This document is an excerpt from the EUR-Lex website
Document 52019PC0273
Proposal for a COUNCIL DECISION on the position to be taken, on behalf of the European Union, in the 83rd Plenary Meeting of the Group of States against Corruption (GRECO) as regards the participation of the European Union as observer in GRECO
Proposta għal DEĊIŻJONI TAL-KUNSILL dwar il-pożizzjoni li għandha tittieħed, f’isem l-Unjoni Ewropea, fit-83 Laqgħa Plenarja tal-Grupp ta’ Stati kontra l-Korruzzjoni (GRECO) rigward il-parteċipazzjoni tal-Unjoni Ewropea bħala osservatur fil-GRECO
Proposta għal DEĊIŻJONI TAL-KUNSILL dwar il-pożizzjoni li għandha tittieħed, f’isem l-Unjoni Ewropea, fit-83 Laqgħa Plenarja tal-Grupp ta’ Stati kontra l-Korruzzjoni (GRECO) rigward il-parteċipazzjoni tal-Unjoni Ewropea bħala osservatur fil-GRECO
COM/2019/273 final
IL-KUMMISSJONI EWROPEA
Brussell, 6.6.2019
COM(2019) 273 final
2019/0135(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed, f’isem l-Unjoni Ewropea, fit-83 Laqgħa Plenarja tal-Grupp ta’ Stati kontra l-Korruzzjoni (GRECO) rigward il-parteċipazzjoni tal-Unjoni Ewropea bħala osservatur fil-GRECO
MEMORANDUM TA’ SPJEGAZZJONI
1.SUĠĠETT TAL-PROPOSTA
Din il-proposta tikkonċerna d-deċiżjoni li tistabbilixxi l-pożizzjoni li għandha tittieħed f’isem l-Unjoni Ewropea fil-Grupp ta’ Stati kontra l-Korruzzjoni (GRECO) b’rabta mal-adozzjoni prevista ta’ deċiżjoni li tikkonċerna l-istatus ta’ osservatur tal-Unjoni Ewropea.
2.KUNTEST TAL-PROPOSTA
Il-GRECO ġie stabbilit fl-1999 mill-Kunsill tal-Ewropa biex jimmonitorja l-konformità tal-Istati mal-istandards kontra l-korruzzjoni stabbiliti fil-Konvenzjoni tal-Liġi Kriminali dwar il-Korruzzjoni u l-Konvenzjoni tal-Liġi Ċivili dwar il-Korruzzjoni. L-objettiv tal-GRECO huwa li jtejjeb il-kapaċità tal-membri tiegħu li jiġġieldu l-korruzzjoni billi jimmonitorjaw il-konformità tagħhom mal-istandards kontra l-korruzzjoni tal-Kunsill tal-Ewropa permezz ta’ proċess dinamiku ta’ evalwazzjoni reċiproka u pressjoni mill-pari. Permezz ta’ sistema ta’ evalwazzjonijiet, dan jgħin biex jiġu identifikati nuqqasijiet fil-politiki nazzjonali kontra l-korruzzjoni, filwaqt li jwassal għal riformi leġiżlattivi, istituzzjonali u prattiċi meħtieġa.
Attwalment, il-GRECO għandu 49 membru sħaħ 1 u 10 osservaturi 2 .
Il-parteċipazzjoni tal-UE fil-GRECO kienet prijorità għall-kooperazzjoni bejn l-Unjoni Ewropea u l-Kunsill tal-Ewropa. Filwaqt li l-UE qed tikkoopera mal-Kunsill tal-Ewropa abbażi ta’ Memorandum ta’ Qbil li ġie miftiehem fl-2007 3 , GRECO huwa wieħed mill-ftit korpi tal-Kunsill tal-Ewropa li miegħu l-UE ma għandha l-ebda qafas legali dedikat ta’ kooperazzjoni. L-UE mhijiex preżenti fil-laqgħat tal-GRECO, u l-opportunitajiet għall-iskambju tal-fehmiet mal-GRECO u l-membri tiegħu u l-kooperazzjoni dwar kwistjonijiet ta’ interess komuni fil-qasam tal-istat tad-dritt u l-ġlieda kontra l-korruzzjoni huma għalhekk limitati ħafna.
