—

għall-Asociación para la Calidad de los Forjados (Ascafor) u l-Asociación de Importadores y Distribuidores de Acero para la Construcción (Asidac), minn A. Vázquez Guillén, prokuratur, assistit minn J. M. Sala Arquer, avukat,

—

għal Calidad Siderúrgica SL, minn M. del Valle Gili Ruiz, prokuratur, assistita minn C. L. Rubio Soler, avukat,

—

għall-Asociación Española de Normalización y Certificación (AENOR), minn L. Cazorla González-Serrano, avukat,

—

għall-Asociación de Investigación de las Industrias de la Construcción (Aidico) Instituto Tecnológico de la Construcción, minn C Tejada Marcelino, prokuratur, assistita minn A. Albert Mora, avukat,

—

għall-Asociación Nacional Española de Fabricantes de Hormigón Preparado (Anefhop), minn C. Hidalgo Senén u E. Hidalgo Martínez, prokuraturi,

—

għall-Asociación de Aceros Corrugados Reglamentarios y su Tecnología y Calidad (Acerteq), minn R. Martínez Solís, avukat,

—

għall-Gvern Spanjol, minn S. Centeno Huerta u B. Plaza Cruz, bħala aġenti,

—

għall-Gvern Olandiż, minn C. M. Wissels, bħala aġent,

—

għall-Kummissjoni Ewropea, minn L. Banciella u G. Zavvos kif ukoll minn A. Alcover San Pedro, bħala aġenti,

1

It-talba għal deċiżjoni preliminari hija dwar l-interpretazzjoni tal-Artikolu 34 TFUE u tal-Artikolu 36 TFUE.

2

Din it-talba tressqet fil-kuntest tal-kawża bejn, minn naħa, l-Asociación para la Calidad de los Forjados (Ascafor) u l-Asociación de Importadores y Distribuidores de Acero para la Construcción (Asidac) u, min-naħa l-oħra, l-Administración del Estado, Calidad Siderúrgica SL, il-Colegio de Ingenieros Técnicos Industriales, l-Asociación Española de Normalización y Certificación (AENOR), il-Consejo General de Colegios Oficiales de Aparejadores y Arquitectos Técnicos, l-Asociación de Investigación de las Industrias de la Construcción (Aidico) Instituto Tecnológico de la Construcción, l-Asociación Nacional Española de Fabricantes de Hormigón Preparado (Anefhop), Ferrovial Agromán SA, l-Agrupación de Fabricantes de Cemento de España (Oficemen) u l-Asociación de Aceros Corrugados Reglamentarios y su Tecnología y Calidad (Acerteq), dwar talba għall-annullament tad-Digriet Irjali 1247/2008, tat-18 ta’ Lulju 2008, li japprova l-Kodiċi dwar il-konkrit strutturali (EHE-08) (BOE Nru 203, tat-22 ta’ Awwissu 2008, p. 35176).

3

Id-Direttiva tal-Kunsill 89/106/KEE, tal-21 ta’ Diċembru 1989, dwar l-approssimazzjoni ta’ liġijiet, regolamenti u dispożizzjonijiet amministrattivi tal-Istati Membri dwar il-prodotti għall-bini (ĠU Edizzjoni Speċjali bil-Malti, Kapitolu 13, Vol. 9, p. 296), kif emendata bid-Direttiva tal-Kunsill 93/68/KEE, tat-22 ta’ Lulju 1993 (ĠU Edizzjoni Speċjali bil-Malti, Kapitolu 13, Vol. 12, p. 173, iktar ’il quddiem “id-Direttiva 89/106”) tapplika, skont l-Artikolu 1(1) tagħha, għall-“prodotti għal bini [kostruzzjoni]”.

4

L-Artikolu 6(2) ta’ din id-direttiva jiddikjara:

“L-Istati Membri, iżda, għandhom iħallu li prodotti mhux koperti b’Artiklu 4(2) jitqiegħdu fis-suq fit-territorju tagħhom jekk jissodisfaw id-dispożizzjonijiet nazzjonali konsistenti mat-Trattat sakemm ma jingħatax lok mod ieħor mill-ispeċifikazzjonijiet tekniċi Ewropej li għalihom jirreferi l-Kapitoli II u III […]”

5

Skont it-termini tal-Artikolu 16 tal-imsemmija direttiva:

“1.   Fin-nuqqas ta’ speċifikazzjonijiet tekniċi, kif imfissra f’Artikolu 4, għal kull prodott imsemmi, l-Istat Membru destinatarju għandu, b’talba f’każijiet individwali, iqis il-prodott li għandu jkun [iqis il-prodott bħala] konformi mad-dispożizzjonijiet nazzjonali li hemm fis-seħħ jekk dawn issodisfawx [dan il-prodott ikun issodisfa] it-testijiet u l-ispezzjonijiet imwettqa minn korp [organu] approvat fl-Istat Membru produttur skond il-metodi fis-seħħ fl-Istat Membru destinatarju jew magħruf [meqjusa] bħala ekwivalenti minn dak l-Istat Membru.

2.   L-Istat Membru produttur għandu jgħarraf lill-Istat Membru destinatarju, [li] bi konformità mad-dispożizzjonijiet tiegħu għandhom isiru t-testijiet u l-ispezzjonijiet, tal-korp li beħsiebu japprova għal dan il-għan. L-Istat Membru destinatarju u l-Istat Membru produttur għandhom jagħtu lil xulxin l-informazzjoni kollha meħtieġa. Meta jintemm dan l-iskambju ta’ informazzjoni l-Istat Membru produttur għandhom japprovaw [għandu japprova] l-korp għalhekk nominat. Jekk Stat Membru jkollu xi nuqqas ta’ fiduċja, huwa għandu jiġġustifika l-pożizzjoni tiegħu u jgħarraf lill-Kummissjoni.

3.   L-Istati Membri għandhom jiżguraw li l-korpi [organi] nominati jistgħu jagħtu lil xulxin l-għajnuna kollha meħtieġa.

4.   F’każ li Stat Membru jistabbilixxi li korp approvat mhux qed iwettaq it-testijiet u l-ispezzjonijiet kif suppost bi konformità mad-dispożizzjonijiet nazzjonali, hu għandu jgħarraf lill-Istat Membru li fih hu approvat il-korp minnufih. Dak l-Istat Membru għandu jgħarraf lill-Istat Membru li jkun qed jagħmel in-notifika fi żmien stipulat raġonevoli dwar l-azzjoni li ttieħdet. Jekk l-Istat Membru li jkun qed jagħmel in-notifika ma jarax li l-azzjoni li ttieħdet tkun biżżejjed, hu jista’ jipprojbixxi t-tqegħid fis-suq u l-użu tal-prodott imsemmi jew jesponih għal kundizzjonijiet speċjali. Hu għandu jgħarraf lill-Istati Membri l-oħra u lill-Kummissjoni dwar dan”.

