EUR-Lex Access to European Union law
This document is an excerpt from the EUR-Lex website
Document 52020AE5719
Opinion of the European Economic and Social Committee on: Amended proposal for a Regulation of the European Parliament and of the Council establishing a common procedure for international protection in the Union and repealing Directive 2013/32/EU (COM(2020) 611 final – 2016/0224 (COD)) – Proposal for a Regulation of the European Parliament and of the Council introducing a screening of third-country nationals at the external borders and amending Regulations (EC) No 767/2008, (EU) 2017/2226, (EU) 2018/1240 and (EU) 2019/817 (COM(2020) 612 final – 2020/0278 (COD)) – Amended proposal for a Regulation of the European Parliament and of the Council on the establishment of ‘Eurodac’ for the comparison of biometric data for the effective application of Regulation (EU) XXX/XXX [Regulation on Asylum and Migration Management] and of Regulation (EU) XXX/XXX [Resettlement Regulation], for identifying an illegally staying third-country national or stateless person and on requests for the comparison with Eurodac data by Member States’ law enforcement authorities and Europol for law enforcement purposes and amending Regulations (EU) 2018/1240 and (EU) 2019/818 (COM(2020) 614 final – 2016/0132(COD))
Opinjoni tal-Kumitat Ekonomiku u Soċjali Ewropew dwar: Proposta emendata għal Regolament tal-Parlament Ewropew u tal-Kunsill li jistabbilixxi proċedura komuni għall-protezzjoni internazzjonali fl-Unjoni u li jħassar id-Direttiva 2013/32/UE (COM(2020) 611 — final 2016/0224-COD), Proposta għal Regolament tal-Parlament Ewropew u tal-Kunsill li jintroduċi skrinjar ta’ ċittadini ta’ pajjiżi terzi fil-fruntieri esterni u li jemenda r-Regolamenti (KE) Nru 767/2008, (UE) 2017/2226, (UE) 2018/1240 u (UE) 2019/817 (COM(2020) 612 — final 2020/0278-COD), Proposta emendata għal Regolament tal-Parlament Ewropew u tal-Kunsill dwar l-istabbiliment tal-“Eurodac” għat-tqabbil ta’ data bijometrika għall-applikazzjoni effettiva tar-Regolament (UE) XXX/XXX [ir-Regolament dwar il-Ġestjoni tal-Ażil u tal-Migrazzjoni] u tar-Regolament (UE) XXX/XXX [ir-Regolament dwar ir-Risistemazzjoni], għall-identifikazzjoni ta’ ċittadin ta’ pajjiż terz jew persuna apolida b’soġġorn illegali u dwar talbiet għat-tqabbil ma’ data tal-Eurodac mill-awtoritajiet tal-infurzar tal-liġi tal-Istati Membri u mill-Europol għall-finijiet ta’ infurzar tal-liġi (riformulat) u li temenda r-Regolamenti (UE) 2018/1240 u (UE) 2019/818 (COM(2020) 614 — final 2016/0132-COD)
Opinjoni tal-Kumitat Ekonomiku u Soċjali Ewropew dwar: Proposta emendata għal Regolament tal-Parlament Ewropew u tal-Kunsill li jistabbilixxi proċedura komuni għall-protezzjoni internazzjonali fl-Unjoni u li jħassar id-Direttiva 2013/32/UE (COM(2020) 611 — final 2016/0224-COD), Proposta għal Regolament tal-Parlament Ewropew u tal-Kunsill li jintroduċi skrinjar ta’ ċittadini ta’ pajjiżi terzi fil-fruntieri esterni u li jemenda r-Regolamenti (KE) Nru 767/2008, (UE) 2017/2226, (UE) 2018/1240 u (UE) 2019/817 (COM(2020) 612 — final 2020/0278-COD), Proposta emendata għal Regolament tal-Parlament Ewropew u tal-Kunsill dwar l-istabbiliment tal-“Eurodac” għat-tqabbil ta’ data bijometrika għall-applikazzjoni effettiva tar-Regolament (UE) XXX/XXX [ir-Regolament dwar il-Ġestjoni tal-Ażil u tal-Migrazzjoni] u tar-Regolament (UE) XXX/XXX [ir-Regolament dwar ir-Risistemazzjoni], għall-identifikazzjoni ta’ ċittadin ta’ pajjiż terz jew persuna apolida b’soġġorn illegali u dwar talbiet għat-tqabbil ma’ data tal-Eurodac mill-awtoritajiet tal-infurzar tal-liġi tal-Istati Membri u mill-Europol għall-finijiet ta’ infurzar tal-liġi (riformulat) u li temenda r-Regolamenti (UE) 2018/1240 u (UE) 2019/818 (COM(2020) 614 — final 2016/0132-COD)
EESC 2020/05719
ĠU C 155, 30.4.2021, p. 64–72
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
30.4.2021 |
MT |
Il-Ġurnal Uffiċjali tal-Unjoni Ewropea |
C 155/64 |
Opinjoni tal-Kumitat Ekonomiku u Soċjali Ewropew dwar: Proposta emendata għal Regolament tal-Parlament Ewropew u tal-Kunsill li jistabbilixxi proċedura komuni għall-protezzjoni internazzjonali fl-Unjoni u li jħassar id-Direttiva 2013/32/UE
(COM(2020) 611 — final 2016/0224-COD)
