Pubblikazzjoni ta’ applikazzjoni għar-reġistrazzjoni ta’ isem skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

(2022/C 87/05)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 51 tar-Regolament (UE) Nru 1151/2012 tal-Parlament Ewropew u tal-Kunsill (1) fi żmien tliet xhur mid-data ta’ din il-pubblikazzjoni.

DOKUMENT UNIKU

“Äkta Gränna Polkagrisar”

Nru tal-UE: PGI-SE-02603 – 21 ta’ April 2020

DOP ( ) IĠP (X)

1.   Isem/Ismijiet [tad-DOP jew tal-IĠP]

“Äkta Gränna Polkagrisar”

2.   Stat Membru jew Pajjiż Terz

L-Iżvezja

3.   Deskrizzjoni tal-prodott agrikolu jew tal-oġġett tal-ikel

3.1.   Tip ta’ prodott

Klassi 2.3. Ħobż, għaġina, kejkijiet, ħelu, gallettini u prodotti oħra tal-furnara

3.2.   Deskrizzjoni tal-prodott li għalih japplika l-isem f’(1)

L-“Äkta Gränna Polkagrisar” hu ħelu tradizzjonali bi strixxi spirali ħomor magħmul miz-zokkor imħawwar biż-żejt naturali tal-peppermint.

L-“Äkta Gränna Polkagrisar” għandu l-karatteristiċi li ġejjin:

Karatteristiki morfoloġiċi

Forma: Stikka ċilindrika dritta.

Tul: 10-50 cm

Dijametru: 10-100 mm

Superfiċe: Xotta u lixxa.

Piż: 25-350 gramma

Kulur: Abjad newtrali bi strixxi spirali ħomor karminju (lewn NCS 1080-R), fejn l-intensità tal-kulur aħmar tista’ tvarja ftit minn lott għall-ieħor.

Karatteristiċi kimiċi

Zokkor: 85-99 %

Glukożju: 0-15 %

Żejt tal-peppermint

Kulur aħmar naturali – normalment aħmar karminju (E120)

Karatteristiċi organolettiċi

Togħma: Togħma ċara tan-nagħniegħ li tiġi bbilanċjata wara ftit ħin bil-ħlewwa. Togħma friska u dejjiema tal-peppermint.

Aroma: Aroma ta’ nagħniegħ b’sfumaturi ħelwin.

Konsistenza: Iebsa imma tista’ tomgħodha kemm xejn. Għandha tkun possibbli li tinqata’ b’sikkina mingħajr ma titfarrak. Il-konsistenza tiddependi fuq għadd ta’ fatturi ambjentali u fatturi oħra. Il-parti ta’ ġewwa hija poruża bi bżieżaq tal-arja żgħar, tondi u delikati.

Esperjenza meta jittiekel: Inizjalment iebes ħafna, bil-mod il-mod jinbidel għal li tista’ tomgħodu u jirtab. It-toqob mimlija bl-arja jistgħu jiġu nnutati b’mod ċar. Il-bżieżaq tal-arja huma r-raġuni għaliex il-“polkagris” jiżviluppa wara xi ftit ħin konsistenza li tomgħod fil-ħalq.

3.3.   Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

—

3.4.   Passi speċifiċi tal-produzzjoni li jridu jsiru fiż-żona ġeografika ddefinita

Biex tipprepara l-“Äkta Gränna Polkagrisa”, iz-zokkor, ix-xropp tal-glukożju, l-ilma u l-ħall jitgħallew f’borom mingħajr għatu. Il-lott imsajjar ma jistax ikun fih aktar minn 5 kg zokkor.

Ladarba l-lott jilħaq madwar 150 °C il-massa titferra’ fuq ċangatura mkessħa. Parti żgħira tal-massa titneħħa u tiġi kkulurita ħamra.

Wara li l-massa titkessaħ għal madwar 70 °C, l-arja tinħadem fiha u fl-istess ħin titħawwar biż-żejt tal-peppermint.

Ladarba l-massa tkun bajda u poruża, id-dulċier tal-“polkagris” ikollu madwar 10 minuti biex jifforma l-“polkagrisar”. Il-massa tiġi ffurmata f’forma tawwalija qabel mal-massa ta’ kulur aħmar titqiegħed fuqha. Wara li tintewa u titgħawweġ, il-massa tiġi ffurmata f’“polkagris” kbir bi strixxi spirali ħomor li jinqata’ min-nofs. Iż-żewġ nofsijiet huma rromblati fi stikek irqaq li jerġgħu jinqatgħu min-nofs. Dan il-proċess ikompli sakemm il-“polkagrisar” ikun laħaq it-tul u l-ħxuna mixtieqa.

Il-“polkagrisar” komplut jitħalla jiksaħ fuq ċinga trasportatriċi li tkun qed tiċċaqlaq b’mod kostanti sabiex il-prodott jikseb il-forma lixxa u uniformi li hija karatteristika tal-“Äkta Gränna Polkagrisar”.

