16.9.2014

MT

Il-Ġurnal Uffiċjali tal-Unjoni Ewropea

C 316/6

---

Pubblikazzjoni ta’ applikazzjoni ta’ modifika skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

2014/C 316/06

Din il-pubblikazzjoni tagħti dritt ta’ oppożizzjoni skont l-Artikolu 51 tar-Regolament (UE) Nru 1151/2012 tal-Parlament Ewropew u tal-Kunsill (1).

TALBA GĦAL MODIFIKA

IR-REGOLAMENT TAL-KUNSILL (KE) Nru 510/2006

dwar il-protezzjoni tal-indikazzjonijiet ġeografiċi u d-denominazzjonijiet tal-oriġini għall-prodotti agrikoli u l-oġġetti tal-ikel  (2)

TALBA GĦAL MODIFIKA SKONT L-ARTIKOLU 9

“BROCCIU CORSE”/“BROCCIU”

Nru CE: FR-PDO-0217-01164 — 18.10.2013

IĠP ( ) DPO ( X )

1.   Intestatura tal-ispeċifikazzjonijiet li huma soġġetti għall-modifika

—

    ☐ Denominazzjoni tal-prodott

—

    ☒ Deskrizzjoni tal-prodott

—

    ☐ Żona ġeografika

—

    ☒ Prova tal-oriġini

—

    ☒ Metodu ta’ kisba

—

    ☐ Rabta

—

    ☒ Tikkettar

—

    ☒ Eżiġenzi nazzjonali

—

    ☒ Oħrajn (dettalji ta’ kuntatt tal-grupp, verifika, imballaġġ)

2.   Tip ta’ modifika(i)

—

    ☐ Modifika tad-dokument uniku jew tas-sommarju

—

    ☒ Modifika tal-ispeċifikazzjonijiet tad-DPO jew tal-IĠP irreġistrati, li għalihom ma ġie ppubblikat l-ebda dokument uniku jew sommarju

—

    ☐ Il-modifika tal-ispeċifikazzjonijiet ma twassal għall-ebda modifika tad-dokument uniku ppubblikat [Artikolu 9(3) tar-Regolament (KE) Nru 510/2006]

—

    ☐ Modifika temporanja tal-ispeċifikazzjonijiet li tirriżulta fl-adozzjoni ta’ miżuri sanitarji jew fitosanitarji obbligatorji mill-awtoritajiet pubbliċi (Artikolu 9(4) tar-Regolament (KE) Nru 510/2006)

3.   Modifika(i)

Deskrizzjoni tal-prodott

L-elementi ta’ deskrizzjoni jiddaħħlu b’mod li l-prodott jiġi kkaratterizzat b’mod aktar preċiż:

—	huwa speċifikat li l-“Brocciu corse”/“Brocciu” huwa “esklussivament” miksub mix-xorrox frisk u mill-ħalib frisk sħiħ tan-nagħaġ u/jew tal-mogħoż użat fl-istat nej;

—	huwa speċifikat li l-istat immaturat jikkorrispondi għat-tip “passu”;

—	huwa speċifikat li l-kontenut ta’ xaħam ta’ 40 g għal kull 100 g “ta’ ġobon” wara d-dessikazzjoni totali jikkonċerna l-“Brocciu corse”/“Brocciu” tat-tip “frisk”.

Prova tal-oriġini

Fir-rigward tal-evoluzzjonijiet leġiżlattivi u regolamentari nazzjonali, it-taqsima “Elementi li jagħtu prova li l-prodott joriġina miż-żona ġeografika” hija kompluta u tiġbor b’mod partikolari l-obbligi dikjarattivi u ż-żamma tar-reġistri relatati mat-traċċabbiltà tal-prodott u mal-monitoraġġ tal-kundizzjonijiet ta’ produzzjoni.

B’mod partikolari hija prevista awtorizzazzjoni tal-operaturi li tirrikonoxxi l-kapaċità tagħhom li jissodisfaw l-eżiġenzi tal-ispeċifikazzjonijiet tal-marka li minnha jieħdu l-benefiċċji.

