This document is an excerpt from the EUR-Lex website
Document 52013TA0110(02)
Report on the annual accounts of the Clean Sky Joint Undertaking for the financial year 2011, together with the replies of the Joint Undertaking
Rapport dwar il-kontijiet annwali tal-Impriża Konġunta Clean Sky għas-sena finanzjarja 2011 flimkien mar-risposti tal-Impriża Konġunta
Rapport dwar il-kontijiet annwali tal-Impriża Konġunta Clean Sky għas-sena finanzjarja 2011 flimkien mar-risposti tal-Impriża Konġunta
ĠU C 6, 10.1.2013, p. 9–17
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
10.1.2013 |
MT |
Il-Ġurnal Uffiċjali tal-Unjoni Ewropea |
C 6/9 |
RAPPORT
dwar il-kontijiet annwali tal-Impriża Konġunta Clean Sky għas-sena finanzjarja 2011 flimkien mar-risposti tal-Impriża Konġunta
2013/C 6/02
INTRODUZZJONI
1. |
L-Impriża Konġunta Clean Sky, li tinsab fi Brussell, ġiet stabbilita f’Diċembru 2007 (1) għal perjodu ta’ 10 snin. |
2. |
L-objettiv tal-Impriża Konġunta Clean Sky huwa li taċċelera l-iżvilupp, il-validazzjoni u d-dimostrazzjoni ta’ teknoloġiji nodfa għat-trasport bl-ajru fl-UE għall użu mill-aktar fis possibbli (2). L-attivitajiet ta’ riċerka koordinati mill-Impriża Konġunta huma maqsumin f’sitt oqsma teknoloġiċi jew ‘Dimostraturi tat-Teknoloġija Integrata’ (ITDs). |
3. |
Il-Membri Fundaturi tal-Impriża Konġunta huma l-Unjoni Ewropea rrappreżentata mill-Kummissjoni, u msieħba industrijali bħala l-mexxejja tal-ITDs, flimkien mal-membri assoċjati tal-ITDs. |
4. |
Il-kontribuzzjoni massima tal-UE lill-Impriża Konġunta Clean Sky biex tkopri l-ispejjeż operazzjonali u l-attivitajiet ta’ riċerka hi ta’ EUR 800 miljun li għandhom jitħallsu mill-baġit tas-Seba’ Programm Kwadru (3). Membri oħrajn tal-Impriża Konġunta għandhom jikkontribwixxu riżorsi li minn tal-inqas huma ugwali għall-kontribuzzjoni tal-UE, inklużi kontributi in natura. |
5. |
L-Impriża Konġunta bdiet taħdem b’mod awtonomu fis-16 ta’ Novembru 2009. |
INFORMAZZJONI LI TAPPOĠĠA D-DIKJARAZZJONI TA’ ASSIGURAZZJONI
6. |
L-approċċ tal-verifika meħud mill-Qorti fih proċeduri tal-verifika analitiċi, ittestjar tat-tranżazzjonijiet fil-livell tal-Impriża Konġunta u valutazzjoni tal-kontrolli ewlenin tas-sistemi ta’ sorveljanza u kontroll. Dan huwa supplimentat b’evidenza pprovduta mix-xogħol ta’ awdituri oħrajn (fejn huwa relevanti) u analiżi tar-rappreżentazzjonijiet tal-maniġment. |
ID-DIKJARAZZJONI TA’ ASSIGURAZZJONI
7. |
Skont id-dispożizzjonijiet tal-Artikolu 287(1) tat-Trattat dwar il-Funzjonament tal-Unjoni Ewropea, il-Qorti vverifikat il-kontijiet annwali (4) tal-Impriża Konġunta Clean Sky, li jikkonsistu fir-“rapporti finanzjarji” (5) u fir-“rapporti dwar l-implimentazzjoni tal-baġit” (6) għas-sena finanzjarja li ntemmet fil-31 ta’ Diċembru 2011, u l-legalità u r-regolarità tat-tranżazzjonijiet li fuqhom huma bbażati dawk il-kontijiet. |
8. |
