IL-KUMMISSJONI EWROPEA

Brussell, 6.12.2017

COM(2017) 738 final

RAPPORT MILL-KUMMISSJONI

li jirrigwarda l-applikazzjoni fl-2016 tar-Regolament (KE) Nru 1049/2001 dwar l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni

Introduzzjoni

Fl-2016, il-Kummissjoni kompliet tonora l-impenn sod tagħha favur aktar trasparenza u akkontabilità. Wieħed mill-mezzi li bih qed tfittex li tagħmel dan huwa billi trawwem l-eżerċitar effettiv tad-dritt għal aċċess għad-dokumenti 1 miżmuma mill-istituzzjonijiet tal-UE. Dan id-dritt hu mnaqqax fl-Artikolu 42 tal-Karta tad-Drittijiet Fundamentali tal-UE, fl-Artikolu 15(3) tat-Trattat dwar il-Funzjonament tal-UE u fir-Regolament (KE) Nru 1049/2001 dwar l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni 2 .

Aġenda għal Trasparenza Iktar Mifruxa

Il-Kummissjoni ħadet diversi passi importanti biex issaħħaħ it-trasparenza tal-proċessi tagħha ta’ tfassil tal-liġijiet u ta’ implimentazzjoni tal-politika, inkluż fil-kuntatti tagħha mal-partijiet ikkonċernati u mal-lobbisti.

Fl-2016, il-Kummissjoni kompliet twettaq l-Aġenda tagħha għal Regolamentazzjoni Aħjar, li għandha l-għan li tagħmel lill-Unjoni Ewropea taħdem aħjar u b’mod iktar trasparenti, b’enfasi qawwija fuq azzjoni b’mod iktar sempliċi u biss fejn dan huwa importanti għaċ-ċittadini. Il-programm tal-Kummissjoni dwar l-Idoneità u l-Prestazzjoni tar-Regolamentazzjoni (REFIT) kompla jiżgura li l-leġiżlazzjoni tal-UE tagħti riżultati liċ-ċittadini u lin-negozji b’mod effettiv, effiċjenti u bl-inqas kost. F’Jannar 2016, il-Pjattaforma REFIT tnediet b’mod uffiċjali, u din tippermetti lill-awtoritajiet nazzjonali, liċ-ċittadini u lil partijiet ikkonċernati oħra jinvolvu ruħhom fit-titjib tal-leġiżlazzjoni tal-UE b’mod trasparenti.

F’April 2016, wara proposta tal-Kummissjoni, il-Parlament Ewropew, il-Kunsill u l-Kummissjoni adottaw il-Ftehim Interistituzzjonali dwar it-Tfassil Aħjar tal-Liġijiet. Il-Ftehim ikompli jsaħħaħ it-trasparenza permezz ta’ sensiela ta' miżuri li jsaħħu l-aċċess miftuħ tal-proċess tat-teħid ta' deċiżjonijiet tal-UE.

Sa minn meta ġew adottati d-Deċiżjonijiet C(2014) 9048 u 9051 3 f’Novembru 2014, fuq is-sit web Europa tqiegħdet għad-dispożizzjoni informazzjoni dwar iktar minn 11,000 laqgħa bilaterali tal-Kummissarji, tal-Membri tal-Kabinett u tad-Diretturi Ġenerali mar-rappreżentanti tal-interessi. Bħala regola ġenerali, dawn il-laqgħat jistgħu jsiru biss ma’ rappreżentanti tal-interessi rreġistrati fir-Reġistru ta’ Trasparenza 4 . Ir-Reġistru ta’ Trasparenza kompla jikber b’mod konsistenti u bħalissa fih aktar minn 11,000 entrata u minn Jannar 2016 attira aktar minn 3,500 reġistrant ġdid 5 .

F'Mejju 2016, il-Kummissjoni adottat regoli ġodda dwar gruppi ta' esperti 6 , li jsaħħu r-rekwiżiti ta' trasparenza u jintroduċu sinerġiji mar-Reġistru ta' Trasparenza.

F’Settembru 2016, wara li kkunsidrat ir-riżultati tal-konsultazzjoni pubblika dwar il-futur tar-Reġistru ta’ Trasparenza, il-Kummissjoni adottat proposta għal Ftehim Interistituzzjonali dwar Reġistru ta’ Trasparenza obbligatorju, li hu pass importanti lejn reġim komuni u obbligatorju ta’ trasparenza fil-livell tal-UE. Il-Kummissjoni stiednet lill-Parlament Ewropew u lill-Kunsill biex jibdew bin-negozjati bl-għan li jistabbilixxu Reġistru bħal dan, li jkopri t-tliet istituzzjonijiet kollha kemm huma, mill-iktar fis possibbli.

Biex tindirizza d-domandi pubbliċi għal iktar trasparenza dwar il-waqtiet possibbli ta’ “bibien iduru” (“revolving doors”), f’Diċembru 2016 il-Kummissjoni ppubblikat it-tieni Komunikazzjoni annwali tagħha 7 li fiha pprovdiet informazzjoni dwar l-uffiċjali għoljin li telqu mill-Kummissjoni għal impjiegi ġodda, filwaqt li spjegat id-dmirijiet preċedenti tagħhom, l-attivitajiet il-ġodda tagħhom barra mill-Kummissjoni, u d-deċiżjoni rispettiva tal-Awtorità tal-Ħatra. It-trasparenza hi żgurata wkoll fid-deċiżjonijiet kollha li jawtorizzaw attivitajiet ta’ wara t-tluq lill-eks Kummissarji, permezz ta’ paġna fuq il-web Europa ddedikata għal dan l-għan 8 .

L-aċċess għad-dokumenti

Fi ħdan l-aġenda usa’ għat-trasparenza, id-dritt ta' aċċess għad-dokumenti jingħata parti prominenti fl-approċċ tal-Kummissjoni għat-trasparenza. Minbarra li tipprovdi aċċess għad-dokumenti fil-pussess tagħha skont ir-Regolament 1049/2001, il-Kummissjoni ppubblikat ukoll b’mod proattiv, faċli għall-utent, firxa wiesa’ ta’ informazzjoni u ta’ dokumenti, kemm fid-diversi reġistri pubbliċi tagħha kif ukoll fuq il-paġni fuq il-web tagħha.

