IL-KUMMISSJONI EWROPEA

Brussell, 15.2.2017

JOIN(2017) 7 final

2017/0031(NLE)

Proposta Konġunta għal

DEĊIŻJONI TAL-KUNSILL

dwar il-pożizzjoni tal-Unjoni fil-Kunsill ta’ Assoċjazzjoni stabbilit mill-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha minn naħa u r-Repubblika Demokratika tal-Poplu tal-Alġerija min-naħa l-oħra, fir-rigward tal-adozzjoni tal-Prijoritajiet tas-Sħubija bejn l-UE u l-Alġerija

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u objettivi tal-proposta

Il-Politika Ewropea tal-Viċinat (PEV) riveduta 1 , adottata f’Novembru 2015 tistabbilixxi qafas ġdid biex tiddefinixxi r-relazzjonijiet bilaterali mal-pajjiżi sħab. Jenħtieġ li dawn ir-relazzjonijiet jinġabru fi “prijoritajiet tas-sħubija”, li huma punt ta’ referenza ewlieni mal-pajjiżi sħab biex jintlaħaq ftehim dwar ġabra limitata ta’ prijoritajiet fil-mira għas-snin li ġejjin.

Il-konsultazzjonijiet mar-Repubblika Demokratika tal-Poplu tal-Alġerija (l-Alġerija) bdew f’April 2016 billi ntbagħat abbozz tat-test lill-awtoritajiet tal-Alġerija qabel iż-żjara tal-Kummissarju Hahn fil-11 ta’ Mejju 2016 fl-Alġier. Dan il-kunċett huwa konformi mal-Istrateġija Globali l-ġdida dwar il-Politika Estera u ta’ Sigurtà tal-Unjoni Ewropea 2 , ippreżentata f’Ġunju 2016 mir-Rappreżentant Għoli, li skontu l-istrumenti kollha tal-UE jintużaw bl-aktar mod effiċjenti biex iżidu l-impatt u l-viżibilità tal-appoġġ tal-Unjoni.

L-UE u l-Alġerija qablu li d-dokument intitolat “Prijoritajiet tas-Sħubija” jikkostitwixxi l-ewwel qafas ta’ referenza tal-PEV riveduta li sar qbil dwaru, u jwitti t-triq għat-tisħiħ tal-kooperazzjoni tagħhom. Dan id-dokument se jkun ukoll referenza siewja li għandha titqies għall-ipprogrammar tal-għajnuna tal-UE.

Il-“Prijoritajiet tas-Sħubija” jirriflettu interessi komuni u jiffukaw fuq oqsma li fihom il-kooperazzjoni bejn l-UE u l-Alġerija hija ta’ benefiċċju reċiproku. Ir-rispett tal-prinċipji demokratiċi u tad-drittijiet fundamentali jikkostitwixxi element essenzjali tar-relazzjonijiet bejn l-UE u l-Alġerija. Sabiex tintlaħaq il-mira kondiviża ta’ żona komuni ta’ paċi, prosperità u stabbiltà tenħtieġ kooperazzjoni, b’mod partikolari fir-rigward tar-responsabbiltajiet kondiviżi u tad-differenzjazzjoni, u kunsiderazzjoni tar-rwol ċentrali li l-Alġerija għandha fir-reġjun.

Filwaqt li jindirizzaw l-aktar sfidi urġenti, l-UE u l-Alġerija se jkomplu jfittxu li jiksbu l-objettivi ewlenin tas-sħubija tagħhom fuq terminu twil, u jaħdmu sabiex jiksbu stabbiltà sostenibbli fuq livell nazzjonali u reġjonali kif ukoll isostnu t-tkabbir ekonomiku permezz ta’ istituzzjonijiet tal-Istat sodi u tad-diversifikazzjoni u l-kompetittività tal-ekonomija tal-Alġerija, filwaqt li jkunu sfruttati l-possibilitajiet provduti mis-settur privat u mis-soċjetà ċivili tal-Alġerija. Il-prijoritajiet politiċi ewlenin identifikati fir-relazzjonijiet bejn l-UE u l-Alġerija għas-snin li ġejjin huma:

(1)Id-djalogu politiku, il-governanza, l-istat tad-dritt u l-ħidma favur id-drittijiet fundamentali;

(2)Il-kooperazzjoni, l-iżvilupp soċjoekonomiku inklużiv, l-iskambji kummerċjali u l-aċċess għas-suq uniku Ewropew;

(3)Is-sħubija fl-enerġija, l-ambjent u l-iżvilupp sostenibbli;

(4)Id-djalogu strateġiku u d-djalogu dwar is-sigurtà (inklużi l-kwistjonijiet reġjonali u l-ġlieda kontra t-terroriżmu);

(5)Id-dimensjoni umana, il-migrazzjoni u l-mobbiltà.

•Konsistenza mad-dispożizzjonijiet politiċi eżistenti fil-qasam ta’ politika

•Konsistenza ma’ politiki oħra tal-Unjoni

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

•Sussidjarjetà (għall-kompetenza mhux esklużiva)

•Proporzjonalità

•L-għażla tal-istrument

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•L-evalwazzjonijiet ex post / il-kontrolli tal-idoneità tal-leġiżlazzjoni eżistenti

•Il-konsultazzjonijiet mal-partijiet ikkonċernati

•Il-ġbir u l-użu tal-kompetenzi

•Il-valutazzjoni tal-impatt

•L-idoneità regolatorja u s-simplifikazzjoni

•Id-drittijiet fundamentali

4.IMPLIKAZZJONI BAĠITARJA

5.ELEMENTI OĦRA

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rappurtar

6. REFERENZI

(a)Komunikazzjoni Konġunta lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni –Rieżami tal-Politika Ewropea tal-Viċinat; [JOIN(2015) 50 final].

