This document is an excerpt from the EUR-Lex website
Document 52018PC0318
Proposal for a COUNCIL IMPLEMENTING DECISION on the operating rules of the selection panel provided for in Article 14(3) of Regulation (EU) 2017/1939 implementing enhanced cooperation on the establishment of the European Public Prosecutor's Office (''the EPPO'')
Proposta għal DEĊIŻJONI TA’ IMPLIMENTAZZJONI TAL-KUNSILL dwar ir-regoli ta’ ħidma tal-bord tal-għażla previsti fl-Artikolu 14(3) tar-Regolament (UE) 2017/1939 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”)
Proposta għal DEĊIŻJONI TA’ IMPLIMENTAZZJONI TAL-KUNSILL dwar ir-regoli ta’ ħidma tal-bord tal-għażla previsti fl-Artikolu 14(3) tar-Regolament (UE) 2017/1939 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”)
COM/2018/318 final - 2018/0163 (NLE)
IL-KUMMISSJONI EWROPEA
Brussell, 25.5.2018
COM(2018) 318 final
2018/0163(NLE)
Proposta għal
DEĊIŻJONI TA’ IMPLIMENTAZZJONI TAL-KUNSILL
dwar ir-regoli ta’ ħidma tal-bord tal-għażla previsti fl-Artikolu 14(3) tar-Regolament (UE) 2017/1939 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”)
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u għanijiet tal-proposta
Ir-Regolament tal-Kunsill (UE) 2017/1939 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”) ġie adottat fit-12 ta’ Ottubru 2017 u daħal fis-seħħ fl-20 ta’ Novembru 2017. F’konformità mal-Artikolu 20 ta’ dak ir-Regolament, il-Kummissjoni hija responsabbli għall-istabbiliment u l-operat amministrattiv inizjali tal-UPPE, sa meta dan tal-aħħar ikollu l-kapaċità li jimplimenta l-baġit tiegħu stess. Il-Kummissjoni qed tagħmel l-isforzi kollha meħtieġa sabiex taċċerta li l-UPPE jkun stabbilit f’qasir żmien. F’konformità mal-Artikolu 120 tar-Regolament u wara fażi ta’ żvilupp ta’ tliet snin, il-Kummissjoni għandha l-għan li l-UPPE jkun operazzjonali sa tmiem l-2020.
Aspett ewlieni għall-funzjonament tal-UPPE jikkonċerna l-għażla u l-ħatra tal-persunal tagħha, b’mod partikolari tal-Kap Prosekutur Ewropew u tal-Prosekuturi Ewropej. Sabiex jintgħażel il-Kap Prosekutur Ewropew u l-Prosekuturi Ewropej tal-UPPE, l-Artikolu 14(3) tar-Regolament (UE) 2017/1939 jipprevedi li l-Kunsill għandu jistabbilixxi r-regoli ta’ ħidma tal-bord tal-għażla u għandu jadotta deċiżjoni li taħtar lill-membri tiegħu fuq proposta mill-Kummissjoni. Għal dan l-għan, il-Kummissjoni qed tipproponi Deċiżjoni ta’ Implimentazzjoni tal-Kunsill bir-regoli ta’ ħidma tal-bord tal-għażla fl-Anness tagħha.
Il-bord tal-għażla se jkollu l-inkarigu prinċipali li jfassal lista ristretta ta’ kandidati kwalifikati għall-kariga ta’ Kap Prosekutur Ewropew qabel il-ħatra tiegħu/tagħha mill-Parlament Ewropew u mill-Kunsill u li jipprovdi opinjoni motivata dwar il-kwalifiki tal-kandidati għal Prosekuturi Ewropej qabel il-ħatra tagħhom mill-Kunsill. Ir-regoli ta’ ħidma proposti mill-Kummissjoni jaċċertaw li l-bord tal-għażla jkun jista’ jaqdi dmirijietu bl-aktar mod effiċjenti possibbli. Għaldaqstant, l-Anness jinkludi r-regoli dwar il-kompiti, l-għamla, is-segretarjat u l-proċeduri ta’ teħid tad-deċiżjonijiet tal-bord tal-għażla, kif ukoll regoli dwar il-klassifikazzjoni tal-kandidati, id-dispożizzjonijiet finanzjarji, l-ipproċessar tad-data personali u r-reġim lingwistiku tal-bord tal-għażla.
