—

wara li kkunsidra l-Artikoli 179, 180 u 181 tat-Trattat dwar l-Unjoni Ewropea,

—

wara li kkunsidra t-Trattat dwar il-Funzjonament tal-Unjoni Ewropea u, b’mod partikolari, l-Artikoli 6, 9, 41, 153, 162, 165, 166 u 174 tiegħu,

—

wara li kkunsidra l-Karta tad-Drittijiet Fundamentali tal-Unjoni Ewropea, b’mod partikolari l-Artikoli 14, 15, 23, 25 u 26 tagħha,

—

wara li kkunsidra l-Konvenzjoni tan-Nazzjonijiet Uniti dwar id-Drittijiet ta’ Persuni b’Diżabilità (CRPD),

—

wara li kkunsidra l-Aġenda 2030 għall-Iżvilupp Sostenibbli tan-Nazzjonijiet Uniti u l-Għanijiet ta’ Żvilupp Sostenibbli (SDGs), b’mod partikolari l-SDGs 4, 8 u 9,

—

wara li kkunsidra s-sentenza tal-Qorti tal-Ġustizzja tal-Unjoni Ewropea tat-28 ta’ Ottubru 2021 fil-Kawża BX vs Unitatea Administrativ Teritorială D. (C-909-19) (1),

—

wara li kkunsidra l-Pilastru Ewropew tad-Drittijiet Soċjali u, b’mod partikolari, il-prinċipji 1, 3, 4 u 5 tiegħu,

—

wara li kkunsidra d-Direttiva 2005/36/KE tal-Parlament Ewropew u tal-Kunsill tas-7 ta’ Settembru 2005 dwar ir-rikonoxximent ta’ kwalifiki professjonali (2),

—

wara li kkunsidra l-komunikazzjoni tal-Kummissjoni tal-1 ta’ Lulju 2020 bit-titolu “Aġenda għall-Ħiliet għall-Ewropa għall-kompetittività sostenibbli, il-ġustizzja soċjali u r-reżiljenza” (COM(2020)0274),

—

wara li kkunsidra r-Regolament (UE) 2021/694 tal-Parlament Ewropew u tal-Kunsill tad-29 ta’ April 2021 li jistabbilixxi l-Programm Ewropa Diġitali u li jħassar id-Deċiżjoni (UE) 2015/2240 (3),

—

wara li kkunsidra r-riżoluzzjoni tiegħu tat-12 ta’ Frar 2019 dwar politika industrijali Ewropea komprensiva dwar l-intelliġenza artifiċjali u r-robotika (4),

—

wara li kkunsidra r-riżoluzzjoni tiegħu tas-16 ta’ Frar 2023 dwar strateġija tal-UE biex tingħata spinta lill-kompetittività industrijali, lill-kummerċ u lill-impjiegi ta’ kwalità (5),

—

wara li kkunsidra l-konklużjonijiet tal-Kunsill tad-9 ta’ Ottubru 2020 dwar id-Drittijiet tal-Bniedem, il-Parteċipazzjoni u l-Benesseri ta’ Persuni Akbar fl-Età fl-Era tad-Diġitalizzazzjoni,

—

wara li kkunsidra r-rakkomandazzjoni tal-Kunsill tal-24 ta’ Novembru 2020 dwar l-edukazzjoni u t-taħriġ vokazzjonali (VET) għall-kompetittività sostenibbli, il-ġustizzja soċjali u r-reżiljenza (6),

—

wara li kkunsidra d-Dikjarazzjoni ta’ Osnabruck tat-30 ta’ Novembru 2020 dwar l-edukazzjoni u t-taħriġ vokazzjonali bħala faċilitatur tal-rkupru u tranżizzjonijiet ġusti lejn ekonomiji diġitali u ekoloġiċi,

—

wara li kkunsidra r-rakkomandazzjoni tal-Kunsill tad-19 ta’ Diċembru 2016 dwar Perkorsi ta’ Titjib tal-Ħiliet: Opportunitajiet Ġodda għall-Adulti (7),

—

wara li kkunsidra r-rakkomandazzjoni tal-Kunsill tas-26 ta’ Novembru 2018 dwar il-promozzjoni tar-rikonoxximent reċiproku awtomatiku ta’ kwalifiki tal-edukazzjoni għolja u tal-edukazzjoni u t-taħriġ fil-livell sekondarju għoli u l-eżiti tal-perjodi ta’ apprendiment barra mill-pajjiż (8),

—

wara li kkunsidra r-rakkomandazzjoni tal-Kunsill tat-22 ta’ Mejju 2018 dwar il-kompetenzi ewlenin għat-tagħlim tul il-ħajja (9),

