This document is an excerpt from the EUR-Lex website
Document 52015DC0036
REPORT FROM THE COMMISSION TO THE EUROPEAN PARLIAMENT AND THE COUNCIL On Progress in Bulgaria under the Co-operation and Verification Mechanism
REPORT FROM THE COMMISSION TO THE EUROPEAN PARLIAMENT AND THE COUNCIL On Progress in Bulgaria under the Co-operation and Verification Mechanism
REPORT FROM THE COMMISSION TO THE EUROPEAN PARLIAMENT AND THE COUNCIL On Progress in Bulgaria under the Co-operation and Verification Mechanism
/* COM/2015/036 final */
REPORT FROM THE COMMISSION TO THE EUROPEAN PARLIAMENT AND THE COUNCIL On Progress in Bulgaria under the Co-operation and Verification Mechanism /* COM/2015/036 final */
1. INTRODUZZJONI
Il-Mekkaniżmu għall-Kooperazzjoni u
l-Verifika (MKV) ġie stabbilit fl-adeżjoni tal-Bulgarija mal-Unjoni
Ewropea fl-2007[1].
Intlaħaq ftehim li kien meħtieġ iktar xogħol f’oqsma
ewlenin biex jiġu indirizzati n-nuqqasijiet fir-riforma ġudizzjarja,
il-ġlieda kontra l-korruzzjoni u t-trattament tal-kriminalità organizzata.
Minn dak iż-żmien ir-rapporti tal-MKV irreġistraw il-progress li
sar mill-Bulgarija u ngħatat l-għajnuna biex l-isforzi
tal-awtoritajiet Bulgari jiġu ffokati permezz ta’ rakkomandazzjonijiet
speċifiċi. Il-MKV kellu
rwol importanti fil-konsolidazzjoni tal-istat tad-dritt fil-Bulgarija
bħala aspett importanti tal-integrazzjoni Ewropea. Il-monitoraġġ
mill-Kummissjoni u l-kooperazzjoni fil-ħidma tal-awtoritajiet Bulgari biex
tiġi promossa r-riforma ħallew impatt konkret fuq il-pass u l-iskala
tar-riformi. Fir-rigward tal-konklużjonijiet tal-Kummissjoni u
l-metodoloġija tal-MKV, kien hemm appoġġ qawwi u konsistenti
mill-Kunsill,[2]
kif ukoll kooperazzjoni u kontribut minn diversi Stati Membri. Dan ir-rapport jiġbor fil-qosor
il-passi meħuda matul is-sena li għaddiet u jipprovdi
rakkomandazzjonijiet għall-passi li jmiss. Dan huwa r-riżultat ta’
proċess bir-reqqa ta’ analiżi mill-Kummissjoni, ibbażat fuq kontributi
mill-awtoritajiet Bulgari, is-soċjetà ċivili u partijiet
ikkonċernati oħra. Il-Kummissjoni setgħet tiġi
appoġġata b'mod speċifiku minn esperti mill-maġistratura fi
Stati Membri oħra biex toffri l-fehma ta' prattikant. Minħabba l-inċertezzi
politiċi tas-sena li għaddiet fil-Bulgarija ma kienx hemm pjattaforma
stabbli għal azzjoni. Dan ir-rapport se jindika għadd ta’ oqsma fejn
il-problemi ġew rikonoxxuti u dawk fejn is-soluzzjonijiet qed jibdew
jiġu identifikati. Jeħtieġ li dawn jibdew jikbru biex is-sostenibbiltà
tal-bidla tintwera. Il-Bulgarija tista’ taħdem aktar ukoll biex
tiġbor (u tippubblika) dejta dwar il-ġudikatura u l-infurzar
tal-liġi. Stħarriġ tal-opinjoni
pubblika tal-Bulgari nfushom wera sa fejn twassal l-isfida. Ewrobarometru
meħud fil-ħarifa tal-2014 wera li hemm qbil ġenerali qawwi
fis-soċjetà Bulgara li r-riforma ġudizzjarja, il-ġlieda kontra
l-korruzzjoni u t-trattament tal-kriminalità organizzata kienu problemi
sinifikanti għall-Bulgarija. Ir-riżultati wrew ukoll tħassib
fost il-Bulgari li s-sitwazzjoni marret għall-agħar, madankollu
b'tama li din it-tendenza tista' terġa' lura u b'appoġġ qawwi
għar-rwol tal-UE biex jiġu indirizzati dawn il-kwistjonijet, u
għall-azzjoni tal-UE biex tkompli sakemm il-Bulgarija tkun laħqet
l-istandard komparabbli ma' Stati Membri oħra[3]. Dawn
l-attitudnijiet jenfasizzaw li l-kontinwazzjoni tar-riformi hija kruċjali
għall-kwalità tal-ħajja taċ-ċittadini, kemm minħabba
l-impatt tal-korruzzjoni u l-kriminalità organizzata fuq l-ekonomija
tal-Bulgarija u minħabba l-importanza tal-istat tad-dritt għal
soċjetà li tiffunzjona u ħielsa. Il-MKV huwa mfassal biex
jimmonitorja x-xejriet fit-tul aktar milli jieħu idea tas-sitwazzjoni
f’mument partikolari. Madankollu, l-għan ta' dan ir-rapport huwa li
jitqiesu l-perspettivi stabbiliti mill-gvern li ħa l-kariga
f’Novembru 2014 u sabiex jiġu identifikati xi ġrajjiet ewlenin
li jistgħu jitfgħu dawl fuq il-progress ta’ dawn il-politiki
fil-ġejjieni. B’dan il-mod, il-Kummissjoni tittama li dan ir-rapport se
jgħin fil-ħolqien ta’ kunsens ġdid biex titħaffef
ir-riforma fil-Bulgarija. Ir-rakkomandazzjonijiet stipulati f’dan ir-rapport,
il-fondi tal-UE immirati tajjeb u l-impenn ta’ Stati Membri[4]
oħra flimkien juru kif l-UE tinsab lesta biex tappoġġa sforz
imġedded. 2. Il-QAGĦDA TAL-PROĊESS TAR-RIFORMA FIL-BULGARIJA 2.1 Ir-riforma tal-ġudikatura Indipendenza,
responsabbiltà u integrità tal-ġudikatura Il-Kunsill
Superjuri tal-Maġistratura (KSM) għandu setgħat b’firxa
wiesgħa biex jimmaniġġa u jorganizza s-sistema ġudizzjarja
Bulgara. Fir-rapport tal-MKV tal-2014 ġie innutat li minkejja xi passi
importanti fir-rigward tar-riforma maniġerjali, il-KSM ma kienx meqjus
bħala “awtorità indipendenti u awtonoma kapaċi tiddefendi
l-indipendenza tal-ġudikatura fir-rigward tal-fergħat eżekuttivi
u parlamentari tal-gvern”[5].
