IL-KUMMISSJONI EWROPEA

Brussell, 2.6.2021

COM(2021) 278 final

2021/0140(CNS)

Proposta għal

REGOLAMENT TAL-KUNSILL

dwar it-twaqqif u l-operazzjoni ta’ mekkaniżmu ta’ evalwazzjoni u monitoraġġ biex jivverifika l-applikazzjoni tal-acquis ta’ Schengen u li jħassar ir-Regolament (UE) Nru 1053/2013

{SEC(2021) 225 final} - {SWD(2021) 119 final} - {SWD(2021) 120 final}

MEMORANDUM TA’ SPJEGAZZJONI

1.KUNTEST TAL-PROPOSTA

•Kuntest ġenerali

Iż-żona Schengen 1 hija waħda mill-aktar kisbiet sinifikanti tal-Unjoni Ewropea. Tejbet il-libertà ta’ moviment billi tat lok biex aktar minn 420 miljun ruħ jiċċaqilqu mingħajr ma jkunu soġġetti għall-kontrolli fil-fruntieri interni, kif ukoll iffaċilitat it-twassil transfruntiera tal-oġġetti u s-servizzi, u ġabet magħha benefiċċji soċjali u ekonomiċi sinifikanti għas-soċjetajiet tagħna.

Il-kooperazzjoni fl-ambitu ta’ Schengen, li bdiet bejn ħames Stati Membri taħt qafas intergovernattiv bl-iffirmar tal-“Ftehim ta’ Schengen” fl-14 ta’ Ġunju 1985, kibret b’mod konsiderevoli minn mindu ġiet stabbilita għall-ewwel darba. Għal dawn l-aħħar 35 sena, l-UE assistiet għal evoluzzjoni kontinwa biex jiġu stabbiliti żona li taħdem sew mingħajr kontrolli fil-fruntieri interni u sens rinforzat ta’ fiduċja reċiproka fost l-Istati Membri. Illum, qed taffaċċja realtà differenti u sfidi differenti minn dawk li kienu jeżistu meta ġiet stabbilita. L-instabbiltà fil-viċinat tal-Ewropa u lil hinn, il-kriżi tar-refuġjati fl-2015 u l-konsegwenzi tagħha, it-theddida terroristika ma taqta’ xejn u l-pandemija tal-COVID-19 poġġew pressjoni konsiderevoli fuq Schengen u saħansitra wasslu biex xi Stati Membri jintroduċu mill-ġdid il-kontrolli fil-fruntieri interni għal perjodu ta’ żmien fit-tul.

Biex tindirizza l-isfidi ffaċċjat miż-żona Schengen, il-President tal-Kummissjoni von der Leyen ħabbret strateġija dwar Schengen fid-diskors dwar l-Istat tal-Unjoni tagħha tal-2020 2 . Fil-Patt Ġdid dwar il-Migrazzjoni u l-Ażil 3 , il-Kummissjoni indikat li l-Istrateġija ta’ Schengen kienet se tgħaqqad inizjattivi leġiżlattivi u operazzjonali maħsuba li joħolqu żona aktar b’saħħitha u aktar reżiljenti mingħajr kontrolli fil-fruntieri interni, filwaqt li tirrinforza l-istrutturi ta’ monitoraġġ u governanza tagħha. Inizjattiva bħal din hija r-reviżjoni tal-mekkaniżmu ta’ evalwazzjoni u monitoraġġ ta’ Schengen (minn hawn ’il quddiem: “il-mekkaniżmu ta’ evalwazzjoni ta’ Schengen” jew “il-Mekkaniżmu”).

Iż-żona Schengen għandha jsostnuha għadd sinifikanti ta’ miżuri li jikkumpensaw għan-nuqqas ta’ kontrolli fil-fruntieri interni, jiffaċilitaw il-moviment liberu, u jiżguraw livell għoli ta’ sigurtà u ġustizzja. L-acquis ta’ Schengen jikkonsisti mid-dispożizzjonijiet integrati fil-qafas tal-Unjoni f’konformità mal-Protokoll Nru 19 anness mat-Trattat dwar l-Unjoni Ewropea (TUE) u mat-Trattat dwar il-Funzjonament tal-Unjoni Ewropea (TFUE), flimkien mal-atti li jibnu fuqhom jew li huma b’xi mod ieħor relatati magħhom. Għaldaqstant l-acquis jinkludi (1) miżuri fil-fruntieri esterni (il-ġestjoni tal-fruntieri esterni), (2) miżuri ta’ kumpens (il-politika komuni dwar il-viżi, il-kooperazzjoni tal-pulizija, il-politika ta’ ritorn u s-Sistema ta’ Informazzjoni ta’ Schengen), u (3) mekkaniżmu robust ta’ evalwazzjoni u monitoraġġ. L-acquis ta’ Schengen jinkludi wkoll rekwiżiti dwar il-protezzjoni tad-data u r-rispett ta’ drittijiet fundamentali oħra. It-tliet pilastri essenzjali u kumplimentari li jissemmew hawn fuq huma s-sisien ta’ Schengen u jagħmlu possibbli l-eżistenza ta’ żona mingħajr kontrolli fil-fruntieri interni. L-istabbiltà kumplessiva ta’ din l-arkitettura kumplessa tiddependi fuq is-saħħa ta’ kull pilastru individwali u fuq il-koerenza u l-koeżjoni tas-sistema kollha kemm hi.

Żona Schengen li taħdem sew tiddependi fuq l-implimentazzjoni korretta u effiċjenti tar-regoli komuni, jiġifieri l-acquis ta’ Schengen, u f’termini aktar ġenerali, fuq il-fiduċja reċiproka fost l-Istati Membri. Nuqqas jew nuqqas ta’ implimentazzjoni fi Stat Membru wieħed jista’ jaffettwa lill-oħrajn kollha u sussegwentement ipoġġi f’riskju ż-żona Schengen. Il-monitoraġġ ta’ kif Stat Membru jimplimenta l-acquis ta’ Schengen u s-segwitu abbażi ta’ rakkomandazzjonijiet għal titjib maqbula b’mod komuni huma element fundamentali tal-istrutturi ta’ governanza ta’ Schengen. Diġà fl-1998, il-partijiet kontraenti tal-Konvenzjoni ta’ Schengen stabbilew Kumitat Permanenti b’mandat li jidentifika n-nuqqasijiet fl-implimentazzjoni tal-acquis ta’ Schengen u jipproponi soluzzjonijiet 4 . Wara l-integrazzjoni tal-acquis ta’ Schengen fil-qafas legali tal-UE, id-Deċiżjoni li tistabbilixxi Kumitat Permanenti ġiet sostitwita bir-Regolament tal-Kunsill (UE) Nru 1053/2013 5 (minn hawn ’il quddiem: “ir-Regolament”) li bħalissa jipprovdi l-bażi ġuridika għall-Mekkaniżmu. Ir-Regolament sar operattiv fl-2015

L-iskop tal-mekkaniżmu ta’ evalwazzjoni ta’ Schengen huwa li jinżamm livell għoli ta’ fiduċja reċiproka fost l-Istati Membri parteċipanti u b’hekk jikkontribwixxi għal żona Schengen li taħdem sew billi jiggarantixxi li l-Istati Membri japplikaw ir-regoli ta’ Schengen b’mod effettiv. Il-Mekkaniżmu għandu jikseb dawn l-għanijiet permezz ta’ evalwazzjonijiet imparzjali u oġġettivi li jkunu kapaċi jidentifikaw in-nuqqasijiet fl-applikazzjoni tal-leġiżlazzjoni fil-prattika u għandu jiżgura li dawn in-nuqqasijiet jiġu indirizzati f’qasir żmien.

Għad li l-Mekkaniżmu jista’ legalment ikopri l-acquis ta’ Schengen kollu kemm hu, il-prassi hija li l-oqsma ta’ politika speċifiċi għall-evalwazzjoni jiġu deċiżi għal kull ċiklu ta’ evalwazzjoni pluriennali mill-Kummissjoni flimkien mal-Istati Membri. Abbażi ta’ din il-prassi, l-ewwel u t-tieni ċiklu ta’ evalwazzjoni pluriennali koprew evalwazzjonijiet speċifiċi biex jivvalutaw l-implimentazzjoni tal-miżuri fl-oqsma tal-ġestjoni tal-fruntieri esterni, ir-ritorn, il-politika komuni dwar il-viżi, il-kooperazzjoni tal-pulizija, is-Sistema ta’ Informazzjoni ta’ Schengen (SIS), il-protezzjoni tad-data u n-nuqqas ta’ kontrolli fil-fruntieri interni. Oqsma ta’ politika oħra li jaqgħu taħt l-acquis ta’ Schengen fil-ġejjieni jistgħu jkunu parti mill-Mekkaniżmu jekk dan jiġi deċiż fil-programm ta’ evalwazzjoni pluriennali stabbilit mill-Kummissjoni. F’dan il-kuntest u abbażi ta’ din il-prassi, il-Mekkaniżmu jkopri wkoll, iżda biss bl-għan li jikkonkludi jekk Stat Membru jkunx lest li japplika l-qafas legali ta’ Schengen kollu jew partijiet minnu, il-kooperazzjoni ġudizzjarja f’materji kriminali, il-leġiżlazzjoni dwar l-armi tan-nar, u l-politika dwar id-drogi.

Skont ir-Regolament, il-Kummissjoni hija responsabbli għall-koordinazzjoni u l-organizzazzjoni kumplessivi tal-evalwazzjoni u l-monitoraġġ, filwaqt li żżomm lill-Parlament Ewropew u lill-parlamenti nazzjonali infurmati bir-riżultati tal-evalwazzjonijiet. F’konformità mal-Artikolu 70 TFUE, il-Mekkaniżmu jibqa’ responsabbiltà kondiviża: il-Kummissjoni twettaq l-evalwazzjonijiet b’mod konġunt mal-esperti mill-Istati Membri u bl-appoġġ tal-korpi, l-uffiċċji u l-aġenziji tal-Unjoni. Dan l-approċċ bejn il-pari huwa kruċjali biex jiġu żgurati l-obbligu ta’ rendikont, l-appartenenza proprja tar-riżultati, u l-fiduċja reċiproka. L-esperti tal-Istati Membri jivverifikaw dak li jkunu qed jagħmlu l-pari tagħhom, jirrakkomandaw soluzzjonijiet u jħeġġu biex tittieħed azzjoni jekk l-Istat Membru ma jimplimentahomx. Barra minn hekk, il-Kunsill huwa assoċjat fil-proċess tat-teħid ta’ deċiżjonijiet f’dak li jirrigwarda l-adozzjoni tar-rakkomandazzjonijiet fuq proposta tal-Kummissjoni.

•Raġunijiet u objettivi tal-proposta

Minħabba l-isfidi li ffaċċjat iż-żona Schengen f’dawn l-aħħar snin u r-rwol tal-Mekkaniżmu fil-governanza ta’ Schengen, huwa importanti li l-Mekkaniżmu jibqa’ adegwat għall-użu u jilħaq il-potenzjal sħiħ tiegħu sabiex ikun jista’ jadatta għal żviluppi leġiżlattivi reċenti, jindirizza sfidi ġodda u jinkludi Stati Membri ġodda li qegħdin japplikaw l-acquis ta’ Schengen kollu jew parzjalment.

L-Artikolu 22 tar-Regolament kien jirrikjedi li l-Kummissjoni twettaq rieżami tal-operazzjoni tar-Regolament fi żmien sitt xhur mill-adozzjoni tar-rapporti kollha ta’ evalwazzjoni taħt l-ewwel programm ta’ evalwazzjoni pluriennali (2015-2019). Il-Kummissjoni ppreżentat ir-rieżami tagħha f’rapport 6 u dokument ta’ ħidma tal-persunal li jakkumpanjah 7 fil-25 ta’ Novembru 2020, li jkopru l-elementi kollha tar-Regolament, inkluż it-tħaddim tal-proċeduri għall-adozzjoni tal-atti skont il-Mekkaniżmu.

Ir-rieżami jikkonkludi li l-Mekkaniżmu wassal biex ikun hemm titjib tanġibbli. Kumplessivament, l-Istati Membri qegħdin jimplimentaw l-acquis ta’ Schengen b’mod adegwat u n-nuqqasijiet serji ġew indirizzati kif dovut. Jikkonferma li l-Mekkaniżmu bħala tali jipprovdi qafas solidu għall-evalwazzjoni u l-monitoraġġ tal-implimentazzjoni tal-acquis ta’ Schengen.

Madankollu, ir-rieżami jidentifika nuqqasijiet sinifikanti fil-proċess skabruż tal-Mekkaniżmu, bil-proċess ta’ evalwazzjoni u s-segwitu u l-implimentazzjoni tal-pjanijiet ta’ azzjoni jieħdu ammont eċċessiv ta’ żmien. Barra minn hekk, ir-rakkomandazzjonijiet tal-Kunsill ma kinux għodda effettiva biżżejjed biex jiżguraw li l-Istati Membri jieħdu azzjoni rapida, billi n-natura teknika tal-proċess ma ġġeneratx biżżejjed pressjoni politika biex tittieħed azzjoni. Filwaqt li l-evalwazzjonijiet identifikaw nuqqasijiet serji f’10 żjarat ta’ evalwazzjoni 8 , saret diskussjoni ministerjali darba waħda biss, fil-każ tan-nuqqasijiet serji tal-Greċja fil-ġestjoni tal-fruntieri esterni.

Apparti minn hekk jidher li l-Mekkaniżmu mhuwiex jiġġenera biżżejjed fiduċja fost l-Istati Membri, minħabba li diversi Stati Membri għal dawn l-aħħar ħames snin komplew itawlu l-kontrolli fil-fruntieri interni, minkejja l-evalwazzjonijiet pożittivi fil-ġestjoni tal-fruntieri esterni, il-kooperazzjoni tal-pulizija u s-Sistema ta’ Informazzjoni ta’ Schengen, u valutazzjoni kumplessiva li l-Istati Membri qegħdin jimplimentaw l-acquis ta’ Schengen b’mod adegwat. Barra minn hekk, mir-rieżami rriżulta li r-riġidità li għandu bħalissa l-Mekkaniżmu ma tħallihx jadatta għal ċirkostanzi ġodda u żviluppi operazzjonali u leġiżlattivi ġodda.

Ir-rieżami kkonkluda li għadd ta’ nuqqasijiet żammew lill-Mekkaniżmu milli jaħdem b’mod effettiv daqs kemm seta’ u għandu jaħdem, u mminaw il-potenzjal sħiħ tiegħu. Dawn in-nuqqasijiet huma:

1.it-tul eċċessiv tal-proċess ta’ evalwazzjoni (10-12-il xahar) u ż-żmien biex l-Istati Membri jimplimentaw ir-rakkomandazzjonijiet (sentejn);

2.kapaċità insuffiċjenti tal-Istati Membri li jikkontribwixxu b’għadd adegwat ta’ esperti għall-evalwazzjonijiet, b’ħames Stati Membri jipprovdu terz tal-esperti kollha u bi skarsezza kronika ta’ esperti f’oqsma ta’ politika speċifiċi;

3.użu u effiċjenza subottimali taż-żjarat għal għarrieda kif ukoll tal-għodda l-oħra ta’ evalwazzjoni u monitoraġġ, b’mod partikolari l-evalwazzjonijiet tematiċi;

4.segwitu u implimentazzjoni bil-mod tal-pjanijiet ta’ azzjoni u nuqqas ta’ approċċ komprensiv u konsistenti fir-rigward tal-monitoraġġ tal-implimentazzjoni; u

5.apparti l-evalwazzjoni tad-dritt tal-protezzjoni tad-data personali, il-valutazzjoni tar-rispett tad-drittijiet fundamentali fl-implimentazzjoni tal-acquis ta’ Schengen mhijiex integrata biżżejjed fil-Mekkaniżmu.

Ir-rieżami indika li wħud minn dawn in-nuqqasijiet jistgħu jiġu indirizzati fil-livell operazzjonali, iżda oħrajn jirrikjedu bidliet leġiżlattivi.

Kemm il-Parlament Ewropew kif ukoll il-Kunsill saħqu dwar il-ħtieġa ta’ riforma tal-Mekkaniżmu. Il-Parlament Ewropew, fir-riżoluzzjoni tiegħu tal-2017 9 , u l-Kunsill, diġà permezz tal-konsultazzjoni li tnediet mill-Presidenza Finlandiża fl-2019 10 , stiednu lill-Kummissjoni biex tieħu azzjoni. Dan l-aħħar, il-Kunsill adotta Konklużjonijiet dwar il-Mekkaniżmu 11 u stieden lill-Kummissjoni tressaq inizjattivi għat-titjib tal-effiċjenza kumplessiva tal-Mekkaniżmu u tiżgura li dan jibqa’ flessibbli, adattabbli għaċ-ċirkostanzi u l-iżviluppi tal-acquis ta’ Schengen li qed jevolvu sabiex jindirizza sfidi ġodda u jadatta għal realtajiet ġodda.

B’segwitu għall-konklużjonijiet tar-rieżami ta’ ħames snin, il-Kummissjoni kkonkludiet li n-nuqqasijiet li ssemmew aktar ’il fuq jistgħu jinġabru fil-qosor bħala tliet sfidi interkonnessi:

–Fokus strateġiku limitat u frammentazzjoni sinifikanti li ma jħallux li tingħata ħarsa ġenerali tat-tħaddim taż-żona Schengen fl-intier tagħha li altrimenti tkun tista’ tiffaċilita d-diskussjoni politika;

–Kapaċità insuffiċjenti li l-Mekkaniżmu jidentifika, jadatta u jirreaġixxi f’qasir żmien għal ċirkostanzi ġodda, għal żviluppi leġiżlattivi u operazzjonali; u

–Adozzjoni u implimentazzjoni bil-mod tar-rimedji b’sistema bejn il-pari li ma teżerċitax il-pressjoni mistennija.

Abbażi tal-input li nkiseb mingħand il-partijiet ikkonċernati rilevanti fil-valutazzjoni tal-impatt korrispondenti, il-Kummissjoni identifikat diversi għażliet ta’ politika miġbura fil-qosor taħt it-Taqsima 3 maħsuba biex iżidu l-effettività tal-Mekkaniżmu u b’hekk jiżguraw implimentazzjoni aktar trasparenti, effettiva u konsistenti tal-acquis ta’ Schengen.

Biex tindirizza l-problemi li jissemmew aktar ’il fuq, din il-proposta għandha l-għan li: (1) iżżid il-fokus strateġiku tal-Mekkaniżmu u tiżgura użu aktar proporzjonat tal-għodod ta’ evalwazzjoni varji; (2) tqassar u tissimplifika l-proċeduri biex il-proċess isir aktar effettiv u effiċjenti, u tiżdied il-pressjoni mill-pari; (3) tottimizza s-sehem tal-esperti tal-Istati Membri u l-kooperazzjoni mal-korpi, l-uffiċċji u l-aġenziji tal-Unjoni; u (4) issaħħaħ l-evalwazzjoni tar-rispett tad-drittijiet fundamentali skont l-acquis ta’ Schengen. Dawn l-objettivi se jintlaħqu, b’mod partikolari permezz tal-approċċ segwenti:

(1) Jiżdied il-fokus strateġiku tal-Mekkaniżmu u jiġi żgurat użu aktar proporzjonat u aktar strateġiku tal-għodod varji ta’ evalwazzjoni u ta’ monitoraġġ

–Tiżdied il-flessibilità biex il-kamp ta’ applikazzjoni tal-evalwazzjonijiet speċifiċi u l-prijoritajiet ta’ evalwazzjoni jiġu adattati għar-realtajiet il-ġodda fl-acquis ta’ Schengen billi titneħħa l-lista li hemm bħalissa ta’ oqsma ta’ politika speċifiċi li għandhom jiġu evalwati u tiġi stabbilita proċedura għal deċiżjoni dwar l-oqsma prijoritarji fil-bidu ta’ kull ċiklu ta’ evalwazzjoni. Skont ir-Regolament attwali, kull Stat Membru ġie evalwat f’sitt oqsma ta’ politika permezz ta’ sitt evalwazzjonijiet individwali li jissarrfu f’sitt rapporti ta’ evalwazzjoni u sitt settijiet ta’ rakkomandazzjonijiet. Madankollu, dawk l-oqsma ta’ politika ma għadhomx aktar jistgħu jiġu adattati mija fil-mija għar-realtajiet il-ġodda. Pereżempju, fl-2023 se jibdew joperaw sensiela ġdida ta’ sistemi tal-IT u se jikkomplementaw is-Sistema ta’ Informazzjoni ta’ Schengen. Hekk kif l-acquis tas-sigurtà kulma jmur qed jiżviluppa, l-evalwazzjonijiet se jkun jeħtiġilhom iqisu elementi addizzjonali, b’mod partikolari fil-kooperazzjoni tal-pulizija. Diversi oqsma ta’ politika, minħabba l-iżviluppi leġiżlattivi, qed isiru kulma jmur dejjem aktar interkonnessi u interdipendenti (pereżempju s-Sistema ta’ Informazzjoni ta’ Schengen u r-ritorn jew is-Sistema ta’ Informazzjoni ta’ Schengen u l-kooperazzjoni tal-pulizija). Għaldaqstant, il-mod kif l-evalwazzjonijiet huma artikolati fl-evalwazzjonijiet tal-oqsma ta’ politika speċifiċi jaf mhuwiex l-aktar mod xieraq biex dawn l-attivitajiet interkonnessi jiġu vvalutati. Billi tneħħi l-lista ta’ oqsma ta’ politika, il-proposta żżid il-flessibilità biex l-evalwazzjonijiet jiġu artikolati b’mod differenti, u jiġu evalwati aspetti differenti jew elementi ġodda possibbli, li jagħtu lok biex il-Mekkaniżmu jadatta f’qasir żmien għan-natura dinamika tal-acquis ta’ Schengen. Fl-istess waqt, toħloq ċertezza tad-dritt fir-rigward tal-proċedura għall-qbil dwar il-prijoritajiet għall-evalwazzjoni fil-bidu ta’ kull ċiklu ta’ evalwazzjoni.

–Il-ħolqien ta’ programmazzjoni flessibbli. Barra minn hekk, il-proposta toħloq qafas leġiżlattiv flessibbli għall-programmazzjoni. Tadatta r-regoli dwar il-programmazzjoni pluriennali u annwali sabiex ikun hemm reazzjoni aktar rapida għall-problemi u sfidi li jfeġġu, billi tnaqqas id-dettalji li bħalissa huma inklużi fil-programmi ta’ evalwazzjoni pluriennali u annwali, u billi tnaqqas il-ħtieġa għall-emendi.

–Tranżizzjoni progressiva lejn evalwazzjonijiet ibbażati mija fil-mija fuq ir-riskju. Il-proposta toħloq obbligu li jitqiesu r-riżultati tal-evalwazzjonijiet preċedenti kif ukoll mekkaniżmi ta’ evalwazzjoni u monitoraġġ oħra nazzjonali u tal-Unjoni (pereż. il-valutazzjoni tal-vulnerabbiltà tal-Frontex jew il-Pjattaforma Multidixxiplinari Ewropea Kontra t-Theddid Kriminali (EMPACT)). Apparti minn hekk (kif spjegat aktar ’l isfel), toħloq obbligi addizzjonali biex jintalbu valutazzjonijiet tar-riskju u għarfien tas-sitwazzjoni mill-korpi, l-aġenziji u l-uffiċċji tal-Unjoni, meta rilevanti. Il-qafas flessibbli l-ġdid u l-obbligi addizzjonali jagħtu lok biex, maż-żmien, pereżempju, issir evalwazzjoni komprensiva tal-Istat Membru bbażata fuq ir-riskju, li tkopri biss l-elementi identifikati permezz tal-analiżi tar-riskju u l-għarfien tas-sitwazzjoni, b’evalwazzjoni unika għal kull Stat Membru li tkopri l-oqsma ta’ politika rilevanti kollha f’rapport uniku ta’ evalwazzjoni. Dan jippermetti wkoll li ssir evalwazzjoni simultanja ta’ diversi Stati Membri li jaffaċċjaw l-istess sfidi.

–Jiġi żgurat li ma jkunx hemm lakuni fl-evalwazzjoni tal-implimentazzjoni tal-acquis ta’ Schengen fi Stat Membru. Hekk kif il-qafas legali ta’ Schengen qiegħed jevolvi u jsir aktar kumpless, l-Istati Membri qegħdin jirrikorru għal atturi oħra biex jappoġġawhom fl-implimentazzjoni tal-kompiti li jaqgħu taħt ir-responsabbiltà tagħhom. Dan qed jiġri pereżempju fil-każ ta’ kumpaniji privati fil-qasam tal-politika dwar il-viżi (pereż. il-fornituri esterni tas-servizzi) jew tal-fruntieri esterni (pereż. linji tal-ajru jew ajruporti ġestiti minn kumpaniji privati). Huwa wkoll il-każ ta’ korpi, aġenziji u uffiċċji tal-Unjoni li f’dawn l-aħħar snin kellhom il-mandati tagħhom imsaħħa biex jipprovdu appoġġ lill-Istati Membri, pereżempju biex iwettqu verifiki jew sorveljanza fil-fruntieri, jew verifiki tas-sigurtà tat-tieni linja. Filwaqt li l-Mekkaniżmu jara li jipprovdi ħarsa ġenerali tas-sitwazzjoni fi Stat Membru, il-proposta tiċċara li l-Mekkaniżmu jista’ jappoġġa l-ivverifikar tal-attivitajiet tal-korpi, l-uffiċċji u l-aġenziji tal-Unjoni sakemm iwettqu funzjonijiet għan-nom tal-Istati Membri biex jassistu fl-applikazzjoni operazzjonali tad-dispożizzjonijiet tal-acquis ta’ Schengen. L-objettiv huwa għalhekk li ma jiġux evalwati dawn il-korpi, uffiċċji u aġenziji per se. L-ivverifikar ta’ dawn l-attivitajiet se jkun inkorporat fl-evalwazzjoni tal-Istati Membri, b’mod simili għas-sitwazzjoni attwali meta, pereżempju, matul l-evalwazzjonijiet fil-qasam tal-politika komuni dwar il-viżi, it-timijiet jivverifikaw l-attivitajiet ta’ dawk il-kumpaniji privati (fornituri esterni tas-servizzi) b’involviment fl-ilqugħ tal-applikazzjonijiet għal viża; jew fil-fruntieri esterni meta t-timijiet jivverifikaw l-infrastruttura ta’ ajruport ġestit minn kumpanija privata. Dan l-aspett tal-evalwazzjonijiet se jsir mingħajr preġudizzju għar-responsabbiltajiet attribwiti lill-Kummissjoni u lill-korpi ta’ governanza rilevanti tal-aġenziji, l-uffiċċji u l-korpi kkonċernati u b’rispett sħiħ tagħhom. Fl-eventwalità li l-evalwazzjonijiet jidentifikaw nuqqasijiet b’rabta mal-attivitajiet imwettqa jew appoġġati mill-korpi, l-uffiċċji u l-aġenziji tal-Unjoni, il-Kummissjoni tinforma lill-korpi ta’ governanza rilevanti.

–Estensjoni taċ-ċiklu ta’ evalwazzjoni minn ħames għal seba’ snin li tagħti lok lill-Istati Membri jiġu evalwati minn tal-anqas darbtejn matul iċ-ċiklu ta’ seba’ snin. Dan jagħti lok ukoll għal użu aktar ibbilanċjat, flessibbli u strateġiku tal-għodod kollha disponibbli ta’ evalwazzjoni u monitoraġġ, u jiżgura monitoraġġ tal-Istati Membri aktar mill-qrib u aktar immirat.

–Jissaħħu l-għamliet u l-metodi tal-attivitajiet ta’ evalwazzjoni u monitoraġġ. Iż-żjarat perjodiċi pprogrammati jibqgħu l-metodu primarju tal-evalwazzjonijiet, iżda se jkun possibbli li jiżdied il-proporzjon ta’ żjarat għal għarrieda. L-attivitajiet ta’ evalwazzjoni u monitoraġġ b’mezzi mill-bogħod (pereż. permezz tal-vidjokonferenza) se jsiru possibbli. “L-evalwazzjonijiet tematiċi” se jkollhom rwol akbar b’obbligu li titwettaq minn tal-anqas evalwazzjoni tematika waħda fis-sena. Sa issa twettqu biss żewġ evalwazzjonijiet tematiċi (waħda relatata mal-istrateġiji nazzjonali għal ġestjoni integrata tal-fruntieri u l-oħra rigward il-kooperazzjoni lokali ta’ Schengen fil-qasam tal-politika komuni dwar il-viżi). Id-dispożizzjonijiet dwar l-attivitajiet ta’ monitoraġġ (żjarat mill-ġdid u għodda ġdida msejħa “żjarat ta’ verifika”) huma aktar ċari u aktar flessibli.

