This document is an excerpt from the EUR-Lex website
Document 52015PC0146
Proposal for a COUNCIL DECISION on the position to be adopted on behalf of the European Union at the International Maritime Organization during the 68th session of the Marine Environment Protection Committee and the 95th session of the Maritime Safety Committee on the adoption of amendments to MARPOL, SOLAS and the 2009 Guidelines for exhaust gas cleaning systems
Proposta għal DEĊIŻJONI TAL-KUNSILL dwar il-pożizzjoni li għandha tiġi adottata f’isem l-Unjoni Ewropea fl-Organizzazzjoni Marittima Internazzjonali matul is-68 sessjoni tal-Kumitat tal-Protezzjoni tal-Ambjent Marin u matul il-95 sessjoni tal-Kumitat tas-Sikurezza Marittima dwar l-adozzjoni ta’ emendi għall-MARPOL, is-SOLAS u l-Linji Gwida tal-2009 dwar is-sistemi għat-tindif tal-gass tal-egżost
Proposta għal DEĊIŻJONI TAL-KUNSILL dwar il-pożizzjoni li għandha tiġi adottata f’isem l-Unjoni Ewropea fl-Organizzazzjoni Marittima Internazzjonali matul is-68 sessjoni tal-Kumitat tal-Protezzjoni tal-Ambjent Marin u matul il-95 sessjoni tal-Kumitat tas-Sikurezza Marittima dwar l-adozzjoni ta’ emendi għall-MARPOL, is-SOLAS u l-Linji Gwida tal-2009 dwar is-sistemi għat-tindif tal-gass tal-egżost
/* COM/2015/0146 final - 2015/0071 (NLE) */
Proposta għal DEĊIŻJONI TAL-KUNSILL dwar il-pożizzjoni li għandha tiġi adottata f’isem l-Unjoni Ewropea fl-Organizzazzjoni Marittima Internazzjonali matul is-68 sessjoni tal-Kumitat tal-Protezzjoni tal-Ambjent Marin u matul il-95 sessjoni tal-Kumitat tas-Sikurezza Marittima dwar l-adozzjoni ta’ emendi għall-MARPOL, is-SOLAS u l-Linji Gwida tal-2009 dwar is-sistemi għat-tindif tal-gass tal-egżost /* COM/2015/0146 final - 2015/0071 (NLE) */
MEMORANDUM TA’ SPJEGAZZJONI 1. INTRODUZZJONI Din il-proposta tal-Kummissjoni tikkonċerna
l-pożizzjoni li stabbiliet l-Unjoni fit-68 sessjoni tal-Kumitat dwar
il-Protezzjoni tal-Ambjent Marittimu tal-IMO u fil-95 sessjoni tal-Kumitat
tas-Sikurezza Marittima tal-IMO fir-rigward ta' tliet (3) emendi fl-istrumenti
tal-IMO stabbiliti b’mod individwali fis-subintestaturi li ġejjin. 1.1 L-emendi fl-Annessi I, II, IV
u V tal-MARPOL L-MEPC 67 approva l-Preambolu, l-Introduzzjoni u
l-Parti II tal-abbozz tal-Kodiċi Internazzjonali għall-bastimenti li
joperaw f’ilmijiet polari (Kodiċi Polari) bil-ħsieb li jiġu
adottati fil-MEPC 68. Abbozz assoċjat talemendi fl- Annessi I, II, IV u V
tal-MARPOL tal-Konvenzjoni tal-MARPOL ġie approvat ukoll mill- MEPC 67
bil-ħsieb li jiġi adottat fil-MEPC 68. Il-Kodiċi Polari
ġiet żviluppata biex tissupplimenta l-istrumenti tal-IMO
eżistenti sabiex tiżdied is-sikurezza tal-operazzjoni tal-bastimenti
u jittaffa l-impatt fuq in-nies u l-ambjent fl-ilmijiet polari remoti,
vulnerabbli u potenzjalment ħorox. Dawn il-bidliet fil-MARPOL huma stipulati
fl-Anness 11 fir-rapport tal-MEPC 67 (MEPC 67/20).
