IL-KUMMISSJONI EWROPEA

Brussell, 28.5.2020

COM(2020) 445 final

2018/0135(CNS)

Proposta emendata għal

DEĊIŻJONI TAL-KUNSILL

dwar is-sistema ta’ Riżorsi Proprji tal-Unjoni Ewropea

MEMORANDUM TA’ SPJEGAZZJONI

1.INTRODUZZJONI

Il-pandemija tal-COVID-19 tikkostitwixxi kriżi mifruxa u serja tas-saħħa pubblika. Din taffettwa b’mod gravi liċ-ċittadini, is-soċjetajiet u l-ekonomiji madwar id-dinja. Il-firxa tal-kriżi tas-saħħa u r-risponsi ta’ politika li ttieħdu għall-kontroll tagħha huma bla preċedent. Għaldaqstant, l-intensità tal-impatt soċjo-ekonomiku tagħha huwa inċert, u dan f’livell straordinarju. Diġà f’dan l-istadju, hija ħaġa ċerta li hija tippreżenta sfidi kbar u mingħajr preċedent għas-sistemi finanzjarji u ekonomiċi tal-Istati Membri. Skont it-tbassir ekonomiku tar-rebbiegħa tal-Kummissjoni 1 , il-PDG tal-UE huwa mbassar li jonqos b’madwar 7,5 % din is-sena, rata ħafna agħar minn dik tal-kriżi finanzjarja dinjija tal-2009, u li jirkupra b’6 % biss fl-2021 filwaqt li r-rata tal-qgħad tal-UE hija mistennija li titla’ għal 9% fl-2020, b’riskju li jiżdiedu l-faqar u l-inugwaljanza..

B’rispons, l-Istati Membri adottaw miżuri ekonomiċi u finanzjarji diskrezzjonali eċċezzjonali. Flimkien mal-effett tal-hekk imsejħa “stabbilizzaturi awtomatiċi”, jiġifieri pagamenti previsti skont sistemi tal-assigurazzjoni tal-qgħad u tas-sigurtà soċjali flimkien ma’ telf fid-dħul mit-taxxa, dawk il-miżuri għandhom influwenza konsiderevoli fuq il-finanzi pubbliċi tagħhom b’defiċit aggregat tal-amministrazzjoni pubblika li jogħla malajr din is-sena minn 0,6 % tal-PDG fl-2019 għal 8,5 % tal-PDG kemm fiż-Żona tal-Euro kif ukoll fl-Unjoni.

Ix-xokk għall-ekonomija tal-UE huwa simetriku fis-sens li l-pandemija laqtet lill-Istati Membri kollha, iżda l-impatt tal-pandemija huwa differenti mhux ħażin bejn l-Istati Membri, bħal ma hi differenti l-ħila tagħhom li jassorbu x-xokk ekonomiku u fiskali u l-jirrispondu għalih, li jiddependi wkoll fuq l-istrutturi ekonomiċi speċifiċi u l-kunduzzjonijiet inizjali tal-Istati Membri. B’riżultat ta’ dan, hemm riskju li l-kriżi se twessa’ d-disparitajiet fl-Unjoni b’mod li jkun ta’ theddid għar-reżiljenza ekonomika u soċjali kollettiva. Din l-istampa ġenerali hija kkonfermata wkoll mill-evalwazzjoni dettaljata tal-bżonnijiet 2 .

L-Unjoni aġixxiet malajr biex tipprovdi rispons kollettiv koordinat u qawwi għall-konsegwenzi soċjali u ekonomiċi tal-kriżi, fil-limiti tal-Qafas Finanzjarju Pluriennali preżenti li se jiskadi fl-2020. Dak ir-rispons jikkumplimenta l-miżuri ekonomiċi u finanzjarji diskrezzjonali meħuda mill-Istati Membri.

Il-kriżi tista’ tirriżulta fi ħsara dejjiema għat-tessut ekonomiku tal-Unjoni sakemm ma tiġix kontrapposta minn rispons ta’ politika li jkun proporzjonat u fi żmien qasir u medju fil-livell tal-Unjoni. Hemm bżonn urġenti li jsir provvediment immedjat ta’ kapaċità finanzjarja addizzjonali disponibbli biex jiġu appoġġati l-irkupru u r-reżiljenza madwar l-Unjoni sabiex tkun tista’ tintlaqa’ din l-isfida.

Ir-rispons għall-kriżi jrid ikun komprensiv, qalbieni u sostnut. Pjan komprensiv għall-irkupru Ewropew se jkun jeħtieġ investiment pubbliku u privat massiv fil-livell Ewropew biex l-Unjoni titqiegħed bis-sod fuq il-perkors lejn irkupru sostenibbli u reżiljenti, bil-ħolqien ta’ impjiegi ta’ kwalità tajba u bit-tiswija tad-dannu immedjat li ġabet magħha l-pandemija tal-Covid 19 filwaqt li jingħata appoġġ għall-prijoritajiet ekoloġiċi u diġitali tal-Unjoni. Il-baġit fit-tul tal-UE, imsaħħaħ mill-Istrument Ewropew ta’ Rkupru tal-Unjoni l-ġdid, se jkun l-għodda ewlenija.

