EUR-Lex Access to European Union law
This document is an excerpt from the EUR-Lex website
Document 52021PC0076
Recommendation for a COUNCIL DECISION authorising the opening of negotiations on an agreement between the European Union and Panama under Article XXVIII of the General Agreement on Tariffs and Trade 1994 regarding the withdrawal of its WTO tariff rate quotas on liquid milk and evaporated milk
Rakkomandazzjoni għal DEĊIŻJONI TAL-KUNSILL li tawtorizza l-ftuħ tan-negozjati dwar ftehim bejn l-Unjoni Ewropea u l-Panama taħt l-Artikolu XXVIII tal-Ftehim Ġenerali dwar it-Tariffi u l-Kummerċ tal-1994 dwar it-tneħħija tar-rati tariffarji tad-WTO tagħha fuq il-ħalib likwidu u l-ħalib evaporat
Rakkomandazzjoni għal DEĊIŻJONI TAL-KUNSILL li tawtorizza l-ftuħ tan-negozjati dwar ftehim bejn l-Unjoni Ewropea u l-Panama taħt l-Artikolu XXVIII tal-Ftehim Ġenerali dwar it-Tariffi u l-Kummerċ tal-1994 dwar it-tneħħija tar-rati tariffarji tad-WTO tagħha fuq il-ħalib likwidu u l-ħalib evaporat
COM/2021/76 final
IL-KUMMISSJONI EWROPEA
Brussell, 22.2.2021
COM(2021) 76 final
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ tan-negozjati dwar ftehim bejn l-Unjoni Ewropea u l-Panama taħt l-Artikolu XXVIII tal-Ftehim Ġenerali dwar it-Tariffi u l-Kummerċ tal-1994 dwar it-tneħħija tar-rati tariffarji tad-WTO tagħha fuq il-ħalib likwidu u l-ħalib evaporat
MEMORANDUM TA’ SPJEGAZZJONI
KUNTEST TAL-PROPOSTA
•Raġunijiet u objettivi tal-proposta
Permezz tal-komunikazzjoni G/SECRET/45 tat-12 ta’ Awwissu 2020, il-Panama nnotifikat lill-Membri tad-WTO bl-intenzjoni tagħha li tirtira l-kwoti tariffarji tagħha għall-ħalib likwidu u l-ħalib evaporat taħt il-linji tariffarji 0401.10.00, 0401.20.10, 0401.20.90, 0402.91.91, 0402.91.92, 0402.91.99, 0402.99.91, 0402.99.92 u 0402.99.99 mill-Iskeda ta’ Konċessjonijiet CXLI tagħha, f’konformità mal-proċedura stabbilita fl-Artikolu XXVIII:1 tal-Ftehim Ġenerali dwar it-Tariffi u l-Kummerċ tal-1994 (GATT 1994). Fl-istess ħin, il-Panama indikat li lesta tinnegozja u tikkonsulta mal-Membri kkonċernati (jiġifieri fornitur sostanzjali u detenturi tad-Dritt Inizjali tan-Negozjar għal-linji tariffarji kkonċernati) skont l-Artikolu XXVIII tal-GATT 1994. Għal dan il-għan, il-Panama ppreżentat statistika tal-importazzjoni skont il-pajjiż tal-oriġini li tkopri l-aħħar tliet snin li għalihom hemm id-data disponibbli.
Skont l-Artikolu XXVIII tal-GATT 1994, bħala Membru tad-WTO li jħaddam id-Dritt Inizjali ta’ Negozjar għal-linji tariffarji li jkopru l-ħalib evaporat (0402.91.91, 0402.91.92, 0402.91.99, 0402.99.91, 0402.99.92 u 0402.99.99) u bħala fornitur sostanzjali għal-linji tariffarji li jkopru l-ħalib likwidu (0401.10.00, 0401.20.10, 0401.20.90), l-UE għandha d-dritt tinnegozja kumpens xieraq mal-Panama, sabiex iżżomm livell ġenerali ta’ konċessjonijiet li ma tkunx inqas favorevoli għall-kummerċ minn qabel il-bidla prevista mill-Panama.