(b)Il-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubblika Alġerina Demokratika u tal-Poplu, min-naħa l-oħra (ĠU L 265, 10.10.2005, p. 1).

(c)Il-Konklużjonijiet tal-Kunsill dwar ir-Rieżami tal-Politika Ewropea tal-Viċinat tal-14 ta’ Diċembru 2015.

(d)Ir-Regolament UE 232/2014 tal-Parlament Ewropew u tal-Kunsill tal-11 ta’ Marzu 2014 li jistabbilixxi Strument Ewropew tal-Viċinat (ĠU L 77, 15.3.2014, p. 27).

(e)Komunikazzjoni Konġunta lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni –Rieżami tal-Politika Ewropea tal-Viċinat; [JOIN(2015) 50 final]; Dokument ta’ Pożizzjoni Komuni tal-Pajjiżi Għarab tal-PEV ippreżentat fil-Konferenza Ministerjali ta’ Bejrut dwar ir-Rieżami tal-Politika Ewropea tal-Viċinat (PEV) fl-24 ta’ Ġunju 2015.

2017/0031 (NLE)

Proposta Konġunta għal

DEĊIŻJONI TAL-KUNSILL

dwar il-pożizzjoni tal-Unjoni fil-Kunsill ta’ Assoċjazzjoni stabbilit mill-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha minn naħa u r-Repubblika Demokratika tal-Poplu tal-Alġerija min-naħa l-oħra, fir-rigward tal-adozzjoni tal-Prijoritajiet tas-Sħubija bejn l-UE u l-Alġerija

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u partikolarment l-Artikolu 217 flimkien mal-Artikolu 218(9) tiegħu,

Wara li kkunsidra l-proposta konġunta tar-Rappreżentant Għoli tal-Unjoni għall-Affarijiet Barranin u l-Politika ta’ Sigurtà u tal-Kummissjoni Ewropea,

Billi:

(1)Il-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha, minn naħa, u r-Repubblika Demokratika tal-Poplu tal-Alġerija, min-naħa l-oħra, ġie ffirmat fit-22 ta’ April 2002 u daħal fis-seħħ fl-1 ta’ Settembru 2005 6 .

(2)Il-Komunikazzjoni Konġunta mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà u tal-Kummissjoni Ewropea tat-18 ta’ Novembru 2015 dwar ir-Rieżami tal-Politika Ewropea tal-Viċinat 7 intlaqgħet mill-Konklużjonijiet tal-Kunsill tal-14 ta’ Diċembru 2015, u li fiha l-Kunsill ikkonferma, fost l-oħrajn, l-intenzjoni tiegħu li jibda fażi ġdida ta’ djalogu mal-pajjiżi sħab fl-2016 li tista’ twassal biex jiġu stabbiliti prijoritajiet ġodda ta’ sħubija, fejn xieraq, iffukati fuq prijoritajiet u interessi maqbula konġuntament.

(3)Sabiex tintlaħaq il-mira kondiviża tal-UE u tal-Alġerija għal żona komuni ta’ paċi, prosperità u stabbiltà tenħtieġ kooperazzjoni b’mod partikolari fir-rigward tar-responsabbiltajiet kondiviżi u tad-differenzjazzjoni, u kunsiderazzjoni tar-rwol ċentrali li l-Alġerija għandha fir-reġjun.

(4)Filwaqt li jindirizzaw l-aktar sfidi urġenti, l-UE u l-Alġerija se jkomplu jfittxu li jiksbu l-objettivi ewlenin tas-sħubija tagħhom fuq terminu twil, u jaħdmu sabiex jiksbu stabbiltà fil-pajjiż u fir-reġjun kif ukoll isostnu t-tkabbir ekonomiku u permezz ta’ istituzzjonijiet tal-Istat sodi u tad-diversifikazzjoni u l-kompetittività tal-ekonomija tal-Alġerija.

ADOTTA DIN ID-DEĊIŻJONI:

Artikolu 1

Il-pożizzjoni tal-Unjoni fil-Kunsill ta’ Assoċjazzjoni stabbilit mill-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha minn naħa u r-Repubblika Demokratika tal-Poplu tal-Alġerija min-naħa l-oħra, fir-rigward tal-adozzjoni tal-prijoritajiet tas-sħubija bejn l-UE u l-Alġerija għandha tkun ibbażata fuq it-test anness ma’ din id-deċiżjoni.

Artikolu 2

Din id-Deċiżjoni għandha tidħol fis-seħħ dakinhar tal-adozzjoni tagħha.

Magħmul fi Brussell,

(1) Il-Konklużjonijiet tal-Kunsill dwar ir-Rieżami tal-Politika Ewropea tal-Viċinat tal-14 ta’ Diċembru 2015; stqarrija għall-istampa tal-Kunsill Nru 926/15.

(2) “Viżjoni kondiviża, azzjoni konġunta: Ewropa aktar b’saħħitha. Strateġija Globali għall-Politika Estera u ta’ Sigurtà Komuni tal-Unjoni Ewropea”.

(3) Il-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubblika Alġerina Demokratika u tal-Poplu, min-naħa l-oħra (ĠU L 265, 10.10.2005, p. 1).

(4) Il-Konklużjonijiet tal-Kunsill dwar ir-Rieżami tal-Politika Ewropea tal-Viċinat tal-14 ta’ Diċembru 2015; stqarrija għall-istampa tal-Kunsill Nru 926/15.