—

wara li kkunsidra l-komunikazzjoni tal-Kummissjoni tad-9 ta’ Marzu 2021 bit-titolu “Il-Kumpass Diġitali tal-2030: l-approċċ Ewropew għad-Deċennju Diġitali” (COM(2021)0118),

—

wara li kkunsidra l-komunikazzjoni tal-Kummissjoni tad-19 ta’ April 2016 bit-titolu “Id-Diġitalizzazzjoni tal-Industrija Ewropea – Ingawdu l-benefiċċji kollha ta’ Suq Uniku Diġitali” (COM(2016)0180),

—

wara li kkunsidra l-komunikazzjoni tal-Kummissjoni tal-5 ta’ Mejju 2021 bit-titolu “Aġġornament tal-Istrateġija Industrijali l-Ġdida tal-2020: Nibnu Suq Uniku aktar b’saħħtu għall-irkupru tal-Ewropa” (COM(2021)0350),

—

wara li kkunsidra l-komunikazzjoni tal-Kummissjoni tal-10 ta’ Marzu 2020 bit-titolu “Strateġija Industrijali Ġdida għall-Ewropa” (COM(2020)0102),

—

wara li kkunsidra l-komunikazzjoni tal-Kummissjoni tal-10 ta’ Marzu 2020 bit-titolu “Strateġija għall-SMEs għal Ewropa sostenibbli u diġitali” (COM(2020)0103),

—

wara li kkunsidra l-komunikazzjoni tal-Kummissjoni tal-1 ta’ Lulju 2020 bit-titolu “Appoġġ għall-Impjieg taż-Żgħażagħ: Pont għall-Impjiegi għall-Ġenerazzjoni li Jmiss” (COM(2020)0276),

—

wara li kkunsidra r-riżoluzzjoni tiegħu tas-17 ta’ Frar 2022 dwar it-tisħiħ tal-pożizzjoni taż-żgħażagħ Ewropej: l-impjiegi u l-irkupru soċjali wara l-pandemija (10),

—

wara li kkunsidra l-komunikazzjoni tal-Kummissjoni tat-13 ta’ Settembru 2017 bit-titolu “Ninvestu f’industrija intelliġenti, innovattiva u sostenibbli: Strateġija mġedda għall-politika industrijali tal-UE” (COM(2017)0479),

—

wara li kkunsidra l-komunikazzjoni tal-Kummissjoni tas-26 ta’ Awwissu 2010 bit-titolu “Aġenda Diġitali għall-Ewropa” (COM(2010)0245),

—

wara li kkunsidra l-komunikazzjoni tal-Kummissjoni tas-6 ta’ Ottubru 2010 bit-titolu “Inizjattiva Ewlenija Ewropa 2020: Unjoni tal-Innovazzjoni” (COM(2010)0546),

—

wara li kkunsidra l-komunikazzjoni tal-Kummissjoni tat-30 ta’ Settembru 2020 dwar il-kisba sal-2025 taż-Żona Ewropea tal-Edukazzjoni (COM(2020)0625), u d-dokument ta’ ħidma tal-persunal tal-Kummissjoni li jakkumpanjaha (SWD(2020)0212),

—

wara li kkunsidra r-riżoluzzjoni tiegħu tad-19 ta’ Mejju 2022 dwar l-istabbiliment taż-Żona Ewropea tal-Edukazzjoni sal-2025 – mikrokredenzjali, kontijiet ta’ apprendiment individwali u apprendiment għal ambjent sostenibbli (11),

—

wara li kkunsidra l-komunikazzjoni tal-Kummissjoni tat-30 ta’ Settembru 2020 bit-titolu “Pjan ta’ Azzjoni dwar l-Edukazzjoni Diġitali 2021-2027: Tfassil mill-ġdid tal-edukazzjoni u t-taħriġ għall-era diġitali” (COM(2020)0624) u d-dokument ta’ ħidma tal-persunal li jakkumpanjaha (SWD(2020)0209),

—

wara li kkunsidra r-rapport tal-Kummissjoni bit-titolu “Digital Economy and Society Index (DESI) 2020: Human capital” (Indiċi tal-Ekonomija u s-Soċjetà Diġitali (DESI) 2020: Kapital uman),

—

wara li kkunsidra l-konklużjonijiet tal-Kunsill tat-8 ta’ Ġunju 2020 dwar it-taħriġ mill-ġdid u t-titjib tal-ħiliet bħala bażi biex jiżdiedu s-sostenibbiltà u l-impjegabbiltà, fil-kuntest ta’ appoġġ għall-irkupru ekonomiku u l-koeżjoni soċjali,

—

wara li kkunsidra l-konklużjonijiet tal-Kunsill tas-16 ta’ Ġunju 2020 dwar il-ġlieda kontra l-kriżi tal-COVID-19 fl-edukazzjoni u t-taħriġ,

