IL-KUMMISSJONI EWROPEA

Brussell, 7.2.2018

COM(2018) 57 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

dwar l-eżerċitar tas-setgħa ta' adozzjoni ta' atti delegati mogħtija lill-Kummissjoni skont ir-Regolament tal-Kunsill (KE) Nru 1217/2009 tat-30 ta' Novembru 2009 li jistabbilixxi netwerk għall-ġbir ta’ informazzjoni tal-kontabilità dwar id-dħul u l-operazzjoni kummerċjali ta’ azjendi agrikoli fil-Komunità Ewropea

1.    INTRODUZZJONI

Ir-Regolament tal-Kunsill (KE) Nru 1217/2009 1 jistipula r-regoli għall-istabbiliment ta’ netwerk għall-ġbir ta’ informazzjoni tal-kontabilità dwar id-dħul u l-operazzjoni kummerċjali ta’ azjendi agrikoli fl-Unjoni Ewropea.

L-Artikolu 19a tar-Regolament jagħti s-setgħa lill-Kummissjoni li tadotta atti delegati li jispeċifikaw il-kontenut tar-rapportar addizzjonali li l-Istati Membri għandhom jissottomettu lill-Kummissjoni dwar aspetti speċifiċi tal-istabbiliment ta’ netwerk għall-ġbir ta’ informazzjoni tal-kontabilità dwar id-dħul u dwar l-operazzjoni kummerċjali ta’ azjendi agrikoli fl-Unjoni Ewropea, bħalma hija l-lista ta’ taqsimiet FADN, ir-regoli li jiffissaw il-limiti u l-pjanijiet, il-perjodu ta’ referenza għall-produzzjonijiet standard, it-tip ta’ biedja u ta’ ġbir tad-dejta.

2.    BAŻI ĠURIDIKA

Dan ir-rapport huwa meħtieġ skont l-Artikolu 19 a tar-Regolament (KE) Nru 1217/2009. Skont dik id-dispożizzjoni, is-setgħa li tadotta atti delegati hija kkonferita lill-Kummissjoni għal perjodu ta’ tliet snin mill-20 ta’ Diċembru 2013 u l-Kummissjoni hija rikjesta tħejji rapport li jirrigwarda d-delegazzjoni tas-setgħa.

3.    EŻERĊIZZJU TAD-DELEGA

Mid-dħul fis-seħħ tar-Regolament tal-Kunsill (KE) Nru 1217/2009, il-Kummissjoni adottat żewġ atti delegati: Ir-Regolament ta’ Delega tal-Kummissjoni (UE) Nru 1198/2014 2 u r-Regolament Delegat tal-Kummissjoni (UE) 2017/2278 3 .

Ir-Regolament tal-Kunsill (KE) Nru 1217/2009 jagħti s-setgħa lill-Kummissjoni li tadotta Regolamenti delegati li jistabbilixxu r-regoli marbuta mad-dejta għad-determinazzjoni tad-dħul u l-analiżi kummerċjali ta’ azjendi agrikoli, bil-għan li jiġi żgurat qafas armonizzat biex l-informazzjoni tiġi rrapportata mill-Istati Membri.

Kif previst fl-Artikolu 3, l-Artikoli 5(1) u 5a(1), l-Artikolu 5b(2) u (3) u l-Artikolu 8(3) tar-Regolament jenħtieġ li l-att delegat b’mod partikolari jistabbilixxi regoli:

a) li jaġġornaw il-lista tat-taqsimiet FADN,

b) li jiffissaw valuri ta’ limitu li jiddelimitaw il-qasam tal-istħarriġ,

ċ) li jistabbilixxu pjani għall-għażla tal-azjendi prospettanti,

d) li jistabbilixxu l-perijodu ta’ referenza għall-produzzjonijiet standard, u li jiddeterminaw it-tipi ġenerali u prinċipali ta’ biedja u

e) li jiddeterminaw il-gruppi ewlenin ta’ dejta tal-kontabilità dwar il-prospetti tal-biedja li għandhom jinġabru, kif ukoll ir-regoli ġenerali li għandhom jiġu segwiti f’dan ir-rigward.