Din id-Dikjarazzjoni ta’ Assigurazzjoni hija indirizzata lill-Parlament Ewropew u lill-Kunsill skont l-Artikolu 185(2) tar-Regolament tal-Kunsill (KE, Euratom) Nru 1605/2002 (7). |
Ir-responsabbiltà tal-Maniġment
9. |
Bħala uffiċjal li jawtorizza, id-Direttur jimplimenta d-dħul u l-infiq tal-baġit skont ir-regoli finanzjarji tal-Impriża Konġunta, fuq ir-responsabbiltà tiegħu stess u fil-limiti tal-approprjazzjonijiet awtorizzati (8). Id-Direttur huwa responsabbli milli jistabbilixxi (9) l-istruttura organizzattiva u s-sistemi u l-proċeduri ta’ ġestjoni u ta’ kontroll interni relevanti għat-tħejjija ta’ kontijiet finali (10) li jkunu ħielsa minn dikjarazzjoni skorretta materjali, sew jekk minħabba fi frodi u sew jekk minħabba xi żball, u biex jiżgura li t-tranżazzjonijiet li fuqhom huma bbażati dawk il-kontijiet huma legali u regolari. |
Ir-responsabbiltà tal-Awditur
10. |
Ir-responsabbiltà tal-Qorti hija li tipprovdi, abbażi tal-verifika tagħha, dikjarazzjoni ta’ assigurazzjoni dwar l-affidabbiltà tal-kontijiet annwali tal-Impriża Konġunta u dwar il-legalità u r-regolarità tat-tranżazzjonijiet li fuqhom huma bbażati. |
11. |
Il-Qorti mexxiet l-awditu (verifika) tagħha skont l-Istandards Internazzjonali tal-Awditjar (Verifika) u l-Kodiċijiet tal-Etika tal-IFAC u l-ISSAI (11). Dawn l-istandards jeżiġu li l-Qorti tikkonforma mar-rekwiżiti etiċi u professjonali u li tippjana u twettaq l-awditu (verifika) sabiex tikseb aċċertament (assigurazzjoni) raġonevoli dwar jekk il-kontijiet ikunux ħielsa minn kwalunkwe dikjarazzjoni skorretta materjali u dwar jekk it-tranżazzjonijiet li fuqhom huma bbażati jkunux legali u regolari. |
12. |
L-awditu (verifika) tal-Qorti tinvolvi t-twettiq ta’ proċeduri biex tinkiseb evidenza għall-awditjar (verifika) dwar l-ammonti u d-divulgazzjonijiet (żvelar) fil-kontijiet u dwar il-legalità u r-regolarità tat-tranżazzjonijiet li fuqhom huma bbażati. Il-proċeduri magħżula, inkluża l-valutazzjoni tagħha tar-riskji ta’ dikjarazzjoni skorretta materjali tal-kontijiet jew ta’ tranżazzjonijiet illegali jew irregolari, sew jekk minħabba frodi u sew jekk minħabba xi żball, jiddependu fuq il-ġudizzju tagħha tal-awditu (verifika). Meta jsiru dawk il-valutazzjonijiet tar-riskji, jitqiesu l-kontrolli interni relevanti għat-tħejjija u l-preżentazzjoni tal-kontijiet mill-entità sabiex jitfasslu l-proċeduri tal-awditjar (verifika) li jkunu xierqa skont iċ-ċirkostanzi. L-awditu (verifika) tal-Qorti jinkludi wkoll evalwazzjoni tal-adegwatezza tal-politiki kontabilistiċi użati u r-raġonevolezza tal-istimi kontabilistiċi magħmula mill-maniġment, kif ukoll evalwazzjoni tal-preżentazzjoni kumplessiva tal-kontijiet. |
13. |
Il-Qorti tqis li l-evidenza għall-awditjar (verifika) miksuba hija suffiċjenti u adegwata biex tipprovdi bażi għall-opinjonijiet imniżżlin hawn taħt. |
Opinjoni dwar l-affidabbiltà tal-kontijiet
14. |