Proposta għal Regolament tal-Parlament Ewropew u tal-Kunsill li jintroduċi skrinjar ta’ ċittadini ta’ pajjiżi terzi fil-fruntieri esterni u li jemenda r-Regolamenti (KE) Nru 767/2008, (UE) 2017/2226, (UE) 2018/1240 u (UE) 2019/817
(COM(2020) 612 — final 2020/0278-COD)
Proposta emendata għal Regolament tal-Parlament Ewropew u tal-Kunsill dwar l-istabbiliment tal-“Eurodac” għat-tqabbil ta’ data bijometrika għall-applikazzjoni effettiva tar-Regolament (UE) XXX/XXX [ir-Regolament dwar il-Ġestjoni tal-Ażil u tal-Migrazzjoni] u tar-Regolament (UE) XXX/XXX [ir-Regolament dwar ir-Risistemazzjoni], għall-identifikazzjoni ta’ ċittadin ta’ pajjiż terz jew persuna apolida b’soġġorn illegali u dwar talbiet għat-tqabbil ma’ data tal-Eurodac mill-awtoritajiet tal-infurzar tal-liġi tal-Istati Membri u mill-Europol għall-finijiet ta’ infurzar tal-liġi (riformulat) u li temenda r-Regolamenti (UE) 2018/1240 u (UE) 2019/818
(COM(2020) 614 — final 2016/0132-COD)
(2021/C 155/10)
Relatur: Panagiotis GKOFAS
Konsultazzjoni |
Kummissjoni Ewropea, 27.11.2020 |
Bażi legali |
Artikolu 304 tat-Trattat dwar il-Funzjonament tal-Unjoni Ewropea |
|
|
Sezzjoni kompetenti |
Sezzjoni għax-Xogħol, l-Affarijiet Soċjali u ċ-Ċittadinanza |
Adottata fis-sezzjoni |
8.2.2021 |
Adottata fil-plenarja |
25.2.2021 |
Sessjoni plenarja Nru |
558 |
Riżultat tal-votazzjoni (favur/kontra/astensjonijiet) |
210/9/28 |
1. Konklużjonijiet u rakkomandazzjonijiet
1.1. |
Il-KESE jieħu nota tal-Patt il-Ġdid dwar il-Migrazzjoni u l-Ażil, li għandu l-għan li jindirizza fenomenu multidimensjonali u kumpless. Il-KESE jemmen li r-Regolamenti l-ġodda jagħtu kontribut pożittiv għal sigurtà fuq il-fruntieri tal-UE aktar effettiva. Qed jiġi stabbilit proċess aħjar u aktar sikur biex jiġu kkontrollati dawk li jidħlu fl-UE. Madankollu, strateġija integrata u komuni tal-UE, u li tkun reżiljenti u li tħares ’il quddiem, hija meħtieġa ħafna u ilha mistennija żmien twil. Sfortunatament, fir-rigward tal-kwistjoni inġenerali tal-migrazzjoni u l-ażil, il-proposti attwali ma jistax jitqies li huma l-pass ’il quddiem li huwa tant meħtieġ. Barra minn hekk, l-erba’ jew ħames Stati Membri kkonċernati se jkollhom joħolqu “ċentri magħluqin” fuq il-bażi tal-prinċipju ta’ nuqqas ta’ dħul (1) għall-bnedmin għal perjodu twil sa sitt jew seba’ xhur, jekk mhux aktar, sakemm l-eżitu tal-proċeduri jkun magħruf, u dan jirriżulta f’sitwazzjonijiet li huma ħafna agħar minn qabel. |
1.2. |
Il-Kummissjoni Ewropea u l-Istati Membri tal-UE jeħtieġu jagħmlu sforzi akbar u ulterjuri. L-Opinjonijiet reċenti tal-KESE (SOC/649 (2) u SOC/669 (3)) jikkritikaw aspetti ewlenin kemm tar-Regolament dwar il-Ġestjoni tal-Ażil u tal-Migrazzjoni (AMR) kif ukoll tar-Regolament dwar il-Proċeduri tal-Ażil (APR). Il-KESE jixtieq jirrimarka wkoll li, skont l-analiżi tiegħu tad-disa’ regolamenti u l-kuntatt tiegħu mal-Kummissjoni, il-prospetti għall-implimentazzjoni ta’ dawn id-disa’ regolamenti differenti jidhru problematiċi minn diversi aspetti. Hija meħtieġa strateġija aktar komprensiva dwar il-migrazzjoni biex jiġu żgurati sinerġiji aħjar bejn ir-regolamenti differenti tal-UE u biex jiġu żgurati tweġibiet għal kwistjonijiet importanti fl-Istati Membri li huma aktar milqutin mill-migrazzjoni. |
1.3. |
Il-KESE jixtieq jesprimi t-tħassib tiegħu dwar il-proċeduri l-ġodda fuq il-fruntieri, speċjalment fir-rigward tal-ħtieġa li jiġi protett id-dritt li jintalab l-ażil u l-kwistjonijiet li ġejjin:
|
1.4. |
Il-KESE jirrikonoxxi l-valur miżjud u l-ħtieġa għal proċeduri tal-ażil komuni, komprensivi u effettivi li jikkonformaw mal-konvenzjonijiet internazzjonali u l-garanziji legali, favur il-kunfidenza tal-UE u tal-Istati Membri li titrawwem minn mekkaniżmi ta’ solidarjetà tanġibbli u responsabbiltajiet/ impenji kondiviżi b’mod ġust. Madankollu, din il-proposta tal-Kummissjoni ma tinkludix sistema komuni tal-ażil ta’ din ix-xorta — waħda komprensiva, li turi solidarjetà u tqassim ġust tar-responsabbiltà fost l-Istati Membri. Id-dispożizzjoni dwar is-solidarjetà għandha tiġi inkluża wkoll fl-APR, eżatt wara li jkun sar l-iskrinjar, u bl-għajnuna tal-IT mill-Eurodac. Jekk “solidarjetà obbligatorja” ma tissarrafx f’“rilokazzjoni obbligatorja” skont id-dispożizzjonijiet tal-APR, jew jekk ma jinħolqux proċeduri li jippermettu lill-persuni japplikaw għall-ażil fl-Istati Membri tal-UE mingħajr il-ħtieġa li jaqsmu l-fruntieri tal-UE, allura f’termini prattiċi r-Regolament ma jkunx operattiv. Għandu jkun hemm ukoll inċentivi u diżinċentivi għar-rilokazzjoni, u fi kwalunkwe każ għandu jkun possibbli li l-proċess tal-APR jitwettaq fi Stati Membri oħra u mhux esklużivament fil-pajjiż tal-ewwel dħul. |