(5) Ir-Regolament UE 232/2014 tal-Parlament Ewropew u tal-Kunsill tal-11 ta’ Marzu 2014 li jistabbilixxi Strument Ewropew tal-Viċinat (ĠU L 77, 15.3.2014, p. 27).

(6) Il-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubblika Alġerina Demokratika u tal-Poplu, min-naħa l-oħra (ĠU L 265, 10.10.2005, p. 1).

(7) Komunikazzjoni Konġunta lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni –Rieżami tal-Politika Ewropea tal-Viċinat; [JOIN(2015) 50 final].

IL-KUMMISSJONI EWROPEA

Brussell, 15.2.2017

JOIN(2017) 7 final

ANNESSI

mal-

proposta konġunta għal

DEĊIŻJONI TAL-KUNSILL

dwar il-pożizzjoni li għandha tiġi adottata mill-Unjoni fi ħdan il-Kunsill ta' Assoċjazzjoni stabbilit mill-Ftehim Ewro-Mediterranju li jistabilixxi assoċjazzjoni bejn il-Komunità Ewropea u l-Istati Membri tagħha, minn naħa waħda, u r-Repubblika Demokratika tal-Poplu tal-Alġerija min-naħa l-oħra, fir-rigward tal-adozzjoni tal-Prijoritajiet ta' Sħubija bejn l-UE u l-Alġerija

DEĊIŻJONI Nru 01/2017 TAL-10 KUNSILL TA’ ASSOĊJAZZJONI TAL-UE-ALĠERIJA TA’ ... 2017

dwar il-qbil dwar il-Prijoritajiet tas-Sħubija bejn l-UE u l-Alġerija

IL-KUNSILL TA’ ASSOĊJAZZJONI UE-ALĠERIJA,

Filwaqt li jikkunsidra l-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubblika Demokratika tal-Poplu tal-Alġerija, min-naħa l-oħra,

Billi

(1)    Il-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha, minn naħa l-waħda, u r-Repubblika Demokratika tal-Poplu tal-Alġerija, min-naħa l-oħra, ġie ffirmat fit-22 ta’ April 2002 u daħal fis-seħħ fl-1 ta’ Settembru 2005.

(2)    L-Artikolu 94 tal-Ftehim Ewro-Mediterranju jagħti s-setgħa lill-Kunsill ta’ Assoċjazzjoni li jieħu d-deċiżjonijiet xierqa, għall-finijiet li jintlaħqu l-objettivi tal-Ftehim.

(3)    Skont l-Artikolu 104 tal-Ftehim Ewro-Mediterranju, il-partijiet għandhom jieħdu kull miżura ġenerali jew speċifika meħtieġa biex jissodisfaw l-obbligi tagħhom skont il-Ftehim u għandhom jaraw li jinkisbu l-għanijiet stipulati fil-Ftehim.

(4)    Ir-rieżami tal-Politika Ewropea tal-Viċinat fl-2016 ipproponiet fażi ġdida ta’ involviment mas-sħab, li tippermetti sens akbar ta’ sjieda miż-żewġ naħat.

(5)    L-UE u l-Alġerija qablu li jikkonsolidaw is-sħubija tagħhom billi jaqblu fuq sett ta’ prijoritajiet għall-perjodu 2017-2020 bl-għan li jappoġġjaw u jsaħħu r-reżiljenza u l-istabbiltà tal-Alġerija.

(6)     Il-partijiet għall-Ftehim Ewro-Mediterranju qablu dwar it-test tal-Prijoritajiet tas-Sħubija bejn l-UE-Alġerija, li se jappoġġaw l-implimentazzjoni tal-Ftehim Ewro-Mediterranju, billi jiffokaw fuq il-kooperazzjoni fir-rigward ta’ sett ta’ interessi identifikati u kondiviżi bejn is-sħab li se tingħatalhom prijorità,

IDDEĊIEDA KIF ĠEJ:

Artikolu 1

Il-Kunsill ta’ Assoċjazzjoni jirrakkomanda li l-partijiet jimplimentaw il-Prijoritajiet tas-Sħubija bejn l-UE u l-Alġerija kif stipulat fl-Anness.

Artikolu 2

Din id-Deċiżjoni tidħol fis-seħħ fid-data tal-adozzjoni tagħha.

Magħmul fi xxx. [jum/Frar/Marzu 2017].

Għall-Kunsill ta' Assoċjazzjoni UE-Alġerija

Il-President

***

ANNESS

Prijoritajiet tas-Sħubija bejn l-UE u l-Alġerija

Prijoritajiet Kondiviżi tas-Sħubija bejn

ir-Repubblika Demokratika tal-Poplu tal-Alġerija (Alġerija)

u l-Unjoni Ewropea (UE)

taħt il-politika Ewropea tal-Viċinat rieżaminata (PEV)

Fl-ispirtu tal-prinċipji ta’ gwida tal-PEV rieżaminat u fid-dawl tal-prijoritajiet politiċi taż-żewġ partijiet, l-Alġerija u l-Unjoni Ewropea jieħdu l-impenn li jivvitaliżżaw mill-ġdid id-djalogu tagħhom, biex jaqblu dwar il-linji ewlenin tar-relazzjonijiet tagħhom, biex ikomplu jispeċifikaw l-objettivi u l-interessi reċiproċi tagħhom u biex jipprijoritizzaw l-oqsma tal-kooperazzjoni tagħhom. Il-prijoritajiet ta’ sħubija dettaljati iktar ‘l isfel jindikaw l-oqsma ewlenin għal djalogu msaħħaħ u għal kooperazzjoni amministrattiva u istituzzjonali li hija speċifika kemm jista’ jkun bejn l-UE u l-Alġerija. Tali djalogu u kooperazzjoni għandhom ikunu bbażati fuq l-esperjenza u l-għarfien rispettivi tal-UE u l-Alġerija u jonoraw l-indipendenza u l-karatteristiċi li jiddefinixxu kull waħda mill-partijiet.