Il-paragrafu 9.45 ta' dak ir-rapport jindika li l-bidliet se jiġu
adottati waqt l-MEPC 68. 1.2 Emendi fil-linji gwida
tal-2009 għas-sistemi ta’ tindif tal-gass tal-egżost Is-Sottokumitat tal-IMO dwar il-Prevenzjoni u
r-Reazzjoni għat-Tniġġis (PPR 2) approva abbozz ta’ emendi
għal-linji gwida tal-2009 għas-sistemi għat-tindif tal-gass
tal-egżost, stipulati fir-Riżoluzzjoni MEPC.184(59), bil-ħsieb
li dawn jiġu adottati fil-MEPC 68. Il-linji gwida tal-2009
għas-sistemi ta’ tindif tal-gass tal-egżost għandhom jipprovdu
ċarezza dwar l-ittestjar ta’ scrubbers konnessi ma’ elementi ta'
makkinarju tal-bastimenti li ma jistgħux jiġu ttestjati
f’tagħbijiet ogħla, jew ma jiġux ittestjati waqt li jkunu
“wieqfa f’port”. L-abbozz ta’ emendi, ibbażat fuq proposti tal-UE,
jikkonċerna l-użu ta’ metodoloġija bbażata fuq il-kalkolu,
bħad-dinamika ta' fluwidu komputazzjonali u/jew l-użu ta’ formuli
empiriċi, li jkunu alternattiva fattibbli għall-kejl u li huma
stabbiliti fit-taqsimiet 6, 6.9, 10.1.2.1(ii) u 10.1.2.2 tal-Linji Gwida
tal-2009. Dawn il-bidliet għal-Linji Gwida tal-2009
għas-sistemi tat-tindif tal-gass tal-egżost huma stipulati
fl-Anness 1 fir-rapport PPR 2 (PPR 2/21). Il-paragrafu 2.23 ta'
dak ir-rapport jindika li l-bidliet se jiġu adottati waqt l-MEPC 68. 1.3 Emendi tar-regolament SOLAS
II-2/20.3 Il-MSC 94 approva abbozz ta’ emendi
tar-Regolament SOLAS II-2/20.3 li se jippermetti l-operat ta' fannijiet
tal-ventilazzjoni b’inqas tibdiliet fal-arja meta sistema tal-kontroll
tal-kwalità tal-arja tkun fis-seħħ skont il-MSC/Circ.729 dwar
it-Tfassil ta’ linji gwida u skont ir-rakkomandazzjonijiet operazzjonali
għal sistemi tal-ventilazzjoni fi spazji tal-merkanzija ro-ro. L-abbozz
ta’ emendi japplika għal bastimenti tal-merkanzija u
tal-passiġġieri fi spazji għall-vetturi, dawk ta' kategorija
speċjali u dawk ro-ro. Dawn il-bidliet huma stipulati fl-Anness 11
tar-rapport MSC 94 (MSC 94/21/add.1). Il-Paragrafu 8.7 tar-rapport
MSC 94 (MSC 94/21) jindika li l-bidliet se jiġu adottati fl-MSC 95. 2. ADOZZJONI TAL-EMENDI TAL-OMI 2.1 Adozzjoni tal-emendi L-emendi stipulati fil-punti minn 1.1 sa 1.3 ta'
hawn fuq ġew approvati fis-67 sessjoni tal-Kumitat għall-Protezzjoni
tal-Ambjent Marin li ltaqa' bejn it-13 u s-17 ta' Ottubru 2014, fl-94 sessjoni
tal-Kumitat dwar is-Sikurezza Marittima li ltaqa' bejn is-17 u l-21 ta'
November 2014, it-2 sessjoni tas-Sottokumitat dwar il-Prevenzjoni u r-Rispons
għat-Tniġġis li ltaqa' bejn id-19 u t-23 ta' Jannar 2015 u se
jitressqu għall-adozzjoni fit-68 sessjoni tal-Kumitat
