52014PC0395

MEMORANDUM TA’ SPJEGAZZJONI

1.           IL-KUNTEST TAL-PROPOSTA

· Ir-raġunijiet għall-proposta u l-għanijiet tagħha

It-tassazzjoni fuq prodotti tal-enerġija u l-elettriku fl-UE hija rregolata bid-Direttiva tal-Kunsill 2003/96/KE ([1]) (minn hawn 'il quddiem imsejħa d-“Direttiva dwar it-Tassazzjoni tal-Enerġija” jew id-“Direttiva”).

Skont l-Artikolu 19(1) tad-Direttiva, flimkien mad-dispożizzjonijiet previsti fl-Artikoli 5, 15 u 17, il-Kunsill, li jaġixxi b'mod unanimu fuq proposta tal-Kummissjoni, jista' jawtorizza lil kwalunkwe Stat Membru biex jintroduċi iktar eżenzjonijiet jew tnaqqis tad-dazji tas-sisa għal kunsiderazzjonijiet politiċi speċifiċi.

L-għan ta' din il-proposta huwa li tawtorizza lill-Italja biex tapplika, f’ċerti żoni partikolarment żvantaġġati, rati mnaqqsa ta’ tassazzjoni fuq il-gażolju u l-gass likwifikat miż-żejt (LPG) użati għal raġunijiet ta’ tisħin biex parzjalment ipaċu l-ispejjeż għoljin għat-tisħin tar-residenti f’dawk iż-żoni ġeografiċi. L-ispejjeż tat-tisħin huma għolja jew minħabba l-kundizzjonijiet severi ħafna tal-klima jew minħabba l-kundizzjonjiet severi tal-klima jew insularità ta' dawn iż-żoni flimkien ma' akkwist tal-fjuwil diffiċli.

· Kuntest Ġenerali

B’ittra ddatata l-31 ta' Mejju 2012, l-awtoritajiet Taljani talbu l-awtorizzazzjoni biex japplikaw, f’ċerti żoni ġeografiċi partikolarment żvantaġġati, rati mnaqqsa ta’ tassazzjoni fuq il-gażolju u l-LPG użati għal raġunijiet ta’ tisħin permezz ta’ tiġdid tad-Deċiżjoni tal-Kunsill 2008/318/KE tas-7 ta' April 2008 li tawtorizza lill-Italja biex tapplika, fiż-żoni ġeografiċi determinati, rati mnaqqsa ta’ tassazzjoni fuq il-gażolju u l-LPG użati għal raġunijiet ta’ tisħin skont l-Artikolu 19 tad-Direttiva 2003/96/KE ([2]). Din id-Deċiżjoni tawtorizza lill-Italja biex sal-31 ta’ Diċembru 2012, tapplika f’ċerti żoni partikolarment żvantaġġati rati mnaqqsa ta' dazju tas-sisa fuq il-fjuwil domestiku u l-LPG użati għat-tisħin. Barra minn hekk l-awtoritajiet Taljani inkludew fit-talba tagħhom estensjoni tal-ambitu tal-awtorizzazzjoni għall-muniċipalitajiet li huma parti minn provinċji fejn aktar minn 70 % tal-muniċipalitajiet huma kklassifikati fiż-żona klimatika F iżda fejn huma stess ma jaqgħux fiż-żona klimatika F. Informazzjoni addizzjonali u kjarifiki ġew ipprovduti mill-awtoritajiet Taljani fl-4 ta’ Diċembru 2012, is-16 ta’ Lulju 2013, il-31 ta’ Diċembru 2013, it-22 ta’ Jannar 2014. B’ittra ddatata d-19 ta’ Marzu 2014, l-awtoritajiet Taljani infurmaw lill-Kummissjoni li huma qed jitolbu tiġdid tal-awtorizzazzjoni mogħtija bid-Deċiżjoni tal-Kunsill 2008/318/KE għal perjodu ġdid ta’ sitt snin mingħajr ma jżidu mal-lista l-muniċipalitajiet il-ġodda kif mitlub inizjalment.