Il-ħidma tal-KSM fl-2014 kompliet tkun soġġetta għal
kontroversji, b’diversi inċidenti fir-rigward ta’ ħatriet,
tkeċċija jew il-kontroll tal-applikazzjoni mill-qrati tas-sistema ta’
allokazzjoni każwali ta’ każijiet. Minbarra dan, it-tensjonijiet bejn
il-KSM u l-Kunsill Ċiviku tiegħu, imwaqqaf biex jirrappreżenta
s-soċjetà ċivili, żviluppaw matul iż-żmien, b’talbiet
min-naħa tal-atturi tas-soċjetà ċivili li l-opinjonijiet
tagħhom mhux qed jiġu kkunsidrati b’mod adegwat. Għaldaqstant,
diversi organizzazzjonijiet, inklużi l-akbar assoċjazzjoni
tal-imħallfin, ħarġu mill-Kunsill Ċiviku. Forsi parzjalment
bħala konsegwenza, il-KSM żviluppa l-istrateġija ta’
komunikazzjoni tiegħu u ħa xi passi ulterjuri fir-rigward
tat-trasparenza[6]. Kwistjoni
waħda msemmija mill-partijiet interessati relatata mal-indipendenza hija
l-ġestjoni taż-żewġ fergħat tal-maġistratura
mill-pari tagħhom. Stati Membri differenti għandhom livelli
differenti ta’ awtonomija għall-imħallfin u l-prosekuturi
fil-kunsilli ġudizzjarji. Din saret tema ta’ diskussjoni fil-Bulgarija,
b’diversi talbiet għal awli separati fil-KSM li jiddeterminaw il-karriera
u d-deċiżjonijiet dixxiplinarji fir-rigward ta’ mħallfin u
prosekuturi, bi kwistjonijiet aktar orizzontali li qed jiġu ttrattati
fis-sessjoni plenarja. Ir-raġuni sottostanti għal dawn it-talbiet
hija l-istrutturi organizzattivi differenti u r-rwoli ta’ mħallfin u
prosekuturi, iżda wkoll il-fatt li t-teħid ta’
deċiżjonijiet dwar ħatriet u kwistjonijiet dixxiplinari
jistgħu jintużaw minn kostitwenza waħda tal-KSM biex issir
pressjoni fuq l-oħra. Din l-idea ta’
bidla tal-istruttura tal-KSM ġiet inkluża fil-proposta l-ġdida
għall-istrateġija tar-riforma ġudizzjarja adottata mill-Gvern
Bulgaru u l-Parlament[7].
Il-KSM, mingħajr ma jopponi l-bidla bis-sħiħ, qajjem
tħassib dwar il-fattibbiltà, u kkunsidra li kienet tkun teħtieġ
bidla tal-Kostituzzjoni, u ma setgħetx tidħol fis-seħħ
permezz ta’ emenda leġiżlattiva tal-Att dwar is-Sistema
Ġudizzjarja. Barra minn hekk, l-istrateġija tar-riforma hija relatata
ma’ kwistjonijiet usa’ bħall-elezzjoni tal-membri tal-KSM. Fir-rapporti
tal-MKV preċedenti diġà saru rakkomandazzjonijiet li jibqgħu
validi għall-elezzjonijiet tal-KSM li jmiss, biex tiżdied
it-trasparenza u tiġi indirizzata l-integrità fil-proċedura
tal-għażla, inkluż permezz ta' “imħallef wieħed vot
wieħed” għall-kwota ġudizzjarja tal-Membri tal-Kunsill[8].
L-istrateġija l-ġdida tqajjem ukoll il-kwistjoni tat-tnaqqis
tas-setgħa tal-presidenti tal-qrati, li tqajmet fil-passat bħala
kwistjoni importanti għall-indipendenza tal-imħallfin individwali. L-importanza ta’
aktar trasparenza u oġġettività fil-ħatriet ġudizzjarji
kienet tema konsistenti fir-rapporti tal-MKV[9].
Għalkemm xi kontroversji li dehru fl-2012-13 ġew evitati fl-2014,
il-kwistjoni tal-ħatriet ta’ livell għoli fil-Maġistratura
baqgħet problematika. B’mod partikolari, l-elezzjoni tal-President
tal-Qorti Suprema ta’ Kassazzjoni (QSK) ġiet differita diversi drabi,
minkejja l-fatt li kienu applikaw kandidati b’reputazzjoni tajba – b’esperjenza
soda fil-QSK innifisha – u fost il-kontroversja fuq is-sistema tal-votazzjoni.
Fir-rigward ta' ħatriet ta’ kapijiet amministrattivi ta’ qrati oħra
ntwera tħassib dwar in-natura miftuħa u bbażata fuq il-mertu
tal-proċedura tal-għażla. Barra minn hekk, id-domandi mressqa
lill-KSM mill-NGOs li jikkonċernaw kwistjonijiet dwar l-integrità ta’
ċerti kandidati mhux dejjem jidhru li ġew indirizzati, għalkemm
il-KSM iwettaq test ta’ integrità formali tal-kandidati kollha – parti
importanti tal-proċedura peress li tista’ twassal għal opinjoni
negattiva. Sar xi titjib proċedurali li jista’ jwassal għal aktar
trasparenza fil-proċeduri, bħal b’mod partikolari l-introduzzjoni ta’
possibbiltà għall-imħallfin fil-QSK sabiex jorganizzaw seduta ta’ smigħ
tal-kandidati għall-Presidenza tal-Qorti. Għażliet
proċedurali ġodda bħal dawn jistgħu kemm isaħħu
l-kredibilità tal-ħatriet kif ukoll iżidu s-sjieda tal-grad
tal-imħallfin fil-proċess. Attur ewlieni
sabiex tiġi promossa l-integrità u l-effiċjenza fil-ġudikatura
kien minn dejjem l-Ispettorat Ġudizzjarju. L-elezzjoni tal-Ispettur
Prinċipali tiegħu, wara post vakanti għal din il-pożizzjoni
għal tul ta' żmien, kienet titqies bħala każ ta' prova
mir-Rapport tal-MKV ta’ Jannar 2014[10].
Sa issa l-elezzjoni għadha ma saritx. Il-proċedura fir-rebbiegħa
tal-2014 ġibdet kandidati li dehru kwalifikati sew għal din
il-pożizzjoni, iżda proċess fit-tul, fisser li l-Parlament ma
laħaqx l-istadju ta’ vot. Għaldaqstant, l-Ispettorat baqa’
mingħajr tmexxija indipendenti b’saħħitha prevista
fil-Kostituzzjoni. Fl-2015 dan se jibqa’ każ ta’ prova importanti
tal-kapaċità tal-istituzzjonijiet Bulgari biex jagħmlu ħatriet
trasparenti u skont il-mertu lil uffiċċji ta’ livell għoli
fil-ġudikatura[11].
