IL-KUMMISSJONI EWROPEA

Brussell, 6.12.2017

COM(2017) 822 final

KOMUNIKAZZJONI TAL-KUMMISSJONI

STRUMENTI BAĠITARJI ĠODDA GĦAL ŻONA TAL-EURO STABBLI FI ĦDAN IL-QAFAS TAL-UNJONI

1.DAĦLA

Fid-diskors tiegħu tal-2017 dwar l-Istat tal-Unjoni u l-Ittra ta’ Intenzjoni li takkumpanjah, il-President Juncker ħabbar l-intenzjoni tal-Kummissjoni li tagħmel proposti konkreti għall-ħolqien ta’ linja baġitarja taż-Żona tal-Euro dedikata fil-baġit tal-UE, li tipprovdi għal dan li ġej: 
(1) assistenza għar-riforma strutturali, filwaqt li tibni fuq il-Programm ta’ Appoġġ għar-Riforma Strutturali tal-Kummissjoni; (2) funzjoni ta’ stabbilizzazzjoni; (3) garanzija ta’ kontinġenza għall-Unjoni Bankarja; u (4) strument ta’ konverġenza biex tingħata l-għajnuna ta’ qabel l-adeżjoni lil Stati Membri fi triqithom lejn sħubija fiż-Żona tal-Euro.

Dawn l-ideat huma spjegati aktar f’din il-Komunikazzjoni, li hija parti minn pakkett ta’ inizjattivi biex japprofondixxu l-Unjoni Ekonomika u Monetarja tal-Unjoni 1 . Il-pakkett huwa msejjes b’mod partikolari fuq ir-Rapport tal-Ħames Presidenti dwar it-twettiq tal-Unjoni Ekonomika u Monetarja tal-Ewropa tat-22 ta’ Ġunju 2015 2 u dwar id-Dokument ta’ Riflessjoni tal-Kummissjoni dwar l-approfondiment tal-Unjoni Ekonomika u Monetarja tal-31 ta’ Mejju 2017 3 .

L-approfondiment tal-Unjoni Ekonomika u Monetarja u l-immodernizzar tal-finanzi pubbliċi tal-UE huma partijiet ewlenin fid-dibattitu dwar il-futur tal-Ewropa mibdi mill-White Paper tal-Kummissjoni tal-1 ta’ Marzu 2017 4 . Dan kien sottolineat aktar fid-Dokument ta’ Riflessjoni dwar il-futur tal-finanzi tal-UE tat-28 ta’ Ġunju 2017 5 . Bħalissa, hemm opportunità li jitnedew proposti konkreti li jħarsu 'l quddiem kemm dwar il-futur tal-Unjoni Ekonomika u Monetarja kif ukoll dwar kif fil-futur il-finanzi pubbliċi tal-UE jistgħu jgħinu jwieġbu għall-isfidi identifikati.

Il-valur miżjud Ewropew huwa fil-qalba tad-dibattitu dwar il-finanzi pubbliċi Ewropej. Ir-riżorsi tal-UE jinħtieġ li jintużaw sabiex jiffinanzjaw beni pubbliċi Ewropej. Dawn il-prodotti huma ta' benefiċċju għall-UE kollha kemm hi u ma jistgħux jiġu żgurati b’mod effettiv minn Stat Membru wieħed waħdu. F’konformità mal-prinċipji ta’ sussidjarjetà u ta’ proporzjonalità, l-UE jinħtieġ li tieħu azzjoni meta toffri valur aħjar għal kull euro tal-kontribwenti meta paragunat ma’ azzjoni meħuda fil-livell nazzjonali, reġjonali jew lokali biss.

L-approfondiment tal-Unjoni Ekonomika u Monetarja huwa ta’ ġid kemm fiż-Żona tal-Euro kif ukoll fl-UE kollha kemm hi. Żona tal-Euro aktar integrata u bi prestazzjoni aħjar iġġib aktar stabbiltà u prosperità għal kulħadd fl-UE filwaqt li tiżgura li l-vuċi ekonomika tal-Ewropa tinstema’ b’mod qawwi fuq livell globali. L-istrumenti baġitarji ġodda ppreżentati f’din il-Komunikazzjoni jfittxu li jindirizzaw xi ħtiġijiet speċifiċi tal-Istati Membri taż-żona tal-euro u dawk fi triqithom biex jissieħbu fl-euro, filwaqt li wieħed iżomm f’moħħu l-ħtiġijiet u l-aspirazzjonijiet usa’ tagħhom bħala Stati Membri tal-UE. Filwaqt li tagħmel dan, hija għandha wkoll l-għan li timmassimizza s-sinerġiji bejn l-istrumenti eżistenti u futuri, billi dawn se jiġu ppreżentati mill-Kummissjoni f’Mejju tal-2018 bħala parti mill-proposti tagħha dwar il-Qafas Finanzjarju Multiannwali tal-UE għal wara l-2020.

2.IL-FINANZI PUBBLIĊI TAL-UE LLUM

Il-finanzi pubbliċi tal-UE jinkludu l-baġit tal-UE u bosta mekkaniżmi u strumenti ta’ finanzjament Ewropej u taż-żona tal-Euro oħrajn. Dawn jikkontribwixxu għall-iżvilupp ekonomiku u soċjali tal-Istati Membri u jappoġġaw il-prijoritajiet kondiviżi fil-livell tal-UE (ara l-appendiċi għal ħarsa ġenerali).

L-approfondiment tal-Unjoni Ekonomika u Monetarja huwa wieħed minn dawn il-prijoritajiet komuni. Huwa jeħtieġ azzjonijiet determinati minn Stati Membri individwali kif ukoll appoġġ adegwat mill-istrumenti ta’ koordinazzjoni tal-politika u baġitarji tal-UE. Din il-Komunikazzjoni tistabbilixxi proposti u ideat dwar kif l-aħjar li jintuża l-baġit tal-UE bħala mezz biex tissaħħaħ ir-reżiljenza tal-ekonomiji interdipendenti tagħna. Il-progress li sar kemm mill-pajjiżi tal-euro kif ukoll dawk mhux tal-euro fl-implimentazzjoni tar-riformi u l-konverġenza 'l fuq se jkun ta’ benefiċċju għal kulħadd.

Il-baġit tal-UE diġà għandu firxa komprensiva ta’ strumenti għad-dispożizzjoni tiegħu b’impatt sinifikanti, li jvarjaw minn għotjiet għal strumenti finanzjarji, iżda għadu relattivament żgħir. Huwa hu ta’ daqs ta’ madwar 1 % tat-total tal-Prodott Domestiku Gross tal-UE, il-baġit tal-UE huwa limitat fid-daqs meta mqabbel ma’ baġits nazzjonali u hija wkoll limitat mill-ħtieġa li jkun f’bilanċ annwali. Madankollu, l-istrumenti tal-UE għandhom impatt strateġiku u ekonomiku sinifikanti f’diversi Stati Membri u setturi. Bħalissa, il-baġit tal-UE jagħmel dan fil-biċċa l-kbira permezz ta’ għotjiet għal atturi ekonomiċi jew awtoritajiet pubbliċi mwassla direttament mill-Istituzzjonijiet Ewropej jew b’mod konġunt mal-Istati Membri. B’mod partikolari, f’xi Stati Membri, il-Fondi Strutturali u ta’ Investiment Ewropej f’dawn l-aħħar snin kienu responsabbli għal aktar minn nofs l-investiment pubbliku totali, u kkontribwixxew b’mod qawwi għall-proċess ta’ konverġenza ekonomika u soċjali tar-reġjuni u tal-pajjiżi madwar l-Ewropa. Barra minn hekk, peress li l-appoġġ tagħhom huwa mifrux fuq bosta snin, il-baġit tal-UE għandu wkoll ċertu effett stabilizzanti fuq il-livell tal-investimenti pubbliċi tul iż-żmien u, kif wera l-appoġġ mogħti lill-ekonomija Griega, dan jista’ jkollu rwol ta’ stabbilizzazzjoni f’każ ta’ diffikultajiet ekonomiċi 6 . Għalkemm limitat fid-daqs, hemm ukoll għadd ta’ strumenti fil-livell tal-UE li speċifikament jistgħu jgħinu jittaffew ix-xokkijiet ekonomiċi fil-livell nazzjonali jew lokali 7 . 

Mill-bidu ta’ din il-Kummissjoni, il-Fondi Strutturali u ta’ Investiment Ewropej u programmi oħra rilevanti ġew ikkumplimentati permezz tal-Fond Ewropew għal Investimenti Strateġiċi. L-hekk imsejjaħ “Pjan Juncker” appoġġa l-investiment privat madwar l-Ewropa u pprovda mod flessibbli biex jiġi mmultiplikat l-effetti ta’ fondi pubbliċi limitati sabiex jistimulaw l-investiment privat 8 .

F’każijiet speċifiċi ħafna, l-UE għandha s-setgħa li tissellef u ssellef. Dan huwa b’mod partikolari l-każ għall-ġestjoni għas-self ipprovdut taħt il-Faċilità tal-Bilanċ tal-Pagamenti 9 biex tappoġġja l-Istati Membri li mhumiex fiż-Żona tal-Euro f’każ ta’ diffikultajiet fil-bilanċ tal-pagamenti. Dan huwa wkoll il-każ għal self mogħti taħt il-Mekkaniżmu Ewropew ta’ Stabbilizzazzjoni Finanzjarja 10 . Billi l-fondi miġbura u s-self korrispondenti huma operazzjonijiet dahar ma’ dahar, ma hemm l-ebda impatt dirett fuq il-baġit tal-UE sakemm l-Istati Membri riċevituri kollha jonoraw l-obbligi tagħhom.