Biex tiġġustifika t-talba tagħha għal deroga, l-Italja tiġbed l-attenzjoni għad-diversità tat-territorju tagħha li għandu klima u kundizzjonijiet ġeografiċi varjabbli. Il-livelli nazzjonali ta’ dazju tas-sisa fuq il-gażolju u l-LPG użati għat-tisħin fl-Italja huma relattivament għolja. Sabiex tevita piż żejjed fuq ċerti konsumaturi partikolarment dipendenti fuq it-tisħin, l-Italja introduċiet rati mnaqqsa ta’ tassazzjoni f’ċerti partijiet tat-territorju tagħha u tixtieq tkompli tapplika l-istess tnaqqis kif introdott fl-2006. It-tnaqqis tat-taxxa jammonta għal EUR 129,11 kull 1 000 litru fil-każ tal-gażolju (b’hekk ir-rata tat-taxxa applikabbli titniżżel għal  EUR 274,10 kull 1 000 litru) u ta’ EUR 159,07 kull 1 000 kg ta’ LPG (b’hekk ir-rata ta’ taxxa applikabbli titniżżel għal EUR 30,87 kull 1 000 kg). Ir-rati ta’ taxxa applikabbli huma ogħla mill-livelli minimi tat-tassazzjoni stipulati fid-Direttiva.

It-tnaqqis tat-taxxa huwa applikabbli f’żoni ġeografiċi li jissodisfaw il-kriterji li ġejjin:

Skont l-Artikolu 8(10) tal-Liġi Taljana Nru 448/1998, il-vantaġġ japplika għal provvisti tal-fjuwils inkwistjoni (il-gażolju u l-LPG) użati f’muniċipalitajiet:

· klassifikati fiż-żona klimatika F, kif imsemmi fid-Digriet Presidenzjali Nru 412 tas-26 ta' Awwissu 1993;

· li ma għandhomx netwerk tal-provvista tal-gass u huma klassifikati fiż-żona klimatika E, kif imsemmi fid-Digriet Presidenzjali 412/1993 imsemmi hawn fuq. F’dan il-każ, kif previst fl-Artikolu 8(10)(c) punt 4) tal-Liġi Nru 448/1998, il-vantaġġ jiġi rtirat malli l-muniċipalità tiġi konnessa ma’ netwerk tal-provvista tal-gass.

· fir-reġjun ta' Sardinja u l-gżejjer iż-żgħar, sakemm ma jkunx sar disponibbli netwerk tal-gass naturali fil-komun konċernat; din il-parti tar-reġimi tkopri l-gżejjer Taljani kollha ħlief Sqallija.

Il-vantaġġ tat-taxxa ma jistax jiġi kombinat ma’ tnaqqis ieħor fid-dazju tas-sisa.

Skont l-awtoritajiet Taljani, id-divrenzjar fit-taxxa huwa bbażat fuq kriterji oġġettivi u huwa maħsub biex jiżguraw kontinwità ġeografika mal-bqija tat-territorju Taljan, jiġifieri għandu l-għan li jqiegħed il-popolazzjoni taż-żoni eliġibbli fuq livell iktar komparabbli mal-bqija tal-popolazzjoni Taljana billi jnaqqas l-ispejjeż għoljin b'mod sproporzjonat tat-tisħin tagħhom. L-ammont tat-tnaqqis tat-taxxa huwa l-istess għall-utenti kollha; għandu biss l-għan li jtaffi parzjalment l-ispejjeż addizzjonali tat-tisħin għall-popolazzjoni taż-żoni eliġibbli li jirriżultaw minn klima kiesħa jew diffikultajiet fl-akkwist tal-fjuwil.

Skont l-awtoritajiet Taljani l-ispejjeż addizzjonali fir-reġjuni muntanjużi għat-trasport tal-LPG huma 120 % ogħla mill-bqija tal-pajjiż u għall-gass 132 % ogħla.

