EUR-Lex Access to European Union law
This document is an excerpt from the EUR-Lex website
Document 62008TN0457
Case T-457/08: Action brought on 10 October 2008 — Intel v Commission
Kawża T-457/08: Rikors ippreżentat fl- 10 ta' Ottubru 2008 — Intel vs Il-Kummissjoni
Kawża T-457/08: Rikors ippreżentat fl- 10 ta' Ottubru 2008 — Intel vs Il-Kummissjoni
ĠU C 301, 22.11.2008, p. 60–60
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
|
22.11.2008 |
MT |
Il-Ġurnal Uffiċjali ta’ l-Unjoni Ewropea |
C 301/60 |
Rikors ippreżentat fl-10 ta' Ottubru 2008 — Intel vs Il-Kummissjoni
(Kawża T-457/08)
(2008/C 301/99)
Lingwa tal-kawża: L-Ingliż
Partijiet
Rikorrenti: Intel (Wilmington, l-Istati Uniti) (rappreżentanti: N. Green QC, K. Bacon, Barrister)
Konvenuti: Il-Kummissjoni tal-Komunitajiet Ewropej
Talbiet tar-rikorrenti
|
— |
tannulla d-deċiżjonijiet; |
|
— |
testendi t-terminu sabiex tiġi ppreżentata r-risposta ta' Intel għad-Dikjarazzjoni Supplimentari tal-Oġġezzjonijiet (DSO) għal perjodu ta' 30 ġurnata mid-data li fiha Intel tingħata aċċess għad-dokumenti rilevanti ta' min iressaq l-ilment; |
|
— |
tikkundanna l-Kummissjoni għall-ispejjeż ta' Intel. |
Motivi u argumenti prinċipali
Permezz ta' dan ir-rikors, ir-rikorrenti titlob l-annullament, skont l-Artikolu 230 KE, tad-deċiżjoni adottata mill-Uffiċjal tas-Seduta fil-15 ta' Settembru 2008 meħuda skont l-Artikolu 10 tad-Deċiżjoni tal-Kummissjoni 2001/462/KE (1) fil-każ KOMP/C-3/37.990 — Intel dwar proċediment skont l-Artikolu 82 KE, kif ukoll deċiżjoni mill-Kummissarju fis-6 ta' Ottubru 2008 jew viċin din id-data. Id-deċiżjonijiet ikkontestati jirrigwardaw ir-rifjut mill-Kummissjoni li tikseb, b'mod partikolari minn min iressaq l-ilment f'din il-kawża, ċerti provi dokumentarji li r-rikorrenti tiddikjara li huma direttament rilevanti għall-allegazzjonijiet magħmula mill-Kummissjoni fid-DSO. L-Uffiċjal tas-Seduta ċaħad ukoll l-argument ta' Intel li hija ma tistax tirrispondi adegwatament għad-DSO mingħajr ma jkollha dawn id-dokumenti, u rrifjuta li jestendi b'iktar it-terminu ta' Intel sabiex tippreżenta r-risposta tagħha quddiem id-DSO.
Ir-rikorrenti tressaq żewġ motivi in sostenn tat-talbiet tagħha.
L-ewwel nett, ir-rikorrenti ssostni li d-deċiżjonijiet għandhom żbalji ta' liġi u hija ssostni li t-terminu stabbilit għat-tweġiba tagħha quddiem id-DSSO ma jistax jibda jiddekorri sakemm il-fajl ikun materjalment komplet; fil-każ kuntrarju l-impriża ma tistax effettivament teżerċita effettivament id-drittijiet tagħha ta' difiża.
It-tieni nett, ir-rikorrenti ssostni li d-deċiżjonijiet kkontestati huma manifestament illegali peress li jippermettu lill-Kummissjoni tkompli b'investigazzjoni li hija diskriminatorja u parzjali, u li tipprevjeni lir-rikorrenti milli teżerċita d-drittijiet tagħha ta' difiża. Ir-rikorrenti issostni li dan jikkostitwixxi ksur tal-prinċipju ta' amministrazzjoni tajba, li jeżiġi li l-Kummissjoni tadotta d-deċiżjoni tagħha abbażi tal-informazzjoni fattwali u legali kollha li jista' jkollha effett fuq l-eżitu.
(1) Deċiżjoni tal-Kummissjoni tat-23 ta' Mejju 2001 dwar it-termini ta' riferenza tal-Uffiċjali tas-Seduta f'ċerti proċedimenti ta' kompetizzjoni, ĠU L 162, p. 21.