52022AE2745

EUR-Lex

Access to European Union law

This document is an excerpt from the EUR-Lex website

EUROPA
EUR-Lex home
EUR-Lex - 52022AE2745 - EN

Help

Search tips

Need more search options? Use the Advanced search

Document 52022AE2745

Help

Opinjoni tal-Kumitat Ekonomiku u Soċjali Ewropew dwar “Proposta għal Direttiva tal-Parlament Ewropew u tal-Kunsill dwar l-istatus ta’ ċittadini ta’ pajjiżi terzi li jkunu residenti għal żmien twil” (COM(2022) 650 — final) — “Proposta għal Direttiva tal-Parlament Ewropew u tal-Kunsill dwar proċedura ta’ applikazzjoni unika għal permess uniku għal ċittadini ta’ pajjiżi terzi sabiex jirrisjedu u jaħdmu fit-territorju ta’ Stat Membru u dwar ġabra komuni ta’ drittijiet għal ħaddiema ta’ pajjiżi terzi residenti legalment fi Stat Membru” (COM(2022) 655 — final) — “Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Nattiraw il-ħiliet u t-talent lejn l-UE” (COM(2022) 657 — final)

EESC 2022/02745

ĠU C 75, 28.2.2023, p. 136–142 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

HTML

PDF

Official Journal

28.2.2023

Il-Ġurnal Uffiċjali tal-Unjoni Ewropea

C 75/136

(COM(2022) 650 — final)

“Proposta għal Direttiva tal-Parlament Ewropew u tal-Kunsill dwar proċedura ta’ applikazzjoni unika għal permess uniku għal ċittadini ta’ pajjiżi terzi sabiex jirrisjedu u jaħdmu fit-territorju ta’ Stat Membru u dwar ġabra komuni ta’ drittijiet għal ħaddiema ta’ pajjiżi terzi residenti legalment fi Stat Membru”

(COM(2022) 655 — final)

“Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Nattiraw il-ħiliet u t-talent lejn l-UE”

(COM(2022) 657 — final)

(2023/C 75/19)

Relatur:	José Antonio MORENO DÍAZ
Korelatur:	Milena ANGELOVA

Konsultazzjoni	Kummissjoni Ewropea, 26.7.2022
Bażi legali	Artikolu 304 tat-Trattat dwar il-Funzjonament tal-Unjoni Ewropea
Sezzjoni kompetenti	Sezzjoni għax-Xogħol, l-Affarijiet Soċjali u ċ-Ċittadinanza
Adozzjoni fis-sezzjoni	29.9.2022
Adozzjoni fil-plenarja	26.10.2022
Sessjoni plenarja Nru	573
Riżultat tal-votazzjoni (favur/kontra/astensjonijiet)	179/0/6

1. Introduzzjoni

1.1.

F’April 2022, il-Kummissjoni Ewropea ppreżentat il-Pakkett dwar il-Ħiliet u t-Talenti skont l-aġenda ta’ ħidma tal-Patt Ġdid dwar il-Migrazzjoni u l-Ażil adottat f’Settembru 2020. L-għan tal-pakkett il-ġdid huwa li jippromovi l-migrazzjoni ordnata lejn l-Unjoni, billi jinkoraġġixxi l-attrazzjoni ta’ talenti u ħiliet b’mod li jkun ta’ benefiċċju kemm għall-pajjiżi ta’ oriġini kif ukoll għall-pajjiżi ta’ destinazzjoni. Ir-reviżjonijiet għandhom ukoll l-għan li jippromovu sistema aktar effiċjenti u koerenti ta’ drittijiet u opportunitajiet ta’ impjieg għal ċittadini mhux tal-UE li jirrisjedu fl-Unjoni, filwaqt li jgħinu biex l-Unjoni ssir aktar attraenti bħala destinazzjoni għal ċittadini ta’ pajjiżi terzi b’ħiliet speċjalizzati.

1.2.

Il-KESE jilqa’ dan il-pakkett li jieħu approċċ kostruttiv u koerenti għall-migrazzjoni u jwieġeb għall-ħtieġa li jittejbu l-istrumenti tal-Unjoni għall-migrazzjoni regolari. Bit-tranżizzjoni diġitali u ekoloġika taqbad il-pass u fi żmien meta n-nuqqas ta’ ħaddiema u ta’ ħiliet huwa evidenti fis-setturi kollha tal-attività ekonomika, il-KESE jenfasizza r-rwol li l-migrazzjoni legali jista’ jkollha biex tgħin biex jiġi indirizzat in-nuqqas ta’ ħaddiema u ħiliet f’oqsma fejn hemm ħtieġa ġustifikata.

1.3.

Il-KESE diġà esprima t-tħassib tiegħu dwar il-fatt li l-Patt -Ġdid dwar il-Migrazzjoni u l-Ażil jiffoka fuq il-ġestjoni tal-fruntieri u l-kontroll tal-migrazzjoni, u għalhekk iqis li l-progress li sar fil-governanza tal-immigrazzjoni organizzata u regolari huwa pożittiv.

1.4.

Il-KESE japprezza li l-Kummissjoni rrikonoxxiet ir-rwol kruċjali li diġà jaqdu l-migranti fl-ekonomija u s-soċjetà Ewropea, billi jgħinu biex jintlaħqu l-ħtiġijiet tas-suq tax-xogħol li qed jevolvi u — fejn hemm bżonn — biex jingħeleb in-nuqqas ta’ ħaddiema u ta’ ħiliet: bidla fil-perspettiva b’diskors ta’ normalizzazzjoni u pożittiv hija importanti ħafna.

