EUR-Lex Access to European Union law
This document is an excerpt from the EUR-Lex website
Document 52023PC0067
Proposal for a COUNCIL DECISION on the position to be taken on behalf of the European Union at the Council of the International Civil Aviation Organization, in respect of proposals for the amendment of Annex 16, Volumes I-III to the Chicago Convention, concerning Standards and Recommended Practices relating to environmental protection
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fil-Kunsill tal-Organizzazzjoni tal-Avjazzjoni Ċivili Internazzjonali, fir-rigward tal-proposti għall-emenda tal-Anness 16, il-Volumi I-III tal-Konvenzjoni ta’ Chicago dwar l-Istandards u l-Prattiki Rakkomandati relatati mal-protezzjoni tal-ambjent
Proposta għal DEĊIŻJONI TAL-KUNSILL dwar il-pożizzjoni li għandha tittieħed f’isem l-Unjoni Ewropea fil-Kunsill tal-Organizzazzjoni tal-Avjazzjoni Ċivili Internazzjonali, fir-rigward tal-proposti għall-emenda tal-Anness 16, il-Volumi I-III tal-Konvenzjoni ta’ Chicago dwar l-Istandards u l-Prattiki Rakkomandati relatati mal-protezzjoni tal-ambjent
COM/2023/67 final
IL-KUMMISSJONI EWROPEA
Brussell, 10.2.2023
COM(2023) 67 final
2023/0030(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kunsill tal-Organizzazzjoni tal-Avjazzjoni Ċivili Internazzjonali, fir-rigward tal-proposti għall-emenda tal-Anness 16, il-Volumi I-III tal-Konvenzjoni ta’ Chicago dwar l-Istandards u l-Prattiki Rakkomandati relatati mal-protezzjoni tal-ambjent
MEMORANDUM TA’ SPJEGAZZJONI
1.Suġġett tal-proposta
Din il-proposta tikkonċerna Deċiżjoni tal-Kunsill dwar il-pożizzjoni li għandha tittieħed f’isem l-Unjoni Ewropea fil-Kunsill tal-Organizzazzjoni tal-Avjazzjoni Ċivili Internazzjonali (ICAO), fir-rigward tal-proposti għall-emenda tal-Anness 16, il-Volumi I-III tal-Konvenzjoni ta’ Chicago dwar l-Istandards u l-Prattiki Rakkomandati relatati mal-protezzjoni tal-ambjent.
2.Kuntest tal-proposta
2.1.Il-Konvenzjoni dwar l-Avjazzjoni Ċivili Internazzjonali
Il-Konvenzjoni dwar l-Avjazzjoni Ċivili Internazzjonali (“il-Konvenzjoni ta’ Chicago”) għandha l-għan li tirregola t-trasport internazzjonali bl-ajru. Daħlet fis-seħħ fl-4 ta’ April 1947 u stabbiliet l-ICAO.
L-Istati Membri kollha tal-UE huma partijiet għall-Konvenzjoni ta’ Chicago.
2.2.L-Organizzazzjoni tal-Avjazzjoni Ċivili Internazzjonali
L-ICAO hija aġenzija speċjalizzata tan-Nazzjonijiet Uniti. L-għanijiet u l-objettivi tal-Organizzazzjoni huma li tiżviluppa l-prinċipji u t-tekniki tan-navigazzjoni internazzjonali bl-ajru u li trawwem l-ippjanar u l-iżvilupp tat-trasport internazzjonali bl-ajru.
Il-funzjonijiet obbligatorji tal-Kunsill tal-ICAO, elenkati fl-Artikolu 54 tal-Konvenzjoni ta’ Chicago, jinkludu l-adozzjoni ta’ Standards u Prattiki Rakkomandati Internazzjonali (SARPs), iddeżinjati bħala Annessi tal-Konvenzjoni ta’ Chicago.
Il-Kunsill tal-ICAO huwa korp permanenti tal-ICAO u fih huma msieħba 36 Stat kontraenti eletti mill-Assemblea tal-ICAO għal perjodu ta’ tliet snin. Għadd ta’ Stati Membri huma rrappreżentati fil-Kunsill tal-ICAO.