Rakkomandazzjoni
oħra tar-Rapport tal-2014[12]
kienet analiżi bir-reqqa u indipendenti tas-sistema ta’ allokazzjoni
każwali ta’ każijiet, biex jiġi żgurat li tkun sikura, u li
l-kapijiet amministrattivi tal-qrati jsiru responsabbli bis-sħiħ
għal kull deċiżjoni biex ma tintużax allokazzjoni
każwali. Il-KSM ħa xi passi biex jiġu analizzati
vulnerabbiltajiet potenzjali u għamel pjanijiet biex jimmodernizza
s-sistema fil-kuntest ta’ terminu itwal tal-proġett tal-ġustizzja
elettronika. L-allokazzjonijiet jistgħu issa jinġabru
ċentralment biex jiġu ffaċilitati l-kontrolli. Madankollu, din
is-soluzzjoni interim ma jidhirx li tejbet is-sigurtà. Ċerti nuqqasijiet
identifikati fl-awditjar ta’ Marzu 2013 tal-Qorti Amministrattiva Suprema
u l-Qorti tal-Belt ta’ Sofija ma ġewx segwiti. Għaldaqstant,
fil-ħarifa tal-2014 kien hemm għadd ta’ skandli dwar l-allokazzjoni
tal-każijiet fil-Qorti tal-Belt ta’ Sofija[13]. Dawn
il-problemi ma kinux identifikati mill-KSM – il-kwistjonijiet kellhom jissemmew
minn atturi esterni. Filwaqt li
d-dewmien fit-tħejjija għal soluzzjoni iktar fit-tul mhuwiex mixtieq,
l-aktar kwistjoni importanti hija r-reazzjoni għal evidenza ta’
trasgressjonijiet. Fir-reazzjoni tal-KĠS fil-ħarifa tal-2014 ġie
ssuġġerit li din hija prijorità baxxa għall-Kunsill, minkejja
l-potenzjal għal reati kriminali kif ukoll dixxiplinari. Jidher probabbli
li r-reputazzjoni tal-ġudikatura fil-Bulgarija se tibqa' mhux tajba sakemm
ikun hemm sistema sikura b’mod sħiħ fis-seħħ. L-użu
ta’ ħiliet tas-sigurtà esterni tal-IT li jittestjaw is-sistema
l-ġdida se jgħin biex jiġi żgurat li din tinsab fit-triq
it-tajba[14].
Strateġiji
ta’ riforma għas-sistema ġudizzjarja Ittieħdu
l-ewwel nett passi mill-Ministeru tal-Ġustizzja bil-pjan direzzjonali biex
jiġu indirizzati r-rakkomandazzjonijiet tal-MKV tal-2014 (għalkemm
l-istatus attwali tiegħu u l-iskadenzi jeħtieġ li jiġu
ċċarati) u mbagħad fil-ħarifa bil-preżentazzjoni ta'
strateġija tar-riforma ġudizzjarja tant mistennija[15]. Dan
id-dokument komprensiv jissostitwixxi l-istrateġija tal-2010, li ġiet
implimentata biss b’mod parzjali. L-Istrateġija ġiet adottata b’Deċiżjoni
tal-Kunsill tal-Ministri fis-17 ta’ Diċembru 2014 u
ġiet approvata b'mod wiesa' mill-Parlament
fil-21 ta' Jannar 2015[16]. Il-kunsens u
s-sjieda saru billi ġie mħeġġeġ dibattitu dwar it-test[17].
Il-Prosekutur Ġenerali u l-KSM irreaġixxew b’mod dettaljat. It-test
jinkludi ħafna elementi mitluba mis-soċjetà ċivili u
organizzazzjonijiet professjonali[18],
u tabilħaqq punti msemmija f'rapporti tal-MKV preċedenti.
L-għanijiet tiegħu huma li tiġi żgurata governanza tajba
tal-awtoritajiet ġudizzjarji u jitjiebu aspetti tar-riżorsi umani,
iżda wkoll b’mod aktar wiesa’ biex tiġi mmodernizzata l-politika
kriminali u biex titjieb il-protezzjoni tad-drittijiet fundamentali.
L-istrateġija għandha tintroduċi livell ta’ ċarezza u urġenza
fid-dibattitu dwar ir-riforma ġudizzjarja – dan issa jeħtieġ li
jitwettaq fl-implimentazzjoni. Min-naħa
tal-prosekuzzjoni, kien hemm progress sinifikanti bl-implimentazzjoni tal-pjan
ta’ azzjoni mressaq mill-prosekutur ġenerali fl-2013. Parzjalment
minħabba l-istrateġija tar-riforma ġudizzjarja, il-prosekutur
ġenerali għamel proposti ġodda wkoll f’Novembru 2014
għad-deċentralizzazzjoni tal-prosekuzzjoni u biex tiġi pprovduta
garanziji addizzjonali ta’ nuqqas ta’ interferenza fil-ħidma tal-prosekuturi[19]. Il-ħidma
fuq il-kodiċi kriminali ġdid imxiet ’il quddiem, iżda għad
ma hemmx kunsens. L-esperti u l-prattikanti esprimew fehmiet diverġenti
dwar jekk hijiex meħtieġa kitba mill-ġdid, jew emendi biss – u
dwar ir-raġuni fundamentali ġenerali. Jidher li l-intenzjoni attwali
hija li jiġi segwit approċċ fuq żewġ binarji, bl-ewwel
stadju li jikkonsisti f’emenda ta’ malajr ta’ partijiet tal-kodiċi
kriminali (u possibbilment tal-kodiċi ta’ proċedura kriminali) dwar
ċerti kwistjonijiet aktar urġenti, inklużi
dispożizzjonijiet relatati mal-ġlieda kontra l-korruzzjoni u
l-kriminalità organizzata. Fit-tieni stadju u abbażi ta’ valutazzjoni
tal-impatt dettaljata u konsultazzjoni pubblika, il-ħtieġa għal
kodiċi kriminali jkun determinat. Dan jista’ jkun parti minn riflessjoni
iktar wiesgħa dwar il-futur ta’ politika kriminali, li teħtieġ
żmien sabiex jinbena kunsens[20]. Effiċjenza
tas-sistema ġudizzjarja Kompliet
il-ħidma fil-KSM fuq metodoloġija għall-valutazzjoni tal-ammont
ta' xogħol tal-maġistrati u l-korpi ġudizzjarji[21].
