This document is an excerpt from the EUR-Lex website
Document 52019PC0221
Proposal for a DECISION OF THE EUROPEAN PARLIAMENT AND OF THE COUNCIL empowering Germany to amend its existing bilateral road transport agreement with Switzerland with a view to authorising cabotage operations in the course of international road passenger transport services by coach and bus in the border regions between the two countries
Proposta għal DEĊIŻJONI TAL-PARLAMENT EWROPEW U TAL-KUNSILL li l-Ġermanja tingħata s-setgħa li temenda l-ftehim bilaterali eżistenti tagħha dwar it-trasport bit-triq mal-Iżvizzera bil-għan li tawtorizza l-operazzjonijiet ta' kabotaġġ waqt is-servizzi internazzjonali tat-trasport bit-triq tal-passiġġieri bil-kowċ u bix-xarabank fir-reġjuni tal-fruntiera bejn iż-żewġ pajjiżi
Proposta għal DEĊIŻJONI TAL-PARLAMENT EWROPEW U TAL-KUNSILL li l-Ġermanja tingħata s-setgħa li temenda l-ftehim bilaterali eżistenti tagħha dwar it-trasport bit-triq mal-Iżvizzera bil-għan li tawtorizza l-operazzjonijiet ta' kabotaġġ waqt is-servizzi internazzjonali tat-trasport bit-triq tal-passiġġieri bil-kowċ u bix-xarabank fir-reġjuni tal-fruntiera bejn iż-żewġ pajjiżi
COM/2019/221 final
IL-KUMMISSJONI EWROPEA
Brussell, 13.5.2019
COM(2019) 221 final
2019/0107(COD)
Proposta għal
DEĊIŻJONI TAL-PARLAMENT EWROPEW U TAL-KUNSILL
li l-Ġermanja tingħata s-setgħa li temenda l-ftehim bilaterali eżistenti tagħha dwar it-trasport bit-triq mal-Iżvizzera bil-għan li tawtorizza l-operazzjonijiet ta' kabotaġġ waqt is-servizzi internazzjonali tat-trasport bit-triq tal-passiġġieri bil-kowċ u bix-xarabank fir-reġjuni tal-fruntiera bejn iż-żewġ pajjiżi
MEMORANDUM TA’ SPJEGAZZJONI
1.KUNTEST TAL-PROPOSTA
•Ir-raġunijiet għall-proposta u l-objettivi tagħha
Dwar is-suġġett
Ir-reġjuni tal-fruntiera tal-Ġermanja u tal-Iżvizzera huma integrati mill-qrib. Ħafna Ġermaniżi jivvjaġġaw biex jaħdmu fl-Iżvizzera u viċi versa u fit-toroq hemm traffiku vibranti ta' passiġġieri transkonfinali. Huma offruti għadd ta' servizzi tax-xarabanks u tal-kowċis li jaqsmu l-fruntiera u b'hekk jgħaqqdu r-reġjuni tal-fruntiera taż-żewġ pajjiżi.
Il-ġarr ta' passiġġieri u ta' oġġetti mit-toroq fiż-żewġ direzzjonijiet bejn l-Iżvizzera u l-UE huwa rregolat mill-Ftehim dwar it-trasport fuq l-art bejn l-UE u l-Iżvizzera 1 (minn hawn 'il quddiem "Ftehim tal-UE").
Skont l-Artikolu 20(1) tal-Ftehim tal-UE, "[i]t-trasport bejn żewġ posizzjonijiet li jinsabu fit-territorju ta' l-istess Parti Kontraenti bit-trasportaturi stabbiliti fit-territorju tal-Parti Kontraenti l-oħra mhux awtorizzar taħt dan il-Ftehim". Dan ifisser li t-trasportaturi li joperaw is-servizzi tal-passiġġieri li jaqsmu l-fruntiera jistgħu jġorru biss passiġġieri bejn il-fruntieri jew fi ħdan it-territorju tal-Parti Kontraenti li huma stabbiliti fih. L-operaturi tax-xarabanks u tal-kowċis stabbiliti fl-Iżvizzera ma jistgħux iġorru passiġġieri bejn żewġ postijiet fuq in-naħa Ġermaniża tal-fruntiera u l-operaturi stabbiliti fl-UE ma jistgħux iġorru passiġġieri bejn żewġ postijiet fuq in-naħa Żvizzera tal-fruntiera.