Barra minn għotjiet u self, l-appoġġ tal-UE sar dejjem aktar preżenti fil-forma ta’ appoġġ tekniku. Bit-twaqqif fl-2015 tas-Servizz ta’ Sostenn għar-Riforma Strutturali, il-Kummissjoni espandiet miżuri ta’ appoġġ tekniku u qed tgħin lill-Istati Membri, fuq talba tagħhom, biex iwettqu riformi f’oqsma ta’ politika ewlenin u biex isaħħu l-amministrazzjonijiet pubbliċi tagħhom.

L-azzjonijiet sostnuti direttament mill-baġit tal-UE huma kumplimentati b’għadd ta’ għodod u korpi Ewropej jew taż-żona tal-euro. Xi wħud minn dawn joperaw fil-qafas istituzzjonali tal-UE iżda barra mill-baġit tal-UE, bħal pereżempju l-Bank Ewropew tal-Investiment. Oħrajn huma barra l-qafas legali tal-Unjoni, bħall-Mekkaniżmu Ewropew ta’ Stabbiltà. Filwaqt li l-Bank Ewropew tal-Investiment jappoġġa proġetti li jikkontribwixxu għat-tkabbir u l-impjiegi fl-Ewropa u lil hinn, il-Mekkaniżmu Ewropew ta’ Stabbiltà jipprovdi assistenza finanzjarja lill-Istati Membri taż-Żona tal-Euro li qed jesperjenzaw diffikultajiet finanzjarji severi.

Il-fondi u l-istrumenti finanzjarji fil-livell tal-UE llum

Sors: il-Kummissjoni Ewropea. EFSM: Mekkaniżmu Ewropew ta' Stabbilità Finanzjarja. BoP: Bilanċ tal-Ħlasijiet.

Filwaqt li l-baġit tal-UE dejjem ippromwova l-konverġenza ekonomika u soċjali 'l fuq u l-kapaċità ta’ self disponibbli fil-livell tal-UE żdiedet f’dawn l-aħħar snin biex twieġeb għal ċirkostanzi estremi, l-istabbilizzazzjoni makroekonomika ma kinitx objettiv espliċitu għall-baġit tal-UE sa issa. L-esperjenza matul is-snin tal-kriżi wriet ukoll li l-arkitettura u l-iskop tal-finanzi pubbliċi tal-UE għadhom ma jaqblux b’mod sħiħ mal-ħtiġijiet speċifiċi tal-Unjoni Ekonomika u Monetarja — la għall-Istati Membri taż-Żona tal-Euro, u lanqas għall-Istati Membri fi triqthom biex jingħaqdu maż-Żona tal-Euro.

Ir-risposta għal dawn l-isfidi mhux bilfors trid ikun finanzjarja għall-ewwel. Diġà sar ħafna progress u jinħtieġ li jsir aktar biex jitjieb il-qafas regolatorju u ta’ politika kemm fil-livell tal-UE kif ukoll fil-livell nazzjonali. Pjan direzzjonali għal ħidma ulterjuri hija deskritta bħala parti mill-pakkett tal-lum 11 . 

Madankollu, fost it-tagħlimiet li nsiltu matul is-snin, tlieta sfidi konnessi u identifikati sew għandhom jiġu indirizzati aħjar mill-finanzi pubbliċi tal-UE:

(1)    Il-promozzjoni u l-appoġġ għar-riformi strutturali fl-Istati Membri sabiex tinkiseb reżiljenza akbar tal-istrutturi ekonomiċi u konverġenza aħjar tal-prestazzjonijiet. Dan huwa partikolarment il-każ għall-pajjiżi li jikkondividu munita unika iżda wkoll għall-Istati Membri fi triqithom biex jissieħbu maż-Żona tal-Euro, minħabba li strutturi b’saħħithom huma essenzjali għal parteċipazzjoni bla xkiel fiż-Żona tal-Euro. Is-snin tal-kriżi snin wrew biċ-ċar l-importanza ta’ strutturi ekonomiċi u soċjali moderni li jkunu jistgħu jirrispondu malajr għal xokkijiet sabiex tiġi evitata tbatija aggravanti ekonomika jew soċjali. Huma kellhom ukoll impatt imdaqqas, aggravat f’ċerti partijiet tal-Ewropa, f’termini ta’ output ekonomiku, qgħad, investiment u salvataġġi tal-banek. Huwa biss issa kważi għaxar snin wara li faqqgħet il-kriżi li hemm sinjali li l-proċess ta’ konverġenza fit-tul fl-istandards ta’ għixien reġa’ beda.

(2)    Biex l-Istati Membri taż-Żona tal-Euro jiġu appoġġati biex jirrispondu aħjar għaċ-ċirkostanzi ekonomiċi li qed jinbidlu malajr u jistabbilizzaw l-ekonomija tagħhom f’każ ta’ xokkijiet asimmetriċi kbar. Bħala riżultat tal-unifikazzjoni tal-politika monetarja fiż-żona tal-munita unika, l-istrumenti tal-politika makroekonomika f’idejn l-Istati Membri parteċipanti ma għadhomx l-istess. Filwaqt li kull pajjiż huwa differenti u d-daqs u l-istruttura tal-ekonomija huma importanti f’termini ta’ probabbiltà li jkunu esposti għal xokkijiet, il-kriżi ssottolinea l-limitazzjonijiet tal-mezzi disponibbli għal Stati Membri individwali biex jassorbu l-impatt ta’ xokkijiet asimmetriċi kbar, b’uħud minnhom jitilfu l-aċċess għas-suq biex jerġgħu jiffinanzjaw lilhom infushom. F’bosta każijiet, dan irriżulta f’reċessjoni fit-tul u effetti ta’ riperkussjoni negattivi għal Stati Membri oħra.

(3)    Li tinqata’ r-rabta bejn id-dejn sovran u s-sitwazzjoni tal-banek, biex inaqqsu r-riskji sistemiċi u tissaħħaħ il-kapaċità ta’ rispons kollettiv għal possibbittà ta’ fallimenti kbar tal-banek, anke biex jipprevjenu l-kontaġju. Mekkaniżmu ta’ garanzija ta’ kontinġenza biex tittejjeb il-kapaċità ta’ Fond Uniku ta' Riżoluzzjoni biex jindirizza riżoluzzjoni ta' bank diġà ntlaħaq qbil dwaru fl-2013 fil-prinċipju. Dan il-mekkaniżmu ta’ garanzija ta’ kontinġenza huwa maħsub biex jaġixxi bħala assigurazzjoni aħħarija u huwa importanti biex isaħħaħ aktar il-fiduċja fis-sistema bankarja Ewropea.

B’kont meħud ta’ dan, hemm modi biex jiġu żviluppati strumenti baġitarji komuni fil-livell tal-UE li jistgħu jikkontribwixxu għall-istabbiltà taż-Żona tal-Euro kif ukoll huma ta' benefiċċju għall-UE kollha kemm hi. Biex jiġi żgurat is-suċċess u l-effettività tagħhom, u biex tiġi massimizzata l-effiċjenza tagħhom għal min iħallas it-taxxa, dawn l-istrumenti jridu jiġu mfassla f’sinerġija sħiħa ma’ strumenti baġitarji oħra eżistenti f’qafas usa’ tal-Unjoni. Il-modernizzazzjoni tal-finanzi pubbliċi tal-UE, bi proposti mill-Kummissjoni li se ssegwi Mejju 2018, se tkun opportunità unika għall-UE u ż-Żona tal-Euro biex jarmaw ruħhom bil-mezzi meħtieġa.

3.FINANZI PUBBLIĊI TAL-UE MODERNIZZATI U ORJENTATI LEJN IL-FUTUR

Id-Dokument ta’ Riflessjoni dwar il-futur tal-finanzi tal-UE fforma l-bażi għal qafas baġitarju modern u li jħares 'il quddiem għal wara l-2010. F’konformità mad-diskors dwar l-Istat tal-Unjoni tal-President Juncker, din il-Komunikazzjoni tiffoka fuq erba’ funzjonijiet speċifiċi:

·Din il-Komunikazzjoni tippreżenta mezz ġdid biex jiġu appoġġati r-riformi nazzjonali identifikati fis-Semestru Ewropew ta’ koordinazzjoni tal-politika ekonomika, filwaqt li tibni l-appoġġ tekniku u baġitarju. L-ewwel pass propost għall-perjodu 2018-2020 fil-forma ta’ aġġustamenti mmirati għar-Regolament dwar id-Dispożizzjonijiet Komuni li jirregola l-Fondi Ewropej Strutturali u ta’ Investiment u rinfurzar tal-Programm ta’ Appoġġ għar-Riforma Strutturali attwali. Għall-Qafas Finanzjarju Pluriennali ta’ wara l-2020, il-Kummissjoni biħsiebha tippreżenta għodda ta’ riforma ġdida biex tappoġġa l-impenji ta’ riforma miftehma mil-Istati Membri finanzjarjament. Barra minn hekk, hija se tipproponi li ssaħħaħ l-appoġġ tekniku għall-perjodu wara l-2020, billi tibni fuq l-esperjenza tal-Programm ta’ Appoġġ għar-Riformi Strutturali.