1.5. |
Il-KESE jenfasizza li l-effettività tal-proċeduri l-ġodda proposti jeħtieġ li titkejjel b’mod kostanti permezz ta’ sistemi li jimmonitorjaw ir-rispett għad-drittijiet fundamentali, b’mod partikolari fir-rigward tad-drittijiet ta’ persuni u tfal vulnerabbli, il-valutazzjoni individwali tat-talbiet għall-ażil, u rimedji effettivi. Madankollu, tqum il-mistoqsija dwar fejn u kif se jiġu implimentati l-Patt il-Ġdid imtejjeb u l-proposti li jakkumpanjawh, u b’liema tip ta’ solidarjetà, rilokazzjoni jew arranġamenti ta’ risistemazzjoni. |
1.6. |
Il-KESE jappoġġja sistema tal-IT aktar integrata u bbilanċjat għall-ġestjoni tal-migrazzjoni, ibbażata fuq bażi tad-data mtejba tal-Eurodac li tiffoka fuq l-applikazzjonijiet u l-applikanti. Il-KESE kellu l-impressjoni li l-Kummissjoni tirrikonoxxi l-ħtieġa għal approċċ komuni għall-iskrinjar obbligatorju ta’ qabel id-dħul tal-marki tas-swaba’ u tar-riskji għas-saħħa u s-sigurtà, iżda minkejja s-sistema sofistikata proposta, sfortunatament ma hemm l-ebda possibbiltà għal persuna biex tapplika għall-ażil fi Stat Membru ieħor għajr il-pajjiż tal-ewwel dħul – xi ħaġa li għandha tkun possibbli. Ir-regoli dwar id-determinazzjoni tal-Istat Membru responsabbli għall-ipproċessar ta’ applikazzjoni għall-ażil, attwalment stabbiliti fl-AMR, għandhom jiġu stabbiliti fl-APR, u jipprovdu opportunità permezz tal-Eurodac għal talbiet biex jiġu pproċessati minn Stati Membri oħra wkoll. |
1.7. |
Minkejja li l-KESE huwa favur proċeduri ġodda u aktar rapidi għat-teħid ta’ deċiżjonijiet fuq il-fruntieri tal-UE, filwaqt li jiġu rispettati d-drittijiet fundamentali, id-drittijiet tal-bniedem u l-proċeduri legali kollha, jinqalgħu bosta mistoqsijiet bħal: Kif nimplimentaw u niżguraw dawn il-proċeduri? Kif nimplimentaw ir-ritorni? Fejn hija s-solidarjetà fl-APR, biex ma nsemmux l-AMR – jekk wara kollox tipprovdi xi dispożizzjoni għas-solidarjetà? Meta persuna tingħata ażil, tista’ tmur fi Stat Membru ieħor minflok il-pajjiż tal-ewwel dħul (4)? L-Istati Membri jistgħu jagħtu ażil biex jipproteġu persuni fil-bżonn jew se jibdew jirrifjutawhom? Għalhekk, il-KESE jistieden lill-Kummissjoni biex tivverifika u tispjega bir-reqqa kull parti tal-proposta, u speċjalment biex twieġeb il-mistoqsija: “Dan il-Patt il-Ġdid kif se jtejjeb il-proċedura komuni tal-ażil u jissodisfa d-dritt li jintalab ażil?” |
1.8. |
Il-KESE jinsab imħasseb dwar l-implimentazzjoni tal-proċeduri l-ġodda ta’ skrinjar ta’ ċittadini ta’ pajjiżi terzi fuq il-fruntieri esterni. Dan il-mekkaniżmu ġdid iżid il-pressjoni fuq dawk l-Istati Membri tal-UE bil-fruntieri marittimi esterni tal-UE, u jippromovi l-ħolqien ta’ ċentri magħluqa fuq il-fruntieri esterni, jew qrib tagħhom. Ċentri simili qajmu tħassib serju f’termini ta’ protezzjoni tad-drittijiet tal-bniedem u l-iżgurar ta’ kundizzjonijiet ta’ għajxien aċċettabbli għar-residenti. |
1.9. |
L-eżitu tal-proċeduri tal-fruntieri se jkun jew l-għoti tal-ażil jew iċ-ċaħda u r-ritorn. Fil-każ ta’ ażil, l-Istat Membru li jagħtih huwa responsabbli għall-integrazzjoni tal-persuni kkonċernati. Madankollu, fix-xenarju tal-Patt il-Ġdid, dan ifisser l-integrazzjoni tagħhom fil-pajjiżi tan-Nofsinhar, mingħajr ebda possibbiltà ta’ rilokazzjoni lejn l-Istati Membri l-oħra jew solidarjetà mingħandhom. Jekk ma jingħatax ażil, l-Istat Membru għandu jirritorna l-applikant għal ażil li jkun ġie rifjutat. Dan l-approċċ għandu janalizza metodi kif jiġu stabbiliti ftehimiet tal-UE mal-pajjiżi terzi ta’ oriġini u ta’ tranżitu u kif jiġu żgurati proċeduri effettivi, kif previst fid-dritt internazzjonali u fl-istrumenti tad-drittijiet tal-bniedem. Ebda ftehim partikolari ma jista’ jiġi stabbilit bejn l-Istati Membri individwalment, u l-Kummissjoni lanqas ma ssemmi proċedura bħal din. |
1.10. |
L-isfidi tal-ġestjoni tal-migrazzjoni, relatati b’mod partikolari mal-iżgurar ta’ identifikazzjoni rapida ta’ dawk fil-bżonn ta’ protezzjoni internazzjonali jew mal-implimentazzjoni proprja tar-ritorni (għal dawk li ma għandhomx bżonn protezzjoni), huma mistennija jiġu indirizzati “b’mod uniformi” mill-UE kollha kemm hi, iżda ma jistax jitqies li dan qed isir bil-proposti attwali. Fil-fatt, din hija kwistjoni li għandha tiġi ttrattata biss mill-Istat Membru tal-ewwel dħul, u mhemmx kondiviżjoni ġusta tal-piżijiet pereżempju permezz ta’ rilokazzjoni obbligatorja tal-applikanti għall-ażil matul il-proċess tal-APR u l-analiżi tat-talba għall-ażil. |
