IL-KUMMISSJONI EWROPEA
Brussell, 25.6.2024
COM(2024) 180 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
dwar il-fond ta' proviżjonament komuni fl-2023
{SWD(2024) 161 final}
This document is an excerpt from the EUR-Lex website
Document 52024DC0180
REPORT FROM THE COMMISSION TO THE EUROPEAN PARLIAMENT AND THE COUNCIL on the common provisioning fund in 2023
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar il-fond ta' proviżjonament komuni fl-2023
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar il-fond ta' proviżjonament komuni fl-2023
COM/2024/180 final
IL-KUMMISSJONI EWROPEA
Brussell, 25.6.2024
COM(2024) 180 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
dwar il-fond ta' proviżjonament komuni fl-2023
{SWD(2024) 161 final}
Werrej
INTRODUZZJONI
Parti 1: Tragwardi ewlenin fl-2023
1.1. Ħarsa ġenerali
1.2. Struttura tal-kompartiment
1.3. Talbiet għal ħlas ta’ garanzija u pretensjonijiet għall-ħlas
1.4. Rata ta’ proviżjonament effettiva
Parti 2: Strateġija ta’ investiment, kompożizzjoni tal-portafoll u prestazzjoni
2.1. Kompożizzjoni u karatteristiċi tal-portafoll
2.2. Impronta ambjentali, soċjali u ta’ governanza (ESG)
2.3. Prestazzjoni tas-CPF fl-2023
KONKLUŻJONIJIET
INTRODUZZJONI
Dan huwa t-tielet rapport annwali dwar il-fond ta’ proviżjonament komuni (CPF) ( 1 ), li jkopri l-perjodu mill-1 ta’ Jannar 2023 sal-31 ta’ Diċembru 2023. Jiddeskrivi l-iżviluppi ewlenin relatati mal-funzjonament tas-CPF fl-2023, jippreżenta l-parametri finanzjarji u tar-riskju ewlenin, kif ukoll il-prestazzjoni annwali tal-fond. Jippreżenta wkoll ir-riżultati tal-azzjonijiet li ħadet il-Kummissjoni biex ittejjeb il-prestazzjoni aktar fit-tul tal-fond permezz tal-introduzzjoni ta’ univers ta’ investiment diversifikat.
Is-CPF, stabbilit skont l-Artikolu 212 tar-Regolament Finanzjarju (RF), iżomm il-proviżjonijiet kollha mwarrbin mill-baġit tal-UE jew li kkontribwew l-Istati Membri parteċipanti u l-pajjiżi tal-EFTA biex ikopru r-riskju ta’ telf fuq l-operazzjonijiet garantiti mill-garanziji interni ( 2 ) u esterni ( 3 ) implimentati mill-Unjoni Ewropea. Minbarra l-garanziji baġitarji, jinżammu proviżjonijiet fis-CPF fir-rigward tal-biċċa l-kbira tas-selfiet ta’ assistenza makrofinanzjarja (AMF) lil pajjiżi terzi ( 4 ). Il-proviżjonijiet miżmuma fis-CPF jikkostitwixxu r-riżerva kapitali li minnha jiġu prelevati l-fondi biex jiġu ssodisfati t-talbiet għal ħlas ta’ garanzija fuq l-operazzjonijiet appoġġati u ħruġ ieħor.
Is-CPF sar operazzjonali f’Jannar 2021. Fi tmiem l-2023, il-valur tas-suq tiegħu kien ta’ EUR 18,8 biljun, li jagħmlu l-akbar portafoll ta’ investiment ġestit direttament mill-Kummissjoni.
Bis-saħħa tal-pożizzjonament prudenti tiegħu, is-CPF innaviga sew il-volatilità tas-suq li ġiet osservata fl-2023 u kien f’pożizzjoni tajba biex japprofitta minn prestazzjoni b’saħħitha tas-suq tard fis-sena. B’mod partikolari, is-CPF irreġistra redditu assolut ta’ +5,21 %, li għenu jirkupra parti mit-telf tal-2022 (-8,9 %) u jirrikostitwixxi l-proviżjonament tal-garanziji. B’ħarsa ’l quddiem, l-ambjent preżenti tar-rati tal-imgħax ogħla u pożittivi joffri pedament sod għar-redditi fuq perjodu ta’ żmien medju.