L-ambizzjoni tal-Alġerija u l-UE hija li tiġi żviluppata sħubija msaħħa globali u b’bosta aspetti fil-konfront ta’ żvilupp komuni u sfidi ta’ sigurtà. Il-partijiet jesprimu wkoll ix-xewqa konġunta li jiksbu dawn il-prijoritajiet fl-oqsma ewlenin li fihom ir-relazzjonijiet tagħhom huma destinati li jiġu msaħħa fil-futur. Numru ta’ dawn il-prijoritajiet se jkunu s-suġġett ta’ kooperazzjoni teknika u finanzjarja, li se tiġi implimentata taħt l-ipprogrammar finanzjarju 2018-2020.

I. Djalogu politiku, governanza, l-istat tad-dritt u l-promozzjoni tad-drittijiet fundamentali

L-UE u l-Alġerija jaqblu li jagħtu importanza speċjali lit-tisħiħ tad-djalogu politiku tagħhom fil-forom kollha tiegħu.

Permezz tar-reviżjoni tal-Kostituzzjoni tagħha fis-7 ta’ Frar 2016, l-Alġerija qed tkompli bil-proċess tal-konsolidazzjoni tal-libertajiet u d-drittijiet fundamentali, l-istat tad-dritt u l-istituzzjonijiet demokratiċi u l-prinċipji li jirregolaw ir-relazzjonijiet tal-Istat maċ-ċittadini. Dan il-proċess jikkorrispondi għad-djalogu bilaterali li nżamm bejn l-UE u l-Alġerija matul dawn l-aħħar 15-il sena u jindika li r-relazzjonijiet bejn iż-żewġ partijiet huma bbażati fuq ir-rispett reċiproku u r-rikonoxximent ta’, u konformità ma’, valuri universali u impenji internazzjonali relatati mal-istat tad-dritt u r-rispett għad-drittijiet fundamentali.  

F’dan il-kuntest, l-Alġerija u l-UE jaqblu li jagħtu importanza speċjali lill-implimentazzjoni tad-dispożizzjonijiet l-ġodda tal-Kostituzzjoni. L-UE bi ħsiebha tappoġġa lill-Alġerija fl-implimentazzjoni tagħhom, b’mod partikolari fl-oqsma ta’ governanza, id-demokrazija parteċipattiva, il-promozzjoni u d-difiża tad-drittijiet fundamentali, inkluż dawk tal-ħaddiema, it-tisħiħ tar-rwol tan-nisa fis-soċjetà, id-deċentralizzazzjoni, it-tisħiħ tas-sistema ġudizzjarja, inkluż l-amministrazzjoni tal-ħabs, u t-tisħiħ tar-rwol tas-soċjetà ċivili, inkluż permezz tal-użu ta’ programmi ta’ assistenza teknika.

Tali kooperazzjoni se tinkludi wkoll appoġġ għall-modernizzazzjoni u amministrazzjoni pubblika mtejba, monitoraġġ iktar mill-qrib tal-finanzi pubbliċi u l-amministrazzjoni tat-taxxa, l-indirizzar tal-korruzzjoni u l-ġlieda kontra l-ħasil tal-flus, id-delokalizzazzjoni tal-kapital u l-finanzjament tat-terroriżmu f’konformità mar-rakkomandazzjonijiet tat-Task Force ta' Azzjoni Finanzjarja (FATF).

II. Kooperazzjoni, żvilupp soċjoekonomiku inklusiv, kummerċ u aċċess għas-suq uniku Ewropew

Fil-kuntest attwali ta’ staġnar ekonomiku u t-tnaqqis drastiku fil-prezzijiet tal-idrokarbur, l-Alġerija u l-UE għandhom interess komuni u pressanti fl-identifikazzjoni ta’ miżuri ta’ governanza ekonomika kemm fis-settur privat kif ukoll is-settur pubbliku li għandu jiffaċilita inizjattivi privati, jagħti spinta għall-investiment fil-bażi ta’ manifattura u, f’dak li jirrigwarda s-settur pubbliku, jimmondernizza l-ġestjoni finanzjarja u jirrazzjonaliżża l-infiq pubbliku.

Il-Ftehim ta' Assoċjazzjoni bejn iż-żewġ partijiet jipprovdi qafas għaż-żieda fill-kummerċ u l-investiment, u l-partijiet għandhom japprofittaw kemm jista’ jkun minn dan il-ftehim biex jgħinu lil xulxin jegħlbu l-kriżi ekonomika attwali. Għalhekk l-UE u l-Alġerija jaffermaw mill-ġdid ix-xewqa tagħhom li jagħmlu l-aħjar użu possibbli mill-Ftehim ta' Assoċjazzjoni tal-2005, jikkonformaw miegħu bi sħiħ u jfittxu jiksbu bilanċ fl-interessi reċiproċi tagħhom. Valutazzjoni konġunta tal-Ftehim ta' Assoċjazzjoni hija parti minn dan il-proċess kontinwu.

Fuq l-isfond tal-prezzijiet instabbli tal-idrokarbur, il-Gvern Alġerin għamel mod li d-diversifikazzjoni tal-ekonomija tkun prijorità nazzjonali. Il-miżuri ta’ riforma li qed isiru issa b’dan il-ħsieb joffru opportunità għal kooperazzjoni ikbar fl-oqsma li, f’konformità mal-Ftehim ta’ Assoċjazzjoni, jikkontribwixxu għad-diversifikazzjoni u l-kompetittività tal-ekonomija Alġerina sabiex tiġi żviluppata l-firxa tal-esportazzjonijiet tagħha (b’mod speċjali ta’ prodotti oħra għajr l-idrokarbonji) għas-suq uniku Ewropew.