In-natura eċċezzjonali tas-sitwazzjoni ekonomika u soċjali teħtieġ miżuri eċċezzjonali li jappoġġaw l-irkupru u r-reżiljenza tal-ekonomiji. Sabiex jinkisbu dawk l-objettivi, jeħtieġ li l-Unjoni tipprovdi lilha nnifisha bil-mezzi neċessarji u tieħu l-miżuri xierqa biex tindirizza l-isfidi li ġġib magħha l-pandemija tal-COVID-19. Għal din ir-raġuni, huwa xieraq li jkun permess li parti mill-finanzjament meħtieġ jiġi mmobilizzat permezz ta’ teħid ta’self fuq is-swieq tal-kapital. Dan it-teħid ta’self jitħallas lura meta l-Unjoni terġa’ lura għal perkors ta’ tkabbir pożittiv.

2.Il-KONTENUT TAL-PROPOSTA EMENDATA 

Il-ħtieġa li l-UE tipprovdi lilha nnifisha bil-mezzi biex tilħaq l-objettiv tagħha

Skont il-proposta emendata, il-Kummissjoni se tkun awtorizzata tissellef fondi f’isem l-Unjoni sal-ammont massimu ta’ EUR 750 biljun fi prezzijiet tal-2018 fis-swieq tal-kapital. Ir-rikavat se jiġi ttrasferit lejn programmi tal-Unjoni f’konformità mal-Istrument ta’ Rkupru tal-Unjoni Ewropea. Minħabba li l-Istrument ta’ Rkupru tal-Unjoni Ewropea huwa rispons eċċezzjonali għal dawk iċ-ċirkostanzi temporanji iżda estremi, is-setgħat mogħtija lill-Kummissjoni f’din id-Deċiżjoni biex tkun tista’ tissellef huma b’mod ċar limitati fl-estensjoni tagħhom, fit-tul ta’ żmien u fil-kamp ta’ applikazzjoni. Dan ineħħi l-possibbiltà li s-setgħat eċċezzjonali skont din il-proposta jintużaw għal xi skop ieħor għajr dak li jiġu indirizzati l-konsegwenzi ekonomiċi u soċjali diretti tal-pandemija tal-COVID 19.

Il-baġit tal-UE se jibda jagħmel il-ħlasijiet lura meħtieġa tal-fondi meħuda b’self fis-swieq tal-kapital mill-2028 ’il quddiem. L-obbligazzjonijiet kollha tal-Unjoni mġarrba mill-att propost se jkunu tħallsu lura kollha sal-2058. Il-ħlas lura għandu jkun organizzat skont il-prinċipju ta’ ġestjoni finanzjarja soda bil-ħsieb li jinkiseb tnaqqis stabbli u prevedibbli tal-obbligazzjonijiet matul il-perjodu kollu kemm hu.

Jiżdied il-limitu massimu tar-Riżorsi Proprji:

Il-limiti massimi stabbiliti fid-Deċiżjoni tar-Riżorsi Proprji jiddeterminaw l-ammont massimu ta’ riżorsi proprji li l-Unjoni tista’ titlob lill-Istati Membri biex jagħmlu disponibbli lill-Unjoni f’xi sena partikolari biex jiffinanzjaw in-nefqa tagħha.

Fit-2 ta’ Mejju 2018, il-Kummissjoni pproponiet limitu massimu biex jiġu koperti l-approprjazzjonijiet ta’ impenn annwali u limitu massimu biex jiġu koperti l-approprjazzjonijiet ta’ pagament annwali ta’ 1,35 % u 1,29 % rispettivament tal-Introjtu Nazzjonali Gross tal-UE. Il-limiti massimi definiti fl-abbozz ta’ Regolament li jistabbilixxi l-Qafas Finanzjarju Pluriennali (QFP), espressi f’euro, jistabbilixxu l-ammont massimu li jista’ jiġi jew impenjat jew inkella jintnefaq matul il-perjodu 2021-2027. Il-marġini bejn il-limiti massimi fid-Deċiżjoni tar-Riżorsi Proprji u l-limiti massimi tal-QFP għandhom ikunu kbar biżżejjed biex jiżguraw li l-Unjoni tkun f’pożizzjoni li tkopri l-obbligi finanzjarji u l-obbligazzjonijiet kontinġenti kollha tagħha fi kwalunkwe sena u taħt kwalunkwe ċirkostanza, anke fil-każ ta’ żviluppi ekonomiċi negattivi.

It-tbassir tar-rebbiegħa 2020 tal-Kummissjoni jipprojetta li l-ekonomija taż-Żona tal-Euro se tiċkien b’rata rekond ta’ 7,75 % fl-2020 u li l-ekonomija tal-UE hija mbassra li tiċkien b’7,5 % fl-2020. Il-projezzjonijiet tat-tkabbir għall-UE u għaż-Żona tal-Euro ġew riveduti ’l isfel b’madwar 9 punti perċentwali meta mqabbla mat-tbassir ekonomiku tal-ħarifa 2019. Għalkemm it-Tbassir tar-Rebbiegħa huwa mċajpar b’livell ogħla minn tas-soltu ta’ inċertezza, ma hemmx dubju li l-limiti massimi tad-Deċiżjoni tar-Riżorsi Proprji, li huma definiti bħala perċentwal tal-Introjtu Nazzjonali Gross tal-UE, se jonqsu b’mod assolut.

