This document is an excerpt from the EUR-Lex website
Document 52013TA1213(13)
Report on the annual accounts of the European Centre for Disease Prevention and Control for the financial year 2012, together with the Centre’s replies
Rapport dwar il-kontijiet annwali taċ-Ċentru Ewropew għall-Prevenzjoni u l-Kontroll tal-Mard għas-sena finanzjarja 2012, flimkien mar-risposti taċ-Ċentru
Rapport dwar il-kontijiet annwali taċ-Ċentru Ewropew għall-Prevenzjoni u l-Kontroll tal-Mard għas-sena finanzjarja 2012, flimkien mar-risposti taċ-Ċentru
ĠU C 365, 13.12.2013, p. 89–96
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
13.12.2013 |
MT |
Il-Ġurnal Uffiċjali tal-Unjoni Ewropea |
C 365/89 |
RAPPORT
dwar il-kontijiet annwali taċ-Ċentru Ewropew għall-Prevenzjoni u l-Kontroll tal-Mard għas-sena finanzjarja 2012, flimkien mar-risposti taċ-Ċentru
2013/C 365/13
INTRODUZZJONI
1. |
Iċ-Ċentru Ewropew għall-Prevenzjoni u l-Kontroll tal-Mard (minn hawn ’il quddiem “iċ-Ċentru”, magħruf ukoll bħala l-“ECDC”), li jinsab fi Stokkolma, ġie stabbilit bir-Regolament (KE) Nru 851/2004 tal-Parlament Ewropew u tal-Kunsill (1). Il-kompiti prinċipali taċ-Ċentru huma li jiġbor u jxerred data dwar il-prevenzjoni u l-kontroll tal-mard tal-bniedem u li jagħti opinjonijiet xjentifiċi dwar dan is-suġġett. Huwa meħtieġ ukoll jikkoordina n-netwerk Ewropew tal-korpi li joperaw f’dan il-qasam (2). |
INFORMAZZJONI LI TAPPOĠĠA D-DIKJARAZZJONI TA’ ASSIGURAZZJONI
2. |
L-approċċ tal-awditjar meħud mill-Qorti jinkludi proċeduri analitiċi tal-awditjar, ittestjar dirett tat-tranżazzjonijiet u valutazzjoni tal-kontrolli ewlenin tas-sistemi ta’ sorveljanza u kontroll taċ-Ċentru. Dan huwa ssupplimentat b’evidenza pprovduta mix-xogħol ta’ awdituri oħrajn (fejn rilevanti) u analiżi tar-rappreżentazzjonijiet tal-maniġment. |
DIKJARAZZJONI TA’ ASSIGURAZZJONI
3. |
Skont id-dispożizzjonijiet tal-Artikolu 287 tat-Trattat dwar il-Funzjonament tal-Unjoni Ewropea (TFUE), il-Qorti awditjat:
|
Ir-responsabbiltà tal-maniġment
4. |
Skont l-Artikoli 33 u 43 tar-Regolament tal-Kummissjoni (KE, Euratom) Nru 2343/2002 (5), il-maniġment huwa responsabbli mit-tħejjija u l-preżentazzjoni ġusta tal-kontijiet annwali taċ-Ċentru u mil-legalità u r-regolarità tat-tranżazzjonijiet ta’ bażi:
|
Ir-responsabbiltà tal-awditur
5. |
Ir-responsabbiltà tal-Qorti hija li, fuq il-bażi tal-awditu tagħha, tipprovdi lill-Parlament Ewropew u lill-Kunsill (7) b’dikjarazzjoni ta' assigurazzjoni dwar l-affidabbiltà tal-kontijiet annwali u dwar il-legalità u r-regolarità tat-tranżazzjonijiet ta’ bażi. Il-Qorti tmexxi l-awditu tagħha skont l-Istandards Internazzjonali tal-Awditjar u l-Kodiċijiet tal-Etika tal-IFAC u l-Istandards Internazzjonali tal-Istituzzjonijiet Supremi tal-Awditjar tal-INTOSAI. Dawn l-istandards jeżiġu li l-Qorti tippjana u twettaq l-awditu biex tikseb aċċertament raġonevoli dwar jekk il-kontijiet annwali taċ-Ċentru jkunux ħielsa minn kwalunkwe dikjarazzjoni skorretta materjali u dwar jekk it-tranżazzjonijiet li fuqhom huma bbażati jkunux legali u regolari. |
6. |
L-awditu jinvolvi t-twettiq ta' proċeduri biex tinkiseb evidenza għall-awditjar dwar l-ammonti u d-divulgazzjonijiet fil-kontijiet u dwar il-legalità u r-regolarità tat-tranżazzjonijiet ta’ bażi. Il-proċeduri magħżula jiddependu fuq il-ġudizzju tal-awditur, li huwa bbażat fuq valutazzjoni tar-riskji ta’ dikjarazzjoni skorretta materjali tal-kontijiet u ta’ nuqqas ta’ konformità materjali mit-tranżazzjonijiet ta’ bażi mar-rekwiżiti fil-qafas legali tal-Unjoni Ewropea, sew jekk minħabba frodi u sew jekk minħabba xi żball. Meta jivvaluta dawn ir-riskji, l-awditur iqis kwalunkwe kontroll intern rilevanti għat-tħejjija u l-preżentazzjoni ġusta tal-kontijiet, kif ukoll is-sistemi ta’ sorveljanza u kontroll li jkunu implimentati biex jiġu żgurati l-legalità u r-regolarità tat-tranżazzjonijiet ta’ bażi, u jfassal proċeduri tal-awditjar li jkunu xierqa skont iċ-ċirkustanzi. L-awditu jinvolvi wkoll l-evalwazzjoni tal-adegwatezza tal-politiki kontabilistiċi, ir-raġonevolezza tal-istimi kontabilistiċi u l-preżentazzjoni kumplessiva tal-kontijiet. |
7. |
Il-Qorti tqis li l-evidenza għall-awditjar miksuba hija suffiċjenti u xierqa biex tipprovdi bażi għad-dikjarazzjoni ta’ assigurazzjoni tagħha. |
Opinjoni dwar l-affidabbiltà tal-kontijiet
8. |
Fl-opinjoni tal-Qorti, il-kontijiet annwali taċ-Ċentru jippreżentaw b’mod ġust, fl-aspetti materjali kollha, il-pożizzjoni finanzjarja tiegħu fil-31 ta’ Diċembru 2012 u r-riżultati tal-operazzjonijiet tiegħu u l-flussi tal-flus tiegħu għas-sena li ntemmet dakinhar, skont id-dispożizzjonijiet tar-Regolament Finanzjarju tiegħu u r-regoli kontabilistiċi adottati mill-uffiċjal tal-kontabbiltà tal-Kummissjoni. |
Opinjoni dwar il-legalità u r-regolarità tat-tranżazzjonijiet li fuqhom huma bbażati l-kontijiet
9. |
Fl-opinjoni tal-Qorti, it-tranżazzjonijiet li fuqhom huma bbażati l-kontijiet annwali għas-sena li ntemmet fil-31 ta’ Diċembru 2012 huma legali u regolari fl-aspetti materjali kollha. |
10. |
Il-kummenti li ġejjin ma jixħtux dubju fuq l-opinjonijiet tal-Qorti. |
KUMMENTI DWAR IL-LEGALITÀ U R-REGOLARITÀ TAT-TRANŻAZZJONIJIET
11. |
L-opinjoni dwar il-legalità u r-regolarità tat-tranżazzjonijiet taċ-Ċentru kienet kwalifikata għas-sena 2011 minħabba li ċ-Ċentru ma rrispettax l-ammont massimu ta’ kuntratt qafas mill-2009. Skont dan il-kuntratt qafas, iċ-Ċentru seta’ jiffirma kuntratti speċifiċi ma’ fornituri magħżula sa ammont massimu ta’ EUR 9 miljun. Madankollu sa tmiem l-2011, kienu saru pagamenti ta’ EUR 12,2 miljun. |
12. |
Sabiex jixtri servizzi essenzjali għat-tkomplija tal-proġett relatat, iċ-Ċentru fl-2012 ikkonkluda kuntratti speċifiċi addizzjonali għal ammont ta’ EUR 2,5 miljun. Flimkien mal-pagamenti ta’ EUR 2,7 miljun li saru fl-2012 għal kuntratti ffirmati diġà fl-2011, il-pagamenti li saru ammontaw għal total ta’ EUR 17,4 miljun sa tmiem l-2012. Filwaqt li pagamenti ’l fuq mil-limitu massimu ta’ EUR 9 miljun stabbilit fil-kuntratt qafas huma irregolari, iċ-Ċentru ħa azzjoni korrettiva fl-2012 u ffirma kuntratt qafas ta’ sostituzzjoni f’Ġunju 2012 (mhumiex se jsiru aktar pagamenti taħt il-kuntratt qadim) u tejjeb il-monitoraġġ tal-konsum ta’ kuntratti qafas inġenerali. |
13. |
Fl-2012 pagamenti li jammontaw għal EUR 5,2 miljun jirriżultaw minn nuqqasijiet fis-snin preċedenti meta l-limitu massimu tal-kuntratt qafas ma ġiex osservat. Dawn jirrelataw ma’ obbligi kuntrattwali li rriżultaw minn snin preċedenti (EUR 2,7 miljun) jew saru fl-2012 għal raġunijiet ta’ kontinwità tan-negozju (EUR 2,5 miljun) sal-finalizzazzjoni tal-proċedura ta’ akkwist għall-kuntratt qafas ġdid. Meta wieħed iqis l-azzjoni korrettiva meħuda miċ-Ċentru fl-2012, il-Qorti ma kkwalifikatx l-opinjoni dwar il-legalità u r-regolarità tat-tranżazzjonijiet din is-sena. |
KUMMENTI DWAR IL-KONTROLLI INTERNI
14. |
Fl-2012, iċ-Ċentru ta għotjiet lil istituzzjonijiet li jwettqu r-riċerka u individwi. In-nefqa totali tal-għotjiet ammontat għal EUR 752 000, li tirrappreżenta 1,4 % tan-nefqa operattiva 2012. Il-verifikazzjonijiet ex ante taċ-Ċentru qabel ir-rimborż tal-ispejjeż ikklejmjati mill-benefiċjarji jikkonsistu minn analiżi fl-uffiċċju tal-klejms tal-ispejjeż u parzjalment ukoll minn ċertifikati tal-awditjar maħruġa minn ditti indipendenti tal-awditjar ikkuntrattati mill-benefiċjarji. Iċ-Ċentru normalment ma jottjeni ebda dokument mill-benefiċjarji biex jissostanzja l-eliġibbiltà u l-preċiżjoni tal-ispejjeż ikklejmjati. Sabiex isaħħaħ il-kontrolli, iċ-Ċentru adotta strateġija ta’ verifikazzjoni ex post u ppjana għall-implimentazzjoni tagħha fl-2012. Madankollu, huwa esperjenza dewmien ta’ 10 xhur biex jikseb aċċess għal kuntratt tal-awditjar interistituzzjonali u, fiż-żmien tal-awditu, kienet għadha ma saret ebda verifikazzjoni ex post tan-nefqa tal-għotjiet fl-2012. Għat-tranżazzjonijiet awditjati mill-Qorti, inkisbet dokumentazzjoni ta’ sostenn miċ-Ċentru f’isem il-Qorti u din ipprovdiet aċċertament raġonevoli dwar il-legalità u r-regolarità tagħhom. |
KUMMENTI DWAR IL-ĠESTJONI BAĠITARJA
15. |
L-implimentazzjoni tar-rati tal-baġit kienu sodisfaċenti għat-Titolu I (nefqa tal-persunal) u għat-Titolu II (nefqa amministrattiva) b’97 % u 80 % tal-approprjazzjonijiet impenjati rispettivament. Filwaqt li l-livell ta’ ammonti riportati relatat mat-Titolu III huwa għoli f’livell ta’ EUR 8,3 miljun (41 % tal-approprjazzjonijiet impenjati tat-Titolu III), dan ma seħħx minħabba d-dewmien fl-implimentazzjoni tal-Programm ta’ Ħidma Annwali taċ-Ċentru, imma jirrifletti n-natura pluriennali tal-attivitajiet. Iċ-Ċentru adotta modulu ta’ ppjanar baġitarju li huwa marbut direttament mal-Programm ta’ Hidma Annwali tiegħu u l-pagamenti ġew ippjanati u magħmula skont il-bżonnijiet operazzjonali. |
SEGWITU GĦALL-KUMMENTI MIS-SENA PREĊEDENTI
16. |
Ħarsa ġenerali lejn l-azzjonijiet korrettivi li ttieħdu b’rispons għall-kumenti tal-Qorti mis-sena preċedenti tingħata fl-Anness I. |
Dan ir-Rapport ġie adottat mill-Awla IV, immexxija minn Dr Louis GALEA, Membru tal-Qorti tal-Awdituri, fil-Lussemburgu fil-laqgħa tagħha tal-10 ta’ Settembru 2013.
Għall-Qorti tal-Awdituri
Vítor Manuel da SILVA CALDEIRA
President
(1) ĠU L 142, 30.4.2004, p. 1.
(2) L-Anness II jagħti sommarju tal-kompetenzi u l-attivitajiet taċ-Ċentru. Huwa ppreżentat għal skopijiet ta’ informazzjoni.
(3) Dawn jinkludu l-karta tal-bilanċ u l-kont tar-riżultat ekonomiku, it-tabella tal-flussi tal-flus, ir-rapport tat-tibdil fl-assi netti u sommarju tal-politiki kontabilistiċi sinifikanti u noti oħra ta’ spjegazzjoni.
(4) Dawn jinkludu l-kont tar-riżultat baġitarju u l-anness għall-kont tar-riżultat baġitarju.
(5) ĠU L 357, 31.12.2002, p. 72.
(6) Ir-regoli kontabilistiċi adottati mill-uffiċjal tal-kontabbiltà tal-Kummissjoni ġejjin mill-Istandards Internazzjonali tal-Kontabbiltà għas-Settur Pubbliku (IPSAS) maħruġa mill-Federazzjoni Internazzjonali tal-Kontabilisti jew, fejn rilevanti, l-Istandards Internazzjonali tal-Kontabbiltà (IAS)/l-Istandards Internazzjonali tar-Rappurtar Finanzjarju (IFRS) maħruġa mill-Bord dwar l-Istandards Internazzjonali tal-Kontabbiltà.
(7) L-Artikolu 185(2) tar-Regolament tal-Kunsill (KE, Euratom) Nru 1605/2002 (ĠU L 248, 16.9.2002, p. 1).
ANNESS I
Segwitu għall-kummenti mis-sena preċedenti
Sena |
Kumment tal-Qorti |
Status tal-azzjoni korrettiva (Ikkompletata / Għadha għaddejja / Pendenti / M/A) |
2011 |
Bħal fis-sena ta’ qabel, livell għoli ta’ ammonti riportati huwa rrappurtat għall-2011. Dan il-livell għoli ta’ ammonti riportati, flimkien ma’ livell baxx ta’ nfiq dovut (EUR 5,4 miljun), imur kontra l-prinċipju baġitarju tal-annwalità. |
Ikkompletata |
2011 |
Fil-paragrafu 10 hemm irrappurtati irregolaritajiet fil-ġestjoni ta’ kuntratt qafas wieħed, u dawn wasslu għal opinjoni kwalifikata dwar il-legalità u r-regolarità tat-tranżazzjonijiet li fuqhom huma bbażati l-kontijiet. Il-Qorti sabet każijiet addizzjonali fejn il-kontrolli taċ-Ċentru ma pprevenewx il-ġestjoni fqira tal-kuntratti. |
Ikkompletata |
2011 |
F’każ minnhom, taħt kuntratt qafas multiplu, ġie emendat kuntratt speċifiku miċ-Ċentru fl-2010 u għal darb’oħra fl-2011. L-emendi kienu koperti mill-kundizzjonijiet tal-kuntratt qafas, iżda ma kkonformawx mar-Regoli ta’ Implimentazzjoni taċ-Ċentru għar-Regolament Finanzjarju tiegħu. L-emendi kienu relatati mat-tul u ż-żidiet kemm fis-servizzi kif ukoll fl-ammonti ta’ kuntratti. Pagamenti li jeċċedu l-valur tal-kuntratt oriġinali ammontaw għal EUR 0,2 miljun. |
Ikkompletata |
2011 |
Għal kuntratt qafas ieħor konkluż għal ammont massimu ta’ EUR 1,7 miljun, l-erba’ kuntratti speċifiċi ffirmati fl-2011 li kienu qegħdin jimplimentawh ma għamlu l-ebda referenza għall-volum jew għall-valur ta’ servizzi li għandhom jingħataw. Fl-2011 il-pagamenti relatati ma’ dawn il-kuntratti speċifiċi ammontaw għal EUR 0,06 miljun. Il-kuntratt qafas innifsu kellu tul massimu eċċessiv ta’ tmien snin u ċ-Ċentru naqas milli joħloq rabta ċara bejn l-ispeċifikazzjonijiet tekniċi, il-kriterji ta’ għotja u l-istruttura tal-ipprezzar kif imniżżla fid-dokumenti tal-offerta mibgħuta lill-fornituri għall-akkwist tas-servizzi kuntrattati. |
Ikkompletata |
2011 |
Ftehim wieħed ta’ għotja għal ammont ta’ EUR 0,2 miljun ġie ffirmat fl-2011 aktar minn erba’ xhur wara li kienu bdew l-attivitajiet. Attivitajiet imwettqa u nfiq imġarrab qabel l-iffirmar tal-ftehim ta’ għotja huma ineliġibbli. |
Ikkompletata |
2011 |
Bħal fis-sena ta’ qabel, il-Qorti identifikat dgħufijiet fir-rigward tal-proċeduri tar-reklutaġġ tal-persunal. Ma kien hemm l-ebda evidenza li l-mistoqsijiet għat-testijiet bil-mitkub u l-intervisti u l-ponderazzjonijiet tagħhom kienu ġew stabbiliti qabel l-eżami tal-applikazzjonjiet. Il-kriterji tal-għażla parzjalment ma kinux ġew iċċekkjati u nbidlu r-rekwiżiti tal-eliġibbiltà fl-istadju tal-valutazzjoni. |
Ikkompletata |
ANNESS II
Ċentru Ewropew għall-Prevenzjoni u l-Kontroll tal-Mard (Stokkolma)
Kompetenzi u attivitajiet
Oqsma ta’ kompetenza tal-Unjoni stipulati fit-Trattat (L-Artikolu 168 tat-Trattat dwar il-Funzjonament tal-Unjoni Ewropea) |
|
||||||||||||||
Kompetenzi taċ-Ċentru (Ir-Regolament (KE) Nru 851/2004 tal-Parlament Ewropew u tal-Kunsill) |
Objettivi
Kompiti
|
||||||||||||||
Tmexxija |
Bord tal-Amministrazzjoni Kompożizzjoni Membru nnominat minn kull Stat Membru, żewġ membri nnominati mill-Parlament Ewropew u tliet rappreżentanti tal-Kummissjoni. Kompiti Il-Bord jadotta l-programm annwali u l-baġit taċ-Ċentru u jimmonitorja l-implimentazzjoni tagħhom. Direttur Maħtur mill-Bord tal-Amministrazzjoni fuq il-bażi ta’ lista ta’ kandidati proposti mill-Kummissjoni. Forum Konsultattiv Kompożizzjoni Rappreżentant ta’ kull Stat Membru u tliet rappreżentanti tal-Kummissjoni mingħajr id-dritt għall-vot. Kompiti Il-Forum għandu jiżgura l-eċċellenza xjentifika tax-xogħol u l-indipendenza tal-attivitajiet u l-opinjonijiet taċ-Ċentru. Awditu estern Il-Qorti Ewropea tal-Awdituri. Awditu intern Is-servizz tal-Awditjar Intern tal-Kummissjoni Ewropea (IAS). Awtorità ta' kwittanza Il-Parlament Ewropew, li jaġixxi fuq rakkomandazzjoni mill-Kunsill. |
||||||||||||||
Riżorsi disponibbli għaċ-Ċentru fl-2012 (2011) |