1.5.

Għalhekk, il-KESE jilqa’ l-fatt li l-influss ta’ talent minn pajjiżi terzi qed jiġi ffaċilitat sabiex jgħin biex jiġu ssodisfati dawn il-ħtiġijiet dejjem akbar, b’mod partikolari f’setturi b’nuqqasijiet strutturali.

1.6.

Mingħajr ma titnaqqas l-importanza tagħha, il-KESE jissuġġerixxi li n-narrattiva li torbot il-wasla ta’ ħaddiema mhux tal-UE mal-ħtiġijiet tas-swieq tax-xogħol tal-Istati Membri għandha tiġi eżaminata sabiex jiġi evitat is-sottoimpjieg u kundizzjonijiet ħżiena tax-xogħol għal ħaddiema mhux tal-UE li jkunu għadhom kif waslu.

1.7.

Il-KESE jqis li huwa neċessarju li jsir progress fuq mezzi ġodda biex jiġi attirat it-talent lejn l-Unjoni, iżda jirrimarka wkoll li hemm ħtiġijiet oħrajn fis-swieq tax-xogħol tal-Istati Membri; dawn il-ħtiġijiet jeħtieġu li jitfasslu miżuri biex jintlaħqu flimkien ma’ dawk previsti fil-pakkett propost. B’mod partikolari, huwa importanti li jissaħħu l-isforzi biex tiġi appoġġjata l-integrazzjoni fis-suq tax-xogħol tal-persuni qiegħda u inattivi permezz ta’ miżuri ta’ appoġġ immirati.

1.8.

Il-KESE jemmen li l-Kummissjoni għandha tkun aktar ambizzjuża fit-tfittxija ta’ kanali legali u organizzati ta’ migrazzjoni tal-ħaddiema li jqisu wkoll il-persuni fil-bżonn ta’ protezzjoni internazzjonali.

1.9.

Il-KESE jilqa’ l-Komunikazzjoni dwar Nattiraw il-ħiliet u t-talent lejn l-UE, peress li jqis dan bħala pass ’il quddiem fil-qasam tal-migrazzjoni tal-ħaddiema, li jirrikjedi strumenti adatti, realistiċi u effettivi fil-kuntesti l-ġodda.

1.10.

Il-KESE jqis li huwa meħtieġ li jsir progress fir-Riżerva ta’ Talent (1), billi nibdew bil-proġett pilota inizjali u l-verżjoni sħiħa li għandha titnieda s-sena d-dieħla, u jirrimarka li s-suċċess u s-sensibilizzazzjoni tar-Riżerva ta’ Talent se jiddependu fuq l-użu ta’ riżorsi adegwati biex l-għodda ssir aċċessibbli u operattiva. Jilqa’ wkoll is-Sħubijiet ta’ Talent u jqis li dawn jeħtieġ li jiġu żviluppati f’kooperazzjoni ma’ pajjiżi terzi. Il-KESE jitlob li jiġu stabbiliti mekkaniżmi ta’ evalwazzjoni adegwati, li jiżguraw il-viżibbiltà u t-trasparenza fl-implimentazzjoni tas-Sħubijiet ta’ Talent, mhux biss għall-istrumenti nfushom, iżda wkoll għall-identifikazzjoni tal-pajjiżi li magħhom għandhom jikkooperaw: ir-rispett għall-istat tad-dritt u d-drittijiet tal-bniedem għandhom dejjem ikunu preżenti fir-relazzjonijiet esterni tal-politika tal-Unjoni dwar l-immigrazzjoni u l-ażil.

1.11.

Minkejja li n-nisa jiffurmaw parti sinifikanti minn għadd ta’ setturi kruċjali, in-nisa mobbli u migranti jistgħu jkunu soġġetti għal impjiegi mhux sikuri u l-ekonomija informali u spiss ikunu partikolarment vulnerabbli għad-diskriminazzjoni, l-esklużjoni soċjali u n-nuqqas ta’ opportunitajiet ta’ impjieg u taħriġ, kif ukoll ikunu esposti għal abbuż, vjolenza u fastidju. Il-KESE jemmen li l-protezzjoni tad-drittijiet tan-nisa u l-perspettiva tal-ġeneru jeħtieġ li jiġu integrati b’mod aktar b’saħħtu.

1.12.

Il-KESE jilqa’ r-reviżjoni proposta tad-Direttiva dwar ir-residenza għal żmien twil fl-Unjoni Ewropea. Il-KESE jilqa’ l-fatt li l-proposta tiffaċilita l-proċess tal-kisba ta’ dan l-istatus permezz tal-akkumulazzjoni ta’ snin ta’ kwalifika minn perjodi ta’ soġġorn fi Stati Membri differenti, trawwem il-mobbiltà intra-UE, u għandha l-għan li testendi l-aċċess ugwali għall-protezzjoni soċjali għaċ-ċittadini tal-UE li jkunu residenti għal żmien twil fi Stat Membru ieħor.

1.13.

Il-KESE jilqa’ r-reviżjoni tad-Direttiva dwar il-Permess Uniku, inkluż l-għan li jiġi ffaċilitat u semplifikat il-proċess tal-applikazzjoni u li jiġi żgurat li l-permess uniku ma jkunx marbut ma’ impjegatur speċifiku wieħed, għalkemm iqis li seta’ sar tentattiv biex jiġi estiż is-sett ta’ drittijiet, f’konformità mal-kontenut tal-ewwel proposta għal direttiva ppreżentata fl-2011.