Wieħed mill-għanijiet huwa li jitwaqqfu regoli dwar kif jitkejjel u
jiġi allokat l-ammont ta’ xogħol, filwaqt li titqies il-kumplessità
kif ukoll l-iskala tal-każijiet. Id-differenzi fl-ammont ta’ xogħol
illum jitqiesu bħala kawża sinifikanti ta’ ineffiċjenza
fis-sistema. Il-qrati reġjonali kollha se jiġu rieżaminati,
filwaqt li jiġu kkunsidrati l-fatturi soċjoekonomiċi kif ukoll
dawk demografiċi u l-ħtieġa li jiġi garantit
aċċess għall-ġustizzja, bil-ħsieb li tiġi preżentata
proposta għal mappa tal-ġudikatura ġdida għall-qrati
reġjonali qabel tmiem l-2015. Diġà ttieħdu passi konkreti
fil-qasam tar-razzjonalizzazzjoni tal-qrati militari. Metodoloġija soda
toffri l-bażi xierqa biex jiġi vvalutat jekk huwiex ġustifikanti
li jingħalqu qrati b'ammont baxx ta’ xogħol (jew li tiġi
stabbilita sistema ta’ “qrati mobbli”), filwaqt li jerġgħu jitqassmu
r-riżorsi lejn qrati oħra li għandhom wisq xogħol.
Il-ħidma fuq riforma usa’ tal-mappa tal-ġudikatura x’aktarx li
tieħu aktar fit-tul, b’mod partikolari minħabba li l-KSM
jeħtieġ li jikkoordina ma’ firxa usa’ ta’ partijiet interessati,[22] anki
jekk id-deċiżjoni finali taqa’ f’idejn il-KSM. Dwar
il-ġestjoni tar-riżorsi umani, is-sistemi ta’ evalwazzjoni u ta’
promozzjoni kif ukoll il-kwalità tat-taħriġ huma fatturi ewlenin.
Hawnhekk l-istrateġija tar-riforma ġudizzjarja tal-gvern
tistabbilixxi xi elementi għal titjib fil-futur. l-Istitut Nazzjonali
tal-Ġustizzja qed ikompli jiżviluppa r-repertorju tiegħu ta’
taħriġ għall-imħallfin[23].
L-azzjoni
dixxiplinarja kienet qasam ieħor li ġie enfasizzat fir-rapporti tal-MKV.
Il-problemi inkludew nuqqas ta’ konsistenza (u standards ċari biex
jitwassal dan), b'għadd kbir ta’ deċiżjonijiet jiġu
revokati f’appell. Il-KSM reċentement adotta xi passi inklużi linji
gwidi ġenerali f’dan il-qasam, madankollu ldan ma jidhirx li kien imsejjes
fuq analiżi ċara tan-nuqqasijiet. Għadu kmieni wisq biex
wieħed jgħid jekk il-miżuri meħuda jkunux
biżżejjed biex tiġi evitata kontroversja kontinwa dwar
proċedimenti dixxiplinari fil-futur. Kwistjoni
oħra li ssemmiet fir-rapporti tal-MKV biex tiġi indirizzata hija
l-implimentazzjoni effettiva tas-sentenzi tal-qrati u b’mod partikolari
l-problema ta’ kriminali kkundannati li jkunu jistgħu jaħarbu
l-ġustizzja. Sar xi xogħol, u wara ttieħdu xi passi
maniġerjali permezz ta’ pjan ta’ azzjoni tal-interaġenziji
għall-2014. Madankollu, ir-rispons tal-awtoritajiet għad ma
għandux kundanna. Il-kwistjoni għadha ma ġietx eżaminata
b’mod komprensiv u għalhekk huwa diffiċli li jiġi stmat sa fejn
il-miżuri ta’ darba (bħall-użu ta’ monitoraġġ
elettroniku) se jimlew il-lakuni[24]. 2.2 Il-korruzzjoni Il-korruzzjoni
għadha kwistjoni serja fil-Bulgarija. Fl-istħarriġ riċenti
tal-Eurobarometru, kważi dawk kollha li wieġbu identifikaw
il-korruzzjoni (97 %) bħala problema sinifikanti[25]. Kienet
rakkomandazzjoni kontinwa għal ħafna żmien tal-MKV li
l-Bulgarija tirrevedi u taġġorna l-istrateġija nazzjonali ta’
kontra l-korruzzjoni[26].
L-ewwel riżultati informali ta’ evalwazzjoni riċenti tal-impatt matul
l-aħħar snin tal-istrateġija tal-Bulgarija kontra l-korruzzjoni,
li saret mill-awtoritajiet Bulgari, jidher li jikkostitwixxu kontribut
importanti inkwantu għal valutazzjoni xierqa tan-nuqqasijiet
tal-istrateġija. Dawn jinkludu approċċ frammentat, l-użu
insuffiċjenti ta’ valutazzjonijiet tar-riskju, u nuqqas ta’
monitoraġġ u evalwazzjoni. Minkejja li spettorati ministerjali
żviluppaw kultura ta’ kontroll imtejjeb, in-nuqqas ta’ struttura
ċentralizzata jew punti ta’ riferiment komuni jwasslu għal spettorati
ministerjali differenti li jaġixxu b’mod mhux koordinat. Jidher li
arranġamenti fuq livell lokali qed juru nuqqasijiet kbar. F'dak li
għandu x’jaqsam mal-istruttura assenjata mill-Bulgarija biex titwettaq
analiżi tar-riskju (BORKOR), jidher li din wasslet għal
riżultati fi proporzjon tal-ispejjeż tagħha, u f'kull każ
tista’ titqies biss bħala li tipprovdi kontribut analitiku. Dan il-korp
mhuwiex maħsub biex jipprovdi direzzjoni politika[27]. Din
il-valutazzjoni tan-nuqqasijiet tas-sistema attwali ta’ kontra l-korruzzjoni
tista’ tkun il-punt ta’ tluq ta’ riforma tant mistennija. Konsultazzjoni
tal-partijiet interessati kollha tippermetti esperjenza biex tiġi
kkunsidrata u tinbena sjieda għall-eżerċizzju. Is-soċjetà
ċivili żviluppat esperjenza utli fil-qasam ta’ kontra l-korruzzjoni,
li għandha tintuża bis-sħiħ. Il-miżuri
preventivi jidhru li għadhom fi stadju bikri fil-biċċa l-kbira
tal-każijiet. F’oqsma partikolari nkisbu xi tagħlimiet,[28]
iżda li jirriflettu sforzi frammentati. Ma hemm l-ebda evidenza ta’
