IL-KUMMISSJONI EWROPEA
Brussell, 11.4.2016
COM(2016) 199 final
KOMUNIKAZZJONI MILL-KUMMISSJONI LILL-PARLAMENT EWROPEW, IL-KUNSILL, IL-BANK ĊENTRALI EWROPEW, IL-KUMITAT EKONOMIKU U SOĊJALI EWROPEW U L-KUMITAT TAR-REĠJUNI
It-Tabella ta' Valutazzjoni tal-Ġustizzja tal-UE 2016
1.INTRODUZZJONI
Sistemi ġudizzjarji effettivi għandhom rwol kruċjali biex isostnu l-istat tad-dritt u l-valuri fundamentali tal-Unjoni. Dawn huma wkoll prerekwiżit għal ambjent favur l-investiment u n-negozju. It-titjib fl-effettività ta' sistemi ġudizzjarji nazzjonali hija għalhekk waħda mill-prijoritajiet tas-Semestru Ewropew – iċ-ċiklu annwali tal-UE tal-koordinazzjoni tal-politika ekonomika. It-Tabella ta' Valutazzjoni tal-Ġustizzja tal-UE tgħin lill-Istati Membri biex jilħqu din il-prijorità.
Ir-raba' edizzjoni tat-Tabella ta' Valutazzjoni tkompli tiżviluppa ħarsa ġenerali komprensiva tal-funzjonament ta' sistemi ġudizzjarji nazzjonali: aktar Stati Membri pparteċipaw fil-ġbir ta' data; ġew introdotti indikaturi tal-kwalità ġodda, pereżempju dwar l-istandards, taħriġ, stħarriġ u għajnuna legali; l-indikaturi dwar l-indipendenza ġew arrikkiti, inkluż permezz ta' stħarriġ ġdid tal-Ewrobarometru; u huwa pprovdut aktar għarfien f'ċerti oqsma bħall-komunikazzjoni elettronika.
X’inhi t-Tabella ta’ Valutazzjoni tal-Ġustizzja tal-UE?
It-Tabella ta’ Valutazzjoni tal-Ġustizzja tal-UE hija għodda ta' informazzjoni li tassisti lill-UE u lill-Istati Membri fil-kisba ta’ ġustizzja aktar effettiva billi tipprovdi data oġġettiva, affidabbli u paragunabbli dwar il-kwalità, l-indipendenza u l-effiċjenza tas-sistemi ġudizzjarji tal-Istati Membri kollha.
It-Tabella ta’ Valutazzjoni tikkontribwixxi biex jiġu identifikati nuqqasijiet potenzjali, titjib u prattiki tajba. Hija turi x-xejriet fil-funzjonament tas-sistemi ġudizzjarji nazzjonali fuq perjodu ta' żmien. Ma tippreżentax klassifikazzjoni unika globali iżda tagħti ħarsa ġenerali ta' kif jiffunzjonaw is-sistemi ġudizzjarji kollha bbażati fuq indikaturi varji li huma ta’ interess komuni għall-Istati Membri kollha.
It-Tabella ta’ Valutazzjoni ma tippromwovix xi tip partikolari ta’ sistema ġudizzjarja u tittratta lill-Istati Membri kollha b’mod ugwali. Ikun xi jkun il-mudell tas-sistema ġudizzjarja nazzjonali jew it-traduzzjoni legali li tkun imsejsa fuqha, il-puntwalità, l-indipendenza, l-affordabbiltà, u l-aċċess faċli għall-utent huma wħud mill-parametri essenzjali ta’ sistema ġudizzjarja effettiva.
It-Tabella ta’ Valutazzjoni tiffoka fuq il-kawżi kontenzjużi ċivili u kummerċjali kif ukoll fuq kawżi amministrattivi biex tgħin lill-Istati Membri fl-isforzi tagħhom biex iwittu t-triq għal ambjent aktar favur in-negozju, l-ambjent u ċ-ċittadin. It-Tabella ta’ Valutazzjoni hija strument li jevolvi fi djalogu mal-Istati Membri u l-Parlament Ewropew, bl-għan li jiġu identifikati l-parametri essenzjali ta’ sistema ġudizzjarja effettiva. Il-Parlament Ewropew talab lill-Kummissjoni biex progressivament twessa’ l-kamp ta' applikazzjoni tat-Tabella ta’ Valutazzjoni u r-riflessjoni dwar kif dan għandu jsir.
X’inhi l-metodoloġija tat-Tabella ta’ Valutazzjoni tal-Ġustizzja tal-UE?
It-Tabella ta’ Valutazzjoni tuża diversi sorsi ta’ informazzjoni. Il-biċċa l-kbira tad-data kwantitattiva hija pprovduta mill-Kummissjoni tal-Kunsill tal-Ewropa għall-Evalwazzjoni tal-Effiċjenza tal-Ġustizzja (CEPEJ) li magħha l-Kummissjoni kkonkludiet kuntratt sabiex twettaq studju speċifiku kull sena.
Din id-data tkopri l-perjodu mill-2010 sal-2014, u ġiet ipprovduta mill-Istati Membri skont il-metodoloġija tal-CEPEJ. L-istudju jipprovdi wkoll kummenti dettaljati u skedi ta' informazzjoni speċifiċi għall-pajjiż li jagħtu aktar kuntest u għandhom jinqraw flimkien ma’ dawn il-grafiki.
Is-sorsi l-oħrajn ta' data huma l-grupp tal-persuni ta' kuntatt dwar sistemi ġudizzjarji nazzjonali, in-Netwerk Ewropew tal-Kunsilli għall-Ġudikatura (ENCJ), in-Netwerk tal-Presidenti tal-Qrati Ġudizzjarji Supremi tal-UE, l-Assoċjazzjoni tal-Kunsilli tal-Istat u tal-Ġurisdizzjonijiet Amministrattivi Supremi tal-UE (ACA), in-Netwerk tal-Kompetizzjoni Ewropea, il-Kunsill tal-Għaqdiet Ewropej tal-Avukati (CCBE), il-Kumitat tal-Komunikazzjoni, l-Osservatorju Ewropew tal-Ksur tad-Drittijiet tal-Propjetà Intellettwali, in-Netwerk tal-Kooperazzjoni għall-Ħarsien tal-Konsumatur, il-Eurostat, in-Netwerk Ewropew tat-Taħriġ Ġudizzjarju (EJTN), il-Bank Dinji u l-Forum Ekonomiku Dinji. Il-metodoloġija għat-Tabella ta' Valutazzjoni 2016 issaħħet bl-involviment aktar mill-qrib tal-grupp ta’ persuni ta’ kuntatt dwar is-sistemi ġudizzjarji nazzjonali.
It-tabella ta’ Valutazzjoni tal-UE għall-Ġustizzja kif titma' s-Semestru Ewropew?
It-Tabella ta’ Valutazzjoni tipprovdi informazzjoni dwar il-funzjonament tas-sistemi ġudizzjarji u tgħin biex jiġi vvalutat l-impatt ta’ riformi fil-ġustizzja. Jekk it-Tabella ta' Valutazzjoni tiżvela prestazzjoni dgħajfa, din dejjem teħtieġ analiżi aktar profonda tar-raġunijiet għaliex. Din il-valutazzjoni speċifika għall-pajjiż titwettaq fil-kuntest tal-proċess tas-Semestru Ewropew permezz ta’ djalogu bilaterali mal-awtoritajiet u mal-partijiet interessati kkonċernati. Din il-valutazzjoni tieħu inkunsiderazzjoni l-partikolaritajiet tas-sistema legali u l-kuntest tal-Istati Membri kkonċernati. Dan eventwalment jista’ jwassal lill-Kummissjoni biex tipproponi lill-Kunsill biex jadotta Rakkomandazzjonijiet Speċifiċi skont il-Pajjiż dwar it-titjib ta' sistemi ġudizzjarji nazzjonali.
2.KUNTEST: SFORZI KONTINWI BIEX JITJIEBU S-SISTEMI ĠUDIZZJARJI
Din l-edizzjoni tat-Tabella ta' Valutazzjoni qiegħda tiġi ppubblikata fi żmien meta numru ta' Stati Membri qegħdin jieħdu miżuri biex itejbu s-sistemi ġudizzjarji tagħhom. Il-grafika t'hawn taħt turi li fl-2015 kważi l-Istati Membri kollha għamlu, jew ħabbru, bidliet fis-sistemi ġudizzjarji tagħhom.
Grafika 1: Attività leġiżlattiva u regolatorja li tikkonċerna sistemi ġudizzjarji fl-2015 (miżuri adottati/ inizjattivi mħabbra għal kull Stat Membru) (sors: Il-Kummissjoni Ewropea
)
Grafika 1 tippreżenta ħarsa ġenerali fattwali ta' 'min jagħmel xiex', mingħajr xi evalwazzjoni kwalitattiva. Tiżvela li ħafna Stati Membri huma attivi fl-istess oqsma u jistgħu għalhekk jitgħallmu minn xulxin. Turi wkoll dinamika ta' riformi fil-ġustizzja madwar l-UE peress li, barra mill-miżuri adottati fl-2015, f'numru ta' Stati Membri tħabbru aktar inizjattivi.
Il-kamp ta' applikazzjoni, l-iskala u s-sitwazzjoni attwali tal-inizjattivi differenti jvarjaw fost l-Istati Membri. Numru kbir ta' Stati Membri ppromulgaw jew ħabbru bidliet fil-liġi proċedurali tagħhom. L-attivitajiet tagħhom komplew jiffokaw fuq l-ICT, iżda l-Istati Membri ħadu wkoll inizjattivi li jikkonċernaw il-professjonijiet legali, il-metodi ta' soluzzjoni alternattiva għat-tilwim (ADR), l-għajnuna legali, l-amministrazzjoni tal-qrati, it-tariffi tal-qorti, l-istatut tal-imħallfin, it-tfassil mill-ġdid ta' mapep ġudizzjarji, l-ispeċjalizzazzjoni tal-qorti u l-Kunsilli għall-Ġudikatura.
Dawn l-isforzi huma parti mir-riformi strutturali mħeġġa fil-kuntest tas-Semestru Ewropew. L-Istħarriġ Annwali dwar it-Tkabbir tal-2016 enfasizza li ''it-titjib fil-kwalità, fl-indipendenza u fl-effiċjenza tas-sistemi ġudizzjarji tal-Istati Membri huwa prerekwiżit għall-ambjent favur l-investiment u n-negozju. […] Huwa meħtieġ li jiġu żgurati proċeduri rapidi, li jiġi indirizzat ix-xogħol b'lura tal-qrati, li jiżdiedu s-salvagwardji għall-indipendenza ġudizzjarja u tittejjeb il-kwalità tal-ġudikatura, fosthom permezz ta' użu aħjar tal-ICT fil-qrati u l-użu ta' standards ta' kwalità.''
