EUR-Lex Access to European Union law
This document is an excerpt from the EUR-Lex website
Document 52020AE4884
Opinion of the European Economic and Social Committee on ‘Communication from the Commission to the European Parliament, the Council, the European Economic and Social Committee and the Committee of the Regions – A Renovation Wave for Europe: greening our buildings, creating jobs, improving lives’ (COM(2020) 662 final)
Opinjoni tal-Kumitat Ekonomiku u Soċjali Ewropew dwar “Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Mewġa ta’ Rinnovazzjoni għall-Ewropa — l-ekoloġizzazzjoni tal-binjiet tagħna, il-ħolqien tal-impjiegi, it-titjib tal-ħajja” [COM(2020) 662 final]
Opinjoni tal-Kumitat Ekonomiku u Soċjali Ewropew dwar “Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Mewġa ta’ Rinnovazzjoni għall-Ewropa — l-ekoloġizzazzjoni tal-binjiet tagħna, il-ħolqien tal-impjiegi, it-titjib tal-ħajja” [COM(2020) 662 final]
EESC 2020/04884
ĠU C 155, 30.4.2021, p. 73–77
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
30.4.2021 |
MT |
Il-Ġurnal Uffiċjali tal-Unjoni Ewropea |
C 155/73 |
Opinjoni tal-Kumitat Ekonomiku u Soċjali Ewropew dwar “Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Mewġa ta’ Rinnovazzjoni għall-Ewropa — l-ekoloġizzazzjoni tal-binjiet tagħna, il-ħolqien tal-impjiegi, it-titjib tal-ħajja”
[COM(2020) 662 final]
(2021/C 155/11)
Relatur: |
Pierre Jean COULON |
Korelatur: |
Aurel Laurenţiu PLOSCEANU |
Konsultazzjoni |
Kummissjoni Ewropea, 11.11.2020 |
Bażi legali |
Artikolu 304 tat-Trattat dwar il-Funzjonament tal-Unjoni Ewropea |
Sezzjoni kompetenti |
Sezzjoni għat-Trasport, l-Enerġija, l-Infrastruttura u s-Soċjetà tal-Informazzjoni |
Adottata fis-sezzjoni |
11.2.2021 |
Adottata fil-plenarja |
24.2.2021 |
Sessjoni plenarja Nru |
558 |
Riżultat tal-votazzjoni (favur/kontra/astensjonijiet) |
212/0/5 |
1. Konklużjonijiet u rakkomandazzjonijiet
1.1 |
Il-KESE jilqa' l-adozzjoni mill-Kummissjoni Ewropea ta' proposta għal Strateġija Ewropea bit-titolu “Mewġa ta' Rinnovazzjoni għall-Ewropa – l-ekoloġizzazzjoni tal-binjiet tagħna, il-ħolqien tal-impjiegi, it-titjib tal-ħajja”. Tali strateġija hija neċessità assoluta u inevitabbli għall-Unjoni Ewropea u ċ-ċittadini tagħha – strateġija li l-KESE għandu l-ħsieb li jappoġġja u jikkontribwixxi għaliha b'mod attiv fir-riflessjonijiet u l-proposti tiegħu. |
1.2 |
Il-KESE fil-fatt iqis li, b'40 % tal-konsum totali tal-enerġija tal-Unjoni Ewropea, l-akkomodazzjonijiet u binjiet oħra għandhom jesperjenzaw tali mewġa ta' rinnovazzjoni mmexxija mill-Unjoni Ewropea, bħala parti minn approċċ globali ta' investiment fit-tul, interess ġenerali, żvilupp sostenibbli, protezzjoni tas-saħħa inkluż it-trattament tal-asbestos f’dawn ix-xogħlijiet, tranżizzjoni ekoloġika u implimentazzjoni effettiva tal-Pilastru Ewropew tad-Drittijiet Soċjali fir-rigward tal-akkomodazzjoni sostenibbli u affordabbli. |
1.3 |