•Konsistenza mad-dispożizzjonijiet ta’ politika eżistenti fil-qasam ta’ politika
L-istabbiliment tal-UPPE huwa previst fl-Artikolu 86 TFUE. L-UPPE se jkun l-ewwel korp tal-UE b’setgħat ta’ investigazzjoni u prosekuzzjoni kriminali ta’ reati li jaffettwaw l-interessi finanzjarji tal-Unjoni u se jkun attur kompletament ġdid fix-xenarju ġudizzjarju Ewropew. L-UPPE huwa mistenni li jkollu politika ta’ prosekuzzjoni aktar konsistenti u aktar effettiva għar-reati li jaffettwaw il-baġit tal-UE, u se jwassal għal għadd akbar ta’ prosekuzzjonijiet, kundanni u livell ogħla ta’ rkupru ta’ fondi tal-Unjoni li jkunu ntilfu b’mod frawdolenti.
Il-Kummissjoni, billi tippreżenta din il-proposta għal Deċiżjoni ta’ Implimentazzjoni tal-Kunsill li fl-Anness tagħha hemm ir-regoli ta’ ħidma tal-bord tal-għażla, qed tikkonforma mal-obbligu tagħha skont l-Artikolu 14(3) tar-Regolament tal-Kunsill 2017/1939. Din il-proposta se tippermetti li jinbdew il-proċeduri meħtieġa għall-għażla u għall-ħatra tal-Kap Prosekutur Ewropew u tal-Prosekuturi Ewropej tal-UPPE. Din il-proposta hija għalhekk konsistenti mija fil-mija mad-dispożizzjonijiet ta’ politika eżistenti fil-qasam rispettiv ta’ politika.
•Konsistenza ma’ politiki oħra tal-Unjoni
Din l-inizjattiva hija konsistenti ma’ politiki u ma’ żviluppi leġiżlattivi oħra tal-Unjoni bl-għan li tissaħħaħ il-protezzjoni tal-interessi finanzjarji tal-Unjoni.
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
Din il-proposta hija bbażata fuq l-Artikolu 291 TFUE flimkien mal-Artikolu 14(3) u 16(2) tar-Regolament tal-Kunsill (UE) 2017/1939.
•Sussidjarjetà (għall-kompetenza mhux esklużiva)
F’konformità mal-Artikolu 14(3) tar-Regolament tal-Kunsill 2017/1939, il-Kummissjoni hija legalment obbligata li tippreżenta proposta għar-regoli ta’ ħidma tal-bord tal-għażla. Din il-proposta hija essenzjali sabiex jiġi aċċertat li l-bord tal-għażla jkun jista’ jaqdi dmirijietu bl-aktar mod effiċjenti possibbli sabiex jagħżel u jaħtar f’qasir żmien il-Kap Prosekutur Ewropew u l-Prosekuturi Ewropej tal-UPPE.
•Proporzjonalità
Din il-proposta hija limitata għal dak li huwa meħtieġ sabiex jinkisbu l-objettivi proposti, u hija għalhekk konformi mal-prinċipju tal-proporzjonalità. Din il-proposta hija direttament marbuta mad-dħul fis-seħħ tar-Regolament tal-Kunsill (UE) 2017/1939 u hija essenzjali biex ikun żgurat li l-UPPE jiġi stabbilit f’qasir żmien.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATTI
Minħabba l-mira speċifika u n-natura limitata ta’ din il-proposta, u l-fatt li din tikkonforma mal-obbligu impost fuq il-Kummissjoni fl-Artikolu 14(3) tar-Regolament tal-Kunsill 2017/1939, ma sarux evalwazzjonijiet ex post, konsultazzjonijiet mal-partijiet ikkonċernati u valutazzjoni tal-impatt.
4.IMPLIKAZZJONIJIET GĦALL-BAĠIT
Fil-punt VIII tal-Anness, din il-proposta tiddeskrivi li l-Membri tal-bord tal-għażla li jkunu jeħtieġu li jivvjaġġaw lil hinn mill-post ta’ residenza tagħhom sabiex jaqdu dmirijiethom għandhom ikunu intitolati għal rimborż tal-ispejjeż tagħhom u għal gratifika f’konformità mal-Artikolu 9 tar-Regolament tal-Kunsill 2016/300. L-ispiża korrispondenti għandha tiġġarrab mill-Kunsill.
