52020AT40135(02)

EUR-Lex

Access to European Union law

This document is an excerpt from the EUR-Lex website

EUROPA
EUR-Lex home
EUR-Lex - 52020AT40135(02) - EN

Help

Search tips

Need more search options? Use the Advanced search

Document 52020AT40135(02)

Help

Sommarju tad-Deċiżjoni tal-Kummissjoni tas-16 ta’ Mejju 2019 li jirrigwarda proċediment skont l-Artikolu 101 tat-Trattat dwar il-Funzjonament tal-Unjoni Ewropea u l-Artikolu 53 tal-Ftehim ŻEE (Il-Każ AT.40135 — Forex-Essex Express) (notifikat bin-numru tad-dokument C(2019)3521) (It-test bl-Ingliż biss huwa awtentiku) (Test b’rilevanza għaż-ŻEE) 2020/C 219/07

C/2019/3621

ĠU C 219, 3.7.2020, p. 8–12 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

HTML

PDF

Official Journal

3.7.2020

Il-Ġurnal Uffiċjali tal-Unjoni Ewropea

C 219/8

Sommarju tad-Deċiżjoni tal-Kummissjoni

tas-16 ta’ Mejju 2019

li jirrigwarda proċediment skont l-Artikolu 101 tat-Trattat dwar il-Funzjonament tal-Unjoni Ewropea u l-Artikolu 53 tal-Ftehim ŻEE

(Il-Każ AT.40135 — Forex-Essex Express)

(notifikat bin-numru tad-dokument C(2019)3521)

(It-test bl-Ingliż biss huwa awtentiku)

(Test b’rilevanza għaż-ŻEE)

(2020/C 219/07)

Fis-16 ta’ Mejju 2019, il-Kummissjoni adottat deċiżjoni dwar proċediment skont l-Artikolu 101 tat-Trattat dwar il-Funzjonament tal-Unjoni Ewropea u l-Artikolu 53 tal-Ftehim ŻEE. F’konformità mad-dispożizzjonijiet tal-Artikolu 30 tar-Regolament tal-Kunsill (KE) Nru 1/2003 (1), il-Kummissjoni qiegħda hawnhekk tippubblika l-ismijiet tal-partijiet u l-kontenut prinċipali tad-deċiżjoni, inkluża kull penali imposta, fid-dawl tal-interess leġittimu tal-impriżi fil-protezzjoni tas-sigrieti kummerċjali tagħhom.

1. INTRODUZZJONI

(1)

Id-destinatarji tad-Deċiżjoni pparteċipaw fi ksur uniku u kontinwu tal-Artikolu 101 TFUE u tal-Artikolu 53 taż-ŻEE. L-oġġett tal-ksur kien ir-restrizzjoni u/jew id-distorsjoni tal-kompetizzjoni fis-settur tan-negozjar fil-pront (FX jew Forex) b’muniti tal-G10 (2).

(2)

Fil-każ tal-muniti tal-G10 huma kkonċernati USD u CAD, JPY, AUD, NZD, GBP, EUR, CHF, SEK, NOK u DKK (jiġifieri b’kollox 11-il munita, li b’mod korrispondenti għall-konvenzjoni tas-suq jissejħu “muniti tal-G10”). Il-klijenti ewlenin tan-negozjanti fis-suq tal-muniti barranin huma maniġers tal-assi, fondi ta’ pensjoni, fondi spekulattivi, korporazzjonijiet u banek oħra.

(3)

In-negozjar fil-pront tal-FX ikopri kemm (i) il-market making, jiġifieri l-eżekuzzjoni tal-ordnijiet tal-klijent biex jiskambja ammont ta’ munita bl-ekwivalenti tiegħu f’munita oħra, kemm (ii) in-negozjar fl-isem proprju, jiġifieri l-eżekuzzjoni ta’ proċessi oħra tal-kambju għall-finijiet tal-kontroll tal-iskopertura li tirriżulta mit-tranżazzjonijiet tal-market making.

(4)

Il-postijiet tan-negozjar tal-impriżi rilevanti, responsabbli min-negozjar fil-pront bil-muniti tal-G10, kienu lesti jinnegozjaw kull waħda minn dawn il-muniti f’dipendenza mid-domanda tas-suq. Filwaqt li n-negozjanti parteċipi stess kienu primarjament responsabbli mill-market making fir-rigward ta’ muniti jew pari ta’ muniti speċifiċi, fuq il-bażi tal-mandat tagħhom dawn setgħu jinnegozjaw f’isem l-impriża tagħhom stess bil-muniti kollha tal-G10 disponibbli fil-kotba tagħhom, xi ħaġa li għamlu fil-perjodu rilevanti b’firxiet differenti, biex jimmassimizzaw il-valur tal-parteċipazzjonijiet rispettivi tagħhom.

(5)

Rilevanti għall-ksur huma t-tliet tipi ta’ ordnijiet li ġejjin, li jaqgħu fil-qasam tan-negozjar imwettaq fuq ordni tal-klijenti (market making) tan-negozjanti parteċipi:

—	Ordnijiet immedjati tal-klijenti, biex jitwettqu immedjatament negozji b’ċertu ammont ta’ munita bir-rata prevalenti tas-suq;

—	Ordnijiet kundizzjonali tal-klijenti, li jiġu eżegwiti jekk jintlaħaq livell ta’ prezz partikolari u joħloq skopertura għar-riskju għan-negozjanti. Dawn isiru eżegwibbli biss meta s-suq jilħaq ċertu limitu (pereżempju ordni ta’ stop-loss jew take-profit);

—

Ordnijiet tal-klijenti għall-eżekuzzjoni ta’ negozju b’rata tal-kambju ta’ referenza jew bir-rata ta’ referenza għal pari ta’ muniti partikolari; f’dan il-każ dan kien jikkonċerna biss il-Closing Spot Rates ta’ WM/Reuters (iktar ’il quddiem “ir-rati ta’ referenza ta’ WMR) u r-rati tal-kambju ta’ referenza tal-Bank Ċentrali Ewropew (iktar ’il quddiem “ir-rati ta’ referenza tal-BĊE”) (3).

(6)

Id-Deċiżjoni hija indirizzata lill-entitajiet legali li ġejjin (iktar ’il quddiem “id-destinatarji”:

—	UBS AG (minn hawn ’il quddiem “UBS”)

—	The Royal Bank of Scotland Group plc u NatWest Markets Plc (4) (flimkien “RBS”)

—	Barclays PLC, Barclays Services Limited, Barclays Capital Inc u Barclays Bank Plc (flimkien “Barclays”) u

—	Mitsubishi UFJ Financial Group Inc. u MUFG Bank, Ltd. (flimkien “BOTM”)

(7)

Id-Deċiżjoni hija bbażata fuq l-evidenza inkluża fil-fajl tal-Kummissjoni kif ukoll fuq ir-rikonoxximent ċar u inekwivoku tal-fatti u l-kwalifika legali tagħhom fis-sottomissjonijiet tar-riżolviment ippreżentati mid-destinatarji ta’ din id-Deċiżjoni kif ukoll fuq il-konferma espliċita u inekwivoka tagħhom li d-Dikjarazzjoni tal-Oġġezzjonijiet tirrifletti l-kontenut tas-sottomissjonijiet tagħhom tar-riżolviment.

2. DESKRIZZJONI TAL-KAŻ

2.1. Proċedura

(8)

L-investigazzjoni nfetħet fuq il-bażi ta’ applikazzjoni għal immunità minn UBS fis-27 ta’ Settembru 2013. Sussegwentement, il-Kummissjoni rċeviet applikazzjonijiet inizjali għall-klemenza mingħand Barclays fil-11 ta’ Ottubru 2013 u mingħand RBS fl-14 ta’ Ottubru 2013. Il-Kummissjoni tat immunità kundizzjonali lil UBS fit-2 ta’ Lulju 2014.