Sabiex jinżamm marġni suffiċjenti skont il-limiti massimi tad-Deċiżjoni tar-Riżorsi Proprji biex l-Unjoni tkun tista’ tkopri l-obbligi finanzjarji u l-obbligazzjonijiet kontinġenti kollha tagħha li jkunu dovuti f’xi sena partikolari, il-limiti massimi fid-Deċiżjoni tar-Riżorsi Proprji kif definiti f’perċentwal tal-Introjtu Nazzjonali Gross tal-Unjoni jridu jiżdiedu.

Għal dak il-għan, il-proposta tal-Kummissjoni tat-2 ta’ Mejju 2018 għandha tiġi emendata biex tippermetti żieda addizzjonali ta’ 0,11 punti perċentwali kemm tal-limitu massimu tal-approprjazzjonijiet ta’ impenn kif ukoll tal-limitu massimu għall-approprjazzjonijiet ta’ pagament. Din iż-żieda tiżdied mal-aġġustamenti li diġà ġew proposti biex ikopru t-tnaqqis awtomatiku tal-ammont assolut tal-limiti massimi tad-Deċiżjoni tar-Riżorsi Proprji minħabba l-ħruġ tar-Renju Unit mill-UE u t-tnaqqis korrispondenti tal-Introjtu Nazzjonali Gross tal-Unjoni. Il-limitu massimu biex tiġi koperta l-approprjazzjoni ta’ pagament annwali għandu għalhekk ikun stabbilit għal 1,40% tal-Introjtu Nazzjonali Gross tal-UE u l-limitu massimu biex jiġu koperti l-approprjazzjonijiet ta’ impenn annwali għal 1,46% tad-Dħul Nazzjonali Gross tal-UE.

Żieda straordinarja u temporanja tal-limiti massimi tar-riżorsi proprji biex tiġi indirizzata l-kriżi tal-COVID 19

Barra minn hekk, il-proposta emendata tawtorizza lill-Kummissjoni biex tissellef fondi f’isem l-Unjoni sa ammont massimu ta’ EUR 750 biljun fi prezzijiet tal-2018. Ir-rikavati se jiġu assenjati skont l-Istrument ta’ Rkupru tal-Unjoni Ewropea li qiegħed jiġi propost. Skont l-Artikolu 310(4) TFUE, l-Unjoni ma għandha tadotta l-ebda att li probabbilment jista’ jkollu implikazzjonijiet sinifikanti fuq il-baġit mingħajr ma tipprovdi assigurazzjoni li n-nefqa li tirriżulta minn tali att tista’ tkun tista’ tiġi ffinanzjata fil-limitu tar-riżorsi proprji tal-Unjoni. Skontl l-Artikolu 323 TFUE il-Parlament Ewropew, il-Kunsill u l-Kummissjoni għandhom jassiguraw li jkun hemm disponibbli l-mezzi finanzjarji li jippermettu lill-Unjoni tissodisfa l-obbligi legali tagħha fir-rigward ta’ terzi persuni.

Sabiex tiġi żgurata l-konformità ma’ dawn id-dispożizzjonijiet fi kwalunkwe sena partikolari u fi kwalunkwe ċirkostanza, huwa meħtieġ li l-Istati Membri jallokaw ir-riżorsi meħtieġa lill-Unjoni biex tkopri l-obbligi finanzjarji u l-obbligazzjonijiet kontinġenti li jirriżultaw minn dan l-għoti ta’ setgħa eċċezzjonali u temporanju li tissellef fondi. Għalhekk, il-limiti massimi fid-Deċiżjoni tar-Riżorsi Proprji jridu jiġu aġġustati 'l fuq fuq bażi temporanja b’0,6 punti perċentwali. Din l-allokazzjoni addizzjonali tista’ tintuża biss biex jiġu onorati l-obbligi finanzjarji u l-obbligazzjonijiet kontinġenti li jirriżultaw mill-għoti ta’ setgħa eċċezzjonali u temporanja ta’ self ta’ fondi. F’dan il-qafas, l-użu potenzjali ta’ din l-allokazzjoni addizzjonali se jonqos maż-żmien billi l-obbligi finanzjarji u l-obbligazzjonijiet kontinġenti rilevanti jonqsu hekk kif il-fondi mislufa jitħallsu lura u s-self jimmatura. Din iż-żieda tiskadi meta dawn l-obbligazzjonijiet kollha ma jkunux għadhom jeżistu, jiġifieri meta l-fondi kollha mislufa jkunu tħallsu lura – sa mhux aktar tard mill-31 ta’ Diċembru 2058 – u r-riskji kollha għal obbligazzjonijiet kontinġenti jkunu waqfu.

.

2018/0135 (CNS)

Proposta emendata għal

DEĊIŻJONI TAL-KUNSILL

dwar is-sistema ta’ Riżorsi Proprji tal-Unjoni Ewropea

COM (2018) 325 tal-Kummissjoni hija emendata kif ġej:

(1)l-aħħar sentenza tal-Premessa (13) hija mħassra;

(2)Jiddaħħlu l-Premessi minn (13a) sa (13k) kif ġej:

(13a) Sabiex jiġi ppreservat marġini suffiċjenti skont il-limiti massimi tad-Deċiżjoni tar-Riżorsi Proprji għall-Unjoni biex tkopri l-obbligi finanzjarji u l-obbligazzjonijiet kontinġenti tagħha kollha li jkunu dovuti fi kwalunkwe sena partikolari, il-limitu massimu fid-Deċiżjoni tar-Riżorsi Proprji għandu jiżdied għal-livell ta’ 1,40% tal-Introjtu Nazzjonali Gross kollu tal-Istati Membri bi prezzijiet tas-suq għall-approprjazzjonijiet ta’ pagament u ta’ 1,46% għall-approprjazzjonijiet ta’ impenn.

