IL-KUMMISSJONI EWROPEA
Brussell, 19.10.2020
COM(2020) 690 final
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI
Programm ta' Ħidma tal-Kummissjoni 2021
Unjoni ta' vitalità f'dinja ta' fraġilità
1. It-tiswija tad-dinja tal-lum bit-tiswir tad-dinja ta’ għada
Inqas minn sena ilu, din il-Kummissjoni Ewropea daħlet fil-kariga wara li ġiet eletta fuq aġenda biex tixpruna l-akbar trasformazzjoni tal-Ewropa f’aktar minn ġenerazzjoni. Il-programm ta’ ħidma tal-Kummissjoni għall-2020 irrifletta dan il-mandat u l-ambizzjoni deskritta l-ewwel fil-Linji Gwida Politiċi tal-President von der Leyen. Huwa fassal il-viżjoni tagħna li nibnu soċjetà aktar ġusta, aktar b’saħħitha, aktar ekoloġika u aktar diġitali. Filwaqt li matul l-aħħar sena ħafna affarijiet inbidlu, dik l-ambizzjoni tibqa’ l-forza li timbuttana għas-sena li ġejja.
Matul l-aħħar sena, il-Kummissjoni ħadmet biex tqiegħed il-pedamenti għall-bidla sistemika li l-Ewropa teħtieġ, aktar u aktar issa li l-ekonomiji kollha tagħna huma affettwati b’mod qawwi minn kriżi dinjija tas-saħħa. Fl-ewwel 100 jum, ippreżentajna l-Patt Ekoloġiku Ewropew, ippreżentajna l-pjanijiet tagħna għall-futur diġitali tal-Ewropa, adottajna l-pjan direzzjonali tagħna għal Ewropa soċjali qawwija bil-ħsieb li jiġi implimentat il-Pilastru Ewropew tad-Drittijiet Soċjali u ħriġna l-istrateġija tagħna għall-ugwaljanza bejn il-ġeneri. Ippreżentajna wkoll strateġija industrijali ġdida, pjan biex jingħata appoġġ aħjar lin-negozji ż-żgħar u miżuri biex jissaħħaħ is-Suq Uniku. Għamilna proposti biex nimmodernizzaw u nsaħħu l-proċess ta’ adeżjoni, filwaqt li wittejna t-triq għall-ftehim storiku biex jinfetħu n-negozjati mal-Maċedonja ta’ Fuq u l-Albanija, u qed noħolqu sħubija ġdida mal-Afrika.
Lil hinn mill-100 jum, ipproponejna wkoll bidu ġdid għal prijoritajiet dejjiema, b’mod partikolari bil-patt il-ġdid dwar il-migrazzjoni u l-ażil u l-istrateġija tal-Unjoni tas-Sigurtà tal-UE. Aħna indirizzajna kwistjonijiet li jaffettwaw il-komunità kollha tal-valuri tagħna, b’mod partikolari billi ppubblikajna l-ewwel Rapport annwali dwar l-Istat tad-Dritt li qatt sar li jkopri l-Istati Membri kollha. U ħadna miżuri li laqtu lis-soċjetà kollha tagħna – mill-ugwaljanza bejn il-ġeneri u l-ġlieda kontra r-razziżmu sal-ħiliet u ż-żgħażagħ.
Iżda għal raġunijiet differenti ħafna, l-2020 se tkun fl-istess waqt sena ta’ min jinsiha mal-ewwel, kif ukoll sena li għandna niftakru fiha għal dejjem. Il-pandemija globali li tat daqqa mhux mistennija lill-Ewropa u lid-dinja u l-lockdowns tas-soċjetajiet u l-ekonomiji tagħna li saru minħabba fiha se tkun tfisser ħafna aktar minn memorji diffiċli għal miljuni ta’ Ewropej li tilfu l-għeżież, li mardu jew qed jgħaddu minn perjodu ta’ ansjetà profonda dwar l-għajxien jew il-benessri tagħhom. X’aktarx li ħadd minna ma hu se jinsa l-fraġilità u l-inċertezza li għadna nħossu madwarna. Il-qawmien mill-ġdid reċenti tal-virus fl-Ewropa juri li rridu nkomplu nimmaniġġjaw il-virus b’attenzjoni, kawtela u koordinazzjoni.
Iżda din is-sena se tibqa’ mfakkra wkoll għall-azzjoni urġenti u bla preċedent li ħadet l-Ewropa biex tipproteġi l-ħajjiet u l-għajxien. L-Ewropa wriet li tista’ taġixxi malajr meta dan ikun meħtieġ, turi solidarjetà reali meta jkollha tagħmel dan, u b’mod kollettiv tibdel l-affarijiet meta tkun trid. Mit-tqegħid għad-dispożizzjoni tal-fondi kollha tal-UE u l-użu tal-flessibbiltà fir-regoli fiskali u tal-għajnuna mill-Istat tagħna, sal-istabbiliment ta’ riżerva ta’ tagħmir mediku. Mit-trasportazzjoni lura lejn darhom ta’ 600,000 ċittadin tal-UE maqbuda barra pajjiżhom, sal-ħolqien tal-istrument SURE li jgħin biex in-nies jibqgħu jaħdmu u biex il-kumpaniji jibqgħu fin-negozju. B’kollox, il-Kummissjoni ħadet aktar minn 800 miżura, mingħajr ippjanar minn qabel, fuq kull ħaġa, mill-ġestjoni tal-fruntieri sal-appoġġ lill-bdiewa u lis-sajjieda.