Metodu ta’ kisba

Sabiex jiġu ċċarati ċerti dispożizzjonijiet tal-metodu ta’ kisba, jiddaħħlu xi preċiżjonijiet:

—

dispożizzjonijiet li jikkonċernaw l-ikel u s-supplimenti, b’mod partikolari l-oriġini ġeografika tagħhom, jiżdiedu b’mod li tiġi ggarantita r-rabta bejn iż-żona ġeografika u l-prodott: — l-ikel ibbażat fuq il-bwar huwa preponderanti, — suppliment ta’ foraġġ u ta’ konċentrati fuq il-bażi ta’ ċereali prodotti fiż-żona huwa awtorizzat; madankollu, kontenut ta’ foraġġ u ta’ konċentrati li ġejjin minn barra ż-żona ta’ produzzjoni huwa aċċettat fil-limitu ta’ 20 % tas-supplimenti, — l-użu tat-tipi kollha ta’ foraġġ iffermentat huwa projbit;

—

sabiex tiġi kkaratterizzata aħjar il-materja prima użata għall-manifattura tal-“Brocciu corse”/“Brocciu”, għandhom jiżdiedu dispożizzjonijiet rigward il-ħalib użat għall-produzzjoni tal-baqta, ix-xorrox u l-ħalib miżjud: — il-ħalib sħiħ għall-produzzjoni tal-baqta jista’ jintuża għal perjodu massimu ta’ 40 siegħa wara l-eqdem ħelba, — il-koagulazzjoni tal-ħalib tinkiseb permezz tal-kimożina tradizzjonali jew kummerċjali, bl-esklużjoni ta’ kull enzima koagulanti oħra, b’mod partikolari li toriġina mill-fungi jew il-mikrobi, — it-tneħħija tal-lattożju huwa projbit, — il-pH tax-xorrox miġbur għandu jkun aktar jew ugwali għal 6,20, — il-ħalib miżjud jintuża fi żmien mhux aktar minn 24 siegħa wara l-ħlib;

—

sabiex jiġu deskritti aħjar l-istadji differenti tal-produzzjoni u biex tiġi garantita ż-żamma tal-għarfien espert, huma speċifikati jew miżjuda xi dispożizzjonijiet: — dwar it-tisħin tax-xorrox, it-terminu “metodu dirett”, li mhuwiex preċiż ħafna, jitħassar u jiġi speċifikat li l-flokkulazzjoni tal-proteini tax-xorrox tinkiseb “esklussivament mit-tisħin fil-fjamma diretta (imsejħa fjamma mikxufa) tal-kontenitur jew tar-reċipjent li fih ix-xorrox mingħajr l-ebda użu ta’ fluwidu li jsaħħan”, — huwa speċifikat li x-xorrox “jissaħħan bil-mod filwaqt li jitħallat ftit” sabiex tiġi favorita l-koagulazzjoni tal-lattoproteini, — sabiex jiġu riflessi aħjar l-użi, it-temperatura li jilħaq ix-xorrox hija definita permezz ta’ medda ta’ temperatura (bejn 40 u 50 °C) minflok valur wieħed biss (madwar 40 °C), — huwa speċifikat li ż-żieda tal-melħ issir fl-istess ħin meta jiżdied il-ħalib, u l-kwantità ta’ melħ miżjuda hija definita (bejn 0,5 u 1 % tal-volum tal-likwidu inizjali), — huwa speċifikat li t-taħlit li jsegwi jsir “bil-mod”, — huwa indikat li matul iż-żieda tat-temperatura, u sal-bidu tal-flokkulazzjoni, għandu jsir xkumar regolari sabiex jitneħħew l-impuritajiet;

—

kriterji tad-daqs tal-forma huma definiti sabiex ikun hemm definizzjoni aħjar tal-formati differenti: —   għall-ġobnijiet ta’ 3 kg: id-dijametru ta’ fuq għandu jkun 200 mm, id-dijametru t’isfel 145 mm u l-għoli 180 mm, —   għall-ġobnijiet ta’ 1 kg: id-dijametru ta’ fuq għandu jkun bejn 155 u 160 mm, id-dijametru t’isfel bejn 90 u 120 mm u l-għoli bejn 85 u 120 mm; —   għall-ġobnijiet ta’ 500 g: id-dijametru ta’ fuq għandu jkun bejn 110 u 115 mm, id-dijametru t’isfel bejn 90 u 92 mm u l-għoli bejn 80 u 82 mm; —   għall-ġobnijiet ta’ 250 g: id-dijametru ta’ fuq għandu jkun bejn 90 u 110 mm, id-dijametru t’isfel bejn 75 u 85 mm u l-għoli 65 mm;

—	il-kundizzjonijiet tat-tmelliħ tal-“Brocciu corse”/“Brocciu” tat-tip “passu” huma speċifikati sabiex jiġu rregolati l-prattiki: dan jista’ jsir “f’darba jew aktar minn darba” u l-ewwel tmelliħ għandu jsir fi żmien 24 siegħa wara t-tpoġġija fil-forma.