Konxji dwar l-importanza tal-klima tan-negozju fl-attrazzjoni ta’ investituri ġodda, l-Alġerija u l-UE jieħdu l-impenn, matul il-perjodu ta' programmazzjoni fil-kooperazzjoni bilaterali li jmiss, li jiffaċilitaw l-attivitajiet ekonomiċi privati, li jaħdmu flimkien biex itejjbu l-klima tan-negozju u l-politika tal-intrapriżi fl-Alġerija sabiex iħeġġu l-iżvilupp ta’ intrapriżi u l-industriji żgħar u ta' daqs medju (SMEs u SMIs), biex jagħmlu sforzi biex jiżviluppaw sħubija pubblika-privata, inkluż estera, industrijali u teknoloġika, biex jgħinu jimplimentaw strateġija tal-impjieg Alġerina integrata u biex isaħħu l-programm ta’ djalogu soċjali bipartit u tripartit tal-Alġerija. Il-partijiet jaqblu dwar l-importanza tal-appoġġ għall-programm Alġerin għat-tisħiħ tas-sistema bankarja u s-superviżjoni tagħha kif ukoll il-promozzjoni tal-iżvilupp tas-swieq kapitali sabiex tingħata għajnuna lin-negozji kollha, b’mod partikolari l-SMEs u l-SMIs kif ukoll start-ups, biex jiksbu finanzjament.

Konxi li ż-żgħażagħ huma l-vitalità tal-impriżi rispettivi tagħhom u importanti biex jindirizzaw l-isfidi ekonomiċi, soċjali u kulturali tagħhom, l-UE u l-Alġerija jieħdu l-impenn li jżidu l-isforzi tagħhom biex jappoġġaw iż-żgħażagħ u jidderieġu l-enerġiji tagħhom. Il-partijiet jaqblu li jużaw, b’mod partikolari, il-programmi u l-istrateġiji tal-UE dwar l-impjieg, l-edukazzjoni formali u tul il-ħajja u taħriġ vokazzjonali biex jikkooperaw, fid-dawl tal-Għanijiet ta’ Żvilupp Sostenibbli (SDGs), dwar l-appoġġ tal-iżvilupp ekonomiku u r-R&D (Riċerka u Żvilupp) fl-Alġerija, flimkien ma’ edukazzjoni (mill-preprimarja sa u inkluż l-edukazzjoni għolja, inkluż taħriġ vokazzjonali).

L-Alġerija u l-Unjoni Ewropea jieħdu l-impenn li jgħinu jiżviluppaw politika kulturali Alġerina li tgħin fl-ixprunar tal-iżvilupp ekonomiku u industrijali u tħeġġeġ skambji ma’ operaturi kulturali Ewropej (pereżempju, permezz tal-programm Ewropa Kreattiva).

L-UE u l-Alġerija se jsaħħu d-djalogu tagħhom dwar kummerċ skont il-Ftehim ta’ Assoċjazzjoni bil-għan li jappoġġaw relazzjoni bilanċjata ta’ kummerċ b’valur miżjud għoli u għat-tnaqqis u l-eliminazzjoni progressiva ta’ restrizzjonijiet fuq kummerċ ta’ oġġetti u servizzi.

F’rabta ma’ dan, il-partijiet se jonqsu milli jintroduċu kwalunkwe miżuri, għajr dawk kumpatibbli mad-dispożizzjonijiet u l-proċeduri tal-Ftehim ta' Assoċjazzjoni, li jistgħu jkunu ta’ ostakolu għall-kummerċ. Il-partijiet se jikkonsolidaw id-djalogu tagħhom dwar strument għad-difiża tal-kummerċ u l-għodod ta’ kooperazzjoni għall-kummerċ (fi ħdan il-qafas tal-kooperazzjoni industrijali Ewro-Mediterranja).

L-UE u l-Alġerija jaqblu wkoll li jużaw il-Ftehim ta' Assoċjazzjoni biex jistabilixxu djalogu dwar x’inhu l-aħjar mod kif jiġi attirat l-investiment barrani (u b’mod partikolari Ewropew). L-UE ttenni l-impenn tagħha li tappoġġa l-adeżjoni tal-Alġerija mal-Organizzazzjoni Dinjija tal-Kummerċ, b’mod partikolari permezz tal-konklużjoni ta’ ftehim bilaterali f’dan il-qafas.

Sabiex jappoġġjaw ir-riformi li qed jiġu implimentati progressivament mill-Alġerija (b’mod partikolari b’konnessjoni mas-sistema bankarja u amministrattiva tagħha u mal-armonizzazzjoni tar-regolamenti ma’ dawk tal-UE), il-partijiet jiddikjaraw li huma lesti, meta jasal iż-żmien, li jikkunsidraw jestendu r-relazzjonijiet kummerċjali tagħhom permezz ta’ negozjati addizzjonali dwar servizzi jew bil-għan li jiġi konkluż ftehim dwar protezzjoni tal-investiment. Il-partijiet jaqblu li dan il-proċess jista’ jkun akkumpanjat minn konferenzi u laqgħat oħra appoġġati mill-UE sabiex jiġu mobilizzati investituri potenzjali fl-Alġerija.