Il-KESE għalhekk jappoġġja l-istrateġija ta' mewġa ta' rinnovazzjoni peress li hija approċċ għall-Unjoni Ewropea fejn jirbaħ kulħadd, approċċ ta' rebħa tripla għall-klima, għall-irkupru permezz tal-impjiegi lokali maħluqa, u fl-aħħar nett għall-ġlieda kontra l-pandemija, kontra l-faqar enerġetiku u għall-promozzjoni ta' akkomodazzjonijiet affordabbli għal kulħadd, inklużi l-persuni vulnerabbli. |
1.4 |
Il-KESE jqis li din l-istrateġija, meta jitqiesu d-dimensjoni partikolari tagħha u t-trajettorja tagħha sal-2050, tirrikjedi li jkun hemm qafas legali u finanzjarju stabbli, ċar u adattat, kemm bl-implimentazzjoni ta' Fond Ewropew tal-Investiment apposta, pjani pluriennali ta' investiment, “semestru ekoloġiku” ġdid, kif ukoll bit-tfassil ta' qafas legali speċifiku u adattat dwar, pereżempju, l-għajnuna mill-Istat, ir-rati tal-VAT applikabbli, l-akkwist pubbliku, is-self ipotekarju “ekoloġiku” u standards dwar ir-rendiment tal-bini fl-użu tal-enerġija. |
1.5 |
Il-KESE jitlob lill-Kummissjoni timplimenta skemi li jinċentivaw il-ħolqien, fil-livell lokali, ta' setturi tal-industrijalizzazzjoni għall-proċessi ta' rinnovazzjoni termali u l-massifikazzjoni tagħhom, filwaqt li jiġi stabbilit “Erasmus tar-Rinnovazzjoni Termali 2050” ġdid, bl-għan li jattira liż-żgħażagħ Ewropej lejn dawn l-impjiegi ġodda tal-ġejjieni. |
1.6 |
Il-KESE jitlob ukoll li l-Istati Membri jitħeġġu jsegwu l-eżempju tal-programm ELENA tal-BEI u jimplimentaw servizzi pubbliċi ta' dijanjostika, għajnuna teknika u pariri, b'mod partikolari għall-unitajiet domestiċi, bl-għan li jiġi evitat kull prattika abbużiva ta’ kummerċjalizzazzjoni diretta u ta’ truffa tal-iskemi ta' appoġġ għar-rinnovazzjoni termali. |
1.7 |
Fuq kollox il-KESE jqis li din l-istrateġija għandha tippermetti lill-Unjoni Ewropea ssir eqreb taċ-ċittadini tagħha u tat-territorji tagħhom permezz ta' komunikazzjoni adattata tal-iskemi fis-seħħ u kif jistgħu jiġu aċċessati. |
1.8 |
Il-KESE jitlob sinerġija reali bejn l-Osservatorju tal-Istokk tal-Bini u l-Osservatorju tal-Faqar Enerġetiku. |
2. Kummenti ġenerali
2.1 |
Il-KESE jilqa' l-adozzjoni mill-Kummissjoni Ewropea tal-Komunikazzjoni “Mewġa ta' Rinnovazzjoni għall-Ewropa – l-ekoloġizzazzjoni tal-binjiet tagħna, il-ħolqien tal-impjiegi, it-titjib tal-ħajja”. Ir-rinnovazzjoni fuq skala kbira tal-bini fl-Unjoni Ewropea – akkomodazzjonijiet privati u soċjali, binjiet pubbliċi u għal użu professjonali – illum hija neċessità assoluta, meta wieħed iqis l-insuffiċjenza strutturali tal-investimenti fit-tul f'dan il-qasam, u fil-konfront tal-konsegwenzi klimatiċi, ambjentali, ekonomiċi u soċjali, meta wieħed iqis l-ispejjeż tan-nuqqas ta' azzjoni f'dan il-qasam. |
2.2 |
Il-Kumitat jappoġġja din l-istrateġija proposta mill-Kummissjoni abbażi tal-objettiv tan-newtralità klimatika, l-applikazzjoni tal-prinċipju taċ-ċirkolarità, il-kontribut għall-għanijiet ta' żvilupp sostenibbli u għall-kompetittività tal-Ewropa, il-ħarsien tal-wirt kulturali u fuq kollox id-dritt ta' kull persuna għal akkomodazzjoni affordabbli, diċenti, aċċessibbli u sana, f'konformità mal-prinċipju 19 tal-Pilastru Ewroprew tad-Drittijiet Soċjali. |
2.3 |