L-UE hija osservatur ad hoc f’ħafna korpi tal-ICAO (Assemblea u korpi tekniċi oħra).
2.3.L-atti previsti tal-Kunsill tal-Organizzazzjoni tal-Avjazzjoni Ċivili Internazzjonali
L-Istandards u l-Prattiki Rakkomandati Internazzjonali (SARPs) dwar il-Protezzjoni tal-Ambjent ġew adottati mill-Kunsill tal-ICAO bħala l-Anness 16 tal-Konvenzjoni ta’ Chicago. L-Anness 16 għandu erba’ volumi, bil-kamp ta’ applikazzjoni li ġej:
–il-Volum I jikkonċerna Standards u Prattiki Rakkomandati Internazzjonali relatati mal-istorbju tal-inġenji tal-ajru;
–il-Volum II jikkonċerna Standards u Prattiki Rakkomandati Internazzjonali relatati mal-emissjonijiet mill-magni tal-inġenji tal-ajru;
–il-Volum III jikkonċerna Standards u Prattiki Rakkomandati Internazzjonali relatati mal-emissjonijiet tas-CO2 tal-ajruplani;
–il-Volum IV jikkonċerna Standards u Prattiki rakkomandati internazzjonali relatati mal-Iskema ta’ Kumpens u Tnaqqis tal-Karbonju għall-Avjazzjoni Internazzjonali (CORSIA).
Fil-228 Sessjoni tiegħu mit-13 sal-31 ta’ Marzu 2023, il-Kunsill tal-ICAO għandu jikkunsidra bidliet possibbli għal dawn il-Volumi. F’Lulju 2022, intbagħtu Ittri lill-Istati 1 , lill-Istati tal-ICAO bil-bidliet mistennija għall-kummenti tagħhom.
3.Pożizzjoni li għandha tittieħed f’isem l-Unjoni
3.1. Sfond
F’konformità mal-Artikolu 19(3) tar-Regolament (UE) 2018/1139 2 , il-Kummissjoni għandha s-setgħa li tadotta atti delegati biex temenda r-referenzi għad-dispożizzjonijiet tal-Konvenzjoni ta’ Chicago msemmija fl-ewwel subparagrafu tal-Artikolu 9(2) ta’ dak ir-Regolament, sabiex taġġornahom fid-dawl ta’ emendi sussegwenti għal dawk id-dispożizzjonijiet li jidħlu fis-seħħ wara l-4 ta’ Lulju 2018 u li jsiru applikabbli fl-Istati Membri kollha, diment li tali adattamenti ma jwessgħux il-kamp ta’ applikazzjoni ta’ dak ir-Regolament.
Id-Deċiżjoni tal-Kunsill (UE) 2016/915 tat-30 ta’ Mejju 2016 3 , kif emendata bid-Deċiżjoni tal-Kunsill (UE) 2020/768 tad-9 ta’ Ġunju 2020 4 , stabbiliet il-pożizzjoni tal-Unjoni fir-rigward tal-istrument internazzjonali li għandu jitfassal fi ħdan il-korpi tal-ICAO u maħsub biex iwassal għall-implimentazzjoni mill-2020 ta’ miżura globali unika bbażata fuq is-suq għall-emissjonijiet mill-avjazzjoni internazzjonali, jiġifieri l-Iskema ta’ Kumpens u Tnaqqis tal-Karbonju għall-Avjazzjoni Internazzjonali (“CORSIA”). Dik id-Deċiżjoni tibqa’ fis-seħħ. Għalhekk, tintuża bħala bażi biex tiġi stabbilita l-pożizzjoni tal-Unjoni fir-rigward tal-bidliet għall-Anness 16, il-Volum IV.
3.2. Pożizzjoni li għandha tittieħed f’isem l-Unjoni
Jeħtieġ li qabel il-228 Sessjoni tal-Kunsill tal-ICAO, mit-13 sal-31 ta’ Marzu 2023, tiġi adottata l-pożizzjoni f’isem l-Unjoni biex l-Istati Membri jkunu jistgħu jipparteċipaw fid-deċiżjonijiet dwar il-bidliet proposti għall-Anness 16, il-Volumi I-III tal-Konvenzjoni ta’ Chicago.