—

wara li kkunsidra l-opinjoni tal-Kumitat Ekonomiku u Soċjali Ewropew tat-13 ta’ Lulju 2016 bit-titolu “L-industrija 4.0 u t-trasformazzjoni diġitali: It-triq ’il quddiem”,

—

wara li kkunsidra l-opinjoni tal-Kumitat Ekonomiku u Soċjali Ewropew tas-7 ta’ Mejju 2020 bit-titolu “Il-finanzjament sostenibbli għat-tagħlim tul il-ħajja u l-iżvilupp tal-ħiliet, fil-kuntest tal-għadd insuffiċjenti ta’ ħaddiema b’ħiliet speċjalizzat”,

—

wara li kkunsidra l-opinjoni tal-Kumitat Ekonomiku u Soċjali Ewropew tal-15 ta’ Marzu 2018 bit-titolu “Il-futur tax-xogħol – il-ksib ta’ għarfien u ħiliet adegwati sabiex jiġu ssodisfati l-ħtiġijiet tal-impjiegi futuri”,

—

wara li kkunsidra l-opinjoni tal-Kumitat Ekonomiku u Soċjali Ewropew tas-27 ta’ April 2023 bit-titolu “Żvilupp ta’ kompetenza u ħiliet fil-kuntest tat-tranżizzjoni doppja ekoloġika u diġitali”,

—

wara li kkunsidra l-proposta tal-21 ta’ April 2021 għal regolament tal-Parlament Ewropew u tal-Kunsill li jistabbilixxi regoli armonizzati dwar l-intelliġenza artifiċjali (l-Att dwar l-Intelliġenza Artifiċjali) u li jemenda ċerti atti leġiżlattivi tal-Unjoni (COM(2021)0206),

—

wara li kkunsidra d-Deċiżjoni (UE) 2023/936 tal-Parlament Ewropew u tal-Kunsill tal-10 ta’ Mejju 2023 dwar Sena Ewropea tal-Ħiliet (12),

—

wara li kkunsidra d-Dikjarazzjoni dwar id-Drittijiet u l-Prinċipji Diġitali għad-Deċennju Diġitali pproklamata fil-15 ta’ Diċembru 2022,

—

wara li kkunsidra l-Istrateġija tal-Global Gateway tal-UE,

—

wara li kkunsidra l-istudju Ċentru Ewropew għall-Iżvilupp ta’ Taħriġ Vokazzjonali (Cedefop) ta’ Frar 2020 bit-titolu “Empowering adults through upskilling and reskilling pathways” (It-tisħiħ tal-pożizzjoni tal-adulti permezz ta’ perkorsi ta’ taħriġ ta’ aġġornament u ta’ taħriġ mill-ġdid),

—

wara li kkunsidra r-rapport konġunt tas-Cedefop u tal-Fondazzjoni Ewropea għat-Titjib tal-Kundizzjonijiet tal-Ħajja u tax-Xogħol (Eurofound) tat-30 ta’ Marzu 2023 bit-titolu “Fostering skills use for sustained business performance: Evidence from the European Company Survey” (It-trawwim tal-użu tal-ħiliet għal prestazzjoni sostnuta tan-negozju: Evidenza mill-Istħarriġ tal-Kumpaniji Ewropej) (13),

—

wara li kkunsidra r-Riżoluzzjoni tal-Kunsill tad-29 ta’ Novembru 2021 dwar aġenda Ewropea ġdida għat-tagħlim għall-adulti 2021 - 2030 (14),

—

wara li kkunsidra l-Istrateġija Ewropea dwar id-Drittijiet tal-Persuni b’Diżabilità 2021-2030,

—

wara li kkunsidra l-Artikolu 54 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Impjiegi u l-Affarijiet Soċjali (A9-0232/2023),

A.

billi l-politiki dwar l-edukazzjoni, it-taħriġ u l-ħiliet huma kompetenza tal-Istati Membri; billi l-UE għandha rwol dejjem aktar importanti biex tappoġġja, tistimola, tikkoordina u tikkomplementa l-azzjonijiet tal-Istati Membri;

B.

billi l-importanza tal-edukazzjoni u t-taħriġ vokazzjonali (VET), u b’mod partikolari t-titjib tal-ħiliet u t-taħriġ mill-ġdid tal-ħaddiema u ta’ dawk li jkunu qed ifittxu impjieg, se jkomplu jiżdiedu, b’mod partikolari b’riżultat tat-tranżizzjoni diġitali u dik ekoloġika; billi kundizzjonijiet tax-xogħol deċenti huma essenzjali biex jinżammu u jiġu attirati ħaddiema tas-sengħa; billi t-taħriġ ipprovdut lill-ħaddiema minn min jimpjegahom ma jridx jaffettwa b’mod negattiv ir-remunerazzjoni tal-ħaddiema;