1.14.

Il-KESE jqis li huwa essenzjali li r-reviżjoni tenfasizza l-ħtieġa li jissaħħaħ it-trattament ugwali tal-ħaddiema li huma ċittadini ta’ pajjiżi terzi, b’mod partikolari fir-rigward tal-kundizzjonijiet tax-xogħol, il-libertà ta’ assoċjazzjoni u affiljazzjoni u l-benefiċċji tas-sigurtà soċjali.

1.15.

Il-KESE jenfasizza wkoll l-importanza li l-imsieħba soċjali u partijiet interessati rilevanti oħra jiġu involuti fid-diskussjoni dwar it-titjib tal-governanza tal-migrazzjoni tal-ħaddiema fil-livell tal-UE. Għal dan l-għan nilqgħu l-ħolqien tal-pjattaforma proposta għad-djalogu fil-livell tal-UE.

2. Kummenti ġenerali

2.1.

F’April 2022, il-Kummissjoni Ewropea ppreżentat il-Pakkett dwar il-Ħiliet u t-Talenti skont l-aġenda ta’ ħidma tal-Patt Ġdid dwar il-Migrazzjoni u l-Ażil adottat f’Settembru 2020. Il-pakkett jinkludi r-reviżjoni tad-Direttiva 2003/109/KE dwar ir-residenza għal żmien twil (2), ir-reviżjoni tad-Direttiva 2011/98/UE dwar il-permess uniku (3), u dwar Nattiraw il-ħiliet u t-talent lejn l-UE (4).

2.2.

L-għan tal-pakkett il-ġdid huwa li jippromovi l-migrazzjoni ordnata lejn l-Unjoni, filwaqt li jinkoraġġixxi l-attrazzjoni ta’ talenti u ħiliet b’mod li jkun ta’ benefiċċju kemm għall-pajjiżi ta’ oriġini kif ukoll għall-pajjiżi ta’ destinazzjoni. Ir-reviżjonijiet għandhom ukoll l-għan li jrawmu sistema aktar effiċjenti u koerenti ta’ drittijiet u opportunitajiet ta’ impjieg għal ċittadini mhux tal-UE li jirrisjedu fl-Unjoni, filwaqt li jgħinu biex l-Unjoni ssir aktar attraenti bħala destinazzjoni għal ċittadini ta’ pajjiżi terzi b’ħiliet speċjalizzati.

2.3.

Il-Komunikazzjoni dwar Nattiraw it-talent u l-ħiliet lejn l-UE għandha l-għan li taġġorna l-prinċipji li jirregolaw il-migrazzjoni legali għal raġunijiet ekonomiċi lejn l-Unjoni. Dan jirrifletti r-rieda li l-pilastru leġiżlattiv jittejjeb biż-żewġ proposti ta’ reviżjoni, li jiġu żviluppati Sħubijiet ta’ Talent u Riżerva ta’ Talent tal-Unjoni, u li titmexxa ’l quddiem il-politika dwar il-migrazzjoni legali fl-oqsma tal-kura, iż-żgħażagħ u l-innovazzjoni.

2.4.

Il-KESE jirrimarka li ma hemm l-ebda eżerċizzju ta’ analiżi u evalwazzjoni fil-proposta li jesploraw għaliex id-Direttivi attwali dwar il-permess uniku jew l-awtorizzazzjonijiet fit-tul mhumiex jaħdmu kif suppost. Il-Kummissjoni għandha tanalizza u taqsam il-kawżi ta’ dawn in-nuqqasijiet, billi tidentifika jekk huwiex nuqqas ta’ rieda min-naħa tal-Istati Membri li jimplimentawhom jew burokrazija eċċessiva, fost kawżi oħra, sabiex jiġu evitati l-istess problemi fil-futur.

2.5.

Il-proposta għar-reviżjoni tad-Direttiva dwar il-permess uniku toffri opportunità biex jitwessa’ l-aċċess għal dan l-istrument u tiġi ffaċilitata l-parteċipazzjoni fis-suq tax-xogħol ta’ ħaddiema mhux tal-UE, filwaqt li jiġu kkonsolidati d-drittijiet inerenti fih, u jsir progress fl-armonizzazzjoni tal-applikazzjoni tiegħu bejn l-Istati Membri.

2.6.

Ir-reviżjoni proposta tad-Direttiva tal-UE dwar ir-Residenza fit-Tul għandha wkoll l-għan li ttejjeb l-applikazzjoni tagħha fl-Istati Membri differenti, filwaqt li tiffaċilita l-mobbiltà intra-UE billi tissemplifika l-proċess u tnaqqas ir-rekwiżiti taż-żmien għall-kisba ta’ permessi ta’ residenza għal żmien twil.

2.7.

B’mod ġenerali, il-KESE jilqa’ dan il-pakkett li jieħu approċċ kostruttiv u koerenti lejn il-migrazzjoni, iwieġeb għall-ħtieġa li jittejbu l-istrumenti tal-Unjoni għall-migrazzjoni regolari, u jenfasizza r-rwol li l-migrazzjoni legali jista’ jkollha biex tgħin tindirizza n-nuqqas ta’ ħaddiema — f’oqsma fejn hemm ħtieġa ppruvata — u ta’ ħiliet. Il-KESE diġà esprima t-tħassib tiegħu dwar il-fatt li l-enfasi tal-Patt Ġdid dwar il-Migrazzjoni u l-Ażil hija fuq il-ġestjoni tal-fruntieri u l-kontroll tal-migrazzjoni, u għalhekk jilqa’ b’sodisfazzjon il-progress li sar fil-governanza ta’ migrazzjoni organizzata u regolari.