Fir-rigward tal-emendi għall-Volum I, l-emendi proposti mistennija, kif stabbilit fl-Ittra lill-Istati msemmija hawn fuq, jinkludu:
a) emendi rigward l-użu xieraq tal-verbi modali biex l-Anness 16, il-Volum I jiġi allinjat mad-dokument “Directives to Divisional-type Air Navigation Meetings and Rules of Procedure for their Conduct” (Dokument 8143), il-Parti II, “Formulation of Proposals for International Standards, Recommended Practices and Procedures”;
b) gwida rakkomandata għall-kejl tal-istorbju mit-titjir f’punt fiss minn ħelikopters bħala parti mill-Anness 16, il-Volum I, id-Dokument Mehmuż H;
c) emendi biex jiġu indirizzati l-limitazzjonijiet tal-ispeċifikazzjonijiet fir-rigward tal-aġġustamenti tal-SPL (livell ta’ pressjoni tal-ħoss) fil-jum tat-test mal-kundizzjonijiet ta’ referenza; u
d) żbalji tipografiċi minuri għall-korrezzjoni.
Fir-rigward tal-emendi għall-Volum II, l-emendi proposti mistennija, kif stabbilit fl-Ittra lill-Istati msemmija hawn fuq, jinkludu:
a) aġġornamenti ta’ ristrutturar u ta’ referenza rilevanti, introdotti f’konformità mad-dokument “Directives to Divisional-type Air Navigation Meetings and Rules of Procedure for their Conduct” (Dokument 8143), il-Parti II, “Formulation of Proposals for International Standards, Recommended Practices and Procedures”;
b) aġġornamenti ta’ konsistenza lingwistika, li, fost l-oħrajn, jintroduċu l-użu xieraq tal-verbi modali, u l-applikazzjoni konsistenti tan-Noti u r-Rakkomandazzjonijiet, f’konformità mad-dokument “Directives to Divisional-type Air Navigation Meetings and Rules of Procedure for their Conduct” (Dokument 8143), il-Parti II, “Formulation of Proposals for International Standards, Recommended Practices and Procedures”;
c) titjib lingwistiku fir-rigward tal-applikabbiltà, biex tirrifletti, fost l-oħrajn, l-applikabbiltà taċ-Ċifra tad-Duħħan u tal-istandards tal-konċentrazzjoni tal-massa ta’ materja partikolata mhux volatili (nvPM) għall-magni;
d) l-introduzzjoni ta’ definizzjoni ġdida għall-“proċedura ekwivalenti” bil-bidliet sussegwenti għall-konsistenza fl-Anness 16, il-Volum II;
e) definizzjonijiet, deskrizzjonijiet, referenzi u titjib lingwistiku, inkluż, fost l-oħrajn, kjarifiki estiżi, deskrizzjonijiet metodoloġiċi, passi proċedurali intermedji, u Noti u Rakkomandazzjonijiet addizzjonali;
f) titjib relatat mal-proċedura ta’ kejl nvPM f’konformità mal-aħħar aġġornamenti fl-SAE ARP 6320A u AIR 6241A dwar il-kampjunar u l-kejl kontinwi tal-emissjonijiet nvPM ta’ magni bit-turbini tal-inġenji tal-ajru; u
g) korrezzjonijiet għal kwistjonijiet ġenerali tekniċi, tipografiċi u dawk tan-nomenklatura, immirati biex iżidu ċ-ċarezza u l-konsistenza fid-dokument kollu.
Fir-rigward tal-emendi għall-Volum III, l-emendi proposti mistennija, kif stabbilit fl-Ittra lill-Istati msemmija hawn fuq, jinkludu:
a) definizzjoni, deskrizzjoni, referenzi u titjib lingwistiku li għandhom l-għan, fost l-oħrajn, li jevitaw miżinterpretazzjoni potenzjali u jintroduċu kjarifiki addizzjonali relatati mal-Fattur Ġeometriku ta’ Referenza (RGF);
b) bidliet għall-konsistenza wara l-introduzzjoni ta’ definizzjoni ġdida għall-“proċedura ekwivalenti” fl-Anness 16, il-Volum III.