Fl-opinjoni tal-Qorti, il-kontijiet annwali tal-Impriża Konġunta jippreżentaw b’mod ġust, fl-aspetti materjali kollha, il-pożizzjoni finanzjarja tagħha fil-31 ta’ Diċembru 2011 u r-riżultati tal-operazzjonijiet tagħha u l-flussi tal-flus (likwidità) tagħha għas-sena li ntemmet dakinhar, skont id-dispożizzjoni tar-regoli finanzjarji tagħha. |
Bażi għal opinjoni kwalifikata dwar il-legalità u r-regolarità tat-tranżazzjonijiet li fuqhom huma bbażati l-kontijiet
15. |
L-istrateġija tal-verifika ex-post tal-Impriża Konġunta ġiet adottata b’deċiżjoni tal-Bord ta’ Tmexxija fis-17 ta’ Diċembru 2010 u hija kontroll ewlieni għall-valutazzjoni tal-legalità u r-regolarità tat-tranżazzjonijiet ta’ bażi (12). Il-verifiki ex-post ikkompletati f’Settembru 2012 koprew EUR 44,3 miljun (18,8 % tal-klejms tal-ispejjeż kollha li waslu għand l-Impriża Konġunta fl-2008, l-2009 u l-2010 (13)). Ir-rata ta’ żball li tirriżulta minn dawn il-verifiki ex-post kienet 6,16 % (14). |
Opinjoni kwalifikata dwar il-legalità u r-regolarità tat-tranżazzjonijiet li fuqhom huma bbażati l-kontijiet
16. |
Fl-opinjoni tal-Qorti, għajr għall-effetti tal-kwistjonijiet deskritti fil-paragrafu 15, it-tranżazzjonijiet li fuqhom huma bbażati l-kontijiet annwali tal-Impriża Konġunta għas-sena finanzjarja li ntemmet fil-31 ta’ Diċembru 2011 huma, legali u regolari fl-aspetti materjali kollha. |
17. |
Il-kummenti segwenti fil-paragrafi 18 sa 32 ma jixħtux dubju fuq l-opinjonijiet tal-Qorti. |
KUMMENTI DWAR IL-ĠESTJONI TAL-BAĠIT U DIK FINANZJARJA
Implimentazzjoni tal-baġit
18. |
Il-baġit emendatorju finali 2011 (15) kien jinkludi approprjazzjonijiet ta’ impenn ta’ EUR 175 miljun u approprjazzjonijiet ta’ pagament ta’ EUR 159,8 miljun. Ir-rata ta’ utilizzazzjoni għall-approprjazzjonijiet ta’ impenn kienet 94 % filwaqt li r-rata għal approprjazzjonijiet ta’ pagament kienet 64 %. Ir-rata għall-approprjazzjonijiet ta’ pagament tirrifletti dewmien fl-implimentazzjoni tal-attivitajiet tal-Impriża Konġunta. Hemm dewmien sinifikanti bejn il-pubblikazzjoni tas-sejħiet għall-proposti u l-firma tal-ftehimiet ta’ għotjiet (16). L-implimentazzjoni baxxa tal-baġit hija riflessa wkoll fil-bilanċ tal-flus, li kien ta’ EUR 51 miljun fi tmiem is-sena (32 % tal-approprjazzjonijiet ta’ pagament disponibbli fl-2011) (17). |
19. |
L-Impriża Konġunta, għal kuntrarju tar-regoli finanzjarji tagħha, irriportat ’il fuq minn EUR 68 miljun ta’ approprjazzjonijiet ta’ pagament għall-2012 mingħajr deċiżjoni mill-Bord ta’ Tmexxija (18). |
Preżentazzjoni tal-kontijiet
20. |
