IL-KUMMISSJONI EWROPEA
Brussell, 17.10.2023
COM(2023) 649 final
2023/0376(COD)
Proposta għal
DIRETTIVA TAL-PARLAMENT EWROPEW U TAL-KUNSILL
li temenda d-Direttiva 2013/11/UE dwar is-soluzzjoni alternattiva għat-tilwim, għat-tilwim tal-konsumaturi, kif ukoll id-Direttivi (UE) 2015/2302, (UE) 2019/2161 u (UE) 2020/1828
(Test b’rilevanza għaż-ŻEE)
{SEC(2023) 347 final} - {SWD(2023) 334 final} - {SWD(2023) 335 final} - {SWD(2023) 337 final}
MEMORANDUM TA’ SPJEGAZZJONI
1.KUNTEST TAL-PROPOSTA
Raġunijiet u objettivi tal-proposta
Id-Direttiva 2013/11/UE dwar is-Soluzzjoni Alternattiva għat-Tilwim tal-Konsumaturi (id-Direttiva ADR) tagħti lill-konsumaturi tal-UE l-possibbiltà li jsolvu t-tilwim tagħhom li jirriżulta minn obbligi kuntrattwali kontra negozjanti stabbiliti fl-UE bl-użu ta’ proċeduri barra mill-qorti ta’ kwalità. L-għan ewlieni huwa li jiġi żgurat li fl-Istati Membri kollha, l-entitajiet tal-ADR li jikkonformaw mal-kriterji komuni tal-kwalità jkunu jistgħu jiġu aċċessati biex isolvu t-tilwim fis-setturi kollha tas-suq tal-konsumaturi malajr, b’mod amikevoli, bi prezz raġonevoli u ġust. Din il-leġiżlazzjoni kienet kruċjali biex tipprovdi livell għoli ta’ protezzjoni tal-konsumatur fis-suq intern li jippermetti lill-konsumaturi jsolvu tilwim ta’ valur baxx li għalih joqogħdu lura milli jmorru l-qorti, minħabba l-ispiża u ż-żmien li jistgħu jkunu involuti. Għan-negozjanti, id-Direttiva tikkontribwixxi biex tgħinhom iżommu reputazzjoni tajba, jipparteċipaw fil-proċeduri tal-ADR u jikkonformaw mar-riżultati tal-ADR.
Id-Direttiva, madankollu, ġiet abbozzata aktar minn 10 snin ilu u ma tipprovdix tajjeb għal tilwim li jirriżulta minn xejriet ġodda tas-suq tal-konsumaturi. Tabilħaqq, il-konsumaturi tal-UE qed jixtru ħafna aktar online inkluż minn negozjanti mhux tal-UE. Sfortunatament, dan jimxi b’mod parallel ma’ esponiment akbar għal prattiki inġusti - permezz ta’ interfaċċi online - li materjalment ifixklu jew ixekklu, apposta jew effettivament, il-kapaċità tar-riċevituri tas-servizz li jagħmlu għażliet jew deċiżjonijiet awtonomi u infurmati (dark patterns), reklamar moħbi, riċensjonijiet foloz, preżentazzjonijiet distorti tal-prezzijiet jew nuqqas ta’ informazzjoni prekuntrattwali importanti. Dawn ix-xejriet għandhom impatt ukoll fuq ix-xiri offline sa ċertu punt peress li l-konsumaturi huma dejjem aktar influwenzati mill-kummerċjalizzazzjoni diġitali li taffettwa l-affinità tal-konsumaturi għal ditti u kummerċjanti speċifiċi. Dawn l-iżviluppi jipperikolaw il-fiduċja tal-konsumatur fis-swieq diġitali u jisfruttaw il-vulnerabbiltajiet tal-konsumatur. Dan ifisser li l-konsumaturi jeħtieġu proċeduri effiċjenti biex jittrattaw tilwim li qed isir dejjem aktar kumpless.
L-evalwazzjoni tal-Kummissjoni tal-2023 tal-implimentazzjoni tad-Direttiva tal-ADR madwar l-UE kkonkludiet li l-ADR, b’mod partikolari l-ADR transfruntiera, għadha ma tintużax biżżejjed f’ħafna Stati Membri minħabba għadd ta’ fatturi bħall-ispejjeż, il-proċeduri kumplessi, il-lingwa u l-liġi applikabbli. L-ambitu tad-Direttiva tal-ADR, li huwa definit b’mod strett, mhuwiex adattat biex isolvi firxa wiesgħa ta’ tilwim li jinqala’, b’mod partikolari fis-swieq diġitali. L-approċċ ta’ armonizzazzjoni minima meħud fid-Direttiva tal-ADR ippermetta lill-Istati Membri jfasslu l-qafas tal-ADR tagħhom stess li jaqbel mal-kultura, l-investiment, ir-riżorsi, l-infrastruttura, is-sensibilizzazzjoni, eċċ. F’dan l-isfond, il-Kummissjoni ħabbret il-Pakkett dwar l-Infurzar tal-Konsumatur fil-Programm ta’ Ħidma leġiżlattiv tagħha għall-2023 li ppreveda l-proposti tal-Kummissjoni b’emendi mmirati għad-Direttiva tal-ADR u r-revoka tar-Regolament dwar is-Soluzzjoni Online għat-Tilwim (ODR).
Din il-proposta għandha l-għan li żżomm l-approċċ attwali ta’ armonizzazzjoni minima u temendah biss biex tagħmlu aktar adattat għas-swieq moderni tal-konsumatur.
L-għanijiet tad-Direttiva tal-ADR riveduta huma li:
·tagħmel il-qafas tal-ADR adattat għas-swieq diġitali billi tkopri b’mod espliċitu firxa wiesgħa ta’ drittijiet tal-konsumatur tal-UE li jistgħu ma jiġux deskritti b’mod espliċitu fil-kuntratti jew li huma relatati mal-istadji prekuntrattwali;
·ittejjeb l-użu tal-ADR f’tilwim transfruntier permezz ta’ assistenza aktar personalizzata għall-konsumaturi u n-negozjanti;
·tissimplifika l-proċeduri tal-ADR għall-benefiċċju tal-atturi kollha; inkluż it-tnaqqis tal-obbligi ta’ rappurtar tal-entitajiet tal-ADR u l-obbligi ta’ informazzjoni tan-negozjanti filwaqt li n-negozjanti jiġu mħeġġa jżidu l-involviment tagħhom fit-talbiet tal-ADR permezz tal-introduzzjoni ta’ dmir ta’ tweġiba.
Sabiex jintlaħqu dawn l-għanijiet, l-elementi li ġejjin qed jitressqu f’din il-proposta:
·Ambitu tal-applikazzjoni: il-kjarifika u t-twessigħ tal-ambitu materjali u ġeografiku tad-Direttiva tal-ADR biex ikopru:
·kull tip ta’ tilwim dwar il-liġi tal-konsumatur tal-UE (jiġifieri mhux limitat għal dak relatat ma’ kuntratt). Problema bid-Direttiva attwali hija li l-ambitu tagħha huwa definit b’mod strett u għalhekk jista’ jeskludi tilwim relatat ma’ stadji prekuntrattwali jew drittijiet statutorji bħall-bdil ta’ fornituri ta’ servizzi jew li għandu jiġi protett kontra l-imblukkar ġeografiku;
·li jiġi kopert tilwim bejn il-konsumaturi tal-UE u n-negozjanti mhux tal-UE (li se jkunu jistgħu jipparteċipaw fil-proċeduri tal-ADR fuq bażi volontarja, bl-istess mod bħal għan-negozjanti tal-UE).
·Dmir ta’ tweġiba: ir-rekwiżit li n-negozjanti jwieġbu għal mistoqsija ta’ entità tal-ADR, jekk għandhomx l-intenzjoni li jipparteċipaw fil-proċess tal-ADR propost jew le (iżda ma jimponux parteċipazzjoni fil-proċessi tal-ADR).
·Obbligi ta’ informazzjoni: it-tneħħija tal-obbligu fuq in-negozjanti li jinfurmaw lill-konsumaturi dwar l-entitajiet tal-ADR f’każ li ma jkollhomx l-intenzjoni li jinvolvu ruħhom.
·ADR transfruntiera: l-għoti ta’ rwol ġdid ta’ appoġġ lill-korpi rilevanti u speċjalment liċ-Ċentri Ewropej tal-Konsumaturi (ECCs) biex jassistu u jissenjalaw lill-konsumaturi f’tilwim transfruntier u biex il-Kummissjoni tintroduċi għodod diġitali faċli għall-utent biex jgħinu lill-konsumaturi jiġu ssenjalati lil korp kompetenti biex isolvu t-tilwim tagħhom.
Fil-Komunikazzjoni tagħha dwar ‘Il-kompetittività fit-tul tal-UE: inħarsu lil hinn mill-2030’, il-Kummissjoni enfasizzat l-importanza ta’ sistema regolatorja li tiżgura li l-objettivi tal-Unjoni jintlaħqu bl-anqas spejjeż possibbli. Għalhekk hija impenjat ruħha għal spinta ġdida biex tirrazzjonalizza u tissimplifika r-rekwiżiti ta’ rappurtar, bl-għan aħħari li tnaqqas dawn il-piżijiet b’25 %, mingħajr ma timmina l-objettivi ta’ politika relatati. Għaldaqstant, ir-rieżami tal-ADR/ODR jinsab taħt il-Pakkett tar-Razzjonalizzazzjoni.
Ir-rekwiżiti ta’ rappurtar għandhom rwol ewlieni fl-iżgurar ta’ infurzar korrett u monitoraġġ xieraq tal-leġiżlazzjoni. Il-kostijiet tagħhom huma kumplessivament ikkumpensati sew mill-benefiċċju li jġibu magħhom, b’mod partikolari fil-monitoraġġ u fl-iżgurar tal-konformità ma’ miżuri ta’ politika ewlenin. Madankollu, ir-rekwiżiti ta’ rapportar jistgħu jimponu wkoll piżijiet sproporzjonati fuq il-partijiet ikkonċernati, li jaffettwaw b’mod partikolari lill-SMEs u lill-mikrokumpaniji. L-akkumulazzjoni tagħhom maż-żmien tista’ tirriżulta f’obbligi żejda, duplikati, jew obsoleti, frekwenza u twaqqit ineffiċjenti, jew f’metodi ta’ ġbir inadegwati. Billi tissimplifika aktar il-qafas tal-ADR madwar l-UE, l-inizjattiva għandha tiġġenera ffrankar tal-ispejjeż u inqas piż amministrattiv kemm għall-awtoritajiet kompetenti tal-ADR kif ukoll għan-negozjanti f’konformità mal-prinċipji REFIT u “one-in-out-out” u tikkontribwixxi wkoll għal kundizzjonijiet ekwi akbar għan-negozjanti tal-UE u mhux tal-UE.
Għalhekk, is-simplifikazzjoni tal-obbligi ta’ rappurtar u t-tnaqqis tal-piżijiet amministrattivi huma prijorità.
F’dan il-kuntest, il-proposta preżenti għandha l-għan li tissimplifika l-inizjattivi inklużi fir-rimedju tal-konsumatur billi:
(a)it-tneħħija tal-obbligi ta’ informazzjoni tal-ADR għan-negozjanti;
(b)L-entitajiet tal-ADR ikollhom jipprovdu rapporti biennali tal-attivitajiet tagħhom minflok rapporti annwali lill-Awtoritajiet Kompetenti tal-ADR u ma jkollhomx għalfejn jirrapportaw aktar dwar il-kooperazzjoni tagħhom fi ħdan netwerks ta’ entitajiet tal-ADR li jiffaċilitaw is-soluzzjoni ta’ tilwim transfruntier, jekk applikabbli;
(c)L-entitajiet tal-ADR mhux se jibqa’ jkollhom għalfejn jipprovdu lill-awtoritajiet kompetenti kull sentejn valutazzjoni tal-effettività tal-kooperazzjoni tagħhom fi ħdan in-netwerks tal-entitajiet tal-ADR, it-taħriġ ipprovdut lill-persunal tagħhom u valutazzjoni tal-effettività tal-proċedura tal-ADR offruta mill-entità u ta’ modi possibbli biex tittejjeb il-prestazzjoni tagħha.