Fil-futur, din is-sena tista’ tibqa’ titfakkar għall-aċċellerazzjoni kbira li seħħet fir-ritmu tal-bidliet u għall-opportunità kbira li, paradossalment, ippreżentat. Il-bidliet fil-klima, it-teknoloġiji diġitali u l-ġeopolitika diġà kienu qed jaffettwaw b’mod profond lis-soċjetà tagħna u jimbuttaw l-aġenda tagħna. Madankollu, il-pandemija iffukat il-ħtieġa li l-Ewropa tmexxi t-tranżizzjonijiet tewmin ekoloġiċi u diġitali u li s-soċjetajiet u l-ekonomiji tagħha jsiru aktar reżiljenti. Dan joħloq opportunità bla paragun biex noħorġu ’l barra mill-fraġilità tal-kriżi billi noħolqu vitalità ġdida għall-Unjoni tagħna.
Quddiem dan l-isfond, l-attenzjoni tal-Kummissjoni fis-sena li ġejja se tkun fuq żewġ binarji. L-ewwel nett hija se tkompli tagħmel l-isforzi kollha tagħha fil-ġestjoni tal-kriżi u tibda tislet tagħlimiet minnha. Dan se jsir b’mod partikolari billi nkomplu bl-isforzi tagħna biex insibu, niffinanzjaw u naraw li jiġi żviluppat vaċċin sikur u aċċessibbli għal kulħadd fl-Ewropa u madwar id-dinja.
B’mod parallel, dan il-programm ta’ ħidma jistabbilixxi kif l-Ewropa tista’ taħtaf l-opportunità li għandna quddiemna biex jitwettqu l-ambizzjonijiet tagħha u tmexxi l-aċċellerazzjoni l-kbira. Bis-saħħa ta’ NextGenerationEU, il-pjan ta’ rkupru storiku ppreżentat mill-Kummissjoni flimkien ma’ baġit fit-tul imġedded, l-Ewropa għandha għodda lesta biex taħtaf din l-opportunità.
Permezz ta’ NextGenerationEU, l-Ewropa mhux biss qed tagħżel li ssewwi l-ħsara, tirkupra għal-lum u tappoġġja lil dawk l-aktar milquta mill-kriżi, iżda wkoll li twassal u tibni mod aħjar ta’ għajxien għad-dinja ta’ għada. Il-programm se jiffoka fuq l-investiment u r-riformi sostenibbli, b’37 % tan-nefqa tal-Faċilità għall-Irkupru u r-Reżiljenza allokati għall-infiq fuq it-tranżizzjoni ekoloġika u minimu ta’ 20 % li għandu jiġi investit fid-diġitali. Aħna se naħdmu qatigħ mal-Istati Membri fit-tħejjija u l-implimentazzjoni tal-pjanijiet nazzjonali tagħhom għall-irkupru u r-reżiljenza. Barra minn hekk, il-Kummissjoni se tara li 30 % mill-EUR 750 biljun ta’ NextGenerationEU jinġabru permezz ta’ bonds ekoloġiċi. U se nappoġġaw lill-koleġiżlaturi biex jiżguraw ftehim rapidu dwar il-pakkett globali ta’ EUR 1,8 triljun sabiex id-differenza li se jagħmel tkun tista’ tinħass malajr kemm jista’ jkun. Il-Kummissjoni se tagħmel ukoll proposti ambizzjużi dwar sorsi ġodda ta’ dħul għall-baġit tal-UE.
Dan ifisser li għandna l-investiment biex inlaħħqu mal-viżjoni u l-ambizzjoni li kellna diġà. Huwa għalhekk li l-programm ta’ ħidma tal-Kummissjoni għall-2021 fih tranżizzjoni mill-istrateġija għat-twassil b’enfasi fuq inizjattivi leġiżlattivi ġodda u reviżjonijiet tal-leġiżlazzjoni eżistenti, b’segwitu għall-pjanijiet deskritti fis-sitt ambizzjonijiet ewlenin kollha tas-sena li għaddiet. Dawn l-inizjattivi huma elenkati fl-Annessi I u II. Se nwettqu wkoll inizjattivi li qabel kienu ppjanati għall-2020 u li ġew posposti minħabba l-pandemija.
L-azzjoni tagħna se tibqa’ ggwidata mill-Aġenda 2030 u l-Għanijiet ta’ Żvilupp Sostenibbli tagħha kemm internament kif ukoll esternament kif ukoll mill-Ftehim ta’ Pariġi.
Fit-twettiq ta’ dan il-programm ta’ ħidma, il-Kummissjoni se tiffoka wkoll fuq l-ispjega ta’ x’qed nagħmlu u fuq il-kunsiderazzjoni tal-fehmiet taċ-ċittadini. Bħala parti minn dan, issa huwa aktar importanti minn qatt qabel li jinbeda d-dibattitu dwar il-Konferenza dwar il-Ġejjieni tal-Ewropa. Il-kwistjonijiet imqajma matul l-aħħar sena – mill-ħtieġa għal Unjoni Ewropea tas-Saħħa aktar qawwija sal-bidliet dejjiema li l-pandemija jista’ jkollha fil-mod tagħna ta’ kif ngħixu flimkien – jistgħu jiġu ġestiti biss jekk kulħadd ikollu leħen u li nitgħallmu mill-esperjenza u l-għarfien espert komuni tagħna kollha.