2.8.

Il-KESE japprezza r-rwol kruċjali li l-migranti diġà għandhom fl-ekonomija u s-soċjetà Ewropea, billi jgħinu biex jiġu ssodisfati l-ħtiġijiet tas-suq tax-xogħol u biex jingħeleb — fejn meħtieġ — in-nuqqas ta’ ħaddiema u ħiliet. Għalhekk, il-KESE jilqa’ l-faċilitazzjoni tal-influss ta’ talent minn pajjiżi terzi sabiex jgħin biex jiġu ssodisfati dawn il-ħtiġijiet dejjem akbar, b’mod partikolari f’setturi b’nuqqasijiet strutturali. Il-KESE jilqa’ wkoll passi biex jiġu attirati negozji innovattivi u skalabbli li jġibu valur miżjud sinifikanti għall-ekonomija u s-soċjetà tal-UE. Proġetti ta’ riċerka internazzjonali jibqgħu mod effettiv ieħor għall-promozzjoni, l-attrazzjoni u ż-żamma ta’ talent ta’ klassi dinjija. Għal dan il-għan, huwa meħtieġ li jitħaffef u jiġi ssemplifikat l-aċċess għas-suq tax-xogħol tal-UE għall-professjonisti minn pajjiżi terzi li huma meħtieġa, sabiex l-Ewropa ssir aktar attraenti għal partijiet oħra tad-dinja. Il-KESE jħeġġeġ u jilqa’ wkoll l-iżvilupp u l-implimentazzjoni ta’ għodod prattiċi li jgħaqqdu u jqabblu t-talent minn pajjiżi terzi b’mod aktar faċli ma’ impjegaturi potenzjali fl-Istati Membri.

2.9.

Hemm bżonn li ssir riflessjoni dwar in-narrattiva li torbot l-influss ta’ ħaddiema barranin mal-ħtiġijiet tas-swieq tax-xogħol tal-Istati Membri. F’xi pajjiżi tal-UE, hemm qgħad strutturali f’ċerti setturi ta’ impjiegi u ta’ professjonijiet li jista’ jirriżulta minn nuqqas ta’ tqabbil tal-ħiliet, nuqqas ta’ attraenza ta’ ċerti setturi/professjonijiet u tħassib dwar il-kundizzjonijiet tax-xogħol. F’dawn il-pajjiżi, huwa importanti li wieħed jipprova jtejjeb l-attraenza ta’ tali setturi u professjonijiet għall-ħaddiema fis-swieq domestiċi (ċittadini ta’ dak il-pajjiż, ħaddiema tal-UE u ta’ pajjiżi terzi b’permessi tax-xogħol) sabiex jiġi evitat is-sottoimpjieg u kundizzjonijiet tax-xogħol ħżiena għal ħaddiema mhux tal-UE li jkunu għadhom kif waslu. B’mod parallel, ir-Riżerva ta’ Talent tal-UE tista’ tgħin biex tiffaċilita t-tqabbil immirat ta’ ħaddiema mhux tal-UE ma’ impjiegi fl-UE sabiex jiġi evitat is-sottoimpjieg ta’ dawn il-ħaddiema.

2.10.

Għalkemm il-KESE jqis li huwa neċessarju li jsir progress fuq mezzi ġodda biex jiġi attirat it-talent lejn l-Unjoni, jirrimarka wkoll li hemm ħtiġijiet oħrajn fis-swieq tax-xogħol tal-Istati Membri; dawn il-ħtiġijiet jeħtieġu li jitfasslu miżuri biex jintlaħqu flimkien ma’ dawk previsti fil-pakkett propost.

2.11.

F’dan ir-rigward, il-KESE jittama li jista’ jsir progress (kif ippjanat mar-rapporti ta’ segwitu) dwar it-titjib tad-Direttiva dwar il-Ħaddiema Staġjonali u d-Direttiva dwar il-Ħaddiema bi Trasferiment Intraażendjali, skedati għall-2023. F’dan ir-rigward, huwa jenfasizza l-ħtieġa, f’konformità mar-riżoluzzjonijiet tal-Parlament Ewropew u tiegħu stess, li jaħdem biex jiżgura l-protezzjoni tal-ħaddiema staġjonali u, b’mod partikolari, biex jiġġieled l-isfruttament tal-forza tax-xogħol fejn jiġi identifikat, filwaqt li jissaħħu u jiżdiedu l-ispezzjonijiet tax-xogħol għal dan l-għan, f’konformità mal-ħidma tal-Awtorità Ewropea tax-Xogħol.

2.12.

Meta titqies l-adozzjoni tal-Aġenda għall-Ħiliet għall-Ewropa (5) fl-1 ta’ Lulju 2020, il-KESE jemmen li l-migranti, ir-refuġjati u l-persuni li jfittxu protezzjoni internazzjonali għandhom jiġu ttrattati b’mod ugwali, irrispettivament mil-livell tal-ħiliet u l-kwalifiki tagħhom. Għalhekk, il-ħaddiema kollha għandhom ikunu jistgħu jivvalidaw il-ħiliet u l-kompetenzi tagħhom u jieħdu sehem f’apprendistati ta’ kwalità tajba u effettivi, taħriġ mill-ġdid u titjib tal-ħiliet, sabiex ikunu jistgħu jiġu integrati fis-suq tax-xogħol abbażi ta’ perkorsi ta’ tagħlim flessibbli li jaqblu mal-ħtiġijiet speċifiċi tagħhom u b’kunsiderazzjoni xierqa għall-koorti tal-età differenti tagħhom.

