EUR-Lex Access to European Union law
This document is an excerpt from the EUR-Lex website
Document 52021PC0036
Proposal for a REGULATION OF THE EUROPEAN PARLIAMENT AND OF THE COUNCIL on the extension of the term of Community plant variety rights for the species asparagus and the species groups flower bulbs, woody small fruits and woody ornamentals
Proposta għal REGOLAMENT TAL-PARLAMENT EWROPEW U TAL-KUNSILL dwar l-estensjoni tat-terminu tad-drittijiet ta’ varjetajiet ta’ pjanti fil-Komunità għall-ispeċijiet tal-ispraġ, u għall-gruppi tal-ispeċijiet tal-basal tal-fjuri, għall-pjanti għudin bi frott żgħir u għall-pjanti ornamentali għudin
Proposta għal REGOLAMENT TAL-PARLAMENT EWROPEW U TAL-KUNSILL dwar l-estensjoni tat-terminu tad-drittijiet ta’ varjetajiet ta’ pjanti fil-Komunità għall-ispeċijiet tal-ispraġ, u għall-gruppi tal-ispeċijiet tal-basal tal-fjuri, għall-pjanti għudin bi frott żgħir u għall-pjanti ornamentali għudin
COM/2021/36 final
IL-KUMMISSJONI EWROPEA
Brussell, 3.2.2021
COM(2021) 36 final
2021/0019(COD)
Proposta għal
REGOLAMENT TAL-PARLAMENT EWROPEW U TAL-KUNSILL
dwar l-estensjoni tat-terminu tad-drittijiet ta’ varjetajiet ta’ pjanti fil-Komunità għall-ispeċijiet tal-ispraġ, u għall-gruppi tal-ispeċijiet tal-basal tal-fjuri, għall-pjanti għudin bi frott żgħir u għall-pjanti ornamentali għudin
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
L-inizjattiva tikkonċerna Regolament adottat abbażi tal-Artikolu 118(1) tat-Trattat dwar il-Funzjonament tal-Unjoni Ewropea dwar l-estensjoni tat-terminu tal-protezzjoni minn 25 sena għal 30 sena għall-ispeċijiet tal-ispraġ, u għall-gruppi tal-ispeċijiet tal-basal tal-fjuri, tal-pjanti għudin bi frott żgħir u tal-pjanti ornamentali għudin, kif hemm stabbilit fil-preżent fl-Artikolu 19 tar-Regolament tal-Kunsill (KE) Nru 2100/94 dwar id-drittijiet ta’ varjetajiet tal-pjanti fil-Komunità. Din il-protezzjoni addizzjonali hija attwalment fis-seħħ għal speċijiet ta’ siġar, dwieli u patata. It-talba li jkun hemm estensjoni saret mill-Kunsill Amministrattiv tal-Uffiċċju Komunitarju tal-Varjetajiet tal-Pjanti (CPVO) wara talba min-nissiela tal-pjanti rrappreżentati mill-organizzazzjonijiet tan-nissiela tal-pjanti Ciopora, Euroseeds u Plantum, kif ukoll mill-kumpanija James Hutton Ltd.
Is-CPVO u l-Kummissjoni (DĠ SANTE) wettqu analiżi dwar jekk għall-ispeċijiet ikkonċernati hemmx xi diffikultajiet tekniċi fil-kultivazzjoni li jeħtieġu nefqa fuq attivitajiet ta’ riċerka għal perjodu twil, jekk il-multiplikazzjoni tal-materjal ta’ propagazzjoni tiħux fit-tul, jekk il-varjetajiet il-ġodda jiżvelawx valur kummerċjali biss fit-tul u r-redditu għall-investimenti f’attivitajiet ta’ riċerka huwa possibbli biss fi stadju pjuttost tard tal-protezzjoni meta mqabbel ma’ għelejjel ortikulturali jew agrikoli oħra. L-analiżi li twettqet uriet li għall-ispeċijiet tal-ispraġ, u għall-gruppi tal-ispeċijiet tal-basal tal-fjuri, għall-pjanti għudin bi frott żgħir u għall-pjanti ornamentali għudin, jenħtieġ li t-terminu tal-protezzjoni jittawwal b’ħames snin sabiex jiġi stabbilit ambjent legali li jwassal għal rifinanzjament ekwu għar-riċerka u għall-kultivazzjoni.•Konsistenza mad-dispożizzjonijiet ta’ politika eżistenti fil-qasam tal-politika
Din hija implimentazzjoni teknika tar-rekwiżiti eżistenti u b’hekk hija konsistenti mad-dispożizzjonijiet ta’ politika eżistenti fil-qasam ta’ politika tad-drittijiet tan-nissiela Ewropej tal-pjanti.
