Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 52024BP2322

Riżoluzzjoni (UE) 2024/2322 tal-Parlament Ewropew tal-11 ta’ April 2024 li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Awtorità Ewropea tat-Titoli u s-Swieq għas-sena finanzjarja 2022

ĠU L, 2024/2322, 10.10.2024, ELI: http://data.europa.eu/eli/res/2024/2322/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

ELI: http://data.europa.eu/eli/res/2024/2322/oj

European flag

Il-Ġurnal Uffiċjali
ta'l-Unjoni Ewropea

MT

Is-serje L

2024/2322

10.10.2024

RIŻOLUZZJONI (UE) 2024/2322 TAL-PARLAMENT EWROPEW

tal-11 ta’ April 2024

li tinkludi l-kummenti li jagħmlu parti integrali mid-deċiżjoni dwar il-kwittanza għall-implimentazzjoni tal-baġit tal-Awtorità Ewropea tat-Titoli u s-Swieq għas-sena finanzjarja 2022

IL-PARLAMENT EWROPEW,

—

wara li kkunsidra d-deċiżjoni tiegħu dwar il-kwittanza għall-implimentazzjoni tal-baġit tal-Awtorità Ewropea tat-Titoli u s-Swieq għas-sena finanzjarja 2022,

—

wara li kkunsidra l-Artikolu 100 u l-Anness V tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Kontroll tal-Baġit (A9-0103/2024),

A.

billi, skont id-dikjarazzjoni tad-dħul u l-infiq tagħha (1), il-baġit finali tal-Awtorità Ewropea tat-Titoli u s-Swieq (l-“Awtorità”) għas-sena finanzjarja 2022 kien ta’ EUR 68 068 551, ammont li jirrappreżenta żieda ta’ 12,32 % meta mqabbel mal-2021; billi l-Awtorità hija ffinanzjata minn kontribuzzjoni mill-Unjoni (EUR 17 301 544, ammont li jirrappreżenta 25,41 % mill-baġit totali), minn kontribuzzjonijiet mill-awtoritajiet superviżorji nazzjonali tal-Istati Membri (EUR 27 293 765, jew 40,10 %) u mill-ħlas ta’ miżati li tirċievi mill-entitajiet taħt is-superviżjoni tagħha (EUR 22 228 234, jew 32,66 %);

B.

billi l-Qorti tal-Awdituri (il-“Qorti”), fir-rapport tagħha dwar il-kontijiet annwali tal-Awtorità Ewropea tat-Titoli u s-Swieq għas-sena finanzjarja 2022 (ir“rapport tal-Qorti”), tistqarr li kisbet aċċertament raġonevoli li l-kontijiet annwali tal-Awtorità huma affidabbli u li t-tranżazzjonijiet ta’ bażi huma legali u regolari;

Ġestjoni baġitarja u finanzjarja

1.

 Jinnota b’sodisfazzjon li l-isforzi ta’ monitoraġġ baġitarju matul is-sena finanzjarja 2022 irriżultaw f’rata ta’ implimentazzjoni tal-baġit ta’ 98,78 %, li tirrappreżenta tnaqqis żgħir ta’ 1,17 % meta mqabbla ma’ dik tal-2021; jinnota li r-rata ta’ eżekuzzjoni tal-approprjazzjonijiet ta’ pagament kienet ta’ 89,83 %, li tirrappreżenta tnaqqis żgħir ta’ 0,08 % meta mqabbla mas-sena preċedenti;

2.

 Jinnota mill-opinjoni tal-Awtorità tal-5 ta’ Lulju 2023 fir-rigward tal-miżuri ta’ segwitu meħuda fid-dawl tal-kwittanza għall-implimentazzjoni tal-baġit tal-Awtorità għas-sena finanzjarja 2021 (minn hawn ’il quddiem l-“Opinjoni tal-Awtorità”), li l-Awtorità, minħabba l-kumplessità dejjem tikber tal-istruttura baġitarja tagħha, tqis li hija meħtieġa reviżjoni tal-mudell tagħha ta’ finanzjament minn tariffi biex tkun tista’ tirreaġixxi kemm b’mod xieraq kif ukoll malajr għal żviluppi sinifikanti fis-swieq finanzjarji, filwaqt li tkun tista’ tiġġestixxi b’mod aktar effiċjenti l-għadd dejjem jikber ta’ sorsi ta’ tariffi derivati minn mandati superviżorji diretti;

Prestazzjoni

3.

