IL-KUMMISSJONI EWROPEA

Brussell, 2.4.2020

COM(2020) 175 final

2020/0056(NLE)

Proposta għal

REGOLAMENT TAL-KUNSILL

li jattiva l-appoġġ ta’ emerġenza skont ir-Regolament tal-Kunsill (UE) 2016/369 tal-15 ta’ Marzu 2016 u li jemenda d-dispożizzjonijiet tiegħu fir-rigward tat-tifqigħa tal-COVID-19

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u objettivi tal-proposta

Il-pandemija tal-COVID-19 qed twassal għal telf ta’ ħajja bla preċedent fl-Unjoni Ewropea u qed tikkawża tbatija liema bħalha għan-nies tal-Ewropa. L-Istati Membri qegħdin jadottaw miżuri eċċezzjonali li jrażżnu l-libertajiet personali biex jillimitaw it-telf ta’ ħajjiet u jrażżnu t-tixrid tal-virus. B’konsegwenza ta’ dan, l-attivitajiet ekonomiċi qed jiġu mfixkla u qed jikkawżaw restrizzjonijiet ta’ likwidità u deterjorament serju tas-sitwazzjoni finanzjarja tal-atturi ekonomiċi.

Is-sistemi tal-kura tas-saħħa tal-Istati Membri jinsabu taħt pressjoni estrema permezz tal-firxa rapida tal-virus u l-għadd kbir ta’ pazjenti li jenħtieġ li jinżammu l-isptar. L-Istati Membri kollha huma mġiegħla jżidu l-infiq fuq is-sistemi tal-kura tas-saħħa tagħhom sabiex jiffinanzjaw il-ħtiġijiet dejjem jiżdiedu marbuta mal-pandemija tal-COVID-19 filwaqt li jkomplu jipprovdu servizzi mediċi essenzjali lill-pazjenti l-oħra kollha. Fl-istess ħin, il-pajjiżi tal-UE qed ikollhom jallokaw riżorsi umani biex jidentifikaw, jakkwistaw u jiżguraw il-forniment f’waqtu tat-tagħmir mediku tant meħtieġ u tad-dispożizzjonijiet li jakkumpanjawh.

Filwaqt li bħalissa s-sitwazzjoni fl-Istati Membri differenti tvarja, il-fatt li din tevolvi malajr juri b’mod tanġibbli li l-Unjoni Ewropea kollha kemm hi hija kkonċernata u li hija meħtieġa reazzjoni kollettiva, koordinata u urġenti biex tiġġieled it-tixrid tal-virus b’mod effettiv u ttaffi l-impatt tiegħu malajr kemm jista’ jkun. L-indirizzar ta’ din is-sitwazzjoni eċċezzjonali b’mod effettiv teħtieġ strateġija koordinata ta’ miżuri differenti li jimmiraw b’mod partikolari li jippreservaw il-ħajja tan-nies, jipprevjenu u jtaffu t-tbatija umana u jipproteġu d-dinjità tal-bniedem.

Azzjoni koordinata fil-livell tal-UE tagħmilha possibbli li tiġi indirizzata l-kriżi attwali u tiġi żgurata reazzjoni xierqa b’segwitu fost l-oħrajn permezz ta’:

–akkumulazzjoni ta’ stokkijiet usa’ u aktar rapida u koordinazzjoni ta’ distribuzzjoni ta’ riżorsi essenzjali madwar l-Ewropa;

–jintlaħqu l-ħtiġijiet tat-trasport għal tagħmir protettiv li għandu jiġi importat minn sħab internazzjonali kif ukoll it-trasport madwar l-UE;

–it-trasport ta’ pazjenti fil-bżonn lejn sptarijiet transfruntiera li jistgħu joffru kapaċità libera;

–il-kooperazzjoni transfruntiera biex tittaffa l-pressjoni minn fuq is-sistemi tal-kura tas-saħħa fl-aktar reġjuni milquta tal-UE;

–l-akkwist ċentrali u d-distribuzzjoni ta’ provvisti mediċi essenzjali għall-isptarijiet u l-provvista ta’ emerġenza ta’ tagħmir protettiv għall-persunal tal-isptar, bħalma huma r-respiraturi, il-ventilaturi, it-tagħmir protettiv personali, il-maskri li jistgħu jerġgħu jintużaw, il-mediċini, it-terapiji u l-provvisti tal-laboratorju u d-diżinfettanti;

–żieda u konverżjoni tal-kapaċitajiet ta’ produzzjoni tal-intrapriżi tal-UE biex jiġu żgurati l-produzzjoni u l-użu rapidu ta’ tagħmir u materjal meħtieġ biex b’mod urġenti jiġi indirizzat in-nuqqas ta’ provvisti ta’ prodotti essenzjali u mediċini;

–żieda fil-faċilitajiet u r-riżorsi ta’ kura, inklużi sptarijiet fuq il-post u semi-permanenti u appoġġ għal faċilitajiet għall-konverżjoni mill-ġdid;

–iż-żieda fil-produzzjoni ta’ kits għall-ittestjar u appoġġ għall-akkwist ta’ sustanzi bażiċi ewlenin;

–l-ispinta lill-iżvilupp rapidu ta' medikazzjoni u ta’ metodi ta’ ttestjar;

–l-iżvilupp, ix-xiri u d-distribuzzjoni tal-provvisti tal-ittestjar (kits għall-ittestjar, reaġenti, hardware).

Il-miżuri previsti taħt il-Mekkaniżmu tal-Unjoni għall-Protezzjoni Ċivili/rescEU, l-Inizjattiva ta’ Investiment fir-Rispons għall-Coronavirus biex jiġu skjerati l-Fondi Strutturali u ta’ Investiment Ewropej 1 u strumenti oħra tal-Unjoni qed jikkontribwixxu biex tiġi indirizzata parzjalment l-emerġenza tas-saħħa pubblika attwali. Madankollu, l-iskala u l-ambitu tal-isfida jeħtieġu rispons aktar b’saħħtu, dirett b’mod partikolari għas-settur tal-kura tas-saħħa tal-UE. Huwa għalhekk li l-Kummissjoni qed tipproponi li timmobilizza l-Istrument għall-Appoġġ ta’ Emerġenza biex tgħammar lill-UE b’kaxxa tal-għodda usa’ li tkun proporzjonata għall-iskala kbira tal-pandemija attwali tal-COVID-19.

Fid-dawl ta’ dan ta’ hawn fuq, l-appoġġ taħt ir-Regolament dwar l-għoti ta’ Appoġġ ta’ Emerġenza (Nru 2016/369) jenħtieġ li jkun attivat kemm jista’ jkun malajr. Dan se jippermetti lill-Unjoni timplimenta miżuri li jipprevjenu u jtaffu l-konsegwenzi severi fi Stat Membru wieħed jew aktar u tindirizza b’mod koordinat il-ħtiġijiet marbuta mad-diżastru tal-COVID-19, billi tikkumplimenta l-assistenza pprovduta permezz ta’ strumenti oħra tal-UE.