Skont l-awtoritajiet Taljani, għaż-żoni klimatiċi E u F, it-tnaqqis fit-taxxa għandu medja ta’ 11-12 % tal-prezz tal-gażolju u tal-LPG użati għal raġunijiet ta’ tisħin.

Dawn iċ-ċifri jridu jitqabblu mal-ispejjeż medji tat-tisħin: dawn huma, minħabba l-kundizzjonijiet klimatiċi, 90 % ogħla mill-medja nazzjonali fiż-żona klimatika E u 170 % ogħla mill-medja nazzjonali fiż-żona klimatika F.

Il-partikolarità tal-gżejjer hija fil-fatt li minħabba l-partikolaritajiet ġeografiċi tagħhom, il-forniment tal-fjuwil huwa limitat fl-ambitu u dan iwassal biex ikun ogħla minn dawk fl-Italja kontinentali minħabba l-ispejjeż addizzjonali tat-trasport. L-awtoritajiet Taljani kkonfermaw li t-tnaqqis tat-taxxa ma jirriżultax f’kumpens żejjed u ma jaffettwax il-prezzijiet b'mod li dawk tal-LPG u l-gażolju jkunu orħos minn fl-Italja kontinentali. Fir-rigward tal-applikazzjoni tas-sussidju fil-gżejjer iż-żgħar, fil-lokalitajiet inkwistjoni l-katina tal-loġistika hija inevitabbilment aktar għalja minn dik fl-Italja kontinentali. L-ispejjeż ogħla huma r-riżultat ta’ nuqqas ta’ loġistika primarja, li jwassal għal spejjeż tad-distribuzzjoni ogħla. L-ispejjeż huma ogħla wkoll minħabba li l-aċċess bit-toroq ta' spiss huwa problematiku, spejjeż tal-fjuwil tal-vetturi ogħla minn dawk kontinentali, l-ispejjeż tat-trasport għall-aċċess tal-gżejjer iż-żgħar u l-kwantitajiet limitati tal-provvisti individwali. L-awtoritajiet Taljani estimaw dawn spejjeż ogħla għal madwar 10-15 % ogħla mill-ispejjeż korrispondenti fl-Italja kontinentali.

L-awtoritajiet Taljani jispjegaw li matul l-aħħar tliet snin il-miżura naqqset il-prezz tal-akkwist aħħari tal-LPG u tal-gażolju għat-tisħin b’madwar 10 %.

L-awtoritajiet Taljani jispjegaw li ma hemmx żvilupp ta’ netwerk tal-gass naturali f’dawk iż-żoni, li huwa żvantaġġ addizzjonali għal dawn il-komuni muntanjużi, Sardinja u l-gżejjer iż-żgħar.

L-infiq baġitarju fis-sena tal-miżura huwa ta’ madwar EUR 230 miljun.

· Dispożizzjonijiet eżistenti fil-qasam tal-proposta

Id-Direttiva tal-Kunsill 2003/96/KE tas-27 ta’ Ottubru 2003 li tirriforma l-istruttura tal-Komunità dwar tassazzjoni fuq prodotti ta' enerġija u elettriku u d-Deċiżjoni tal-Kunsill 2008/318/KE tas-7 ta’ April 2008 li tawtorizza lill-Italja sabiex tapplika, fiż-żoni ġeografiċi determinati, rati mnaqqsa ta’ taxxa fuq il-gażolju u l-LPG użat għal finijiet ta’ tisħin skont l-Artikolu 19 tad-Direttiva 2003/96/KE.

Konsistenza mal-bqija tal-politiki u l-għanijiet tal-Unjoni

Kull talba għal deroga skont l-Artikolu 19 tad-Direttiva dwar it-Taxxa fuq l-Enerġija trid tiġi eżaminata mill-Kummissjoni li għandha tqis it-tħaddim tajjeb tas-suq intern, il-bżonn li tiġi żgurata l-kompetizzjoni ġusta u l-politiki tal-UE tas-saħħa, l-ambjent, l-enerġija u t-trasport.