Konsistenza mad-dispożizzjonijiet eżistenti fil-qasam ta’ politika
Id-Direttiva tal-ADR hija direttiva proċedurali li tipprovdi kriterji ta’ kwalità li għandhom jiġu applikati mill-entitajiet tal-ADR b’mod simili madwar l-Unjoni u l-proċeduri għall-Istati Membri biex jakkreditaw tali entitajiet, jimmonitorjaw il-konformità tagħhom mal-kriterji u jiżguraw livell effettiv ta’ trasparenza dwar l-eżistenza u l-funzjonament ta’ tali entitajiet.
L-emendi proposti għandhom l-għan li jiżguraw li t-tilwim kollu tal-konsumaturi, b’mod partikolari dak li jinqala’ fis-swieq diġitali, inklużi l-obbligi mhux kuntrattwali, u dak relatat mad-drittijiet statutorji ekstrakuntrattwali jkun jista’ jiġi indirizzat mill-entitajiet tal-ADR. Fil-kjarifika u l-estensjoni tal-kamp ta’ applikazzjoni tad-Direttiva tal-ADR, l-emendi se jżidu l-konsistenza tagħha mal-leġiżlazzjoni eżistenti tal-konsumatur billi jippermettu lill-entitajiet tal-ADR jittrattaw firxa usa’ ta’ tilwim li huwa speċifikat fl-anness tagħha. It-titjib għalhekk se jaffettwa b’mod pożittiv il-kisba tal-objettivi fil-qasam ta’ politika.
Il-proposta hija wkoll parti mill-ewwel pakkett ta’ miżuri biex jiġu razzjonalizzati r-rekwiżiti ta’ rappurtar. Dan huwa pass fi proċess kontinwu li jħares b’mod komprensiv lejn rekwiżiti ta’ rapportar eżistenti, bil-ħsieb li jivvaluta r-rilevanza kontinwa tagħhom u biex jagħmilhom aktar effiċjenti. Ir-razzjonalizzazzjoni introdotta minn dawn il-miżuri mhux se taffettwa l-kisba tal-objettivi fil-qasam tal-politika. Madankollu, l-iffrankar tal-ispejjeż u l-ħin investit fl-obbligi ta’ rappurtar, li bl-ebda mod ma jtejbu l-proċess tal-ADR, huwa ta’ vantaġġ għan-negozji u l-entitajiet tal-ADR.
Konsistenza ma’ politiki oħra tal-Unjoni
L-Artikolu 21 tal-Att dwar is-Servizzi Diġitali dwar is-soluzzjoni tat-tilwim barra mill-qorti huwa mingħajr preġudizzju għad-Direttiva tal-ADR (l-Artikolu 21 (9)). Barra minn hekk, tirregola kif l-utenti tas-servizzi intermedjarji jistgħu jilmentaw dwar id-deċiżjonijiet ta’ moderazzjoni tal-kontenut tal-intermedjarju fir-rigward ta’ kontenut illegali jew dannuż, inkluż meta l-fornitur tas-servizzi jiddeċiedi li ma jiħux azzjoni wara avviż. Anki jekk tali kontenut jew kontenut illegali li b’xi mod ieħor ikun inkompatibbli mat-termini u l-kundizzjonijiet intermedjarji jista’ jikkonċerna l-prattiki kummerċjali ħżiena ta’ kummerċjant terz, it-tilwima skont l-Artikolu 21 tad-DSA tiġi solvuta bejn l-intermedjarju u r-riċevitur ikkonċernati mid-deċiżjoni ta’ moderazzjoni tal-kontenut u tkun limitata għar-restrizzjonijiet applikabbli għall-kontenut jew għall-kont inkwistjoni. Id-Direttiva tal-ADR se tibqa’ applikabbli għat-tilwim tal-konsumaturi man-negozjant ta’ parti terza li ġeneralment jikkonċerna kif għandhom jittieħdu l-flus lura, kif jissewwa prodott difettuż, kif jitwaqqaf kuntratt li kien ibbażat fuq termini inġusti, eċċ. Id-Direttiva tal-ADR, għalhekk, tipprovdi mezzi komplementari lill-konsumaturi sabiex isolvu kwistjonijiet marbuta ma’ prattiki kummerċjali illegali tan-negozjant u mhux mal-moderazzjoni tal-kontenut imwettqa mill-intermedjarju.
Fil-Programm dwar l-Idoneità u l-Prestazzjoni tar-Regolamentazzjoni (REFIT), il-Kummissjoni tiżgura li l-leġiżlazzjoni tagħha hija adattata għall-użu tagħha, immirata lejn il-ħtiġijiet tal-partijiet ikkonċernati u xxejjen il-piżijiet filwaqt li tilħaq l-objettivi tagħha. Għaldaqstant, dawn il-proposti huma parti mill-Programm REFIT, li jnaqqas il-kumplessità tal-piżijiet tar-rapportar li jirriżultaw mill-ambjent legali tal-UE.
Filwaqt li ċerti rekwiżiti ta’ rapportar huma essenzjali, jeħtieġ li jkunu effiċjenti kemm jista’ jkun, jevitaw id-duplikazzjonijiet, ineħħu piżijiet mhux meħtieġa u jużaw kemm jista’ jkun soluzzjonijiet diġitali u interoperabbli.
Ir-razzjonalizzazzjoni introdotta mill-emendi mmirati għad-Direttiva tal-ADR mhux se taffettwa l-kisba tal-objettivi fil-qasam ta’ politika, għar-raġunijiet li ġejjin:
·L-informazzjoni obbligatorja dwar l-ADR fuq il-website tan-negozjanti mhijiex effettiva għal dawk in-negozjanti li m’għandhomx l-intenzjoni li jinvolvu ruħhom fi proċeduri tal-ADR u mhumiex obbligati li jagħmlu dan skont il-liġi nazzjonali jew tal-UE. Għall-kuntrarju, in-negozjanti li jimpenjaw ruħhom b’mod attiv fl-ADR se jkunu liberi li jippromwovu dan il-fatt lill-klijenti tagħhom b’mod adegwat.
·L-obbligu ta’ rappurtar tal-entitajiet tal-ADR huwa ssimplifikat biex titnaqqas il-frekwenza tar-rapporti tagħhom minn sena għal sentejn. Dan se jippermetti li jkun hemm aktar informazzjoni biex tinġabar u b’hekk ikun hemm bażi ta’ data aħjar biex jiġi vvalutat il-funzjonament tagħhom fuq perjodu ta’ żmien medju. Xi punti ma għandhomx ikunu obbligatorji peress li huma l-entitajiet tal-ADR li jiddeċiedu liema informazzjoni hija l-aktar rilevanti biex jippubblikaw u jew jittrażmettu lill-awtoritajiet kompetenti. L-ispejjeż u l-ħin iffrankati għandhom jintużaw għal skopijiet oħra bħat-taħriġ tal-persunal tagħhom.
2.BAŻI ĠURIDIKA, SUSSIDJARJETÀ U PROPORZJONALITÀ
Bażi ġuridika
Il-bażi ġuridika għad-Direttiva tal-ADR riveduta proposta hija l-Artikolu 114 tat-TFUE dwar it-tlestija tas-suq intern, b’kunsiderazzjoni xierqa għall-Artikolu 169 tat-TFUE. Huwa jagħti lill-UE s-setgħa li tadotta miżuri għall-approssimazzjoni tar-regoli nazzjonali dwar l-istabbiliment u l-funzjonament tas-suq intern. Billi toħloq livell għoli ta’ protezzjoni tal-konsumatur, il-proposta għandha l-għan li tgħin lis-suq intern jiffunzjona mingħajr xkiel.
Sussidjarjetà
Id-Direttiva tal-ADR riveduta se tipprovdi aċċess imtejjeb għall-konsumaturi u n-negozjanti kollha għal soluzzjoni tat-tilwim barra mill-qorti ta’ kwalità għolja u kosteffiċjenti adattata għas-swieq diġitali. Li l-ADR isir aktar sempliċi u aktar kosteffikaċi biex jissolva tilwim b’dimensjoni transfruntiera, il-promozzjoni tar-raggruppament ta’ każijiet simili fi proċedura waħda jgħinu biex tiżdied l-effiċjenza tas-soluzzjoni tat-tilwim inkluż f’kuntest transfruntier. Dan imbagħad għandu jagħti spinta lill-fiduċja tal-konsumatur fix-xiri online iżda wkoll fil-konsum tat-turiżmu u s-servizzi tal-ivvjaġġar fl-UE u lil hinn minnha.
L-objettivi tal-azzjoni proposta ma jistgħux jintlaħqu b’mod suffiċjenti mill-Istati Membri waħedhom u jistgħu għalhekk, minħabba l-iskala jew l-effetti tal-azzjoni proposta, jintlaħqu aħjar mill-UE. L-azzjoni tal-UE tiżgura livell konsistentement għoli ta’ protezzjoni tal-konsumatur, aktar fiduċja tal-konsumatur fl-ADR u aktar networking u skambju tal-aħjar prattiki fil-livell tal-UE (eż. dwar l-użu ta’ għodod diġitali biex l-ADR issir aktar kosteffiċjenti u konsistenti, proċeduri ta’ trattament tal-każijiet, ADR speċifika għas-settur, eċċ).
Ir-rekwiżiti ta’ rapportar li huma ssimplifikati huma imposti mil-liġi tal-UE. Ir-razzjonalizzazzjoni għalhekk issir aħjar fil-livell tal-UE biex jiġu żgurati ċ-ċertezza legali u l-konsistenza tar-rappurtar għall-finijiet tal-komparabbiltà tad-data meta jiġu evalwati l-implimentazzjoni u l-progress tal-ADR fl-Istati Membri kollha.
Proporzjonalità
Il-valutazzjoni tal-impatt wettqet test tal-proporzjonalità biex tiżgura li l-opzjonijiet ta’ politika proposti jkunu proporzjonati abbażi tal-kostijiet u r-riżorsi. Il-proposta għandha approċċ ambizzjuż u li jibqa’ validu fil-futur li jwassal għal benefiċċji ogħla għall-konsumaturi u għas-soċjetà b’mod ġenerali bis-saħħa ta’ estensjoni u kjarifika tal-kamp ta’ applikazzjoni. Dan se jippermetti li aktar tilwim jiġi indirizzat barra mill-qorti, iżid il-fiduċja tal-konsumatur fis-swieq u jagħmel is-swieq aktar effiċjenti. Is-soluzzjoni aktar faċli għat-tilwim qed tiffaċilita wkoll il-ġestjoni tal-konsumaturi wara l-bejgħ għan-negozji filwaqt li se jitnaqqas il-piż tat-trasparenza tagħhom. L-introduzzjoni ta’ dmir għan-negozjanti li jwieġbu għal talbiet minn entitajiet tal-ADR se tippermetti li l-proċeduri jkunu aktar rapidi peress li se jkun ċar minnufih jekk in-negozjant jaqbilx li jinvolvi ruħu jew le. Il-proposta ma tmurx lil hinn minn dak li hu strettament meħtieġ sabiex jintlaħqu l-objettivi tagħha.
Hija żżomm l-approċċ ta’ armonizzazzjoni minima, filwaqt li tipprovdi grad ta’ flessibbiltà għall-Istati Membri inkluż biex jiddeċiedu jekk il-parteċipazzjoni tan-negozjanti fl-ADR hijiex obbligatorja jew volontarja, jew imħallta skont is-setturi tas-suq.
Minkejja l-għadd kbir ta’ konsumaturi li jużaw sistemi għas-soluzzjoni tat-tilwim ipprovduti minn swieq online bħala parti mis-servizzi intermedjarji tagħhom, il-Kummissjoni mhijiex qed tipproponi li tirregola tali servizzi. Minflok, hija adottat rakkomandazzjoni indirizzata lis-swieq online u lill-assoċjazzjonijiet kummerċjali tal-UE, biex tagħmilha ċara li s-sistemi tagħhom għas-soluzzjoni tat-tilwim huma għodod importanti għas-soluzzjoni alternattiva għat-tilwim, li jistgħu jsolvu ħafna tilwim tal-konsumaturi u jtejbu ħafna l-aċċess għat-tilwim transfruntier. Jekk dawn is-sistemi jiġu stabbiliti internament, dawn għandhom ikunu konformi mal-kriterji tal-kwalità fid-Direttiva tal-ADR biex jiġu żgurati l-indipendenza u l-ġustizzja kemm għall-konsumaturi kif ukoll għan-negozjanti li huma partijiet fit-tilwima. Barra minn hekk, ir-Regolament tal-ODR huwa propost li jitħassar peress li ma jġibx benefiċċju sinifikanti f’termini ta’ aċċess għal ADR ta’ kwalità għall-konsumaturi online. Dan it-tħassir se jnaqqas b’mod sostanzjali l-piż għan-negozji peress li l-obbligu għall-kummerċjanti online kollha stabbiliti fl-UE li jipprovdu link għall-pjattaforma tal-ODR u li jżommu indirizz tal-email apposta huwa abolit.
