—

għall-Enosi Epangelmation Asfaliston Ellados (EEAE), is-Syllogos Asfalistikon Praktoron N. Attikis (SPATE), il-Panellinios Syllogos Asfalistikon Symvoulon (PSAS), is-Syndesmos Ellinon Mesiton Asfaliseon (SEMA) u l-Panellinios Syndesmos Syntoniston Asfalistikon Symvoulon (PSSAS), minn A. K. Sinis, dikigoros,

—

għall-Ypourgos Anaptyxis, minn N. Amiralis, bħala aġent,

—

għall-Omospondia Asfalistikon Syllogon Ellados, minn C. Theodorou u C. Synodinos, dikigoroi,

—

għall-Gvern Grieg, minn M. Germani u F. Dedousi, kif ukoll minn G. Karipsiades u N. Amiralis, bħala aġenti,

—

għall-Gvern Belġjan, minn M. Jacobs u L. Van den Broeck, bħala aġenti,

—

għall-Gvern Ċiprijott, minn N. Kyriakou, bħala aġent,

—

għall-Gvern Awstrijak, minn C. Pesendorfer, bħala aġent,

—

għall-Kummissjoni Ewropea, minn I. Zervas u K.-Ph. Wojcik kif ukoll minn N. Yerrell, bħala aġenti,

1

It-talba għal deċiżjoni preliminari tirrigwarda l-interpretazzjoni tat-tieni subparagrafu tal-Artikolu 2(3) tad-Direttiva 2002/92/KE tal-Parlament Ewropew u tal-Kunsill, tad-9 ta’ Diċembru 2002, dwar il-medjazzjoni fl-assigurazzjoni (ĠU Edizzjoni Speċjali bil-Malti, Kapitolu 6, Vol. 4, p. 330).

2

Din it-talba tressqet fil-kuntest ta’ kawża bejn diversi assoċjazzjonijiet professjonali fil-qasam tal-medjazzjoni fl-assigurazzjoni, jiġifieri l-Enosi Epangelmation Asfaliston Ellados (EEAE) (l-Unjoni tal-Professjonisti tal-Assigurazzjoni tal-Greċja), is-Syllogos Asfalistikon Praktoron N. Attikis (SPATE) (l-Assoċjazzjoni tal-Aġenti tal-Assigurazzjoni tad-Dipartiment ta’ Attique), il-Panellinios Syllogos Asfalistikon Symvoulon (PSAS) (l-Assoċjazzjoni panellenika tal-Konsulenti tal-Assigurazzjoni), is-Syndesmos Ellinon Mesiton Asfaliseon (SEMA) (l-Unjoni Ellenika tas-Sensara tal-Assigurazzjoni) u l-Panellinios Syndesmos Syntoniston Asfalistikon Symvoulon (PSSAS) (l-Unjoni panellenika tal-Koordinaturi tal-Konsulenti tal-Assigurazzjoni, iktar ’il quddiem flimkien l-“EEAE et”) u l-Ypourgos Anaptyxis (Ministru tal-Iżvilupp) u l-Omospondia Asfalistikon Syllogon Ellados (il‑Federazzjoni tal-Assoċjazzjonijiet tal-Assiguraturi tal-Greċja), dwar rikors intiż għall-annullament parzjali tad-digriet tas-Segretarju tal-Istat għall-Iżvilupp Nru°K3‑8010 tat-8 ta’ Awwissu 2007, li jiddetermina l –kundizzjonijiet sabiex jiġu ċċertifikati l-esperjenza, l-abbiltajiet u l-konoxxenzi ġenerali, kummerċjali u professjonali tal-intermedjarji tal-assigurazzjoni.

3

Il-premessi 6 u 9 tad-Direttiva 2002/92 huma fformulati kif ġej:

4

L-Artikolu 1(1) tad-Direttiva 2002/92 jipprovdi li:

“Din id-Direttiva tippreskrivi r-regoli għall-bidu u l-insegwiment ta’ l-attivitajiet ta’ medjazzjoni fl-assigurazzjoni u riassigurazzjoni minn persuni naturali jew ġuridiċi li huma stabbiliti fi Stat Membru jew li jixtiequ li jkunu stabbiliti hemmhekk.”