B'40 % tal-konsum totali tal-enerġija tal-Unjoni Ewropea, l-akkomodazzjonijiet u binjiet oħra għandhom jesperjenzaw mewġa ta' rinnovazzjoni, bħala parti minn approċċ globali ta' investiment fit-tul, interess ġenerali, żvilupp sostenibbli u tranżizzjoni ekoloġika. |
2.4 |
Barra minn hekk il-pandemija enfasizzat ir-rwol ewlieni tal-akkomodazzjonijiet fil-ġestjoni tas-saħħa tal-kriżi u n-neċessità li jitqies mill-ġdid l-użu tagħhom, u b'konsegwenza ta' dan id-disinn tagħhom, meta wieħed iqis ir-restrizzjonijiet tal-lockdown. |
2.5 |
Il-pandemija fuq kollox issottolinjat ir-rabta inaċċettabbli bejn il-kundizzjonijiet sanitarji tal-akkomodazzjonijiet, il-faqar enerġetiku u r-reżiljenza għall-pandemija. |
2.6 |
Għalhekk, l-istrateġija ta' mewġa ta' rinnovazzjoni tal-binjiet hija parti minn approċċ fejn jirbaħ kulħadd permezz tal-importanza tal-kontribut effikaċi tagħha għall-ġlieda kontra t-tibdil fil-klima, tal-volum ta' investimenti fit-tul u tal-impjiegi lokali li tista' toħloq u li jistgħu jikkontribwixxu b'mod attiv għall-irkupru, kif ukoll għall-ġlieda kontra l-faqar enerġetiku u l-promozzjoni tal-koeżjoni u l-inklużjoni soċjali, permezz tal-iżvilupp ta' provvista ta' akkomodazzjonijiet affordabbli għaċ-ċittadini tal-Unjoni Ewropea. |
2.7 |
Il-mewġa ta' rinnovazzjoni tal-binjiet għandha, għalhekk, tkun ibbażata fuq l-irjieħat u l-kurrenti permanenti u konverġenti, kemm fil-qasam tar-regolamentazzjoni u l-għajnuna tal-Unjoni Ewropea kif ukoll fil-qasam tal-pjani pluriennali ta' investiment tal-Istati Membri. Dawn għandhom ikunu fl-istess ħin ċari u aċċessibbli filwaqt li jqisu d-diversità tal-atturi u l-loġika proprja tagħhom ta' investiment, li jvarjaw minn unitajiet domestiċi Ewropej li jokkupaw l-akkomodazzjoni tagħhom stess, assolutament jew f'koproprjetà, għal unitajiet domestiċi li jikru akkomodazzjoni(jiet) fis-suq, għal organizzazzjonijiet tal-akkomodazzjoni soċjali rregolati minn kompiti partikolari ta' interess ġenerali u l-obbligi tas-servizz pubbliku li jirriżultaw minnhom, għal awtoritajiet pubbliċi u l-binjiet pubbliċi tagħhom, għal bini storiku protett jew għal kumpaniji u l-proprjetà immobbli tagħhom. Is-“surfers” potenzjali fuq il-mewġa ta' rinnovazzjoni li jridu jiġu persważi jinvestu fit-tul fl-akkomodazzjonijiet tagħhom u bini ieħor minn issa sal-2050 permezz ta' mekkaniżmi ta' finanzjament adattati għan-natura tal-bini, li jgħaqqdu s-self fit-tul jew is-“self ekoloġiku”, il-garanziji pubbliċi u s-sussidji inevitabbli li ma jitħallsux lura b'mod partikolari għall-unitajiet domestiċi. |
2.8 |
Il-mewġa ta' rinnovazzjoni tal-bini fuq kollox trid tkun immexxija minn moviment Ewropew lejn l-industrijalizzazzjoni u l-massifikazzjoni tal-operazzjonijiet fil-livell lokali, b'tali mod li jitnaqqsu l-ispejjeż tar-rinnovazzjoni u t-tul ta' żmien għat-twettiq tax-xogħlijiet għall-unitajiet domestiċi li jokkupaw l-akkomodazzjonijiet, permezz ta' esternalizzazzjoni tal-proċessi u d-diġitalizzazzjoni tagħhom. Din l-industrijalizzazzjoni għandha tkun akkumpanjata minn mudelli ta' kostruzzjoni ġodda bbażati fuq obbligi tekniki u standards tal-kostruzzjoni adatti, u fuq kollox minn kampanja Ewropea li tippromovi dan is-settur il-ġdid u dawn l-impjiegi ġodda potenzjali fost il-ġenerazzjonijiet żgħażagħ bit-tnedija ta' “Erasmus tar-Rinnovazzjoni Termali 2050”, li qed jitlob il-Kumitat. Għandha tingħata attenzjoni partikolari wkoll lir-riskji ta’ dumping soċjali inerenti f’esternalizzazzjonijiet bħal dawn u mezzi oħra ta’ subkuntrattar tax-xogħol. |
