5.9.2014   

MT

Il-Ġurnal Uffiċjali tal-Unjoni Ewropea

L 266/297

—

wara li kkunsidra l-kontijiet annwali definittivi tal-Aġenzija tal-Unjoni Ewropea għad-Drittijiet Fundamentali għas-sena finanzjarja 2012,

—

wara li kkunsidra r-rapport tal-Qorti tal-Awdituri dwar il-kontijiet annwali definittivi tal-Aġenzija tal-Unjoni Ewropea għad-Drittijiet Fundamentali għas-sena finanzjarja 2012, flimkien mat-tweġibiet tal-Aġenzija (1),

—

wara li kkunsidra r-rakkomandazzjoni tal-Kunsill tat-18 ta’ Frar 2014 (05849/2014 — C7-0054/2014),

—

wara li kkunsidra l-Artikolu 319 tat-Trattat dwar il-Funzjonament tal-Unjoni Ewropea,

—

wara li kkunsidra r-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 rigward ir-Regolament Finanzjarju applikabbli għall-baġit ġenerali tal-Komunitajiet Ewropej (2), u b’mod partikolari l-Artikolu 185 tiegħu,

—

wara li kkunsidra r-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002 (3), u b’mod partikolari l-Artikolu 208 tiegħu,

—

wara li kkunsidra r-Regolament (KE) Nru 168/2007 tal-15 ta’ Frar 2007 li jwaqqaf l-Aġenzija tal-Unjoni Ewropea għad-Drittijiet Fundamentali (4), u b’mod partikolari l-Artikolu 21 tiegħu,

—

wara li kkunsidra r-Regolament tal-Kummissjoni (KE, Euratom) Nru 2343/2002 tad-19 ta’ Novembru 2002 dwar ir-Regolament Finanzjarju strutturali għall-entitajiet imsemmijin fl-Artikolu 185 tar-Regolament tal-Kunsill (KE, Euratom) Nru 1605/2002 dwar ir-Regolament Finanzjarju li jgħodd għall-baġit ġenerali tal-Komunitajiet Ewropej (5),

—

wara li kkunsidra r-Regolament ta’ Delega tal-Kummissjoni (UE) Nru 1271/2013 tat-30 ta’ Settembru 2013 dwar Regolament Finanzjarju ta’ qafas għall-korpi msemmija fl-Artikolu 208 tar-Regolament (UE, Euratom) Nru 966/2012 tal-Parlament Ewropew u tal-Kunsill (6), u b’mod partikolari l-Artikolu 108 tiegħu,

—

wara li kkunsidra d-deċiżjonijiet u r-riżoluzzjonijiet ta’ kwittanza preċedenti tiegħu,

—

wara li kkunsidra r-Regola 77 u l-Anness VI tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Kontroll tal-Baġit u l-opinjoni tal-Kumitat għal-Libertajiet Ċivili, il-Ġustizzja u l-Intern (A7-0184/2014),

A.

billi, skont l-istqarrijiet finanzjarji tagħha, il-baġit tal-Aġenzija tal-Unjoni Ewropea għad-Drittijiet Fundamentali (“l-Aġenzija”) għas-sena finanzjarja 2012 kien ta’ EUR 20 376 000, ammont li jirrapreżenta żieda ta’ 0,97 % meta mqabbel mal-2011,

B.

billi l-Qorti tal-Awdituri stqarret li kisbet assigurazzjonijiet raġonevoli li l-kontijiet annwali tal-Aġenzija għas-sena finanzjarja 2012 huma affidabbli u li t-tranżazzjonijiet sottostanti huma legali u regolari,

1.

Jirrikonoxxi mill-Aġenzija li:

2.

Jinnota bi tħassib li fl-2012, is-servizzi tat-tindif tal-Aġenzija ngħataw permezz ta’ qafas ta’ sensiela ta’ kuntratti lil żewġ fornituri, u li minħabba żball klerikali matul l-evalwazzjoni tal-offerti, il-klassifika tal-kuntratturi kienet żbaljata; jinnota li bħala riżultat ta’ dan l-iżball, ingħata kuntratt wieħed speċifiku għal EUR 56 784 fl-2012 u li l-pagamenti relatati kienu irregolari; jirrikonoxxi li wara l-awditjar tal-Qorti tal-Awdituri, l-Aġenzija emendat il-klassifika tal-kuntratturi kif xieraq;

3.

Jinnota li l-isforzi għall-monitoraġġ tal-baġit matul is-sena finanzjarja 2012 irriżultaw f’rata ta’ implimentazzjoni baġitarja ta’ 100 %; jinnota bi tħassib li r-rata ta’ eżekuzzjoni tal-approprjazzjonijiet ta’ pagament kienet ta’ 78,5 %;

4.