C.

billi t-tqabbil tal-ħiliet u l-aspirazzjonijiet tal-ħaddiema mal-ħtiġijiet tas-suq tax-xogħol tal-UE li qed jevolvu huwa wieħed mill-għanijiet ewlenin tas-Sena tal-Ħiliet tal-UE;

D.

billi fost l-akbar sfidi li qed jiffaċċjaw l-edukazzjoni u t-taħriġ vokazzjonali kontinwi (CVET) bħalissa hemm l-attraenza baxxa tagħhom meta mqabbla mal-edukazzjoni akkademika, in-nuqqas ta’ interess fost l-istudenti u n-nuqqas ta’ ħaddiema tas-sengħa;

E.

billi t-tranżizzjoni diġitali u dik ekoloġika jista’ biss ikollhom suċċess jekk il-ħaddiema jingħataw il-ħiliet u l-kompetenzi meħtieġa;

F.

billi l-implimentazzjoni ta’ CVET ta’ kwalità għolja tista’ timponi piż finanzjarju sinifikanti, speċjalment fuq l-intrapriżi mikro u l-intrapriżi żgħar u ta’ daqs medju (SMEs);

G.

billi l-aċċess ugwali għall-VET, inklużi l-opportunitajiet ta’ titjib tal-ħiliet u ta’ taħriġ mill-ġdid, kif ukoll opportunitajiet ta’ tagħlim tul il-ħajja għal kulħadd, huwa kruċjali;

H.

billi, fl-2021, 45 % tal-ħaddiema rrappurtaw li rċevew taħriġ imħallas minn min iħaddimhom matul l-aħħar 12-il xahar; billi dan is-sehem kien aktar baxx fost il-ħaddiema żgħażagħ, in-nisa, u l-ħaddiema b’kuntratti ta’ aġenzija għal żmien fiss u temporanji, u dan jindika inugwaljanzi fl-aċċess għat-taħriġ (15);

I.

billi, fl-2021, 9,7 % ta’ dawk bejn it-18 u l-24 sena fl-UE kienu temmew biss l-edukazzjoni sekondarja għolja u ma kinux qed jipparteċipaw f’edukazzjoni jew taħriġ ulterjuri; billi 56 % ta’ nies Rom ta’ bejn is-16 u l-24 sena ma kinux impenjati fl-edukazzjoni, impjieg jew taħriġ (NEET) fl-2021;

J.

billi, fl-2021, il-proporzjon ta’ persuni fl-UE ta’ bejn il-25 u l-64 sena fl-edukazzjoni jew it-taħriġ kien ta’ 10,8 %, u s-sehem ta’ persuni ta’ bejn il-25 u l-64 sena fl-edukazzjoni u t-taħriġ żdied b’1,7 punt perċentwali meta mqabbel mal-2020, u b’hekk reġa’ lura għal-livelli tal-2019, jew għal-livelli ta’ qabel il-COVID-19 (16);

K.

billi l-Ewropa qed tesperjenza swieq tax-xogħol li qed jiċkienu u, sal-2030, 40 % tal-Ewropej se jkunu qed jgħixu f’reġjuni fejn in-numru ta’ impjiegi qed jonqos (17); billi 77 % tal-kumpaniji tal-UE rrapportaw diffikultajiet biex isibu ħaddiema bil-ħiliet meħtieġa; billi din id-diskrepanza fil-ħiliet bejn il-ħaddiema u l-impjiegi fis-suq tax-xogħol tal-UE ġġib magħha spejjeż sinifikanti għall-ekonomiji, il-kumpaniji u l-individwi; billi t-titjib tal-kundizzjonijiet tax-xogħol u l-fatturi li jindikaw il-kwalità tax-xogħol bħalma hija l-paga, l-awtonomija tal-impjegat u l-bilanċ bejn ix-xogħol u l-ħajja privata, flimkien mal-investimenti fil-ħiliet u fit-tagħlim fil-livell tal-kumpaniji, jistgħu jwasslu biex in-nuqqas ta’ ħaddiema jittaffa (18);

L.

billi objettiv wieħed tal-Aġenda għall-Ħiliet għall-Ewropa huwa li sal-2025 ikun hemm rata ta’ parteċipazzjoni fit-tagħlim ta’ 50 % fost dawk ta’ bejn il-25 u l-64 sena (meta mqabbel ma’ 38 % fl-2016); billi l-objettiv għall-parteċipazzjoni fost dawk ta’ bejn is-16 u l-74 sena b’minn tal-inqas ħiliet diġitali bażiċi huwa ta’ 70 % (meta mqabbel ma’ 56 % fl-2019); billi madwar 42 % tal-Ewropej ma għandhomx ħiliet diġitali bażiċi, inklużi 37 % ta’ dawk fil-forza tax-xogħol; billi l-Unjoni trid li sal-2030 iżżid is-sehem tal-popolazzjoni b’minn tal-inqas il-ħiliet diġitali bażiċi għal 80 %;