·Din il-Komunikazzjoni tipproponi li twaqqaf faċilità speċifika ta’ konverġenza għall-Istati Membri fi triqthom biex jingħaqdu maż-Żona tal-Euro. Għall-perjodu 2018-2020, il-Kummissjoni tipproponi li toħloq fluss ta’ xogħol iddedikat permezz tal-Programm ta’ Appoġġ għar-Riforma Strutturali. Għall-perjodu ta’ wara l-2020, dan jinħtieġ li jinbidel f’faċilità apposta. L-għażla tal-prijoritajiet ta’ riforma ser tiġi diskussa u mmonitorjata bħala parti mis-Semestru Ewropew.

·Din il-Komunikazzjoni tistabbilixxi l-karatteristiċi prinċipali ta’ pjan ta’ emerġenza għall-Unjoni Bankarja. Dan jikkonsisti f’linja ta’ kreditu jew garanziji permezz tal-Mekkaniżmu Ewropew ta’ Stabbiltà / il-Fond Monetarju Ewropew, li għandu jiġi pprovdut direttament fil-Fond Uniku ta’ Riżoluzzjoni.

·Din il-Komunikazzjoni tippreżenta xi karatteristiċi ewlenin għall-introduzzjoni tal-funzjoni ta’ stabbilizzazzjoni bħala mezz biex jinżamm il-livell tal-investiment f’każ ta’ xokkijiet asimmetriċi kbar. Il-funzjoni ta’ stabbilizzazzjoni hija maħsuba għall-Istati Membri taż-Żona tal-Euro u jinħtieġ li jkunu miftuħa għall-Istati Membri l-oħra tal-UE. Dan jeħtieġ li jkun rifless fid-disinn finanzjarju eventwali.

Dawn il-funzjonijiet huma spjegati f’aktar dettall fit-taqsimiet sussegwenti. Madankollu, qabel ma nħarsu lejn id-dettalji, wieħed għandu jżomm f’moħħu numru ta’ prinċipji ġenerali.

·L-ewwel nett, filwaqt li ċerti funzjonijiet immiraw aktar il-bżonnijiet speċifiċi ta’ Stati Membri taż-Żona tal-Euro fuq naħa, u l-Istati Membri li ma ssiħbux fl-euro min-naħa l-oħra, kollha huma huma ankrati f’approċċ komuni tal-UE u viżjoni tal-qafas usa’ tal-UE. Stampa ċara tal-finanzi pubbliċi globali tal-UE — illum u għada — hija essenzjali fit-tfassil ta’ dawn l-istrumenti: din se tgħin biex issaħħaħ is-sinerġiji bejn l-atturi kollha u l-istrumenti ta’ finanzjament, tiġi evitata d-duplikazzjoni, u, fl-aħħar mill-aħħar, jiġi żgurat redditu ikbar għal kull euro li jintefaq b’mod kollettiv. Dan huwa dejjem aktar neċessarju minħabba li, hekk kif huwa mfakkar matul il-pakkett tal-lum, il-futur tal-euro u l-Istati Membri mhux fil-euro huwa marbut mill-qrib, u d-distinzjoni bejniethom hija dejjem inqas rilevanti matul iż-żmien.

·It-tieni nett, filwaqt li l-bqija ta’ dan id-dokument iħares prinċipalment lejn in-naħa tal-infiq tal-finanzi pubbliċi tal-UE, sistema modernizzata ta’ riżorsi proprji tista’ tikkontribwixxi wkoll fil-futur. Pereżempju, in-naħa tad-dħul tal-baġit tal-UE diġà jipprovdi ċertu livell ta’ stabbiltà ekonomika, b’mod partikolari permezz tar-riżorsi proprji bbażati fuq id-Dħul Nazzjonali Gross, li jammonta għal kważi 75 % tal-ammont totali tar-riżorsi proprji, u li jirrifletti l-prestazzjoni ekonomika relattiva. 12 Dan ifisser li bħalma n-naħa tal-infiq tal-baġit tal-UE evolviet matul iż-żmien, titjib ulterjuri jinħtieġ li jiġi kkunsidrat ukoll fuq in-naħa tad-dħul. 13 Sorsi possibbli ta’ dħul addizzjonali kienu pereżempju identifikati mill-Grupp ta’ Livell Għoli dwar ir-Riżorsi Proprji. 14  Dawn il-kunsiderazzjonijiet mhumiex żviluppati f’dan it-test iżda se jiġu esplorati fid-dawl tal-Qafas Finanzjarju Pluriennali ta’ wara l-2020. Dawn jista’ jkun kumplimentari għal dak li huwa ppreżentat hawn taħt.

·It-tielet nett, dawn il-funzjonijiet jinħtieġ li jaħdmu id f’id mal-qafas ta’ politika previst mis-Semestru Ewropew tal-koordinazzjoni tal-politika ekonomika, inkluż il-Patt ta’ Stabbiltà u Tkabbir. Is-Semestru Ewropew huwa l-għodda ewlenija għall-koordinazzjoni tal-politiki ekonomiċi tal-Istati Membri fil-livell tal-UE. Huwa jippermetti lill-Istati Membri biex jiddiskutu l-prijoritajiet ekonomiċi, soċjali u baġitarji tagħhom u li jimmonitorjaw il-progress f’waqtiet speċifiċi matul is-sena. Fil-kuntest tas-Semestru Ewropew, il-Patt ta’ Stabbiltà u Tkabbir u l-Proċedura ta’ Żbilanċi Makroekonomiċi jservu biex jiżguraw finanzi pubbliċi sodi u biex jevitaw riskji ta’ żbilanċi. Sar ukoll progress fl-istabbiliment ta’ rabta akbar bejn il-prijoritajiet tas-Semestru Ewropew u l-Fondi Strutturali u ta’ Investiment Ewropej, billi ġew introdotti kundizzjonijiet ex ante u makroekonomiċi 15 . Barra minn hekk, billi jsir l-aħjar użu tal-flessibbiltà integrata fir-regoli eżistenti tal-Patt ta’ Stabbiltà u Tkabbir, il-Kummissjoni attwali saħħet ir-rabta bejn l-investiment, ir-riformi strutturali u r-responsabbiltà fiskali, filwaqt ħadet kont aħjar tal-kundizzjonijiet ekonomiċi ċikliċi li jħabbtu wiċċhom magħhom l-Istati Membri. 16 B’ħarsa lejn il-ġejjieni, se jkun essenzjali li jkomplu jissaħħu l-koerenza u l-impatt ta’ dawn l-istrumenti kollha.

·Ir-raba’ nett, l-erba’ funzjonijiet diskussi hawnhekk huma interkonnessi mill-qrib. Dawn jistgħu joperaw bħala parti minn approċċ globali biex jiġi mmodernizzat il-qafas tal-UE. Minħabba l-attenzjoni ffokata fuq l-Unjoni Ekonomika u Monetarja, l-ispjegazzjonijiet naturalment jirreferu għall-prijoritajiet tal-UE u l-istrumenti ta’ finanzjament marbuta mal-impjiegi, it-tkabbir, l-investiment u l-istabbiltà makroekonomika. Madankollu, dan ma jippreġudikax elementi oħra tal-Qafas Finanzjarju Pluriennali proposti li se jsegwu f’Mejju 2018.

Għall-perjodu ta’ wara l-2020, huwa possibbli li wieħed ifassal it-triq ’il quddiem li timmassima l-impatt tal-finanzi pubbliċi tal-UE. Din it-triq ’il quddiem hija miġbura fil-qosor fil-grafika ta’ hawn taħt. Ħafna mill-elementi huma magħrufa sew: kif inhu l-każ illum, għadd ta’ fondi tal-UE u, b’mod partikolari, il-Fondi Strutturali u ta’ Investiment Ewropej ser ikomplu jeżistu bħala mezz biex titrawwem konverġenza reali, flimkien ma’ sorsi oħra ta’ finanzjament bħal dawk ipprovduti taħt il-“Pjan Juncker” u strumenti oħra fil-livell tal-UE. Irrispettivament mit-tip ta’ sors ta’ finanzjament, l-appoġġ xorta se jieħu waħda mit-tliet forom bażiċi li ġejjin: assistenza teknika, għotjiet jew self.

Prijoritajiet ta’ riforma nazzjonali xorta se jiġu identifikati mill-Istati Membri bħala parti mill-programmi nazzjonali annwali tagħhom fil-kuntest tas-Semestru Ewropew ta’ koordinazzjoni tal-politika ekonomika. Kif spjegat fl-Istħarriġ Annwali dwar it-Tkabbir tal-2018, 17 jeħtieġ li jitkomplew l-isforzi fuq l-implimentazzjoni tar-riformi li jinsabu għaddejjin, u dan ħafna drabi jieħu ż-żmien u diskussjoni. Din hija r-raġuni għaliex il-Kummissjoni qed tippromwovi aktar approċċ pluriennali u reviżjoni aktar kollettiva tal-impenji għar-riforma.