Ir-razzjonalizzazzjoni tar-rekwiżiti ta’ rappurtar lill-entitajiet tal-ADR tnaqqas il-piż amministrattiv billi tintroduċi xi bidliet fir-rekwiżiti eżistenti li ma jaffettwawx is-sustanza tal-objettiv ta’ politika usa’. Il-proposta hija limitata għal dawk il-bidliet li huma meħtieġa biex jiġi żgurat rappurtar effiċjenti mingħajr ma jinbidel l-ebda wieħed mill-elementi sostanzjali tal-leġiżlazzjoni kkonċernata.
Għażla tal-istrument
L-istrument magħżul huwa Direttiva li temenda d-Direttiva 2013/11/UE. Direttiva hija vinkolanti fir-rigward tar-riżultat tal-kisba tal-funzjonament tas-suq intern, iżda tħalli lill-awtoritajiet nazzjonali l-għażla tal-forma u tal-metodi. Dan se jippermetti lill-Istati Membri jemendaw il-leġiżlazzjoni fis-seħħ (b’riżultat tat-traspożizzjoni tad-Direttiva 2013/11/UE) sa fejn ikun meħtieġ biex tiġi żgurata l-konformità, filwaqt li jillimita l-impatt ta’ tali riforma fuq is-sistemi leġiżlattivi tagħhom.
B’mod parallel ma’ din ir-reviżjoni, qed jiġi propost li jitħassar ir-Regolament (UE) Nru 524/2013 dwar is-soluzzjoni online għat-tilwim (ODR) għat-tilwim tal-konsumaturi u li titwaqqaf il-pjattaforma tal-ODR li tipprovdi minħabba l-ineffiċjenza ta’ din is-sistema u l-ispejjeż sproporzjonati għan-negozji tal-UE. Huwa għalhekk meħtieġ li jiġu emendati d-Direttivi tal-UE li fihom referenzi għar-Regolament dwar l-ODR.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
Evalwazzjonijiet ex post/kontrolli tal-idoneità tal-leġiżlazzjoni eżistenti
Fl-2023, il-Kummissjoni wettqet evalwazzjoni sħiħa f’konformità mal-5 kriterju (effettività, effiċjenza, rilevanza, koerenza, valur miżjud tal-UE) fis-Sett ta’ Għodod għal Regolamentazzjoni Aħjar. Il-kwistjoni ewlenija tal-eżerċizzju kienet li jiġi vvalutat sa liema punt id-Direttiva tal-ADR għenet lill-konsumaturi jsolvu t-tilwim tagħhom man-negozjanti b’mod sodisfaċenti u f’konformità mar-rekwiżiti ta’ kwalità armonizzati tagħha kif spjegat fil-Kapitolu II tad-Direttiva tal-ADR.
B’mod ġenerali, id-Direttiva tal-ADR ġiet implimentata b’mod korrett mill-Istati Membri kollha. Minħabba l-approċċ ta’ armonizzazzjoni minima, l-Istati Membri jiddeċiedu dwar il-governanza, l-arkitettura u l-istruttura tal-qafas nazzjonali tal-ADR. Il-parteċipazzjoni tal-kummerċjanti tvarja ħafna bejn l-Istati Membri, skont jekk il-parteċipazzjoni tagħhom hijiex obbligatorja jew volontarja, jekk l-eżitu huwiex vinkolanti jew le, jew jekk hemmx prattiċi ta’ stigmatizzazzjoni, fost l-oħrajn.
L-aċċess għall-ADR jiddependi fuq it-tariffi, l-assistenza disponibbli, il-proċeduri faċli għall-utent, l-għarfien, eċċ. Hemm ħafna ostakli fl-aċċess għall-ADR, b’mod partikolari f’każijiet transfruntieri (fir-rigward tal-liġi applikabbli, il-lingwa, l-ispejjeż, il-proċeduri kumplessi). L-investimenti mill-entitajiet tal-ADR fid-diġitalizzazzjoni wrew li jagħmlu l-ADR irħas fit-tul u jtejbu l-konsistenza fl-eżitu tal-ADR. L-ispejjeż tal-ADR ivarjaw b’mod sinifikanti bejn l-Istati Membri skont l-infrastruttura eżistenti, il-mudell ta’ finanzjament, l-għadd ta’ entitajiet tal-ADR akkreditati u mmonitorjati, it-tariffi tal-konsumaturi u tan-negozjanti kif ukoll jekk kienx hemm strutturi tal-ADR li kienu jeżistu qabel. IIn-nuqqas ta’ data dwar l-ispejjeż, jagħmilha diffiċli li tiġi kkalkulata l-kosteffettività tal-ADR. Madankollu, meta mqabbla mal-ispejjeż li jġarrbu l-konsumaturi, in-negozjanti u l-Istati Membri jekk it-tilwim kollu tal-konsumaturi kellu jiġi ttrattat fil-qorti, is-sistema tal-ADR hija ħafna aktar kosteffiċjenti. Jista’ possibbilment isir xi ffrankar fl-ispejjeż billi jitnaqqsu ċerti piżijiet ta’ rappurtar li ġew ivvalutati bħala sproporzjonati minn ħafna partijiet ikkonċernati.
Ir-restrizzjoni tal-kamp ta’ applikazzjoni għan-negozjanti stabbiliti fl-UE madankollu qed iċċaħħad lil ħafna konsumaturi milli jaċċessaw sistemi ta’ rimedju ġust. F’sitwazzjonijiet ta’ kriżi, eż. il-pandemija tal-COVID-19 u l-kriżi reċenti tal-enerġija, il-proċeduri tal-ADR urew li huma mekkaniżmi importanti biex jiġi indirizzat l-għadd akbar ta’ kwistjonijiet tal-konsumatur li ġġeneraw il-kriżijiet. Għalhekk, dawn il-kriżijiet ma jiddubitawx ir-rilevanza tad-Direttiva, iżda l-kwistjoni hija jekk ċerti mekkaniżmi għandhomx jissaħħu b’mod partikolari biex l-entitajiet tal-ADR ikunu jistgħu jittrattaw aktar każijiet fl-istess ħin permezz ta’ raggruppament ta’ każijiet.
L-approċċ ta’ armonizzazzjoni minima ntlaqa’ tajjeb u l-partijiet ikkonċernati rrakkomandaw bil-qawwa li jinżamm. L-entitajiet tal-ADR ibbenefikaw minn azzjonijiet fil-livell tal-UE li offritilhom pjattaforma għall-iskambju tal-aħjar prattiki u assistenza finanzjarja biex itejbu l-infrastruttura tagħhom inkluż it-trattament tal-każijiet, il-bini tal-kapaċità u l-għarfien tal-ADR tagħhom.
Il-konklużjonijiet tal-evalwazzjoni wasslu lill-Kummissjoni biex tirrifletti fuq proposta leġiżlattiva biex temenda d-Direttiva tal-ADR attwali biex tagħmilha aktar adattata b’mod partikolari għas-swieq diġitali.
Konsultazzjonijiet mal-partijiet ikkonċernati
Għal approċċ ibbażat fuq l-evidenza fit-tfassil tal-politika tagħha, il-Kummissjoni:
(a)wettqet żewġ konsultazzjonijiet pubbliċi multilingwi b’approċċ retrospettiv u li jħares’ il quddiem dwar l-ADR; u ppubblikat Sejħa għal Evidenza li enfasizzat il-miżuri ta’ politika għar-reviżjoni tad-Direttiva tal-ADR fuq is-sit web tagħha Semma’ Leħnek;
(b)organizza diversi workshops ta’ konsultazzjoni fiżika u ibrida inkluża l-assemblea tal-ADR 2021; diskussjoni tal-panel fis-Summit tal-Konsumatur u d-diskussjoni madwar mejda dwar l-ADR transfruntieri fl-2022;
(c)fasslu kwestjonarju biex jgħin lill-awtoritajiet kompetenti tal-ADR jikkompilaw ir-rapporti nazzjonali tal-ADR tagħhom tal-2022 f’konformità mal-Artikolu 26 tad-Direttiva tal-ADR;
(d)ħadu sehem f’diversi avvenimenti biex jiġbru feedback dwar kif l-ADR tista’ tittejjeb (eż. avvenimenti ta’ anniversarju tal-entitajiet tal-ADR, avvenimenti tan-netwerk tal-ADR ta’ FIN-Net u Travel-net, sessjonijiet ta’ informazzjoni, eċċ);
(e)ikkummissjona studju li ffoka fuq l-implimentazzjoni tal-ADR fuq il-post f’ 4 ġurisdizzjonijiet u studju dwar l-imġiba tal-ADR;
(f)ħares lejn id-dokumenti ta’ pożizzjoni reċenti dwar l-ADR mill-partijiet ikkonċernati ewlenin inklużi l-ECC-Net, il-BEUC, eċċ.
Maġġoranza kbira tal-partijiet ikkonċernati fil-kategoriji kollha, enfasizzaw il-ħtieġa li tiġi riveduta d-Direttiva tal-ADR billi jitwessa’ l-kamp ta’ applikazzjoni tagħha biex tinkludi b’mod espliċitu tilwim relatat mad-drittijiet statutorji tal-konsumatur indipendentement mill-eżistenza jew le ta’ kuntratt jew dak li jinsab fil-kuntratt, u b’hekk il-qafas tal-ADR isir aktar aċċessibbli u b’hekk kosteffettiv, b’mod partikolari biex jiġi indirizzat tilwim transfruntier. Kien hemm fehmiet diverġenti dwar jekk l-ADR kollettiva għandhiex tiġi inċentivata permezz tar-raggruppament ta’ każijiet minħabba r-riżorsi u l-kapaċità limitati ta’ xi entitajiet tal-ADR. Fil-kuntest tal-konsultazzjoni pubblika miftuħa, 58 % mill-111 rispondent esprimew l-appoġġ tagħhom għall-ADR kollettiva. Id-diskussjoni transfruntiera madwar mejda kkonkludiet ukoll li l-ADR kollettiva għandha tiġi mħeġġa bħala mod kif tiġi żgurata s-sostenibbiltà tal-entitajiet tal-ADR fi żminijiet ta’ kriżi. Madankollu, il-partijiet ikkonċernati enfasizzaw li t-tfassil tal-ADR kollettiva għandu jitħalla f’idejn l-Istati Membri.
Xi partijiet ikkonċernati jemmnu li t-titjib tar-rwol tal-punti ta’ kuntatt tal-ODR biex isiru punti ta’ kuntatt de factotal-ADR jtejjeb b’mod partikolari l-potenzjal biex jissolva tilwim transfruntier. Il-maġġoranza tal-partijiet ikkonċernati ħasbu li peress li l-pjattaforma tal-ODR hija ineffettiva, kien meħtieġ li jiġu pprovduti għodod faċli għall-utent għal sinjalar aħjar tal-konsumatur dwar il-possibbiltajiet ta’ rimedju tagħhom u l-entitajiet tal-ADR possibbli li għandhom jintużaw.
Il-partijiet ikkonċernati enfasizzaw ukoll li l-ECCs għandhom rwol importanti ħafna biex jgħinu lill-konsumaturi bi problemi fix-xiri transfruntier tagħhom. Pereżempju, il-ministerjali informali dwar l-affarijiet tal-konsumatur organizzat mill-Presidenza Ċeka tal-Kunsill f’Settembru 2022 ikkonferma li l-Istati Membri kollha huma sodisfatti bl-assistenza pprovduta mill-ECC-Net lill-konsumaturi fit-tilwim transfruntier tagħhom u jaraw ir-rwol tagħhom imsaħħaħ fil-futur.
Il-parteċipanti fl-Assemblea tal-ADR tal-2021 enfasizzaw l-importanza li jitnaqqsu l-obbligi ta’ rappurtar għall-entitajiet tal-ADR biex jilliberaw riżorsi li jistgħu jintużaw biex jespandu s-sensibilizzazzjoni tagħhom.
Ġbir u użu tal-għarfien espert
Il-Kummissjoni kkummissjonat tliet studji relatati mal-ADR lil kuntratturi esterni:
(1)Studju tal-ġbir ta' data: jiġifieri biex jiġi analizzat ir-rispons li wasal mill-konsultazzjoni pubblika li tħares lura, ir-rapporti nazzjonali tal-ADR ippreżentati lill-Kummissjoni mill-Istati Membri kollha tal-UE, in-Norveġja u l-Iżlanda, u 5 studji tal-każ li kienu bbażati fuq riċerka bbażata biss fuq id-dokumentazzjoni u intervisti fis-setturi li ġejjin (il-kummerċ elettroniku, l-ivvjaġġar, il-finanzi, l-IA fl-ADR, u l-akkreditazzjoni tal-entitajiet tal-ADR).
(2)Studju dwar l-imġiba tal-ADR dwar kif il-konsumaturi għandhom jiġu mħajra jużaw l-ADR u kif il-lawbot assistit mill-IA jgħin lill-konsumaturi jifhmu aħjar ir-rimedju tagħhom u jsibu l-entità tal-ADR it-tajba.
(3)Studju legali li eżamina l-letteratura akkademika dwar l-ADR/l-ODR f’4 Stati Membri tal-UE.
Valutazzjoni tal-impatt
Il-Valutazzjoni tal-Impatt analizzat 4 opzjonijiet differenti. Dik preferuta rreferiet għall-estensjoni tal-kamp ta’ applikazzjoni materjali tad-Direttiva, is-simplifikazzjoni tal-ADR transfruntier u l-introduzzjoni tad-dmir ta’ tweġiba għan-negozjanti.
Din l-opzjoni tagħmel l-għadd ta’ tilwim potenzjali tal-ADR jiżdied b’madwar 4.5 % bħala konsegwenza diretta tal-estensjoni tal-kamp ta’ applikazzjoni materjali tad-Direttiva għal tilwim tal-konsumaturi li jmur lil hinn minn kwistjonijiet kuntrattwali stretti, peress li tilwim addizzjonali li jikkonċerna drittijiet statutorji li mhumiex imsemmija b’mod espliċitu f’kuntratt jew relatati ma’ kwistjonijiet li jirriżultaw mid-drittijiet tal-konsumatur bħall-bdil bejn il-fornituri tas-servizzi, id-diskriminazzjoni, it-trasparenza tal-prezzijiet u l-informazzjoni prekuntrattwali, jew il-portabbiltà tal-kontenut jistgħu jiġu inklużi. Bħalissa, kif jidher fid-definizzjoni tal-problema tal-valutazzjoni tal-impatt, hemm madwar 2,250,000 konsumatur li qed jesperjenzaw kwistjonijiet u li potenzjalment jixtiequ jsolvuhom permezz tal-ADR. Madankollu, dan l-għadd kbir ta’ konsumaturi interessati fl-ADR jonqos sostanzjalment f’dak li għandu x’jaqsam mat-talba għal proċedura tal-ADR. Dan huwa dovut għal diversi fenomeni bħan-nuqqas ta’ għarfien dwar l-entitajiet eżistenti tal-ADR, dewmien twil li għandu jkun mistenni eċċ. Il-konsumaturi jibbilanċjaw l-ammont tat-telf tagħhom mal-piż li jipprevedu u se jiddeċiedu li jitolbu proċedura tal-ADR biss jekk l-ammont inkwistjoni jkun relattivament għoli. Il-korpi tal-ADR iwettqu testijiet ta’ eliġibbiltà pereżempju dwar il-kamp ta’ applikazzjoni tad-drittijiet ikkonċernati u dwar it-tip ta’ evidenza li għandha tiġi pprovduta fir-rigward ta’ kuntatti preċedenti man-negozjant. Dawn it-testijiet ikomplu jnaqqsu l-għadd ta’ każijiet li finalment huma soġġetti għal proċess tal-ADR. Skont id-data trażmessa minn 23 awtorità kompetenti nazzjonali, bħala medja biss 300,000 każ fis-sena, fl-UE kollha huma aċċettati bħala eliġibbli biex jiġu solvuti permezz ta’ proċedura tal-ADR. Madwar nofs minn dawk mhux se jipproċedu peress li n-negozjanti fil-biċċa l-kbira tal-każijiet mhumiex obbligati li jaqblu li jipparteċipaw, jew in-negozjant u l-konsumatur jaqblu li jsolvu t-tilwima qabel ma jintemm il-proċess tal-ADR, jew ma jistgħux isibu soluzzjoni aċċettabbli u jiddeċiedu li jabbandunaw il-proċess tal-ADR.
Mit-2,250,000 konsumatur interessati li jwettqu ADR, madwar 4.5 % għandhom tilwima li llum taqa’ barra mill-kamp ta’ applikazzjoni tad-Direttiva tal-ADR u għalhekk ma tkunx eliġibbli għall-ADR (100,000 tilwima). Għalhekk, it-tilwim potenzjali b’din il-miżura jiżdied minn 300,000 tilwima attwali għal 400,000. Għal kull tilwima eliġibbli, tintbagħat notifika mill-entità tal-ADR li tirċievi lment lin-negozju kkonċernat biex jibda t-tilwima barra mill-qorti. Minn dawn l-400,000 notifika mibgħuta mill-entitajiet tal-ADR lin-negozji, 240,000 isiru tilwimiet, filwaqt li madwar 128,000 ma jiġux imwieġba.
Jekk fid-Direttiva jiġi introdott dmir ta’ tweġiba, huwa stmat li l-ispiża għan-negozji biex jibagħtu tweġiba waħda hija ta’ madwar EUR 20 (inklużi t-tħejjija, l-ipproċessar u t-trażmissjoni), li jirriżulta fi spiża totali għan-negozji ta’ EUR 2.6 miljun fis-sena, jew EUR 23 miljun f’ 10 snin. Sehem mill-128,000 tilwima potenzjali li n-negozji issa jkollhom iwieġbu għalihom jista’ jinbidel f’tilwim reali, bi tweġibiet negattivi min-negozji li jirriżultaw f’ċertezza msaħħa għall-konsumaturi, li jistgħu jiddeċiedu li jressqu t-talba tagħhom (jew le) xi mkien ieħor. Mill-128,000 tilwima potenzjali, huwa stmat li madwar 77,000 se jinbidlu f’tilwim attwali (l-aktar dawk marbuta ma’ negozji li qabel ma kinux konxji tal-ADR, għal total ta’ kważi 200,000 tilwim ġdid taħt din l-opzjoni ta’ politika). Jekk il-konsumaturi jirbħu 90 % tad-drabi (bin-negozji jaċċettaw l-eżitu tal-ADR), dan inaqqas id-detriment b’EUR 33 miljun kull sena, jiġifieri EUR 290 miljun f’10 snin. Madankollu, it-trattament ta’ dawn l-200,000 tilwima ġdida jista’ jiswa sa EUR 60 miljun kull sena (EUR 527 miljun f’10 snin) għall-entitajiet tal-ADR, li jistgħu jiġu ffinanzjati b’diversi modi. L-iffaċilitar tar-raggruppament ta’ każijiet simili ma’ negozjant speċifiku mill-entitajiet tal-ADR jiġġenera ffrankar għalihom (bħala riżultat ta’ ġestjoni aktar effiċjenti), u b’hekk l-ispejjeż tagħhom jiġu kkumpensati b’EUR 11-il miljun fis-sena (jiġifieri EUR 97 miljun f’10 snin). L-ispejjeż żejda netti għall-entitajiet tal-ADR, meta jitqiesu l-ekonomiji ta’ skala, jistgħu jvarjaw minn EUR 0 sa EUR 49 miljun fis-sena (medja ta’ EUR 25 miljun), jew minn EUR 0 sa EUR 430 miljun f’10 snin (medja ta’ EUR 215 miljun). L-entitajiet tal-ADR li jġarrbu l-ispejjeż jistgħu jgħadduhom ukoll lin-negozjanti, bl-għarfien li xorta waħda jiffrankaw meta mqabbla mal-fatt li jmorru l-qorti. Id-dmir ta’ tweġiba jissostitwixxi r-rekwiżit attwali li tiġi żvelata informazzjoni dwar l-ADR, għan-negozji li la beħsiebhom u lanqas ma huma obbligati jsolvu t-tilwim permezz tal-ADR (64 % tan-negozjanti). Huwa magħruf mill-Valutazzjoni tal-Impatt marbuta mad-Direttiva tal-ADR attwali li l-ispiża aġġustata għall-inflazzjoni biex tingħata informazzjoni lill-konsumaturi hija ta’ madwar EUR 310 għal kull negozju. Din hija fil-biċċa l-kbira spiża ta’ darba. Kull sena, għan-negozji li għadhom kif ġew stabbiliti li ma jaderixxux ma’ xi entità tal-ADR, l-iffrankar totali jammonta għal EUR 99 miljun fis-sena, jiġifieri EUR 870 miljun f’10 snin; sehem mill-ispejjeż li jirriżultaw miż-“żieda ta’ informazzjoni dwar l-ADR fil-kuntratti, il-fatturi, l-irċevuti, il-websajts, rivisti/fuljetti” imbagħad jiġu ffrankati wkoll għan-negozji attwali, għal total ta’ EUR 165 miljun fis-sena, jiġifieri EUR 1.4 biljun f’10 snin (total ta’ EUR 2.3 biljun f’10 snin bħala ffrankar għan-negozji).
L-għoti ta’ rwol ta’ appoġġ lill-ECCs (jew korpi oħra) ifisser li l-ECCs ikollhom jassistu lill-ADRs b’mistoqsijiet dwar il-liġi applikabbli fi Stati Membri oħra, billi jittraduċu l-korrispondenza u d-dokumenti rilevanti għall-każ, eċċ. Dan huwa stmat li jeħtieġ madwar 50 ekwivalenti full-time (FTEs) fl-UE kollha, li jassorbu mill-ġdid l-għadd ekwivalenti ta’ karigi li jaġixxu bħala punti ta’ kuntatt tal-ODR fl-Istati Membri. Din il-miżura mingħajr spejjeż min-naħa tagħha tkompli tnaqqas id-detriment tal-konsumatur u tiffranka l-ispejjeż għall-entitajiet tal-ADR.
Impatti soċjali: Iċ-ċertezza li tinkiseb tweġiba malajr għall-ilmenti tagħhom imressqa għal ADR xierqa tnaqqas drastikament l-istress tal-konsumaturi li jivvalutaw aħjar il-fattibbiltà tad-diversi possibbiltajiet biex isolvu t-tilwim. Il-kamp ta’ applikazzjoni estiż tad-Direttiva jnaqqas ukoll ix-xogħol b’lura fil-qorti peress li bħalissa l-konsumaturi jista’ jkollhom biss is-soluzzjoni tagħhom fil-qorti. Is-sostituzzjoni tal-Pjattaforma tal-ODR ma jkollha l-ebda impatt soċjali fuq l-impjiegi peress li l-punt ta’ kuntatt tal-Istati Membri (madwar 50 FTE fl-UE kollha) jiġi assorbit mill-ECCs b’responsabbiltajiet transfruntiera ġodda tal-ADR.
Impatti ambjentali: L-espansjoni tal-ambitu tad-Direttiva biex jinkludi tilwim ekstrakuntrattwali tippermetti lill-konsumaturi jfittxu rimedju għad-danni li jirriżultaw minn prattiki kummerċjali inġusti, inklużi dawk relatati ma’ asserzjonijiet ekoloġiċi qarrieqa. Il-possibbiltà li jinkiseb rimedju kontra l-greenwashing permezz tal-ADR issaħħaħ l-isforzi tal-awtoritajiet pubbliċi għall-protezzjoni tal-konsumatur u tikkontribwixxi biex jintlaħqu l-għanijiet tal-istrateġija tal-Patt Ekoloġiku Ewropew. Fl-istess ambitu, il-konsumaturi jkunu jistgħu jippreżentaw ukoll asserzjoni tal-ADR dwar każijiet oħra b’impatt ambjentali bħal dawk relatati ma’ informazzjoni prekuntrattwali qarrieqa fir-rigward ta’ kuntratti tal-enerġija jew ta’ asserzjonijiet ambjentali.