M.

billi l-VET u t-tagħlim tul il-ħajja ta’ kwalità jistgħu jikkontribwixxu biex jinkisbu l-prinċipji tal-Pilastru Ewropew tad-Drittijiet Soċjali (EPSR); billi wieħed mill-objettivi stabbiliti fil-Pjan ta’ Azzjoni tal-EPSR huwa li sal-2030 jintlaħaq sehem ta’ 60 % tal-adulti fit-taħriġ kull sena u mill-inqas 78 % f’impjieg;

N.

billi l-mira tal-UE fl-ambitu tal-qafas strateġiku għall-kooperazzjoni Ewropea fl-edukazzjoni u t-taħriġ (ET2020) għall-parteċipazzjoni fit-tagħlim għall-adulti (15 % fl-2020) ma ntlaħqitx fiċ-ċiklu li għadda, b’mod partikolari fir-rigward tal-persuni li jagħmlu parti mill-gruppi vulnerabbli u emarġinati u/jew b’inqas opportunitajiet; billi l-anzjani huma l-grupp ta’ età bl-inqas probabbiltà li jipparteċipaw fit-tagħlim għall-adulti; billi dimensjonijiet oħra ta’ esklużjoni evalwati mill-Eurostat huma relatati mal-ġeneru u relatati mal-livell edukattiv u mal-istatus attiv tal-individwu fis-suq tax-xogħol;

O.

billi l-inugwaljanzi fl-aċċess għat-tagħlim għall-adulti u l-VET għall-ħaddiema u għall-persuni li qed ifittxu xogħol għadhom jippersistu; billi l-livell ta’ edukazzjoni milħuq, il-grupp okkupazzjonali, is-settur ekonomiku tal-attività u d-daqs tal-istabbiliment kollha flimkien jiddeterminaw il-parteċipazzjoni tal-adulti fil-VET; billi l-ostakli l-aktar frekwenti fl-aċċess għat-tagħlim għall-adulti huma l-ispejjeż, l-inaċċessibbiltà, in-nuqqas ta’ infrastruttura tal-kura, il-litteriżmu baxx u l-istima personali baxxa; billi waħda minn kull tliet kumpaniji li ma jorganizzawx taħriġ isemmu l-ammont kbir ta’ xogħol u n-nuqqas ta’ ħin bħala raġunijiet, filwaqt li 28 % jindikaw spejjeż għoljin ta’ taħriġ vokazzjonali kontinwu (19); billi kemm il-ħin kif ukoll l-ispiża huma ostakli kbar għat-tagħlim għall-adulti minn perspettiva individwali;

P.

billi 45 % biss tal-ħaddiema fl-Unjoni jistgħu jużaw l-għarfien u l-ħiliet attwali tagħhom fl-impjieg ewlieni tagħhom, filwaqt li għall-kumplament, parti mill-għarfien u l-ħiliet tagħhom mhumiex utilizzati biżżejjed (20); billi minbarra n-nuqqas ta’ ħaddiema u d-diskrepanzi fil-ħiliet, id-diffikultajiet biex jiġu reklutati ħaddiema tas-sengħa jirriflettu wkoll kwalità batuta tax-xogħlijiet disponibbli, nuqqas ta’ politika tar-riżorsi umani orjentata lejn in-nies u opportunitajiet ta’ tfassil tax-xogħol mhux sfruttati (21);

Q.

billi r-Raba’ Rivoluzzjoni Industrijali, li tinkludi d-diġitalizzazzjoni sħiħa tal-provvista tas-servizzi u tal-proċessi ta’ produzzjoni, qed tfassal is-swieq tax-xogħol u tal-edukazzjoni u s-soċjetajiet tal-lum, billi toħloq kemm sfidi u kif ukoll opportunitajiet għall-ħaddiema u l-kumpaniji bħalma huma l-għajbien ta’ xi kompiti u okkupazzjonijiet u l-ħolqien ta’ oħrajn, ir-riallokazzjoni dinamika tal-kompiti tax-xogħol u t-tfassil mill-ġdid tal-kontenut tax-xogħlijiet; billi jeħtieġ aktar investiment mill-kumpaniji biex jiżviluppaw VET b’saħħithom madwar l-Unjoni u jippromwovu kompetenzi adattati għall-ħidma b’teknoloġiji ġodda, bħall-produzzjoni u l-makkinarju intelliġenti, ir-robotika avvanzata, il-cloud computing, l-intelliġenza artifiċjali, l-ipproċessar tad-data u l-Internet tal-Oġġetti; jissottolinja l-importanza li, minn naħa, nakkomodaw il-ħtieġa ta’titjib tal-ħiliet u taħriġ mill-ġdid u min-naħa l-oħra nindirizzaw id-distakk diġitali;