1.11. |
B’mod partikolari, huwa importanti li tinħoloq proċedura aħjar li tippermetti li jiġu identifikati persuni li x’aktarx ma jirċevux protezzjoni fl-UE (5). Il-proposta tal-Kummissjoni tistabbilixxi skrinjar ta’ qabel id-dħul li għandu jkun applikabbli għaċ-ċittadini kollha ta’ pajjiżi terzi li jkunu preżenti fil-fruntiera esterna mingħajr ma jissodisfaw il-kundizzjonijiet tad-dħul jew wara l-iżbark, wara operazzjoni ta’ tfittxija u salvataġġ. B’xorti ħażina, madankollu, dan l-“iskrinjar ta’ qabel id-dħul” isir fit-territorju tal-pajjiż tal-ewwel dħul fl-UE fuq il-fruntiera. “Ta’ qabel” (id-dħul) tfisser li l-persuna kkonċernata tmur lejn “ċentru magħluq ta’ detenzjoni” u toqgħod hemm, mingħajr ebda possibbiltà li tiċċaqlaq sakemm l-awtoritajiet tal-Istat Membru jiddeċiedu jew li jagħtuhom ażil (6) jew li jirritornawhom lejn il-pajjiż ta’ oriġini jew ta’ tranżitu, u dan biss jekk dan ir-ritorn ikun possibbli – li mhuwiex il-każ fil-biċċa l-kbira tal-każijiet. |
1.12. |
Il-KESE jappoġġja wkoll qafas tal-UE li jistabbilixxi regoli uniformi għall-iskrinjar tal-migranti irregolari maqbuda fit-territorju u li żgiċċaw mill-verifiki fuq il-fruntieri mad-dħul fiż-żona Schengen. Dan għandu l-għan li jipproteġi ż-żona Schengen u jiżgura ġestjoni effiċjenti tal-migrazzjoni irregolari jew illegali. |
1.13. |
Il-KESE jistieden lill-istituzzjonijiet tal-UE, l-aġenziji u l-imsieħba soċjali biex jipparteċipaw fit-tfassil ta’ politiki u programmi oħrajn (bħal Sħubijiet ta’ Talent), fi skambji tal-aħjar prattika u programmi ta’ ġemellaġġ multilaterali rigward il-“kurituri umanitarji” eżistenti. Huwa jitlob ukoll li jiġu żviluppati oqfsa legali ġodda, li jiġu introdotti proċeduri rapidi li jippermettu li l-viża umanitarja tintuża b’mod aktar wiesa’ u minn għadd akbar ta’ persuni (permezz ta’ aġġustamenti għad-dispożizzjonijiet attwali tal-Artikolu 25 tar-Regolament (KE) Nru 810/2009 tal-Parlament Ewropew u tal-Kunsill (7)), u li “l-isponsorizzazzjoni” tiġi inkluża wkoll bħala perkors legali ordinarju għad-dħul fil-qasam tal-politiki tal-immigrazzjoni, applikabbli għal ċittadini ta’ pajjiżi terzi minn pajjiżi li mhumiex Stati Membri tal-UE. Il-KESE jiġbed l-attenzjoni tal-koleġiżlaturi għall-fatt li l-leġiżlazzjoni tal-UE li diġà teżisti, bħall-Ftehim ta’ Schengen u t-Trattat ta’ Lisbona, diġà tipprevedi “protezzjoni sussidjarja u temporanja” għal dawk li qed jaħarbu l-gwerer jew id-diżastri naturali. Dan juri kif, bl-użu ta’ strumenti leġiżlattivi diġà disponibbli għall-Istati Membri tal-Unjoni Ewropea, id-dħul regolari jista’ jiġi ggarantit għal persuni vulnerabbli li jeħtieġu protezzjoni internazzjonali. |
2. Osservazzjonijiet u kummenti ġenerali
2.1. |
Il-Patt Ġdid jirrakkomanda tfassil integrat tal-politika li jlaqqa’ flimkien il-politiki fl-oqsma tal-ażil, il-migrazzjoni, ir-ritorn, il-protezzjoni tal-fruntieri esterni, il-ġlieda kontra t-traffikar tal-migranti, u r-relazzjonijiet ma’ pajjiżi terzi ewlenin, b’mod li jirriflettu approċċ li jkopri l-gvern kollu. Fl-aħħar mill-aħħar, madankollu, ir-regolamenti proposti li qed jiġu eżaminati se jpoġġu piż kbir fuq l-Istati Membri tan-Nofsinhar tal-Ewropa, bil-konsegwenza inevitabbli li r-regolamenti mhux se jkunu applikabbli u ma jirnexxilhomx jiksbu r-riżultat maħsub tagħhom. Wara perjodu raġonevoli ta’ żmien, l-Istati Membri se jkunu mġiegħla de facto jirrifjutaw ħafna applikazzjonijiet għall-ażil, anke dawk li jissodisfaw il-kundizzjonijiet biex jingħata l-ażil, sabiex jiġi evitat li għadd dejjem jikber ta’ nies jinżammu flimkien f’kundizzjonijiet inumani. |
2.2. |
L-Istati Membri fin-Nofsinhar tal-Ewropa m’għandhom l-ebda għażla ħlief li jiġu kkonvertiti f’ċentri ta’ detenzjoni jew ta’ qabel it-tluq. |
2.3. |
Din l-Opinjoni ser tiffoka fuq tlieta mid-disa’ strumenti li jinsabu fil-Patt il-Ġdid: i) Regolament ġdid dwar l-iskrinjar; ii) Proposta emendata li tirrevedi r-Regolament dwar il-proċeduri tal-ażil; iii) Proposta emendata għal riformulazzjoni tar-Regolament tal-Eurodac. |