Flimkien mal-prijoritajiet ta’ riforma nazzjonali, l-Istati Membri ser jiżviluppaw il-prijoritajiet ta’ investiment tagħhom stess, li jista’ jiġi rifless fi pjattaforma nazzjonali ta’ investiment. Dawn il-pjattaformi se jġibu flimkien l-atturi rilevanti, f’livelli differenti ta’ awtorità, f’kull Stat Membru, sabiex jiġu definiti l-prijoritajiet ta’ investiment multiannwali, biex jappoġġaw proġetti ta’ pipelines, li jistgħu jkunu wkoll parti minn proġetti Ewropej, u biex jidentifikaw sorsi ta’ finanzjament u appoġġ, inkluż mill-UE.

L-immassimizzar tal-impatt tal-finanzi pubbliċi tal-UE: triq possibbli 'l quddiem

Sors: Il-Kummissjoni Ewropea

Filwaqt li din il-kostruzzjoni hija relattivament simili għar-realtajiet tal-lum, żewġ elementi ġodda se jiġu miżjuda. L-ewwel waħda hija l-għodda ta’ twassil tar-riforma li tkun tipprovdi aktar għotjiet biex jiġu appoġġati l-isforzi nazzjonali biex jimplimentaw ir-riformi identifikati bħala prijoritajiet fis-Semestru Ewropew. It-tieni waħda hija funzjoni ta’ stabbilizzazzjoni li tista’ tipprovdi l-appoġġ rapidu u tgħin biex jinżammu l-livelli tal-investiment nazzjonali f’każ ta’ xokkijiet asimmetriċi kbar, tipikament billi jimlew il-vojt fil-finanzjament ta’ proġetti ta’ pipelines li diġà jeżistu u / jew appoġġ għal titjib tal-ħiliet. Dawn iż-żewġ karatteristiċi ġodda huma spjegati aktar hawn taħt.

4.APPOĠĠ GĦAR-RIFORMA STRUTTURALI

Politiki nazzjonali xierqa huma essenzjali għall-funzjonament bla xkiel ta’ Unjoni Ekonomika u Monetarja aktar integrata. Billi ħafna oqsma ta’ politika kritiċi li huma deċiżivi jibqgħu primarjament f’idejn l-Istati Membri, il-koordinazzjoni tagħhom u s-sekwenzar ta’ riformi taħt is-Semestru Ewropew huwa essenzjali biex tiġi mmassimizzata l-effikaċja tagħhom, mhux biss fil-livell nazzjonali, iżda wkoll fil-livell tal-UE.

Aktar appoġġ għal riformi strutturali jista’ jinkiseb permezz ta’ żewġ komponenti komplementari:

a) l-għodda ta’ twassil ta’ riforma sabiex tappoġġja l-impenji ta’ riforma tal-Istati Membri, u

b) appoġġ tekniku għal azzjonijiet speċifiċi b'talba tal-Istati Membri.

Għodda ta’ twassil ta’ riforma sabiex tappoġġja l-impenji ta’ riforma tal-Istati Membri

Bil-għan li jingħata appoġġ lill-Istati Membri fl-implimentazzjoni tar-riformi identifikati fil-kuntest tas-Semestru Ewropew, il-Kummissjoni biħsiebha tipproponi għodod ġodda ta’ implimentazzjoni tar-riforma taħt il-Qafas Finanzjarju Pluriennali wara l-2020. Din l-għodda l-ġdida se tkun disponibbli biex l-Istati Membri jwettqu r-riformi diskussi fi djalogu mal-Kummissjoni u maqbula fl-impenji ta’ riforma.

Din ir-riforma l-għodda l-ġdida ta’ twassil tar-riforma tfittex li tappoġġa firxa wiesgħa ta’ riformi. L-enfasi jinħtieġ li tkun fuq dawk ir-riformi li jistgħu jikkontribwixxu l-aktar għar-reżiljenza tal-ekonomiji nazzjonali u jkollhom effetti sekondarji pożittivi fuq Stati Membri oħra. Dawn jinkludu riformi fis-swieq tal-prodotti u tax-xogħol, ir-riformi fiskali, l-iżvilupp tas-swieq kapitali, riformi biex itejbu l-ambjent tan-negozju kif ukoll l-investiment fil-kapital uman u r-riformi tal-amministrazzjoni pubblika.

Ir-riformi li għandhom jiġu appoġġati għandhom jiġu identifikati f’pakketti ta’ impenji għar-riforma pluriennali u jiġu mmonitorjati flimkien mal-Programmi Nazzjonali ta’ Riforma. L-impenji tar-riforma se jkunu proposti mill-Istati Membri nfushom u jkunu jinkludu sett ta’ miżuri ta’ riforma bi tragwardi u miri ċari (ara l-kaxxa hawn taħt). L-Istati Membri bi żbilanċi eċċessivi identifikati fil-Proċedura ta’ Żbilanċ Makroekonomiku se jiġu mistiedna jippreżentaw tali impenji ta’ riforma bħala mezz kif jiġu indirizzati kwistjonijiet li huma enfasizzati. Proċess ta’ evalwazzjoni bejn il-pari se jiżgura li l-proposti ta’ riforma jibbenefikaw mill-esperjenza ta’ Stati Membri oħra kif ukoll minn valutazzjoni mill-Kummissjoni.

Ladarba jiġi miftiehem pakkett ta’ impenji favur ir-riforma, il-monitoraġġ u r-rappurtar dwar l-implimentazzjoni ta’ l-għanijiet tiegħu jkun allinjat mas-Semestru Ewropew. Il-Programmi ta’ Riforma Nazzjonali se jkunu sors ta’ informazzjoni dwar il-progress u jinħtieġ li jipprovdu informazzjoni dwar passi lejn it-tlestija tar-riforma. Ir-Rapporti tal-Pajjiżi annwali magħmula mis-servizzi tal-Kummissjoni se jipprovdu evalwazzjoni aġġornata dwar il-progress fir-riforma. Il-proċess għall-għoti ta’ appoġġ taħt dan l-istrument jeħtieġ li jkun kalibrat bir-reqqa sabiex jiġi żgurat li d-deċiżjoni hija f’waqtha u għandha biżżejjed sjieda. 

Għall-perjodu 2018–2020, sistema bħal din tista’ tiġi ttestjata f’fażi pilota billi toffri l-possibbiltà lill-Istati Membri biex jużaw parti mir-riserva ta’ prestazzjoni tal-Fondi Ewropej Strutturali u ta’ Investiment kurrenti biex jappoġġaw riformi minflok proġetti speċifiċi. Għal dan il-għan, l-emendi għar-Regolament dwar id-Dispożizzjonijiet Komuni huma ppreżentati llum bħala parti mill-pakkett.

Appoġġ tekniku għal azzjonijiet speċifiċi fuq talba ta’ Stat Membru

Bħala komplement, il-Kummissjoni qed tippjana li ttejjeb b'mod sinifikanti l-appoġġ tekniku li toffri lill-Istati Membri għat-tfassil u l-implimentazzjoni tar-riformi. Wara li tnieda l-Programm ta’ Appoġġ għar-Riforma Strutturali, it-talbiet għal appoġġ mill-Istati Membri qabżu b'mod sinifikanti l-ammont ta' fondi disponibbli għaċ-ċikli annwali (ara l-kaxxa hawn taħt).

Bħala l-ewwel pass, il-Kummissjoni tipproponi li tirdoppja l-pakkett finanzjarju tal-Programm ta’ Appoġġ għar-Riforma Strutturali attwali, u b'hekk iġġibu għal EUR 300 miljun għall-perjodu sal-2020, ukoll biex tkopri l-ħtiġiet tal-Istati Membri fi triqithom biex jingħaqdu mal-euro (ara hawn taħt) Dan jippermetti l-iskjerament rapidu ta’ appoġġ tekniku addizzjonali għar-riformi strutturali previsti fil-mument kurrenti. Fuq il-bażi ta’ din l-esperjenza, il-Kummissjoni beħsiebha wkoll tipproponi programm ta' segwitu għall-Programm ta’ Appoġġ għar-Riforma Strutturali taħt il-Qafas Finanzjarju Pluriennali ta' wara l-2020.

5.FAĊILITÀ DDEDIKATA TA’ KONVERĠENZA GĦALL-ISTATI MEMBRI FI TRIQTHOM BIEX JADOTTAW L-EURO

L-euro hija l-munita tal-UE 18 u l-Istati Membri kollha - ħlief id-Danimarka u r-Renju Unit - huma legalment impenjati li jingħaqdu fiż-żona tal-euro eventwalment. Bħal ma qal il-President Juncker fid-Diskors dwar l-Istat tal-Unjoni tiegħu tal-2017: “L-euro hija intenzjonata li tkun il-munita unika tal-Unjoni Ewropea kollha kemm hi. L-Istati Membri kollha, ħlief għal tnejn minnhom, huma obbligati u intitolati li jissieħbu fiż-żona tal-euro ladarba jissodisfaw il-kundizzjonijiet kollha. L-Istati Membri li jridu jadottaw l-euro għandhom ikunu jistgħu jagħmlu dan.”