(9)

Fis-27 ta’ Ottubru 2016 tnedew proċedimenti kontra l-partijiet bil-ħsieb li jsiru diskussjonijiet dwar ir-riżolviment. Bejn Novembru 2016 u Frar 2018, il-Kummissjoni kellha laqgħat bilaterali u kienet f’kuntatt ma’ kull waħda mill-partijiet f’tliet ċikli ta’ riżolviment, f’konformità mal-Avviż ta’ Riżolviment.

(10)

Fl-24 ta’ Jannar 2018 il-Kulleġġ tal-Kummissarji approva l-firxiet tal-multi x’aktarx applikabbli. Il-partijiet kollha sussegwentement ippreżentaw is-sottomissjonijiet tagħhom tar-riżolviment, li fihom irrikonoxxew l-imputabilità tagħhom għall-ksur (inkluż ir-rwol tagħhom u d-durata tal-parteċipazzjoni tagħhom fil-ksur) u aċċettaw l-ammont massimu tal-multa previst mill-Kummissjoni.

(11)

Il-Kummissjoni adottat id-Dikjarazzjoni tal-Oġġezzjonijiet fl-24 ta’ Lulju 2018 u l-partijiet kollha mingħajr ekwivoku kkonfermaw li hija kienet tikkorrispondi mal-kontenut tas-sottomissjonijiet tagħhom ta’ riżolviment u li kienu impenjati li jsegwu l-proċedura għar-riżolviment. Il-Kumitat Konsultattiv fil-qasam tal-Prattiċi Restrittivi u Pożizzjonijiet Dominanti ħareġ opinjoni favorevoli fis-6 ta’ Mejju 2019. Fis-7 ta’ Mejju 2019, l-Uffiċjal tas-Seduta ħareġ ir-rapport finali tiegħu. Il-Kummissjoni adottat id-Deċiżjoni fis-16 ta’ Mejju 2019.

2.2. Deskrizzjoni tal-imġiba

(12)

Id-Deċiżjoni tirrigwarda l-kartell “Essex Express” (imsemmi għaċ-chatroom professjonali ta’ Bloomberg li fiha l-evidenza tal-imġiba) bejn UBS, Barclays, RBS u BOTM, li seħħ bejn l-14 ta’ Diċembru 2009 u l-31 ta’ Lulju 2012. Id-durata tal-parteċipazzjoni tal-kumpaniji differenti tvarja (ara l-punt (16)). Il-kartell huwa dokumentat f’komunikazzjonijiet li seħħew fi ħdan żewġ chatrooms ta’ Bloomberg li inizjalment kienu qed joperaw b’mod parallel: (i) “Essex Express ‘n Jimmy”, li tinvolvi negozjanti minn UBS, Barclays u RBS u (ii) “Grumpy Semi Old Men”, bejn negozjanti minn BOTM, Barclays u RBS. F’Jannar 2011 iċ-chatroom “Grumpy Semi Old Men” ġiet inkorporata fiċ-chatroom “Essex Express ‘n Jimmy” li kompliet għaddejja sa Lulju 2012. Fiċ-chatrooms ipparteċipaw negozjanti li kienu impjegati mill-impriżi rispettivi tagħhom waqt il-perjodu rilevanti, u kull wieħed minnhom kien awtorizzat jinnegozja bil-muniti tal-G10 fil-qafas ta’ tranżazzjonijiet spot f’isem u għan-nom tal-impjegatur tiegħu fil-post apposta tan-negozjar fil-pront tal-kambju.