 Jinnota li l-Awtorità tuża ċerti miżuri bħalma huma l-indikaturi ewlenin tal-prestazzjoni biex tivvaluta l-valur miżjud ipprovdut mill-attivitajiet tagħha u minn miżuri oħrajn biex ittejjeb il-ġestjoni baġitarja tagħha; ifaħħar lill-Awtorità talli lestiet 90 % mill-programm ta’ ħidma tagħha għall-2022, bil-biċċa l-kbira tal-indikaturi ewlenin tal-prestazzjoni tagħha milħuqa jew maqbuża;

4.

 Jilqa’ r-reazzjoni tal-Awtorità għall-isfidi ġeopolitiċi fl-2022; jinnota, f’dak il-kuntest, li l-Awtorità intensifikat l-attivitajiet ta’ monitoraġġ tar-riskju u l-attivitajiet superviżorji tagħha b’reazzjoni għall-invażjoni mhux provokata u illegali tar-Russja fl-Ukrajna, filwaqt li żgurat viġilanza akbar fil-valutazzjoni tal-impatti potenzjali fuq is-swieq finanzjarji tal-Unjoni u ħadet l-azzjonijiet meħtieġa biex tissalvagwardja l-istabbiltà tas-suq u l-protezzjoni tal-investituri; jinnota wkoll li fil-kuntest tal-kriżi tal-enerġija, l-Awtorità ppubblikat il-valutazzjoni ta’ livell għoli tagħha dwar l-oqsma fejn il-Kummissjoni talbet kontribut dwar miżuri biex tiġi limitata l-volatilità eċċessiva u biex jittaffew il-pressjonijiet tal-likwidità fuq kontropartijiet mhux finanzjarji attivi fis-swieq tal-gass u tal-elettriku, u adottat miżuri temporanji ta’ emerġenza biex tindirizza dawk il-pressjonijiet tal-likwidità;

5.

 Jinnota li fl-2022 il-prijoritajiet strateġiċi tal-Awtorità ffukaw fuq tliet suġġetti orizzontali, jiġifieri l-appoġġ għall-iżvilupp ta’ swieq kapitali sodi, il-promozzjoni ta’ finanzi u innovazzjoni sostenibbli, u t-trawwim tal-innovazzjoni u d-diġitalizzazzjoni; jilqa’ l-fatt li l-Awtorità wettqet dawk il-prijoritajiet fl-2022 permezz ta’ firxa ta’ azzjonijiet, bħall-għoti ta’ kontribut tekniku lill-Kummissjoni dwar l-aspetti tal-protezzjoni tal-investituri tar-rieżami tal-MiFID II u tal-MiFIR u fir-rigward tal-Att dwar il-Kwotazzjoni fil-Borża, il-pubblikazzjoni tal-pjan direzzjonali tal-Awtorità dwar il-finanzi sostenibbli 2022-2024, u l-ħruġ ta’ twissijiet lill-investituri u lill-awtoritajiet nazzjonali kompetenti (NCAs) dwar ir-riskji tal-kriptoassi, fost l-oħrajn;

6.

 Jirrikonoxxi l-kisbiet tal-Awtorità fl-2022, li kienet sena sinifikanti mill-perspettiva ta’ konverġenza superviżorja, b’diversi azzjonijiet superviżorji komuni, tliet rieżamijiet bejn il-pari ewlenin flimkien mar-rieżami bejn il-pari annwali obbligatorju dwar il-kontropartijiet ċentrali, inkluż wieħed li jagħti dettalji dwar l-azzjonijiet imwettqa mill-NCAs marbuta mar-rilokazzjonijiet wara l-ħruġ tar-Renju Unit mill-Unjoni, u l-ewwel rakkomandazzjonijiet maħruġa mill-Awtorità lil NCA skont l-Artikolu 16 tar-Regolament Fundatur tagħha, bl-għan li jissaħħu strutturalment l-approċċ superviżorju u l-kapaċità tal-NCAs;

7.