2.9 |
Il-Kummissjoni fl-istesss ħin għandha tiżgura l-konverġenza tad-dispożizzjonijiet eżistenti, id-dispożizzjonijiet li għandhom jiġu riveduti u l-proposti għal dispożizzjonijiet ġodda, mhux biss għall-benefiċċju tal-Istati Membri u l-istrateġiji ta' investiment fit-tul tagħhom, iżda wkoll għall-benefiċċju tal-unitajiet domestiċi, il-lokaturi soċjali, l-awtoritajiet pubbliċi u l-intrapriżi, li kollha jieħdu deċiżjonijiet finali fl-atti individwali tal-investiment fit-tul li se jsostnu l-mewġa sal-2050 skont il-loġika tagħhom. |
2.10 |
Din il-konverġenza neċessarja tapplika daqstant ieħor għar-reviżjonijiet tad-dispożizzjonijiet eżistenti, pereżempju, fir-rigward tad-Direttiva dwar ir-Rendiment tal-Bini fl-Użu tal-Enerġija, l-akkwist pubbliku jew l-iskemi ta' għajnuna mill-Istat, b’mod partikolari għall-akkomodazzjoni soċjali, ir-rata speċifika tal-VAT applikabbli, il-kreditu ipotekarju “ekoloġiku”, iżda wkoll id-dispożizzjonijiet u l-kundizzjonijiet tal-pjan Ewropew ta' rkupru Next Generation EU u l-politika ta' koeżjoni għall-2021-2027, li għandha tkun ċara għall-unitajiet domestiċi Ewropej fil-mira. Dan il-pjan ta’ rkupru għandu jingħata dinamika ġdida permezz ta' politika reali ta' proposti u rakkomandazzjonijiet konkreti kif ukoll permezz tal-koordinazzjoni tal-osservatorji nazzjonali eżistenti. |
2.11 |
Il-Kumitat jitlob li l-Osservatorju Ewropew tal-Istokk tal-Bini jaħdem f'sinerġija mal-Osservatorju tal-Faqar Enerġetiku. |
2.12 |
Il-Kumitat jitlob li jiġi stabbilit servizz pubbliku fl-Istati Membri għall-promozzjoni tal-mewġa ta' rinnovazzjoni termali, tad-dijanjostika u tal-assistenza teknika għal operazzjonijiet ta' rinnovazzjoni termali, b'mod partikolari fid-direzzjoni tal-unitajiet domestiċi, sabiex tiġi evitata kull prattika malizzjuża fir-rigward tal-kummerċjalizzazzjoni abbużiva tax-xogħlijiet ta' rinnovazzjoni. |
3. Osservazzjonijiet – L-istimular tar-rinnovazzjoni tal-bini fid-dawl tan-newtralità klimatika u l-irkupru
3.1 |
Ir-rinnovazzjoni fuq skala kbira tal-bini fl-Unjoni Ewropea – akkomodazzjonijiet privati u soċjali, binjiet pubbliċi u għal użu professjonali – illum hija neċessità assoluta, meta wieħed iqis l-insuffiċjenza strutturali tal-investimenti fit-tul f'dan il-qasam, u fil-konfront tal-konsegwenzi klimatiċi, ambjentali, ekonomiċi u soċjali. |
3.2 |
Il-Kumitat jaqbel mal-analiżi tal-Kummissjoni dwar l-urġenza klimatika biex tittieħed azzjoni fil-qasam tar-rinnovazzjoni tal-akkomodazzjonijiet u bini ieħor, u dwar l-opportunità li l-kriżi tal-COVID-19 tintuża biex dawn jitqiesu mill-ġdid, jiġu żviluppati mill-ġdid u mmodernizzati f'approċċ ambjentali, soċjali u ekonomiku fejn jirbaħ kulħadd. Din hija tabilħaqq opportunità unika biex nieħdu azzjoni fl-istess ħin favur in-newtralità klimatika, l-irkupru u l-koeżjoni soċjali.