(13)

L-oġġett tal-kartell kien ksur uniku u kontinwu kkaratterizzat mill-iskambju bejn in-negozjanti — f’dawn iċ-chatrooms privati u fil-biċċa l-kbira multilaterali u b’mod estensiv u rikorrenti — ta’ ċerta informazzjoni kummerċjalment sensittiva, attwali jew orjentata lejn il-futur, dwar l-attivitajiet ta’ negozjar tagħhom. Dan l-iskambju ta’ informazzjoni seħħ skont ftehim taċitu sottostanti li: (i) tali informazzjoni setgħet tintuża għall-benefiċċju rispettiv tan-negozjanti u sabiex tidentifika okkażjonijiet biex tikkoordina l-kummerċ tagħhom; (ii) tali informazzjoni tkun kondiviża f’chatrooms privati; (iii) in-negozjanti ma jiżvelawx din l-informazzjoni kondiviża li jirċievu minn parteċipanti oħra taċ-chatrooms lil partijiet barra miċ-chatrooms privati; u (iv) tali informazzjoni kondiviża ma tintużax kontra n-negozjanti li jaqsmuha (minn hawn ’il quddiem imsejjaħ “il-ftehim sottostanti”). Barra minn hekk, skont il-ftehim sottostanti, in-negozjanti b’mod okkażjonali kkoordinaw l-attivitajiet ta’ negozjar tagħhom fir-rigward tan-negozjar fil-pront b’muniti tal-G10. L-iskambju tal-informazzjoni kien immirat fuq żewġ parametri bażiċi tal-kompetizzjoni fin-negozjar professjonali fil-pront tal-kambju: il-prezz u l-ġestjoni professjonali tar-riskju.

(14)

Minflok ma kkompetew b’mod awtonomu fir-rigward ta’ dawn il-parametri, fid-deċiżjonijiet tagħhom relatati mas-suq in-negozjanti bbażaw fuq informazzjoni dwar il-pożizzjonijiet, l-intenzjonijiet u r-restrizzjonijiet tal-kompetituri tagħhom. Kienu problematiċi:

—

l-iskambju ta’ informazzjoni dwar il-pożizzjonijiet ta’ riskju miftuħa tan-negozjanti, li seta’ jipprovdilhom tagħrif dwar l-imġiba potenzjali ta’ hedging tal-kollegi tagħhom. Huma pprovdew informazzjoni lin-negozjanti li setgħet tkun rilevanti għad-deċiżjonijiet ta’ negozjar sussegwenti tagħhom għal perjodu ta’ minuti jew sal-iskambju ta’ informazzjoni li jmiss.

—

l-iskambju ta’ informazzjoni dwar il-firxiet bejn it-talba u l-offerta eżistenti jew intenzjonati tagħhom, li ddivulgaw il-prezz ikkwotat min-negozjanti għal pari ta’ muniti u volumi ta’ negozju speċifiċi u li setgħu jaffettwaw ukoll il-prezz globali mħallas mill-klijenti għan-negozjar bil-muniti. Skont il-volatilità tas-suq f’dak iż-żmien, l-informazzjoni tista’ tibqa’ utli għan-negozjanti l-oħra f’perjodu li jista’ jkun ta’ ftit sigħat.

—

l-iskambju ta’ informazzjoni dwar negozjar attwali jew ippjanat u ordnijiet pendenti tal-klijenti (stop loss orders, ordnijiet bir-rata ta’ referenza u ordnijiet immedjati), li kienu utli għan-negozjanti fid-deċiżjonijiet sussegwenti tagħhom u ppermettewlhom jidentifikaw l-okkażjonijiet biex jikkoordinaw in-negozjar tagħhom.

(15)

Barra minn hekk, biex jiksbu vantaġġ fuq il-kompetituri li ma kinux parteċipanti fiċ-chatrooms, in-negozjanti parteċipi okkażjonalment ikkoordinaw il-pożizzjonijiet ta’ negozjar bil-ħsieb li jinfluwenzaw ir-rati ta’ referenza ta’ WMR u tal-BĊE.

