Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 52020IP0137

    Riżoluzzjoni mhux leġiżlattiva tal-Parlament Ewropew tat-18 ta' Ġunju 2020 dwar l-abbozz ta' deċiżjoni tal-Kunsill dwar il-konklużjoni tal-Protokoll dwar l-implimentazzjoni tal-Ftehim ta' Sħubija dwar is-Sajd bejn il-Komunità Ewropea u r-Repubblika tal-Guinea-Bissau (mill-2019 sal-2024) (08928/2019 – C9-0011/2019 – 2019/0090M(NLE))

    ĠU C 362, 8.9.2021, p. 153–157 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

    8.9.2021   

    MT

    Il-Ġurnal Uffiċjali tal-Unjoni Ewropea

    C 362/153

    P9_TA(2020)0137

    Protokoll dwar l-implimentazzjoni tal-Ftehim ta' Sħubija dwar is-Sajd bejn il-Komunità Ewropea u l-Guinea-Bissau (2019-2024) (Riżoluzzjoni)

    Riżoluzzjoni mhux leġiżlattiva tal-Parlament Ewropew tat-18 ta' Ġunju 2020 dwar l-abbozz ta' deċiżjoni tal-Kunsill dwar il-konklużjoni tal-Protokoll dwar l-implimentazzjoni tal-Ftehim ta' Sħubija dwar is-Sajd bejn il-Komunità Ewropea u r-Repubblika tal-Guinea-Bissau (mill-2019 sal-2024) (08928/2019 – C9-0011/2019 – 2019/0090M(NLE))

    (2021/C 362/22)

    Il-Parlament Ewropew,

    —

    wara li kkunsidra l-abbozz ta' Deċiżjoni tal-Kunsill (08928/2019),

    —

    wara li kkunsidra l-konklużjoni tal-Protokoll dwar l-implimentazzjoni tal-Ftehim ta' Sħubija dwar is-Sajd bejn il-Komunità Ewropea u r-Repubblika tal-Guinea-Bissau (08894/2019) (“il-Protokoll”),

    —

    wara li kkunsidra t-talba għal approvazzjoni mressqa mill-Kunsill skont l-Artikolu 43, l-Artikolu 218(6), it-tieni subparagrafu, punt (a)(v), u l-Artikolu 218(7) tat-Trattat dwar il-Funzjonament tal-Unjoni Ewropea (C9-0011/2019),

    —

    wara li kkunsidra l-Artikolu 31(4) tar-Regolament (UE) Nru 1380/2013 tal-Parlament Ewropew u tal-Kunsill tal-11 ta' Diċembru 2013 dwar il-Politika Komuni tas-Sajd, li jemenda r-Regolamenti tal-Kunsill (KE) Nru 1954/2003 u (KE) Nru 1224/2009 u li jħassar ir-Regolamenti tal-Kunsill (KE) Nru 2371/2002 u (KE) Nru 639/2004 u d-Deċiżjoni tal-Kunsill 2004/585/KE (Politika Komuni tas-Sajd) (1),

    —

    wara li kkunsidra r-riżoluzzjoni tiegħu tat-12 ta' April 2016 dwar regoli komuni fid-dawl tal-applikazzjoni tad-dimensjoni esterna tal-PKS, inklużi l-Ftehimiet dwar is-Sajd (2),

    —

    wara li kkunsidra r-riżoluzzjoni leġiżlattiva tiegħu tat-18 ta’ Ġunju 2020 (3) dwar l-abbozz ta’ deċiżjoni,

    —

    wara li kkunsidra l-Artikolu 105(2) tar-Regoli ta' Proċedura tiegħu,

    —

    wara li kkunsidra l-opinjoni tal-Kumitat għall-Iżvilupp,

    —

    wara li kkunsidra r-rapport tal-Kumitat għas-Sajd (A9-0013/2020),

    A.