għall-Protezzjoni tal-Ambjent Marin bejn il-11 u s-16 ta' Mejju 2015 u
fil-95 sessjoni tal-Kumitat dwar is-Sikurezza Marittima bejn it-3 u t-12 ta' Ġunju
2015. 2.2 Aċċettazzjoni u
dħul fis-seħħ. Ladarba jiġu adottati
miż-żewġ Kumitati, l-emendi stipulati fil-punti 1.1 u 1.3 ta'
hawn fuq se jitressqu quddiem il-partijiet kontraenti rispettivi sabiex dawn
jesprimu l-kunsens tagħhom li jintrabtu bl-emendi msemmija. Ir-riżoluzzjoni
li se tistabbilixxi l-emendi għal-Linji Gwida tal-2009 għas-sistemi
ta’ tindif tal-gass tal-egżost imsemmija fil-punt 1.2 ta' hawn fuq se
tindika d-data tad-dħul fis-seħħ. 3. LEĠIŻLAZZJONI U
KOMPETENZI RILEVANTI TAL-UE 3.1 L-emendi għall-Annessi I
u II tal-MARPOL L-Artikolu 3 tad-Direttiva 2005/35/KE dwar
tniġġis ikkawżat mill-vapuri u dwar l-introduzzjoni ta’ penali,
inklużi pieni kriminali, għal reati ta’ tniġġis,
jistabbilixxi li din id-Direttiva tapplika f’ibħra miftuħa. Xi oqsma
ta’ ilmijiet polari koperti mill-Kodiċi Polari huma kkunsidrati bħala
ibħra miftuħa. Skont l-Artikolu 2, id-Direttiva tapplika għal
skariki ta' sustanzi li jniġġsu, li għandha tfisser is-sustanzi
koperti mill-Annessi I (żejt) u II (sustanzi likwidi noċivi bil-grossa)
tal-MARPOL 73/78. L-għan tad-Direttiva 2005/35/KE huwa li tinkorpora
fil-liġi tal-UE standards internazzjonali għal tniġġis
ikkawżat mill- vapuri, u li tiżgura li dawk li jniġġsu
jkunu penalizzati b’mod adegwat. Skont l-Artikolu 4 tad-Direttiva, l-Istati
Membri għandhom jiżguraw li r-rimi minn vapuri ta’ sustanzi li
jniġġsu, inkluż każi minuri ta’ tali rimi, fi kwalunkwe
żona msemmija fl-Artikolu 3(1) ikun ikkunsidrat bħala każ
ta’ ksur jekk isir b’intenzjoni, b’nuqqas ta’ ħsieb jew b’negliġenza
serja. It-taqsimiet relevanti huma stabbiliti fil-Parti
II-A tal-Kodiċi Polari dwar Miżuri ta’ Prevenzjoni
tat-Tniġġis, li l-Kapitoli 1 u 2 tagħhom jittrattaw
il-prevenzjoni tat-tniġġis miż-żejt u l-kontroll tat-tniġġis
minn sustanzi likwidi noċivi trasportati bil-kwantità. Għaldaqstant, l-emendi li jridu jiġu
adottati fil-MEPC 68, li jintroduċu bidliet fil-MARPOL li
jikkonċernaw il-Kodiċi Polari, se jaffettwaw il-liġi tal-UE
permezz tal-applikazzjoni tad-Direttiva 2005/35/KE. 3.2 Emendi fil-linji gwida tal-2009
għas-sistemi ta’ tindif tal-gass tal-egżost Il-Linji Gwida tal-2009 għas-sistemi ta’
tindif tal-gass tal-egżost, stipulati fir-Riżoluzzjoni MEPC.184(59),
huma msemmija fl-Anness II tad-Direttiva 2012/33/UE fir-rigward tal-kontenut ta’ kubrit fil-fjuwils
marini bħala mekkaniżmu prinċipali biex
tiġi żgurata l-konformità mad-Direttiva (id-Direttiva dwar il-Kubrit)