–L-evalwazzjonijiet għal għarrieda, bħala regola ġenerali, ma jkunux jirrikjedu xi notifika minn qabel. Dan jiżgura użu aħjar mill-evalwazzjonijiet għal għarrieda, b’mod partikolari biex l-evalwazzjonijiet iseħħu bi skop li jinvestigaw il-konformità mal-obbligi skont l-acquis ta’ Schengen, b’mod partikolari b’reazzjoni għal indikazzjonijiet ta’ problemi li għandhom impatt sinifikanti fuq it-tħaddim taż-żona Schengen, jew allegazzjonijiet serji ta’ ksur tad-drittijiet fundamentali. Notifika limitata minn qabel se tibqa’ applikabbli għaż-żjarat għal għarrieda, li l-iskop tagħhom huwa li jwettqu “kontroll aleatorju tas-sitwazzjoni” tal-implimentazzjoni tal-acquis ta’ Schengen mill-Istati Membri. Iż-żjarat għal għarrieda mhumiex se jkunu soġġetti għall-programmazzjoni u jistgħu jiġu organizzati fi żmien qasir skont iċ-ċirkostanzi.

–Ir-rapporti annwali dwar ir-riżultati tal-evalwazzjonijiet imwettqa u dwar is-sitwazzjoni tal-mument rigward l-azzjonijiet ta’ rimedju meħuda mill-Istati Membri previsti skont dan ir-Regolament għandhom ikunu parti mir-“Rapport dwar l-Istat ta’ Schengen” ta’ kull sena. Huwa kruċjali li d-diskussjoni politika tkopri b’mod komprensiv l-elementi kollha tal-arkitettura kumplessa li ssostni t-tħaddim kif suppost ta’ Schengen. Għal dan l-għan, il-Kummissjoni se tniedi mill-ġdid l-adozzjoni tar-“Rapport dwar l-Istat ta’ Schengen” biex iservi bħala bażi għad-diskussjonijiet fil-Forum Schengen li nħoloq dan l-aħħar. L-evalwazzjonijiet ta’ Schengen, is-sitwazzjoni fir-rigward tan-nuqqas ta’ verifiki fil-fruntieri interni u l-istat tal-implimentazzjoni tar-rakkomandazzjonijiet se jkunu parti importanti minn dak ir-rapport.

(2) Jiqsaru u jiġu ssimplifikati l-proċeduri biex il-proċess isir aktar effettiv u effiċjenti, u tiżdied il-pressjoni mill-pari

–Tħaffif sinifikanti tal-proċess ta’ evalwazzjoni, bi skadenzi proċedurali ċari Bħala regola ġenerali, il-Kummissjoni se tadotta r-rapporti ta’ evalwazzjoni u r-rakkomandazzjonijiet f’att uniku fi żmien erba’ xhur mill-attività tal-evalwazzjoni (u saħansitra qabel fl-eventwalità li l-evalwazzjoni tidentifika nuqqas serju). Dan mhux biss jiżgura aktar ċarezza fir-rigward tar-rabta ta’ kawżalità bejn is-sejbiet fir-rapport u r-rakkomandazzjonijiet, iżda wkoll iħaffef il-proċess. Jevita kwalunkwe dewmien fl-adozzjoni tar-rakkomandazzjonijiet, li bħalissa ssir permezz ta’ proċess tat-teħid ta’ deċiżjonijiet b’żewġ stadji (jiġifieri r-rapporti ta’ evalwazzjoni adottati mill-Kummissjoni u r-rakkomandazzjonijiet adottati mill-Kunsill). L-involviment sħiħ tal-Kunsill fil-proċess ta’ evalwazzjoni u fir-rakkomandazzjonijiet jibqa’ jiġi aċċertat permezz tal-proċedura ta’ eżami (opinjoni pożittiva tal-Kumitat ta’ Schengen li fih jieħdu sehem l-Istati Membri kollha u jivvutaw fuq l-att uniku li jinkludi kemm is-sejbiet tal-evalwazzjoni kif ukoll ir-rakkomandazzjonijiet). 

–Tiżdied il-pressjoni mill-pari billi s-setgħat tat-teħid ta’ deċiżjonijiet tal-Kunsill jiffukaw fuq każijiet politikament rilevanti u billi jiżdied ir-rwol tiegħu fis-segwitu u l-monitoraġġ tal-implimentazzjoni tar-rakkomandazzjonijiet. Filwaqt li l-proċedura attwali b’żewġ stadji kellha l-għan li tippromovi d-diskussjoni politika fil-livell tal-Kunsill u teżerċita pressjoni mill-pari fl-eventwalità ta’ nuqqasijiet serji jew meta Stat Membru ma jkunx qiegħed jimplimenta r-rakkomandazzjonijiet, l-esperjenza sa issa wriet biċ-ċar li l-użu ta’ dan l-approċċ fil-każijiet kollha u għar-rapporti kollha ma wassalx biex jinkiseb l-objettiv maħsub, iżda żied konsiderevolment mat-tul u l-kumplessità tal-proċess, filwaqt li kkomprometta l-effettività tiegħu.

L-Istati Membri diġà huma involuti sew fil-proċess ta’ evalwazzjoni (iwettqu l-evalwazzjonijiet mal-Kummissjoni, jabbozzaw b’mod konġunt ir-rapporti ta’ evalwazzjoni u l-abbozzi ta’ rakkomandazzjonijiet) u fil-proċess ta’ adozzjoni tar-rapport ta’ evalwazzjoni permezz tal-proċedura ta’ eżami tal-Kumitat. Barra minn hekk, bosta mill-kwistjonijiet identifikati matul l-evalwazzjonijiet huma ta’ natura teknika aktar milli politika. Il-pressjoni tax-xogħol qawwija fil-Kunsill (eżaminazzjoni ta’ 40 rapport fis-sena u d-deċiżjonijiet ta’ implimentazzjoni tal-Kunsill li jirriżultaw minnhom b’mijiet ta’ rakkomandazzjonijiet), u n-natura ferm dettaljata u lokalizzata tar-rakkomandazzjonijiet żammew lura milli ssir xi tip ta’ diskussjoni reali. Ir-rieżami ta’ ħames snin wera li l-fatt li l-Kunsill jadotta r-rakkomandazzjonijiet f’kull każ ma ġġenerax il-pressjoni mill-pari mistennija, u l-Mekkaniżmu ma pprovdiex il-bażi għal diskussjoni politika dwar l-istat ta’ Schengen. Anki meta l-Mekkaniżmu identifika nuqqasijiet serji, id-diskussjonijiet dwar is-sejbiet waslu fil-livell ministerjali darba biss. Apparti minn hekk, il-Kunsill għandu rwol limitat ferm fis-segwitu u l-monitoraġġ tal-implimentazzjoni tal-pjanijiet ta’ azzjoni tal-Istati Membri.

Ir-reviżjoni proposta tara li tirrimedja dawn in-nuqqasijiet billi tiżgura li l-Kunsill jadotta r-rakkomandazzjonijiet f’każijiet li jitqiesu li jkollhom l-akbar valur miżjud u l-akbar impatt biex jorjentaw id-diskussjoni politika dwar kwistjonijiet ta’ interess ġenerali għat-tħaddim taż-żona Schengen. Dawn il-każijiet huma s-segwenti: evalwazzjonijiet tematiċi, “evalwazzjonijiet tal-ewwel darba” (meta jiġi deċiż jekk Stat Membru huwiex lest li japplika l-acquis ta’ Schengen għalkollox jew qasam speċifiku) kif ukoll fl-eventwalità ta’ nuqqas serju bl-għan li tiżdied il-pressjoni mill-pari u d-diskussjoni politika fil-livell tal-Kunsill. Fl-istess waqt, qiegħed jiġi propost li l-proċeduri jiġu ssimplifikati għal każijiet ta’ natura aktar teknika.

Il-proposta żżid ukoll b’mod sinifikanti r-rwol tal-Kunsill fis-segwitu u l-monitoraġġ tal-progress ta’ dawn il-każijiet u tipprevedi wkoll mekkaniżmu li jeskala f’każ ta’ nuqqas ta’ progress. B’mod partikolari, fl-eventwalità ta’ nuqqas serju, il-Kunsill jistabbilixxi limiti taż-żmien għall-implimentazzjoni tar-rakkomandazzjonijiet u l-Kunsill jispeċifika l-frekwenza tar-rapporti dwar il-progress mill-Istat Membru kkonċernat, li jkollu jippreżentaw dawn ir-rapporti dwar il-progress kemm lill-Kummissjoni kif ukoll lill-Kunsill. Il-Kunsill ikun obbligat li jesprimi l-pożizzjoni tiegħu dwar ir-rapport tal-Kummissjoni b’segwitu għaż-żjara mill-ġdid kif ukoll dwar l-għeluq tal-pjanijiet ta’ azzjoni. Dispożizzjonijiet simili japplikaw għall-għeluq tal-pjanijiet ta’ azzjoni relatati mal-“evalwazzjonijiet tal-ewwel darba”.

Barra minn hekk, fil-fażi ta’ monitoraġġ, il-Kunsill se jingħata rwol akbar, fil-każijiet kollha: il-proposta tipprevedi li l-Kummissjoni tinforma lill-Parlament Ewropew u lill-Kunsill minn tal-anqas darbtejn fis-sena dwar l-istat ta’ implimentazzjoni tal-pjanijiet ta’ azzjoni. Minbarra dan, il-Kummissjoni se tadotta wkoll rapport komprensiv kull sena dwar l-evalwazzjonijiet imwettqa li għandu jiġi diskuss mill-Kunsill bl-għan li jadotta konklużjonijiet dwar il-kwistjoni. Fl-aħħar nett, il-Kummissjoni se tinforma lill-Kunsill meta Stat Membru ma jkunx qiegħed jagħmel progress adegwat fl-implimentazzjoni tal-pjan ta’ azzjoni.

–Tisħiħ u tħaffif tal-pass tad-dispożizzjonijiet relatati ma’ każijiet li fihom l-evalwazzjonijiet jidentifikaw nuqqas serju: tiddaħħal proċedura rapida għal nuqqas serju biex jiġi żgurat li n-nuqqasijiet identifikati jiġu indirizzati fil-pront. Il-proposta tinkorpora fit-test normattiv id-definizzjoni ta’ nuqqasijiet serji li hemm bħalissa fil-linji gwida għall-evalwazzjoni ta’ Schengen biex iżżid iċ-ċertezza tad-dritt u tiżgura komprensjoni komuni tal-kunċett. L-Istat Membru evalwat ikollu jibda minnufih jimplimenta l-azzjonijiet biex jirrimedja n-nuqqas anki qabel ma jiġi adottat ir-rapport u jkollu jinforma, mingħajr dewmien, lill-Kummissjoni u lill-Istati Membri dwar il-miżuri meħuda. Fl-eventwalità ta’ nuqqas serju, ir-rakkomandazzjonijiet għandhom jiġu adottati mill-Kunsill fi żmien xahrejn u nofs minn tmiem l-attività ta’ evalwazzjoni; issir żjara mill-ġdid biex jiġu vverifikati l-azzjonijiet ta’ rimedju mhux aktar tard minn sena wara l-evalwazzjoni (tista’ ssir qabel skont l-iskadenzi għall-implimentazzjoni tal-azzjonijiet ta’ rimedju stabbiliti mill-Kunsill); il-Kummissjoni tinforma minnufih lill-Kunsill u lill-Parlament Ewropew dwar l-eżistenza ta’ nuqqas serju, għal skrutinju politiku aktar mill-qrib, kif indikat fil-punt ta’ hawn fuq.

(3) Issaħħaħ l-evalwazzjoni tar-rispett tad-drittijiet fundamentali skont l-acquis ta’ Schengen

(4) Jiġu ottimizzati s-sehem tal-esperti tal-Istati Membri u l-kooperazzjoni mal-korpi, l-uffiċċji u l-aġenziji tal-Unjoni, kif ukoll is-sinerġiji ma’ mekkaniżmi oħra ta’ evalwazzjoni u monitoraġġ, għal evalwazzjonijiet aktar immirati, strateġiċi u mfassla apposta

–Ħolqien ta’ grupp ta’ esperti. Bħalissa, il-Kummissjoni toħroġ stediniet biex tinnomina esperti qabel kull evalwazzjoni possibbli (tliet xhur qabel l-evalwazzjoni speċifika). Dan huwa eżerċizzju li jieħu ħafna żmien u l-Istati Membri mhux dejjem ikunu jistgħu jaħtru biżżejjed esperti kwalifikati billi l-proċedura attwali ma tantx tħallilhom ħin biex jippjanaw. F’każijiet bħal dawn, il-Kummissjoni jkollha testendi diversi drabi s-sejħiet għal esperti għall-evalwazzjonijiet. Barra minn hekk, hemm skarsezza kronika ta’ esperti f’oqsma ta’ politika speċifiċi.

Din is-sistema se tiġi sostitwita b’sejħa annwali biex jinħatru esperti li jiffurmaw grupp ta’ esperti. L-Istati Membri se jkollhom jaħtru minn tal-anqas espert wieħed għal kull qasam ta’ politika identifikat fil-programm ta’ evalwazzjoni pluriennali (pereż. il-viża, il-ġestjoni tal-fruntieri esterni, ir-ritorn, il-protezzjoni tad-data) kull sena u jiżguraw id-disponibbiltà tagħhom għall-evalwazzjonijiet. Il-Kummissjoni se tikkonferma l-għażla tal-esperti biex jiffurmaw il-grupp ta’ esperti u żżomm lista aġġornata tal-membri tal-grupp ta’ esperti. Il-grupp ta’ esperti mbagħad jipprovdi s-sors ewlieni tal-evalwaturi ta’ Schengen għall-evalwazzjonijiet speċifiċi (jiġifieri jistabbilixxi timijiet għal evalwazzjonijiet speċifiċi) u jiffaċilita ferm l-organizzazzjoni taż-żjarat għal għarrieda. Meta jiġu stabbiliti t-timijiet, se titqies kif dovut il-kapaċità tal-amministrazzjonijiet nazzjonali kif ukoll il-ħtieġa li jiġi żgurat il-bilanċ ġeografiku. Il-fatt li espert ikun inħatar biex jifforma parti mill-grupp ta’ esperti ma jfissirx li kull espert fil-grupp ta’ esperti se jkun meħtieġ il-ħin kollu. Il-grupp ta’esperti se jiżgura li t-timijiet jiġu stabbiliti b’mod anqas ikkumplikat u se jipprovdi wkoll aktar prevedibbiltà u flessibilità kemm għall-esperti tal-Kummissjoni kif ukoll tal-Istati Membri anki għaliex l-ippjanar għall-evalwazzjonijiet se jitqassam lill-Istati Membri ferm qabel. Qabel kull evalwazzjoni, il-Kummissjoni tista’ tirrikorri direttament għall-membri individwali tal-grupp ta’ esperti biex tifforma t-timijiet, u b’hekk tħaffef u tissimplifika l-proċess b’mod konsiderevoli. Il-Kummissjoni, meta tifforma t-timijiet speċifiċi, għandha tiżgura wkoll, sa fejn ikun possibbli, il-bilanċ ġeografiku. Jekk għal evalwazzjoni speċifika jkun meħtieġ profil partikolari u ma jkunx possibbli li jitqabbad espert mil-grupp ta’ esperti, il-Kummissjoni xorta waħda tista’ tirrikorri għal sejħiet speċifiċi għal esperti. Il-ħolqien ta’ grupp ta’ esperti fuq medda twila ta’ żmien jippermetti li jiġi stabbilit tim interdixxiplinari biex jivvaluta l-oqsma rilevanti tal-acquis ta’ Schengen.

–It-tisħiħ tal-kooperazzjoni mal-Frontex, mal-eu-LISA, mal-Europol, mal-Aġenzija tal-Unjoni Ewropea għad-Drittijiet Fundamentali u mal-Kontrollur Ewropew għall-Protezzjoni tad-Data. Il-proposta tipprevedi li l-kooperazzjoni għandha tkun reċiproka sabiex dawk l-aġenziji u l-korpi wkoll ikunu jistgħu jagħmlu uża mill-informazzjoni miġbura permezz tal-proċess ta’ evalwazzjoni. Il-Kummissjoni se tkun tista’ wkoll tikseb varjetà usa’ ta’ prodotti ta’ informazzjoni u ta’ analiżi tar-riskju mingħand il-korpi u l-aġenziji,

Apparti minn hekk il-proposta żżid is-sinerġiji mal-mekkaniżmi ta’ evalwazzjoni u monitoraġġ implimentati mill-aġenziji u l-korpi tal-Unjoni. F’dawn l-aħħar snin, ġew stabbiliti mekkaniżmi oħra ta’ kontroll tal-kwalità u ta’ monitoraġġ fil-livelli nazzjonali u tal-UE li jistgħu jikkomplementaw il-Mekkaniżmu. Il-proposta tipprevedi koerenza akbar u aktar sinerġiji mal-attivitajiet tal-Frontex u b’mod partikolari l-proċess tal-valutazzjoni tal-vulnerabbiltà. Il-valutazzjoni tal-vulnerabbiltà mwettqa mill-Frontex hija strument komplementari għall-mekkaniżmu ta’ evalwazzjoni u monitoraġġ ta’ Schengen biex jiggarantixxi l-kontroll tal-kwalità fil-livell tal-UE u jiżgura li kemm il-livell Ewropej kif ukoll dak nazzjonali, ikunu lesti jirrispondu għal kwalunkwe sfida fil-fruntieri esterni. Il-valutazzjoni tal-vulnerabbiltà toffri stampa tal-kapaċità operazzjonali ta’ Stat Membru fil-qasam tal-fruntieri esterni bl-għan li tidentifika d-dgħufijiet potenzjali fis-sistema. Huwa approċċ orjentat fil-futur maħsub biex jilqa’ għall-kriżijiet. Il-Kummissjoni diġà qiegħda tikkondividi r-riżultati tal-proċess ta’ valutazzjoni tal-vulnerabbiltà mat-tim tal-esperti tal-Istati Membri qabel evalwazzjoni f’konformità mal-Artikolu 33 tar-Regolament (UE) 2019/1896 14  u stabbiliet kanali formali għall-iskambju tal-informazzjoni mal-Frontex. Biex iżżid aktar is-sinerġiji, il-proposta tipprevedi dispożizzjonijiet speċifiċi biex timmassimizza l-informazzjoni miġbura permezz tal-proċess ta’ valutazzjoni tal-vulnerabbiltà bl-għan li tiġi stabbilita stampa mtejba tas-sitwazzjoni dwar it-tħaddim taż-żona Schengen. L-għan huwa wkoll li, sa fejn ikun possibbli, jiġu evitati sforzi doppji u rakkomandazzjonijiet kunfliġġenti.

Eżempji rilevanti, f’oqsma oħra ta’ politika li fihom se jkun possibbli li jkun hemm aktar sinerġiji skont id-dispożizzjonijiet il-ġodda previsti fil-proposta huma l-Pjattaforma Multidixxiplinari Ewropea Kontra t-Theddid Kriminali (“EMPACT”) jew is-sorveljanza mwettqa mill-Kummissjoni bl-appoġġ tal-eu-LISA fir-rigward tat-tħejjija tal-Istati Membri għall-implimentazzjoni tas-sistemi rilevanti tal-IT. Il-mekkaniżmi nazzjonali tal-kontroll tal-kwalità (imħeġġa skont ir-Regolament (UE) 2019/1896) jistgħu jsiru daqstant importanti fil-futur u l-proposta tistabbilixxi l-bażi għall-iżgurar tas-sinerġiji u l-iskambju tal-informazzjoni. Barra minn hekk, fl-evalwazzjonijiet jitqiesu wkoll ir-riżultati tal-mekkaniżmu ta’ monitoraġġ indipendenti żviluppat skont il-proposta li tintroduċi skrinjar taċ-ċittadini ta’ pajjiż terz fil-fruntieri esterni.

Il-proposta tipprovdi skadenza ambizzjuża għall-applikazzjoni sħiħa tar-Regolament (mill-[1 ta’ Settembru 2022]).

L-analiżi tal-Kummissjoni, li hija mogħtija fil-valutazzjoni tal-impatt 15 li takkumpanja din il-proposta u miġbura fil-qosor fit-Taqsima 3 hija l-bażi ta’ din il-proposta għal rieżami komprensiv tar-Regolament.

•Konsistenza mad-dispożizzjonijiet eżistenti fil-qasam ta’ politika

Din il-proposta takkumpanja l-Komunikazzjoni dwar “Strateġija lejn żona Schengen reżiljenti u li tiffunzjona bis-sħiħ” 16 li tippreżenta approċċ komprensiv biex iż-żona ta’ spazju ta’ libertà, sigurtà u ġustizzja ssir aktar b’saħħitha u aktar reżiljenti għal kwalunkwe sfida u theddida tal-futur.

Il-Mekkaniżmu għandu jipprovdi qafas legali robust biex ikopri l-leġiżlazzjoni li qed tevolvi fl-intier tagħha u li fuqha jissejjes it-tħaddim taż-żona Schengen. F’dan il-kuntest, wieħed mill-objettivi speċifiċi tal-proposta huwa li jiżdied il-fokus strateġiku fil-proċess ta’ evalwazzjoni u ta’ monitoraġġ. Dan jirrikjedi li tiġi żgurata l-konsistenza mad-dispożizzjonijiet eżistenti u dawk tal-ġejjieni li jagħmlu parti mill-acquis ta’ Schengen. Għal dak l-għan, il-Mekkaniżmu għandu jiġi adattat għall-kamp ta’ applikazzjoni li qed jevolvi tad-dritt tal-UE rilevanti. Matul dawn l-aħħar ftit snin, l-Unjoni ħadet diversi inizjattivi biex issaħħaħ iż-żona Schengen u tagħmilha aktar reżiljenti. Dawn il-bidliet jinkludu diversi elementi ġodda, b’mod partikolari b’rabta mal-ġestjoni tal-fruntieri esterni. Minbarra s-Sistema ta’ Informazzjoni ta’ Schengen u s-Sistema ta’ Informazzjoni dwar il-Viża, sa tmiem l-2023, il-ġestjoni tal-fruntieri esterni se tkun appoġġata minn sistemi ġodda tal-IT, bħas-Sistema ta’ Dħul u Ħruġ 17 u s-Sistema Ewropea ta’ Informazzjoni u ta’ Awtorizzazzjoni għall-Ivvjaġġar 18 . Barra minn hekk, bejn il-bażijiet tad-data rilevanti se tiġi żgurata l-interoperabbiltà 19 . Apparti minn hekk, l-adozzjoni, aktar tard fl-2021, ta’ proposta għal Kodiċi ta’ Kooperazzjoni tal-Pulizija tal-UE taħt l-Istrateġija tal-UE dwar l-Unjoni tas-Sigurtà 20 kif ukoll l-adozzjoni tal-proposta għal emenda tal-Kodiċi tal-Fruntieri ta’ Schengen 21 biex jiġi indirizzati t-tagħlimiet meħuda mill-Covid-19 kif ukoll min-negozjati dwar il-proposta tal-2017 għal emenda tal-Kodiċi tal-Fruntieri ta' Schengen se jkunu inizjattivi importanti biex tiżdied is-sigurtà u tiġi stabbilita mill-ġdid l-integrità taż-żona Schengen.

Ir-rwol tal-aġenziji tal-UE involuti fl-implimentazzjoni tal-acquis ta’ Schengen ukoll akkwista importanza ulterjuri. Fl-2019, il-ħolqien tal-Gwardja Ewropea tal-Fruntiera u tal-Kosta, inkluż it-twaqqif ta’ korp permanenti ta’ 10 000 ruħ sal-2027, kien pass importanti fid-direzzjoni ta’ kontroll Ewropew veru u proprju tal-fruntieri esterni u t-twaqqif progressiv ta’ sistema komuni tal-UE għar-ritorni. Il-mandat tal-Europol jinsab fil-proċess li jiġi aġġornat b’segwitu għal proposta tal-Kummissjoni tad-9 ta’ Diċembru 2020 22 .

Kif deskritt aktar ’il fuq, uħud mill-atti legali fid-diversi oqsma ta’ politika koperti mill-Mekkaniżmu fihom l-għodod ta’ evalwazzjoni u ta’ monitoraġġ tagħhom stess fil-livell nazzjonali jew Ewropew. Għaldaqstant, huwa meħtieġ li jinħolqu u jiġu żgurati sinerġiji biex jiġu evitati duplikazzjonijiet u biex l-għodod ta’ monitoraġġ settorjali jintużaw bl-aqwa mod. Iż-żamma u l-irfinar ta’ din l-interazzjoni huma element importanti ta’ din il-proposta. F’dan ir-rigward, il-proposta tipprovdi dispożizzjonijiet biex tiżdied aktar il-koerenza b’mod partikolari mal-attivitajiet tal-Frontex u l-proċess tal-valutazzjonijiet tal-vulnerabbiltà. Il-Mekkaniżmu u r-rakkomandazzjonijiet tiegħu għandhom jikkomplementaw dawk fl-ambitu tal-proċess tal-valutazzjoni tal-vulnerabbiltà. Eżempji oħra, f’oqsma oħra ta’ politika li fihom se jkun possibbli li jkun hemm aktar sinerġiji huma l-EMPACT (azzjonijiet prijoritarji fil-qasam tal-kooperazzjoni tal-pulizija), jew l-uffiċjal għad-drittijiet fundamentali fil-Frontex (monitoraġġ tal-konformità mad-drittijiet fundamentali fil-fruntieri esterni mill-Frontex). Il-mekkaniżmi nazzjonali tal-kontroll tal-kwalità (imħeġġa skont ir-Regolament (UE) 2019/1896), li huma mekkaniżmi “nazzjonali” ta’ evalwazzjoni u monitoraġġ ta’ Schengen, jistgħu jsiru daqstant importanti fil-futur. Barra minn hekk, fl-evalwazzjonijiet jitqiesu wkoll ir-riżultati tal-mekkaniżmu nazzjonali ta’ monitoraġġ indipendenti żviluppat skont il-proposta li tintroduċi skrinjar 23 taċ-ċittadini ta’ pajjiż terz fil-fruntieri esterni. 

Il-proposta ġiet żviluppata biex tkun konsistenti mad-dispożizzjonijiet eżistenti fil-qasam ta’ politika (jiġifieri oqsma ta’ politika koperti mill-acquis ta’ Schengen), u tqiesu wkoll kif dovut l-inizjattivi li hemm għaddejjin u dawk previsti li għadhom ma daħlux fis-seħħ. F’termini usa’, billi tikkollega aħjar l-oqsma ta’ politika differenti, l-inizjattiva jaf tirrinforza l-effettività tal-approċċ olistiku propost mill-istrateġiji tal-Kummissjoni u tirrinforza l-komplementarjetà tal-għodod kollha żviluppati bħala parti mill-isforzi leġiżlattivi l-ġodda

•Konsistenza ma’ politiki oħra tal-Unjoni

Il-proposta hija konsistenti mal-objettivi u mal-inizjattivi previsti skont l-Istrateġija tal-UE dwar l-Unjoni tas-Sigurtà li jmorru lil hinn mill-acquis ta’ Schengen, bħall-proposta għar-rinforzar tal-iskambju awtomatiku ta’ kategoriji ta’ data importanti skont id-Deċiżjonijiet ta’ Prüm tal-Kunsill 24 , u ma’ inizjattivi tal-futur skont l-Istrateġija tal-UE 2021-2025 għall-Ġlieda kontra l-Kriminalità Organizzata 25 . Hija daqstant konsistenti mal-inizjattivi inklużi fil-Patt Ġdid dwar il-Migrazzjoni u l-Ażil 26 .

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

Il-bażi ġuridika tal-proposta hija l-Artikolu 70 tat-Trattat dwar il-Funzjonament tal-Unjoni Ewropea. L-Artikolu 70 jipprevedi speċifikament il-kompetenza tal-Kunsill li jadotta, fuq proposta tal-Kummissjoni, miżuri li jistabbilixxu l-arranġamenti li permezz tagħhom l-Istati Membri, f’kollaborazzjoni mal-Kummissjoni, jagħmlu evalwazzjoni oġġettiva u imparzjali tal-implimentazzjoni tal-politiki tal-Unjoni mill-awtoritajiet tal-Istati Membri fl-ispazju ta’ libertà, sigurtà u ġustizzja. Il-proposta tħassar u tissostitwixxi r-Regolament (UE) Nru 1053/2013, li wkoll huwa bbażat fuq din id-dispożizzjoni tat-Trattat.