Il-Kumitat jixtieq iqajjem il-kwistjoni tad-diversità tal-bini kkonċernat, u b’mod partikolari d-diversità tal-akkomodazzjonijiet li għandhom jiġu rinnovati, li jvarjaw minn djar individwali għal konglomerazzjonijiet kbar ta’ proprjetà immobbli li nbnew matul il-perjodu Sovjetiku jew saħansitra s-subborgi tal-klassi tal-ħaddiedma. F’din id-diversità kbira tad-djar, il-blokok tad-djar tal-Ewropa tal-Lvant, djar antiki ħafna f’ċentri tal-bliet sottovalutati, djar suburbani u djar rurali jistgħu jkunu soġġetti għal prijoritizzazzjoni speċifika. B’rabta mal-fatt li l-istokk tad-djar sar obsolet u jeħtieġ proċessi ta’ rinnovazzjoni kemm biex tittejjeb il-kwalità tal-ħajja taċ-ċittadini kif ukoll biex isiru ċerti aġġornamenti fil-livell tekniku, jeħtieġ li jiġi żgurat l-aċċess għall-finanzjament għaċ-ċittadini peress li bħalissa huwa ostaklu ewlieni għar-rinnovazzjoni. Bl-istess mod, għandha titqies l-aċċessibbiltà għall-persuni b’diżabilità. L-Unjoni Ewropea għandha wkoll taħtaf din l-opportunità ta' azzjoni fuq skala kbira biex issir eqreb taċ-ċittadini tagħha u tat-territorju tagħhom permezz ta' komunikazzjoni adatta. |
3.3 |
Il-Kumitat jappoġġja l-mira proposta li r-rata annwali ta' rinnovazzjoni enerġetika tal-akkomodazzjonijiet u binjiet oħra tiġi rduppjata sal-2030 filwaqt li tiġi stimulata rinnovazzjoni profonda, jiġifieri 35 miljun unità sal-2030, u li dan jinżamm sabiex tinkiseb in-newtralità klimatika fil-livell tal-UE sal-2050. Idealment, dan l-irduppjar għandu jinqabeż u jiġi ttriplikat. |
3.4 |
Il-Kumitat jissottolinja l-ambizzjoni ta' din il-mira, il-projezzjoni tagħha fuq 30 sena, kif ukoll il-ħtieġa ta' azzjoni fil-fond biex ikun hemm uniformità bejn id-dispożizzjonijiet leġiżlattivi u regolatorji eżistenti fil-qasam u l-mekkaniżmi ta' appoġġ finanzjarju għall-unitajiet domestiċi kkonċernati, il-lokaturi soċjali, l-awtoritajiet pubbliċi u proprjetarji ta' bini oħra kkonċernati, li lkoll huma investituri potenzjali li għandhom jiġu persważi jinvestu fit-tul fil-loġika u l-kapaċitajiet tagħhom stess. Ir-rabta li qiegħda tiġi stabbilita mill-Istati Membri u l-awtoritajiet ta' ġestjoni reġjonali tagħhom bejn l-istrument ta' rkupru Next Generation EU u l-politika ta' koeżjoni għall-2021-2027 hija xhieda ta' dan. |
4. Osservazzjonijiet – Prinċipji ewlenin għar-rinnovazzjoni tal-bini sal-2030 u l-2050
4.1 |
Il-Kumitat jaqbel mal-ħtieġa li tiġi adottata strateġija globali u integrata li tinvolvi lill-partijiet ikkonċernati abbażi ta' seba' prinċipji: “l-Effiċjenza Enerġetika Tiġi l-Ewwel”, l-affordabbiltà, id-dekarbonizzazzjoni u l-integrazzjoni tas-sorsi ta' enerġija rinnovabbli, iċ-ċikli tal-ħajja u ċ-ċirkolarità, standards għoljin tas-saħħa u tal-ambjent, l-isfidi tat-tranżizzjonijiet ekoloġiċi u diġitali, u fl-aħħar nett ir-rispett għall-etika u għall-kwalità arkitettonika. |
4.2 |