Dan ir-rapport hu mfassal skont l-Artikolu 17(1) tar-Regolament 1049/2001. Hu jipprovdi l-ħarsa ġenerali lejn kif il-Kummissjoni applikat ir-regoli dwar l-aċċess għad-dokumenti fl-2016. Ir-rapport hu bbażat fuq data statistika li hija miġbura fil-qosor fl-Anness 9 . L-istatistiki jirriflettu n-numru ta’ applikazzjonijiet riċevuti fl-2016 u t-tweġibiet ipprovduti għalihom. Dawn ma jirriflettux in-numru ta’ dokumenti mitluba jew (parzjalment) iddivulgati, li kienu ferm iktar numerużi. Filwaqt li l-applikanti jistgħu jitolbu aċċess għal dokument wieħed, iktar sikwit dawn jitolbu aċċess għal għadd kbir ta’ dokumenti, jew saħansitra għal fajls sħaħ dwar suġġett speċifiku jew proċedura speċifika 10 . L-istatistiki juru l-importanza tad-dritt ta' aċċess għad-dokumenti bħala parti mill-politika ġenerali tal-Kummissjoni dwar it-trasparenza. Id-dokumenti mitluba ġew iddivulgati bis-sħiħ jew b’mod parzjali f’81,3% tal-każijiet fl-istadju inizjali, u ngħata aċċess usa’ jew saħansitra sħiħ fi 52% tal-każijiet rieżaminati fl-istadju konfermatorju.

1.Reġistri u Siti fuq l-Internet

11 12 13 Fl-2016, ġew miżjuda 18,523 dokument ġdid mar-reġistru ta’ dokumenti tal-Kummissjoni (ara l-Anness – Tabella 1), li jaqgħu taħt il-kategorija C, COM, JOIN, OJ, PV, SEC jew SWD. Fl-2016 il-Kummissjoni la ħolqot u lanqas ma rċiviet dokumenti sensittivi li jaqgħu fi ħdan dawk il-kategoriji.

14 Fl-2016, is-sit web tal-Aċċess għad-Dokumenti fuq Europa rreġistra żieda ħafifa fin-numru ta’ żjarat (19,191 meta mqabbla mat-18,939 fl-2015), filwaqt li n-numru ta’ viżitaturi u l-paġni li nqraw baqgħu kostanti (ara l-Anness – Tabella 2).

2.Kooperazzjoni ma’ Istituzzjonijiet oħrajn soġġetti għar-Regolament

Fl-2016, il-Parlament Ewropew, il-Kunsill u l-Kummissjoni baqgħu jagħmlu laqgħat tekniċi regolari fuq livell amministrattiv biex jaqsmu l-esperjenza, jiżviluppaw l-aħjar prattiki u jiżguraw applikazzjoni konsistenti tar-Regolament 1049/2001.

3.Analiżi tal-Applikazzjonijiet għall-Aċċess

3.1.L-għadd ta’ applikazzjonijiet

Fl-2016, in-numru ta’ applikazzjonijiet inizjali naqas bi kważi 10% (6,077 meta mqabbla ma’ 6,752 fl-2015). Min-naħa l-oħra, in-numru ta’ tweġibiet inizjali bbażati fuq ir-Regolament 1049/2001 żdied b’iktar minn 2% (minn 5,819 fl-2015 għal 5,944 fl-2016 – l-ikbar numru ta’ tweġibiet fl-aħħar ħames snin).

L-1,193 tweġiba li jifdal ġew ipprovduti barra mill-kamp ta’ applikazzjoni tar-Regolament 1049/2001, jew ikkonfermaw li d-dokumenti mitluba ma kinux fil-pussess tal-Kummissjoni (ara l-Anness – Tabella 3).

Rigward l-applikazzjonijiet konfermatorji li talbu rieżami, mill-Kummissjoni, ta’ tweġibiet inizjali li jirrifjutaw l-aċċess kompletament jew b’mod parzjali, in-numru tagħhom żdied b’4% (295 fl-2016 meta mqabbla ma’ 284 fl-2015), biex b’hekk komplew bit-tendenza ta’ żieda kostanti li ilha mill-2012. Min-naħa l-oħra, in-numru ta’ tweġibiet konfermatorji bbażati fuq ir-Regolament 1049/2001 naqas bi ftit, minn 230 fl-2015 għal 219 fl-2016, peress li wħud mit-talbiet dehru li kienu talbiet għal informazzjoni.

F’każijiet oħra, diversi talbiet mingħand applikant wieħed ġew raggruppati u indirizzati bi tweġiba waħda (ara l-Anness – Tabella 5).

3.2.Sehem ta’ applikazzjonijiet għal kull DĠ/Servizz tal-Kummissjoni (Anness – Tabella 10)

Is-Segretarjat Ġenerali (SĠ) irċieva l-ikbar sehem ta’ applikazzjonijiet inizjali (8.6% meta mqabbel ma’ 8.7% fl-2015), filwaqt li d-DĠ SANTE kklassifika fit-tieni post, bi tnaqqis minn 9,2% fl-2015 għal 8% fl-2016. L-applikazzjonijiet inizjali għal dokumenti miżmuma mid-DĠ GROW naqsu min 8,6% għal 7,6% fl-2016, biex dan ikklassifika fit-tielet post.

Id-DĠ COMP (7,2%) u d-DĠ FISMA (5,6%) kienu l-uniċi DĠ oħra li rċevew iktar minn 5% mill-applikazzjonijiet inizjali kollha kull wieħed. Kull wieħed mid-dipartimenti li jifdal tal-Kummissjoni jirrappreżenta 4% jew inqas mill-applikazzjonijiet inizjali kollha.

Rigward l-applikazzjonijiet konfermatorji riċevuti mis-Segretarjat Ġenerali, l-ikbar sehem kien relatat mat-tweġibiet inizjali pprovduti mid-DĠ COMP (15,9% fl-2016, meta mqabbel ma’ 16,2% fl-2015). Dan kien segwit mid-DĠ SANTE (10,2%, meta mqabbel ma’ 7% fl-2015) u mis-SĠ (6,8%, meta mqabbel ma’ 10,2% fl-2015).

Id-DĠ JUST u TAXUD (it-tnejn 6,1% fl-2016, meta mqabbla ma’ 7,4% u 6,3% rispettivament fl-2015) qasmu bejniethom ir-raba’ post. It-tweġibiet inizjali ta’ żewġ dipartimenti oħra tal-Kummissjoni kienu s-suġġett ta’ iktar minn 5% tal-applikazzjonijiet konfermatorji kollha (DĠ GROW u EPSO). Id-dipartimenti li jifdal tal-Kummissjoni rrappreżentaw inqas minn 5% tal-applikazzjonijiet konfermatorji kull wieħed.