f’dak li għandu x’jaqsam ma’ kundizzjonijiet għall-użu ta’
sistemi għat-tindif tal-gass tal-egżost skont dik id-Direttiva, b’mod
partikolari l-użu tal-metodi ta’ tnaqqis tal-emissjonijiet stabbiliti
fl-Artikolu 4c. L-emendi li jridu jiġu adottati
fil-MEPC 68, li jintroduċu bidliet għal-Linji Gwida tal-2009, se
jaffettwaw il-liġi tal-UE, permezz tal-applikazzjoni tad-Direttiva
2012/33/UE. 3.3 Emendi tar-regolamenti SOLAS II-2/20.3.1.2.1 Ir-Regolament SOLAS II-2/20.3.1.2.1, li bih hija
rregolata l-kwistjoni ta’ prestazzjoni tas-sistemi ta’ ventilazzjoni, jirreferi
għall-protezzjoni ta’ spazji għall-vetturi, dawk ta' kategorija
speċjali u dawk ro-ro u japplika għall-vapuri
tal-passiġġieri. L-emendi li jridu jiġu adottati
fil-MSC 95, li jintroduċu bidliet fir-Regolament SOLAS II-2/20.3, se
jaffettwaw il-liġi tal-UE, permezz tal-applikazzjoni tad-Direttiva
2009/45/KE dwar regoli u standards ta’ sigurtà għal vapuri
tal-passiġġieri. L-Artikolu 6(2)(a)(i) jistabbilixxi li l-vapuri
tal-passiġġieri l-ġodda tal-Klassi A għandhom jikkonformaw
bis-sħiħ mar-rekwiżiti tal-Konvenzjoni SOLAS tal-1974, kif
emendata. Barra minn hekk il-Kummissjoni tinnota li d-Direttiva 2009/45/KE fiha
regoli dettaljati dwar is-sistema ta’ ventilazzjoni tal-vapuri tal-passiġġieri
tal-Klassijiet B, C u D, li huma identiċi għal dawk li jinstabu
f’SOLAS, kif stabbilit fil-Kapitolu II tal-Anness I, il-paragrafu 9 tal-Parti
B. 3.4 Sommarju Fid-dawl tal-leġiżlazzjoni rilevanti
tal-UE, il-Kummissjoni tqis li l-adozzjoni tal-emendi msemmija hawn fuq u li
mistennija jiġu adottati fil-MEPC 68 u fil-MSC 95 jaqgħu taħt
il-kompetenza esklussiva tal-UE, li l-Unjoni kisbet permezz
tal-Artikolu 3(2) tat-TFUE, minħabba li l-adozzjoni tal-istrumenti
internazzjonali kkonċernati taffettwa r-regoli komuni. B'konsistenza ma’ ġurisprudenza konsolidata
b’mod tajjeb, anke jekk l-Unjoni mhijiex membru tal-IMO, l-Istati Membri
mhumiex awtorizzati li jieħdu obbligi li x’aktarx se jaffettwaw regoli
tal-UE li ġew adottati għall-ksib tal-għanijiet tat-Trattati,
sakemm dawn ma jkunux awtorizzati li jagħmlu dan permezz ta’
Deċiżjoni tal-Kunsill, fuq proposta mill-Kummissjoni. 4. Konklużjoni Il-Kummissjoni għalhekk tipproponi
Deċiżjoni tal-Kunsill dwar il-pożizzjoni li għandha
tiġi adottata f’isem l-Unjoni Ewropea għall-emendi msemmija
fil-paragrafi minn 1.1 sa 1.3 ta' hawn fuq li għandha tiġi
adottata fit-68 sessjoni tal-Kumitat tal-Protezzjoni tal-Ambjent Marin u
fil-95 sessjoni tal-Kumitat tas-Sikurezza Marittima rispettivament. 2015/0071 (NLE) Proposta għal DEĊIŻJONI TAL-KUNSILL dwar il-pożizzjoni li għandha