•Konsistenza ma’ politiki oħrajn tal-Unjoni
Din il-proposta tikkonforma mar-regoli tal-Unjoni.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
Il-bażi legali ta’ dan l-Att hija l-Artikolu 118(1) tat-Trattat dwar il-Funzjonament tal-Unjoni Ewropea, li, f’konformità mal-proċedura leġiżlattiva ordinarja jagħti s-setgħa lill-Parlament Ewropew u lill-Kunsill jistabbilixxu l-miżuri għall-ħolqien ta’ drittijiet tal-proprjetà intellettwali Ewropej li jipprovdu protezzjoni uniformi tad-drittijiet tal-proprjetà intellettwali madwar l-Unjoni u għall-istabbiliment ta’ sistemi ċentralizzati ta’ awtorizzazzjoni, ta’ koordinazzjoni u ta’ superviżjoni madwar l-Unjoni.
•Sussidjarjetà (għall-kompetenza mhux esklużiva)
Ir-rekwiżiti għad-drittijiet tan-nissiela tal-pjanti huma rregolati fil-livell tal-Unjoni, u sabiex jiġi garantit l-istess perjodu ta’ protezzjoni għad-drittijiet tan-nissiela tal-pjanti, hija meħtieġa azzjoni fil-livell tal-Unjoni.
•Proporzjonalità
Din hija l-unika forma possibbli ta’ azzjoni tal-Unjoni biex jintlaħaq l-għan imfittex.
•Għażla tal-istrument
L-istrument legali huwa previst mill-bażi legali, l-Artikolu 118 tat-Trattat dwar il-Funzjonament tal-Unjoni Ewropea.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
Ma japplikax
•Konsultazzjonijiet mal-partijiet ikkonċernati
Diversi organizzazzjonijiet tan-nissiela tal-pjanti talbu li jittawwal il-perjodu ta’ protezzjoni għal ċerti speċijiet. Il-partijiet ikkonċernati ewlenin kollha u l-Istati Membri ġew infurmati u kkonsultati kemm fil-Kunsill Amministrattiv tas-CPVO, li rriżulta f’talba formali tal-korp lill-Kummissjoni, kif ukoll fil-Kumitat Permanenti dwar il-Pjanti, l-Annimali, l-Ikel u l-Għalf. Ma kienet meħtieġa l-ebda konsultazzjoni separata, peress li l-inizjattiva tikkonċerna biss l-implimentazzjoni teknika ta’ regoli eżistenti u ma saret l-ebda konsultazzjoni separata f’inizjattivi simili fl-imgħoddi.
•Ġbir u użu tal-għarfien espert
Il-Kummissjoni wettqet analiżi teknika flimkien mas-CPVO.
•Valutazzjoni tal-impatt
Dan huwa att ta’ natura teknika u jimplimenta r-regoli eżistenti bbażati fuq l-esperjenza tal-partijiet ikkonċernati. Għaldaqstant, mhijiex meħtieġa valutazzjoni tal-impatt.
•Idoneità regolatorja u simplifikazzjoni
Din il-proposta mhijiex marbuta mar-REFIT. Din il-proposta ta’ perjodu addizzjonali ta’ protezzjoni ta’ ħames snin tgħin biex jinkiseb redditu suffiċjenti tal-investimenti li jkunu saru u tinkoraġġixxi t-tnissil ta’ varjetajiet imtejba ġodda għall-benefiċċju tal-kultivaturi, tal-konsumaturi u tas-soċjetà inġenerali. Barra minn hekk, l-aċċess, b’mod partikolari tal-SMEs, għas-swieq tal-esportazzjoni jista’ jiġi ffaċilitat. In-natura tal-problema ma tinbidilx meta s-soċjetà tagħmel użu akbar mill-internet u mill-midja soċjali ħlief li l-offerta ta’ varjetajiet ġodda ta’ pjanti fuq l-internet (bejgħ bl-internet) lill-konsumaturi x’aktarx li tkompli tiżdied.