(13b) L-impatt ekonomiku tal-kriżi tal-COVID-19 jenfasizza l-importanza li tiġi żgurata kapaċità finanzjarja suffiċjenti għall-Unjoni f’każ ta’ xokkijiet ekonomiċi. Hemm bżonn li l-Unjoni tipprovdi lilha nnifisha bil-mezzi biex tilħaq l-objettiv tagħha Huma meħtieġa riżorsi finanzjarji fuq skala eċċezzjonali sabiex jiġu indirizzati l-konsegwenzi tal-kriżi tal-COVID-19, mingħajr ma tiżdied il-pressjoni fuq il-finanzi tal-Istati Membri f’mument fejn il-baġits tagħhom diġà huma taħt pressjoni enormi biex jiġu ffinanzjati miżuri ekonomiċi u soċjali nazzjonali b’rabta mal-kriżi. Għalhekk għandu jingħata rispons eċċezzjonali fil-livell tal-Unjoni. Għal din ir-raġuni, huwa xieraq li l-Unjoni tiġi awtorizzata biex b’mod eċċezzjonali temporanjament tissellef EUR 750 biljun fi prezzijiet tal-2018 fuq is-swieq tal-kapital, li jintużaw biss għal nefqa f’ammont ta’ EUR 500 biljun fi prezzijiet tal-2018 u għal self f’ammont ta’ EUR 250 biljun fi prezzijiet tal-2018, biex jiġu indirizzati l-konsegwenzi tal-kriżi tal-COVID-19.

(13c) Jenħtieġ li dan ir-rispons eċċezzjonali jindirizza l-konsegwenzi tal-pandemija tal-COVID-19 u jiġi evitat li terġa’ titfaċċa. Għalhekk, l-appoġġ jenħtieġ li jkun għal żmien limitat u li l-maġġoranza tal-finanzjament għandu jingħata fiż-żmien li fih ikunu qegħdin jinħassu l-konsegwenzi immedjati tal-pandemija.

(13d) Żieda temporanja u eċċezzjonali tal-limitu massimu tar-riżorsi proprji hija meħtieġa biex l-Unjoni ġġorr ir-responsabbiltà relatata ma’ dak is-self ta’ fondi. L-għoti ta’ setgħa lill-Kummissjoni biex tissellef fondi mis-swieq tal-kapital, f’isem l-Unjoni, għall-fini uniku u esklussiv li tiffinanzja l-miżuri li jindirizzaw il-konsegwenzi tal-COVID-19, huwa relatat mill-qrib maż-żieda tal-limitu massimu tar-riżorsi proprji operat skont din id-Deċiżjoni u, fl-aħħar mill-aħħar, għall-funzjonament tas-sistema tar-riżorsi proprji tal-Unjoni. Għaldaqstant, tali setgħa jenħtieġ li tiġi inkluża f’din id-Deċiżjoni. In-natura bla preċedent ta’ din l-operazzjoni u l-ammont eċċezzjonali ta’ dawn il-fondi jitolbu għal ċertezza dwar il-volum kunplessiv tar-responsabbiltà tal-Unjoni u l-karatteristiċi essenzjali tal-pagament lura tagħha, kif ukoll għat-twettiq ta’ strateġija ta’ self unika.

(13e) Is-self ta’ fondi fis-swieq tal-kapital jeħtieġ li jkun sinifikanti u għandu jseħħ fuq perjodu relattivament qasir. Jenħtieġ li l-Kummissjoni, meta tkun qiegħda timplimenta l-operazzjonijiet permezz ta’ strateġija ta’ finanzjament diversifikata, tagħmel l-aħjar użu mill-kapaċità tas-swieq li jassorbu s-self ta’ tali ammonti sinifikanti ta’ fondi b’maturitajiet differenti u tiżgura l-aktar kundizzjonijiet vantaġġużi għall-ħlas lura.

(13f) Il-ħlas lura ta’ fondi mislufa sabiex jiġi pprovdut appoġġ li ma jitħallasx lura, appoġġ li jitħallas lura permezz ta’ strumenti finanzjarji jew il-provvediment għal garanziji baġitarji, kif ukoll l-imgħax dovut, jenħtieġ li jiġi ffinanzjati mill-baġit tal-Unjoni. Il-fondi missellfa li jingħataw bħala self lill-Istati Membri jenħtieġ li jitħallsu lura mis-somom riċevuti mingħand l-Istati Membri benefiċjarji. Jeħtieġ li r-riżorsi meħtieġa jiġu allokati u jitqiegħdu għad-dispożizzjoni tal-Unjoni biex tkun tista’ tkopri l-obbligi finanzjarji u l-obbligazzjonijiet kontinġenti kollha tagħha li jirriżultaw mill-għoti ta’ setgħa eċċezzjonali u temporanja li tissellef fi kwalunkwe sena u fi kwalunkwe ċirkostanza f’konformità mal-Artikolu 310(4) TFUE u l-Artikolu 323 TFUE.

