IL-KUMMISSJONI EWROPEA
Brussell, 15.4.2016
COM(2016) 207 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
dwar it-tħaddim tar-Regolament tal-Kunsill (KE) Nru 1185/2003 dwar it-tneħħija tal-pinen ta’ klieb il-baħar abbord bastimenti, kif emendat bir-Regolament (UE) Nru 605/2013, u dwar l-iżviluppi internazzjonali f'dan il-qasam
Rapport lill-Parlament Ewropew u lill-Kunsill
Dwar it-tħaddim tar-Regolament tal-Kunsill (KE) Nru 1185/2003 dwar it-tneħħija tal-pinen ta’ klieb il-baħar abbord bastimenti, kif emendat bir-Regolament (UE) Nru 605/2013, u dwar l-iżviluppi internazzjonali f'dan il-qasam
1.Bażi għal dan ir-rapport
Ir-Regolament tal-Kunsill (KE) Nru 1185/2003
dwar it-tneħħija tal-pinen ta’ klieb il-baħar abbord bastimenti stabbilixxa projbizzjoni ġenerali għall-prattika tat-tneħħija tal-pinen tal-klieb il-baħar, jiġifieri it-tneħħija tal-pinen tal-klieb il-baħar u r-rimi l-baħar tal-karkassa li jifdal. Skont dan ir-Regolament l-Istati Membri jistgħu joħorġu permessi speċjali tas-sajd għall-ipproċessar tal-klieb il-baħar abbord. Biex jipprevjeni t-tneħħija tal-pinen, ir-Regolament stabbilixxa l-hekk imsejjaħ proporzjon pinna mal-karkassa għal klieb il-baħar ipproċessati.
Dan ir-Regolament ġie emendat bir-Regolament (UE) Nru 605/2013
. L-Artikolu 6 ta' dan tal-aħħar jistipula: "Meta bastiment tas-sajd li jtajjar bandiera ta’ Stat Membru jaqbad, iżomm abbord, jittrażborda jew iħott klieb il-baħar, l-Istat Membru tal-bandiera għandu […] jibgħat kull sena lill-Kummissjoni […] rapport komprensiv dwar l-implimentazzjoni tiegħu ta’ dan ir-Regolament […]. Wara li […] jkunu bagħtu t-tieni rapport annwali tagħhom […], il-Kummissjoni għandha, sal-1 ta’ Jannar 2016, tirrapporta lill-Parlament Ewropew u lill-Kunsill dwar it-tħaddim ta’ dan ir-Regolament u l-iżviluppi internazzjonali f’dan il-qasam." Dan ir-rapport jissodisfa r-rekwiżit tar-rappurtar.
2.Rappurtar mill-Istati Membri
Użu ta’ permessi speċjali tas-sajd sal-2013
Skont ir-Regolament (KE) Nru 1185/2003, l-Istati Membri li ppermettew it-tneħħija abbord tal-pinen minn klieb il-baħar mejta kellhom jirrappurtaw lill-Kummissjoni l-għadd ta’ permessi speċjali li huma ħarġu kull sena għal dan l-iskop. Ħarsa ġenerali lejn il-permessi maħruġa mill-Istati Membri li użaw din il-possibbiltà skont ir-Regolament l-antik hija ppreżentata fit-Tabella 1 u fil-Grafika 1 fl-Anness.
Rappurtar mill-Istati Membri għall-2013 u għall-2014
Meta bastimenti li jtajru l-bandiera ta’ Stat Membru jaqbdu, iżommu abbord, jittrażbordaw jew iħottu l-art klieb il-baħar, kull sena l-Istat Membru tal-bandiera għandu jippreżenta rapport lill-Kummissjoni dwar l-implimentazzjoni ta’ dan ir-Regolament matul is-sena preċedenti. Dan jinkludi deskrizzjoni tal-monitoraġġ u tal-infurzar tal-konformità tiegħu mar-Regolament u, b’mod partikolari, informazzjoni dwar:
l-għadd ta’ drabi li tħattew l-art klieb il-baħar,
l-għadd, id-data u l-post tal-ispezzjonijiet,
l-għadd u n-natura ta’ każijiet ta’ nuqqas ta’ konformità kif ukoll il-penali applikata,
u l-ħatt l-art totali skont l-ispeċijiet (piż/għadd) u skont il-port.