L-UE tieħu l-impenn li tidħol f’djalogu dwar l-implimentazzjoni tal-mudell Alġerin ġdid ta’ tkabbir ekonomiku bbażat fuq inizjattiva privata, intrapriża u intraprenditorija, sħubiji pubbliċi-privati, inkluż ma’ pajjiżi esteri, u l-ekonomija tal-għarfien. Huwa mudell imfassal biex joħloq ekonomija li hija kompetittiva, diversifikata, endoġena, inklużiva u attraenti għal investituri esteri.

Sabiex jgħinu fil-ħolqien ta’ ekonomija Alġerina diversifikata, l-UE u l-Alġerija identifikaw ukoll setturi oħra possibbli għall-kooperazzjoni permezz ta’ appoġġ u l-iskambju ta’ prattiċi tajba, informazzjoni u esperjenza: żvilupp rurali u agrikolu, sajd, l-ekonomija marittima, turiżmu (sostenibbli), akkwist pubbliku, statistika, armonizzazzjoni progressiva tar-regolamenti tekniċi Alġerini ma’ dawk tal-UE dwar l-akkreditazzjoni u l-appellazzjoni tar-regoli ta’ oriġini preferenzjali pan-Ewro-Mediterranji.

L-UE u l-Alġerija jixtiequ jħaffu l-pass fil-kooperazzjoni tagħhom dwar l-armonizzazzjoni tal-istandards Alġerini ma’ dawk tal-UE fis-setturi ta’ prijorità identifikati mill-partijiet kif ukoll dwar l-aġġornament tal-infrastruttura ta’ assigurazzjoni tal-kwalità bil-għan li jiġi nnegozjat ftehim dwar il-valutazzjoni tal-konformità u l-aċċettazzjoni ta’ prodotti industrijali (ACAA). Din il-ħidma tkun imfassla biex tintegra aħjar l-ekonomija Alġerina mal-katina ta' valur reġjonali u mondjali.

Fl-aħħarnett, il-partijiet jaqblu li jesploraw modi ta’ kooperazzjoni sabiex jgħinu biex jiżviluppaw it-teknoloġiji tal-informazzjoni u l-komunikazzjoni (ICT) fl-Alġerija biex jingħata appoġġ għal miżuri li jippromwovu l-kompetittività, il-klima tan-negozju u l-investiment, amministrazzjoni iktar effiċjenti u governanza mtejba tal-intrapriżi tas-settur pubbliku u s-sħubiji pubbliċi-privati għall-iżvilupp tal-SMEs u l-SMIs kif ukoll attivitajiet ta’ innovazzjoni.

Iż-żewġ partijiet jaqblu li jwaqqfu l-mekkaniżmi neċessarji għat-tisħiħ tal-kapaċitajiet tas-servizzi doganali tal-Alġerija, b’mod partikolari fir-rigward tal-iskema Operatur Ekonomiku Awtorizzat, il-falsifikazzjoni u l-iskambju ta’ informazzjoni, fost oħrajn dwar il-valur doganali. 

B’żieda ma’ dan, il-partijiet jikkonsidraw li l-kooperazzjoni fil-qasam tal-istatistika tibqa’ importanti, b’mod partikolari f’dak li jirrigwarda l-armonizzazzjoni progressiva tas-sistemi kontabilistiċi nazzjonali.

III. Sħubija fl-enerġija, l-ambjent u l-iżvilupp sostenibbli

L-UE u l-Alġerija jieħdu l-impenn li jiżviluppaw sħubija strateġika ta' benefiċċju reċiproku fil-qasam tas-sigurtà tal-enerġija. Dwar kwistjonijiet relatati mal-enerġija, l-Alġerija u l-Unjoni Ewropea huma marbuta minn interessi strateġiċi reċiproċi. L-Alġerija ilha minn żmien twil waħda mill-provvedituri tal-gass l-iktar importanti u l-iktar affidabbli tal-UE. L-UE, min-naħa tagħha, tibqà klijent ewlieni tal-Alġerija.

Fl-għarfien li l-enerġija tibqa’ waħda mill-ixprunaturi tal-iżvilupp ekonomiku sostenibbli, l-UE u l-Alġerija jaffermaw mill-ġdid l-interessi strateġiċi kondiviżi tagħhom u jieħdu l-impenn li jikkonsolidaw is-sħubija tagħhom f’dan il-qasam fi ħdan il-qafas tad-Djalogu ta’ Livell Għoli stabbilit bejn il-partijiet dwar kummerċ fl-enerġija, il-promozzjoni tal-enerġija rinnovabbli u l-effiċjenza enerġetika. Fid-dawl ta’ dan, il-partijiet jieħdu l-impenn li jikkooperaw dwar l-iskambju ta’ informazzjoni dwar il-provvista fuq terminu medju u twil u previżjonijiet ta’ domanda għall-enerġija, inkluż forom ta’ enerġija rinnovabbli. L-UE tibqa’ wkoll lesta biex żżid l-appoġġ tagħha għall-implimentazzjoni tal-Programm 2030 tal-Alġerija għall-Enerġija Rinnovabbli u Effiċjenza Enerġetika bil-għan li tagħmel użu sħiħ mill-potenzjal konsiderevoli tal-Alġerija f’dan il-qasam.

L-Alġerija u l-UE jaqblu li jesploraw il-miżuri possibbli għal żieda fl-investiment, it-tisħiħ u l-iżvilupp ta’ konnessjonijiet tal-elettriku fl-Ewropa u fil-Mediterran u l-promozzjoni ta’ taħriġ u t-trasferiment tat-teknoloġija, innovazzjoni, għarfien u kompetenzi mill-UE għall-Alġerija.