3.3.Il-profil soċjali u okkupazzjonali tal-applikanti 15 (Anness – Tabella 8)

Ħafna mill-applikazzjonijiet inizjali fl-2016 baqgħu joriġinaw mingħand ċittadini. Dawn kienu jirrappreżentaw kważi 40% tal-applikazzjonijiet kollha (38,3% meta mqabbla ma’ 24,7% fl-2015). L-istituzzjonijiet akkademiċi u l-gruppi ta' riflessjoni kienu t-tieni l-iktar kategorija attiva, u rrappreżentaw 16% tal-applikazzjonijiet inizjali (meta mqabbla ma’ 21,3% fl-2015).

It-tielet post kien okkupat minn professjonisti legali (13,5%, meta mqabbla ma’ 12,7% fl-2015), segwiti mis-soċjetà ċivili (NGOs) (11,9%, meta mqabbla ma’ 15,2% fl-2015), minn kumpaniji (9,7%, meta mqabbla ma’ 2% fl-2015) u minn ġurnalisti (5,9% fl-2016, meta mqabbla ma’ 7,1% fl-2015).

Ħafna mill-applikazzjonijiet konfermatorji fl-2016 oriġinaw mingħand ċittadini. Dawn irrappreżentaw iktar minn 30% tal-applikazzjonijiet kollha (30,2%, meta mqabbla ma’ 24,3% fl-2015). Il-professjonisti legali, b’26,4% tal-applikazzjonijiet kollha (meta mqabbla ma’ 27,8% fl-2015) kienu t-tieni l-iktar kategorija attiva ta’ applikanti.

Dawn kienu segwiti mill-qrib mis-soċjetà ċivili (NGOs), li rrappreżentaw 24,7% tal-applikazzjonijiet (24,6% fl-2015). Il-ġurnalisti okkupaw ir-raba’ post bi 8,1% (13% fl-2015), u l-istituzzjonijiet akkademiċi u l-gruppi ta' riflessjoni ġew fil-ħames post b’4,4% tal-applikazzjonijiet (5,6% fl-2015).

3.4.L-oriġini ġeografika tal-applikanti (Anness – Tabella 9)

Rigward id-disaggregazzjoni ġeografika tal-applikazzjonijiet inizjali, l-ikbar sehem baqa’ joriġina mill-applikanti fil-Belġju (27,2%, meta mqabbla ma’ 26,8% fl-2015), segwiti mill-Ġermanja (12,6%, meta mqabbla ma’ 11,7% fl-2015) u mir-Renju Unit (żieda sinifikanti, minn 7,6% fl-2015 għal 10% fl-2016). Franza, Spanja, l-Italja u n-Netherlands segwew, billi rrappreżentaw iktar minn 5% tal-applikazzjonijiet kollha kull wieħed. L-applikazzjonijiet li oriġinaw mill-21 Stat Membru li jifdal kienu jirrappreżentaw inqas minn 2% għal kull Stat Membru.

Id-dritt ta’ aċċess għal dokumenti baqa’ jiġi eżerċitat ukoll mill-applikanti li jirresjedu jew li għandhom uffiċċju reġistrat f’pajjiżi terzi, billi l-applikazzjonijiet inizjali tagħhom irrappreżentaw 4,1% tal-applikazzjonijiet inizjali kollha (4,4% fl-2015).

Rigward id-disaggregazzjoni ġeografika tal-applikazzjonijiet konfermatorji, l-ikbar sehem bil-bosta baqa’ joriġina mill-applikanti fil-Belġju (33,2%, meta mqabbla ma’ 30,3% fl-2015), segwiti mill-Ġermanja (13,2%, meta mqabbla ma’ 15,1 fl-2015). L-Italja (9,8%), Spanja (8,8%), in-Netherlands (6,4%), ir-Renju Unit (5,8%) u Franza (5,1%) kienu l-uniċi Stati Membri oħra li minnhom oriġinaw iktar minn 5% tal-applikazzjonijiet.

L-applikazzjonijiet li oriġinaw mill-21 Stat Membru li jifdal kienu jirrappreżentaw 2% jew inqas għal kull wieħed. Finalment, l-applikazzjonijiet mingħand applikanti li jirresjedu jew li għandhom uffiċċju reġistrat f’pajjiżi terzi rrappreżentaw 3,7% tal-applikazzjonijiet kollha (met mqabbla ma’ 2,5% fl-2015).

4.L-Applikazzjoni tal-Eċċezzjonijiet għad-Dritt ta' Aċċess

4.1.Tipi ta’ aċċess ipprovdut

Fl-2016, ingħata aċċess sħiħ jew parzjali f’iktar minn 80% tal-każijiet fl-istadju inizjali (81,3% meta mqabbla ma’ 84,7% fl-2015). L-aċċess sħiħ baqa’ jingħata fi kważi 61% tal-każijiet kollha. Dan jikkostitwixxi tnaqqis meta mqabbel mas-sena ta’ qabel (68,8%), biex b’hekk kompliet it-tendenza ta’ tnaqqis li ilha għaddejja mill-2012, li f’parti minnha tista’ tiġi attribwita lill-applikazzjoni iktar stretta tal-politika tal-Kummissjoni dwar il-protezzjoni tad-data.

Għall-istess raġuni, il-perċentwal ta’ tweġibiet parzjalment pożittivi żdied b’mod sinifikanti, minn 30% (20,4% fl-2016 meta mqabbel ma’ 15,9% fl-2015). 18,7% tal-applikazzjonijiet ġew irrifjutati kompletament (meta mqabbla ma’ 15,3% fl-2015) – ara l-Anness (Tabella 4).

Fl-2016, waħda minn kull żewġ tweġibiet inizjali kkontestati minn applikazzjoni konfermatorja treġġgħet lura (kompletament jew parzjali) fi stadju konfermatorju (żieda sinifikanti minn 41.3% fl-2015 għal 52% fl-2016). F’47% tal-każijiet, ingħata aċċess usa’ (iżda mhux sħiħ) milli ngħata fil-livell inizjali (żieda konsiderevoli meta mqabbel ma’ 31.7% fl-2015). Fil-livell konfermatorju, ir-rifjut inizjali sħiħ ġie kkonfermat biss fi 48% tal-każijiet (meta mqabbel ma’ 58.7% fl-2015).

Minn naħa l-oħra, in-numru ta’ applikazzjonijiet konfermatorji li wasslu għal tweġiba kompletament pożittiva kien inqas (5%) milli fl-2015 (9,6%) – ara l-Anness (Tabella 6).