L-Impriża Konġunta esperjenzat dewmien sinifikanti fil-wasla tal-klejms tal-ispejjeż minn Ftehimiet tal-Għotjiet mal-Membri għall-2011. Minħabba fid-dewmien, il-validazzjoni ta’ għadd kbir ta’ klejms ma setgħux jiġu kkompletati għall-Kontijiet Finali 2011. Il-kontributi in natura relatati (EUR 52 miljun) ma ġewx approvati mill-Bord ta’ Tmexxija fi żmien xieraq u b’konsegwenza ta’ dan, ma setgħux jiġu rreġistrati taħt l-attivi netti u kellhom jiġu riflessi taħt il-passivi (“kontribuzzjonijiet li jridu jiġu vvalidati”). L-Impriża Konġunta għalhekk irrapportat attivi netti negattivi ta’ EUR 18,5 miljun. Il-Kontijiet Finali b’mod xieraq jirriflettu din is-sitwazzjoni tranżizzjonali li ma tindika ebda riskju ta’ solvenza għall-Imrpiża Konġunta. |
KUMMENTI DWAR IL-KONTROLLI EWLENIN TAS-SISTEMI TA’ SORVELJANZA U KONTROLL TAL-IMPRIŻA KONĠUNTA
21. |
Minkejja l-progress li sar matul l-2011, l-Impriża Konġunta s’issa għadha ma stabbilietx b’mod sħiħ sistemi affidabbli ta’ kontroll intern u ta’ informazzjoni finanzjarja. B’mod partikolari, jinħtieġ aktar xogħol fuq il-proċeduri ta’ kontroll ex-ante applikati għall-validazzjoni tal-klejms għall-ispejjeż. |
22. |
Fl-2011 l-Impriża Konġunta kienet għadha ma implimentatx l-għodda l-ġdida (19) biex timmaniġġa d-data relatata mal-klejms għall-ispejjeż ippreżentati mill-membri u l-benefiċjarji. |
23. |
Il-Qorti eżaminat il-proċeduri ta’ kontroll ex-ante applikati għal klejms għall-ispejjeż ippreżentati skont tliet ftehimiet ta’ għotjiet ma’ Membri tal-Clean Sky (20). Ġew identifikati d-dgħufijiet li ġejjin:
|
24. |
L-Uffiċjal tal-Kontabilità f’Marzu 2012 kkompleta l-eżerċizzju ta’ validazzjoni tal-proċessi ta’ negozju ta’ bażi hekk kif meħtieġ mir-regoli finanzjarji tal-Impriża Konġunta (23). Saru għadd ta’ rakkomandazzjonijiet fir-rapport ta’ validazzjoni tal-Uffiċjal tal-Kontabilità, b’mod partikolari l-bżonn li titjieb is-sistema għall-validazzjoni tal-klejms għall-ispejjeż u l-implimentazzjoni ta’ għodda biex isir rappurtar b’mod xieraq lill-maniġment, dwar kwistjonijiet baġitarji u kontabilistiċi. |
KWISTJONIJIET OĦRAJN
Uffiċċju tal-awditjar (verifika) intern u s-Servizz tal-Awditjar (verifika) Interna tal-Kummissjoni
25. |
Matul l-2011, u bħala riżultat ta’ limiti ta’ riżorsi fi ħdan l-organizzazzjoni, l-awditur intern kellu jaħdem fuq il-proċessi fundamentali tal-Impriża Konġunta, inkluż l-istabbiliment tal-kontijiet tal-2010 u 2011 u l-validazzjoni tal-klejms għall-ispejjeż li waslu mingħand il-membri. |
26. |
Fl-2011 is-Servizz tal-Awditjar (Verifika) Intern tal-Kummissjoni wettaq eżerċizzju ta’ valutazzjoni tar-riskju. Ibbażat fuq ir-riżultati tal-valutazzjoni tar-riskju, il-pjan strateġiku tal-verifika għall-2012-2014 ġie ppreżentat lill-Bord ta’ Tmexxija għall-adozzjoni fl-14 ta’ Diċembru 2011. |
27. |
Il-karta tal-missjoni tas-Servizz tal-Awditjar (Verifika) Intern tal-Kummissjoni ġiet adottata mill-Bord ta’ Tmexxija fil-31 ta’ Marzu 2011. Madankollu, ir-regoli finanzjarji tal-Impriża Konġunta s’issa għadhom ma ġewx emendati sabiex jinkludu d-dispożizzjoni tar-Regolament Strutturali (24) li jirreferi għas-setgħat tal-awditur intern tal-Kummissjoni. |
Pagamenti tal-kontribuzzjonijiet tal-membri
28. |