Kif previst fl-Artikolu 140 tat-Trattat dwar il-Funzjonament tal-UE, l-Istati Membri jridu jkunu kisbu grad għoli ta’ konverġenza sostenibbli sabiex jadottaw l-euro. Dan jiġi vvalutat abbażi tat-twettiq tal-erba’ kriterji ta' konverġenza elenkati fl-Artikolu 140 u fil-Protokoll Nru 13 anness mat-Trattati tal-Unjoni. Minbarra dawn il-kriterji formali, ir-reżiljenza tal-istrutturi ekonomiċi hija wkoll essenzjali għat-tranżizzjoni u l-parteċipazzjoni bla xkiel fl-euro, b'mod partikolari biex jiġu assorbiti x-xokkijiet.

Ir-reżiljenza tal-ekonomiji tiddependi fuq numru ta’ fatturi. L-Istati Membri għandhom jimmaniġġjaw il-baġits tagħhom skont il-prinċipji ta’ ġestjoni finanzjarja pubblika soda, joħolqu buffers fiskali fi żminijiet tajbin u jiżguraw redditu għoli fuq in-nefqa pubblika, inkluż permezz ta' amministrazzjonijiet pubbliċi li jiffunzjonaw tajjeb. L-istituzzjonijiet regolatorji u superviżorji tagħhom għandhom ikunu lesti biex jipparteċipaw fl-Unjoni Bankarja. Swieq tax-xogħol u tal-prodotti li jiffunzjonaw sewwa għandhom jippermettu l-espansjoni rapida ta’ attivitajiet ġodda u livelli għoljin ta' impjiegi u produttività.

Bħala parti mill-attivitajiet ta’ assistenza teknika tagħha, il-Kummissjoni tipproponi li twaqqaf fluss tax-xogħol iddedikat biex toffri appoġġ immirat lejn l-Istati Membri fi triqthom lejn l-adeżjoni fl-euro. L-appoġġ tekniku se jiġi offrut fuq talba u se jkopri l-politiki kollha li jistgħu jgħinu biex jintlaħaq livell għoli ta’ konverġenza, bħal appoġġ għal riformi fl-oqsma tal-ġestjoni finanzjarja pubblika, l-ambjent kummerċjali, is-settur finanzjarju, is-swieq tax-xogħol u tal-prodotti, u l-amministrazzjoni pubblika.
Dan l-appoġġ tekniku se jiġi ffinanzjat permezz tal-Programm ta’ Appoġġ għar-Riforma Strutturali. Se jkun kompletament volontarju u offrut mingħajr kofinanzjament mill-Istati Membri benefiċjarji. Din il-proposta hija riflessa fl-emenda għar-Regolament tal-Programm ta’ Appoġġ għar-Riforma Strutturali ppreżentat flimkien ma' dan il-pakkett.

Għall-perjodu wara l-2020, il-Kummissjoni se tipproponi faċilità ddedikata ta’ konverġenza, bħala parti mis-segwitu għall-Programm ta' Appoġġ għar-Riforma Strutturali sabiex tappoġġa lill-Istati Membri fit-tħejjija konkreta tagħhom għall-parteċipazzjoni bla xkiel fiż-żona tal-euro. Dan huwa irrispettivament mill-proċess formali lejn l-adozzjoni tal-euro, li huwa parti minn proċess ta' monitoraġġ speċifiku 19 . 

L-Istati Membri kkonċernati jistgħu wkoll jiddeċiedu, diġà minn issa, li jipprogrammaw mill-ġdid parti mill-baġit tal-assistenza teknika tagħhom disponibbli taħt il-Fondi Strutturali u ta' Investiment Ewropej għal proġetti li għandhom ikunu appoġġati mis-Servizz ta’ Appoġġ għar-Riforma Strutturali. Il-progress fir-riformi fuq il-post, inklużi dawk marbuta mal-għodda ta' twassil ta’ riforma ppreżentata hawn fuq, se jkompli jiġi sorveljat fil-kuntest tas-Semestru Ewropew.

6.GARANZIJA TA’ KONTINĠENZA GĦALL-UNJONI BANKARJA

Il-ħolqien ta’ garanzija għall-Fond Uniku ta' Riżoluzzjoni kien maqbul mill-Istati Membri fl-2013, bħala komplement għall-ftehim politiku dwar ir-Regolament dwar il-Mekkaniżmu Uniku ta’ Riżoluzzjoni 20 . Bħala assigurazzjoni tal-aħħar rikors f'każ ta’ riżoluzzjoni bankarja, garanzija komuni tiġi attivata biss fil-każ li r-riżorsi disponibbli fil-Fond Uniku ta' Riżoluzzjoni ma jkunux biżżejjed biex jiffinanzjaw ir-riżoluzzjoni tal-bank/banek ikkonċernat(i). Dan itejjeb il-fiduċja tal-partijiet kollha kkonċernati fl-azzjonijiet li għandhom jittieħdu mill-Bord Uniku ta’ Riżoluzzjoni.

Erba’ snin wara, din il-garanzija għadha mhix operattiva. L-indirizz tal-Istat tal-Unjoni ta’ Settembru 2017 u l-Komunikazzjoni ta' Ottubru 2017 dwar it-tlestija tal-Unjoni Bankarja 21 jenfasizzaw il-ħtieġa li din il-garanzija ssir operattiva bħala kwistjoni ta' prijorità.

Id-Dokument ta’ Riflessjoni dwar l-approfondiment tal-Unjoni Ekonomika u Monetarja identifika ċerti kriterji li l-garanzija għandha tilqa’ biex tkun operattiva f'każ ta’ kriżi. Għandha tkun ta’ daqs adegwat biex tkun tista' twettaq ir-rwol tagħha u tkun tista’ tiġi attivata malajr fi żminijiet ta' kriżi. Għandha tkun ukoll newtrali fiskalment, minħabba li r-Regolament dwar il-Mekkaniżmu Uniku ta’ Riżoluzzjoni jistipula li s-settur bankarju fl-Unjoni Bankarja għandu jirrimborsa kull ħlas potenzjali mill-Fond Uniku ta' Riżoluzzjoni.

Garanzija komuni permezz tal-Mekkaniżmu Ewropew ta’ Stabbiltà / Fond Monetarju Ewropew

Illum il-Kummissjoni qed tressaq proposta għat-twaqqif ta’ Fond Monetarju Ewropew li jipprevedi li l-Fond Monetarju Ewropew futur għandu jipprovdi linja ta' kreditu jew garanziji direttament lill-Fond Uniku ta' Riżoluzzjoni.

Ħafna Stati Membri esprimew l-appoġġ tagħhom għall-integrazzjoni tal-funzjoni ta’ garanzija fil-Mekkaniżmu Ewropew ta’ Stabbiltà. Il-Kummissjoni tilqa’ l-ħidma preparatorja teknika li diġà twettqet għal dan il-għan. Din hija wkoll l-iktar soluzzjoni pragmatika u effiċjenti. Il-Mekkaniżmu Ewropew ta’ Stabbiltà (fil-ġejjieni l-Fond Monetarju Ewropew) jibni fuq l-esperjenza u r-rekord ippruvat tiegħu ta' sfruttar tas-swieq, anki f'ambjent ta’ sfida.

Dan l-arranġament għandu jiġi estiż kif meħtieġ biex jinkludi fuq l-istess livell il-membri kollha tal-Unjoni Bankarja. Kull meta Stat Membru ġdid jissieħeb fl-Unjoni Bankarja mingħajr ma jingħaqad maż-żona tal-euro, għandu jipprovdi faċilità parallela nazzjonali flimkien mal-appoġġ tal-Fond Monetarju Ewropew għall-Fond Uniku ta’ Riżoluzzjoni. Arranġamenti xierqa ta’ governanza għandhom jiżguraw li l-interessi leġittimi tal-Istati Membri li mhumiex taż-żona tal-euro li jipparteċipaw fl-Unjoni Bankarja jiġu kkunsidrati. Dan hu previst fil-proposta tal-lum għall-ħolqien ta’ Fond Monetarju Ewropew.

Il-governanza

Filwaqt li jirrikonoxxi l-importanza tal-ġestjoni tal-falliment ta’ bank filwaqt li jiġi evitat kull kontaġju jew tfixkil fl-istabilità finanzjarja, ir-Regolament dwar il-Mekkaniżmu Uniku ta' Riżoluzzjoni jipprovdi arranġamenti speċifiċi għat-teħid ta’ deċiżjonijiet. Il-proċeduri ta’ teħid ta' deċiżjonijiet għall-adozzjoni ta’ skema ta' riżoluzzjoni huma suġġetti għal skadenzi qosra sabiex ikunu jistgħu jitlestew, meta meħtieġ matul il-lejl, qabel ma jerġgħu jinfetħu s-swieq 22 .

Il-garanzija għandha tkun disponibbli fil-mument meta l-iskema tar-riżoluzzjoni tidħol fis-seħħ. Fil-każ li jkunu meħtieġa ammonti addizzjonali għal dawk disponibbli fil-Fond Uniku ta' Riżoluzzjoni (jiġifieri l-garanzija), il-proċess tat-teħid tad-deċiżjonijiet tal-Fond Monetarju Ewropew dwar l-użu tal-garanzija għandu jkun rapidu u prevedibbli. Ma għandux jinvolvi kundizzjonalità addizzjonali lil hinn mir-rekwiżiti tar-Regolament dwar il-Mekkaniżmu Uniku ta’ Riżoluzzjoni 23 . L-arranġamenti xierqa ta’ governanza għalhekk jeħtieġ li jkunu rapidi u affidabbli, u li jiżguraw trattament ugwali fl-Unjoni Bankarja.