L-Artikolu 20(2) tal-Ftehim tal-UE jippermetti li jibqgħu jiġu eżerċitati d-drittijiet diġà eżistenti skont ftehimiet bilaterali konklużi bejn Stati Membri individwali tal-UE u l-Iżvizzera li kienu fis-seħħ fiż-żmien meta ġie konkluż il-Ftehim tal-UE, dment li ma jkun hemm l-ebda diskriminazzjoni bejn it-trasportaturi tal-UE u l-ebda tfixkil tal-kompetizzjoni. Għalhekk, il-kabotaġġ fit-trasport tal-passiġġieri bil-kowċ u bix-xarabank huwa possibbli f'relazzjonijiet mal-Iżvizzera fil-każ li ftehim bejn Stat Membru tal-UE u l-Iżvizzera li daħal fis-seħħ fil-21 ta' Ġunju 1999 ikun ippreveda dan. Fil-prattika, l-ebda wieħed mill-ftehimiet bilaterali bejn l-Istati Membri u l-Iżvizzera li kienu fis-seħħ f'dak iż-żmien ma ppreveda drittijiet tal-kabotaġġ għat-trasport tal-passiġġieri bil-kowċ u bix-xarabank. 2
Permezz ta' ittra datata l-11 ta' Mejju 2017, il-Ġermanja informat lill-Kummissjoni li hija tapprezza jekk l-Unjoni kellha tagħtiha s-setgħa skont l-Artikolu 2(1) tat-TFUE biex temenda l-ftehim bilaterali tagħha dwar it-trasport bit-triq mal-Iżvizzera tal-1953 3 bil-għan li tawtorizza operazzjonijiet ta' kabotaġġ waqt l-għoti ta' servizzi tat-trasport tal-passiġġieri bil-kowċ u bix-xarabank fir-reġjun tal-fruntiera bejn iż-żewġ pajjiżi. Fil-laqgħa ta' Ġunju 2018 tal-Kumitat tat-Trasport Intern bejn l-UE u l-Iżvizzera, stabbilit mill-Ftehim tal-UE, l-Iżvizzera informat lill-Kummissjoni li hija kienet interessata wkoll li temenda dan il-ftehim għal dak il-għan.
Il-kabotaġġ fit-trasport tal-passiġġieri bil-kowċ u bix-xarabank jista' jtejjeb l-effiċjenza tal-operazzjonijiet tat-trasport peress li jippermetti żieda fil-fattur tat-tagħbija tal-vettura. Għalhekk, ġeneralment l-UE hija favur il-ftuħ tas-suq tal-kabotaġġ, kif għamlet ġewwa l-UE skont ir-Regolament (KE) Nru 1073/2009 dwar regoli komuni għall-aċċess għas-suq internazzjonali tas-servizzi tal-kowċ u x-xarabank 4 (minn hawn 'il quddiem "Ir-Regolament (KE) Nru 1073/2009"). L-awtorizzazzjoni ta' operazzjonijiet ta' kabotaġġ fil-kuntest tal-għoti ta' servizzi internazzjonali tat-trasport tal-passiġġieri bil-kowċ u bix-xarabank fir-reġjuni tal-fruntiera bejn il-Ġermanja u l-Iżvizzera tippermetti lit-trasportaturi involuti jsiru aktar kompetittivi u effiċjenti.
Dwar il-kompetenza tal-UE
L-Artikolu 3(2) tat-Trattat dwar il-Funzjonament tal-Unjoni Ewropea (TFUE) jistabbilixxi li "[l]-Unjoni għandha wkoll kompetenza esklużiva li tikkonkludi ftehim internazzjonali meta l-konklużjoni tiegħu tkun prevista f'att leġislattiv ta' l-Unjoni, jew tkun meħtieġa sabiex l-Unjoni tkun tista' teżerċita l-kompetenza interna tagħha, jew sal-punt fejn il-konklużjoni tiegħu tista' tolqot xi regoli komuni jew tbiddel il-kamp ta' l-applikazzjoni tagħhom".
Skont ir-Regolament (KE) Nru 1073/2009, l-operazzjonijiet ta' kabotaġġ fi ħdan l-Unjoni jistgħu jitwettqu, taħt ċerti kundizzjonijiet, esklużivament mit-trasportaturi li għandhom liċenzja tal-Komunità. Impenji internazzjonali li jippermettu trasportaturi oħra, b'mod partikolari trasportaturi minn pajjiżi terzi, biex iwettqu tali operazzjonijiet jaffettwaw ir-Regolament imsemmi hawn fuq, skont it-tifsira tal-Artikolu 3(2) tat-TFUE. 5
Barra minn hekk, tali impenji internazzjonali jaffettwaw ukoll il-Ftehim tal-UE, b'mod partikolari l-Artikolu 20 tiegħu. Dawn mhumiex awtorizzati mill-paragrafu 1 ta' dak l-Artikolu, ħlief kif stabbilit fil-paragrafu 2 tiegħu.