Minħabba x-xenarju ġeopolitiku u n-natura fit-tul u trasformattiva tal-inizjattivi ppjanati, il-ħidma tagħna se tkompli tkun infurmata minn prospettiva strateġika. L-ewwel Rapport ta’ Prospettiva Strateġika wera kemm hi importanti r-reżiljenza għall-irkupru u li l-politiki tagħna għandhom jsiru bbażati fuq l-evidenza u validi għall-futur. Dan l-approċċ jista’ jgħinna wkoll inħejju għal sfidi u opportunitajiet ġodda li inevitabbilment se jitfaċċaw fis-sena li ġejja u li rridu nkunu lesti nantiċipaw u nirrispondu għalihom.
2. Niksbu s-sitt ambizzjonijiet ewlenin
2.1 Il-Patt Ekoloġiku Ewropew
Dwar il-Patt Ekoloġiku Ewropew, l-attenzjoni tal-Kummissjoni se tkun dik li tiġi aġġornata mill-qiegħ il-leġiżlazzjoni rilevanti tagħna dwar il-klima u l-enerġija biex tiġi allinjata mal-mira li għadha kif ġiet proposta biex jitnaqqsu l-emissjonijiet b’mill-inqas 55% sal-2030, meta mqabbla mal-livelli tal-1990. Dan se jinġabar f’daqqa fil-pakkett “Fit for 55” li se jkopri kollox minn sorsi rinnovabbli sal-effiċjenza enerġetika l-ewwel, il-bini, kif ukoll l-użu tal-art, it-tassazzjoni tal-enerġija, il-kondiviżjoni tal-isforzi u l-iskambju tal-emissjonijiet kif ukoll firxa wiesgħa ta’ biċċiet oħra ta’ leġiżlazzjoni. L-isforzi diplomatiċi fejn jidħlu l-klima u l-enerġija jibqgħu prijorità mas-sħab esterni tagħna.
Kif imsemmi fil-Linji Gwida Politiċi tal-President von der Leyen, il-Kummissjoni se tipproponi mekkaniżmu ta’ aġġustament tal-karbonju fil-fruntiera biex tgħin timmotiva lill-produtturi barranin u lill-importaturi tal-UE biex inaqqsu l-emissjonijiet tal-karbonju tagħhom, filwaqt li jiġu ggarantiti kundizzjonijiet ekwi li jwasslu għall-kummerċ b’mod kompatibbli mad-WTO.
Il-profondità u l-wisa’ tal-ħidma ppjanata fil-Patt Ekoloġiku Ewropew jirriflettu n-natura sistemika tat-tranżizzjoni ekoloġika u l-importanza tagħha bħala strateġija ta’ tkabbir. Se nippreżentaw sensiela ta’ miżuri dwar it-trasport intelliġenti u sostenibbli, inkluża reviżjoni tar-Regolament dwar in-netwerk trans-Ewropew tat-trasport u tad-Direttiva dwar sistemi intelliġenti tat-trasport. Se nkomplu bl-implimentazzjoni tal-pjan ta’ azzjoni għall-ekonomija ċirkolari, filwaqt li nħarsu lejn l-ekodisinn u l-prodotti sostenibbli, b’mod partikolari l-elettronika ċirkolari, inkluż it-titjib tal-ġbir, l-użu mill-ġdid u t-tiswija tal-mowbajls, il-laptops u apparati oħra.
Dan jirrifletti li l-Patt Ekoloġiku Ewropew imur ferm lil hinn mit-tnaqqis tal-emissjonijiet. F’dan l-ispirtu, se nsegwu l-istrateġija tal-UE għall-bijodiversità għall-2030 u l-istrateġija mill-għalqa sal-platt, b’mod partikolari biex tingħata spinta lill-produzzjoni organika, jiġu restawrati l-ekosistemi degradati, jiġu protetti l-oċeani u r-reġjuni kostali tagħna, jiġu protetti, irrestawrati u ġestiti b’mod sostenibbli l-foresti, u jitnaqqas ir-riskju ta’ prodotti assoċjati mad-deforestazzjoni fis-suq tal-UE. Se nġibu wkoll addittivi tal-għalf innovattivi fis-suq biex jitnaqqas l-impatt ambjentali tat-trobbija tal-bhejjem.
2.2. Ewropa Lesta għall-Era Diġitali
Biex niżguraw li dan ikun id-deċennju diġitali tal-Ewropa, se nipproponu pjan direzzjonali b’għanijiet definiti b’mod ċar għall-2030, bħal pereżempju fejn jidħlu l-konnettività, il-ħiliet u s-servizzi pubbliċi diġitali. L-approċċ tagħna se jsegwi prinċipji ċari: id-dritt għall-privatezza u l-konnettività, il-libertà tal-kelma, il-fluss ħieles tad-data u ċ-ċibersigurtà.
