SENTENZA TAL-QORTI TAL-PRIM’ISTANZA (Is-Seba’ Awla)

15 ta’ Ottubru 2008

Kawża T-160/04

Gerasimos Potamianos

vs

Il-Kummissjoni tal-Komunitajiet Ewropej

“Servizz pubbliku – Membru tal-persunal temporanju – Nuqqas ta’ tiġdid ta’ kuntratt għal żmien determinat”

Suġġett: Rikors li għandu bħala suġġett talba għall-annullament tad-deċiżjoni tal-Awtorità li għandha s-setgħa li tikkonkludi l-kuntratti ta’ reklutaġġ li ma ġġeddidx il-kuntratt tar-rikorrent bħala membru tal-persunal temporanju.

Deċiżjoni: Ir-rikors huwa miċħud. Gerasimos Potamianos u l-Kummissjoni għandhom ibatu l-ispejjeż rispettivi tagħhom.

Sommarju

1.      Uffiċjali – Appell – Ilment amministrattiv minn qabel – Termini – Punt ta’ tluq

(Regolamenti tal-Persunal, Artikolu 90(1))

2.      Uffiċjali – Membri tal-persunal temporanju – Reklutaġġ – Tiġdid ta’ kuntratt għal żmien determinat – Setgħa diskrezzjonali tal-amministrazzjoni

(Kondizzjonijiet tal-impieg ta’ impjegati oħra, Artikolu 8 u l-ewwel paragrafu tal-Artikolu 47)

1.      Għalkemm huwa minnu li normalment kuntratt ikollu effett minn meta dan jiġi ffirmat u, għalhekk, it-terminu għat-tressiq ta’ lment fi żmien utli fis-sens tal-Artikolu 90(1) tar-Regolamenti tal-Persunal huwa kkalkolat mid-data tal-firma, id-deċiżjoni li l-kuntratt ta’ membru tal-persunal temporanju ma jiġġeddidx tikkostitwixxi, madankollu, deċiżjoni distinta mill-kuntratt inkwistjoni u tista’, bħala tali, tkun suġġetta għal ilment, kif ukoll appell, fit-termini stabbiliti mir-Regolamenti tal-Persunal.

(ara l-punt 21)

Referenza: Il-Qorti tal-Prim’Istanza 11 ta’ Lulju 2002, Martinez Paramo et vs Il‑Kummissjoni, T‑137/99 u T‑18/00, ĠabraSP p. I‑A‑119 u II‑639, punt 56

2.      Għalkemm l-Artikolu 8 tal-Kondizzjonijiet tal-impieg ta’ impjegati oħra jipprevedi l-possibbiltà ta’ tiġdid ta’ kuntratt ta’ membru tal-persunal temporanju, dan mhuwiex każ ta’ dritt, iżda sempliċi possibbiltà li taqa’ fid-diskrezzjoni tal-awtorità kompetenti. Fil-fatt, l-Istituzzjonijiet tal-Komunità għandhom setgħa diskrezzjonali wiesgħa fl-organizzazzjoni tad-dipartimenti tagħhom skont il-missjonijiet fdati lilhom u fil-ħatra, għal dan il-għan, tal-persunal li jkollhom għad-dispożizzjoni tagħhom, bil-kundizzjoni, madankollu, li dawn il-ħatriet isiru fl-interess tas-servizz.

(ara l-punt 30)

Referenza: Il-Qorti tal-Ġustizzja 14 ta’ Lulju 1983, Nebe vs Il-Kummissjoni, 176/82, Ġabra p. 2475, punt 18; Il-Qorti tal-Ġustizzja 21 ta’ Ġunju 1984, Lux vs Il-Qorti tal-Awdituri, 69/83, Ġabra p. 2447, punt 17