4.2.L-eċċezzjonijiet invokati għad-dritt ta' aċċess (Anness – Tabella 7)

Il-protezzjoni tal-privatezza u tal-integrità tal-individwu baqgħet ir-raġuni ewlenija għar-rifjut (sħiħ jew parzjali) ta’ aċċess fl-istadju inizjali, billi baqgħu kostanti għal kważi 30%. It-tieni eċċezzjoni l-iktar invokata spiss kienet il-protezzjoni tal-proċess tat-teħid ta' deċiżjonijiet tal-istituzzjoni (żieda ħafifa, minn 20,3% fl-2015 għal 21,7% fl-2016). L-eċċezzjoni li kellha l-għan li tħares l-iskop tal-ispezzjonijiet, tal-investigazzjonijiet u tal-awditi, li okkupat it-tielet post, ġiet invokata bi frekwenza konsiderevolment inqas milli fl-2015 (16,2% fl-2016 meta mqabbla ma’ 20,9% fl-2015).

L-użu relattiv tal-eċċezzjoni li tħares l-interessi kummerċjali naqas bi ftit (13,7% fl-2016, meta mqabbel ma’ 14,7% fl-2015), iżda baqa’ fir-raba’ post. L-iktar żieda sinifikanti kienet tikkonċerna l-eċċezzjoni li tħares l-interess pubbliku fir-rigward tas-sigurtà pubblika (7,3% fl-2016 imqabbla ma’ 2,4% fl-2015).

Fl-istadju konfermatorju, l-iktar raġuni ewlenija invokata ta’ spiss għall-ikkonfermar ta’ rifjut (sħiħ jew parzjali) ta’ aċċess kienet il-protezzjoni tal-privatezza u tal-integrità tal-individwu, li rrappreżentat żieda ta’ 45% meta mqabbla mas-sena ta’ qabel (28,3% fl-2016, meta mqabbla ma’ 15,6% fl-2015). Fit-tieni post kien hemm l-eċċezzjoni li tħares il-proċess tat-teħid ta' deċiżjonijiet (22,3%, meta mqabbla ma’ 16,4% fl-2015). L-eċċezzjoni li tipproteġi l-iskop tal-ispezzjonijiet, tal-investigazzjonijiet u tal-awditi ġiet invokata bi frekwenza konsiderevolment inqas (20,3% fl-2016, meta mqabbla ma’ 37,7% fl-2015), u b’hekk ikklassifikat fit-tielet post.

Ir-raba’ u l-ħames ikklassifikati kienu, rispettivament, l-eċċezzjonijiet li jħarsu l-interessi kummerċjali (15,9%, meta mqabbla ma’ 13,1% fl-2015), u l-proċeduri tal-qorti u l-pariri legali (5,6%, meta mqabbla ma’ 4,9% fl-2015).

5.Ilmenti lill-Ombudsman Ewropew

16 17 18 Fl-2016, l-Ombudsman għalaq 21 ilment kontra l-ipproċessar mill-Kummissjoni tat-talbiet għal aċċess għad-dokumenti. Sitta minn dawn ingħalqu b’kummenti ulterjuri jew kritiċi. Għat-tqabbil, fl-2015 l-Ombudsman għalaq 23 ilment, sitta minnhom b’kumment kritiku.

Fl-2016, l-Ombudsman fetaħ 12-il investigazzjoni ġdida li fihom l-aċċess għad-dokumenti kien il-parti prinċipali jew inkella parti sussidjarja tal-ilment (żieda ħafifa meta mqabbla mal-2015, meta nfetħu 11-il investigazzjoni ġdida).

6.Stħarriġ Ġudizzjarju

Fl-2016, il-Qrati tal-UE pprovdew ġurisprudenza importanti ġdida li se tinfluwenza l-prattika tal-Kummissjoni skont ir-Regolament 1049/2001.

6.1.Il-Qorti tal-Ġustizzja

Il-Qorti tal-Ġustizzja qatgħet tliet sentenzi ta’ appell li fihom il-Kummissjoni kienet parti għall-proċeduri.

Fil-kawża Internationaler Hilfsfonds 19 , rigward l-aċċess għall-fajl li jikkonċerna kuntratt għal għajnuna umanitarja, din ikkonfermat l-ordni tal-Qorti Ġenerali li tiċħad ir-rikors tar-rikorrent ippreżentat kontra l-Kummissjoni.

Fis-sentenza tagħha f’SeaHandling 20 , il-Qorti tal-Ġustizzja kkonfermat l-eżistenza ta’ preżunzjoni ġenerali li d-divulgazzjoni ta’ dokumenti fil-fajl amministrattiv ta’ investigazzjoni dwar l-għajnuna mill-Istat fil-prinċipju jxxekkel l-iskop tal-attivitajiet ta’ investigazzjoni. Din iġġudikat ukoll li interess possibbli fil-kisba ta’ dokument għall-finijiet tal-proċeduri tal-qorti ma jistax jikkostitwixxi interess pubbliku prevalenti fid-divulgazzjoni. Barra minn hekk, hi spjegat li, f’każ ta’ tweġiba mdewwma, ir-rikorrent jista’ jippreżenta lment mal-Ombudsman jew jieħu passi għad-danni biex jiġu infurzati d-dritt tiegħu ta' aċċess u d-dritt tiegħu għal proċess ġust.

Fis-sentenza tagħha fi Stichting Greenpeace Nederland 21 , il-Qorti tal-Ġustizzja stabbilixxiet li l-kunċett ta’ “emissjonijiet fl-ambjent” skont ir-Regolament 1367/2006 22 mhuwiex limitat għal emissjonijiet konkreti, iżda jinkludi wkoll l-emissjonijiet prevedibbli fl-ambjent f’kundizzjonijiet normali jew realistiċi tal-użu ta’ prodott jew ta’ sustanza. Il-Qorti speċifikat ukoll li l-informazzjoni li “tkun konnessa ma’ emissjonijiet fl-ambjent” hi informazzjoni li tirrigwarda jew li hija marbuta ma’ tali emissjonijiet, u mhux l-informazzjoni li għandha rabta, diretta jew indiretta, mal-emissjonijiet fl-ambjent.

6.2.Il-Qorti Ġenerali

23 24 Il-Qorti Ġenerali qatgħet 12-il sentenza marbuta mad-dritt għall-aċċess għad-dokumenti fejn il-Kummissjoni kienet parti mill-proċedimenti. F’żewġ kawżi, il-Qorti Ġenerali ddikjarat li r-rikors għal annullament tad-deċiżjoni tal-Kummissjoni kien inammissibbli. Kawża minnhom ma rriżultatx f’sentenza.