Aħna se nieħdu azzjoni f’dawn l-oqsma differenti, b’mod partikolari permezz ta’ leġiżlazzjoni li tkopri s-sikurezza, ir-responsabbiltà, id-drittijiet fundamentali u l-aspetti tad-data tal-intelliġenza artifiċjali u ta’ Att dwar id-Data biex jiġu stabbiliti l-kundizzjonijiet it-tajba għal kontroll aħjar u l-kundizzjonijiet għall-kondiviżjoni tad-data għaċ-ċittadini u n-negozji.
Fl-istess spirtu, se nipproponu identità diġitali Ewropea ġdida biex nagħmluha eħfef biex fuq l-internet ikunu jistgħu jitwettqu kompiti u jkun hemm aċċess għas-servizzi madwar l-Ewropa u niżguraw li n-nies ikollhom aktar kontroll u serħan il-moħħ dwar liema data jikkondividu u kif tintuża.
Biex tinżamm il-ġustizzja fid-dinja diġitali, l-UE se tkompli taħdem għal ftehim internazzjonali dwar sistema tat-taxxa ġusta li tipprovdi dħul sostenibbli fit-tul. Fin-nuqqas ta’ dan, il-Kummissjoni se tipproponi imposta diġitali fl-ewwel nofs tas-sena d-dieħla. Fl-istess spirtu ta’ ambjent kummerċjali ġust, il-Kummissjoni se tipproponi strument legali biex toħloq kundizzjonijiet ekwi fir-rigward tas-sussidji barranin.
Il-Kummissjoni se tkompli r-rieżami kontinwu tagħha tar-regoli tal-kompetizzjoni biex tiżgura li dawn ikunu adatti għall-ambjent tas-suq li qed jinbidel, inkluż l-aċċellerazzjoni tad-diġitalizzazzjoni tal-ekonomija. Se naġġornaw ukoll l-istrateġija industrijali l-ġdida tagħna għall-Ewropa biex jitqiesu l-impatti tal-COVID-19, il-kuntest kompetittiv globali, u l-aċċellerazzjoni tat-tranżizzjonijiet ekoloġiċi u diġitali doppji.
Sabiex jiġu żgurati kundizzjonijiet tax-xogħol dinjitużi, trasparenti u prevedibbli, se tiġi ppreżentata proposta leġiżlattiva biex jittejbu l-kundizzjonijiet tax-xogħol tal-persuni li jipprovdu servizzi permezz ta’ pjattaformi bil-għan li jiġu garantiti kundizzjonijiet tax-xogħol ġusti u protezzjoni soċjali adegwata.
2.3. Ekonomija li topera għan-nies
Hekk kif il-pandemija u l-miżuri ta’ konteniment qed jittawlu, huwa essenzjali li l-Ewropa tiżgura li kriżi tas-saħħa u ekonomika ma tiżviluppax fi kriżi soċjali. Dan se jkun ta’ gwida fl-azzjoni tagħna għas-sena d-dieħla u l-implimentazzjoni sħiħa u l-użu sħiħ tal-programm SURE se jgħin lill-ħaddiema jżommu l-introjtu tagħhom u jiżguraw li n-negozji jkunu jistgħu jżommu l-persunal. Se nevalwaw bir-reqqa dawn il-miżuri fis-snin li ġejjin.
Il-Pilastru Ewropew tad-Drittijiet Soċjali se jkun il-boxxla tal-irkupru tal-Ewropa u l-aħjar għodda tagħna biex niżguraw li ħadd ma jitħalla lura. Se nippreżentaw pjan ta’ azzjoni ambizzjuż biex niżguraw l-implimentazzjoni sħiħa tiegħu. Il-pjan ta’ azzjoni se jkun l-istrument ċentrali ta’ din il-Kummissjoni li jikkontribwixxi għall-irkupru soċjoekonomiku u r-reżiljenza fuq perjodu medju u twil ta’ żmien, bil-ħsieb li jissaħħaħ l-element ta’ ġustizzja soċjali fit-tranżazzjoni diġitali u dik ekoloġika. Fl-istess spirtu, il-garanzija Ewropea l-ġdida għat-tfal, imħabbra fil-Linji Gwida Politiċi tal-President von der Leyen, se jkollha l-għan li tnaqqas il-faqar u l-inugwaljanzi fost it-tfal billi tiżgura li t-tfal kollha jkollhom aċċess għal servizzi bażiċi bħas-saħħa u l-edukazzjoni. Filwaqt li tislet tagħlimiet mill-pandemija tal-COVID-19 u fl-isfond tad-dinja tax-xogħol dejjem tinbidel, il-Kummissjoni se tippreżenta qafas strateġiku ġdid tal-UE dwar is-saħħa u s-sigurtà fuq il-post tax-xogħol. Se nipproponu wkoll pjan ta’ azzjoni għall-ekonomija soċjali biex jissaħħaħ l-investiment soċjali, u jiġu appoġġati l-atturi tal-ekonomija soċjali u l-intrapriżi soċjali meta jiġu stabbiliti, meta jespandu, meta jinnovaw u meta joħolqu l-impjiegi.