 Jinnota l-pubblikazzjoni mill-Awtorità fl-2022 ta’ rapport dwar is-suq Ewropew għall-kwoti tal-emissjonijiet u d-derivattivi, li ressaq għadd ta’ rakkomandazzjonijiet ta’ politika biex jittejbu t-trasparenza u l-monitoraġġ tas-suq, kif ukoll il-koordinazzjoni mill-Awtorità tal-ewwel eżerċizzju ta’ xiri bil-moħbi li qatt sar fost għadd ta’ NCAs, u t-tnedija tal-istrateġija l-ġdida tal-Awtorità għall-perjodu 2023-2028;

Effiċjenza u titjib

8.

 Josserva li l-Awtorità qed tkompli tfittex titjib fl-effiċjenza u sinerġiji fl-oqsma ta’ attività tagħha; jinnota, f’dak il-kuntest, li l-Awtorità wettqet evalwazzjoni tal-programm ta’ ħidma annwali tagħha bl-għan li ttejjeb l-effiċjenza billi talloka r-riżorsi b’mod effettiv b’rispons għal fatturi esterni, bħall-invażjoni tal-Ukrajna mir-Russja, inkluż fir-rigward tal-proposti leġiżlattivi dwar il-Punt ta’ Aċċess Uniku Ewropew, li ma kinux previsti inizjalment fil-programm annwali ta’ ħidma tal-Awtorità għall-2022; ifaħħar il-fatt li, bħala parti mill-istrateġija ta’ effiċjenza tagħha, l-Awtorità għadha tikkondividi uffiċjal tal-kontabbiltà mal-Awtorità Bankarja Ewropea;

9.

 Jinnota xi wħud mill-miżuri interni implimentati biex jinkisbu titjib fl-effiċjenza u sinerġiji, bħal riallokazzjoni interna sħiħa li ppermettiet lill-Awtorità tieħu f’idejha mandati u kompiti ġodda, mingħajr il-ħtieġa ta’ riżorsi addizzjonali, ottimizzazzjoni ulterjuri tar-riżorsi tal-akkwist billi tingħaqad ma’ aktar proċeduri interistituzzjonali u billi tmexxi akkwisti kbar bejn l-aġenziji, kif ukoll simplifikazzjoni tal-proċessi fil-qasam tal-ġestjoni baġitarja u l-investimenti fl-awdjo, fil-vidjokonferenzi, u fl-għodod ta’ votazzjoni żviluppati matul il-pandemija, li qed jippermettu xogħol mill-bogħod; jinnota, barra minn hekk, li l-Awtorità qed tippjana li jkollha anqas missjonijiet għall-persunal tagħha u aktar laqgħat mill-bogħod fil-futur, u b’hekk iżżid il-flessibbiltà tagħha u tnaqqas l-ispejjeż;

10.

 Jirrikonoxxi li l-funzjonijiet kollha amministrattivi u ta’ appoġġ tal-Awtorità, jiġifieri r-riżorsi umani, l-etika, il-finanzi, l-akkwist u l-proċessi ta’ ġestjoni tal-faċilitajiet, ilhom diġitalizzati diversi snin u b’hekk titwettaq politika ta’ karta żero; jinnota li fl-2022 l-infrastruttura tat-teknoloġija tal-informazzjoni u tal-komunikazzjoni tal-Awtorità ġiet ittrasferita għall-cloud pubbliku u huwa mistenni li jkun hemm iffrankar wara l-espansjoni tas-sistemi; jilqa’ l-fatt li fir-raba’ trimestru 2022, l-Awtorità bdiet il-proċess biex tintegra l-għodda għall-ġestjoni tal-akkwist pubbliku;

Politika dwar il-persunal

11.

 Jinnota li, fil-31 ta’ Diċembru 2022, 87,60 % tat-tabella tal-persunal kienet ġiet implimentata, b’219-il aġent temporanju maħtur minn total ta’ 243 aġent temporanju awtorizzat mill-baġit tal-Unjoni, meta mqabbel ma’ 250 pożizzjoni awtorizzata fl-2021; jinnota li, barra minn hekk, 91 aġent kuntrattwali u 12-il espert nazzjonali sekondat kienu qed jaħdmu għall-Awtorità fl-2022;

12.