Fl-2011, il-Kummissjoni ddefinixxiet l-objettivi ewlenin ta’ kooperazzjoni msaħħa bejn l-UE u l-GRECO u analizzat il-modi possibbli biex l-UE tipparteċipa fil-ħidma tal-GRECO kif ukoll il-benefiċċji li dan iġib miegħu 4 . Dan kien segwit fl-2012 b’Komunikazzjoni tal-Kummissjoni 5 li tistabbilixxi approċċ f’żewġ fażijiet għall-adeżjoni tal-UE mal-GRECO li kien jimplika status 6 ta’ parteċipant sħiħ fl-ewwel stadju u status ta’ sħubija sħiħa fit-tieni stadju.
Il-Parlament Ewropew esprima appoġġ kontinwu għall-parteċipazzjoni tal-UE fil-GRECO permezz ta’ diversi rapporti u riżoluzzjonijiet, bħar-riżoluzzjoni tal-2016 dwar il-ġlieda kontra l-korruzzjoni u s-segwitu tar-riżoluzzjoni tal-2015 dwar il-kriminalità organizzata, il-korruzzjoni u l-ħasil tal-flus, kif ukoll f’dibattitu fil-Plenarja fl-2018.
Fl-20 ta’ Marzu 2019, id-Direttur Eżekuttiv tal-GRECO bagħat ittra lill-Presidenza tal-Kunsill, li fiha ssuġġerixxa li l-UE ssir osservatur fil-GRECO. L-istatus ta’ osservatur jippermetti lill-UE tipparteċipa fil-laqgħat tal-GRECO u jkollha aċċess għad-dokumenti kollha diskussi. Bħala osservatur, l-UE ma jkollhiex id-dritt li tivvota, ma tkunx soġġetta għal evalwazzjoni u ma tiħux pożizzjoni formali fi proċessi ta’ evalwazzjoni u lanqas ma tipparteċipa f’missjonijiet ta’ evalwazzjoni. Ma hemm l-ebda kontribuzzjoni finanzjarja mitluba mill-osservaturi. Ta’ min jinnota li r-regoli huma l-istess għal kull osservatur.
Skont l-Artikolu 220 tat-TFUE, l-Unjoni tistabbilixxi l-forom kollha xierqa ta' koperazzjoni mal-organi tan-Nazzjonijiet Uniti u l-aġenziji speċjalizzati tagħha, mal-Kunsill tal-Ewropa, mal-Organizzazzjoni għas-Sigurtà u l-Koperazzjoni fl-Ewropa u mal-Organizzazzjoni għall-Koperazzjoni u l-Iżvilupp Ekonomiku. Ir-Rappreżentant Għoli tal-Unjoni għall-Affarijiet Barranin u l-Politika ta' Sigurtà u l-Kummissjoni għandhom ikunu responsabbli għall-implimentazzjoni ta' dan l-Artikolu. Il-Kummissjoni infurmat uffiċjalment lill-Parlament Ewropew u lill-Kunsill bl-intenzjoni tagħha li titlob lill-GRECO li l-Unjoni Ewropea tingħata l-istatus ta’ osservatur. Il-Kunsill esprima l-appoġġ tiegħu biex l-Unjoni ssir osservatur fil-GRECO fil-laqgħa tiegħu tas-6 ta’ Ġunju 2019.
Fis-6 ta’ Ġunju 2019, il-Kummissjoni ppreżentat talba lis-Segretarju Ġenerali tal-Kunsill tal-Ewropa biex issir osservatur 7 .
L-UE li issa qed tfittex li ssir osservatur fil-GRECO ma tipprekludix forom oħra possibbli ta’ parteċipazzjoni fil-futur, inkluża s-sħubija sħiħa.