L-ekonomiji tagħna jeħtieġu appoġġ ta’ politika kontinwu u se jkun hemm bżonn li jintlaħaq bilanċ delikat bejn li jingħata l-appoġġ finanzjarju u li tiġi żgurata s-sostenibbiltà fiskali. Hekk kif jiżdied it-tixrid tal-virus u jiżdiedu l-miżuri ta’ konteniment, l-Istati Membri għandhom ikomplu jagħmlu użu tajjeb mill-flessibbiltà fiskali biex jappoġġaw l-ekonomija. Il-kummerċ globali u l-ktajjen tal-valur integrati tiegħu se jibqgħu mutur ta’ tkabbir fundamentali u forza ewlenija għal irkupru tassew globali. Bħalissa għaddejja reviżjoni tal-politika kummerċjali tal-UE u se nadottaw strument ġdid biex jiskoraġġixxi u jaġixxi kontra azzjonijiet koerċittivi minn pajjiżi terzi.
Fuq medda itwal ta’ żmien ma hemm l-ebda triq akbar lejn l-istabbiltà u l-kompetittività milli permezz ta’ Unjoni Ekonomika u Monetarja aktar profonda, li se tiggarantixxi wkoll rwol internazzjonali aktar b’saħħtu għall-euro. Jeħtieġ li nagħmlu progress fejn jidħlu l-Unjoni tas-Swieq Kapitali u l-Unjoni Bankarja. Bħala parti minn dan, aħna se nirrevedu l-qafas għall-ġestjoni tal-fallimenti tal-banek tal-UE, nieħdu miżuri biex tingħata spinta lill-investiment transfruntier fl-UE u nintensifikaw il-ġlieda kontra l-ħasil tal-flus.
Bħala parti mill-bidla sistemika tal-Ewropa, is-sistema ekonomika u finanzjarja tagħna trid tkun ukoll mutur ewlieni tat-tranżizzjonijiet tewmin. Se tiġi proposta leġiżlazzjoni dwar il-governanza korporattiva sostenibbli biex titrawwem imġiba korporattiva sostenibbli u responsabbli fit-tul. Se nkomplu wkoll bil-progress dwar il-finanzjament sostenibbli, b’mod partikolari billi nipproponu li nistabbilixxu standard tal-UE tal-bonds ekoloġiċi.
Biex nilħqu l-ambizzjonijiet tagħna, u nkunu kapaċi nindirizzaw il-ħtiġijiet ta’ investiment u riforma, irridu nżidu u nivvalutaw l-effettività, l-effiċjenza u l-kapaċità tal-amministrazzjonijiet u s-servizzi pubbliċi madwar l-Unjoni Ewropea.
2.4. Ewropa aktar b’saħħitha fid-dinja
Din il-Kummissjoni bdiet il-mandat tagħha biex tiżgura Ewropa aktar b’saħħitha fid-dinja. Il-Kummissjoni ġeopolitika tagħna tistinka biex tavvanza l-interessi u l-objettivi strateġiċi tal-UE lil hinn minna u biex tiddefendi ordni internazzjonali bbażat fuq ir-regoli u l-valuri f’dinja dejjem aktar polarizzata. Ser naħdmu biex insaħħu r-rwol globali tagħna bħala ankra tar-responsabbiltà, l-istabbiltà, il-kooperazzjoni u s-solidarjetà, billi nindirizzaw l-għadd dejjem jikber ta’ sfidi, kriżijiet u kunflitti globali, permezz tal-mobilizzazzjoni tal-istrumenti kollha tagħna.
Matul is-sena d-dieħla, il-Kummissjoni se tiżgura li l-Ewropa taqdi r-rwol vitali tagħha f’din id-dinja fraġli – kemm jekk tkun qed tmexxi r-rispons globali biex tiżgura vaċċin sikur u aċċessibbli għal kulħadd jew biex issaħħaħ is-sistema multilaterali globali bbażata fuq ir-regoli kif ukoll sħubijiet bilaterali, reġjonali u globali. Ser inkomplu nagħtu prijorità sħiħa lill-viċinat tagħna tal-Lvant u tan-Nofsinhar, lill-Balkani tal-Punent u lill-Afrika.
L-istrumenti l-ġodda tagħna ta’ nfiq estern se jikkontribwixxu għall-implimentazzjoni esternament tal-prijoritajiet strateġiċi tal-Unjoni.
L-Unjoni Ewropea dejjem se temmen fis-saħħa u fil-valur tal-multilateraliżmu u fil-kooperazzjoni fl-istituzzjonijiet globali. Ser nipproponu Komunikazzjoni Konġunta dwar it-tisħiħ tal-kontribut tal-UE għall-multilateraliżmu bbażat fuq ir-regoli. Jeħtieġ li mmexxu r-riformi tal-Organizzazzjoni Dinjija tas-Saħħa u tal-Organizzazzjoni Dinjija tal-Kummerċ biex nagħmluhom adattati għal realtajiet ġodda.
B’ħidma mas-sħab tagħna, se nipproponu sħubija mġedda mal-viċinat tan-Nofsinhar tagħna u nippreżentaw Komunikazzjoni dwar l-Artiku biex naġġornaw il-politika tal-UE lejn reġjun li huwa partikolarment espost għat-tibdil fil-klima u l-pressjonijiet ambjentali flimkien mal-impatt ekonomiku u fuq is-sigurtà tiegħu.