Skont il-Proċeduri għan-Negozjati skont l-Artikolu XXVIII adottati mill-Kunsill tal-GATT fl-10 ta’ Novembru 1980 1 , fis-26 ta’ Ottubru 2020 l-UE ppreżentat dikjarazzjoni ta’ interess bħala Membru li għandu Dritt Inizjali ta’ Negozjar fuq oġġetti koperti taħt is-SA 0402 u bħala Membru li hu fornitur sostanzjali ta’ oġġetti koperti taħt is-SA 0401 10 u 0401 20.
L-objettiv tal-proposta huwa li l-Kummissjoni tikseb awtorizzazzjoni mill-Kunsill biex tiftaħ in-negozjati skont l-Artikolu XXVIII tal-GATT 1994 mal-Panama sabiex jintlaħaq ftehim dwar kumpens adegwat għall-UE wara d-deċiżjoni tal-Panama li tirtira ċerti konċessjonijiet tariffarji għall-ħalib likwidu u għall-ħalib evaporat mill-Iskeda ta’ Konċessjonijiet CXLI.
Din il-proposta hija mingħajr preġudizzju għar-Rakkomandazzjoni tal-Kummissjoni tad-29 ta’ Lulju 2015 (COM (2015) 369 final) li tawtorizza l-ftuħ ta’ negozjati skont l-Artikolu XXIV:6 u/jew XXVIII tal-GATT 1994 mal-membri tad-WTO li jimmodifikaw il-konċessjonijiet tariffarji tagħhom.
•Konsistenza mad-dispożizzjonijiet eżistenti fil-qasam ta’ politika
Il-proposta hija konsistenti mal-politika kummerċjali tal-UE u mar-regoli tal-Organizzazzjoni Dinjija tal-Kummerċ.
•Konsistenza ma’ politiki oħra tal-Unjoni
Mhux applikabbli.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
Il-Kummissjoni ma tindikax il-bażi ġuridika sostantiva meta tirrakkomanda lill-Kunsill biex jadotta deċiżjoni li tawtorizza n-negozjati ta’ ftehim internazzjonali. Għalhekk, l-Artikolu 218(3) u (4) għandu jiġi indikat bħala bażi ġuridika għal din il-proposta.
•Sussidjarjetà (għall-kompetenza mhux esklużiva)
Skont l-Artikolu 5(3) tat-TUE, il-prinċipju tas-sussidjarjetà ma japplikax fl-oqsma tal-kompetenza esklużiva tal-UE. Il-politika kummerċjali komuni hija elenkata fost l-oqsma ta’ kompetenza esklużiva tal-Unjoni fl-Artikolu 3 tat-TFUE. In-negozjati skont l-Artikolu XXVIII tal-GATT jikkonċernaw kwistjonijiet li jaqgħu taħt il-politika kummerċjali.
•Proporzjonalità
Din ir-Rakkomandazzjoni tipproponi lill-Kunsill li jawtorizza lill-Kummissjoni tiftaħ in-negozjati, f’isem l-UE, skont l-Artikolu XXVIII tal-GATT 1994 mal-Panama. Il-Panama nnotifikat lill-Membri tad-WTO bl-intenzjoni li tinnegozja skont l-Artikolu XXVIII tal-GATT 1994 sabiex tirtira l-kwoti tariffarji tagħha għall-ħalib likwidu u għall-ħalib evaporat taħt il-linji tariffarji 0401.10.00, 0401.20.10, 0401.20.90, 0402.91.91, 0402.91.92, 0402.91.99, 0402.99.91, 0402.99.92 u 0402.99.99 mill-Iskeda ta’ Konċessjonijiet tagħha CXLI. Skont ir-regoli tad-WTO, bħala membru tad-WTO li jħaddam id-Dritt Inizjali ta’ Negozjar għal-linji tariffarji li jkopru l-ħalib evaporat (0402.91.91, 0402.91.92, 0402.91.99, 0402.99.91, 0402.99.92 u 0402.99.99) u bħala fornitur sostanzjali għal-linji tariffarji li jkopru l-ħalib likwidu (0401.10.00, 0401.20.10, 0401.20.90), l-UE għandha d-dritt tinnegozja kumpens xieraq mal-Panama. Ir-rakkomandazzjoni proposta tal-Kummissjoni hija konformi mal-prinċipju tal-proporzjonalità u meħtieġa fid-dawl tal-objettivi stabbiliti hawn fuq.