5

Skont l-Artikolu 2(3)u (5) tad-Direttiva 2002/29:

“Għall-iskopijiet ta’ din id-Direttiva, għandhom japplikaw id-definizzjonijiet li ġejjin:

[…]

Dawn l-attivitajiet meta mw[e]ttqa minn impriża ta’ assigurazzjoni jew impjegat ta’ impriża ta’ assigurazzjonili jaġixxi taħt ir-responsabbiltà ta’ impriża ta’ assigurazzjoni m’għandhomx jitqiesu bħala medjazzjoni fl-assigurazzjoni.

[…]

6

L-Artikolu 4(1) ta’ din id-direttiva jipprovdi li:

“L-intermedjarji ta’ assigurazzjoni u riassigurazzjoni għandhom ikunu jippossjedu l-għerf u l-abbiltà adattati kif stabbilit mill-pajjiz ta’ l-Istat Membru ta’ l-intermedjarju.

Il-pajjiżi ta’ l-Istati Membri jistgħu jaġġustaw il-kondizzjonijiet meħtieġa fir-rigward ta’ l-għerf u l-abbiltà b’konformità ma’ l-attività ta’ medjazzjoni fl-assigurazzjoni jew riassigurazzjoni u l-prodotti mqassma, partikolarment jekk l-attività prinċipali professjonali ta’ l-intermedjarju tkun oħra minbarra medjazzjoni fl-assigurazzjoni. F’dawk il-każi, intermedjarju jista’ jsegwi attività ta’ medjazzjoni fl-assigurazzjoni biss jekk intermedjarju ta’ assigurazzjoni li jikkonforma mal-kondizzjonijiet ta’ dan l-Artikolu jew impriża ta’ assigurazzjoni tassumi responsabbiltà sħiħa għall-azzjonijiet tiegħu.

[…]

L-Istati Membri mhux meħtieġa li japplikaw il-ħtiġiet imsemmija fl-ewwel subparagrafu ta’ dan il-paragrafu għall-persuni naturali kollha li jaħdmu f’impriża li ssegwi l-attività ta’ medjazzjoni fl-assigurazzjoni u riassigurazzjoni. L-Istati Membri għandhom jassiguraw li proporzjon raġonevoli ta’ persuni fi ħdan l-istruttura ta’ amministrazzjoni ta’ dawn l-impriżi li huma responsabbli għall-medjazzjoni fir-rigward ta’ prosotti ta’ assigurazzjoni u l-persuni l-oħra kollha direttament involuti f’medjazzjoni fl-assigurazzjoni jew riassigurazzjoni juri l-għerf u l-abbiltà meħtieġa għat-twettieq tad-dmirijiet tagħhom.”

7

L-Artikolu 12 tal-imsemmija direttiva jelenka l-informazzjoni li intermedjarju ta’ assigurazzjoni għandu jipprovdi lill-klijent qabel il-konklużjoni tal-ewwel kuntratt ta’ assigurazzjoni u, jekk ikun neċessarju, meta dan il-kuntratt jiġi emendat jew jiġġedded, bħall-identità u l-indirizz tiegħu, ir-reġistru li jkun ġie inkluż fih u l-mezzi għall-verifika li jkun ġie rreġistrat, kif ukoll kwalunkwe holding, dirett jew indirett, li jirrappreżenta iktar minn 10 % tad-drittijiet ta’ vot jew tal-kapital ta’ impriża ta’ assigurazzjoni speċifika li huwa jkollu.

8

Id-dispożizzjonijiet tad-Direttiva 2002/92 ġew trasposti fid-dritt Grieg permezz tad-Digriet Presidenzjali 190/2006 li fl-ewwel u t-tieni subparagrafu tal-Artikolu 2(3) tiegħu jipprovdi:

“‘Medjazzjoni fl-assigurazzjoni’ tfisser kull attività li tippreżenta, tipproponi jew tipprovdi xogħlijiet preparatorji għall-konklużjoni ta’ kuntratti ta’ assigurazzjoni, jew li tikkonkludi tali kuntratti, jew li tipprovdi għajnuna fl-amministrazzjoni jew fit-twettiq ta’ dawk il-kuntratti, b’mod partikolari fil-każ ta’ dannu.