Il-proċedura għal ħruġ ta’ ordnijiet ta’ rkupru relatati mal-ispejjeż operazzjonali tal-Impriża Konġunta ma kinitx applikata b’mod xieraq. It-talba lill-membri biex iħallsu l-kontribuzzjonijiet tagħhom tal-2011 ma kinitx akkumpanjata bil-previżjoni tal-likwidità hekk kif inhuwa meħtieġ skont il-ftehim ta’ finanzjament. |
Segwitu tal-osservazzjonijiet preċedenti
29. |
Sa tmiem l-2011, l-Impriża Konġunta kienet għadha ma kkompletatx il-proċeduri interni li jridu jintużaw għas-sorveljanza tal-applikazzjoni tad-dispożizzjonijiet li jirrigwardaw il-protezzjoni, l-użu u t-tixrid ta’ riżultati ta’ riċerka (25). |
30. |
Fl-Opinjoni 2011 tagħha dwar ir-regoli finanzjarji tal-Impriża Konġunta, il-Qorti identifikat għadd ta’ oqsma li kellhom bżonn jiġu emendati (26). Ir-regoli finanzjarji ma ġewx emendati biex jirriflettu l-kwistjonjiet imqajma fl-Opinjoni tal-Qorti. |
31. |
Matul l-2011 l-Impriża Konġunta stabbilixxiet Pjan tal-Kontinwità tan-Negozju u għamlet progress fil-formalizzazzjoni tal-politiki tas-sigurtà tal-IT. Filwaqt li ġew definiti elementi essenzjali (27) ta’ Pjan ta’ Rkupru minn Diżastru matul l-2011, jinħtieġ li jsir iktar xogħol sabiex dan jiġi ffinalizzat u approvat. |
32. |
Il-Ftehim mal-Istat Ospitanti (28) bejn l-Impriża Konġunta u l-awtoritajiet Belġjani dwar spazju għall-uffiċċji, privileġġi u immunitajiet u appoġġ ieħor ġie ffirmat fit-2 ta’ Frar 2012. |
Dan ir-Rapport ġie adottat mill-Awla IV, immexxija minn Dr Louis GALEA, Membru tal-Qorti tal-Awdituri, fil-Lussemburgu fil-laqgħa tagħha tat-13 ta’ Novembru 2012.
Għall-Qorti tal-Awdituri
Vítor Manuel da SILVA CALDEIRA
President
(1) Ir-Regolament tal-Kunsill (KE) Nru 71/2008 tal-20 ta’ Diċembru 2007 li jistabbilixxi l-Impriża Konġunta Clean Sky (ĠU L 30, 4.2.2008, p. 1).
(2) L-Anness jagħti sommarju tal-kompetenzi, l-attivitajiet u r-riżorsi disponibbli tal-Impriża Konġunta. Huwa jiġi ppreżentat għal skopijiet ta’ informazzjoni.
(3) Is-Seba' Programm Kwadru, adottat bid-Deċiżjoni Nru 1982/2006/KE tal-Parlament Ewropew u tal-Kunsill (ĠU L 412, 30.12.2006, p. 1) tat-18 ta’ Diċembru 2006, jiġbor flimkien taħt saqaf wieħed l-inizjattivi kollha tal-UE relatati mar-riċerka u għandu rwol kruċjali fil-kisba tal-miri ta’ tkabbir, kompetittività u impjiegi. Huwa wkoll pilastru ewlieni għaż-Żona Ewropea tar-Riċerka.
(4) Il-Qorti rċeviet il-kontijiet annwali proviżorji fl-1 ta’ Marzu 2012. Dawn il-kontijiet huma akkumpanjati minn rapport dwar il-ġestjoni tal-baġit u dik finanzjarja matul is-sena li, fost l-oħrajn, jagħti rendikont tar-rata ta’ implimentazzjoni tal-approprjazzjonijiet.
(5) Ir-rapporti finanzjarji jinkludu l-karta tal-bilanċ u l-kont tar-riżultat ekonomiku, it-tabella tal-likwidità, ir-rapport tat-tibdil fl-attivi netti u l-anness għar-rapporti finanzjarji, li jinkludi deskrizzjoni tal-politiki tal-kontabilità prinċipali u informazzjoni oħra ta’ spjegazzjoni.