•Għażla tal-istrument
L-uniku strument disponibbli biex jintlaħaq l-objettiv huwa ftehim internazzjonali. Għalhekk hija meħtieġa awtorizzazzjoni biex jinfetħu n-negozjati għal ftehim internazzjonali.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
Mhux applikabbli.
•Konsultazzjonijiet mal-partijiet ikkonċernati
Mhux applikabbli. Skont ir-regoli tad-WTO, in-negozjati skont l-Artikolu XXVIII tal-GATT 1994 jenħtieġ li jsiru bl-akbar segretezza possibbli.
•Ġbir u użu tal-għarfien espert
Mhux applikabbli.
•Valutazzjoni tal-impatt
Mhux applikabbli.
•Idoneità regolatorja u simplifikazzjoni
Mhux applikabbli.
•Drittijiet fundamentali
Mhux applikabbli.
4.IMPLIKAZZJONIJIET BAĠITARJI
Mhux applikabbli.
5.ELEMENTI OĦRA
•Pjanijiet ta’ implimentazzjoni u arranġamenti ta’ monitoraġġ, evalwazzjoni u rappurtar
Mhux applikabbli.
•Dokumenti ta’ spjegazzjoni (għad-direttivi)
Mhux applikabbli.
•Spjegazzjoni fid-dettall tad-dispożizzjonijiet speċifiċi tal-proposta
Mhux applikabbli.
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ ta’ negozjati dwar ftehim bejn l-Unjoni Ewropea u l-Panama skont l-Artikolu XXVIII tal-Ftehim Ġenerali dwar it-Tariffi u l-Kummerċ tal-1994 rigward l-irtirar tal-kwoti tariffarji tad-WTO tagħha għall-ħalib likwidu u għall-ħalib evaporat
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikoli 218(3) u (4) tiegħu,
Wara li kkunsidra r-rakkomandazzjoni tal-Kummissjoni Ewropea,
Billi,
(1)Fit-12 ta’ Awwissu 2020, il-Panama nnotifikat lill-Membri tal-Organizzazzjoni Dinjija tal-Kummerċ (“id-WTO”) bl-intenzjoni tagħha li tvara negozjati skont l-Artikolu XXVIII tal-Ftehim Ġenerali dwar it-Tariffi u l-Kummerċ tal-1994 (“GATT 1994”) sabiex tirtira l-kwoti tariffarji tagħha għall-ħalib likwidu u għall-ħalib evaporat taħt il-linji tariffarji 0401.10.00, 0401.20.10, 0401.20.90, 0402.91.91, 0402.91.92, 0402.91.99, 0402.99.91, 0402.99.92 u 0402.99.99 mill-Iskeda ta’ Konċessjonijiet CXLI tagħha, f’konformità mal-proċedura stabbilita fl-Artikolu XXVIII:1 tal-GATT 1994.
(2)Fis-26 ta’ Ottubru 2020, l-Unjoni kkomunikat id-dikjarazzjoni ta’ interess tagħha lill-Panama bħala Membru tad-WTO li għandu Dritt Inizjali ta’ Negozjar rigward il-linji tariffarji li jkopru l-ħalib evaporat u bħala fornitur sostanzjali fir-rigward tal-linji tariffarji li jkopru l-ħalib likwidu, fir-rigward tal-konċessjonijiet li huma s-suġġett ta’ negozjati u konsultazzjoni skont l-Artikolu XXVIII tal-GATT 1994.