R.

billi s-sehem tal-impjegati (11,8 %) u l-ħaddiema (11,5 %) fl-edukazzjoni u t-taħriġ għall-adulti huwa ogħla meta mqabbel mal-popolazzjoni adulta inġenerali, iżda wera xejriet simili f’dawn l-aħħar snin; billi hemm differenzi sinifikanti f’dan ir-rigward bejn l-Istati Membri (22);

S.

billi ċ-ċifri tal-Eurostat dwar l-intrapriżi fl-UE b’10 impjegati jew aktar (bl-esklużjoni tal-intrapriżi tas-settur finanzjarju) juru li 98 % jużaw il-kompjuters u 97 % għandhom aċċess għall-internet; billi madwar 60 % tal-persuni kollha attivi fis-suq tal-impjiegi jużaw kompjuters, laptops, smartphones, tablets jew apparat portabbli ieħor fuq ix-xogħol (23);

T.

billi tnaqqis fin-numru ta’ impjiegi b’livell medju ta’ ħiliet u b’paga medja jista’ jiġi osservat favur żieda fl-impjiegi b’pagi baxxi u b’livell baxx ta’ ħiliet minħabba l-awtomatizzazzjoni tax-xogħol;

U.

billi 21 % tal-ħaddiema fl-Ewropa jindikaw li l-funzjonijiet tax-xogħol primarju tagħhom inbidlu minħabba l-introduzzjoni ta’ software jew hardware ġdid (24);

V.

billi l-edizzjoni tal-2022 tat-Tabella ta’ Valutazzjoni tal-Innovazzjoni Ewropea turi riżultati mtejba fl-innovazzjoni matul is-snin 2015-2022; billi għad hemm disparitajiet serji bejn l-Istati Membri (25);

W.

billi tlieta minn kull erba’ kumpaniji tal-UE jiffaċċjaw diffikultajiet biex isibu persunal bil-ħiliet it-tajba (26); billi hemm diskrepanza emerġenti fil-ħiliet;

X.

billi l-ħiliet trażversali bħalma huma l-ħiliet ta’ man-nies, il-multilingwiżmu, il-ħiliet ta’ tagħlim, il-komunikazzjoni, it-trattament tal-klijent, is-soluzzjoni tal-problemi, il-ħsieb kritiku, l-intraprenditorija, il-kreattività, il-kompetenzi interkulturali, il-ħidma f’tim u l-litteriżmu diġitali u fil-media qed jiġu vvalutati dejjem aktar minn min iħaddem bħala kruċjali għall-impjieg; billi l-ħiliet trażversali għandhom impatt li jmur lil hinn mill-impjieg u jirrikjedu bidla fil-mentalità tal-partijiet ikkonċernati fil-qasam tal-VET;

Y.

billi l-kompetenzi li ġejjin ġew identifikati u maqbula mill-Istati Membri kollha bħala essenzjali biex jiġi żgurat approċċ ta’ tagħlim tul il-ħajja: il-litteriżmu, il-multilingwiżmu, il-kompetenzi fix-xjenza, it-teknoloġija, l-inġinerija u l-matematika (STEM), il-kompetenzi diġitali, il-kompetenzi personali, soċjali u ta’ tagħlim dwar kif wieħed jitgħallem kompetenzi, il-kompetenza ċivika, il-ħiliet interkulturali u l-intraprenditorija; billi hemm nuqqas sproporzjonat ta’ nisa li jipparteċipaw fl-iSTEM;

Z.

billi bejn l-2020 u l-2021 sitta minn kull għaxar ħaddiema tal-UE+ wettqu mill-inqas attività ta’ edukazzjoni u taħriġ formali jew mhux formali biex jitgħallmu ħiliet relatati mal-impjieg (27);

AA.

billi l-pandemija tal-COVID-19 kellha impatt negattiv sinifikanti fuq l-implimentazzjoni sistematika tal-politiki tal-edukazzjoni u t-taħriġ; billi l-kriżi relatata biddlet il-mod tax-xogħol u saħħet il-ħtieġa li naġġornaw ir-repertorju tal-ħiliet tal-forza tax-xogħol Ewropea, speċjalment f’termini ta’ ħiliet diġitali;

AB.