Tikkettar

Din it-taqsima hija aġġornata wkoll sabiex ikun hemm identifikazzjoni aħjar tal-prodott:

—	huwa speċifikat li l-ġobnijiet tax-xorrox li jibbenefikaw mid-denominazzjoni tal-oriġini kontrollata “Brocciu corse”/“Brocciu” għandhom jiġu kkummerċjalizzati b’tikketta individwali,

—	it-terminu “Denominazzjoni tal-Oriġini Kontrollata” u l-abbrevjazzjoni “DOK” jitneħħew u jiġu sostiwiti mis-simbolu DPO tal-Unjoni Ewropea,

—	huwa indikat li d-dispożizzjonijiet differenti jikkonċernaw ukoll il-kaxex u imballaġġi oħrajn li jkun fihom il-“Brocciu corse”/“Brocciu”.

Eżiġenzi nazzjonali

Fir-rigward tal-evoluzzjonijiet leġiżlattivi u regolamentari nazzjonali, it-taqsima “Eżiġenzi nazzjonali” hija ppreżentata fil-forma ta’ tabella tal-punti ewlenin li għandhom jiġu vverifikati, il-valuri ta’ referenza u l-metodi ta’ evalwazzjoni tagħhom.

Oħrajn

—   Id-dettalji ta’ kuntatt tal-grupp:

Id-dettalji ta’ kuntatt tal-grupp ġew aġġornati.

—   Verifika:

Id-dettalji ta’ kuntatt tal-istrutturi ta’ verifika ġew aġġornati.

Fir-rigward tal-verifika tal-ispeċifikazzjonijiet tad-DPO “Brocciu corse”/“Brocciu”, huwa speċifikat li din hija organizzata minn pjan ta’ verifika elaborat minn organizzazzjoni ta’ verifika.

—   Imballaġġ:

Fir-rigward tal-imballaġġ, l-arranġamenti tal-ippakkjar u tal-preservazzjoni huma miżjuda sabiex jiġu konservati l-kwalitajiet tal-prodott: “It-tekniki ta’ imballaġġ tal-‘Brocciu corse’/‘Brocciu’ għandhom jippermettu li jinżammu l-kwalitajiet fiżikokimiċi u organolettiċi tal-prodott tul il-preżentazzjoni u l-konsum previsti fuq it-tikketta minn min jippakkja. Iż-żieda ta’ kwalunkwe prodott estern fil-produzzjoni tal-‘Brocciu corse’/‘Brocciu’, għajr il-gassijiet tal-imballaġġ awtorizzati mir-regolamentazzjoni dwar l-addittivi li jistgħu jintużaw fil-produzzjoni tal-oġġetti tal-ikel maħsuba għall-konsum mill-bniedem, hija pprojbita”.

DOKUMENT UNIKU

REGOLAMENT TAL-KUNSILL (KE) Nru 510/2006

dwar il-protezzjoni tal-indikazzjonijiet ġeografiċi u d-denominazzjonijiet tal-oriġini għall-prodotti agrikoli u l-oġġetti tal-ikel  (3)

“BROCCIU CORSE”/“BROCCIU”

Nru CE: FR-PDO-0217-01164 — 18.10.2013

IĠP ( ) DPO ( X )

1.   Denominazzjoni

“Brocciu corse”/“Brocciu”

2.   Stat Membru jew pajjiż terz

Franza

3.   Deskrizzjoni tal-prodott agrikolu jew tal-oġġett tal-ikel

3.1.   Tip ta’ prodott

Klassi 1.3. Ġobon

3.2.   Deskrizzjoni tal-prodott li għandu d-denominazzjoni msemmija fil-punt 1

Il-“Brocciu corse”/“Brocciu” huwa ġobon tax-xorrox li għandu forma ta’ kon maqtugħ minn fuq.

Il-piż tiegħu huwa bejn 250 g u 3 kg, skont erba’ tipi ta’ forom definiti ta’ 3 kg, 1 kg, 500 g u 250 g.

Jinkiseb esklussivament mix-xorrox frisk tal-mogħoż u/jew tan-nagħaġ li miegħu jiżdiedu l-ħalib frisk sħiħ tan-nagħaġ u/jew tal-mogħoż użat fl-istat mhux ipproċessat u l-melħ.