Ir-Regolament dwar l-Għoti ta’ Appoġġ ta’ Emerġenza joffri mezz konkret biex jesprimi solidarjetà fil-livell tal-UE billi jinvolvi liċ-ċittadini u lis-soċjetà ċivili fil-ġlieda kontra l-kriżi. Fuq in-naħa tan-nefqa l-istrument jippermetti l-involviment ta’ NGOs kif ukoll ta’ organizzazzjonijiet internazzjonali, ta’ awtoritajiet reġjonali u nazzjonali (eż. is-setturi tas-saħħa). Fuq in-naħa tad-dħul huwa jipprevedi mhux biss kontribuzzjonijiet addizzjonali mill-Istati Membri iżda wkoll donazzjonijiet minn individwi, fondazzjonijiet u anki finanzjament kollettiv. Il-Kummissjoni qed tikkunsidra li tistabbilixxi l-modalitajiet meħtieġa kollha biex tippermetti l-ġbir rapidu ta’ kontribuzzjonijiet u donazzjonijiet.

•Konsistenza mad-dispożizzjonijiet eżistenti fil-qasam ta’ politika

Filwaqt li tqis il-kunsiderazzjonijiet ta’ hawn fuq, il-Kummissjoni qed tipproponi li tattiva l-appoġġ ta’ emerġenza f’konformità mal-Artikolu 2 tar-Regolament 2016/369 u li temenda wħud mid-dispożizzjonijiet tiegħu biex tindirizza l-ħtiġijiet speċjali tat-tifqigħa tal-COVID-19. B’mod partikulari, il-Kummissjoni qiegħda tipproponi:

–l-attivazzjoni tal-appoġġ tal-UE mill-1 ta’ Frar 2020 u għal perjodu ta’ sentejn;

–l-estensjoni tal-ambitu tal-azzjonijiet eliġibbli u tas-sħab eliġibbli inkarigati mill-implimentazzjoni fid-dawl tal-ambitu wiesa’ tal-miżuri meħtieġa biex tiġi indirizzata l-kriżi tal-COVID–19 u biex jiġi definit aktar l-ambitu tal-kostijiet eliġibbli;

–l-applikazzjoni retroattiva tar-Regolament mill-1 ta’ Frar 2020, b’eliġibbiltà tal-azzjonijiet rilevanti sa minn dik id-data bl-għan li tiġi żgurata l-ugwaljanza fit-trattament bejn l-Istati Membri;

–il-perjodu estiż biex jiġu konklużi l-impenji legali biex tiġi żgurata l-flessibbiltà fl-implimentazzjoni tal-appoġġ ta’ emerġenza;

–il-possibbiltà li l-Kummissjoni tikseb appoġġ ta’ emerġenza għall-Istati Membri biex jindirizzaw il-ħtiġijiet tagħhom marbuta mal-pandemija tal-COVID-19, inkluż permezz ta’ akkwist konġunt, u akkwist ċentralizzat f’isem l-Istati Membri.

L-azzjoni u l-miżuri koordinati permessi skont ir-Regolament propost se jkunu komplementari għall-appoġġ ipprovdut skont strumenti oħra tal-UE.

•Konsistenza ma’ politiki oħra tal-Unjoni:

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

•Sussidjarjetà (għall-kompetenza mhux esklużiva)

L-attivazzjoni tal-Istrument għall-Appoġġ ta’ Emerġenza għall-ġlieda kontra l-COVID-19 fl-UE hija msejsa fuq il-prinċipju tas-sussidjarjetà. Minħabba d-dimensjoni globali tal-pandemija tal-COVID-19, l-iskala kbira tal-effetti ekonomiċi u soċjali tagħha u l-pressjoni għolja fuq is-sistemi tal-kura tas-saħħa fl-Istati Membri kollha, l-Unjoni hija f’pożizzjoni aħjar mill-Istati Membri waħedhom biex tindirizza l-kriżi b’mod olistiku u kkoordinat fuq kull livell.

Hija biss azzjoni koordinata motivata minn spirtu ta’ solidarjetà bejn l-Istati Membri li tista’ tiżgura li l-firxa tal-COVID-19 titwaqqaf b’mod effiċjenti u rapidu, u li l-impatt tad-diżastru jiġi mitigat kemm jista’ jkun u l-konsegwenzi tiegħu jiġu indirizzati biex jiġi evitat li dan jerġa’ jfeġġ. Minħabba t-talbiet urġenti biex jiġu mobilizzati r-riżorsi fi skala suffiċjenti u jiġu implimentati fl-Istati Membri tal-UE abbażi tal-ħtiġijiet tagħhom, huwa meħtieġ li l-UE taġixxi f’kooperazzjoni mal-Istati Membri kollha li ntlaqtu mill-pandemija tal-COVID-19.

•Proporzjonalità

Il-mobilizzazzjoni u l-użu min-naħa tal-UE tar-riżorsi kollha meħtieġa biex titrażżan il-firxa tal-COVID-19 jgħinu b’mod sinifikanti biex jiżdiedu l-azzjonijiet għall-preservazzjoni tal-ħajja, tas-saħħa u tad-dinjità tal-bniedem u għall-irkupru tal-ekonomiji tal-Istati Membri. Minħabba l-konsegwenzi mingħajr preċedent tal-COVID-19 għaċ-ċittadini kollha tal-UE u għas-setturi kollha tal-ekonomija u minħabba l-ħtieġa għal azzjoni rapida u effiċjenti, il-proposta ma tmurx lil hinn minn dak li huwa meħtieġ biex jinkisbu l-objettivi stabbiliti fl-istrument attwali.

•Għażla tal-istrument

Filwaqt li titqies id-dimensjoni tal-pandemija tal-COVID-19 u d-dimensjoni tal-impatt soċjali, ekonomiku u finanzjarju tagħha, il-Kummissjoni tqis li huwa xieraq li taġixxi permezz ta’ regolament li huwa ta’ kamp ta’ applikazzjoni ġenerali u applikabbli b’mod dirett u immedjat. Dan ikun jirriżulta f’mekkaniżmu ta’ assistenza finanzjarja rapida, uniformi u li japplika għall-Unjoni kollha.

3.RIŻULTATI TAL-EVALWAZZJONIJIET EX-POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Konsultazzjonijiet mal-partijiet ikkonċernati

Minħabba l-urġenza biex titħejja l-proposta biex tkun tista’ tiġi adottata fil-ħin mill-Kunsill, ma setgħetx titwettaq konsultazzjoni mal-partijiet ikkonċernati.