Il-Kumitat jixtieq jissottolinja l-importanza partikolari li għandha tingħata, f'konformità mal-prinċipju 19 tal-Pilastru Ewropew tad-Drittijiet Soċjali, lill-affordabbiltà tal-akkomodazzjoni u l-investimenti li għandhom isiru mill-unitajiet domestiċi kkonċernati, sew bħala proprjetarji-okkupanti, kerrejja jew koproprjetarji f'koproprjetà degradata, b'mod partikolari fit-trattament tal-binjiet li minnhom taħrab is-sħana u l-ġlieda kontra l-faqar enerġetiku, iżda wkoll mil-lokaturi soċjali li l-livelli ta' kera tagħhom jaqgħu taħt l-obbligi tas-servizz pubbliku tal-affordabbiltà imposti skont il-kompiti partikolari tas-servizz pubbliku assenjati mill-Istati Membri. |
4.3 |
Il-KESE jirrimarka li l-iżolament tal-ħitan tal-kavità u tal-art huma l-aktar miżuri li jippermettu frankar tas-CO2, l-aktar sempliċi biex jitwettqu u l-inqas li jqumu flus. Iżda anke dawn il-miżuri relattivament irħas huma għaljin wisq għal ħafna sidien tad-djar, minkejja l-ispejjeż tal-enerġija aktar baxxi li jiġġeneraw. Huwa għalhekk li l-KESE jirrakkomanda li l-gvernijiet nazzjonali jagħmlu skema ta’ sussidju għal dawn il-miżuri. Il-kalkoli mwettqa fin-Netherlands juru li sussidju ta’ EUR 2 000 għal kull dar huwa biżżejjed biex jitwettqu dawn il-miżuri. Minbarra t-tnaqqis sostanzjali fl-emissjonijiet tas-CO2, skema bħal din tipprovdi wkoll impjiegi sostanzjali fis-settur tal-kostruzzjoni li ntlaqat ħażin mill-COVID-19. L-istess japplika fi Franza permezz tal-espansjoni reċenti fid-djar kollha tal-primjum għar-rinnovazzjoni tad-djar biex tkun iktar effiċjenti fl-użu tal-enerġija “MaPrimeRenov”. |
4.4 |
Il-konklużjonijiet u r-rakkomandazzjonijiet tal-Opinjoni tal-KESE dwar “Ix-xogħol bl-asbestos fir-rinnovazzjoni tal-enerġija” għandhom jiġu segwiti wkoll sabiex tiġi promossa t-tneħħija tal-asbestos matul il-proċessi ta’ rinnovazzjoni tal-enerġija fejn meħtieġ u possibbli (1). |
5. Osservazzjonijiet – Rinnovazzjonijiet aktar rapidi u profondi għal bini ta' kwalità aħjar
5.1 |
Il-Kumitat jaqbel mal-analiżi tal-Kummissjoni tal-ħafna ostakli fid-deċiżjonijiet ta' investiment individwali u l-kumplessità tal-aċċess għall-finanzjament, b'mod partikolari fil-livell lokali – kumplessità li tapplika kemm għall-iskemi nazzjonali kif ukoll għall-fondi strutturali, b'mod partikolari fil-fażi tal-evalwazzjoni ta' proġetti, iżda wkoll b'kunsiderazzjoni taż-żmien biex titħallas l-għajnuna. Din il-kumplessità u dawn id-disfunzjonijiet għandhom jiġu indirizzati b'mod prijoritarju sabiex jintlaħqu l-objettivi stabbiliti, inkluż fil-kuntest tal-implimentazzjoni mill-2021 'l hawn ta' dispożizzjonijiet speċifiċi għall-politika ta' koeżjoni għall-2021-2027. |
5.2 |
Il-Kumitat jieħu nota tal-identifikazzjoni ta' dawn l-ostakli mill-Kummissjoni fil-konsultazzjoni pubblika tagħha u tal-proposti għat-tisħiħ tal-informazzjoni, taċ-ċertezza tad-dritt u tal-inċentivi għall-investiment, ta' finanzjament suffiċjenti u mmirat sew, il-kapaċità li jiġu ppreparati u implimentati proġetti, il-promozzjoni ta' rinnovazzjoni globali u integrata, l-adattament tal-ekosistema għall-iżvilupp sostenibbli u, fl-aħħar nett, l-użu tar-rinnovazzjoni bħala ingranaġġ kontra l-faqar enerġetiku u għall-promozzjoni ta' akkomodazzjoni affordabbli permezz ta' inizjattiva Ewropea speċifika. Dawn il-proposti għandhom jiġu implimentati skont il-prinċipju tas-sempliċità, taħlita stabbilita minn qabel ta' finanzjament addizzjonali li jista' jiġi mmobilizzat mill-awtoritajiet pubbliċi u tal-proporzjonalità tal-kontrolli tal-għajnuna mill-Istat. |