3.a.    Delega ta’ setgħat fir-rigward tal-Artikolu 3 tar-Regolament (KE) Nru 1217/2009 dwar il-lista tat-taqsimiet FADN għal kull Stat Membru.

Il-FADN huma diviżjonijiet tan-netwerk tad-dejta tal-kontabilità agrikola, kif iddefinit fl-Artikolu 2 tar-Regolament tal-Kunsill (KE) Nru 1217/2009, fit-territorji ta’ Stat Membru, jew ta’ kwalunkwe parti minnu, delimitat bil-ħsieb tal-għażla tal-azjendi prospettanti. Lista ta’ tali taqsimiet tinsab fl-Anness ta’ dan ir-Regolament.

L-Artikolu 3 jiżgura li l-lista tat-taqsimiet FADN tkun tista’ tiġi aġġornata wara talba minn Stat Membru u jagħti s-setgħa lill-Kummissjoni li tadotta atti delegati, f’konformità mal-Artikolu 19a, sabiex temenda l-lista fl-Anness I.

Fil-31 ta’ Mejju 2017, il-Ġermanja talbet li tgħaqqad id-diviżjonijiet Schleswig-Holstein u Hamburg f’taqsima waħda tal-FADN: Schleswig-Holstein / Hamburg.

Il-Kummissjoni użat dik is-setgħa billi adottat ir-Regolament Delegat tal-Kummissjoni (UE) 2017/2278 4 li jemenda l-Anness I fir-rigward tal-lista tat-taqsimiet FADN għal kull Stat Membru, bl-amalgamazzjoni tad-diviżjonijiet Ġermaniżi ta’ Schleswig-Holstein u Hamburg f’taqsima waħda uniformi tal-FADN: Schleswig-Holstein / Hamburg.

Fl-Anness I, il-lista tat-taqsimiet FADN li jikkonċernaw il-Ġermanja ġiet sostitwita kif ġej:

“Il-Ġermanja

1. Schleswig-Holstein/Hamburg

2. Is-Sassonja t’Isfel

3. Bremen

4. Nordrhein-Westfalen

5. Hessen

6. Rheinland-Palatinat

7. A.3 Baden-Württemberg

8. Il-Bavarja

9. Saarland

10. Berlin

11. Brandenburg

12. Mecklenburg-Vorpommern

13. Is-Sassonja

14. Is-Sassonja Anhalt:

15. Thüringen”

Il-Kummissjoni adottat ir-Regolament Delegat fl-4 ta’ Settembru 2017 u dan daħal fis-seħħ fis-seba’ jum wara dak tal-pubblikazzjoni tiegħu fil-Ġurnal Uffiċjali tal-Unjoni Ewropea fit-12 ta’ Diċembru 2017. Dan se japplika mis-sena ta’ kontabilità 2018 għan-netwerk tad-dejta tal-kontabilità agrikola.

3.b    Delega ta’ setgħat fir-rigward tal-Artikolu 5 tar-Regolament (KE) Nru 1217/2009 dwar regoli għall-iffissar tal-livell limitu għad-daqs ekonomiku.

Jenħtieġ li l-valuri ta’ limitu li jiddelimitaw il-qasam tal-istħarriġ jippermettu l-kisba ta’ riżultati rappreżentattivi fil-qasam tal-istħarriġ. Jenħtieġ li l-valuri ta’ limitu jimmassimizzaw il-proporzjon kostijiet-benefiċċji u li jiġu determinati bil-għan li l-qasam tal-istħarriġ ikun jinkludi azjendi li jirrappreżentaw l-akbar sehem possibbli tal-produzzjoni agrikola, taż-żona agrikola u tax-xogħol agrikolu ta’ dawk l-azjendi b’orjentazzjoni kummerċjali.