3.5.   Regoli speċifiċi dwar it-tqattigħ, it-taħkik, l-ippakkjar, eċċ. tal-prodott li għalih jirreferi l-isem irreġistrat

L-“Äkta Gränna Polkagrisar” jinbiegħ imgeżwer f’imballaġġ tal-karti jew bis-cellophane ittikettat “Äkta Gränna Polkagrisar”.

3.6.   Regoli speċifiċi dwar it-tikkettar tal-prodott li għalih jirreferi l-isem irreġistrat

L-ebda rekwiżit addizzjonali għajr dawk li jirriżultaw mil-leġiżlazzjoni ordinarja.

4.   Definizzjoni fil-qosor taż-żona ġeografika

L-“Äkta Gränna Polkagrisar” isir fil-parroċċa ta’ Gränna fil-parti tal-Majjistral tal-provinċja ta’ Småland.

5.   Rabta maż-żona ġeografika

Ir-rabta maż-żona ġeografika hija bbażata fuq il-metodu ta’ kif isir l-“Äkta Gränna Polkagrisar”, li joriġina fi Gränna u li nżamm sal-lum il-ġurnata.

L-arti ta’ kif isir l-“Äkta Gränna Polkagrisar” ġiet ivvintata fil-belt ta’ Gränna minn Amalia Eriksson f’nofs is-snin 1800. Minn dak iż-żmien ’l hawn, ir-riċetta u l-metodu ta’ tħejjija ngħaddew f’sistema ta’ apprendisti, li fiha dulċiera ġodda jitgħallmu s-sengħa minn dulċier stabbilit tal-“polkagris”.

Sabiex tinkiseb il-konsistenza partikolari li tikkaratterizza l-“Äkta Gränna Polkagrisar”, dulċier tas-sengħa tal-“polkagris” għandu jkun jaf, fost affarijiet oħra, kif il-konsistenza hija affettwata mill-kwantitajiet tad-diversi ingredjenti, mill-punt tat-togħlija, mill-ammont ta’ arja maħduma fil-massa u mid-daqs tal-prodott finali.

Glukożju żejjed jew nuqqas ta’ ilma jwebbes il-“polkagris”, filwaqt li nuqqas ta’ ħall se jagħmlu imrammel. Jekk il-massa titgħalla bil-mod wisq, jew jekk it-temperatura tal-massa tkun baxxa ħafna meta titqiegħed fuq il-mejda mkessħa, il-“polkagris” jibqa’ artab. Id-dulċier għandu jiżgura wkoll li l-massa titkessaħ b’mod uniformi billi jċaqlaqha u billi jitwi t-truf b’mod kostanti.

Ladarba l-massa tkun tkessħet għat-temperatura t-tajba, id-dulċier jibda jaħdem l-arja fil-massa billi jiġbed u jgħawweġ b’mod ripetut madwar ganċ imwaħħal mal-ħajt. L-arja maħduma fil-massa jagħmilha bajda. Jekk il-dulċier ma jħaddimx fih biżżejjed arja, ikun hemm inqas bżieżaq tal-arja fil-massa, u b’hekk il-“polkagris” jibqa’ iebes. Ħafna arja tagħmel il-“polkagris” fraġli u jitfarrak aktar malajr.

Id-dulċier tal-“polkagris” għandu wkoll jadatta l-varjabbli msemmija hawn fuq skont id-daqs tal-prodott finali. Il-“Polkagris” kbir għandu t-tendenza li jiċċattja bil-piż tiegħu stess, b’tali mod li l-forma karatteristika ta’ stikka tonda tal-“Äkta Gränna Polkagrisar” tintilef. Id-dulċier tal-“polkagris” jista’ jmur kontra dan il-fenomenu billi jagħli l-massa f’temperatura ogħla jew billi juża aktar glukożju.

Sa mill-bidu tiegħu kien prodott lokali, u r-reputazzjoni tal-ħelu speċjali nfirex malajr permezz tal-artikli tal-istampa. Fil-bidu tas-snin 1900, l-“Äkta Gränna Polkagrisar” kien magħruf fil-parti l-kbira tal-Iżvezja. L-“Äkta Gränna Polkagrisar” kien ukoll esportat lejn l-Istati Uniti. Illum l-“Äkta Gränna Polkagrisar” hu magħruf sew madwar l-Iżvezja kollha u mit-turisti li jżuru Gränna, il-“belt tal-polkagris”.

Referenza għall-pubblikazzjoni tal-Ispeċifikazzjoni

(it-tieni subparagrafu tal-Artikolu 6(1) ta’ dan ir-Regolament)

https://www.livsmedelsverket.se/globalassets/produktion-handel-kontroll/livsmedelsinformation-markning-halsopastaenden/skyddade-beteckningar/produktbeskrivning_akta_granna_polkagrisar_2021_10_04.pdf

---

(1)  ĠU L 343, 14.12.2012, p. 1.