6

L-Artikolu 17 tal-istess direttiva jiddikjara:

“L-Istati Membri destinatarji għandhom jagħtu l-istess valur lir-rapporti u ċertifikati ta’ konformità maħruġa fl-Istat Membru produttur bi konformità mal-proċedura li għaliha jirreferi l-Artikolu 16, kif jagħmlu għad-dokumenti nazzjonali korrispondenti tagħhom.”

7

Fil-Kapitolu VII tad-Direttiva 89/106 intitolat “Korpi [Organi] approvati” jinsab l-Artikolu 18(2), li jiddikjara:

“Il-korpi ta’ ċertifikazzjoni, il-korpi li jispezzjonaw u l-laboratorji li jittestjaw għandhom ikunu jaqblu mal-kriterji stabbiliti f’Anness IV.”

8

L-Anness IV tad-Direttiva 89/106 jindika l-kundizzjonijiet minimi li għandhom jissodisfaw il-korpi ta’ ċertifikazzjoni, il-korpi li jispezzjonaw u l-laboratorji li jittestjaw sabiex jiġu approvati skont din id-direttiva.

9

Il-Kodiċi dwar il-konkrit stutturali (EHE-08), approvat bid-Digriet Irjali 1247/2008 (iktar ’il quddiem il-“Kodiċi dwar il-konkrit”), jippreskrivi l-ispeċifikazzjonijiet tekniċi li l-prodotti magħmulin mill-konkrit għandhom jissodisfaw sabiex ikunu jistgħu jiġu użati fi Spanja fis-settur tal-kostruzzjoni.

10

Dan il-kodiċi jippreskrivi wkoll il-metodi ta’ spezzjoni tal-ispeċifikazzjonijiet tekniċi li għandhom jiġu sodisfatti.

11

Fir-rigward tal-qafas tal-azzar, l-Artikolu 87 tal-Kodiċi dwar il-konkrit jipprovdi għal żewġ possibbiltajiet li permezz tagħhom tkun tista’ tingħata evidenza dwar il-konformità tal-prodotti mal-ispeċifikazzjonijiet tekniċi.

12

Minn naħa, ikun stabbilit li l-qafas tal-azzar huwa konformi mal-istandards ta’ kwalità u ta’ sigurtà jekk ikollu tikketta ta’ kwalità li hija rikonoxxuta uffiċjalment inkonformità mal-Anness 19 ta’ dan il-kodiċi.

13

Min-naħa l-oħra, fin-nuqqas ta’ tikketta ta’ kwalità rikonoxxuta, il-konformità mal-imsemmija speċifikazzjonijiet tkun ikkonstatata billi jitwettqu testijiet u eżamijiet kull meta tiġi aċċettata kunsinna ta’ qafas tal-azzar.

14

Għal dak li jirrigwarda l-qafas tal-azzar li ġej minn Stat Membru ieħor li ma huwiex ir-Renju ta’ Spanja, l-Artikolu 4.1 tal-Kodiċi dwar il-konkrit jipprovdi:

“Il-prodotti għall-kostruzzjoni mmanifatturati jew ikkummerċjalizzati legalment fl-Istati Membri tal-Unjoni Ewropea […] jistgħu, fil-kamp ta’ applikazzjoni ta’ dan il-kodiċi, jintużaw sakemm ikunu konformi mal-leġiżlazzjoni ta’ dawn l-Istati u sakemm jiggarantixxu, fl-użu li għalih huma intiżi, livell ta’ sigurtà li huwa ekwivalenti għal dak meħtieġ minn dan il-kodiċi.

Dan il-livell ta’ ekwivalenza għandu jingħata inkonformità mad-dispożizzjonijiet tal-Artikolu 4.2 jew, skont il-każ, mal-Artikolu 16 tad-Direttiva 89/106/KEE […]

[…]

It-tikketti ta’ kwalità volontarji li jiffaċilitaw l-osservanza tar-rekwiżiti ta’ dan il-kodiċi jistgħu jiġu rikonoxxuti mill-amministrazzjonijiet pubbliċi kompetenti fil-qasam tal-kostruzzjoni tal-Istati Membri kollha fiż-Żona Ekonomika Ewropea u jistgħu jagħmlu referenza għall-abbozz tal-istruttura, għall-prodotti, għall-proċessi għall-kostruzzjoni tagħha jew għat-teħid inkunsiderazzjoni ta’ kriterji ambjentali.”

15

L-Artikolu 81 ta’ dan il-kodiċi, intitolat “Livell ta’ garanzija u tikketti ta’ kwalità”, jipprovdi:

“Il-konformità tal-prodotti u tal-proċessi ta’ eżekuzzjoni mar-rekwiżiti bażiċi ddefiniti minn dan il-kodiċi teħtieġ li dawn jissodisfaw grupp ta’ speċifikazzjonijiet b’livell ta’ garanzija suffiċjenti.

Huwa dejjem possibbli [għall-Istati ta’ produzzjoni] li joħolqu għall-prodotti u għall-proċessi [tagħhom] livell ta’ garanzija superjuri għal dak minimu meħtieġ billi jistabbilixxu sistemi (bħal, pereżempju, it-tikketti ta’ kwalità) li jiċċertifikaw, permezz ta’ spezzjonijiet, verifiki u testijiet korrispondenti, li s-sistemi ta’ kwalità [tagħhom] u l-ispezzjonijiet ta’ produzzjoni [tagħhom] jissodisfaw ir-rekwiżiti meħtieġa għall-għoti ta’ dawn it-tikketti.

Livelli simili ta’ garanziji addizzjonali u superjuri għal dawk minimi rikjesti mil-liġi jistgħu jiġu pprovati:

Dan il-kodiċi jipprovdi għall-applikazzjoni ta’ ċerti kriterji partikolari fir-rigward tal-aċċettazzjoni ta’ kunsinna ta’ dawn il-prodotti u proċessi li jippreżentaw livell ta’ garanzija superjuri attestat permezz ta’ waħda miż-żewġ proċeduri msemmija fil-paragrafu preċedenti.

L-ispezzjoni tal-aċċettazzjoni ta’ kunsinna tista’ tieħu inkunsiderazzjoni garanziji assoċjati mal-pussess ta’ tikketta sakemm din tissodisfa ċerti kriterji. Din l-ispezzjoni tippermetti li jiġu applikati kriterji partikolari għall-aċċettazzjoni kemm tal-proċessi ta’ eżekuzzjoni kif ukoll tal-prodotti li d-Direttiva 89/106/KEE teżonera mill-obbligu li jkollhom il-marka KE meta dawn il-proċessi jew prodotti jkollhom tikketta ta’ kwalità mwaħħla fil-kuntest ta’ proċedura volontarja li tkun rikonoxxuta uffiċjalment minn ċentru amministrattiv kompetenti fil-qasam tal-kostruzzjoni u tax-xogħlijiet pubbliċi li jkun jagħmel parti mill-amministrazzjoni pubblika ta’ Stat Membru tal-Unjoni Ewopea jew ta’ wieħed mill-Istati li ffirmaw il-Ftehim dwar iż-Żona Ekonomika Ewropea.