L-Artikolu 5 tar-Regolament tal-Kunsill (KE) Nru 1217/2009 jagħti s-setgħa lill-Kummissjoni li tadotta atti delegati, f’konformità mal-Artikolu 19a, li jistabbilixxu r-regoli għall-istabbiliment tal-livell limitu espress f’euro li jikkorrispondi għal wieħed mil-limiti iktar baxxi tal-klassijiet ta’ daqs ekonomiku tat-tipoloġija tal-Unjoni għall-azjendi agrikoli definiti fl-Artikolu 5b tal-istess Regolament, tant il-qasam tal-istħarriġ imsemmi fl-Artikolu 1(2) għandu jkopri l-azjendi agrikoli li għandhom daqs ekonomiku ekwivalenti għal jew ikbar mil-limitu msemmi hawn fuq.

Il-Kummissjoni użat dik is-setgħa, billi adottat ir-Regolament ta’ Delega tal-Kummissjoni (UE) Nru 1198/2014 5 biex tindika li:

Il-limitu msemmi fl-Artikolu 5(1) tar-Regolament (KE) Nru 1217/2009 għandu jiżgura li l-qasam tal-istħarriġ jirrappreżenta l-akbar sehem possibbli tal-produzzjoni agrikola, taż-żona agrikola u tax-xogħol agrikolu, ta’ impriżi b’orjentazzjoni kummerċjali.

Il-Kummissjoni adottat ir-Regolament ta’ Delega fl-1 ta’ Awwissu 2014 u dan daħal fis-seħħ fis-seba’ jum wara dak tal-pubblikazzjoni tiegħu fil-Ġurnal Uffiċjali tal-Unjoni Ewropea fis-7 ta’ Novembru 2014. Dan se japplika mis-sena ta’ kontabilità 2015 għan-netwerk tad-dejta tal-kontabilità agrikola.

3.c.    Delega ta’ setgħat fir-rigward tal-Artikolu 5a tar-Regolament (KE) Nru 1217/2009 dwar ir-regoli biex jitfassal pjan għall-għażla ta’ azjendi prospettanti għal kull Stat Membru.

Il-pjan ta’ għażla għandu jinkludi għadd minimu ta’ elementi li juru kif jingħażel kampjun rappreżentattiv, biex b’hekk l-istħarriġ ikun jilħaq l-objettivi tan-netwerk tad-dejta tal-kontabiiltà agrikola.

L-Artikolu 5a tar-Regolament tal-Kunsill (KE) Nru 1217/2009, jagħti s-setgħa lill-Kummissjoni li tadotta atti delegati, skont l-Artikolu 19a, li jistabbilixxu r-regoli li skonthom kull Stat Membru jfassal pjan għall-għażla tal-azjendi prospettanti li jiżgura li jinkiseb kampjun rappreżentattiv tal-kontabilità tal-qasam tal-istħarriġ. Tali regoli għandhom jiżguraw li l-pjanijiet għall-għażla ta’ azjendi prospettanti:

- jitfasslu abbażi tad-dejta statistika l-iktar reċenti,

- jiġu ppreżentati skont it-tipoloġija tal-Unjoni għall-azjendi agrikoli, u

- jispeċifikaw, b’mod partikolari, id-distribuzzjoni ta’ azjendi prospettanti skont il-kategorija tal-azjenda u r-regoli dettaljati għall-għażla tagħhom.

Il-Kummissjoni użat dik is-setgħa meta adottat ir-Regolament ta’ Delega tal-Kummissjoni (UE) Nru 1198/2014 biex tindika li l-pjan għall-għażla tal-azjendi li jibgħatu prospetti li għandu jitfassal minn kull Stat Membru għandu jinkludi elementi li jiżguraw il-kisba ta’ kampjun rappreżentattiv tal-kontabilità tal-qasam tal-istħarriġ. B’mod partikolari, il-pjan għandu:

(a) ikun ibbażat fuq is-sorsi tad-dejta statistika l-iktar reċenti;