•Ġbir u użu tal-għarfien espert

Mhux rilevanti.

•Valutazzjoni tal-impatt

Minħabba n-natura urġenti tal-proposta, ma saret l-ebda valutazzjoni tal-impatt.

•Idoneità regolatorja u simplifikazzjoni

Mhux rilevanti.

•Drittijiet fundamentali

Mhux rilevanti.

4.IMPLIKAZZJONIJIET BAĠITARJI

Qed tiġi proposta allokazzjoni ta’ EUR 2,7 biljun għall-2020 biex tappoġġa l-finanzjament ta’ azzjonijiet previsti taħt l-Istrument għall-Appoġġ ta’ Emerġenza li ġie attivat mill-ġdid. Is-sorsi ta’ finanzjament huma deskritti f’aktar dettall fid-Dikjarazzjoni Finanzjarja Leġiżlattiva ppreżentata ma’ din il-proposta u riflessa fl-abbozz ta’ baġit emendatorju Nru 2/2020.

Jista’ jingħata finanzjament addizzjonali skont l-evoluzzjoni tal-kriżi u l-ħtiġijiet relatati li ma jistgħux ikunu koperti minn strumenti oħra.

5.ELEMENTI OĦRA

Mhux rilevanti.

2020/0056 (NLE)

Proposta għal

REGOLAMENT TAL-KUNSILL

li jattiva l-appoġġ ta’ emerġenza skont ir-Regolament tal-Kunsill (UE) 2016/369 tal-15 ta’ Marzu 2016 u li jemenda d-dispożizzjonijiet tiegħu fir-rigward tat-tifqigħa tal-COVID-19

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 122(1) tiegħu,

Wara li kkunsidra l-proposta tal-Kummissjoni Ewropea,

Billi:

(1)Il-kriżi tal-COVID-19, iddikjarata pandemija mill-Organizzazzjoni Dinjija tas-Saħħa (WHO) fil-11 ta’ Marzu 2020, affettwat lis-soċjetà u lill-ekonomija tal-Unjoni Ewropea b’mod drammatiku, u ħtieġet lill-Istati Membri biex jadottaw sensiela ta’ miżuri eċċezzjonali.

(2)Barra l-impatt ekonomiku u soċjali tal-pandemija, is-sistemi tal-kura tas-saħħa tal-Istati Membri huma batuti ħafna minħabba l-kriżi. L-Istati Membri kollha qed iħabbtu wiċċhom ma’ domanda li żdiedet b’mod partikolari għal tagħmir u provvisti mediċi, servizzi pubbliċi essenzjali u kapaċitajiet ta’ produzzjoni għal materjali bħal dawn.

(3)Hemm bżonn ta’ miżuri rapidi u diversifikati biex l-Unjoni kollha tkun tista’ tindirizza l-kriżi fi spirtu ta’ solidarjetà taħt ir-restrizzjonijiet ikkawżati mit-tixrid rapidu tal-virus. B’mod partikolari, tali miżuri jenħtieġ li jkollhom l-għan li jippreservaw il-ħajja, jipprevjenu u jtaffu s-sofferenza umana u li jżommu d-dinjità tal-bniedem kull fejn jinqala’ l-bżonn b’konsegwenza tal-kriżi attwali tal-COVID-19.

(4)In-natura u l-konsegwenzi tat-tifqigħa tal-COVID-19 huma ta’ skala kbira u transnazzjonali u għalhekk jeħtieġu rispons komprensiv. Il-miżuri previsti taħt il-Mekkaniżmu tal-Unjoni għall-Protezzjoni Ċivili (“rescEU”) stabbiliti bid-Deċiżjoni Nru 1313/2013/UE tal-Parlament Ewropew u tal-Kunsill 4 u strumenti eżistenti oħra tal-Unjoni huma limitati fl-iskala u għalhekk ma jippermettux rispons suffiċjenti u lanqas ma jagħmluha possibbli li jiġu indirizzati b’mod effettiv il-konsegwenzi fuq skala kbira tal-kriżi tal-COVID-19 fl-Unjoni.

(5)Għalhekk, huwa meħtieġ li jiġi attivat l-appoġġ ta’ emerġenza skont ir-Regolament tal-Kunsill (UE) 2016/369.

(6)Sabiex ikun permess il-livell ta’ flessibbiltà meħtieġ biex jiġi żgurat rispons koordinat fit-tul f’ċirkostanzi mhux previsti kif inhu l-każ għall-kriżi tal-COVID-19, eż. il-forniment ta’ provvisti mediċi u medikazzjoni, il-miżuri ta’ rkupru, riċerka medika rilevanti, huwa meħtieġ li jiġi żgurat li l-impenji baġitarji li jsiru matul il-perjodu ta’ attivazzjoni jkunu jistgħu jintużaw għall-konklużjoni ta’ impenji legali matul id-durata kollha tal-perjodu ta’ attivazzjoni, mingħajr preġudizzju għar-regoli finanzjarji ġenerali applikabbli għall-baġit ġenerali tal-Unjoni stabbilit fl-Artikolu 114(2) tar-Regolament (UE, Euratom) 2018/1046 tal-Parlament Ewropew u tal-Kunsill. 5 . Jenħtieġ li l-kostijiet imġarrba skont dawn l-impenji legali jkunu eliġibbli għall-perjodu kollu tal-implimentazzjoni tagħhom.

(7)Sabiex jiġi żgurat trattament ugwali u kundizzjonijiet ekwi għall-Istati Membri kollha, huwa wkoll meħtieġ li jkun hemm lok għal eliġibbiltà retroattiva tal-kostijiet mid-data tal-attivazzjoni tal-appoġġ, inkluż għal azzjonijiet li diġà tlestew, dment li jkunu bdew wara dik id-data.

(8)Sabiex tiġi ppreservata n-natura sussidjarja tal-appoġġ ta’ emerġenza skont ir-Regolament (UE) Nru 2016/369, tali appoġġ jenħtieġ li jkun strettament komplementari għal kwalunkwe assistenza li ssir disponibbli taħt strumenti oħra tal-Unjoni.  

(9)Fil-kuntest ta’ kriżi tal-COVID-19, sar evidenti li huwa meħtieġ li jiġi estiż il-kamp ta’ applikazzjoni tar-Regolament (UE) 2016/369 biex jiġi pprovdut finanzjament li jkopri l-ħtiġijiet urġenti għal tagħmir u materjali mediċi, bħall-ventilaturi respiratorji u t-tagħmir protettiv, il-provvisti kimiċi għat-testijiet, il-kostijiet għall-iżvilupp, il-produzzjoni u d-distribuzzjoni ta’ mediċini, u provvisti u materjali oħra. Jenħtieġ li jkun possibbli wkoll li jiġu ffinanzjati azzjonijiet li jappoġġaw il-passi meħtieġa biex tinkiseb l-approvazzjoni għall-użu ta’ prodotti mediċi.

