Rikors ippreżentat fit-18 ta' April 2007 — Areva et vs Il-Kummissjoni

(Kawża T-117/07)

(2007/C 140/49)

Lingwa tal-kawża: Il-Franċiż

Partijiet

Rikorrenti: AREVA SA, AREVA T&D HOLDING SA, AREVA T&D SA (Pariġi, Franza) u AREVA T&D AG (Oberentfelden, l-Isvizzera) (rappreżentanti: A. Schild, Rechtsanwältin, u J.-M. Cot, avocat)

Konvenuta: Il-Kummissjoni tal-Komunitajiet Ewropej

Talbiet tar-rikorrent(i)

Motivi u argumenti prinċipali

Permezz ta' dan ir-rikors, ir-rikorrenti jitolbu l-annullament parzjali tad-Deċiżjoni tal-Kummissjoni C(2006) 6762 finali ta' l-24 ta' Jannar 2007, dwar proċedura għall-applikazzjoni ta' l-Artikolu 81 KE u ta' l-Artikolu 53 ŻEE (każ COMP/F/38.899 — (gas insulated switchgear), dwar akkordju fil-qasam ta' proġetti li jirrigwardaw gas insulated switchgear li wassal għall-manipulazzjoni tas-sejħa għall-offerti dwar dawn il-proġetti, l-iffissar tal-prezz minimu ta' l-offerta, l-għoti ta' kwoti u ta' proġetti u ta' skambju ta' informazzjoni. Sussidjarjament, ir-rikorrenti jitolbu t-tnaqqis tal-multa imposta fuqhom mid-deċiżjoni kkontestata.

In sostenn ta' l-allegazzjonijiet tagħhom, ir-rikorrenti jqajmu seba' motivi.

L-ewwel motiv jirriżulta mill-ksur mill-Kummissjoni ta' l-obbligu ta' motivazzjoni prevista mill-Artikolu 253 KE billi l-motivazzjoni kienet kontradittorja u insuffiċjenti f'dak li jikkonċerna l-elementi dwar b'mod partikolari l-attribuzzjoni tal-prattiki antikompetittivi, il-kundanna in solidum ma' ALSTOM SA u ż-żieda ta' l-ammont ta' bażi tal-multa imposta minħabba fir-rwol ta' AREVA T&D SA bħala mexxej tal-ksur.

Permezz tat-tieni motiv, ir-rikorrenti jakkużaw lill-Kummissjoni li kisret l-Artikolu 81 KE u, b'mod partikolari, ir-regoli ġuridiċi dwar l-attribuzzjoni tar-responsabbiltà ta' ksur, meta kkunsidrat AREVA T&D SA, AREVA T&D AG responsabbli tal-prattiċi antikompetittivi qabel it-trasferiment tagħhom minn ALSTOM SA, billi ddeċidiet li dawn il-kumpanniji ma kinux indipendenti minn ALSTOM SA qabel it-trasferiment tagħhom.

It-tielet motiv invokat mir-rikorrenti huwa l-ksur ta' l-Artikolu 81 KE billi l-Kummissjoni attribwiet lil AREVA SA u AREVA T&D HOLDING SA prattiċi antikompetittivi attribwiti lill-kumpanniji sussidjarji tagħha diretti jew indiretti AREVA T&D SA u AREVA T&D AG, meta, skond ir-rikorrenti, ma werietx li AREVA SA u AREVA T&D HOLDING SA kienu effettivament jikkontrollaw dawn il-kumpanniji sussidjarji matul il-perijodu tal-ksur.

Ir-raba u l-ħames motivi jirriżultaw mill-ksur ta' l-Artikoli 7 u 81 KE, b'mod partikolari, tar-regoli dwar ir-responsabbiltà in solidum tal-ksur. Ir-rikorrenti jqisu li l-Kummissjoni ma tistax tikkundanna in solidum AREVA T&D SA u ALSTOM SA billi dawn ma jifformawx unità ekonomika u li kundanna in solidum bħal din tikkostitwixxi delegazzjoni illegali tal-poter tal-Kummissjoni li tippenalizza kif ukoll ksur tal-prinċipju ġenerali ta' trattament ugwali, ta' ċertezza legali u ta' protezzjoni ġudizzjarja effettiva.

Permezz tas-sitt motiv, il-partijiet jikkontestaw li d-deċiżjoni kkontestata applikat b'mod żbaljat il-kunċett ta' mexxej u li għalhekk tikser l-Artikolu 81 KE kif ukoll il-linji ta' gwida dwar il-metodi tal-kalkoli tal-multi (1) u numru ta' prinċipji ġenerali ta' dritt.

Permezz ta' l-aħħar motiv, ir-rikorrenti jqisu li l-Kummissjoni wettqet żball ta' evalwazzjoni fir-rigward tal-livell ta' kooperazzjoni mogħtija mir-rikorrenti matul il-proċedura ta' investigazzjoni tal-ksur ta' l-Artikolu 81 u tal-linji gwida dwar l-kooperazzjoni mħabbra fl-Avviż dwar l-immunità minn multi u tnaqqis f'multi f'każijiet ta' kartell (2).

(1)  ĠU C 9 ta' l-14.1.1998, p. 3

(2)  ĠU C 45 tad-19.2.2002, p. 3