(b) jispjega l-proċedura għat-tqassim f’saffi tal-qasam tal-istħarriġ skont id-diviżjonijiet elenkati fl-Anness I tar-Regolament (KE) Nru 1217/2009 kif ukoll skont it-tipi ta’ biedja u l-klassijiet ta’ daqs ekonomiku kif imsemmija fl-Artikolu 5(b)(1) tar-Regolament (KE) Nru 1217/2009;

(c) jipprovdi analiżi tal-azjendi fil-qasam tal-istħarriġ skont it-tipi ta’ biedja u l-klassijiet ta’ daqs ekonomiku kif imsemmija fl-Artikolu 5(b)(1) tar-Regolament (KE) Nru 1217/2009 li jikkorrispondi tal-inqas mat-tipi prinċipali;

(d) jindika metodi statistiċi għad-determinazzjoni tar-rata tal-għażla magħżula għal kull saff, il-proċeduri għall-għażla tal-azjendi li jibgħatu prospetti u l-għadd ta’ azjendi li jippreżentaw il-kontijiet li għandhom jintgħażlu għal kull saff adottat.

Il-Kummissjoni adottat ir-Regolament ta’ Delega fl-1 ta’ Awwissu 2014 u dan daħal fis-seħħ fis-seba’ jum wara dak tal-pubblikazzjoni tiegħu fil-Ġurnal Uffiċjali tal-Unjoni Ewropea fis-7 ta’ Novembru 2014. Dan se japplika mis-sena ta’ kontabilità 2015 għan-netwerk tad-dejta tal-kontabilità agrikola.

3.d.    Delega ta’ setgħat fir-rigward tal-Artikolu 5b tar-Regolament (KE) Nru 1217/2009 jiffissa l-perjodu ta’ referenza għall-produzzjoni standard u rigward id-determinazzjoni tat-tipi ġenerali u prinċipali ta’ biedja.

Il-produzzjonijiet standard huma bbażati fuq dejta medja tul ċertu perjodu ta’ referenza. Jenħtieġ li l-valuri tagħhom jiġu aġġornati regolarment biex dawn ikunu jqisu x-xejriet ekonomiċi sabiex it-tipoloġija tkun tista’ tibqa’ tiġi applikata b’mod sinifikanti. Il-frekwenza tal-aġġornament għandha tkun marbuta mas-snin li fihom isiru l-istħarriġiet tal-Unjoni dwar l-istruttura tal-azjendi agrikoli.

It-tipi ta’ biedja ġenerali u prinċipali jeħtieġ li jitranġaw b’tali mod li gruppi omoġenji ta’ azjendi jkunu jistgħu jinġabru flimkien bi grad ikbar jew iżgħar ta’ aggregazzjoni u li s-sitwazzjonijiet ta’ gruppi ta’ azjendi jkunu jistgħu jitqabblu.

L-Artikolu 5b tar-Regolament tal-Kunsill (KE) Nru 1217/2009, jagħti s-setgħa lill-Kummissjoni li tadotta atti delegati, f’konformità mal-Artikolu 19a, li jistabbilixxu l-perijodu ta’ referenza għall-produzzjoni standard u rigward id-determinazzjoni tat-tipi ġenerali u prinċipali ta’ biedja.

It-‘tip ta’ biedja’ ta’ azjenda għandu jiġi determinat mill-kontribut relattiv tal-produzzjoni standard tal-karatteristiċi differenti ta’ dik l-azjenda għall-produzzjoni standard totali tal-azjenda. L-azjendi agrikoli għandhom jiġu kklassifikati b’mod uniformi skont it-tipoloġija tal-Unjoni għall-azjendi agrikoli, skont it-tip ta’ biedja, id-daqs ekonomiku u l-importanza ta’ attivitajiet oħra ta’ profitt marbuta direttament magħhom. It-tipoloġija għandha tintuża b’mod partikolari għall-preżentazzjoni, skont it-tip ta’ biedja u l-klassi tad-daqs ekonomiku, tal-informazzjoni miġbura permezz tal-istħarriġiet tal-Unjoni dwar l-istruttura tal-azjendi agrikoli u l-FADN.