Dawn l-attivitajiet ma jitqisux bħala medjazzjoni fl-assigurazzjoni meta jitwettqu minn impriża ta’ assigurazzjoni jew minn impjegat ta’ impriża ta’ assigurazzjoni li huwa marbut magħha permezz ta’ kuntratt ta’ impjieg u li jaġixxi taħt ir-responsabbiltà tagħha [...]”.

9

L-Artikolu 4 tad-Digriet Presidenzjali 190/2006 jelenka d-dokumenti li għandhom jiġu ppreżentati minn kull persuna li tixtieq tiġi rreġistrata fir-reġistru speċjali bħala intermedjarju tal-assigurazzjoni jew tar-riassigurazzjoni. Skont il-paragrafu 1 A (e) tal-imsemmi Artikolu, sabiex issir tali reġistrazzjoni għandhom jiġu ppreżentati, fost oħrajn, “dokumenti li jiċċertifikaw li [l-persuna kkonċernata] għandha konoxxenzi ġenerali, kummerċjali jew professjonali”.

10

Id-Digriet Presidenzjali 190/2006 ġie emendat bil-Liġi 3557/2007.

11

L-Artikolu 15(2) tal-Liġi 3557/2007 żied inċiż ġdid mat-tieni subparagrafu tal-Artikolu 2(3) tad-Digriet Presidenzjali 190/2006, li jipprovdi kif ġej:

“Bħala deroga, kull [impjegat] ta’ impriża ta’ assigurazzjoni, imsemmi fl-inċiż preċedenti, jista’ jwettaq atti ta’ medjazzjoni fl-assigurazzjoni mingħajr ma jkun suġġett għad-dispożizzjonijiet ta’ dan id-digriet, sakemm id-dħul annwali gross tiegħu li joriġina minn dawn l-atti ma jkunx jeċċedi s-somma totali ta’ EUR ħamest elef (5000)”.

12

L-Artikolu 11(3)(b) tal-Liġi 3557/2007 jipprovdi, għal dak li jirrigwarda d-dokumenti msemmija fl-Artikolu 4 tad-Digriet Presidenzjali 190/2006:

“Digriet tal-Ministru tal-Iżvilupp, adottat fi 30 jum mill-pubblikazzjoni tal-imsemmija liġi, kellu jistabbilixxi d-dokumenti li jattestaw il-konoxxenzi ġenerali, kummerċjali jew professjonali tal-persuni li japplikaw sabiex ikunu intermedjarji fl-assigurazzjoni jew fir-riassigurazzjoni, intermedjarji marbuta fl-assigurazzjoni jew riassigurazzjoni, [impjegati] ta’ impriża ta’ assigurazzjoni, ta’ impriża ta’ medjazzjoni fl-assigurazzjoni jew fir-riassigurazzjoni, kif ukoll il-każijiet li fihom dawn il-persuni huma obbligati jkollhom taħriġ addizzjonali.”

13

Id-Digriet Nru°K3‑8010, tat-8 ta’ Awwissu 2007 ġie adottat abbażi tal-Artikolu 11(3)(b) tal-Liġi Nru 3357/2007.

14

Il-paragrafu XI tal-imsemmi digriet jipprovdi li:

“Kull [impjegat] ta’ impriża ta’ assigurazzjoni jista’ jwettaq atti ta’ medjazzjoni fl-assigurazzjoni mingħajr ma jkun obbligat jirreġistra ruħu mal-kamra professjonali kompetenti, sakemm id-dħul annwali gross tiegħu, li joriġina minn dawn l-atti, bħala kummissjonijiet, ma jeċċedix is-somma totali ta’ EUR ħamest elef (5000).

Jekk id-dħul annwali tiegħu li joriġina minn dawn l-atti jaqbeż l-ammont imsemmi, huwa obbligat jirreġistra ruħu mal-kamra professjonali kompetenti, skont il-kundizzjonijiet applikabbli għall-kategorija ta’ intermedjarji fl-assigurazzjoni li fiha huwa jagħżel li jirreġistra ruħu.