7.FUNZJONI TA’ STABBILIZZAZZJONI

Funzjoni ta’ stabbilizzazzjoni fil-livell Ewropew tipprovdi l-possibbiltà li tattiva r-riżorsi malajr biex tindirizza xokkijiet li ma jistgħux jiġu ġestiti fil-livell nazzjonali biss. Ir-Rapport tal-Ħames Presidenti u d-Dokument ta’ Riflessjoni dwar l-approfondiment tal-Unjoni Ekonomika u Monetarja stabbilixxew ir-raġunament għal tali strument u ġew identifikati prinċipji importanti, li jibqgħu validi 24 . L-aċċess għall-funzjoni ta’ stabbilizzazzjoni jkun soġġett għal kriterji ta' eliġibilità u mekkaniżmu miftiehem biex jinbeda l-użu tagħha. Il-bqija ta’ din it-taqsima jipprevedi funzjoni ta' stabbilizzazzjoni maħsuba għall-Istati Membri taż-żona tal-euro u miftuħa għal dawk kollha li jixtiequ jipparteċipaw.

Tali funzjoni ta’ stabbilizzazzjoni tikkomplementa biss ir-rwol ta' stabbilizzazzjoni li għandhom il-baġits nazzjonali fil-każ ta’ xokkijiet asimmetriċi kbar. Minħabba l-irwol ċentrali tagħhom fl-ekonomija, il-baġits nazzjonali se jkomplu jkunu l-istrument prinċipali tal-politika fiskali għall-Istati Membri biex jaġġustaw għaċ-ċirkostanzi ekonomiċi li qed jinbidlu. Huwa għalhekk li l-Istati Membri jridu jkomplu jibnu u jsostnu buffers fiskali adegwati, notevolment fi żminijiet tajbin, kif previst mill-Patt ta’ Stabbiltà u Tkabbir 25 . F'każ ta’ tnaqqis fir-ritmu ekonomiku, l-Istati Membri l-ewwel jużaw l-istabbilizzaturi awtomatiċi tagħhom u l-politika fiskali diskrezzjonarja f'konformità mal-Patt. Biss jekk dawn il-buffers u l-istabbilizzaturi mhumiex biżżejjed, fil-każ ta’ xokkijiet asimmetriċi kbar, għandha tintuża l-funzjoni ta' stabbilizzazzjoni fil-livell Ewropew.

Funzjoni bħal din tgħin biex ittaffi l-effetti ta’ xokkijiet asimmetriċi u tevita r-riskju ta' tixrid negattiv. L-għan huwa li jiġu pprovduti riżorsi lil Stat Membru milqut minn xokk li kieku jkun imġiegħel jitlob lis-suq għall-iffinanzjar - f'ċirkostanzi potenzjalment diffiċli - b'impatti possibbli fuq il-pożizzjoni tad-defiċit / dejn tal-Istat Membru kkonċernat.

Karatteristiċi ewlenin ta’ funzjoni ta' stabbilizzazzjoni

Sabiex tkun effettiva, il-funzjoni ta’ stabbilizzazzjoni għandha tissodisfa diversi kriterji. B'mod partikolari, din għandha tkun:

·Distinta minn u komplimentari għall-istrumenti eżistenti fil-kaxxa tal-għodda tal-finanzi pubbliċi tal-UE.
Tali funzjoni għandha timla l-vojt bejn, minn naħa, l-istrumenti eżistenti ffinanzjati mill-baġit tal-UE għall-impjiegi, it-tkabbir u l-investiment u, min-naħa l-oħra, l-għajnuna finanzjarja taħt il-Fond Monetarju Ewropew f'każijiet estremi. B'ħarsa ’l quddiem, huwa importanti wkoll li jiġi kkunsidrat ir-rwol tal-istrumenti eżistenti taħt il-baġit tal-UE b'xi effett ta' stabilizzazzjoni 26 . Dawn jistgħu jittejbu wkoll biex jassistu fl-assorbiment tax-xokkijiet b'mod aktar effettiv fil-ġejjieni, bħala komplement għal dak li hu ppreżentat hawn. Bl-istess mod, ta’ min jikkunsidra l-idea ta’ żieda temporanja fir-rata ta' kofinanzjament tal-UE u / jew modulazzjoni possibbli tal-livell ta' prefinanzjament tal-Fondi Strutturali u ta’ Investiment Ewropej skont iċ-ċirkostanzi 27 .

·Newtrali fuq il-perijodu medju u ma twassalx għal trasferimenti permanenti bejn l-Istati Membri. Il-funzjoni ta’ stabilizzazzjoni għandha tkun mibnija b'tali mod li l-Istati Membri parteċipanti kollha jkollhom l-istess probabbiltà li jibbenefikaw u jikkontribwixxu b'mod konsistenti.

·Tikkontribwixxi għal politika fiskali soda u tnaqqas il-periklu morali. Ma jkun hemm l-ebda kundizzjonalità marbuta mal-appoġġ iżda jkun hemm kriterji ta' eliġibilità stretti u predefiniti bbażati fuq politiki makroekonomiċi sodi sabiex ikun hemm aċċess għall-funzjoni ta’ stabbilizzazzjoni. Bħala prinċipju ġenerali, l-Istati Membri li jikkonformaw mal-qafas ta’ sorveljanza tal-UE matul il-perjodu ta' qabel ix-xokk asimmetriku kbir biss għandhom ikunu eliġibbli għall-aċċess. Dan jevita l-periklu morali u joħloq inċentiv addizzjonali għall-konformità ma’ politiki fiskali u strutturali sodi.

·Tikkontribwixxi għall-istabbiltà finanzjarja. Għandha tnaqqas ir-riskju li Stat Membru benefiċjarju jispiċċa jeħtieġ programm mill-Fond Monetarju Ewropew.

·Ekonomikament sinifikanti fl-istat fiss. Għandha tkun kbira biżżejjed biex tipprovdi stabbilizzazzjoni reali fil-livell tal-Istati Membri. L-istimi jissuġġerixxu li biex tkun effettiva fiż-żona tal-euro, din il-funzjoni għandha tippermetti pagamenti globali netti ta’ mill-inqas 1% tal-Prodott Domestiku Gross. Barra minn hekk, biex tkun kredibbli, il-funzjoni ta’ stabbilizzazzjoni jeħtieġ li jkollha riżorsi suffiċjenti disponibbli, anke f'nofs tnaqqis ekonomiku. Dan jista’ jimplika xi forma ta' kapaċità ta 'self, b'kunsiderazzjoni tal-ħtieġa li jiġi żgurat li l-baġit tal-UE jibqa' f'bilanċ.

·F'waqtha u effettiva. Għal dawk l-Istati Membri li jissodisfaw il-kriterji ta’ eliġibbiltà biex jaċċessaw il-funzjoni ta' stabbilizzazzjoni, il-bidu għandu jiġi attivat awtomatikament u malajr fuq il-bażi ta’ parametri definiti minn qabel (pereżempju, abbażi ta’ devjazzjoni negattiva temporanja kbira mix-xejra tagħhom ta' qgħad jew investiment).

·Tinkludi komponent ta’ appoġġ / għotja tal-baġit. Li jibbaża ruħu biss fuq sistema ta’ self jista' jkollu impatt limitat, peress li l-Istat Membru jista’ sempliċement jissellef fis-swieq jew jaċċessa waħda mill-linji ta' kreditu ta’ prekawzjoni eżistenti. Min-naħa l-oħra, komponent ta’ self għandu l-mertu li jindirizza xi tħassib possibbli dwar il-likwidità mingħajr ma joħloq riskji ta' trasferimenti permanenti. Strument ta’ stabbilizzazzjoni permezz ta' sistema ta’ għotjiet jista' jkollu effetti makroekonomiċi aktar b'saħħithom u aktar immedjati.

Hemm modi differenti kif tista’ tiġi prevista din il-funzjoni ta’ stabbilizzazzjoni. Il-Kummissjoni elenkat tliet għażliet differenti fil-Karta ta’ Riflessjoni tagħha dwar l-approfondiment tal-Unjoni Ekonomika u Monetarja.
L-ewwel waħda, Skema Ewropea għall-Ħarsien tal-Investiment li tista' tipproteġi l-investiment f'każ ta’ riċessjoni, billi tappoġġja prijoritajiet identifikati tajjeb u proġetti jew attivitajiet diġà ppjanati fil-livell nazzjonali,
bħall-infrastruttura jew l-iżvilupp tal-ħiliet. It-tieni waħda, Skema Ewropea ta’ Riassigurazzjoni tal-Qgħad li tista' taġixxi bħala "fond ta’ riassigurazzjoni" għal skemi tal-qgħad nazzjonali. It-tielet waħda, fond għal li jista’ jinqala’ li jista' jakkumula fondi mill-Istati Membri fuq bażi regolari u l-iżburżar jinbeda fuq bażi definita minn qabel. Dawn l-għażliet kollha għandhom il-merti tagħhom u jistgħu wkoll jingħaqdu maż-żmien.