struttura biex jiġu kondiviżi l-aħjar prattiki jew jiġu
rikonoxxuti s-suċċessi. L-amministrazzjoni pubblika ma għandhiex
sistema komprensiva ta’ monitoraġġ obbligatorju ta’ attivitajiet
kontra l-korruzzjoni u li tirrapporta lil punt ċentrali. Kif stabbilit
f’rapporti suċċessivi tal-MKV, l-akkwist pubbliku huwa żona ta’
riskju għoli fir-rigward tal-korruzzjoni. Sistemi biex jiġu
kkontrollati l-proċeduri jistgħu jissaħħu, skont
l-istrateġija riċenti għas-sistema Bulgara tal-akkwist pubbliku
li ġiet żviluppata wara rakkomandazzjonijiet mis-servizzi
tal-Kummissjoni. Dwar
il-kunflitti ta’ interess u l-arrikkiment illeċitu, il-Kummissjoni
għall-Prevenzjoni u l-Aċċertament ta’ Kunflitti ta’ Interess
(KPAKI) qed tistenna bidliet leġiżlattivi kif ukoll nominazzjonijiet
fil-livell maniġerjali. It-tnejn huma importanti għall-operat
effettiv tal-Kummissjoni,[29]
u r-riżenja furzata tal-eks President wara evidenza ta’
eżerċitar ta’ influwenza[30]
turi li hemm livell ta’ urġenza biex il-Kummissjoni titqiegħed lura
fuq bażi soda. Madankollu, dawn id-deċiżjonijiet issa ilhom
pendenti matul l-2014. Din hija r-responsabbiltà tal-Parlament, u d-dewmien
joħolqu r-riskju li tiżdied l-impressjoni li
d-deċiżjonijiet f'dak li jikkonċerna l-integrità għandhom
jippredominaw qed jittieħdu fuq raġunijiet politiċi. B'referenza
għall-prevenzjoni tal-korruzzjoni, jista’ jsir użu aħjar
mid-dikjarazzjonijiet tal-assi mressqa minn uffiċjali pubbliċi dwar
l-identifikazzjoni ta’ żoni ta’ riskju u każijiet possibbli ta’
arrikkiment illeċitu. Prosekuzzjoni
effettiva u kundanni finali huma ċentrali għall-kredibilità ta’ kull
strateġija ta’ kontra l-korruzzjoni. Minkejja l-kobor tal-problema, sa
issa hemm ftit li xejn kundanni finali f’każijiet li jinvolvu korruzzjoni
sostanzjali[31].
Diġà ttieħdu passi pożittivi fil-Prosekuzzjoni Ġenerali
biex il-korruzzjoni tiġi pprijoritizzata, u kien hemm żieda
fl-għadd ta’ każijiet mibdija u ħeffa fil-proċess. Ftit
minn dawn il-każijiet jikkonċernaw individwi f’pożizzjonijiet
ta’ livell għoli. Bħal fil-każ ta’ kriminalità organizzata,
il-monitoraġġ tal-iżvilupp ta’ każijiet ta’ korruzzjoni
fil-livell ta’ qorti huwa essenzjali li jiġu identifikati aspetti
tal-prassi tal-qrati li jistgħu jiġu manipulati biex ikun hemm
dewmien biex issir ġustizzja. Xi drabi l-każijiet jidhru li waqfu
għal ammont sostanzjali ta’ żmien fil-livell ta’ qorti qabel ma
jintbagħtu lura lill-prosekuzzjoni bi skadenza qasira biex jitwettqu
kompiti supplimentari. Struttura
speċjalizzata żgħira ġiet stabbilita mill-Prosekuzzjoni,
b'persunal magħmul minn prosekuturi u investigaturi mill-Aġenzija
Statali tas-Sigurtà Nazzjonali (State Agency for National Security, SANS), biex
b’mod aktar effettiv jinvestigaw il-korruzzjoni fl-amministrazzjoni pubblika.
L-unità sa issa fil-biċċa l-kbira kienet qed timmira każijiet
ta’ korruzzjoni lokali, li ma setgħux jiġu trattati fil-livell
lokali, minħabba relazzjonijiet u pressjonijiet lokali. Il-mudell ta’
strutturi speċjalizzati fil-ġlieda kontra l-korruzzjoni jidher li
kellu xi riżultati bikrija, iżda t-test se jasal b’aktar
każijiet ta’ livell għoli u żvilupp ta’ kapaċitajiet
operattivi. Se jkun importanti wkoll li bidliet strutturali għal SANS ma
jnaqqsux l-effettività ta’ dan ix-xogħol. Problema
oħra tidher li tikkonċerna n-nuqqasijiet fir-regoli fil-Kodiċi
Kriminali għall-ġlieda kontra l-korruzzjoni, u b’mod partikolari l-“korruzzjoni
ta’ livell għoli”, l-eżerċitar ta' influwenza u
d-differenzjazzjoni ta’ korruzzjoni attiva u passiva. Jidher li hemm
ħtieġa kbira biex jiġi mmodernizzat il-Kodiċi f’dan
il-qasam, li jista' jibbenefika minn emendi li jsiru f'qasir żmien, b’mod
parallel ma' riflessjoni usa' dwar il-politika kriminali u kodiċi
ġdid. 2.3 Il-kriminalità organizzata Il-kriminalità
organizzata għadha problema fil-Bulgarija. Dan jidher fl-attitudnijiet
tal-pubbliku,[32]
u każijiet reċenti prominenti ta’ sparaturi fil-pubbliku u
l-omiċidju ta’ xhud li pprovdew tfakkira ċara tal-gravità
tas-sitwazzjoni. Filwaqt li l-għadd ta’ każijiet mibdija
mill-prosekuzzjoni jidher li żdied b’mod sostanzjali fl-2014, l-għadd
ta’ każijiet li laħqu konklużjoni finali għadu baxx[33].
L-awtoritajiet li jaħdmu f’dan il-qasam irrappurtaw lill-Kummissjoni
tħassib dwar pressjonijiet fuq livell lokali li jfixklu l-investigazzjoni
effettiva tal-kriminalità u l-korruzzjoni. L-intimidazzjoni tax-xhieda
għadha problema serja, u jista’ jkun hemm modi li jinkoraġġixxu
lix-xhieda biex jaċċettaw aktar malajr programmi
għall-protezzjoni tax-xhieda[34].