 Jinnota li fl-2022 l-għadd totali ta’ membri tal-persunal żdied b’45 % meta mqabbel mal-2021; jinnota wkoll li, fir-rigward tal-bilanċ ġeografiku, fi tmiem is-sena 2022, il-persunal tal-Awtorità, jiġifieri aġenti temporanji, aġenti kuntrattwali u esperti nazzjonali sekondati, kienu jinkludu 24 nazzjonalità differenti tal-Unjoni; ifakkar kemm huwa importanti li tiġi żgurata rappreżentanza ġeografika bbilanċjata fost il-persunal maniġerjali u dak ġenerali tal-Awtorità;

13.

 Jilqa’ l-fatt li l-Awtorità tinsab qrib li tikseb bilanċ bejn il-ġeneri fil-livell maniġerjali u tal-persunal; jinnota d-distribuzzjoni tal-ġeneri fi ħdan il-persunal maniġerjali superjuri u intermedju tal-Awtorità, fejn 16 minn 30 huma nisa (53 %); jinnota d-distribuzzjoni tal-ġeneri fi ħdan il-Bord Maniġerjali tal-Awtorità, fejn erbgħa minn sebgħa huma rġiel (57 %); jinnota wkoll id-distribuzzjoni tal-ġeneri fi ħdan il-persunal ġenerali tal-Awtorità, fejn 175 minn 322 huma rġiel (54 %);

14.

 Jirrikonoxxi li l-Awtorità għandha politika dwar il-protezzjoni tad-dinjità tal-persuna u l-prevenzjoni tal-fastidju psikoloġiku u sesswali; jilqa’ l-fatt li fl-2022 ma kien hemm l-ebda każ ta’ fastidju rrapportat, investigat, konkluż internament jew li ttieħed quddiem il-qorti; jilqa’ wkoll l-impenn tal-Awtorità li tiżviluppa “politika dwar id-diversità u l-inklużjoni”;

Akkwist

15.

 Jinnota li l-Awtorità, fl-2022, iġġestiet 14-il proċedura ta’ akkwist, li minnhom tlieta kienu offerti miftuħa fil-qasam tal-IT u jirrappreżentaw valur totali ta’ EUR 99,4 miljun;

16.

 Ifakkar, mir-rapport tal-Qorti dwar il-kontijiet annwali tal-Awtorità għas-sena finanzjarja 2021, fl-osservazzjoni fir-rigward tad-deċiżjoni tal-Awtorità li tniedi proċedura nnegozjata mingħajr ma tirreklamaha, u b’hekk tikser il-punt 3.1 tal-Anness I tar-Regolament Finanzjarju (2); jinnota, mill-Opinjoni tal-Awtorità, li l-ommissjoni ta’ pubbliċità ex ante kienet iġġustifikata mill-kamp ta’ applikazzjoni speċifiku tal-akkwist u ddokumentata kif xieraq ex post, u dan ikompli jsostni li ttieħdu l-miżuri kollha meħtieġa biex fil-futur tiġi evitata sitwazzjoni simili;

17.

 Jiġbed l-attenzjoni għan-nota IV.1 tal-kont annwali tal-Awtorità għall-2022, li tiddeskrivi inċertezza relatata mal-eżitu ta’ kawża (“UniSystems Lussemburgu u Unisystems systimata plioforikis vs ESMA”) fir-rigward tad-deċiżjoni fi proċedura ta’ akkwist konġunt ikkontestata minn applikant fil-Qorti Ġenerali tal-Unjoni;

Prevenzjoni u ġestjoni tal-kunflitti ta’ interess u trasparenza

18.

 Jinnota li fl-2022, l-Awtorità rrevediet il-politika dwar il-kunflitti ta’ interess għal persuni li mhumiex membri tal-persunal, li tkopri l-membri tal-persunal, l-esperti sekondati nazzjonali u t-trainees; ifaħħar lill-Awtorità talli ħadet diversi azzjonijiet biex tqajjem kuxjenza dwar il-kunflitti ta’ interess u r-regoli tal-etika, inkluż billi wettqet sessjonijiet ta’ introduzzjoni għal dawk reklutati ġodda, u talli organizzat sessjoni għall-persunal kollu biex tinformah dwar il-fatti u ċ-ċifri ewlenin fl-etika, biex tipprovdi kjarifiki fil-fond dwar it-trattament tal-istrumenti finanzjarji u tikkondividi l-prijoritajiet għall-2022;

19.