Jinnota li l-implimentazzjoni tal-baġit għat-Titolu III (nefqa operazzjonali) kienet baxxa b’49 % tal-approprjazzjonijiet ta’ impenn; jirrikonoxxi, madankollu, li dan ma seħħx minħabba dewmien fl-implimentazzjoni tal-programm ta’ ħidma annwali tal-Aġenzija u li dan il-livell baxx jirrifletti n-natura pluriennali tal-attivitajiet; jinnota li l-Aġenzija adottat modulu ta’ ppjanar baġitarju li hu direttament marbut mal-programm ta’ ħidma annwali tagħha u li l-pagamenti kienu ppjanati u mwettqa skont il-ħtiġijiet operazzjonali u li l-Qorti tal-Awdituri tqis tali sitwazzjonijiet bħala aċċettabbli;

5.

Jirrikonoxxi li l-eżerċizzju ta’ awditjar annwali tal-Qorti tal-Awdituri ma sab l-ebda kwistjoni notevoli fir-rigward tal-livell ta’ riporti fl-2012; ifaħħar lill-Aġenzija talli mxiet mal-prinċipju tal-annwalità u għall-eżekuzzjoni puntwali tal-baġit tagħha;

6.

Jinnota b’sodisfazzjon li, skont ir-rapport annwali tal-attività, kif ukoll skont ir-riżultati tal-eżerċizzji ta’ awditjar li għamlet il-Qorti tal-Awdituri, il-livell u n-natura tat-trasferimenti fl-2012 baqgħu fil-limiti tar-regoli finanzjarji; ifaħħar lill-Aġenzija għall-ippjanar baġitarju tajjeb tagħha;

7.

Jinnota li, għas-sena 2012, la t-tranżazzjonijiet li ttieħed kampjun tagħhom u lanqas is-sejbiet l-oħra tal-eżerċizzju ta’ awditjar ma wasslu għal xi kumment dwar il-proċeduri ta’ akkwist tal-Uffiċċju fir-rapport tal-awditjar annwali tal-Qorti tal-Awdituri;

8.

Jinnota li l-Qorti tal-Awdituri ma għamlet l-ebda kumment fir-rapport tal-awditjar annwali tagħha għall-2012 fir-rigward tal-proċeduri ta’ reklutaġġ tal-Uffiċċju;

9.

Jirrikonoxxi li l-Aġenzija se teżamina mill-ġdid il-politika tagħha dwar il-prevenzjoni u l-ġestjoni tal-kunflitti ta’ interessi abbażi tal-Linji Gwida tal-Kummissjoni dwar il-Prevenzjoni u l-Ġestjoni tal-Kunflitti ta’ Interessi fl-Aġenziji Deċentralizzati tal-UE; jappella lill-Aġenzija biex tinforma lill-awtorità ta’ kwittanza dwar ir-riżultati tal-valutazzjoni ladarba jkunu disponibbli;

10.

Jirrikonoxxi mill-Aġenzija li, fl-2012, is-Servizz tal-Awditjar Intern (IAS) tal-Kummissjoni wettaq awditjar dwar proċeduri ta’ akkwist fl-Aġenzija u għamel żewġ rakkomandazzjonijiet ferm importanti u sebgħa rakkomandazzjonijiet oħra importanti; jinnotal li l-Aġenzija pproponiet pjan ta’ azzjoni li kien aċċettat mill-IAS u li sad-data ta’ limitu tal-31 ta’ Diċembru 2012, tmienja minn dawk ir-rakkomandazzjonijiet kienu ngħalqu; jinnota li rakkomandazzjoni waħda importanti li kien fadal ingħalqet fl-2013;

11.

Jinnota bi tħassib li l-Aġenzija ma kelliex proċedura ta’ verifika ex post fis-seħħ matul l-2012; jinsab sodisfatt li wara analiżi komprensiva tar-riskju mwettqa mill-Aġenzija, kienet implimentata proċedura formali fil-bidu tal-2013;

12.

Jitlob li l-Aġenzija tikkomunika r-riżultati u l-impatt li l-ħidma tagħha għandha fuq iċ-ċittadini Ewropej b’mod aċċessibbli, prinċipalment permezz tas-sit tal-Internet tagħha;

13.

Jirreferi, fir-rigward tal-kummenti l-oħrajn li jakkumpanjaw id-deċiżjoni tiegħu dwar il-kwittanza, li huma ta’ natura orizzontali, għar-riżoluzzjoni tiegħu tat-3 ta’ April 2014 (7) dwar il-prestazzjoni, il-ġestjoni finanzjarja u l-kontroll tal-aġenziji.