L-emendi proposti kollha huma previsti li jsiru applikabbli fl-1 ta’ Jannar 2024.
Is-suġġett tal-att previst jikkonċerna qasam li għalih l-Unjoni għandha kompetenza esterna esklużiva bis-saħħa tal-aħħar parti tal-Artikolu 3(2) tat-TFUE peress li l-atti previsti jistgħu jaffettwaw ir-regoli komuni jew ibiddlu l-kamp ta’ applikazzjoni tagħhom, b’mod partikolari:
— Ir-Regolament (UE) 2018/1139 tal-Parlament Ewropew u tal-Kunsill tal-4 ta’ Lulju 2018 dwar regoli komuni fil-qasam tal-avjazzjoni ċivili u li jistabbilixxi Aġenzija tas-Sikurezza tal-Avjazzjoni tal-Unjoni Ewropea 5 ;
— Ir-Regolament tal-Kummissjoni (UE) Nru 748/2012 tat-3 ta’ Awwissu 2012 li jistabbilixxi regoli ta’ implimentazzjoni għaċ-ċertifikazzjoni tal-airworthiness u ambjentali ta’ inġenji tal-ajru u ta’ prodotti, partijiet u tagħmir relatati, kif ukoll għaċ-ċertifikazzjoni ta’ organizzazzjonijiet relatati mad-disinn u l-produzzjoni 6 .
Wara li kkunsidrat il-leġiżlazzjoni rilevanti tal-Unjoni, il-pożizzjoni li għandha tittieħed f’isem l-Unjoni fil-Kunsill tal-ICAO għandha tkun li tappoġġa l-emendi proposti għall-Volumi I, II u III.
4.Konsistenza ma’ politiki oħra tal-Unjoni
Id-Deċiżjoni proposta hija konsistenti u komplementari ma’ politiki oħra tal-Unjoni, b’mod partikulari l-politiki tal-enerġija, tal-ambjent u tat-trasport.
5.Bażi ġuridika
5.1.Bażi ġuridika proċedurali
5.1.1. Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “ l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
L-Artikolu 218(9) tat-TFUE japplika irrispettivament minn jekk l-Unjoni hix membru tal-korp jew parti għall-ftehim 7 .
Il-kunċett ta’ “atti li jkollhom effetti legali” jinkludi l-atti li jkollhom effetti legali skont ir-regoli tad-dritt internazzjonali li jirregola s-sede kkonċernata. Dan jinkludi wkoll l-istrumenti li ma għandhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatur tal-Unjoni” 8 .
5.1.2 Applikazzjoni għal dan il-każ
Il-Kunsill tal-ICAO huwa korp stabbilit permezz ta’ ftehim, jiġifieri l-Konvenzjoni ta’ Chicago.
L-atti previsti għandhom effett legali għall-finijiet tal-Artikolu 218(9) tat-TFUE.
F’konformità mal-Artikolu 54 tal-Konvenzjoni ta’ Chicago, il-Kunsill tal-ICAO jadotta Standards u Prattiki Rakkomandati internazzjonali (SARPs), iddeżinjati bħala Annessi tal-Konvenzjoni ta’ Chicago. Tali SARPs huma vinkolanti skont id-dritt internazzjonali f’konformità mal-Artikolu 90 tal-Konvenzjoni ta’ Chicago sa fejn isiru vinkolanti għall-partijiet kontraenti kollha tal-ICAO sakemm il-maġġoranza ta’ dawn tal-aħħar ma jirreġistrawx id-diżapprovazzjoni tagħhom mal-Kunsill tal-ICAO.
Barra minn hekk, billi potenzjalment iwasslu għal emendi, l-atti previsti jistgħu jinfluwenzaw b’mod deċiżiv il-kontenut tal-leġiżlazzjoni tal-UE, jiġifieri r-Regolament (UE) 2018/1139 u r-Regolament tal-Kummissjoni (UE) Nru 748/2012 sa fejn jirreferu b’mod espliċitu għall-Anness 16, il-Volumi I-III tal-Konvenzjoni ta’ Chicago.