Il-proposta tikkonċerna bidliet limitati u mmirati tal-leġiżlazzjoni bil-ħsieb li jiġu razzjonalizzati r-rekwiżiti ta’ rappurtar. Dawn huma bbażati fuq l-esperjenza mill-implimentazzjoni tal-leġiżlazzjoni. Il-bidliet ma għandhomx impatti sinifikanti fuq il-politika, iżda jiżguraw biss implimentazzjoni aktar effiċjenti u effettiva. Minħabba n-natura mmirata tagħhom u n-nuqqas ta’ għażliet ta’ politika rilevanti, valutazzjoni tal-impatt mhijiex meħtieġa.
Idoneità regolatorja u simplifikazzjoni
Il-miżuri fir-reviżjoni proposta se jipprovdu l-opportunitajiet li ġejjin għal effiċjenza mtejba, ikkalkulata fuq bażi annwali:
·Iffrankar kontinwu tal-ispejjeż ta’ aġġustament ta’ EUR 370 miljun għan-negozji (sostituzzjoni tal-Pjattaforma tal-ODR tal-UE);
·EUR 264 miljun f’iffrankar kontinwu tal-ispejjeż ta’ aġġustament għan-negozji (tneħħija ta’ obbligi ta’ żvelar ta’ informazzjoni tal-ADR).
L-għażla ppreferuta ġġib magħha l-ispejjeż ta’ aġġustament annwali żgħar li ġejjin:
·EUR 2,6 miljun fi spejjeż kontinwi ta’ aġġustament għan-negozji (mid-dmir ta’ tweġiba);
·EUR 25M fi spejjeż kontinwi ta’ aġġustament għall-entitajiet tal-ADR (l-ipproċessar ta’ tilwim addizzjonali);
·EUR 11 miljun relatati mal-konformità għall-fornituri privati tal-pjattaforma tal-ODR.
Dan it-total ta’ EUR 39 miljun fis-sena huwa kkumpensat ħafna mill-iffrankar annwali tal-ispejjeż ta’ EUR 634 miljun li ġej mis-simplifikazzjoni.
Mhuwiex magħruf kemm hemm tilwim mal-SMEs u kemm hemm ma’ negozji kbar, għalhekk l-ispejjeż assoċjati mad-dmir ta’ tweġiba jistgħu fil-prinċipju jinqasmu mal-SMEs. Madankollu, peress li l-SMEs huma l-maġġoranza l-kbira tan-negozji, huma se jkunu wkoll il-benefiċjarji ewlenin tal-iffrankar tal-ispejjeż tal-provvista tal-informazzjoni kemm marbuta mas-sostituzzjoni tal-pjattaforma tal-ODR kif ukoll tal-ADR b’mod ġenerali. Il-kompetittività tal-SMEs tal-UE se tintlaqat b’mod pożittiv minn din l-għażla, minħabba li l-iffrankar jista’ jintuża biex tingħata spinta lill-attraenza tal-prezzijiet tagħhom, u possibbilment titrawwem l-innovazzjoni.
Studju dwar l-imġiba mwettaq dwar ir-rekwiżiti ta’ informazzjoni tal-ADR, wera li r-rekwiżit attwali għan-negozjanti li jiżvelaw b’mod ċar fuq is-siti web tagħhom il-link tal-ODR ma għandux impatt pożittiv fuq l-intenzjoni tal-konsumatur li juża l-ADR. Għalhekk, it-tneħħija tagħha ma tipproduċix konsegwenzi negattivi fuq l-involviment tal-konsumaturi fl-ADR. In-negozji li joperaw online ma jkollhomx bżonn iżommu indirizz tal-posta elettronika għall-korrispondenza tal-ODR, u jiffrankaw EUR 100 fis-sena. Il-benefiċċju totali għan-negozji mbagħad ikun EUR 370 miljun iffrankati kull sena, jiġifieri EUR 3,3 biljun f’ 10 snin. Barra minn hekk, negozji li għadhom kif ġew stabbiliti fl-UE fl-10 snin li ġejjin mhux se jġarrbu spejjeż biex jipprovdu informazzjoni tal-ODR fuq is-sit web tagħhom, iżda din l-istima diġà hija inkluża fil-kalkoli marbuta mat-tneħħija tal-informazzjoni tal-ADR.
Drittijiet fundamentali
Il-proposta tal-Kummissjoni għandha impatt pożittiv ġenerali fuq id-drittijiet fundamentali. L-ambitu materjali u ġeografiku mwessa’ tad-Direttiva jiżgura li l-konsumaturi jkollhom aċċess għal rimedju privat għal firxa usa’ ta’ tilwim, b’mod li jissaħħaħ id-dritt tagħhom għal rimedju effettiv kif stabbilit mill-Artikolu 47 tal-Karta tad-Drittijiet Fundamentali tal-UE (KDFUE). Għalkemm l-introduzzjoni ta’ dmir ta’ tweġiba tirrikjedi li n-negozjanti jeżaminaw kwalunkwe tilwim potenzjali mgħoddi lilhom mill-entitajiet tal-ADR, il-fatt li n-negozji mhumiex obbligati mid-Direttiva li jipparteċipaw fl-ADR jiżgura li l-libertà tagħhom li jwettqu negozju tiġi osservata.
4.IMPLIKAZZJONIJIET BAĠITARJI
Ir-reviżjoni tad-Direttiva tal-ADR mhux se timplika obbligi finanzjarji ġodda għall-Kummissjoni, u għalhekk mhuma meħtieġa l-ebda riżorsi umani u amministrattivi addizzjonali għaliha. Biex jiġu appoġġati d-dispożizzjonijiet il-ġodda miżjuda fid-Direttiva tal-ADR, il-krediti eżistenti allokati biex jappoġġaw ir-rimedju tal-konsumatur fil-Programm tas-Suq Uniku 2021-2027 se jintużaw biex itejbu l-aċċess għal-lista tal-entitajiet tal-ADR li diġà hija ppubblikata mill-Kummissjoni bħala parti mill-pjattaforma tal-ODR, jew biex jappoġġaw liċ-Ċentri Ewropej tal-Konsumaturi biex jgħinu aħjar lill-konsumaturi li jfittxu parir dwar soluzzjonijiet ta’ rimedju transfruntier. Il-programm tas-Suq Uniku jippermetti wkoll l-attribuzzjoni ta’ għotjiet lill-entitajiet tal-ADR biex itejbu l-kosteffiċjenza tagħhom pereżempju permezz tad-diġitalizzazzjoni jew it-taħriġ tal-persunal tagħhom.
5.ELEMENTI OĦRA
Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar
Id-Direttiva emendatorja ma tbiddilx l-obbligi ta’ monitoraġġ tal-Kummissjoni kif previst fl-Artikolu 26 tad-Direttiva tal-ADR: jiġifieri se tipprovdi rapport li jivvaluta l-effiċjenza tad-direttiva tal-ADR (kif emendata) kull erba’ snin abbażi ta’ sorsi ta’ data eżistenti inklużi r-rapporti nazzjonali li l-awtoritajiet kompetenti jridu jipproduċu wkoll kull erba’ snin lill-Kummissjoni.
Spjegazzjoni fid-dettall tad-dispożizzjonijiet speċifiċi tal-proposta
Peress li d-direttiva preżenti hija direttiva li temenda, id-deskrizzjonijiet li ġejjin qed isiru fir-rigward tal-artikoli tad-direttiva tal-ADR li huma emendati.
Artikolu 2 – Ambitu
L-ambitu attwali tad-Direttiva tal-ADR huwa limitat għal tilwim li jirriżulta minn obbligi kuntrattwali għall-bejgħ ta’ oġġetti jew servizzi. Permezz ta’ din ir-reviżjoni, il-Kummissjoni qed tipproponi li testendi l-ambitu għall-proċessi volontarji tal-ADR kontra kwalunkwe negozjant li jbigħ oġġetti jew servizzi, inkluż kontenut diġitali u servizzi diġitali, għall-konsumaturi residenti fl-UE u għal tilwim relatat mal-istadji prekuntrattwali li matulhom jeżistu d-drittijiet tal-konsumatur irrispettivament minn jekk il-konsumatur fl-aħħar mill-aħħar jikkonkludix kuntratt. Dan, pereżempju, huwa relatat ma’ reklamar qarrieqi, informazzjoni nieqsa, mhux ċara jew qarrieqa, termini inġusti jew drittijiet ta’ garanzija. Barra minn hekk, l-ambitu estiż għandu l-għan li jkopri tilwim relatat ma’ drittijiet statutorji ewlenin oħrajn tal-konsumaturi bħad-dritt li ma jkunux soġġetti għal prattiki ta’ mblukkar ġeografiku, li jibdlu l-fornituri tat-telekomunikazzjoni jew li jkollhom aċċess għal servizzi finanzjarji bażiċi.
Artikolu 4 – Definizzjonijiet
Id-definizzjonijiet ta’ “tilwim domestiku” u “tilwim transfruntier” fid-Direttiva tal-ADR huma konformi mal-ambitu attwali u għalhekk, jagħmlu referenza biss għal tilwim kuntrattwali ma’ negozjanti stabbiliti fl-Unjoni. Il-Kummissjoni qed tipproponi li timmodifika dawk id-definizzjonijiet, sabiex tkopri t-tilwim kollu relatat mad-drittijiet statutorji ewlenin tal-konsumaturi. Barra minn hekk, id-definizzjoni l-ġdida ta’ “tilwim transfruntier” għandha l-għan li tkopri wkoll każijiet fejn in-negozjant ikun stabbilit barra mill-Unjoni.
Artikolu 5 - Aċċess għall-entitajiet tal-ADR u l-proċeduri tal-ADR
Kif inhu bħalissa, l-Artikolu 5(1) jipprevedi li l-Istati Membri jiżguraw l-eżistenza ta’ entitajiet tal-ADR konformi mar-rekwiżiti tad-Direttiva tal-ADR li jittrattaw tilwim bejn il-konsumaturi u n-negozjanti stabbiliti fit-territorji rispettivi tagħhom. Bl-estenżjoni proposta tal-ambitu, in-negozjanti stabbiliti barra mill-UE jistgħu jipparteċipaw ukoll (fuq bażi volontarja) fil-proċeduri tal-ADR. Għalhekk, il-Kummissjoni tipproponi li jinħoloq obbligu għall-Istati Membri biex jistabbilixxu entitajiet tal-ADR li se jkollhom il-kompetenza li jittrattaw tilwim bħal dan bejn il-konsumaturi u n-negozjanti mhux tal-UE.
Sabiex jiġu ssalvagwardjati l-konsumaturi b’ħiliet limitati ta’ litteriżmu diġitali, l-Artikolu 5(2)(a) jirreferi għall-possibbiltà li fuq talba l-konsumaturi vulnerabbli jibagħtu u jaċċessaw dokumenti f’format mhux diġitali. L-Artikolu 5(2)(b) jenfażizza l-ħtiġijiet tal-konsumaturi vulnerabbli li jkollhom aċċess faċli għall-proċeduri tal-ADR permezz ta’ għodod inklużivi, filwaqt li l-Artikolu 5(2)(c) jiżgura d-dritt għar-reviżjoni ta’ proċedura awtomatizzata minn persuna fiżika. L-Artikolu 5(2)(d) isaħħaħ il-possibbiltà li diġà teżisti f’ċerti Stati Membri għall-entitajiet tal-ADR li jiġbru flimkien każijiet simili kontra negozjant speċifiku wieħed biex jiffrankaw ir-riżorsi tal-ADR u l-ħin għan-negozjant u l-konsumaturi kkonċernati, filwaqt li jagħtu d-dritt lill-konsumaturi kkonċernati li joġġezzjonaw għal tali raggruppament.