tiġi adottata f’isem l-Unjoni Ewropea fl-Organizzazzjoni Marittima
Internazzjonali matul is-68 sessjoni tal-Kumitat tal-Protezzjoni tal-Ambjent
Marin u matul il-95 sessjoni tal-Kumitat tas-Sikurezza Marittima dwar
l-adozzjoni ta’ emendi għall-MARPOL, is-SOLAS u l-Linji Gwida tal-2009
dwar is-sistemi għat-tindif tal-gass tal-egżost IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, u b’mod partikolari l-Artikolu 100(2) u
l-Artikolu 218(9) tiegħu, Wara li kkunsidra l-proposta mill-Kummissjoni
Ewropea, Billi: (1) L-azzjoni mill-Unjoni Ewropea
fis-settur tat-trasport marittimu għandu jkollha l-għan li ttejjeb
is-sikurezza marittima u tipproteġi l-ambjent marin. (2) Il-Kumitat dwar
il-Protezzjoni tal-Ambjent Marin tal-IMO (MEPC) li ltaqa’ fis-67 sessjoni
tiegħu approva emendi għall-MARPOL. Dawk l-emendi huma mistennija
jiġu adottati fit-68 sessjoni tal-MEPC, li se sir f'Mejju 2015. (3) Is-Sottokumitat tal-IMO dwar
il-Prevenzjoni u r-Reazzjoni għat-Tniġġis (PPR) li ltaqa' waqt
it-2 sessjoni tiegħu approva abbozz ta’ emendi għal-Linji Gwida
tal-2009 għal sistemi ta’ tindif tal-gass tal-egżost. Dawk l-emendi
huma mistennija li jiġu adottati fit-68 sessjoni tal-MEPC, li se sir
f'Mejju 2015. (4) Waqt l-94 sessjoni
tal-laqgħa tal-Kumitat tas-Sikurezza Marittima (MSC) tal-IMO ġew
approvati emendi għas-SOLAS u l-Konvenzjoni u l-Kodiċi tal-STCW. Dawk
l-emendi huma mistennija li jiġu adottati fil-95 sessjoni tal-MSC, li se
ssir f'Ġunju 2015. (5) L-emendi għall-Annessi I
u II tal-Konvenzjoni MARPOL se jintroduċu miżuri assoċjati
mal-adozzjoni tal-abbozz ta’ Kodiċi Internazzjonali għal bastimenti
li joperaw f’ilmijiet polari (Kodiċi Polari), il-Kodiċi Polari
jagħmluha mandatorja. Il-Kodiċi Polari
testendi l-projbizzjoni attwali tal-MARPOL tal-iskariki ta' żejt/likwidi
noċivi fl-Antartiku sal-Ilmijiet Polari. L-Artikolu 4, flimkien
mal-Artikolu 3(1), tad-Direttiva 2005/35/KE tal-Parlament Ewropew u
tal-Kunsill[1],
jistabbilixxi li l-Istati Membri għandhom jiżguraw li l-iskariki minn
vapuri ta’ sustanzi li jniġġsu, inkluż każi minuri ta’ tali
skariki, jitqiesu bħala każ ta’ ksur jekk isiru b’intenzjoni, b’mod
imprudenti jew b’negliġenza serja u jkopri għalhekk dawn il-kwistjonijiet.
(6) L-emendi għal-Linji Gwida
tal-2009 għal sistemi ta’ tindif tal-gass tal-egżost se
jintroduċu l-użu ta' metodologija msejsa fuq il-kalkolu
għall-ittestjar ta’ scrubbers konnessi ma’ elementi ta' makkinarju
tal-bastimenti li ma jistgħux jiġu ttestjati f’tagħbijiet
ogħla, jew ma jiġux ittestjati waqt li jkunu “wieqfa f’port”.