Huwa kkummerċjalizzat fl-istat frisk jew immaturat (tip “passu”).

Għandu minimu ta’ 40 g ta’ xaħam għal kull 100 g ta’ ġobon wara d-dessikazzjoni totali, u l-kontenut tiegħu ta’ materja niexfa ma jistax ikun taħt 20 g għal kull 100 g ta’ prodott għall-ġobon tad-denominazzjoni tat-tip “frisk”.

It-tip “passu” fih minimu ta’ 35 g ta’ materja niexfa għal kull 100 g ta’ ġobon.

3.3.   Materja prima (għall-prodotti pproċessati biss)

Ir-razza ovina ta’ Korsika u r-razza kaprina ta’ Korsika biss huma awtorizzati.

Ix-xorrox użat għandu jiġi mill-produzzjoni ta’ baqta friska tal-mogħoż u/jew tan-nagħaġ bin-natura ta’ “kimożina”.

Il-ħalib sħiħ għall-produzzjoni tal-baqta jista’ jintuża għal perjodu massimu ta’ 40 siegħa wara l-eqdem ħelba.

Il-koagulazzjoni tal-ħalib tinkiseb permezz tal-kimożina tradizzjonali jew kummerċjali, b’esklużjoni ta’ kull enzima koagulanti oħra, b’mod partikolari li toriġina mill-fungi jew mill-mikrobi.

It-tneħħija tal-lattożju huwa pprojbit.

Ix-xorrox frisk miġbur, li ma jsirlu l-ebda tibdil, jintuża fi żmien massimu ta’ sagħtejn wara l-produzzjoni tal-ġobon.

Il-pH tax-xorrox miġbur għandu jkun aktar minn jew ugwali għal 6,20.

Il-ħalib miżjud huwa ħalib frisk sħiħ tan-nagħaġ jew tal-mogħoż li jintuża fl-istat nej, fi żmien mhux aktar minn 24 siegħa wara t-tiħlib.

3.4.   Ikel għall-annimali (għall-prodotti li ġejjin mill-annimali biss)

L-ikel ibbażat fuq il-bwar huwa preponderanti.

Suppliment ta’ foraġġ u ta’ konċentrati fuq il-bażi ta’ ċereali prodotti fiż-żona huwa awtorizzat.

Madankollu, kontenut ta’ foraġġ u ta’ konċentrati li ġejjin minn barra ż-żona ta’ produzzjoni huwa aċċettat fil-limitu ta’ 20 % tas-supplimenti.

L-użu tat-tipi kollha ta’ foraġġ iffermentat huwa projbit.

3.5.   Stadji speċifiċi tal-produzzjoni li jridu jsiru fiż-żona ġeografika delimitata

Il-produzzjoni tal-ħalib u tax-xorrox, il-manifattura u l-maturazzjoni tal-ġobon tax-xorrox għandhom isiru fiż-żona ġeografika.

3.6.   Regoli speċifiċi applikabbli għat-tfettit, il-ħakk, l-imballaġġ, eċċ.

It-tekniki ta’ imballaġġ tal-“Brocciu corse”/“Brocciu” għandhom jippermettu li jinżammu l-kwalitajiet fiżikokimiċi u organolettiċi tal-prodott tul il-preżentazzjoni u l-konsum previsti fuq it-tikketta minn min jippakkja.

Iż-żieda ta’ kwalunkwe prodott estern fil-produzzjoni tal-“Brocciu corse”/“Brocciu”, għajr il-gassijiet tal-imballaġġ awtorizzati mir-regolamentazzjoni dwar l-addittivi li jistgħu jintużaw fil-produzzjoni tal-oġġetti tal-ikel maħsuba għall-konsum mill-bniedem, hija pprojbita.

3.7.   Regoli speċifiċi tat-tikkettar

Il-ġobnijiet tax-xorrox li jibbenefikaw mid-denominazzjoni tal-oriġini kontrollata “Brocciu corse”/“Brocciu” għandhom jiġu kkummerċjalizzati b’tikketta individwali li, minbarra t-termini regolamentari applikabbli għall-ġobnijiet kollha tax-xorrox u għall-oġġetti tal-ikel ippakkjati minn qabel, ikollha l-isem tad-denominazzjoni tal-oriġini u s-simbolu DPO tal-Unjoni Ewropea, it-tnejn miktuba f’tipi ta’ daqs mill-inqas ugwali għal żewġ terzi ta’ dak tal-aktar tipi kbar li jidhru fuq it-tikketta. Id-deskrizzjonijiet “frisk” jew “passu” jidhru b’mod obbligatorju fuq it-tikketta. Id-data ta’ produzzjoni għandha b’mod obbligatorju titniżżel fuq it-tikketta tal-ġobnijiet mibjugħa bid-deskrizzjoni “frisk”.