L-Artikolu 5(4)(a) jiċċara li għalkemm il-konsumaturi huma obbligati jippruvaw isolvu t-tilwim bilateralment man-negozjant, jenħtieġ li l-entitajiet tal-ADR ma jistabbilixxux regoli sproporzjonati dwar kif jikkuntattjaw lin-negozjant qabel ma jkunu jistgħu jipproċedu għall-ADR.
L-Artikolu 5(8) jintroduċi d-dmir ta’ tweġiba fuq in-negozjanti bl-għan li jinċentivahom jipparteċipaw aktar fl-ADR. Għalkemm mhumiex obbligati jipparteċipaw fl-ADR, sakemm ma jkunx previst speċifikament fil-leġiżlazzjoni nazzjonali jew fil-leġiżlazzjoni tal-UE speċifika għas-settur, huwa propost li jkunu obbligati jwieġbu għal talba minn entità tal-ADR, f’perjodu li ma jaqbiżx 20 jum ta’ xogħol, dwar jekk humiex qed jippjanaw li jipparteċipaw fi proċess ta’ ADR kontrihom, jew inkella le.
Artikolu 7 – Trasparenza
L-emenda minn rapporti ta’ attività “annwali” ppubblikati minn entitajiet tal-ADR għal rapporti ta’ attività “biennali” hija maħsuba biex ittaffi l-piż amministrattiv u l-ispejjeż għal entitajiet bħal dawn. Għalkemm il-kooperazzjoni hija mħeġġa, l-Artikolu 7(2)(h) jitħassar, u għalhekk l-entitajiet tal-ADR mhux se jibqgħu meħtieġa jirrapportaw dwar il-kooperazzjoni tal-entitajiet tal-ADR fi ħdan netwerks ta’ entitajiet tal-ADR biex jiffaċilitaw is-soluzzjoni transfruntiera għat-tilwim.
Artikolu 13 – Informazzjoni għall-Konsumaturi min-Negozjanti
Il-Kummissjoni qed tipproponi li jitħassar l-Artikolu 13(3) li jimponi fuq in-negozjanti li jipprovdu informazzjoni dwar l-ADR lill-konsumaturi kemm jekk biħsiebhom jużaw proċess tal-ADR kif ukoll jekk le. Dan l-artikolu huwa żejjed bl-Artikolu 13(1) għan-negozjanti li jimpenjaw ruħhom li jinvolvu ruħhom fl-ADR filwaqt li jobbliga lin-negozjanti li mhumiex lesti li jinvolvu ruħhom fl-ADR biex jinfurmaw lill-konsumaturi dwar dan il-fatt. Ir-riżultat huwa li tali informazzjoni tiskoraġġixxi lill-konsumaturi milli jagħżlu proċess tal-ADR. Huwa kontroproduttiv u piż mhux ġustifikat impost fuq in-negozjanti.
Artikolu 14 – Assistenza għall-Konsumaturi
Fid-dawl tal-użu baxx tal-ADR f’każijiet transfruntiera, il-Kummissjoni tipproponi li tagħti spinta lill-assistenza tal-konsumatur billi toħloq punti ta’ kuntatt tal-ADR bi preferenza bħala parti miċ-Ċentri Ewropej tal-Konsumaturi li diġà għandhom rwol b’saħħtu biex jgħinu lill-konsumaturi fix-xiri transfruntier tagħhom. Dawn il-punti ta’ kuntatt tal-ADR se jippromwovu l-użu tal-ADR, jassistu lill-konsumaturi u lin-negozjanti fil-proċessi tal-ADR pereż. jipprovdu traduzzjoni awtomatika, jissenjalaw lill-konsumaturi lill-entità tal-ADR kompetenti, jispjegaw il-proċeduri differenti, jassistu fis-sottomissjoni tal-ilment, eċċ. Tali punti jistgħu jgħinu wkoll f’każijiet domestiċi jekk l-Istati Membri jaqblu.
Artikolu 19 – Informazzjoni li għandha tiġi nnotifikata lill-awtoritajiet kompetenti mill-entitajiet ta’ soluzzjoni għat-tilwim
Il-Kummissjoni qed tipproponi li tħassar l-Artikoli 19(3)(f)-(h) li permezz tagħhom l-entitajiet tal-ADR għandhom jinfurmaw lill-awtoritajiet kompetenti tal-ADR dwar: a) valutazzjoni tal-effettività tan-netwerks tal-ADR, b) informazzjoni dwar it-taħriġ ipprovdut lill-persunal u c) valutazzjoni ta’ kif biħsiebhom itejbu l-prestazzjoni tagħhom. Dan huwa maħsub biex inaqqas il-piż amministrattiv tal-entitajiet tal-ADR u minflok jiġu mmobbilizzati r-riżorsi ffrankati biex jittrattaw aktar tilwim jew jinvestu f’titjib fil-produttività.
Artikolu 20 - Ir-rwol tal-awtoritajiet kompetenti u tal-Kummissjoni
Minbarra l-Artikolu 20(4) li jirrikjedi li l-Kummissjoni tippubblika l-lista ta’ entitajiet tal-ADR akkreditati – attwalment ippubblikata fis-sit web tal-pjattaforma tal-ODR – l-Artikolu 20(8) il-ġdid jipprevedi li l-Kummissjoni għandha tiżviluppa u żżomm għodod faċli għall-utent biex ittejjeb is-sinjalar tal-konsumaturi, fi kliem ieħor biex jiġi żgurat li n-nies li jkunu qed ifittxu informazzjoni dwar kif isolvu tilwima tal-konsumaturi jkunu jistgħu jiksbu tweġiba malajr dwar l-aħjar entità tal-ADR biex jikkuntattjaw għall-każ tagħhom. L-għodod il-ġodda se jintegraw il-lista multilingwi eżistenti tal-entitajiet tal-ADR u se jipprovdu soluzzjonijiet interattivi għall-konsumaturi biex ifittxu l-aħjar entitajiet tal-ADR għat-tilwim speċifiku tagħhom. Jenħtieġ li dawn l-għodod joffru wkoll informazzjoni dwar mekkaniżmi oħra ta’ rimedju u links għall-punti ta’ kuntatt tal-ADR li għadhom kif ġew stabbiliti.
Artikolu 24 - Komunikazzjoni
L-Artikolu 24(4) jobbliga lill-Istati Membri jikkomunikaw l-ismijiet u d-dettalji ta’ kuntatt tal-punti ta’ kuntatt tal-ADR maħtura sa ċerta data.
2023/0376 (COD)
Proposta għal
DIRETTIVA TAL-PARLAMENT EWROPEW U TAL-KUNSILL
li temenda d-Direttiva 2013/11/UE dwar is-soluzzjoni alternattiva għat-tilwim, għat-tilwim tal-konsumaturi, kif ukoll id-Direttivi (UE) 2015/2302, (UE) 2019/2161 u (UE) 2020/1828
(Test b’rilevanza għaż-ŻEE)
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 114 tiegħu,
Wara li kkunsidraw il-proposta tal-Kummissjoni Ewropea,
Wara li l-abbozz tal-att leġiżlattiv intbagħat lill-parlamenti nazzjonali,
Wara li kkunsidraw l-opinjoni tal-Kumitat Ekonomiku u Soċjali Ewropew,
Filwaqt li jaġixxu f’konformità mal-proċedura leġiżlattiva ordinarja,
Billi:
(1)Id-Direttiva 2013/11/UE tal-Parlament Ewropew u tal-Kunsill ġiet adottata sabiex jiġi żgurat li l-konsumaturi fl-Unjoni jkollhom aċċess għal proċeduri ta’ soluzzjoni alternattiva għat-tilwim (alternative dispute resolution, “ADR”) ta’ kwalità għolja biex isolvu t-tilwim kuntrattwali li jinqala’ mill-bejgħ ta’ oġġetti jew mill-provvista ta’ servizzi minn negozjanti stabbiliti fl-Unjoni lil konsumaturi residenti fl-Unjoni. Din tipprevedi d-disponibbiltà ta’ proċeduri tal-ADR għat-tipi kollha ta’ tilwim domestiku u transfruntier tal-konsumaturi fl-Unjoni, filwaqt li tiżgura li l-proċeduri tal-ADR jissodisfaw standards minimi ta’ kwalità. Din tirrikjedi li l-Istati Membri jimmonitorjaw il-prestazzjoni tal-entitajiet tal-ADR. Sabiex jiżdied l-għarfien tal-konsumaturi u jiġi promoss l-użu tal-ADR, din tipprevedi wkoll li jenħtieġ li n-negozjanti jkunu meħtieġa jinfurmaw lill-konsumaturi tagħhom dwar il-possibbiltà li jsolvu t-tilwim tagħhom barra mill-qorti permezz ta’ proċeduri tal-ADR.
(2)Fl-2019, il-Kummissjoni adottat rapport dwar l-implimentazzjoni tad-Direttiva 2013/11/UE u tar-Regolament (UE) Nru 524/2013 tal-Parlament Ewropew u tal-Kunsill li żvela li d-Direttiva 2013/11/UE wasslet għal żieda fil-kopertura tas-swieq tal-konsumaturi minn entitajiet tal-ADR ta’ kwalità madwar l-Unjoni. Madankollu, ir-rapport identifika wkoll li l-adozzjoni tal-proċeduri tal-ADR min-naħa tal-konsumaturi u tan-negozji kienet għadha lura f’xi setturi u Stati Membri. Raġuni waħda għal dan kienet il-livell baxx ta’ għarfien tan-negozjanti u l-konsumaturi dwar proċeduri bħal dawn fl-Istati Membri fejn kienu ġew introdotti biss reċentement. Raġuni oħra kienet in-nuqqas ta’ fiduċja tal-konsumaturi u tan-negozjanti f’entitajiet tal-ADR mhux regolati. Id-data pprovduta mill-awtoritajiet nazzjonali kompetenti fil-bidu tal-2022, kif ukoll l-evalwazzjoni tal-implimentazzjoni tad-Direttiva 2013/11/UE mwettqa fl-2023, jissuġġerixxu li l-adozzjoni baqgħet relattivament stabbli (minbarra żieda żgħira ta’ każijiet relatati mal-pandemija tal-COVID-19). Il-biċċa l-kbira tal-partijiet ikkonċernati kkonsultati fil-kuntest ta’ dik l-evalwazzjoni kkonfermaw li n-nuqqas ta’ għarfien u fehim tal-proċeduri tal-ADR mill-konsumaturi, l-involviment baxx min-negozjanti, il-lakuni fil-kopertura tal-ADR f’uħud mill-Istati Membri, l-ispejjeż għoljin u l-proċeduri nazzjonali kumplessi tal-ADR u d-differenzi fil-kompetenzi tal-entitajiet tal-ADR, huma fatturi frekwenti li jfixklu l-adozzjoni tal-proċeduri tal-ADR. Hemm ostakli addizzjonali fl-ADR transfruntiera bħal-lingwa, nuqqas ta’ għarfien tal-liġi applikabbli, kif ukoll diffikultajiet speċifiċi ta’ aċċess għall-konsumaturi vulnerabbli.
(3)Peress li mill-inqas tnejn minn kull ħames tranżazzjonijiet online magħmula minn konsumaturi residenti fl-Unjoni huma ma’ negozjanti bbażati f’pajjiżi terzi, jenħtieġ li l-ambitu tad-Direttiva 2013/11/UE jiġi estiż biex jippermetti lil dawk in-negozjanti ta’ pajjiżi terzi li jixtiequ jipparteċipaw fi proċedura tal-ADR biex jagħmlu dan. Jenħtieġ li ebda impediment proċedurali ma jfixkel lill-konsumaturi residenti fl-Unjoni milli jsolvu tilwim kontra negozjanti, irrispettivament mill-istabbiliment tagħhom, jekk in-negozjanti jaċċettaw li jsegwu proċedura tal-ADR permezz ta’ entità tal-ADR stabbilita fi Stat Membru.