Id-differenzjazzjoni tat-taxxa ttaffi parzjalment l-ispejjeż addizzjonali għat-tisħin taċ-ċittadini f’ċerti żoni ġeografiċi tal-Italja li huma partikolarment żvantaġġati meta mqabbla mal-bqija tat-territorju u li għalihom, għalhekk, ir-rata standard tat-taxxa applikabbli għal-LPG u l-gażolji użati għal raġunijiet ta’ tisħin twassal għal piż tat-taxxa eċċessiv. L-iżvantaġġ ġeografiku jfisser spejjeż addizzjonali tat-tisħin minħabba kundizzjonijiet klimatiċi severi jew l-insularità ta’ dawn iż-żoni, flimkien ma’ nuqqas ta’ disponibilità ta’ riżorsi alternattivi għat-tisħin, b’mod partikolari nuqqas ta’ disponibbiltà ta' aċċess għan-netwerk tal-gass naturali.

Ir-rata mnaqqsa ta’ tassazzjoni kemm għall-gażolju kif ukoll għal-LPG tibqa’ ogħla mil-livelli minimi ta’ tassazzjoni tal-UE stabbiliti fid-Direttiva dwar it-Tassazzjoni tal-Enerġija u ttaffi l-ispejjeż addizzjonali għat-tisħin fiż-żona ġeografika inkwistjoni b'mod parzjali biss.

B’hekk jista’ jiġi kkunsidrat li t-tnaqqis huwa kompatibbli mal-mira li jingħata inċentiv tat-taxxa bil-għan tal-effiċjenza fl-użu tal-enerġija. Ma nstabx li l-miżura mhijiex kompatibbli mal-politiki rilevanti tal-UE dwar l-ambjent u l-enerġija.

Barra minn hekk, il-miżura hija aċċettabbli mill-aspett tat-tħaddim tajjeb tas-suq intern u l-ħtieġa li tkun żgurata kompetizzjoni ġusta. Il-miżura tipprova biss ittaffi parzjalment l-ispejjeż addizzjonali tat-tisħin assoċjati mal-kundizzjonijiet oġġettivi taż-żoni kkonċernati. It-tnaqqis tat-taxxa mhu kumulativ mal-ebda tip ieħor ta’ tnaqqis ta' taxxa u ma japplikax għal użu ieħor tal-fjuwil tat-tisħin ħlief għat-tisħin tal-ispazji.

L-Artikolu 19(2) tad-Direttiva dwar it-Taxxa tal-Enerġija jipprevedi wkoll li l-miżuri adottati skont id-dispożizzjonijiet tagħha jridu jkunu limitati biż-żmien, u jistabbilixxi perjodu massimu ta' sitt snin, bil-possibilità ta' tiġdid. Il-fehim tal-Kummissjoni huwa li peress li din hija miżura tat-taxxa ta’ natura temporanja l-estensjoni tagħha għandha tipprovdi lill-Italja biżżejjed żmien biex tagħmel valutazzjoni tal-effett ambjentali tal-miżura iżda wkoll biex toħloq inċentivi biex titjieb l-effiċjenza tal-enerġija u tevalwahom. L-estensjoni tal-miżura għandha tipprovdi lill-awtoritajiet Taljani biżżejjed żmien biex jiġbru l-informazzjoni meħtieġa għal tali valutazzjoni. Din se tkun ukoll sinjal li fil-futur l-enfasi jkun fuq miżuri għall-iffrankar tal-enerġija aktar immirati sabiex tittejjeb l-effiċjenza enerġetika u li jkollhom effett pożittiv fuq l-ambjent. Għal dawn ir-raġunijiet fl-istadju attwali, jidher xieraq li tingħata l-awtorizzazzjoni għal tliet snin.