billi hemm domanda dejjem akbar għall-ħiliet diġitali; billi teknoloġiji diġitali ġodda ġew introdotti f’44 % tal-postijiet tax-xogħol bejn l-2020 u l-2021; billi erbgħa minn kull għaxar impjegati adulti aktar spiss użaw teknoloġiji diġitali biex iwettqu xi parti mill-kompiti tax-xogħol tagħhom u madwar terz (36 %) ipparteċipaw aktar f’tagħlim online li għandu x’jaqsam mal-impjieg milli offline (28); billi t-tranżizzjoni diġitali lejn industrija 4.0 tirrikjedi li jiżdiedu l-ħiliet diġitali bażiċi għall-ħaddiema kollha u li jiġi aġevolat l-akkwist ta’ ħiliet diġitali aktar avvanzati, filwaqt li jiġi żgurat ir-rikonoxximent xieraq tagħhom fl-Istati Membri kollha; billi għandha tingħata attenzjoni partikolari għar-riskji u għalhekk għall-forniment ta’ ħiliet relatati maċ-ċibersigurtà u s-sikurezza diġitali;

AC.

billi l-kompiti jistgħu jiġu awtomatizzati f’ħafna setturi u sa punti differenti, u dan jirriżulta f’bidliet sinifikanti fl-impjiegi, fil-produttività tax-xogħol, fir-rekwiżiti tal-ħiliet u fid-daqs tal-forza tax-xogħol fl-Unjoni b’differenzi reġjonali qawwija; billi 35 % tal-ħaddiema jibżgħu li t-teknoloġiji diġitali ġodda jistgħu jew sejrin iwettqulhom xogħolhom kompletament jew parzjalment fil-futur (29); billi 45 % huma mħassba wkoll dwar il-ħiliet teknoloġiċi li ma għadhomx jintużaw u l-ħtieġa li jinkisbu għarfien u ħiliet ġodda; billi 49 % tal-attivitajiet li n-nies huma mħallsa jagħmlu fl-ekonomija globali hemm potenzjal li jsiru awtomatizzati billi t-teknoloġija li qed tintwera bħalissa tiġi adattata (30);

AD.

billi wieħed minn kull ħames ħaddiema adulti tal-UE+ (u 31 % ta’ dawk li ma jużawx it-teknoloġija diġitali) jibbenefikaw minn taħriġ fl-aktar ħiliet diġitali bażiċi, jiġifieri n-navigazzjoni fuq l-internet; billi minn 70 % sa 90 % jistgħu jiġu mħarrġa mill-ġdid f’bażijiet ta’ data aktar avvanzati u f’ħiliet ta’ programmazzjoni tal-kompjuter (31);

AE.

billi, skont il-miri tal-UE, 75 % tal-kumpaniji tal-UE għandhom jużaw teknoloġiji tal-cloud computing, Intelliġenza Artifiċjali u big data u aktar minn 90 % tal-SMEs għandhom jilħqu mill-inqas livell bażiku ta’ intensità diġitali (32);

AF.

billi l-allinjament tal-kurrikuli u l-aspirazzjonijiet tan-nies mal-kompetenzi u l-ħiliet meħtieġa biex jinkiseb kemm it-tisħiħ personali u professjonali u kif ukoll jiġu indirizzati l-ħtiġijiet tas-suq tax-xogħol u tas-soċjetà huwa waħda mill-isfidi ewlenin għas-sistemi edukattivi tal-Istati Membri; billi aktar minn nofs it-tfal li jidħlu fl-iskola primarja se jkunu impjegati f’impjiegi li ma jeżistux bħalissa;

AG.

billi huwa kruċjali li jiġu stabbiliti kundizzjonijiet u inċentivi ottimali biex jippermettu lil min iħaddem ikollu aċċess għal VET ta’ kwalità għolja li se jiżguraw esperjenza ta’ tagħlim utli u l-iżvilupp ta’ sett ta’ ħiliet rilevanti għall-impjegati;

AH.

billi l-promozzjoni ta’ proċess ta’ tagħlim ibbażat fuq il-kompetenza tista’ tiżgura l-adattabbiltà bla xkiel tal-proċess ta’ tagħlim għall-ħtiġijiet tal-istudenti u l-bidliet soċjetali li qed iseħħu b’ritmu mgħaġġel;

AI.

billi, matul is-snin, in-natura, il-kwalità, il-perċezzjoni u l-evalwazzjoni soċjetali tal-VET evolvew, u dan sar bis-saħħa, fost l-oħrajn, ta’ kampanji u politiki dwar il-VET, prospetti ta’ karriera aħjar, opportunitajiet ta’ mobilità, u s-soluzzjonijiet diġitali fl-edukazzjoni; billi, minkejja t-titjib fl-istatus u l-immaġni tal-VET, ta’ spiss għadhom ma humiex l-ewwel għażla fost iż-żgħażagħ u huma meqjusa bħala għażla sekondarja u inqas attraenti, wara l-edukazzjoni ġenerali;