•Sussidjarjetà (għall-kompetenza mhux esklużiva)

L-Artikolu 70 jipprevedi l-bażi ġuridika għall-miżuri li permezz tagħhom l-Istati Membri, f’kollaborazzjoni mal-Kummissjoni, iwettqu evalwazzjoni oġġettiva u imparzjali tal-implimentazzjoni tal-politiki tal-Unjoni mill-awtoritajiet tal-Istati Membri fl-ispazju ta’ libertà, sigurtà u ġustizzja. Filwaqt li din il-proposta ġġib magħha ħafna bidliet, ma tibdilx fundamentalment l-objettivi u l-kamp ta’ applikazzjoni tal-Mekkaniżmu. Il-proposta hija fil-limiti stabbiliti mill-Artikolu 70 TFUE.

L-objettiv ta’ din il-proposta huwa li l-Mekkaniżmu li diġà jeżisti jiġi żviluppat u mtejjeb aktar u jsir aktar effiċjenti. Ir-rieżami tar-Regolament imwettaq fl-2020 ikkonferma l-ħtieġa ta’ mekkaniżmu robust fil-livell tal-UE. Jibqa’ l-fatt li l-valur miżjud tal-UE tal-Mekkaniżmu jirriżulta l-ewwel u qabel kollox mill-kondiviżjoni tar-responsabbiltajiet bejn il-Kummissjoni u l-Istati Membri. Dan joħloq bażi qawwija biex tiġi ġġenerata fiduċja reċiproka. L-evalwazzjonijiet imwettqa fil-livell tal-UE jistgħu jiżguraw l-identifikazzjoni f’waqtha ta’ nuqqasijiet li jfeġġu minn asimetriji, diverġenzi u implimentazzjoni skorretta tal-acquis ta’ Schengen li altrimenti jpoġġu f’riskju l-integrità ta’ Schengen. Apparti minn hekk, il-pressjoni mill-pari eżerċitata fil-livell tal-UE toħloq l-inċentiv meħtieġ biex jiġi żgurat li l-Istati Membri jirrimedjaw f’qasir żmien in-nuqqasijiet, b’mod partikolari fl-eventwalità ta’ nuqqasijiet serji.

Barra minn dan, l-inizjattiva tqis kif dovut il-prinċipju tas-sussidjarjetà billi tistipula l-bażi għal koordinazzjoni mtejba permezz tal-evalwazzjonijiet li jsiru fl-ambitu tal-mekkaniżmi nazzjonali ta’ kontroll tal-kwalità u ta’ monitoraġġ. Wieħed mill-objettivi huwa li l-fokus tal-Mekkaniżmu jiġi trasferit fuq in-nuqqasijiet li jaf ikollhom effetti ħżiena fuq it-tħaddim sew ta’ Schengen kollha kemm hi. Kwistjonijiet ta’ portata limitata għandhom minflok jiġu trattati fuq livell nazzjonali. Dan l-approċċ huwa konsistenti wkoll mar-Regolament (UE) 2019/1896, li jħeġġeġ biex jiġu żviluppati mekkaniżmi nazzjonali ta’ kontroll tal-kwalità fl-ambitu tal-komponenti tal-ġestjoni integrata Ewropea tal-fruntieri.

Bħala konklużjoni, sabiex in-nuqqasijiet identifikati mir-rieżami jiġu indirizzati b’mod effettiv u analizzati ulterjorment fil-valutazzjoni tal-impatt, huma meħtieġa bidliet leġiżlattivi.

•Proporzjonalità

L-Artikolu 5(4) tat-Trattat dwar l-Unjoni Ewropea jipprevedi li l-kontenut u l-forma tal-azzjoni tal-Unjoni ma għandhomx jeċċedu dak li jkun meħtieġ sabiex jitwettqu l-objettivi tat-Trattati. Il-forma magħżula għal din l-azzjoni trid tagħti lok biex il-proposta tikseb l-objettivi tagħha u tiġi implimentata bl-aktar mod effettiv possibbli.

Il-Mekkaniżmu ġie stabbilit fl-2013 permezz ta’ Regolament billi dan il-Mekkaniżmu speċifiku li huwa implimentata fil-livell tal-UE u kkoordinat mill-Kummissjoni jirrikjedi regoli ċari rigward ir-responsabbiltajiet u l-proċeduri. L-inizjattiva proposta tikkostitwixxi reviżjoni ta’ Regolament u għalhekk trid ukoll tkun fil-forma ta’ Regolament.

Fir-rigward tal-kontenut, il-proporzjonalità tal-aspetti ġodda ewlenin ġew eżaminati fil-valutazzjoni tal-impatt li takkumpanjaha (it-Taqsima 7.3).

Fost affarijiet oħra, il-proposta hija maħsuba li tissimplifika l-proċess ta’ evalwazzjoni billi tissimplifika l-proċess attwali tat-teħid ta’ deċiżjonijiet b’żewġ stadji, sabiex, bħala regola ġenerali, il-Kummissjoni tadotta mhux biss ir-rapporti ta’ evalwazzjoni iżda wkoll ir-rakkomandazzjonijiet permezz ta’ att uniku ta’ implimentazzjoni (bħalissa l-Kummissjoni tadotta r-rapport u proposta għal Rakkomandazzjonijiet tal-Kunsill). L-esperjenza tas-snin imgħoddija wriet li l-adozzjoni tar-rakkomandazzjonijiet mill-Kunsill ittawwal il-proċedura b’mod konsiderevoli (b’medja ta’ 2-3 xhur) filwaqt li l-pressjoni tax-xogħol eċċessiva tillimita s-setgħa tal-Kunsill li jeżerċita l-pressjoni mill-pari meħtieġa u jkollu diskussjonijiet ġenerali dwar l-istat ta’ Schengen. L-approċċ rivedut ifittex li jirrimedja b’mod proporzjonat dawn in-nuqqasijiet billi jiżgura li r-rakkomandazzjonijiet tal-Kunsill jiġu adottati fil-każijiet meqjusa li jkollhom l-akbar valur miżjud u impatt biex jorjentaw id-diskussjoni politika dwar kwistjonijiet li huma ta’ interess ġenerali għat-tħaddim taż-żona Schengen, jiġifieri l-evalwazzjonijiet tal-ewwel darba u n-nuqqasijiet serji, kif ukoll l-evalwazzjonijiet tematiċi, filwaqt li jissimplifika l-proċedura f’każijiet ta’ natura aktar teknika. Il-proposta żżid ukoll b’mod sinifikanti r-rwol tal-Kunsill fis-segwitu u l-monitoraġġ tal-progress ta’ dawn il-każijiet, u tipprevedi wkoll mekkaniżmu ta’ sanzjonijiet gradwali f’każ ta’ nuqqas ta’ progress.

Bħala konklużjoni, l-ebda bidla proposta f’din l-inizjattiva ma tmur lil hinn minn dak li huwa meħtieġ biex jinkisbu l-objettivi deskritti fit-Taqsima 1, u b’hekk il-proposta tirrispetta l-prinċipju tal-proporzjonalità. Fil-fatt, diversi elementi tal-proposta se jnaqqsu l-piż amministrattiv fuq l-Istati Membri u l-Kummissjoni.

•Għażla tal-istrument

Ladarba l-inizjattiva proposta hija maħsuba li tirrevedi u taġġorna l-mekkaniżmu ta’ evalwazzjoni eżistenti stabbilit permezz tar-Regolament (ir-Regolament (UE) Nru 1053/2013), se tkun ukoll f’forma ta’ Regolament.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Evalwazzjonijiet ex post/kontrolli tal-idoneità tal-leġiżlazzjoni eżistenti

•Konsultazzjonijiet mal-partijiet ikkonċernati

•Valutazzjoni tal-impatt 31

Abbażi tad-data disponibbli u r-riżultati ta’ konsultazzjoni wiesgħa mal-partijiet ikkonċernati, il-Kummissjoni fasslet erba’ għażliet ta’ politika li kull waħda tinkludi sensiela ta’ miżuri biex jinkisbu l-objettivi. L-Għażla 1 tinkludi biss miżuri operazzjonali biex l-implimentazzjoni tiġi allinjata mal-ħtiġijiet attwali. L-Għażla 2 hija emendi leġiżlattivi mmirati għar-Regolament biex jiġi ċċarat il-kamp ta’ applikazzjoni ta’ dispożizzjonijiet speċifiċi biex tiżdied iċ-ċertezza tad-dritt rigward l-obbligi tal-atturi differenti involuti, u jiġu ssimplifikati u rrazzjonalizzati l-proċeduri eżistenti. L-Għażla 3 hija approċċ aktar ambizzjuż li jwassal għas-simplifikazzjonijiet tal-ewwel żewġ għażliet u bidliet importanti fit-tħaddim tal-Mekkaniżmu. L-Għażla 4 hija approċċ ikkombinat li jġib flimkien elementi mid-diversi għażliet skont il-qasam ta’ intervent. Dawn l-għażliet jibnu fuq xulxin u f’ħafna mill-każijiet huma kumulattivi aktar minn alternattivi, skont il-livell ta’ ambizzjoni. Il-pakkett ta’ politika ppreferuta (l-Għażla 4) jiġbor flimkien sensiela ta’ miżuri mill-għażliet 1, 2 u 3.

Objettiv speċifiku 1: Jiġu evitati l-lakuni fis-sejbiet tal-evalwazzjonijiet u jiżdied il-fokus strateġiku

L-għażla ppreferuta hija li jinżamm il-kamp ta’ applikazzjoni attwali li jkopri l-aspetti kollha tal-acquis ta’ Schengen, filwaqt li l-prijoritajiet (oqsma ta’ politika) jiġu adattati għar-realtajiet il-ġodda bi programmazzjoni aktar flessibbli u ċ-ċiklu ta’ evalwazzjoni jiġi estiż minn ħames għal seba’ snin. L-għażla tat-twessigħ tal-kamp ta’ applikazzjoni tal-Mekkaniżmu biex ikopri kwistjonijiet lil hinn mill-acquis ta’ Schengen (pereż. fil-qasam tal-politika dwar l-ażil) ġiet skartata għal raġunijiet prinċipalment legali iżda anki għal raġunijiet politiċi, billi ħafna Stati Membri ma appoġġawx tali għażla. L-artikolazzjoni attwali tal-evalwazzjonijiet skont l-oqsma ta’ politika se tinżamm ukoll iżda se ssir aktar flessibbli. Li jkun hemm evalwazzjoni komprensiva waħda għal kull Stat Membru rriżulta li fil-prattika mhuwiex fattibbli fl-immedjat (iżda kien jimmira għal terminu medju). Madankollu, fir-rigward tal-għamliet u l-metodi tal-attivitajiet ta’ evalwazzjoni u monitoraġġ, huma proposti bidliet leġiżlattivi ambizzjużi biex iwessgħu s-sensiela ta’ għodod disponibbli u jiċċaraw il-kriterji u l-kundizzjonijiet għall-użu tagħhom: evalwazzjonijiet tematiċi sistematiċi, żewġ tipi ta’ żjarat għal għarrieda b’avviż ta’ 24 siegħa jew mingħajru skont l-iskop, u żewġ tipi ta’ żjarat mill-ġdid (“żjarat minħabba nuqqasijiet serji” u “żjarat ta’ verifika”).

Objettiv speċifiku 2: Ir-rwoli u t-tqassim tar-responsabbiltajiet jiġu rrazzjonalizzati, u jiġu ssimplifikati l-proċessi u l-proċeduri

Il-pakkett ta’ politika ppreferuta jinkludi emendi biex il-proċessi jitħaffu u jiġu ssimplifikati l-proċeduri kif ukoll bidliet legali ambizzjużi biex tiġi mmodifikati l-proċedura tat-teħid ta’ deċiżjonijiet. Id-deklassifikazzjoni tar-rapporti ta’ evalwazzjoni, bħala regola, bit-twaqqif ta’ limiti taż-żmien legali għall-adozzjoni tar-rapporti ta’ evalwazzjoni u r-rakkomandazzjonijiet, il-valutazzjoni ssimplifikata tal-pjanijiet ta’ azzjoni mill-Kummissjoni u l-frekwenza ridotta tal-obbligi ta’ rapportar għall-Istati Membri se jħaffu l-pass u jiffaċilitaw il-proċeduri u dawn għandhom l-appoġġ wiesa’ tal-partijiet ikkonċernati. Fir-rigward tal-bidla proposta fil-proċedura tat-teħid ta’ deċiżjonijiet, li skontha l-Kummissjoni tadotta kemm ir-rapporti ta’ evalwazzjoni kif ukoll ir-rakkomandazzjonijiet (filwaqt li jinżamm ir-rwol tal-Kunsill fl-aktar każijiet politikament rilevanti), l-Istati Membri se jkomplu jkunu involuti mija fil-mija fl-adozzjoni tar-rapporti ta’ evalwazzjoni u r-rakkomandazzjonijiet bis-saħħa tal-proċedura ta’ eżami.

Objettiv speċifiku 3: Tissaħħaħ l-implimentazzjoni tas-salvagwardji tad-drittijiet fundamentali skont l-acquis ta’ Schengen

L-għażla ppreferuta hija li jiġu introdotti bidliet biex tiżdied iċ-ċertezza tad-dritt rigward elementi rilevanti għad-drittijiet fundamentali u tiġi enfasizzata l-importanza tagħhom. Qiegħed jiġi propost li tiddaħħal referenza għall-preżentazzjoni regolari ta’ analiżijiet tar-riskju mill-Aġenzija tal-Unjoni Ewropea għad-Drittijiet Fundamentali, tissaħħaħ ir-referenza għad-drittijiet fundamentali fid-dispożizzjonijiet dwar it-taħriġ, jiżdied is-sehem tal-Aġenzija tal-Unjoni Ewropea għad-Drittijiet Fundamentali fiż-żjarat ta’ evalwazzjoni, u jiddaħħal Artikolu speċifiku rigward l-użu ta’ evidenza mogħtija minn partijiet terzi.

Minbarra l-elementi li jissemmew hawn fuq, il-proposta tinkludi diversi bidliet tekniċi biex jiżdiedu l-effettività u l-effiċjenza tal-Mekkaniżmu. Kull waħda, individwalment, għandha biss impatt pożittiv pjuttost limitat (u għalhekk ma kinux soġġetti għall-valutazzjoni tal-impatt), iżda l-impatt kumplessiv ta’ dawn il-miżuri huwa pożittiv.

Objettiv speċifiku 4: Jiġi ottimizzat is-sehem tal-esperti tal-Istati Membri u l-involviment tal-korpi, l-uffiċċji u l-aġenziji tal-Unjoni

•Idoneità regolatorja u simplifikazzjoni

•Drittijiet fundamentali

Din il-proposta tirrispetta d-drittijiet fundamentali stabbiliti fil-Karta tad-Drittijiet Fundamentali tal-Unjoni Ewropea u tintroduċi bidliet leġiżlattivi speċifiċi biex jiġi żgurat li l-obbligi fir-rigward tad-drittijiet fundamentali jkunu koperti b’mod ċar mill-Mekkaniżmu.

4.IMPLIKAZZJONIJIET BAĠITARJI

Ma’ din il-proposta hija annessa dikjarazzjoni finanzjarja. Fis-sena t-tħaddim tal-Mekkaniżmu jiswa’ lill-Kummissjoni bejn wieħed u ieħor EUR 2 miljun. Dan il-livell ta’ nfiq se jinżamm; il-proposta ma tirrikjedix żieda fir-riżorsi umani u finanzjarji li diġà huma allokati għall-Kummissjoni. Dan huwa primarjament minħabba s-sensiela ta’ bidliet li jwasslu biex inaqqsu l-piż amministrattiv tal-Kummissjoni u d-dispożizzjonijiet li jippermetti evalwazzjonijiet aktar immirati (u saħansitra iqsar) b’timijiet iżgħar. Matul il-ħidma fuq il-valutazzjoni tal-impatt, il-Kummissjoni kienet immexxija mill-prinċipju li l-effiċjenza u l-effettività tal-Mekkaniżmu għandhom jiżdiedu mingħajr ma jkunu jirrikjedu riżorsi umani u finanzjarji addizzjonali.

5.ELEMENTI OĦRA

•Monitoraġġ

Il-Kummissjoni se twettaq rieżami tal-operazzjoni tar-Regolament u tippreżenta rapport lill-Kunsill u lill-Parlament Ewropew fi żmien sitt xhur mill-adozzjoni tar-rapporti kollha ta’ evalwazzjoni rigward l-evalwazzjonijiet koperti mill-ewwel ċiklu ta’ evalwazzjoni pluriennali ta’ seba’ snin taħt ir-Regolament il-ġdid.

Bħala parti mill-valutazzjoni tal-impatt u f’konformità mar-regoli dwar ir-regolamentazzjoni aħjar, ġiet żviluppata lista ta’ indikaturi kwalitattivi u kwantitattivi mhux eżawrjenti li se tintuża għar-rieżami. Barra minn hekk, il-Kummissjoni tinsab fil-proċess li tiżviluppa għodda ġdida tal-IT biex timmodernizza l-monitoraġġ tal-implimentazzjoni tal-pjanijiet ta’ azzjoni mill-Istati Membri. Din l-għodda hija mistennija li tibda topera diġà fl-2021.

•Il-konsegwenzi tad-diversi protokolli annessi mat-Trattati u tal-ftehimiet ta’ assoċjazzjoni konklużi ma’ pajjiżi terzi

•Spjegazzjoni fid-dettall tad-dispożizzjonijiet speċifiċi tal-proposta

Paragun artikolu wara l-ieħor mad-dispożizzjonijiet tar-Regolament attwali:

Artikolu 1 – Suġġett u kamp ta’ applikazzjoni

L-Artikolu jibqa’ essenzjalment kif kien, iżda jiċċara l-iskop tal-Mekkaniżmu (“jiżgura li l-Istati Membri japplikaw l-acquis ta’ Schengen b’mod effettiv, u b’hekk jikkontribwixxi għal żona li taħdem sew mingħajr kontrolli fil-fruntieri interni”). Il-paragrafu 3 tqiegħed fl-Artikolu 15 (“esperti tal-Istati Membri”).

Artikolu 2 – Definizzjonijiet

Ġew miżjuda għadd ta’ definizzjonijiet ġodda biex ikun hemm ċertezza tad-dritt u biex ir-Regolament ikun jista’ jinqara aħjar. Tiżdied id-definizzjoni ta’ “nuqqas serju” biex ikun hemm aktar ċertezza tad-dritt u tiġi żgurata komprensjoni komuni tal-kunċett. Id-definizzjoni tibbaża fuq dik diġà użata bħalissa fil-“Gwida għall-Evalwazzjoni ta’ Schengen” tal-Kummissjoni. L-Artikolu jipprovdi wkoll definizzjonijiet għall-“evalwazzjoni tal-ewwel darba”, “evalwazzjoni perjodika”, “evalwazzjoni għal għarrieda”, “evalwazzjoni tematika”, “żjara”, “żjara mill-ġdid”, “żjara ta’ verifika”, “attività ta’ evalwazzjoni” u “tim”,

Artikolu 3 – Responsabbiltajiet u dmir ta’ kooperazzjoni

Ma ddaħħlet l-ebda bidla sinifikanti. Il-paragrafi l-ġodda 4 u 5 ġew trasferiti hawnhekk mill-Artikolu 13 billi jinkludu essenzjalment responsabbiltajiet għall-Istati Membri u l-Kummissjoni.

Artikolu 4 – Għamliet tal-evalwazzjonijiet

Biex jipprovdi ċarezza, l-Artikolu jikkomplementa d-definizzjonijiet billi jelenka l-għamliet tal-evalwazzjonijiet u jispeċifika l-kundizzjonijiet għall-evalwazzjonijiet għal għarrieda u għall-evalwazzjonijiet tematiċi.

Artikolu 5 – Għamliet tal-attivitajiet ta’ monitoraġġ

Biex jipprovdi ċarezza, l-Artikolu jelenka l-għamliet tal-attivitajiet ta’ monitoraġġ.

Artikolu 6 – Metodi ta’ evalwazzjoni u monitoraġġ

Bl-istess mod, biex jipprovdi ċarezza, l-Artikolu jelenka l-metodi li għandhom jintużaw għall-attivitajiet ta’ evalwazzjoni u monitoraġġ, jiġifieri żjarat (b’avviż minn qabel jew għal għarrieda), kwestjonarji jew metodi oħra mill-bogħod, pereż. vidjokonferenzi. Jispeċifika li dawn jistgħu jintużaw b’mod indipendenti jew imħallta flimkien.

Artikolu 7 – Kooperazzjoni mal-korpi, l-uffiċċji u l-aġenziji tal-Unjoni

Dan l-Artikolu ġdid jirrinforza l-importanza li tiġi stabbilita kooperazzjoni mill-qrib għall-finijiet ta’ dan ir-Regolament mal-korpi, l-uffiċċji u l-aġenziji tal-Unjoni rilevanti involuti fl-implimentazzjoni tal-acquis ta’ Schengen (b’mod partikolari l-Frontex, l-eu-LISA u l-Europol). Jirreferi b’mod espliċitu għall-ħtieġa li tiġi rinforzata l-kooperazzjoni anki mal-Aġenzija tal-Unjoni Ewropea għad-Drittijiet Fundamentali. Abbażi tal-Artikolu, il-Kummissjoni se (tkompli tirrikjedi) informazzjoni, data statistika u analiżijiet tar-riskju rilevanti mingħand dawn il-korpi, uffiċċji u aġenziji. Il-kondiviżjoni tal-informazzjoni se tkun reċiproka: Artikolu sussegwenti (l-Artikolu 10) jipprevedi li l-Kummissjoni tista’ tikkondividi magħhom dettalji dwar ir-rapporti ta’ evalwazzjoni, il-pjanijiet ta’ azzjoni u l-aġġornamenti dwar l-implimentazzjoni tal-pjanijiet ta’ azzjoni biex iżżid is-sinerġiji u biex tevita sforzi doppji.

Artikolu 8 – Kooperazzjoni mal-Frontex

L-Artikolu huwa verżjoni adattata tal-Artikolu 7 tar-Regolament attwali, u jqis l-evoluzzjoni tar-Regolament dwar il-Gwardja Ewropea tal-Fruntiera u tal-Kosta.

Artikolu 9 – Kooperazzjoni mal-Europol

Abbażi tal-proposta tal-Kummissjoni 32 biex jiġi emendat ir-Regolament dwar l-Europol, l-Artikolu jipprevedi kontroreferenza għall-Artikolu 4(1)(s) tar-Regolament (UE) 2016/794 33 , li skontu l-Europol ikollha tagħti s-sostenn tagħha għall-implimentazzjoni ta’ dan ir-Regolament b’għarfien espert, analiżijiet, rapporti u informazzjoni oħra rilevanti. It-test għadu pendenti għall-adozzjoni tal-proposta.

Artikolu 10 – Sinerġiji ma’ attivitajiet oħra ta’ evalwazzjoni u monitoraġġ

Sabiex jiżdied il-fokus strateġiku u t-tfassil aktar immirat tal-evalwazzjoni, l-Artikolu jirrikjedi aktar sinerġiji mal-mekkaniżmi u l-pjattaformi rilevanti operati mill-aġenziji tal-UE u l-amministrazzjonijiet nazzjonali, pereż. il-Pjattaforma Multidixxiplinari Ewropea Kontra t-Theddid Kriminali (“EMPACT”) jew is-sorveljanza mwettqa mill-eu-LISA fir-rigward tat-tħejjija tal-Istati Membri għall-implimentazzjoni tas-sistemi tal-IT rilevanti kif ukoll is-sejbiet tal-mekkaniżmi nazzjonali ta’ kontroll tal-kwalità jew il-mekkaniżmi ta’ monitoraġġ indipendenti. L-Artikolu jipprevedi wkoll li l-korpi u l-aġenziji ma għandhomx biss ikunu fornituri tal-informazzjoni, iżda wkoll benefiċċjarji u għalhekk, il-Kummissjoni għandha tkun tista’ tikkondividi magħhom rapporti ta’ evalwazzjoni, pjanijiet ta’ azzjoni u aġġornamenti dwar l-implimentazzjoni tal-pjanijiet ta’ azzjoni.

Artikolu 11 – Informazzjoni minn partijiet terzi

L-Artikolu jipprovdi bażi ġuridika għall-użu ta’ informazzjoni pprovduta minn partijiet terzi (pereż. l-ombudspersons, l-awtoritajiet li jwettqu monitoraġġ tar-rispett tad-drittijiet fundamentali, l-organizzazzjonijiet nongovernattivi u internazzjonali) biex tiżdied l-effiċjenza tal-programmazzjoni u l-implimentazzjoni tal-attivitajiet ta’ evalwazzjoni. Tali informazzjoni tista’ tkun partikolarment ta’ siwi biex jiġi evalwat ir-rispett tad-drittijiet fundamentali fl-implimentazzjoni tal-acquis ta’ Schengen.

Artikolu 12 – Programm ta’ evalwazzjoni pluriennali

It-terminu tal-programm pluriennali ġie estiż minn ħames għal seba’ snin sabiex jingħata lok biex isiru l-evalwazzjonijiet kollha meħtieġa bl-aktar mod effettiv, ikun jista’ jkun hemm reazzjoni għall-isfidi li jfeġġu, l-għodod kollha disponibbli jkunu jistgħu jintużaw b’mod aktar flessibbli u bbilanċjat, u biex ikun previst monitoraġġ aktar mill-qrib u aktar immirat. L-Artikolu jiddeskrivi l-kontenut tal-programm ta’ evalwazzjoni pluriennali li se jidentifika l-oqsma prijoritarji speċifiċi li għandhom jiġu koperti mill-evalwazzjonijiet perjodiċi. Se jistabbilixxi wkoll lista proviżorja ta’ Stati Membri li għandhom ikunu soġġetti għal evalwazzjonijiet perjodiċi f’sena partikolari. Qiegħda tiddaħħal ukoll proċedura simplifikata għall-aġġustament tal-programm, li skontha l-aġġustamenti meħtieġa minħabba avvenimenti u ċirkostanzi ta’ force majeure, jaf ma jkunux jirrikjedu emenda għall-programm, jiġifieri l-att ta’ implimentazzjoni kkonċernat. L-esperjenza tal-imgħoddi wriet biċ-ċar il-ħtieġa għal tali flessibilità. Minħabba l-pandemija tal-Covid-19, il-programm ta’ evalwazzjoni annwali għall-2020 kellu jiġi emendat. Barra minn hekk, l-evalwazzjonijiet fil-qasam tal-politika komuni dwar il-viżi huma suxxettibbli għal avvenimenti mhux previsti minħabba li jsiru f’pajjiżi terzi. Tali avvenimenti wasslu wkoll biex jiġi emendat il-programm, li huma eżerċizzju li jieħu ż-żmien.

Artikolu 13 – Programm ta’ evalwazzjoni annwali

L-ebda bidla kbira meta mqabbel mal-Artikolu attwali korrispondenti (l-Artikolu 6). Il-programm ta’ evalwazzjoni annwali se jkun fih proposti għal evalwazzjonijiet perjodiċi tal-Istati Membri kif speċifikat fil-programm ta’ evalwazzjoni pluriennali; evalwazzjonijiet tal-ewwel darba ta’ Stat Membru (jekk ikun meħtieġ) u minn tal-anqas evalwazzjoni tematika waħda. Se jinkludi skeda taż-żmien proviżorja ta’ dawn l-evalwazzjonijiet, iżda mhux neċessarjament is-siti li għandha ssir żjara fiha / li għandhom jiġu evalwati. L-evalwazzjonijiet għal għarrieda mhumiex se jiġu pprogrammati aktar iżda se jiġu organizzati fi żmien qasir skont il-bżonn. Dan ma għandu l-ebda impatt fuq l-Istat Membru iżda se jiffaċilita l-ippjanar u l-proċeduri interni fil-Kummissjoni u jżid il-flessibilità u l-kapaċità ta’ reazzjoni għal ċirkostanzi ġodda. B’mod simili għall-programm pluriennali, qiegħda tiddaħħal proċedura simplifikata għall-aġġustament tal-programm meħtieġa minħabba avvenimenti jew ċirkostanzi ta’ force majeure.