(4)Il-kumplessità tat-tilwim tal-konsumaturi evolviet b’mod sinifikanti mill-adozzjoni tad-Direttiva 2011/13/UE. Id-diġitalizzazzjoni tal-oġġetti u s-servizzi, l-importanza dejjem tikber tal-kummerċ elettroniku u tar-reklamar diġitali fil-formazzjoni ta’ kuntratti tal-konsumatur irriżultaw f’żieda fl-għadd ta’ konsumaturi li ġew esposti għal informazzjoni qarrieqa online u interfaċċi manipulattivi li jżommuhom milli jieħdu deċiżjonijiet infurmati dwar ix-xiri. Għalhekk, huwa meħtieġ li jiġi ċċarat li t-tilwim kuntrattwali li jirriżulta mill-bejgħ ta’ oġġetti jew servizzi jinkludi kontenut diġitali u servizzi diġitali, u li jiġi estiż l-ambitu tad-Direttiva 2011/13/UE, lil hinn minn tilwim bħal dan sabiex il-konsumaturi jkunu jistgħu jfittxu wkoll rimedju għal prattiki li jagħmlu ħsara lilhom fi stadju prekuntrattwali, irrispettivament minn jekk aktar tard ikunux marbuta b’kuntratt.
(5)Barra minn hekk, jenħtieġ li d-Direttiva 2011/13/UE tkopri wkoll id-drittijiet tal-konsumatur li jirriżultaw mil-leġiżlazzjoni tal-Unjoni li tirregola r-relazzjonijiet bejn il-konsumaturi u n-negozjanti meta ma jkun hemm l-ebda relazzjoni ta’ natura kuntrattwali, fir-rigward tad-dritt ta’ aċċess u ta’ ħlas għal prodotti u servizzi mingħajr ma ssirilhom diskriminazzjoni abbażi tan-nazzjonalità, tal-post tar-residenza jew tal-istabbiliment, kif previst fl-Artikoli 4 u 5 tar-Regolament (UE) 2018/302 tal-Parlament Ewropew u tal-Kunsill; id-dritt għall-ftuħ u l-bdil ta’ kontijiet bankarji kif previst fl-Artikoli 9, 10, 11, u 16 tad-Direttiva 2014/92/UE tal-Parlament Ewropew u tal-Kunsill u li ma ssirx diskriminazzjoni kontrihom kif previst fl-Artikolu 15 ta’ dik id-Direttiva; id-dritt li wieħed jirċievi informazzjoni trasparenti dwar il-kundizzjonijiet ta’ roaming bl-imnut għal telefonati u messaġġi SMS kif previst fl-Artikoli 13, 14 u 15 tar-Regolament (UE) 2022/612 tal-Parlament Ewropew u tal-Kunsill, id-dritt għat-trasparenza tal-prezzijiet fin-nollijiet tal-ajru u r-rati kif previst fl-Artikolu 23 tar-Regolament (KE) Nru 1008/2008 tal-Parlament Ewropew u tal-Kunsill. Għalhekk, jenħtieġ li jiġi previst li t-tilwim li jinqala’ fir-rigward ta’ tali kategoriji ta’ drittijiet tal-konsumatur ikun jista’ jiġi ttrattat fil-proċeduri tal-ADR.
(6)Jenħtieġ li l-Istati Membri jkollhom id-dritt li japplikaw proċeduri tal-ADR anki għal tilwim li jkun relatat ma’ drittijiet mhux kuntrattwali oħra li jirriżultaw mid-dritt tal-Unjoni, inklużi d-drittijiet li jirriżultaw mill-Artikoli 101 u 102 tat-TFUE jew id-drittijiet tal-utenti previsti fir-Regolament (UE) 2022/1925 tal-Parlament Ewropew u tal-Kunsill. Dan huwa mingħajr preġudizzju għall-infurzar pubbliku ta’ dawk ir-regoli.
(7)Meta tinqala’ tilwima bejn fornitur ta’ pjattaforma online u riċevitur ta’ dak is-servizz b’rabta mal-attivitajiet ta’ dak il-fornitur fil-moderazzjoni ta’ kontenut illegali jew dannuż fuq il-pjattaforma tiegħu, l-Artikolu 21 tar-Regolament (UE) 2022/2065 tal-Parlament Ewropew u tal-Kunsill dwar is-soluzzjoni extraġudizzjarja ta’ tilwim japplika għal dik it-tilwima, f’konformità mal-Artikolu 2(4) ta’ dak ir-Regolament, peress li jistabbilixxi regoli aktar dettaljati fir-rigward ta’ tali tilwim.
(8)Jenħtieġ li d-definizzjonijiet ta’ “tilwim domestiku” u “tilwim transfruntier” jiġu adattati kif xieraq biex jirriflettu l-estensjoni tal-ambitu tad-Direttiva 2013/11/UE.
(9)Sabiex jiġi żgurat li l-proċeduri tal-ADR ikunu adattati sew għall-era diġitali fejn il-komunikazzjoni ssir online, inkluż f’kuntest transfruntier, huwa meħtieġ li jiġu żgurati proċessi rapidi u ġusti għall-konsumaturi kollha. Jenħtieġ li l-Istati Membri jiżguraw li l-entitajiet tal-ADR stabbiliti fit-territorji tagħhom ikollhom il-kompetenza li jipprovdu proċeduri ta’ soluzzjoni għat-tilwim bejn negozjanti stabbiliti barra mill-Unjoni u konsumaturi residenti fit-territorju tagħhom.
(10)Jenħtieġ li l-Istati Membri jiżguraw li l-ADR tippermetti lill-konsumatur jibda u jsegwi proċeduri tal-ADR anki offline jekk dan jintalab. Jenħtieġ li jiġi żgurat ukoll li meta jiġu pprovduti għodod diġitali, dawk ikunu jistgħu jintużaw mill-konsumaturi kollha, inklużi l-konsumaturi vulnerabbli jew dawk b’livelli differenti ta’ litteriżmu diġitali. Jenħtieġ li l-Istati Membri jiżguraw li, fuq talba, il-partijiet għat-tilwim dejjem ikollhom aċċess għal rieżami tal-proċeduri awtomatizzati minn persuna fiżika.
(11)Jenħtieġ li l-Istati Membri jippermettu wkoll lill-entitajiet tal-ADR jiġbru flimkien każijiet simili kontra negozjant speċifiku, jagħmlu l-eżiti tal-ADR konsistenti għall-konsumaturi soġġetti għall-istess prattika illegali, u aktar kosteffiċjenti għall-entitajiet tal-ADR u għan-negozjanti. Jenħtieġ li l-konsumaturi jiġu infurmati kif xieraq u jenħtieġ li jingħataw ċ-ċans li jirrifjutaw li t-tilwim tagħhom jiġi raggruppat.
(12)Jenħtieġ ukoll li l-Istati Membri ma jippermettux l-introduzzjoni ta’ regoli sproporzjonati fir-rigward tar-raġunijiet li entità tal-ADR tista’ tinvoka biex tirrifjuta t-trattament ta’ tilwim, bħall-obbligu li tintuża s-sistema ta’ eskalazzjoni tal-kumpanija wara l-ewwel kuntatt negattiv mas-servizz tal-ipproċessar tal-ilmenti, jew l-obbligu li tingħata prova li parti speċifika mis-servizz ta’ wara l-bejgħ ta’ kumpanija ġiet ikkuntattjata.
(13)Skont id-Direttiva 2013/11/UE, l-Istati Membri jistgħu jintroduċu leġiżlazzjoni nazzjonali biex jagħmlu l-parteċipazzjoni tan-negozjanti fl-ADR obbligatorja f’setturi li huma jqisu xierqa, flimkien mal-leġiżlazzjoni tal-Unjoni speċifika għas-settur li tipprevedi l-parteċipazzjoni obbligatorja tan-negozjanti fl-ADR. Biex titħeġġeġ il-parteċipazzjoni tan-negozjanti fil-proċeduri tal-ADR u biex jiġu żgurati proċeduri tal-ADR xierqa u rapidi, in-negozjanti għandhom ikunu meħtieġa, speċjalment f’każijiet fejn il-parteċipazzjoni tagħhom ma tkunx obbligatorja, li jwieġbu fi żmien perjodu speċifiku għall-mistoqsijiet li jsiru mill-entitajiet tal-ADR dwar jekk għandhomx l-intenzjoni li jipparteċipaw fil-proċedura proposta.
(14)Biex jitnaqqsu r-rekwiżiti ta’ informazzjoni u rappurtar u biex jiġu ffrankati l-ispejjeż għall-entitajiet tal-ADR, l-awtoritajiet kompetenti nazzjonali u n-negozjanti, jenħtieġ li jiġu ssimplifikati r-rekwiżiti ta’ rappurtar u informazzjoni u jenħtieġ li jitnaqqas l-ammont ta’ informazzjoni pprovduta mill-entitajiet tal-ADR lill-awtoritajiet kompetenti.
(15)Sabiex tingħata assistenza effettiva lill-konsumaturi u lin-negozjanti f’tilwim transfruntier, huwa meħtieġ li jiġi żgurat li l-Istati Membri jistabbilixxu punti ta’ kuntatt tal-ADR b’kompiti definiti b’mod ċar. Iċ-Ċentri Ewropej tal-Konsumaturi (European Consumer Centres, “ECCs”) jinsabu f’pożizzjoni tajba biex iwettqu tali kompiti, peress li huma speċjalizzati biex jassistu lill-konsumaturi fi kwistjonijiet dwar ix-xiri transfruntier tagħhom, iżda jenħtieġ li l-Istati Membri jkunu jistgħu jagħżlu wkoll korpi oħra b’għarfien espert rilevanti. Jenħtieġ li dawk il-punti ta’ kuntatt tal-ADR maħtura jiġu kkomunikati lill-Kummissjoni.
(16)Minkejja l-fatt li l-proċeduri tal-ADR huma maħsuba biex ikunu sempliċi, il-konsumaturi jistgħu jiġu assistiti minn parti terza tal-għażla tagħhom matul il-proċeduri tal-ADR. Jenħtieġ li l-Istati Membri jiżguraw li tali assistenza tingħata in bona fide biex tippermetti proċedura ġusta u bi trasparenza sħiħa, b’mod partikolari fir-rigward tat-tariffi possibbli meħtieġa bi skambju għall-assistenza.
(17)Sabiex jiġi żgurat li l-konsumaturi jkunu jistgħu jsibu faċilment entità tal-ADR xierqa, speċjalment f’kuntest transfruntier, jenħtieġ li l-Kummissjoni tiżviluppa u żżomm għodda interattiva diġitali li tipprovdi informazzjoni dwar il-karatteristiċi ewlenin tal-entitajiet tal-ADR u l-links għall-paġni web tal-entitajiet tal-ADR, kif notifikati lilha.
(18)Għaldaqstant, jenħtieġ li d-Direttiva 2013/11/UE tkun emendata skont dan.
(19)Peress li r-Regolament (UE) Nru 524/2013 għandu jitħassar permezz ta’ att separat, jenħtieġ ukoll li jiġu emendati d-Direttivi (UE) 2015/2302, (UE) 2019/2161 u (UE) 2020/1828 tal-Parlament Ewropew u tal-Kunsill, bħala konsegwenza ta’ dak it-tħassir,
ADOTTAW DIN ID-DIRETTIVA:
Artikolu 1
Emendi għad-Direttiva 2013/11/UE
Id-Direttiva 2013/11/UE hija emendata kif ġej:
1.Fl-Artikolu 2, il-paragrafu 1 huwa sostitwit b’dan li ġej:
“1. Din id-Direttiva għandha tapplika għal proċeduri għas-soluzzjoni extraġudizzjarja ta’ tilwim bejn konsumaturi residenti fl-Unjoni u negozjanti li joffru oġġetti jew servizzi, inkluż kontenut diġitali u servizzi diġitali, lil dawk il-konsumaturi, permezz tal-intervent ta’ entità tal-ADR li tipproponi jew timponi soluzzjoni jew li tlaqqa’ l-partijiet flimkien bl-għan li tiffaċilita soluzzjoni amikevoli li tikkonċerna waħda minn dawn li ġejjin:
(a)obbligi kuntrattwali li jirriżultaw minn kuntratti ta’ bejgħ, inkluż għall-provvista ta’ kontenut diġitali, jew kuntratti ta’ servizzi;
(b)drittijiet tal-konsumatur applikabbli għal sitwazzjonijiet mhux kuntrattwali u prekuntrattwali u previsti fil-liġi tal-Unjoni dwar:
(i)prattiċi u kundizzjonijiet kummerċjali żleali,
(ii)informazzjoni prekuntrattwali obbligatorja,
(iii)non-diskriminazzjoni abbażi ta’ nazzjonalità jew post ta’ residenza,
(iv)aċċess għas-servizzi u konsenji,
(v)rimedji f’każ ta’ nuqqas ta’ konformità ta’ prodotti u kontenut diġitali,
(vi)dritt għall-bdil tal-fornituri, u
(vii)drittijiet tal-passiġġieri u tal-vjaġġaturi.