(10)Biex tittaffa l-pressjoni akuta fuq il-forza tax-xogħol medika u fuq ir-riżorsi tal-istat minħabba kapaċitajiet insuffiċjenti ta’ servizzi pubbliċi essenzjali, u biex tinżamm il-vijabbiltà tas-sistema tal-kura tas-saħħa, jenħtieġ li jkunu appoġġati l-infurzar temporanju u l-iskambju ta’ professjonisti mediċi kif ukoll it-trattament ta’ pazjenti minn Stati Membri oħra, b’mezzi finanzjarji jew organizzazzjonali.

(11)Jenħtieġ li l-professjonisti fil-kura tas-saħħa u l-loġistika jirċievu taħriġ ukoll fid-dawl tal-ġlieda kontra l-iffalsifikar tal-provvisti tal-kura tas-saħħa.

(12)Fid-dawl tal-konsegwenzi fuq skala kbira tal-COVID-19, jenħtieġ li jkun hemm impenn rapidu u komprensiv tas-sħab rilevanti kollha, inkluż tal-awtoritajiet pubbliċi, tal-fornituri primarji u privati tal-kura tas-saħħa u tal-kura fl-isptarijiet u fid-djar tal-kura, eċċ., attivitajiet biex tittaffa l-pressjoni fuq l-infrastruttura tas-saħħa u biex jingħata appoġġ lil gruppi ta’ persuni vulnerabbli f’riskju.

(13)Sabiex jiġu indirizzati n-nuqqasijiet ta’ provvista, jenħtieġ li jiġu appoġġati l-kapaċitajiet ta’ produzzjoni għal prodotti mediċi essenzjali bħal medikazzjoni, testijiet dijanjostiċi, provvisti tal-laboratorji, tagħmir protettiv, eċċ. u jenħtieġ li jiġi pprovdut finanzjament biex jinżamm stokk ta’ dawn il-prodotti.

(14)Il-metodi ta’ ttestjar addizzjonali jew alternattivi biex tiżdied il-kapaċità u r-riċerka medika rilevanti, jenħtieġ li jiġu assistiti b’mezzi finanzjarji u/jew organizzattivi.

(15)L-awtoritajiet kontraenti mill-Istati Membri qed jiffaċċjaw diffikultajiet legali u prattiċi konsiderevoli fix-xiri ta’ provvisti jew servizzi f’sitwazzjonijiet ta’ emerġenza. Sabiex l-awtoritajiet kontraenti jkunu jistgħu jieħdu l-akbar benefiċċju possibbli mill-potenzjal tas-suq intern f’termini ta’ ekonomiji ta’ skala u tal-kondiviżjoni tar-riskji u l-benefiċċji, huwa ta’ l-akbar importanza li jiġu estiżi l-possibbiltajiet li l-Kummissjoni tixtri provvisti jew servizzi f’isem l-Istati Membri. Jenħtieġ li l-Kummissjoni tkun tista’ twettaq il-proċeduri ta’ akkwist rilevanti. Meta awtorità kontraenti ta’ Stat Membru twettaq ċerti partijiet tal-proċedura, pereżempju l-ftuħ mill-ġdid tal-kompetizzjoni taħt ftehim qafas jew l-għoti ta’ kuntratti individwali bbażati fuq sistema dinamika ta’ xiri, dik l-awtorità kontraenti tibqa’ responsabbli għall-istadji li twettaq.

(16)F’sitwazzjonijiet ta’ emerġenza, meta jkun meħtieġ li jitwettaq akkwist konġunt bejn il-Kummissjoni u awtorità kontraenti waħda jew aktar mill-Istati Membri, jenħtieġ li jkun possibbli li l-Istati Membri kompletament jakkwistaw, jikru jew jieħdu b’lokazzjoni l-kapaċitajiet akkwistati b’mod konġunt.

(17)Jenħtieġ li l-Kummissjoni titħalla tixtri, taħżen, tbiegħ mill-ġdid u tagħti provvisti u servizzi, inklużi l-kirjiet, lill-Istati Membri jew lill-organizzazzjonijiet tas-sħab magħżula mill-Kummissjoni.

(18)Għalhekk, jenħtieġ li r-Regolament (UE) 2016/369 jiġi emendat skont dan.

(19)Minħabba s-sitwazzjoni relatata mal-kriżi tal-COVID-19, jenħtieġ li dan ir-Regolament jidħol fis-seħħ b’urġenza.

(20)Sabiex jiġi żgurat trattament ugwali u kundizzjonijiet ekwi għall-Istati Membri kollha u tiġi pprovduta kopertura irrispettivament minn meta seħħet it-tifqigħa f’kull Stat Membru, huwa meħtieġ li dan ir-Regolament jiġi applikat mill-1 ta’ Frar 2020,

ADOTTA DAN IR-REGOLAMENT:

Artikolu 1

L-appoġġ ta’ emerġenza skont ir-Regolament (UE) Nru 2016/369 huwa b’dan attivat biex jiffinanzja n-nefqa meħtieġa biex tiġi indirizzata l-pandemija tal-COVID-19 għall-perjodu mill-1 ta’ Frar 2020 sal-31 ta’ Jannar 2022.

Artikolu 2

Mingħajr preġudizzju għall-Artikolu 114(2) tar-Regolament (UE, Euratom) 2018/1046 u b’deroga minnu, l-impenji baġitarji globali li jwasslu għal nefqa għall-appoġġ skont dan ir-Regolament għandhom ikopru l-kostijiet totali tal-impenji legali korrispondenti li jsiru sa tmiem il-perjodu ta’ attivazzjoni msemmi fl-Artikolu 1.

In-nefqa għandha tkun eliġibbli mid-data tal-attivazzjoni tal-appoġġ imsemmi fl-Artikolu 1.

B’deroga mill-Artikolu 193(3) tar-Regolament (UE, Euratom) 2018/1046, jistgħu jingħataw għotjiet għal azzjonijiet li jkunu diġà tlestew qabel id-data tad-dħul fis-seħħ ta’ dan ir-Regolament sakemm l-azzjonijiet ikunu nbdew wara d-data tal-attivazzjoni msemmija fl-Artikolu 1.

Artikolu 3

Ir-Regolament (UE) 2016/369 huwa emendat kif ġej:

(1)L-Artikoli 3 u 4 huma sostitwiti b'dan li ġej:

"Artikolu 3

Azzjonijiet eliġibbli

1. L-appoġġ ta' emerġenza skont dan ir-Regolament għandu jagħti rispons ta' emerġenza bbażat fuq il-ħtiġijiet, li jikkomplimenta r-rispons tal-Istati Membri affettwati, immirat lejn il-preservazzjoni tal-ħajja, il-prevenzjoni u t-tnaqqis tas-sofferenza umana, u ż-żamma tad-dinjità tal-bniedem fejn ikun meħtieġ minħabba xi diżastru msemmi fl-Artikolu 1(1). Mingħajr preġudizzju għall-perjodu ta’ attivazzjoni kif imsemmi fl-Artikolu 2(1), l-appoġġ jista’ jingħata wkoll bil-ħsieb li jiġu indirizzati l-ħtiġijiet wara diżastru jew li jiġi evitat li jerġa’ jfeġġ.