Regoli dwar l-għajnuna mill-Istat

Ir-rati tat-taxxa mnaqqsa ta' EUR 274,10 kull 1 000 litru għall-gażolju u EUR 30.87 kull 1 000 kg għal-LPG użati għat-tisħin previsti mill-awtoritajiet Taljani huma aktar mil-limiti minimi tal-UE għat-tassazzjoni skont l-Artikolu 9 tad-Direttiva 2003/96/KE. Il-miżura għalhekk hija koperta mill-Artikolu 25 tar-Regolament 800/2008/KE ([3]) (“ir-Regolament għal Eżenzjoni Ġenerali Sħiħa”) u għalhekk titqies kompatibbli mas-suq intern u eżentata mir-rekwiżit ta’ notifika. Il-perjodu ta’ validità tar-Regolament għal Eżenzjoni Ġenerali Sħiħa kien oriġinarjament limitat sal-31 ta’ Diċembru 2013 iżda kien estiż bir-Regolament tal-Kummissjoni 1224/2013/UE ([4]) sat-30 ta’ Ġunju 2014. Fil-każ li l-Kummissjoni tadotta regoli ġodda dwar l-għajnuna mill-Istat qabel id-Deċiżjoni tal-Kunsill dwar din il-proposta, l-obbligi ta’ notifika jkollhom jiġu rivalutati skont ir-regoli l-ġodda.

2.           IR-RIŻULTATI TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET TAL-IMPATT

· Il-konsultazzjoni mal-partijiet interessati

Din il-proposta tikkonċerna lill-Italja biss.

· Ġbir u l-użu tal-għarfien espert

Ma kienx hemm ħtieġa ta’ għarfien espert estern.

· Valutazzjoni tal-impatt Din il-proposta tikkonċerna awtorizzazzjoni lil Stat Membru individwali fuq talba tiegħu stess.

3.           L-ELEMENTI LEGALI TAL-PROPOSTA

Il-proposta għandha l-għan li tawtorizza lill-Italja tidderoga mid-dispożizzjonijiet ġenerali tad-Direttiva tal-Kunsill 2003/96/KE u biex tapplika rati mnaqqsa ta’ tassazzjoni fuq il-gażolju u l-LPG użati għat-tisħin.

Bażi ġuridika

L-Artikolu 19 tad-Direttiva tal-Kunsill 2003/96/KE.

Prinċipju ta’ sussidjarjetà

Il-qasam tat-tassazzjoni indiretta kopert mill-Artikolu 113 TFUE mhuwiex fih innifsu fil-kompetenza esklussiva tal-Unjoni Ewropea skont it-tifsira tal-Artikolu 3 TFUE.

Madankollu, l-eżerċizzju tal-Istati Membri tal-kompetenzi tagħhom f’dan il-qasam huwa regolat u limitat ħafna mil-liġi eżistenti tal-UE. F'konformità mal-Artikolu 19 tad-Direttiva 2003/96/KE, il-Kunsill għandu biss is-setgħa li jawtorizza Stat Membru jintroduċi eżenzjonijiet jew tnaqqis ulterjuri skont it-tifsira ta’ dik id-dispożizzjoni. L-Istati Membri ma jistgħux jieħdu post il-Kunsill.

Il-proposta għalhekk tirrispetta l-prinċipju tas-sussidjarjetà.

Prinċipju ta’ proporzjonalità

Il-proposta tirrispetta l-prinċipju tal-proporzjonalità. It-tnaqqis fit-taxxa ma jeċċedix dak li hu neċessarju biex jintlaħaq l-għan inkwistjoni (ara l-kunsiderazzjonijiet dwar l-aspetti tas-suq intern u l-kompetizzjoni ġusta, hawn fuq).

Għażla tal-istrumenti

Strument(i) propost(i): Deċiżjoni ta' Implimentazzjoni tal-Kunsill.

L-Artikolu 19 tad-Direttiva 2003/96 jipprovdi għal din it-tip ta’ miżura biss.

4.           IMPLIKAZZJONI BAĠITARJA

Il-miżura ma timponix piż finanzjarju jew amministrattiv fuq l-Unjoni. Il-proposta għalhekk ma għandhiex impatt fuq il-baġit tal-Unjoni.