3. Kummenti speċifiċi dwar ir-Regolament il-ġdid dwar l-iskrinjar
3.1. |
Ir-Regolament il-ġdid dwar l-iskrinjar jipproponi proċedurata’ skrinjar qabel id-dħul fit-territorju tal-pajjiż tal-ewwel dħul, waħda li għandha tkun applikabbli għaċ-ċittadini ta’ pajjiżi terzi kollha li jkunu preżenti fuq il-fruntiera esterna li ma jissodisfawx il-kundizzjonijiet tad-dħul jew wara l-iżbark, wara operazzjoni ta’ tfittxija u salvataġġ. |
3.2. |
Id-data disponibbli turi li l-wasla ta’ ċittadini ta’ pajjiżi terzi fi bżonn ċar ta’ protezzjoni internazzjonali kif osservat fl-2015-2016 ġiet parzjalment sostitwita minn wasliet imħallta ta’ persuni. |
3.3. Kummenti speċifiċi dwar l-objettivi u l-elementi ewlenin tal-proċedura ta’ skrinjar
3.3.1. |
L-objettiv tal-iskrinjar huwa li jikkontribwixxi għall-approċċ komprensiv il-ġdid għall-migrazzjoni u l-flussi mħallta billi jiżgura li l-identità tal-persuni imma anke kwalunkwe riskju għas-saħħa u s-sigurtà, jiġu stabbiliti malajr u li ċ-ċittadini kollha ta’ pajjiżi terzi li jkunu preżenti fuq il-fruntiera esterna li ma jissodisfawx il-kundizzjonijiet tad-dħul jew wara l-iżbark wara operazzjoni ta’ tfittxija u salvataġġ jiġu rriferuti malajr għall-proċedura applikabbli. L-objettiv għandu jkun ukoll li tiġi pprovduta għodda utli li l-bqija tal-pajjiżi tal-UE jkunu jistgħu jipparteċipaw u jevalwaw ukoll l-applikant matul il-proċess tal-APR. |
3.3.2. |
Il-proposta tipprevedi li d-drittijiet fundamentali tal-persuni kkonċernati għandhom jiġu protetti permezz ta’ mekkaniżmu ta’ monitoraġġ li għandu jitwaqqaf mill-Istati Membri. |
3.3.3. |
L-iskrinjar għandu jikkonsisti, b’mod partikolari, f’:
|
3.3.4. |
L-iskrinjar għandu jkun obbligatorju u jenħtieġ li japplika mhux biss fil-pajjiżi tal-ewwel dħul, iżda f’kull Stat Membru, f’konformità mal-prinċipju tas-solidarjetà tal-UE. Kif deskritt fil-Patt il-ġdid, il-proċess tal-APR se jsir biss fil-pajjiżi tal-ewwel dħul. Jekk “solidarjetà obbligatorja” ma tissarrafx f’“rilokazzjoni obbligatorja” skont id-dispożizzjonijiet tal-APR, jew jekk ma jinħolqux proċeduri li jippermettu lill-persuni japplikaw għall-ażil fl-Istati Membri tal-UE mingħajr il-ħtieġa li jaqsmu l-fruntieri tal-UE, allura f’termini prattiċi r-Regolament ma jkunx operattiv. Għandu jkun hemm ukoll inċentivi u diżinċentivi għar-rilokazzjoni, u fi kwalunkwe każ il-proċess tal-APR għandu jitwettaq fi Stati Membri oħra u mhux esklużivament fil-pajjiż tal-ewwel dħul. |
3.3.5. |
L-iskrinjar propost huwa mistenni li jżid il-valur għall-proċeduri attwali u, bl-eċċezzjoni ta’ kwistjonijiet ta’ saħħa, jenħtieġ li ma jitwettaqx biss f’pajjiżi bi fruntieri esterni. |
3.3.6. |
Mekkaniżmu ta’ monitoraġġ indipendenti, effettiv u kontinwu għandu jkopri b’mod partikolari r-rispett tad-drittijiet fundamentali fir-rigward tal-iskrinjar, kif ukoll ir-rispett tar-regoli nazzjonali applikabbli fil-każ ta’ detenzjoni u konformità mal-prinċipju ta’ non-refoulement. Barra minn hekk, għandu jiżgura li l-ilmenti jiġu ttrattati malajr u b’mod xieraq. |
3.3.7. |
Il-proposta tirrikonoxxi r-rwol tal-aġenziji tal-UE — il-Frontex u l-Aġenzija tal-Unjoni Ewropea għall-Ażil, li jistgħu jakkumpanjaw u jappoġġjaw lill-awtoritajiet kompetenti fil-kompiti kollha tagħhom relatati mal-iskrinjar — iżda din mhix ċara biżżejjed. Tagħti wkoll rwol importanti, iżda xejn ċar, lill-Aġenzija għad-Drittijiet Fundamentali fl-appoġġ lill-Istati Membri biex jiżviluppaw il-mekkaniżmi ta’ monitoraġġ indipendenti tad-drittijiet fundamentali fir-rigward tal-iskrinjar, kif ukoll ir-rispett tar-regoli nazzjonali applikabbli fil-każ ta’ detenzjoni u konformità mal-prinċipju ta’ non-refoulement. |
4. Proposta emendata li tirrevedi r-Regolament dwar il-Proċeduri tal-Ażil
4.1. |
Il-KESE jqis li l-għażla ta’ proposta leġiżlattiva ġdida u emendata fil-forma ta’ regolament tal-UE minflok direttiva, kif inhu l-każ illum, hija adatta. Madankollu, il-KESE jistaqsi kif tista’ tiġi infurzata u implimentata fl-Istati Membri kollha, b’mod partikolari dawk li kienu soġġetti għal proċeduri ta’ ksur. Jista’ japprova din il-proposta biss jekk ma tibdilx lill-Istati Membri fin-Nofsinhar f’ċentri ta’ detenzjoni jew ta’ ċentri ta’ qabel it-tluq għall-persuni. |
4.2. |