L-Istati Membri jistgħu japplikaw il-proċeduri tal-ADR stabbiliti f’din id-Direttiva, anki għal kategoriji ta’ tilwim għajr dawk elenkati fl-ewwel subparagrafu, il-punt (b).”.
2.Fl-Artikolu 4(1), il-punti (e) u (f) huma sostitwiti b’dan li ġej:
“(e) ‘tilwim domestiku’ tfisser tilwima bejn konsumatur u negozjant, relatata ma’ obbligi kuntrattwali u / jew drittijiet tal-konsumatur previsti fil-liġijiet tal-Unjoni kif imsemmija fl-Artikolu 2(1), fejn il-konsumatur ikun residenti fl-istess Stat Membru bħal dak li fih ikun stabbilit in-negozjant;
(f) ‘tilwim transfruntier’ tfisser tilwim bejn konsumatur u negozjant, relatat ma’ obbligi kuntrattwali u / jew drittijiet tal-konsumatur previsti fl-atti tal-Unjoni kif imsemmija fl-Artikolu 2(1), fejn il-konsumatur ikun residenti fi Stat Membru għajr l-Istat Membru li fih ikun stabbilit in-negozjant jew fejn il-konsumatur ikun residenti fi Stat Membru u n-negozjant ikun stabbilit barra mill-Unjoni;”.
3.L-Artikolu 5 huwa emendat kif ġej:
(a)il-paragrafu 1 huwa sostitwit b’dan li ġej:
“1. L-Istati Membri għandhom jiffaċilitaw l-aċċess mill-konsumaturi għall-proċeduri tal-ADR u għandhom jiżguraw li t-tilwim kopert minn din id-Direttiva u li jinvolvi negozjant stabbilit fit-territorji rispettivi tagħhom, jew negozjant mhux stabbilit fit-territorju ta’ kwalunkwe Stat Membru iżda li joffri prodotti jew servizzi, inkluż kontenut diġitali u servizzi diġitali, lill-konsumaturi residenti fit-territorji rispettivi tagħhom, jista’ jiġi ppreżentat lil entità tal-ADR li tikkonforma mar-rekwiżiti stabbiliti f’din id-Direttiva.”;
(b)fil-paragrafu 2, il-punti minn (a) sa (d) huma sostitwiti b’dan li ġej:
“(a) jiżguraw li l-konsumaturi jkunu jistgħu jissottomettu l-ilmenti u d-dokumenti ta’ sostenn meħtieġa online b’mod traċċabbli u jiżguraw li l-konsumaturi jkunu jistgħu wkoll jissottomettu u jaċċessaw dawn id-dokumenti f’format mhux diġitali fuq talba;
(b) joffru proċeduri tal-ADR diġitali permezz ta’ għodod aċċessibbli faċilment u inklużivi;
(c) jagħtu d-dritt lill-partijiet fit-tilwima li jitolbu li l-eżitu tal-proċedura tal-ADR jiġi rieżaminat minn persuna fiżika meta l-proċedura tkun twettqet b’mezzi awtomatizzati;
(d) jistgħu jiġbru flimkien każijiet simili kontra negozjant speċifiku wieħed fi proċedura waħda, bil-kundizzjoni li l-konsumatur ikkonċernat ikun infurmat u ma joġġezzjonax għal dan;”
(c)fil-paragrafu 4, il-punt (a) huwa sostitwit b’dan li ġej:
“(a) il-konsumatur ma ppruvax jikkuntattja lin-negozjant ikkonċernat sabiex jiddiskuti l-ilment u jfittex, bħala l-ewwel pass, li jsolvi l-kwistjoni direttament man-negozjant, mingħajr ma jiddaħlu regoli sproporzjonati dwar il-format ta’ tali kuntatt”;
(d)jiżdied il-paragrafu 8 li ġej:
“8. L-Istati Membri għandhom jiżguraw li n-negozjanti stabbiliti fit-territorji tagħhom li jiġu kkuntattjati minn entità tal-ADR minn pajjiżhom jew minn Stat Membru ieħor, jinfurmaw lil dik l-entità tal-ADR jekk jaċċettawx jew le li jipparteċipaw fil-proċedura proposta u jwieġbu fi żmien raġonevoli li ma għandux jaqbeż l-20-il jum ta’ xogħol.”.
4.L-Artikolu 7, il-paragrafu 2 huwa emendat kif ġej:
(a)fil-frażi introduttorja, l-ewwel sentenza hija sostitwita b’dan li ġej:
“L-Istati Membri għandhom jiżguraw li l-entitajiet tal-ADR jagħmlu disponibbli, jekk jintalbu dan, b'mod pubbliku fuq is-siti web tagħhom, fuq mezz li jservi għal żmien twil u bi kwalunkwe mezz ieħor li huma jqisu adatt, rapporti tal-attivitajiet biennali”.
(b)il-punt (h) jitħassar.
5.Fl-Artikolu 13, il-paragrafu 3 jitħassar.
6.l-Artikolu 14 huwa sostitwit b’dan li ġej:
“Artikolu 14
Assistenza għall-konsumaturi
1. L-Istati Membri għandhom jiżguraw li, fir-rigward ta’ tilwim transfruntier, il-konsumaturi u n-negozjanti jkunu jistgħu jiksbu assistenza biex jaċċessaw l-entità jew l-entitajiet tal-ADR li huma kompetenti biex jipproċessaw it-tilwim transfruntier tagħhom.
2. Kull Stat Membru għandu jaħtar punt ta’ kuntatt tal-ADR inkarigat mill-kompitu msemmi fil-paragrafu 1. Kull Stat Membru għandu jikkomunika l-isem u d-dettalji ta’ kuntatt tal-punt ta’ kuntatt tal-ADR tiegħu lill-Kummissjoni. L-Istati Membri għandhom jagħtu r-responsabbiltà għat-tħaddim tal-punti ta’ kuntatt tal-ADR liċ-ċentru tagħhom li jappartjeni għan-Netwerk taċ-Ċentri Ewropej tal-Konsumaturi, jew, jekk dan ma jkunx possibbli, lill-organizzazzjonijiet tal-konsumatur jew lil kwalunkwe korp ieħor li jiġġestixxi l-protezzjoni tal-konsumatur.
3. Il-punti ta’ kuntatt tal-ADR għandhom jiffaċilitaw il-komunikazzjoni bejn il-partijiet u l-entità tal-ADR kompetenti, li tista’ tinkludi, b’mod partikulari:
(a)għajnuna fit-tressiq tal-ilment u, fejn xieraq, id-dokumentazzjoni rilevanti;
(b)il-forniment lill-partijiet u lill-entitajiet tal-ADR b’informazzjoni ġenerali dwar id-drittijiet tal-konsumatur tal-UE;
(c)il-forniment lill-partijiet spjegazzjonijiet dwar ir-regoli ta’ proċedura applikati mill-entitajiet speċifiċi tal-ADR;
(d)l-informazzjoni lill-parti li qed tressaq l-ilment b’mezzi oħra ta’ rimedju meta tilwima ma tkunx tista’ tiġi solvuta permezz ta’ pjattaforma ADR.
4. L-Istati Membri jistgħu jagħtu lill-punti ta’ kuntatt tal-ADR id-dritt li jipprovdu l-assistenza msemmija f’dan l-Artikolu lill-konsumaturi u lin-negozjanti meta jaċċessaw entitajiet tal-ADR anki fir-rigward ta’ tilwim domestiku.
5. L-Istati Membri għandhom jiżguraw li kull attur li jassisti lill-konsumaturi f’tilwim transfruntier jew domestiku, jaġixxi in bona fide biex jippermetti lill-partijiet fit-tilwima jilħqu soluzzjoni amikevoli u jipprovdi l-informazzjoni rilevanti lill-konsumaturi bi trasparenza sħiħa, inkluża informazzjoni dwar ir-regoli proċedurali u kull tariffa applikabbli.”.
7.Fl-Artikolu 19(3), il-punti (f), (g) u (h) huma mħassra.
8.Fl-Artikolu 20, jiżdied il-paragrafu li ġej:
“8. Il-Kummissjoni għandha tiżviluppa u żżomm għodda diġitali interattiva li tipprovdi informazzjoni ġenerali dwar ir-rimedju għall-konsumatur u links għall-paġni web tal-entitajiet tal-ADR notifikati lilha f’konformità mal-paragrafu 2 ta’ dan l-Artikolu.”.
9.Fl-Artikolu 24, jiżdied il-paragrafu 4 li ġej:
“4. Sa [daħħal id-data] l-Istati Membri għandhom jikkomunikaw lill-Kummissjoni l-ismijiet u d-dettalji ta’ kuntatt tal-punti ta’ kuntatt tal-ADR maħtura f’konformità mal-Artikolu 14(2).”.
Artikolu 2
Emenda għad-Direttiva (UE) 2015/2302
Fl-Artikolu 7(2) tad-Direttiva (UE) 2015/2302, il-punt (g) huwa sostitwit b’dan li ġej:
“(g) informazzjoni dwar proċeduri interni disponibbli għall-ipproċessar tal-ilmenti u dwar mekkaniżmi ta’ soluzzjoni alternattiva għat-tilwim (“ADR”) skont id-Direttiva 2013/11/UE tal-Parlament Ewropew u tal-Kunsill u, fejn applikabbli, dwar l-entità tal-ADR li huwa kopert minnha n-negozjant;”.
Artikolu 3
Emenda għad-Direttiva (UE) 2019/2161
Fl-Artikolu 5 tad-Direttiva (UE) 2019/2161, il-punt (b) huwa sostitwit b’dan li ġej:
“(b) jissottomettu lment liċ-ċentru kompetenti tan-Netwerk taċ-Ċentri Ewropej tal-Konsumaturi, skont il-partijiet involuti.”.
Artikolu 4
Emenda għad-Direttiva (UE) 2020/1828
Fl-Anness I tad-Direttiva (UE) 2020/1828, il-punt (44) jitħassar.
Artikolu 5
Traspożizzjoni
1.Sa [jj/xahar/sena - sena (1) wara d-dħul fis-seħħ], l-Istati Membri għandhom jadottaw u jippubblikaw il-miżuri meħtieġa biex jikkonformaw mal-Artikolu 1 ta’ din id-Direttiva. Huma għandhom minnufih jgħarrfu lill-Kummissjoni f’dak ir-rigward.
Huma għandhom japplikaw dawk il-miżuri minn [data].
2.Sa [jj/xahar/sena - sena (1) wara d-dħul fis-seħħ tar-Regolament xx/…. [il-proposta għal Regolament tal-Parlament Ewropew u tal-Kunsill li jħassar ir-Regolament (UE) Nru 524/2013 dwar is-soluzzjoni online għal tilwim għall-konsumaturi]], l-Istati Membri għandhom jadottaw u jippubblikaw il-miżuri meħtieġa biex jikkonformaw mal-Artikoli 2, 3 u 4 ta’ din id-Direttiva. Huma għandhom minnufih jgħarrfu lill-Kummissjoni f’dak ir-rigward.
Huma għandhom japplikaw dawk il-miżuri minn [daħħal id-data].
3.Meta l-Istati Membri jadottaw il-miżuri msemmija fil-paragrafi 1 u 2, dawn il-miżuri għandu jkollhom referenza għal din id-Direttiva jew issir tali referenza meta jiġu ppubblikati uffiċjalment. Il-metodi kif issir dik ir-referenza għandhom jiġu stabbiliti mill-Istati Membri.
4.L-Istati Membri għandhom jikkomunikaw lill-Kummissjoni t-test tal-miżuri ewlenin tal-liġi nazzjonali li huma jadottaw fil-qasam kopert minn din id-Direttiva.
Artikolu 6
Dħul fis-seħħ
Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Artikolu 7
Destinatarji
Din id-Direttiva hija indirizzata lill-Istati Membri.
Magħmul fi Brussell,
Għall-Parlament Ewropew
Għall-Kunsill
Il-President
Il-President