Artikolu 14 – Kwestjonarju standard

L-ebda bidla sostanzjali meta mqabbel mal-Artikolu attwali korrispondenti (l-Artikolu 9). Mhux se jkun meħtieġ li jiġi adottat kwestjonarju standard ġdid minħabba l-adozzjoni tar-Regolament il-ġdid (l-Artikolu 31). Għandu jibqa’ jintuża dak ta’ bħalissa. L-iskadenza biex jintbagħat il-kwestjonarju u biex jiġu riċevuti t-tweġibiet mill-Istati Membri ġiet aġġustata biex jiġi żgurat li l-maġġorparti tax-xogħol min-naħa tal-Istati Membri ma jkollux għalfejn (neċessarjament) isir matul il-perjodu tal-btajjel tas-sajf. Barra minn hekk, huwa speċifikat li fuq talba tal-Kummissjoni, l-Istati Membri għandhom jaġġornaw it-tweġibiet tagħhom għall-kwestjonarju standard u jwieġbu, jekk ikun mitlub, mistoqsijiet komplementari qabel l-evalwazzjonijiet speċifiċi, kif ukoll jipprovdu s-sejbiet tal-mekkaniżmi nazzjonali ta’ kontroll tal-kwalità u tal-verifiki interni. Din id-dispożizzjoni tiżgura li t-timijiet ikollhom l-informazzjoni kollha rilevanti u aġġornata għad-dispożizzjoni tagħhom biex iwettqu b’mod effiċjenti l-evalwazzjonijiet speċifiċi.

Artikolu 15 – Esperti tal-Istati Membri

L-ebda bidla sostanzjali meta mqabbel mal-Artikolu attwali (l-Artikolu 12). Il-paragrafu 2 ġie trasferit hawnhekk mill-Artikolu 1 fejn jinsab bħalissa.

Artikolu 16 – Taħriġ tal-esperti

Kienet tinħass il-ħtieġa li d-dispożizzjoni dwar it-taħriġ tiġi rinforzata billi jiddaħħal Artikolu speċifiku dwar il-kwistjoni, li jenfasizza l-importanza tal-kunsiderazzjonijiet kollha rilevanti rigward id-drittijiet fundamentali fil-korsijiet ta’ taħriġ u tal-involviment sistematiku tal-Aġenzija għad-Drittijiet Fundamentali. Issir referenza speċifika għall-ħtieġa li l-curricula tat-taħriġ inizjali jinżammu aġġornati u li jiġi organizzat taħriġ ta’ aġġornament. Barra minn hekk, kull tim ta’ evalwazzjoni jista’ jinkludi “osservatur” minn Stat Membru jew inkella mill-Kummissjoni. Dawn l-esperti “b’anqas esperjenza” se jġibu l-esperjenza mill-evalwazzjonijiet qabel ma jieħdu sehem fihom mija fil-mija bħala membri sħaħ tat-tim. Bħala osservaturi, jistgħu jingħataw il-kompitu li jipprovdu assistenza teknika (kif speċifikat fl-Artikolu 18) iżda ma għandhomx ikunu involuti fil-ħidma ewlenija tat-timijiet (valutazzjoni tas-sejbiet u abbozzar). Madankollu, l-ispejjeż jiġġarrbu mill-Kummissjoni f’konformità mal-Artikolu 3.

Artikolu 17 – Grupp ta’ esperti tal-Istati Membri

Dan l-Artikolu ġdid, kif diġà spjegat fid-dettall taħt it-Taqsima 1, għandu l-għan li jiżgura li jkun hemm għadd suffiċjenti ta’ esperti b’esperjenza li jieħdu sehem fl-attivitajiet ta’ evalwazzjoni u monitoraġġ u li t-timijiet jiġu stabbiliti b’mod aktar rapidu u anqas ikkumplikat. Il-grupp ta’ esperti se jipprovdi aktar prevedibbiltà kif ukoll flessibilità akbar. L-Artikolu jipprovdi regoli dettaljati u skadenzi fir-rigward tat-twaqqif tal-grupp ta’ esperti u jiddefinixxi l-obbligi għall-Kummissjoni u għall-Istati Membri. Huwa mistenni li l-membri tal-grupp ta’ esperti kif ukoll l-awtoritajiet nazzjonali jwieġbu b’mod pożittiv għal stediniet speċifiċi; ir-rifjut tagħhom għandu jkun ibbażat fuq raġunijiet professjonali jew personali serji biss.

Artikolu 18 – Twaqqif tat-timijiet

L-Artikolu jgħaqqad flimkien u jemenda l-Artikoli 10 u 11 korrispondenti ta’ bħalissa. Jipprevedi, bħala regola ġenerali, li l-membri tat-timijiet jintgħażlu mill-grupp ta’ esperti li jkun ġie stabbilit ġdid (ara l-Artikolu 17) filwaqt li titqies il-kapaċità ta’ amministrazzjonijiet nazzjonali iżgħar. Il-ħruġ ta’ sejħa għall-Istati Membri kollha, li huwa l-mod attwali li bih jinġiebu l-esperti, se jinżamm xorta waħda, bħala possibbiltà supplimentari f’każijiet li fihom il-Kummissjoni ma tkunx tista’ ġġib għadd suffiċjenti ta’ esperti mill-grupp ta’ esperti. Fir-rigward tal-għadd ta’ esperti fit-timijiet se jingħata lok għall-flessibilità. Il-Kummissjoni se tiddefinixxi d-daqs tat-timijiet skont il-ħtiġijiet u l-isfidi relatati ma’ kull attività ta’ evalwazzjoni u monitoraġġ. Fit-twaqqif tat-timijiet, il-bilanċ u r-rotazzjoni ġeografika se jiġu żgurati mill-Kummissjoni u se titqies il-kapaċità tal-amministrazzjonijiet nazzjonali u l-ħtieġa għal varjetà ta’ profili. L-Artikolu jipprevedi wkoll regoli biex jinħatru u jintgħażlu l-esperti fit-tmun u jiddeskrivi r-responsabbiltajiet prinċipali tagħhom.

Artikolu 19 – Twettiq taż-żjarat

L-akbar bidla meta mqabbel mal-Artikolu attwali korrispondenti (l-Artikolu 13) hija li bħala regola ġenerali, iż-żjarat għal għarrieda se jsiru mingħajr ebda notifika minn qabel lill-Istat Membru kkonċernat. Dan se jkun japplika b’mod partikolari meta l-iskop taż-żjara jkun li jiġu evalwati l-prattiki fil-fruntieri interni (kif jiġri bħalissa); jekk il-Kummissjoni ssir taf b’xi problemi li feġġew jew problemi sistematiċi li potenzjalment ikollhom impatt negattiv sinifikanti fuq it-tħaddim taż-żona Schengen; jew jekk Stat Membru allegatament ikun qiegħed jittraskura serjament l-obbligi tiegħu skont l-acquis ta’ Schengen, inklużi allegazzjonijiet serji ta’ ksur potenzjali tad-drittijiet fundamentali b’rabta mal-implimentazzjoni tal-acquis ta’ Schengen. Avviż minn qabel ta’ 24 siegħa se jkun l-eċċezzjoni għall-każijiet li l-iskop ewlieni taż-żjara għal għarrieda jkun verifika bħas-soltu tal-implimentazzjoni tal-acquis ta’ Schengen. L-Artikolu jagħmilha ċara wkoll li l-programm dettaljat taż-żjarat jaf jinkludi żjarat lill-awtoritajiet u l-korpi nazzjonali, lill-organizzazzjonijiet nongovernattivi u internazzjonali, u laqgħat magħhom, kif ukoll żjarat lil entitajiet, aġenziji u korpi oħra involuti fl-implimentazzjoni tal-acquis ta’ Schengen, li jieħdu sehem fih jew ikkonċernati minnu waqt il-kooperazzjoni tagħhom mal-Istat Membru kkonċernat, kif ukoll laqgħat magħhom.

Artikolu 20 – Metodi mill-bogħod

Dan l-Artikolu jiddikjara li l-Kummissjoni f’kooperazzjoni mal-Istati Membri tista’ tistabbilixxi linji gwida biex twettaq attivitajiet ta’ evalwazzjoni u monitoraġġ permezz ta’ kwestjonarju jew metodi oħra mill-bogħod (pereż. vidjokonferenzi). Minkejja li jeżistu linji gwida għat-twettiq taż-żjarat, ma jeżistux linji gwida ta’ din ix-xorta biex isiru evalwazzjonijiet permezz ta’ kwestjonarju jew metodi mill-bogħod. Diġà teżisti dispożizzjoni simili (u tinżamm fl-Artikolu 19) fir-rigward tat-twettiq ta’ żjarat għal għarrieda.

Artikolu 21 - Rapporti ta’ evalwazzjoni

Jiddaħħlu bidliet importanti biex iħaffu u jżidu l-effiċjenza tal-proċedura, b’mod partikolari billi jingħataw skadenzi iqsar u ġodda u billi jiddaħħal ir-rekwiżit li r-rapporti jiġu adottati mhux aktar tard minn erba’ xhur mill-evalwazzjoni.

Ir-rapporti ta’ evalwazzjoni se jkunu aktar iffukati, u se jkun fihom sejbiet sostanzjali; prinċipalment, l-aħjar prattiki jew inkella dawk mhux konformi. Tinżamm madankollu l-kategorija ta’ “konformi iżda meħtieġ titjib”, mhux l-inqas minħabba li wriet li kienet għodda ta’ siwi biex tgħolli l-livell ta’ implimentazzjoni tal-acquis ta’ Schengen għal standards għoljin filwaqt li tiżgura wkoll armonizzazzjoni ulterjuri. Ir-rapporti, bħala regola ġenerali, se jkunu jinkludu wkoll rakkomandazzjonijiet u se jkomplu jiġu adottati bħala att ta’ implimentazzjoni skont il-proċedura ta’ eżami. F’dan ir-rigward tingħata spjegazzjoni ulterjuri taħt it-Taqsima 2 (“Proporzjonalità”) u fl-Artikoli 23, 24 u 25 huma stabbiliti eċċezzjonijiet mir-regola ġenerali (ara aktar ’l isfel).

Artikolu 22 – Segwitu u monitoraġġ

Jiddaħħlu diversi bidliet sostanzjali, l-ewwel u qabel kollox biex jiġi żgurat li n-nuqqasijiet jiġu rimedjati f’qasir żmien u wkoll biex jitnaqqas il-piż amministrattiv li hemm bħalissa minħabba l-frekwenza tal-obbligu ta’ rapportar. Ir-rapporti kollha ta’ evalwazzjoni se jkunu segwiti minn pjan ta’ azzjoni. Is-servizzi tal-Kummissjoni se jipprovdu osservazzjonijiet dwar il-pjanijiet ta’ azzjoni permezz ta’, pereżempju, ittri amministrattivi kuntrarjament għall-Komunikazzjonijiet formali tal-Kummissjoni kif jiġri skont ir-Regolament attwali. Jekk is-servizzi tal-Kummissjoni ma jqisux il-pjan ta’ azzjoni bħala adegwat, l-Istat Membru għandu jippreżenta pjan ta’ azzjoni rivedut fi żmien xahar minn mindu jirċievi l-osservazzjonijiet. Bħala regola ġenerali, il-frekwenza tar-rapportar ta’ segwitu se titnaqqas minn tliet xhur għal sitt xhur. Madankollu, element ġdid huwa li r-rapporti ta’ segwitu ma għandhomx jiġu ppreżentati biss lill-Kummissjoni iżda lill-Kunsill ukoll. Bħala parti mill-attivitajiet ta’ monitoraġġ tagħha, il-Kummissjoni tista’ torganizza żjarat mill-ġdid u żjarat ta’ verifika. F’termini ta’ rekwiżiti organizzazzjonali u ta’ rapportar, dawn iż-żjarat se jkunu anqas esiġenti miż-żjarat ta’ evalwazzjoni. Ir-rwol tal-Parlament Ewropew u tal-Kunsill se jiġi rinforzat fil-fażi ta’ monitoraġġ: il-Kummissjoni se tinfurmahom minn tal-anqas darbtejn fis-sena dwar l-istat tal-implimentazzjoni tal-pjanijiet ta’ azzjoni, l-eżitu taż-żjarat mill-ġdid u ż-żjarat ta’ verifika kif ukoll jekk tosservax nuqqas konsiderevoli ta’ progress fl-implimentazzjoni ta’ pjan ta’ azzjoni.

Artikolu 23 – Dispożizzjonijiet speċifiċi fl-eventwalità ta’ nuqqas serju identifikat permezz tar-rapport ta’ evalwazzjoni

Dan l-Artikolu jipprevedi dispożizzjonijiet speċifiċi fil-każijiet li fihom l-evalwazzjoni tidentifika nuqqas serju. Huma previsti involviment aktar mill-qrib tal-Kunsill, proċeduri aktar rapidi u skadenzi aktar stretti. Ir-rapport ta’ evalwazzjoni huwa adottat mill-Kummissjoni filwaqt li r-rakkomandazzjonijiet se jiġu adottati mill-Kunsill separatament mir-rapport ta’ evalwazzjoni. Se jiġu imposti skadenzi stretti kemm fuq il-Kummissjoni (biex tadotta r-rapport) kif ukoll fuq il-Kunsill (biex jadotta r-rakkomandazzjonijiet) Fil-fażi ta’ monitoraġġ se jiġu applikati regoli proċedurali stretti: l-Istat Membru għandu jibda jimplimenta l-azzjonijiet ta’ rimedju immedjatament wara li jiġi infurmat bin-nuqqas serju u għandu jinforma lill-Kummissjoni u lill-Istati Membri mingħajr dewmien. L-Istat Membru se jkun meħtieġ jipprovdi l-pjan ta’ azzjoni tiegħu fi żmien xahar u l-Kummissjoni għandha torganizza żjara mill-ġdid li għandha ssir mhux aktar tard minn sena mid-data tal-attività ta’ evalwazzjoni. Wara ż-żjara mill-ġdid, il-Kummissjoni għandha tippreżenta rapport ta’ żjara mill-ġdid lill-Kunsill li għandu jesprimi l-pożizzjoni tiegħu dwar ir-rapport. Il-Kummissjoni tinforma lill-Parlament Ewropew u lill-Kunsill bl-intenzjoni tagħha li tagħlaq il-pjan ta’ azzjoni u l-Kunsill jiġi mistieden jesprimi l-pożizzjoni tiegħu dwar l-għeluq propost. Għal nuqqasijiet serji fil-fruntieri esterni, jistgħu japplikaw l-Artikoli 21 u 29 tal-Kodiċi tal-Fruntieri ta’ Schengen.

Artikolu 24 – Dispożizzjonijiet speċifiċi għall-evalwazzjonijiet tal-ewwel darba

Regoli speċifiċi huma meħtieġa wkoll għall-evalwazzjonijiet tal-ewwel darba. Bl-istess mod bħal dak ta’ każijiet li fihom l-evalwazzjoni tidentifika nuqqas serju, huma previsti involviment aktar mill-qrib tal-Kunsill, proċeduri rapidi u skadenzi stretti (iżda mhux stretti daqs dawk fl-Artikolu 23), kif ukoll regoli aktar stretti fil-fażi ta’ monitoraġġ.

Artikolu 25 – Dispożizzjoni speċifika għall-evalwazzjonijiet tematiċi

Fl-evalwazzjonijiet tematiċi huwa previst involviment aktar mill-qrib tal-Kunsill, bl-istess mod bħalma hemm fl-evalwazzjonijiet tal-ewwel darba. Għall-fażi ta’ monitoraġġ, irriżulta li d-dispożizzjonijiet speċifiċi ma kinux meħtieġa.

Artikolu 26 – Informazzjoni sensittiva

Ir-rapporti ta’ evalwazzjoni u r-rapporti dwar iż-żjarat mill-ġdid, fil-prinċipju, mhux se jiġi kklassifikati aktar bħala dokumenti “EU Restricted”. L-istatus tagħhom għandu jiġi ddeterminat f’konformità mar-regoli ta’ sigurtà applikabbli. Il-klassifikazzjoni tibqa’ possibbli jekk l-Istat Membru evalwat jagħmel talba ġustifikata kif dovut.

Artikolu 27 – Kundizzjonijiet għas-sehem tal-Irlanda

L-Artikolu jsegwi l-Artikolu attwali korrispondenti (l-Artikolu 18) mingħajr ma jsemmi lir-Renju Unit.

Artikolu 28 – Rapportar lill-Parlament Ewropew u lill-Kunsill

L-Artikolu jsegwi l-Artikolu attwali korrispondenti (l-Artikolu 20). Ir-rapport komprensiv ta’ kull sena jikkomplementa l-obbligi ta’ rapportar rinforzati skont l-Artikolu 22. Il-Kunsill għandu jiddiskuti r-rapport u jadotta l-konklużjonijiet.

Artikolu 29 – Proċedura ta’ kumitat

L-Artikolu jsegwi, fil-biċċa l-kbira tiegħu, l-Artikolu attwali korrispondenti (l-Artikolu 21).

Artikolu 30 – Rieżami

L-Artikolu jsegwi l-Artikolu attwali korrispondenti (l-Artikolu 22).

Artikolu 31 – Tħassir

L-Artikolu jħassar ir-Regolament (UE) Nru 1053/2013 b’effett mid-dħul fl-applikazzjoni tar-Regolament il-ġdid.

Artikolu 32 – Dispożizzjonijiet tranżizzjonali

L-Artikolu jipprevedi dispożizzjoni tranżizzjonali għall-adozzjoni ta’ programm pluriennali ġdid, li jiġi stabbilit sal-1 ta’ Novembru 2022 u jibda fl-1 ta’ Jannar 2023. Dawn id-dati jiġu adattati skont l-andament tan-negozjati dwar il-proposta.

Ladarba l-programm pluriennali li għaddej bħalissa se jintemm f’nofsu (f’Jannar 2023), id-dispożizzjoni tispeċifika li l-programm pluriennali l-ġdid għandu jqis l-evalwazzjonijiet li diġà twettqu taħt it-tieni programm pluriennali adottat fl-ambitu tar-Regolament attwali. Fil-prattika dan ifisser li l-programm pluriennali l-ġdid ta’ seba’ snin jibda bl-evalwazzjoni tal-Istati Membri li ma ġewx evalwati taħt iċ-ċiklu attwali filwaqt li dawk li diġà ġew evalwati bejn l-2020 u d-dħul fis-seħħ tar-regoli l-ġodda jiżdiedu fi tmiem iċ-ċiklu l-ġdid ta’ evalwazzjoni.

L-Artikolu jiċċara wkoll li l-kwestjonarju standard adottat fl-ambitu tar-Regolament attwali se jintuża sakemm jiġi stabbilit il-kwestjonarju standard previst skont l-Artikolu 14 ta’ dan ir-Regolament.

Artikolu 33 – Dħul fis-seħħ u applikazzjoni

2021/0140 (CNS)

Proposta għal

REGOLAMENT TAL-KUNSILL

dwar it-twaqqif u l-operazzjoni ta’ mekkaniżmu ta’ evalwazzjoni u monitoraġġ biex jivverifika l-applikazzjoni tal-acquis ta’ Schengen u li jħassar ir-Regolament (UE) Nru 1053/2013

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 70 tiegħu,

Wara li kkunsidra l-proposta tal-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidra l-opinjoni tal-Parlament Ewropew 34 ,

Wara li kkunsidra l-opinjoni tal-Kontrollur Ewropew għall-Protezzjoni tad-Data,

Filwaqt li jaġixxi skont proċedura leġiżlattiva speċjali,

Billi:

(1)Iż-żona Schengen mingħajr kontrolli fil-fruntieri interni tibbaża fuq l-applikazzjoni effettiva u effiċjenti tal-acquis ta’ Schengen mill-Istati Membri. Dak l-acquis jinkludi miżuri fil-qasam tal-fruntieri esterni, miżuri ta’ kumpens għan-nuqqas ta’ kontrolli fil-fruntieri interni u qafas ta’ monitoraġġ b’saħħtu, li flimkien jiffaċilitaw il-moviment liberu u jiżguraw livell għoli ta’ sigurtà, ġustizzja u protezzjoni tad-drittijiet fundamentali, inkluż il-protezzjoni tad-data personali.

(2)Il-monitoraġġ u l-evalwazzjoni bejn il-pari tal-applikazzjoni ta’ dak l-acquis ilu element ewlieni taż-żona Schengen sa mill-1998 bħala għodda biex jinżamm livell għoli ta’ obbligu ta’ rendikont u appartenenza proprja tar-riżultati kif ukoll biex tissaħħaħ il-fiduċja reċiproka bejn l-Istati Membri.

(3)Permezz tar-Regolament tal-Kunsill (UE) Nru 1053/2013 35 , li sar operattiv fl-2015, ġie speċifikat mekkaniżmu ta’ evalwazzjoni u monitoraġġ ta’ Schengen.

(4)Sabiex iżid l-effettività u l-effiċjenza tiegħu, il-mekkaniżmu ta’ evalwazzjoni u monitoraġġ ta’ Schengen jenħtieġ li jittejjeb. Jenħtieġ li l-mekkaniżmu ta’ evalwazzjoni u monitoraġġ jimmira li jżomm livell għoli ta’ fiduċja reċiproka fost l-Istati Membri billi jiggarantixxi li l-Istati Membri japplikaw l-acquis ta’ Schengen b’mod effettiv billi jsegwu l-istandards komuni maqbula u n-normi u l-prinċipji fundamentali, u b’hekk jikkontribwixxi għal żona Schengen li taħdem sew.

(5)Jenħtieġ li l-mekkaniżmu ta’ evalwazzjoni u monitoraġġ jikseb dawn l-għanijiet permezz ta’ evalwazzjonijiet oġġettivi u imparzjali li jkunu jistgħu jidentifikaw f’qasir żmien in-nuqqasijiet fl-applikazzjoni tal-acquis ta’ Schengen li jistgħu jfixklu t-tħaddim korrett taż-żona Schengen, jiżguraw li dawn in-nuqqasijiet jiġu indirizzati minnufih, u jipprovdu l-bażi għad-djalogu dwar it-tħaddim taż-żona Schengen kollha kemm hi. Dan jirrikjedi kooperazzjoni mill-qrib bejn l-Istati Membri u l-Kummissjoni, distribuzzjoni bbilanċjata tar-responsabbiltajiet kondiviżi u li tinżamm in-natura tar-rieżami bejn il-pari tas-sistema. Jirrikjedi wkoll involviment aktar mill-qrib tal-Parlament Ewropew. Minħabba l-portata tal-bidliet, ir-Regolament (UE) Nru 1053/2013 jenħtieġ li jitħassar u jiġi sostitwit b’Regolament ġdid.

(6)Il-mekkaniżmu ta’ evalwazzjoni u monitoraġġ jista’ jkopri l-oqsma kollha tal-acquis ta’ Schengen - preżent u futur - ħlief dawk fejn mekkaniżmu ta’ evalwazzjoni speċifiku diġà jeżisti taħt il-liġi tal-Unjoni. Il-mekkaniżmu ta’ evalwazzjoni u monitoraġġ jenħtieġ li jinkorpora l-leġiżlazzjoni rilevanti kollha u l-attivitajiet operazzjonali li jikkontribwixxu għat-tħaddim taż-żona Schengen.

(7)It-tħaddim korrett tal-awtoritajiet li japplikaw l-acquis ta’ Schengen jenħtieġ li jitqies fl-evalwazzjonijiet kollha f’konformità mal-konklużjonijiet tal-Kunsill Ewropew tal-1 u t-2 ta’ Marzu 2012. L-evalwazzjoni jenħtieġ ukoll tkopri l-prattiki tal-entitajiet privati, bħal-linji tal-ajru jew il-fornituri esterni tas-servizzi, sa fejn ikunu involuti fl-implimentazzjoni tal-acquis ta’ Schengen jew affettwati minnu meta jikkooperaw mal-Istati Membri. Bl-istess mod, minħabba r-rwol akbar tal-korpi, l-uffiċċji u l-aġenziji tal-Unjoni fl-implimentazzjoni tal-acquis ta’ Schengen, jenħtieġ li l-mekkaniżmu ta’ evalwazzjoni u monitoraġġ jappoġġa l-ivverifikar tal-attivitajiet ta’ dawn il-korpi, l-uffiċċji u l-aġenziji tal-Unjoni sakemm iwettqu funzjonijiet għan-nom tal-Istati Membri biex jassistu fl-applikazzjoni operazzjonali tad-dispożizzjonijiet tal-acquis ta’ Schengen. L-ivverifikar ta’ dawn l-attivitajiet f’dawn ir-rigward jenħtieġ li jkun inkorporat fl-evalwazzjoni tal-Istati Membri u jitwettaq mingħajr preġudizzju għar-responsabbiltajiet attribwiti lill-Kummissjoni u lill-korpi ta’ governanza rilevanti tal-aġenziji, l-uffiċċji u l-korpi kkonċernati mir-regolamenti ta’ twaqqif tagħhom u l-proċeduri ta’ evalwazzjoni u monitoraġġ tagħhom stess li jinsabu fihom, kif ukoll b’rispett sħiħ tagħhom. Fl-eventwalità li l-evalwazzjonijiet jidentifikaw nuqqasijiet b’rabta mal-funzjonijiet imwettqa jew appoġġati mill-korpi, l-uffiċċji u l-aġenziji tal-Unjoni, jenħtieġ li l-Kummissjoni tinforma lill-korpi ta’ governanza rilevanti tagħhom.

(8)Jenħtieġ li l-attivitajiet ta’ evalwazzjoni u monitoraġġ ikunu mmirati, iqisu r-riżultati ta’ evalwazzjonijiet preċedenti u r-riżultati tal-mekkaniżmi nazzjonali ta’ kontroll tal-kwalità. Jenħtieġ li jkunu appoġġati minn kooperazzjoni rinforzata mal-kooperazzjoni mal-korpi, l-uffiċċji u l-aġenziji tal-Unjoni, mill-involviment sistematiku tagħhom fl-evalwazzjonijiet ta’ Schengen u minn analiżijiet tar-riskju u kondiviżjoni tal-informazzjoni mtejba. Din il-kooperazzjoni u l-involviment jikkonċernaw b’mod partikolari l-Aġenzija Ewropea għall-Gwardja tal-Fruntiera u tal-Kosta (“Frontex”), l-Aġenzija tal-Unjoni Ewropea għat-Tmexxija Operattiva ta’ Sistemi tal-IT fuq Skala Kbira (eu-LISA), l-Aġenzija tal-Unjoni għall-Kooperazzjoni fl-Infurzar tal-Liġi (Europol), l-Aġenzija Ewropea għad-Drittijiet Fundamentali u l-Kontrollur Ewropew għall-Protezzjoni tad-Data. Jenħtieġ ukoll li l-kooperazzjoni ssir aktar reċiproka u huwa mistenni li l-aġenziji ma jkunux biss kontributuri, iżda għandhom jibbenefikaw ukoll mill-involviment tagħhom fil-mekkaniżmu ta’ evalwazzjoni u monitoraġġ.

(9)Il-valutazzjoni tal-vulnerabbiltà mwettqa mill-Frontex hija mekkaniżmu komplementari għall-mekkaniżmu ta’ evalwazzjoni u monitoraġġ stabbilit minn dan ir-Regolament biex jiggarantixxi l-kontroll tal-kwalità fil-livell tal-Unjoni u jiżgura li kemm il-livell tal-Unjoni kif ukoll dak nazzjonali, ikunu lesti jirrispondu għal kwalunkwe sfida fil-fruntieri esterni. Iż-żewġ mekkaniżmi jikkostitwixxu komponent tal-Ġestjoni Integrata Ewropea tal-Fruntieri. Jenħtieġ li s-sinerġiji bejn il-valutazzjoni tal-vulnerabbiltà u l-mekkaniżmu ta’ evalwazzjoni u monitoraġġ jiġu mmassimizzati bl-għan li tiġi stabbilita stampa mtejba tas-sitwazzjoni dwar it-tħaddim taż-żona Schengen, u jiġu evitati, sa fejn ikun possibbli, l-isforzi doppji u r-rakkomandazzjonijiet kunfliġġenti. Għal dak il-għan, jenħtieġ li jkun hemm skambju ta’ informazzjoni regolari bejn il-Frontex u l-Kummissjoni dwar ir-riżultati taż-żewġ mekkaniżmi. Iż-żieda fil-fokus strateġiku u t-tfassil aktar immirat tal-evalwazzjoni jirrikjedu wkoll iż-żieda ulterjuri tas-sinerġiji mal-mekkaniżmi u l-pjattaformi rilevanti operati mill-aġenziji tal-Unjoni u l-amministrazzjonijiet nazzjonali, bħall-Pjattaforma Multidixxiplinari Ewropea Kontra t-Theddid Kriminali (“EMPACT”) jew is-sorveljanza mwettqa mill-Kummissjoni bl-appoġġ ta’ eu-LISA fir-rigward tat-tħejjija tal-Istati Membri għall-implimentazzjoni tas-sistemi tal-IT rilevanti kif ukoll is-sejbiet tal-mekkaniżmi nazzjonali ta’ kontroll tal-kwalità.

