Pubblikazzjoni ta’ applikazzjoni għar-reġistrazzjoni ta’ isem skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

(2023/C 129/07)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 51 tar-Regolament (UE) Nru 1151/2012 tal-Parlament Ewropew u tal-Kunsill (1) fi żmien 3 xhur mid-data ta’ din il-pubblikazzjoni.

DOKUMENT UNIKU

“Българско бяло саламурено сирене / Bulgarsko byalo salamureno sirene”

Nru tal-UE: PDO-BG-02656 — 4.2.2021

DOP (X) IĠP ( )

1.   Isem/Ismijiet

“Българско бяло саламурено сирене / Bulgarsko byalo salamureno sirene”

2.   Stat Membru jew pajjiż terz

Ir-Repubblika tal-Bulgarija

3.   Deskrizzjoni tal-prodott agrikolu jew tal-oġġett tal-ikel

3.1.   Tip ta’ prodott

Klassi 1.3 – Ġobon

3.2.   Deskrizzjoni tal-prodott li għalih japplika l-isem f’(1)

Il-“Българско бяло саламурено сирене / Bulgarsko byalo salamureno sirene” huwa prodott tal-ħalib iffermentat magħmul minn ħalib sħiħ tal-baqra, tan-nagħaġ, tal-mogħoż, tal-bufli jew imħallat biż-żieda ta’ kulturi starter li fihom il-Lactococcus lactis subsp. lactis u l-Lactobacillus casei, kif ukoll starters simbjotiċi mill-batterji Lactoba-cillus delbrueckii subsp. bulgaricus u Streptococcus thermophilus, miksuba permezz tat-tibqit bil-ħmira għall-ġobon, li jkun sarlu t-trattament meħtieġ, immaturat fis-salmura u maħsub għall-konsum.

Karatteristiċi organolettiċi

—	Dehra: Abjad, maqtugħ sew qisu tal-porċellana, bi bwiet ta’ arja maqbuda iżolati kkawżati mill-batterji jew mingħajrhom, mingħajr saffi ovvji, b’kulur speċifiku għat-tip ta’ ħalib. Il-biċċiet huma ffurmati sew, jinqasmu faċilment, u ma jitfarrkux.

—	Forma: Biċċiet parallelepipediċi b’bażi kwadra u bi ġnub rettangolari – tul: 100 sa 220 mm, wisa’: 100 sa 110 mm, għoli: 80 sa 100 mm.

—	Daqs: Bejn 0,2 u 2,0 kg.

—	Kulur: Abjad, bi sfumatura speċifika ta’ kulur speċifika għal kull tip ta’ ħalib.

—	Sawra: Moderatament iebsa, malleabbli.

—

Togħma: Speċifika għall-ġobon matur fis-salmura. Moderatament mielħa b’togħma pjaċevoli evidenti ta’ aċidu lattiku. Huma l-kompożizzjoni tal-istarter u l-maturazzjoni fis-salmura li jiddeterminaw it-togħma u l-aroma tal-prodott, aktar milli t-tip ta’ ħalib minn diversi annimali. Il-kulturi starter, li fihom il-Lactobacillus delbrueckii subsp. bulgaricus u l-iStreptococcus thermophilus għandhom relazzjoni simbjotika, kif ukoll il-proċessi tal-fermentazzjoni, jinfluwenzaw il-proprjetajiet organolettiċi tipiċi tal-prodott.

Parametri fiżikokimiċi

—

Il-materja niexfa tal-prodott finali trid tkun mill-inqas 46 % għall-“Българско бяло саламурено сирене / Bulgarsko byalo salamureno sirene” magħmul minn ħalib tal-baqra, tal-mogħoż u mħallat, u mhux inqas minn 48 % għall-“Българско бяло саламурено сирене / Bulgarsko byalo salamureno sirene” magħmul minn ħalib tan-nagħaġ u tal-bufli.

—	Il-kontenut ta’ xaħam fil-materja niexfa ma jistax ikun inqas minn 44 % għall-ħalib tal-baqar u tal-mogħoż, 48 % għall-ħalib tal-bufli u tan-nagħaġ, u 45 % għall-ħalib imħallat.

—	L-aċidità tal-prodott finali trid tkun ta’ pH bejn 4,2 u 4,4 jew bejn 200 u 300 °T.

—	Il-preservattivi, l-istabbilizzaturi u l-emulsjonanti ma humiex permessi fil-prodott lest.

—	Il-perċentwal tal-melħ irid ikun ta’ 3,5 % ± 0,5 % fil-massa totali tal-ġobon u 6 sa 10 % fis-salmura.

—	Il-grad ta’ maturità (il-proporzjon tal-proteini solubbli mal-proteini totali, f’%) ma huwiex inqas minn 14 % għall-ġobon magħmul minn ħalib tal-baqar, tal-bufli, tal-mogħoż u mħallat u 16 % għall-ġobon magħmul minn ħalib tan-nagħaġ.

—	Dan il-grad ta’ sajran iseħħ b’perjodu minimu ta’ maturazzjoni ta’ 45 jum għall-ġobon magħmul mill-ħalib tal-baqar u tal-mogħoż u 60 jum għall-ġobon magħmul mill-ħalib tan-nagħaġ, tal-bufli u mħallat.

3.3.   Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

L-għalf minn barra ż-żona ġeografika jikkostitwixxi sa 20 % fis-sena. Is-supplimentazzjoni hija meħtieġa f’kundizzjonijiet klimatiċi mhux favorevoli, meta l-għalf prodott fiż-żona ġeografika ma jkunx biżżejjed. Peress li l-annimali jingħataw biss ammont żgħir ta’ għalf minn barra ż-żona ġeografika, il-karatteristiċi tal-prodott li huma dovuti prinċiplament għall-ambjent ġeografiku, ma humiex affettwati.

Minbarra l-għalf, l-annimali jieklu fil-mergħat. Il-mergħat huma mifruxin madwar il-pajjiż kollu. Il-perjodu tar-ragħa jdum minn Marzu sa Novembru. Il-kundizzjonijiet naturali u klimatiċi fil-Bulgarija jiffavorixxu t-trobbija tal-bhejjem u l-għalf tal-annimali matul is-sena kollha b’taħlita ta’ ħaxix, użati kemm friski kif ukoll fil-forma ta’ ħuxlief u silaġġ. Il-perjodu itwal tar-ragħa huwa r-raġuni għad-diversità tal-minerali u l-vitamini fil-kompożizzjoni tal-ħalib mhux ipproċessat. Għandu kontenut ibbilanċjat speċifiku tal-ingredjenti ewlenin bħas-sustanzi minerali (il-potassju, il-manjeżju, il-fosfru u l-kalċju), il-proteini u l-vitamini (A, B, E, D u l-aċidu foliku) li jirriżultaw mir-ragħa ta’ annimali tal-ħalib. Dawn in-nutrijenti huma preżenti fil-prodott finali.

Il-ħalib mhux ipproċessat użat fil-produzzjoni tal-“Българско бяло саламурено сирене / Bulgarsko byalo salamureno sirene” joriġina mir-Repubblika tal-Bulgarija. Karatteristika li tiddistingwi l-ħalib mhux ipproċessat hija l-livell għoli ta’ Lactobacillus delbrueckii subsp. bulgaricus.

Il-kulturi starter tal-batterji Lactococcus lactis subsp. lactis u Lactobacillus casei, kif ukoll il-kulturi starter simbjotiċi tal-batterji Lactobacillus delbrueckii subsp. bulgaricus u Streptococcus thermophilus, li ma humiex soġġetti għal modifika ġenetika, iridu jiġu prodotti wkoll fit-territorju tar-Repubblika tal-Bulgarija.

3.4.   Passi speċifiċi tal-produzzjoni li jridu jsiru fiż-żona ġeografika ddefinita

L-istadji kollha fil-proċess tal-produzzjoni jsiru fit-territorju tar-Repubblika tal-Bulgarija.

