IL-KUMMISSJONI EWROPEA
Brussell, 28.5.2020
COM(2020) 446 final
2020/0109(APP)
Proposta għal
REGOLAMENT TAL-KUNSILL
li jemenda r-Regolament tal-Kunsill (UE, Euratom) Nru 1311/2013 li jistabbilixxi l-qafas finanzjarju pluriennali għas-snin 2014-2020
MEMORANDUM TA’ SPJEGAZZJONI
1.KUNTEST TAL-PROPOSTA
Il-ħtiġijiet ta’ finanzjament għall-investimenti urġenti li se jirriżultaw minħabba l-kriżi huma bla preċedent. Għaldaqstant hemm il-bżonn ta’ reazzjoni deċiżiva u straordinarja fil-livell tal-Unjoni. L-appoġġ finanzjarju jeħtieġ li jingħata fil-bidu fl-ewwel snin kruċjali tal-irkupru, inkluż fl-2020. Dan se jgħin biex jitnaqqas id-distakk bejn l-ewwel miżuri ta’ reazzjoni u l-irkupru fit-tul. Id-daqs tal-intervent u s-sura tiegħu jridu jirreflettu l-kobor u l-urġenza tal-isfidi li qed tħabbat wiċċha magħhom l-Unjoni. Il-Kummissjoni qiegħda tipproponi l-isfruttament tal-potenzjal sħiħ tal-baġit tal-UE għall-mobilizzazzjoni tal-investiment u għall-għoti tal-appoġġ finanzjarju fil-bidu matul l-ewwel xhur u snin kruċjali tal-irkupru.
F’dawn l-aħħar ġimgħat il-Kummissjoni użat il-flessibbiltà kollha li għad fadal fil-baġit attwali tal-UE biex kull euro disponibbli jintuża biex jiġu salvati l-ħajjiet u biex jitħares l-għajxien tan-nies. Dawn il-miżuri wrew is-setgħa tal-baġit tal-UE li jipprovdi appoġġ sostanzjali u f’waqtu lil Stati Membri fi kriżi. Huma eżawrew ukoll il-flessibbiltà kollha li għad baqagħlu l-baġit attwali tal-UE, li enfasizza l-ħtieġa urġenti li jiddaħħlu fis-seħħ miżuri ġodda li se jixprunaw il-fażijiet tal-irkupru kruċjali li jmiss.
Għaldaqstant jeħtieġ li r-Regolament tal-Kunsill (UE, Euratom) Nru 1311/2013 tat-2 ta’ Diċembru 2013 li jistabbilixxi l-qafas finanzjarju pluriennali għas-snin 2014-2020 jiġi rivedut biex l-appoġġ finanzjarju jkun jista’ jingħata fil-bidu u malajr kemm jista’ jkun b’bidu fl-2020. Prinċipalment dan jikkonċerna kwalunkwe ħtieġa li l-proviżjonament tal-Istrument ta’ Appoġġ tas-Solvenza fil-kuntest tal-Fond Ewropew għall-Investiment Strateġiku jiġi ffinanzjat minn kmieni u l-kontribuzzjoni tal-Unjoni għaż-żieda fil-kapital tal-Fond Ewropew tal-Investiment, li l-infiq addizzjonali ta’ koeżjoni permezz tar-REACT-EU jiġi kkonċentrat fil-bidu, u ż-żieda fil-mezzi finanzjarji tal-Fond Ewropew għall-Iżvilupp Sostenibbli.
2.ELEMENTI ĠURIDIĊI TAL-PROPOSTA
Sabiex jiġi mobilizzat l-investiment u l-appoġġ finanzjarju jingħata fil-bidu matul l-ewwel xhur kruċjali tal-irkupru, din ir-reviżjoni tipprevedi ż-żieda tal-limiti massimi tan-nefqa tal-qafas pluriennali 2014-2020 għas-sena 2020.
Il-Kummissjoni qed tipproponi li żżid il-limiti massimi tal-approprjazzjonijiet ta’ impenn għas-sena 2020, kif ġej:
–il-limitu massimu tal-approprjazzjonijiet ta’ impenn għas-subintestatura 1a “Kompetittività għat-tkabbir u l-impjiegi” qiegħed jiżdied għal-livell ta’ EUR 25 681 miljun (prezzijiet tal-2011);
–il-limitu massimu tal-approprjazzjonijiet ta’ impenn għas-subintestatura 1b “Koeżjoni ekonomika, soċjali u territorjali” qiegħed jiżdied għal-livell ta’ EUR 53 109 miljun (prezzijiet tal-2011);
–il-limitu massimu tal-approprjazzjonijiet ta’ impenn għall-Intestatura 4 “Ewropa Globali” qiegħed jiżdied għal-livell ta’ EUR 9 665 miljuni (prezzijiet tal-2011);
Iż-żidiet proposti tal-limiti massimi tal-impenji se jirriżultaw f’żieda fil-ħtiġijiet ta’ pagament ta’ EUR 6 040 miljuni, li huwa ammont kompatibbli mal-limiti massimi tal-pagamenti annwali tal-2020 skont kif ġie aġġustat fl-aġġustament tekniku ta’ Mejju 2019. Għal din ir-raġuni, il-Kummissjoni ma tipproponix li tirrevedi l-limitu massimu tal-pagamenti tal-2020.