2.13.

2.14.

Fir-rigward ta’ studenti minn pajjiżi terzi li jiġu fl-UE għal skopijiet ta’ studju, għandha tingħata kunsiderazzjoni xierqa lill-inkorporazzjoni bla xkiel tagħhom fis-suq tax-xogħol tal-UE filwaqt li fl-istess ħin jittaffa l-eżodu ta’ mħuħ: ikun pożittiv li jiġu inkorporati miżuri preventivi bħal klawżoli ta’ reklutaġġ etiku (6), mekkaniżmi ta’ ritorn assistit lejn il-pajjiżi ta’ oriġini tagħhom u l-integrazzjoni mill-ġdid tagħhom jew li jiġu introdotti klawżoli speċifiċi f’dan ir-rigward fi ftehimiet bilaterali dwar il-migrazzjoni tal-ħaddiema.

3. Dwar il-Komunikazzjoni dwar Nattiraw il-ħiliet u t-talent lejn l-UE

3.1.

Il-Komunikazzjoni ppreżentata f’April 2022 tilqa’ r-rakkomandazzjonijiet tal-Patt dwar il-Migrazzjoni u l-Ażil tal-2020 dwar il-migrazzjoni legali, bil-għan li jiġu promossi inizjattivi leġiżlattivi u operazzjonali f’dan il-qasam.

3.2.

Il-KESE jilqa’ din il-Komunikazzjoni, li jqis bħala pass ’il quddiem fil-qasam tal-migrazzjoni tal-ħaddiema, qasam li jeħtieġ strumenti adatti għall-kuntesti l-ġodda. F’dan ir-rigward, il-KESE jqis li l-inklużjoni ta’ sensiela ta’ azzjonijiet speċifiċi għar-refuġjati Ukreni hija f’waqtha, u jiddispjaċih ukoll li dawn l-azzjonijiet ma ġewx implimentati aktar kmieni għal persuni fil-bżonn ta’ protezzjoni internazzjonali b’mod ġenerali, speċjalment waqt il-kriżi li nħolqot mill-gwerra fis-Sirja fl-2015. Il-KESE huwa konvint li l-azzjoni u l-inizjattiva meħuda man-nies li qed jaħarbu mill-Ukrajna huma punt ta’ bidla deċiżiva u għandhom ikunu l-istandard għall-azzjoni tal-UE f’każijiet simili fil-futur.

3.3.

Il-KESE jqis li huwa neċessarju li jsir progress fis-Sħubijiet ta’ Talent f’kooperazzjoni ma’ pajjiżi terzi. Madankollu, jitlob li jiġu stabbiliti mekkaniżmi ta’ evalwazzjoni adegwati, mhux biss għall-istrumenti nfushom, iżda wkoll għall-identifikazzjoni tal-pajjiżi li jikkooperaw magħhom. Ir-rispett għall-istat tad-dritt u d-drittijiet tal-bniedem għandu dejjem ikun preżenti fir-relazzjonijiet esterni tal-politika tal-Unjoni dwar l-immigrazzjoni u l-ażil. Il-KESE jqis ukoll li huwa meħtieġ li jiġu kkontrollati u evalwati l-proċeduri u r-riżultati tal-proġetti pilota li diġà ġew iffinalizzati, li għandhom jiġu kkunsidrati u użati meta jiġu mnedija proġetti ġodda.

3.4.

Fil-preżentazzjoni tal-proposta għal Riżerva ta’ Talent tal-UE, huwa importanti li l-Kummissjoni Ewropea taħdem mal-Istati Membri u l-imsieħba soċjali biex tiżviluppa r-riżerva b’mod li timminimizza l-burokrazija u tevita l-kumplessità bla bżonn, sabiex din tibda taħdem malajr kemm jista’ jkun. L-għan tar-Riżerva għandu jkun li tgħin biex jintlaħqu l-ħtiġijiet ta’ ħiliet attwali u futuri; hija għandha tisfrutta l-opportunitajiet offruti mill-intelliġenza artifiċjali u teknoloġiji avvanzati oħrajn, b’mod li tagħmel użu sħiħ tal-ħiliet u t-talenti ta’ persuni minn pajjiżi terzi u tikkomplementa r-rwol taċ-ċittadini tal-Istati Membri u l-mobbiltà fi ħdan l-Unjoni.

3.5.

Meta wieħed iqis in-nuqqas akut ta’ ħaddiema u ħiliet li qed jesperjenzaw l-impjegaturi, li f’ħafna każijiet huma ta’ natura strutturali, punt tat-tluq rilevanti għat-tnedija tal-verżjoni sħiħa tar-Riżerva jkun li approċċ immirat jissejjes fuq it-tqabbil tal-listi ta’ impjiegi b’nuqqas ta’ ħaddiema. Minħabba l-importanza li jiġi żgurat li l-listi nazzjonali ta’ nuqqas ta’ impjiegi jkunu aġġornati, il-Kummissjoni għandha tidentifika opportunitajiet għal tagħlim reċiproku u evalwazzjoni bejn il-pari dwar dan is-suġġett.

3.6.