25 26 F’sitt każijiet, il-Qorti Ġenerali ċaħdet ir-rikors għal annullament tar-rikorrent għal annullament tad-deċiżjoni konfermatorja tal-Kummissjoni dwar l-aċċess għad-dokumenti, billi kkonfermat il-pożizzjoni tal-Kummissjoni. Fi tliet kawżi, il-Qorti Ġenerali annullat id-deċiżjoni tal-Kummissjoni b’mod parzjali.

Dwar is-suġġett ta’ data personali, il-Qorti Ġenerali ddikjarat li l-Kummissjoni ma tistax tgħatti d-data personali proprja tar-rikorrent, jekk ikun ċar li dan tal-aħħar ikun favur id-divulgazzjoni tagħha. Hi ċċarat ukoll li l-istituzzjoni m’għandhiex bżonn tivvaluta n-nuqqas ta’ preġudizzju għall-interessi leġittimi tas-suġġett tad-data jekk l-applikant ma jkunx ipprovda xi ġustifikazzjoni espliċita u leġittima jew xi argument konvinċenti biex juri n-neċessità tat-trasferiment ta’ dik id-data personali 27 .

Fir-rigward tal-interessi kummerċjali, il-Qorti Ġenerali fakkret il-presuppożizzjoni ġenerali ta’ nuqqas ta’ divulgazzjoni tal-offerti sottomessi mill-offerenti fi proċeduri ta’ akkwist, peress li d-divulgazzjoni ta’ dawn tkun qed ixxekkel l-interessi kummerċjali tal-offerent li jirbaħ il-kuntratt u l-kompetizzjoni ġusta fost l-offerenti.

Rigward l-iskop tal-investigazzjonijiet, il-Qorti Ġenerali kkonfermat il-preżunzjoni ġenerali ta’ nuqqas ta’ aċċessibilità tad-dokumenti investigattivi tal-OLAF għall-investigazzjonijiet kurrenti u, f’ċerti każijiet, magħluqa. Din iddikjarat ukoll li l-okkorrenza ta’ kxif mhux awtorizzat ta’ informazzjoni kunfidenzjali minnha nnifisha ma tiġġustifikax id-divulgazzjoni ta’ dawn id-dokumenti skont ir-Regolament 1049/2001. Il-Qorti Ġenerali ddikjarat ukoll li, anki jekk l-applikant ikun fil-pussess tad-dokumenti mitluba (jew ta’ parti minnhom), il-Kummissjoni ma tistax tirrifjuta li tittratta l-applikazzjoni tiegħu skont ir-Regolament 1049/2001 28 .

Barra minn hekk, il-Qorti Ġenerali reġgħet ikkonfermat l-eżistenza ta’ preżunzjoni ġenerali ta’ nuqqas ta’ divulgazzjoni ta’ dokumenti li jifformaw parti mill-fajl ta’ proċedura ta' ksur matul l-istadju ta’ prelitigazzjoni tagħha, peress li d-divulgazzjoni ta’ dawn fil-prinċipju tkun qed ixxekkel il-protezzjoni tal-iskop tal-investigazzjonijiet 29 .

Fir-rigward tad-dokumenti li għandhom rabta rilevanti ma’ tilwima ġudizzjarja pendenti fil-livell tal-UE, jew ma’ proċedimenti nazzjonali li aktarx li jwasslu għal deċiżjoni preliminari, il-Qorti Ġenerali ddikjarat li t-tali dokumenti jistgħu jkunu protetti kontra d-divulgazzjoni. L-għan hu li jiġi żgurat ir-rispett tal-prinċipji ta’ opportunitajiet ugwali għall-partijiet u tal-amministrazzjoni soda tal-ġustizzja u, fuq l-istess nota, il-protezzjoni tal-proċedimenti tal-qorti 30 .

Barra minn hekk, il-Qorti Ġenerali kkonfermat li għall-finijiet ta’ applikazzjoni tal-eċċezzjoni relatata mal-protezzjoni ta’ pariri legali, it-tempestività u l-mod (formali jew informali) li bih ingħata dan il-parir huma irrilevanti. Hi rrikonoxxiet ukoll li l-protezzjoni ta’ pariri legali tkopri l-pożizzjoni tas-Servizz Legali tal-Kummissjoni fid-difiża tagħha tal-pożizzjoni tal-Kummissjoni quddiem il-Qorti tal-Ġustizzja, pari passu mal-partijiet l-oħrajn. Finalment, il-Qorti Ġenerali ddikjarat li s-sempliċi fatt li l-parir legali tfassal fil-kuntest ta’ proċess leġiżlattiv mhuwiex minnu nnifsu biżżejjed biex jiġi stabbilit interess pubbliku prevalenti 31 .

Fir-rigward tal-protezzjoni tal-proċess tat-teħid ta' deċiżjonijiet, il-Qorti Ġenerali stabbilixxiet li l-Kummissjoni hi intitolata li tippreżumi, bla ma twettaq eżaminazzjoni speċifika u individwali tad-dokumenti mfassla fil-kuntest ta’ tħejjija ta’ valutazzjoni tal-impatt, li d-divulgazzjoni ta’ kull wieħed minn dawn id-dokumenti fil-prinċipju tkun qed ixxekkel serjament il-proċess tagħha tat-teħid ta’ deċiżjonijiet għall-iżvilupp ta’ proposta ta’ politika 32 .

Il-Qorti Ġenerali rrikonoxxiet ukoll l-importanza li l-persunal tal-UE jkollu l-possibbiltà li jesprimi l-fehmiet tiegħu b’mod indipendenti. Hi kkonfermat li d-divulgazzjoni tal-opinjonijiet tagħhom għal użu intern, bħala parti mid-deliberazzjonijiet u mill-konsultazzjonijiet preliminari, tista’ xxekkel serjament il-proċess tat-teħid ta' deċiżjonijiet tal-Kummissjoni, peress li tkun qed iżżomm il-persunal milli jesprimi l-opinjoni tiegħu b’mod indipendenti u mingħajr ma jkun influwenzat kif mhux xieraq mill-prospettiva ta’ divulgazzjoni mifruxa li tesponi lill-istituzzjoni li hu parti minnha 33 .

F’sentenza oħra, il-Qorti Ġenerali ċċarat li r-realtà tal-pressjoni esterna li għaliha jkun espost il-proċess tat-teħid ta' deċiżjonijiet trid tiġi stabbilita b’ċertezza u li l-evidenza trid tiġi addotta bl-għan li jintwera li kien hemm riskju raġonevolment prevedibbli li l-proċess ikun affettwat b’mod sostanzjali minħabba dik il-pressjoni esterna 34 .

Fl-2016, il-Qorti Ġenerali ma qatgħet l-ebda sentenza relatata mad-dritt ta' aċċess għad-dokumenti b’appell kontra deċiżjoni tat-Tribunal għas-Servizz Pubbliku fejn il-Kummissjoni kienet parti fil-proċedimenti.