Għall-istess raġuni, it-titjib fis-sistemi ġudizzjarji nazzjonali huwa wkoll fost l-isforzi meħtieġa fil-livell nazzjonali biex jakkumpanja l-Pjan ta' Investiment għall-Ewropa.
Is-sejbiet tat-Tabella ta’ Valutazzjoni tal-2015, flimkien ma' valutazzjoni speċifika għall-pajjiż ta' kull Stat Membru kkonċernat, tqiesu fis-Semestru Ewropew. Is-Semestru Ewropew 2015 juri li ċerti Stati Membri xorta waħda għadhom jaffaċċjaw sfidi partikolari.
B'mod partikolari, il-Kunsill, fuq proposta mill-Kummissjoni, indirizza Rakkomandazzjonijiet Speċifiċi għall-Pajjiż lil ċerti Stati Membri li jenfasizzaw modi li bihom huma jistgħu jagħmlu s-sistemi ġudizzjarji tagħhom aktar effettivi.
Barra minn hekk, ir-riformi fil-ġustizzja fl-Istati Membri l-oħrajn li jaffaċċjaw sfidi huma mmonitorjati mill-qrib permezz tar-rapporti tal-pajjiżi ppubblikati matul is-Semestru Ewropew
u f'dawk l-Istati Membri skont Programm ta' Aġġustament Ekonomiku.
Barra minn hekk, fil-kuntest tat-Tielet Pilastru tal-Pjan ta' Investiment għall-Ewropa, is-sistemi ġudizzjarji f'disa' Stati Membri ġew identifikati bħala sfida għall-investiment.
Bejn l-2014 u l-2020, l-UE sejra tipprovdi sa EUR 4.2 biljun permezz tal-Fondi Strutturali u ta' Investiment Ewropej (Fondi SIE) biex jagħtu appoġġ għar-riformi ġudizzjarji.
14-il Stat Membru
identifikaw il-ġustizzja bħala qasam li għandu jiġi appoġġjat mill-Fondi SIE fid-dokumenti ta' programmar tagħhom. Il-Kummissjoni tenfasizza l-importanza li jittieħed approċċ orjentat lejn ir-riżultati meta jiġu implimentati l-fondi: dan l-approċċ huwa meħtieġ ukoll skont ir-Regolament tal-Fondi ESI. Il-Kummissjoni qiegħda tiddiskuti mal-Istati Membri kif l-aħjar tivvaluta u tevalwa l-impatt tal-fondi ESI fuq is-sistemi ġudizzjarji kkonċernati.
L-impatt ekonomiku ta' sistemi ġudizzjarji li jiffunzjonaw b'mod sħiħ jiġġustifika dawn l-isforzi. Sistemi ġudizzjarji effettivi għandhom rwol importanti fl-istabbiliment tal-fiduċja matul iċ-ċiklu tan-negozju. Meta s-sistemi ġudizzjarji jiggarantixxu l-infurzar tad-drittijiet, il-kredituri huma aktar probabbli li jsellfu, il-kumpaniji huma dissważi minn imġiba opportunistika, l-ispejjeż tat-tranżazzjonijiet huma mnaqqsin u n-negozji innovattivi li ta’ spiss jiddependu fuq assi intanġibbli. L-importanza tal-effikaċja tas-sistemi ġudizzjarji nazzjonali għall-SMEs ġiet enfasizzata fi stħarriġ tal-2015 ta kważi 9 000 SMEs Ewropej dwar l-innovazzjoni u l-IPR. L-istħarriġ sab b'mod partikolari illi l-ispiża u t-tul eċċessiv tal-proċedimenti ġudizzjarji kienu fost ir-raġunijiet ewlenin għalfejn ma nbditx proċedura minħabba ksur ta' drittijiet ta' proprjeta intellettwali l-qorti. L-impatt pożittiv ta' sistemi ġudizzjarji nazzjonali fuq l-ekonomija hu enfasizzat fil-letteratura u r-riċerka
, inkluż mill-Fond Monetarju Internazzjonali,
il-Bank Ċentrali Ewropew,
l-OECD,
il-Forum Ekonomiku Dinji,
u l-Bank Dinji.
Ir-rilevanza tal-isforzi tal-Istati Membri biex itejbu l-effettività tas-sistemi ġudizzjarji tagħhom hija kkonfermata wkoll mill-ammont ta' xogħol konsistentement għoli għall-qrati matul is-snin, għalkemm is-sitwazzjoni tvarja bejn l-Istati Membri, kif muri mill-figuri t'hawn isfel.
Grafika 2: Numru ta' kawżi ċivili, kummerċjali, amministrattivi u oħrajn deħlin* (Prim'istanza/kull 100 abitant) (sors: studju tas-CEPEJ
)
* Skont il-metodoloġija tas-CEPEJ, din il-kategorija tinkludi l-kawżi ċivili u kummerċjali kontenzjużi u mhux kontenzjużi kollha, il-kawżi tar-reġistru tal-artijiet u tan-negozju mhux kontenzjużi, kawżi tar-reġistru oħrajn, kawżi mhux kontenzjużi oħrajn, il-kawżi tal-liġi amministrattiva u kawżi oħrajn mhux kriminali. IT: Fl-2013, ġiet introdotta klassifikazzjoni differenti ta' kawżi ċivili, għalhekk it-tqabbil ta' snin differenti jista' jwassal għal konklużjonijiet żbaljati. DK: Ambjent tan-negozju mtejjeb allegatament jispjega li l-qrati fil-livelli kollha rċivew inqas kawżi.
Grafika 3: Numru ta' kawżi ċivili u kummerċjali litiġjużi deħlin* (Prim'istanza/kull 100 abitant) (sors: studju tas-CEPEJ)
* Il-kawżi ċivili u kummerċjali kontenzjużi jikkonċernaw tilwim bejn partijiet, pereżempju tilwim dwar kuntratti, skont il-metodoloġija tas-CEPEJ. B'kuntrast għal dan, il-kawżi ċivili (u kummerċjali) mhux kontenzjużi jikkonċernaw proċedimenti mhux ikkontestati, pereżempju, ordnijiet ta’ ħlas mhux ikkontestati. Il-kawżi kummerċjali huma indirizzati minn qrati kummerċjali speċjali f’xi pajjiżi, u ttrattati minn qrati (ċivili) ordinarji f’oħrajn. EL: Bidliet fil-metodoloġija ntrodotti fl-2014. IT: Fl-2013 ġiet introdotta klassifikazzjoni differenti ta' kawżi ċivili, għalhekk it-tqabbil bejn snin differenti jista' jwassal għal konklużjonijiet żbaljati.
3.IS-SEJBIET EWLENIN tat-Tabella ta’ Valutazzjoni tal-Ġustizzja tal-UE għall-2016
L-effiċjenza, il-kwalità u l-indipendenza huma l-parametri prinċipali għal sistema ġudizzjarja effettiva, u t-Tabella ta' Valutazzjoni tippreżenta indikaturi dwar it-tlieta li huma.
3.1 L-effiċjenza tas-sistemi ġudizzjarji
L-indikaturi relatati mal-effiċjenza tal-proċedimenti huma: it-tul tal-proċedimenti (iż-żmien għat-tlestija); ir-rata ta' għeluq tal-kawżi u; in-numru ta’ kawżi pendenti.
3.1.1 It-tul tal-proċedimenti
It-tul tal-proċedimenti jindika ż-żmien stmat (f’jiem) meħtieġ biex tiġi solvuta kawża l-qorti, jiġifieri ż-żmien li tieħu l-qorti sabiex tieħu deċiżjoni fil-prim'istanza. L-indikatur taż-"żmien għat-tlestija" huwa n-numru ta’ kawżi mhux solvuti diviż bin-numru ta’ kawżi solvuti sa tmiem is-sena mmultiplikat bi 365 (jum). Il-grafiki kollha jikkonċernaw proċedimenti fil-prim'istanza u jqabblu, fejn disponibbli, id-data għall-2010, 2012, 2013 u 2014.
* Skont il-metodoloġija tas-CEPEJ, din il-kategorija tinkludi l-kawżi ċivili u kummerċjali kontenzjużi u mhux kontenzjużi kollha, il-kawżi tar-reġistru tal-artijiet u tan-negozju mhux kontenzjużi, kawżi tar-reġistru oħrajn, kważi mhux kontenzjużi oħrajn, il-kawżi tal-liġi amministrattiva u kawżi oħrajn mhux kriminali. Il-paraguni għandhom isiru b’ċertu ħsieb għaliex xi Stati Membri rrappurtaw bidliet fil-metodoloġija għall-ġbir tad-data jew kategorizzazzjoni (CZ, EE, HR, IT, CY, LV, HU, RO, SI, FI). CZ u SK jirrapportaw li mhuwiex possibbli li jiġu individwati n-numru ta' kawżi pendenti fil-prim'istanza, peress li l-kawżi huma kkunsidrati pendenti sakemm l-ebda proċediment ieħor ma jkun possibbli. PT: Mhemmx data disponibbli minħabba limitazzjonijiet tekniċi.
Grafika 5: Żmien meħtieġ biex jiġu solvuti kawżi ċivili u kummerċjali kontenzjużi*
(Fil-prim'istanza/f'jiem) (sors: studju tas-CEPEJ)
* Il-kawżi ċivili (u kummerċjali) kontenzjużi jikkonċernaw tilwim bejn partijiet, pereżempju tilwim dwar kuntratti, skont il-metodoloġija tas-CEPEJ. Min-naħa l-oħra, il-kawżi ċivili (u kummerċjali) mhux kontenzjużi jikkonċernaw proċedimenti mhux ikkontestati, pereżempju, ordnijiet ta’ ħlas mhux ikkontestati. Il-kawżi kummerċjali huma indirizzati minn qrati kummerċjali speċjali f’xi pajjiżi, u ttrattati minn qrati (ċivili) ordinarji f’oħrajn. Il-paraguni għandhom isiru b’ċertu ħsieb għaliex xi Stati Membri rrappurtaw bidliet fil-metodoloġija għall-ġbir tad-data jew kategorizzazzjoni (CZ, EE, EL, ES, HR, IT, CY, LV, LU, HU, RO, SI, FI) jew għamlu twissijiet dwar il-kompletezza tad-data li jaf ma tkoprix l-istati federali kollha jew lill-qrati kollha (DE, LU). CZ u SK jirrappurtaw li mhuwiex possibbli jindividwaw in-numru ta' kawżi pendenti fil-prim istanza, peress li l-kawżi jiġu kkunsidrati pendenti sakemm ma jkunx possibbli li jsir proċediment ulterjuri. Qabel 2014, NL ippreżentat żmien għat-tlestija ponderat, mhux ikkalkulat mis-CEPEJ. PT: Id-data għall-2014 ma kinitx disponibbli minħabba restrizzjonijiet tekniċi.