Id f’id mal-iżvilupp tal-kunċett ta’ Riżerva ta’ Talent, huwa neċessarju li tiġi żviluppata aktar, bl-involviment tal-impjegaturi u t-trade unions, informazzjoni f’ħin reali dwar is-suq tax-xogħol u l-ħiliet li se tippermetti li r-Riżerva tiffunzjona b’suċċess. Fl-istess ħin, huwa importanti li tittejjeb il-kapaċità tal-Unjoni li tiġbor u tinterpreta data komparabbli u kredibbli dwar il-ħtieġa għal migrazzjoni minn pajjiżi terzi.

3.7.

Il-KESE jilqa’ l-introduzzjoni ta’ għodda ta’ tqabbil biex jiġu ffaċilitati l-konnessjonijiet bejn il-provvista u d-domanda. Huwa jemmen li dawn il-passi huma meħtieġa għar-reklutaġġ tat-talent, iżda jtenni l-ħtieġa reali li b’mod parallel jiġu indirizzati setturi oħra tas-swieq tax-xogħol tal-Istati Membri.

3.8.

Il-KESE jaqbel mal-Kummissjoni li s-suċċess ta’ dawn l-inizjattivi jesiġi l-kooperazzjoni u l-parteċipazzjoni tal-atturi soċjali u ekonomiċi, u jqis li huwa essenzjali li jsir progress fil-ħolqien ta’ opportunitajiet ta’ djalogu bejniethom fil-livell Ewropew. Il-KESE huwa forum privileġġat għad-diskussjoni ta’ kwistjonijiet operattivi u prattiċi relatati mal-migrazzjoni tal-ħaddiema. F’dan ir-rigward, il-KESE għandu jipparteċipa fil-konferenza ta’ livell għoli li l-Kummissjoni ppjanat għal tmiem l-2022 dwar il-pjattaforma l-ġdida għall-migrazzjoni tal-ħaddiema. Il-KESE jenfasizza wkoll l-importanza li l-imsieħba soċjali u partijiet interessati rilevanti oħra jiġu involuti fid-diskussjoni dwar it-titjib tal-governanza tal-migrazzjoni tal-ħaddiema fil-livell tal-UE. Għal dan l-għan nilqgħu l-ħolqien tal-pjattaforma proposta għad-djalogu fil-livell tal-UE.

3.9.

Il-KESE jqis li l-esplorazzjoni ta’ toroq futuri għall-migrazzjoni tal-ħaddiema f’settur bħas-settur tal-kura hija pass ’il quddiem, għalkemm jiddispjaċih li l-progress f’dawn il-kwistjonijiet huwa strutturat madwar proċeduri speċifiċi li jifframmentaw l-integrità tal-politika komuni Ewropea dwar l-immigrazzjoni u l-ażil, u b’hekk timpedixxi viżjoni integrali. Fi kwalunkwe każ, il-KESE jaqbel li jeħtieġ li jsir progress f’dawn l-oqsma billi jitqajmu kwistjonijiet bħar-reklutaġġ etiku u l-istandards tal-protezzjoni tad-drittijiet tax-xogħol.

3.10.

Minkejja li n-nisa jiffurmaw parti sinifikanti mill-biċċa l-kbira tas-setturi kruċjali, in-nisa mobbli u migranti jistgħu jkunu soġġetti għal impjiegi mhux sikuri u l-ekonomija informali u spiss ikunu partikolarment vulnerabbli għad-diskriminazzjoni, l-esklużjoni soċjali u n-nuqqas ta’ opportunitajiet ta’ impjieg u taħriġ, kif ukoll ikunu esposti għal abbuż, vjolenza u fastidju. Il-KESE jemmen li l-protezzjoni tad-drittijiet tan-nisa u l-perspettiva tal-ġeneru jeħtieġ li jiġu integrati b’mod aktar b’saħħtu.

3.11.

Il-KESE jilqa’ wkoll il-promozzjoni ta’ skemi ta’ mobbiltà għaż-żgħażagħ, iżda għal darb’ oħra jiġbed l-attenzjoni għall-ħtieġa li jiġu żgurati mobbiltà u integrazzjoni fis-suq tax-xogħol li jipproteġu d-drittijiet tax-xogħol tal-ħaddiema żgħażagħ, li xi drabi jiffaċċjaw kundizzjonijiet tax-xogħol inqas tajbin (impjieg temporanju, pagi baxxi, eċċ.). Bl-istess mod, għandhom jiġu stabbiliti miżuri speċifiċi għall-ħaddiema b’diżabilità biex tiġi ffaċilitata l-integrazzjoni xierqa tagħhom.

3.12.

Il-KESE jilqa’ l-inizjattiva biex jiġu esplorati skemi ta’ ammissjoni għal intraprenditorija innovattiva mhux tal-UE. F’dan ir-rigward, il-KESE jqis li huwa pożittiv li dawn l-iskemi ta’ ammissjoni qed jiġu esplorati fil-kuntest tal-ekonomija diġitali u sostenibbli, iżda jemmen li, jekk ikunu strutturati sew, jista’ jkollhom ukoll ambitu wiesa’ biex jiffaċilitaw id-dħul ta’ diversi profili professjonali oħra fil-pajjiżi tal-UE.

4. Dwar ir-reviżjoni tad-Direttiva dwar ir-residenza għal żmien twil fl-Unjoni

4.1.