Ir-regola stabbilita fil-paragrafu preċedenti tapplika wkoll għall-prodotti għall-kostruzzjoni mmanifatturati jew ikkummerċjalizzati legalment fi Stat li kkonkluda ftehim ta’ assoċjazzjoni doganali mal-Unjoni Ewropea meta dan il-ftehim jirriżerva għal dawn il-prodotti l-istess trattament bħal dak li huwa rriżervat għall-prodotti mmanifatturati jew ikkummerċjalizzati fi Stat Membru tal-Unjoni Ewropea. F’dan il-każ, il-livell ta’ ekwivalenza għandu jkun stabbilit skont il-proċeduri previsti mid-Direttiva 89/106/KEE.

Għall-finijiet ta’ konformità mar-rekwiżiti bażiċi imposti minn dan il-kodiċi, it-tikketti ta’ kwalità għandhom jissodisfaw il-kundizzjonijiet għar-rikonoxximent uffiċjali stabbiliti mill-Anness Nru 19

[…]”

16

L-Anness Nru 19 tal-Kodiċi dwar il-konkrit, intitolat “Livelli ta’ garanzija u kundizzjonijiet għar-rikonoxximent uffiċjali tat-tikketti”, jistabbilixxi, b’mod partikolari, ir-regoli dwar l-organizzazzjoni u l-funzjonament tal-organi ta’ ċertifikazzjoni kif ukoll is-setgħat tal-amministrazzjoni kompetenti fir-rigward tagħhom.

17

L-Artikolu 1 ta’ dan l-anness jiddisponi:

“Dan il-kodiċi jippermetti lid-Dirección Facultativa tapplika kriterji partikolari għal ċerti prodotti u proċessi meta dawn jippreżentaw livelli ta’ garanzija addizzjonali superjuri għal-livelli minimi rikjesti mil-liġi li jkunu ngħatawlhom fil-kuntest ta’ proċedura volontarja skont l-Artikolu 81.

B’mod ġenerali, dawn il-livelli ta’ garanzija addizzjonali għandhom jiġu pprovati permezz tat-twaħħil ta’ tikketta ta’ kwalità rikonoxxuta uffiċjalment mill-amministrazzjoni kompetenti fil-qasam tal-kostruzzjoni ta’ Stat Membru tal-Unjoni Ewopea, ta’ wieħed mill-Istati li ffirmaw il-Ftehim dwar iż-Żona Ekonomika Ewropea jew ta’ Stat li kkonkluda mal-Unjoni Ewropea ftehim dwar it-twettiq ta’ unjoni doganali, f’liema każ il-livell ta’ ekwivalenza għandu jkun stabbilit skont il-proċeduri stabbiliti fid-Direttiva 89/106/KEE.

18

Skont it-termini tal-Artikolu 2 tal-Anness Nru 19 tal-Kodiċi dwar il-konkrit:

“[...] Fil-każ ta’ prodotti jew proċessi li għalihom ma tapplikax il-marka KE, il-livell ta’ garanzija rikjest mil-liġi huwa dak previst minn dan il-kodiċi.

Barra minn hekk, il-produttur ta’ prodott, il-persuna responsabbli għal proċess jew il-bennej jistgħu jagħżlu, fil-kuntest ta’ proċedura volontarja, li titwaħħal tikketta ta’ kwalità li tistabbilixxi livell ta’ garanzija superjuri minn dak minimu previst minn dan il-kodiċi. Fil-każ ta’ prodotti li jkollhom il-marka KE, dawn it-tikketti ta’ kwalità għandhom jipprovdu valur addizzjonali f’termini ta’ karatteristiċi li ma humiex koperti mill-marka KE.

Peress li dawn it-tikketti ta’ kwalità huma ta’ natura volontarja, l-għoti tagħhom jista’ jikkonforma ma’ kriterji differenti u jista’ jsir skont proċeduri partikolari. Dan l-anness jistabbilixxi l-kundizzjonijiet li jippermettu li jiġu distini t-tikketti li jikkonferixxu livell ta’ garanzija addizzjonali meta mqabbla mal-livell rikjest mil-liġi u jistgħu, għalhekk, jiġu rikonoxxuti uffiċjalment mill-amministrazzjonijiet kompetenti.”

19

L-Artikolu 3 ta’ dan l-anness huwa mfassal kif ġej:

“L-amministrazzjoni kompetenti li tirrikonoxxi uffiċjalment it-tikketta għandha tivverifika li l-kundizzjonijiet għar-rikonoxximent uffiċjali previsti f’dan l-anness huma sodisfatti u għandha tiżgura li dawn jibqgħu sodisfatti. Sabiex jinkiseb dan il-għan, l-amministrazzjoni tista’, bil-kunfidenzjalità li hija meħtieġa, tintervjeni fl-attivitajiet kollha li hija tikkunsidra xierqa għall-finijiet tar-rikonoxximent tat-tikketti.

[…]”

20

L-Artikolu 4 tal-Anness Nru 19 tal-Kodiċi dwar il-konkrit jipprovdi:

“Sabiex tkun rikonoxxuta uffiċjalment, it-tikketta

Il-leġiżlazzjoni msemmija iktar ’il fuq

21

Il-membri tal-Ascafor huma impriżi li għandhom bħala attività prinċipali l-manufatturazzjoni u l-kummerċjalizzazzjoni tal-qafas tal-azzar għall-konkrit fi Spanja. Il-membri tal-Asidac huma importaturi Spanjoli tal-azzar intiż għall-kostruzzjoni.

22

Dawn l-assoċjazzjonijiet jikkunsidraw li l-Kodiċi dwar il-konkrit u, b’mod partikolari, l-Artikolu 81 u l-Anness Nru 19 ta’ dan il-kodiċi, jirrestrinġu l-possibbiltà tagħhom li jimportaw qafas tal-azzar li ġej minn Stati Membri oħra minbarrar-Renju ta’ Spanja.

23

Il-qorti tar-rinviju tippreċiża li, sabiex il-qafas tal-azzar ikun jista’ jintuża fil-kostruzzjoni fi Spanja, huwa neċessarju li dan ikun konformi ma’ ċertu numru ta’ speċifikazzjonijiet tekniċi.