Grafika 6: Żmien meħtieġ biex jiġu solvuti kawżi amministrattivi* (tal-prim istanza/fi ġranet) (sors: studju tas-CEPEJ)
* Il-kawżi tal-liġi amministrattiva jikkonċernaw tilwim bejn iċ-ċittadini u l-awtoritajiet lokali, reġjonali jew nazzjonali, skont il-metodoloġija tas-CEPEJ. Il-kawżi tal-liġi amministrattiva jiġu indirizzati minn qrati amministrattivi speċjali f'xi pajjiżi u minn qrati (ċivili) ordinarji f'oħrajn. Il-paraguni għandhom isiru b'attenzjoni peress li xi Stati Membri rrappurtaw xi bidliet fil-metodoloġija għall-ġbir tad-data jew fil-kategorizzazzjoni (HU, FI), organizzazzjoni mill-ġdid tas-sistema amministrattiva tal-qrati (HR fl-2012) jew għamlu twissijiet dwar il-kompletezza tad-data li jaf ma tkoprix l-istati federali kollha jew lill-qrati kollha (DE, LU). CZ u SK jirrapportaw li mhuwiex possibbli li jiġu individwati n-numru ta' kawżi pendenti fil-prim istanza, peress li l-kawżi huma kkunsidrati pendenti sakemm l-ebda proċediment ieħor mhuwa possibbli. CY: Iż-żieda fil-kawżi relatati mar-rikapitalizzazzjoni u r-riżoluzzjoni konġunta tagħhom allegatament tispjega l-varjazzjonijiet. MT: Żieda fin-numru ta' mħallfin allegatament tispjega l-varjazzjonijiet.
3.1.2 Rata tal-ikklirjar
Ir-rata tal-ikklirjar hija l-proporzjon tan-numru ta’ kawżi solvuti meta mqabbel man-numru ta’ kawżi li jkunu deħlin. Hija tkejjel jekk qorti hijiex tlaħħaq mal-ammont ta’ kawżi deħlin. Meta r-rata tal-ikklirjar tkun ta' madwar 100% jew aktar, dan ifisser li s-sistema ġudizzjarja għandha l-kapaċità li tal-inqas taqta' kawżi bl-istess rata li jidħlu. Meta r-rata tal-ikklirjar tkun inqas minn 100%, dan ifisser li l-qrati qed isolvu l-kawżi inqas minn numru ta' kawżi li jidħlu.
Grafika 7: Rata ta' riżoluzzjoni ta' kawżi ċivili, kummerċjali, amministrattivi u oħrajn*
(fil-prim'istanza/f'% - valuri ogħla minn 100% jindikaw li jiġu solvuti iktar kawżi milli jidħlu, filwaqt li valuri inqas minn 100% jindikaw li jiġu solvuti inqas kawżi milli jidħlu) (sors: studju tas-CEPEJ)
* Il-paraguni għandhom isiru b'attenzjoni peress li xi Stati Membri irrappurtaw xi bidliet fil-metodoloġija għall-ġbir jew il-kategorizzazzjoni tad-data (CZ, EE, IT, CY, LV, HU, SI, FI). Bidliet fil-kawżi li jidħlu allegatament jispjegaw il-varjazzjonijiet f'LT u SK. LV: Fatturi esterni u interni bħal proċedimenti ġodda ta' insolvenza allegatament kellhom impatt fil-varjazzjonijiet.PT: Data mhijiex disponibbli minħabba limitazzjonijiet tekniċi.
Figura 8: Rata ta' riżoluzzjoni ta' kawżi ċivili u kummerċjali litigużi* (fl-ewwel istanza/f'%) (sors: studju tas-CEPEJ)
* Il-paraguni għandhom isiru b'attenzjoni peress li xi Stati Membri rrappurtaw xi bidliet fil-metodoloġija għall-ġbir tad-data jew fil-kategorizzazzjoni (CZ, EE, EL, IT, CY, LV, HU, SI, FI) jew għamlu twissijiet dwar il-kompletezza tad-data li jaf ma tkoprix l-istati federali kollha jew lill-qrati kollha (DE, LU). NL: Qabel l-2014, ingħata żmien għat-tlestija ponderat, mhux ikkalkulat mis-CEPEJ. LU: L-introduzzjoni tal-metodi tal-istatistiċi l-ġodda allegatament tispjega l-varjazzjonijiet. IE: Prattiċi storiċi fir-reġistrazzjoni tal-kawżi ċivili pendenti allegatament jispjegaw ir-riżultati l-baxxi. PT: Id-data għall-2014 ma kinitx disponibbli minħabba restrizzjonijiet tekniċi.
Grafika 9: Rata ta' riżoluzzjoni tal-kawżi amministrattivi* (fil-prim'istanza/f'%) (sors: studju tas-CEPEJ)
* Il-paraguni għandhom isiru b'attenzjoni peress li xi Stati Membri irrappurtaw xi bidliet fil-metodoloġija għall-ġbir tad-data jew il-kategorizzazzjoni (HU, FI), organizzazzjoni mill-ġdid tas-sistema amministrattiva tal-qrati (HR fl-2012) jew għamlu twissijiet dwar il-kompletezza tad-data li jaf ma tkoprix l-istati federali kollha jew lill-qrati kollha (DE, LU). LT: Bidliet fil-kawżi li jidħlu allegatament jispjegaw il-varjazzjonijiet. MT: Żieda fin-numru ta' mħallfin allegatament tispjega l-varjazzjonijiet.
3.1.3 Kawżi pendenti
In-numru ta’ kawżi pendenti juri n-numru ta’ kawżi li għad iridu jiġu indirizzati fi tmiem perjodu. Hija tinfluwenza wkoll iż-żmien għar-riżoluzzjoni tal-kawża.
Grafika 10: Numru ta' kawżi ċivili, kummerċjali, amministrattivi u kawżi pendenti oħra* (fil-prim istanza/għal kull 100 abitant) (sors: studju tas-CEPEJ)
* Il-paraguni għandhom isiru b'attenzjoni peress li xi Stati Membri irrappurtaw xi bidliet fil-metodoloġija għall-ġbir jew il-kategorizzazzjoni tad-data (CZ, EE, IT, CY, LV, HU, RO, SI, FI). CZ u SK jirrappurtaw li mhuwiex possibbli jindividwaw in-numru ta' kawżi pendenti fil-prim'istanza, peress li l-kawżi jiġu kkunsidrati pendenti sakemm ma jkunx possibbli li jsir proċediment ulterjuri. ES: Bidliet fil-kawżi li jidħlu allegatament jispjegaw il-varjazzjonijiet. PT: Data mhijiex disponibbli minħabba limitazzjonijiet tekniċi.
Grafika 11: Numru ta' kawżi pendenti ċivili u kummerċjali litiġjużi* (fil-prim'istanza/għal kull 100 abitant) (sors: studju tas-CEPEJ)
* Il-paraguni għandhom isiru b'attenzjoni peress li xi Stati Membri rrappurtaw xi bidliet fil-metodoloġija għall-ġbir tad-data jew il-kategorizzazzjoni (CZ, EE, EL, IT, CY, LV, HU, RO, SI, FI) jew għamlu twissijiet dwar il-kompletezza tad-data li jaf ma tkoprix l-istati federali kollha jew lill-qrati kollha (DE, LU). Bidliet fil-kawżi li jidħlu allegatament jispjegaw il-varjazzjonijiet fid-DK, EL, u ES. CZ u SK jirrappurtaw li mhuwiex possibbli jindividwaw in-numru ta' kawżi pendenti fil-prim'istanza, peress li l-kawżi jiġu kkunsidrati pendenti sakemm ma jkunx possibbli li jsir proċediment ulterjuri. PT: Id-data għall-2014 ma kinitx disponibbli minħabba restrizzjonijiet tekniċi.
Grafika 12: Numru ta' kawżi pendenti amministrattivi* (fil-prim istanza/għal kull 100 abitant) (sors: studju tas-CEPEJ)
* Il-paraguni għandhom isiru b'attenzjoni peress li xi Stati Membri irrappurtaw xi bidliet fil-metodoloġija għall-ġbir tad-data jew fil-kategorizzazzjoni (HU, FI), organizzazzjoni mill-ġdid tas-sistema amministrattiva tal-qrati (HR fl-2012) jew għamlu twissijiet dwar il-kompletezza tad-data li jaf ma tkoprix l-istati federali kollha jew lill-qrati kollha (DE, LU). Bidliet fil-kawżi li jidħlu allegatament jispjegaw il-varjazzjonijiet fi ES u CY. CZ u SK jirrappurtaw li mhuwiex possibbli jindividwaw in-numru ta' kawżi pendenti fil-prim'istanza, peress li l-kawżi jiġu kkunsidrati pendenti sakemm ma jkunx possibbli li jsir proċediment ulterjuri.
3.1.4 L-effiċjenza f'oqsma speċifiċi
Din it-Taqsima tipprovdi informazzjoni iktar dettaljata dwar iż-żmien meħtieġ mill-qrati biex isolvu t-tilwim f'oqsma speċifiċi tal-liġi u tikkumplimenta d-data ġenerali dwar l-effiċjenza tas-sistemi ġudizzjarji. L-oqsma jintgħażlu fuq il-bażi tar-rilevanza tagħhom għas-suq uniku, l-ekonomija u l-ambjent tan-negozju inġenerali. Id-data dwar it-tul medju tal-proċedimenti f'dawn l-oqsma speċifiċi tipprovdi fehim iktar sfumat dwar kif tiffunzjona sistema ġudizzjarja nazzjonali. It-Tabella ta' Valutazzjoni tal-2016 tibni fuq l-eżerċizzji tal-ġbir tad-data ta' qabel u tistudja l-oqsma tal-insolvenza, il-liġi tal-kompetizzjoni, il-liġi tal-konsumatur, id-drittijiet tal-proprjetà intellettwali, il-liġi dwar il-komunikazzjonijiet elettroniċi u l-akkwist pubbliku.
Ħarsa iktar mill-qrib lejn il-funzjonament tal-qrati meta japplikaw il-liġi tal-UE f'oqsma speċifiċi hija partikolarment rilevanti. Il-liġi tal-UE tifforma bażi komuni fis-sistemi legali tal-Istati Membri u l-litigazzjoni bbażata fuq il-liġi tal-UE għalhekk hija partikolarment adegwata biex tikseb data komparabbli. Meta japplikaw il-liġi tal-UE, il-qrati nazzjonali jaġixxu bħala qrati tal-Unjoni u jiżguraw li d-drittijiet u l-obbligi mogħtija skont il-liġi tal-UE jiġu infurzati b'mod effettiv. Ħarsa iktar mill-qrib lejn oqsma speċifiċi tal-UE titfa' dawl fuq kemm hija infurzata b'mod effettiv il-liġi tal-UE. Dewmien twil fil-proċedimenti ġudizzjarji jista' jkollu konsegwenzi negattivi fuq l-infurzar tad-drittijiet li jirriżultaw mil-liġi tal-UE inkwistjoni, eż. meta rimedji adegwati ma jkunux iktar disponibbli jew danni finanzjarji serji jsiru rrekuperabbli.
Grafika 13 Insolvenza: Żmien meħtieġ biex tissolva l-insolvenza* (fi snin) (sors: Il-Bank Dinji: Twettiq ta’ Negozju)
* Iż-żmien għall-kredituri biex jirkupraw il-kreditu tagħhom. Il-perjodu ta’ żmien jibda mill-inadempjenza tal-kumpanija sal-ħlas ta’ parti mill-flus jew tal-ammont ta' flus kollu dovut lill-bank. It-tattiċi ta' dewmien potenzjali mill-partijiet, bħall-preżentazzjoni ta' appelli dilatorji jew talbiet għal estensjoni, jittieħdu inkunsiderazzjoni. Id-data hija derivata minn tweġibiet għall-kwestjonarji mill-prattikanti lokali tal-insolvenza u vverifikati permezz ta' studju tal-liġijiet u r-regolamenti, kif ukoll informazzjoni pubblika dwar sistemi ta' insolvenza. Data miġbura f'Ġunju ta' kull sena.
Grafika 14 Kompetizzjoni: Tul medju tal-kawżi ta' stħarriġ ġudizzjarju kontra deċiżjonijiet tal-awtoritajiet nazzjonali ta' kompetizzjoni li japplikaw l-Artikoli 101 u 102 TFUE* (fil-prim istanza/f'jiem) (sors: Il-Kummissjoni Ewropea man-Netwerk Ewropew ta' Kompetizzjoni)
Wieħed mill-aspetti prinċipali ta' ambjent ta' negozju attraenti hija l-applikazzjoni korretta tal-liġi tal-kompetizzjoni. Dan huwa essenzjali biex jiġi żgurat li n-negozji jkunu jistgħu jikkompetu fuq l-istess livell. L-istħarriġ ġudizzjarju tad-deċiżjonijiet tal-awtoritajiet nazzjonali tal-kompetizzjoni fil-prim istanza jidhru li jieħdu iktar fit-tul meta jitqabblu maż-żmien għar-riżoluzzjoni fil-kawżi amministrattivi (Grafika 6) jew fil-kawżi ċivili, kummerċjali, amministrattivi u kawżi oħra inġenerali (Grafika 4). Probabbilment, dawn ir-riżultati jindikaw il-kumplessità u l-importanza ekonomika tal-kawżi meta tkun ġiet applikata l-liġi tal-kompetizzjoni tal-UE.
* L-ebda kawża ma ġiet identifikata f'dan il-perjodu fil-BG, EE, CY, MT. IE: Ix-xenarju definit biex tinkiseb id-data f'din il-Grafika ma japplikax (l-awtorità nazzjonali tal-kompetizzjoni m'għandhiex is-setgħa li tieħu deċiżjonijiet bl-applikazzjoni tal-Artikoli 101 u 102 TFUE). AT: Ix-xenarju ma japplikax b'mod dirett; id-data tinkludi l-kawżi kollha deċiżi mill-Qorti Cartel li jinvolvu l-ksur tal-Artikoli 101 u 102 tat-TFUE. Iż-żmien meħtieġ biex jissolvew il-kawżi ta' stħarriġ ġudizzjarju ġie kkalkulat fuq il-bażi tat-tul tal-kawżi meta ttieħdet deċiżjoni tal-qorti fis-sena ta' referenza. L-Istati Membri huma ppreżentati fuq il-bażi tat-tul medju peżat tal-proċedimenti ġudizzjarji waqt dawn it-tliet snin. In-numru ta' kawżi rilevanti għal kull Stat Membru jvarja, iżda f'ħafna kawżi dan in-numru huwa baxx (inqas minn tlieta fis-sena). Dan jista' jagħmel it-tul medju dipendenti fuq it-tul ta' kawża waħda eċċezzjonalment twila jew qasira u jirriżulta f'varjazzjonijiet kbar minn sena għal oħra (eż. BE, DE, PL, UK). Xi wħud mill-itwal kawżi involvew referenza għal deċiżjoni preliminari lill-Qorti tal-Ġustizzja tal-Unjoni Ewropea (eż. CZ).
Grafika 15 Komunikazzjonijiet elettroniċi: Tul medju tal-kawżi ta' stħarriġ ġudizzjarju kontra deċiżjonijiet tal-awtoritajiet nazzjonali regolatorji li japplikaw il-liġi tal-UE dwar il-komunikazzjonijiet elettroniċi* (prim istanza/f'jiem) (sors: Il-Kummissjoni Ewropea mal-Kumitat tal-Komunikazzjonijiet)
Il-leġiżlazzjoni dwar il-komunikazzjonijiet elettroniċi timmira li tagħmel is-swieq relatati iktar kompetittivi u tiġġenera investiment, innovazzjoni u tkabbir. L-infurzar effettiv ta' din il-leġiżlazzjoni huwa essenzjali wkoll biex jikseb il-miri ta' prezzijiet iktar baxxi għaċ-ċittadini, servizzi ta' kwalità aħjar u iktar trasparenza. B'mod ġenerali, it-tul medju biex jiġu solvuti l-kawżi ta' stħarriġ ġudizzjarju fil-liġi tal-komunikazzjonijiet elettroniċi fil-prim istanza jidhru itwal mit-tul medju biex jiġu solvuti kawżi ċivili, kummerċjali, amministrattivi u oħrajn (Grafika 4). Paragun mal-kawżi tal-liġi tal-kompetizzjoni (Grafika 14) u tal-protezzjoni tal-konsumatur (Grafika 17) juri diverġenzi ikbar fit-tul medju fil-grupp ta' kawżi li jikkonċerna l-komunikazzjonijiet elettroniċi. Probabbilment, dan huwa minħabba l-ispettru wiesgħa ta' kawżi koperti minn din il-kategorija, li jvarjaw minn reviżjonijiet estensivi ta' "analiżi tas-swieq" għal kwistjonijiet iffukati fuq il-konsumatur.
* L-ebda kawża ma ġiet identifikata f'dan il-perjodu fil-LU u fil-LV, l-ebda kawża fil-FI fl-2013, l-ebda kawża fl-IE u f'MT fl-2014. In-numru ta' kawżi rilevanti ta' stħarriġ ġudizzjarju jvarja skont l-Istat Membru. F'xi kawżi, in-numru limitat ta' kawżi rilevanti (BE, EE, IE, CY, LT, UK) jfisser li kawżi b'tul ta' żmien twil ħafna jistgħu jaffettwaw b'mod konsiderevoli l-medja. AT: Fl-2013 kien hemm numru eċċezzjonalment kbir ta' kawżi kumplessi tal-analiżi tas-suq biex jiġu deċiżi mill-qorti rilevanti. DK: korp kważi ġudizzjarju huwa inkarigat mill-appelli tal-prim istanza. Fl-ES, AT, PL qrati differenti huma inkarigati skont is-suġġett tal-kawża.
Grafika 16 Trademark Komunitarja: Tul medju tal-kawżi ta' ksur tat-trademark komunitarja* (prim istanza/f'jiem) (sors: Il-Kummissjoni Ewropea mal-Osservatorju Ewropew dwar il-ksur tad-drittijiet tal-proprjetà intellettwali)
Id-drittijiet ta' proprjetà intellettwali huma essenzjali biex jistimulaw l-investiment fl-innovazzjoni. Mingħajr mezzi effettivi ta' infurzar tad-drittijiet tal-proprjetà intellettwali, l-innovazzjoni u l-kreattività huma skorraġuti u l-investiment jispiċċa. Għalhekk, il-Grafika 16 tippreżenta data dwar iż-żmien meħtieġ għall-qrati nazzjonali biex jieħdu deċiżjoni f'kawżi li jikkonċernaw ksur tal-iktar titolu komuni ta' proprjetà intellettwali tal-UE - Trademark Komunitarja. Il-leġiżlazzjoni tal-UE dwar it-trademarks Komunitarji tagħti rwol sinifikanti lill-qrati nazzjonali, li jaġixxu bħala qrati tal-Unjoni u jieħdu deċiżjonijiet li jaffettwaw it-territorju tas-suq uniku. Id-data turi differenzi fuq perjodu ta' żmien medju ta' dawn il-kawżi fi Stati Membri differenti, li jistgħu jkollhom impatt fuq id-detenturi tat-trademarks Komunitarji li qiegħdin ifittxu rimedju ġudizzjarju f'kawżi ta' allegat ksur.
* HR: L-ebda kawża ma ġiet identifikata f'dan il-perjodu. L-ebda kawża ma ġiet identifikata fil-LU u fl-IE fl-2012, fil-LT fil-2013 u fl-EE u fil-FI fl-2014. It-tul medju tal-kawżi ġie kkalkulat fuq il-bażi ta' data statistika, fejn disponibbli, jew kampjun ta' kawżi. L-Istati Membri huma organizzati fuq il-bażi tat-tul medju peżat tal-proċedimenti ġudizzjarji waqt dawn it-tliet snin. DK: Id-data mogħtija għall-2012 u l-2013 tinkludi l-kawżi kollha li għandhom x'jaqsmu mat-trademarks. EL: Id-data għall-2014 hija medja kkalkulata ibbażata fuq data minn qrati differenti. Intużaw stimi mill-qrati għad-data fid-DE, ES, PT, SE. In-numru ta' kawżi rilevanti jvarja skont l-Istat Membru. In-numru ta' kawżi rilevanti kien limitat (inqas minn ħamsa) fil-LT fl-2012, fl-EE u fil-FI fl-2012 u fl-2013, fl-IE u fil-LU fl-2013 u fl-2014, fl-HU fl-2012 u fl-2014. Dan jista' jagħmel it-tul medju dipendenti fuq it-tul ta' kawża waħda eċċezzjonalment twila jew qasira u jirriżulta f'varjazzjonijiet kbar minn sena għal oħra.
Grafika 17 Protezzjoni tal-konsumatur: Tul medju tal-kawżi ta' stħarriġ ġudizzjarju kontra deċiżjonijiet tal-awtoritajiet tal-protezzjoni tal-konsumatur li japplikaw il-liġi tal-UE* (prim istanza/f'jiem) (sors: Il-Kummissjoni Ewropea man-Netwerk ta' Kooperazzjoni tal-Protezzjoni tal-Konsumatur)
L-infurzar effettiv tal-liġi tal-konsumatur tal-UE jiżgura li l-konsumaturi jibbenefikaw mid-drittijiet tagħhom u li l-kumpaniji li jiksru r-regoli tal-konsumatur ma jiksbux vantaġġi mhux ġusti. L-awtoritajiet tal-protezzjoni tal-konsumatur u l-qrati għandhom rwol importanti fl-infurzar tal-liġi tal-konsumatur tal-UE. Ix-xenarju ta' hawn taħt ikopri lill-Istati Membri fejn l-awtoritajiet tal-protezzjoni tal-konsumatur għandhom is-setgħa li jadottaw deċiżjonijiet li jiddikjaraw ksur tal-liġi tal-konsumatur. Il-kawżi trattati mill-awtoritajiet tal-konsumatur ta' spiss jikkonċernaw kwistjonijiet importanti tal-konsumatur. Stħarriġ ġudizzjarju li jdum ħafna jista' jtawwal ir-riżoluzzjoni tal-ksur possibbli tal-liġi tal-konsumatur, li tista' taffettwa serjament lill-konsumaturi u n-negozji.
* Ix-xenarju ma japplikax għall-BE, LU, AT, FI, SE, UK. Ma seħħet l-ebda kawża rilevanti fl-IE, CY, MT waqt il-perjodu li għalih kienet disponibbli d-data. DE: L-awtoritajiet amministrattivi għandhom kompetenza li jadottaw deċiżjonijiet f'kawżi transfruntiera u ma seħħew l-ebda kawżi transfruntiera rilevanti f'dan il-perjodu. FR: Il-kawżi ta' appell huma marġinali u d-data kienet disponibbli biss għall-2013. ES: Id-data turi l-medja ta' erba' komunitajiet awtonomi kull sena u l-medja tista' tvarja f'pajjiżi awtonomi oħra. In-numru ta' kawżi fid-DK, EE, FR, HR, LT, NL, SI għall-perjodu kopert huwa baxx, li jfisser li kawża waħda b'tul qasir jew twil ħafna tista' taffettwa b'mod konsiderevoli l-medja u tista' twassal għal varjazzjonijiet ikbar għal kull sena. Xi Stati Membri taw stima (IT, PL, RO għall-2013). B'mod ġenerali, id-data ma tkoprix servizzi u prodotti finanzjarji. It-tul medju jiġi kkalkulat f'jiem kalendarji, li jgħodd mill-jum meta tkun ġiet ippreżentata azzjoni jew appell quddiem il-qorti u sal-jum ta' meta l-qorti tkun adottat id-deċiżjoni finali.
Oqsma speċifiċi oħra
Fl-2015, il-Kummissjoni esplorat modi kif tiġbor id-data mal-ACA-Europe - l-Assoċjazzjoni tal-Kunsilli tal-Istat u tal-Ġurisdizzjonijiet Amministrattivi Supremi tal-Unjoni Ewropea fil-qasam tal-akkwist pubbliku. Il-liġi tal-UE dwar l-akkwist pubbliku
hija ekonomikament importanti, peress li tipprevedi rimedji mgħaġġla u effettivi għal offerenti attwali u potenzjali li jikkontestaw l-għoti tal-kuntratti pubbliċi. Id-data miksuba minn 17-il Stat Membru, turi li fl-2013-2014, it-tul medju fl-UE ta' proċedimenti sostantivi fil-kawżi tal-akkwisti pubbliċi fil-qrati tal-aħħar istanza kien inqas minn sena (268 jum). Stħarriġ ġudizzjarju effettiv jiżgura li l-offerenti jistgħu jibbenefikaw mill-kamp ta' applikazzjoni sħiħ tar-rimedji skont il-liġi tal-UE dwar rimedji fl-akkwisti pubbliċi u s-soċjetà inġenerali ma tkunx affettwata mill-prestazzjoni mdewma tal-kuntratti pubbliċi.
3.1.5 Ġabra fil-qosor dwar l-effiċjenza tas-sistemi ġudizzjarji
Il-puntwalità tad-deċiżjonijiet ġudizzjarji hija essenzjali biex jiġi żgurat il-funzjonament bla xkiel tas-sistema ġudizzjarja. Il-parametri prinċipali użati mit-Tabella ta' Valutazzjoni għall-eżaminazzjoni tal-effiċjenza tas-sistemi ġudizzjarji huma t-tul tal-proċedimenti (żmien stmat f'jiem meħtieġa biex tinqata' kawża), ir-rata tal-ikklirjar (il-proporzjon tan-numru ta' kawżi li jinqatgħu fuq in-numru ta' kawżi li jidħlu) u n-numru ta' kawżi pendenti (li għad irid jiġi indirizzat fl-aħħar tas-sena). It-Tabella ta' Valutazzjoni tal-2016 turi xi sinjali pożittivi.
Meta mqabbla mal-edizzjoni tat-Tabella ta' Valutazzjoni ta' qabel, id-data turi li:
It-tul tal-kawżi ċivili u kummerċjali litiġjużi b'mod ġenerali tjieb (Grafika 5). Madankollu, għall-kategorija l-wiesgħa "l-kawżi kollha" (Grafika 4) u għall-kawżi amministrattivi (Grafika 6), it-tul tal-proċedimenti mar għall-agħar f'iktar pajjiżi milli tjieb.
Fil-biċċa l-kbira tal-Istati Membri li hemm data disponibbli għalihom, il-qrati għandhom rati tal-ikklirjar iktar minn 100% fil-kategorija tal-"kawżi kollha" (Grafika 7) u għall-kawżi ċivili u kummerċjali litiġużi (Grafika 8). Dan ifisser li jistgħu jitrattaw il-kawżi li jidħlu f'dawn l-oqsma. Madankollu, fir-rigward tal-kawżi amministrattivi (Grafika 9), il-biċċa l-kbira tal-Istati Membri għandhom rata tal-ikklirjar ta' inqas minn 100% li turi li qed jaffaċċjaw diffikultajiet biex ilaħħqu mal-kawżi li jidħlu.
Rigward il-kawżi pendenti, hemm stabbiltà globali iżda jista' jiġi osservat titjib f'diversi Stati Membri li affaċċjaw sfidi partikolari b'numru kbir ta' kawżi pendenti, kemm fil-kategorija tal-"kawżi kollha" (Grafika 10) kif ukoll għall-kawżi amministrattivi (Grafika 12).
Id-data tul is-snin turi li:
Hemm ftit volatilità fir-riżultati, li tista' titjieb jew tiddeterjora fl-Istati Membri minn sena għal oħra. Din il-varjanza tista' tiġi spjegata b'fatturi kuntestwali bħal żieda f'daqqa ta' kawżi li jidħlu - peress li varjazzjonijiet ta' iktar minn 10% tal-kawżi li jidħlu mhumiex mhux tas-soltu. Riżultati li jvarjaw jistgħu jkunu ġejjin ukoll minn nuqqasijiet sistemiċi bħal nuqqas ta' flessibbiltà u rispons tas-sistema ġudizzjarja, kapaċità insuffiċjenti għall-adattament għall-bidla jew inkonsistenzi fil-proċess tar-riforma.
Fejn jistgħu jiġu osservati x-xejriet tul dawn l-aħħar tliet snin, jidher li għall-kawżi ċivili u kummerċjali litiġużi u l-kategorija tal-"kawżi kollha", it-tul tal-proċedimenti tjieb f'iktar pajjiżi milli ma tjiebx. Madankollu, is-sitwazzjoni ddeterjorat għall-kawżi amministrattivi. F'pajjiżi fejn ir-rata tal-ikklirjar hija inqas minn 100%, ġeneralment jistgħu jiġu osservati iktar xejriet negattivi milli pożittivi għall-kawżi kollha. Rigward kawżi pendenti, kien hemm tnaqqis globali ħafif fil-kategoriji kollha tal-kawżi.
Id-data għal oqsma speċifiċi tipprovdi ħarsa aktar fil-fond fit-tul tal-proċedimenti f’ċerti sitwazzjonijiet fejn il-liġi tal-UE hija involuta (eż. leġiżlazzjoni dwar il-kompetizzjoni, il-komunikazzjonijiet elettroniċi, id-drittijiet tal-konsumatur, u l-proprjetà intellettwali). L-għan ta’ dawn il-figuri huwa sabiex jirriflettu aħjar il-funzjonament tas-sistemi ġudizzjarji f’tipi konkreti ta’ tilwim relatat man-negozju, anke jekk ix-xenarji dojoq użati għall-kisba tad-data jfissru li l-konklużjonijiet għandhom jittieħdu b’ċerta kawtela. Il-grafiki juru li:
It-tul tal-proċedimenti fl-istess Stati Membri jistgħu jvarjaw b’mod konsiderevoli, skont il-qasam tal-liġi kkonċernat. Jidher ukoll li ċerti Stati Membri jmorru anqas tajjeb f’dawn l-oqsma speċifiċi milli fil-kategoriji usa' tal-kawżi ppreżentati hawn fuq. Dan jista’ jiġi spjegat mill-kumplessità tas-suġġett, mill-passi proċedurali speċifiċi jew mill-fatt li ftit kawżi kkumplikati jistgħu jaffetwaw it-tul medju.
Il-litigazzjoni bejn partijiet privati hija bħala medja iqsar mil-litigazzjoni kontra l-awtoritajiet tal-istat. Pereżempju, fi ftit Stati Membri biss l-istħarriġ ġudizzjarju tal-prim’istanza tad-deċiżjonijiet tal-awtoritajiet nazzjonali li japplikaw il-liġi tal-UE (eż. L-awtoritajiet tal-kompetizzjoni, tal-konsumatur jew tal-komunikazzjoni elettronika) jieħu anqas minn sena fuq bażi medja. Din is-sejba tenfasizza l-importanza għal kumpaniji u konsumaturi li jkun hemm funzjonament mingħajr intoppi tal-katina tal-infurzar tal-liġi tal-UE kollha, mill-awtorità kompetenti sal-qorti tal-aħħar istanza. Din tikkonferma wkoll ir-rwol ewlieni li l-ġudikatura għandha għall-effikaċja tal-liġi tal-UE u l-governanza ekonomika.
|
3.2 Il-kwalità tas-sistemi ġudizzjarji
Sistemi ġudizzjarji effikaċi ma jeħtieġux biss deċiżjonijiet f’waqthom imma kwalità wkoll. Għaldaqstant nuqqas jista’ jżid ir-riskji tan-negozju għal kumpaniji kbar u SMEs u jaffetwa l-għażliet tal-konsumatur. Għalkemm mhemmx mod wieħed miftiehem ta’ kejl tal-kwalità tas-sistemi ġudizzjarji, it-Tabella ta’ Valutazzjoni tiffoka fuq ċerti fatturi li ġeneralment huma aċċettati bħala rilevanti
u li jistgħu jgħinu sabiex itejbu l-kwalità tal-ġustizzja. Dawn huma raggruppati f’erba’ kategoriji: (1) aċċessibilità tal-ġustizzja għal ċittadini u negozji; (2) riżorsi u materjali umani adegwati; (3) il-ħolqien ta’ għodod ta’ valutazzjoni; u (4) l-użu ta’ standards tal-kwalità.
3.2.1 Aċċessibbiltà
L-aċċessibbiltà hija meħtieġa matul il-katina kollha tal-ġustizzja sabiex tiffaċilita l-kisba tal-informazzjoni – dwar is-sistema ġudizzjarja, dwar kif issir talba u l-aspetti finanzjarji relatati, u dwar l-istat tal-proċedimenti sat-tmiem tal-proċess – sabiex is-sentenza tkun tista’ tiġi aċċessata online malajr.
– L-għoti tal-informazzjoni dwar is-sistema ġudizzjarja –
Il-pedament għall-aċċess għall-ġustizzja hija l-informazzjoni pprovduta lil ċittadini u negozji dwar l-aspetti ġenerali tas-sistema ġudizzjarja.
Grafika 18: Disponibbiltà ta’ informazzjoni online dwar is-sistema ġudizzjarja għall-pubbliku ġenerali* (sors: Il-Kummissjoni Ewropea)
* F’xi Stati Membri (SI, RO) l-informazzjoni dwar il-kompożizzjoni tal-ispejjeż tal-proċedimenti hija disponibbli permezz tal-pubblikazzjoni tal-leġiżlazzjoni li fiha l-informazzjoni rilevanti. BG: Mhux kull sit elettroniku ta’ kull qorti jistabbilixxi l-informazzjoni dwar is-sistema ġudizzjarja, il-bidu ta’ kawża, l-għajnuna legali u l-kompożizzjoni tal-ispejjeż tal-proċeduri. CZ L-informazzjoni dwar kif tibda kawża hija disponibbli fis-sit elettroniku tal-Qorti Suprema, il-Qorti Amministrattiva Suprema u l-Qorti Kostituzzjonali. DE: Kull stat federali u l-livell federali jiddeċiedi liema informazzjoni jipprovdi online.
– Għoti ta’ għajnuna legali –
"Għandha tingħata għajnuna legali lil dawk li ma jkollhomx mezzi biżżejjed, fil-kawżi fejn din l-għajnuna hija meħtieġa sabiex jiġi żgurat aċċess effettiv għall-ġustizzja" (Karta tad-Drittijiet Fundamentali tal-UE, l-Artikolu 47(3)). Grafika 19 tistabbilixxi l-allokazzjoni tal-baġit tal-Istati Membri għal kull persuna f'għajnuna legali. L-Istati Membri kollha rrapportaw l-allokazzjoni ta’ baġit.
Grafika 19: Il-baġit pubbliku annwali allokat għal għajnuna legali* (EUR għal kull abitant) (sors: studju tas-CEPEJ)
* F’ċerti Stati Membri, il-professjonisti legali jistgħu jkopru wkoll parti mill-għajnuna legali; li mhijiex riflessa fil-figuri ta’ hawn fuq.
Grafika 20: Livell limitu tal-introjtu għal għajnuna legali f’kawża speċifika tal-konsumatur* (differenzi f'% bejn il-livell limitu tal-Eurostat għall-faqar u l-livell limitu ta' introjtu) (sors: Kummissjoni Ewropea mal-Kunsill tal-Għaqdiet Ewropej tal-Avukati (CCBE )
It-tqabbil tal-baġits iddedikati għal għajnuna legali ma jqisx il-kundizzjonijiet makroekonomiċi differenti li jeżistu madwar l-Unjoni. Sabiex ikun hemm tqabbil aħjar, ġie esplorat xenarju dejjaq speċifiku ta’ tilwim tal-konsumaturi mis-CCBE sabiex tippreżenta l-eliġibilità tal-individwi għal għajnuna legali fil-kuntest tal-introjtu u kundizzjonijiet ta’ għajxien ta’ kull Stat Membru. Id-data f'Grafika 20 tirrigwarda dan ix-xenarju speċifiku. Minħabba l-kumplessità tas-sistemi ta’ għajnuna legali fl-Istati Membri, kull tqabbil għandu jsir bir-reqqa u ma għandux ikun ġeneralizzat.
Ħafna mill-Istati Membri jagħtu għajnuna legali abbażi tal-introjtu tal-applikant. Grafika 20 hawn isfel tqabbel f'% il-livell limitu tal-introjtu għall-għoti tal-għajnuna legali bil-livell limitu tar-riskju tal-faqar tal-Eurostat (limitu tal-Eurostat). Pereżempju, jekk l-eliġibbiltà għall-għajnuna legali tidher li hi ta' 20%, dan ifisser illi applikant b'introjtu 20% ogħla mil-livell limitu tal-Eurostat jista' jirċievi l-għajnuna legali. Bil-maqlub, jekk l-eliġibbiltà għall-għajnuna legali tidher f’-20%, dan ifisser li l-livell limitu tal-introjtu huwa 20% anqas mil-livell limitu tal-Eurostat. Din hija ħarsa ġenerali komparattiva tal-livelli limitu tal-introjtu użat mill-Istati Membri biex jagħtu l-għajnuna legali f'dan ix-xenarju speċifiku.
Xi Stati Membri jħaddmu sistema ta’ għajnuna legali li tipprovdi għal kopertura ta’ 100% tal-ispejjeż marbuta mal-litigazzjoni (għajnuna legali sħiħa), ikkumplimentata minn sistema li tkopri partijiet tal-ispejjeż (għajnuna legali parzjali). Xi Stati Membri jħaddmu jew sistema ta’ għajnuna legali sħiħa biss jew parzjali biss.
* Ħafna mill-Istati Membri jużaw introjtu disponibbli għall-istabbiliment tal-livell limitu għall-eleġibiltà tal-għajnuna legali, ħlief għal DK, FR, NL, PT li jużaw introjtu gross. BG: L-għajnuna legali li tkopri 100% tal-ispejjeż hija pprovduta lil persuni li huma eliġibbli li jirċievu l-benefiċċji ta’ kull xahar tal-għajnuna soċjali; DE: L-ammont tal-livell limitu tal-introjtu huwa bbażat fuq il-Prozesskostenhilfebekanntmachung 2015 u fuq l-ispejjeż medji annwali tad-djar fid-DE fl-2013 (SILC); IE: Minbarra l-introjtu, l-applikant għandu jkun kapaċi juri li l-pagament ta’ kontribuzzjoni finanzjarja se jikkawżalu tbatija żejda. LV: Firxa ta’ introjtu ta' bejn EUR 128.06 u EUR 320 li tiddependi fuq il-post ta’ residenza tal-applikant. Ir-rata hija bbażata fuq il-medja aritmetika. FI: L-ammont tal-livell limitu tad-dħul huwa bbażat fuq il-livell limitu tal-mezzi disponibbli ta’ individwu mingħajr dipendenti u fuq l-ispejjeż medji annwali tad-djar fil-FI fl-2013 (SILC). UK (SC): Il-valur tal-kawża (EUR 3 000) jiġi indirizzat taħt il-proċeduri għal talbiet żgħar li għalihom mhemmx għajnuna legali sħiħa disponibbli.
– Preżentazzjoni ta’ talba online –
Il-preżentazzjoni elettronika ta’ talbiet u komunikazzjoni elettronika bejn il-qrati u l-avukati hija element importanti ieħor li tiffaċilita l-aċċess għall-ġustizzja u tnaqqas id-dewmien u l-ispejjeż. Is-sistemi tal-ICT fil-qrati għandhom ukoll rwol dejjem aktar importanti fil-kooperazzjoni transfruntiera bejn l-awtoritajiet ġudizzjarji u b’hekk jiffaċilitaw l-implimentazzjoni tal-leġiżlazzjoni tal-UE.
Grafika 21: Preżentazzjoni elettronika ta’ talbiet* (0 = disponibbli f’0% tal-qrati, 4 = disponibbli f’100% tal-qrati) (sors: studju tas-CEPEJ)
* PL: Il-possibilità li tippreżenta kawża l-qorti permezz ta’ mezzi elettroniċi teżisti biss għal ċitazzjoni ta’ kawżi ta’ pagamenti. RO: Kawża tista' tiġi ppreżentata lill-qrati permezz ta' email. Sussegwentement, il-preżentazzjoni tiġi stampata u miżjuda mal-fajl tal-kawża.
Grafika 22: Il-parametri referenzjarji tal-proċeduri online għat-talbiet iż-żgħar (sors: It-13-ir Rapport dwar il-Valutazzjoni Komparattiva għall-Gvern elettroniku, studju li qiegħed jitħejja għall-Kummissjoni Ewropea, id-Direttorat Ġenerali għan-Netwerks tal-Komunikazzjonijiet, il-Kontenut u t-Teknoloġija)
Il-modi faċli kif tippreżenta talbiet żgħar, kemm fuq livell nazzjonali kif ukoll fuq livell Ewropew, huma kruċjali għat-titjib tal-aċċess taċ-ċittadini għall-ġustizzja u sabiex ikunu jistgħu jagħmlu użu aħjar mid-drittijiet tal-konsumatur tagħhom. L-importanza ta’ proċeduri għal talbiet żgħar online transfruntiera qiegħda tiżdied ukoll b’risposta għal kummerċ elettroniku transkonfinali. Għaldaqstant wieħed mill-għanijiet tal-politika tal-Kummissjoni Ewropea huwa li jiġu ssimplifikati u jitħaffu t-talbiet għal proċeduri żgħar billi tittejjeb il-komunikazzjoni bejn l-awtoritajiet ġudizzjarji u billi jsir użu intelliġenti mill-ICT. L-għan aħħari huwa li jitnaqqas il-piż amministrattiv għall-gruppi tal-utenti kollha: qrati, atturi ġudizzjarji u utenti finali. Għat-13-il Rapport dwar il-Valutazzjoni Komparattiva għall-Gvern elettroniku kkummissjonat mill-Kummissjoni Ewropea, il-valutazzjoni tal-proċedura għal talbiet żgħar twettqet minn grupp ta’ riċerkaturi (hekk imsejħa “xerrejja anonomi” (mystery shoppers)) L-għan kien sabiex jiġi żvelat jekk id-dispożizzjonijiet tas-servizz pubbliku online humiex organizzati madwar il-ħtiġijiet tal-utenti.