(13g) Jenħtieġ li l-ħlas lura li jkun se jsir mill-baġit jibda fl-2028, filwaqt li l-obbligazzjonijiet kollha mġarrba minn din is-setgħa eċċezzjonali u temporanja ta’ self ta’ fondi jenħtieġ li jkunu tħallsu lura kollha sal-31 ta’ Diċembru 2058. Sabiex tiġi żgurata ġestjoni baġitarja effiċjenti tal-approprjazzjonijiet meħtieġa biex jiġi kopert il-ħlas lura għall-fondi meħuda b’self, huwa xieraq li tiġi prevista l-possibbiltà li l-impenji baġitarji sottostanti jiġu diżaggregati fi ħlasijiet parzjali annwali. L-iskedar tal-ħlas lura jenħtieġ li jirrispetta l-prinċipju ta’ ġestjoni finanzjarja soda, inkuża skopertura annwali massima, bil-ħsieb li jinkiseb tnaqqis stabbli u prevedibbli tal-obbligazzjonijiet matul il-perjodu kollu kemm hu.

(13h) Minħabba l-karatteristiċi tal-awtorizzazzjoni eċċezzjonali, temporanja u limitata għas-self ta’ fondi biex tiġi indirizzata l-kriżi tal-Covid-19, għandu jiġi ċċarat li, bħala regola, jenħtieġ li l-Unjoni ma tużax fondi mislufa fuq is-swieq tal-kapital għall-finanzjament tan-nefqa operattiva.

(13i) Għall-fini uniku li jiġu koperti l-obbligi finanzjarji addizzjonali u l-obbligazzjonijiet kontinġenti li jirriżultaw mill-għoti ta’ setgħa eċċezzjonali u temporanja għas-self ta’ fondi u biex tiġi żgurata s-sostenibbiltà finanzjarja anki fi żminijiet ta’ tnaqqis fir-ritmu ekonomiku, il-limiti massimi għall-approprjazzjonijiet ta’ pagament u l-limitu massimu għal approprjazzjonijiet ta’ impenn għandhom jiżdiedu b’0,6 punti perċentwali kull wieħed.

(13j) Din iż-żieda hija meħtieġa peress li l-limiti massimi attwali mhumiex biżżejjed biex jipprovdu r-riżorsi addizzjonali li għandha bżonn l-Unjoni biex tissodisfa l-obbligazzjonijiet li jirriżultaw mill-għoti ta’ setgħa eċċezzjonali u temporanja li tissellef fondi. Il-ħtieġa tal-użu ta’ din l-allokazzjoni addizzjonali se jkun biss temporanju peress li l-obbligi finanzjarji u l-obbligazzjonijiet kontinġenti rilevanti kull ma jmur jonqsu hekk kif il-fondi mislufa jitħallsu lura u s-self jimmatura. Għalhekk, iż-żieda għandha tiskadi meta l-fondi kollha mislufa jkunu tħallsu lura u l-obbligazzjonijiet kontinġenti kollha minn self mogħti fuq il-bażi ta’ dawn il-fondi jkunu waqfu, mhux aktar tard mill-31 ta’ Diċembru 2058.

(13k) Sabiex jiġi żgurat li l-Unjoni tkun dejjem kapaċi tissodisfa l-obbligi legali tagħha fir-rigward ta’ terzi persuni, jenħtieġ li l-Kummissjoni, f’konformità mal-kundizzjonijiet kif stabbiliti fir-regolamenti adottati skont l-Artikolu 322(2) TFUE, tiġi awtorizzata, matul dak il-perjodu ta’ żieda temporanja, li titlob lill-Istati Membri jagħmlu disponibbli r-riżorsi ta’ flus kontanti rilevanti meta l-approprjazzjonijiet awtorizzati mdaħħla fil-baġit ma jkunux biżżejjed.

(3)Fl-Artikolu 3, il-paragrafi 1 u 2 jiġu sostitwiti b’dan li ġej:

“1. L-ammont totali ta’ riżorsi proprji allokat lill-Unjoni biex ikopru approprjazzjonijiet annwali ta’ pagament ma għandux jeċċedi 1,40% tal-Introjtu Nazzjonali Gross totali tal-Istati Membri kollha.

2. L-ammont totali annwali tal-approprjazzjonijiet ta’ impenn li jiddaħħlu fil-baġit tal-Unjoni ma għandux jeċċedi 1,46% tal-Introjtu Nazzjonali Gross totali tal-Istati Membri kollha.”;    

(4)Jiddaħħlu l-Artikoli 3 a, 3b u 3c li ġejjin:

"Artikolu 3a
L-Użu ta’ fondi mislufa fuq is-swieq tal-kapital

L-Unjoni ma għandhiex tuża fondi mislufa fuq is-swieq tal-kapital għall-finanzjament tan-nefqa operattiva.

Artikolu 3b
Mezzi addizzjonali u temporanji biex tiġi indirizzata l-kriżi tal-COVID-19

(1)Għall-uniku fini li jiġu indirizzati l-konsegwenzi tal-kriżi tal-COVID-19:

(a)Il-Kummissjoni għandha tingħata s-setgħa li tissellef fondi mis-swieq tal-kapital f’isem l-Unjoni sal-ammont ta’ EUR 750 000 000 000 fi prezzijiet tal-2018. L-operazzjonijiet ta’ teħid b’self għandhom jitwettqu f’euro.