Il-Kummissjoni se tkun responsabbli mis-segretarjat tal-bord u se tipprovdi għall-appoġġ amministrattiv neċessarju għat-tħaddim tal-bord. Dawn l-inkarigi mhux se jkollhom implikazzjonijiet finanzjarji.
5.ELEMENTI OĦRA
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rappurtar
Minħabba n-natura ta’ din il-miżura, ma hemmx bżonn ta’ implimentazzjoni.
•Dokumenti ta’ spjegazzjoni (għad-direttivi)
Il-proposta ma għandhiex bżonn ta’ Dokumenti ta’ Spjegazzjoni dwar it-traspożizzjoni.
•Spjegazzjoni fid-dettall tad-dispożizzjonijiet speċifiċi tal-proposta
Il-punt I jistabbilixxi l-inkarigi tal-bord tal-għażla, f’konformità mal-Artikoli 14(3) u 16(2) tar-Regolament tal-Kunsill 2017/1939.
Il-punt II jiddeskrivi l-għamla tal-bord tal-għażla u l-mandat tal-membri tal-bord. F’konformità mal-Artikolu 14(3) tar-Regolament tal-Kunsill 2017/1939, il-bord tal-għażla se jkun magħmul minn dawk li kienu membri tal-Qorti tal-Ġustizzja u tal-Qorti tal-Awdituri, dawk li kienu membri nazzjonali ta’ Eurojust, membri tal-qrati supremi nazzjonali, prosekuturi ta’ livell għoli u avukati ta’ kompetenza rikonoxxuta. Dan il-punt jiċċara li l-membri tal-bord tal-għażla għandhom minn tal-anqas jissodisfaw wieħed mill-kriterji msemmija hawn fuq fil-mument tal-ħatra tagħhom. Il-punt 2 ikompli jispjega li l-membri tal-bord tal-għażla għandhom jinħatru mill-Kunsill għal perjodu ta’ erba’ snin. Barra minn hekk, dan il-punt jipprevedi regoli dwar is-sostituzzjoni tal-membri qabel ma jasal fi tmiemu l-mandat tagħhom.
Il-punt III jipprevedi regoli dwar il-President u s-segretarjat tal-bord tal-għażla. Dan il-punt jispjega li l-Kummissjoni hija responsabbli mis-segretarjat tal-bord u jistabbilixxi l-inkarigi tas-segretarjat.
Il-punt IV jipprevedi regoli dwar id-deliberazzjonijiet tal-bord tal-għażla.
Il-punt V jispjega li l-applikazzjonijiet kollha għall-pożizzjoni ta’ Kap Prosekutur Ewropew u n-nomini għall-pożizzjoni ta’ Prosekuturi Ewropej se jiġu rreferuti lill-bord tal-għażla. Barra minn hekk, il-punt V jipprevedi l-possibbiltà li l-bord tal-għażla jagħmel talba għal aktar informazzjoni lill-applikanti jew lill-gvernijiet tal-Istati Membri tal-ħatra.
Il-punt VI jistabbilixxi l-proċeduri applikabbli għall-ħatra tal-Kap Prosekutur Ewropew kif ukoll tal-Prosekuturi Ewropej. Fir-rigward tal-Kap Prosekutur Ewropew, dan il-punt jispjega li l-bord tal-għażla se janalizza l-applikazzjonijiet b’rabta mar-rekwiżiti stabbiliti fl-Artikolu 14(2) tar-Regolament 2017/1939, kif speċifikat aktar fl-avviż ta’ post battal. Il-bord tal-għażla se jikklassifika lill-kandidati li jissodisfaw ir-rekwiżiti u se jisma’ għadd suffiċjenti ta’ kandidati fost l-ogħla klassifikati. L-applikanti li ma jissodisfawx ir-rekwiżiti ta’ eliġibbiltà jew li ma jkunux mistiedna għal smigħ mill-bord se jkunu mgħarrfa bir-raġunijiet. Fir-rigward tal-Prosekuturi Ewropej, dan il-punt jiddeskrivi li l-bord se janalizza n-nomini b’rabta mar-rekwiżiti stabbiliti fl-Artikolu 16(1) tar-Regolament tal-Kunsill 2017/1939 u se jisma’ lill-kandidati nominati.