    billi l-objettiv ġenerali tal-Ftehim ta' Sħubija dwar is-Sajd Sostenibbli bejn l-UE u l-Guinea-Bissau huwa li tissaħħaħ il-kooperazzjoni fil-qasam tas-sajd bejn l-UE u l-Guinea-Bissau, fl-interess taż-żewġ partijiet, permezz tal-promozzjoni ta' politika tas-sajd sostenibbli u l-isfruttament san u sostenibbli tar-riżorsi tas-sajd fiż-żona tas-sajd tal-Guinea-Bissau, flimkien mal-iżvilupp tas-settur tas-sajd tal-Guinea-Bissau u tal-ekonomija blu tagħha;

    B.

    billi, b'mod ġenerali, l-użu tal-opportunitajiet tas-sajd taħt il-Ftehim ta' Sħubija dwar is-Sajd Sostenibbli preċedenti jitqies bħala wieħed sodisfaċenti;

    C.

    billi l-Ftehim ta' Sħubija dwar is-Sajd Sostenibbli bejn l-UE u l-Guinea-Bissau huwa importanti ferm fil-kuntest tal-Ftehimiet ta' Sħubija dwar is-Sajd Sostenibbli konklużi min-naħa tal-UE ma' pajjiżi terzi, u bħalissa huwa t-tielet Ftehim ta' Sħubija dwar is-Sajd Sostenibbli l-aktar importanti f'dawk li huma fondi involuti, u joffri l-vantaġġ miżjud li hu wieħed minn tliet ftehimiet biss li jippermettu l-aċċess għas-sajd imħallat;

    D.

    billi l-kontribut tas-sajd tal-Guinea-Bissau għar-rikkezza tal-pajjiż huwa baxx ħafna (3,5 % tal-PDG fl-2015), għad li l-fondi li se jirċievi l-pajjiż permezz tal-Ftehim ta' Sħubija dwar is-Sajd Sostenibbli bħala kumpens finanzjarju għall-aċċess għar-riżorsi se jagħmel kontribut sinifikanti għall-finanzi pubbliċi nazzjonali tiegħu;

    E.

    billi, meta mqabbel mal-Protokoll preċedenti, il-kontribuzzjoni finanzjarja tal-UE żdiedet minn EUR 9 miljun għal EUR 11,6-il miljun fis-sena fir-rigward tal-ammont annwali għall-aċċess għar-riżorsi tas-sajd u minn EUR 3 miljun għal EUR 4 miljun fis-sena fir-rigward tal-appoġġ tal-UE għall-politika settorjali tas-sajd tal-Guinea-Bissau;

    F.

    billi tul il-perjodu kopert mill-Protokoll, l-opportunitajiet tas-sajd se jiġu definiti b'żewġ modi differenti: matul l-ewwel sentejn, l-isforz tas-sajd (imkejjel f'termini ta’ tunnellaġġ gross reġistrat (TGR)), u matul l-aħħar tliet snin, il-qabdiet totali permissibbli (f'tunnellati); billi din it-tranżizzjoni għandha tkun akkumpanjata, matul l-ewwel sentejn tal-Protokoll, mill-implimentazzjoni ta' sistema elettronika ta' rappurtar (SER) tal-qabdiet u l-ipproċessar tad-data tal-qabdiet;

    G.

    billi matul l-ewwel perjodu kopert mill-Protokoll, l-opportunitajiet tas-sajd mogħtija lill-flotot tal-UE huma dawn li ġejjin: 3 700 TGR għall-bastimenti tat-tkarkir mgħammar bi friża għas-sajd tal-gambli, 3 500 TGR għall-bastimenti tat-tkarkir mgħammar bi friża għas-sajd tal-ħut bil-pinen u ċ-ċefalopodi u 15 000 TGR għall-bastimenti tat-tkarkir pelaġiċi żgħar, 28 bastiment bit-tartarun u bil-konz mgħammar bi friża għas-sajd tat-tonn, u 13-il bastiment bil-bastun u x-xlief għas-sajd għat-tonn; billi, matul it-tieni perjodu, l-opportunitajiet tas-sajd mogħtija lill-flotot tal-UE huma dawn li ġejjin: 2 500 tunnellata għall-bastimenti tat-tkarkir mgħammar bi friża għas-sajd tal-gambli, 11 000 għall-bastimenti tat-tkarkir mgħammar bi friża għas-sajd tal-ħut bil-pinen, 1 500 tunnellata għall-bastimenti tat-tkarkir mgħammar bi friża għas-sajd taċ-ċefalopodi u 18 000 tunnellata għall-bastimenti tat-tkarkir pelaġiċi żgħar, 28 bastiment bit-tartarun u bil-konz mgħammar bi friża għas-sajd tat-tonn, u 13-il bastimenti tas-sajd għat-tonn bil-bastun u x-xlief;