Dak li l-Kummissjoni tipprevedi hawn hija funzjoni ta’ stabbilizzazzjoni li tista' tappoġġa livelli ta’ investiment fil-livell nazzjonali u li tista' tiġi żviluppata maż-żmien, li tibda b'self u komponent ta’ għotja relattivament limitat. Dan ikun konformi mal-importanza li din il-Kummissjoni tattribwixxi għall-investiment bħala mutur ta' tkabbir fit-tul, u jippermetti żvilupp aktar mgħaġġel meta mqabbel maż-żewġ għażliet l-oħra. Minħabba l-arkitettura u l-kompożizzjoni tal-baġit tal-UE (bilanċ annwali u limitazzjoni fuq ir-riżorsi proprji), funzjoni ta’ stabbilizzazzjoni jkollha tinbena b'tali mod li tista' tilħaq il-potenzjal sħiħ tagħha għal ċertu perjodu ta’ żmien, notevolment biex tilħaq is-setgħa finanzjarja meħtieġa.

Il-funzjoni ta’ stabbilizzazzjoni: vettura ddedikata li ġġib flimkien il-finanzi pubbliċi tal-UE biex twieġeb għal xokkijiet asimmetriċi kbar

F'din il-kostruzzjoni, vettura ddedikata ġestita mill-Kummissjoni tista’ tgħaqqad flimkien sorsi differenti ta' finanzjament fil-livell Ewropew b'mod effiċjenti biex tipprovdi l-funzjoni ta’ stabbilizzazzjoni. Din il-vettura tkun ibbażata fuq il-loġika ta’ Skema Ewropea għall-Ħarsien tal-Investiment u għandha l-għan li tappoġġa prijoritajiet identifikati tajjeb u proġetti jew attivitajiet diġà ppjanati fil-livell nazzjonali, bħal dawk identifikati fil-kuntest tal-pjattaformi ta’ investiment nazzjonali msemmija hawn fuq.

Suġġett għal kriterji stretti ta’ eliġibilità, l-Istat Membru li qed jiffaċċja xokk asimmetriku kbir awtomatikament għandu jkun intitolat li jibbenefika mill-għajnuna provduta permezz tal-funzjoni ta' stabbilizzazzjoni. Se jkun hemm appoġġ imħallat ibbażat fuq is-self u l-appoġġ baġitarju, li jista’ jkun ibbażat fuq tliet komponenti li jistgħu jiġu żviluppati progressivament:

·Il-baġit tal-UE u l-Fond Monetarju Ewropew jistgħu jipprovdu self garantit mill-baġit tal-UE lill-Istat Membru milqut. Il-Fond Monetarju Ewropew jista’ jkollu rwol ta' back-office għall-funzjoni ta’ stabbilizzazzjoni billi jipprovdi self prekawzjonarju biex jagħti appoġġ ta' likwidità għal żmien qasir. Dan ikun ikkumplimentat minn self wieħed wara l-ieħor garantit mill-baġit tal-UE (għal dan, kapaċità limitata ta’ self tista' tkun mibnija fil-Qafas

Finanzjarju Pluriennali wara l-2020 28 ). L-Istat Membru benefiċjarju jirrimborsa dak is-self lill-funzjoni ta’ stabbilizzazzjoni. 

·Il-baġit tal-UE jista’ jipprovdi xi appoġġ tal-għotja baġitarja limitat kull sena lill-Istati Membri kkonċernati. L-approprjazzjonijiet korrispondenti jkunu kommessi fuq linja baġitarja speċifika, possibbilment bħala parti mill-Fondi Strutturali u ta’ Investiment Ewropej għall-Istati Membri parteċipanti. Din il-linja baġitarja tgħin kull sena fil-funzjoni ta’ stabbilizzazzjoni biex tgħin fil-bini tal-kapital tagħha. Sabiex jiġi evitat l-eżawriment tar-riżorsi għal politiki oħra tal-UE, in-nefqa bbaġittjata relatata tingħadd mal-'marġini' bejn il-Qafas Finanzjarju Pluriennali u l-limiti massimi tar-riżorsi proprji 29 .

·Mekkaniżmu ta’ assigurazzjoni bbażat fuq kontributi volontarji tal-Istati Membri jista' jikkumplimenta s-sostenn tal-għotja tal-funzjoni ta’ stabbilizzazzjoni matul iż-żmien. L-Istati Membri jistgħu jikkontribwixxu kull sena għal dan il-fond iddedikat barra mill-baġit tal-UE u / jew jistgħu jaqblu dwar it-twaqqif ta’ fluss tax-xogħol iddedikat ta' riżorsi. Ladarba l-Istati Membri jkunu impenjaw ruħhom li jikkontribwixxu u jakkumulaw biżżejjed riżorsi, dan il-mekkaniżmu jsaħħaħ il-kapaċità tal-funzjoni ta’ stabbilizzazzjoni.

Funzjoni ta’ stabbilizzazzjoni Ewropea b'appoġġ għall-investiment

Sors: Il-Kummissjoni Ewropea

Il-Kummissjoni se tkompli tevalwa l-implikazzjonijiet ulterjuri għall-baġit tal-UE fil-kuntest tal-preparazzjoni tal-Qafas Finanzjarju Pluriennali wara l-2020 u se tagħmel il-proposti meħtieġa.

8.KONKLUŻJONIJIET

B'din il-Komunikazzjoni, il-Kummissjoni tippreżenta ideat għal strumenti baġitarji ġodda għal żona tal-euro stabbli fil-qafas tal-Unjoni.

Għall-perjodu 2018-2020, il-Kummissjoni tipproponi:

·Li jiġi żgurat ftehim mgħaġġel, sa nofs l-2018, u l-operazzjonalizzazzjoni, sal-2019, ta’ funzjoni ta’ garanzija għall-Fond Uniku ta' Riżoluzzjoni. Din il-proposta tinsab fil-proposta għat-twaqqif ta’ Fond Monetarju Ewropew fil-qafas tal-Unjoni.

·Li jissaħħu l-attivitajiet tas-Servizz ta’ Appoġġ għar-Riforma Strutturali sabiex jiġu appoġġati r-riformi fl-Istati Membri kollha, u biex jiġi stabbilit fluss tax-xogħol iddedikat għall-Istati Membri fi triqithom biex jadottaw l-euro. Dan huwa rifless fil-proposta biex jiġi emendat ir-Regolament tal-Programm ta’ Appoġġ għar-Riforma Strutturali, bil-għan li jirdoppja l-baġit disponibbli għall-attivitajiet tas-Servizz ta' Appoġġ għar-Riforma Strutturali għall-perjodu sal-2020.

·Li tiġi estiża l-possibbiltà li tintuża r-riżerva attwali tal-prestazzjoni fil-Fondi Strutturali u ta’ Investiment Ewropej b'appoġġ għar-riformi strutturali, bħala mezz biex tiġi ttestjata l-idea ta' għodda għall-għoti ta’ riforma f'fażi pilota. Dan huwa rifless f'bidla mmirata għar-Regolament dwar id-Dispożizzjonijiet Komuni li jkopri l-Fondi Strutturali u ta’ Investiment Ewropej.

Għall-perjodu wara l-2020, il-Kummissjoni beħsiebha tippreżenta l-proposti tagħha f'Mejju 2018, bħala parti mill-Qafas Finanzjarju Pluriennali wara l-2020, li jinkludi dan li ġej:

·Għodda ta’ twassil ta' riforma biex tappoġġa l-impenji ta’ riforma tal-Istati Membri.

·Aktar appoġġ tekniku għal azzjonijiet speċifiċi fuq talba tal-Istati Membri.

·Faċilità ddedikata ta’ konverġenza għall-Istati Membri li jkunu ti triqithom biex jadottaw l-euro.

·Funzjoni ta’ stabbilizzazzjoni għall-Istati Membri taż-żona tal-euro u miftuħa għal kulħadd, fil-każ ta' xokkijiet asimmetriċi kbar.

Appendiċi 1: Ħarsa ġenerali lejn il-fondi u l-firewalls disponibbli

Sors: Il-Kummissjoni Ewropea

(1)      COM(2017) 821, 6 ta’ Diċembru 2017.

(2)      Nikkompletaw l-Unjoni Ekonomika u Monetarja Ewropea, Rapport ta’ Jean-Claude Juncker, b’kooperazzjoni mill-qrib ma’ Donald Tusk, Jeroen Dijsselbloem, Mario Draghi u Martin Schulz, it-22 ta’ Ġunju 2015.

(3)      COM(2017) 291,31 ta’ Mejju 2017.

(4)      COM (2017) 2025, 1 ta’ Marzu 2017.

(5)      COM (2017) 358, 28 ta’ Ġunju 2017.

(6)

   Fil-15 ta’ Lulju 2015, il-Kummissjoni ppreżentat il-Komunikazzjoni “Bidu ġdid għat-tkabbir u l-impjiegi fil-Greċja” (COM (2015) 400) u pproponiet sensiela ta’ miżuri eċċezzjonali li għenu biex jimmassimizzaw l-assorbiment tal-fondi tal-UE b’appoġġ lill-ekonomija reali Griega.