•Drittijiet fundamentali
Id-dritt għall-proprjetà intellettwali, l-Artikolu 17(2) tal-Karta tad-Drittijiet Fundamentali tal-Unjoni Ewropea 1
4.IMPLIKAZZJONIJIET BAĠITARJI
Le
5.ELEMENTI OĦRA
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rappurtar
Ma japplikax
•Dokumenti ta’ spjegazzjoni (għad-direttivi)
Ma japplikax
•Spjegazzjoni fid-dettall tad-dispożizzjonijiet speċifiċi tal-proposta
L-għan ta’ din il-proposta huwa li tiżdied il-protezzjoni tad-Drittijiet ta’ Varjetajiet ta’ Pjanti fil-Komunità minn 25 għal 30 sena għall-ispeċijiet tal-ispraġ, u għall-gruppi tal-ispeċijiet tal-basal tal-fjuri, għall-pjanti għudin bi frott żgħir u għall-pjanti ornamentali għudin. Għal dan il-għan huwa previst Regolament li jipprevedi estensjoni, u fl-Artikolu 2(1) it-terminu tal-protezzjoni għall-ispeċijiet ikkonċernati huwa mtawwal b’ħames snin.
Barra minn hekk, l-Artikolu 2(2) ta’ din il-proposta għandu l-għan li jqis it-tul tad-drittijiet nazzjonali ta’ varjetajiet ta’ pjanti. Fil-każ tal-varjetajiet li għalihom ikun ġie konċess dritt nazzjonali għall-varjetà ta’ pjanta qabel il-konċessjoni tad-dritt ta’ varjetajiet ta’ pjanti fil-Komunità, iżda li għalihom ma japplikax ir-raba’ inċiż tal-Artikolu 116(4) tar-Regolament 1994/2100 KE, l-estensjoni msemmija fl-Artikolu 2(2) ta’ din il-proposta għandha titnaqqas bl-itwal perjodu ta’ żmien fi snin sħaħ li matulu kull dritt jew drittijiet nazzjonali ta’ proprjetà konċessi kienu effettivi fi Stat Membru rigward l-istess varjetà qabel il-konċessjoni tad-dritt ta’ varjetajiet ta’ pjanti fil-Komunità.
2021/0019 (COD)
Proposta għal
REGOLAMENT TAL-PARLAMENT EWROPEW U TAL-KUNSILL
dwar l-estensjoni tat-terminu tad-drittijiet ta’ varjetajiet ta’ pjanti fil-Komunità għall-ispeċijiet tal-ispraġ, u għall-gruppi tal-ispeċijiet tal-basal tal-fjuri, għall-pjanti għudin bi frott żgħir u għall-pjanti ornamentali għudin
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-ewwel paragrafu tal-Artikolu 118 tiegħu,
Wara li kkunsidraw il-proposta tal-Kummissjoni Ewropea,
Wara li l-abbozz tal-att leġiżlattiv intbagħat lill-parlamenti nazzjonali,
Wara li kkunsidraw l-opinjoni tal-Kumitat Ekonomiku u Soċjali Ewropew 2
Filwaqt li jaġixxu skont il-proċedura leġiżlattiva ordinarja 3
Billi:
(1)Id-diffikultajiet tekniċi fit-tnissil, minħabba kuntesti ġenetiċi kumplessi jew minħabba r-riproduzzjoni bil-mod jew teknikament ikkumplikata tal-ispeċijiet tal-ispraġ, u tal-gruppi ta’ speċijiet tal-basal tal-fjuri, tal-pjanti għudin bi frott żgħir u tal-pjanti ornamentali għudin jeħtieġu investimenti għall-attivitajiet ta’ riċerka. Ladarba tingħata l-protezzjoni għall-ispeċijiet imsemmija, iridu jgħaddu s-snin biex il-pjanti jimmultiplikaw u jinbena stokk li jkun kbir biżżejjed biex jiġġenera dħul raġonevoli. Għaldaqstant, iż-żmien tad-detentur tad-drittijiet biex jiġġenera introjtu abbażi tal-protezzjoni huwa limitat għal-raġunijiet prattiċi. Biex jitħeġġeġ l-investiment fir-riċerka u l-iżvilupp għal dawn il-varjetajiet jeħtieġ li jittawwal il-perjodu tal-protezzjoni tal-varjetajiet u li jiġu inċentivizzati l-attivitajiet ta’ tnissil biex jiġu żviluppati varjetajiet ġodda li jissodisfaw il-ħtiġijiet tal-bdiewa u tal-konsumaturi u biex jiġi ffaċċjat l-impatt tat-tibdil fil-klima. Biex irendu l-profitti, dawk l-investimenti jeħtieġu perjodu itwal minn dak tal-maġġoranza l-kbira tal-ispeċijiet l-oħra, bħall-għelejjel agrikoli, li spiss ikollhom ħajja iqsar u firxa akbar u aktar wiesgħa ta’ klijenti.