(10)Matul l-evalwazzjoni, jenħtieġ li tingħata attenzjoni partikolari għall-ivverifikar tar-rispett tad-drittijiet fundamentali fl-applikazzjoni tal-acquis ta’ Schengen minbarra l-evalwazzjoni tal-implimentazzjoni u l-applikazzjoni korretti tar-rekwiżiti tal-protezzjoni tad-data tal-acquis ta’ Schengen imwettqa permezz ta’ evalwazzjonijiet separati. Jenħtieġ li jiġu implimentati miżuri addizzjonali biex tiżdied il-kapaċità tal-mekkaniżmu ta’ monitoraġġ u evalwazzjoni li jidentifika l-ksur tad-drittijiet fundamentali fl-oqsma ta’ politika rilevanti. Jenħtieġ li l-evalwaturi ta’ Schengen jitħarrġu kif suppost f’dan ir-rigward, l-informazzjoni rilevanti mill-Aġenzija Ewropea għad-Drittijiet Fundamentali jenħtieġ li tiġi użata aħjar u l-esperti tagħha jkunu involuti b’mod aħjar fit-tfassil u l-implimentazzjoni tal-evalwazzjonijiet. Apparti minn hekk, jenħtieġ li evidenza li toħroġ fil-pubbliku jew tingħata permezz ta’ mekkaniżmi ta’ monitoraġġ indipendenti jew partijiet terzi rilevanti fuq inizjattiva tagħhom stess bħal ombudspersons, awtoritajiet li jwettqu monitoraġġ tar-rispett tad-drittijiet fundamentali, organizzazzjonijiet nongovernattivi u internazzjonali, titqies fil-programmazzjoni, fit-tfassil u fl-implimentazzjoni tal-evalwazzjonijiet.

(11)Jenħtieġ li l-mekkaniżmu ta’ evalwazzjoni u monitoraġġ jistabbilixxi regoli trasparenti, effiċjenti u ċari dwar l-għamliet u l-metodi li għandu jiġu applikati għall-attivitajiet ta’ evalwazzjoni u monitoraġġ, l-użu ta’ esperti bi kwalifiki għolja u s-segwitu għas-sejbiet tal-evalwazzjonijiet.

(12)Jenħtieġ li l-għamliet tal-evalwazzjonijiet u l-metodi jsiru aktar flessibbli biex tiżdied l-effiċjenza tal-mekkaniżmu ta’ evalwazzjoni u monitoraġġ u l-kapaċità tiegħu li jadatta għal ċirkostanzi ġodda u żviluppi leġiżlattivi u biex jiġi ssimplifikat l-użu tar-riżorsi tal-Istati Membri, il-Kummissjoni u l-korpi, l-uffiċċji u l-aġenziji tal-Unjoni. Jenħtieġ li l-evalwazzjonijiet perjodiċi permezz ta’ żjarat ikunu l-mezz primarju ta’ evalwazzjoni. Jenħtieġ li l-proporzjon ta’ żjarat għal għarrieda u evalwazzjonijiet tematiċi jiżdied gradwalment biex jiġi żgurat użu bbilanċjat tal-għodod disponibbli. Jenħtieġ li l-għamliet tal-evalwazzjonijiet jiġu definiti b’mod ċar. Skont il-qasam ta’ politika u n-natura tal-attività ta’ evalwazzjoni u monitoraġġ, il-mekkaniżmu ta’ evalwazzjoni u monitoraġġ jenħtieġ li jippermetti l-evalwazzjoni ta’ diversi Stati Membri simultanjament u jwettaq evalwazzjonijiet mill-bogħod fl-intier tagħhom jew parzjalment kif ukoll jgħaqqad flimkien l-evalwazzjoni tal-oqsma ta’ politika. Jenħtieġ li l-mekkaniżmu ta’ evalwazzjoni u monitoraġġ jara li jitfasslu rapporti ta’ evalwazzjoni tal-Istati Membri li jkunu komprensivi li jivvalutaw il-prestazzjoni kumplessiva tal-Istat Membru fl-applikazzjoni tal-acquis ta’ Schengen.

(13)Jenħtieġ li l-evalwazzjonijiet tematiċi jintużaw aktar ta’ spiss biex jipprovdu analiżi komparattiva tal-prattiki fl-Istati Membri. Jenħtieġ li jsiru biex jivvalutaw l-implimentazzjoni ta’ bidliet leġiżlattivi kbar malli jibdew japplikaw u ta’ inizjattivi ġodda, kif ukoll biex jivvalutaw kwistjonijiet minn fost l-oqsma ta’ politika jew il-prattiki tal-Istati Membri li jkunu qegħdin jaffaċċjaw sfidi simili.

(14)Jenħtieġ li ż-żjarat għal għarrieda, billi huma fost l-aktar għodod effettivi għall-ivverifikar tal-prattiki tal-Istati Membri, isiru, skont xi jkun l-iskop tagħhom, mingħajr notifika minn qabel lill-Istat Membru kkonċernat jew b’notifika qasira minn qabel biss. Jenħtieġ li ż-żjarat għal għarrieda mingħajr notifika minn qabel jsiru għal skopijiet “investigattivi” sabiex tiġi vverifikata l-konformità mal-obbligi skont l-acquis ta’ Schengen, inkluż, bħala reazzjoni għal indikazzjonijiet fir-rigward ta’ problemi sistemiċi li qegħdin ifeġġu li jistgħu potenzjalment ikollhom impatt sinifikanti fuq it-tħaddim taż-żona Schengen jew għal ksur tad-drittijiet fundamentali, b’mod partikolari allegazzjonijiet ta’ ksur serju tad-drittijiet fundamentali fil-fruntieri esterni. F’każijiet bħal dawn, id-dispożizzjoni ta’ avviż minn qabel ixxejjen l-objettiv taż-żjara. Żjarat għal għarrieda b’avviż minn qabel ta’ 24 siegħa jenħtieġ li ssir jekk l-iskop ewlieni taż-żjara jkun li jsir kontroll aleatorju tal-implimentazzjoni tal-acquis ta’ Schengen mill-Istat Membru.

(15)Il-programmazzjoni tal-attivitajiet imwettqa taħt dan ir-Regolament permezz tal-programmi pluriennali u annwali diġà wriet il-valur miżjud tagħha biex tiġi żgurata l-prevedibbiltà u ċ-ċertezza. Għaldaqstant, il-Kummissjoni, f’kooperazzjoni mal-Istati Membri jenħtieġ li tadotta l-programmi ta’ evalwazzjoni pluriennali u annwali. Dawn il-programmi jenħtieġ ukoll li jipprovdu l-flessibbiltà meħtieġa biex maż-żmien ikunu jistgħu jadattaw għan-natura dinamika tal-acquis ta’ Schengen. Fl-eventwalità ta’ force majeure, jenħtieġ li jsiru aġġustamenti għall-programmi bi qbil mal-Istat Membru kkonċernat mingħajr il-ħtieġa ta’ emenda formali tal-programmi. Il-programm ta’ evalwazzjoni pluriennali, adottat għal seba’ snin, jenħtieġ li jidentifika l-oqsma prijoritarji speċifiċi li għandhom jiġu koperti mill-evalwazzjonijiet perjodiċi. Dan l-approċċ huwa mistenni li jagħti lok għal aktar flessibilità, prijoritizzazzjoni aħjar u użu aktar ibbilanċjat u strateġiku tal-għodod kollha disponibbli. L-estensjoni tal-programm ta’ evalwazzjoni pluriennali minn ħames għal seba’ snin hija mistennija li twassal ukoll għal aktar monitoraġġ tal-Istati Membri li jkun aktar mill-qrib u aktar immirat mingħajr ma jitnaqqas il-livell ta’ skrutinju.

(16)Jenħtieġ li l-attivitajiet ta’ evalwazzjoni u monitoraġġ isiru minn timijiet magħmula minn rappreżentanti tal-Kummissjoni u esperti maħtura mill-Istati Membri. Jenħtieġ li dawn ir-rappreżentanti u l-esperti jkollhom kwalifiki adegwati, inkluż għarfien teoretiku solidu u esperjenza prattika. Sabiex ikun żgurat li jieħdu sehem biżżejjed esperti bl-esperjenza b’mod aktar rapidu u inqas ikkumplikat, jenħtieġ li jiġi stabbilit grupp ta’ esperti akkarigu tal-Kummissjoni f’kooperazzjoni mill-qrib mal-Istati Membri. Il-grupp jenħtieġ li jkun is-sors primarju minn fejn jinġiebu l-esperti għall-attivitajiet ta’ evalwazzjoni u monitoraġġ.

(17)Jenħtieġ li tingħata aktar flessibilità fir-rigward tad-daqs tat-timijiet ta’ evalwazzjoni u monitoraġġ sabiex tiżdied l-effiċjenza u jonqos il-piż amministrattiv. Għaldaqstant, jenħtieġ li l-Kummissjoni tiddefinixxi u tadatta d-daqs tat-timijiet skont il-ħtiġijiet u l-isfidi relatati ma’ kull attività ta’ evalwazzjoni u monitoraġġ. Fit-twaqqif tat-timijiet, jenħtieġ li l-bilanċ u r-rotazzjoni ġeografika, sa fejn ikun possibbli, jiġu żgurati mill-Kummissjoni u jenħtieġ li titqies il-kapaċità tal-amministrazzjonijiet nazzjonali u l-ħtieġa għal varjetà ta’ profili. Il-prinċipju tar-responsabbiltà kondiviża, il-prevedibbiltà u l-impenn meħud meta jiġu nnominati l-esperti biex jiddaħħlu fil-grupp, jimplika li l-esperti mistiedna għal evalwazzjonijiet speċifiċi u l-awtoritajiet nazzjonali tagħhom huma mistennija li jwieġbu b’mod pożittiv għall-istediniet; ir-rifjut tal-istediniet jenħtieġ li jkun iġġustifikat kif dovut minħabba raġunijiet professjonali jew personali serji biss.

(18)L-ispejjeż operazzjonali marbuta mal-attivitajiet ta’ evalwazzjoni u monitoraġġ (vjaġġar, akkomodazzjoni u ikel) jenħtieġ li jagħmel tajjeb għalihom il-baġit tal-Unjoni. Kwalunkwe per diem addizzjonali tal-esperti nazzjonali li jieħdu sehem fil-missjonijiet ta’ evalwazzjoni u monitoraġġ u l-kostijiet tal-persunal ta’dawk li jissostitwixxu lil dawn l-esperti fin-nuqqas tagħhom jistgħu jiġu koperti mill-programmi nazzjonali tal-Istati Membri taħt il-Fondi tal-Unjoni rilevanti, f’konformità mal-objettivi u r-regoli applikabbli ta’ dawk il-Fondi.

(19)Ir-rapporti ta’ evalwazzjoni jenħtieġ li jkunu konċiżi u fil-qosor. Jenħtieġ li jiffukaw fuq in-nuqqasijiet b’impatt sinifikanti u jenfasizzaw l-oqsma fejn jista’ jsir titjib importanti. Is-sejbiet minuri mhumiex mistennija li jkunu parti mir-rapporti. Madankollu t-tim għandu jikkomunika dawn is-sejbiet lill-Istat Membru evalwat fi tmiem l-attività ta’ evalwazzjoni, inkluż lill-awtoritajiet responsabbli għall-mekkaniżmu nazzjonali rilevanti ta’ kontroll tal-kwalità. Jenħtieġ li t-tim ifittex b’mod attiv li jidentifika l-aħjar prattiki li huma mistennija li jiżdiedu fir-rapporti. B’mod partikolari, jenħtieġ li miżuri ġodda u innovattivi li jtejbu b’mod sinifikanti l-implimentazzjoni tar-regoli komuni u li jistgħu jiġu implimentati minn Stati Membri oħra jiġu enfasizzati bħala l-aħjar prattika għall-finijiet tar-rapport.

(20)Jenħtieġ li, bħala regola, ir-rapporti ta’ evalwazzjoni, jinkludu rakkomandazzjonijiet dwar kif għandhom jiġu rrimedjati n-nuqqasijiet identifikati (inkluż il-ksur tad-drittijiet fundamentali) u jiġu adottati f’att uniku mill-Kummissjoni bis-saħħa tal-atti ta’ implimentazzjoni permezz tal-proċedura ta’ eżami f’konformità mal-Artikolu 5 tar-Regolament (UE) Nru 182/2011 36 . Il-konsolidazzjoni tar-rapport u r-rakkomandazzjonijiet f’dokument uniku u soġġetta għal proċedura unika ta’ adozzjoni tirrinforza r-rabta intrinsika bejn is-sejbiet tal-evalwazzjoni u r-rakkomandazzjonijiet. Barra minn hekk, il-pubblikazzjoni mħaffa tar-rakkomandazzjonijiet hija mistennija li tippermetti lill-Istati Membri jindirizzaw in-nuqqasijiet b’mod aktar rapidu u b’effiċjenza akbar. Fl-istess waqt, l-użu tal-proċedura ta’ eżami jenħtieġ li jiżgura l-involviment tal-Istat Membru fil-proċess tat-teħid ta’ deċiżjonijiet li jwassal għall-adozzjoni tar-rakkomandazzjonijiet.

(21)Madankollu, minħabba r-rwol kruċjali tal-Kunsill biex jeżerċita pressjoni mill-pari u l-ħtieġa ta’ diskussjoni politika, jenħtieġ li l-Kunsill jadotta rakkomandazzjonijiet f’każijiet ta’ importanza politika u interess ġenerali għat-tħaddim taż-żona Schengen. Jenħtieġ li jitqies li hemm lok għal tali każijiet meta evalwazzjoni tikkonkludi li jeżisti nuqqas serju, f’każijiet ta’ evalwazzjonijiet tematiċi, jew f’każijiet li fihom evalwazzjoni ssir għall-finijiet li tivverifika jekk Stat Membru marbut mill-acquis ta’ Schengen u li għalih ma jkunux tneħħew il-kontrolli fil-fruntieri interni jissodisfax il-kundizzjonijiet biex japplika għalkollox l-acquis ta’ Schengen jew, fil-każ ta’ Stat Membru li ma jkunx marbut bl-acquis ta’ Schengen u li jkun għażel li japplika partijiet minnu, tivverifika jekk l-Istat Membru jissodisfax il-kundizzjonijiet biex japplika parzjalment l-acquis ta’ Schengen.

(22)Barra minn hekk, meta l-evalwazzjonijiet jidentifikaw nuqqas serju, jenħtieġ li japplikaw dispożizzjonijiet speċifiċi biex tiġi żgurata l-adozzjoni fil-pront ta’ miżuri ta’ rimedju. Minħabba r-riskju li tali nuqqas jirrappreżenta, malli l-Istat Membru evalwat jiġi infurmat dwar nuqqas serju, l-Istat Membru evalwat jenħtieġ li jibda jimplimenta minnufih l-azzjonijiet ta’ implimentazzjoni biex jirrimedja n-nuqqas, inkluż, meta meħtieġ, il-mobilizzazzjoni tal-mezzi operazzjonali u finanzjarji kollha disponibbli. Jenħtieġ li l-azzjoni ta’ rimedju tkun soġġetta għal skadenzi aktar stretti u monitoraġġ u skrutinju politiku aktar mill-qrib tul il-proċess. F’dan ir-rigward, jenħtieġ li l-Kummissjoni tinforma minnufih lill-Kunsill u lill-Parlament Ewropew meta evalwazzjoni tistabbilixxi l-eżistenza ta’ nuqqas serju u torganizza żjara mill-ġdid minħabba “nuqqas serju” mhux aktar tard minn sena mid-data tal-evalwazzjoni biex tivverifika jekk Stat Membru jkunx irrimedja n-nuqqasijiet ikkonċernati. Jenħtieġ li l-Kummissjoni tippreżenta rapport taż-żjara mill-ġdid lill-Kunsill wara ż-żjara mill-ġdid.

(23)L-identifikazzjoni ta’ nuqqas serju tirrikjedi valutazzjoni bir-reqqa każ b’każ abbażi ta’ kriterji ċari rigward in-natura, l-iskala u l-impatt potenzjali tal-problemi, li jaf ikunu differenti għal kull qasam ta’ politika. Elementi ewlenin differenti għall-implimentazzjoni effettiva tal-acquis ta’ Schengen u taħlita differenti ta’ fatturi jistgħu jwasslu biex sejba tiġi kklassifikata bħala nuqqas serju. Madankollu, jekk jitqies li nuqqas identifikat qiegħed ipoġġi f’riskju t-tħaddim kumplessiv taż-żona mingħajr fruntieri interni, jew jista’ potenzjalment jagħmel hekk fuq żmien qasir, jew ikollu impatt negattiv sinifikanti fuq id-drittijiet tal-individwi, tali nuqqas għandu jitqies bħala nuqqas serju. Meta, f’rapport ta’ evalwazzjoni, jiġi identifikat nuqqas serju fit-twettiq tal-kontroll fil-fruntieri esterni, jistgħu japplikaw l-Artikoli 21 u 29 tar-Regolament (UE) 2016/399 tal-Parlament Ewropew u tal-Kunsill 37 .

(24)Jenħtieġ li l-mekkaniżmu ta’ evalwazzjoni u monitoraġġ jinkludi komponent robust ta’ segwitu u monitoraġġ li huwa mistenni li jiġi żgurat mill-Kummissjoni, f’kooperazzjoni mill-qrib mal-Kunsill u l-Parlament Ewropew, mingħajr ma jinħoloq piż sproporzjonat għall-atturi involuti. Jenħtieġ li l-evalwazzjonijiet jiġu segwiti minn pjanijiet ta’ azzjoni. Jenħtieġ li meta jfasslu l-pjanijiet ta’ azzjoni, l-Istati Membri jqisu għalkollox il-possibbiltajiet ta’ finanzjament pprovduti mill-Unjoni u jagħmlu l-aqwa użu minn dawn ir-riżorsi. Biex tħaffef il-proċess, jenħtieġ li l-Kummissjoni tipprovdi osservazzjonijiet dwar l-adegwatezza tal-pjanijiet ta’ azzjoni pereżempju f’għamla ta’ ittra. Sabiex jiġi żgurat segwitu fil-pront, jekk is-servizzi tal-Kummissjoni ma jqisux il-pjan ta’ azzjoni bħala adegwat, l-Istat Membru kkonċernat jenħtieġ li jintalab jippreżenta pjan ta’ azzjoni rivedut fi żmien xahar minn mindu jaslulu l-osservazzjonijiet. Il-frekwenza tar-rapportar ta’ segwitu mill-Istat Membru lill-Kummissjoni u l-Kunsill dwar l-implimentazzjoni tal-pjanijiet ta’ azzjoni, jenħtieġ li, bħala regola, tkun ta’ sitt xhur.

(25)Bħala parti mill-attivitajiet ta’ monitoraġġ tagħha, jenħtieġ li jkun possibbli li l-Kummissjoni torganizza żjarat mill-ġdid u żjarat ta’ verifika. Jenħtieġ li jiġu organizzati żjarat mill-ġdid biex isir monitoraġġ tal-progress tal-implimentazzjoni ta’ pjan ta’ azzjoni wara evalwazzjoni li tkun identifikat nuqqas serju jew wara evalwazzjoni li ssir qabel l-adeżjoni sħiħa ta’ Stat Membru ma’ Schengen (“evalwazzjoni tal-ewwel darba”) u kkonkludiet li l-Istat Membru evalwat ma ssodisfax il-kundizzjonijiet meħtieġa biex japplika l-acquis ta’ Schengen fil-qasam ta’ politika rispettiv evalwat. Jenħtieġ li r-rapport taż-żjara mill-ġdid jillimita ruħu għall-preżentazzjoni tal-progress li jkun sar fl-implimentazzjoni tar-rakkomandazzjonijiet. Altrimenti, iż-żjarat ta’ verifika jistgħu jsiru biex iwettqu monitoraġġ tal-implimentazzjoni ta’ pjan ta’ azzjoni, b’segwitu għal evalwazzjoni li ma tkunx identifikat nuqqas serju, fejn jitqies li huwa meħtieġ. Jenħtieġ li ż-żjarat ta’ verifika jiġu organizzati dejjem qabel l-għeluq ta’ pjan ta’ azzjoni b’segwitu għal evalwazzjoni tal-ewwel darba. F’termini ta’ rekwiżiti organizzazzjonali u ta’ rapportar, jenħtieġ li ż-żjarat ta’ verifika jkunu anqas esiġenti miż-żjarat ta’ evalwazzjoni. B’mod partikolari, jenħtieġ li jkunu jinkludu timijiet iżgħar u jenħtieġ li ma jwasslux għal sejbiet ġodda jew jirrikjedu l-adozzjoni ta’ rapport separat. Jenħtieġ li l-Kunsill ikun involut b’mod aktar attiv fil-fażi ta’ monitoraġġ u jenħtieġ li jesprimi l-pożizzjoni tiegħu dwar l-għeluq propost tal-pjanijiet ta’ azzjoni.

(26)Huwa essenzjali u opportun li l-Parlament Ewropew u l-Kunsill ikollhom diskussjonijiet regolari fil-livell politiku sabiex jissensibilizzaw dwar l-importanza tal-implimentazzjoni tal-acquis ta’ Schengen, iżommu responsabbli lill-Istati Membri li b’mod persistenti jiksru r-regoli komuni, u jżidu l-pressjoni fuqhom biex jirrimedjaw in-nuqqasijiet identifikati. Jenħtieġ li l-Kummissjoni tipprovdi input adegwat biex tiffaċilita dawn id-diskussjonijiet inkluż permezz tal-adozzjoni ta’ rapport annwali komprensiv li jkopri l-evalwazzjonijiet imwettqa matul is-sena preċedenti u l-istat ta’ implimentazzjoni tar-rakkomandazzjonijiet, li jifforma parti mir-rapport dwar “l-Istat ta’ Schengen”. Il-Parlament Ewropew huwa mħeġġeġ jadotta riżoluzzjonijiet u l-Kunsill jenħtieġ li jadotta konklużjonijiet biex iżid il-pressjoni fuq l-Istati Membri li ma jagħmlux biżżejjed progress. Il-“Forum Schengen”, bħala xena unika fejn jiġi diskuss Schengen f’livell għoli mar-rappreżentanti tal-Parlament Ewropew, l-Istati Membri u l-Kummissjoni, jenħtieġ li jipprovdi pjattaforma għad-diskussjonijiet informali bl-għan li l-acquis ta’ Schengen jiġi implimentat aħjar.

(27)Il-mekkaniżmu ta’ evalwazzjoni u monitoraġġ stabbilit minn dan ir-Regolament jenħtieġ li jaqdi funzjoni komplementarja ta’ monitoraġġ tal-effettività tal-implimentazzjoni prattika tal-politiki tal-Unjoni permezz tar-rieżami bejn il-pari. Jenħtieġ li s-setgħa ġenerali tal-Kummissjoni biex tissorvelja l-applikazzjoni tal-liġi tal-Unjoni taħt il-kontroll tal-Qorti tal-Ġustizzja tal-Unjoni Ewropea permezz ta’ proċeduri ta’ ksur ma tiġix affettwata.

(28)L-istatus tal-klassifikazzjoni tar-rapporti ta’ evalwazzjoni u ta’ żjara mill-ġdid jenħtieġ li jiġi ddeterminat f’konformità mar-regoli tas-sigurtà applikabbli stabbilit fid-Deċiżjoni tal-Kummissjoni (UE, Euratom) 2015/444 38 . L-Istat Membru evalwat  jenħtieġ li jkun jista’ xorta waħda jżomm il-possibbiltà li jitlob il-klassifikazzjoni tar-rapport kollu jew partijiet minnu f’konformità mar-regoli tas-sigurtà applikabbli.

(29)Fid-dawl tar-rwol partikolari fdat lill-Parlament Ewropew u lill-parlamenti nazzjonali taħt l-aħħar sentenza tal-Artikolu 70 tat-Trattat dwar il-Funzjonament tal-Unjoni Ewropea (TFUE), kif issottolinjat fl-Artikolu 12, il-punt (c) tat-Trattat dwar l-Unjoni Ewropea (TUE) fir-rigward tal-parlamenti nazzjonali, jenħtieġ li l-Kunsill u l-Kummissjoni jinformaw għalkollox lill-Parlament Ewropew u lill-parlamenti nazzjonali dwar il-kontenut u r-riżultati tal-evalwazzjonijiet. Barra minn hekk, fl-eventwalità li l-Kummissjoni tippreżenta proposta biex temenda dan ir-Regolament, il-Kunsill, f’konformità mal-Artikolu 19(7), il-punt (h), tar-Regoli ta’ Proċedura tiegħu 39 , jikkonsulta lill-Parlament Ewropew sabiex jikkunsidra l-opinjoni tiegħu, kemm jista’ jkun possibbli, qabel ma jadotta test finali.

(30)Ir-Regolament (UE) 2016/679 tal-Parlament Ewropew u tal-Kunsill 40   japplika għall-ipproċessar ta’ data personali mill-Istati Membri meta jwettqu r-responsabbiltajiet tagħhom skont dan ir-Regolament. Ir-Regolament (UE) 2018/1725 tal-Parlament Ewropew u tal-Kunsill 41   japplika għall-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni meta jwettqu r-responsabbiltajiet tagħhom skont dan ir-Regolament.

(31)Sabiex jiġu żgurati kundizzjonijiet uniformi għall-implimentazzjoni ta’ dan ir-Regolament, jenħtieġ li jingħataw setgħat ta’ implimentazzjoni lill-Kummissjoni biex tadotta programm ta’ evalwazzjoni pluriennali u annwali, biex tistabbilixxi u taġġorna kwestjonarju standard u biex tadotta rapporti ta’ evalwazzjoni u ta’ żjarat mill-ġdid. Jenħtieġ li dawk is-setgħat jiġu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill 42 .

(32)Jenħtieġ li l-Kummissjoni tadotta atti ta’ implimentazzjoni applikabbli immedjatament meta, f’każijiet ġustifikati kif dovut relatati ma’ nuqqas serju, dan ikun rikjest minn raġunijiet imperattivi ta’ urġenza.

(33)F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, kif anness mat-TUE u mat-TFUE, id-Danimarka mhijiex qed tieħu sehem fl-adozzjoni ta’ dan ir-Regolament u mhijiex marbuta bih jew soġġetta għall-applikazzjoni tiegħu. Ladarba dan ir-Regolament jibni fuq l-acquis ta’ Schengen, id-Danimarka għandha, f’konformità mal-Artikolu 4 ta’ dak il-Protokoll, tiddeċiedi fi żmien sitt xhur wara li l-Kunsill jiddeċiedi dwar dan ir-Regolament jekk hijiex se timplimentah fil-liġi nazzjonali tagħha.

(34)L-Irlanda qed tieħu sehem f’dan ir-Regolament, f’konformità mal-Artikolu 5(1) tal-Protokoll Nru 19 dwar l-acquis ta’ Schengen integrat fil-qafas tal-Unjoni Ewropea, anness mat-TUE u mat-TFUE, u l-Artikolu 6(2) tad-Deċiżjoni tal-Kunsill 2002/192/KE 43 .

(35)Fir-rigward tal-Iżlanda u n-Norveġja, dan ir-Regolament jikkostitwixxi żvilupp tad-dispożizzjonijiet tal-acquis ta’ Schengen fis-sens tal-Ftehim konkluż mill-Kunsill tal-Unjoni Ewropea u r-Repubblika tal-Iżlanda u r-Renju tan-Norveġja dwar l-assoċjazzjoni ta’ dawn tal-aħħar mal-implimentazzjoni, l-applikazzjoni u l-iżvilupp tal-acquis ta’ Schengen, li jaqgħu fl-ambitu msemmi fil-punt A tal-Artikolu 1 tad-Deċiżjoni tal-Kunsill 1999/437/KE 44 .

(36)Fir-rigward tal-Iżvizzera, dan ir-Regolament jikkostitwixxi żvilupp tad-dispożizzjonijiet tal-acquis ta’ Schengen fis-sens tal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen, li jaqgħu fl-ambitu msemmi fil-punt A tal-Artikolu 1 tad-Deċiżjoni 1999/437/KE moqri flimkien mal-Artikolu 3 tad-Deċiżjoni tal-Kunsill 2008/146/KE 45 .