2.3. Involviment tal-impriżi individwali fl-imġiba

(16)

UBS, Barclays, RBS u BOTM ipparteċipaw fl-imġiba msemmija qabel fil-perjodi indikati fit-tabella li ġejja:

Tabella 1: involviment tal-Partijiet fiċ-chatrooms

BANK	ESSEX EXPRESS (*1)	GRUMPY SEMI OLD MEN (*1)
UBS	14.12.2009–31.7.2012
BARCLAYS	14.12.2009–31.7.2012	8.9.2010–12.1.2011
BARCLAYS	6.1.2011–31.7.2012
RBS	14.9.2010–8.11.2011	16.9.2010–12.1.2011
BOTM	12.1.2011–12.9.2011	8.9.2010–12.1.2011

2.4. Ambitu ġeografiku

(17)

L-ambitu ġeografiku tal-ksur kopra mill-anqas it-territorju kollu taż-ŻEE.

2.5. Rimedji

(18)

Id-deċiżjoni tapplika l-Linji Gwida tal-Kummissjoni tal-2006 dwar il-Multi (5). Id-Deċiżjoni timponi multi fuq l-entitajiet ta’ Barclays, RBS u BOTM elenkati fil-punt (6).

2.5.1. Ammont bażiku tal-multa

(19)

Il-Kummissjoni tqis li huwa xieraq li jiġi applikat indikatur għall-valur tal-bejgħ bħala punt ta’ tluq għad-determinazzjoni tal-multi għax tranżazzjonijiet spot bil-muniti tal-G10 ma jiġġenerawx valur tal-bejgħ li jista’ jiġi ttraċċat direttament fil-kontijiet tal-Partijiet.

(20)

Il-Kummissjoni tistabbilixxi l-indikatur għall-valuri rilevanti tal-bejgħ kif ġej:

—

L-ewwel nett bħala referenza l-Kummissjoni tieħu l-ammonti nozzjonali kkalkolati fuq sena, li l-impriżi kkonċernati nnegozjaw fil-qafas ta’ tranżazzjonijiet spot b’muniti tal-G10, li saru ma’ kontropartijiet li jinsabu fiż-ŻEE. Għal dan il-għan il-Kummissjoni tqis li jkun iktar xieraq li l-indikatur għall-valur tal-bejgħ ikun ibbażat direttament fuq id-dħul tal-Partijiet fix-xhur li jikkorrispondu mal-parteċipazzjoni rispettiva tagħhom fil-ksur, li mbagħad jinħadem fuq sena.

—

It-tieni, il-Kummissjoni timmultiplika dawn l-ammonti b’fattur ta’ aġġustament xieraq, uniformi għall-Partijiet kollha, li jirrifletti l-firxiet applikabbli bejn it-talba u l-offerta fit-tranżazzjonijiet spot bil-muniti tal-G10. Dan il-fattur huwa s-somma ta’ żewġ elementi: wieħed relatat mal-attivitajiet ta’ market making u t-tieni wieħed relatat man-negozjar fl-isem proprju.

(21)

Għal dawk l-impriżi li ppreżentaw sottomissjonijiet addizzjonali ta’ riżolviment fil-Każ 40.135 — Forex, (mhux kopert b’din id-Deċiżjoni), fid-diskrezzjoni tagħha l-Kummissjoni ddeċidiet li tapplika fattur ta’ korrezzjoni oġġettiv li jirrifletti l-grad tas-sovrapożizzjoni temporali biex tevita eżitu potenzjalment sproporzjonat. Fil-qafas ta’ din id-deċiżjoni dan iwassal għall-applikazzjoni ta’ fatturi korrettivi fuq il-valur tal-bejgħ ikkonfermat ta’ UBS, Barclays u RBS.

2.5.2. Aġġustamenti għall-ammont bażiku

2.5.2.1. Ċirkostanzi aggravanti

(22)

F’dan il-każ mhumiex applikati ċirkustanzi aggravanti.

2.5.2.2. Ċirkostanzi mitiganti

(23)

Fir-rigward ta’ UBS u BOTM jitqiesu ċirkustanzi mitiganti minħabba parteċipazzjoni limitata li tirriżulta fi tnaqqis tal-multa b’5 % kull wieħed. Iż-żewġ kumpaniji ma kinux jafu bl-eżistenza taċ-chatrooms “Grumpy Semi Old Men” u “Essex Express ‘n Jimmy” fil-perjodu qabel ma ngħaqdu ż-żewġ chatrooms.