    H.

    billi l-ewwel ftehim dwar is-sajd bejn il-Komunità Ekonomika Ewropea u l-Guinea-Bissau kien imur lura għall-1980; billi l-protokoll preċedenti tal-Ftehim skada fit-23 ta' Novembru 2017; billi l-prestazzjoni tal-komponent tal-kooperazzjoni għall-iżvilupp ta' dawn il-ftehimiet (jiġifieri l-appoġġ settorjali) ma kinitx globalment sodisfaċenti; billi, minkejja dan, ġie rreġistrat progress fil-monitoraġġ, il-kontroll u s-sorveljanza tas-sajd u fil-kapaċità tal-ispezzjoni sanitarja, bħalma ġie rreġistrat progress ukoll fil-parteċipazzjoni tal-Guinea-Bissau fil-korpi reġjonali tas-sajd; billi l-kooperazzjoni settorjali hemm bżonn li tissaħħaħ sabiex jiġi promoss aħjar l-iżvilupp tas-settur tas-sajd lokali u l-industriji u l-attivitajiet relatati ħalli jiġi żgurat li proporzjon akbar tal-valur miżjud maħluq mill-isfruttament tar-riżorsi naturali tal-pajjiż jibqa' fil-Guinea-Bissau;

    I.

    billi, sabiex is-settur tas-sajd tal-Guinea-Bissau jiżviluppa, jeħtieġ li tiġi installata infrastruttura bażika, bħal portijiet, siti ta' ħatt l-art, faċilitajiet għall-ħżin u impjanti għall-ipproċessar, li għadhom jonqsu, bi sforz biex jiġi attirat il-ħatt l-art tal-ħut li jinqabad fl-ilmijiet tal-Guinea-Bissau;

    J.

    billi s-sena 2021 se tara l-bidu tad-Deċennju tan-Nazzjonijiet Uniti tax-Xjenza dwar l-Oċeani għall-Iżvilupp Sostenibbli (2021-2030); billi l-pajjiżi terzi għandhom jiġu inkoraġġiti jwettqu rwol ewlieni fil-kisba tal-għarfien;

    K.

    billi l-kummerċ tal-prodotti tas-sajd mill-Guinea-Bissau kien ġie pprojbit min-naħa tal-UE għal bosta snin minħabba li l-pajjiż ma kienx kapaċi jikkonforma mal-miżuri sanitarji mitluba mill-UE; billi d-dewmien fil-proċess ta' ċertifikazzjoni tal-laboratorju analitiku (CIPA) huwa l-ostaklu ewlieni għall-esportazzjoni tal-prodotti tas-sajd mill-Guinea-Bissau lejn l-UE; billi l-awtoritajiet tal-Guinea-Bissau u l-Kummissjoni qed jaħdmu flimkien fil-proċess ta' ċertifikazzjoni sabiex ineħħu l-projbizzjoni;

    L.

    billi hemm bżonn li jiġi żgurat li proporzjon akbar tal-valur miżjud iġġenerat mill-isfruttament tar-riżorsi tas-sajd fiż-żona tas-sajd tal-Guinea-Bissau jibqa' fil-pajjiż;

    M.

    billi l-impjieg dirett fis-settur tas-sajd fil-Guinea-Bissau kien limitat, anke f'dak li jirrigwarda l-impjieg ta' membri tal-ekwipaġġ lokali abbord il-bastimenti (attwalment, l-għadd ta' dawk li qed jaħdmu fuq dawn il-bastimenti huwa iktar baxx minn meta ġie konkluż il-Protokoll preċedenti) jew in-nisa, li l-għajxien u l-impjiegi tagħhom jiddependu mis-settur tas-sajd;

    N.