Il-kwalità [ta’ impjegat] fil-qasam tal-assigurazzjoni hija inkompatibbli ma’ dik ta’ konsulent tal-assigurazzjoni.”

15

L-EEAE et huma assoċjazzjonijiet professjonali li għandhom bħala għan li jiddefendu l-interessi professjonali u finanzjarji tal-membri tagħhom, li huma attivi fil-medjazzjoni fl-assigurazzjoni bħala professjonisti. Fid-29 ta’ Ottubru 2007, l-EEAE et ippreżentaw quddiem il-qorti tar-rinviju rikors għall-annullament parzjali tad-Digriet Nru K3‑8010 tat-8 ta’ Awwissu 2007. Permezz ta’ dan ir-rikors, huma jsostnu b’mod partikolari li l-paragrafu XI ta’ dan id-digriet ma huwiex konformi mad-dispożizzjonijiet tad-Direttiva 2002/92, sa fejn jippermetti, taħt ċerti kundizzjonijiet, lill-impjegati ta’ impriżi ta’ assigurazzjoni li jwettqu atti ta’ medjazzjoni fl-assigurazzjoni mingħajr ma jkollhom il-kwalifiki meħtieġa mill-Artikolu 4(1) tal-imsemmija direttiva.

16

Il-qorti tar-rinviju għandha dubji dwar il-fondatezza tar-rikors għall-annullament tal-paragrafu XI tad-Digriet Nru K3-8010 tat-8 ta’ Awwissu 2007. Fil-fatt, skont l-imsemmija qorti, peress li l-qafas leġiżlattiv Grieg, interpretat skont id-Direttiva 2002/92, jippermetti li jiġi żgurat li l-impjegat ta’ impriża ta’ assigurazzjoni, li jeżerċita okkażjonalment attivitajiet ta’ medjazzjoni, jaġixxi dejjem, għall-finijiet ta’ dawn l-attivitajiet, taħt ir-responsabbiltà u s-sorveljanza tal-impriża li tagħtih ukoll it-taħriġ neċessarju, ir-rekwiżiti li jinsabu fid-dispożizzjonijiet ta’ din id-direttiva għandhom jitqiesu bħala sodisfatti, indipendentement mir-rabta li teżisti bejn l-impjegat inkwistjoni u l-impriża tiegħu meta huwa jeżerċita l-imsemmija attività.

17

Madankollu, peress li awla oħra tal-imsemmija qorti tidher li ma taqbilx ma’ din il-pożizzjoni, is-Symvoulio tis Epikrateias iddeċidiet li tissospendi l-proċeduri u li tagħmel lill-Qorti tal-Ġustizzja d-domanda preliminari li ġejja:

“Id-dispożizzjonijiet tat-tieni subparagrafu tal-Artikolu 2(3) tad-Direttiva 2002/92/KE [...] għandhom jiġu interpretati fis-sens li persuna impjegata ta’ impriża ta’ assigurazzjoni li ma għandhiex il-kwalifiki previsti fl-Artikolu 4(1) [ta’ din id-] Direttiva tista’ teżerċita attivitajiet ta’ medjazzjoni fl-assigurazzjoni, okkażjonalment u mhux fil-kuntest tal-attività professjonali prinċipali tagħha, anki jekk ma taġixxix fil-kuntest tar-rabta ta’ subordinazzjoni li torbotha ma’ din l-impriża, filwaqt li huwa ppreċiżat li, f’kull ipoteżi, din l-impriża teżerċita sorveljanza fuq l-attivitajiet tagħha, jew għandu jiġi kkunsidrat li [din id-] direttiva tawtorizza tali attività biss meta hija tiġi effettwata fil-kuntest tar-rabta ta’ subordinazzjoni?”