2. L-appoġġ ta' emerġenza, kif imsemmi fil-paragrafu 1, jista' jinkludi kwalunkwe azzjoni ta' għajnuna umanitarja li tkun eliġibbli għall-finanzjament mill-Unjoni skont l-Artikoli 2, 3 u 4 tar-Regolament (KE) Nru 1257/96, u jista' konsegwentement jinkludi assistenza, sokkors u, fejn meħtieġ, operazzjonijiet ta' protezzjoni biex tiġi salvata u ppreżervata l-ħajja f'diżastri jew minnufih warajhom. Jista' jintuża wkoll biex jiffinanzja kull nefqa oħra marbuta direttament mal-implimentazzjoni tal-appoġġ ta' emerġenza skont dan ir-Regolament. B’mod partikolari, l-appoġġ jista’ jintuża biex jiġu ffinanzjati l-azzjonijiet stabbiliti fl-Anness 1.

3. Mingħajr preġudizzju għall-paragrafu 4, l-appoġġ ta' emerġenza skont dan ir-Regolament għandu jingħata u jiġi implimentat f'konformità mal-prinċipji umanitarji fundamentali tal-umanità, in-newtralità, l-imparzjalità u l-indipendenza.

4. L-azzjonijiet imsemmija fil-paragrafu 2 għandhom jitwettqu mill-Kummissjoni jew minn organizzazzjonijiet sħab magħżula mill-Kummissjoni. Il-Kummissjoni tista’ tagħżel, b’mod partikolari, bħala organizzazzjonijiet sħab, organizzazzjonijiet mhux governattivi, servizzi speċjalizzati tal-Istati Membri, awtoritajiet nazzjonali u korpi pubbliċi oħra, organizzazzjonijiet internazzjonali u l-aġenziji tagħhom u, fejn xieraq u meħtieġ għall-implimentazzjoni ta’ azzjoni, organizzazzjonijiet u entitajiet oħrajn li għandhom l-għarfien espert meħtieġ jew li huma attivi fis-setturi rilevanti għall-għajnuna f’każ ta’ diżastru, bħall-fornituri ta’ servizzi privati, il-manifatturi ta’ tagħmir kif ukoll ix-xjentisti u l-istituzzjonijiet ta’ riċerka. B'hekk, il-Kummissjoni għandha żżomm kooperazzjoni mill-qrib mal-Istat Membru milqut.

Artikolu 4

Tipi ta' intervent finanzjarju u proċeduri ta' implimentazzjoni

1. Il-Kummissjoni għandha timplimenta l-appoġġ finanzjarju tal-Unjoni f’konformità mar-Regolament (UE, Euratom) 2018/1046 tal-Parlament Ewropew u tal-Kunsill 6 . B'mod partikolari, il-finanzjament mill-Unjoni għal azzjonijiet ta' appoġġ skont dan ir-Regolament għandu jkun implimentat permezz ta' ġestjoni diretta jew indiretta skont il-punti (a) u (c), rispettivament, tal-Artikolu 62(1) ta' dan ir-Regolament.

2. L-appoġġ ta’ emerġenza skont dan ir-Regolament għandu jkun iffinanzjat mill-baġit ġenerali tal-Unjoni u mill-kontribuzzjonijiet li jistgħu jsiru mill-Istati Membri u minn donaturi oħra pubbliċi jew privati bħala dħul assenjat estern f’konformità mal-Artikolu 21(5) tar-Regolament (UE, Euratom) Nru 2018/1046.

3. Il-finanzjament mill-Unjoni għal azzjonijiet ta' appoġġ skont dan ir-Regolament li għandu jiġi implimentat permezz ta' ġestjoni diretta jista' jingħata direttament mill-Kummissjoni mingħajr sejħa għal proposti, f'konformità mal-Artikolu 195 tar-Regolament (UE, Euratom) Nru 2018/1046. Għal dan l-għan il-Kummissjoni tista' tidħol fi ftehimiet qafas ta' sħubija jew tibbaża fuq ftehimiet qafas ta' sħubija li diġà jeżistu u li ġew konklużi f'konformità mar-Regolament (KE) Nru 1257/96.

4. Meta l-Kummissjoni timplimenta operazzjonijiet ta' appoġġ ta' emerġenza permezz ta' organizzazzjonijiet mhux governattivi, il-kriterji li jikkonċernaw il-kapaċità finanzjarja u operazzjonali għandhom jitqiesu bħala ssodisfati fejn ikun hemm fis-seħħ ftehim qafas ta' sħubija bejn dik l-organizzazzjoni u l-Kummissjoni bis-saħħa tar-Regolament (KE) Nru 1257/96.

5. L-appoġġ ta’ emerġenza skont dan ir-Regolament jista’ jingħata fi kwalunkwe waħda mill-forom li ġejjin:

(a) akkwist konġunt mal-Istati Membri kif imsemmi fl-Artikolu 165 (2) tar-Regolament (UE, Euratom) 2018/1046 li bih l-Istati Membri jistgħu jakkwistaw, jikru jew jieħdu b’lokazzjoni kompletament il-kapaċitajiet miġbura b’mod konġunt;

(b) għoti ta’ akkwist pubbliku mill-Kummissjoni f’isem l-Istati Membri bbażat fuq ftehim bejn il-Kummissjoni u l-Istati Membri.

(c) għoti ta’ akkwist pubbliku mill-Kummissjoni bħala bejjiegħ bl-ingrossa permezz tax-xiri, l-istokkjar u l-bejgħ mill-ġdid jew l-għoti ta’ provvisti u servizzi, inklużi l-kirjiet, lill-Istati Membri jew lill-organizzazzjonijiet sħab magħżula mill-Kummissjoni. 

6. Fil-każ ta’ proċedura ta’ akkwist kif imsemmi fil-paragrafu 5(b), il-kuntratti li jirriżultaw għandhom jiġu konklużi minn wieħed minn dawn li ġejjin:

(a) mill-Kummissjoni li permezz tagħha s-servizzi jew l-oġġetti għandhom jingħataw jew jiġu kkonsenjati lill-Istati Membri jew lill-organizzazzjonijiet sħab magħżula mill-Kummissjoni;

(b) mill-Istati Membri parteċipanti li permezz tagħhom huma għandhom jakkwistaw, jikru jew jieħdu b’lokazzjoni l-kapaċitajiet miksuba għalihom mill-Kummissjoni.