Il-punt VII jsegwi l-proċedura stipulata fil-punt VI u jinkludi li l-bord tal-għażla se jfassal lista ristretta ta’ bejn tlieta u ħames kandidati għall-kariga ta’ Kap Prosekutur Ewropew, li se tkun ippreżentata lill-Parlament Ewropew u lill-Kunsill. Il-kandidati li ma jkunux tqiegħdu fuq il-lista ristretta se jiġu mgħarrfa bir-raġunijiet u jistgħu jressqu lment lill-Kunsill f’konformità mal-Artikolu 90(2) tar-Regolamenti tal-Persunal. Filwaqt li l-bord tal-għażla se jikklassifika lill-kandidati skont il-kwalifiki u l-esperjenza tagħhom, din il-klassifikazzjoni mhijiex se tkun vinkolanti fuq il-Parlament Ewropew u l-Kunsill. Fir-rigward tal-kariga ta’ Prosekutur Ewropew, il-bord tal-għażla se jsawwar opinjoni dwar il-kwalifiki tal-kandidati biex jaqdu d-dmirijiet ta’ Prosekuturi Ewropej u se jiddikjara espressament jekk kandidat jissodisfax jew le l-kundizzjonijiet fl-Artikolu 16(1) tar-Regolament 2017/1939. Filwaqt li l-bord tal-għażla se jikklassifika lill-kandidati skont il-kwalifiki u l-esperjenza tagħhom, din il-klassifikazzjoni mhijiex se tkun vinkolanti fuq il-Kunsill. Dan il-punt jipprevedi wkoll regoli f’każ li l-kandidati nominati għall-kariga ta’ Prosekutur Ewropew ma jissodisfawx il-kundizzjonijiet meħtieġa.
Il-punt VIII jistabbilixxi d-dispożizzjonijiet finanzjarji. Il-membri tal-bord tal-għażla li jkun jeħtiġilhom jivvjaġġaw lil hinn mill-post ta’ residenza tagħhom sabiex jaqdu dmirijiethom se jkunu intitolati għal rimborż tal-ispejjeż tagħhom u għal gratifika f’konformità mal-Artikolu 9 tar-Regolament tal-Kunsill 2016/300. L-ispiża korrispondenti trid titħallas mill-Kunsill.
Il-punt IX jirregola li l-ipproċessar tad-data personali fil-kuntest tal-ħidma tal-bord tal-għażla għandu jsir taħt ir-responsabbiltà tal-Kummissjoni f’konformità mar-Regolament (KE) Nru 45/2001. Dan il-punt jiżgura wkoll li r-regoli applikabbli għas-sigurtà tal-informazzjoni proċessata fil-kuntest tal-ħidma tal-bord tal-għażla, u għall-aċċess għaliha, għandhom ikunu dawk applikabbli għall-Kummissjoni.
Il-punt X jistabbilixxi r-reġim lingwistiku tal-bord tal-għażla u jistipula li l-bord, wara proposta mill-president tiegħu, se jiddetermina r-reġim lingwistiku għad-deliberazzjonijiet tiegħu.
2018/0163 (NLE)
Proposta għal
DEĊIŻJONI TA’ IMPLIMENTAZZJONI TAL-KUNSILL
dwar ir-regoli ta’ ħidma tal-bord tal-għażla previsti fl-Artikolu 14(3) tar-Regolament (UE) 2017/1939 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea,
Wara li kkunsidra r-Regolament tal-Kunsill (UE) 2017/1939 tat-12 ta’ Ottubru 2017 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”), u b’mod partikolari l-Artikolu 14(3) tiegħu,
Wara li kkunsidra l-proposta tal-Kummissjoni Ewropea,
Billi:
(1)Ir-Regolament (UE) 2017/1939 jipprevedi li l-Parlament Ewropew u l-Kunsill iridu jaħtru Kap Prosekutur Ewropew, bi qbil komuni, minn lista ristretta ta’ kandidati kwalifikati mfassla minn bord tal-għażla, magħmul minn dawk li kienu membri tal-Qorti tal-Ġustizzja u tal-Qorti tal-Awdituri, dawk li kienu membri nazzjonali ta’ Eurojust, membri tal-qrati supremi nazzjonali, prosekuturi ta’ livell għoli u avukati ta’ kompetenza rikonoxxuta, kif ukoll membru wieħed propost mill-Parlament Ewropew.