Konxji dwar l-obbligi għall-ġenerazzjonijiet futuri, l-UE u l-Alġerija jieħdu l-impenn li jgħaqqdu din is-sħubija dwar l-enerġija ma’ kooperazzjoni msaħħa dwar il-mitigazzjoni tat-tibdil fi u l-adattament għall-klima, bil-għan li l-Ftehim ta' Pariġi u l-kontribuzzjonijiet determinati fuq bażi nazzjonali jiġu implimentati bis-sħiħ. Il-partijiet jieħdu l-impenn li jgħinu fl-integrazzjoni ta’ azzjoni dwar it-tibdil fil-klima f’politiki nazzjonali kif ukoll fil-monitoraġġ, rapportar u verifikazzjoni tal-emissjonijiet.

Fil-qasam tal-ambjent, il-partijiet jieħdu l-impenn li jippromwovu ġestjoni sostenibbli tar-riżorsi tagħhom (b’mod partikolari ir-riżorsi tal-ilma), il-governanza tajba, l-integrazzjoni tal-prattiki ambjentali tajba fl-attivitajiet kollha tagħhom, is-sistema tal-valutazzjoni tal-impatt u aċċess imtejjeb għall-informazzjoni. Jieħdu wkoll l-impenn li jsaħħu l-kooperazzjoni tagħhom fl-implimentazzjoni tal-impenji internazzjonali tagħhom, b’mod partikolari l-Konvenzjoni ta’ Barċellona għall-protezzjoni tal-ambjent marittimu u r-reġjun tax-xatt tal-Mediterran, kif ukoll kooperazzjoni reġjonali dwar it-tindif mit-tniġġis tal-Mediterran.

IV. Djalogu dwar strateġija u sigurtà

L-UE u l-Alġerija jaqblu li jippromwovu djalogu ta’ strateġija u sigurtà fil-konfront tal-isfidi ta’ sigurtà komuni u ta’ żvilupp.

Għal bosta snin, l-Alġerija ilha tagħti kontribut ewlieni biex trawwem il-paċi, l-istabilità u s-sigurtà fir-reġjun, b’mod partikolari fis-Saħel, billi tipproteġi l-fruntieri tagħha u tieħu sehem attiv fid-diplomazija bħala pajjiż ġirien: appoġġat il-Gvern ta' Kunsens Nazzjonali tal-Libja u medjazzjoni internazzjonali fil-Mali, li wassal għal ftehim ta’ paċi u rikonċiljazzjoni nazzjonali li issa irid jiġi implimentat.

Fid-dawl tar-rwol reġjonali li għandhom, l-Alġerija u l-UE jaqblu li jsaħħu d-djalogu sabiex jiżviluppaw is-sħubija għall-paċi u s-sigurtà, inkluż fi ħdan fora internazzjonali u reġjonali bħan-Nazzjonijiet Uniti u l-Unjoni Afrikana jew fi ħdan il-qafas ta’ djalogi eżistenti bejn l-UE u fora bħal-Lega tal-Istati Għarab, Ewropa-Afrika, id-Djalogu 5+5, l-Unjoni għall-Mediterran, il-Fondazzjoni Anna Lindh u l-Forum Globali Kontra t-Terroriżmu. Jieħdu wkoll l-impenn li jisfruttaw opportunitajiet għal kooperazzjoni triangolari li tippermettilhom li jfasslu azzjonijiet konġunti biex jiżviluppaw u jsaħħu l-abilità li jirreżistu u jiġġieldu t-theddid ta’ terroriżmu u jindirizzaw il-konessjonijiet tiegħu mal-kriminalità organizzata, b’mod partikolari t-traffikar ta’ droga.

L-UE u l-Alġerija jaqblu li jikkonsultaw mill-qrib dwar kwistjonijiet reġjonali u internazzjonali ta’ interess komuni bil-għan li jikkontribwixxu għar-riżoluzzjoni politika ta’ kriżijiet u għall-paċi u s-sigurtà fir-reġjun.

Fl-isforzi konġunti u sostnuti tagħhom biex jipprevjenu u jiġġieldu t-terroriżmu, ir-radikalizzazzjoni fil-forom kollha tagħha, il-kriminalità organizzata, it-traffikar ta’ droga u traffikar ta' bnedmin, il-partijiet jieħdu l-impenn li jiżviluppaw id-djalogu tagħhom u jżidu l-kooperazzjoni tagħhom fil-ġlieda kontra t-terroriżmu, b’mod partikolari fi ħdan il-Forum Globali Kontra t-Terroriżmu, u l-kriminalità organizzata transfruntiera. Din il-kooperazzjoni se tkopri wkoll il-ġestjoni ta’ riskji kimiku, bijoloġiku, radjoloġiku u nukleari (CBRN), il-monitoraġġ ta’ trasferiment leċitu ta’ armi u l-ġlieda kontra t-traffikar illeċitu ta' armi, inkluż armi ħfief.

Il-partijiet jaqblu li jippromwovu l-iskambju ta’ esperjenza u għarfien, b’mod partikolari fil-qasam taċ-ċiberkriminalità, biex isaħħu l-kapaċitajiet tal-Mekkaniżmu tal-Unjoni Afrikana għall-Kooperazzjoni tal-Pulizija (AFRIPOL), biex jikkollegaw dan tal-aħħar mal-Europol u l-aġenzija tal-Unjoni Ewropea għat-Taħriġ tal-Infurzar tal-Liġi (CEPOL) u biex jappoġġaw iċ-Ċentru Afrikan għar-Riċerka u l-Istudju dwar it-Terroriżmu (ACSRT).