 Jinnota li għad-dikjarazzjonijiet annwali tal-kunflitti ta’ interess eżaminati mill-Awtorità fl-2022, ma tqajmet l-ebda kwistjoni relatata ma’ kunflitti ta’ interess potenzjali; josserva li, minbarra d-dikjarazzjonijiet annwali, fl-2022 l-Awtorità rrieżaminat u vvalutat għadd konsiderevoli ta’ talbiet u dikjarazzjonijiet mill-persunal, jiġifieri 54 dikjarazzjoni fil-proċeduri ta’ selezzjoni, 13-il dikjarazzjoni dwar l-impjieg bi qligħ tal-konjuġi, 41 talba għal attività esterna, 21 talba għal pubblikazzjoni jew diskors, 23 talba għal ġestjoni ta’ strumenti finanzjarji, 10 talbiet għal attività waqt liv għal raġunijiet personali u 10 dikjarazzjonijiet dwar l-attività intenzjonata wara t-tluq mill-Awtorità; jinnota f’dak il-kuntest li, filwaqt li l-maġġoranza tad-dikjarazzjonijiet ma qajmu l-ebda tħassib dwar kunflitti ta’ interess, f’żewġ każijiet ġiet rakkomandata bidla fil-kompożizzjoni tal-bord ta’ selezzjoni, u f’każ wieħed ġew imposti salvagwardji fir-rigward ta’ maniġer li kien se jitlaq mill-Awtorità, pereżempju l-qtugħ minn informazzjoni kunfidenzjali u projbizzjoni ta’ sena fuq illobbjar fil-konfront tal-persunal;

20.

 Jilqa’ l-fatt li l-Awtorità tippubblika s-CVs u d-dikjarazzjonijiet ta’ interess tal-membri tal-Bord Maniġerjali u tal-persunal maniġerjali tagħha; ifaħħar il-mod trasparenti li bih l-Awtorità tirrapporta l-laqgħat tal-persunal tagħha mal-partijiet ikkonċernati esterni u tagħmilhom disponibbli fuq is-sit web tagħha;

21.

 Ifakkar, mir-rapport tal-Qorti dwar il-kontijiet annwali tal-Awtorità għas-sena finanzjarja 2021, fl-osservazzjoni tal-Qorti rigward id-dgħufijiet li nstabu fis-sistemi ta’ ġestjoni u kontroll tal-Awtorità relatati mal-kunflitti ta’ interess; jinnota, f’dak il-kuntest, li fl-2022 it-tim tal-etika tal-Awtorità beda prattika li jiġbor b’mod sistematiku d-dikjarazzjonijiet ta’ interess tal-uffiċjali responsabbli mir-rapporti tal-maniġers superjuri, biex jiġi żgurat li ma jkun hemm l-ebda riskju ta’ kunflitti ta’ interess matul il-proċess ta’ evalwazzjoni tal-maniġers superjuri tal-Awtorità; ifakkar ukoll li l-bord tas-superviżuri adotta politika emendata dwar il-kunflitti ta’ interess biex jintroduċi rekwiżit espliċitu għal individwi f’sitwazzjoni ta’ kunflitt, jiġifieri membri tal-bord, sostituti jew koordinaturi tal-NCAs, biex iħallu spazju għad-deliberazzjonijiet dwar il-punt rilevanti, u jastjenu milli jivvotaw fi proċeduri bil-miktub; ifaħħar lill-Aġenzija talli indirizzat l-osservazzjoni tal-Qorti li issa meqjusa magħluqa;

Kontroll intern

22.