Dawn l-indikazzjonijiet jitniżżlu wkoll fuq il-kaxex u imballaġġi oħrajn li jkun fihom dawn il-ġobnijiet tax-xorrox.

4.   Deskrizzjoni fil-qosor tad-delimitazzjoni taż-żona ġeografika

Iż-żona ġeografika hija magħmula mid-dipartimenti Haute-Corse u Corse-du-Sud.

5.   Rabta maż-żona ġeografika

5.1.   Speċifiċità taż-żona ġeografika

Fatturi naturali

Il-gżira ta’ Korsika hija kkaratterizzata mill-oriġinalità tal-ambjent naturali tagħha. Tidher bħal muntanja fil-baħar, l-ilma ta’ madwarha jipprovdilha l-preċipitazzjonijiet li l-għoljiet tagħha jwaqqfu. Barra minn hekk, mill-perspettiva tal-klima, il-karatteristiċi Mediterranji tagħha jisparixxu minn ċertu altitudni.

Korsika tibbenefika minn temperaturi moderati u minn ħafna xita iżda b’mod irregolari. Il-preċipitazzjonijiet medji annwali huma sostanzjali relattivament u kwantitattivament. Din is-sistema ta’ preċipitazzjonijiet staġonali u irregolari fil-gżira kollha, tat-tip Mediterranju hija kkaratterizzata minn nixfa kbira fis-sajf.

Ir-razez lokali ta’ nagħaġ u mogħoż adattaw ruħhom b’mod perfett għall-ispeċifitajiet tal-gżira, għall-klima tagħha, għall-artijiet tagħha bil-muntanji u ħorox u għall-veġetazzjoni tagħha, makkja kostitwita minn tapit veġetali kompatt ħafna u b’ħafna flora tfuħ.

In-nagħaġ u l-mogħoż tar-razez ta’ Korsika jagħtu ħafna ħalib meta jitqiesu l-piż u t-trobbija tagħhom.

Fatturi umani

Waħda mill-bażijiet tal-patrimonju tal-ġobon tal-gżira żgur hija l-oriġinalità tas-sistema tal-produzzjoni tal-ħalib. Ir-riżorsi tal-foraġġ li jikber lokalment b’mod selvaġġ huma sfruttati permezz tal-użu ta’ dawn ir-ruminanti żgħar.

Ir-ragħaj għadu jaħdem b’mod tradizzjonali: trobbija barra, tranżumanza fis-sajf fil-muntanji għoljin u fix-xitwa fil-pjanuri.

Ir-rgħajja ta’ Korsika jipproduċu, skont għarfien li ġej mill-antenati, “Brocciu corse”/“Brocciu” mix-xorrox li jiġi mill-produzzjoni tal-ġobnijiet li jistgħu jkunu differenti skont il-mikroreġjuni tal-gżira (ġobon tan-nagħaġ u/jew tal-mogħoż artab jew ippressat). Il-“Brocciu corse”/“Brocciu” għalhekk huwa s-segwitu loġiku ta’ din il-produzzjoni tradizzjonali ta’ ġobon li timplika l-użu ta’ ħalib frisk mingħajr maturazzjoni minn qabel u l-kisba ta’ baqta ftit aċida b’natura ta’ kimożina. Is-sera miksuba, għalhekk huma sera ħelwin li jintużaw għall-produzzjoni tal-“Brocciu corse”/“Brocciu”.

Dan ix-xorrox frisk jissaħħan f’borma kbira. Wieħed mis-sigrieti tas-suċċess huwa fit-twettiq tat-tisħin li għandu jkun bil-mod u progressiv, biex jippermetti l-koagulazzjoni termali tal-lattoproteini solubbli tax-xorrox frisk u tal-ħalib miżjud tal-mogħoż u/jew tan-nagħaġ, bil-melħ bħala katalizzatur.