Ser nippreżentaw approċċ strateġiku ġdid biex nappoġġaw id-diżarm, id-demobilizzazzjoni u r-reintegrazzjoni tal-ex-suldati, li huwa kruċjali biex jiġu żgurati stabbiltà u paċi dejjiema f’pajjiżi u reġjuni milquta mill-kunflitti.
Ser nippreżentaw ukoll Komunikazzjoni dwar l-għajnuna umanitarja tal-UE, li ser tiffoka b’mod partikolari fuq modi ġodda ta’ ħidma mas-sħab tagħna u donaturi oħra, l-użu ta’ għodod diġitali u approċċi innovattivi għall-modalitajiet ta’ finanzjament u twassil tal-għajnuna, inkluż fuq il-kapaċità ta’ rispons rapidu tal-Kummissjoni stess u modi biex tissaħħaħ il-ħidma fuq ir-rabta bejn l-għajnuna umanitarja, l-iżvilupp u l-paċi..
Reviżjoni tad-Direttiva dwar il-protezzjoni konsulari se tippermettilna niffaċilitaw l-eżerċizzju tad-dritt taċ-ċittadinanza tal-Unjoni għall-protezzjoni konsulari u biex insaħħu s-solidarjetà tal-UE biex nipproteġu aħjar liċ-ċittadini tal-UE barra minn pajjiżhom, b’mod partikolari waqt kriżijiet. Hija ser issaħħaħ il-kooperazzjoni fost l-Istati Membri u ssaħħaħ ir-rwol ta’ appoġġ tal-UE, filwaqt li tagħmel l-aħjar użu min-netwerk uniku tagħha ta’ delegazzjonijiet tal-UE.
2.5. Promozzjoni tal-Istil ta’ Ħajja Ewropew
Il-kriżi tas-saħħa attwali kixfet il-ħtieġa li nsaħħu t-tħejjija tagħna għall-kriżijiet u l-ġestjoni tat-theddid transfruntier għas-saħħa. Filwaqt li l-enfasi tibqa’ fuq l-iżgurar li l-Ewropa tkun tista’ tiġġestixxi t-tixrid tal-virus u l-impatt tal-pandemija, se nieħdu wkoll l-ewwel tagħlimiet mill-kriżi. Wasal iż-żmien li nibnu Unjoni Ewropea tas-Saħħa aktar b’saħħitha.
Aħna ser nipproponu li nsaħħu l-qafas tal-UE għad-detezzjoni u r-rispons għal theddid transfruntieri serju għas-saħħa, u nsaħħu r-rwoli tal-aġenziji eżistenti. Bħala t-tieni pass, se nipproponu li nistabbilixxu aġenzija għar-riċerka u l-iżvilupp avvanzati fis-settur bijomediku. Strateġija farmaċewtika ġdida se tħares lejn is-sigurtà tal-katina tal-provvista tal-Ewropa u tiżgura li ċ-ċittadini jkunu jistgħu jserrħu fuq mediċini sikuri, affordabbli u ta’ kwalità għolja. Barra minn hekk, l-ispazju Ewropew tad-data dwar is-saħħa se jitnieda sal-aħħar tas-sena d-dieħla biex tiġi sfruttata d-data għal kura tas-saħħa aħjar, riċerka aħjar, u tfassil aħjar tal-politika għall-benefiċċju tal-pazjenti.
Se nieħdu wkoll tagħlimiet f’oqsma oħra, b’mod partikolari f’dak li għandu x’jaqsam maż-żona Schengen u f’dak li għandu x’jaqsam mal-moviment liberu tal-persuni mingħajr kontrolli fil-fruntieri interni. Se naħdmu mal-Parlament Ewropew u mal-Istati Membri biex nippreservaw u ntejbu l-funzjonament taż-żona Schengen abbażi ta’ strateġija ġdida għall-futur ta’ Schengen u regoli aktar b’saħħithom ta’ Schengen u ser inkomplu l-ħidma li tlesti ż-żona Schengen.
Ser inkomplu bil-ħidma fuq il-patt il-ġdid dwar il-migrazzjoni u l-ażil. F’dan il-kuntest, il-Kummissjoni se tipproponi għadd ta’ miżuri dwar il-migrazzjoni legali, li se jinkludu pakkett ta’ “talenti u ħiliet” u, bħala parti minnu, reviżjoni tad-Direttiva dwar ir-residenti fit-tul u rieżami tad-Direttiva dwar il-permess uniku, kif ukoll għażliet li jiżviluppaw ġabra fl-UE ta’ talenti. Elementi oħra tal-patt jinkludu pjan ta’ azzjoni tal-UE kontra t-traffikar tal-migranti u strateġija ta’ ritorn volontarju u riintegrazzjoni .
Aħna ser inkomplu nsaħħu l-Unjoni tas-Sigurtà, b’mod partikolari billi nieħdu miżuri dwar il-ġlieda kontra l-kriminalità organizzata, il-ġlieda kontra t-theddid ibridu, it-teħid ta’ approċċ ġdid dwar miżuri kontra t-terroriżmu u r-radikalizzazzjoni u t-titjib tal-identifikazzjoni, it-tneħħija u r-rappurtar tal-abbuż sesswali li jsir online fuq it-tfal.