Il-KESE jilqa’ din il-proposta għal Direttiva li għandha l-għan li ssaħħaħ l-istatus ta’ residenza għal żmien twil fl-Unjoni billi ttejjeb il-mod kif tinkiseb ir-residenza għal żmien twil, speċjalment fil-każ ta’ residenza fi Stat Membru ieħor. Huwa jilqa’ wkoll il-fatt li l-proposta għandha l-għan li testendi l-aċċess ugwali għall-protezzjoni soċjali għaċ-ċittadini tal-UE li jkunu residenti għal żmien twil fi Stat Membru ieħor. Il-KESE jilqa’ wkoll it-tentattiv biex jiġi żgurat trattament ugwali u biex jiġi ffaċilitat l-aċċess għall-informazzjoni dwar ir-riunifikazzjoni tal-familja b’rabta ma’ din id-Direttiva.

4.2.

Ir-residenza għal żmien twil fl-Unjoni hija waħda mill-istrumenti ewlenin tal-politika Ewropea dwar l-immigrazzjoni u l-ażil. Il-proċeduri għall-kisba ta’ residenza għal żmien twil fl-Unjoni, adottati fl-2003, żviluppaw b’mod mhux uniformi fl-Unjoni, u r-reviżjoni proposta mill-Kummissjoni għandha l-għan li toħloq sistema aktar koerenti.

4.3.

Iċ-ċittadini tal-Unjoni jistgħu japplikaw għal residenza għal żmien twil wara ħames snin residenza fi Stat Membru ieħor, dispożizzjoni li tinżamm fid-Direttiva riveduta proposta. Il-proposta għandha l-għan li tiffaċilita l-mobbiltà fl-Unjoni għal persuni b’dan it-tip ta’ residenza billi tnaqqas ir-rekwiżit tal-perjodu ta’ residenza għal tliet snin. Barra minn hekk, il-proposta tinkludi perjodi kumulattivi ta’ residenza fi Stati Membri differenti.

4.4.

Il-KESE jqis bħala pass ’il quddiem il-fatt li l-applikanti jitħallew jakkumulaw perjodi ta’ residenza fi Stati Membri differenti sabiex jissodisfaw ir-rekwiżiti għal residenza għal żmien twil fl-Unjoni, għalkemm jemmen li l-mekkaniżmi għall-monitoraġġ u l-koordinazzjoni ta’ din id-dispożizzjoni fl-Istati Membri differenti jeħtieġ li jittejbu.

4.5.

Il-KESE jilqa’ l-inklużjoni ta’ mudelli ta’ residenza differenti, bħar-residenza għal skopijiet ta’ studju, il-protezzjoni internazzjonali u r-residenza temporanja. Viżi għal żmien qasir huma eżentati, għalkemm jistgħu jiġu kkunsidrati skont id-dispożizzjoni jekk l-applikant jista’ jagħti prova ta’ relazzjoni ta’ impjieg regolari jew simili.

4.6.

Il-KESE jilqa’ wkoll it-tisħiħ tad-drittijiet marbuta ma’ residenza għal żmien twil fl-Unjoni u għall-membri tal-familja, inkluż id-dritt li jaħdmu u jmorru jgħixu fi Stat Membru ieħor, jew li jibdlu l-impjieg u jmorru jgħixu fi Stat Membru ieħor. Il-KESE jqis li huwa partikolarment interessanti li, skont l-artikolu l-ġdid propost, is-sitwazzjoni tas-suq tax-xogħol nazzjonali ma għandhiex għalfejn titqies għal applikazzjonijiet għal residenza għal żmien twil fi Stat Membru ieħor (jiġifieri fejn diġà nkisbet residenza għal żmien twil fl-Unjoni) kemm għal persuna impjegata kif ukoll għal min jaħdem għal rasu.

4.7.

Il-KESE jilqa’ s-semplifikazzjoni tal-possibbiltà li persuna taħdem u tistudja fi żmien 30 jum minn meta tiġi ppreżentata applikazzjoni għal residenza għal żmien twil fi Stat Membru ieħor. Huwa jilqa’ wkoll ir-rikonoxximent tad-dritt li persuna teżerċita professjoni regolari (ta’ residenti għal żmien twil fi Stat Membru ieħor) taħt l-istess kundizzjonijiet bħaċ-ċittadini tal-UE.

4.8.

Il-KESE jirrikonoxxi l-importanza li l-Istati Membri jiggarantixxu l-istess libertajiet u drittijiet għar-residenti għal żmien twil fl-Unjoni (u l-membri tal-familja tagħhom) bħal dawk b’residenza nazzjonali permanenti. Barra minn hekk, huwa fatt pożittiv li l-Istati Membri jiggarantixxu wkoll li l-applikanti għal permess ta’ residenza għal żmien twil fl-Unjoni ma jkunux obbligati jħallsu tariffi ogħla għall-ipproċessar tal-applikazzjoni tagħhom mill-applikanti għal permessi għal residenza nazzjonali.

4.9.

Il-KESE jqis id-dritt li wieħed jgħix bħala familja huwa kwistjoni fundamentali li tiffaċilita l-integrazzjoni soċjali: għalhekk jilqa’ t-tneħħija tal-ostakli amministrattivi u burokratiċi, b’mod partikolari l-kundizzjonijiet għall-integrazzjoni fil-każ ta’ residenti fit-tul. Jilqa’ wkoll l-akkwist awtomatiku ta’ residenza fit-tul għal tfal ta’ residenti fit-tul imwielda (jew adottati) fl-UE.

5. Dwar ir-reviżjoni tad-Direttiva dwar il-Permess Uniku

5.1.