5.2.   Speċifiċità tal-prodott

Il-“Brocciu corse”/“Brocciu”, li l-kulur tiegħu jista’ jvarja minn abjad pur sal-kulur krema, huwa kkaratterizzat minn għamla iebsa, żejtnija fil-ħalq b’togħma ħafifa u pjaċevoli, ftit immellħa. Aktar ma jkun frisk il-“Brocciu corse”/“Brocciu”, aktar ikun tari u artab.

L-elaborazzjoni tal-“Brocciu corse”/“Brocciu” tippreżenta ċerti partikolaritajiet li jagħtu lill-prodott il-karatteristiċi speċifiċi ta’ finezza, tal-għamla u tat-togħma, b’mod partikolari minħabba l-fatt li jiżdiedu l-melħ u l-ħalib nej sħiħ matul il-produzzjoni.

Minbarra l-konsum tiegħu fl-istat frisk jew maturat, il-“Brocciu corse”/“Brocciu” jintuża wkoll fit-tisjir ta’ speċjalitajiet tipiċi tal-ikel ta’ Korsika bħal pereżempju l-froġa bin-nagħniegħ selvaġġ, l-Imbrucciata (torta) u ċ-Ciaccia (downats).

5.3.   Rabta kawżali bejn iż-żona ġeografika u l-kwalità jew il-karatteristiċi tal-prodott (għad-DPO), jew kwalità speċifika, ir-reputazzjoni jew karatteristika oħra tal-prodott (għall-IĠP)

Korsika għandha vokazzjoni storika għat-trobbija tal-ovini u l-kaprini imposta mill-kundizzjonijiet klimatiċi u ġeografiċi tal-ambjent.

Ir-razez lokali ovini u kaprini adattaw ruħhom perfettament għal dan l-ambjent ġeografiku, u dawn jagħtu ħalib b’ħafna materji utli li joffru rendiment sinifikanti ta’ ġobon. Fil-fatt, anki jekk il-kwalità fiżikokimika tal-ħalib tista’ tvarja skont l-istaġuni, meta jitqiesu l-perjodi ta’ transumanza meta l-annimali jimxu ħafna, il-kontenut ta’ xaħam u ta’ proteini tal-ħalib xorta jkun għoli.

Barra minn hekk, il-ġestjoni tar-riżorsi naturali u l-prattika tat-trobbija estensiva jippermettu li jkun hemm kwantità ta’ ħalib relattivament regolari tul il-kampanja tat-tiħlib.

Din ir-rikkezza tal-ħalib tan-nagħaġ u tal-mogħoż ta’ Korsika tippermetti l-produzzjoni tal-“Brocciu corse”/“Brocciu”. Fil-fatt, din il-produzzjoni, li ssegwi l-produzzjoni tradizzjonali tal-ġobon ta’ Korsika, hija l-valorizzazzjoni tal-proteini tas-serum u tax-xaħam fix-xorrox.

Minbarra l-kwalitajiet tal-ħalib, il-metodu tal-produzzjoni tal-ġobon tradizzjonali jispejga wkoll din il-produzzjoni sekondarja. Fil-fatt, il-produzzjoni tal-baqta li ssir bil-kimożina hija rapida u l-baqta li tiġi prodotta hija kkalċifikata ħafna, u dan jippermetti l-qtugħ irqiq ħafna b’effett li tiġi liberata kwantità kbira ta’ proteini solubbli u xaħam fix-xorrox li mbagħad jintuża għall-produzzjoni tal-“Brocciu corse”/“Brocciu”.

Hija din ir-rikkezza tal-ħalib ta’ Korsika li tagħti l-oriġinalità lill-“Brocciu corse”/“Brocciu” minħabba li l-ħalib jiżdied pur u fl-istat nej (“u puricciu”) matul il-produzzjoni, u dan jagħti lill-prodott din l-għamla tarija ħafna u din it-togħma karatteristika li ma teżisti fl-ebda ġobon ieħor tax-xorrox.

Referenza għall-pubblikazzjoni tal-ispeċifikazzjonijiet

[Artikolu 5(7) tar-Regolament (KE) Nru 510/2006 (4)]

http://agriculture.gouv.fr/IMG/pdf/Cdc-Brocciu_BO_cle8279f6.pdf

---

(1)  ĠU L 343, 14.12.2012, p. 1.

(2)  ĠU L 93, 31.3.2006, p. 12. Sostitwit mir-Regolament (UE) Nru 1151/2012.

(3)  Sostitwit mir-Regolament (UE) Nru 1151/2012.

(4)  Ara n-nota ta’ qiegħ il-paġna 3.

---