Tliet Stati Membri kostali – il-Kroazja, l-Italja u r-Rumanija – ma ppreżentaw l-ebda rapport għall-2013 jew għall-2014; diversi oħra ppreżentaw biss rapport rigward l-implimentazzjoni tagħhom tar-Regolament fl-2013 jew fl-2014. Ħarsa ġenerali lejn l-informazzjoni rrappurtata mill-Istati Membri kollha tingħata fit-Tabella 2 fl-Anness; dawn ir-rapporti huma disponibbli onlajn jekk l-Istat Membru kkonċernat ma oġġezzjonax għall-pubblikazzjoni.
F’termini ta’ volum, seba’ Stati Membri jirrappurtaw ħatt l-art ta’ iktar minn 50 tunnellata fl-2013, b’żewġ Stati Membri jispikkaw (Spanja, b’aktar minn 60 000 tunnellata, u Franza, b’aktar minn 15 000 tunnellata). Nofs l-Istati Membri li qabel kienu ħarġu permessi speċjali għas-sajd biex jippermettu l-ipproċessar abbord ta’ klieb il-baħar ma rrappurtaw l-ebda qabda ta’ klieb il-baħar mill-flotot tagħhom.
Spanja u l-Portugall għandhom l-ogħla proporzjonijiet ta’ volumi għal kull ħatt l-art (Tabella 3, Grafika 2). Fit-Tabella 4 tingħata analiżi tal-volumi rrappurtati skont l-ispeċijiet u l-Istati Membri għall-2013. Fil-każ speċifiku tal-ħuta kaħla – speċi li għall-pinen tagħha hemm suq – il-flotot Spanjoli u Portugiżi għandhom l-ikbar ishma f’volumi (Grafika 3).
Rigward il-frekwenza ta’ spezzjonijiet, hemm ċerta eteroġeneità bejn l-Istati Membri (Tabella 5, Grafika 4). Pereżempju, fl-2013, Malta rrappurtat medja ta’ 84 spezzjoni għal kull 100 ħatt l-art filwaqt li Franza rrappurtat 0,2. Fost l-Istati Membri li qabel kienu ħarġu permessi speċjali tas-sajd għall-ipproċessar abbord ta’ klieb il-baħar, il-Litwanja u l-Estonja ma rrappurtaw l-ebda spezzjoni ta’ bastimenti tas-sajd.
Aktar minn 4 400 spezzjoni ġew irrappurtati għall-2013, li matulhom instabu erba’ każijiet ta’ ksur: Ċipru rrappurtat każ ta’ ħuta kaħla li nstabet mingħajr pinen abbord bastiment, Franza każ ta' tneħħija tal-pinen ta' klieb il-baħar minn bastiment Venezwelan, Spanja każ ta' tneħħija tal-pinen ta' klieb il-baħar minn bastiment Portugiż, u r-Renju Unit każ ta' sliħ fuq il-baħar ta’ żewġt iklieb il-baħar.
Spanja ppreżentat informazzjoni addizzjonali b'valutazzjoni tal-impatti finanzjarji tar-Regolament fuq il-flotta Spanjola bil-konz4. Fuq il-bażi tal-ispejjeż irrappurtati ta' adattament għar-rekwiżiti tar-Regolament il-ġdid, analiżi tas-segmenti rilevanti tal-flotta mis-servizzi tal-Kummissjoni tindika li l-akbar segment tal-flotta (f'termini ta' għadd ta' bastimenti u impjiegi) jista' jkompli jopera b'marġnijiet ta' profitti raġonevoli. Għal segmenti li bħalissa diġà qed joperaw b’telf, l-ispejjeż ta’ adattament jistgħu jaggravaw il-problemi finanzjarji tagħhom.