24

Għalhekk, sabiex jiġi stabbilit li dawn ir-rekwiżiti jiġu sodisfatti, il-Kodiċi dwar il-konkrit jipprovdi għal żewġ possibbiltajiet, jiġifieri jew li l-konformità tal-qafas tal-azzar mal-ispeċifikazzjonijiet tekniċi tiġi kkonstatata b’riżultat tat-testijiet u tal-ispezzjonijiet li jitwettqu meta tiġi aċċettata l-kunsinna ta’ kull lott ta’ dan il-prodott, jew inkella li l-qafas tal-azzar ikollu tikketta ta’ kwalità rikonoxxuta uffiċjalment, jiġifieri li kien ġie kkonfermat li l-produttur osserva l-kundizzjonijiet prekritti minn dan il-kodiċi sa mill-istadju tal-produzzjoni.

25

Il-qorti tar-rinviju tenfasizza li, fl-ewwel każ, it-testijiet u l-ispezzjonijiet ta’ konformità jinvolvu iktar spejjeż u jitħallsu mill-utent finali tal-azzar u mhux mill-produttur tiegħu, bħalma huwa l-każ fil-kuntest tal-proċedura ta’ konformità permezz tal-akkwist ta’ tikketta ta’ kwalità rikonoxxuta uffiċjalment.

26

Minn dan il-qorti tar-rinviju tikkonkludi li l-utenti tal-qafas tal-azzar huma inkuraġġuti sabiex jagħmlu użu mill-prodotti ċċertifikati, jiġifieri dawk il-prodotti li jkollhom tikketta ta’ kwalità rikonoxxuta uffiċjalment, sabiex jevitaw l-inkonvenjenzi u l-ispejjeż konnessi ma’ spezzjoni ta’ konformità li titwettaq meta tiġi aċċettata l-kunsinna ta’ kull lott tal-qafas tal-azzar, b’tali mod li l-produtturi tal-Istati Membri l-oħra minbarra r-Renju ta’ Spanja huwa wkoll inkuraġġuti sabiex jikkummerċjalizzaw il-prodotti tagħhom fis-suq Spanjol permezz ta’ tali tikketta ta’ kwalità rikonoxxuta uffiċjalment mill-awtoritajiet Spanjoli.

27

F’dan id-dawl, filwaqt li tfakkar il-proċedura għar-rikonoxximent tat-tikketti ta’ kwalità tal-Istati Membri l-oħra minbarra r-Renju ta’ Spanja kif prevista fl-Artikolu 81 tal-Kodiċi dwar il-konkrit, moqri flimkien mal-Anness Nru 19 ta’ dan il-kodiċi, il-qorti tar-rinviju tesprimi dubji rigward il-kompatibbiltà mal-Artikolu 34 TFUE u mal-Artikolu 36 TFUE tal-kundizzjonijiet enumerati li l-organi ta’ ċertifikazzjoni ta’ dawn l-Istati Membri għandhom jissodisfaw sabiex iċ-ċertifikati ta’ kwalità li jingħataw minnhom ikunu rikonoxxuti uffiċjalment fi Spanja.

28

Huwa f’dawn iċ-ċirkustanzi li t-Tribunal Supremo ddeċieda li jissospendi l-proċeduri quddiemu u li jagħmel lill-Qorti tal-Ġustizzja d-domanda preliminari li ġejja:

“Id-dispożizzjonijiet eżawrjenti li jinsabu fl-Anness 19 tad-Digriet Irjali Nru 1247/08, tat-18 ta’ Lulju [2008], flimkien mal-Artikolu 81 tiegħu, dwar ir-rikonoxximent uffiċjali taċ-ċertifikati ta’ kwalità, jistgħu jiġu kkunsidrati li huma eċċessivi u sproporzjonati meta mqabbla mal-għan intiż, u għalhekk jikkostitwixxu restrizzjoni mhux ġustifikata li tirrendi r-rikonoxximent tal-ekwivalenza taċ-ċertifikati iktar diffiċli, barra milli jikkostitwixxu ostakolu jew restrizzjoni għall-kummerċjalizzazzjoni tal-prodotti importati li tmur kontra l-Artikoli [34 TFUE] u [36 TFUE]?”

29

Calidad Siderúrgica SL, l-Aidico Instituto Tecnológico de la Construcción u l-Acerteq jeċepixxu l-inammissibbiltà tad-domanda preliminari.

30

Minn naħa, huma jsostnu li l-qorti tar-rinviju qegħdha fir-realtà titlob lill-Qorti tal-Ġustizzja sabiex tiddeċiedi dwar il-mertu tal-kawża billi tinterpreta d-dritt nazzjonali. Konsegwentement, din tal-aħħar għandha tiddikjara li ma għandhiex ġurisdizzjoni.

31

Min-naħa l-oħra, id-domanda hija fformulata b’termini ipotetiċi u fittizji, sa fejn il-qorti tar-rinviju ma indikatx liema mir-rekwiżiti preskritti mil-leġiżlazzjoni nazzjonali inkwistjoni huma sproporzjonati meta mqabbla mal-għan intiż minn din il-leġiżlazzjoni.

32

Qabel kollox, għandu jitfakkar li l-proċedura prevista fl-Artikolu 267 TFUE hija bbażata fuq separazzjoni distinta tal-funzjonijiet bejn il-qrati nazzjonali u l-Qorti tal-Ġustizzja. Hija biss il-qorti nazzjonali, li tkun adita bil-kawża u li jkollha tassumi r-responsabbiltà għad-deċiżjoni ġudizzjarja eventwali, li għandha tevalwa, fid-dawl tal-karatteristiċi partikolari tal-kawża, kemm in-neċessità ta’ deċiżjoni preliminari sabiex tkun tista’ tagħti d-deċiżjoni tagħha kif ukoll ir-rilevanza tad-domandi li hija tagħmel lill-Qorti tal-Ġustizzja. Konsegwentement, sa fejn id-domanda magħmula tirrigwarda l-interpretazzjoni tad-dritt tal-Unjoni, il-Qorti tal-Ġustizzja hija, bħala prinċipju, obbligata li tiddeċiedi (ara s-sentenzi tal-5 ta’ Ottubru 2006, Nádasdi u Németh, C-290/05 u C-333/05, Ġabra p. I-10115, punt 28, kif ukoll tas-16 ta’ Diċembru 2008, Michaniki, C-213/07, Ġabra p. I-9999, punt 32).