(7)

   Mekkaniżmi simili oħra jinkludu l-Inizjattiva favur l-Impjieg taż-Żgħażagħ, li tipprovdi appoġġ lill-Istati Membri u r-reġjuni li jiffaċċjaw qgħad għoli fost iż-żgħażagħ; il-Fond ta’ Solidarjetà tal-Unjoni Ewropea, li jipprovdi għajnuna finanzjarja lill-Istati Membri / reġjuni milquta minn diżastri serji; u l-Fond Ewropew ta’ Aġġustament għall-Globalizzazzjoni, li jipprovdi appoġġ lin-nies li jitilfu l-impjiegi tagħhom bħala riżultat ta’ bidliet strutturali kbar fix-xejriet tal-kummerċ dinji jew bħala riżultat tal-kriżi ekonomika u finanzjarja globali.

(8)

   Sal-aħħar ta’ Novembru 2017, il-ftehimiet approvati permezz tal-Fond Ewropew għal Investimenti Strateġiċi (FEIS) ammontaw għal EUR 49,6 biljun f’finanzjament u jinsabu f’kull wieħed mit-28 Stat Membru, fejn il-Fond Ewropew għal Investimenti Strateġiċi huwa mistenni li joħloq EUR 251,6 biljun f’investimenti globali. Madwar 528 000 kumpaniji żgħar u ta’ daqs medju (SMEs) huma mistennija li jibbenefikaw minn aċċess imtejjeb għall-finanzjament.

(9)       Ir-Regolament tal-Kunsill (KE) Nru 332/2002 tat-18 ta' Frar li jistabbilixxi faċilità li tipprovdi għajnuna finanzjarja għal żmien medju għall-bilanċi ta' pagamenti tal-Istati Membri (ĠU L 53, tat-23 ta’ Frar 2002, p. 1).

(10)    Il-mekkaniżmu Ewropew ta’ Stabbilizzazzjoni Finanzjarja kien stabbilit fil-11 ta’ Mejju 2010 fuq il-bażi tar-Regolament tal-Kunsill (UE) Nru 407/2010 tal-11 ta’ Mejju 2010 (ĠU L 118, 12 ta’ Mejju 2010, p. 1). Huwa jaħdem b’mod simili għall-faċilità tal-bilanċ tal-pagamenti iżda huwa disponibbli għall-Istati Membri kollha, inklużi dawk membri fiż-Żona tal-Euro.

(11)      COM(2017) 821, 6 ta’ Diċembru 2017.

(12) Il-fatt li dawn il-kontribuzzjonijiet huma bbażati fuq id-Dħul Nazzjonali Gross ta’ kull Stat Membru jfisser li l-ammont assolut tagħhom jinbidel maż-żmien skont iċ-ċiklu ekonomiku, meta l-fatturi l-oħra kollha jkunu l-istess.

(13)      Kuntrarju għall-baġits nazzjonali, il-baġit tal-UE ma jistax iġarrab dejn, billi d-dħul u l-ħruġ iridu jkunu f’bilanċ annwali. Minflok, jistrieħ fuq finanzjament permezz ta’ “riżorsi proprji”. Hemm tliet tipi prinċipali ta’ riżorsi proprji llum: kontribuzzjonijiet mill-Istati Membri bbażati fuq il-livell tad-dħul tagħhom imkejjel bid-Dħul Nazzjonali Gross, kontribuzzjonijiet ibbażati fuq it-Taxxa fuq il-Valur Miżjud u d-dazji tad-dwana miġbura fil-fruntieri esterni tal-Unjoni.

(14)      Ara d-Dokument ta’ Riflessjoni dwar il-futur tal-finanzi tal-UE tat-28 ta’ Ġunju 2017, li ħa ispirazzjoni mir-rapport finali u r-rakkomandazzjonijiet tal-Grupp ta' Livell Għoli dwar ir-Riżorsi Proprji ta’ Diċembru 2016. Dan il-Grupp kien presedut mill-eks Prim Ministru Taljan u Kummissarju tal-UE Mario Monti u kien magħmul minn membri maħtura mill-Parlament Ewropew, il-Kunsill u l-Kummissjoni Ewropea.

(15)    Ara wkoll l-Artikolu 4 tar-Regolament dwar id-Dispożizzjonijiet Komuni (ir-Regolament (UE) Nru 1303/2013 tal-Parlament Ewropew u tal-Kunsill tas-17 ta’ Diċembru 2013.

(16)    COM (2015) 12, 13 ta' Jannar 2015.

(17)      COM(2017) 690, 22 ta’ Novembru 2017.

(18)      Fid-Dikjarazzjoni 52 annessa mat-Trattat ta’ Lisbona, 16-il Stat Membru (il-Belġju, il-Bulgarija, il-Ġermanja, il-Greċja, Spanja, l-Italja, Ċipru, il-Litwanja, il-Lussemburgu, l-Ungerija, Malta, l-Awstrija, il-Portugall, ir-Rumanija, is-Slovenja u s-Slovakkja) iddikjaraw li għalihom “l-euro bħala l-munita tal-Unjoni Ewropea” se tkompli bħala simbolu biex tesprimi s-sens ta’ komunità tan-nies fl-Unjoni Ewropea u l-lealtà tagħhom lejha. Permezz ta’ riżoluzzjoni parlamentari tas-27 ta' Novembru 2017 tal-Assemblea Nazzjonali Franċiża, Franza ħadet passi biex taderixxi ma’ dik id-dikjarazzjoni.

(19)    Skont l-Artikolu 140 tat-Trattat dwar il-Funzjonament tal-UE, il-Kummissjoni u l-Bank Ċentrali Ewropew jippreżentaw rapport mill-inqas kull sentejn. Ir-rapporti li jmiss huma mistennija f'Mejju 2018.

(20)

   Id-Dikjarazzjoni tal-Ministri tal-Grupp tal-Euro u tal-Kunsill tal-Affarijiet Ekonomiċi u Finanzjarji dwar il-garanzija ta’ kontinġenza tal-Mekkaniżmu Uniku ta’ Riżoluzzjoni, it-18 ta’ Diċembru 2013.

(21)

   COM(2017) 592, il-11 ta’ Ottubru 2017.

(22)

   L-Artikolu 18 tar-Regolament dwar il-Mekkaniżmu Uniku ta’ Riżoluzzjoni.

(23)      Ir-Regolament (UE) Nru 806/2014 tal-Parlament Ewropew u tal-Kunsill tal-15 ta' Lulju 2014 li jistabbilixxi regoli uniformi u proċedura uniformi għar-riżoluzzjoni tal-istituzzjonijiet ta' kreditu u ċerti ditti tal-investiment fil-qafas ta' Mekkaniżmu Uniku ta' Riżoluzzjoni u Fond Uniku għar-Riżoluzzjoni u li jemenda r-Regolament (UE) Nru 1093/2010; ara l-Artikolu 18.

(24)      Ġew imsemmija numru ta’ prinċipji gwida. Strument ta’ stabbilizzazzjoni għandu i) jimminimizza l-periklu morali u ma jwassalx għal trasferimenti permanenti, ii) ikun strettament kundizzjonali fuq kriterji ċari u politiki sodi u kontinwi, b'mod partikolari dawk li jwasslu għal aktar konverġenza fiż-żona tal-euro, iii) jiġi żviluppat fil-qafas legali tal-UE , iv) ikun miftuħ u trasparenti vis-à-vis l-Istati Membri kollha tal-UE, u v) ma jiddupplikax ir-rwol tal-Mekkaniżmu Ewropew ta’ Stabbiltà - il-Fond Monetarju Ewropew futur bħala għodda ta’ ġestjoni tal-kriżi.

(25)

   F'dawn l-aħħar snin, il-Patt ta’ Stabbiltà u Tkabbir ġie msaħħaħ biex iqis dak li jagħmel sens għal Stat Membru partikolari fiż-żmien partikolari taċ-ċiklu ekonomiku tiegħu, pereżempju biex jevita li jkun kontrazzjonarju meta ċ-ċirkostanzi jitolbu bil-kontra. Il-Patt ta’ Stabbiltà u Tkabbir jipprovdi buffers addizzjonali fi żminijiet tajbin u l-ħtieġa għal sforz fiskali iżgħar li għandu jsir waqt kundizzjonijiet ekonomiċi diffiċli.

(26)      Ara n-nota f'qiegħ il-paġna 7 b'mod partikolari għal eżempji ta’ strumenti eżistenti tal-UE maħsuba biex itaffu u / jew jassorbu x-xokkijiet.

(27)      Miżuri eċċezzjonali bħal dawn ittieħdu biex jappoġġaw il-Greċja fis-snin riċenti. Il-modulazzjoni tar-rati ta’ kofinanzjament jista' jkollha effett ta’ darba ta' stabbilizzazzjoni peress li tgħin biex jinżamm l-investiment pubbliku fil-wiċċ li kieku l-Istati Membri jistgħu ma jkunux kapaċi jiffinanzjaw. L-aġġustament tal-livell ta’ prefinanzjament jista' pereżempju jfisser avvanz tal-pagamenti mill-Fondi Strutturali u ta’ Investiment Ewropej miftiehma għall-perjodu kollu tal-Qafas Finanzjarju Pluriennali, soġġett għal pagamenti aktar baxxi aktar tard.

(28)      Ta’ min jinnota li tista' tkun meħtieġa żieda fil-limitu tar-riżorsi proprji, skont l-ammont previst.

(29)      Id-deċiżjoni dwar ir-riżorsi proprji u r-Regolament tal-Qafas Finanzjarju Pluriennali jkollha tiġi aġġustata kif xieraq.