L-atti previsti la jissupplimentaw u lanqas jemendaw il-qafas istituzzjonali tal-ftehim.
Għalhekk, l-adozzjoni tal-pożizzjoni tal-Unjoni fir-rigward ta’ notifiki bħal dawn taqa’ fil-kamp ta’ applikazzjoni tal-Artikolu 218(9) tat-TFUE.
5.2.Bażi ġuridika sostantiva
5.2.1 Prinċipju
Il-bażi ġuridika sostantiva għal deċiżjoni skont l-Artikolu 218(9) tat-TFUE tiddependi primarjament fuq l-objettiv u fuq il-kontenut tal-att adottat li fir-rigward tiegħu tittieħed pożizzjoni f’isem l-Unjoni.
Jekk l-att previst ikollu żewġ għanijiet jew żewġ komponenti, u jekk wieħed minn dawk l-għanijiet jew komponenti jkun jista’ jiġi identifikat bħala dak ewlieni, filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) tat-TFUE trid tissejjes fuq bażi ġuridika sostantiva unika, jiġifieri dik meħtieġa mill-għan jew mill-komponent ewlieni jew predominanti.
5.2.2 Applikazzjoni għal dan il-każ
L-objettiv u l-kontenut ewlieni tal-att adottat huma relatati mal-politika tat-trasport.
Il-bażi ġuridika sostantiva tad-deċiżjoni proposta hija l-Artikolu 100(2) tat-TFUE. F’konformità ma’ dan l-Artikolu, il-Parlament Ewropew u l-Kunsill, filwaqt li jaġixxu skont il-proċedura leġiżlattiva ordinarja, jistgħu jistabbilixxu dispożizzjonijiet xierqa għat-trasport bl-ajru.
5.3.Konklużjoni
Il-bażi ġuridika tad-deċiżjoni proposta għandha tkun l-Artikolu 100(2) tat-TFEU, flimkien mal-Artikolu 218(9) tat-TFUE.
2023/0030 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fil-Kunsill tal-Organizzazzjoni tal-Avjazzjoni Ċivili Internazzjonali, fir-rigward tal-proposti għall-emenda tal-Anness 16, il-Volumi I-III tal-Konvenzjoni ta’ Chicago dwar l-Istandards u l-Prattiki Rakkomandati relatati mal-protezzjoni tal-ambjent
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 100(2), flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)Il-Konvenzjoni dwar l-Avjazzjoni Ċivili Internazzjonali (“il-Konvenzjoni ta’ Chicago”) li tirregola t-trasport internazzjonali bl-ajru, daħlet fis-seħħ fl-4 ta’ April 1947. Din stabbiliet l-Organizzazzjoni tal-Avjazzjoni Ċivili Internazzjonali (ICAO).
(2)L-Istati Membri kollha huma Stati Kontraenti tal-Konvenzjoni ta’ Chicago u membri tal-ICAO, filwaqt li l-Unjoni għandha status ta’ osservatur f’ċerti korpi tal-ICAO.
(3)Skont l-Artikolu 54 tal-Konvenzjoni, ta’ Chicago, il-Kunsill tal-ICAO jista’ jadotta Standards Internazzjonali u Prattiki Rakkomandati.
(4)L-Istandards u l-Prattiki Rakkomandati Internazzjonali (SARPs) dwar il-Protezzjoni tal-Ambjent ġew adottati mill-Kunsill tal-ICAO bħala l-Anness 16 tal-Konvenzjoni ta’ Chicago, fil-Volumi I-IV.
(5)Il-Kunsill tal-ICAO, waqt il-228 Sessjoni tiegħu li għandha ssir bejn it-13 u l-31 ta’ Marzu, għandu jadotta għadd ta’ emendi għall-Anness 16, il-Volumi I sa III tal-Konvenzjoni ta’ Chicago.
(6)Jixraq li tiġi stabbilita l-pożizzjoni li għandha tittieħed f’isem l-Unjoni fil-Kunsill tal-ICAO peress li l-emendi proposti għandhom effett legali, minħabba li huma vinkolanti skont id-dritt internazzjonali u jistgħu jinfluwenzaw b’mod deċiżiv il-kontenut tad-dritt tal-Unjoni, jiġifieri r-Regolament (UE) 2018/1139 u r-Regolament tal-Kummissjoni (UE) Nru 748/2012.