(6) Ir-rapporti tal-implimentazzjoni tal-baġit jikkonsistu fil-kont tar-riżultat tal-baġit u fl-anness tiegħu.
(7) ĠU L 248, 16.9.2002, p. 1.
(8) L-Artikolu 33 tar-Regolament tal-Kummissjoni (KE, Euratom) Nru 2343/2002 (ĠU L 357, 31.12.2002, p. 72).
(9) L-Artikolu 38 tar-Regolament (KE, Euratom) Nru 2343/2002.
(10) Ir-regoli dwar il-preżentazzjoni tal-kontijiet u tal-kontabilità mill-korpi tal-UE huma stabbiliti fil-Kapitoli 1 u 2 tat-Titolu VII tar-Regolament (KE, Euratom) Nru 2343/2002, kif l-aħħar emendat bir-Regolament (KE, Euratom) Nru 652/2008 (ĠU L 181, 10.7.2008, p. 23), u huma integrati hekk fir-Regoli Finanzjarji tal-Impriża Konġunta.
(11) Il-Federazzjoni Internazzjonali tal-Kontabilisti (IFAC) u l-Istandards Internazzjonali tal-Istituzzjonijiet Supremi tal-Verifika (ISSAI).
(12) L-Artikolu 12(4) tar-Regolament li jistabbilixxi l-Impriża Konġunta jiddikjara li "L-Impriża Konġunta "Clean Sky"għandha twettaq kontrolli fuq il-post u verifiki finanzjarji fost id-destinatarji tal-finanzjament pubbliku tal-Impriża Konġunta "Clean Sky" ". Verifiki ex-post jistgħu jidentifikaw nefqiet ineliġibbli kklejmjati mill-benefiċjarji li mbagħad huma soġġetti għal proċeduri ta’ rkupru.
(13) Il-klejms tal-2010 ġew imħallsa matul l-2011
(14) Ir-rata ta’ żball tiġi kkalkolata billi tintuża medja tad-dikjarazzjonijiet eċċessivi li jinstabu fil-klejms differenti tal-ispejjeż ippeżati skont l-ammont tagħhom.
(15) Adottat mill-Bord ta’ Tmexxija fl-14 ta’ Diċembru 2011.
(16) Il-ħin medju bejn il-pubblikazzjoni tas-sejħa għall-proposti u l-firma tal-ftehimiet ta’ għotja tal-Impriża Konġunta kien ta’ 418-il ġurnata għas-sejħiet varati fl-2010 u 291 ġurnata għall-ewwel sejħa varata fl-2011.
(17) Il-bilanċ tal-flus fi tmiem l-2010 ammonta għal EUR 53 miljun (41 % mill-approprjazzjonijiet ta’ pagament disponibbli fl-2010).
(18) L-Artikolu 10(1) tar-regoli finanzjarji jiddikjara li approprjazzjonijiet li ma jkunux intużaw fi tmiem is-sena finanzjarja li għaliha jkunu ddaħħlu għandhom jiġu kkanċellati. Fid-dawl tal-ħtiġijiet tal-Impriża Konġunta, l-approprjazzjonijiet ikkanċellati jistgħu jiddaħħlu fl-estimi tad-dħul u l-infiq sa mhux aktar tard mit-tliet snin finanzjarji segwenti, f'konformità mal-Artikolu 27.
Madankollu, permezz ta’ deċiżjoni tal-Bord ta’ Tmexxija meħuda mhux aktar tard mill-15 ta' Frar, huma jistgħu jiġu riportati biss għas-sena finanzjarja li jkun imiss, …”.
(19) L-Impriża Konġunta qed tiżviluppa għodda ġdida biex timmaniġġa d-data relatata mal-Membri.
(20) Kull klejm tal-Membri tal-Clean Sky inkluda medja ta’ 30 klejm għall-ispejjeż ta’ assoċjati.
(21) Elementi kritiċi bħal ma hija l-firma tal-uffiċjali tal-verifikazzjoni operazzjonali u l-eżami tal-kompletezza tal-lista ta’ kontroll operazzjonali mill-uffiċjal tal-verifikazzjoni finanzjarja mhux dejjem ġew iddokumentati.