AJ.

billi l-bidliet demografiċi fl-Istati Membri qed jaċċelleraw u huma mistennija jkomplu jagħmlu dan fid-deċennji li ġejjin, u jsaħħu l-ħtieġa li jsir użu mill-potenzjal sħiħ tal-adulti kollha fl-età tax-xogħol permezz ta’ investimenti kontinwi fil-ħiliet tagħhom, l-għarfien u l-kwalifiki kif ukoll permezz tat-tqegħid ta’ aktar persuni f’impjieg attiv; billi l-kumpaniji jistgħu jgħaddu minn problemi relatati mat-telf ta’ għarfien meta l-ħaddiema li jkollhom l-esperjenza jirtiraw; billi l-postijiet tax-xogħol u l-kundizzjonijiet tax-xogħol għandhom jiġu adattati għall-ħtiġijiet tal-forza tax-xogħol li qed tixjieħ; billi huwa kruċjali li jitrawwem it-tagħlim bejn ħaddiema b’aktar esperjenza u dawk b’inqas esperjenza fil-kumpaniji u li jiġi żgurat it-trasferiment tal-għarfien, anki minn ġenerazzjoni għal oħra, permezz ta’ programmi ta’ tutoraġġ, coaching u mentoraġġ;

AK.

billi kundizzjonijiet tax-xogħol deċenti u aċċess għal sistemi ta’ sigurtà soċjali, servizzi soċjali ta’ kwalità u ambjent ta’ għajxien attraenti se jkollhom rwol prominenti fiż-żamma u l-attrazzjoni ta’ ħaddiema tas-sengħa; billi t-tisħiħ tal-iżvilupp personali u l-gwida għat-tagħlim minn età bikrija u l-appoġġ għall-aċċess ugwali għall-informazzjoni jistgħu jgħinu lin-nies jagħżlu perkorsi ta’ tagħlim adatti għal opportunitajiet ta’ impjieg ta’ kwalità;

AL.

billi għadhom għaddejjin bidliet demografiċi; billi huwa stmat li l-popolazzjoni tal-Ewropa fl-età tax-xogħol (ta’ bejn l-20 u l-64 sena) se tkun qed tonqos b’0,4 % kull sena minn issa sal-2040; billi t-tnaqqis demografiku qed jikkawża wkoll bidliet fl-istruttura tas-suq tax-xogħol u domanda dejjem akbar għal ħaddiema f’ċerti setturi, bħalma huwa s-settur tal-kura tas-saħħa jew is-settur tal-kura;

AM.

billi 28 settur ġew ikklassifikati bħala li għandhom nuqqasijiet ta’ ħaddiema tas-sengħa, inklużi l-kura tas-saħħa, l-ospitalità, il-kostruzzjoni, is-servizzi tal-IT u s-sigurtà; billi hemm nuqqas ġenerali ta’ ħaddiema, b’mod partikolari nisa, bi sfondi ta’ STEM; billi l-għalliema huma wieħed mill-aktar ħames impjiegi bi skarsezzi fl-Ewropa, b’differenzi bbażati fuq ir-reġjuni ġeografiċi u s-suġġetti, li jħallu impatt fuq il-kapaċità li jipprovdu l-edukazzjoni u t-taħriġ li l-istudenti kollha jeħtieġu sabiex jadattaw għat-tranżizzjoni diġitali u dik ekoloġika kif ukoll ir-Raba’ Rivoluzzjoni Industrijali;

AN.

billi d-domanda dejjem tikber ta’ min iħaddem għal ħiliet speċifiċi turi l-ħtieġa ta’ impenn aktar b’saħħtu tal-kumpaniji fil-VET;

AO.

billi l-Parlament Ewropew ikkundanna ripetutament il-prattika ta’ traineeships mhux imħallsa bħala forma ta’ sfruttament ta’ ħaddiema żgħażagħ u ksur tad-drittijiet tagħhom;

AP.

billi, bħala parti mill-Istrateġija Ewropea dwar id-Drittijiet tal-Persuni b’Diżabilità 2021-2030, il-Kummissjoni impenjat ruħha li tippermetti lill-persuni b’diżabilità jgħixu b’mod indipendenti u jipparteċipaw bis-sħiħ fl-aspetti kollha tal-ħajja; billi huwa kruċjali li jiġu pprovduti opportunitajiet aħjar għall-persuni b’diżabilità biex jipparteċipaw fil-VET u jiksbu ħiliet ġodda, u dan huwa prerekwiżit għall-impjieg u l-indipendenza;