(37)Fir-rigward tal-Liechtenstein, dan ir-Regolament jikkostitwixxi żvilupp tad-dispożizzjonijiet tal-acquis ta’ Schengen fis-sens tal-Protokoll bejn l-Unjoni Ewropea, il-Komunità Ewropea u l-Konfederazzjoni Żvizzera u l-Prinċipat tal-Liechtenstein dwar l-adeżjoni tal-Prinċipat tal-Liechtenstein mal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen, li jaqgħu fl-ambitu msemmi fil-punt A tal-Artikolu 1 tad-Deċiżjoni1999/437/KE moqri flimkien mal-Artikolu 3 tad-Deċiżjoni tal-Kunsill 2011/350/UE 46 .

(38)Fir-rigward ta’ Ċipru, il-Bulgarija, ir-Rumanija u l-Kroazja, dan ir-Regolament jikkostitwixxi att li jibni fuq l-acquis ta’ Schengen, jew li huwa b’xi mod ieħor relatat miegħu fis-sens, rispettivament, tal-Artikolu 3(1) tal-Att ta’ Adeżjoni tal-2003, l-Artikolu 4(1) tal-Att ta’ Adeżjoni tal-2005 u l-Artikolu 4(1) tal-Att ta’ Adeżjoni tal-2011.

(39)Ġaladarba l-verifika f’konformità mal-proċeduri applikabbli tal-evalwazzjoni ta’ Schengen fir-rigward tal-Bulgarija, Ċipru, ir-Rumanija u l-Kroazja, diġà ġiet ikkompletata skont l-Att ta’ Adeżjoni rispettiv tagħhom, il-verifika skont l-Artikolu 1(2)(b) ta’ dan ir-Regolament jenħtieġ li ma ssirx fir-rigward ta’ dawk l-Istati Membri,

ADOTTA DAN IR-REGOLAMENT:

KAPITOLU I

DISPOŻIZZJONIJIET ĠENERALI

Artikolu 1

Suġġett u kamp ta’ applikazzjoni

1.Dan ir-Regolament jistabbilixxi mekkaniżmu ta’ evalwazzjoni u monitoraġġ għall-fini li jiżgura li l-Istati Membri japplikaw l-acquis ta’ Schengen b’mod effettiv, u b’hekk jikkontribwixxi għal żona li taħdem sew mingħajr kontrolli fil-fruntieri interni.

2.Il-mekkaniżmu stabbilit għandu jipprevedi attivitajiet ta’ evalwazzjoni u monitoraġġ oġġettivi u imparzjali bl-għan li:

(a)jivverifikaw l-applikazzjoni tal-acquis ta’ Schengen fl-Istati Membri li għalihom japplika kompletament kif ukoll fl-Istati Membri li għalihom, f’konformità mal-Protokolli rilevanti annessi mat-TUE u mat-TFUE, l-acquis ta’ Schengen japplika parzjalment;

(b)jivverifikaw li l-kundizzjonijiet meħtieġa għall-applikazzjoni tal-partijiet rilevanti kollha tal-acquis ta’ Schengen ikunu ġew issodisfati f’dawk l-Istati Membri li fir-rigward tagħhom ma tkunx ittieħdet deċiżjoni tal-Kunsill li tiddikjara li d-dispożizzjonijiet tal-acquis ta’ Schengen għandhom japplikaw għalkollox jew parzjalment;

3.L-evalwazzjonijiet jistgħu jkopru l-aspetti kollha tal-acquis ta’ Schengen u jqisu t-tħaddim tal-awtoritajiet li japplikaw l-acquis ta’ Schengen.

Artikolu 2

Definizzjonijiet

Għall-fini ta’ dan ir-Regolament:

(a)“acquis ta’ Schengen” tfisser id-dispożizzjonijiet integrati fil-qafas tal-Unjoni f’konformità mal-Protokoll Nru 19 anness mat-TUE u mat-TFUE, flimkien mal-atti li jibnu fuqhom jew li huma b’xi mod ieħor relatati magħhom;

(b)“evalwazzjoni tal-ewwel darba” tfisser evalwazzjoni biex tivverifika jekk Stat Membru marbut mill-acquis ta’ Schengen u li għalih ma jkunux tneħħew il-kontrolli fil-fruntieri interni jissodisfax il-kundizzjonijiet biex japplika għalkollox l-acquis ta’ Schengen jew, fil-każ ta’ Stat Membru li ma jkunx marbut bl-acquis ta’ Schengen u li jkun għażel li japplika partijiet minnu, tivverifika jekk l-Istat Membru jissodisfax il-kundizzjonijiet biex japplika parzjalment l-acquis ta’ Schengen;

(c)“evalwazzjoni perjodika” tfisser evalwazzjoni inkluża fil-programm ta’ evalwazzjoni pluriennali u fil-programmi ta’ evalwazzjoni annwali biex tivverifika l-applikazzjoni tal-acquis ta’ Schengen minn Stat Membru bl-għan li tivvaluta l-prestazzjoni kumplessiva tal-Istat Membru fl-applikazzjoni tal-acquis ta’ Schengen;

(d)“evalwazzjoni għal għarrieda” tfisser evalwazzjoni, li mhijiex inkluża fil-programmi ta’ evalwazzjoni pluriennali u annwali, biex tivverifika l-applikazzjoni tal-acquis ta’ Schengen minn Stat Membru wieħed jew aktar f’qasam ta’ politika wieħed jew aktar;

(e)“evalwazzjoni tematika” tfisser evalwazzjoni bl-għan li tipprovdi analiżi komparattiva tal-leġiżlazzjoni jew il-prattiki tal-Istati Membri, jew l-applikazzjoni ta’ partijiet speċifiċi tal-acquis ta’ Schengen fost diversi Stati Membri;

(f)“żjara” tfisser żjara fi Stat Membru jew fil-konsolati tiegħu għall-finijiet ta’ twettiq ta’ evalwazzjoni jew attività ta’ monitoraġġ;

(g)“żjara mill-ġdid” tfisser żjara mwettqa biex tagħmel monitoraġġ tal-progress tal-implimentazzjoni ta’ pjan ta’ azzjoni b’segwitu għal evalwazzjoni li tkun identifikat nuqqas serju jew b’segwitu għal evalwazzjoni tal-ewwel darba li tkun ikkonkludiet li l-Istat Membru evalwat ma ssodisfax il-kundizzjonijiet meħtieġa biex japplika l-acquis ta’ Schengen;

(h)“żjara ta’ verifika” tfisser żjara, li mhijiex żjara mill-ġdid, imwettqa biex tagħmel monitoraġġ tal-progress tal-implimentazzjoni ta’ pjan ta’ azzjoni;

(i)“nuqqas serju” tfisser nuqqas wieħed jew aktar li jirrigwarda l-applikazzjoni effettiva ta’ elementi ewlenin tal-acquis ta’ Schengen u li individwalment jew flimkien ma’ oħrajn, għandu, jew hemm riskju li maż-żmien ikollu, impatt negattiv sinifikanti fuq id-drittijiet tal-individwi jew fuq it-tħaddim taż-żona Schengen;

(j)“attività ta’ evalwazzjoni” tfisser żjara speċifika, evalwazzjoni bbażata fuq kwestjonarju jew evalwazzjoni oħra mwettqa mill-bogħod;

(k)“tim” tfisser grupp magħmul minn esperti maħtura mill-Istati Membri u rappreżentanti tal-Kummissjoni li jwettqu l-attivitajiet ta’ evalwazzjoni u monitoraġġ.

Artikolu 3

Responsabbiltajiet u dmir ta’ kooperazzjoni

1.L-Istati Membri u l-Kummissjoni għandhom ikunu responsabbli b’mod konġunt għall-implimentazzjoni tal-mekkaniżmu ta’ evalwazzjoni u monitoraġġ, bil-kontribut tal-korpi, l-uffiċċji u l-aġenziji tal-Unjoni rilevanti f’konformità mal-mandati rispettivi tagħhom.

2.Il-Kummissjoni għandha tkun responsabbli mit-twaqqif tal-programmi ta’ evalwazzjoni annwali u pluriennali, l-abbozzar tal-kwestjonarji, l-iffissar tal-iskedi taż-żjarat, it-twettiq taż-żjarat u l-abbozzar tar-rapporti ta’ evalwazzjoni u tar-rakkomandazzjonijiet. Għandha tiżgura wkoll l-attivitajiet ta’ segwitu u monitoraġġ.

3.L-Istati Membri u l-Kummissjoni għandhom jikkooperaw bis-sħiħ fl-istadji kollha tal-evalwazzjonijiet sabiex jiżguraw l-implimentazzjoni effettiva ta’ dan ir-Regolament.

4.L-Istati Membri għandhom jieħdu l-miżuri kollha, ġenerali jew partikolari, biex jappoġġaw u jassistu lill-Kummissjoni u lit-timijiet fl-implimentazzjoni tal-attivitajiet ta’ evalwazzjoni u monitoraġġ.

Għandhom jiżguraw li l-Kummissjoni u t-timijiet li jwettqu l-attivitajiet ta’ evalwazzjoni u monitoraġġ ikunu kapaċi jwettqu l-kompiti tagħhom b’mod effettiv, b’mod partikolari billi jagħtu l-possibbiltà lill-Kummissjoni u lit-timijiet biex jindirizzaw direttament lill-persuni rilevanti u billi jipprovdu aċċess komplut u bla xkiel għaż-żoni, binjiet u dokumenti kollha li jkun intalab aċċess għalihom, inklużi struzzjonijiet u linji gwida nazzjonali u interni, anki dawk klassifikati.

5.Il-Kummissjoni għandha tkun inkarigata mill-arranġamenti meħtieġa għall-ivvjaġġar lejn u mill-Istat Membru li ssir iż-żjara fih għar-rappreżentanti tal-Kummissjoni u l-esperti tal-Istat Membru fit-timijiet.

Il-Kummissjoni għandha ġġarrab l-ispejjeż għall-ivvjaġġar u għall-akkomodazzjoni tal-esperti u l-osservatur imsemmi fl-Artikolu 16(2) li jieħdu sehem fiż-żjarat.

L-Istat Membru li fih issir iż-żjara għandu jkun responsabbli biex jipprovdi t-trasport meħtieġ fuq il-post.

Artikolu 4

Għamliet tal-evalwazzjonijiet

1.L-evalwazzjonijiet jista’ jkollhom xi waħda mill-għamliet segwenti:

(a)evalwazzjonijiet tal-ewwel darba;

(b)evalwazzjonijiet perjodiċi;

(c)evalwazzjonijiet għal għarrieda;

(d)evalwazzjonijiet tematiċi.

2.Il-Kummissjoni tista’ torganizza evalwazzjonijiet għal għarrieda, b’mod partikolari:

(a)biex tevalwa l-prattiki fil-fruntieri interni;

(b)meta ssir taf b’xi problemi li feġġew jew problemi sistematiċi li potenzjalment jista’ jkollhom impatt negattiv sinifikanti fuq it-tħaddim taż-żona Schengen;

(c)meta jkollha raġunijiet biex tqis li Stat Membru qiegħed jittraskura serjament l-obbligi tiegħu skont l-acquis ta’ Schengen inkluż allegazzjonijiet ta’ ksur serju tad-drittijiet fundamentali fil-fruntieri esterni.

3.Il-Kummissjoni tista’ torganizza evalwazzjonijiet tematiċi, b’mod partikolari biex tivvaluta l-implimentazzjoni ta’ bidliet leġiżlattivi sinifikanti, malli jibdew japplikaw, u ta’ inizjattivi ġodda, jew biex tivvaluta kwistjonijiet minn fost l-oqsma ta’ politika jew il-prattiki tal-Istati Membri li jkunu qegħdin jaffaċċjaw sfidi simili.

Artikolu 5

Għamliet tal-attivitajiet ta’ monitoraġġ

L-attivitajiet ta’ monitoraġġ jistgħu jinkludu xi waħda mis-segwenti:

(a)ir-rieżami tal-pjanijiet ta’ azzjoni u tar-rapporti ta’ segwitu ppreżentati mill-Istati Membri evalwati;

(b)iż-żjarat mill-ġdid;

(c)iż-żjarat ta’ verifika.

Artikolu 6

Metodi ta’ evalwazzjoni u monitoraġġ

L-attivitajiet ta’ evalwazzjoni u monitoraġġ imsemmija fl-Artikoli 4 u 5 jistgħu jitwettqu permezz ta’ żjarat b’avviż minn qabel jew għal għarrieda, u kwestjonarji jew metodi mill-bogħod.

Kull metodu ta’ evalwazzjoni u monitoraġġ jista’ jintuża b’mod indipendenti jew imħallat ma’ ieħor, kif xieraq.

Artikolu 7

Kooperazzjoni mal-korpi, l-uffiċċji u l-aġenziji tal-Unjoni

1.Il-Kummissjoni għandha tikkoopera mal-korpi, l-uffiċċji u l-aġenziji tal-Unjoni rilevanti li huma involuti fl-implimentazzjoni tal-acquis ta’ Schengen kif ukoll mal-Aġenzija tal-Unjoni Ewropea għad-Drittijiet Fundamentali.

Il-Kummissjoni tista’ tagħmel arranġamenti mal-korpi, l-uffiċċji u l-aġenziji tal-Unjoni biex tiffaċilita l-kooperazzjoni.

2.Il-Kummissjoni tista’ titlob lill-korpi, l-uffiċċji u l-aġenziji tal-Unjoni msemmija fil-paragrafu 1 f’konformità mal-mandati rispettivi tagħhom biex jipprovdu informazzjoni, data statistika jew analiżijiet tar-riskju għat-titjib tal-għarfien tas-sitwazzjoni fis-sens tar-Regolament (UE) 2019/1896 rigward l-implimentazzjoni tal-acquis ta’ Schengen mill-Istati Membri.

Artikolu 8

Kooperazzjoni mal-Frontex

1.Sal-31 ta’ Awwissu kull sena, il-Frontex għandha tippreżenta analiżi tar-riskju lill-Kummissjoni u lill-Istati Membri fid-dawl tal-programm ta’ evalwazzjoni annwali msemmi fl-Artikolu 13 ta’ dan ir-Regolament.

2.L-analiżi tar-riskju msemmi fil-paragrafu 1 għandu jkopri l-aspetti rilevanti kollha relatati mal-ġestjoni integrata tal-fruntieri u għandha tinkludi wkoll rakkomandazzjonijiet għaż-żjarat għal għarrieda fis-sena ta’ wara, irrispettivament mill-ordni tal-Istati Membri li għandhom jiġu evalwati kull sena, kif stabbilit fil-programm ta’ evalwazzjoni pluriennali f’konformità mal-Artikolu 12.

Dawk ir-rakkomandazzjonijiet jistgħu jirrigwardaw kwalunkwe reġjun jew qasam speċifiku u għandhom jinkludu lista ta’ minn tal-anqas 10 sezzjonijiet speċifiċi tal-fruntieri esterni u minn tal-anqas 10 punti speċifiċi ta’ qsim tal-fruntiera, siti speċifiċi rilevanti għall-evalwazzjoni tal-konformità mad-Direttiva 2008/115/KE 47 , u informazzjoni rilevanti oħra.

Artikolu 9

Kooperazzjoni mal-Europol

F’konformità mal-Artikolu 4(1), il-punt (s), tar-Regolament (UE) 2016/794 tal-Parlament Ewropew u tal-Kunsill 48 , l-Europol għandha tipprovdi għarfien espert, analiżi, rapporti u informazzjoni rilevanti oħra biex tappoġġa l-implimentazzjoni ta’ dan ir-Regolament.

Artikolu 10

Sinerġiji ma’ attivitajiet oħra ta’ evalwazzjoni u monitoraġġ

1.Il-Kummissjoni għandha tuża r-riżultati tal-mekkaniżmi u tal-istrumenti rilevanti, inkluż attivitajiet ta’ evalwazzjoni u monitoraġġ tal-korpi, l-uffiċċji u l-aġenziji tal-Unjoni li huma involuti fl-implimentazzjoni tal-acquis ta’ Schengen u tal-Aġenzija tal-Unjoni Ewropea għad-Drittijiet Fundamentali kif ukoll ta’ mekkaniżmi nazzjonali indipendenti ta’ monitoraġġ u ta’ korpi u mekkaniżmi oħra nazzjonali ta’ kontroll tal-kwalità fit-tħejjija tal-attivitajiet ta’ evalwazzjoni u monitoraġġ, biex ittejjeb is-sensibilizzazzjoni dwar it-tħaddim taż-żona Schengen u biex tevita sforzi doppji u miżuri kunfliġġenti.

2.Ir-rakkomandazzjonijiet skont dan ir-Regolament għandhom ikunu komplementari għar-rakkomandazzjonijiet skont l-Artikolu 32(7) tar-Regolament (UE) 2019/1896 fl-ambitu tal-valutazzjoni tal-vulnerabbiltà.

3.Il-Kummissjoni tista’ tikkondividi mal-korpi, l-uffiċċji u l-aġenziji nazzjonali u tal-Unjoni rilevanti msemmija fil-paragrafu 1 b’mod sigur u fil-pront, dettalji tar-rapporti ta’ evalwazzjoni, tal-pjanijiet ta’ azzjoni u aġġornament dwar l-implimentazzjoni tal-pjanijiet ta’ azzjoni.

Il-kondiviżjoni tal-informazzjoni għandha ssir f’konformità mal-mandati tal-korpi, l-uffiċċji u l-aġenziji tal-Unjoni kkonċernati.

Artikolu 11

Informazzjoni minn partijiet terzi

Tul il-programmazzjoni u l-implimentazzjoni tal-attivitajiet ta’ evalwazzjoni u monitoraġġ, il-Kummissjoni għandha tqis l-informazzjoni pprovduta minn partijiet terzi, inkluż awtoritajiet indipendenti, organizzazzjonijiet nongovernattivi u organizzazzjonijiet internazzjonali.

KAPITOLU II

PROGRAMMAZZJONI

Artikolu 12

Programm ta’ evalwazzjoni pluriennali

1.Il-Kummissjoni, fejn xieraq, wara li tikkonsulta mal-korpi, l-uffiċċji u l-aġenziji tal-Unjoni rilevanti, għandha tistabbilixxi programm ta’ evalwazzjoni pluriennali li jkopri perjodu ta’ seba’ snin minn tal-anqas sitt xhur qabel jibda l-perjodu ta’ seba’ snin ta’ wara.

F’kull ċiklu ta’ evalwazzjoni pluriennali, kull Stat Membru għandu jkun soġġett għal evalwazzjoni perjodika waħda u minn tal-anqas evalwazzjoni għal għarrieda waħda jew evalwazzjoni tematika waħda.

2.Il-Kummissjoni għandha tadotta l-programm ta’ evalwazzjoni pluriennali permezz ta’ att ta’ implimentazzjoni. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 29(3). Il-Kummissjoni għandha tibgħat il-programm ta’ evalwazzjoni pluriennali lill-Parlament Ewropew u lill-Kunsill.

3.Il-programm ta’ evalwazzjoni pluriennali għandu jidentifika l-oqsma prijoritarji speċifiċi li għandhom jiġu koperti mill-evalwazzjonijiet perjodiċi u għandu jinkludi skeda taż-żmien proviżorja ta’ dawk l-evalwazzjonijiet.

Għandu jistabbilixxi lista proviżorja ta’ Stati Membri li għandhom ikunu soġġetti għal evalwazzjonijiet perjodiċi, mingħajr preġudizzju għall-aġġustamenti skont il-paragrafu 4, f’sena partikolari. L-ordni proviżorju li fih l-Istati Membri għandhom ikunu soġġetti għal evalwazzjoni perjodika għandu jqis iż-żmien li jkun għadda mill-evalwazzjoni perjodika preċedenti. Għandu wkoll iqis l-eżitu tal-evalwazzjonijiet preċedenti, ir-ritmu tal-implimentazzjoni tal-pjanijiet ta’ azzjoni u informazzjoni rilevanti oħra għad-dispożizzjoni tal-Kummissjoni fir-rigward tal-prattiki tal-Istati Membri.

4.Fl-eventwalità ta’ force majeure li timpedixxi li jsiru l-evalwazzjonijiet f’konformità mal-iskeda taż-żmien proviżorja stabbilita skont il-paragrafu 3, il-Kummissjoni tista’, bi qbil mal-Istati Membri kkonċernati, tagħmel aġġustamenti għall-iskeda taż-żmien għall-evalwazzjonijiet ikkonċernati.

Il-Kummissjoni għandha tinforma, mingħajr dewmien, lill-Parlament Ewropew u lill-Kunsill dwar tali avvenimenti u dwar l-impatt mistenni tagħhom fuq l-iskedar tal-evalwazzjonijiet fl-ambitu tal-programm ta’ evalwazzjoni pluriennali.

Artikolu 13

Programm ta’ evalwazzjoni annwali

1.Il-Kummissjoni għandha tistabbilixxi, permezz ta’ att ta’ implimentazzjoni, programm ta’ evalwazzjoni annwali sal-15 ta’ Novembru tas-sena li tippreċedi dik li tirrigwarda l-programm, abbażi, b’mod partikolari, tal-analiżijiet tar-riskju u informazzjoni oħra miksuba mill-Kummissjoni f’konformità mal-Artikoli 7, 8, 9, 10 u 11. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 29(3).

2.Il-programm ta’ evalwazzjoni annwali għandu jinkludi skeda taż-żmien proviżorja tal-evalwazzjonijiet segwenti:

(a)evalwazzjonijiet perjodiċi tal-Istati Membri kif speċifikat fil-programm ta’ evalwazzjoni pluriennali;

(b)evalwazzjoni tal-ewwel darba ta’ Stat Membru b’segwitu għad-dikjarazzjoni tiegħu li jinsab lest li jiġi evalwat;

(c)minn tal-anqas evalwazzjoni tematika waħda.

3.Il-Kummissjoni għandha tibgħat il-programm ta’ evalwazzjoni annwali lill-Parlament Ewropew u lill-Kunsill.

Fl-eventwalità ta’ force majeure li timpedixxi li jsiru l-evalwazzjonijiet f’konformità mal-iskeda taż-żmien proviżorja stabbilita skont il-paragrafu 2, il-Kummissjoni tista’, bi qbil mal-Istati Membri kkonċernati, tagħmel aġġustamenti għall-iskeda taż-żmien għall-evalwazzjonijiet ikkonċernati.

Il-Kummissjoni għandha tinforma, mingħajr dewmien, lill-Parlament Ewropew u lill-Kunsill dwar tali avvenimenti u dwar l-impatt mistenni tagħhom fuq l-iskedar tal-evalwazzjonijiet fl-ambitu tal-programm ta’ evalwazzjoni annwali.

Artikolu 14

Kwestjonarju standard

1.Il-Kummissjoni għandha, permezz ta’ att ta’ implimentazzjoni, tistabbilixxi u taġġorna kwestjonarju standard.

Fit-tfassil tal-kwestjonarju, il-Kummissjoni tista’ tikkonsulta lill-korpi, l-uffiċċji u l-aġenziji tal-Unjoni rilevanti msemmija fl-Artikolu 7.

2.L-atti ta’ implimentazzjoni msemmija fil-paragrafu 1 għandhom jiġu adottati f’konformità mal-proċedura konsultattiva msemmija fl-Artikolu 29(2).

3.Il-kwestjonarju standard għandu jkopri l-implimentazzjoni tal-leġiżlazzjoni rilevanti u l-mezzi organizzattivi u tekniċi disponibbli għall-implimentazzjoni tal-acquis ta’ Schengen, inkluż dawk imsemmija fil-Manwali, il-katalogi ta’ Schengen u d-data statistika rilevanti.

4.Sal-1 ta’ Awwissu kull sena, il-Kummissjoni għandha tibgħat il-kwestjonarju standard lil dawk l-Istati Membri li għandhom ikunu soġġetti għal evalwazzjonijiet perjodiċi fis-sena ta’ wara, f’konformità mal-programm ta’ evalwazzjoni annwali.

Dawk l-Istati Membri għandhom jipprovdu t-tweġibiet tagħhom lill-Kummissjoni fi żmien tliet xhur minn meta jirċievu l-kwestjonarju standard.

Il-Kummissjoni għandha tagħmel it-tweġibiet disponibbli għall-Istati Membri l-oħra.

5.Meta ssir talba mill-Kummissjoni, l-Istati Membri evalwati għandhom jaġġornaw it-tweġibiet tagħhom għall-kwestjonarju standard u jwieġbu, jekk ikun mitlub, mistoqsijiet komplementari qabel l-evalwazzjonijiet speċifiċi, kif ukoll jipprovdu s-sejbiet tal-mekkaniżmi nazzjonali ta’ kontroll tal-kwalità u tal-verifiki interni.

KAPITOLU III

DISPOŻIZZJONIJIET KOMUNI GĦALL-ATTIVITAJIET TA’ EVALWAZZJONI U MONITORAĠĠ

Artikolu 15

Esperti tal-Istati Membri

1.L-esperti tal-Istati Membri li jieħdu sehem fl-attivitajiet ta’ evalwazzjoni u monitoraġġ għandu jkollhom kwalifiki adegwati, inkluż għarfien teoretiku solidu u esperjenza prattika fl-oqsma koperti mill-mekkaniżmu ta’ evalwazzjoni u monitoraġġ, flimkien ma’ għarfien tajjeb tal-prinċipji ta’ evalwazzjoni, proċeduri u tekniki, u għandhom ikunu kapaċi jikkomunikaw b’mod effettiv b’lingwa komuni.

2.Esperti mill-Istati Membri li, f’konformità mal-Att ta’ Adeżjoni rilevanti, ikunu marbuta bl-acquis ta’ Schengen iżda jkunu għadhom ma japplikawhx għalkollox, jistgħu jieħdu sehem fl-attivitajiet ta’ evalwazzjoni u monitoraġġ tal-partijiet kollha tal-acquis ta’ Schengen.

Artikolu 16

Taħriġ tal-esperti

1.L-Istati Membri u l-Kummissjoni, f’kooperazzjoni mal-korpi, l-uffiċċji jew l-aġenziji tal-Unjoni rilevanti, għandhom jiżguraw li l-esperti tal-Istati Membri u r-rappreżentanti tal-Kummissjoni jirċievu taħriġ adegwat biex isiru evalwaturi ta’ Schengen.

Il-korsijiet ta’ taħriġ għall-evalwaturi ta’ Schengen għandhom jinkludu komponenti tad-drittijiet fundamentali żviluppati bis-sehem tal-Aġenzija tal-Unjoni Ewropea għad-Drittijiet Fundamentali.

Il-Kummissjoni, f’kooperazzjoni mal-korpi, l-uffiċċji jew l-aġenziji tal-Unjoni rilevanti, għandha żżomm il-curricula tat-taħriġ inizjali aġġornati u fejn ikun meħtieġ, tipprovdi taħriġ ta’ segwitu u ta’ aġġornament.

2.Għall-finijiet ta’ taħriġ, kull tim li jwettaq evalwazzjonijiet perjodiċi jista’ jinkludi “osservatur” minn Stat Membru jew inkella mill-Kummissjoni.

Artikolu 17

Gruppi ta’ esperti tal-Istati Membri

1.Il-Kummissjoni, f’kooperazzjoni mal-Istati Membri, għandha tistabbilixxi, kull sena, grupp ta’ esperti b’esperjenza professjonali li tkopri oqsma prijoritarji speċifiċi stabbiliti fil-programm ta’ evalwazzjoni pluriennali.

2.B’mod parallel għat-twaqqif tal-programm ta’ evalwazzjoni annwali f’konformità mal-Artikolu 13(1), meta jiġu mistiedna mill-Kummissjoni, l-Istati Membri għandhom jaħtru minn tal-anqas espert kwalifikat wieħed għal kull qasam speċifiku ddeterminat fil-programm ta’ evalwazzjoni pluriennali għall-grupp ta’ esperti tas-sena ta’ wara.

3.Skont l-evalwazzjonijiet inklużi fil-programm ta’ evalwazzjoni annwali, il-Kummissjoni, fl-istedina tista’ tispeċifika ulterjorment ir-rekwiżiti professjonali għall-esperti li għandhom jinħatru.

4.L-Istati Membri għandhom jaħtru esperti fi żmien erba’ ġimgħat minn meta jirċievu l-istedina msemmija fil-paragrafu 2.

5.L-Istati Membri għandhom jiżguraw li l-esperti maħtura jissodisfaw il-kundizzjonijiet imsemmija fl-Artikolu 15 u r-rekwiżiti speċifiċi stabbiliti fl-istedina biex jiġi stabbilit il-grupp ta’ esperti.