Dan ir-rapport jiffoka fuq kwistjonijiet relatati mal-ġestjoni tal-assi tas-CPF. L-evoluzzjoni tal-obbligazzjonijiet kontinġenti li jinħolqu minn garanziji baġitarji u self tal-UE, li kontrihom l-assi tas-CPF jinżammu bħala proviżjonijiet, se tiġi diskussa f’rapport separat skont l-Artikolu 250 tar-Regolament Finanzjarju.
Parti 1: Tragwardi ewlenin fl-2023
1.1. Ħarsa ġenerali
Bħal fis-snin preċedenti, il-fond ġie ġestit f’konformità mal-proċeduri taħt l-istruttura ta’ governanza stabbilita tiegħu ( 5 ), u mingħajr inċidenti operazzjonali.
Fil-31 ta’ Diċembru 2023, il-valur tal-assi netti ( 6 ) kien ta’ EUR 18,8 biljun, li jirrappreżenta żieda ta’ EUR 4,4 biljun fi tmiem l-2022 (żieda ta’ 30 % matul is-sena). Fl-2023, is-CPF irċieva EUR 3,53 biljun ta’ kontribuzzjonijiet netti mill-baġit tal-UE jew li kkontribwew l-Istati Membri parteċipanti u l-pajjiżi tal-EFTA. Il-bqija taż-żieda fil-valur tal-portafoll (EUR 880 miljun) tirriżulta miż-żieda fil-valur tas-suq tal-assi eżistenti.
Illustrazzjoni 1: Evoluzzjoni tal-valur nett tal-assi tas-CPF (EUR biljuni)
Aktar informazzjoni dwar ir-rapporti finanzjarji hija disponibbli fid-dokument ta’ ħidma tal-persunal li jakkumpanja dan ir-rapport.
1.2. Struttura tal-kompartiment
Filwaqt li l-assi tas-CPF huma ġestiti f’konformità ma’ politika unika ta’ investiment, dawn jinżammu f’kompartimenti differenti marbuta mal-garanziji baġitarji individwali u mal-programmi ta’ assistenza finanzjarja.
Il-proviżjonament miżmum mis-CPF huwa allokat għal kull programm ta’ garanzija baġitarja/assistenza finanzjarja, f’konformità mal-oqfsa legali rispettivi tagħhom ( 7 ). L-ammonti assenjati għal kull garanzija baġitarja huma rreġistrati f’kompartimenti distinti biex jippermettu li l-livelli ta’ proviżjonament jiġu trekkjati meta mqabbla mal-livelli stabbiliti mill-istrument li jistabbilixxi l-garanzija. Jekk il-proviżjonijiet jaqgħu taħt ċerti livelli, ir-rikostituzzjonijiet jistgħu jiġu ffinanzjati mill-pakketti tal-programmi rispettivi.
Fl-2023, żdiedu żewġ kompartimenti ġodda ta’ InvestEU tal-Istati Membri ( 8 ) meta mqabbla ma’ 10 fl-2022. L-evoluzzjoni tal-kompartimenti matul is-snin preċedenti hija deskritta f’aktar dettall fir-rapporti tas-CPF għall-2021 ( 9 ) u għall-2022 ( 10 ).
Fil-31 ta’ Diċembru 2023, is-CPF kien magħmul minn 16-il kompartiment, bi 13 minnhom ikunu kompletament operazzjonali u jkun fihom fondi. Il-kompartimenti li jifdal jiġu attivati malli jiġu riċevuti l-ewwel influssi korrispondenti.