Baġit Finali EUR 58,2 (56,6) miljun Persunal fil-31 ta' Diċembru 2012 Postijiet awtorizzati: 200 (200) Postijiet okkupati: 187 (177) Postijiet oħra: 91 (88) Total: 278 (265), assenjati għad-dmirijiet li ġejjin:
|
||||||||||||||
Prodotti u servizzi fl-2012 (2011) |
69 (64) theddida identifikata u monitorjata permezz tal-Għodda tat-Traċċar tat-Theddid (Threat Tracking Tool) (TTT). 52 (52) rapport ta’ theddid kull ġimgħa dwar mard trasmissibbli, mibgħut lil 334 (331) riċevitur. Barra minn hekk, mill-2012 ’il hawn, ir-rapport huwa disponibbli wkoll fuq il-websajt tal-ECDC kull ġimgħa. Għoti ta’ appoġġ lill-intelliġenza dwar l-epidemiji għal 3 (3) avvenimenti kbar li jiġbdu l-massa. Barra minn dan, 3 (5) avvenimenti ta’ natura eċċezzjonali/importanza pubblika ġew monitorjati wkoll. Tħejjija ta’ 6 valutazzjonijiet tar-riskju, 16-il (17-il) valutazzjoni rapida tar-riskju ġdida u 16-il (11-il) aġġornament dwar il-valutazzjonijiet rapidi tar-riskju. 1 (2) sessjonijiet ta’ ħidma ta’ eżerċizzju ta' simulazzjoni mwettqa għall-ittestjar u t-titjib tat-tħejjija u t-tweġiba għal mard trasmissibbli. 94 (98) sieħeb imħarreġ skont il-Programm Ewropew dwar it-Taħriġ dwar Interventi Epidemjoloġiċi (EPIET). 10 (8) imsieħba mħarrġa fit-Taħriġ Ewropew dwar il-Mikrobijoloġija tas-Saħħa Pubblika (EUPHEM). 114-il (181) espert dwar is-saħħa pubblika minn 30 pajjiż tal-UE-ŻEE pparteċipaw f’moduli qosra ta’ taħriġ taċ-Ċentru. 780 000(500 000) viżitatur fuq il-portal tal-web taċ-Ċentru. 240 (122) pubblikazzjoni xjentifika ppubblikati. Fifth European Antibiotic Awareness Day (Il-Ħames Ġurnata Ewropea fuq Sensibilizzazzjoni dwar l-Antibijotiċi) organizzata bil-parteċipazzjoni ta’ 43 (37) pajjiż; bi sforz għal turija ta’ solidarjetà globali, il-Ġimgħa tal-Istati Uniti “Get Smart About Antibiotics” (Ikseb Intelliġenza dwar l-Antibijotiċi), l-inizjattiva Kanadiża “AntibioticAwareness.ca” (Sensibilizzazzjoni dwar l-Antibijotiċi.ca) u l-Australian Antibiotic Awareness Week (il-Ġimgħa Awstrajlana fuq is-Sensibilizzazzjoni dwar l-Antibijotiċi) ġew varati wkoll matul l-istess ġimgħa. 13-il (11,2-il) miljun rekord uniku fid-databases ta’ TESSy; 1 324(845) utent attiv minn 56 (53) pajjiż. Sorveljanza mtejba; integrazzjoni fiċ-Ċentru ta’ 15 (15) mis-17-il netwerk tas-sorveljanza ddedikata fi tmiem l-2011; (wieħed ma tkompliex u l-ieħor ġie mogħti ’l barra). Pubblikazzjoni tar-Rapport Annwali dwar l-Epidemjoloġija. Pubblikazzjoni tar-rapporti annwali dwar it-Tuberkulosi, l-HIV/AIDS u kontra l-mikrobijoreżistenza. 40 (32) bullettin ta’ kull ġimgħa dwar l-influwenza/deskrizzjonijiet ġeneriċi ta' kull ġimgħa lejn is-sorveljanza tal-influwenza għall-2012. 