Il-prosekuzzjoni
u l-qrati speċjalizzati stabbiliti sentejn ilu bil-mod il-mod qed jibdew
jipproduċu xi riżultati, bi ftit kundanni finali, u xi evidenza ta’
proċeduri aktar mgħaġġla. Iżda l-azzjoni tagħhom
għadha mxekkla minn attribuzzjoni ta’ kompiti mhux iffukati u
dispożizzjonijiet ta’ natura formali ħafna tal-Kodiċi ta’
Proċedura Kriminali. Il-Prosekutur Ġenerali għamel proposti
f’Novembru biex jiġu indirizzati xi wħud minn dawn il-kwistjonijiet. Minkejja sforzi
sostanzjali, il-konfiska tal-assi għadha ma tidhirx li hija mmirata
biżżejjed kontra l-gruppi ta’ kriminalità organizzata. Meta jkun
urġenti, jiġu ordnati miżuri ta’ ffriżar interim
mill-prosekuzzjoni u jgħaddu għand il-Kummissjoni għall-Konfiska
tal-Assi. Din il-Kummissjoni tkompli tilħaq riżultati sinifikanti,
minkejja li jeżisti qafas legali ta' piż. Fl-aħħar rapport
tal-MKV issemmew punti interrogattivi fir-rigward tal-qafas legali ġdid
għall-konfiska tal-assi[35]
– dawn il-kwistjonijiet għadhom pendenti. Il-Ministeru
tal-Intern għandu l-kapaċitajiet tiegħu stess
għall-forensika , id-DNA, il-ballistika u l-grafoloġija, iżda
oqsma oħra ta’ għarfien espert jeħtieġu l-użu ta’
esperti akkreditati għall-qrati, li joħolqu kwistjonijiet ta’
disponibbiltà, kompetenza, spejjeż u – possibbilment – imparzjalità.
Il-Bulgarija ma għandhiex uffiċċju ta’ esperti jew
mekkaniżmu ieħor simili. L-osservaturi qajmu din il-kwistjoni bħala
raġuni waħda potenzjali għan-nuqqas ta’ każijiet
għall-progress fil-qorti[36].
Il-Gvern Bulgaru
l-ġdid ħabbar l-intenzjoni tiegħu li jneħħi
l-investigazzjoni tal-kriminalità organizzata mill-mandat ta’ SANS, u
jreġġa' lura l-għaqda kontroversjali tal-eks Direttorat
tal-pulizija fuq il-kriminalità organizzata – GDBOP – permezz ta' SANS fl-2013[37].
Ir-riforma preċedenti f’dan il-qasam wasslet għal diversi xhur ta’
tfixkil tal-operat f’każijiet ta’ kriminalità organizzata, inkluż
f’kooperazzjoni mas-servizzi tas-sigurtà ta' Stati Membri oħra. Intwera
tħassib li riorganizzazzjoni ġdida tas-servizzi responsabbli
għall-investigazzjoni tal-kriminalità organizzata tinsab f'riskju
għal tfixkil simili, iżda l-gvern għamilha ċara li huwa
konxju minn dan ir-riskju u se jieħu l-miżuri biex tiġi
ffaċilitata t-tranżizzjoni. 3. KONKLUŻJONIJIET U
RAKKOMANDAZZJONIJIET Mill-aħħar
rapport tal-Kummissjoni f'Jannar 2014, il-progress inkwantu
għall-indirizzar ta’ riforma ġudizzjarja u t-twettiq ta' avvanzi
konkreti fil-korruzzjoni u l-kriminalità organizzata kien bil-mod. Il-fatt li
fil-perjodu kopert minn dan ir-rapport kien hemm tliet gvernijiet differenti u
xi diffikultajiet minħabba s-sitwazzjoni parlamentari kkontribwixxa b’mod
ċar għal nuqqas ta' ħeġġa lejn ir-riforma. Madankollu,
il-bażi biex ir-riforma timxi 'l quddiem hija li jiġu rikonoxxuti
l-problemi u identifikati l-miżuri biex jirrimedjaw għalihom.
Il-gvern attwali ħa pass importanti billi adotta strateġija
għar-riforma ġudizzjarja b’livell impressjonanti ta’ preċiżjoni.
Hemm ukoll indikazzjonijiet li għall-analiżi li ġejja
tal-miżuri eżistenti ta’ kontra l-korruzzjoni se jiġi pprovdut
kontribut siewi għal riflessjonijiet dwar strateġija futura.
Il-fażi li jmiss se tkun li jintwera li r-riforma hija verament prijorità politika
billi dawn l-oqfsa jitmexxew 'il quddiem, jinbena kunsens u jiġu
identifikati azzjonijiet preċiżi bi stadji speċifiċi – u
mbagħad tiġi żgurata l-implimentazzjoni tagħhom. Dan ikun
jeħtieġ bidla ulterjuri fil-kultura politika, u sens reali li dawn
il-kwistjonijiet huma fuq nett fl-aġenda. Xi
istituzzjonijiet ewlenin komplew jiżviluppaw bidliet maniġerjali li
għandhom jappoġġjaw l-isforz għar-riforma waqt il-bidla
fil-post. Barra mit-tmexxija rapida tar-riforma biex tkun konformi
mal-istrateġija, il-ġbir ta’ dejta aktar sistematika u professjonali,
u iktar trasparenza dwar it-tqegħid ta’ informazzjoni fil-pubbliku, se
jgħin ukoll biex tinbena fiduċja fil-professjonaliżmu u l-impenn
tal-awtoritajiet. Il-kredibilità
ta’ progress se jiddependi wkoll fuq ir-reazzjoni għal kontroversji
speċifiċi u biex isir progress fir-rigward ta' każijiet
speċifiċi. Fl-aħħar rapporti tal-MKV issemma kif
ix-xettiċiżmu pubbliku dwar ir-riforma kien beda minn kontroversja
f’oqsma bħat-trasparenza u l-mertu fil-ħatriet ġudizzjarji, jew
ir-reazzjoni għal trasgressjonijiet bħall-ħarba ta' kriminali
kkundannati jew in-nuqqasijiet evidenti fl-allokazzjoni każwali
tal-kawżi. Ir-reazzjonijiet tal-awtoritajiet Bulgari f’każijiet
bħal dawn għadhom bla kundanna, li jwassal għal dubji dwar
l-indipendenza ġudizzjarja. Jibqa’ l-fatt li l-għadd ta’ sentenzi
finali tal-qorti fuq korruzzjoni ta’ livell għoli u każi ta’
kriminalità organizzata huwa baxx ħafna. Kif juri l-istħarriġ
tal-opinjoni pubblika, dawn in-nuqqasijiet fir-rigward tal-miżuri ewlenin
tal-bidla jinsabu wkoll fil-qalba tax-xettiċiżmu tal-Bulgari dwar
ir-riforma sa issa[38].