(3)Għaldaqstant, jenħtieġ li l-Kummissjoni tkun awtorizzata li tiftaħ in-negozjati skont l-Artikolu XXVIII tal-GATT 1994 mal-Panama sabiex jintlaħaq qbil dwar kumpens adegwat għall-Unjoni wara d-deċiżjoni tal-Panama li tirtira ċerti konċessjonijiet tariffarji għall-ħalib likwidu u għall-ħalib evaporat mill-Iskeda ta’ Konċessjonijiet CXLI,
ADOTTAT DIN ID-DEĊIŻJONI:
Artikolu 1
Il-Kummissjoni hija b’dan awtorizzata tinnegozja, f’isem l-Unjoni, ftehim mal-Panama, skont l-Artikolu XXVIII tal-GATT 1994 għal kumpens xieraq, wara d-deċiżjoni tal-Panama li tirtira l-kwoti għall-ħalib likwidu u għall-ħalib evaporat taħt il-linji tariffarji 0401.10.00, 0401.20.10, 0401.20.90, 0402.91.91, 0402.91.92, 0402.91.99, 0402.99.91, 0402.99.92 u 0402.99.99 mill-Iskeda ta’ Konċessjonijiet CXLI tagħha.
Artikolu 2
Id-direttivi għan-negozjar huma stabbiliti fl-Anness.
Artikolu 3
In-negozjati għandhom isiru b’konsultazzjoni mal-Kumitat tal-Politika Kummerċjali.
Artikolu 4
Din id-deċiżjoni hija indirizzata lill-Kummissjoni.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell, 22.2.2021
COM(2021) 76 final
ANNESS
ta'
Rakkomandazzjoni għal
DEĊIŻJONI TAL-KUNSILL
li tawtorizza l-ftuħ tan-negozjati dwar ftehim bejn l-Unjoni Ewropea u l-Panama taħt l-Artikolu XXVIII tal-Ftehim Ġenerali dwar it-Tariffi u l-Kummerċ tal-1994 dwar it-tneħħija tar-rati tariffarji tad-WTO tagħha fuq il-ħalib likwidu u l-ħalib evaporat
ANNESS
·Il-Kummissjoni għandha tinnegozja ftehim mal-Panama skont l-Artikolu XXVIII tal-GATT 1994 1 , wara d-deċiżjoni tal-Panama li tirtira l-kwoti tariffarji tagħha għall-ħalib likwidu u għall-ħalib evaporat taħt il-linji tariffarji 0401.10.00, 0401.20.10, 0401.20.90, 0402.91.91, 0402.91.92, 0402.91.99, 0402.99.91, 0402.99.92 u 0402.99.99 mill-Iskeda ta’ Konċessjonijiet CXLI tagħha.
·Il-Kummissjoni għandha tmexxi n-negozjati, bil-ħsieb li jintlaħaq qbil mal-Panama dwar kumpens adegwat wara d-deċiżjoni tal-Panama li tirtira l-kwoti tariffarji tagħha għall-ħalib likwidu u għall-ħalib evaporat mill-Iskeda ta’ Konċessjonijiet CXLI tagħha.
·Il-Kummissjoni għandha ssegwi d-dispożizzjonijiet rilevanti tad-WTO, b’mod partikolari l-Artikolu XXVIII tal-GATT 1994 u l-Ftehim dwar il-Interpretazzjoni tal-Artikolu XXVIII tal-GATT 1994 2 .
·Il-Kummissjoni għandha tirrapporta lill-Kunsill dwar l-eżitu tan-negozjati u, fejn ikun il-każ, dwar kwalunkwe problema li tista’ tinqala’ matul in-negozjati.