L-Artikolu 4c u l-Annex II tad-Direttiva 1999/32/KE[2] tal-Kunsill, kif emendata, ikopru dawn
il-kwistjonijiet u l-Anness II inġieb mil-Linji Gwida tal-2009 li se
jiġu emendati. (7) L-emendi fis-SOLAS
II-2/20.3.1.2.1 se jippermettu l-operat tal-fannijiet tal-ventilazzjoni
f’għadd imnaqqas ta’ tibdiliet fl-arja meta sistema ta’ kontroll
tal-kwalità tal-arja tkun fis-seħħ għall-vapuri
tal-passiġġieri fi spazji għall-vetturi, dawk ta' kategorija
speċjali u dawk ro-ro. L-Artikolu 6(2)(a)(i)
tad-Direttiva 2009/45/KE tal-Parlament Ewropew u tal-Kunsill[3]
jistabbilixxi li l-vapuri tal-passiġġieri l-ġodda tal-Klassi A
għandhom jikkonformaw bis-sħiħ mar-rekwiżiti
tal-Konvenzjoni SOLAS tal- 1974, kif emendata, inkluż mar-Regolament
II-2/20.3. Għalhekk il-bidliet li għandhom jiġu adottati
se jkollhom effett ġuridiku dirett fuq id-Direttiva 2009/45/KE. (8) L-Unjoni la hija Membru
tal-OMI u lanqas hija parti kontraenti għall-konvenzjonijiet u
l-kodiċijiet ikkonċernati. Huwa għalhekk meħtieġ li
l-Kunsill jawtorizza lill-Istati Membri jesprimu l-pożizzjoni tal-Unjoni u
jesprimu l-kunsens tagħhom li jintrabtu b’dawn l-emendi. ADOTTAT DIN ID-DEĊIŻJONI: Artikolu 1 Il-pożizzjoni tal-Unjoni fit-68 sessjoni
tal-Kumitat tal-Protezzjoni tal-Ambjent Marin tal-IMO għandha tkun li
taqbel mal-adozzjoni tal-emendi għal dawn li ġejjin: –
l-Annessi I u II tal-MARPOL kif stipulati fl-Anness
11 tad-Dokument tal-IMO MEPC 67/20; –
il-Linji Gwida tal-2009 għas-sistemi
tat-tindif tal-gass tal-egżost kif stipulati fl-Anness 1 fid-Dokument
tal-IMO PPR 2/21. Artikolu 2 Il-pożizzjoni tal-Unjoni
fil-95 sessjoni tal-Kumitat għas-Sikurezza Marittima tal-IMO
għandha tkun li taqbel mal-adozzjoni tal-emenda li ġejja fir- –
Regolament SOLAS II-2/20.3.1.2.1 kif jistipula
l-Anness 11 tad-Dokument tal-IMO MSC 94/21/add.1. Artikolu 3 Il-pożizzjoni tal-Unjoni kif stipulata
fl-Artikoli 1 u 2 għandha tiġi espressa mill-Istati Membri li huma
membri tal-IMO billi jaġixxu b’mod konġunt fl-interess tal-Unjoni. Artikolu 4 Jista’ jsir qbil dwar bidliet formali u minuri
fil-pożizzjoni msemmija fl-Artikoli 1 u 2 mingħajr ma jkun hemm
għalfejn tiġi emendata l-pożizzjoni. Artikolu 5 L-Istati Membri huma b’dan awtorizzati li
jagħtu l-kunsens tagħhom li jintrabtu, fl-interess tal-Unjoni,
bl-emendi msemmija fl-Artikoli 1 u 2. Artikolu 6 Din id-Deċiżjoni hija indirizzata
lill-Istati Membri. Magħmul fi Brussell, Għall-Kunsill Il-President [1] Id-Direttiva
2005/35/KE tal-Parlament Ewropew u tal-Kunsill tas-7 ta’ Settembru 2005 dwar
it-tniġġiż ikkawżat minn
vapuri u l-introduzzjoni ta' sanzjonijiet għal ksur (ĠU L 255, 30.9.2005,
p. 11) [2] Id-Direttiva tal-Kunsill 1999/32/KE
tas-26 ta' April 1999 dwar it-tnaqqis tal-kontenut tal-kubrit
f'ċerti karburanti likwidi u li temenda d-Direttiva
93/12/KEE (ĠU L 121, 11.5.1999, p. 13). [3] Id-Direttiva 2009/45/KE tal-Parlament Ewropew u
tal-Kunsill tat-6 ta’ Mejju 2009 dwar regoli u standards ta’ sigurtà għall-vapuri
tal-passiġġieri (ĠU L 163, 25.6.2009, p. 1)