(b)Il-fondi li jittieħdu b’self jistgħu jintużaw għal self sa ammont ta’ EUR 250 000 000 000 fi prezzijiet tal-2018 u, b’deroga mill-Artikolu 3a, għal nefqa sa ammont ta’ EUR 500 000 000 000 fi prezzijiet tal-2018.

(2)Il-ħlas lura tal-kapital tal-fondi użati għan-nefqa msemmija fil-punt (b) tal-paragrafu 1 u l-imgħax dovut relatat għandhom jitħallsu mill-baġit ġenerali tal-Unjoni. L-impenn baġitarju jista’ jinqasam fi ħlasijiet annwali fuq diversi snin skond l-Artikolu 112(2) tar-Regolament (KE, Euratom) 2018/1046.

Il-ħlas lura għandu jkun skedat, skont il-prinċipju ta’ ġestjoni finanzjarja soda, sabiex jiġi żgurat li jkun hemm tnaqqis kostanti u prevedibbli fil-passiv, u jibda mill-1 ta’ Jannar 2028 sal-31 ta’ Diċembru 2058. L-ammonti dovuti mill-Unjoni f’xi sena partikolari għall-ħlas lura tal-kapital ma għandhomx jaqbżu 7,5 % tal-ammont massimu li ssir referenza għalih fil-punt (a) tal-paragrafu 1.

(3)Il-Kummissjoni għandha tistabbilixxi l-arranġamenti meħtieġa għall-amministrazzjoni tal-operazzjonijiet ta’ self.

Artikolu 3c
Żieda straordinarja u temporanja tal-limiti massimi tar-riżorsi proprji
għall-allokazzjoni tar-riżorsi neċessarji biex tiġi indirizzata l-kriżi tal-COVID-19

L-ammonti stabbiliti fl-Artikolu 3(1) u (2), rispettivament, għandhom jiżdiedu temporanjament b’0,6 punti perċentwali għall-uniku skop li jiġu koperti l-obbligazzjonijiet kollha tal-Unjoni li jirriżultaw mit-teħid ta’ self tagħha li ssir referenza għalih fl-Artikolu 3b sakemm dawn l-obbligazzjonijiet kollha ma jkunux għadhom jeżistu, u mhux aktar tard mill-31 ta’ Diċembru 2058.

Dawk l-ammonti miżjuda ma għandhomx jintużaw għall-ħlas ta’xi obbligazzjoni oħra tal-Unjoni”.

(5)Fl-Artikolu 6, jiżdied il-paragrafu 4 li ġej:

“4. Meta l-approprjazzjonijiet awtorizzati mdaħħla fil-baġit ma jkunux biżżejjed biex l-Unjoni tkun tista’ tkun konformi mal-obbligi tagħha li jirriżultaw mis-self li ssir referenza għalih fl-Artikolu 3b, l-Istati Membri għandhom iqiegħdu r-riżorsi meħtieġa għal dak il-għan għad-dispożizzjoni tal-Kummissjoni.

Ir-riżorsi fi flus kontanti għandhom isiru disponibbli f’konformità mar-regolamenti adottati skont l-Artikolu 322(2) TFUE, kif applikabbli f’dak iż-żmien, taħt l-istess kundizzjonijiet bħal dawk li japplikaw fil-każ ta’ inadempjenza fuq self kuntrattat skont regolamenti u deċiżjonijiet adottati mill-Kunsill, jew mill-Parlament Ewropew u l-Kunsill.”

DIKJARAZZJONI FINANZJARJA LEĠIŻLATTIVA

1.IL-QAFAS TAL-PROPOSTA

1.1.Titlu tal-proposta

1.2.Qasam (oqsma) ta’ politika kkonċernati fl-istruttura ABM/ABB 3  

1.3. In-natura tal-proposta/inizjattiva

◻ Il-proposta/inizjattiva hija marbuta ma’ azzjoni ġdida 

◻ Il-proposta/inizjattiva hija marbuta ma’ azzjoni ġdida. wara proġett pilota/azzjoni preparatorja 4  

x Il-proposta/inizjattiva hija marbuta mal-estensjoni ta’ azzjoni eżistenti 

◻ Il-proposta/inizjattiva hija marbuta ma’ azzjoni ridiretta lejn azzjoni ġdida. 

1.4.Objettiv(i)

1.4.1.L-objettiv(i) ta’ strateġija pluriennali tal-Kummissjoni fil-mira tal-proposta/inizjattiva

1.4.2.Objettiv(i) speċifiku/iċi u l-attività(jiet) ABM/ABB kkoncernati

1.4.3.Il-limiti massimi tar-riżorsi proprji jridu jiżdiedu b’mod temporanju biex l-UE tkun tista’ twettaq l-obbligi finanzjarji tagħha. Din iż-żieda hija neċessarja biex ikunu jistgħu jiġu koperti l-obbligi finanzjarji u l-obbligazzjonijiet kontinġenti li jirriżultaw minn din l-għoti ta’ setgħa eċċezzjonali u temporanja ta’ self ta’ fondi.