33

Madankollu, il-Qorti tal-Ġustizzja ma għandhiex, fil-kuntest ta’ proċedura għal deċiżjoni preliminari, tevalwa l-konformità ta’ leġiżlazzjoni nazzjonali mad-dritt tal-Unjoni u lanqas ma għandha tinterpreta l-liġijiet jew ir-regolamenti nazzjonali (ara, b’mod partikolari, is-sentenzi tad-9 ta’ Settembru 2003, Jaeger, C-151/02, Ġabra p. I-8389, punt 43; tal-31 ta’ Jannar 2008, Centro Europa 7, C-380/05, Ġabra p. I-349, punt 49; digrieti tas-17 ta’ Settembru 2009, Investitionsbank Sachsen-Anhalt, C-404/08 u C-409/08, punt 25, kif ukoll tat-13 ta’ Jannar 2010, Calestani u Lunardi, C-292/09 u C-293/09, punt 15).

34

Madankollu, il-Qorti tal-Ġustizzja kemm-il darba ddeċidiet li hija għandha l-ġurisdizzjoni sabiex tagħti lill-qorti tar-rinviju l-elementi ta’ interpretazzjoni kollha li jikkonċernaw lid-dritt tal-Unjoni u li jistgħu jippermettulha tevalwa tali konformità għall-finijiet tad-deċiżjoni fil-kawża li jkollha quddiemha (ara, b’mod partikolari, is-sentenzi tal-15 ta’ Diċembru 1993, Hünermund et, C-292/92, Ġabra p. I-6787, punt 8; Centro Europa 7, iċċitata iktar ’il fuq, punt 50, kif ukoll id-digriet Calestani u Lunardi, iċċitat iktar ’il fuq, punt 16).

35

Fil-każ ineżami, minn naħa, id-domanda preliminari tirrigwarda b’mod espliċitu l-interpretazzjoni tal-Artikoli 34 TFUE u 36 TFUE, sa fejn il-qorti tar-rinviju għandha dubji dwar il-kompatibbiltà tal-leġiżlazzjoni nazzjonali inkwistjoni mal-imsemmija artikoli.

36

Min-naħa l-oħra, għalkemm huwa minnu li dik il-qorti ma indikatx liema mir-rekwiżiti preskritti mil-leġiżlazzjoni nazzjonali inkwistjoni fir-rigward tal-organi ta’ ċertifikazzjoni jistgħu jmorru lil hinn minn dak li huwa neċessarju għall-kisba tal-għan mixtieq, għandu jiġi enfasizzat li d-dubji tal-imsemmija qorti jirrigwardaw in-natura eżawrjenti tar-rekwiżiti preskritti u mhux rekwiżit wieħed b’mod partikolari.

37

Għalhekk, huwa preċiżament f’dan il-kuntest li huwa xieraq li tingħata risposta utli għall-qorti tar-rinviju.

38

Preliminarjament, għandu jitfakkar li d-Direttiva 89/106 għandha bħala għan prinċipali li tneħħi l-ostakoli għall-kummerċ billi toħloq kundizzjonijiet li permezz tagħhom il-prodotti għall-kostruzzjoni jkunu jistgħu jiġu kkummerċjalizzati b’mod liberu fi ħdan l-Unjoni. Għal dan il-għan, din id-direttiva tippreċiża r-rekwiżiti essenzjali li għandhom jissodisfaw il-prodotti għall-kostruzzjoni u li għandhom jiġu implementati permezz ta’ normi armonizzati u normi nazzjonali ta’ traspożizzjoni, permezz ta’ ftehim tekniċi Ewropej kif ukoll permezz ta’ speċifikazzjonijiet tekniċi nazzjonali rikonoxxuti fuq livell tal-Unjoni (ara, f’dan is-sens, is-sentenza tat-13 ta’ Marzu 2008, Il-Kummissjoni vs Il-Belġju, C-227/06, punt 31).

39

Huwa paċifiku li l-qafas tal-azzar għall-konkrit huwa “prodott għall-bini [kostruzzjoni]” fis-sens tad-Direttiva 89/106, li la huwa s-suġġett ta’ norma armonizzata jew ta’ ftehim tekniku Ewropew u lanqas ta’ speċifikazzjoni teknika nazzjonali rikonoxxuta fuq livell tal-Unjoni fis-sens tal-Artikolu 4(2) ta’ din id-direttiva.

40

Issa, fir-rigward ta’ prodott għall-kostruzzjoni li ma huwiex kopert mill-Artikolu 4(2) tad-Direttiva 89/106, l-Artikolu 6(2) ta’ din id-direttiva jiddisponi li l-Istati Membri għandhom jawtorizzaw it-tqegħid fis-suq ta’ dan il-prodott fit-territorju tagħhom jekk jissodisfa dispożizzjonijiet nazzjonali li jkunu konformi mat-Trattat, u dan sakemm l-ispeċifikazzjonijiet tekniċi Ewropej ma jipprovdux mod ieħor (ara, f’dan is-sens, is-sentenza Il-Kummissjoni vs Il-Belġju, iċċitata iktar ’il fuq, punt 33).

41

Kif jirriżulta mid-deċiżjoni tar-rinviju, skont il-leġiżlazzjoni Spanjola, jeżistu żewġ possibbiltajiet dwar kif tista’ tiġi attestata l-konformità tal-qafas tal-azzar għall-konkrit mal-istandards ta’ sigurtà u ta’ kwalità tal-industrija Spanjola, jiġifieri permezz ta’ testijiet u ta’ spezzjonijiet li jitwettqu meta tiġi aċċettata l-kunsinna ta’ lott tal-azzar fis-sit tal-kostruzzjoni, jew permezz tal-preżentazzjoni ta’ tikketta ta’ kwalità li permezz tagħha jista’ jiġi preżunt li l-produttur tal-azzar issodisfa speċifikazzjonijiet tekniċi superjuri.

42

Ir-rikorrenti fil-kawża prinċipali, filwaqt li kkonfermaw l-evalwazzjoni tal-qorti tar-rinviju, enfasizzaw li l-ewwel għażla tinvolvi żieda fl-ispejjeż għall-ispezzjoni, bil-Gvern Spanjol jenfasizza, minn tal-inqas, li l-ispezzjonijiet, f’dan il-kuntest, ikunu iktar intensivi u li l-ispejjeż assoċjati magħhom ikunu sostnuti mill-utenti finali.

43

F’dawn iċ-ċirkustanzi, it-tieni possibbiltà dwar kif tista’ tiġi attestata l-konformità tal-qafas tal-azzar għandha, fi Spanja, importanza partikolari, sa fejn l-utenti finali huma inkuraġġuti ekonomikament sabiex jużaw il-qafas tal-azzar li jkun iċċertifikat permezz ta’ tikketta ta’ kwalità.