Tabella 1: Kompartimenti tas-CPF fil-31 ta’ Diċembru 2023
Kompartiment |
Valur tas-suq f’EUR fil-31 ta’ Diċembru 2023 |
Kompartimenti miftuħa fl-2021 |
|
FEIS |
9 224 784 078,06 |
GFEA ( 11 ) |
2 776 909 740,77 |
EFSD ( 12 ) |
735 238 609,90 |
InvestEU ( 13 ) |
3 357 374 936,75 |
Kompartimenti miftuħa fl-2022 |
|
EFSD+ |
2 222 070 436,62 |
AMF wara l-2020 |
105 403 883,94 |
AMF eċċezzjonali għall-Ukrajna ( 14 ) |
- |
Self tal-Euratom wara l-2020 |
- |
Self tal-ELM bi skop ġdid għall-Ukrajna |
- |
Garanzija ta’ InvestEU għar-Rumanija |
80 817 782,06 |
Garanzija ta’ InvestEU għar-Repubblika Ċeka |
28 505 258,04 |
Garanzija ta’ InvestEU għall-Finlandja |
25 499 598,46 |
Garanzija ta’ InvestEU għall-Greċja |
31 241 677,26 |
Operazzjonijiet ta’ Taħlit ta’ InvestEU |
161 082 630,28 |
Kompartimenti miftuħa fl-2023 |
|
Garanzija ta’ InvestEU għall-Bulgarija |
41 334 023,23 |
Garanzija ta’ InvestEU għal Malta |
6 352 640,21 |
TOTAL |
18 796 615 295,58 |
Illustrazzjoni 2: Daqs tal-kompartimenti tas-CPF fil-31 ta’ Diċembru 2023
1.3. Talbiet għal ħlas ta’ garanzija u pretensjonijiet għall-ħlas
Il-ġestjoni tal-likwidità tat-talbiet għal ħlas ta’ garanzija u l-pretensjonijiet għall-ħlas hija ffaċilitata minn riżerva ta’ likwidità, kif previst fil-Linji Gwida dwar il-Ġestjoni tal-Assi (AMGs) tas-CPF ( 15 ). Ir-riżerva ta’ likwidità hija magħmula minn riżervi limitati ta’ flus miżmuma fit-Teżor Ċentrali tal-Kummissjoni biex ikopru l-ħruġ ta’ flus mistenni li jimmaterjalizza fuq perjodu ta’ 3 xhur abbażi ta’ notifiki mis-sħab fl-implimentazzjoni.
Ir-riżerva bdiet fl-2023 b’bilanċ ta’ EUR 342 miljun. Matul is-sena, din irċeviet influssi ta’ EUR 114-il miljun ( 16 ), filwaqt li ammont nett ta’ kważi EUR 351 miljun tħallas fl-2023 ( 17 ). Fi tmiem l-2023, il-bilanċ li jifdal tar-riżerva ta’ likwidità kien jammonta għal EUR 106 miljun.
It-talbiet tal-2023 fuq il-proviżjonijiet tas-CPF mill-garanziji baġitarji rispettivi ( 18 ), kif ukoll talbiet oħrajn fuq ir-riżorsi miżmuma mill-kompartimenti tas-CPF, huma miġbura fil-qosor hawn taħt ( 19 ).
Tabella 2: Ħruġ tas-CPF fl-2023, ħarsa ġenerali dettaljata
Kompartiment |
f’EUR mln |
Natura tal-ħruġ |
EFSD |
0,60 |
talbiet għal ħlas ta’ garanzija |
EFSD+ |
0,04 |
talbiet għal ħlas ta’ garanzija |
GFEA |
127,57 |
talbiet għal ħlas ta’ garanzija |
0,06 |
spejjeż legali |
|
127,63 |
total |
|
FEIS |
115,60 |
talbiet netti u aġġustamenti tal-valur tal-portafolli ta’ ekwità |
22,40 |
spejjeż u talbiet tal-SMEW (netti mir-rikostituzzjonijiet) fuq il-prodotti ta’ garanzija |
|
55,90 |
spejjeż (kostijiet ta’ finanzjament u rkupru) |
|
193,90 ( 20 ) |
total |
|
InvestEU |
25,915 |
spejjeż (tariffi, imgħax negattiv, finanzjament u kostijiet amministrattivi) |
1,585 |
talbiet għal ħlas ta’ garanzija |
|
27,50 |
total |
|
InvestEU għar-Rumanija |
1,20 |
talba taħt riżerva tal-kost għall-iħħeġġjar |
Ħruġ totali |
350,9 |
Illustrazzjoni 3: Ħruġ tas-CPF fl-2023 għal kull kompartiment (EUR miljuni)
1.4. Rata ta’ proviżjonament effettiva
L-Artikolu 213 tar-Regolament Finanzjarju jipprevedi li l-proviżjonament ta’ garanziji baġitarji u assistenza finanzjarja lil pajjiżi terzi fis-CPF se jkun ibbażat fuq ir-Rata ta’ Proviżjonament Effettiva (EPR, Effective Provisioning Rate) kif definita f’dak l-Artikolu. L-EPR tqis li l-ġestjoni raggruppata tas-CPF – għall-kuntrarju tal-ġestjoni ta’ fondi ta’ garanzija separati – tista’ tirriżulta f’diversifikazzjoni potenzjali jekk is-sejħiet fuq il-kompartimenti differenti ma jkunux korrelatati fiż-żmien jew fl-intensità.