1.4.4.Riżultat(i) mistennij/a u l-impatt

Speċifika l-effetti li l-proposta/inizjattiva għandu għax ikollha fuq il-benefiċjarji/gruppi fil-mira

1.4.5.Indikaturi tar-riżultati u l-impatt

Speċifika l-indikaturi għall-monitoraġġ tal-implimentazzjoni tal-proposta/inizjattiva.

1.5.Raġunijiet tal-proposta/inizjattiva

1.5.1.Rekwiżit/i li jridu jiġu ssodisfati fuq perjodu qasir jew twil

1.5.2.Valur miżjud tal-involviment tal-UE

1.5.3.Lezzjonijiet meħuda minn esperjenzi simili fil-passat

1.5.4.Kumpatibbiltà u sinerġija possibbli ma’ strumenti oħra xierqa

1.6.Il-perjodu u l-impatt finanzjarju

X Proposta/inizjattiva ta’ perjodu limitat

–X    L-impatt finanzjarju mid-dħul fis-seħħ tad-Deċiżjoni sa meta titlesta l-maturità tas-self, li huwa perjodu kopert minn diversi Oqsfa Finanzjarju Pluriennali; ma hija prevista l-ebda maturità qabel l-2028.

X Proposta/inizjattiva ta’ perjodu mhux limitat għaż-zieda proposta fil-limitu massimu tar-RP fuq bażi permanenti

–Implimentazzjoni b’perjodu ta’ bidu mid-dħul fis-seħħ tad-Deċiżjoni.

1.7.Mod/i ta’ mmaniġġjar ippjanat/i 5

X Immaniġġjar dirett mill-Kummissjoni

–X mid-dipartimenti tagħha, inkluż bil-persunal tagħha fid-delegazzjonijiet tal-Unjoni.

–◻    mill-aġenziji eżekuttivi

◻ Immaniġġjar kondiviż mal-Istati Membri

◻ Immaniġġjar indirett billi l-implimentazzjoni tal-baġit tiġi ddelegata lil:

–◻ pajjiżi terzi jew il-korpi li huma jaħtru;

–◻ organizzazzjonijiet internazzjonali u l-aġenziji tagħhom (għad iridu jiġu speċifikati);

–◻ il-BEI u l-Fond Ewropew tal-Investiment;

–◻ korpi li ssir referenza għalihom fl-Artikoli 208 u 209 tar-Regolament (UE, Euratom) 1046/2018;

–◻ korp irregolat bil-liġi pubblika;

–◻ korpi amministrati bid-dritt privat b’missjoni ta’ servizz pubbliku sal-livell li jipprovdu garanziji finanzjarji adegwati;

–◻ korpi amministrati bid-dritt privat ta’ xi Stat Membru li jkunu fdati bl-implimentazzjoni ta’ xi sħubija pubblika-privata u li jipprovdu garanziji finanzjarji adegwati;

–◻ persuni fdati bl-implimentazzjoni ta’ azzjonijiet speċifiċi fil-PESK skont it-Titolu V tat-TUE, u identifikati fl-att bażiku relevanti.

–Jekk jiġi indikat aktar minn mod uniku ta’ mmaniġġjar, jekk jogħoġbok agħti d-dettalji fit-taqsima “Kummenti”.

2.MIŻURI TA’ MMANIĠĠJAR

2.1.Regoli ta’ monitoraġġ u rappurtar

Speċifika l-frekwenza u l-kundizzjonijiet

2.1.1.Riskju/i identifikat(i)

2.1.2.Informazzjoni rigward is-sistema ta’ kontrol intern stabbilita

2.1.3.Stima tal-kosti u l-benefiċċji tal-kontrolli u evalwazzjoni tal-livell ta’ żball mistenni

2.2.Miżuri kontra l-frodi u l-irregolaritajiet

Speċifika miżuri ta’ protezzjoni eżistenti jew previsti

3.IMPATT FINANZJARJU STMAT TAL-PROPOSTA/INIZJATTIVA

3.1.Intestatura/i tal-qafas finanzjarju pluriennali u tal-linja/i baġitarja/i affettwati

·L-ebda linja baġitarja eżistenti

·Linji baġitarji ġodda mitluba

Fl-ordni tal-intestaturi tal-qafas finanzjarju pluriennali u l-linji baġitarji.

3.2.Impatt stmat fuq in-nefqa

Il-proposta ma għandha l-ebda impatt fuq in-nefqa. Se tinħoloq linja p.m. tinħoloq fil-proċedura baġitarja.

3.2.1.Sommarju tal-impatt stmat fuq in-nefqa

Miljuni ta’ EUR (sa tliet punti deċimali)

Miljuni ta’ EUR (sa tliet punti deċimali)

Miljuni ta’ EUR (sa tliet punti deċimali)

3.2.2.Impatt stmat fuq l-approprjazzjonijiet operazzjonali

–◻    Il-proposta/l-inizjattiva ma teħtieġx l-użu ta’ approprjazzjonijiet operazzjonali

–X    Il-proposta/l-inizjattiva teħtieġ l-użu ta’ approprjazzjonijiet operazzjonali fis-snin tal-baġit 2020-2027: ħlas ta’ interessi kif indikat fit-tabella ta’ hawn fuq

3.2.3.Impatt stmat fuq l-approprjazzjonijiet ta’ natura amministrattiva

3.2.3.1.Sommarju

–◻    Il-proposta/l-inizjattiva ma teħtieġx l-użu ta’ approprjazzjonijiet ta’ natura amministrattiva