Huwa probabbli li l-Plenarja tal-GRECO tikkunsidra t-talba tal-UE fil-laqgħa tagħha tas-17–21 ta’ Ġunju 2019. Hija għandha tiddeċiedi b’unanimità. Jekk ma tintlaħaqx l-unanimità fil-Plenarja, il-kwistjoni tista’ tiġi riferuta lill-Kumitat tal-Ministri li jiddeċiedi b’maġġoranza ta’ żewġ terzi tar-rappreżentanti kollha tiegħu. L-Istati Membri kollha tal-UE huma membri tal-GRECO u se jipparteċipaw fid-deċiżjoni li għandha tittieħed dwar l-għoti tal-istatus ta’ osservatur tal-UE fil-GRECO.
L-Istati Membri huma obbligati li jappoġġjaw it-talba skont il-prinċipju ta’ kooperazzjoni leali. Madankollu, il-Kummissjoni ddeċidiet f’din l-okkażjoni li tagħmel proposta bbażata fuq l-Artikolu 218(9) tat-TFUE. Dan se jiżgura saħasitra b’aktar ċertezza li l-Istati Membri tal-UE jitkellmu b’vuċi waħda b’appoġġ tal-UE li tingħata l-istatus ta’ osservatur fil-Laqgħa Plenarja tal-GRECO u, jekk ikun meħtieġ, waqt il-laqgħa sussegwenti tal-Kumitat tal-Ministri.
3.BAŻI ĠURIDIKA
L-objettiv ewlieni tal-GRECOhuwa li jtejjeb il-kapaċità tal-membri tiegħu biex jiġġieldu l-korruzzjoni. Jenħtieġ għalhekk li l-bażi ġuridika tad-deċiżjoni proposta tkun l-Artikolu 83 tat-TFUE, flimkien mal-Artikolu 218(9) tat-TFUE.
2019/0135 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed, f’isem l-Unjoni Ewropea, fit-83 Laqgħa Plenarja tal-Grupp ta’ Stati kontra l-Korruzzjoni (GRECO) rigward il-parteċipazzjoni tal-Unjoni Ewropea bħala osservatur fil-GRECO
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 83, flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)Ir-Riżoluzzjoni Statutorja tal-Kunsill tal-Ewropa Nru (93)28 tipprevedi l-possibilità li Stati mhux membri kif ukoll organizzazzjonijiet internazzjonali jsiru osservaturi fi ftehimiet parzjali u estiżi bħal dak li jistabbilixxi l-GRECO,
(2)Fis-6 ta’ Ġunju 2019, il-Kummissjoni ppreżentat talba lis-Segretarju Ġenerali tal-Kunsill tal-Ewropa għall-parteċipazzjoni tal-Unjoni fil-GRECO bħala osservatur,
(3)Il-parteċipazzjoni tal-Unjoni Ewropea fil-GRECO bħala osservatur ma tipprekludix il-parteċipazzjoni futura possibbli tagħha fil-GRECO bħala membru sħiħ,
(4)L-Istati Membri kollha tal-Unjoni Ewropea huma membri tal-GRECO,
(5)Huwa mistenni li l-Plenarja tal-GRECO tintalab tiddeċiedi dwar l-istatus ta’ osservatur tal-Unjoni Ewropea fit-83 Laqgħa Plenarja tal-GRECO (Strasburgu, 17–21 ta’ Ġunju 2019),
(6)Jekk din id-deċiżjoni ma titteħidx fit-83 Laqgħa Plenarja tal-GRECO tas-17–21 ta’ Ġunju 2019 jew fil-Laqgħa Plenarja sussegwenti tal-GRECO, jenħtieġ li l-Istati Membri tal-Unjoni Ewropea juru l-appoġġ tagħhom biex il-kwistjoni titressaq quddiem il-Kumitat tal-Ministri, fejn huma mistennija jappoġġjaw l-ammissjoni tal-UE bħala osservatur fil-GRECO,
(7)Għalhekk, huwa xieraq li tiġi stabbilita l-pożizzjoni li għandha tittieħed f’isem l-Unjoni Ewropea rigward l-adozzjoni tad-deċiżjoni dwar l-istatus ta’ osservatur tal-Unjoni Ewropea,