34 (27) opinjoni xjentifika prodotti, ibbażati fuq talbiet ta’ partijiet interessati. Organizzazzjoni tas-sitt Konferenza Ewropea Xjentifika dwar l-Epidemjoloġija tal-Mard Li Jittieħed Applikat (European Scientific Conference on Applied Infectious Disease Epidemiology) (ESCAIDE) bejn l-24 u s-26 ta’ Ottubru 2012 fi Edinburgh, b’511-il (500) parteċipant. Organizzazzjoni tal-ewwel konferenza tal-vaċċin Ewropew (Eurovaccine.net) b’200 parteċipant. Pubblikazzjoni kull ġimgħa tal-ġurnal xjentifiku Eurosurveillance, b’14 000(13 302) abbonat online. L-Eurosurveillance rċieva l-ewwel fattur tal-impatt tiegħu. Iċ-ċifra impressjonanti ta’ 6,15 ġiet mogħtija għas-sena 2011. Din tqiegħed lill-Eurosurveillance fi klassifikazzjoni 6 fost is-70 ġurnal fil-kategorija ta’ Mard Infezzjuż madwar id-dinja kollha. |
||||||||||||||
Sors: Informazzjoni mogħtija miċ-Ċentru. |
IT-TWEĠIBIET TAĊ-ĊENTRU
11–13. |
Iċ-Ċentru sar konxju ta’ dan il-każ f’Settembru 2011 u ressqu għall-attenzjoni tal-Qorti tal-Awdituri matul l-awditu tagħhom f’Ottubru 2011. Iċ-Ċentru eżerċita trasparenza totali dwar din il-kwistjoni biex ifittex gwida u parir mill-Qorti tal-Awdituri. Wara d-diskussjonijiet dak iż-żmien, iċ-Ċentru kien stabbilixxa l-miżuri kollha meħtieġa: tnedija minnufih ta’ sejħa għal offerti ġdida biex jiġi stabbilit Kuntratt Qafas ġdid (FWC) u reġistrazzjoni ta’ eċċezzjoni. F’Diċembru 2011, flimkien mat-tweġiba taċ-Ċentru għal din is-sejba preliminari, inkluda, informazzjoni dettaljata relatata mal-volumi tal-kuntratt li għandhom jiġu ffirmati xorta taħt l-FWC attwali sabiex jiżgura l-kontinwità tan-negozju tiegħu, skeda taż-żmien għall-FWC l-ġdid u l-miżuri stabbiliti biex fil-futur dan jiġi evitat bħall-ġestjoni tal-FWC l-ġdid minn Uffiċjal tal-Awtorizzazzjoni wieħed u l-konsum tiegħu minn Uffiċjal tar-Riżorsi wieħed. Iċ-Ċentru jenfasizza li ma ntilef l-ebda fond u l-ebda parti ma ġiet żvantaġġata. |
14. |
Il-Politika tal-ECDC dwar il-Verifika tal-Għotjiet waslet biex tiġi riveduta f’Lulju 2013. Il-politika riveduta ser tikkunsidra l-osservazzjonijiet magħmula mill-Qorti Ewropea tal-Awdituri. Il-verifiki kollha tal-infiq tal-għotjiet ippjanati għall-2012 minflok ser isiru fl-2013, flimkien mal-verifiki magħżula għal din is-sena. Għaldaqstant, in-nuqqas ta’ disponibbiltà tal-kuntratt qafas interistituzzjonali għall-awditi mhuwa ser iwassal għall-ebda tnaqqis fil-kontrolli li jsiru. |
15. |
Il-kumment tal-Qorti jintlaqa’ b’sodisfazzjon peress li jikkonferma n-natura pluriennali tal-biċċa l-kbira tal-attività operattiva taċ-Ċentru. |