Il-KESE jilqa’ r-reviżjoni tad-Direttiva dwar il-Permess Uniku, li ġġib magħha diversi punti ta’ titjib għad Direttiva attwali:

—	it-tnaqqis għal erba’ xhur tal-perjodu għall-proċedura tal-permessi;

—	il-fatt li l-proċedura tista’ tinbeda mill-pajjiż tal-oriġini jew minn Stat Membru tad-destinazzjoni;

—	id-Direttiva tkopri wkoll ċittadini barranin li jaħdmu permezz ta’ aġenziji ta’ impjieg temporanju;

—	il-possibbiltà li jinbidel l-impjegatur matul il-perjodu ta’ validità tal-permess, għalkemm tinżamm il-possibbiltà ta’ rifjut mill-gvern;

—	il-fatt li l-permess uniku ma jistax jiġi rtirat għal mill-inqas tliet xhur wara t-telf tal-impjieg tad-detentur tal-permess, li jipprovdi stabbiltà u jtejjeb il-kwalità tal-impjieg u l-kundizzjonijiet tax-xogħol tal-ħaddiema migranti;

—	l-estensjoni tad-Direttiva dwar il-Permess Uniku għal dawk taħt protezzjoni temporanja;

—	il-fatt li qed jiġu mfittxija modi biex tiġi pprovduta informazzjoni dwar id-drittijiet abbinati mal-permess uniku.

5.2.

Madankollu, il-KESE jqis li hija opportunità mitlufa li ma jiġix estiż is-sett ta’ drittijiet f’konformità mal-kontenut tal-ewwel proposta għal direttiva ppreżentata fl-2011. Dan japplika għal kwistjonijiet bħall-aċċess għall-benefiċċji tal-qgħad, filwaqt li l-KESE għadu jenfasizza l-importanza li l-Istati Membri jitħallew ikollhom xi ftit flessibbiltà dwar dan kif previst fid-Direttiva attwali. Barra minn hekk, il-KESE jiddispjaċih li ma ġietx esplorata l-possibbiltà li d-Direttiva tiġi estiża għall-migranti f’sitwazzjonijiet ta’ xogħol temporanju.

5.3.

Il-KESE jqis li huwa essenzjali li r-rieżami jenfasizza l-ħtieġa li jissaħħaħ it-trattament ugwali tal-ħaddiema li huma ċittadini ta’ pajjiżi terzi, b’mod partikolari fir-rigward tal-għoti ta’ pariri dwar id-drittijiet soċjali u l-kundizzjonijiet tax-xogħol, il-libertà ta’ assoċjazzjoni u affiljazzjoni u l-benefiċċji tas-sigurtà soċjali, sabiex tiġi faċilitata l-integrazzjoni tal-ħaddiema taħt kundizzjonijiet ugwali.

5.4.

Il-KESE jappoġġja s-sejħa biex l-Istati Membri jiżviluppaw mekkaniżmi adatti għall-valutazzjoni tar-riskju, l-ispezzjonijiet u s-sanzjonijiet kif ukoll għall-monitoraġġ tal-impjegaturi. Madankollu, huwa jinnota li peress li l-ispezzjonijiet tax-xogħol huma kompetenza nazzjonali, il-messaġġi u l-għodod ta’ monitoraġġ li jistgħu jiġu żviluppati fil-livell tal-UE għandhom jissaħħu f’konformità mal-mandat tal-Awtorità Ewropea tax-Xogħol (7).

5.5.

Il-KESE jemmen li għandu jsir aktar progress fil-protezzjoni tal-ħaddiema migranti li jagħmlu użu mill-mekkaniżmi ta’ lmenti tal-ispettorat tax-xogħol. Mingħajr mekkaniżmi li jipprevjenu li l-ilmenti tax-xogħol jintużaw għal skopijiet ta’ kontroll tal-migrazzjoni, hemm riskju li l-impjegaturi jikkastigaw lil dawk li jirrapportaw kundizzjonijiet tax-xogħol abbużivi, b’riperkussjonijiet negattivi għall-istatus ta’ residenza tagħhom. F’dan ir-rigward, jeħtieġ li jiġu żviluppati aktar il-miżuri għall-ġlieda kontra l-isfruttament tal-ħaddiema kif ukoll li jiġu infurzati aħjar.

Brussell, is-26 ta’ Ottubru 2022.

Christa SCHWENG

Il-President tal-Kumitat Ekonomiku u Soċjali Ewropew

(1) Ir-Riżerva ta’ Talent tal-UE se tkun grupp ta’ kandidati madwar l-UE kollha minn pajjiżi mhux tal-UE, li se jintgħażlu abbażi ta’ livelli ta’ ħiliet, kriterji u rekwiżiti ta’ migrazzjoni speċifiċi, wara l-iskrinjar tal-kredenzjali tal-kandidati. Din se tkun l-ewwel pjattaforma u għodda ta’ tlaqqigħ għall-UE kollha għal dan l-għan (COM(2022) 657 final).

(2) COM(2022) 650 final.

(3) COM(2022) 655 final.

(4) COM(2022) 657 final.

(5) https://ec.europa.eu/social/main.jsp?langId=mt&catId=89&furtherNews=yes&newsId=9723

(6) General principles and operational guidelines for fair recruitment and definition of recruitment fees and related costs (Prinċipji ġenerali u linji gwida operattivi għal reklutaġġ ġust u definizzjoni ta’ tariffi ta’ reklutaġġ u spejjeż relatati).

(7) https://www.ela.europa.eu/en/what-we-do

Top

Choose the experimental features you want to try