    billi meta mqabbel mal-Protokoll preċedenti, l-għadd ta' baħrin li għandhom jitħaddmu abbord fil-flotta tal-UE żdied b'mod sinifikanti; billi s-sidien tal-bastimenti tal-UE għandhom jagħmlu ħilithom biex iħaddmu abbord baħrin mill-Guinea-Bissau addizzjonali; billi l-awtoritajiet tal-Guinea-Bissau għandhom ifasslu u jżommu aġġornata lista indikattiva tal-baħrin ikkwalifikati li huma kandidati li jitħaddmu abbord mill-bastimenti tal-UE;

    O.

    billi saru avvanzi fil-ġlieda kontra s-sajd IUU (illegali, mhux irrappurtat u mhux irregolat) fl-ilmijiet territorjali tal-Guinea-Bissau, bis-saħħa tal-metodi mtejba ta' superviżjoni taż-Żona Ekonomika Esklussiva (ŻEE) tal-Guinea-Bissau, jiġifieri dawk allokati lill-FISCAP (Spezzjoni u Kontroll tal-Attivitajiet tas-Sajd), li tinkludi korp ta' osservaturi u bastimenti tal-għassa veloċi; billi għadhom jeżistu difetti u nuqqasijiet li jridu jingħelbu, li jinkludu kwistjonijiet relatati tas-Sistema ta' Monitoraġġ tal-Bastimenti (Vessel Monitoring System -VMS);

    P.

    billi saru avvanzi f'dak li jikkonċerna t-tfassil tal-profili tal-istokkijiet demersali fiż-ŻEE tal-Guinea-Bissau, u b'mod partikolari r-“rapport tal-kampanja għall-valutazzjoni tal-istokkijiet demersali fiż-ŻEE tal-Guinea-Bissau” ta' Jannar 2019;

    Q.

    billi l-Guinea-Bissau hija waħda mit-13-il pajjiż li jaqgħu taħt l-ambitu tal-proġett “Improved regional fisheries governance in western Africa (PESCAO)” (Governanza reġjonali tas-sajd imtejba fl-Afrika tal-Punent (PESCAO)) adottat bid-Deċiżjoni tal-Kummissjoni C(2017)2951 tat-28 ta' April 2017, li, fost objettivi oħra, għandu l-għan li jsaħħaħ il-prevenzjoni tas-sajd IUU u t-tweġibiet għalih billi jtejjeb il-monitoraġġ, il-kontroll u s-sorveljanza fil-livell nazzjonali u f'dak reġjonali;

    R.

    billi l-integrazzjoni tar-rakkomandazzjonijiet li saru qabel min-naħa tal-Parlament fil-Protokoll attwali ma kinitx għalkollox sodisfaċenti;

    S.

    billi l-Parlament għandu jiġi infurmat kif dovut fi żmien utli u fl-istadji kollha bil-proċeduri li jkollhom x'jaqsmu mal-Protokoll jew mat-tiġdid tiegħu.

    1.

    		 Jinnota l-importanza tal-Ftehim ta' Sħubija dwar is-Sajd Sostenibbli bejn l-UE u l-Guinea-Bissau, kemm għall-flotot tal-Guinea-Bissau kif ukoll għal dawk tal-UE li joperaw fiż-żona tas-sajd tal-Guinea-Bissau; jenfasizza li hemm lok għal progress aktar effettiv f'dik li hi kooperazzjoni tas-sajd bejn l-UE u l-Guinea-Bissau u jtenni l-istedina tiegħu lill-Kummissjoni biex tieħu kull pass meħtieġ biex tmur lil hinn mill-protokolli preċedenti dwar l-implimentazzjoni ta' dan il-ftehim biex jiġi żgurat li dan il-Ftehim ta' Sħubija dwar is-Sajd Sostenibbli jwassal għal livelli sodisfaċenti ta' żvilupp tas-settur tas-sajd lokali f'termini globali, u għandu jkun konsistenti mal-objettivi msemmija fl-Għan ta' Żvilupp Sostenibbli (SDG) 14 tan-NU li l-oċeani, l-ibħra u r-riżorsi tal-baħar jiġu konservati u użati b'mod sostenibbli għal żvilupp sostenibbli;

    2.