6.L-esperti li rċevew it-taħriġ xieraq imsemmi fl-Artikolu 16 għandhom jinħatru biex jagħmlu parti mill-grupp ta’ esperti stabbilit għas-sena ta’ wara dik li fiha jkunu rċevew il-kors ta’ taħriġ rispettiv.

7.Il-Kummissjoni tista’ tistieden ukoll lill-korpi, l-uffiċċji u l-aġenziji tal-Unjoni msemmija fl-Artikolu 7 jaħtru l-esperti biex jagħmlu parti mill-grupp ta’ esperti.

8.Il-Kummissjoni għandha tivvaluta l-esperti maħtura u tikkonferma l-għażla tal-esperti biex jagħmlu parti mill-grupp ta’ esperti fi żmien ġimgħa.

9.F’każ li ħadd mill-esperti għall-oqsma speċifiċi ma jissodisfa r-rekwiżiti msemmija fil-paragrafu 3, il-Kummissjoni għandha tistieden lill-Istat Membru kkonċernat jaħtar espert ġdid għall-qasam prijoritarju speċifiku kkonċernat.

10.L-Istati Membri għandhom jiżguraw li l-esperti maħtura jkunu disponibbli għall-evalwazzjonijiet.

Jekk xi espert ma jkunx aktar disponibbli biex jifforma parti mill-grupp ta’ esperti, l-Istat Membru kkonċernat għandu jaħtar sostitut mingħajr dewmien.

11.Il-Kummissjoni għandha żżomm aġġornata l-lista ta’ esperti li jiffurmaw parti mill-grupp ta’ esperti u tinforma lill-Istati Membri dwar l-għadd ta’ esperti u l-profili tagħhom maħtura għal kull Stat Membru.

Artikolu 18

Twaqqif tat-timijiet

1.Il-Kummissjoni għandha tiddefinixxi l-għadd ta’ esperti tal-Istati Membri u r-rappreżentanti tal-Kummissjoni li jieħdu sehem f’tim abbażi tal-partikolaritajiet u l-ħtiġijiet tal-attività ta’ evalwazzjoni u monitoraġġ. Il-Kummissjoni għandha tagħżel esperti minn grupp ta’ esperti biex isiru membri ta’ tim.

2.Meta tagħżel l-esperti, il-Kummissjoni għandha tikkunsidra l-profili meħtieġa għal attività ta’ evalwazzjoni jew monitoraġġ partikolari u tqis il-ħtieġa li jiġi żgurat bilanċ ġeografiku, bilanċ fir-rigward tal-esperjenza professjonali u l-kapaċità tal-amministrazzjonijiet nazzjonali.

L-esperti tal-Istati Membri ma għandhomx jieħdu sehem f’tim li jwettaq attività ta’ evalwazzjoni jew monitoraġġ tal-Istat Membru li fih ikunu impjegati.

3.Il-Kummissjoni għandha tistieden lill-esperti magħżula immedjatament wara li tiġi ffissata d-data tal-attività ta’ evalwazzjoni jew monitoraġġ u mhux aktar tard minn 10 ġimgħat qabel ma l-attività ta’ evalwazzjoni jew monitoraġġ tkun skedata li tibda. L-esperti mistiedna għandhom iwieġbu fi żmien ġimgħa minn meta jirċievu l-istedina, bi qbil mal-awtoritajiet li jkunu ħatruhom.

4.Fil-każ ta’ żjarat għal għarrieda, il-Kummissjoni għandha tibgħat l-istediniet mhux aktar tard minn ġimagħtejn qabel ma ż-żjara tkun skedata li tibda. L-esperti għandhom iwieġbu fi żmien 72 siegħa minn meta jirċievu l-istedina, bi qbil mal-awtoritajiet li jaħtruhom.

5.Il-Kummissjoni tista’ tistieden lill-korpi, l-uffiċċji u l-aġenziji tal-Unjoni rispettivi msemmija fl-Artikolu 7 jaħtru rappreżentant b’esperjenza professjonali u fil-qasam biex jieħu sehem bħala osservatur f’attività ta’ evalwazzjoni jew monitoraġġ. Għall-istedina u għat-tweġiba għandhom japplikaw l-iskadenzi stabbiliti fil-paragrafi 3 u 4.

6.Jekk Stat Membru jkun jixtieq jaħtar osservatur għall-finijiet ta’ taħriġ imsemmi fl-Artikolu 16(3), dan għandu jikkomunikah lill-Kummissjoni minn tal-anqas sitt ġimgħat qabel ma tkun skedata li tibda l-evalwazzjoni.

7.L-osservaturi msemmija fil-paragrafi 5 u 6 għandhom jappoġġaw lit-tim kif mitlub mill-esperti fit-tmun, iżda ma għandhomx jieħdu sehem fil-proċess intern tat-teħid ta’ deċiżjonijiet tat-tim.

8.Jekk il-Kummissjoni ma jirnexxilhiex tikseb konferma tas-sehem tal-għadd meħtieġ ta’ esperti mill-grupp ta’ esperti minn tal-anqas sitt ġimgħat qabel ma tkun skedata li tibda l-attività ta’ evalwazzjoni jew monitoraġġ, jew minn tal-anqas ġimgħa f’każ ta’ żjarat għal għarrieda, il-Kummissjoni għandha mingħajr dewmien tistieden lill-Istati Membri kollha jinnominaw esperti kwalifikati li ma jkunux fil-grupp ta’ esperti biex jimlew il-postijiet neqsin.

9.L-Istati Membri għandhom iwieġbu fi żmien 72 siegħa minn meta jirċievu dik l-istedina.

Il-Kummissjoni għandha taħtar espert fit-tmun mill-Kummissjoni u tipproponi l-espert fit-tmun mill-Istati Membri. L-espert fit-tmun mill-Istati Membri għandu jinħatar mill-membri tat-tim mill-aktar fis possibbli wara li jiġi stabbilit it-tim.

L-esperti fit-tmun għandhom ikunu inkarigati b’mod partikolari mill-ippjanar kumplessiv, l-attivitajiet ta’ tħejjija, l-organizzazzjoni tat-tim, it-twettiq tal-evalwazzjoni, il-koordinazzjoni tal-abbozzar tar-rapport ta’ evalwazzjoni, il-verifika tal-kwalità u s-segwitu u l-attivitajiet ta’ monitoraġġ rilevanti, kif xieraq.

Artikolu 19

Twettiq taż-żjarat

1.It-timijiet għandhom jagħmlu l-attivitajiet ta’ tħejjija kollha meħtieġa biex jiżguraw li ż-żjarat ikunu effiċjenti, preċiżi u konsistenti.

2.Il-programm dettaljat għal żjarat fi Stat Membru jew fil-konsolati tiegħu għandu jiġi stabbilit mill-Kummissjoni f’kooperazzjoni mill-qrib mal-esperti fit-tmun u mal-Istat Membru kkonċernat.

Jista’ jinkludi żjarat lill-awtoritajiet u l-korpi nazzjonali, lill-organizzazzjonijiet nongovernattivi u internazzjonali, u laqgħat magħhom, kif ukoll żjarat lil entitajiet, aġenziji u korpi oħra involuti fl-implimentazzjoni tal-acquis ta’ Schengen, li jieħdu sehem fih jew ikkonċernati minnu waqt il-kooperazzjoni tagħhom mal-Istat Membru soġġett għall-attività ta’ evalwazzjoni jew monitoraġġ, kif ukoll laqgħat magħhom.

3.Għaż-żjarat b’avviż minn qabel, il-Kummissjoni għandha tikkonsulta u tinnotifika lill-Istat Membru kkonċernat dwar l-iskeda ta’ żmien u l-programm dettaljat minn tal-anqas erba’ ġimgħat qabel ma tkun se ssir iż-żjara. Għandha tipprovdi minn qabel l-ismijiet tal-membri tat-tim u tal-osservaturi. L-Istat Membru kkonċernat għandu jaħtar punt ta’ kuntatt biex jagħmel l-arranġamenti prattiċi għaż-żjara.

4.Iż-żjarat għal għarrieda għandhom isiru mingħajr notifika minn qabel lill-Istat Membru kkonċernat. Eċċezzjonalment, il-Kummissjoni tista’ tinnotifika lill-Istat Membru kkonċernat minn tal-anqas 24 siegħa qabel ma tkun se ssir tali żjara meta l-iskop prinċipali taż-żjara għal għarrieda jkun dak ta’ verifika aleatorja tal-implimentazzjoni tal-acquis ta’ Schengen.

Il-Kummissjoni għandha tistabbilixxi l-programm dettaljat għaż-żjarat għal għarrieda. Fil-każijiet li fihom ikunu ġew innotifikati l-Istati Membri, il-Kummissjoni tista’ tikkonsulta l-iskeda ta’ żmien u l-programm dettaljat mal-Istat Membru kkonċernat.

5.Il-Kummissjoni, f’kooperazzjoni mill-qrib mal-Istati Membri, tista’ tistabbilixxi u taġġorna Linji gwida għat-twettiq taż-żjarat għal għarrieda.

Artikolu 20

Metodi mill-bogħod

Il-Kummissjoni, f’kooperazzjoni mal-Istati Membri, tista’ tistabbilixxi linji gwida biex twettaq attivitajiet ta’ evalwazzjoni u monitoraġġ permezz ta’ kwestjonarju jew metodi oħra mill-bogħod.

Artikolu 21

Rapporti ta’ evalwazzjoni

1.It-tim għandu jabbozza rapport ta’ evalwazzjoni wara kull evalwazzjoni.

Il-Kummissjoni għandha tadotta r-rapport ta’ evalwazzjoni permezz ta’ att ta’ implimentazzjoni f’konformità mal-proċedura ta’ eżami msemmija fl-Artikolu 29(3). Ir-rapport ta’ evalwazzjoni għandu jiġi adottat mhux aktar tard minn erba’ xhur wara t-tmiem tal-attività ta’ evalwazzjoni.

Il-Kummissjoni għandha tibgħat ir-rapport ta’ evalwazzjoni lill-parlamenti nazzjonali, lill-Parlament Ewropew u lill-Kunsill.

2.Meta jippreparaw ir-rapport ta’ evalwazzjoni, it-timijiet għandhom iqisu t-tweġibiet għall-kwestjonarju standard, kull informazzjoni addizzjonali miksuba f’konformità mal-Artikoli 7, 8, 9, 10 u 11 u s-sejbiet tal-attività ta’ evalwazzjoni. Ir-rapporti ta’evalwazzjoni jistgħu jinkludu materjal ta’ dokumentazzjoni u diġitali bħala sostenn għas-sejbiet. Fil-każijiet li fihom evalwazzjoni ssir permezz ta’ żjara, it-tim għandu jabbozza r-rapport ta’ evalwazzjoni matul iż-żjara.

It-timijiet għandhom jieħdu r-responsabbiltà kumplessiva għall-abbozzar tar-rapport ta’ evalwazzjoni u għall-iżgurar tal-integrità u l-kwalità tiegħu. F’każ ta’ nuqqas ta’ qbil, it-tim għandu jagħmel ħiltu biex isib kompromess.

3.Ir-rapport ta’ evalwazzjoni għandu janalizza l-aspetti kwalitattivi, kwantitattivi, operazzjonali, amministrattivi u organizzazzjonali u għandu jelenka n-nuqqasijiet, l-oqsma għat-titjib u l-aħjar prattiki identifikati matul l-evalwazzjoni.

4.Is-sejbiet jistgħu jiġu vvalutati bħala waħda mis-segwenti:

(a)l-aħjar prattika;

(b)konformi iżda meħtieġ titjib;

(c)mhux konformi.

5.Ir-rapport ta’ evalwazzjoni għandu jkun fih rakkomandazzjonijiet għal azzjonijiet ta’ rimedju bl-għan li jindirizzaw in-nuqqasijiet u l-oqsma għat-titjib identifikati matul l-evalwazzjoni u jagħti indikazzjoni tal-prijoritajiet għall-implimentazzjoni tagħhom. Ir-rapport ta’ evalwazzjoni jista’ jistabbilixxi skadenzi għall-implimentazzjoni tar-rakkomandazzjonijiet. Meta l-evalwazzjoni tidentifika nuqqas serju, għandhom japplikaw id-dispożizzjonijiet speċifiċi stabbiliti fl-Artikolu 23.

6.Il-Kummissjoni għandha tibgħat l-abbozz tar-rapport ta’ evalwazzjoni lill-Istat Membri evalwat fi żmien erba’ ġimgħat minn tmiem l-attività ta’ evalwazzjoni. L-Istat Membru evalwat għandu jipprovdi l-kummenti tiegħu dwar l-abbozz tar-rapport ta’ evalwazzjoni fi żmien ġimagħtejn minn meta jirċevih. F’każ li ssir talba mingħand l-Istat Membru evalwat, għandha ssir laqgħa ta’ abbozzar, mhux aktar tard minn ħamest ijiem tax-xogħol minn meta jaslu l-kummenti mingħand l-Istat Membru evalwat. Il-kummenti tal-Istat Membru evalwat jistgħu jiġu riflessi fl-abbozz tar-rapport ta’ evalwazzjoni.

Artikolu 22

Segwitu u monitoraġġ

1.Fi żmien xahrejn mill-adozzjoni tar-rapport ta’ evalwazzjoni, l-Istat Membru evalwat għandu jippreżenta pjan ta’ azzjoni lill-Kummissjoni u lill-Kunsill biex jimplimenta r-rakkomandazzjonijiet kollha inklużi fir-rapport ta’ evalwazzjoni.

2.Il-Kummissjoni, wara li tikkonsulta lit-tim li jkun wettaq l-attività ta’ evalwazzjoni, għandha tipprovdi osservazzjonijiet dwar l-adegwatezza tal-pjan ta’ azzjoni u, fi żmien xahar mill-preżentazzjoni tiegħu, għandha tinforma lill-Istat Membru bl-osservazzjonijiet tagħha. Il-Kunsill jista’ jistieden lill-Istati Membri jipprovdu kummenti dwar il-pjan ta’ azzjoni.

Jekk il-Kummissjoni ma tqisx li r-rakkomandazzjonijiet kollha jkunu ġew indirizzati biżżejjed, l-Istat Membru evalwat għandu jippreżenta pjan ta’ azzjoni rivedut fi żmien xahar minn mindu jirċievi l-osservazzjonijiet.

3.L-Istat Membru evalwat għandu jirrapporta lill-Kummissjoni u lill-Kunsill dwar l-implimentazzjoni tal-pjan ta’ azzjoni tiegħu kull sitt xhur mill-adozzjoni tar-rapport ta’ evalwazzjoni sakemm il-Kummissjoni tikkunsidra l-pjan ta’ azzjoni bħala implimentat mija fil-mija. Skont in-natura tan-nuqqasijiet u l-istat tal-implimentazzjoni tar-rakkomandazzjonijiet, il-Kummissjoni jaf tirrikjedi lill-Istat Membru evalwat frekwenzi ta’ rapportar differenti.

Fil-każijiet li fihom il-Kummissjoni tikkunsidra l-pjan ta’ azzjoni bħala implimentat, għandha tinforma lill-Istat Membru evalwat dwar l-għeluq tal-pjan ta’ azzjoni.

Il-Kummissjoni għandha tinforma lill-Parlament Ewropew u lill-Kunsill minn tal-anqas darbtejn fis-sena dwar l-istat ta’ implimentazzjoni tal-pjanijiet ta’ azzjoni. Il-Kummissjoni għandha b’mod partikolari tipprovdi informazzjoni dwar l-osservazzjonijiet tagħha rigward l-adegwatezza tal-pjanijiet ta’ azzjoni msemmija fil-paragrafu 2, l-eżitu taż-żjarat mill-ġdid u ż-żjarat ta’ verifika u jekk tosservax nuqqas konsiderevoli ta’ progress fl-implimentazzjoni ta’ pjan ta’ azzjoni.

KAPITOLU IV

NUQQAS SERJU U GĦAMLIET SPEĊIFIĊI TA’ EVALWAZZJONI

Artikolu 23

Dispożizzjonijiet speċifiċi fl-eventwalità ta’ nuqqas serju identifikat permezz tar-rapport ta’ evalwazzjoni

1.Ir-regoli stipulati fil-paragrafi 2 sa 7 għandhom japplikaw b’rabta mal-evalwazzjonijiet li jkunu identifikaw nuqqas serju.

2.Fi tmiem l-attività ta’ evalwazzjoni, l-esperti fit-tmun mill-Kummissjoni u mill-Istati Membri, għan-nom tat-tim, għandhom jinfurmaw lill-Istat Membru evalwat li jkun ġie identifikat nuqqas serju.

L-Istat Membru evalwat għandu jieħu azzjonijiet ta’ rimedju minnufih inkluż, fejn meħtieġ, li jimmobilizza l-mezzi operazzjonali u finanzjarji kollha disponibbli. L-Istat Membru evalwat għandu jinforma mingħajr dewmien lill-Kummissjoni u lill-Istati Membri dwar l-azzjonijiet ta’ rimedju immedjati meħuda jew ippjanati. B’mod parallel, il-Kummissjoni għandha tinforma lill-korpi, l-uffiċċji u l-aġenziji tal-Unjoni rispettivi msemmija fl-Artikolu 7 dwar in-nuqqas serju fid-dawl tal-appoġġ possibbli tagħhom lill-Istat Membru evalwat. Il-Kummissjoni għandha wkoll tinforma lill-Kunsill u lill-Parlament Ewropew.

3.Ir-rapport ta’ evalwazzjoni abbozzat f’konformità mal-Artikolu 21(2), (3) u (4) għandu jiffoka fuq is-sejbiet li jkunu wasslu għad-determinazzjoni ta’ nuqqas serju. Ma għandux ikun fih rakkomandazzjonijiet. Il-Kummissjoni għandha tibgħat l-abbozz tar-rapport ta’ evalwazzjoni lill-Istat Membri evalwat fi żmien ġimagħtejn minn tmiem l-attività ta’ evalwazzjoni.

L-Istat Membru evalwat għandu jipprovdi l-kummenti tiegħu dwar l-abbozz tar-rapport ta’ evalwazzjoni fi żmien ħamest ijiem tax-xogħol minn meta jirċevih.

Abbażi ta’ raġunijiet ta’ urġenza imperattivi ġustifikati kif dovut li jirrigwardaw nuqqas serju, il-Kummissjoni għandha tadotta rapport ta’ evalwazzjoni mhux aktar tard minn sitt ġimgħat wara t-tmiem tal-attività ta’ evalwazzjoni permezz ta’ att ta’ implimentazzjoni f’konformità mal-proċedura msemmija fl-Artikolu 29(4).

4.Fid-dawl tas-sejbiet, it-tim għandu jabbozza rakkomandazzjonijiet għal azzjonijiet ta’ rimedju bl-għan li jindirizzaw in-nuqqas serju identifikat fl-abbozz ta’ rapport ta’ evalwazzjoni.

Il-Kummissjoni għandha tippreżenta proposta lill-Kunsill biex jadotta r-rakkomandazzjonijiet ikkonċernati.

5.Il-Kunsill għandu jadotta rakkomandazzjonijiet fi żmien ġimagħtejn minn meta jirċievi l-proposta.

Għandu jittrasmetti r-rakkomandazzjonijiet lill-Parlament Ewropew u lill-parlamenti nazzjonali.

Il-Kunsill għandu jistabbilixxi limiti taż-żmien għall-implimentazzjoni tar-rakkomandazzjonijiet relatati ma’ nuqqas serju u jispeċifika l-frekwenza tar-rapportar mill-Istat Membru evalwat lill-Kummissjoni u lill-Kunsill dwar l-implimentazzjoni tal-pjan ta’ azzjoni tiegħu.

6.L-Istat Membru evalwat għandu jippreżenta l-pjan ta’ azzjoni lill-Kummissjoni u lill-Kunsill fi żmien xahar mill-adozzjoni tar-rakkomandazzjonijiet. Il-Kummissjoni għandha tibgħat dak il-pjan ta’ azzjoni lill-Parlament Ewropew.

Il-Kummissjoni għandha tipprovdi lill-Istat Membru evalwat osservazzjonijiet dwar l-adegwatezza tal-pjan ta’ azzjoni fi żmien ġimagħtejn mill-preżentazzjoni tiegħu. Il-Kummissjoni għandha tibgħat l-osservazzjonijiet tagħha lill-Kunsill u lill-Parlament Ewropew.

7.Biex tivverifika l-progress li jkun sar fl-implimentazzjoni tar-rakkomandazzjonijiet relatati man-nuqqas serju, il-Kummissjoni għandha torganizza żjara mill-ġdid li għandha ssir mhux aktar tard minn sena mid-data tal-attività ta’ evalwazzjoni.

Il-Kummissjoni għandha tadotta, permezz ta’ att ta’ implimentazzjoni, rapport ta’ żjara mill-ġdid f’konformità mal-proċedura ta’ eżami msemmija fl-Artikolu 29(3). Il-Kummissjoni għandha tippreżenta r-rapport ta’ żjara mill-ġdid lill-Kunsill.

8.Il-Kunsill għandu jesprimi l-pożizzjoni tiegħu fuq ir-rapport.

9.Il-Kummissjoni għandha tinforma lill-Parlament Ewropew u lill-Kunsill bl-intenzjoni tagħha li tagħlaq il-pjan ta’ azzjoni.

Il-Kummissjoni għandha tistieden lill-Kunsill jesprimi l-pożizzjoni tiegħu dwar l-għeluq propost.

Il-Kummissjoni, meta tiddeċiedi dwar jekk tagħlaqx il-pjan ta’ azzjoni, għandha tqis dik il-pożizzjoni.

10.Jekk in-nuqqas serju jitqies li jikkostitwixxi theddida serja għall-ordni pubbliku jew għall-iskrutinju intern fiż-żona mingħajr kontrolli fil-fruntieri interni, jew ksur sistematiku tad-drittijiet fundamentali, il-Kummissjoni, fuq inizjattiva tagħha stess jew jekk tintalab mill-Parlament Ewropew jew minn Stat Membru, għandha tinforma immedjatament lill-Parlament Ewropew u lill-Kunsill b’dan.

Artikolu 24

Dispożizzjonijiet speċifiċi għall-evalwazzjonijiet tal-ewwel darba

1.Ir-regoli stipulati fil-paragrafi 2 sa 3 għandhom japplikaw b’rabta mal-evalwazzjonijiet tal-ewwel darba.

2.Ir-rapport ta’ evalwazzjoni abbozzat f’konformità mal-Artikolu 21(2), (3) u (4) ma għandux ikun fih rakkomandazzjonijiet. Fid-dawl tas-sejbiet, it-tim għandu jabbozza rakkomandazzjonijiet għal azzjonijiet ta’ rimedju identifikati fl-abbozz ta’ rapport ta’ evalwazzjoni. Għandha tapplika l-kronoloġija fl-Artikolu 21(1) u (6).

Il-Kummissjoni għandha tippreżenta proposta lill-Kunsill biex jadotta r-rakkomandazzjonijiet ikkonċernati.

3.Il-Kunsill għandu jadotta rakkomandazzjonijiet fi żmien xahrejn minn meta jirċievi l-proposta.

Għandu jittrasmetti r-rakkomandazzjonijiet lill-Parlament Ewropew u lill-parlamenti nazzjonali.

Il-Kunsill jista’ jistabbilixxi limiti taż-żmien għall-implimentazzjoni tar-rakkomandazzjonijiet speċifiċi.

Il-Kummissjoni għandha torganizza żjara mill-ġdid f’każ li r-rapport ta’ evalwazzjoni kkonkluda li l-Istat Membru evalwat ma ssodisfax il-kundizzjonijiet meħtieġa biex japplika l-acquis ta’ Schengen. Il-Kummissjoni għandha tadotta, permezz ta’ att ta’ implimentazzjoni r-rapport ta’ żjara mill-ġdid f’konformità mal-proċedura ta’ eżami msemmija fl-Artikolu 29(3). Il-Kummissjoni għandha tippreżenta r-rapport ta’ żjara mill-ġdid lill-Kunsill.

4.Il-Kummissjoni għandha twettaq żjara ta’ verifika qabel l-għeluq tal-pjan ta’ azzjoni.

Il-Kummissjoni għandha tinforma lill-Parlament Ewropew u lill-Kunsill bl-eżitu taż-żjara ta’ verifika u l-intenzjoni tagħha li tagħlaq il-pjan ta’ azzjoni.

5.Il-Kummissjoni għandha tistieden lill-Kunsill jesprimi l-pożizzjoni tiegħu dwar l-għeluq propost.

Il-Kummissjoni, meta tiddeċiedi dwar jekk tagħlaqx il-pjan ta’ azzjoni, għandha tqis dik il-pożizzjoni.

Artikolu 25

Dispożizzjoni speċifika għall-evalwazzjonijiet tematiċi

L-Artikolu 24(2) u (3) għandu japplika għall-evalwazzjoni tematiċi.

Jekk l-evalwazzjoni tematika tidentifika nuqqas serju, għandu japplika l-Artikolu 23.

KAPITOLU V

DISPOŻIZZJONIJIET FINALI

Artikolu 26

Informazzjoni sensittiva

1.It-timijiet għandhom iqisu kwalunkwe informazzjoni li jiksbu matul il-qadi ta’ dmirijiethom bħala kunfidenzjali.

2.L-istatus tal-klassifikazzjoni tar-rapporti għandu jiġi ddeterminat f’konformità mad-Deċiżjoni (UE, Euratom) 2015/444. Jistgħu jiġi kklassifikati wkoll bħala “EU RESTRICTED/RESTREINT UE” abbażi ta’ rikjesta ġustifikata kif dovut tal-Istat Membru evalwat.

3.It-trażmissjoni u t-trattament tal-informazzjoni u d-dokumenti klassifikati għall-finijiet ta’ dan ir-Regolament għandhom iseħħu f’konformità mar-regoli tas-sigurtà applikabbli. Tali regoli ma għandhomx jipprekludu informazzjoni milli tkun disponibbli għall-Parlament Ewropew u għall-korpi, l-uffiċċji u l-aġenziji tal-Unjoni rilevanti msemmija fl-Artikolu 7.

Artikolu 27

Kundizzjonijiet għas-sehem tal-Irlanda

1.L-esperti tal-Irlanda għandhom jieħdu sehem biss fl-evalwazzjoni tal-parti tal-acquis ta’ Schengen li l-Irlanda ġiet awtorizzata tieħu sehem fiha.

2.L-evalwazzjonijiet għandhom ikopru biss l-applikazzjoni effettiva u effiċjenti mill-Irlanda tal-parti tal-acquis ta’ Schengen li ġiet awtorizzata tieħu sehem fiha.

3.L-Irlanda għandha tieħu sehem biss fl-adozzjoni tar-rakkomandazzjonijiet mill-Kunsill fir-rigward tal-parti tal-acquis ta’ Schengen li ġiet awtorizzata tieħu sehem fiha.

Artikolu 28

Rapportar lill-Parlament Ewropew u lill-Kunsill

Il-Kummissjoni għandha tippreżenta kull sena rapport komprensiv lill-Parlament Ewropew u lill-Kunsill dwar l-evalwazzjonijiet li jkunu saru skont dan ir-Regolament. Dak ir-rapport għandu jsir pubbliku u għandu jkun jinkludi l-informazzjoni dwar l-evalwazzjonijiet li jkunu saru matul is-sena preċedenti, dwar il-konklużjonijiet li jkunu nsiltu minnhom u dwar is-sitwazzjoni tal-mument fir-rigward tal-azzjonijiet ta’ rimedju meħuda mill-Istati Membri. Il-Kummissjoni għandha tibgħat dak ir-rapport lill-parlamenti nazzjonali. Il-Kunsill għandu jiddiskuti r-rapport u jadotta l-konklużjonijiet.

Artikolu 29

Proċedura ta’ kumitat

1.Il-Kummissjoni għandha tiġi assistita minn kumitat. Dak il-kumitat għandu jkun kumitat fis-sens tar-Regolament (UE) Nru 182/2011.

2.Fejn issir referenza għal dan il-paragrafu, għandu japplika l-Artikolu 4 tar-Regolament (UE) Nru 182/2011.

3.Fejn issir referenza għal dan il-paragrafu, għandu japplika l-Artikolu 5 tar-Regolament (UE) Nru 182/2011. Fejn il-kumitat ma jagħti l-ebda opinjoni, il-Kummissjoni ma għandhiex tadotta l-abbozz ta’ att ta’ implimentazzjoni u għandu japplika t-tielet subparagrafu tal-Artikolu 5(4) tar-Regolament (UE) Nru 182/2011.