Konsegwentement, l-impenji bħal dawk maħsuba mill-Ġermanja jaqgħu fil-kamp ta' applikazzjoni tal-kompetenza esklużiva tal-Unjoni. Madankollu, skont l-Artikolu 2(1) tat-TFUE, l-Unjoni tista' tagħti s-setgħa lill-Istati Membri biex jaġixxu f'oqsma fejn hija għandha kompetenza esklużiva.
L-għan ta' din il-proposta huwa li l-Ġermanja tingħata s-setgħa li temenda l-ftehim bilaterali eżistenti tagħha dwar it-trasport bit-triq mal-Iżvizzera bil-għan li tawtorizza l-operazzjonijiet ta' kabotaġġ waqt is-servizzi internazzjonali tat-trasport bit-triq tal-passiġġieri bil-kowċ u bix-xarabank fir-reġjuni tal-fruntiera rispettivi taż-żewġ pajjiżi.
Dwar il-proċedura
L-operazzjonijiet ta' kabotaġġ fi ħdan l-Unjoni minn trasportaturi ta' pajjiż terz, li ma jkollhomx liċenzja tal-Komunità skont ir-Regolament (KE) Nru 1073/2009, jaffettwaw il-funzjonament tas-suq intern għas-servizzi tal-kowċ u x-xarabank, kif stabbilit mil-leġiżlatur tal-Unjoni permezz tar-Regolament (KE) Nru 1073/2009. Għalhekk huwa meħtieġ li kwalunkwe għoti tas-setgħa skont l-Artikolu 2(1) tat-TFUE jingħata mil-leġiżlatur tal-Unjoni, skont il-proċedura leġiżlattiva msemmija fl-Artikolu 91 tat-TFUE.
•Konsistenza ma’ dispożizzjonijiet ta’ politika eżistenti fil-qasam ta’ politika
Attwalment, il-Ftehim tal-UE ma jawtorizza l-ebda operazzjoni ta' kabotaġġ fit-trasport bit-triq tal-passiġġieri bil-kowċ u bix-xarabank. Madankollu, l-Artikolu 20(2) tal-Ftehim tal-UE jippermetti speċifikament l-eżerċizzju kontinwu ta' drittijiet ta' kabotaġġ diġà eżistenti dment li ma jkun hemm l-ebda diskriminazzjoni bejn it-trasportaturi tal-UE u ma jkun hemm l-ebda tfixkil tal-kompetizzjoni. Ftehim bejn il-Ġermanja u l-Iżvizzera li jawtorizza l-operazzjonijiet ta' kabotaġġ waqt l-għoti ta' servizzi internazzjonali tat-trasport tal-passiġġieri bil-kowċ u bix-xarabank ma jbiddilx id-drittijiet tal-Iżvizzera skont il-Ftehim tal-UE. Barra minn hekk, emenda tal-ftehim bilaterali diġà eżistenti limitat għall-kabotaġġ fir-reġjuni tal-fruntiera rispettivi u, fir-rigward ta' nondiskriminazzjoni u kompetizzjoni mhux imxekkla, soġġetta għal kundizzjonijiet identiċi għal dawk stabbiliti fl-Artikolu 20(2) tal-Ftehim tal-UE, hija konformi mal-politika sottostanti għall-eċċezzjoni stabbilita f'dik id-dispożizzjoni.
Fl-UE, il-kabotaġġ fit-trasport bit-triq tal-passiġġieri bil-kowċ u bix-xarabank huwa permess skont id-dispożizzjonijiet tar-Regolament (KE) Nru 1073/2009. L-Artikolu 15 ta' dak ir-Regolament jawtorizza l-operazzjonijiet ta' kabotaġġ fi ħdan l-UE: (1) għal servizzi okkażjonali, (2) għal servizzi regolari speċjali dment li dawn ikunu koperti minn kuntratt konkluż bejn l-organizzatur u t-trasportatur, u (3) għal servizzi regolari waqt servizz internazzjonali regolari ħlief għas-servizzi tat-trasport li jissodisfaw il-ħtiġijiet ta' ċentru urban jew il-ħtiġijiet ta' konurbazzjoni jew tat-trasport bejnu u bejn iż-żoni tal-madwar. L-operazzjoni ta' dak ir-Regolament se tkun affettwata mill-emenda tal-ftehim bilaterali dwar it-trasport bit-triq kif mitlub mill-Ġermanja, iżda fil-każ li l-awtorizzazzjoni tingħata taħt il-kundizzjonijiet deskritti hawn fuq, l-effett ikun biżżejjed limitat.