7. Fil-każ ta’ proċeduri ta’ akkwist kif imsemmi fil-paragrafu 5 (b) u (c), il-Kummissjoni għandha ssegwi r-regoli tar-Regolament (UE, Euratom) 2018/1046 għall-akkwist tagħha stess.”

(2)Fl-Artikolu 5, il-paragrafi 1 u 2 huma sostitwiti b’dan li ġej:

“1. Il-finanzjament mill-Unjoni jista’ jkopri kwalunkwe kost dirett meħtieġ għall-implimentazzjoni tal-azzjonijiet eliġibbli stabbiliti fl-Artikolu 3, inklużi x-xiri, il-preparazzjoni, il-ġbir, it-trasport, il-ħażna u d-distribuzzjoni ta’ oġġetti u servizzi taħt dawk l-azzjonijiet kif ukoll kostijiet ta’ investiment ta’ azzjonijiet jew proġetti relatati direttament mal-kisba tal-objettivi tal-appoġġ ta’ emerġenza attivat skont dan ir-Regolament. ”

2. Il-kostijiet indiretti tal-organizzazzjonijiet sħab jistgħu jkunu koperti wkoll f'konformità mar-Regolament (UE, Euratom) Nru 2018/1046. ”

(3)Jiżdied l-Anness 1 li ġej:

“ANNESS 1

Azzjonijiet eliġibbli

L-azzjonijiet li ġejjin jistgħu jiġu ffinanzjati fil-każ ta’ pandemiji li għandhom effett fuq skala kbira:

(a) it-tisħiħ temporanju tal-forza tax-xogħol medika, l-iskambju ta’ professjonisti mediċi, l-ospitar ta’ pazjenti barranin jew tip ieħor ta’ appoġġ reċiproku;

(b) l-iskjerament ta’ faċilitajiet tal-kura tas-saħħa temporanji u l-estensjoni temporanja ta’ faċilitajiet tal-kura tas-saħħa eżistenti biex tittaffa l-pressjoni fuq l-istrutturi eżistenti u tiżdied il-kapaċità ġenerali tal-kura tas-saħħa;

(c) attivitajiet li jappoġġaw l-amministrazzjoni tal-applikazzjoni fuq skala kbira ta’ testijiet mediċi u t-tħejjija tal-istrateġiji u l-protokolli meħtieġa għall-ittestjar xjentifiku;

(d) l-istabbiliment ta’ faċilitajiet ta’ kwarantina temporanji u miżuri oħra xierqa fil-fruntieri tal-Unjoni;

(e) l-iżvilupp, il-produzzjoni jew l-akkwist u d-distribuzzjoni ta’ prodotti mediċi;

(f) żidiet u konverżjonijiet tal-kapaċitajiet ta’ produzzjoni għall-prodotti mediċi kif imsemmi fil-punt (e) biex jiġu indirizzati n-nuqqasijiet ta’ provvista;

(g) il-manutenzjoni tal-istokk ta’ prodotti mediċi kif imsemmi fil-punt (e) u r-rimi tagħhom;

(h) azzjonijiet li jappoġġaw il-passi meħtieġa biex tinkiseb l-approvazzjoni għall-użu tal-prodotti mediċi kif imsemmi fil-punt (e) jekk meħtieġ;

(j) azzjonijiet biex jiġu żviluppati metodi xierqa għall-intraċċar tal-iżvilupp tal-epidemija u tar-riżultati tal-miżuri implimentati biex jindirizzawha;

(k) l-organizzar ta’ provi kliniċi ad-hoc ta’ terapiji jew ta’ dijanjostika potenzjali skont l-istandards ta’ prova maqbula fil-livell tal-Unjoni;

(l) il-validazzjoni xjentifika ta’ prodotti mediċi, inklużi metodi ġodda ta’ ttestjar potenzjali.

Il-lista ta' hawn fuq mhijiex eżawrjenti.”

Artikolu 3

Dħul fis-seħħ

Dan ir-Regolament għandu jidħol fis-seħħ fil-jum tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA / INIZJATTIVA

1.1.Titlu tal-proposta / inizjattiva

1.2.Qasam / oqsma ta’ politika kkonċernat(i) fl-istruttura ABM/ABB

1.3.Natura tal-proposta / tal-inizjattiva

1.4.Objettiv(i)

1.5.Raġunijiet għall-proposta / għall-inizjattiva

1.6.Durata u impatt finanzjarju

1.7.Mod(i) ta’ ġestjoni ppjanat(i)

2.MIŻURI TA’ ĠESTJONI

2.1.Regoli ta’ monitoraġġ u ta’ rapportar

2.2.Sistema ta' ġestjoni u kontroll

2.3.Miżuri għall-prevenzjoni tal-frodi u tal-irregolaritajiet

3.IMPATT FINANZJARJU STMAT TAL-PROPOSTA / TAL-INIZJATTIVA

3.1.Intestatura/i tal-qafas finanzjarju pluriennali u l-linja/i baġitarja/i tan-nefqa affettwata/i

3.2.Impatt stmat fuq in-nefqa 

3.2.1.Sommarju tal-impatt stmat fuq in-nefqa

3.2.2.Impatt stmat fuq l-approprjazzjonijiet operattivi

3.2.3.Impatt stmat fuq l-approprjazzjonijiet ta’ natura amministrattiva

3.2.4.Il-kompatibbiltà mal-qafas finanzjarju pluriennali attwali

3.2.5.Kontribuzzjonijiet minn terzi

3.3.Impatt stmat fuq id-dħul

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA / TAL-INIZJATTIVA

1.1.Titlu tal-proposta / tal-inizjattiva

1.2.Qasam / oqsma ta’ politika kkonċernat(i) fl-istruttura ABM/ABB 7  

1.3.Natura tal-proposta / tal-inizjattiva

X.Il-proposta/inizjattiva tirrigwarda azzjoni ġdida 

◻ Il-proposta / l-inizjattiva hi marbuta ma’ azzjoni ġdida b’segwitu għal proġett pilota / azzjoni preparatorja 8  

◻ Il-proposta / l-inizjattiva hija dwar l-estensjoni ta’ azzjoni eżistenti 

◻ Il-proposta / l-inizjattiva hija dwar azzjoni diretta mill-ġdid lejn azzjoni ġdida 

1.4.Objettiv(i)

1.4.1.L-objettiv(i) strateġiku/strateġiċi pluriennali tal-Kummissjoni fil-mira tal-proposta / l-inizjattiva

1.4.2.L-objettiv(i) speċifiku / speċifiċi u l-attività / l-attivitajiet ABM/ABB ikkonċernata/i

1.4.3.Riżultat(i) u impatt mistennija

Speċifika l-effetti li għandu jkollha l-proposta / l-inizjattiva fuq il-benefiċjarji / il-gruppi fil-mira.