    		 Iqis li l-objettivi tal-Ftehim ta' Sħubija dwar is-Sajd Sostenibbli bejn l-UE u l-Guinea-Bissau kellhom livelli differenti ta' suċċess: filwaqt li l-ftehim offra u jipprovdi opportunitajiet tas-sajd konsiderevoli għall-bastimenti tal-UE fiż-żona tas-sajd tal-Guinea-Bissau u s-sidien tal-bastimenti Ewropej għamlu użu konsiderevoli minn dawn l-opportunitajiet, is-settur tas-sajd lokali, b'mod ġenerali, ma żviluppax biżżejjed jew b'mod sodisfaċenti;

    3.

    		 Jenfasizza li, fl-Artikolu 3 tiegħu, il-Protokoll jinkludi klawżola ta' nondiskriminazzjoni li permezz tagħha l-Guinea-Bissau tintrabat li ma tagħtix kundizzjonijiet tekniċi aktar favorevoli lil flotot barranin oħra li joperaw fiż-żona tas-sajd tal-Guinea-Bissau li għandhom l-istess karatteristiċi u li jimmiraw li jaqbdu l-istess speċijiet; jistieden lill-Kummissjoni ssegwi mill-qrib il-ftehimiet tas-sajd li l-UE għandha mal-pajjiżi terzi li jinsabu fiż-żona tas-sajd tal-Guinea-Bissau;

    4.

    		 Jilqa' l-kontribut tal-bastimenti tal-UE għas-sigurtà tal-ikel fil-Guinea-Bissau permezz tal-ħatt l-art dirett, kif speċifikat fil-Kapitolu 5 tal-Anness tal-Protokoll, għall-benefiċċju tal-komunitajiet lokali u għall-promozzjoni tal-kummerċ u l-konsum intern tal-ħut;

    5.

    		 Iqis li tranżizzjoni fil-ġestjoni tal-opportunitajiet tas-sajd (minn ġestjoni tal-isforz tas-sajd għal ġestjoni tal-qabdiet totali permissibbli) tikkostitwixxi sfida għal dan il-Protokoll; jistieden lill-Kummissjoni u lill-Guinea-Bissau jippromwovu, mingħajr dewmien, tranżizzjoni xierqa u effikaċi, li tissalvagwardja l-affidabbiltà u l-effikaċja meħtieġa tas-SER u tal-ipproċessar tad-data tal-qabdiet;

    6.

    		 Jappoġġa l-ħtieġa li jsir progress sinifikanti fl-iżvilupp tas-settur tas-sajd tal-Guinea-Bissau, inkluża l-industrija tas-sajd u l-attivitajiet relatati, u jistieden lill-Kummissjoni tieħu l-miżuri kollha meħtieġa – inkluża l-possibbiltà ta' reviżjoni u t-tisħiħ tal-komponent ta' appoġġ settorjali tal-ftehim, flimkien ma' miżuri biex tiżdied ir-rata ta' assorbiment tal-kontribuzzjoni finanzjarja – bil-għan li dan l-objettiv jintlaħaq;

    7.

    		 Iqis li l-Ftehim ta' Sħubija dwar is-Sajd Sostenibbli bejn l-UE u l-Guinea-Bissau mhux se jilħaq l-objettivi tiegħu jekk ma jgħinx biex tiġi stabbilita sistema ta' ġestjoni għall-isfruttament fit-tul u sostenibbli tar-riżorsi tas-sajd tagħha; iqis li huwa tal-akbar importanza li d-dispożizzjonijiet spjegati fil-Protokoll dwar l-appoġġ settorjali jiġu rispettati sabiex jikkontribwixxi għall-implimentazzjoni sħiħa tal-istrateġija nazzjonali għas-sajd u għall-ekonomija blu; jidentifika, f'dan ir-rigward, bħala oqsma ta' prijorità għall-appoġġ tal-UE, il-mobilizzazzjoni tal-assistenza teknika u finanzjarja meħtieġa sabiex:

    a.