•Konsistenza ma’ politiki oħrajn tal-Unjoni
Emenda tal-ftehim bilaterali eżistenti dwar it-trasport bit-triq bejn il-Ġermanja u l-Iżvizzera bil-għan li jiġu awtorizzati l-operazzjonijiet ta' kabotaġġ waqt l-għoti ta' servizzi internazzjonali tat-trasport tal-passiġġieri bil-kowċ u bix-xarabank fir-reġjuni tal-fruntiera rispettivi taż-żewġ pajjiżi ma tkunx inkonsistenti ma' kwalunkwe politika oħra tal-Unjoni.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
Il-bażi ġuridika għal din il-proposta hija l-Artikolu 2(1) u 91 tat-TFUE.
•Sussidjarjetà (għall-kompetenza mhux esklużiva)
Il-proposta taqa’ taħt il-kompetenza esklużiva tal-Unjoni.
•Proporzjonalità
L-uniku objettiv ta' din il-proposta huwa li l-Ġermanja tingħata s-setgħa, skont l-Artikolu 2(1) tat-TFUE, li temenda l-ftehim bilaterali eżistenti tagħha dwar it-trasport bit-triq mal-Iżvizzera bil-għan li tawtorizza l-operazzjonijiet ta' kabotaġġ waqt l-għoti ta' servizzi internazzjonali tat-trasport tal-passiġġieri bil-kowċ u bix-xarabank fir-reġjuni tal-fruntiera bejn iż-żewġ pajjiżi. Konsegwentement, id-Deċiżjoni proposta tal-Parlament Ewropew u tal-Kunsill ma tmurx lil hinn minn dak li huwa meħtieġ biex jintlaħaq dan l-objettiv.
•L-għażla tal-istrument
L-operazzjonijiet ta' kabotaġġ fi ħdan l-Unjoni minn trasportaturi ta' pajjiż terz, li ma jkollhomx liċenzja tal-Komunità skont ir-Regolament (KE) Nru 1073/2009, jaffettwaw il-funzjonament tas-suq intern għas-servizzi tal-kowċ u x-xarabank, kif stabbilit mil-leġiżlatur tal-Unjoni permezz tar-Regolament (KE) Nru 1073/2009. Għalhekk huwa meħtieġ li kwalunkwe għoti tas-setgħa skont l-Artikolu 2(1) tat-TFUE jingħata mil-leġiżlatur tal-Unjoni, skont il-proċedura leġiżlattiva msemmija fl-Artikolu 91 tat-TFUE. L-att propost, li min-natura tiegħu huwa setgħa individwali, għandu jiġi adottat b'reazzjoni għal talba korrispondenti magħmula mill-Ġermanja. Għalhekk, dan għandu jieħu l-forma ta' deċiżjoni, indirizzata lill-Ġermanja. Konsegwentement, id-Deċiżjoni proposta tal-Parlament Ewropew u tal-Kunsill tirrappreżenta strument adegwat biex, skont l-Artikolu 2(1) tat-TFUE, il-Ġermanja tingħata s-setgħa biex taġixxi f'din il-kwistjoni.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Konsultazzjonijiet ma’ partijiet ikkonċernati
Din il-proposta hija bbażata fuq talba magħmula mill-Ġermanja u tirrigwarda biss lil dan l-Istat Membru. Talba simili ġiet riċevuta mill-Italja li hija soġġetta għal proċedura parallela.
4.IMPLIKAZZJONIJIET BAĠITARJI
Din il-proposta ma għandha l-ebda impatt fuq il-baġit tal-Unjoni.