3.Żviluppi internazzjonali
Biex ittejjeb il-konservazzjoni tal-klieb il-baħar u biex tippromwovi kundizzjonijiet ekwivalenti ta' kompetizzjoni għall-flotot tal-Unjoni, il-Kummissjoni kienet u qed tkompli tippromwovi, il-politiki ta’ ħatt l-art ta’ klieb il-baħar bil-pinen mehmuża b’mod naturali f’organizzazzjonijiet u f’korpi reġjonali tas-sajd, bħall-Kummissjoni tas-Sajd tal-Atlantiku tal-Grigal (NEAFC), u f’fora internazzjonali rilevanti.
L-UE hija wkoll promotur ewlieni tar-Riżoluzzjoni tal-Assemblea Ġenerali tan-NU dwar is-Sajd Sostenibbli, li tappella lill-Istati biex jieħdu azzjoni immedjata u kkoordinata biex tittejjeb l-implimentazzjoni tal-miżuri eżistenti tal-RFMO jew ta' dispożijonijiet li jirregolaw is-sajd għall-klieb il-baħar u l-qbid inċidentali tal-klieb il-baħar, u l-konformità magħhom.
4.Konklużjoni
Il-preżentazzjoni ta' rapporti annwali mill-Istati Membri kif stipulat bir-Regolament ma kinitx kompluta minħabba li 14-il Stat Membru kostali biss minn 23 ippreżentaw rapporti sħaħ dwar l-implimentazzjoni tagħhom tar-Regolament kemm fl-2013 kif ukoll fl-2014, filwaqt li tliet Stati Membri kostali ma ppreżentaw l-ebda rapport, minkejja bosta tfakkiriet mill-Kummissjoni. Madankollu, l-Istati Membri kollha li fil-passat kienu ħarġu permessi speċjali tas-sajd għall-ipproċessar abbord ta’ klieb il-baħar ippreżentaw mill-inqas rapport wieħed dwar l-implimentazzjoni tar-Regolament. L-Istati Membri rrappurtaw d-dejta wkoll f’livelli differenti u f’formati differenti.
Minkejja li d-dejta mhijiex kompluta, ir-rappurtar jista' jkun utli biex jinsiltu xi konklużjonijiet limitati. Ir-rapporti ppreżentati jissuġġerixxu li s-sajd għall-klieb il-baħar fuq skala kbira jsir prinċipalment minn bastimenti ta’ żewġ Stati Membri. L-għadd ta’ ksur identifikat matul l-ispezzjonijiet imwettqa mill-Istati Membri li pprovdew l-informazzjoni meħtieġa lill-Kummissjoni, inklużi ż-żewġ Stati Membri ewlenin, jidher li huwa limitat ħafna.
Il-Kummissjoni hija konxja tat-tħassib imqajjem f'wieħed mir-rapporti tal-Istati Membri, li huwa simili għal dak imqajjem minn xi Stati Membri u xi partijiet ikkonċernati matul il-konsultazzjoni pubblika preċedenti, jiġifieri li l-implimentazzjoni tar-Regolament tikkomplika it-trattament tal-karakssi u timponi spejjeż addizzjonali fuq il-bastimenti kkonċernati. Il-Kummissjoni se tkompli timmonitorja s-sitwazzjoni u l-konsegwenzi ekonomiċi tagħha. Diffikultajiet bħal dawn jistgħu jkunu indirizzati sa ċertu punt minn strumenti eżistenti, inklużi dawk tal-FEMS, sabiex ikunu jistgħu jinstabu soluzzjonijiet prattiċi għad-diffikultajiet allegati. Il-Kummissjoni temmen ukoll li huwa importanti li tkompli bil-promozzjoni attiva, fil-livell internazzjonali, ta’ politiki ta' ħatt l-art ta' klieb il-baħar bil-pinen mehmuża b'mod naturali, b’konformità mat-talba tal-Kunsill biex jiżdied l-appoġġ internazzjonali li jikkontribwixxi għal kundizzjonijiet aktar ekwivalenti ta' kompetizzjoni, anke jekk il-proposti tal-UE ma jiġux adottati.