18

Permezz tad-domanda tagħha, il-qorti tar-rinviju essenzjalment tistaqsi jekk id-dispożizzjonijiet moqrija flimkien tat-tieni subparagrafu tal-Artikolu 2(3) u l-Artikolu 4(1) tad-Direttiva 2002/92 għandhomx jiġu interpretati fis-sens li huma jipprekludu li impjegat ta’ impriża ta’ assigurazzjoni li ma għandux il-kwalifiki previsti f’din id-dispożizzjoni tal-aħħar jeżerċita, okkażjonalment u mhux fil-kuntest tal-attività professjonali prinċipali tiegħu, attivitajiet ta’ medjazzjoni fl-assigurazzjoni, meta dan l-impjegat ma jaġixxix fil-kuntest tar-relazzjoni ta’ subordinazzjoni li torbtu ma’ din l-impriża, iżda din tal-aħħar tissorvelja madankollu l-attivitajiet tiegħu.

19

EEAE et kif ukoll il-Gvern Belġjan u Awstrijak jikkunsidraw li t-tieni subparagrafu tal-Artikolu 2(3) tad-Direttiva 2002/92 għandu jiġi interpretat fis-sens li impjegat ta’ impriża ta’ assigurazzjoni li ma għandux il-kwalifiki previsti fl-Artikolu 4(1) tal-imsemmija direttiva ma jistax jeżerċita okkażjonalment attivitajiet ta’ medjazzjoni fl-assigurazzjoni. L-Omospondia Asfalistikon Syllogon Ellados kif ukoll il-Gvern Grieg u Ċiprijott, min-naħa l-oħra, isostnu, li tali impjegat jista’ jeżerċita tali attivitajiet. Il-Kummissjoni Ewropea, min-naħa tagħha, issostni li t-tieni subparagrafu tal-Artikolu 2(3) ikopri attivitajiet eżerċitati minn impjegat ta’ impriża ta’ assigurazzjoni li jaġixxi taħt ir-responsabbiltà tagħha, indipendentement mit-tip ta’ kuntratt li jorbtu ma’ din l-impriża.

20

Preliminarjament, għandu jitfakkar li mit-tieni subparagrafu tal-Artikolu 2(3) tad-Direttiva 2002/92 jirriżulta li attivitajiet, li skont l-ewwel subparagrafu ta’ din id-dispożizzjoni jkunu kklassifikati bħala medjazzjoni fl-assigurazzjoni, ma humiex meqjusa bħala tali meta huma eżerċitati minn impriża ta’ assigurazzjoni jew impjegat ta’ impriża ta’ assigurazzjoni li jaġixxi taħt ir-responsabbiltà tagħha.

21

Sabiex tiġi evalwata l-portata tal-esklużjoni prevista minn din id-dispożizzjoni, għandu jitfakkar li, skont ġurisprudenza stabbilita, għall-interpretazzjoni ta’ dispożizzjoni tad-dritt tal-Unjoni, ma għandhomx jiġu kkunsidrati biss kliemha iżda wkoll il-kuntest tagħha u l-għanijiet imfittxija mil-leġiżlazzjoni li tagħha hija tagħmel parti (ara s-sentenza tad-19 ta’ Lulju 2012, A, C‑33/11, punt 27 u l-ġurisprudenza ċċitata).

22

Għal dak li jirrigwarda l-kliem użat mit-tieni subparagrafu tal-Artikolu 2(3), għandu jiġi kkonstatat li l-attivitajiet ta’ impjegat ta’ impriża ta’ assigurazzjoni ma humiex esklużi mill-kamp ta’ applikazzjoni tad-Direttiva 2002/92 ħlief meta dan “jaġixxi taħt ir-responsabbiltà” ta’ din l-impriża.

23

Il-kelmiet “jaġixxi taħt ir-responsabbiltà” ta’ impriża ta’ assigurazzjoni, użati minn din id-dispożizzjoni, jippresupponu mhux biss li din l-impriża tista’ tkun marbuta minn atti ta’ dawn l-impjegati, li jaġixxu, kif jippreċiża l-Avukat Ġenerali fil-punt 45 tal-konklużjonijiet tiegħu, għal u għan-nom ta’ din, iżda jfissru wkoll li din tal-aħħar tista’ titqies responsabbli mill-attivitajiet tagħhom.