Il-Kummissjoni
tħeġġeġ lill-Bulgarija biex tieħu azzjoni fl-oqsma li
ġejjin: 1. Indipendenza,
responsabbiltà u integrità tal-ġudikatura L-istrateġija
tar-riforma ġudizzjarja tinkludi bosta proposti mfassla biex jindirizzaw
in-nuqqasijiet f’dan il-qasam. Dawn il-miżuri jeħtieġ li
jkollhom appoġġ b'għarfien li l-kredibbiltà tas-sistema
sserraħ fuq l-awtoritajiet li juri determinazzjoni biex tiġi
mmassimizzata l-oġġettività u biex jiġi żgurat li trasgressjonijiet
jkunu ttrattati b’mod sod. ·
It-twettiq
tar-riforma tal-organizzazzjoni tal-KSM, li jinvolvi assoċjazzjonijiet
professjonali u partijiet interessati rilevanti oħra, inkluż
il-kunsiderazzjoni tal-proċeduri għall-elezzjonijiet li jmiss tal-KSM
li se twassal għal KSM li jista’ jġib fiduċja; ·
L-applikazzjoni
ta' standards oġġettivi ta’ mertu, integrità u trasparenza
għall-ħatriet fil-ġudikatura, inklużi għal
uffiċċji ta’ livell għoli, u dawn il-ħatriet isiru
f’waqthom. Kwistjonijiet ta’ integrità huma ta’ importanza partikolari u dawk
responsabbli għall-ħatriet iridu juru li l-mistoqsijiet ġew
segwiti; ·
In-nomina
għall-post ta’ Kap Spettur għandha tiġi riżolta malajr kemm
jista' jkun; ·
Titjib
rapidu tas-sigurtà tas-sistema ta’ allokazzjoni każwali ta’ każijiet
u tmexxija rapida tal-ħidma li għaddejja dwar l-immodernizzar
tagħha; twettiq bir-reqqa u imparzjali ta' investigazzjonijiet dwar
il-każijiet kollha li fihom jitqajmu suspetti ta’ tbagħbis possibbli
fis-sistema. 2. Riforma
tas-Sistema Ġudizzjarja L-istrateġija
tar-riforma ġudizzjarja tikkostitwixxi bażi soda għal azzjoni
futura u d-dibattitu li ħolqot wassal biex korpi bħalma huwa
l-Prosekutur Ġenerali jagħtu rispons kostruttiv. ·
Implimentazzjoni
tal-istrateġija ġudizzjarja adottata mill-gvern, kif ukoll l-ideat
dettaljati proposti mill-prosekuzzjoni; ·
Indirizzar
tal-oqsma kritiċi fil-kodiċi kriminali li jeħtieġu titjib
urġenti biex tissaħħaħ il-ġlieda kontra l-korruzzjoni
u l-kriminalità organizzata; ·
Ftehim
dwar limitu ta' żmien dettaljat għal riflessjoni aktar fit-tul fuq
l-għanijiet fundamentali ta’ kodiċi kriminali ġdid. 3.
Effiċjenza tas-sistema ġudizzjarja Il-Kunsill
Ġudizzjarju Suprem kien qed jieħu xi passi maniġerjali
importanti li issa jeħtieġ li jiġu segwiti. ·
Ikkompletar
tal-metodoloġija għall-valutazzjoni tal-ammont tax-xogħol
tal-maġistrati u l-qrati u konsultazzjoni mal-partijiet interessati
ewlenin kollha biex joffru bażi oġġettiva għar-riforma
mappa tal-ġudikatura (jekk ikun meħtieġ, il-qrati jiġu
ddisassoċjati minn mapep oħra ta' servizzi pubbliċi); ·
Infurzar
ta' proċeduri ċari u standards għal penali biex tiġi
żgurata sentenzi dixxiplinari konsistenti; ·
Implimentazzjoni
tax-xogħol biex jingħalqu lakuni fl-implimentazzjoni effettiva
tad-deċiżjonijiet tal-qorti, bħal ħarba biex tkun evitata
sentenza ta’ ħabs jew nuqqas li jkunu applikati sanzjonijiet finanzjarji
stabbiliti mill-qorti. ·
Isir
progress konkret fil-ġustizzja elettronika bħala mezz
għat-titjib tal-proċess ġudizzjarju. 4.
Il-korruzzjoni L-evalwazzjoni
li jmiss tal-istrateġija kontra l-korruzzjoni tal-Bulgarija għandha
tipprovdi analiżi utli tal-isfidi li l-Bulgarija qed tiffaċċja.
Din tista’ tgħin biex tiġi definita l-istrateġija l-ġdida u
biex jingħata bidu għal passi konkreti biex jiġu ttrattati
l-problemi, kemm fir-rigward tal-prevenzjoni kif ukoll il-prosekuzzjoni
effettiva. ·
Tiġi
inkarigata istituzzjoni waħda bl-awtorità u l-awtonomija
meħtieġa biex jiġi kkoordinat u kkontrollat l-infurzar
tal-attivitajiet ta' kontra l-korruzzjoni; Jinħoloq sett uniformi ta'
standards minimi għas-settur pubbliku fir-rigward ta' korpi ta' kontroll,
valutazzjoni tar-riskju u l-obbligu ta' rappurtar; ·
Tiġi
stabbilita strateġija nazzjonali soda kontra l-korruzzjoni, li tibda
bil-pubblikazzjoni tal-analiżi tan-nuqqasijiet tal-istrateġija
attwali; ·
Jiġi
żgurat segwitu determinat għall-istrateġija tal-akkwist pubbliku
adottata f’Lulju 2014; ·
Jiġu
ffinalizzati l-proċeduri tan-nomina għall-bqija tal-Mmmbri tal-KPAKI
u l-bidliet leġiżlattivi relatati mal-liġi tal-kunflitti ta’
interess; ·
Jiġi
vvalutat kif is-sistema ta’ dikjarazzjonijiet ta’ assi tista' tintuża
aħjar (bħal kontrolli fil-mira permezz ta’ valutazzjoni ta’ riskju); ·
Tiġi
infurzata l-kapaċità tal-prosekuzzjoni biex jitressqu każijiet ta’
korruzzjoni ta’ livell għoli; ·
Jiġi
mmonitorjat il-progress ta’ każijiet ta’ korruzzjoni f’livell għoli u
jiġu definiti l-passi u tittieħed azzjoni biex jiġi evitat
l-isfruttament ta’ lakuni proċedurali biex ikun hemm dewmien biex issir
ġustizzja. 5.