Stadju 1 –

Aċċettazzjoni, klassifikazzjoni, standardizzazzjoni u ħażna tal-materja prima

Stadju 2 –

Pastorizzazzjoni tal-ħalib

Stadju 3 –

Tibqit tal-ħalib

Stadju 4 –

Qtugħ u pproċessar tal-baqta tat-tames

Stadju 5 –

Ippressar tal-baqta

Stadju 6 –

Tmelliħ – għażla mxarrba jew niexfa

Stadju 7 –

Qabel il-maturazzjoni

Stadju 8 –

Tmelliħ addizzjonali u għeluq tal-pakketti

Stadju 9 –

Maturazzjoni tal-ġobon fis-salmura

3.5.   Regoli speċifiċi dwar it-tqattigħ, it-taħkik, l-ippakkjar, eċċ.

Il-prodott jitqatta’, jiġi ppakkjat u ttikkettat fl-impjant tal-ħalib fir-Repubblika tal-Bulgarija fejn ikun ġie magħmul. L-ippakkjar f’unitajiet tal-konsum wara li jkun tlesta l-istadju tal-maturazzjoni jrid isir fl-impjant tal-ħalib fir-Repubblika tal-Bulgarija fejn ikun ġie magħmul il-prodott. Inkella, ikun hemm riskju ta’ bidliet fil-kwalitajiet fiżikokimiċi, mikrobijoloġiċi u tat-togħma tal-prodott. Il-prodott irid jiġi ppakkjat immedjatament wara li jitneħħa mis-salmura sabiex jiġi limitat il-kuntatt mal-arja. Il-prodott huwa igroskopiku ħafna, jiġifieri jassorbi rwejjaħ oħrajn faċilment, u dan jista’ jagħtih togħma ħażina u jaffettwa l-kwalità tiegħu. Il-ġobon jista’ jiġi ppakkjat f’pakketti b’vakwu ssiġillati sew ta’ rita tal-polietilen, laned tal-metall, kaxxi tal-plastik u btieti tal-injam.

3.6.   Regoli speċifiċi dwar it-tikkettar

—

4.   Definizzjoni fil-qosor taż-żona ġeografika

Iż-żona ġeografika li fiha jiġi prodott il-“Българско бяло саламурено сирене / Bulgarsko byalo salamureno sirene” hija r-Repubblika tal-Bulgarija.

5.   Rabta maż-żona ġeografika

Il-“Българско бяло саламурено сирене / Bulgarsko byalo salamureno sirene” huwa magħruf b’dan l-isem fil-Bulgarija u madwar id-dinja. Kien is-suġġett ta’ bosta ġurnali u pubblikazzjonijiet.

Il-ġobon jiġi prodott fil-Bulgarija kollha skont teknika stabbilita sew. Il-kundizzjonijiet naturali u klimatiċi favorevoli fil-Bulgarija jikkontribwixxu għall-iżvilupp tal-batterji lattiċi Lactobacillicus delbrueckii subsp. bulgaricus, li jintuża fil-produzzjoni tal-prodott u jaffettwa l-karatteristiċi speċifiċi tiegħu.

Dr Stamen Grigoroff, student tal-mediċina fl-Università ta’ Ġinevra, ingħata l-kreditu għall-iskoperta tal-batterju fl-1905. Ftit wara, fl-1907, il-mikroorganiżmu forma ta’ virga li kien skopra ssemma Bacillus bulgaricus (Grigoroff) għalih, u llum huwa magħruf skont il-klassifikazzjoni ta’ Bergey bħala Lactobacillus delbrueckii subsp. bulgaricus (fejn l-isem jenfasizza l-konnessjoni mat-territorju).

5.1.   Speċifiċità taż-żona ġeografika

Klima relattivament moderata b’ammonti moderati ta’ sħana u umdità hija tipika għall-Bulgarija, iż-żona ġeografika fejn jiġi prodott il-ġobon. It-temperatura medja annwali għall-biċċa l-kbira tal-Bulgarija hija bejn 10 °C u 14 °C, li hija tipika għal latitudnijiet moderati. Il-kundizzjonijiet naturali u klimatiċi huma prerekwiżit għall-preżenza ta’ mergħat kemm fil-pjanuri kif ukoll fiż-żoni muntanjużi, li jiffavorixxu l-produzzjoni tal-ħalib. Il-mergħat u l-bwar naturali u miżrugħin jipprovdu dieta bbilanċjata u varjata għall-annimali minħabba l-preżenza ta’ ħaxix, legumi u ċereali. Dawn il-kulturi jistagħnew kemm f’art b’altitudni baxxa kif ukoll f’żoni muntanjużi għoljin. Aktar minn 2 000 tip ta’ ħxejjex aromatiċi, bħat-trew, l-Artemisia campestris, il-ġarġir il-ġemel u oħrajn jikbru fuq il-bwar naturali. Is-sustanzi bijoloġikament attivi ewlenin responsabbli għall-proprjetajiet antiossidanti tagħhom huma d-derivattivi fenoliċi, u l-vitamini A, E u C. Dawn jibbenefikaw mill-aroma tal-għalf u l-aroma u l-kompożizzjoni tal-ħalib mhux ipproċessat. Ir-ragħa tal-annimali tal-ħalib, kif ukoll it-tagħlif supplimentari tagħhom b’għalf prinċipalment miż-żona ġeografika, jaffettwaw b’mod pożittiv il-kontenut tal-minerali u tal-vitamini tal-kompożizzjoni tal-materja prima. Il-kompożizzjoni kimika, il-proprjetajiet fiżikokimiċi u l-maturità bijoloġika jinfluwenzaw it-togħma u l-kwalità tal-prodott.