Għaldaqstant l-Anness tar-Regolament (UE, Euratom) Nru 1311/2013 jenħtieġ li jiġi emendat u ssostitwit mill-Anness ta’ din il-proposta.
F’konformità mal-Artikolu 135(2) tal-Ftehim dwar il-ħruġ tar-Renju Unit u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika, dan ir-Regolament jenħtieġ li ma japplikax għar-Renju Unit sa fejn iħalli impatt fuq l-obbligi finanzjarji tar-Renju Unit meta jitqabblu ma’ dawk fid-data tal-ħruġ tar-Renju Unit mill-Unjoni.
2020/0109 (APP)
Proposta għal
REGOLAMENT TAL-KUNSILL
li jemenda r-Regolament tal-Kunsill (UE, Euratom) Nru 1311/2013 li jistabbilixxi l-qafas finanzjarju pluriennali għas-snin 2014-2020
IL-KUNSILL TAL-UNJONI EWROPEA,
Wara li kkunsidra it-Trattat dwar il-Funzjonament tal-Unjoni Ewropea, u b’mod partikulari l-Artikolu 312 tiegħu,
Wara li kkunsidra l-proposta tal-Kummissjoni Ewropea,
Wara li l-abbozz tal-att leġiżlattiv intbagħat lill-parlamenti nazzjonali,
Wara li kkunsidra l-kunsens tal-Parlament Ewropew,
Filwaqt li jaġixxi b’konformità ma’ proċedura leġiżlattiva speċjali,
Billi:
(1)It-tifqigħa tal-COVID-19 u l-kriżi assoċjata li laqtet lis-saħħa pubblika u lill-ekonomija tirrekjedi miżuri straordinarji. Il-ħtiġijiet relatati mal-finanzjament ta’ investimenti urġenti li se jirriżultaw minħabba l-kriżi huma bla preċedent. Għaldaqstant hemm il-ħtieġa għal reazzjoni deċiżiva u straordinarja fil-livell tal-Unjoni, u l-appoġġ finanzjarju jeħtieġ li jingħata fil-bidu matul l-ewwel snin kruċjali tal-irkupru, inkluż fl-2020.
(2)Jeħtieġ li din tkopri l-ħtiġijiet finanzjarji tal-2020 li jirriżultaw minn inizjattivi ġodda li jindirizzaw l-irkupru. Dan jikkonċerna l-Istrument ta’ Appoġġ tas-Solvenza u l-kontribuzzjoni tal-Unjoni għaż-żieda fil-kapital tal-Fond Ewropew tal-Investiment, it-tisħiħ tal-għan tal-Investiment għat-tkabbir u l-impjiegi fil-qafas tal-Fondi Strutturali u ta’ Investiment Ewropej (REACT-EU), u l-Fond Ewropew għall-Iżvilupp Sostenibbli.
(3)Għaldaqstant huwa meħtieġ li jiżdiedu l-limiti massimi tal-approprjazzjonijiet ta’ impenn tas-Sottointestaturi 1a u 1b u tal-Intestatura 4 għas-sena 2020. Għaldaqstant, jenħtieġ li l-Anness tar-Regolament (UE, Euratom) Nru 1311/2013 jiġi emendat kif xieraq.
(4)F’konformità mal-Artikolu 135(2) tal-Ftehim dwar il-ħruġ tar-Renju Unit u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika, dan ir-Regolament jenħtieġ li ma japplikax għar-Renju Unit sa fejn iħalli impatt fuq l-obbligi finanzjarji tar-Renju Unit meta jitqabblu ma’ dawk fid-data tal-ħruġ tar-Renju Unit mill-Unjoni.
ADOTTA DAN IR-REGOLAMENT:
Artikolu 1
L-Anness tar-Regolament (UE, Euratom) Nru 1311/2013 huwa sostitwit bit-test stabbilit fl-Anness ta’ dan ir-Regolament.
Artikolu 2
Dan ir-Regolament għandu jidħol fis-seħħ fil-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament ma għandux iżid l-obbligi finanzjarji tar-Renju Unit meta mqabbla ma’ dawk li kellu fid-data tal-ħruġ tiegħu mill-Unjoni.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell,