17.8.2017   

MT

Il-Ġurnal Uffiċjali tal-Unjoni Ewropea

C 272/36

1.

jilqa’ bi pjaċir il-proposti leġislattivi tal-Kummissjoni Ewropea dwar it-tnaqqis annwali vinkolanti tal-emissjonijiet ta’ gassijiet serra mill-Istati Membri mill-2021 sal-2030 f’setturi mhux koperti mill-Iskema għall-iskambju ta' kwoti tal-emissjonijiet (ETS) [COM (2016) 482 final], kif ukoll dwar l-inklużjoni tal-emissjonijiet u l-assorbimenti ta’ gassijiet serra minn użu tal-art, tibdil fl-użu tal-art u l-forestrija (LULUCF) fil-qafas ta’ politika għall-klima u l-enerġija għall-2030 [COM (2016) 479 final];

2.

jenfasizza li huwa importanti li jitnaqqsu l-emissjonijiet tal-gassijiet b’effett ta’ serra fis-setturi li ma jaqgħux taħt l-ETS sal-2030, sabiex jintlaħaq l-għan fit-tul għat-tnaqqis tal-emissjonijiet tal-gassijiet b’effett ta’ serra b’95 % sal-2050;

3.

huwa tal-fehma li, sabiex ikun konformi mal-impenji magħmula fil-qafas tal-Ftehim ta’ Pariġi, l-integrazzjoni tal-potenzjal għat-tnaqqis tal-emissjonijiet ta’ CO2 mill-użu tal-art, it-tibdil fl-użu tal-art u l-forestrija (LULUCF) fi ħdan il-qafas tal-politika tal-UE dwar il-klima jkun innovattiv u kosteffettiv sew;

4.

huwa konvint li huwa indispensabbli li l-awtoritajiet lokali u reġjonali jiġu rikonoxxuti bħala atturi ewlenin fl-implimentazzjoni tal-miżuri inklużi fil-politika l-ġdida dwar il-klima, u f’konformità mal-prinċipji tal-governanza f’diversi livelli, jkunu involuti b’mod attiv fl-implimentazzjoni tal-politiki tal-UE dwar l-enerġija u l-klima;

5.

jenfasizza r-rwol u r-responsabbiltajiet tal-bliet u r-reġjuni fil-ġbir u l-kumpilazzjoni tad-data għall-kalkolu tal-inventarju tal-gassijiet b'effett ta’ serra fis-setturi koperti mir-Regolament LULUCF u r-Regolament dwar il-kondiviżjoni tal-isforzi; huwa jirrakkomanda lill-Istati Membri u l-Kummissjoni, biex jappoġjaw l-awtoritajiet lokali u reġjonali, permezz tat-tisħiħ tal-kapaċitajiet rispettivi tagħhom, fit-twettiq tal-kompiti bażiċi tagħhom meta jfasslu u jippjanaw l-iżvilupp lokali fil-enerġija, it-trasport, il-ġestjoni tal-iskart, l-użu tal-art u setturi oħra.

6.

huwa tal-fehma li, permezz tal-istrumenti ta’ flessibiltà, il-prinċipji tas-suq u l-prattiki tal-użu tal-art kif ukoll ir-riżorsi biex jintlaħaq l-għan tat-tnaqqis tal-emissjonijiet jiġu riflessi fl-azzjoni dwar il-klima, madanakollu jemmen li jridu jsiru bidliet meħtieġa biex ma jiddgħajfux l-għanijiet ambizzjużi tal-politika tal-UE dwar il-bidla fil-klima u biex tiġi evitata l-inflazzjoni tal-kummerċ tal-kwoti. Dan jista’ jsir jekk issir kontabilizzazzjoni tal-emissjonijiet attwali jew it-tendenza lineari għat-tnaqqis tagħhom fl-2020, jitnaqqas it-trasferiment tal-eċċess tal-kwoti mis-setturi koperti mill-ETS tal-UE għal dawk li mhumiex mill-ETS, u jekk jiġu stabbiliti miri aktar ambizzjużi, inklużi għal pajjiżi b’PDG baxx;

7.

jitlob l-introduzzjoni ta’ kontrolli intermedji ta’ konformità kull ħames snin bħala mezz effettiv biex jiġi żgurat it-twettiq tal-miri ta’ tnaqqis tal-emissjonijiet permezz ta’ monitoraġġ aktar regolari;

8.

iqis li, fid-dawl tan-nuqqas ta’ miri speċifiċi għat-tnaqqis tal-emissjonijiet għas-setturi individwali koperti mir-Regolament dwar il-kondiviżjoni tal-isforzi, għandhom isiru dispożizzjonijiet ta’ programmazzjoni, sabiex jippermettu li l-UE, l-Istati Membri, ir-reġjuni u l-awtoritajiet lokali, jkunu jistgħu jiżviluppaw strateġiji u azzjonijiet biex jgħinu biex jiggarantixxu t-tranżizzjoni f’ dawk is-setturi lejn miżuri favur it-tnaqqis tal-emissjonijiet tas-CO2. Għaldaqstant, għandhom jiġu mfassla miri settorjali sabiex jiġi żgurat li s-setturi kollha koperti mir-Regolament dwar il-kondiviżjoni tal-isforzi jkunu f’armonija mal-għan tat-tnaqqis tal-emissjonijiet globali propost fir-Regolament, u barra minn hekk, il-kontrolli tal-konformità għandhom jissaħħu permezz ta’ reviżjonijiet u karta tal-bilanċ annwali;

9.

jenfasizza l-ħtieġa li jiġu sfruttati aħjar u b’mod aktar ambizzjuż l-opportunitajiet f’termini tar-rekwiżiti legali għall-inizjattivi settorjali fis-setturi b’riskju ta’ żieda fl-emissjonijiet (eż. l-effiċjenza tal-karozzi tal-passiġġieri u l-vetturi kummerċjali ħfief fis-settur tat-trasport).

10.

jitlob lill-Kummissjoni Ewropea tikkunsidra l-kontribut tal-LULUCF b’mod olistiku, bilii jirrikonoxxi li das-settur, b’mod partikolar f’dak li jirrigwarda l-foresti, għandu l-potenzjal li jikkontribwixxi b’mod pożittiv għall-mitigazzjoni tat-tibdil fil-klima permezz, tas-sekwestru, il-ħżin u s-sostituzzjoni tal-emissjonijiet tas-CO2.

1.

jemmen li l-awtoritajiet lokali u reġjonali bla dubju għandhom rwol deċiżiv fis-setturi koperti mir-regolament dwar il-kondiviżjoni tal-isforzi għat-tnaqqis tal-emissjonijiet ta’ gassijiet b'effett ta' serra u tar-Regolament tal-LULUCF, peress li dawn ir-regolamenti jeħtieġu l-inklużjoni tad-dimensjoni territorjali. Fl-istess ħin dawn huma oqsma li fihom l-awtoritajiet lokali u reġjonali jistgħu jaġixxu, fuq il-bażi tar-responsabbiltajiet u s-setgħat legali tagħhom. Għall-implimentazzjoni tal-politika teżisti firxa wiesgħa ta’ strumenti xierqa adegwati, bħalma huma l-ippjanar territorjali, il-promozzjoni tal-SMEs, il-miżuri ta’ politika biex jiġu attirati u promossi investimenti ekoloġiċi, il-bini, it-trasport urban u l-mobilità u l- pjani ta' żvilupp urban;

2.

jenfasizza li l-miżuri proposti se jgħinu biex jitnaqqsu l-emissjonijiet f'dawk l-oqsma li mhumiex koperti mill-Iskema tal-UE għall-iskambju ta' kwoti tal-emissjonijiet (ETS) u għalhekk joffru valur miżjud soċjali, ekonomiku u ambjentali. B'hekk il-bliet u r-reġjuni għandhom rwol saħansitra aktar deċiżiv peress li huma pijunieri fit-territorji tagħhom u jixprunaw inizjattivi għad-dekarbonizzazzjoni u jieħdu inkonsiderazzjoni l-fatturi ekonomiċi u soċjali ta’ kull miżura fuq il-post;

3.

jisħaq li forestrija moderna u sostenibbli tikkontribwixxi għal użu akbar tar-riżorsi sostenibbli u l-bijoenerġija, li kemm jissostitwixxu l-użu tal-karburanti fossili kif ukoll jiffunzjonaw bħala bir tal-karbonju. Barra minn hekk, il-Kumitat jisħaq fuq l-importanza li jiġi promoss ukoll it-tnaqqis tal-emissjonijiet fi ħdan is-settur LULUCF permezz tal-politika agrikola komuni tal-UE;

4.

jara rwol importanti tal-awtoritajiet lokali u reġjonali fil-forniment ta’ informazzjoni diretta liċ-ċittadini u l-implimentazzjoni ta’ kampanji dwar kwistjonijiet ta' enerġija. Il-proposti tal-Kummissjoni jappoġġjaw l-implimentazzjoni tal-istrateġiji reġjonali tal-klima u tal-enerġija u jippromovu d-dekarbonizzazzjoni tas-setturi u l-użu ppjanat tal-art fil-kuntest tal-iżvilupp reġjonali u urban u l-ippjanar spazjali. Proċessi reġjonali u lokali huma mqegħdin f’qafas ta’ eżempji konkreti u miri ta’ tnaqqis mill-Patt tas-Sindki;

5.

iqis li r-Regolamenti proposti ma jqajmu ebda kwistjoni rigward il-konformità tagħhom mal-prinċipju tas-sussidjarjetà, peress li l-indirizzar tat-tibdil fil-klima u l-effetti tiegħu huwa mingħajr dubju kwistjoni transkonfinali u għalhekk l-għanijiet ta’ dawn ir-Regolamenti jistgħu jinkisbu biss permezz ta’ azzjoni fil-livell tal-UE. Barra dan, ir-Regolamenti proposti ma jmorrux lil hinn minn dak li hu neċessarju fil-forma jew kontenut sabiex jintlaħaq l-għan tal-implimentazzjoni tal-mira għat-tnaqqis tal-emissjonijiet ta’ gass b'effett ta' serra tal-UE għall-2030 b’mod kosteffettiv u b’hekk f’konformità mal-prinċipju tal-proporzjonalità;

6.

iqis li huwa neċessarju li t-tranżizzjoni għal ekonomija b'karbonju baxx u l-enerġija nadifa tkompli, li jibqgħu jiġu adottati miżuri klimatiċi fuq sisien wesgħin, anki f'setturi li mhumiex soġġetti għall-ETS. Fil-kuntest ta’ kondiviżjoni tal-isforzi qed jiġi propost sett ġenerali ta’ regoli għas-setturi li mhumiex fl-ETS;

7.

jirrimarka li l-Kummissjoni ma stabbiliet l-ebda miri konkreti u vinkolanti legalment għal dawn is-setturi, iżda pjuttost valutazzjoni globali tal-kontribuzzjoni tagħhom li f’dan il-kuntest, l-Istati Membri għandhom libertà relattivament kbira biex jiddeċiedu liema miżuri speċifiċi beħsiebhom japplikaw biex jilħqu l-miri tagħhom għat-tnaqqis ta' emissjonijiet ta’ gassijiet b'effett ta' serra. Il-prospetti għat-tnaqqis tal-emissjonijiet tal-gassijiet b'effett ta’ serra jvarjaw minn settur għal ieħor u fil-livell nazzjonali jistgħu anki jirriżultaw f’żidiet – bħal fil-każ tal-emissjonijiet imbassra mit-trasport rurali irrispettivament mill-implimentazzjoni tal-miżuri biex tiżdied l-effiċjenza tal-fjuwil;

8.

jitlob li jkun hemm implimentazzjoni flessibbli tal-miri ġenerali tul is-setturi kollha, fejn jiġu evalwati u meqjusa l-kapaċitajiet reġjonali u lokali rispettivi; madankollu, il-frammentazzjoni tal-mira għas-setturi individwali mhijiex possibbli b'mod prattiku;

9.

Jenfasizza li l-Istati Membri u s-setturi kollha tal-ekonomija jikkontribwixxu għall-kisba tat-tnaqqis fl-emissjonijiet tas-CO2 u li kollha kemm huma għandhom jipparteċipaw f’dan l-isforz biex tintlaħaq il-mira hawn fuq imsemmija bil-bilanċ ta' kunsiderazzjonijiet ta’ ġustizzja u ta' solidarjetà, u l-adattament tal-miri nazzjonali fi ħdan il-grupp tal-Istati Membri b’PDG per capita ’l fuq mill-medja tal-Unjoni biex jirriflettu l-kosteffikaċja b’mod ġust u bilanċjat.

10.

jinnota li l-kisba ta’ dan it-tnaqqis tal-emissjonijiet ta’ gassijiet serra għandha tagħti spinta lill-effiċjenza u l-innovazzjoni fl-ekonomija Ewropea, u b’mod partikolari għandha tippromovi t-titjib, speċifikament fil-bini, fl-agrikoltura, fil-ġestjoni tal-iskart u fit-trasport, sa fejn dawn jaqgħu fil-kamp ta’ applikazzjoni ta’ dan ir-Regolament;

11.

jiġbed l-attenzjoni li r-Regolament dwar il-Kondiviżjoni tal-Isforzi jipprovdi ħafna opportunitajiet għall-flessibilità u l-kummerċ, li huma mmirati biex jgħinu lill-Istati Membri jiksbu l-miri tagħhom għat-tnaqqis tal-emissjonijiet sa l-2030. Miżuri ta’ dan it-tip inaqqsu l-ispiża ta' tnaqqis tal-emissjonijiet, għalkemm huma meħtieġa realiżmu u prudenza u għandha tingħata attenzjoni għall-fatt li l-flessibilità ma tirriżultax f'xi Stati Membri li jżidu l-emissjonijiet jew jiġu stabbiliti miri aktar baxxi permezz ta’ manipulazzjoni, kemm qabel l-implimentazzjoni tad-dispożizzjonijiet jew fl-implimentazzjoni tal-mekkaniżmu ta’ flessibbiltà, peress li mekkaniżmi differenti ta' flessibbiltà jistgħu finalment iwasslu għal nuqqas li jintlaħqu l-miri ta' tnaqqis tal-emissjonijiet. Huwa importanti li jinżamm kont mhux biss tal-problemi ekonomiċi u strutturali temporanji tal-Istati Membri u l-istandard tagħhom tal-għajxien, iżda wkoll li jitqiesu d-differenzi reġjonali fi ħdan l-Istati Membri biex b’hekk ikunu jistgħu jintlaħqu l-miri ambizzjużi;

12.

jistieden b’urġenza lill-Kummissjoni biex tipproponi soluzzjonijiet konkreti għall-problemi ta’ dawk ir-reġjuni li jistgħu jsibu ruħhom f'diffikultà jew tnaqqis partikolari fil-kuntest tat-tranżizzjoni meħtieġa lejn ekonomija b'karbonju baxx; jisħaq dwar il-ħtieġa li jiġu żviluppati soluzzjonijiet realistiċi għal reġjuni li jiddipendu ħafna mill-użu tal-fjuwils fossili jew għal industriji b’intensità enerġetika għolja, jew li inkella jintlaqtu b’mod sproporzjonat mill-applikazzjoni tar-Regolamenti proposti; jenfasizza l-importanza tal-involviment tal-awtoritajiet lokali u reġjonali fl-iżvilupp ta’ rotot ta’ żvilupp sostenibbli li jistgħu fl-istess ħin jistimulaw l-ekonomija ta' dawn ir-reġjuni;

13.

jinnota li, minħabba l-provvista eċċessiva ta’ kwoti tal-ETS u l-prezz baxx għas-CO2, il-limitu massimu ta’ 100 miljun unità ffissat għall-emissjonijiet mhu se jkun ta’ ebda għajnuna għal tnaqqis qawwi ta' emissjonijiet, iżda jista’ jaħdem kontra l-għanijiet ta' protezzjoni tal-klima u jista’ saħansitra jikkawża żieda fl-emissjonijiet fis-setturi li mhumiex soġġetti għall-ETS, bħala riżultat ta’ tnaqqis ta' żbilanċi;

14.

jistieden lill-Kummissjoni biex tipprovdi xi flessibbiltà fl-allokazzjoni tal-penali billi jiġu applikati rati aktar baxxi ta’ skambu u valutazzjoni fir-riallokazzjoni tal-kwoti tal-emissjonijiet bejn is-setturi;

15.

jilqa’ b’sodisfazzjon il-proposta biex l-Istati Membri jkunu jistgħu jużaw total ta’ 280 miljun unità tal-LULUCF għall-kontabbiltà, li jirrikonoxxi l-fatt li das-settur, b’mod partikolari l-foresti, għandu l-potenzjal jikkontribwixxi b’mod pożittiv għall-qafis tal-UE dwar il-klima. Josserva li hemm problemi fl-eżattezza tal-monitoraġġ tal-emissjonijiet tal-gassijiet b’effett ta’ serra fil-qafas tal-LULUCF, u bl-appoġġ għal-livell lokali fil-ġbir tad-data;

16.

jinnota li l-assorbiment tas-CO2 fil-qafas tal-LULUCF għandu jkun limitat għal dawk l-oqsma ta-Regolament dwar il-Kondiviżjoni tal-Isforzi, li fih ir-regoli tal-kontabilità huma xjentifikament sodi u ġustifikati, u ġew ikkontrollati fi proġetti pilota. B'dan il-mod, l-ispekulazzjoni u t-tnaqqis tal-prinċipji ġenerali dwar l-aspetti tal-ispiża pura għandhom jiġu evitati. Fil monitoraġġ tal-attivitajiet fil-qasam tal-LULUCF u fir-rappurtar relevanti għandu jiġi evitat, bl-użu tal-aħjar għarfien u l-implimentazzjoni tal-aħjar prattiki, l-għadd doppju; dan japplika speċjalment għall-bidliet fil-kategoriji tal-użu tal-art, kif ukoll meta jiġu kkunsidrati l-prodotti tal-injam u d-disturbi naturali;

17.

jipproponi li jiġi awtorizzat tnaqqis kull ħames snin, biex ikun jista’ jitqies il-kontribut potenzjali minn art deforestata, minn art forestali, minn raba’ ġestita u minn bwar ġestiti. B’dal mod ikun hemm kumpens għall-varjabilità tan-natura u l-impatt tal-avvenimenti każwali u l-proċessi ċikliċi;

18.

jirrakkomanda li l-Kummissjoni taħdem mal-Istati Membri biex tistabbilixxi regoli definiti għar-rwol tal-awtoritajiet lokali u reġjonali fil-ġestjoni tad-data u l-monitoraġġ tal-kontabbiltà tal-LULUCF;

19.

iqis li huwa importanti li r-rapportar robust u ċ-ċiklu ta’ konformità skont l-ESD jinżammu skont il-proposta. L-Istati Membri għandhom obbligu li jikkonformaw mal-limiti annwali tal-emissjonijiet u trajettorja lineari fil-perjodu ta’ bejn l-2021 u l-2030 għalkemm il-kontroll tal-konformità attwali se jkun organizzat kull 5 snin.

20.

jenfasizza li, sabiex jiġi żgurat li l-kontrolli tal-konformità jseħħu abbażi ta’ data preċiża, il-Kummissjoni teżamina u tevalwa b’mod kontinwament u sistematikament, fejn xieraq u bl-għajnuna ta’ esperti indipendenti, l-inventarji tal-gassijiet b'effett ta’ serra ppreżentati mill-Istati Membri;

21.

jemmen li l-Aġenzija Ewropea għall-Ambjent għandha tkompli tikkoordina l-kontroll tat-trasparenza, tal-preċiżjoni, tal-konsistenza, tal-komparabbiltà u tal-kompletezza tal-informazzjoni ppreżentata. Huwa importanti li jsaħħu l-awtoritajiet lokali u reġjonali fl-attivitajiet ta’ kontabbiltà u rappurtar tagħhom sabiex ikun żgurat li l-karatteristiċi speċifiċi lokali u territorjali jitqiesu b’mod aktar effettiv minn qatt qabel;

22.

iqis li huwa importanti li l-amministrazzjonijiet nazzjonali, reġjonali u lokali kif ukoll kumpaniji, SMEs u mikrointrapriżi ma jitgħabbewx bi dmirijiet ta’ rappurtaġġ immedjat jew piżijiet amministrattivi minħabba din il-proposta;

23.

ifakkar li d-diversità u l-varjabilità tal-użu tal-art fl-Ewropa iwasslu b’mod naturali għal trattament differenti u inkonsistenti li jirrikjedi armonizzazzjoni determinata u koordinata u standardizzazzjoni tal-kwalità tad-data tal-Istati Membri, f’dan il-kuntest, għandhom jitqiesu mhux biss kundizzjonijiet u tendenzi nazzjonali iżda wkoll dawk reġjonali u lokali, inkluża d-dinamika tagħhom; jissuġġerixxi, f’dan il-kuntest, li jsir użu tal-esperjenza miġbura permezz ta’ għodod bħall-metodoloġija għall-inventarji tal-emissjonijiet taħt l-inizjattiva tal-Patt tas-Sindki, u li tingħaqad mal-isforzi li għaddejjin biex jiġu stabbiliti indikaturi flessibbli, faċli biex jintużaw u affidabbli għall-kejl tal-emissjonijiet lokali u reġjonali fil-kuntest tal-Patt tas-Sindki Globali;

24.

huwa mħasseb li l-Protokoll ta’ Kyoto se jiskadi fl-aħħar tal-2020. Konsegwentement, il-governanza għas-settur tal-LULUCF teħtieġ li tiġi żviluppata aktar fi ħdan l-UE. Konsegwentement, il-governanza għas-settur tal-LULUCF jeħtieġ li tiġi żviluppata aktar fi ħdan l-UE; bħalissa din hija pprovduta mid-Deċiżjoni dwar il-LULUCF (529/2013/UE). Din id-deċiżjoni diġà ġiet implementata, u għandha tipprovdi sistemi ta' kontabilità tejba sal-2020. Mingħajr qafas legali li jikkonsolida din l-implimentazzjoni u li jiddefinixxi r-regoli applikabbli għall-perjodu ta’ wara l-2020, il-mod li bih il-LULUCF ikun inkluż fil-qafas globali jista’ jkun eteroġenu madwar l-UE kollha. Id-differenzi fir-regoli ta’ rapportar u dawk kontabilistiċi minn Stat Membru għall-ieħor jistgħu jaffettwaw il-funzjonament ottimu tas-suq uniku b’mod negattiv;

25.

jirrikonoxxi li r-regoli ta’ kontabbiltà għall-inventorju LULUCF abbażi tal-proċedura IPCC tal-2006, ma jagħmlux użu mill-metodi l-aktar aġġornati disponibbli. L-UE għandha tiżviluppa b’mod sostanzjali, l-proċedura tal-inventarju, sabiex jittejbu l-preċiżjoni u l-veloċità tiegħu, filwaqt li jinżammu s-sempliċità u t-trasparenza tas-sistema. F’dan ir-rigward, il-bliet u r-reġjuni se jkollhom rwol importanti jekk mhux deċiżiv fit-trażmissjoni tat-tagħrif meħtieġ għall-inventarji tal-LULUCF kemm għall-evalwazzjoni ex post kif ukoll għat-tħejjija tal-previżjonijiet;