Il-korrispondenza bejn it-tipi ġenerali u prinċipali ta’ biedja u t-tipi partikolari ta’ speċjalizzazzjonijiet fil-biedja li jikkorrispondu għal tipi prinċipali ta’ biedja għandhom jiġu speċifikati. Id-daqs ekonomiku tal-azjenda għandu jiġi ddeterminat abbażi tal-produzzjoni standard totali tal-azjenda. Il-produzzjoni standard u d-dejta għad-determinazzjoni tagħhom għandhom jiġu trasmessi lill-Kummissjoni (Eurostat) mill-aġenzija ta’ kollegament magħżula minn kull Stat Membru skont l-Artikolu 7 jew mill-korp li lilu tkun ġiet delegata din il-funzjoni.

Il-Kummissjoni użat dik is-setgħa, billi adottat ir-Regolament ta’ Delega tal-Kummissjoni (UE) Nru 1198/2014 biex tindika l-perjodu ta’ referenza għall-produzzjoni standard, kif ġej:

Għall-finijiet tal-kalkolu tal-produzzjonijiet standard għall-istħarriġ tal-Unjoni dwar l-istruttura tal-azjendi agrikoli għas-sena N (…), il-perjodu ta’ referenza jikkonsisti f’ħames snin suċċessivi mis-sena N-5 sas-sena N-1. Il-produzzjonijiet standard għandhom jiġu ddeterminati bl-użu ta’ dejta medja bażika kkalkulata fuq il-perjodu ta’ referenza stabbilit fl-ewwel paragrafu u huma magħrufa bħala “produzzjonijiet standard N-3”. Dawn il-produzzjonijiet standard N-3 għandhom jiġu aġġornati biex iqisu x-xejriet ekonomiċi mill-inqas kull meta jsir stħarriġ tal-Unjoni dwar l-istruttura tal-azjendi agrikoli.

Ir-Regolament ta’ Delega tal-Kummissjoni (UE) Nru 1198/2014 fl-Anness I tiegħu jagħti ħarsa ġenerali lejn it-tipi ta’ biedja ġenerali u prinċipali u l-korrispondenza bejniethom, kif ġej:

Il-Kummissjoni adottat ir-Regolament ta’ Delega fl-1 ta’ Awwissu 2014 u dan daħal fis-seħħ fis-seba’ jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea fis-7 ta’ Novembru 2014. Dan kien japplika mis-sena ta’ kontabilità 2015 għan-Netwerk tad-Dejta tal-Kontabilità Agrikola.

3.e.    Delega ta’ setgħat fir-rigward tal-Artikolu 8 tar-Regolament (KE) Nru 1217/2009 rigward id-determinazzjoni tal-gruppi ewlenin tad-dejta tal-kontabilità li għandha tinġabar u r-regoli ġenerali għall-ġbir tad-dejta

Jenħtieġ li d-dejta rrapportata fil-prospetti tal-biedja tippermetti li tittieħed stampa tal-azjendi li jibgħatu prospetti fir-rigward tal-fatturi ta’ produzzjoni, li jiġi vvalutat il-livell ta’ dħul tal-biedja, u li jiġu riflessi l-kundizzjonijiet tekniċi, ekonomiċi u soċjali tal-azjendi involuti. Jenħtieġ li l-gruppi ewlenin tad-dejta tal-kontabilità li għandha tinġabar u r-regoli ġenerali għall-ġbir ta’ informazzjoni ikunu determinati għal dak l-għan.

L-Artikolu 8 tar-Regolament tal-Kunsill (KE) Nru 1217/2009 jagħti s-setgħa lill-Kummissjoni li tadotta atti delegati, skont l-Artikolu 19a, rigward id-determinazzjoni tal-gruppi ewlenin tad-dejta tal-kontabilità li għandha tinġabar u r-regoli ġenerali għall-ġbir tal-informazzjoni.