6.3.Kawżi ġodda quddiem il-Qorti

35 36 Fl-2016 ġew ippreżentati dsatax-il kawża ġodda quddiem il-Qorti Ġenerali kontra deċiżjonijiet tal-Kummissjoni skont ir-Regolament 1049/2001. Barra minn hekk, ġew ippreżentati erba’ appelli ġodda quddiem il-Qorti tal-Ġustizzja kontra sentenza tal-Qorti Ġenerali fejn il-Kummissjoni kienet parti fil-proċedimenti.

7.Konklużjonijiet

Fl-2016, il-Kummissjoni kompliet tonora l-impenn tagħha li żżid it-trasparenza, kemm skont ir-Regolament 1049/2001 kif ukoll fil-qafas tal-aġenda tagħha għal trasparenza iktar mifruxa.

Dan kien rifless, fost l-oħran, fl-implimentazzjoni progressiva tagħha tal-Aġenda għal Regolamentazzjoni Aħjar; fil-pubblikazzjoni sistematika tagħha ta’ informazzjoni dwar il-laqgħat tal-mexxejja politiċi u tal-uffiċjali għoljin tagħha mal-partijiet ikkonċernati; fil-proposta tagħha għal Ftehim Interistituzzjonali dwar Reġistru ta’ Trasparenza obbligatorju; u fil-politika tagħha rigward il-“bibien iduru”.

Il-Kummissjoni kompliet ukoll tippubblika b’mod proattiv u faċli għall-utent firxa wiesa’ ta’ informazzjoni u ta’ dokumenti dwar id-diversi attivitajiet leġiżlattivi u mhux leġiżlattivi tagħha.

Id-dritt ta’ aċċess għal dokumenti wara li tkun saret talba għalihom, kif stipulat fil-Karta tad-Drittijiet Fundamentali tal-UE, fit-Trattati u fir-Regolament 1049/2001, baqa' jkun strument importanti li permezz tiegħu l-Kummissjoni tonora l-impenji tagħha favur it-trasparenza.

Fl-2016, il-Kummissjoni rċiviet iktar minn 6,000 applikazzjoni inizjali għall-aċċess għal dokumenti, u kważi 300 applikazzjoni konfermatorja. Dan juri li ċ-ċittadini tal-UE u benefiċjarji oħra qed jagħmlu użu attiv mid-dritt tagħhom li jaċċessaw dokumenti miżmuma mill-Kummissjoni.

Il-Kummissjoni tibqa' bil-bosta l-istituzzjoni li tiġġestixxi l-akbar għadd ta' talbiet ta’ aċċess għal dokumenti. Ir-rata għolja ta’ divulgazzjoni ta’ dokumenti wara diversi talbiet ta’ aċċess wasslet għat-tqegħid għad-dispożizzjoni ta’ numru kbir ta’ dokumenti. Dan sar minbarra d-dokumentazzjoni u l-informazzjoni li ġew ippubblikati b’mod proattiv mill-Kummissjoni fl-2016, jew li diġà huma disponibbli fuq id-diversi paġni fuq il-web tal-Kummissjoni u fid-diversi reġistri pubbliċi tagħha.

(1)      Il-benefiċjarji tad-dritt ta' aċċess għal dokumenti huma ċittadini tal-UE u persuni li jirresjedu jew li għandhom l-uffiċċju reġistrat tagħhom fi Stat Membru. Barra minn hekk, ċittadini u persuni ġuridiċi ta’ pajjiżi terzi li ma jirresjedux jew li ma għandhomx uffiċċju reġistrat fi Stat Membru jgawdu minn dan id-dritt ukoll.

(2)    Il-Ġurnal Uffiċjali L 145, 31.5.2001, p. 43 (minn hawn ’il quddiem imsejjaħ “ir-Regolament 1049/2001”).

(3)    Id-Deċiżjoni tal-Kummissjoni tal-25.11.2014 dwar il-pubblikazzjoni ta' informazzjoni dwar laqgħat li jsiru bejn id-Direttorati Ġenerali tal-Kummissjoni u organizzazzjonijiet jew persuni li jaħdmu għal rashom (C(2014) 9048) u d-Deċiżjoni tal-Kummissjoni tal-25.11.2014 dwar il-pubblikazzjoni ta' informazzjoni dwar laqgħat li jsiru bejn il-Membri tal-Kummissjoni u organizzazzjonijiet jew persuni impjegati għal rashom (C(2014) 9051).

(4)      Ir-regola “mingħajr reġistrazzjoni, m’hemmx laqgħa” hi stabbilita fil-Komunikazzjoni mill-President lill-Kummissjoni: Il-Metodi ta’ Ħidma tal-Kummissjoni Ewropea 2014-2019 (C(2014) 9004), p. 9.

(5)    Id-data hi bbażata fuq ċifri estratti fl-1 ta’ Frar 2017.

(6)      Id-Deċiżjoni tal-Kummissjoni C(2016) 3301 tat-30.5.2016 li tistabbilixxi regoli orizzontali dwar il-ħolqien u l-funzjonament tal-gruppi ta’ esperti tal-Kummissjoni.

(7)      Komunikazzjoni lill-Kummissjoni dwar il-pubblikazzjoni ta’ informazzjoni li tikkonċerna attivitajiet okkupazzjonali ta’ uffiċjali għoljin wara li jitilqu mis-servizz (Artikolu 16(3) u (4) tar-Regolamenti tal-Persunal), C(2016) 8928, disponibbli fuq: http://ec.europa.eu/civil_service/docs/2016_annual_report_en.pdf .

(8)       https://ec.europa.eu/info/about-european-union/principles-and-values/ethics-and-integrity/ethics-and-integrity-eu-commissioners/former-european-commissioners-authorised-occupations_mt

(9)    Sakemm ma jiġix indikat mod ieħor, l-istatistiċi ppreżentati f’dan ir-Rapport huma bbażati fuq iċ-ċifri misluta mill-applikazzjonijiet tal-IT tal-Kummissjoni fit-3 ta’ Mejju 2017. Il-perċentwali fil-parti narrattiva tar-Rapport huma arrotondati għall-eqreb deċimali.

(10)      Fil-każ ta’ applikazzjonijiet li jkopru mijiet (jew, f’ċerti każijiet, anki eluf) ta’ dokumenti, fejn tinstab soluzzjoni ġusta mal-applikanti, l-applikazzjonijiet normalment jiġu indirizzati fl-istadji suċċessivi, b’kull waħda tkopri numru ta’ dokumenti li jistgħu jiġu indirizzati fi ħdan l-iskadenzi stabbiliti fir-Regolament 1049/2001.