26.

jenfasizza li, fil-kuntest ta’ din il-proċedura, l-użu ta’ strutturi ta’ appoġġ bl-għan li jiġi appoġġjat titjib gradwali jidher bħala żvilupp promettenti. Il-KtR jista’ jikkontribwixxi għall-ħolqien ta’ ambjent favorevoli għal aktar żvilupp tal-kapaċità tal-bliet u r-reġjuni biex jiġbru, janalizzaw u jaggregaw data tal-LULUCF, f’konformità mal-prinċipji ewlenin tal-proċedura IPCC ta’ konsistenza, komparabbiltà, kompletezza, preċiżjoni u trasparenza;

27.

huwa tal-fehma li l-Kummissjoni Ewropea, flimkien mal-KtR, għandha tiżviluppa linji gwida sabiex tingħata għajnuna proċedurali lill-awtoritajiet lokali u reġjonali biex jiġbru d-data, kif ukoll standards metodoloġiċi komuni għall-integrazzjoni u l-kunsiderazzjoni ta’ tagħrif lokali, b’kont meħud tal-bilanċ bejn il-preċiżjoni u l-kosteffettività, kif ukoll li jiġi limitat il-piż amministrattiv. Livell ogħla ta’ preċiżjoni jista’ naturalment jintlaħaq biss permezz tal-involviment ta’ esperti lokali u reġjonali;

28.

jinnota li approċċ li jinvolvi diversi partijiet interessati mhux biss huwa xieraq, sabiex jintlaħaq qbil dwar il-kwistjonijiet tat-tibdil fil-klima u t-tfassil ta’ LULUCF, iżda jikkontribwixxi wkoll sabiex tiżdied it-trasparenza u l-obbligi ta’ rappurtar, titjieb il-valutazzjoni tal-impatt soċjali u ekonomiku fil-livell lokali u reġjonali, tiġi faċlitata l-identifikazzjoni tal-aħjar soluzzjonijiet biex tiġi indirizzata l-kumplessità li dejjem tikber ta’ dawn il-kwistjonijiet permezz ta’ approċċ trasversali;

29.

huwa tal-fehma li, fir-rigward tal-inklużjoni tal-LULUCF fil-qafas ta’ politika dwar il-klima, prinċipalment għandhom jitqiesu l-agrikoltura u l-forestrija, iżda wkoll il-kontribuzzjoni tal-akkomodazzjoni, l-immaniġġjar tal-iskart u l-industriji ż-żgħar kemm fl-adozzjoni tal-aħjar prattiki fir-rigward tar-rekwiżiti ta’ trasparenza u sabiex tiġi żgurata l-effettività tal-mekkaniżmi ta’ kontroll. Reazzjonijiet ta’ malajr u konkreti fl-oqsma differenti, kemm waqt id-diskussjonijiet dwar ir-Regolament kif ukoll fl-istadju ta’ eżekuzzjoni huma kruċjali u essenzjali;

30.

jenfasizza li l-opportunitajiet ta’ finanzjament għandhom jiġu estiżi gradwalment, b’mod iktar deċiż minn qatt qabel, u b’mod aktar deċentralizzat, għal-livell lokali u reġjonali, bħala addizzjonijiet attraenti għall-finanzjament privat u għall-istituzzjonijiet ta’ kreditu. Minbarra l-għoti ta’ finanzjament nazzjonali u Ewropew fil-forma ta’ għotjiet u kofinanzjament, għandu jiġi kkunsidrat – bi tħejjija għall-implimentazzjoni ta’ inizjattivi ambjentali –titjib tal-kapaċità ta’ self tal-awtoritajiet lokali u reġjonali u l-kapaċità tagħhom li jagħtu għotjiet finanzjarja. Dan jista’ jinkiseb permezz ta’ bidliet fil-leġislazzjoni jew billi jiġu ffurmati assoċjazzjonijiet ta’ bliet, li waħidhom mhumiex kbar biżżejjed biex jixtru bonds, pereżempju.