Id-dejta għandha tkun marbuta ma’ azjenda agrikola waħda u ma’ sena ta’ kontabilità waħda ta’ 12-il xahar konsekuttiv, u għandha tikkonċerna esklussivament dik l-azjenda agrikola. Dik l-informazzjoni għandha tirreferi għall-attivitajiet agrikoli tal-azjenda nnifisha u għal attivitajiet oħra bi skop ta’ qligħ relatati direttament mal-azjenda agrikola.

Il-Kummissjoni użat dik is-setgħa metaadottat ir-Regolament ta’ Delega tal-Kummissjoni (UE) Nru 1198/2014 li jindika li t-tipi ta’ biedja ġenerali u prinċipali u l-korrispondenza bejniethom huma speċifikati fl-Anness I. Barra minn hekk, dwar il-prospett tal-azjenda agrikola, il-gruppi ewlenin tad-dejta tal-kontabilità li għandha tinġabar u r-regoli ġenerali għall-ġbir tad-dejta huma speċifikati fl-Anness II ta’ dan ir-Regolament.

Ir-Regolament ta’ Delega tal-Kummissjoni (UE) Nru 1198/2014 fl-Anness II tiegħu jagħti ħarsa ġenerali lejn il-gruppi ewlenin tad-dejta tal-kontabilità li għandha tinġabar mill-Prospett tal-Biedja u r-regoli ġenerali għall-ġbir tad-dejta, kif ġej:

Prospett tal-biedja — gruppi ewlenin tad-dejta tal-kontabilità li għandha tinġabar

- Informazzjoni ġenerali dwar l-azjenda, bħal informazzjoni relatata maż-żona, l-istatus, it-tip u l-klassifikazzjoni.

- Tip ta’ okkupazzjoni: informazzjoni fil-qosor relatata mat-tipi ta’ okkupazzjoni taż-żoni tal-art agrikola użati mill-azjenda.

- Xogħol: dejta li tikkaratterizza x-xogħol tal-azjenda, bħall-għadd ta’ persuni li jaħdmu fl-azjenda agrikola, il-ħin kemm dawn idumu jaħdmu u t-tip ta’ inkarigu.

- Assi: dejta li tiddeskrivi l-assi tal-azjenda, maqsuma f’kategoriji, użata fl-operat tagħha matul is-sena fiskali.

- Kwoti u drittijiet oħra: informazzjoni relatata mal-kwoti u drittijiet oħra marbuta mal-operazzjoni tal-azjenda fis-sena fiskali.

- Dejn: dejta relatata mal-pożizzjoni tad-dejn tal-azjenda fis-sena fiskali.

- Taxxa fuq il-valur miżjud: dejta relatata mal-applikazzjoni tas-sistemi ta’ taxxa fuq il-valur miżjud (VAT) tal-azjenda.

- Inputs: dejta relatata ma’ inputs użati fil-produzzjoni tal-azjenda, bħalma huma spejjeż speċifiċi u spejjeż ġenerali, għall-produzzjoni fis-sena fiskali.

- Prodotti tar-raba’: dejta li tagħti dettalji tal-produzzjoni u l-użu ta’ għelejjel fl-azjenda.

- Produzzjoni ta’ bhejjem: dejta li tagħti dettalji tal-produzzjoni u l-użu ta’ bhejjem fl-azjenda.

- Prodotti mill-annimali u servizzi: dejta li tagħti dettalji tal-produzzjoni u l-użu ta’ prodotti mill-annimali u servizzi fl-azjenda.

- Attivitajiet oħra bi skop ta’ qligħ relatati direttament mal-azjenda agrikola: dejta relatata mal-attivitajiet kollha li mhumiex xogħol agrikolu, relatati direttament mal-azjenda u li għandhom impatt ekonomiku u fejn jintużaw ir-riżorsi (żona, bini, makkinarju, prodotti agrikoli, eċċ.) jew il-prodotti tal-azjenda.