4.Fejn issir referenza għal dan il-paragrafu, għandu japplika l-Artikolu 8 tar-Regolament (UE) Nru 182/2011, flimkien mal-Artikolu 5 tiegħu.

Artikolu 30

Rieżami

Il-Kummissjoni twettaq rieżami tal-applikazzjoni ta’ dan ir-Regolament u tippreżenta rapport lill-Kunsill fi żmien sitt xhur mill-adozzjoni tar-rapporti ta’ evalwazzjoni kollha fir-rigward tal-evalwazzjonijiet koperti mill-ewwel programm ta’ evalwazzjoni pluriennali adottat f’konformità ma’ dan ir-Regolament. Tali rieżami għandu jkopri l-elementi kollha ta’ dan ir-Regolament, inkluż it-tħaddim tal-proċeduri għall-adozzjoni ta’ atti taħt il-mekkaniżmu ta’ evalwazzjoni. Il-Kummissjoni għandha tippreżenta dak ir-rapport lill-Parlament Ewropew.

Artikolu 31

Dispożizzjonijiet tranżizzjonali

1.L-ewwel programm ta’ evalwazzjoni pluriennali skont dan ir-Regolament għandu jiġi stabbilit sal-[1 Novembru 2022] u għandu jibda fl-[1 Jannar 2023].

Dan il-programm għandu jqis l-evalwazzjonijiet kollha mwettqa skont it-tieni programm ta’ evalwazzjoni pluriennali adottat skont ir-Regolament (UE) Nru 1053/2013 u għandu jitfassal bħala kontinwazzjoni ta’ dak il-programm.

2.Il-kwestjonarju standard adottat skont ir-Regolament (UE) Nru 1053/2013 għandu jintuża sakemm jiġi stabbilit il-kwestjonarju standard previst skont l-Artikolu 14 ta’ dan ir-Regolament.

Artikolu 32

Tħassir

Ir-Regolament tal-Kunsill (UE) Nru 1053/2013 jitħassar mill-[1 ta’ Settembru 2022].

Ir-referenzi għar-Regolament imħassar għandhom jinftehmu bħala referenzi għal dan ir-Regolament u għandhom jinqraw f’konformità mat-tabella ta’ korrelazzjoni fl-Anness.

Artikolu 33

Dħul fis-seħħ u applikazzjoni

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea..

Għandu japplika mill-[1 ta’ Settembru 2022].

Dan ir-Regolament għandu jorbot fl-intier tiegħu u japplika direttament fl-Istati Membri skont it-Trattati.

Magħmul fi Brussell,

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA/TAL-INIZJATTIVA 

1.1.Titolu tal-proposta/tal-inizjattiva

1.2.Qasam/Oqsma ta’ politika kkonċernat(i) 

1.3.Titolu 11 - Ġestjoni tal-Fruntieri

Il-proposta/l-inizjattiva hija relatata ma’: 

◻ azzjoni ġdida 

◻ azzjoni ġdida b’segwitu għal proġett pilota/azzjoni preparatorja 49  

☑ l-estensjoni ta’ azzjoni eżistenti 

◻ fużjoni jew ridirezzjonar ta’ azzjoni waħda jew aktar lejn azzjoni oħra/ġdida 

1.4.Objettiv(i)

1.4.1.Objettiv(i) ġenerali

1.4.2.Objettiv(i) speċifiku/speċifiċi

1.4.3.Riżultat(i) u impatt mistennija

Speċifika l-effetti li l-proposta/l-inizjattiva jenħtieġ li jkollha fuq il-benefiċjarji/il-gruppi fil-mira.

1.4.4.Indikaturi tal-prestazzjoni

Speċifika l-indikaturi għall-monitoraġġ tal-progress u tal-kisbiet.

1.5.Raġunijiet għall-proposta/għall-inizjattiva 

1.5.1.Rekwiżit(i) li jrid(u) jiġi/u ssodisfat(i) fuq terminu qasir jew twil inkluża kronoloġija dettaljata għat-tnedija tal-implimentazzjoni tal-inizjattiva

1.5.2.Il-valur miżjud tal-involviment tal-Unjoni (dan jista’ jirriżulta minn fatturi differenti, eż. titjib fil-koordinazzjoni, ċertezza tad-dritt, effettività akbar jew komplementarjetajiet). Għall-finijiet ta’ dan il-punt, “il-valur miżjud tal-involviment tal-Unjoni” huwa l-valur li jirriżulta mill-intervent tal-Unjoni li jkun addizzjonali għall-valur li b’mod ieħor kien kieku jinħoloq mill-Istati Membri weħidhom.

1.5.3.Tagħlimiet meħuda minn esperjenzi simili fl-imgħoddi

1.5.4.Kompatibbiltà mal-Qafas Finanzjarju Pluriennali u sinerġiji possibbli ma’ strumenti xierqa oħra

1.5.5.Valutazzjoni tal-għażliet differenti ta’ finanzjament disponibbli, inkluż l-ambitu għar-riallokazzjoni

1.6.Durata u impatt finanzjarju tal-proposta/tal-inizjattiva

◻ durata limitata

–◻    fis-seħħ minn [JJ/XX]SSSS sa [JJ/XX]SSSS

–◻    Impatt finanzjarju minn SSSS sa SSSS għall-approprjazzjonijiet ta’ impenn u minn SSSS sa SSSS għall-approprjazzjonijiet ta’ pagament.

☑ durata mhux limitata

Implimentazzjoni b’perjodu ta’ tnedija mid-dħul fis-seħħ, segwita minn operazzjoni fuq skala sħiħa.

1.7.Mod(i) ta’ ġestjoni ppjanat(i) 58   

☑ Ġestjoni diretta mill-Kummissjoni

–◻ mid-dipartimenti tagħha, inkluż mill-persunal tagħha fid-delegazzjonijiet tal-Unjoni;

–◻    mill-aġenziji eżekuttivi

◻ Ġestjoni kondiviża mal-Istati Membri

◻ Ġestjoni indiretta billi jiġu fdati kompiti ta’ implimentazzjoni baġitarja:

–◻ lill-pajjiżi terzi jew lill-korpi nnominati minnhom;

–◻ lill-organizzazzjonijiet internazzjonali u lill-aġenziji tagħhom (iridu jiġu speċifikati);

–◻ lill-BEI u lill-Fond Ewropew tal-Investiment;

–◻ lill-korpi msemmija fl-Artikoli 70 u 71 tar-Regolament Finanzjarju;

–◻ lill-korpi tal-liġi pubblika;

–◻ lill-korpi rregolati mil-liġi privata b’missjoni ta’ servizz pubbliku sakemm dawn jipprovdu garanziji finanzjarji adegwati;

–◻ lill-korpi rregolati mil-liġi privata ta’ Stat Membru li jkunu fdati bl-implimentazzjoni ta’ sħubija pubblika-privata u li jipprovdu garanziji finanzjarji adegwati;

–◻ lill-persuni fdati bl-implimentazzjoni ta’ azzjonijiet speċifiċi fil-PESK skont it-Titolu V tat-TUE, u identifikati fl-att bażiku rilevanti.

–Jekk jiġi indikat iżjed minn mod ta’ ġestjoni wieħed, jekk jogħġbok ipprovdi d-dettalji fit-taqsima “Kummenti”.

Kummenti

2.MIŻURI TA’ ĠESTJONI 

2.1.Regoli ta’ monitoraġġ u ta’ rapportar 

Speċifika l-frekwenza u l-kundizzjonijiet.

2.2.Sistema/i ta’ ġestjoni u ta’ kontroll 

2.2.1.Ġustifikazzjoni tal-mod(i) ta’ ġestjoni, tal-mekkaniżmu/i għall-implimentazzjoni tal-finanzjament, tal-modalitajiet ta’ pagament u tal-istrateġija ta’ kontroll proposta

2.2.2.Informazzjoni dwar ir-riskji identifikati u s-sistema/i ta’ kontroll intern stabbilita/i għall-mitigazzjoni tagħhom

2.2.3.Stima u ġustifikazzjoni tal-kosteffettività tal-kontrolli (proporzjon tal-“kostijiet tal-kontroll ÷ il-valur tal-fondi relatati ġestiti”) u valutazzjoni tal-livelli mistennija tar-riskju ta’ żball (mal-ħlas u fl-għeluq)

2.3.Miżuri għall-prevenzjoni ta’ frodi u ta’ irregolaritajiet 

Speċifika l-miżuri ta’ prevenzjoni u ta’ protezzjoni eżistenti jew previsti, eż. mill-Istrateġija Kontra l-Frodi.

3.IMPATT FINANZJARJU STMAT TAL-PROPOSTA/TAL-INIZJATTIVA 

3.1.Intestatura/i tal-qafas finanzjarju pluriennali u l-linja/i baġitarja/i tan-nefqa affettwata/i 

·Linji baġitarji eżistenti

Skont l-ordni tal-intestaturi tal-qafas finanzjarju pluriennali u tal-linji baġitarji.

Kumment: Ta’ min jinnota li l-approprjazzjonijiet mitluba fil-kuntest tal-proposta huma koperti mill-approprjazzjonijiet diġà previsti fid-dikjarazzjoni finanzjarja leġiżlattiva li fuqha jissejjes ir-Regolament BMVI. Mhumiex jintalbu riżorsi finanzjarji u umani addizzjonali fil-kuntest ta’ din il-proposta leġiżlattiva.

3.2.Impatt finanzjarju stmat tal-proposta fuq l-approprjazzjonijiet 

3.2.1.Sommarju tal-impatt stmat fuq l-approprjazzjonijiet operazzjonali 

–◻    Il-proposta/l-inizjattiva ma teħtieġx l-użu ta’ approprjazzjonijiet operazzjonali

–☑    Il-proposta/l-inizjattiva teħtieġ l-użu ta’ approprjazzjonijiet operazzjonali, kif spjegat hawn taħt:

miljuni ta’ EUR (sa tliet pożizzjonijiet deċimali)

Jenħtieġ li din it-taqsima timtela billi tintuża d-“data baġitarja ta’ natura amministrattiva” li, qabel kollox, trid tiġi introdotta fl- Anness tad-Dikjarazzjoni Finanzjarja Leġiżlattiva (l-Anness V tar-regoli interni), li jittella’ fid-DECIDE għall-finijiet ta’ konsultazzjoni bejn is-servizzi.

miljuni ta’ EUR (sa tliet pożizzjonijiet deċimali)

miljuni ta’ EUR (sa tliet pożizzjonijiet deċimali)

3.2.2.Output stmat iffinanzjat bl-approprjazzjonijiet operazzjonali 

Approprjazzjonijiet ta’ impenn f’miljuni ta’ EUR (sa tliet pożizzjonijiet deċimali)

3.2.3.Sommarju tal-impatt stmat fuq l-approprjazzjonijiet amministrattivi 

–◻    Il-proposta/l-inizjattiva ma teħtieġx l-użu ta’ approprjazzjonijiet ta’ natura amministrattiva

–☑    Il-proposta/l-inizjattiva teħtieġ l-użu ta’ approprjazzjonijiet ta’ natura amministrattiva, kif spjegat hawn taħt:

miljuni ta’ EUR (sa tliet pożizzjonijiet deċimali)

L-approprjazzjonijiet meħtieġa għar-riżorsi umani u għal nefqa oħra ta’ natura amministrattiva se jiġu koperti mill-approprjazzjonijiet tad-DĠ li diġà jkunu assenjati għall-ġestjoni tal-azzjoni u/jew li diġà jkunu ġew riassenjati fid-DĠ, flimkien, jekk ikun meħtieġ, ma’ kwalunkwe allokazzjoni addizzjonali li tista’ tingħata lid-DĠ tal-ġestjoni skont il-proċedura annwali ta’ allokazzjoni u fid-dawl tal-limitazzjonijiet baġitarji.

3.2.3.1.Ir-rekwiżiti stmati ta’ riżorsi umani

–◻    Il-proposta/l-inizjattiva ma teħtieġx l-użu ta’ riżorsi umani.

–☑    Il-proposta/l-inizjattiva teħtieġ l-użu ta’ riżorsi umani, kif spjegat hawn taħt:

L-istima trid tiġi espressa f’unitajiet ekwivalenti għall-full-time

Ir-riżorsi umani meħtieġa se jiġu koperti mill-persunal tad-DĠ li diġà jkun assenjat għall-ġestjoni tal-azzjoni u/jew li diġà jkun ġie riassenjat fid-DĠ, flimkien, jekk ikun meħtieġ, ma’ kwalunkwe allokazzjoni addizzjonali li tista’ tingħata lid-DĠ tal-ġestjoni skont il-proċedura annwali ta’ allokazzjoni u fid-dawl tal-limitazzjonijiet baġitarji.

Deskrizzjoni tal-kompiti li jridu jitwettqu:

3.2.4.Kompatibbiltà mal-qafas finanzjarju pluriennali attwali 

Il-proposta/l-inizjattiva:

–☑    tista’ tiġi ffinanzjata kompletament permezz ta’ riallokazzjoni fl-intestatura rilevanti tal-Qafas Finanzjarju Pluriennali (QFP).

–◻    teħtieġ l-użu tal-marġni mhux allokat taħt l-intestatura rilevanti tal-QFP u/jew l-użu tal-istrumenti speċjali ddefiniti fir-Regolament dwar il-QFP.

–◻    teħtieġ reviżjoni tal-QFP.

3.2.5.Kontribuzzjonijiet ta’ partijiet terzi 

Il-proposta/l-inizjattiva:

–☑    ma tipprevedix kofinanzjament minn partijiet terzi

–◻    tipprevedi l-kofinanzjament minn partijiet terzi kif stmat hawn taħt:

Approprjazzjonijiet f’miljuni ta’ EUR (sa tliet pożizzjonijiet deċimali)

3.3.Impatt stmat fuq id-dħul 

–☑    Il-proposta/l-inizjattiva ma għandha l-ebda impatt finanzjarju fuq id-dħul.

–◻    Il-proposta/l-inizjattiva għandha l-impatt finanzjarju li ġej:

fuq ir-riżorsi proprji

fuq dħul ieħor

(2)indika, jekk id-dħul hux assenjat għal-linji tan-nefqa

miljuni ta’ EUR (sa tliet pożizzjonijiet deċimali)

Għal dħul assenjat, speċifika l-linja/i baġitarja/i tan-nefqa affettwata/i.

Rimarki oħra (eż. il-metodu/il-formula li ntużaw biex jiġi kkalkolat l-impatt fuq id-dħul jew kwalunkwe informazzjoni oħra).

(1)    Lil hinn mill-Istati Membri, iż-żona Schengen tkopri wkoll l-Iżlanda, in-Norveġja, l-Iżvizzera u l-Liechtenstein (l-hekk imsejħa “Pajjiżi Assoċjati ma’ Schengen”). L-Irlanda mhijiex parti miż-żona Schengen iżda mill-1 ta’ Jannar 2021 tapplika parzjalment l-acquis ta’ Schengen. Il-Bulgarija, il-Kroazja, Ċipru u r-Rumanija huma marbuta bl-acquis ta’ Schengen, madankollu, il-kontrolli fil-fruntieri interni għadhom ma tneħħewx fir-rigward ta’ dawn l-Istati Membri.

(2)    Id-Diskors dwar l-Istat tal-Unjoni mill-President von der Leyen waqt il-Plenarja tal-Parlament Ewropew, is-16 ta’ Settembru 2020.

(3)    COM(2020) 609 final ta’ 23.9.2020, p. 14-15.

(4)    Id-Deċiżjoni tal-Kumitat Eżekuttiv tas-16 ta’ Settembru 1998 li stabbilixxiet Kumitat Permanenti għall-evalwazzjoni u l-implimentazzjoni ta’ Schengen (SCH/ Com-ex (98) 26 def.), ĠU L 239, 22.09.2000, p 138.

(5)    Ir-Regolament tal-Kunsill (UE) Nru 1053/2013 tas-7 ta’ Ottubru 2013 li jistabbilixxi mekkaniżmu ta’ evalwazzjoni u monitoraġġ biex jivverifika l-applikazzjoni tal-acquis ta’ Schengen u li jħassar id-Deċiżjoni tal-Kumitat Eżekuttiv tas-16 ta’ Settembru 1998 li stabbilixxiet Kumitat Permanenti għall-evalwazzjoni u l-implimentazzjoni ta’ Schengen, ĠU L 295, 6.11.2013, p. 27.

(6)    Ir-Rapport tal-Kummissjoni lill-Kunsill u lill-Parlament Ewropew dwar il-Funzjonament tal-Mekkaniżmu ta’ Evalwazzjoni u Monitoraġġ ta’ Schengen skont l-Artikolu 22 tar-Regolament tal-Kunsill (UE) Nru 1053/2013. COM(2020)779 final.

(7)    SWD (2020)327 final.

(8)    Kif indikat skont ir-Rieżami ta’ ħames snin, il-Mekkaniżmu identifika nuqqasijiet serji f’10 evalwazzjonijiet fi tliet oqsma: il-ġestjoni tal-fruntieri esterni (il-Greċja, l-Iżlanda, Spanja u l-Iżvezja); il-politika komuni dwar il-viżi (il-Finlandja u n-Netherlands); is-Sistema ta’ Informazzjoni ta’ Schengen (il-Belġju, Franza, Spanja u r-Renju Unit).

(9)    Rapport annwali dwar il-Funzjonament taż-Żona Schengen (2017/2256(INI)).

(10)    Dok. tal-Kunsill 13244/2019.

(11)    Dok. tal-Kunsill 7939/21.

(12)    Il-Parlament Ewropew u l-NGOs talbu għal aċċess iffaċilitat għar-rapporti ta’ evalwazzjoni.

(13)    B’mod partikolari b’rabta mal-applikazzjoni tar-Regolament (KE) Nru 1049/2001 dwar l-aċċess għad-dokumenti.

(14)    ĠU L 295, 14.11.2019, p. 1.

(15)    SWD (2021) 119 final.

(16)    COM(2021) 277 final.

(17)    Ir-Regolament (UE) 2017/2226, ĠU L 327, 9.12.2017, p. 20.

(18)    Ir-Regolament (UE) 2018/1240, ĠU L 236, 19.9.2018, p. 1.

(19)    Ir-Regolament (UE) 2019/817, ĠU L 135, 22.5.2019, p. 27.

(20)    COM(2020)605 final ta’ 24.7.2020.

(21)    Ir-Regolament (UE) 2016/399, ĠU L 77, 23.3.2016, p. 1.

(22)    COM(2020) 796 final.

(23)    COM(2020) 612 final. Ara l-Artikolu 7.

(24)    Id-Deċiżjoni tal-Kunsill 2008/615/ĠAI dwar it-titjib tal-koperazzjoni transkonfinali, b’mod partikolari fil-ġlieda kontra t-terroriżmu u l-kriminalità transkonfinali u d-Deċiżjoni tal-Kunsill 2008/616/ĠAI dwar l-implimentazzjoni tad-Deċiżjoni 2008/615/ĠAI.

(25)    SWD(2021) 74 final ta’ 14.4.2021.

(26)    COM(2020)605 final.

(27)    Fl-2016, kien stmat li l-istabbiliment totali mill-ġdid tal-kontrolli fil-fruntieri interni jiġġenera kostijiet diretti immedjati ta’ bejn EUR 5 biljun u EUR 18-il biljun fis-sena, COM(2016) 120 final, p. 3.

(28)    ĠU L 295, 6.11.2013, p. 37.

(29)    Ara n-noti 6 u 7 f’qiegħ il-paġna.

(30)    Ara, b’mod partikolari l-Anness 2 tal-valutazzjoni tal-impatt.

(31)    L-iskeda tas-sommarju tal-valutazzjoni tal-impatt u l-opinjoni pożittiva tal-Bord tal-Iskrutinju Regolatorju huma disponibbli hawnhekk: https://ec.europa.eu/transparency/documents-register/?lang=mt .

(32)    COM(2020) 796 final ta’ 9.12.2020.

(33)    ĠU L 135, 24.5.2016, p. 53.

(34)    ĠU C , , p. .

(35)    Ir-Regolament tal-Kunsill (UE) Nru 1053/2013 tas-7 ta’ Ottubru 2013 li jistabbilixxi mekkaniżmu ta’ evalwazzjoni u monitoraġġ biex jivverifika l-applikazzjoni tal-acquis ta’ Schengen u li jħassar id-Deċiżjoni tal-Kumitat Eżekuttiv tas-16 ta’ Settembru 1998 li stabbilixxiet Kumitat Permanenti għall-evalwazzjoni u l-implimentazzjoni ta’ Schengen (ĠU L 295, 6.11.2013, p. 27).

(36)    ĠU L 55, 28.2.2011, p. 13.

(37)    Ir-Regolament (UE) 2016/399 tal-Parlament Ewropew u tal-Kunsill tad-9 ta’ Marzu 2016 dwar Kodiċi tal-Unjoni dwar ir-regoli li jirregolaw il-moviment ta’ persuni min-naħa għall-oħra tal-fruntiera (Kodiċi tal-Fruntieri ta’ Schengen) (ĠU L 77, 23.3.2016, p. 1).

(38)    Id-Deċiżjoni tal-Kummissjoni (UE, Euratom) 2015/444 tat-13 ta’ Marzu 2015 dwar ir-regoli tas-Sigurtà għall-protezzjoni ta’ informazzjoni klassifikata tal-UE (ĠU L 72, 17.3.2015, p. 53).

(39)    Id-Deċiżjoni tal-Kunsill 2009/937/UE tal-1 ta’ Diċembru 2009 li tadotta r-Regoli ta’ Proċedura tiegħu (ĠU L 325 11.12.2009, p. 35).

(40)    Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il- moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, p. 1)

(41)    Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).

(42)    Ir-Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (ĠU L 55, 28.2.2011, p. 13).

(43)    Id-Deċiżjoni tal-Kunsill 2002/192/KE tat-28 ta’ Frar 2002 rigward it-talba tal-Irlanda biex tieħu sehem f’xi dispożizzjonijiet tal-acquis ta’ Schengen ( ĠU L 64, 7.3.2002, p. 20 ).

(44)    Id-Deċiżjoni tal-Kunsill 1999/437/KE tas-17 ta’ Mejju 1999 dwar ċerti arranġamenti għall-applikazzjoni tal-Ftehim konkluż mill-Kunsill tal-Unjoni Ewropea u r-Repubblika tal-Iżlanda u r-Renju tan-Norveġja dwar l-assoċjazzjoni ta’ dawn iż-żewġ Stati mal-implimentazzjoni, l-applikazzjoni u l-iżvilupp tal-acquis ta’ Schengen (ĠU L 176, 10.7.1999, p. 31).

(45)    Id-Deċiżjoni tal-Kunsill 2008/146/KE tat-28 ta’ Jannar 2008 dwar il-konklużjoni f’isem il-Komunità Ewropea, tal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen (ĠU L 53, 27.2.2008, p. 1).

(46)    Id-Deċiżjoni tal-Kunsill 2011/350/UE tas-7 ta’ Marzu 2011 dwar il-konklużjoni, f’isem l-Unjoni Ewropea tal-Protokoll bejn l-Unjoni Ewropea, il-Komunità Ewropea, il-Konfederazzjoni Żvizzera u l-Prinċipat tal-Liechtenstein dwar l-adeżjoni tal-Prinċipat tal-Liechtenstein mal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen, relatat mal-abolizzjoni tal-verifiki mal-fruntieri interni u l-moviment tal-persuni (ĠU L 160, 18.6.2011, p. 19).

(47)    Id-Direttiva 2008/115/KE tal-Parlament Ewropew u tal-Kunsill tas-16 ta’ Diċembru 2008 dwar standards u proċeduri komuni fl-Istati Membri għar-ritorn ta’ ċittadini ta’ pajjiżi terzi li jkunu qegħdin fil-pajjiż illegalment (ĠU L 348, 24.12.2008, p. 98).

(48)    Ir-Regolament (UE) 2016/794 tal-Parlament Ewropew u tal-Kunsill tal-11 ta’ Mejju 2016 dwar l-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) u li jissostitwixxi u jħassar id-Deċiżjonijiet tal-Kunsill 2009/371/ĠAI, 2009/934/ĠAI, 2009/935/ĠAI, 2009/936/ĠAI u 2009/968/ĠAI (ĠU L 135, 24.5.2016, p. 53).

(49)    Kif imsemmi fl-Artikolu 58(2)(a) jew (b) tar-Regolament Finanzjarju.

(50)    Ir-Rapport tal-Kummissjoni lill-Kunsill u lill-Parlament Ewropew dwar il-Funzjonament tal-Mekkaniżmu ta’ Evalwazzjoni u Monitoraġġ ta’ Schengen skont l-Artikolu 22 tar-Regolament tal-Kunsill (UE) Nru 1053/2013. COM(2020)779 final.

(51)    SWD (2020)327 final.

(52)     https://ec.europa.eu/commission/presscorner/detail/mt/SPEECH_20_1655 .

(53)    COM(2020) 690 final.

(54)    Ir-Regolament tal-Kunsill (UE) Nru 1053/2012.

(55)    COM(2020) 779 final.

(56)    COM(2020) 779 final.

(57)     https://data.consilium.europa.eu/doc/document/ST-7939-2021-INIT/mt/pdf  

(58)    Id-dettalji tal-modi ta’ ġestjoni u r-referenzi għar-Regolament Finanzjarju jinsabu fuq is-sit BudgWeb: https://myintracomm.ec.europa.eu/budgweb/EN/man/budgmanag/Pages/budgmanag.aspx .

(59)    Diff. = Approprjazzjonijiet differenzjati / Mhux diff. = Approprjazzjonijiet mhux differenzjati.

(60)    EFTA: Assoċjazzjoni Ewropea tal-Kummerċ Ħieles.

(61)    Pajjiżi kandidati u, meta jkun applikabbli, pajjiżi kandidati potenzjali mill-Balkani tal-Punent.

(62)    Skont in-nomenklatura tal-baġit uffiċjali.

(63)    Assistenza teknika u/jew amministrattiva u nefqa ta’ appoġġ għall-implimentazzjoni ta’ programmi u/jew ta’ azzjonijiet tal-UE (li qabel kienu l-linji “BA”), riċerka indiretta u riċerka diretta.

(64)    L-outputs huma l-prodotti u s-servizzi li jridu jiġu pprovduti (eż.: l-għadd ta’ skambji ta’ studenti ffinanzjati, l-għadd ta’ kilometri ta’ toroq mibnija, eċċ.).

(65)    Kif deskritt fil-punt 1.4.2. “Objettiv(i) speċifiku/speċifiċi…”

(66)    Is-Sena N hija s-sena li fiha tibda l-implimentazzjoni tal-proposta/tal-inizjattiva. Issostitwixxi n-“N” bl-ewwel sena ta’ implimentazzjoni prevista (pereżempju: 2021). Agħmel l-istess għas-snin ta’ wara.

(67)    Assistenza teknika u/jew amministrattiva u nefqa ta’ appoġġ għall-implimentazzjoni ta’ programmi u/jew ta’ azzjonijiet tal-UE (li qabel kienu l-linji “BA”), riċerka indiretta u riċerka diretta.

(68)    AC= Persunal bil-Kuntratt; AL = Persunal Lokali; END = Espert Nazzjonali Sekondat; INT = Persunal tal-Aġenziji; JPD = Professjonisti Subalterni f’Delegazzjonijiet.

(69)    Sottolimitu għall-persunal estern kopert minn approprjazzjonijiet operazzjonali (li qabel kienu l-linji “BA”).

(70)    Is-Sena N hija s-sena li fiha tibda l-implimentazzjoni tal-proposta/tal-inizjattiva. Issostitwixxi n-“N” bl-ewwel sena ta’ implimentazzjoni prevista (pereżempju: 2021). Agħmel l-istess għas-snin ta’ wara.

(71)    Fir-rigward tar-riżorsi proprji tradizzjonali (id-dazji doganali, l-imposti fuq iz-zokkor), l-ammonti indikati jridu jkunu ammonti netti, jiġifieri ammonti grossi wara t-tnaqqis ta’ 20 % għall-kostijiet tal-ġbir.

IL-KUMMISSJONI EWROPEA

Brussell, 2.6.2021

COM(2021) 278 final

ANNESS

tal-

Proposta għal Regolament tal-Kunsill
dwar

it-twaqqif u l-operazzjoni ta’ mekkaniżmu ta’ evalwazzjoni u monitoraġġ biex jivverifika l-applikazzjoni tal-acquis ta’ Schengen u li jħassar ir-Regolament (UE) Nru 1053/2013

{SEC(2021) 225 final} - {SWD(2021) 119 final} - {SWD(2021) 120 final}

ANNESS

Tabella ta’ Korrelazzjoni