(8)Din id-deċiżjoni hija mingħajr preġudizzju għall-prinċipju ta’ kooperazzjoni sinċiera u l-obbligu diġà eżistenti għall-Istati Membri kollha biex jappoġġjaw it-talba għall-istatus ta’ osservatur tal-UE,
(9)[F'konformità mal-Artikolu 3 tal-Protokoll Nru 21 dwar il-pożizzjoni tar-Renju Unit u l-Irlanda rigward l-ispazju ta' libertà, sigurtà u ġustizzja, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, dawn l-Istati Membri nnotifikaw ix-xewqa tagħhom li jieħdu sehem fl-adozzjoni u l-applikazzjoni ta' din id-Deċiżjoni,]
(10)[F'konformità mal-Artikoli 1 u 2 tal-Protokoll Nru 21 dwar il-pożizzjoni tar-Renju Unit u tal-Irlanda rigward l-ispazju ta' libertà, sigurtà u ġustizzja, anness mat-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea, u mingħajr preġudizzju għall-Artikolu 4 ta' dan il-Protokoll, dawn l-Istati Membri mhumiex qed jieħdu sehem fl-adozzjoni u l-applikazzjoni ta' din id-Deċiżjoni u mhumiex marbutin biha jew soġġetti għall-applikazzjoni tagħha,]
(11)[F'konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka mhijiex qed tieħu sehem fl-adozzjoni ta' din id-Deċiżjoni u mhijiex marbuta biha jew soġġetta għall-applikazzjoni tagħha,]
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni Ewropea fit-83 Laqgħa Plenarja tal-Grupp ta’ Stati kontra l-Korruzzjoni (GRECO) tas-17–21 ta’ Ġunju 2019 jew, jekk meħtieġ, fil-Laqgħa Plenarja sussegwenti, għandha tkun din li ġejja:
L-Istati Membri tal-Unjoni Ewropea għandhom jappoġġaw l-adozzjoni tad-deċiżjoni li l-Unjoni Ewropea ssir osservatur fil-GRECO.
Jekk id-deċiżjoni ma titteħidx fit-83 Laqgħa Plenarja tal-GRECO tas-17–21 ta’ Ġunju 2019 jew fil-Laqgħa Plenarja sussegwenti tal-GRECO, l-Istati Membri tal-Unjoni Ewropea għandhom jappoġġaw li l-kwistjoni tiġi riferuta lill-Kumitat tal-Ministri, fejn huma għandhom isostnu l-ammissjoni tal-UE bħala osservatur mal-GRECO.
Artikolu 2
Din id-Deċiżjoni hija indirizzata lill-Istati Membri.
Magħmul fi Brussell,
Għall-Kunsill
Il-President
Erba’ Korpi tal-Kunsill tal-Ewropa, jiġifieri l-Assemblea Parlamentari, il-Kumitat Ewropew dwar il-Kooperazzjoni Legali (CDCJ), il-Kumitat Ewropew dwar il-Problemi ta’ Kriminalità (CDPC), u l-Bank ta’ Żvilupp tal-Kunsill tal-Ewropa (CEB); L-Organizzazzjoni għall-Kooperazzjoni u l-Iżvilupp Ekonomiku (OECD); in-Nazzjonijiet Uniti, rappreżentati mill-Uffiċċju tan-Nazzjonijiet Uniti kontra d-Droga u l-Kriminalità (UNODC), l-Uffiċċju għall-Istituzzjonijiet Demokratiċi u d-Drittijiet tal-Bniedem (ODIHR) tal-Organizzazzjoni għas-Sigurtà u l-Kooperazzjoni fl-Ewropa (OSKE), l-Akkademja Internazzjonali Kontra l-Korruzzjoni (IACA); l-Istitut Internazzjonali għad-Demokrazija u l-Għajnuna Elettorali (IDEA), u l-Organizzazzjoni tal-Istati Amerikani (OAS).