—

id-data dwar it-tibdil fil-klima, il-kwalità tal-ħamrija u s-sekwestru tal-karbonju, il-pestiċidi użati, il-kwalità tal-ilma u l-arja, l-enerġija, u l-bijodiversità għandha tiġi ttrattata bħala data ambjentali li għandha tinġabar mill-bdiewa jew minn strumenti oħra interoperabbli mal-FSDN. Id-data miġbura għandha tiġi diżaggregata skont it-tip ta’ prodott (organiku, eċċ.). Il-varjabbli tad-data dwar is-sostenibbiltà jridu jiġu evalwati bir-reqqa fir-rigward tal-validità, il-kwalità u l-komparabbiltà biex jiġu inklużi fin-network jekk iridu jintużaw bħala għodda għall-politiki;

—

id-data dwar il-kundizzjonijiet tax-xogħol, it-tipi ta’ kuntratti, is-saħħa u s-sikurezza (l-eżistenza ta’ pjan tas-saħħa u s-sikurezza fil-livell tal-azjendi agrikoli, l-għadd ta’ inċidenti, inklużi l-ħaddiema li jaħdmu għal rashom), il-ħiliet u l-pagi, il-kondizzjonalità soċjali marbuta mal-Politika Agrikola Komuni, l-għadd ta’ ħaddiema li jaħdmu għal rashom, l-għadd ta’ ħaddiema temporanji/staġjonali jenħtieġ li jiġu kkunsidrati bħala data soċjali li għandha tinġabar mill-bdiewa jew minn strumenti oħra interoperabbli mal-FSDN. Għandu jkun hemm fokus speċjali fuq in-nisa u ż-żgħażagħ;

—

id-data ambjentali u soċjali għandha tingħata l-istess livell ta’ importanza bħad-data ekonomika. Meta jitqies li għal dawn l-aħħar deċennji l-FADN ivvaluta prinċipalment is-sitwazzjoni ekonomika tal-bdiewa, id-dimensjoni ekonomika hija waħda kruċjali flimkien mal-isfidi ambjentali u soċjali;

—

approċċ inkroċjat mas-Sistema Integrata ta’ Amministrazzjoni u Kontroll (SIAK) u mad-data li tirriżulta mill-implimentazzjoni tal-politika agrikola komuni (PAK) kif ukoll mill-Eurostat, speċjalment għal data ambjentali u soċjali;

—

il-possibbiltà għall-bdiewa kollha li jikkontribwixxu għall-FSDN, fil-każi meta jkunu lesti u kapaċi jagħmlu dan, fuq il-bażi ta’ metodoloġija speċifika u bil-kundizzjoni li jitqiesu r-rappreżentattività u r-restrizzjonijiet baġitarji; m’għandha teżisti l-ebda sanzjoni jekk ikunu parti mill-grupp kampjun iżda ma jridux jikkontribwixxu. Il-forniment tad-data mill-bdiewa jrid jibqa’ volontarju; Madankollu, l-Istati Membri għandhom jidentifikaw modi u inċentivi adegwati biex iħeġġu lill-bdiewa jieħdu sehem fl-FSDN;

—

għandu jkun hemm fokus kostanti fuq it-tnaqqis tal-burokrazija: għandhom jintużaw ukoll teknoloġiji moderni tad-data bħall-intelliġenza artifiċjali, l-Internet tal-oġġetti, il-validazzjoni awtomatika jew l-infrastruttura tal-ġbir mill-bogħod;

—

l-FSDN għandu jgħin biex jiżdied il-fehim tal-ekosistema kollha tal-azjenda agrikola, u għal dan għandha tiġi prevista l-interoperabbiltà ma’ bażijiet oħra tad-data; u għandha tiġi prevista wkoll l-analiżi ta’ settijiet ta’ data separati li jkopru partijiet oħra tal-katina tal-provvista;

—

jiġi previst li l-azjendi agrikoli ta’ sussistenza u azjendi agrikoli ta’ semisussistenza jiġu inklużi fit-teħid tal-kampjuni tal-FSDN;

—

jiġu inklużi karatteristiċi, sorsi, formati, dimensjonijiet u livelli differenti ta’ granularità tad-data skont is-sitwazzjonijiet differenti fost l-Istati Membri;

—

jiġi previst skambju kostanti tal-aħjar prattiki tal-biedja bejn l-Istati Membri u l-bdiewa; għandhom jiġu żviluppati strumenti speċjali f’dan ir-rigward;

—

għandu jsir aktar biex tiġi kkonsolidata l-kapaċità għall-ġbir, il-kondiviżjoni, il-ġestjoni u l-użu tad-data biex jittejbu l-effiċjenza u l-proċess tat-teħid tad-deċiżjonijiet fil-livell tal-azjendi agrikoli, speċjalment għall-azjendi agrikoli ż-żgħar;

—

l-FSDN għandu jikkontribwixxi għat-titjib tal-ġestjoni tal-azjendi agrikoli, u s-servizzi ta’ konsulenza personalizzati għandhom jingħataw ukoll billi tinħoloq rabta ċara mad-data dwar il-varjabbli eżoġeni tal-proċess tal-produzzjoni agrikola bħat-tbassir tat-temp, eċċ.;

—

għandhom jiġu stabbiliti kriterji speċifiċi marbuta mas-sostenibbiltà tal-proċessi meħtieġa mill-FSDN u kriterji tal-kundizzjonijiet tax-xogħol għall-kolletturi tad-data.