L-EPR hija l-proporzjon bejn
·l-ammont meħtieġ ta’ flus u ekwivalenti ta’ flus fl-istruttura ta’ ġestjoni konġunta tas-CPF, u
·is-somma tal-ammonti meħtieġa ta’ flus u ekwivalenti ta’ flus f’każ li kull kompartiment jiġi ġestit separatament.
Bil-liġi, l-EPR għandha tiġi stabbilita bejn 95 % u 100 %, b’ċifra ta’ inqas minn 100 % li tindika effett ta’ diversifikazzjoni. Wara kalkoli bbażati fuq il-metodoloġija stabbilita ( 21 ) u minħabba l-inċertezzi makroekonomiċi u ġeopolitiċi prevalenti (b’xi wħud mill-kompartimenti tas-CPF jiddependu ħafna fuq l-evoluzzjoni tas-sitwazzjoni fl-Ukrajna), il-Kummissjoni pproponiet li l-EPR għall-2023 tibqa’ ta’ 100 % minħabba n-nuqqas ta’ kull diversifikazzjoni osservata bejn is-sejħiet fuq il-proviżjonijiet tal-kompartimenti differenti. Dan l-approċċ ġie kkonfermat fil-Baġit Annwali adottat għall-2024.
Parti 2: Strateġija ta’ investiment, kompożizzjoni tal-portafoll u prestazzjoni
Il-prinċipji u l-kunsiderazzjonijiet ġenerali li jinformaw l-istrateġija ta’ investiment tas-CPF huma stabbiliti mil-Linji Gwida dwar il-Ġestjoni tal-Assi tas-CPF u deskritti aktar fl-ewwel rapport annwali tas-CPF għall-2021 ( 22 ). Abbażi tal-approċċ konservattiv minqux fil-Linji Gwida dwar il-Ġestjoni tal-Assi tiegħu, u t-tolleranza baxxa għar-riskju, is-CPF huwa ġestit b’mod li, mill-inqas, għandu jwassal għall-preservazzjoni tal-kapital matul l-orizzont ta’ investiment tiegħu (9 snin) ( 23 ). B’riflessjoni ta’ din il-politika ta’ investiment prudenti, l-assi li fihom jista’ jinvesti s-CPF huma limitati għal titoli ta’ introjtu fiss likwidi ħafna u bi klassifikazzjoni għolja. Il-biċċa l-kbira tas-CPF sal-lum kienet ristretta għall-investiment f’titoli ta’ introjtu fiss (bonds) bi grad ta’ investiment denominati f’Euro u f’Dollaru Amerikan. Il-Linji Gwida dwar il-Ġestjoni tal-Assi ġew immodifikati fl-2022 biex jippermettu xi investiment limitat f’Fondi ta’ ekwità nnegozjati fil-Borża biex jiġu pprovduti opportunitajiet ta’ diversifikazzjoni addizzjonali għas-CPF.
2.1. Kompożizzjoni u karatteristiċi tal-portafoll
Skont il-Linji Gwida dwar il-Ġestjoni tal-Assi tiegħu, is-CPF iżomm portafoll diversifikat likwidu, filwaqt li jinvesti primarjament fi strumenti ta’ dejn bi klassifikazzjoni għolja, bħal bonds maħruġa minn gvernijiet, bonds supranazzjonali, bonds maħruġa minn aġenziji tal-Istat u minn korporazzjonijiet.
Il-portafoll tas-CPF fi tmiem is-sena kien diversifikat sew bejn il-klassijiet ta’ assi differenti fl-univers tal-introjtu fiss eliġibbli, inkluża xi skopertura limitata għal titoli mhux denominati f’euro (USD), ETFs ta’ ekwità u flus jew ekwivalenti ta’ flus. Il-gwadanji jew it-telf fil-munita fuq titoli u tranżazzjonijiet mhux f’euro ġew ikkumpensati fil-biċċa l-kbira minn bidliet opposti fid-derivattivi tal-kambju użati bħala ħeġġijiet.
Il-kwalità tal-kreditu tal-portafoll tas-CPF kienet għolja, bi klassifikazzjoni medja ta’ A, li tissuġġerixxi probabbiltà negliġibbli ta’ inadempjenza ( 24 ).
Aktar minn 36 % tal-valur tas-suq tal-portafoll ġie investit f’titoli AAA ( 25 ), bil-bqija distribwit fuq l-iskala tal-grad ta’ investiment.
L-investimenti denominati f’USD kienu jirrappreżentaw 6,6 % tal-valur tas-suq tal-portafoll ( 26 ), bir-riskju tal-munita ħħeġġjat bl-użu ta’ kuntratti forward.