    tissaħħaħ il-kapaċità istituzzjonali, b'mod partikolari l-istrateġiji ta' governanza reġjonali u globali tas-sajd, sabiex jitqiesu l-impatti kumulattivi tal-ftehimiet differenti dwar is-sajd tal-pajjiżi fir-reġjun;

    b.

    jingħata appoġġ għat-tisħiħ taż-żoni tal-baħar protetti sabiex isir progress lejn ġestjoni integrata tar-riżorsi tas-sajd;

    c.

    tiġi żviluppata infrastruttura ewlenija għas-sajd u għall-attivitajiet relatati, bħal portijiet (kemm industrijali kif ukoll artiġjanali), siti ta' ħatt l-art, ħżin u pproċessar tal-ħut, strutturi għad-distribuzzjoni u l-kummerċjalizzazzjoni u laboratorji għall-analiżi tal-kwalità, bil-ħsieb li jiġi attirat il-ħatt l-art tal-ħut li jinqabad fl-ilmijiet tal-Guinea-Bissau;

    d.

    tissaħħaħ il-kapaċità tal-operaturi lokali fis-settur tas-sajd billi jingħata appoġġ lill-organizzazzjonijiet tas-sajjieda;

    e.

    jiġu mħarrġa l-professjonisti fis-settur tas-sajd;

    f.

    jingħata appoġġ għas-sajd fuq skala żgħira,

    g.

    jingħata kontribut għall-kondizzjoni ekoloġika tajba tal-ambjent tal-baħar, b'mod partikolari billi jingħata appoġġ lill-ġbir tal-iskart u tal-irkaptu tas-sajd li jsir mill-atturi lokali;

    h.

    jiġi rikonoxxut u msaħħaħ ir-rwol tan-nisa u taż-żgħażagħ fis-sajd, u tittejjeb l-organizzazzjoni tar-rwoli tagħhom billi jingħata appoġġ lill-kundizzjonijiet meħtieġa għal dan il-għan;

    8.

    		 Iħeġġeġ lill-Kummissjoni u lill-Istati Membri biex, fil-politiki ta' kooperazzjoni u ta' assistenza uffiċjali għall-iżvilupp tagħhom, iqisu l-fatt li l-Fond Ewropew għall-Iżvilupp (FEŻ) u l-appoġġ settorjali previst fil-Ftehim ta' Sħubija dwar is-Sajd Sostenibbli bejn l-UE u l-Guinea-Bissau għandhom jikkomplementaw lil xulxin u jkunu għalkollox ikkoordinati, bil-għan li is-settur tas-sajd lokali jissaħħaħ;

    9.

    		 Jesprimi t-tħassib tiegħu dwar l-għadd dejjem jikber ta' impjanti tal-ħut mitħun u taż-żejt tal-ħuta fuq il-kosta tal-Afrika tal-Punent, li huma fornuti wkoll b'ħut mill-ilmijiet tal-Guinea-Bissau; jissottolinja l-fatt li s-sajd għall-ħut żgħir tal-għalf imur kontra l-prinċipju tas-sostenibbiltà u tal-forniment ta' riżorsi ta' proteini prezzjużi għall-komunità lokali; jilqa' l-espansjoni tal-faċilitajiet portwarji u ta' ħatt l-art fil-Guinea-Bissau, iżda fl-istess ħin jesprimi t-tħassib tiegħu li dan jista' jiġi segwit bil-kostruzzjoni ta' impjanti ġodda tal-ħut mitħun;

    10.

    		 Jistieden lill-Kummissjoni u lill-awtoritajiet tal-Guinea-Bissau isaħħu l-kooperazzjoni tagħhom sabiex jistabbilixxu l-kundizzjonijiet għall-esportazzjoni tal-prodotti tas-sajd mill-Guinea-Bissau lejn l-UE, b'mod partikolari f'dak li għandu x'jaqsam mal-verifika tal-kundizzjonijiet sanitarji meħtieġa u ċ-ċertifikazzjoni tal-laboratorju analitiku (CIPA), ħalli tiġi megħluba l-projbizzjoni attwali, tingħata spinta lill-iżvilupp tas-settur tas-sajd lokali u, konsegwentement, isir progress biex jintlaħqu l-objettivi tal-Ftehim ta' Sħubija dwar is-Sajd Sostenibbli;

    11.