44

F’dan ir-rigward, għandu jiġi nnotat li l-Artikolu 81 tal-Kodiċi dwar il-konkrit jipprevedi proċedura għar-rikonoxximent tat-tikketti ta’ kwalità maħruġa mill-organi tal-Istati Membri l-oħra minbarra r-Renju ta’ Spanja lill-qafas tal-azzar li kien ġie mmanifatturat hemmhekk. Dan l-artikolu jiddisponi, b’mod partikolari, li sabiex tkun rikonoxxuta uffiċjalment, it-tikketta ta’ kwalità maħruġa fi Stat Membru għandha tissodisfa l-kundizzjonijiet stabbiliti fl-Anness Nru 19 ta’ dan il-kodiċi.

45

Dan l-anness fih, minn naħa, il-kundizzjonijiet sostantivi li l-qafas tal-azzar għandu jissodisfa u, min-naħa l-oħra, ir-rekwiżiti proċedurali u formali rigward l-għoti tat-tikketta ta’ kwalità.

46

B’mod partikolari, l-Artikolu 4 tal-Anness Nru 19 tal-Kodiċi dwar il-konkrit jippreskrivi r-rekwiżiti li għandhom jiġu sodisfatti mill-organi ta’ ċertifikazzjoni tal-Istati Membri l-oħra minbarra r-Renju ta’ Spanja sabiex it-tikketti ta’ kwalità maħruġa minnhom ikunu rikonoxxuti uffiċjalment fi Spanja.

47

F’dan il-kuntest, għandu jitfakkar li, skont l-Artikolu 16(1) tad-Direttiva 89/106, applikabbli għall-prodotti għall-kostruzzjoni li l-ispeċifikazzjonijiet tekniċi tagħhom ma ġewx armonizzati, l-Istat Membru destinatarju għandu jikkunsidra dawn il-prodotti bħala li huma konformi mad-dispożizzjonijiet nazzjonali fis-seħħ jekk jissodisfaw it-testijiet u l-ispezzjonijiet li jsiru fl-Istat Membru prodottur minn organu approvat skont il-metodi li huma fis-seħħ fl-Istat Membru destinatarju jew li huwa rikonoxxut bħala ekwivalenti minn dan tal-aħħar.

48

F’dan ir-rigward, l-Anness IV ta’ din id-direttiva jistabbilixxi l-kundizzjonijiet minimi neċessarji li organi ta’ ċertifikazzjoni, l-organi li jispezzjonaw u l-laboratorji li jittestjaw għandhom jissodisfaw sabiex jiġu approvati.

49

Għandu jiġi kkonstatat li r-rekwiżiti preskritti għall-organi ta’ ċertifikazzjoni fl-Artikolu 4 tal-Anness Nru 19 tal-Kodiċi dwar il-konkrit imorru lil hinn minn dawn il-kundizzjonijiet minimi.

50

Issa, huwa paċifiku li Stat Membru ma jistax jissottometti t-tqegħid fis-suq fit-territorju tiegħu ta’ prodott għall-kostruzzjoni, li ma jkunx kopert minn speċifikazzjonijiet tekniċi armonizzati jew rikonoxxuti fuq il-livell tal-Unjoni, ħlief għal dispożizzjonijiet nazzjonali li jkunu konformi mal-obbligi li joħorġu mit-Trattat, b’mod partikolari mal-prinċipju ta’ moviment liberu tal-merkanzija stabbilit fl-Artikolu 34 TFUE u fl-Artikolu 36 TFUE (ara s-sentenza Il-Kummissjoni vs Il-Belġju, iċċitata iktar ’il fuq, punt 34).

51

Għalhekk, għandu jiġi vverifikat jekk, kif isostnu r-rikorrenti fil-kawża prinċipali, l-applikazzjoni eżawrjenti ta’ dawn ir-rekwiżiti għall-organi ta’ ċertifikazzjoni ta’ Stat Membru ieħor minbarra r-Renju ta’ Spanja tikkostitwixxix ostakolu għall-moviment liberu tal-merkanzija.

52

Skont ġurisprudenza stabbilita, kull leġiżlazzjoni kummerċjali tal-Istati Membri li tista’ tostakola, direttament jew indirettament, attwalment jew potenzjalment, il-kummerċ fl-Unjoni għandha tiġi kkunsidrata bħala miżura li għandha effett ekwivalenti għal restrizzjonijiet kwantitattivi fis-sens tal-Artikolu 34 TFUE (ara, b’mod partikolari, is-sentenzi tal-11 ta’ Lulju 1974, Dassonville, 8/74, Ġabra p. 837, punt 5, u tat-2 ta’ Diċembru 2010, Ker-Optika, C-108/09, p. I-12213, punt 47).

53

Minn ġurisprudenza daqstant ieħor stabbilita jirriżulta li l-Artikolu 34 TFUE jirrifletti l-obbligu li jiġu osservati l-prinċipji ta’ nondiskriminazzjoni u ta’ rikonoxximent reċiproku tal-prodotti mmanifatturati u kkummerċjalizzati legalment fi Stati Membri oħra kif ukoll l-obbligu li jiġi żgurat aċċess liberu għas-swieq nazzjonali għall-prodotti tal-Unjoni (ara s-sentenzi tal-10 ta’ Frar 2009, Il-Kummissjoni vs L-Italja, C-110/05, Ġabra p. I-519, punt 34, kif ukoll Ker-Optika, iċċitata iktar ’il fuq, punt 48).

54

Fil-każ ineżami, skont l-Artikolu 4 tal-Anness Nru 19 tal-Kodiċi dwar il-konkrit, l-organi ta’ Stati Membri oħra minbarra r-Renju ta’ Spanja li jagħtu ċ-ċertifikati ta’ kwalità għall-qafas tal-azzar għandhom jissodisfaw it-totalità tal-kundizzjonijiet li huma preskritti f’dan l-anness sabiex l-imsemmija ċertifikati jiġu rikonoxxuti uffiċjalment fi Spanja.

55

L-impożizzjoni tat-totalità ta’ dawn ir-rekwiżiti tista’ twassal għar-rifjut tat-talba għar-rikonoxximent taċ-ċertifikati ta’ kwalità maħruġa fi Stat Membru ieħor minbarra r-Renju ta’ Spanja meta l-organu li joħroġhom ma jissodisfax dawn ir-rekwiżiti kollha, iktar u iktar meta l-Artikolu 4 tal-Anness Nru 19 tal-Kodiċi dwar il-konkrit jippreskrivi kundizzjonijiet iktar estiżi mill-istandards minimi neċessarji previsti fl-Anness IV tad-Direttiva 90/106 li għandhom jiġu sodisfatti mill-organi approvati fis-sens ta’ din id-direttiva.

56

Għalhekk, ir-rekwiżiti inkwistjoni jistgħu jirrestrinġu l-aċċess għas-suq Spanjol tal-qafas tal-azzar immanifatturat u ċċertifikat fi Stat Membru ieħor minbarra r-Renju ta’ Spanja, sa fejn dawn ma humiex neċessarjament sodisfatti minn organu ta’ ċertifikazzjoni tal-Istat ta’ produzzjoni.