(2)Barra minn hekk, l-introduzzjoni fis-suq u l-adozzjoni fis-suq ta’ varjetà ġdida ta’ dawk l-ispeċijiet jeħtieġu żmien itwal, peress li l-esperjenza wriet li varjetà ġdida tiżvela l-valur kummerċjali tagħha fit-tul biss. Għal dawn ir-raġunijiet, ir-rifużjoni ekwa tal-investiment fir-riċerka hija possibbli biss fi stadju pjuttost tard tal-protezzjoni ta’ dawk l-ispeċijiet meta mqabbla mal-għelejjel l-oħra.
(3)Sabiex jiġi stabbilit ambjent legali li jwassal għall-kisba ta’ rifużjoni ekwitabbli, jixraq li t-terminu tad-drittijiet ta’ varjetajiet ta’ pjanti fil-Komunità li jikkonċerna l-ispeċijiet tal-ispraġ, u l-gruppi tal-ispeċijiet tal-basal tal-fjuri, tal-pjanti għudin bi frott żgħir u tal-pjanti ornamentali għudin, jittawwal b’ħames snin oħra.
(4)Għal raġunijiet ta’ konsistenza, jenħtieġ li din l-estensjoni tapplika għad-drittijiet kollha ta’ varjetajiet ta’ pjanti fil-Komunità fir-rigward tal-ispeċijiet tal-ispraġ, u tal-gruppi tal-ispeċijiet tal-basal tal-fjuri, tal-pjanti għudin bi frott żgħir u tal-pjanti ornamentali għudin.
(5)Jenħtieġ li l-perjodu tal-estensjoni jitnaqqas jekk id-drittijiet nazzjonali ta’ proprjetà fir-rigward ta’ dawk il-varjetajiet kienu effettivi fi Stat Membru qabel l-għoti ta’ dritt ta’ varjetajiet ta’ pjanti fil-Komunità u, għaldaqstant, ikunu diġà ppermettew lin-nissiela tal-pjanti jisfruttaw il-varjetajiet tagħhom.
ADOTTAW DAN IR-REGOLAMENT:
Artikolu 1
Definizzjonijiet
Għall-finijiet ta’ dan ir-Regolament, japplikaw id-definizzjonijiet li ġejjin:
(1)“il-varjetajiet tal-pjanti kkonċernati” tfisser il-varjetajiet tal-pjanti tal-ispeċijiet tal-ispraġ, u tal-gruppi tal-ispeċijiet tal-basal tal-fjuri, tal-pjanti għudin bi frott żgħir u tal-pjanti ornamentali għudin;
(2)“it-terminu tad-dritt” tfisser it-terminu, li jirriżulta mill-Artikolu 19(1) tar-Regolament tal-Kunsill (KE) Nru 2100/94, ta’ dritt ta’ varjetajiet ta’ pjanti fil-Komunità.
Artikolu 2
Estensjoni tat-terminu tad-drittijiet
1.It-terminu tad-dritt tal-varjetajiet ta’ pjanti kkonċernati għandu jittawwal b’ħames snin. Dik l-estensjoni għandha tapplika għad-drittijiet mogħtija qabel l-1 ta’ Lulju 2021, f’dik id-data, jew warajha.
2.Il-Paragrafu 1 huwa mingħajr preġudizzju għal:
(a)l-Artikolu 3 ta’ dan ir-Regolament;
(b)ir-raba’ inċiż tal-Artikolu 116(4) tar-Regolament (KE) Nru 2100/94.
Artikolu 3
Tnaqqis tal-estensjoni tat-terminu tad-drittijiet
1.Għall-varjetajiet tal-pjanti msemmija fil-paragrafu 2, l-estensjoni tat-terminu previst fl-Artikolu 2 għandha titnaqqas bl-itwal perjodu fi snin kalendarji sħaħ li matulhom kwalunkwe dritt jew drittijiet nazzjonali ta’ proprjetà mogħtija kienu effettivi fi Stat Membru fir-rigward tal-istess varjetà qabel l-għoti tad-dritt ta’ varjetajiet ta’ pjanti fil-Komunità.
2.Il-paragrafu 1 għandu japplika għall-varjetajiet ta’ pjanti kkonċernati li mhumiex soġġetti għar-raba’ inċiż tal-Artikolu 116(4) tar-Regolament (KE) Nru 2100/94 u li jkunu ngħataw dritt nazzjonali wieħed jew aktar tal-varjetajiet ta’ pjanti qabel l-għoti tad-dritt ta’ varjetajiet ta’ pjanti fil-Komunità.
Artikolu 4
Dħul fis-seħħ u applikazzjoni
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu japplika mill-1 ta’ Lulju 2021.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell,
Għall-Parlament Ewropew Għall-Kunsill
Il-President Il-President