–X    Il-proposta/l-inizjattiva teħtieġ l-użu ta’ approprjazzjonijiet ta’ natura amministrattiva, kif spjegat hawn taħt:

Miljuni ta’ EUR (sa tliet punti deċimali)

2020:

L-approprjazzjonijiet meħtieġa għar-riżorsi umani u għal infiq ieħor ta’ natura amministrattiva se jiġu koperti b’approprjazzjonijiet mid-DĠ li diġà huma assenjati għall-ġestjoni tal-azzjoni u/jew intużaw mill-ġdid fid-DĠ, flimkien, jekk ikun meħtieġ, ma’ kull allokazzjoni addizzjonali li tista’ tingħata lid-DĠ maniġerjali skont il-proċedura annwali ta’ allokazzjoni u fid-dawl tal-limitazzjonijiet baġitarji.

3.2.3.2.Rekwiżiti stmati ta’ riżorsi umani

–◻    Il-proposta/l-inizjattiva ma teħtieġx l-użu ta’ riżorsi umani.

–X    Il-proposta/l-inizjattiva teħtieġ l-użu ta’ riżorsi umani, kif spjegat hawn taħt:

L-istima trid tiġi espressa f’unitajiet ekwivalenti għall-full-time

DG BUDG huwa l-qasam ta’ politika jew it-titolu baġitarju kkonċernat.

Ir-riżorsi umani meħtieġa jiġu mill-persunal tad-DĠ li diġà jkun assenjat għall-immaniġġjar tal-azzjoni u/jew ġie riallokat fid-DĠ, jekk ikun meħtieġ, flimkien ma’ kull allokazzjoni addizzjonali li tista’ tingħata lid-DĠ maniġerjali skont il-proċedura annwali ta’ allokazzjoni u fid-dawl tal-limiti baġitarji.

Deskrizzjoni tal-kompiti li jridu jitwettqu:

3.2.4.Kompatibbiltà mal-qafas finanzjarju pluriennali attwali

–X    Il-proposta/l-inizjattiva hija kompatibbli mal-qafas finanzjarju pluriennali attwali u ma’ dak li qiegħed jiġi propost.

–◻    Il-proposta/l-inizjattiva se tkun tinvolvi riprogrammazzjoni tal-intestatura rilevanti fil-qafas finanzjarju pluriennali.

–◻    Il-proposta/l-inizjattiva teħtieġ l-applikazzjoni tal-istrument ta’ flessibbiltà jew ir-reviżjoni tal-qafas finanzjarju pluriennali.

3.2.5.Kontribuzzjonijiet minn terzi

–Il-proposta/l-inizjattiva ma tipprevedix il-kofinanzjament minn partijiet terzi.

–X Il-proposta/inizjattiva tipprovdi għall-kofinanzjament stmat hawn taħt:

3.3.Impatt stmat fuq id-dħul

–◻Il-proposta/l-inizjattiva ma għandha l-ebda impatt finanzjarju fuq id-dħul 10 .

–X    Il-proposta/l-inizjattiva għandha l-impatt finanzjarju li ġej:

dħul assenjat (linja ta’ dħul tal-baġit li għad trid tiġi ddeterminata)

Matul il-perjodu ta’ implimentazzjoni, EUR X biljun minn rikavati ta’ operazzjonijiet ta’ self ser jikkostitwixxu dħul assenjat estern iddedikat għal għotjiet lill-Istati Membri u garanziji baġitarji.

EUR miljun (arrotondati)

(1)    Tbassir Ekonomiku Ewropew, Dokument Istituzzjonali 125. Mejju 2020.

(2)    SWD(2020)XXXX..

(3)    Għandu/hom jiġi/u determinati fil-proċeduri baġitarji tal-2020 u l-2021. ABM: immaniġġjar ibbażat fuq l-attività (activity-based management); ABB: immaniġġjar ibbażat fuq l-ibbaġitjar (activity-based budgeting);

(4)    Kif issir referenza fl-Artikolu 54(2)(a) jew (b) tar-Regolament Finanzjarju.

(5)    Dettalji ta’ modi ta’ mmaniġġjar u referenzi għar-Regolament (UE, Euratom) 1046/2018 jistgħu jinkisbu mis-sit BudgWeb: http://www.cc.cec/budg/man/budgmanag/budgmanag_en.html

(6)    Billi s-self se jilħaq il-maturità tiegħu mill-2028, se jsiru biss il-pagamenti ta’ kupuni fis-snin preċedenti.

(7)    L-assistenza teknika u/jew amministrattiva u n-nefqa li jsostnu l-implimentazzjoni ta’ programmi u/jew ta’ azzjonijiet tal-UE (li qabel kienu l-linji “BA”), ta’ riċerka indiretta u ta’ riċerka diretta.

(8)    L-assistenza teknika u/jew amministrattiva u n-nefqa li jsostnu l-implimentazzjoni ta’ programmi u/jew ta’ azzjonijiet tal-UE (li qabel kienu l-linji “BA”), ta’ riċerka indiretta u ta’ riċerka diretta.

(9)    Sottolimitu massimu għall-persunal estern kopert minn approprjazzjonijiet operazzjonali (li qabel kienu l-linji “BA”).