Il-KESE jilqa’ l-intenzjoni tal-proposta tal-Kummissjoni li ttejjeb il-koordinazzjoni u l-proċeduri komuni għall-għoti u l-irtirar tal-protezzjoni internazzjonali, u għal aktar armonizzazzjoni tad-deċiżjonijiet dwar l-ażil u r-ritorn. Madankollu, jinnota b’dispjaċir li saru aktar proposti biex tiġi kkoordinata l-implimentazzjoni ta’ ċentri magħluqa ta’ detenzjoni fil-pajjiżi tal-ewwel dħul milli saru dwar is-sistema komuni tal-ażil, li jimponu l-obbligu esklużiv ta’ ġestjoni ta’ dawk li jfittxu l-ażil fuq il-pajjiżi tal-ewwel dħul. Dan jagħti l-impressjoni qawwija li l-proposti li għandhom jiġu implimentati huma indirizzati lill-pajjiżi tan-Nofsinhar, mingħajr ebda referenza għar-rilokazzjoni matul l-applikazzjoni tal-“proċeduri fuq il-fruntieri”. |
4.3. |
Barra minn hekk, il-KESE jinnota b’dispjaċir li l-problemi potenzjali fl-operat tal-programmi ta’ ritorn ma ġewx identifikati b’mod adegwat fil-proposta, fuq kollox fir-rigward tar-rieda fil-prattika ta’ pajjiżi terzi, pajjiżi ta’ oriġini jew pajjiżi ta’ tranżitu biex jikkooperaw mal-UE. |
4.4. |
Il-KESE jenfasizza l-ħtieġa urġenti għal strateġija aktar komprensiva bbażata fuq sistema ta’ responsabbiltà bbilanċjata u kondiviża għall-governanza tal-flussi migratorji bejn l-UE u pajjiżi mhux tal-UE. |
4.5. |
Barra minn hekk, il-KESE jenfasizza l-ħtieġa li tiġi pprovduta protezzjoni adegwata għall-familji bit-tfal u jħeġġeġ lill-Kummissjoni biex tagħti attenzjoni speċjali fir-rigward tal-minuri mhux akkumpanjati, l-effettività ġenerali tal-proċeduri ta’ gwida dwar l-ażil, l-indikaturi ta’ standards operazzjonali u l-kumpilazzjoni ta’ eżempji tal-aħjar prattika (ippubblikati mill-Uffiċċju Ewropew ta’ Appoġġ fil-qasam tal-Ażil (EASO)). Mhuwiex aċċettabbli li minuri jitqies bħala tali jekk ikun taħt l-età ta’ 12-il sena biss, u mhux taħt l-età ta’ 18-il sena, f’konformità mad-dritt internazzjonali. Skont il-Konvenzjoni tan-NU tal-1989 dwar id-Drittijiet tat-Tfal, minuri ifisser kull bniedem taħt l-età ta’ 18-il sena. |
4.6. |
F’konsultazzjonijiet reċenti, l-organizzazzjonijiet tas-soċjetà ċivili pproponew li jiġu riveduti ċerti regoli dwar id-determinazzjoni tar-responsabbiltà u li jiġi previst mekkaniżmu ta’ solidarjetà obbligatorju, inkluż għal persuni żbarkati wara operazzjoni ta’ tfittxija u salvataġġ. L-organizzazzjonijiet mhux governattivi rrakkomandaw ukoll l-istabbiliment ta’ fehim komuni ta’ “responsabbiltà” fost l-Istati Membri u appellaw biex ir-regoli riveduti ta’ Dublin jinkludu mekkaniżmu ta’ rilokazzjoni aktar permanenti (8) . Il-KESE jistaqsi kif mekkaniżmu ta’ solidarjetà li jiffunzjona tajjeb fost l-Istati Membri jista’ jiġi implimentat b’mod realistiku skont il-proposta emendata l-ġdida. Ir-regoli dwar id-determinazzjoni tal-Istat Membru responsabbli għall-ipproċessar ta’ applikazzjoni għall-ażil, attwalment stabbiliti fl-AMR, għandhom ikunu fl-APR, u jipprovdu opportunità permezz tal-Eurodac għal talbiet li għandhom jiġu pproċessati minn Stati Membri oħra wkoll. |
5. L-emendar tal-proposta tal-2016 għal riformulazzjoni tar-regolament tal-Eurodac
5.1. |
L-emenda għall-Proposta tal-2016 għal riformulazzjoni tar-Regolament tal-Eurodac għandha l-għan li toħloq rabta bejn individwi speċifiċi u l-proċeduri li huma soġġetti għalihom sabiex jitjiebu l-kontroll tal-migrazzjoni irregolari u d-detezzjoni ta’ movimenti mhux awtorizzati. |
5.2. |
L-għan ewlieni tal-Eurodac huwa li tidentifika lil dawk li jfittxu l-ażil u li tiffaċilita, permezz ta’ data tal-marki tas-swaba’ u tal-immaġni tal-wiċċ (“bijometrika”), il-provvista ta’ evidenza biex tgħin fid-determinazzjoni tal-Istat Membru responsabbli biex jeżamina applikazzjoni għall-ażil ippreżentata fl-UE. |
5.3. |
Il-KESE mhuwiex konvint li l-użu tal-Eurodac (9) ikun l-għodda adatta għall-ġlieda kontra l-migrazzjoni irregolari, u lanqas li l-użu tal-Eurodac se jappoġġja b’mod effettiv lill-Istati Membri fil-monitoraġġ tal-għoti ta’ assistenza għar-ritorn volontarju u r-riintegrazzjoni (10). |
5.4. |
Il-proposta li temenda l-proposta tal-2016 tibni fuq ftehim proviżorju bejn il-koleġiżlaturi, tikkumplementa dawn il-bidliet u għandha l-għan li tittrasforma l-Eurodac f’bażi ta’ data komuni Ewropea biex tappoġġja l-politiki tal-UE dwar l-ażil, ir-risistemazzjoni u l-migrazzjoni irregolari. |
5.5. |