L-ekwità kienet tirrappreżenta 5,5 % tal-valur tas-suq tal-portafoll fi tmiem l-2023.
Minn Diċembru 2023, madwar 15,2 % tal-portafoll kien jikkonsisti f’assi likwidi ta’ terminu qasir ( 27 ), li jipprevedu sors ta’ likwidità lesta biex tintuża f’każ ta’ ħruġ kbir li jaqbeż id-daqs tar-riżerva ta’ likwidita deskritta hawn fuq ( 28 ).
Illustrazzjoni 4: Allokazzjoni tal-portafoll tas-CPF fi tmiem is-sena (2023)
2.2. Impronta ambjentali, soċjali u ta’ governanza (ESG)
Fl-2023, l-impronta ESG tal-portafoll baqgħet b’saħħitha, b’sehem ta’ 14,6 % ta’ bonds ittikkettati bħala ESG ( 29 ), meta mqabbla ma’ 14,0 % fl-2022. L-approċċ proattiv għall-investiment tal-ESG jiffavorixxi bonds ittikkettati bħala ESG, diment li dawn ikunu allinjati mal-kriterji tal-ġestjoni tar-riskju u mal-istrateġija kumplessiva ta’ investiment. Fl-2023, il-Kummissjoni kompliet issaħħaħ l-impronta tal-ESG fl-istrateġija l-ġdida ta’ investiment tas-CPF, kif spjegat fir-rapport annwali tas-CPF għall-2022 ( 30 ).
2.3. Prestazzjoni tas-CPF fl-2023
Fl-2023, il-volatilità tas-suq baqgħet sinifikanti (ara l-Kaxxa). Madankollu, fl-aħħar ftit xhur tal-2023, il-pressjoni inflazzjonarja bdiet tonqos, u dan wassal għal aspettattivi tas-suq li l-banek ċentrali kienu se jibdew inaqqsu r-rati tal-imgħax fl-2024. Dawn l-aspettattivi ta’ tnaqqis fir-rati pendenti wasslu għal treġġigħ lura parzjali tad-dinamika osservata fl-2022, u taw spinta pożittiva lill-valur tal-bonds pendenti li huma proprjetà tas-CPF. Aktar dettalji dwar l-iżviluppi tas-suq huma pprovduti fil-kaxxa ta’ hawn taħt.
F’dan l-isfond, is-CPF kiseb redditu annwali ta’ +5,21 % (
31
), f’konformità mal-parametru referenzjarju tal-portafoll tiegħu (+5,40 %). Il-porzjon ta’ ekwità introdott reċentement (bħala medja madwar 3,1 % matul l-2023) ikkontribwixxa +0,38 % għar-redditu totali tal-portafoll. Meta wieħed iħares lejh b’mod iżolat, l-investiment fl-ekwità ta redditu ta’ madwar +12,5 %, li huwa aktar mid-doppju tar-redditu tal-porzjon ta’ introjtu fiss fl-2023.
Żviluppi tas-suq fl-2023 Id-data dwar l-inflazzjoni u l-azzjoni rispettiva mill-banek ċentrali kienu l-ixprunaturi ewlenin tas-suq fl-2023. Sal-bidu tal-2023, il-Bank Ċentrali Ewropew (BĊE) kompla jgħolli r-rati uffiċjali tiegħu f’kull laqgħa tal-Kunsill Governattiv sa Settembru, meta waqaf, wara li laħaq livell ta’ 4 % għar-rata tal-faċilità ta’ depożitu (minn 2 % għall-bidu tas-sena). Filwaqt li fadal xi inċertezza rigward ir-ritorn sostenibbli tagħha għal-livell fil-mira ta’ 2 %, l-inflazzjoni fl-Ewropa naqset b’mod kostanti mill-punt tat-tluq għoli tagħha. F’Jannar, l-inflazzjoni ewlenija kienet ta’ 8,6 %. Din naqset għal 2,4 % f’Novembru, qabel ma żdiedet bi ftit, biex għalqet bi 2,9 % f’Diċembru. Fl-Istati Uniti, l-inflazzjoni ewlenija naqset ukoll, minn 6,4 % f’Jannar għal 3 % f’Ġunju, qabel ma stabbilizzat u għalqet is-sena bi 3,1 %. Il-Federal Reserve Bank għolla r-rata uffiċjali ewlenija tiegħu b’total ta’ 1 %, għal medda fil-mira ta’ 5,25 % - 5,50 %. Ir-rata baqgħet f’dan il-livell minn Lulju. Minbarra