2019/0107 (COD)
Proposta għal
DEĊIŻJONI TAL-PARLAMENT EWROPEW U TAL-KUNSILL
li l-Ġermanja tingħata s-setgħa li temenda l-ftehim bilaterali eżistenti tagħha dwar it-trasport bit-triq mal-Iżvizzera bil-għan li tawtorizza l-operazzjonijiet ta' kabotaġġ waqt is-servizzi internazzjonali tat-trasport bit-triq tal-passiġġieri bil-kowċ u bix-xarabank fir-reġjuni tal-fruntiera bejn iż-żewġ pajjiżi
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikoli 2(1) u 91 tiegħu,
Wara li kkunsidraw il-proposta mill-Kummissjoni Ewropea,
Wara t-trasmissjoni tal-abbozz tal-att leġiżlattiv lill-Parlamenti nazzjonali,
Wara li kkunsidraw l-opinjoni tal-Kumitat Ekonomiku u Soċjali Ewropew 6 ,
Wara li kkunsidraw l-opinjoni tal-Kumitat tar-Reġjuni 7 ,
Waqt li jaġixxu skont il-proċedura ordinarja leġiżlattiva,
Billi:
(1)Skont l-Artikolu 20(1) tal-Ftehim bejn il-Komunità Ewropea u l-Konfederazzjoni Żvizzera dwar it-Trasport ta' Merkanzija u Passiġġieri permezz tal-Linji tal-Ferroviji u tat-Triq 8 (minn hawn 'il quddiem "il-Ftehim tal-UE"), it-trasport tal-passiġġieri bil-kowċ u bix-xarabank bejn żewġ postijiet li jinsabu fit-territorju tal-istess Parti Kontraenti minn trasportaturi stabbiliti fit-territorju tal-Parti Kontraenti l-oħra, magħruf bħala kabotaġġ, mhux awtorizzat.
(2)Skont l-Artikolu 20(2) tal-Ftehim tal-UE, id-drittijiet ta' kabotaġġ eżistenti skont il-ftehimiet bilaterali konklużi bejn l-Istati Membri tal-Unjoni u l-Iżvizzera, li kienu fis-seħħ meta ġie konkluż il-Ftehim tal-UE, jiġifieri fil-21 ta' Ġunju 1999, jistgħu jibqgħu jiġu eżerċitati dment li ma jkun hemm l-ebda diskriminazzjoni bejn it-trasportaturi stabbiliti fl-Unjoni u l-ebda tfixkil tal-kompetizzjoni. Il-ftehim bilaterali dwar it-trasport bit-triq bejn il-Ġermanja u l-Iżvizzera tal-1953 9 ma jawtorizzax l-operazzjonijiet ta' kabotaġġ waqt l-għoti ta' servizzi tat-trasport tal-passiġġieri bil-kowċ u bix-xarabank bejn iż-żewġ pajjiżi. Għalhekk, id-dritt li jitwettqu tali operazzjonijiet bħala riżultat ta' emenda possibbli għall-ftehim mhux fost id-drittijiet koperti bl-Artikolu 20(2) tal-Ftehim tal-UE.
(3)Impenji internazzjonali li jippermettu lit-trasportaturi mill-Iżvizzera jwettqu operazzjonijiet ta' kabotaġġ fi ħdan l-Unjoni jistgħu jaffettwaw l-Artikolu 20 tal-Ftehim tal-UE, sal-punt li din id-dispożizzjoni ma tawtorizzax tali operazzjonijiet.
(4)Barra minn hekk, skont ir-Regolament (KE) Nru 1073/2009 10 , l-operazzjonijiet ta' kabotaġġ fi ħdan l-Unjoni jistgħu jitwettqu, taħt ċerti kundizzjonijiet, esklużivament mit-trasportaturi li għandhom liċenzja tal-Komunità. Impenji internazzjonali li jippermettu lit-trasportaturi minn pajjiżi terzi, li ma għandhomx tali liċenzja, iwettqu operazzjonijiet ta' dak it-tip jistgħu jaffettwaw dak ir-Regolament.
(5)Konsegwentement, tali impenji jaqgħu taħt il-kompetenza esterna esklużiva tal-Unjoni. L-Istati Membri jistgħu jinnegozjaw jew jidħlu f'tali impenji biss jekk huma jingħataw is-setgħa mill-Unjoni biex jagħmlu dan skont l-Artikolu 2(1) tat-TFUE.
(6)L-operazzjonijiet ta' kabotaġġ fi ħdan l-Unjoni minn trasportaturi ta' pajjiż terz, li ma jkollhomx liċenzja tal-Komunità skont ir-Regolament (KE) Nru 1073/2009, jaffettwaw il-funzjonament tas-suq intern għas-servizzi tal-kowċ u x-xarabank, kif stabbilit mil-leġiżlatur tal-Unjoni permezz tar-Regolament (KE) Nru 1073/2009. Għalhekk huwa meħtieġ li kwalunkwe għoti tas-setgħa skont l-Artikolu 2(1) tat-TFUE jingħata mil-leġiżlatur tal-Unjoni, skont il-proċedura leġiżlattiva msemmija fl-Artikolu 91 tat-TFUE.