(11)      Numru simili bħal fl-2015 (18,945).

(12)      C: Atti awtonomi tal-Kummissjoni; COM: Proposti leġiżlattivi tal-Kummissjoni u dokumenti oħra kkomunikati lil istituzzjonijiet oħra, bid-dokumenti preparatorji tagħhom; JOIN: Atti Konġunti tal-Kummissjoni u tar-Rappreżentant Għoli; ĠU: Aġendi tal-laqgħat tal-Kummissjoni; PV: Minuti tal-laqgħat tal-Kummissjoni; SEC: Dokumenti tal-Kummissjoni li ma jistgħux jiġu kklassifikati f’xi waħda mis-sensiliet l-oħra; SWD: Dokument ta' ħidma tal-persunal tal-Kummissjoni.

(13)      Għall-finijiet tar-Regolament 1049/2001, id-dokumenti sensittivi huma dokumenti kklassifikati bħala "top secret", "secret" jew "confidential" (ara l-Artikolu 9(1) tar-Regolament 1049/2001).

(14)    Aċċess għad-dokumenti: https://ec.europa.eu/info/about-european-union/principles-and-values/transparency/access-documents_mt .

(15) Fl-applikazzjoni tagħhom, l-applikanti jistgħu (iżda mhumiex obbligati) jindikaw il-profil soċjali/okkupazzjonali tagħhom (jiġifieri jagħżlu waħda mis-seba’ kategoriji mogħtija). Għal skopijiet statistiċi, il-profil taċ-“ċittadini” jkopri l-applikanti li indikaw il-profil tagħhom bħala “ċittadini” flimkien mal-applikanti li ma indikawx il-profil soċjali/ekonomiku tagħhom (jiġifieri ma għażlu ebda waħda mis-seba’ kategoriji).

(16)      L-istatistiċi jikkonċernaw il-każijiet tal-Ombudsman għad-dipartimenti kollha tal-Kummissjoni ħlief l-OLAF.

(17)      Is-sitt każijiet b’kumment ulterjuri/kritiku: 2012/0803/TN (+ 2013/369/TN), 2014/0852/LP, 2014/1871/JN, 2014/2063/PMC, u 2015/437/OMB. Tliet każijiet ingħalqu b'suġġerimenti għat-titjib u 12-il każ ingħalqu mingħajr ebda azzjoni ulterjuri.

(18)    L-istatistiki, ipprovduti fir-Rapport annwali tal-2015, irreferew biss għall-każijiet li jirriżultaw mill-applikazzjonijiet konfermatorji u ġestiti ċentralment mis-Segretarjat Ġenerali (16-il ilment, li tnejn minnhom ingħalqu b’kumment kritiku). Dipartimenti oħra tal-Kummissjoni mmaniġġjaw seba' ilmenti addizzjonali, li erba’ minnhom ingħalqu b’kumment kritiku).

(19)      Ordni tal-Qorti tal-21 ta’ Jannar 2016 f’Internationaler Hilfsfonds eV vs il-Kummissjoni, C-103/15 P.

(20)      Sentenza tal-14 ta’ Lulju 2016 f’Sea Handling SpA, f’likwidazzjoni, preċedentement Sea Handling SpA vs il-Kummissjoni, C-271/15 P.

(21)      Sentenza tat-23 ta’ Novembru 2016 f’il-Kummissjoni vs Stichting Greenpeace Nederland u PAN Europe, C-673/13 P.

(22)      Ir-Regolament (KE) Nru 1367/2006 tal-Parlament Ewropew u tal-Kunsill tas-6 ta' Settembru 2006 dwar l-applikazzjoni għall-istituzzjonijiet u l-korpi tal-Komunità tad-dispożizzjonijiet tal-Konvenzjoni ta' Aarhus dwar l-Aċċess għall-Informazzjoni, il-Parteċipazzjoni tal-Pubbliku fit-Teħid ta' Deċiżjonijiet u l-Aċċess għall-Ġustizzja fi Kwistjonijiet Ambjentali (Il-Ġurnal Uffiċjali L 264 tal-25.9.2006, p. 13–19).

(23)      Ordnijiet tal-Qorti Ġenerali f’(1) PITEE vs il-Kummissjoni, T-674/15 (taħt appell), u (2) Anikó Pint vs il-Kummissjoni, T-660/16 (taħt appell).

(24)      Ordni tal-Qorti Ġenerali f’TMG Landelijke Media BV u Menzo Willems vs il-Kummissjoni, T-189/15, EU:T:2016:22.

(25)      IMG vs il-Kummissjoni, T-110/15; Philip Morris Ltd vs il-Kummissjoni, T-796/14 u T-800/14; Herbert Smith Freehills vs il-Kummissjoni, T-755/14; Syndial SpA vs il-Kummissjoni, T-581/15; u Secolux vs il-Kummissjoni, T-363/14.

(26)      Is-sentenzi f’PAN Europe vs il-Kummissjoni, T-51/15; Philip Morris Ltd vs il-Kummissjoni, T-18/15; u Strack vs il-Kummissjoni, T-221/08.

(27)      Sentenza tas-26 ta’ April 2016 fi Strack vs il-Kummissjoni, T-221/08, u sentenza tal-21 ta’ Settembru 2016 f’Secolux vs il-Kummissjoni, T‑363/14.

(28)      Sentenza tas-26 ta’ Mejju 2016 f’IMG vs il-Kummissjoni, T-110/15, u sentenza tas-26 ta’ April 2016 fi Strack vs il-Kummissjoni, T-221/08.

(29)      Sentenza tal-25 ta’ Mejju 2016 f’Syndial SpA vs il-Kummissjoni, T-581/15.

(30)      Sentenzi tal-15 ta’ Settembru 2016 f’Philip Morris Ltd vs il-Kummissjoni, T-18/15, T-796/14 u T-800/14.

(31)      Sentenzi tal-15 ta’ Settembru 2016 f’Herbert Smith Freehills vs il-Kummissjoni, T-755/14, u f’Philip Morris vs il-Kummissjoni, T-796/14 u T-800/14.

(32)      Sentenza tat-13 ta’ Novembru 2015 fi ClientEarth vs il-Kummissjoni, T-424/14 u T-425/14 (taħt appell).

(33)      Sentenza tal-15 ta’ Settembru 2016 f’Philip Morris Ltd. vs il-Kummissjoni, T-18/15.

(34)      Sentenza tal-20 ta’ Settembru 2016 f’Pesticide Action Network Europe (PAN Europe) vs il-Kummissjoni Ewropea, T-51/15.