Minħabba ż-żieda fil-vjolenza antisemitika u r-reati ta’ mibegħda, il-Kummissjoni se tippreżenta strateġija komprensiva dwar il-ġlieda kontra l-antisemitiżmu , biex tikkumplimenta u tappoġġa l-isforzi tal-Istati Membri.
It-triq lejn l-irkupru ekonomiku u tranżizzjonijiet ekoloġiċi u diġitali ta’ suċċess se jeħtieġu wkoll li l-Ewropej jiksbu ħiliet ġodda. Bħala parti minn sforzi usa’ biex titrawwem kultura ta’ tagħlim tul il-ħajja u jiġu ffaċilitati t-tranżizzjonijiet minn impjiegi għall-ieħor, se nipproponu inizjattiva dwar kontijiet individwali ta’ tagħlim biex l-individwi jingħataw is-setgħa li jwettqu taħriġ u jiġġestixxu l-karriera tagħhom, u nistabbilixxu approċċ Ewropew għall-mikrokredenzjali biex iwessgħu l-opportunitajiet personalizzati ta’ tagħlim għal kulħadd.
2.6. Spinta ġdida għad-demokrazija Ewropea
Il-Kummissjoni se tkompli ssawwar Unjoni ta’ Ugwaljanza u se żżomm l-impenn tal-Ewropa għall-protezzjoni tal-valuri tal-UE kif ukoll l-inklużjoni u l-ugwaljanza fis-sensi kollha tagħha, irrispettivament mis-sess, l-oriġini razzjali jew etnika, ir-reliġjon jew it-twemmin, id-diżabbiltà, l-età jew l-orjentazzjoni sesswali.
Bħala parti minn dan, il-Kummissjoni se tippreżenta strateġija tal-UE dwar id-drittijiet tal-persuni b’diżabilità, b’mod partikolari biex tiżgura l-implimentazzjoni sħiħa tal-Konvenzjoni tan-NU dwar id-Drittijiet tal-Persuni b’Diżabilità. Strateġija tal-UE dwar id-drittijiet tat-tfal se tħares lejn kif tħejji l-parteċipazzjoni tat-tfal u ż-żgħażagħ fil-ħajja demokratika tal-UE, tipproteġi aħjar lit-tfal vulnerabbli, tipproteġi d-drittijiet tagħhom online, trawwem sistema ta’ ġustizzja li tkun adattata għat-tfal u tipprevjeni u tiġġieled kontra l-vjolenza.
Filwaqt li l-Kummissjoni tibqa’ impenjata għall-adeżjoni tal-UE mal-Konvenzjoni ta’ Istanbul, hija se tressaq proposta ġdida biex tiġġieled il-vjolenza abbażi tal-ġeneru. Se tipproponi wkoll li testendi l-lista ta’ dawk l-atti li fl-Ewropa kollha jkunu meqjusa bħala reati, biex jiġu inklużi l-forom kollha ta’ reati ta’ mibegħda u diskors ta’ mibegħda.
Il-pjan ta’ azzjoni għad-Demokrazija Ewropea li għandu jiġi adottat se jkun pass ’il quddiem biex tittejjeb ir-reżiljenza tad-demokraziji tagħna, jiġi indirizzat it-theddid ta’ interferenza esterna fl-elezzjonijiet Ewropej u tiġi miġġielda d-diżinformazzjoni, kif ukoll biex tiġi appoġġata midja ħielsa u indipendenti. Is-sena d-dieħla, se nipproponu regoli aktar ċari dwar il-finanzjament tal-partiti politiċi Ewropej u nieħdu azzjoni biex niżguraw aktar trasparenza fir-reklamar politiku mħallas, intejbu d-drittijiet elettorali tal-Ewropej li jimxu minn Stat Membru għall-ieħor u nieħdu azzjoni biex nipproteġu l-ġurnalisti u s-soċjetà ċivili kontra kawżi strateġiċi kontra l-parteċipazzjoni pubblika.
Ser navvanzaw ukoll il-kooperazzjoni ġudizzjarja transfruntiera billi nagħmlu użu sħiħ mit-teknoloġiji diġitali.
Il-Kummissjoni se tħares lejn kif il-politika ta’ koeżjoni tista’ tagħti spinta lill-irkupru u t-tranżizzjonijiet tewmin, tindirizza t-twessigħ tad-disparitajiet reġjonali kemm qabel kif ukoll wara l-COVID-19 u tgħin biex jiġu indirizzati kwistjonijiet soċjali u ekonomiċi emerġenti. Biex inżidu l-għarfien tagħna u b’hekk intejbu r-risponsi ta’ politika tagħna, se tippreżenta valutazzjoni tas-sitwazzjoni fir-reġjuni tagħna. Se tiżviluppa wkoll viżjoni fit-tul għaż-żoni rurali biex tipproponi azzjonijiet ħalli l-potenzjal ta’ dawn ir-reġjuni jiġi sfruttat kemm jista’ jkun. Jitjieb il-livell tat-tfassil tal-liġijiet, it-tfassil tal-politika, l-implimentazzjoni u l-infurzar tad-dritt tal-Unjoni
Meta l-Kummissjoni daħlet fil-kariga, impenjat ruħha għal politiki bbażati fuq l-evidenza li jkunu aktar faċli li jiġu segwiti u inqas probabbli li joħolqu piż bla bżonn għan-negozji u għan-nies. Il-ħtieġa ta’ dan hija tinħass aktar u aktar akuta hekk kif l-Ewropa għadha għaddejja bil-ħidma biex timmaniġġja l-kriżi u tiffoka fuq l-irkupru.