57

Peress li l-operaturi ekonomiċi stabbiliti fir-Renju ta’ Spanja huma skuraġġuti milli jimportaw il-qafas tal-azzar prodott fi Stat Membru ieħor, u minkejja li r-rekwiżiti tal-Artikolu 4 tal-Anness Nru 19 tal-Kodiċi dwar il-konkrit japplikaw kemm għall-organi ta’ ċertifikazzjoni tal-Istati Membri l-oħra minbarra r-Renju ta’ Spanja kif ukoll għall-organi ta’ ċertifikazzjoni Spanjoli, il-leġiżlazzjoni nazzjonali inkwistjoni għandha tiġi kkunsidrata bħala miżura li għandha effett ekwivalenti għal restrizzjonijiet kwantitattivi għall-importazzjoni fis-sens tal-Artikolu 34 TFUE.

58

Huwa paċifiku li ostakolu għall-moviment liberu tal-merkanzija jista’ jiġi ġġustifikat minħabba r-raġunijiet ta’ interess ġenerali msemmija fl-Artikolu 36 TFUE jew minħabba rekwiżiti imperattivi. Fiż-żewġ każijiet, il-miżura nazzjonali għandha tkun adegwata sabiex tiggarantixxi li jintlaħaq l-għan mixtieq u ma għandhiex tmur lil hinn minn dak li huwa meħtieġ sabiex jintlaħaq (ara s-sentenza Ker-Optika, iċċitata iktar ’il fuq, punt 57).

59

Fil-każ ineżami, il-Gvern Spanjol jenfasizza li l-leġiżlazzjoni nazzjonali inkwistjoni hija ġġustifikata mill-għan ta’ protezzjoni tas-saħħa u tal-ħajja tal-persuni sa fejn tiggarantixxi s-sigurtà tal-utenti tax-xogħlijiet tal-arti u tal-kostruzzjoni.

60

F’dan ir-rigward, huwa paċifiku li, fl-assenza ta’ regoli ta’ armonizzazzjoni, hija r-responsabbiltà tal-Istati Membri sabiex jiddeċiedu dwar il-livell sa fejn jixtiequ jiżguraw il-protezzjoni tas-saħħa u tal-ħajja tal-persuni u dwar in-neċessità tal-ispezzjoni tal-prodotti kkonċernati meta jkunu qegħdin jintużaw (ara, f’dan is-sens, is-sentenzi tas-27 ta’ Ġunju 1996, Brandsma, C-293/94, Ġabra p. I-3159, punt 11, u tal-10 ta’ Novembru 2005, Il-Kummissjoni vs Il-Portugall, C-432/03, Ġabra p. I-9665, punt 44).

61

F’dan il-kuntest, għandhom jiġu rrilevati d-differenzi li ħarġu waqt is-seduta bejn, minn naħa, il-komprensjoni tas-sistema tat-tikketti ta’ kwalità difiża oralment minn xi wħud mill-partijiet interessati u, min-naħa l-oħra, il-formulazzjoni stess tad-dispożizzjonijiet nazzjonali inkwistjoni kif ukoll l-osservazzjonijiet bil-miktub minn xi wħud minn dawn il-partijiet.

62

F’dan is-sens, l-Artikolu 2 tal-Anness Nru 19 tal-Kodiċi dwar il-konkrit jipprovdi li “[b]arra minn hekk, il-produttur ta’ prodott, il-persuna responsabbli għal proċess jew il-bennej jistgħu jagħżlu, fil-kuntest ta’ proċedura volontarja, li titwaħħal tikketta ta’ kwalità li tistabbilixxi livell ta’ garanzija superjuri minn dak minimu previst minn dan il-kodiċi. [...] Dan l-anness jistabbilixxi l-kundizzjonijiet li jippermettu li jiġu distini t-tikketti li jikkonferixxu livell ta’ garanzija addizzjonali meta mqabbla mal-livell rikjest mil-liġi u jistgħu, għalhekk, jiġu rikonoxxuti uffiċjalment mill-amministrazzjonijiet kompetenti.”. Il-Gvern Spanjol u l-Acerteq sostnew, fl-osservazzjonijiet bil-miktub tagħhom, li t-tikketti ta’ kwalità rikonoxxuti uffiċjalment jippermettu li jiġi pprovat li l-prodott iċċertifikat joffri livell ta’ garanzija iktar għoli jew ħafna iktar għoli minn dak li huwa normalment rikjest mill-Kodiċi dwar il-konkrit.

63

Jekk il-qorti tar-rinviju taċċetta din il-komprensjoni tas-sistema ta’ tikketti ta’ kwalità fi Spanja, minn dan jirriżulta li t-tikketti ta’ kwalità rikonoxxuti uffiċjalment fi Spanja huma intiżi li jattestaw li l-prodott iċċertifikat jissodisfa rekwiżiti li jmorru lil hinn mill-istandards minimi preskritti mill-Kodiċi dwar il-konkrit sabiex jiggarantixxi s-sigurtà industrijali.

64

F’tali ċirkustanzi, ir-rekwiżiti li l-Anness Nru 19 tal-Kodiċi dwar il-konkrit jimponi fuq l-organi li joħorġu t-tikketti ta’ kwalità kif ukoll fuq il-proċeduri li għandhom jiġu segwiti għar-rikonoxximent uffiċjali ta’ tali tikketti fi Spanja jmorru lil hinn minn dak li huwa neċessarju sabiex tiġi attestata l-konformità tal-qafas tal-azzar mal-istandards minimi li jiggarantixxu l-protezzjoni tal-ħajja u tas-saħħa tal-persuni. Għaldaqstant, tali għan ma jistax jiġġustifika l-ostakolu għall-moviment liberu tal-merkanzija li tirriżulta mil-leġiżlazzjoni nazzjonali inkwistjoni.

65

Għall-kuntrarju, uħud mill-partijiet interessati sostnew, waqt is-seduta, li s-sistema Spanjola tat-tikketti ta’ kwalità twassal sabiex tinħoloq, favur il-prodott iċċertifikat, preżunzjoni ta’ konformità mal-istandards minimi stabbiliti mill-Kodiċi dwar il-konkrit.

66

Hija l-qorti tar-rinviju li għandha tiddetermina liema waħda minn dawn iż-żewġ interpretazzjonijiet tad-dritt nazzjonali hija rilevanti. Fil-każ li hija tagħżel l-interpretazzjoni difiża mill-partijiet waqt is-seduta quddiem il-Qorti tal-Ġustizzja, ikun meħtieġ li ssir distinzjoni bejn, minn naħa, iċ-ċertifikati ta’ kwalità maħruġa fl-Istati Membri l-oħra minbarra r-Renju ta’ Spanja minn organi approvati fis-sens tad-Direttiva 89/106 u, min-naħa l-oħra, dawk maħruġa minn entitajiet distini.