(2)Ir-Regolament (UE) 2017/1939 jipprevedi wkoll li l-Kunsill irid jaħtar kull Prosekutur Ewropew minn fost tliet kandidati nominati minn kull Stat Membru wara li jkun irċieva opinjoni motivata minn dak il-bord tal-għażla.
(3)Il-proċedura għall-għażla tal-Kap Prosekutur Ewropew u tal-Prosekuturi Ewropej jenħtieġ li tkun element ewlieni biex tkun iggarantita l-indipendenza tagħhom kif meħtieġ mill-Artikolu 6 tar-Regolament (UE) 2017/1939.
(4)Jenħtieġ li r-regoli tal-bord tal-għażla jiggarantixxu li l-bord innifsu jkollu l-indipendenza u l-imparzjalità neċessarji biex iwettaq il-ħidma tiegħu;
(5)Jenħtieġ għalhekk li r-regoli ta’ ħidma tal-bord tal-għażla jiġu stabbiliti.
ADOTTA DIN ID-DEĊIŻJONI:
Artikolu 1
Ir-regoli ta’ ħidma tal-bord tal-għażla previsti fl-Artikolu 14(3) tar-Regolament (UE) 2017/1939 għandhom ikunu stabbiliti fl-Anness ta’ din id-Deċiżjoni.
Artikolu 2
Din id-Deċiżjoni għandha tidħol fis-seħħ mal-firma tagħha.
Artikolu 3
Din id-Deċiżjoni hija indirizzata lill-Istati Membri.
Magħmul fi Brussell,
Għall-Kunsill
Il-President
IL-KUMMISSJONI EWROPEA
Brussell,25.5.2018
COM(2018) 318 final
ANNESS
tal-
Proposta għal Deċiżjoni ta’ Implimentazzjoni tal-Kunsill
dwar ir-regoli ta’ ħidma tal-bord tal-għażla previsti fl-Artikolu 14(3) tar-Regolament (UE) 2017/1939 li jimplimenta kooperazzjoni msaħħa dwar l-istabbiliment tal-Uffiċċju tal-Prosekutur Pubbliku Ewropew (“l-UPPE”)
ANNESS
I. Missjoni
Il-bord tal-għażla għandu jfassal lista ristretta ta’ kandidati kwalifikati għall-kariga ta’ Kap Prosekutur Ewropew, f’konformità mal-Artikolu 14(3) tar-Regolament (UE) 2017/1939 1 . Għandu wkoll jipprovdi opinjoni motivata dwar il-kwalifiki tal-kandidati nominati għall-kariga ta’ Prosekutur Ewropew, f’konformità mal-Artikolu 16(2) tar-Regolament (UE) 2017/1939, qabel il-ħatra tagħhom mill-Parlament Ewropew u mill-Kunsill fl-ewwel każ u mill-Kunsill fit-tieni każ.
II. Għamla u mandat
Il-bord tal-għażla għandu jikkonsisti minn tnax-il persuna li, fil-mument tal-ħatra tagħhom, ikunu eks membri tal-Qorti tal-Ġustizzja u tal-Qorti tal-Awdituri, eks membri nazzjonali ta’ Eurojust, membri tal-qrati supremi nazzjonali, prosekuturi ta’ livell għoli u avukati ta’ kompetenza rikonoxxuta. Il-membri kollha għandhom jissodisfaw minn tal-anqas kriterju wieħed minn fost dawk imsemmija aktar ’il fuq fil-mument tal-ħatra tagħhom.
Il-membri tal-bord tal-għażla għandhom jinħatru mill-Kunsill, wara proposta mill-Kummissjoni, għal perjodu ta’ erba’ snin. Waħda mill-persuni magħżula għandha tkun proposta mill-Parlament Ewropew. Il-persuna li tkun se tissostitwixxi membru qabel it-tmiem ta’ dak il-perjodu, għandha tinħatar għall-bqija tal-mandat tal-predeċessur tagħha. Il-membri tal-bord jistgħu jerġgħu jinħatru darba oħra.