2014/0200 (NLE)

Proposta għal

DEĊIŻJONI TA’ IMPLIMENTAZZJONI TAL-KUNSILL

li tawtorizza lill-Italja tapplika, f'żoni ġeografiċi determinati, rati mnaqqsa ta’ tassazzjoni fuq il-gażolju u l-LPG użat għal raġunijiet ta’ tisħin skont l-Artikolu 19 tad-Direttiva 2003/96/KE

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra d-Direttiva tal-Kunsill 2003/96/KE tas-27 ta' Ottubru 2003 li tirriforma l-istruttura tal-Komunità dwar tassazzjoni fuq prodotti ta’ enerġija u elettriku ([5]), u b’mod partikolari l-Artikolu 19(1) tagħha,

Wara li kkunsidra l-proposta tal-Kummissjoni Ewropea,

Billi:

(1)       Skont l-Artikolu 19(1) tad-Direttiva 2003/96/KE, l-Italja kienet awtorizzata tapplika f’ċerti żoni partikolarment żvantaġġati rati mnaqqsa tad-dazju tas-sisa fuq il-gażolju u l-LPG użati għat-tisħin. L-awtorizzazzjoni ngħatat sal-31 ta' Diċembru 2012 mid-Deċiżjoni tal-Kunsill 2008/318/KE tas-7 ta' April 2008 li tawtorizza lill-Italja sabiex tapplika, fiż-żoni ġeografiċi determinati, rati mnaqqsa ta’ taxxa fuq il-gażolju u l-LPG użat għal finijiet ta’ tisħin skont l-Artikolu 19 tad-Direttiva 2003/96/KE ([6]).

(2)       Permezz ta’ ittra ddatata l-31 ta’ Mejju 2012, l-awtoritajiet Taljani talbu awtorizzazzjoni biex japplikaw f’ċerti żoni partikolarment żvantaġġati ġeografikament, rati mnaqqsa ta’ tassazzjoni fuq il-gażolju u l-LPG użati għal raġunijiet ta’ tisħin permezz ta’ estensjoni ta’ prattika segwita taħt id-Deċiżjoni tal-Kunsill imsemmija hawn fuq f’xi żoni, u dan qabel ma tiskadi. Informazzjoni addizzjonali u kjarifiki ġew ipprovduti mill-awtoritajiet Taljani fl-4 ta’ Diċembru 2012, fis-16 ta’ Lulju 2013, fil-31 ta’ Diċembru 2013 u fit-22 ta’ Jannar 2014. Permezz ta’ ittra ddatata d-19 ta’ Marzu 2014, l-awtoritajiet Taljani talbu tiġdid tal-awtorizzazzjoni mogħtija bid-Deċiżjoni tal-Kunsill 2008/318/KE mingħajr bidliet fl-ambitu territorjali tagħha. L-awtorizzazzjoni ġiet mitluba għall-perjodu mill-1 ta’ Jannar 2013 sal-31 ta’ Diċembru 2018. 

(3)       L-Italja għandha territorju li jvarja ħafna b'kundizzjonijiet klimatiċi u ġeografiċi varjabbli. L-Italja qieset il-partikolaritajiet tat-territorju tagħha u introduċiet rati mnaqqsa ta' tassazzjoni fuq il-gażolju u l-LPG bil-ħsieb li tpaċi parzjalment l-ispejjeż disproporzjonalment għoljin tat-tisħin tar-residenti ta’ ċerti żoni ġeografiċi.

(4)       Id-divrenzjar fit-taxxa huwa bbażat fuq kriterji oġġettivi u għandu l-għan li jqiegħed il-popolazzjoni taż-żoni eliġibbli fuq bażi aktar komparabbli mal-bqija tal-popolazzjoni Taljana permezz ta’ tnaqqis tal-spejjeż disproporzjonalment għoljin tat-tisħin tagħhom minħabba l-kundizzjonijiet klimatiċi severi jew id-diffikultajiet fl-akkwist tal-fjuwil meta mqabbel mal-bqija tat-territorju Taljan.