Barra minn hekk, għandha l-għan li tiġbor data aktar preċiża u kompluta biex tinforma t-tfassil tal-politika u b’hekk tgħin aħjar fil-kontroll tal-migrazzjoni irregolari u fid-detezzjoni ta’ movimenti mhux awtorizzati billi, minbarra l-applikazzjonijiet, isir ukoll l-għadd tal-applikanti individwali. Madankollu, il-KESE jemmen li din is-sistema sofistikata trid tipprovdi wkoll lill-migrant bil-possibbiltà li japplika għal ażil fi Stat Membru ieħor, mingħajr ma jkun limitat għall-pajjiż tal-ewwel dħul. |
5.6. |
L-Eurodac għandha wkoll l-għan li tappoġġja l-identifikazzjoni ta’ soluzzjonijiet ta’ politika adatti f’dan il-qasam billi tippermetti li titfassal statistika li tikkombina data minn diversi bażijiet tad-data. |
5.7. |
Il-KESE jaqbel li regoli komuni dwar it-teħid tal-marki tas-swaba’ u l-immaġni tal-wiċċ għal ċittadini ta’ pajjiżi terzi għall-finijiet tal-Eurodac jeħtieġ li jiġu applikati bl-istess mod fl-Istati Membri kollha. |
5.8. |
Il-KESE huwa favur li jinħoloq strument ta’ għarfien li jipprovdi lill-Unjoni Ewropea b’informazzjoni dwar kemm ċittadini minn pajjiżi terzi jidħlu fl-UE b’mod irregolari jew wara operazzjonijiet ta’ tfittxija u salvataġġ u japplikaw għall-protezzjoni internazzjonali, xi ħaġa li hija indispensabbli għat-tfassil ta’ politika sostenibbli u bbażata fuq l-evidenza fil-qasam tal-migrazzjoni u l-politika dwar il-viża. |
5.9. |
Objettiv ieħor tal-Eurodac huwa li tipprovdi appoġġ addizzjonali lill-awtoritajiet nazzjonali li jittrattaw l-applikanti għall-ażil li l-applikazzjonijiet tagħhom ikunu diġà ġew irrifjutati fi Stat Membru ieħor, billi tidentifika l-applikazzjonijiet rifjutati, iżda l-awtoritajiet nazzjonali għandhom jingħataw id-dritt li jeżaminaw mill-ġdid applikazzjoni pproċessata minn Stat Membru ieħor. |
Brussell, il-25 ta’ Frar 2021.
Christa SCHWENG
Il-President tal-Kumitat Ekonomiku u Soċjali Ewropew
(1) Il-kunċett tan-nuqqas ta’ dħul huwa xi ħaġa li eżistiet kemm f’Schengen kif ukoll fl-acquis tal-ażil (l-Artikolu 43 tad-Direttiva dwar il-Proċeduri tal-Ażil (APD)).
(2) ĠU C 123, 9.4.2021, p. 15.
(3) Ara l-paġna 58 ta’ dan il-Ġurnal Uffiċjali.
(4) Skont id-dispożizzjonijiet tar-Regolament dwar Standards għall-Kwalifika, id-drittijiet u l-benefiċċji li jirriżultaw mill-istatus ta’ rifuġjat/protezzjoni sussidjarja huma marbutin mal-Istat Membru li jkun ta l-istatus.
(5) Is-sehem tal-migranti li jkunu ġejjin minn pajjiżi b’rati ta’ rikonoxximent ta’ inqas minn 25 % żdied minn 14 % fl-2015 għal 57 % fl-2018.
(6) Fir-rigward tal-użu tad-detenzjoni matul il-proċedura fuq il-fruntiera, ara l-paragrafi 179 u 183 tas-sentenza tal-QĠUE C-808/18: “l-Istati Membri huma, fil-fatt, awtorizzati li jżommu f’‘detenzjoni’, fis-sens tal-Artikolu 2(h) tad-Direttiva 2013/33, l-applikanti għal protezzjoni internazzjonali li jippreżentaw ruħhom fil-fruntieri tagħhom, qabel ma jagħtuhom dritt ta’ dħul fit-territorju tagħhom, taħt il-kundizzjonijiet li l-imsemmi Artikolu 43 jistabbilixxi u sabiex tiġi ggarantita l-effettività tal-proċeduri li jipprevedi l-istess Artikolu 43”; “mill-Artikolu 43(1) tad-Direttiva 2013/32 jirriżulta li detenzjoni bbażata fuq din id-dispożizzjoni hija ġġustifikata biss sabiex tippermetti lill-Istat Membru kkonċernat jeżamina, qabel ma jirrikonoxxi lill-applikant għal protezzjoni internazzjonali d-dritt li jidħol fit-territorju tiegħu, jekk l-applikazzjoni tiegħu hijiex inammissibbli […] jew jekk din għandhiex tiġi miċħuda bħala infondata […]”.
(7) Ir-Regolament (KE) Nru 810/2009 tal-Parlament Ewropew u tal-Kunsill tat-13 ta’ Lulju 2009 li jistabbilixxi Kodiċi Komunitarju dwar il-Viżi (Kodiċi dwar il-Viżi) (ĠU L 243, 15.9.2009, p. 1).
(8) Rapport tal-proġett minn CEPS, Search and rescue, disembarkation and relocation arrangements in the Mediterranean Sailing Away from Responsibility?, Ġunju 2019 [Mhux disponibbli bil-Malti].
(9) Dan ser itejjeb il-kapaċitajiet ta’ monitoraġġ tal-Istati Membri f’dan il-qasam u jipprevjeni x-“shopping” għar-ritorn volontarju assistit u r-riintegrazzjoni (AVRR), peress li l-Istati Membri ser ikollhom aċċess immedjat għal din l-informazzjoni u persuna li tingħata assistenza fi Stat Membru wieħed ikollha toqgħod lura milli tiċċaqlaq lejn Stat Membru ieħor bil-għan li tikseb tip ieħor jew aħjar ta’ assistenza. Bħalissa, l-Istati Membri ma għandhom l-ebda bażi ta’ data komuni jew xi mod biex jiskopru jekk persuna rimpatrijata tkunx diġà bbenefikat minn appoġġ għar-ritorn u r-riintegrazzjoni. Din l-informazzjoni hija essenzjali fil-ġlieda kontra l-użu ħażin u l-benefiċċji doppji.