(22) Il-manwal tal-proċeduri finanzjarji tal-Impriża Konġunta jiddikjara li r-rwoli tal-uffiċjal tal-verifikazzjoni operazzjonali u finanzjarja u tal-uffiċjal awtorizzanti għandhom ikunu separati u mifruxa madwar il-ġestjoni tan-nefqa operazzjonali u li:
— |
l-aġent tal-verifikazzjoni operazzjonali għandu jikkonferma li l-aspetti operazzjonali (tekniċi u finanzjarji) tal-fajl huma konformi mal-parametri miftiehma. |
— |
l-aġent tal-verifikazzjoni (il-kap tal-amministrazzjoni) għandu jikkonferma l-konformità tal-aspetti operazzjonali mar-regoli eżistenti u r-regolarità kumplessiva tal-operazzjoni. |
— |
id-direttur eżekuttiv għandu jwettaq il-kontroll kumplessiv finanzjarju u operazzjonali tal-fajl sħiħ. |
(23) L-Artikolu 43 tar-regoli finanzjarji tal-Impriża Konġunta jistipola li l-uffiċjal tal-kontabilità għandu jkun responsabbli għall-istabbiliment u l-validazzjoni tas-sistemi kontabilistiċi, u, fejn xieraq, jivvalida sistemi stabbiliti mill-uffiċjal awtorizzanti biex iforni jew jiġġustifika informazzjoni kontabilistika.
(24) Ir-Regolament (KE, Euratom) Nru 2343/2002.
(25) Il-paragrafu 23 tar-rapport tal-Qorti tal-Awdituri dwar il-kontijiet annwali 2010 tal-Impriża Konġunta Clean Sky (ĠU C 368, 16.12.2011, p. 8).
(26) L-Opinjoni Nru 2/2011 tal-Qorti tal-Awdituri dwar ir-Regoli Finanzjarji tal-Impriża Konġunta Clean Sky (http://eca.europa.eu).
(27) (a) ċirkuwiti finanzjarji fil-każ ta’ diżastru; (b) proċedura ta’ riżerva (back-up) għas-sigurtà tad-databases b’riżerva regolari u frekwenti u ħażna ’l barra mis-sit (off-site storage); (c) ftehim inizjali biex jintużaw l-installazzjonijiet tal-KE sabiex ikun hemm aċċess għas-sistemi finanzjarji (ABAC, SAP) u l-internet.
(28) Il-paragrafu 25 tar-rapport tal-Qorti tal-Awdituri dwar il-kontijiet annwali 2010 tal-Impriża Konġunta Clean Sky.
ANNESS
Impriża Konġunta Clean Sky (Brussell)
Il-kompetenzi u l-attivitajiet
L-oqsma ta’ kompetenza tal-Unjoni stipulati fit-Trattat (Siltiet mill-Artikoli 187 u 188 tat-Trattat dwar il-Funzjonament tal-Unjoni Ewropea) |
Id-Deċiżjoni Nru 1982/2006/KE tal-Parlament Ewropew u tal-Kunsill tat-18 ta’ Diċembru 2006 dwar is-Seba' Programm Kwadru tipprevedi kontribut tal-Komunità għat-twaqqif ta’ sħubiji pubbliċi-privati fit-tul f'forma ta’ Inizjattivi Teknoloġiċi Konġunti li jistgħu jkunu implimentati permezz ta’ Impriżi Konġunti skont it-tifsira tal-Artikolu 187 tat-Trattat. Ir-Regolament tal-Kunsill (KE) Nru 71/2008 tal-20 ta’ Diċembru 2007 li jistabbilixxi l-Impriża Konġunta “Clean Sky’” (ĠU L 30, 4.2.2008, p. 1). |
||||||||||
Il-kompetenzi tal-Impriża Konġunta (Ir-Regolament tal-Kunsill (KE) Nru 71/2008) |
L-objettivi
|
||||||||||
It-tmexxija |
|
||||||||||
Ir-riżorsi disponibbli għall-Impriża Konġunta fl-2011 |