24

Meta l-impjegat ta’ impriża ta’ assigurazzjoni jwettaq attivitajiet ta’ medjazzjoni fl-assigurazzjoni barra mir-relazzjoni ta’ subordinazzjoni li torbtu ma’ din l-impriża huwa għandu, fil-prinċipju, jitqies bħala li mhux qed jaġixxi taħt ir-responsabbiltà ta’ din l-impriża u, għaldaqstant, li qed jaġixxi huwa stess bħala intermedjarju ta’ assigurazzjoni fis-sens tal-Artikolu 2(5) tad-Direttiva 2002/92, bil-konsegwenza li għandu jissodisfa r-rekwiżiti msemmija fl-Artikolu 4 ta’ din id-direttiva. Il-fatt li l-impriża ta’ assigurazzjoni teżerċita ċerta sorveljanza fuq l-attivitajiet tiegħu ma huwiex biżżejjed sabiex l-imsemmi intermedjarju jiġi eżentat mill-obbligu li jissodisfa l-imsemmija rekwiżiti professjonali previsti mill-imsemmija direttiva.

25

Din l-interpretazzjoni ma toħroġx biss mill-kliem tad-Direttiva 2002/92, iżda tikkonforma wkoll kemm mal-għan tat-tieni subparagrafu tal-Artikolu 2(3) tagħha, kif ukoll mal-għanijiet tal-imsemmija direttiva meħudha b’mod globali.

26

Għal dak li jikkonċerna l-għan tat-tieni subparagrafu tal-Artikolu 2(3), għandu jiġi kkonstatat li ma huwiex intiż li jeskludi mill-kamp ta’ applikazzjoni ta’ din id-direttiva ħlief l-attivitajiet ta’ assigurazzjoni li fihom is-servizzi huma offerti u mibjugħa lill-klijenti direttament mill-impriża ta’ assigurazzjoni jew mill-impjegati tagħha u mhux dawk li fihom l-imsemmija servizzi huma offerti permezz ta’ medjazzjoni.

27

Għal dak li jirrigwarda l-għan tad-Direttiva 2002/92 meħuda fil-globalità tagħha, għandu jiġi enfasizzat li din tal-aħħar għandha, kif huwa provdut fil-premessi 6 sa 8 tagħha, għan doppju, jiġifieri, minn naħa, il-kompletezza u l-funzjonament tajjeb tas-suq uniku tal-assigurazzjoni, permezz tal-eliminazzjoni tal-ostakoli għal-libertà ta’ stabbiliment u għal-libertà li jiġu provduti servizzi u, min-naħa l-oħra, it-titjib tal-protezzjoni tal-konsumaturi f’dan il-qasam.

28

Interpretazzjoni li tippermetti lil ċertu kategorija ta’ persuni joffru servizzi ta’ medjazzjoni, minkejja li huma ma jissodisfawx il-kundizzjonijiet previst fl-Artikolu 4(1) tad-Direttiva 2002/92 biex jagħmlu dan, tippreġudika lil dan l-għan doppju.

29

Minn naħa, jekk tingħata tali interpretazzjoni tad-Direttiva 2002/92 din toħloq differenzi notevoli bejn l-intermedjarji li jaġixxu fis-suq uniku tal-assigurazzjoni, inkwantu l-intermedjarji sew jekk jissodisfaw dawn il-kundizzjonijiet u sew jekk le, jistgħu jwettqu attivitajiet ta’ medjazzjoni għall-istess tipi ta’ kuntratti ta’ assigurazzjoni. Barra minn hekk, din l-interpretazzjoni tmur kontra l-għan li tiġi żgurata, kif jirriżulta mill-premessa 9 tad-Direttiva 2002/92, l-ugwaljanza fit-trattament bejn il-kategoriji kollha ta’ intermedjarji ta’ assigurazzjoni.