    		 Jappoġġa l-ħtieġa li jissaħħaħ il-kontribut tal-Ftehim ta' Sħubija dwar is-Sajd Sostenibbli għall-ħolqien, fil-livell lokali, ta' impjiegi diretti u indiretti, kemm fuq il-bastimenti li joperaw taħt il-Ftehim ta' Sħubija dwar is-Sajd Sostenibbli kif ukoll fl-attivitajiet tas-sajd, kemm upstream kif ukoll downstream; iqis li l-Istati Membri jista' jkollhom rwol ewlieni u jkunu parti attiva fil-bini tal-kapaċitajiet u fl-isforzi ta' taħriġ biex dan jirnexxi;

    12.

    		 Ifakkar fin-natura unika tal-ekosistemi tal-baħar u tal-kosta tal-Guinea-Bissau, bħalma huma l-foresti tal-mangrovji, li jaġixxu bħala ħabitats ta' trawwim għar-riżorsi tas-sajd, u li jeħtieġu azzjoni mmirata għall-protezzjoni u l-irkupru tal-bijodiversità;

    13.

    		 Iqis li għandha tinġabar informazzjoni dwar il-benefiċċji li l-implimentazzjoni tal-Protokoll iġġib għall-ekonomiji lokali (pereżempju impjiegi, infrastruttura, titjibiet soċjali);

    14.

    		 Iqis li hemm il-bżonn li jsir titjib fil-kwantità u l-kwalità tad-data dwar il-qabdiet kollha (il-qabdiet fil-mira u dawk inċidentali), dwar l-istatus ta' konservazzjoni tar-riżorsi tas-sajd fiż-żona tas-sajd tal-Guinea-Bissau u, b'mod ġenerali, dwar l-impatt li għandu l-Ftehim ta' Sħubija dwar is-Sajd Sostenibbli fuq l-ekosistemi, u jqis ukoll li għandu jsir sforz biex tiġi żviluppata l-kapaċità tal-Guinea-Bissau li tikseb tali data; jistieden lill-Kummissjoni tgħin biex jiġi żgurat li l-korpi responsabbli għas-sorveljanza tal-implimentazzjoni tal-Ftehim ta' Sħubija dwar is-Sajd Sostenibbli, jiġifieri l-Kumitat Konġunt u l-Kumitat Xjentifiku Konġunt, ikunu jistgħu joperaw mingħajr xkiel, bl-involviment tal-assoċjazzjonijiet tas-sajjieda artiġjanali, l-assoċjazzjonijiet tan-nisa li jaħdmu fis-settur tas-sajd, it-trejdjunjins, ir-rappreżentanti tal-komunitajiet tal-kosta u l-organizzazzjonijiet tas-soċjetà ċivili tal-Guinea-Bissau;

    15.

    		 Iqis li hemm il-bżonn assolut li l-ġbir tad-data dwar il-qabdiet fil-Guinea-Bissau jittejjeb; jitlob, barra minn hekk, li jsir titjib fit-trażmissjoni tad-data ġġenerata mis-sistemi tal-VMS tal-bastimenti tal-UE permezz tal-istat tal-bandiera lill-awtoritajiet Afrikani; jitlob li jkun hemm interoperabbiltà aħjar tas-sistema tad-data;

    16.

    		 Iħeġġeġ il-pubblikazzjoni ta' rapporti dwar l-azzjonijiet li ġew appoġġati mill-appoġġ settorjali għal aktar trasparenza;

    17.

    		 Iqis li, jekk jiġri li s-sajd jingħalaq jew jiġu introdotti restrizzjonijiet fuq is-sajd, bil-għan li jiġi żgurat li r-riżorsi jkunu sostenibbli, kif hemm stabbilit fil-Protokoll, il-ħtiġijiet tas-sajd lokali għandhom jiġu indirizzati l-ewwel abbażi ta' parir xjentifiku sod;

    18.

    		 Jenfasizza l-importanza tar-rekwiżit ta' bilanċ pożittiv għall-bastimenti tal-Unjoni li jistadu fl-ilmijiet ta' pajjiżi terzi;

    19.