5.3 |
Il-Kumitat jappoġġja l-proposta tal-Kummissjoni li tawtorizza l-Osservatorju Ewropew tal-Istokk tal-Bini biex jiġġestixxi repożitorju Ewropew dwar ir-rendiment tal-bini fl-użu tal-enerġija u jappoġġja t-tfassil ta' inċentivi dwar dan il-qasam. Dan l-Osservatorju għandu jaħdem flimkien mal-Osservatorju tal-Faqar Enerġetiku, li għandu jingħata dinamika ġdida f'dan il-mument. |
5.4 |
Il-Kumitat jirrikonoxxi n-natura partikolari ħafna tas-sitwazzjoni attwali fir-rigward tal-mobilizzazzjoni potenzjali ta' riżorsi Ewropej għar-rinnovazzjoni termali taħt l-istrument ta' rkupru Next Generation EU, minn naħa, u l-politika ta' koeżjoni għall-2021-2027 min-naħa l-oħra. Hemm mhux inqas minn 13-il skema li jistgħu jikkontribwixxu għall-kofinanzjament tar-rinnovazzjoni termali, jew permezz ta' sussidji li ma jitħallsux lura jew permezz ta' self fit-tul b'rati preferenzjali u garanziji pubbliċi. |
5.5 |
Il-Kumitat iqis li din is-sitwazzjoni eċċezzjonali għandha twassal lill-Unjoni Ewropea biex, minbarra li tifformula objettivi kwantitattivi għar-rinnovazzjonijiet, issaħħaħ lill-Istati Membri u l-programmi annwali tagħhom ta' investiment fir-rinnovazzjoni termali, kif ukoll tiżgura evalwazzjoni ta' dawn il-programmi fuq bażi annwali fil-kuntest tas-Semestru Ewropew, billi tiġi stabbilita “governanza ekoloġika” proprja, flimkien mal-governanza ekonomika jew skont il-metodu miftuħ ta' koordinazzjoni. |
5.6 |
Il-Kumitat iqis li din is-sitwazzjoni unika għandha wkoll tintuża biex jiġi miġġieled il-faqar enerġetiku u jinqered permezz tal-prijoritizzazzjoni tiegħu fil-mobilizzazzjoni tal-finanzjament. L-Osservatorju Ewropew tal-Faqar Enerġetiku għandu jiġi msaħħaħ fil-kompiti tiegħu u jkun fil-quċċata ta' network Ewropew ta' osservatorji tal-faqar enerġetiku tal-Istati Membri. |
5.7 |
Madankollu, il-Kumitat jixtieq jagħmel lill-Kummissjoni konxja tad-diffikultà għal investituri potenzjali, b'mod partikolari l-unitajiet domestiċi u l-lokaturi soċjali, biex jgħaqqdu dawn il-mezzi ta' finanzjament differenti u jorbtuhom ma' regolamenti, bażijiet eliġibbli u kontrolli applikabbli differenti. Fid-dawl tal-mira għall-2050, dawn l-iskemi għandhom jingħaqdu b'tali mod li jsiru aktar ċari u aċċessibbli għall-unitajiet domestiċi u l-awtoritajiet pubbliċi fil-mira. |
5.8 |
B'kunsiderazzjoni taż-żmien tal-investiment inkwistjoni u l-mira għall-2050, il-Kumitat jipproponi li l-Kummissjoni tistudja, għal finijiet ta' semplifikazzjoni u ċarezza għall-unitajiet domestiċi Ewropej ikkonċernati, il-fattibbiltà ta' fond ta' investiment speċifiku mill-Bank Ewropew tal-Investiment (BEI), li jiżgura fl-istess ħin l-assistenza teknika, l-għaqda tal-iskemi eżistenti u l-garanzija tal-kontinwità tal-azzjoni sal-2050. |