30

Min-naħa l-oħra, tali interpretazzjoni ma tippermettix li jiġi żgurat livell għoli ta’ protezzjoni tal-konsumaturi fis-suq tal-assigurazzjoni, jiġifieri, tal-persuni assigurati. Fil-fatt, ma huwiex possibbli li jitqies li l-impjegati ta’ impriża ta’ assigurazzjoni li jieħdu ħsieb il-bejgħ dirett tas-servizzi ta’ assigurazzjoni fi ħdan din l-impriża għandhom, fi kwalunkwe każ, il-konoxxenzi u l-abbiltajiet xierqa li huma neċessarji sabiex iwettqu, fuq bażi individwali, il-medjazzjoni fl-assigurazzjoni u li jistgħu, għaldaqstant, jiggarantixxu l-kwalità ta’ tali medjazzjoni. Lanqas ma jista’ jiġi preżunt li tali impjegati huma f’pożizzjoni, mingħajr ma jkollhom dawn il-konoxxenzi u dawn l-abbiltajiet, li jipprovdu lill-klijenti tagħhom, meta jiġi konkluż, emendat jew imġedded il-kuntratt ta’ assigurazzjoni ta’ dawn tal-aħħar, l-informazzjoni prevista fl-Artikolu 12 tad-Direttiva 2002/92.

31

Fl-aħħar nett, bil-kontra ta’ dak li sostna l-Gvern Grieg waqt is-seduta, tali interpretazzjoni ma hijiex imminata mill-kontenut tar-raba’ subparagrafu tal-Artikolu 4(1) ta’ din id-direttiva. Għalkemm huwa minnu li din id-dispożizzjoni tipprovdi li l-Istati Membri ma humiex obbligati japplikaw ir-rekwiżiti professjonali għall-persuni fiżiċi kollha li jaħdmu għal impriża u li jeżerċitaw attività ta’ medjazzjoni fl-assigurazzjoni, xorta jibqa’ l-fatt li l-imsemmija dispożizzjoni tirregola s-sitwazzjoni tal-impriżi li jwettqu huma stess il-medjazzjoni fl-assigurazzjoni u mhux impriżi ta’ assigurazzjoni li jbigħu direttament servizzi ta’ assigurazzjoni.

32

Mill-kunsiderazzjonijiet kollha preċedenti jirriżulta li r-risposta għad-domanda għandha tkun li d-dispożizzjonijiet moqrjia flimkien tat-tieni subparagrafu tal-Artikolu 2(3) u tal-Artikolu 4(1) tad-Direttiva 2002/92 għandhom jiġu interpretati fis-sens li huma jipprekludu li impjegat ta’ impriża ta’ assigurazzjoni li ma għandux il-kwalifiki previsti f’din id-dispożizzjoni tal-aħħar jeżerċita, okkażjonalment u mhux fil-kuntest tal-attività professjonali prinċipali tiegħu, attivitajiet ta’ medjazzjoni fl-assigurazzjoni, meta dan l-impjegat ma jaġixxix fil-kuntest tar-relazzjoni ta’ subordinazzjoni li torbtu ma’ din l-impriża, iżda din tal-aħħar tissorvelja madankollu l-attivitajiet tiegħu.

33

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, il-Qorti tal-Ġustizzja (It-Tielet Awla) taqta’ u tiddeċiedi:

Id-dispożizzjonijiet moqrjia flimkien tat-tieni subparagrafu tal-Artikolu 2(3) u tal-Artikolu 4(1) tad-Direttiva 2002/92/KE tal-Parlament Ewropew u tal-Kunsill, tad-9 ta’ Diċembru 2002, dwar il-medjazzjoni fl-assigurazzjoni għandhom jiġu interpretati fis-sens li huma jipprekludu li impjegat ta’ impriża ta’ assigurazzjoni li ma għandux il-kwalifiki previsti f’din id-dispożizzjoni tal-aħħar jeżerċita, okkażjonalment u mhux fil-kuntest tal-attività professjonali prinċipali tiegħu, attivitajiet ta’ medjazzjoni fl-assigurazzjoni, meta dan l-impjegat ma jaġixxix fil-kuntest tar-relazzjoni ta’ subordinazzjoni li torbtu ma’ din l-impriża, iżda din tal-aħħar tissorvelja madankollu l-attivitajiet tiegħu.