 Jilqa’ l-valutazzjoni annwali tas-sistema ta’ kontroll intern tal-Awtorità u l-konklużjoni li din teżisti u tiffunzjona tajjeb; jinnota li l-Awtorità kejlet 77 indikatur ta’ kontroll intern, li jkopru l-prinċipji kollha ta’ kontroll intern, u identifikat 42 nuqqas, li l-biċċa l-kbira tagħhom kienu minuri jew moderati u li l-ebda wieħed minnhom ma qajjem dubji dwar l-eżistenza u l-funzjonament xieraq tal-prinċipji ta’ kontroll intern; jinnota li l-opportunitajiet osservati għal titjib huma prinċipalment relatati mal-ambjent ta’ kontroll, mal-attivitajiet ta’ kontroll kif ukoll mal-komponenti tal-informazzjoni u l-komunikazzjoni;

23.

 Jinnota li l-Awtorità ġiet awditjata mis-Servizz tal-Awditjar Intern tal-Kummissjoni (IAS) dwar il-ġestjoni tad-data fl-2022, filwaqt li jirrikonoxxi l-kisbiet li saru fl-istabbiliment tal-qafas tal-ġestjoni tad-data, kif ukoll l-isforzi kontinwi biex tiġi definita viżjoni aktar koerenti dwar l-attivitajiet ta’ ġestjoni tad-data; jinnota, madankollu, li l-IAS identifika dgħufijiet kemm fit-tfassil kif ukoll fl-implimentazzjoni effettiva u effiċjenti tas-sistemi ta’ kontroll intern stabbiliti għall-proċessi ta’ ġestjoni tad-data u ħareġ ħames rakkomandazzjonijiet, tnejn minnhom importanti ħafna; jistieden lill-Awtorità tindirizza dawk id-dgħufijiet u tirrapporta lill-awtorità ta’ kwittanza dwar il-progress li jkun sar f’dak ir-rigward;

24.

 Jinnota li wara l-valutazzjoni tar-riskju organizzazzjonali annwali tagħha, l-Awtorità identifikat riskji fl-2022, bħal swieq fraġli u aktar volatili li jistgħu jaffettwaw l-istabbiltà finanzjarja, ipoġġu f’riskju lill-investituri u jżidu r-riskju superviżorju għall-Awtorità, ir-riskju ta’ riżorsi inadegwati jew nuqqas ta’ għarfien espert f’ċerti oqsma biex din tkun tista’ tadatta għall-isfidi l-ġodda u r-riskju ta’ attakk ċibernetiku mmirat lejn l-Awtorità u li jaffettwa s-sigurtà tas-sistemi tal-IT; jistieden lill-Awtorità tieħu l-azzjonijiet ta’ mitigazzjoni kollha meħtieġa biex tindirizza dawk ir-riskji;

Kummenti oħra

25.

 Ifaħħar lill-Awtorità talli hija rikonoxxuta uffiċjalment għas-sistema ta’ ġestjoni ambjentali tagħha fl-ambitu tal-EMAS (Skema ta’ Ġestjoni u Verifika Ambjentali tal-Unjoni Ewropea) u talli kisbet ir-reġistrazzjoni fl-EMAS fl-2022; ifaħħar ukoll lill-Awtorità għall-impenn tagħha li trawwem u tintegra kemm jista’ jkun rekwiżiti ekoloġiċi fil-proċeduri ta’ akkwist tagħha; jinnota b’sodisfazzjon mir-rapport tal-Qorti li l-Awtorità hija fost l-aġenziji li joħorġu dikjarazzjoni ambjentali annwali;

26.

 Jinnota li fl-2022 l-Awtorità, flimkien mal-Awtoritajiet Superviżorji Ewropej l-oħra, ħarġet twissijiet lill-konsumaturi fir-rigward tal-attivitajiet ta’ riskju għoli u spekulattivi assoċjati ma’ bosta kriptoassi;

27.

 Jirreferi, rigward kummenti oħrajn ta’ natura orizzontali li jakkumpanjaw id-deċiżjoni tagħha dwar il-kwittanza, għar-riżoluzzjoni tiegħu tal-11 ta’ April 2024 (3) dwar il-prestazzjoni, il-ġestjoni finanzjarja u l-kontroll tal-aġenziji.

(1)   ĠU C 38, 31.1.2023, p. 84.

(2)  Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU L 193, 30.7.2018, p. 1).

(3)  Testi adottati, P9_TA(2024)0280.

ELI: http://data.europa.eu/eli/res/2024/2322/oj

ISSN 1977-074X (electronic edition)

Top