*L-Istati Membri jirċievu biss 100 punt għal kull kategorija jekk is-servizzi kien kompletament disponobbli online permezz ta' portal ċentrali. Huma rċevew 50 punt jekk l-informazzjoni dwar is-servizz biss kienet disponibbli online.
Meta mqabbla mal-figuri għas-sena ta’ qabel, iċ-ċart turi titjib fid-disponibbilta tas-seba’ kategoriji kollha. Dsatax-il Stat Membru urew titjib meta mqabbel mas-sena li għaddiet, filwaqt li l-ebda wieħed minnhom ma kellu inqas punti.
– Komunikazzjoni bejn il-qrati u l-avukati –
Grafika 23: Komunikazzjoni elettronika (0 = disponibbli f’0% tal-qrati, 4 = disponibbli f’100% tal-qrati) (sors: studju tas-CEPEJ)
– Komunikazzjoni mal-midja–
Billi tirċievi u tirrapporta informazzjoni li tinftiehem u fil-ħin, il-midja sservi bħala mezz li jikkontribwixxi għall-aċċessibilità tas-sistemi ġudizzjarji u xogħol ġudizzjarju.
Grafika 24: Relazzjonijiet bejn il-qrati u l-istampa/l-midja* (sors: il-Kummissjoni Ewropea)
* Għal kull istanza (prima, it-tieni u t-tielet), jistgħu jingħataw żewġ punti jekk huma koperti l-kawżi ċivili/kummerċjali u l-kawżi amministrattivi. Jekk kategorija waħda biss hija koperta (eż. jew ċivili/kummerċjali jew amministrattiva), jingħata punt wieħed biss. DE: Kull stat federali għandu l-linji gwida tiegħu għall-imħallfin dwar il-komunikazzjoni mal-istampa u l-midja. SE: L-imħallfin jiġu mħeġġa b’mod attiv sabiex jikkomunikaw is-sentenzi tagħhom lill-midja. Barra minn hekk, inħoloq grupp tal-midja li jikkonsisti minn imħallfin mit-tliet istanzi kollha.
– Aċċess għas-sentenzi –
Id-dispożizzjoni ta’ sentenzi online tikkontribwixxi għall-avvanz tat-trasparenza u tal-fehim tas-sistema ġudizzjarja u tgħin liċ-ċittadini u n-negozji sabiex jieħdu deċiżjonijiet infurmati meta jaċċessaw il-ġustizzja. Din tikkontribwixxi wkoll għaż-żieda tal-konsistenza fil-ġurisprudenza.
Grafika 25: Aċċess għal sentenzi ppubblikati online* (kawżi ċivili u kummerċjali u amministrattivi, l-istanzi kollha) (sors: Il-Kummissjoni Ewropea)
* Għal kawżi ċivili/kummerċjali u kawżi amministrattivi rispettivament ingħata punt wieħed għal kull istanza fejn is-sentenzi għall-qrati kollha huma disponibbli online għall-pubbliku ġenerali (0.5 punti fejn is-sentenzi huma disponibbli biss għal xi qrati). Meta Stat Membru għandu żewġ istanzi biss, ingħataw punti għal tliet istanzi billi ġiet riflessa l-ogħla istanza rispettiva tal-istanza non-eżistenti. Pereżempju, jekk Stat Membru għandu biss il-prim’istanza u l-ogħla istanza – bl-ogħla istanza tirċievi żewġ punti, it-tieni istanza (non-eżistenti) ingħatat żewġ punti wkoll. Għal dawk l-Istati Membri li ma jiddistingwixxux bejn kawżi amministrattvi u ċivili/kummerċjali, ingħataw l-istess punti għaż-żewġ oqsma tal-liġi. Għal xi Stati Membri, mhux is-sentenzi kollha huma disponibbli online. CZ: Xi sentenzi tal-liġi amministrattiva tal-prim’istanza huma disponibbli fuq is-sit elettroniku tal-Qorti Amministrattiva Suprema. DE: Kull stat federali u l-livell federali jiddeċiedi fuq id-disponibbiltà online tas-sentenzi tal-qrati rispettivi tagħhom. IT: Is-sentenzi tal-prim u t-tieni istanza f’kawżi ċivili/kummerċjali huma disponibbli online lill-partijiet ikkonċernati biss. SE: Il-pubbliku huwa intitolat li jaqra s-sentenzi jew id-deċiżjonijiet kollha diment li dawn ma jkunux ikklassifikati. RO: Id-disponibbiltà online tas-sentenzi lill-pubbliku ġenerali daħlet fis-seħħ f’Diċembru 2015.
Grafika 26: Arranġamenti għall-pubblikazzjoni online tas-sentenzi fl-istanzi kollha* – kawżi ċivili/kummerċjali u amministrattivi (sors: Il-Kummissjoni Ewropea)
*Għal kull istanza (l-ewwel, it-tieni u t-tielet) jistgħu jingħataw żewġ punti jekk huma koperti l-kawżi ċivili/kummerċjali u amministrattivi. Jekk waħda mill-kategoriji biss hija koperta (pereżempju ċivili/kummerċjali jew amministrattiva) jingħata punt wieħed biss għal kull istanza. F’xi Stati Membri (IE, MT, EE) l-imħallfin jiddeċiedu dwar l-anonimizzazzjoni tas-sentenzi. IE: Il-liġi tal-familja, tħaris tat-tfal u ċerti proċeduri oħrajn fejn l-istatut jeħtieġ illi s-sentenzi jkunu anonimizzati. MT: Il-kawżi kollha tal-familja huma anonimizzati. DE: Il-pubblikazzjoni online ta’ għażla ta’ sentenzi f’ħafna mill-Istati federali, l-immarkar ta’ sentenzi skont il-kliem ewlenin f’xi stati federali, sistema ECLI fil-Qorti Kostituzzjonali Federali, il-Qorti Amministrattiva Federali u l-Qorti tax-Xogħol Federali. IT: Is-sentenzi tal-prim u t-tieni istanza f’kawżi ċivili/kummerċjali huma aċċessibbli online lill-partijiet ikkonċernati biss. RO: Id-disponibbiltà online tas-sentenzi lill-pubbliku ġenerali daħlet fis-seħħ f’Diċembru 2015 u deċiżjonijiet li jmorru lura għall-2007 qegħdin jittellgħu bil-mod.
– Aċċess għal metodi alternattivi għas-soluzzjoni tat-tilwim –
L-aċċess għall-ġustizzja mhuwiex limitat għall-qrati iżda japplika wkoll għal postijiet oħra barra l-qrati wkoll. L-Istati Membri kollha li pprovdew data daħħlu fis-seħħ metodi alternattivi għas-soluzzjoni tat-tilwim. Il-promozzjoni u l-inċentivar tal-użu volontarju tagħhom sabiex jinfurmaw u jżidu l-għarfien jikkontribwixxu għat-titjib tal-aċċess għal ġustizzja. Grafika 27 tkopri kull metodu għas-soluzzjoni tat-tilwim ħlief għal-litigazzjoni fil-qrati. Il-medjazzjoni, il-konċiljazzjoni u l-arbitraġġ huma l-aktar forom komuni ta’ metodi alternattivi għas-soluzzjoni tat-tilwim.
Grafika 27: Promozzjoni ta’ u inċentivi għall-użu ta’ metodi alternattivi għas-soluzzjoni tat-tilwim* (sors: Il-Kummissjoni Ewropea)
*Indikaturi aggregati bbażati fuq l-indikaturi li ġejjin: 1) sit elettroniku li jipprovdi l-informazzjoni dwar l-ADR; 2) Kampanji pubbliċitarji fil-midja; 3) Fuljetti lill-pubbliku ġenerali; 4) Il-Qorti tipprovdi sessjonijiet ta’ informazzjoni speċifika dwar l-ADR fuq talba; 5) Koordinatur tal-ADR/medjazzjoni fil-qrati; 6) Pubblikazzjoni tal-evalwazzjonijiet dwar l-użu tal-ADR; 7) Pubblikazzjoni tal-istatistiċi dwar l-użu tal-ADR; 8) L-għajnuna legali tkopri spejjeż (parzjali jew sħaħ) imġarrba mill-ADR; 9) Rifużjoni sħiħa jew parzjali tal-ispejjeż tal-qorti; inkluż taxxa tal-boll; jekk l-ADR hija ta’ suċċess; 10) Avukat mhux meħtieġ għall-proċedura tal-ADR; 11) L-imħallef jista’ jaġixxi bħala medjatur; 12) Oħrajn. Għall kull wieħed minn dawn it-12-il indikatur, ingħata punt wieħed. Għall kull qasam tal-liġi, jista’ jingħata massimu ta’ 12-il punt. F’xi Stati Membri (ES, FR, LT) proċeduri ta’ konċiljazzjoni qabel il-proċeduri ġudizzjarji huma obbligatorji f’tilwim relatat max-xogħol. Barraminhekk fl-ES, il-medjazzjoni ġudizzjarja hija obbligatorja ladarba l-proċeduri ġudizzjarji jkunu bdew. IE: Il-promozzjoni u l-inċentivi jikkonċernaw biss il-proċeduri tal-familja. IT: L-imħallfin jistgħu jaġixxu bħala konċiljatur fi proċedura u, jekk ikun hekk, il-konċiljazzjoni tista’ tiġi infurzata. LV: F’tilwim relatat max-xogħol mhumiex imposti drittijiet tal-qorti.