1.4.4.Indikaturi tar-riżultati u tal-impatt

Speċifika l-indikaturi għall-monitoraġġ tal-implimentazzjoni tal-proposta / tal-inizjattiva.

1.5.Raġunijiet għall-proposta / għall-inizjattiva

1.5.1.Rekwiżit(i) li jrid(u) jiġi/u ssodisfat(i) fuq terminu qasir jew twil

1.5.2.Valur miżjud tal-involviment tal-UE

1.5.3.Tagħlimiet miksuba minn esperjenzi simili fl-imgħoddi

1.5.4.Kompatibbiltà u sinerġija possibbli ma’ strumenti xierqa oħra

1.6.Durata u impatt finanzjarju

X Proposta b’tul ta’ żmien limitat

–effettivament mid-data tal-adozzjoni għal perjodu ta’ 24 xahar (“perjodu ta’ attivazzjoni”); azzjonijiet li jirċievu appoġġ finanzjarju skont ir-Regolament (UE) 2016/369 bħala parti minn din l-attivazzjoni jista’ jkollhom perjodu ta’ implimentazzjoni li jintemm wara t-tmiem tal-perjodu ta’ attivazzjoni bil-kundizzjoni li kull perjodu ta’ tali implimentazzjoni ma jintemmx aktar minn 24 xahar wara tmiem il-perjodu ta’ attivazzjoni

–Impatt finanzjarju: l-2020 għall-approprjazzjonijiet ta’ impenn u mill-2020 sal-2023 għall-approprjazzjonijiet ta’ pagament.

1.7.Mod(i) ta’ ġestjoni ppjanat(i) 9

X Ġestjoni diretta mill-Kummissjoni

–X mid-dipartimenti tagħha, inkluż mill-persunal tagħha fid-delegazzjonijiet tal-Unjoni;

–◻    mill-aġenziji eżekuttivi

◻ Ġestjoni kondiviża mal-Istati Membri

X Ġestjoni indiretta billi l-kompiti tal-implimentazzjoni baġitarja jiġu nkarigati lil:

–◻ pajjiżi terzi jew lill-korpi nnominati minnhom;

–X organizzazzjonijiet internazzjonali u l-aġenziji tagħhom (iridu jiġu speċifikati);

–◻il-BEI u l-Fond Ewropew tal-Investiment;

–◻ korpi li hemm referenza għalihom fl-Artikoli 208 u 209 tar-Regolament Finanzjarju;

–X korpi rregolati bil-liġi pubblika;

–X korpi amministrati mid-dritt privat b’missjoni ta’ servizz pubbliku sal-punt li jipprovdu garanziji finanzjarji adegwati;

–◻ korpi rregolati mil-liġi privata ta’ Stat Membru li jkunu inkarigati bl-implimentazzjoni ta’ sħubija pubblika-privata u li jipprovdu garanziji finanzjarji adegwati;

–◻ persuni inkarigati bl-implimentazzjoni ta’ azzjonijiet speċifiċi fil-PESK skont it-Titolu V tat-TUE, u identifikati fl-att bażiku rilevanti.

–Jekk tindika iżjed minn modalità waħda ta’ ġestjoni, ipprovdi d-dettalji fit-taqsima “Kummenti”.

Kummenti

2.MIŻURI TA’ ĠESTJONI

2.1.Regoli ta’ monitoraġġ u ta’ rapportar

Speċifika l-frekwenza u l-kundizzjonijiet.

2.2.Sistema ta' ġestjoni u kontroll

2.2.1.Riskju/i identifikat(i)

2.2.2.Informazzjoni dwar is-sistema ta’ kontroll intern li ġiet stabbilita

2.2.3.Stima tal-kostijiet u tal-benefiċċji tal-kontrolli u valutazzjoni tal-livell mistenni tar-riskju ta’ żball

2.3.Miżuri għall-prevenzjoni tal-frodi u tal-irregolaritajiet

Speċifika l-miżuri protettivi u ta’ prevenzjoni eżistenti jew previsti.

3.IMPATT FINANZJARJU STMAT TAL-PROPOSTA / TAL-INIZJATTIVA

3.1.Intestatura/i tal-qafas finanzjarju pluriennali u l-linja/i baġitarja/i tan-nefqa affettwata/i

·Linji baġitarji eżistenti

Skont l-ordni tal-intestaturi tal-qafas finanzjarju pluriennali u tal-linji baġitarji.

·Ebda linja baġitarja ġdida mitluba

3.2.Impatt stmat fuq in-nefqa

3.2.1.Sommarju tal-impatt stmat fuq in-nefqa

Miljuni ta’ EUR (aġġustati għal tliet pożizzjonijiet deċimali)

Miljuni ta’ EUR (aġġustati għal tliet pożizzjonijiet deċimali)

Miljuni ta’ EUR (aġġustati għal tliet pożizzjonijiet deċimali)

3.2.2.Impatt stmat fuq l-approprjazzjonijiet operattivi

–◻    Il-proposta / l-inizjattiva ma teħtieġx l-użu ta’ approprjazzjonijiet operattivi

–X    Il-proposta / l-inizjattiva teħtieġ l-użu ta’ approprjazzjonijiet operattivi, kif spjegat hawn taħt:

Approprjazzjonijiet ta' impenn f’miljuni ta' EUR (aġġustati għal tliet pożizzjonijiet deċimali)

3.2.3.Impatt stmat fuq l-approprjazzjonijiet ta’ natura amministrattiva

3.2.3.1.Sommarju

–◻    Il-proposta / l-inizjattiva ma teħtieġx l-użu ta’ approprjazzjonijiet ta’ natura amministrattiva.

–X    Il-proposta / l-inizjattiva teħtieġ l-użu ta’ approprjazzjonijiet ta’ natura amministrattiva, kif spjegat hawn taħt:

Miljuni ta’ EUR (aġġustati għal tliet pożizzjonijiet deċimali)

L-approprjazzjonijiet meħtieġa għar-riżorsi umani u għal infiq ieħor ta’ natura amministrattiva se jiġu koperti mill-approprjazzjonijiet tad-DĠ li diġà jkunu assenjati għall-ġestjoni tal-azzjoni u / jew li jkunu ġew allokati mill-ġdid fid-DĠ, flimkien, jekk ikun meħtieġ, ma’ kull allokazzjoni addizzjonali li tista’ tingħata lid-DĠ ta’ ġestjoni skont il-proċedura annwali ta’ allokazzjoni u fid-dawl tal-limitazzjonijiet baġitarji..

3.2.3.2.Ir-rekwiżiti stmati tar-riżorsi umani

–◻    Il-proposta / l-inizjattiva ma teħtieġx l-użu ta’ riżorsi umani.