(7)Permezz ta' ittra datata l-11 ta' Mejju 2017, il-Ġermanja talbet li l-Unjoni tagħtiha s-setgħa li temenda l-ftehim tagħha dwar it-trasport bit-triq mal-Iżvizzera bil-għan li tawtorizza l-operazzjonijiet ta' kabotaġġ waqt is-servizzi tat-trasport tal-passiġġieri bil-kowċ u bix-xarabank fir-reġjuni tal-fruntiera rispettivi taż-żewġ pajjiżi.
(8)L-operazzjonijiet ta' kabotaġġ jippermettu żieda fil-fattur tat-tagħbija tal-vetturi li żżid l-effiċjenza ekonomika tas-servizzi. Għalhekk huwa xieraq li jiġu awtorizzati tali operazzjonijiet waqt l-għoti ta' servizzi internazzjonali tat-trasport tal-passiġġieri bil-kowċ u bix-xarabank fir-reġjuni tal-fruntiera rispettivi tal-Iżvizzera u tal-Ġermanja. Dan jista' jsaħħaħ b'mod ulterjuri l-integrazzjoni mill-qrib ta' dawn ir-reġjuni tal-fruntiera.
(9)Sabiex jiġi żgurat li l-operazzjonijiet ta' kabotaġġ ikkonċernati ma jbiddlux il-funzjonament tas-suq intern għas-servizzi tal-kowċ u x-xarabank b'mod eċċessiv, kif stabbilit bir-Regolament (KE) Nru 1073/2009, l-awtorizzazzjoni tagħhom għandha tkun soġġetta għall-kundizzjonijiet li bejn it-trasportaturi stabbiliti fi ħdan l-Unjoni ma hemm l-ebda diskriminazzjoni u l-ebda tfixkil tal-kompetizzjoni.
(10)Għall-istess raġuni, l-operazzjonijiet ta' kabotaġġ għandhom ikunu awtorizzati biss fir-reġjuni tal-fruntiera tal-Ġermanja waqt l-għoti ta' servizzi tal-kowċ u x-xarabank bejn il-Ġermanja u l-Iżvizzera. Għal dan il-għan, huwa meħtieġ li r-reġjuni tal-fruntiera tal-Ġermanja jiġu ddefiniti skont it-tifsira ta' din id-Deċiżjoni b'mod li jitqies kif xieraq il-funzjonament tar-Regolament (KE) Nru 1073/2009, filwaqt li tkun permessa ż-żieda fl-effiċjenza tal-operazzjonijiet ikkonċernati,
ADOTTAW DIN ID-DEĊIŻJONI:
Artikolu 1
Il-Ġermanja b'dan tingħata s-setgħa li temenda l-ftehim bilaterali eżistenti tagħha dwar it-trasport bit-triq mal-Iżvizzera bil-għan li tawtorizza operazzjonijiet ta' kabotaġġ fir-reġjuni tal-fruntiera rispettivi tal-Ġermanja u tal-Iżvizzera waqt l-għoti ta' servizzi tal-kowċ u x-xarabank bejn iż-żewġ pajjiżi, dment li ma jkun hemm l-ebda diskriminazzjoni bejn it-trasportaturi stabbiliti fl-Unjoni u l-ebda tfixkil tal-kompetizzjoni.
Skont it-tifsira tal-ewwel paragrafu, ir-reġjuni tal-fruntiera tal-Ġermanja għandhom jitqiesu bħala d-distretti amministrattivi ta' Freiburg u Tübingen f'Baden-Württemberg u d-distrett amministrattiv ta' Swabia fil-Bavarja.
Artikolu 2
Il-Ġermanja għandha tinforma lill-Kummissjoni dwar l-emenda tal-ftehim bilaterali tagħha dwar it-trasport bit-triq mal-Iżvizzera skont l-Artikolu 1 ta' din id-Deċiżjoni u tinnotifika t-test ta' dan il-ftehim, Il-Kummissjoni għandha tinforma lill-Kunsill u lill-Parlament Ewropew b'dan.
Artikolu 3
Din id-Deċiżjoni hija indirizzata lir-Repubblika Federali tal-Ġermanja.
Magħmul fi Brussell,
Għall-Parlament Ewropew Għall-Kunsill
Il-President Il-President