Il-kundizzjonijiet klimatiċi jikkontribwixxu għall-iżvilupp ta’ batterji lattiċi bħall-Lactobacillus delbrueckii subsp. bulgaricus, li jinsab kullimkien fil-Bulgarija. Il-batterju huwa preżenti b’mod naturali fil-Bulgarija, fejn jinstab fi kwantitajiet kbar, fil-flora u fil-fawna tal-pajjiż, u fin-nida fuq il-ħaxix tal-mergħat u fl-ilmijiet tan-nixxigħat. Il-ġurnal xjentifiku speċjalizzat Scripta Scientifica Pharmaceutica (vol. 1, 2014, p. 25) jinnota li “l-Lactobacillus delbrueckii subsp. bulgaricus jirriproduċi biss fit-territorju tal-Bulgarija moderna [...]. F’partijiet oħra fid-dinja, jgħaddi minn mutazzjonijiet u jieqaf jirriproduċi wara fermentazzjoni waħda jew tnejn.” Huwa l-batterju li jaffettwa l-karatteristiċi speċifiċi tal-prodott.

5.2.   Fatturi umani

L-industrija tal-produzzjoni tal-ġobon fil-Bulgarija għandha tradizzjoni storika twila. Ir-referenzi storiċi għall-imħaleb tal-ġobon imorru lura sal-1558. Mgħoddija minn ġenerazzjoni għal oħra, in-know-how u t-tradizzjonijiet tal-farms tal-familja lokali Bulgari huma kruċjali għall-produzzjoni ta’ dan il-ġobon. Il-produtturi tal-ġobon japplikaw il-ħiliet tagħhom fil-proċess teknoloġiku, fit-tibqit tal-ħalib, il-qtugħ tal-baqta tat-tames, l-ippressar tal-baqta u t-tmelliħ tagħha. Meta l-ħalib jitbaqqat, huma jimmonitorjaw it-temperatura tal-ħalib mhux ipproċessat kif ukoll l-ammont ta’ ħmira u starter, peress li dawn huma kruċjali għall-formazzjoni ta’ baqta tat-tames ta’ kwalità. Il-produtturi tal-ġobon iħawdu l-baqta bl-idejn b’movimenti ġentili sabiex jevitaw il-frammentazzjoni tal-baqta tat-tames. L-ipproċessar manwali tajjeb tal-baqta tat-tames huwa importanti biex tinkiseb konsistenza moderatament iebsa u elastika. Għal darba oħra, bl-idejn, bl-użu ta’ skieken speċjali tat-tip multi-cutter, il-baqta tat-tames tinqata’ f’kubi ta’ ċertu daqs. Млекарство [Trobbija ta’ bhejjem tal-ħalib] (Prof. Nikola Dimov et al., Sofia, 1975) jiddeskrivi l-ippressar bħala l-aktar stadju delikat, li “jrid jiġi adattat sabiex ix-xorrox żejjed ikun jista’ jiġi sseparat, il-massa tal-ġobon tkun tista’ tiġi kkompattjata u l-qoxra mixtieqa tkun tista’ tifforma fuq il-wiċċ tal-moffa”. L-għarfien u l-ħiliet tal-produtturi tal-ġobon jidhru wkoll fil-proċess tat-tmelliħ, peress li t-tmelliħ korrett u f’waqtu jikseb togħma speċifika moderatament mielħa. Il-grad ta’ tmelliħ u r-rata li biha l-prodott jiġi mmellaħ jiġu mmonitorjati, u dan jaffettwa b’mod konsiderevoli l-proċessi mikrobijoloġiċi u bijokimiċi matul il-maturazzjoni u l-ħażna. Bl-industrijalizzazzjoni beda jintuża l-makkinarju iżda t-tibqit u l-ipproċessar għadhom isiru bl-idejn. Is-sengħa tal-produzzjoni tal-ġobon tiġi mgħoddija minn persuna tas-sengħa għal oħra, sabiex b’hekk jiġi ppreservat il-metodu tradizzjonali ta’ kif isir il-prodott.