(7)Il-pożizzjoni li għandha tittieħed f’isem l-Unjoni jenħtieġ li tkun li tappoġġa l-emendi għall-Volumi I sa III.
(8)Il-pożizzjoni tal-Unjoni jenħtieġ li tiġi espressa mill-Istati Membri tal-Unjoni li huma membri tal-Kunsill tal-ICAO, li jaġixxu b’mod konġunt f’isem l-Unjoni.
(9)Il-pożizzjoni tal-Unjoni wara l-adozzjoni mill-Kunsill tal-ICAO tal-emendi għall-Anness 16, il-Volumi I-III tal-Konvenzjoni ta’ Chicago, li għandha titħabbar mis-Segretarju Ġenerali tal-ICAO permezz ta’ proċedura ta’ Ittra tal-Istat tal-ICAO, jenħtieġ li tkun li ma tiġix irreġistrata diżapprovazzjoni u li tiġi notifikata l-konformità ma’ dawk il-miżuri. Meta l-leġiżlazzjoni tal-Unjoni tiddevja mill-SARPs li jkunu għadhom kif ġew adottati wara data tal-applikazzjoni prevista ta’ dawk l-SARPs, id-differenza minn dawk l-SARPs partikolari jenħtieġ li tiġi notifikata lill-ICAO.
ADOTTA DIN ID-DEĊIŻJONI:
Artikolu 1
(1)Il-pożizzjoni li għandha tittieħed f’isem l-Unjoni fil-228 Sessjoni tal-Kunsill tal-ICAO, jew fi kwalunkwe sessjoni sussegwenti, fir-rigward tal-Anness 16, il-Volumi I-III tal-Konvenzjoni dwar l-Avjazzjoni Ċivili Internazzjonali fir-rigward tal-emendi ta’ dawn il-Volumi għandha tkun li tappoġġa l-emendi proposti fl-intier tagħhom.
(2)Il-pożizzjoni li għandha tittieħed f’isem l-Unjoni, dment li l-Kunsill tal-ICAO jadotta mingħajr ebda bidla sostanzjali l-emendi proposti għall-Anness 16, il-Volumi I-III tal-Konvenzjoni dwar l-Avjazzjoni Ċivili Internazzjonali msemmija fil-paragrafu 1, għandha tkun li ma tiġix irreġistrata diżapprovazzjoni u li tiġi nnotifikata l-konformità mal-miżura adottata bi tweġiba għall-Ittra rispettiva tal-Istat tal-ICAO. Meta l-leġiżlazzjoni tal-Unjoni tiddevja mill-SARPs li jkunu għadhom kif ġew adottati wara d-data tal-applikazzjoni prevista ta’ dawk l-SARPs, id-differenza minn dawk l-SARPs partikolari għandha tiġi notifikata lill-ICAO. F’każ bħal dan, il-Kummissjoni għandha, fi żmien xieraq u mill-inqas xahrejn qabel kwalunkwe skadenza stabbilita mill-ICAO biex jiġu nnotifikati d-differenzi, tissottometti lill-Kunsill, għad-diskussjoni u l-approvazzjoni, dokument preparatorju li jistabbilixxi d-differenzi dettaljati li l-Istati Membri għandhom jinnotifikaw lill-ICAO f’isem l-Unjoni.
Artikolu 2
Il-pożizzjoni msemmija fl-Artikolu 1(1) għandha tiġi espressa mill-Istati Membri tal-Unjoni li huma membri tal-Kunsill tal-Organizzazzjoni tal-Avjazzjoni Ċivili Internazzjonali, li jaġixxu b’mod konġunt f’isem l-Unjoni.
Il-pożizzjoni msemmija fl-Artikolu 1(2) għandha tiġi espressa mill-Istati Membri kollha tal-Unjoni.
Artikolu 3
Din id-Deċiżjoni hija indirizzata lill-Istati Membri.
Magħmul fi Brussell,
Għall-Kunsill
Il-President