(35)      Steven Verschuur vs il-Kummissjoni, T-877/16; Falcon Technologies Int. LLC vs il-Kummissjoni, T-875/16; Access Info Europe vs il-Kummissjoni, T-852/16 u T-851/16; Anikó Pint vs il-Kummissjoni, T-660/16; Malte vs il-Kummissjoni, T-653/16 u T-653/16R; ClientEarth vs il-Kummissjoni, T-644/16; Verein Deutsche Sprache e.V. vs il-Kummissjoni, T-468/16; Fabio De Masi vs il-Kummissjoni, T-423/16, T-341/16 u T-11/16; MS vs il-Kummissjoni, T-314/16; CEE Bankwatch Network vs il-Kummissjoni, T-307/16; Pagkyprios organismos ageladotrofon (POA) Dimosia Ltd vs il-Kummissjoni, T-74/16; European Environmental Bureau (EEB) vs il-Kummissjoni, T-38/16; Association Justice & Environment, z.s. vs il-Kummissjoni, T-727/15; PITEE vs il-Kummissjoni, T-674/15; Stichting Greenpeace Nederland and Pesticide Action Network Europe (PAN Europe) vs il-Kummissjoni, T-545/11RENV.

(36)      ClientEarth vs il-Kummissjoni, C-57/16 P; Syndial vs il-Kummissjoni, C-410/16 P; PITEE vs il-Kummissjoni, C-464/16 P; u Pint vs il-Kummissjoni, C-625/16 P.

IL-KUMMISSJONI EWROPEA

Brussell, 6.12.2017

COM(2017) 738 final

ANNESS

tar-

RAPPORT MILL-KUMMISSJONI

li jirrigwarda l-applikazzjoni fl-2016 tar-Regolament (KE) Nru 1049/2001 dwar l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni

1.L-għadd ta’ dokumenti mniżżla fir-reġistru

2.Il-Konsultazzjoni tal-websajt dwar l-aċċess għad-dokumenti fuq is-server Europa

3.L-Għadd ta’ applikazzjonijiet inizjali riċevuti u ttrattati

4.Tweġibiet mogħtija fl-istadju inizjali

5.L-Għadd ta’ applikazzjonijiet konfermatorji riċevuti u ttrattati

6.Tweġibiet mogħtija fl-istadju konfermatorju

7.Rifjut tal-aċċess skont l-eċċezzjoni applikata (%)

8.
Il-profil soċjali u professjonali tal-applikanti (%) 6

9.L-Oriġini ġeografika tal-applikanti (%)

10.
L-Applikazzjonijiet għal kull dipartiment tal-Kummissjoni (%)

(1)    Rikjesta waħda tista’ tikkonċerna diversi dokumenti u tista’ konsegwentement twassal għal diversi risposti differenti. Min-naħa l-oħra, diversi rikjesti jistgħu jinġabru flimkien f’xi każijiet u jagħtu lok għal risposta waħda biss.

(2)    Din il-kategorija tinkludi biss tweġibiet li jagħtu l-aċċess jew li (parzjalment) jirrifjutaw l-aċċess għad-dokumenti, mitluba taħt ir-Regolament 1049/2001. Din ma tinkludix it-tweġibiet fejn il-Kummissjoni indikat li hija ma tinsabx fil-pussess tad-dokumenti mitluba. Barra minn hekk, ma tinkludix tweġibiet għal applikazzjonijiet għall-aċċess għal dokumenti li kienu kkunsidrati li jaqgħu barra l-kamp ta’ applikazzjoni tar-Regolament 1049/2001 (pereżempju t-tweġibiet mogħtija skont il-prinċipju tal-kooperazzjoni leali mal-Istati Membri jew ma’ istituzzjonijiet oħra, it-tweġibiet fuq il-bażi tal-Kodiċi ta’ Mġiba Amministrattiva Tajba, eċċ.).

(3)      Ara l-ispjegazzjoni fin-nota ta’ qiegħ il-paġna 1.

(4)    Ara l-ispjegazzjoni fin-nota ta’ qiegħ il-paġna 2.

(5)      Din il-kategorija ma għadhiex tintuża aktar, billi ma tikkostitwixxix eċċezzjoni fis-sens tal-Artikolu 4 tar-Regolament 1049/2001. Madankollu għadha tidher peress li d-dejta mhux ipproċessata mhux dejjem ippermettiet distribuzzjoni skont l-eċċezzjoni tal-Artikolu 4 tar-Regolament 1049/2001.

(6)      Fl-2016, il-kategoriji ta’ profili professjonali u soċjali ġew irranġati u m’għadhomx jikkorrispondu mal-kategoriji indikati fir-Rapport Annwali tal-2015. Konsegwentement, fir-Rapport Annwali tal-2016, l-istatistika tal-2015 hija kkonfermata mill-ġdid skont il-profili l-ġodda introdotti fl-2016.

(7)      Fl-2015, l-applikazzjonijiet mingħand l-awtoritajiet nazzjonali/sottonazzjonali ġew irreġistrati bħala applikazzjonijiet skont ir-Regolament 1049/2001. Fl-2016, dawn ma baqgħux jiġu rreġistrati bħala tali, peress li huma kkunsidrati bħala applikazzjonijiet magħmula skont il-prinċipju ta’ kooperazzjoni leali bejn il-Kummissjoni u l-Istati Membri.

(8)      Din il-kategorija tidher fl-istatistika billi f’każijiet fejn l-applikazzjoni inizjali ma kinitx ippreżentata permezz tal-għodda onlajn, ġiet ikkodifikata b’mod manwali u f’ċerti każijiet, minħabba żball klerikali, il-pajjiż tal-applikant ma kienx indikat fis-sistema tal-IT użata għall-ġestjoni tal-aċċess għad-dokumenti (GestDem).

(9)    Mill-ħolqien tas-Servizz Ewropew għall-Azzjoni Esterna (is-SEAE), id-dokumenti tal-FPI biss jinżammu fil-Kummissjoni.

(10)      Id-dejta dwar l-Uffiċċju Ewropew Kontra l-Frodi (OLAF) tikkonċerna l-applikazzjonijiet għall-aċċess għad-dokumenti marbuta mal-attivitajiet amministrattivi tiegħu, li huma rreġistrati fl-istess sistema tal-IT kif użat minn dipartimenti oħra tal-Kummissjoni (GestDem). L-applikazzjonijiet għall-aċċess għad-dokumenti marbuta mal-attivitajiet investigattivi tal-OLAF mhumiex is-suġġett ta’ dan ir-rapport.