–X    Il-proposta / l-inizjattiva teħtieġ l-użu ta’ riżorsi umani, kif spjegat hawn taħt:

Stima li trid tiġi espressa f’unitajiet ekwivalenti għal full-time

XX huwa l-qasam ta’ politika jew it-titolu baġitarju kkonċernat.

Ir-riżorsi umani meħtieġa jintlaħqu mill-persunal tad-DĠs li diġà huwa assenjat għall-ġestjoni tal-azzjoni u / jew li diġà ngħata kariga band'oħra fid-DĠs, flimkien, jekk ikun meħtieġ, ma' xi allokazzjoni addizzjonali li tista' tingħata lid-DĠs li jkunu qed imexxu l-azzjoni skont il-proċedura ta' allokazzjoni annwali u fid-dawl tar-restrizzjonijiet baġitarji.

Deskrizzjoni tal-kompiti li jridu jsiru:

3.2.4.Kompatibbiltà mal-qafas finanzjarju pluriennali attwali

–◻    Il-proposta / l-inizjattiva hija kompatibbli mal-qafas finanzjarju pluriennali attwali.

–◻    Il-proposta / l-inizjattiva se tinvolvi l-programmazzjoni mill-ġdid tal-intestatura rilevanti fil-qafas finanzjarju pluriennali.

–X    Il-proposta teħtieġ l-użu tal-marġni mhux allokat taħt l-intestatura rilevanti tal-QFP u / jew l-użu tal-istrumenti speċjali jew ir-reviżjoni tal-qafas finanzjarju pluriennali.

3.2.5.Kontribuzzjonijiet minn terzi

–X Il-proposta / l-inizjattiva ma tipprevedix kofinanzjament minn terzi 18 .

–◻    Il-proposta / l-inizjattiva tipprevedi l-kofinanzjament stmat hawn taħt:

Approprjazzjonijiet f’miljuni ta’ EUR (aġġustati għal tliet pożizzjonijiet deċimali)

3.3.Impatt stmat fuq id-dħul

–X    Il-proposta / l-inizjattiva ma għandha l-ebda impatt finanzjarju fuq id-dħul.

–◻    Il-proposta / l-inizjattiva għandha dan l-impatt finanzjarju:

–◻    fuq ir-riżorsi proprji

–◻    fuq id-dħul mixxellanju

(1)    Proposta għal Regolament tal-Parlament Ewropew u tal-Kunsill li jemenda r-Regolament (UE) Nru 1303/2013, ir-Regolament (UE) Nru 1301/2013 u r-Regolament (UE) Nru 508/2014 fir-rigward ta’ miżuri speċifiċi biex jiġu mmobilizzati investimenti fis-sistemi tal-kura tas-saħħa tal-Istati Membri u fis-setturi l-oħra tal-ekonomiji tagħhom b’reazzjoni għat-tifqigħa COVID-19 [Inizjattiva ta’ Investiment fir-Rispons għall-Coronavirus], tat-13 ta’ Marzu 2020 COM (2020) 113 final.

(2)    Il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Bank Ċentrali Ewropew, lill-Bank Ewropew tal-Investiment u lill-Grupp tal-Euro, Rispons ekonomiku kkoordinat għat-Tifqigħa tal-COVID-19, COM(2020) 112 final tat-13 ta’ Marzu 2020.

(3)    Proposta għal Regolament tal-Parlament Ewropew u tal-Kunsill li jemenda r-Regolament tal-Kunsill (KE) Nru 2012/2002 sabiex jipprovdi assistenza finanzjarja lill-Istati Membri u lill-pajjiżi li qed jinnegozjaw l-adeżjoni tagħhom mal-Unjoni li jkunu affettwati serjament minn emerġenza tas-saħħa pubblika kbira, COM(2020) 114 final tat-13 ta’ Marzu 2020.

(4)    Id-Deċiżjoni Nru 1313/2013/UE tal-Parlament Ewropew u tal-Kunsill tas-17 ta' Diċembru 2013 dwar Mekkaniżmu tal-Unjoni għall-Protezzjoni Ċivili (ĠU L 347, 20.12.2013, p. 924).

(5)    Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni 541/2014/UE u li jħassar ir-Regolament (UE, Euratom) Nru 966/2012 (ĠU L 193, 30.7.2018, p. 1).

(6)    Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU L 193, 30.7.2018, p. 1).

(7)    ABM (Activity-Based Management): ġestjoni bbażata fuq l-attività; ABB (Activity-Based Budgeting): ibbaġitjar ibbażat fuq l-attività.

(8)    Kif imsemmi fl-Artikolu 54(2)(a) jew (b) tar-Regolament Finanzjarju.

(9)    Id-dettalji tal-modi ta’ ġestjoni u r-referenzi għar-Regolament Finanzjarju jinstabu fuq is-sit BudgWeb: http://www.cc.cec/budg/man/budgmanag/budgmanag_en.html

(10)    Diff. = Approprjazzjonijiet differenzjati / Mhux diff. = Approprjazzjonijiet mhux differenzjati.

(11)    EFTA: Assoċjazzjoni Ewropea tal-Kummerċ Ħieles.

(12)    Pajjiżi kandidati u, fejn applikabbli, kandidati potenzjali mill-Balkani tal-Punent.

(13)    Assistenza teknika u / jew amministrattiva u nefqa b’sostenn għall-implimentazzjoni ta’ programmi u / jew ta’ azzjonijiet tal-UE (li qabel kienu l-linji “BA”), riċerka indiretta u riċerka diretta.

(14)    Kif deskritt fil-punt 1.4.2. “Objettiv(i) speċifiku/speċifiċi…”

(15)    Assistenza teknika u / jew amministrattiva u nefqa b’sostenn għall-implimentazzjoni ta’ programmi u / jew ta’ azzjonijiet tal-UE (li qabel kienu l-linji “BA”), riċerka indiretta u riċerka diretta.

(16)    AC = Aġent Kuntrattwali; AL = Persunal Lokali; SNE= Espert Nazzjonali Sekondat; INT = persunal tal-aġenzija; JPD = Esperti Subordinati fid-Delegazzjonijiet.

(17)    Sottolimitu għall-persunal estern kopert minn approprjazzjonijiet operattivi (li qabel kienu l-linji “BA”).

(18)    L-Artikolu 4(2) tar-Regolament tal-Kunsill 2016/369 jipprevedi l-possibbiltà li donaturi pubbliċi jew privati jikkontribwixxu għall-Istrument għall-Appoġġ ta’ Emerġenza. Jekk isiru disponibbli dawn il-kontribuzzjonijiet se jikkostitwixxu dħul assenjat estern skont dik id-dispożizzjoni u skont l-Artikolu 21(5) tar-Regolament Finanzjarju.