    		 Jappoġġa l-ħtieġa – bil-ħsieb li tittejjeb is-sostenibbiltà tal-attivitajiet tas-sajd – li jittejbu l-governanza, il-kontroll u s-sorveljanza taż-żona tas-sajd tal-Guinea-Bissau u li jiġi miġġieled is-sajd IUU, inter alia, billi jiġi intensifikat il-monitoraġġ tal-bastimenti (permezz tas-sistema ta' monitoraġġ tal-basimenti, VMS);

    20.

    		 Iħeġġeġ l-inklużjoni ta' dispożizzjonijiet dwar it-trasparenza, li jkunu jinvolvu l-pubblikazzjoni tal-ftehimiet kollha konklużi ma' stati jew entitajiet privati li jkunu taw lil bastimenti barranin aċċess għaż-ŻEE tal-Guinea-Bissau;

    21.

    		 Jenfasizza kemm hu importanti li l-opportunitajiet tas-sajd ipprovduti mill-Ftehim ta' Sħubija dwar is-Sajd Sostenibbli jiġu allokati abbażi tal-prinċipji tal-ekwità, tal-bilanċ u tat-trasparenza;

    22.

    		 Jenfasizza kemm hu importanti li l-ħatt l-art tal-ħut fil-portijiet tal-Guinea-Bissau jikkontribwixxi għall-attivitajiet tal-ipproċessar lokali u għas-sigurtà tal-ikel, kemm f'dawk li huma speċijiet kif ukoll f'dik li hi kwalità;

    23.

    		 Jistieden lill-Kummissjoni tgħaddi lill-Parlament il-minuti u l-konklużjonijiet tal-laqgħat tal-Kumitat Konġunt, il-programm settorjali pluriennali msemmi fl-Artikolu 5 tal-Protokoll u r-riżultati tal-evalwazzjonijiet annwali tagħha, informazzjoni dwar il-koordinament ta' dan il-programm mal-pjan strateġiku għall-iżvilupp tas-sajd tal-Guinea-Bissau (2015-2020), il-minuti u l-konklużjonijiet tal-laqgħat tal-Kumitat Xjentifiku Konġunt, kif ukoll informazzjoni dwar is-sajd IUU fiż-żona tas-sajd tal-Guinea-Bissau, l-integrazzjoni tal-operaturi ekonomiċi tal-UE fis-settur tas-sajd tal-Guinea-Bissau (l-Artikolu 10 tal-Protokoll) u l-verifika tal-konformità mal-obbligi tas-sidien tal-bastimenti (eż. fir-rigward tal-kontribuzzjoni in natura prevista mill-Kapitolu V tal-Anness tal-Protokoll); jistieden lill-Kummissjoni biex, fi żmien l-aħħar sena tal-applikazzjoni tal-Protokoll u qabel il-ftuħ tan-negozjati għat-tiġdid tiegħu, tressaq quddiem il-Parlament rapport sħiħ dwar l-implimentazzjoni tiegħu;

    24.

    		 Jistieden lill-Kummissjoni u lill-awtoritajiet tal-Guinea-Bissau jipprovdu informazzjoni aktar dettaljata dwar l-iżvilupp tal-attivitajiet assoċjati mas-sajd għall-ħut żgħir tal-għalf fir-reġjun;

    25.

    		 Jistieden lill-Kummissjoni tintegra aħjar ir-rakkomandazzjonijiet tal-Parlament fil-ftehim ta' sħubija dwar is-sajd sostenibbli bejn l-UE u l-Guinea-Bissau u tieħu kont tagħhom fil-proċeduri għat-tiġdid tal-Protokoll;

    26.

    		 Jagħti istruzzjonijiet lill-President tiegħu biex jgħaddi l-pożizzjoni tal-Parlament lill-Kunsill, lill-Kummissjoni u lill-gvernijiet u lill-parlamenti tal-Istati Membri u tal-Guinea-Bissau.

    (1)  ĠU L 354, 28.12.2013, p. 22.

    (2)  ĠU C 58, 15.2.2018, p. 93.

    (3)  Testi adottati, P9_TA(2020)0136.

    Top