- Sussidji: sussidji ta’ informazzjoni dettaljata li waslet fl-azjenda waqt is-sena ta’ kontabilità.

Prospett tal-biedja — regoli ġenerali għall-ġbir tad-dejta

(a) Is-sena fiskali ta’ 12-il xahar konsekuttiv imsemmija fl-Artikolu 8(3) tar-Regolament (KE) Nru 1217/2009 għandha tintemm fil-perjodu ta’ bejn il-31 ta’ Diċembru u t-30 ta’ Ġunju biż-żewġ dati inklużi.

(b) Id-dejta mogħtija fil-prospett tal-biedja għandha tittieħed minn kontijiet li jikkonsistu f’entrati li jkunu saru sistematikament u regolarment matul is-sena fiskali.

(c) Id-dejta fil-prospett tal-biedja għandha tingħata f’valuri finanzjarji, f’euro jew f’unitajiet ta’ munita nazzjonali, b’miżuri fiżiċi ta’ piż, volum, erja, numri, kif ukoll f’unitajiet oħra jew indikazzjonijiet korrispondenti.

(d) Id-dejta tal-kontabilità għandha tiġi espressa f’termini monetarji mingħajr VAT.

(e) Id-dejta tal-kontabilità mogħtija f’termini monetarji għandha tiġi espressa mingħajr ma jitqiesu l-għotjiet u s-sussidji li jkunu dokumentati separatament. Għotjiet u sussidji jfissru kull forma ta’ għajnuna diretta minn fondi pubbliċi li rriżultaw fi rċevuta speċifika.

Il-Kummissjoni adottat ir-Regolament ta’ Delega fl-1 ta’ Awwissu 2014 u dan daħal fis-seħħ fis-seba’ jum wara dak tal-pubblikazzjoni tiegħu fil-Ġurnal Uffiċjali tal-Unjoni Ewropea fis-7 ta’ Novembru 2014. Dan se japplika mis-sena ta’ kontabilità 2015 għan-Netwerk tad-Dejta tal-Kontabilità Agrikola.

4.    KONKLUŻJONI

Il-Kummissjoni eżerċitat is-setgħat ta’ delega tagħha b’mod korrett, u tistieden lill-Parlament Ewropew u lill-Kunsill jieħdu nota ta’ dan ir-Rapport.

(1)

IR-REGOLAMENT TAL-KUNSILL (KE) Nru 1217/2009 tat-30 ta’ Novembru 2009 li jistabbilixxi netwerk għall-ġbir ta’ informazzjoni tal-kontabilità dwar id-dħul u l-operazzjoni kummerċjali ta’ azjendi agrikoli fil-Komunità Ewropea (ĠU L 328, 15.12.2009, p. 27).

(2)

IR-REGOLAMENT TA’ DELEGA TAL-KUMMISSJONI (UE) Nru 1198/2014 tal-1 ta’ Awwissu 2014 li jissupplementa r-Regolament tal-Kunsill (KE) Nru 1217/2009 li jistabbilixxi netwerk għall-ġbir ta’ informazzjoni tal-kontabilità dwar id-dħul u l-operazzjoni kummerċjali ta’ azjendi agrikoli fl-Unjoni Ewropea (ĠU L 321, 07.11.2014, p. 2).

(3)

IR-REGOLAMENT DELEGAT TAL-KUMMISSJONI (UE) 2017/2278 tal-4 ta’ Settembru 2017 li jemenda l-Anness I tar-Regolament tal-Kunsill (KE) Nru 1217/2009 li jistabbilixxi netwerk għall-ġbir ta’ informazzjoni tal-kontabilità dwar id-dħul u l-operazzjoni kummerċjali ta’ azjendi agrikoli fl-Unjoni Ewropea (ĠU L 328, 12.12.2014, p. 1).

(4)

 Ara n-nota 3 f’qiegħ il-paġna.

(5)

Ara n-nota 2 f’qiegħ il-paġna.