(5)       It-tnaqqis tat-taxxa huwa applikabbli f’żoni ġeografiċi li jissodisfaw il-kriterji li ġejjin: i) l-aktar kundizzjonijiet klimatiċi severi fit-territorju Taljan (communes li jaqgħu fiż-żona F kif definit fid-digriet Presidenzjali Nru 412 tal-1993 ([7])), kundizzjonijiet klimatiċi severi flimkien ma' diffikultajiet fl-akkwist tal-fjuwil (communes li jaqgħu fiż-żona E kif definit fid-digriet Presidenzjali Nru 412 tal-1993 sakemm in-netwerk tal-gass naturali ma jkunx sar disponibbli fil-commune), iżolament ġeografiku flimkien ma akkwist tal-fjuwil għali u diffikultuż: Sardinja u gżejjer żgħar. Billi l-iżvilupp tan-netwerk tal-gass naturali, sa ċertu punt importanti jnaqqas l-ispejjeż addizzjonali tat-tisħin u jwassal għal diversità akbar fil-provvista tal-fjuwil, fejn ikun xieraq, l-applikazzjoni tar-rati mnaqqsa hija ristretta sakemm jitlesta n-netwerk tal-gass naturali fil-communes konċernati.

(6)       Il-miżura ġiet eżaminata mill-Kummissjoni u nstab li ma tikkawżax distorsjoni tal-kompetizzjoni jew ittellef l-operat tas-suq intern u ma titqiesx inkompatibbli mal-politika tal-UE dwar l-ambjent, l-enerġija u t-trasport. Ir-rata mnaqqsa ta’ tassazzjoni kemm għall-gażolju kif ukoll għal-LPG tibqa’ ogħla mil-livelli minimi ta’ tassazzjoni tal-UE stabbiliti fid-Direttiva 2003/96/KE u ttaffi l-ispejjeż addizzjonali għat-tisħin fiż-żona ġeografika inkwistjoni b'mod parzjali biss.

(7)       Il-miżura kkonċernata tapplika biss għal għanijiet ta' tisħin ta' spazji (kemm għall-individwi privati kif ukoll għan-negozji); ma tapplikax għal forom oħra ta’ użu kummerċjali ta' dawn il-prodotti. Skont l-awtoritajiet Taljani l-ammont ta' vantaġġ tat-taxxa għall-utenti kummerċjali, huwa f'kull każ partikulari kopert bir-Regolament tal-Kummissjoni (KE) Nru 1407/2013 tat-18 ta’ Diċembru 2013 dwar l-applikazzjoni tal-Artikoli 107 u 108 tat-Trattat dwar il-Funzjonament tal-Unjoni Ewropea għall-għajnuna de minimis ([8]). Madankollu, jekk il-benefiċċju għal xi impriża singola jeċċedi l-limitu stabbilit f'dak ir-Regolament, għandu jiġi notifikat lill-Kummissjoni skont ir-Regolament (KE) Nru 734/2013 tat-22 ta’ Lulju 2013 li jemenda r-Regolament tal-Kunsill (KE) Nru 659/1999 li jistipula regoli dettaljati għall-applikazzjoni tal-Artikolu 93 tat-Trattat tal-KE ([9]).

(8)       Meta wieħed iqis l-effetti ambjentali potenzjali tal-miżura, jidher xieraq li tingħata l-awtorizzazzjoni għal tliet snin. Dan il-perjodu ta’ applikazzjoni jipprovdi lill-awtoritajiet Taljani b’biżżejjed żmien biex jivvalutaw l-effett ambjentali tal-miżura u se jindika wkoll li fil-futur jeħtieġ li jiddaħħlu fis-seħħ miżuri għall-iffrankar tal-enerġija aktar immirat sabiex titjieb l-effiċjenza tal-enerġija u jiġi żgurat effett pożittiv fuq l-ambjent,

ADOTTA DIN ID-DEĊIŻJONI:

Artikolu 1

L-Italja hija b’dan awtorizzata tapplika rati mnaqqsa ta’ tassazzjoni fuq il-gażolju u l-LPG użati għal raġunijiet ta’ tisħin fiż-żoni ġeografikament żvantaġġati li ġejjin: 

1. Il-communes li jaqgħu fiż-żona klimatika F kif stabbilit bid-Digriet Presidenzjali tas-26 ta’ Awwissu 1993 Nru 412.

2. Il-communes li jaqgħu fiż-żona klimatika E kif stabbilit bid-Digriet Presidenzjali tas-26 ta’ Awwissu 1993 Nru 412.

3. Il-communes ta' Sardinja u l-gżejjer żgħar ([10]).

Sabiex jiġi evitat kwalunkwe kumpens żejjed, it-tnaqqis ma jridx ikun iktar mill-ispejjeż addizzjonali tat-tisħin taż-żoni kkonċernati. Fil-każ partikolari ta’ Sardinja u l-gżejjer żgħar, bħala konsegwenza, it-tnaqqis tat-taxxa ma jridx irendi l-prezz inqas mill-prezz tal-istess fjuwil fl-Italja kontinentali.

Ir-rata mnaqqsa tkun konformi mar-rekwiżiti tad-Direttiva tal-Kunsill 2003/96/KE, u b’mod partikolari l-livelli minimi ta’ tassazzjoni stabbiliti fl-Artikolu 9 ta' dik id-Direttiva.

Artikolu 2

L-eliġibbiltà taż-żoni ġeografiċi msemmija fl-Anness taħt il-punt 2 u 3 tiddependi fuq in-nuqqas ta’ disponibbiltà ta’ netwerk tal-gass naturali fil-commune.

Artikolu 3

Din id-Deċiżjoni tidħol fis-seħħ fil-jum tan-notifika tagħha. Tiskadi tliet snin wara.

Artikolu 4

Din id-Deċiżjoni hija indirizzata lir-Repubblika tal-Italja.

Magħmul fi Brussell,

                                                                       Għall-Kunsill

                                                                       Il-President

([1])            Id-Direttiva tal-Kunsill 2003/96/KE tas-27 ta' Ottubru 2003 li tirriforma l-istruttura tal-Komunità dwar tassazzjoni fuq prodotti ta' enerġija u elettriku (ĠU L 283 tal-31.10.2003 p. 51; Id-Direttiva kif emendata l-aħħar bid-Direttivi 2004/74/KE u 2004/75/KE (ĠU L 157, 30.4.2004, p. 87 u p.100).

([2])            ĠU L 109, 19.4.2008, p. 27–29.

([3])            Ir-Regolament tal-Kummissjoni (KE) Nru 800/2008 tas-6 ta’ Awwissu 2008 li jiddikjara ċerti kategoriji ta’ għajnuna bħala kompatibbli mas-suq komuni fl-applikazzjoni tal-Artikoli 87 u 88 tat-Trattat, ĠU L 214, 9.8.2008, p. 3.

([4])            ĠU L 320, 30.11.2013.

([5])            ĠU L 283, 31.10.2003, p. 51, id-Direttiva kif emendata l-aħħar bid-Direttiva 2004/75/KE (ĠU L 157, 30.4.2004, p. 100).

([6])            ĠU L 109, 19.4.2008, p. 27–29.

([7])            Id-digriet Presidenzjali Nru 412 tal-1993 jaqsam it-territorju Taljan f’sitt żoni klimatiċi (A sa F). Il-klassifikazzjoni hija bbażata fuq l-unità “gradi kull jum” li tirrappreżenta l-ammont ta’ jiem kull sena li t-temperatura ta’ barra ma tkunx l-ottimu ta' 20 °C u b’hekk ikun meħtieġ it-tisħin.

([8])            ĠU L 352 of 24.12.2013, p. 1.

([9])            ĠU L 204 of 31.7.2013, p. 15.

([10])           Il-gżejjer Taljani kollha ħlief Sqallija.