ż-żieda fir-rati tal-imgħax uffiċjali, il-banek ċentrali ewlenin baqgħu jindikaw għall-biċċa l-kbira tas-sena li r-rati uffiċjali mhux se jitnaqqsu malajr u jkollhom jibqgħu “għoljin għal aktar żmien” biex jiżguraw li l-inflazzjoni terġa’ lura għall-mira. F’dan l-isfond, ir-rendimenti tal-bonds kienu wkoll qed jiżdiedu b’mod gradwali matul l-ewwel 9 xhur tas-sena u l-bond tal-gvern Ġermaniż ta’ 10 Snin laħaq il-quċċata tiegħu ta’ 2,96 % fil-bidu ta’ Ottubru, minn 2,44 % fil-bidu tas-sena. Fir-raba’ trimestru, ir-rilaxxi tad-data li juru inflazzjoni aktar baxxa milli mistennija ppermettew lill-banek ċentrali ewlenin li jmexxu l-komunikazzjoni tagħhom f’direzzjoni inqas “aggressiva” u jibdew japprovaw l-għażla taż-żmien possibbli tal-ewwel tnaqqis fir-rata uffiċjali. Dan wassal biex is-swieq jipprezzaw malajr għadd sostanzjali ta’ tnaqqis fir-rati tal-imgħax fl-2024, li wassal għal rendimenti aktar baxxi tal-bonds u, konsegwentement, għal prezzijiet tal-bonds u redditi ogħla. Il-bond tal-gvern Ġermaniż ta’ 10 Snin għalaq is-sena bi 2,02 %. Barra minn hekk, it-tkabbir ekonomiku sfida l-previżjonijiet negattivi li kienu prevalenti fil-bidu tas-sena, speċjalment fl-Istati Uniti, li rreġistraw rata ta’ tkabbir b’saħħitha ħafna, filwaqt li l-Ewropa evitat reċessjoni. Is-suq tax-xogħol kien ukoll b’saħħtu ħafna, u r-rati tal-qgħad baqgħu qrib il-livelli baxxi rekord fuq iż-żewġ naħat tal-Atlantiku. Il-kombinament ta’ tkabbir reżiljenti fid-dawl taż-żidiet fir-rati tal-imgħax aggressivi u inflazzjoni li qed tonqos estenda l-irkupru tal-prezzijiet tas-suq għall-biċċa l-kbira tal-klassijiet tal-assi. Minbarra l-bonds tal-gvern, il-bonds korporattivi marru tajjeb ħafna wkoll. Bl-istess mod, is-swieq tal-ekwità rreġistraw irkupru qawwi ħafna. L-indiċi STOXX Europe 600 żdied bi 12,7 %, filwaqt li l-indiċi S&P 500 tal-Istati Uniti żdied b’24,2 %. |
KONKLUŻJONIJIET
Is-CPF irreġistra redditu ta’ +5,21 %, li għen biex jirkupra parti mit-telf tal-2022 (-8,9 %) u jirrikostitwixxi l-proviżjonament tal-garanziji. B’ħarsa ’l quddiem, l-ambjent preżenti tar-rati tal-imgħax ogħla u pożittivi joffri pedament sod għar-redditi fuq perjodu ta’ żmien medju. Dan huwa rifless fir-rendiment medju sal-maturità tal-portafoll, li baqa’ ta’ madwar 3 % fis-sena fi tmiem l-2023.
Is-sitwazzjoni diffiċli tas-suq iffaċċjata matul l-2022 issottolinjat ir-riskji ta’ dipendenza esklużiva fuq l-investimenti b’introjtu fiss. Sabiex titnaqqas id-dipendenza fuq is-swieq tal-bonds, l-istrateġija ta’ investiment tas-CPF ġiet diversifikata fl-2023 permezz tal-investiment f’indiċijiet tal-ekwità pan-Ewropej wesgħin. L-ewwel sena ta’ esperjenza b’din il-klassi ġdida ta’ assi kienet pożittiva. L-iskopertura limitata għall-ekwità wriet il-kapaċità tagħha li ttejjeb ir-redditi konsistenti mal-livell baxx ta’ riskju. Is-CPF jinsab f’pożizzjoni tajba biex isostni t-trajettorja tal-irkupru tiegħu u jikseb stabbiltà u tkabbir aktar fit-tul, f’konformità mal-objettivi ta’ investiment tiegħu.
() Il-Fond Ewropew għall-Iżvilupp Sostenibbli.