(10) Is-sistema ta’ Dħul/Ħruġ tippermetti lill-Istati Membri jidentifikaw ċittadini ta’ pajjiżi terzi li jkunu ilhom joqogħdu illegalment minkejja li jkunu daħlu fl-UE legalment. Madankollu, ma teżisti l-ebda sistema bħal din għall-identifikazzjoni ta’ ċittadini ta’ pajjiżi terzi preżenti illegalment li jidħlu fl-UE b’mod irregolari fil-fruntieri esterni. Is-sistema attwali tal-Eurodac hija l-bażi tad-data ideali biex tospita din l-informazzjoni peress li diġà fiha data ta’ dan it-tip. Għalissa, l-għan tal-ġbir ta’ tali data huwa limitat għall-assistenza fid-determinazzjoni tal-Istat Membru responsabbli biex janalizza applikazzjoni għall-ażil. L-identifikazzjoni ta’ ċittadini ta’ pajjiżi terzi preżenti illegalment u dawk li daħlu fl-Unjoni Ewropea b’mod irregolari fil-fruntieri esterni ser jassisti b’mod partikolari lill-Istati Membri fid-dokumentazzjoni mill-ġdid ta’ ċittadin ta’ pajjiż terz għal finijiet ta’ ritorn.
ANNESS
L-emenda li ġejja nċaħdet waqt id-diskussjoni iżda rċeviet tal-inqas kwart tal-voti mixħuta (Artikolu 43(2) tar-Regoli ta’ Proċedura):
Punt 2.2
Ibdel it-test kif ġej:
2.2. |
L-Istati Membri fin-Nofsinhar tal-Ewropa m’għandhom l-ebda għażla ħlief li jiġu kkonvertiti f’ċentri ta’ detenzjoni jew jistabbilixxu ċentri magħluqa ta’ qabel it-tluq fejn is-sitwazzjonijiet ta’ dawk li jfittxu l-ażil huma problematiċi ħafna f’termini ta’ kundizzjonijiet ta’ għixien u drittijiet. |
Raġuni
It-test attwali huwa faċli ħafna biex jiġi interpretat ħażin peress li l-pajjiżi nnifishom mhuma kkonvertiti la f’ċentru ta’ detenzjoni u lanqas f’xi ħaġa oħra. Fil-pajjiżi hemm stabbiliti ċentri ta’ qabel it-tluq.
Riżultat tal-votazzjoni:
Favur: |
96 |
Kontra: |
100 |
Astensjoni: |
47 |
Il-punti li ġejjin tal-Opinjoni tas-Sezzjoni ġew modifikati biex jirriflettu l-emenda adottata mill-assemblea, iżda rċevew aktar minn kwart tal-voti mixħuta (Artikolu 43(2) tar-Regoli ta’ Proċedura):
1.1. |
Il-KESE jieħu nota tal-Patt il-Ġdid dwar il-Migrazzjoni u l-Ażil, li għandu l-għan li jindirizza fenomenu multidimensjonali u kumpless. Il-KESE jemmen li r-Regolamenti l-ġodda jagħtu kontribut pożittiv għal sigurtà fuq il-fruntieri tal-UE aktar effettiva. Qed jiġi stabbilit proċess aħjar u aktar sikur biex jiġu kkontrollati dawk li jidħlu fl-UE. Madankollu, strateġija integrata u komuni tal-UE, u li tkun reżiljenti u li tħares ’il quddiem, hija meħtieġa ħafna u ilha mistennija żmien twil. Sfortunatament, fir-rigward tal-kwistjoni inġenerali tal-migrazzjoni u l-ażil, il-Kummissjoni qed toffri l-istess platt tas-soltu, imsaħħan mill-ġdid u, kif inhi l-prattika standard, xorta servut kiesaħ fil-pajjiżi tan-Nofsinhar tal-Ewropa. Barra minn hekk, l-erba’ jew ħames Stati Membri kkonċernati se jsiru “ċentri magħluqin tad-detenzjoni” (1) għall-bnedmin għal perjodu ta’ mill-inqas sitt jew seba’ xhur, jekk mhux aktar, sakemm l-eżitu tal-proċeduri jkun magħruf, u dan jirriżulta f’sitwazzjonijiet li huma 20 darba agħar minn qabel. |
Riżultat tal-votazzjoni:
Favur: |
105 |
Kontra: |
99 |
Astensjoni: |
43 |
1.2. |
Il-KESE jixtieq jirrimarka li jidher li hemm nuqqas ta’ rieda tajba min-naħa tal-Kummissjoni fir-rigward tas-suġġerimenti tiegħu. L-Opinjonijiet kollha tiegħu (SOC/649, SOC/669 u SOC/670) jikkritikaw l-adozzjoni kemm tar-Regolament dwar il-Ġestjoni tal-Ażil u tal-Migrazzjoni (AMR) kif ukoll tar-Regolament dwar il-Proċeduri tal-Ażil (APR). Il-KESE jixtieq jirrimarka wkoll li mill-analiżi tiegħu tad-disa’ regolamenti u l-kuntatt tiegħu mal-Kummissjoni, jidher li mhemmx prospetti għall-implimentazzjoni ta’ dawn id-disa’ regolamenti differenti. Huwa tipiku tal-Kummissjoni li tonqos milli tittratta l-immigrazzjoni bħala kwistjoni speċifika, u pjuttost tiddikjara li kwalunkwe proposta jew suġġeriment jaqgħu taħt regolament ieħor. B’riżultat ta’ dan, l-ebda kwistjoni ma tista’ tiġi konnessa b’mod sostanzjali, li jfisser li l-kwistjonijiet jitqiesu individwalment fil-kamp ta’ applikazzjoni ta’ kull regolament esklużiv. Fi kliem ieħor, “għal kull osservazzjoni, napplikaw regola differenti”, jew il-Kummissjoni sempliċement twarrab il-kummenti kollha bl-argument li dawn jaqgħu taħt regoli differenti. |
Riżultat tal-votazzjoni:
Favur: |
101 |
Kontra: |
97 |
Astensjoni: |
41 |
(1) Il-kunċett tan-nuqqas ta’ dħul huwa xi ħaġa li eżistiet kemm f’Schengen kif ukoll fl-acquis tal-ażil (l-Artikolu 43 tad-Direttiva dwar il-Proċeduri tal-Ażil (APD)).