2.5.2.3. Żieda speċifika bħala deterrent

(24)

Sabiex jiġi żgurat li l-multi jkollhom effett ta’ deterrent suffiċjenti, il-Kummissjoni tista’ żżid il-multi imposti fuq impriżi li għandhom valur tal-bejgħ partikolarment kbir bis-saħħa ta’ beni jew servizzi li mhumiex relatati mal-ksur (6).

(25)

F’dan il-każ huwa xieraq li jiġi applikat fattur multiplikanti ta’ deterrenza fuq il-multi li għandhom jiġu imposti fuq BOTM.

2.5.2.4. Applikazzjoni tal-limitu tal-valur tal-bejgħ ta’ 10 %

(26)

F’konformità mal-Artikolu 23(2) tar-Regolament (KE) Nru 1/2003, f’dan il-każ l-ebda multa ma teċċedi l-10 % tal-valur tal-bejgħ totali tal-impriżi fis-sena kummerċjali li tippreċedi d-data ta’ din id-Deċiżjoni (7).

2.5.2.5. Applikazzjoni tal-Avviż ta’ Klemenza tal-2006: tnaqqis tal-multi

(27)

UBS qed jingħata l-immunità mill-multi. Barra minn hekk, lil Barclays il-Kummissjoni tatu tnaqqis tal-multa b’50 % u lil RBS tnaqqis b’25 %.

2.5.2.6. Applikazzjoni tal-Avviż ta’ Riżolviment

(28)

B’riżultat tal-applikazzjoni tal-Avviż ta’ Riżolviment, l-ammont tal-multi imposti fuq l-impriżi kollha tnaqqas b’10 % u dan it-tnaqqis ġie miżjud ma’ kwalunkwe gwadann ta’ klemenza.

3. KONKLUŻJONI

(29)

Il-multi li ġejjin ġew imposti skont l-Artikolu 23(2) tar-Regolament (KE) Nru 1/2003

(30)

Tabella 2: Ammonti tal-multi għall-ksur

Impriża	Multi (f’EUR)
UBS	0
Barclays	94 217 000
RBS	93 715 000
BOTM	69 750 000

(1) ĠU L 1, 4.1.2003, p. 1.

(2) Il-każ ma jikkonċernax in-negozjar fil-pront elettroniku tal-FX, iddefinit bħala negozji fil-pront tal-FX li jiġu rreġistrati mill-pjattaformi ta’ negozjar elettroniċi jew mill-algoritmi tal-kompjuter tal-banek rilevanti jew jiġu eżegwiti fuqhom.

(3) Ir-rata ta’ referenza ta’ WMR u tal-BĊE huma bbażati fuq in-negozjar fil-pront tal-FX min-naħa tal-parteċipanti fis-suq fil-mumenti jew qrib il-mumenti li fihom jiġu ffissati r-rati ta’ referenza rispettivi ta’ WMR jew tal-BĊE.

(4) Fit-30 ta’ April 2018 The Royal Bank of Scotland plc bidel ismu għal NatWest Markets plc.

(*1) Bit-tipa grassa huma mmarkati l-bidu u t-tmiem tal-parteċipazzjoni f’Essex Express għal kull bank.

(5) ĠU C 210, 1.9.2006, p. 2.

(6) Il-punt 30 fil-Linji Gwida tal-2006 dwar il-multi.

(7) Il-Kummissjoni talbet lill-banek jipprovdu l-valur tal-bejgħ totali tagħhom fuq bażi grossa kif ukoll netta. Irrispettivament mill-valur tal-bejgħ totali meqjus (gross jew nett), il-multi għal ebda impriża kkonċernata ma jeċċedu l-10 % tal-valur tal-bejgħ totali.

Top

Choose the experimental features you want to try