Il-Komunikazzjoni li jmiss dwar regolamentazzjoni aħjar se tiffoka fuq it-tnaqqis tal-piżijiet, b’mod partikolari fl-implimentazzjoni tal-prinċipju ta’ “one-in, one-out”. Dan se jiżgura li l-piżijiet amministrattivi introdotti ġodda jiġu kkumpensati billi l-persuni u n-negozji jinħelsu minn piżijiet ekwivalenti fil-livell tal-UE, fl-istess qasam ta’ politika. Mis-sena d-dieħla, il-pjattaforma “Fit-for-Future”, grupp ta’ esperti ta’ livell għoli, se tappoġġa lill-Kummissjoni biex tidentifika fejn hemm potenzjal għal simplifikazzjoni u tnaqqis tal-piżijiet.
Il-kriżi kompliet tenfasizza l-ħtieġa ta’ deċiżjonijiet bbażati fuq l-evidenza u prinċipji ta’ regolamentazzjoni aħjar . Il-ħtieġa li jsiru valutazzjonijiet tal-impatt, li jqisu l-fehmiet ta’ dawk kollha milquta, hija aktar importanti minn qatt qabel. Il-Kummissjoni se ġġib il-konsultazzjonijiet aktar effiċjenti u aktar aċċessibbli biex tiffaċilita l-parteċipazzjoni tal-partijiet ikkonċernati u twieġeb għas-sejħa ta’ konsultazzjonijiet aktar simplifikati.
Il-Kummissjoni se żżid ukoll l-isforzi biex ittejjeb l-applikazzjoni, l-implimentazzjoni u l-infurzar effettivi tad-dritt tal-UE. Dan huwa partikolarment importanti għall-funzjonament kif suppost tas-suq uniku, il-protezzjoni ta’ ktajjen tal-provvista ewlenin li jipprovdu l-ikel lill-ħwienet u provvisti mediċi lis-servizzi tas-saħħa, biex jitħarsu d-drittijiet taċ-ċittadini u biex jitwettaq il-Patt Ekoloġiku Ewropew . Il-Kummissjoni se tkompli tappoġġa u taħdem mal-Istati Membri biex tiżgura l-implimentazzjoni rapida u korretta ta’ regoli ġodda u eżistenti tal-UE. Fl-istess ħin, mhux se toqgħod lura milli tiddefendi d-dritt tal-UE permezz ta’ proċedimenti ta’ ksur fejn meħtieġ.
4. Konklużjoni
Matul is-sena li għaddiet, in-nies tal-Ewropa għamlu sagrifiċċji biex jipproteġu lil xulxin u rridu nipproteġu l-progress li għamilna flimkien. Dan ifisser li noqogħdu attenti u li nżommu l-attenzjoni tagħna fuq l-iżgurar li nkunu nistgħu niġġestixxu l-kriżi, niġbdu ħabel wieħed flimkien u naħdmu fuq soluzzjoni fit-tul biex nimxu lil hinn minn dan.
Iżda hekk kif u meta l-Ewropa timxi ’l quddiem lil hinn mill-kriżi, jeħtieġ li nkunu lesti li nagħmlu l-affarijiet b’mod aħjar u ngħixu f’soċjetà aktar b’saħħitha, aktar ġusta u aktar prospera. Dan ifisser li nagħmlu lilna nfusna aktar reżiljenti iżda jfisser ukoll li naċċelleraw l-aġenda trasformattiva li fuqha ġiet eletta din il-Kummissjoni u li fuqha kienet iffukata sa mill-ewwel jum fil-kariga tagħha.
Dan huwa l-għan doppju ta’ dan il-programm ta’ ħidma tal-Kummissjoni u tal-inizjattivi kollha elenkati fih. Kull wieħed minnhom jista’ jiffoka fuq oqsma differenti iżda kollha jridu jkunu qed jiġbdu fl-istess direzzjoni. Fl-aħħar mill-aħħar l-inizjattivi kollha għandhom l-għan li jiffaċilitaw ħajjitna, l-ambjent tagħna jsir aktar san, is-soċjetajiet aktar ġusti, l-opportunitajiet aktar varjati u aċċessibbli, u l-ekonomiji aktar moderni u mmirati lejn objettivi usa’.
Biex tiżgura li jkollhom l-impatt mixtieq tagħhom, il-Kummissjoni se taħdem mill-qrib fi sħubija kemm mal-Parlament Ewropew kif ukoll mal-Kunsill. Dan l-ispirtu kollettiv huwa dak li wassal biex l-Ewropa tingħaqad biex tilħaq qbil dwar NextGenerationEU. Dan huwa dak li se jippermettilna negħlbu din il-pandemija u nwettqu l-bidla sistemika li l-Ewropa teħtieġ. Għandna l-viżjoni, għandna l-pjan, għandna l-investiment – u issa rridu nirkupraw illum billi nibnu dinja aħjar għal għada.