5.9 |
Il-Kumitat jappoġġja l-approċċ tal-Kummissjoni li f'dan ir-rigward tirrevedi l-iskemi ta' għajnuna mill-Istat li japplikaw għal investimenti fir-rinnovazzjoni termali. Dawn l-iskemi ta' għajnuna mill-Istat għar-rinnovazzjoni termali għandhom jiġu ssemplifikati sabiex ma jikkostitwixxux ostaklu għad-deċiżjonijiet ta' investiment, fid-dawl tan-neċessità assoluta tagħhom. Il-Kumitat jilqa' wkoll id-deċiżjoni tal-Kummissjoni li fl-2021 tevalwa d-Deċiżjoni tal-Kummissjoni 2012/21/UE (2) dwar l-għajnuna mill-Istat taħt il-forma ta' kumpens għas-servizzi pubbliċi. L-għajnuna għar-rinnovazzjoni termali tal-akkomodazzjonijiet soċjali taqa' taħt din l-iskema applikabbli għat-twettiq tal-obbligi tas-servizz pubbliku. |
5.10 |
Il-Kumitat jappoġġja l-proposta tal-Kummissjoni li tniedi inizjattiva Ewropea għal akkomodazzjoni affordabbli billi tiffinanzja 100 proġett ewlieni innovattiv u parteċipattiv li jiffukaw fuq ir-rinnovazzjoni globali ta' nħawi ta' akkomodazzjoni soċjali biex iservu bħala mudell għal żvilupp fuq skala kbira fl-Unjoni Ewropea. Meta wieħed iqis il-kapaċità tal-lokaturi soċjali li jinvestu fil-kwalità tas-servizzi ta' interess ekonomiku ġenerali tagħhom u bl-appoġġ tal-BEI, il-massifikazzjoni tal-operazzjonijiet u l-industrijalizzazzjoni tal-iskemi tar-rinnovazzjoni tal-proprjetà immobbli jwasslu mhux biss għall-ħolqien ta' impjiegi lokali, iżda wkoll għal tnaqqis fl-ispejjeż tar-rinnovazzjoni għall-akkomodazzjonijiet l-oħra u l-bini pubbliku permezz tal-istabbiliment ta' setturi industrijali lokali ġodda. |
5.11 |
Il-Kumitat jipproponi li l-Kummissjoni, abbażi tal-esperjenza ELENA, u bl-appoġġ tal-BEI, tħeġġeġ lill-Istati Membri jorganizzaw servizz pubbliku tal-assistenza teknika għal operazzjonijiet ta' rinnovazzjoni termali, b'mod partikolari għall-unitajiet domestiċi kkonċernati, sabiex jiġu evitati l-prattiki abbużivi tas-solleċitazzjoni u l-frodi li diġà ġew osservati f'xi Stati Membri b'rabta max-xogħlijiet ta’ rinnovazzjoni għall-effiċjenza enerġetika. |
5.12 |
Il-Kumitat jappoġġja bis-sħiħ l-approċċ tal-“Bauhaus Ewropew il-ġdid” li nediet il-President von der Leyen fid-diskors tagħha dwar l-Istat tal-Unjoni u li ġie żviluppat fil-Komunikazzjoni, li se jiġbor flimkien professjonisti minn diversi oqsma biex jaħsbu dwar il-bini tal-futur u jivvintaw mill-ġdid stil ta' ħajja sostenibbli għall-futur. Il-Kumitat jistieden lill-partijiet interessati kollha biex jieħdu sehem fil-konsultazzjoni pubblika mnedija mill-Kummissjoni. |
Brussell, l-24 ta’ Frar 2021.
Christa SCHWENG
Il-President tal-Kumitat Ekonomiku u Soċjali Ewropew
(1) ĠU C 240, 16.7.2019, p. 15.
(2) Deċiżjoni tal-Kummissjoni 2012/21/UE tal-20 ta’ Diċembru 2011 dwar l-applikazzjoni tal-Artikolu 106(2) tat-Trattat dwar il-Funzjonament tal-Unjoni Ewropea għall-għajnuna mill-Istat taħt il-forma ta’ kumpens għas-servizzi pubbliċi mogħti lil ċerti impriżi inkarigati bil-ġestjoni ta’ servizzi ta’ interess ekonomiku ġenerali (ĠU L 7, 11.1.2012, p. 3).