III. Presidenza u segretarjat
Il-bord tal-għażla għandu jkun ippresedut minn wieħed mill-membri tiegħu, elett għal dak l-iskop mill-membri tal-bord permezz ta’ vot ta’ maġġoranza. Il-Kummissjoni għandha tkun responsabbli mis-segretarjat tal-bord. Għandha tipprovdi l-appoġġ amministrattiv meħtieġ għall-ħidma tal-bord, inkluża t-traduzzjoni tad-dokumenti. Is-segretarjat għandu wkoll jittrażmetti l-lista ristretta tal-kandidati għall-kariga ta’ Kap Prosekutur Ewropew lill-Parlament Ewropew u lill-Kunsill, u, rispettivament, l-opinjoni motivata dwar il-kwalifiki tal-kandidati biex jaqdu d-doveri ta’ Prosekuturi Ewropej lill-Kunsill.
IV. Deliberazzjonijiet u quorum
Id-deliberazzjonijiet tal-bord tal-għażla għandhom ikunu kunfidenzjali u għandhom isiru bil-magħluq. Il-laqgħat tal-bord għandhom ikunu validi biss jekk ikunu preżenti minn tal-anqas disa’ membri.
Id-deċiżjonijiet tal-bord tal-għażla għandhom jittieħdu b’kunsens. Madankollu, jekk membru jitlob biex jittieħed vot, id-deċiżjoni għandha tittieħed permezz ta’ maġġoranza sempliċi tal-membri preżenti. F’każ li l-voti jiġu ndaqs, il-President għandu jkollu l-vot deċiżiv.
V. Referenza lil kumitat u talbiet għal informazzjoni addizzjonali
Malli jaslu l-applikazzjonijiet għall-kariga ta’ Kap Prosekutur Ewropew, is-segretarjat għandu jibgħathom lill-President tal-bord. L-istess japplika għan-nomini għall-kariga ta’ Prosekutur Ewropew, inklużi d-dokumenti ta’ akkumpanjament ippreżentati mill-Istati Membri.
Il-bord tal-għażla jista’ jitlob lill-applikanti u, fil-każ tan-nomini għall-kariga ta’ Prosekutur Ewropew, lill-gvern tal-Istat Membru li jinnomina, biex jipprovdu informazzjoni addizzjonali jew materjal ieħor li l-bord iqis li huwa meħtieġ għad-deliberazzjonijiet tiegħu.
VI. Analiżi u smigħ
1. Il-Proċedura għall-ħatra ta’ Kap Prosekutur Ewropew
Malli jaslulu l-applikazzjonijiet tal-kandidati, il-bord tal-għażla għandu janalizza l-applikazzjonijiet b’rabta mar-rekwiżiti stabbiliti fl-Artikolu 14(2) tar-Regolament 2017/1939, kif speċifikat ulterjorment fl-avviż ta’ post battal. Il-kandidati li ma jissodisfawx ir-rekwiżiti ta’ eliġibbiltà għandhom jiġu esklużi mill-passi tal-proċedura li jkun imiss. Il-bord għandu jikklassifika lill-kandidati li jissodisfaw ir-rekwiżiti skont il-kwalifiki u l-esperjenza tagħhom, abbażi tad-dokumentazzjoni u l-informazzjoni provduta fl-applikazzjoni jew li tiġi prodotta wara li ssir talba skont ir-Regola V. Il-bord għandu jisma’ għadd suffiċjenti ta’ kandidati fost l-ogħla klassifikati sabiex ikun jista’ jistabbilixxi l-lista ristretta msemmija fir-Regola VII. Is-smigħ għandu jsiru bil-preżenza fiżika.
Il-kandidati li ma jissodisfawx ir-rekwiżiti ta’ eliġibbiltà jew li ma jkunux mistiedna għal smigħ mill-bord għandhom ikunu mgħarrfa bir-raġunijiet. Il-kandidati jistgħu jirreaġixxu għal din id-deċiżjoni billi jiddikjaraw ir-raġunijiet għaliex ma jaqblux mal-valutazzjoni tal-bord. Sussegwentement, il-bord jerġa’ jivvaluta l-applikazzjoni tal-kandidati u jgħarrafhom bil-miktub bil-konklużjoni tiegħu. Il-kandidati esklużi mill-proċedura tal-għażla jistgħu jressqu lment lill-Kunsill fis-sens tal-Artikolu 90(2) tar-Regolamenti tal-Persunal.