L-għarfien u l-ħiliet meħtieġa għall-produzzjoni tal-ġobon ġew deskritti f’għadd ta’ kotba. Fl-1872, ir-rivista Читалище ppubblikat artiklu intitolat “Производство на сирене” [Il-produzzjoni tal-ġobon] u fl-1903, it-teknika ġiet deskritta minn Hristo G. Tahtunov fil-ktieb tiegħu Как се прави кашкавал и бяло саламурено сирене [Kif tagħmel il-ġobon isfar u l-ġobon abjad fis-salmura]. Sentejn wara, Dr Stamen Grigoroff skopra l-batterju Lactobacillus delbrueckii subsp. bulgaricus, li r-razez tiegħu ġew iżolati u magħżula fil-Bulgarija. Ikkombinat mal-iStreptococcus thermophilus fi proporzjon ta’ 1:1 u f’temperatura ta’ 39-40 °C, il-Lactobacillus delbrueckii subsp. bulgaricus jadatta għall-proċess ta’ fermentazzjoni hekk kif jimmatura l-ġobon. Il-maturazzjoni tal-ġobon tagħti lill-“Българско бяло саламурено сирене / Bulgarsko byalo salamureno sirene” t-togħma u l-aroma speċifiċi tiegħu. Fl-1934, il-Kumpanija Agrikola Bulgara introduċiet il-pastorizzazzjoni tal-ħalib mhux ipproċessat u l-użu ta’ kulturi puri fil-produzzjoni. Sussegwentement, riċerka mill-Istitut tal-Industrija tal-Ħalib f’Vidin żvelat ukoll li l-involviment tal-batterju Bulgaru Lactobacillus delbrueckii subsp. bulgaricus fil-produzzjoni tal-prodott ifforma l-bażi tat-togħma u l-aroma speċifiċi tiegħu.

5.3.   Karatteristiċi tal-prodott

It-togħma u s-sawra speċifiċi tal-prodott, bħala l-karatteristiċi ewlenin tiegħu, jinkisbu permezz ta’ teknoloġija ta’ produzzjoni tradizzjonali, li fiha l-batterji tal-aċidu lattiku Lactobacillus delbrueckii subsp. bulgaricus għandhom rwol deċiżiv.

Il-funzjoni ewlenija tal-batterji lattiċi fil-kulturi starter hija li tipproduċi l-aċidu lattiku matul il-fermentazzjoni lattika. L-enzimi tagħhom huma involuti fil-proteoliżi u fil-konverżjoni tal-aċidi amminiċi f’komposti aromatiċi, u jikkontribwixxu wkoll għall-maturazzjoni tal-ġobon. Il-kisba tat-togħma speċifika tal-ġobon hija proċess kumpless minħabba t-taħlita unika ta’ fatturi mikrobijoloġiċi, bijokimiċi u teknoloġiċi. It-togħma tal-prodott hija ffurmata mhux biss mit-togħma pjaċevoli tal-aċidu lattiku ta’ dan l-istarter u s-salmura, iżda wkoll mill-imrar ħafif u mhux imponenti tal-prodotti ta’ degradazzjoni ta’ proteini kumplessi u ta’ ċerti aċidi amminiċi, b’mod partikolari l-aċidu glutamiku. Waqt il-maturazzjoni, madwar 130 tip ta’ sustanzi volatili: fis-salmura jiffurmaw ammini, aldeidi, alkoħols, aċidi karbossiliċi, ketoni metiliċi, esteri etiliċi, komposti tal-kubrit u idrokarburi aromatiċi, li jagħtu lill-prodott it-togħma u l-aroma karatteristiċi tiegħu. It-taħlita tat-togħma u l-aroma tifforma l-“bouquet” tal-ġobon.