L-UE u l-Alġerija jaqblu li jimplimentaw bis-sħiħ l-arranġament amministrattiv li reċentement iffirmaw biex jipprevjenu, jħejju għal u jirrispondu għad-diżastri, kemm naturali u ta’ oriġini umana, u li jirrispondu għal riskji teknoloġiċi u ekoloġiċi, b’mod partikolari billi jżommu u jsaħħu l-kapaċitajiet tagħhom ta’ allarm bikri, sorveljanza, prevenzjoni, tħejjija u ġestjoni permezz ta’ kooperazzjoni bejn il-korpi inkarigati mill-protezzjoni ċivili.

Il-partijiet jaqblu li jibdew jikkooperaw fuq it-tisħiħ tal-kapaċitajiet tal-forza tas-servizzi doganali u tal-fruntiera Alġerini.

V. Dimensjoni umana, migrazzjoni u mobilità

L-UE u l-Alġerija jieħdu l-impenn li jagħtu l-importanza meħtieġa għat-tisħiħ tad-dimensjoni umana fir-relazzjonijiet bilaterali tagħhom u jaqblu li l-migrazzjoni u l-mobilità huma fiċ-ċentru ta’ din id-dimensjoni. Jaqblu li jikkooperaw fil-promozzjoni ta’ djalogu kulturali u interreliġjuż fir-rispett ta’ dak li huwa distint u differenti għal kull parti u għall-ġlieda kontra l-emerġenza tal-estremiżmu.

Konxji kif inhuma li l-flussi migratorji bejn l-UE u l-Alġerija jirrappreżentaw mhux biss opportunità sostanzjali għall-iżvilupp uman, kulturali, ekonomiku, soċjali u xjentifiku iżda wkoll sfida jekk dawn ma jiġux ikkontrollati kif xieraq, b’mod partikolari fil-kuntest reġjonali attwali, l-UE u l-Alġerija jaqblu, abbażi tal-approċċ globali, bilanċat u miftiehem fis-samit ta’ Valletta dwar il-migrazzjoni, li jkollhom djalogi regolari fil-livelli l-aktar xierqa li jkopru t-temi kollha relatati mal-mobilità, il-migrazzjoni u d-dritt għall-ażil.

F’dan il-kuntest, l-UE u l-Alġerija jieħdu l-impenn li jeżaminaw liema miżuri jistgħu jieħdu biex progressivament itejjbu l-kundizzjonijiet ta’ moviment taċ-ċittadini tagħhom u li jirriammettu, b’kont dovut għad-drittijiet tal-bniedem, dawk li l-istatus residenzjali tagħhom huwa illegali skont il-proċeduri fis-seħħ. 

L-UE u l-Alġerija jipproponu wkoll li jibdew jikkooperaw fuq il-ġestjoni tal-migrazzjoni u, f’konformità mal-istandards nazzjonali fis-seħħ, id-drittijiet tal-ħaddiema migranti, u dwar l-iżvilupp ta’ miżuri, b’mod speċjali għal persuni vulnerabbli, biex jipprevjenu l-migrazzjoni irregolari billi jiġu indirizzati l-kawżi ewlenin ta’ dan il-fenomenu fir-reġjuni b'pressjoni migratorja għolja.

L-UE se tappoġġa l-isforzi tal-Alġerija biex tiġġestixxi l-flussi migratorji. Iż-żewġ partijiet jieħdu wkoll l-impenn li jaħdmu flimkien bil-għan li jimmaniġġaw il-migrazzjoni regolari u l-mobilità tal-individwi billi jsaħħu d-djalogu tagħhom u l-kooperazzjoni fuq materji konsulari, dwar il-faċilitazzjoni tal-proċeduri tal-ħruġ tal-viżi, dwar kontroll fil-fruntieri, il-ġlieda kontra l-frodi tad-dokumenti u l-kutrabandu tal-migranti kif ukoll isegwu politika ta’ ritorn u integrazzjoni sostenibbli tal-migranti irregolari, bil-għan li titjieb is-sistema ta’ protezzjoni internazzjonali u l-ażil.

Iż-żewġ partijiet jaqblu li jwettqu skambji ta’ opinjonijiet f’livell xieraq dwar ir-riammissjoni u dwar l-iffaċilitar tal-kwistjoni tal-viżi b’kont dovut għall-eżistenza ta’ ftehimiet bilaterali f’dawn il-materji ma’ ċerti Stati Membri tal-UE.

L-UE se tkompli tipproteġi d-drittijiet taċ-ċittadini Alġerini stabbiliti fl-UE bi sħiħ u se teżamina miżuri biex ir-rwol u l-kontribuzzjoni tagħhom tissaħħaħ b’mod ulterjuri għall-iżvilupp tal-Alġerija.     

Iż-żewġ partijiet jaqblu li jsaħħu iktar il-kooperazzjoni tagħhom - fil-qafas tad-Djalogu bejn l-UE u l-Afrika, inkluż fuq bażi triangolari – dwar il-firxa sħiħa ta’ kwistjonijiet marbuta mal-migrazzjoni u l-mobilità li l-UE u l-Alġerija jieħdu l-impenn li jmexxu oltre.                 

Fil-kuntest tas-samit ta’ Valletta dwar il-migrazzjoni, il-ħolqien ta’ Fond Fiduċjarju ta' Emerġenza għall-Afrika, li jinkludi b’mod speċifiku dimensjoni tal-Afrika ta’ Fuq, u ta’ inizjattivi oħra bħall-Pjan ta' Investiment Estern għall-Ewropa se jikkontribwixxu għall-implimentazzjoni tal-proġetti ta’ migrazzjoni u mobilità maqbula miż-żewġ partijiet.

**

* * *

**