3.2.2 Riżorsi
Riżorsi adegwati huma neċessarji għall-funzjonament tajjeb tas-sistema ġudizzjarja u sabiex ikun hemm kundizzjonijiet xierqa fil-qrati u persunal ikkwalifikat tajjeb. Mingħajr numru suffiċjenti ta’ persunal bil-kwalifiki u ħiliet meħtieġa u b'aċċess għal taħriġ kontinwu, il-kwalità tal-proċeduri u d-deċiżjonijiet ikunu fir-riskju.
– Riżorsi finanzjarji –
Il-figuri hawn taħt juru l-baġit li attwalment intnefaq fuq il-qrati, l-ewwel skont l-abitant (Grafika 28) u t-tieni bħala sehem mill-prodott domestiku gross (Grafika 29).
Grafika 28: In-nefqa totali ġenerali tal-gvern fuq il-qrati*
(f’EUR għal kull abitant) (sors : Eurostat)
* Id-data għal ES, LT, LU, NL u SK hija provviżorja.
Grafika 29: In-nefqa ġenerali tal-gvern fuq il-qrati* (bħala perċentwal tal-prodott domestiku gross) (sors: Eurostat)
* Id-data għal ES, LT, LU, NL u SK hija provviżorja.
– Riżorsi umani –
Ir-riżorsi umani huma element importanti għas-sistema ġudizzjarja. Il-bilanċ bejn is-sessi tal-imħallfin iżid għarfien, ħiliet u esperjenza kumplimentari u jirrifletti r-realtà tas-soċjetà.
Grafika 30: Numru ta’ mħallfin * (għal kull 100 000 abitant) (sors: studju tas-CEPEJ)
* Din il-kategorija tikkonsisti minn imħallfin li jaħdmu full-time, taħt il-metodoloġija tas-CEPEJ. Din ma tinkludix ir-Rechtspfleger/skrivani tal-qrati li jeżistu f’xi Stati Membri. EL: In-numru totali ta’ mħallfin professjonali jinkludi kategoriji differenti matul is-snin murija hawn fuq, u dan parzjalment jispjega l-varjazzjoni tagħhom.
Grafika 31: Proporzjon ta’ mħallfin professjonali nisa fil-prim u t-tieni istanza u Qrati Supremi (sors: Il-Kummissjoni Ewropea (Il-Qrati Supremi) u studju tas-CEPEJ (prim u t-tieni istanza))
Seba’ Stati Membri jirrapportaw rata bbilanċjata bejn is-sessi
tal-imħallfin għaż-żewġ istanzi u 14 irrapportaw rata ta’ mħallfin nisa ‘il fuq mill-bilanċ bejn is-sessi għal mill-inqas waħda miż-żewġ istanzi. Madankollu, fil-livell tal-Qorti Suprema, 19-il Stat Membru rrapportaw rati ta’ mħallfin professjonali nisa taħt – f’xi kawżi ħafna taħt – 40%.
Grafika 32: Varjazzjoni fil-proporzjon ta’ mħallfin professjonali nisa kemm fil-prim kif ukoll fit-tieni istanza mill-2010 sal-2014 kif ukoll fil-Qrati Supremi mill-2010 sal-2015* (differenza f'punti perċentwali) (sors: Il-Kummissjoni Ewropea (Il-Qrati Supremi) u studju tas-CEPEJ (prim u t-tieni istanza))
* LU: il-proporzjon ta’ mħallfin professjonali nisa fil-Qorti Suprema naqas minn 100% fl-2010 għal 50% fl-2015.
Grafika 33: Numru ta’ avukati* (għal kull 100 000 abitant) (sors: studju tas-CEPEJ)
*Avukat huwa persuna kkwalifikata u awtorizzata skont il-liġi nazzjonali biex tinvoka u taġixxi f’isem il-klijenti tagħha, biex tinvolvi ruħha fil-prattika tal-liġi, biex tidher quddiem il-qrati jew tagħti pariri u tirrappreżenta lill-klijenti tagħha fi kwistjonijiet legali (Rakkomandazzjoni Rec(2000)21 tal-Kumitat tal-Ministri tal-Kunsill tal-Ewropa dwar il-libertà tal-eżerċitar tal-professjoni ta’ avukat).
– It-taħriġ –
Il-promozzjoni tat-taħriġ, bħala parti mill-politiki tar-riżorsi umani, hija għodda neċessarja sabiex issostni u ttejjeb il-kwalità tas-sistemi ġudizzjarji. It-taħriġ ġudizzjarju, inkluż ħiliet ġudizzjarji huwa importanti wkoll fil-kontribuzzjoni għall-kwalità tad-deċiżjonijiet ġudizzjarji u s-servizz tal-ġustizzja li jitwassal liċ-ċittadini. Id-data stabbilita hawn taħt tkopri t-taħriġ ġudizzjarju f’firxa wiesgħa ta’ oqsma, inkluż dwar il-komunikazzjoni mal-partijiet u l-istampa.
Grafika 34: Taħriġ obbligatorju għall-imħallfin* (sors: studju tas-CEPEJ)
*L-Istati Membri li ġejjin ma joffrux taħriġ f’ċerti kategoriji: MT (taħriġ inizjali); DK (funzjonijiet speċjalizzati); EL, IE, MT, ES (funzjonijiet ta’ ġestjoni); BG, EE, MT (użu ta’ faċilitajiet tal-kompjuter). Fil-każijiet l-oħrajn kollha, it-taħriġ jista’ jiġi pprovdut iżda huwa fakultattiv.
Grafika 35: L-imħallfin li pparteċipaw f'attivitajiet kontinwi ta' taħriġ fil-liġi tal-UE jew fil-liġi ta' Stat Membru ieħor* (bħala perċentwal tan-numru totali ta’ mħallfin) (sors: Kummissjoni Ewropea, taħriġ ġudizzjarju Ewropew 2015)
* Fi ftit kawżi rrapportati mill-Istati Membri, il-proporzjon ta' parteċipanti għal membri eżistenti ta' professjoni legali jaqbeż il-100 %, li jfisser li l-parteċipanti ħadu sehem f'aktar minn attività waħda ta' taħriġ fuq id-dritt tal-UE.
Grafika 36: Perċentwal ta' attivitajiet ta' taħriġ ġudizzjarju kontinwi dwar tipi varji ta' ħiliet ġudizzjarji* (sors: Kummissjoni Ewropea)
* It-tabella turi d-distribuzzjoni ta' attivitajiet ta' taħriġ ġudizzjarju kontinwi (jiġifieri, dawk li jseħħu wara l-perjodu ta' taħriġ inizjali sabiex wieħed isir imħallef) f'kull wieħed mill-erba' oqsma identifikati bħala perċentwal tat-total. Attivitajiet ta' taħriġ legali ma jitqiesux. Awtoritajiet ta' taħriġ ġudizzjarju fid-DK, LU, UK(NI) ma pprovdewx attivitajiet ta' taħriġ speċifiku dwar il-ħiliet magħżula.
Grafika 37: Disponibbiltà ta' taħriġ għall-imħallfin dwar komunikazzjoni mal-partijiet u l-istampa (sors: Kummissjoni Ewropea)
3.2.3 Għodod ta' valutazzjoni
It-titjib tal-kwalità tas-sistemi ġudizzjarji jeħtieġ għodod sabiex jiġi vvalutat il-funzjonament tagħhom. Il-monitoraġġ u l-evalwazzjoni tal-attivitajiet tal-qorti jgħinu biex itejbu l-prestazzjoni tal-qorti billi jidentifikaw in-nuqqasijiet u l-bżonnijiet, u billi jagħmlu s-sistema ġudizzjarja aktar risponsiva għal sfidi attwali u futuri. Għodod tal-ICT xierqa jistgħu jipprovdu ġestjoni tal-kawża fil-ħin reali, statistika tal-qorti standardizzata, ġestjoni ta' kawżi pendenti u sistemi ta' twissija bikrija awtomatiċi. L-istħarriġ huwa wkoll indispensabbli sabiex jiġu vvalutat kif jaħdmu s-sistemi ġudizzjarji mill-perspettiva ta' professjonisti legali u utenti tal-qorti. Lil hinn mis-sempliċi fatt ta' implimentazzjoni tal-istħarriġ, it-Tabella ta' Valutazzjoni tal-Ġustizzja tal-2016 ħarset aktar bir-reqqa lejn is-suġġetti u s-segwiti ta' stħarriġ li saru fost l-utenti tal-qorti jew professjonisti legali.
Grafika 38: Disponibbiltà ta' monitoraġġ u evalwazzjoni tal-attivitajiet tal-qorti* (sors: studju tas-CEPEJ)
* Is-sistema ta' monitoraġġ għandha l-għan li tivvaluta l-attività ta' kuljum tal-qrati grazzi, b'mod partikolari, għall-ġbir tad-data u l-analiżi tal-istatistika. Is-sistema ta' evalwazzjoni tirreferi għall-prestazzjoni tas-sistemi tal-qrati, billi jintużaw indikaturi u miri. Fl-2014, l-Istati Membri kollha rrapportaw li kellhom sistema li tippermettilhom jissorveljaw in-numru ta' kawżi li deħlin u n-numru ta' deċiżjonijiet mogħtija, li għamlu dawn il-kategoriji irrilevanti. B'mod simili, ħidma fil-fond li tfasslet fl-2015 issostitwixxiet is-sempliċi referenza għall-istandards ta' kwalità bħala kategorija ta' evalwazzjoni. Dan għamilha possibbli biex il-kategoriji li jifdal jiġu amalgamati f'grafika waħda għall-monitoraġġ u l-evalwazzjoni. Data fuq "elementi oħrajn" tinkludi eżempju kawżi appellati (EE, ES, LV), smigħ (SE), jew in-numru ta' kawżi solvuti fi ħdan ċerti perjodi ta' żmien (DK).
Grafika 39: L-ICT użat għall-ġestjoni tal-kawża u għall-istatistika tal-attività tal-qorti*
(indikatur peżat: min=0, mass=4) (sors: studju tas-CEPEJ)
* IE: Il-preżentazzjoni tal-kawża b'mod elettroniku huwa obbligatorju għall-kawżi dwar insolvenza personali aktar milli falliment u fakultattiv għal kwalunkwe pretensjoni żgħira.
Grafika 40: Suġġetti ta' stħarriġ li saru fost l-utenti tal-qorti jew il-professjonisti legali* (sors: Kummissjoni Ewropea)
* Uħud mill-Istati Membri li ma wettqux l-istħarriġ fl-2014 għamluh fl-2015 (IT) jew ippjanawh għall-2016 (IE).
Grafika 41: Is-segwitu ta' stħarriġ li sar fost l-utenti tal-qorti jew il-professjonisti legali (sors: Kummissjoni Ewropea)