2. Il-Proċedura għall-ħatra tal-Prosekuturi Ewropej
Malli jaslulu n-nomini, il-bord tal-għażla għandu janalizzahom b’rabta mar-rekwiżiti stabbiliti fl-Artikolu 16(1) tar-Regolament 2017/1939. Il-bord għandu jisma’ lill-kandidati nominati. Is-smigħ għandu jsiru bil-preżenza fiżika.
VII. Sejbiet u dikjarazzjoni tar-raġunijiet
1. Kap Prosekutur Ewropew
Abbażi tas-sejbiet tiegħu matul l-analiżi u s-smigħ, il-bord tal-għażla għandu jfassal lista ristretta ta’ bejn tlieta sa ħames kandidati li għandha tiġi ppreżentata lill-Parlament Ewropew u lill-Kunsill. Għandu jipprovdi raġunijiet għaliex ikun għażel lill-kandidati fuq il-lista ristretta. Il-kandidati li ma jkunux tqiegħdu fuq il-lista ristretta għandhom jiġu mgħarrfa bir-raġunijiet.
Il-bord tal-għażla għandu jikklassifika lill-kandidati skont il-kwalifiki u l-esperjenza tagħhom. Il-klassifikazzjoni għandha tindika l-ordni ta’ preferenza tal-bord u ma għandhiex tkun vinkolanti fuq il-Parlament Ewropew u l-Kunsill. Il-kandidati li ma jkunux tqiegħdu fuq il-lista ristretta ta’ kandidati kwalifikati mfassla mill-bord, jistgħu jressqu lment lill-Kunsill fis-sens tal-Artikolu 90(2) tar-Regolamenti tal-Persunal.
2. Prosekuturi Ewropej
Il-bord tal-għażla, abbażi tas-sejbiet tiegħu matul l-analiżi u s-smigħ, għandu jsawwar opinjoni dwar il-kwalifiki tal-kandidati biex jaqdu d-dmirijiet ta’ Prosekuturi Ewropej u għandu jiddikjara espressament jekk kandidat jissodisfax jew le l-kundizzjonijiet fl-Artikolu 16(1)tar-Regolament 2017/1939. Il-bord għandu jipprovdi raġunijiet għall-opinjoni tiegħu.
Fl-eventwalità li l-kandidati nominati ma jissodisfawx il-kundizzjonijiet stabbiliti fl-Artikolu 16(1) tar-Regolament (UE) 2017/1939, il-bord tal-għażla għandu, permezz tas-segretarjat tiegħu, jitlob lill-Istat Membru kkonċernat biex jinnomina għadd korrispondenti ta’ kandidati ġodda.
Il-bord għandu jikklassifika lill-kandidati skont il-kwalifiki u l-esperjenza tagħhom. Il-klassifikazzjoni għandha tindika l-ordni ta’ preferenza tal-bord u ma għandhiex tkun vinkolanti fuq il-Kunsill.
VIII. Dispożizzjonijiet finanzjarji
Il-membri tal-bord tal-għażla li jkun jeħtiġilhom jivvjaġġaw lil hinn mill-post ta’ residenza tagħhom sabiex jaqdu d-doveri tagħhom għandhom ikunu intitolati għal rimborż tal-ispejjeż tagħhom u għal gratifika f’konformità mal-Artikolu 9 tar-Regolament tal-Kunsill 2016/300 2 .
L-ispiża korrispondenti għandha tiġġarrab mill-Kunsill.
IX. Data personali
L-ipproċessar tad-data personali fil-kuntest tal-ħidma tal-bord tal-għażla għandu jsir taħt ir-responsabbiltà tal-Kummissjoni f’konformità mar-Regolament (KE) Nru 45/2001 tal-Parlament Ewropew u tal-Kunsill 3 . Ir-regoli applikabbli għas-sigurtà tal-informazzjoni proċessata fil-kuntest tal-ħidma tal-bord tal-għażla, u għall-aċċess għaliha, għandhom ikunu dawk applikabbli għall-Kummissjoni.
X. Ir-reġim lingwistiku
Il-bord tal-għażla għandu, wara proposta mill-president tiegħu, jiddetermina l-lingwa/i ta’ ħidma tal-bord, fid-dawl tal-lingwi komuni mitkellma mill-membri tiegħu.