5.4.   Rabta kawżali bejn iż-żona ġeografika u l-kwalità jew il-karatteristiċi tal-prodott (għal DOP) jew il-kwalità, ir-reputazzjoni jew karatteristiċi oħra speċifiċi tal-prodott (għal IĠP)

Il-kundizzjonijiet naturali u klimatiċi taż-żona ġeografika, ikkaratterizzati minn ammonti moderati ta’ sħana u ndewwa, jiffavorixxu l-iżvilupp ta’ batterji lattiċi tipiċi tal-mikroflora reġjonali, bħal-Lactobacillus delbrueckii subsp. bulgaricus. Il-kulturi starter tal-Lactobacillus delbrueckii subsp. bulgaricus u Streptococcus thermophilus jaffettwaw it-togħma u l-aroma pjaċevoli tal-aċidu lattiku tal-“Българско бяло саламурено сирене / Bulgarsko byalo salamureno sirene”. Dawn jifformaw matul il-proċess tal-maturazzjoni fis-salmura. Dan il-ġobon jiġi prodott permezz ta’ proċessi mikrobijoloġiċi speċifiċi bis-saħħa ta’ kulturi puri bil-Lactobacillus delbrueckii subsp. bulgaricus u ta’ parametri speċifiċi favorevoli għall-iżvilupp tagħhom.

It-tradizzjonijiet u l-ħiliet tal-produtturi tal-ġobon jassumu rwol kruċjali fil-produzzjoni. Dawn jiġu applikati fil-proċess teknoloġiku, speċifikament fit-tibqit tal-ħalib, il-qtugħ tal-baqta tat-tames, l-ippressar tal-baqta u t-tmelliħ tagħha. Meta l-ħalib jitbaqqat, huma jimmonitorjaw it-temperatura tal-ħalib mhux ipproċessat kif ukoll l-ammont ta’ ħmira u starter, peress li dawn huma kruċjali għall-formazzjoni ta’ baqta tat-tames ta’ kwalità. Dan huwa importanti biex tinkiseb il-konsistenza moderatament iebsa u elastika tiegħu. Il-qtugħ tal-baqta tat-tames bl-idejn bl-użu ta’ skieken speċjali tat-tip multi-cutter huwa importanti wkoll. L-għarfien u l-ħiliet tal-produtturi tal-ġobon jidhru wkoll fil-proċess tat-tmelliħ, li jikseb togħma speċifika moderatament mielħa.

Il-prodott jieħu wkoll il-karatteristiċi speċifiċi tiegħu mill-ħalib mhux ipproċessat, li għandu jiġi miż-żona ġeografika. Ir-ragħa tal-annimali tal-ħalib f’din iż-żona jaffettwa l-aroma u t-togħma tal-ħalib mhux ipproċessat u l-kontenut għoli ta’ Lactobacillus delbrueckii subsp. bulgaricus. Il-perjodu itwal tar-ragħa huwa r-raġuni għad-diversità tal-minerali u l-vitamini fil-kompożizzjoni tal-ħalib mhux ipproċessat. Għandu kontenut ibbilanċjat speċifiku ta’ sustanzi minerali bħall-potassju, il-manjeżju, il-fosfru u l-kalċju, proteini u vitamini (A, B, E, D u l-aċidu foliku). Il-kompożizzjoni kimika, il-proprjetajiet fiżikokimiċi u l-maturità bijoloġika tal-ħalib, kif ukoll il-kundizzjonijiet ta’ maturazzjoni, jaffettwaw b’mod sinifikanti l-kwalità u t-togħma tal-ġobon.

Il-“Българско бяло саламурено сирене / Bulgarsko byalo salamureno sirene” għandu firxa wiesgħa ta’ użi fit-tisjir, għaliex l-istruttura tiegħu ssir elastika meta jissaħħan. Il-prodott huwa ingredjent fi platti tradizzjonali fir-reġjun fosthom l-insalata shopska, il-“banitsa” [magħmula mill-għaġina], u l-“mish-mash” [bajd imħabbat bil-ħaxix] kif deskritt minn Maria Baltadzhieva.

Referenza għall-pubblikazzjoni tal-Ispeċifikazzjoni tal-Prodott

https://www.mzh.government.bg/bg/politiki-i-programi/politiki-i-strategii/politiki-po-agrohranitelnata-veriga/zashiteni-naimenovaniya/blgarsko-byalo-salamureno-sirene/

---

(1)  ĠU L 343, 14.12.2012, p. 1.