67

Għalhekk, f’dan l-aħħar każ, ikun kompletament leġittimu għal Stat Membru, fid-dawl tal-għan li jiġu żgurati s-saħħa u l-ħajja tal-persuni, li jiżgura li l-organu li ħareġ ċertifikat ta’ kwalità jkun jissodisfa rekwiżiti rigward l-attività ta’ spezzjoni tiegħu, bħalma huma dawk previsti fl-Anness Nru 19 tal-Kodiċi dwar il-konkrit.

68

Fir-rigward taċ-ċertifikati ta’ kwalità maħruġa, fl-Istati Membri l-oħra minbarra r-Renju ta’ Spanja, minn organi approvati fis-sens tad-Direttiva 89/106, il-Qorti tal-Ġustizzja diġà ddeċidiet li l-mekkaniżmi għar-rikonoxximent tal-ekwivalenza ta’ dawn iċ-ċertifikati jeżiġu attitudni attiva min-naħa tal-organu nazzjonali li ssirlu talba għal rikonoxximent. Tali attitudni attiva hija imposta barra minn hekk, jekk ikun il-każ, anki fuq l-organu li joħroġ tali ċertifikat, u l-Istati Membri għandhom jiżguraw li l-organi approvati u kompetenti jikkooperaw b’mod reċiproku, sabiex jiffaċilitaw il-proċeduri li għandhom jiġu segwiti sabiex jinkiseb aċċess għas-suq tal-Istat Membru ta’ importazzjoni (ara, f’dan is-sens, is-sentenza Il-Kummissjoni vs Il-Portugall, iċċitata iktar ’il fuq, punt 47).

69

L-Artikolu 16 tad-Direttiva 89/106 jenfasizza barra minn hekk, fil-paragrafi 2 u 3 tiegħu, l-importanza ta’ tali kooperazzjoni.

70

F’dawn iċ-ċirkustanzi, għandu jiġi kkonstatat li, fid-dawl ta’ tali kooperazzjoni kif ukoll tal-prinċipju ta’ rikonoxximent reċiproku kif imfakkar fil-punt 53 ta’ din is-sentenza, ċerti rekwiżiti preskritti fl-Artikolu 4 tal-Anness Nru 19 tal-Kodiċi dwar il-konkrit jistgħu jmorru lil hinn minn dak li huwa neċessarju sabiex tiġi żgurata l-osservanza tal-istandards minimi previsti mill-Kodiċi tal-konkrit li jiggarantixxu l-protezzjoni tal-ħajja u tas-saħħa tal-persuni, kwistjoni din li għandha tiġi evalwata mill-qorti tar-rinviju fil-kawża prinċipali.

71

Għaldqastant, ir-risposta li għandha tingħata għad-domanda magħmula hija li l-Artikolu 34 TFUE u l-Artikolu 36 TFUE għandhom jiġu interpretati fis-sens li r-rekwiżiti preskritti fl-Artikolu 81 tal-Kodiċi dwar il-konkrit, moqri flimkien mal-Anness Nru 19 ta’ dan il-kodiċi, sabiex ikun aċċettat ir-rikonoxximent uffiċjali taċ-ċertifikati li jagħtu prova tal-livell ta’ kwalità tal-qafas tal-azzar għall-konkrit maħruġa fi Stat Membru ieħor minbarra r-Renju ta’ Spanja, jikkostitwixxu ostakolu għall-moviment liberu tal-merkanzija. Tali ostakolu jista’ jiġi ġġustifikat permezz tal-għan ta’ protezzjoni tas-saħħa u tal-ħajja tal-persuni sakemm ir-rekwiżiti preskritti ma jkunux superjuri għall-istandards minimi rikjesti għall-użu tal-qafas tal-azzar għall-konkrit fi Spanja. F’dan il-każ, hija l-qorti tar-rinviju li għandha tivverifika, fil-każ li l-organu li joħroġ iċ-ċertifikat ta’ kwalità li għandu jkun is-suġġett ta’ rikonoxximent uffiċjali fi Spanja jkollu l-kwalità ta’ organu approvat fis-sens tad-Direttiva 89/106, liema minn dawn ir-rekwiżiti jmorru lil hinn minn dak li huwa neċessarju għat-twettiq tal-għan ta’ protezzjoni tas-saħħa u tal-ħajja tal-persuni.

72

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, minbarra dawk tal-imsemmija partijiet, ma jistgħux jitħallsu lura.

Għal dawn il-motivi,

Il-Qorti tal-Ġustizzja (Il-Ħames Awla)

taqta’ u tiddeċiedi:

L-Artikolu 34 TFUE u l-Artikolu 36 TFUE għandhom jiġu interpretati fis-sens li r-rekwiżiti preskritti fl-Artikolu 81 tal-Kodiċi dwar il-konkrit (EHE-08) approvat bid-Digriet Irjali 1247/08, tat-18 ta’ Lulju 2008, moqri flimkien mal-Anness Nru 19 ta’ dan il-kodiċi, sabiex ikun aċċettat ir-rikonoxximent uffiċjali taċ-ċertifikati li jagħtu prova tal-livell ta’ kwalità tal-qafas tal-azzar għall-konkrit maħruġa fi Stat Membru ieħor minbarra r-Renju ta’ Spanja, jikkostitwixxu ostakolu għall-moviment liberu tal-merkanzija. Tali ostakolu jista’ jiġi ġġustifikat permezz tal-għan ta’ protezzjoni tas-saħħa u tal-ħajja tal-persuni sakemm ir-rekwiżiti preskritti ma jkunux superjuri għall-istandards minimi rikjesti għall-użu tal-qafas tal-azzar għall-konkrit fi Spanja. F’dan il-każ, hija l-qorti tar-rinviju li għandha tivverifika, fil-każ li l-organu li joħroġ iċ-ċertifikat ta’ kwalità li għandu jkun is-suġġett ta’ rikonoxximent uffiċjali fi Spanja jkollu l-kwalità ta’ organu approvat fis-sens tad-Direttiva tal-Kunsill 89/106/KEE, tal-21 ta’ Diċembru 1989, dwar l-approssimazzjoni ta’ liġijiet, regolamenti u dispożizzjonijiet amministrattivi tal-Istati Membri dwar il-prodotti għall-bini, kif emendata bid-Direttiva tal-Kunsill 93/68/KEE, tat-22 ta’ Lulju 1993, liema minn dawn ir-rekwiżiti jmorru lil hinn minn dak li huwa neċessarju għat-twettiq tal-għan ta’ protezzjoni tas-saħħa u tal-ħajja tal-persuni.