Il-kriminalità organizzata Jibqa’ l-fatt li
l-għadd kbir ta’ każijiet pendenti u ftit eżempji ta’ progress
jitfgħu dell fuq ix-xogħol biex tiġi indirizzata l-kriminalità
organizzata u titjieb il-professjonalità tal-infurzar tal-liġi f’dan
il-qasam. ·
Jinħolqu
l-kundizzjonijiet meħtieġa għall-Qorti Speċjalizzata
għall-Kriminalità Organizzata u l-Uffiċċju tal-Prosekutur marbut
biex ikun jista' jkun hemm konċentrazzjoni fuq każijiet bi profil
għoli u kumplessi; ·
Jiġi
mmonitorjat il-progress ta’ każijiet ta’ korruzzjoni f’livell għoli u
jiġu definiti l-passi u tittieħed azzjoni biex jiġi evitat
l-isfruttament ta’ lakuni proċedurali biex ikun hemm dewmien biex issir
ġustizzja; ·
Jiġi
żgurat li jittieħdu s-salvagwardji neċessarji biex jiġi
evitat li imputati ta' livell għoli jaħarbu mill-ġustizzja jew
jaħbu proprjetà miksuba permezz tal-kriminalità qabel deċiżjoni
finali tal-Qorti, bi tqassim ċar tar-responsabbiltà għal kull nuqqas; ·
Jiġi
żgurat li kull tibdil tal-istrutturi involuti fl-investigazzjoni
tal-kriminalità organizzata jitwettqu b’tali mod li tiġi żgurata
kontinwità operattiva. [1] Il-konklużjonijiet tal-Kunsill,
is-17 ta’ Ottubru 2006 (13339/06); Id-Deċiżjoni
tal-Kummissjoni dwar it-twaqqif ta’ mekkaniżmu għall-kooperazzjoni u
l-verifika tal-progress fil-Bulgarija li jindirizza limiti speċifiċi
fl-oqsma tar-riforma ġudizzjarja u l-ġlieda kontra l-korruzzjoni u
l-kriminalità organizzata, it-13 ta’ Diċembru 2006 (C
(2006) 6570 finali) [2] Il-konklużjonijiet
tal-Kunsill dwar ir-rapporti preċedenti:
http://ec.europa.eu/cvm/key_documents_en.htm [3] Flash Eurobarometer 406 [4] Xi Stati Membri jipprovdu
assistenza teknika lill-Bulgarija f’oqsma rilevanti għall-MKV. [5] COM(2014) 36 finali,
p. 3 [6] Rapport tekniku
Taqsima 2.1 [7] Rapporti
jissuġġerixxu madankollu li din il-kwistjoni kienet ikkontestata
mill-Parlament fil-21 ta’ Jannar 2015. [8] COM(2012) 411
finali, p. 11. [9] Ara pereżempju
COM(2012) 411 finali, p. 6 u COM(2014) 36 finali, p. 9. [10] COM(2014) 36 finali,
p. 4. [11] Fit-30 ta’ Jannar 2015
l-Assemblea Nazzjonali bdiet mill-ġdid il-proċedura b’data ta’
skadenza għal nomina ta’ kandidati. [12] Ara r-Rakkomandazzjoni,
p. 9 tal-COM(2014) 36 finali. [13] B’mod partikolari
fir-rigward tal-allokazzjoni ta’ proċeduri f’każ ta’ falliment
f’żewġ każijiet emblematiċi. Ara r-rapport tekniku
Taqsima 4.1 [14] Jista’ jkun mistenni li
din tkun żona tajba għall-appoġġ tal-fondi tal-UE. [15] Disponibbli fuq is-sit
elettroniku tal-Ministeru tal-Ġustizzja (bil-Bulgaru): http://mjs.bg/107/ [16] Jidher li xi elementi
tal-istrateġija ġew ikkontestati fil-Parlament. [17] Skont il-gvern interim
f’Ottubru 2014, it-test tressaq bħala abbozz. [18] Ara l-aktar il-proposti
msemmijin hawn fuq għal diviżjoni tal-KSM fi kmamar għal
deċiżjonijiet li jikkonċernaw ħatriet u kwistjonijiet
dixxiplinari. [19] Il-proposti konkreti diġà ppreżentati
mill-Prosekutur Ġenerali, li jimmiraw għal uffiċċju
tal-prosekuzzjoni aktar deċentralizzat, trasparenti u responsabbli, jista’
wkoll jiġi kkunsidrat fil-kuntest ta’ bidliet usa’ għall-Kodiċi
ta’ Proċedura Kriminali u l-Att dwar is-Sistemi Ġudizzjarji. [20] It-tħejjijiet li
ilhom għaddejjin mill-2009 f’dan il-qasam għandhom jipprovdu
bażi dettaljata fir-rigward tal-kontribut analitiku. [21] Parzjalment b’reazzjoni
għal rakkomandazzjonijiet tal-MKV (ara pereżempju COM(2014) 36
finali, p. 10), il-ħidma analitika li qed issir bħalissa fil-KSM
tista' titjieb ukoll abbażi tal-valutazzjonijiet, pereżempju permezz
ta’ kontabilità aħjar fuq l-ammont tax-xogħol u l-iżvilupp ta’
bażi aktar ċara għall-evalwazzjoni regolari tal-maġistrati. [22] Hemm implikazzjonijiet
għall-organizzazzjoni territorjali ta’ servizzi pubbliċi oħra. [23] Rapport tekniku
Taqsima 4.2. [24] Ara r-rapport tekniku
Taqsima 6.2. [25] Flash Eurobarometer 406 [26] Bl-istess mod,
fir-Rapport tal-UE Kontra l-Korruzzjoni tal-2014 issemmew għadd ta’ sfidi
fil-Bulgarija (COM (2014) 38 finali). Il-korruzzjoni (kif ukoll
l-indipendenza ġudizzjarja) ukoll issemmiet bħala sfida
għall-Bulgarija fir-rakkomandazzjonijiet speċifiċi
għall-pajjiż tal-2014 fil-kuntest tas-Semestru Ewropew tal-koordinazzjoni
tal-politika ekonomika. (ĠU 2014/C 247/02). [27] COM(2014) 36 finali,
p. 7; rapport tekniku Taqsima 5.4. [28] Bħall-evitar
tal-immaniġġjar tal-flus kontanti minn uffiċjali doganali u
gwardja tal-fruntieri, jew persunal li jinbidel. [29] Rapport tekniku
Taqsima 5.4. [30] Dan kien
is-suġġett ta’ proċedimenti kriminali. [31] Ir-rapport SANS dwar
l-attivitajiet tagħha għall-2014 seta' jindika ħafna aktar
attività fuq il-kriminalità organizzata milli fuq dik kontra l-korruzzjoni. [32] Din titqies bħala
problema importanti minn 96 % ċittadin Bulgaru mistħarrġa
fil-Flash Eurobarometer 406 reċenti. [33] Rapport tekniku
Taqsima 6.1. [34] F’każ riċenti
tal-omiċidju ta’ xhud f’każ emblematiku, ix-xhud irrifjuta li
jipparteċipa fi programm għall-protezzjoni tax-xhieda. [35] COM(2014) 35 finali,
p. 8 [36] Rapport tekniku
Taqsima 6.1. [37] COM(2014) 35 finali,
p. 8 [38] Flash Eurobarometer 406.