Il-Baġit EUR 192 350 991 Il-persunal fil-31 ta’ Diċembru 2011 24 kariga li hemm stipulazzjoni dwarhom fit-tabella tal-persunal (18-il membru tal-persunal temporanju u 6 membri tal-persunal b'kuntratt), li minnhom 23 kienu okkupati; dawn kienu allokati għal: Attivitajiet operazzjonali: 9; Kompiti amministrattivi: 14; Kompiti mħallta: 5 |
||||||||||
L-attivitajiet u s-servizzi mogħtija fl-2011 |
Ara r-Rapport ta’ Attività Annwali 2011 tal-Impriża Konġunta Clean Sky Joint Undertaking fuq www.cleansky.eu |
||||||||||
Sors: Informazzjoni mogħtija mill-Impriża Konġunta Clean Sky. |
TWEĠIBIET TAL-IMPRIŻA KONĠUNTA “CLEAN SKY”
Bażi għal opinjoni kkwalifikata dwar il-legalità u r-regolarità tat-tranżazzjonjiet li fuqhom huma bbażati l-kontijiet
Paragrafu 15
L-Impriża Konġunta Clean Sky (CSJU) tilqa’ l-konklużjoni pożittiva tal-Qorti dwar il-legalità u r-regolarità tat-tranżazzjonijiet kollha li fuqhom huma bbażati l-kontijiet annwali tal-2011 bl-unika eċċezzjoni tat-tranżazzjonijiet relatati mal-validazzjoni tal-pretensjonijiet tal-ispejjeż.
Il-validazzjoni tal-pretensjonijiet tal-ispejjeż mill-benefiċjarji tal-JU twassal għal pagamenti interim/finali u l-approvazzjoni tal-prefinanzjament. L-awditi ex-post imwettqa mill-CSJU fl-2011 koprew l-ispejjeż validati mill-amministrazzjoni tal-Impriża Konġunta (JU) fir-rigward tat-twettiq tal-proġetti għall-2008, l-2009 u l-2010. Fil-pagamenti operattivi akkumulati li ħallset il-JU mill-bidu tal-programm CS sa Diċembru 2011, 49,5 % biss (1) kienu relatati mal-eżekuzzjoni tal-proġetti għall-2008, l-2009 u l-2010.
L-iżball misjub mill-awditi ex-post tal-JU mwettqa fl-2011 ilaħħaq is-6,16 %. Madankollu, filwaqt li jitqiesu l-azzjonijiet korrettivi mill-JU kif deskritt aktar ’l isfel f’dan il-kumment, minbarra r-rata ta’ żball misjuba, għandu jitqies indikatur ieħor għall-valutazzjoni tal-legalità u r-regolarità tal-pretensjonijiet tal-ispejjeż validati: ir-rata ta’ żball residwa. Skont il-metodoloġija deskritta fl-istrateġija approvata ta’ awditu ex-post tal-CSJU, ir-rata ta’ żball residwu tindika l-iżball li jifdal fil-pretensjonijiet tal-ispejjeż validati, wara li jkun iddaħħal il-mekkaniżmu ta’ rkupru. Għall-awditi ex-post imwettqa fl-2011 għall-pretensjonijiet tal-ispejjeż tas-snin preċedenti, ir-rata ta’ żball residwa tlaħħaq l-4,09 %, li twassal għal ammont komparattivament limitat f’riskju fir-rigward tal-pagamenti operattivi akkumulati li ntefqu għall-programm CS sa tmiem l-2011 (2,02 % (2)).
Il-JU tirrikonoxxi r-rilevanza tar-rati ta’ żball misjuba u residwi relatati mal-pretensjonijiet tal-ispejjeż awditjati u għandha l-għan li ssaħħaħ aktar il-kwalità tal-proċess tagħha ta’ validazzjoni ex-ante.
Il-JU implimentat il-proċess ta’ awditu ex-post fis-sena 2011, madwar sena wara li kisbet l-awtonomija tagħha f’Novembru 2009. Il-kamp ta’ applikazzjoni tal-ewwel awditi jkopri l-proċess ta’ validazzjoni tas-sena 2010, li kien l-ewwel wieħed imwettaq mill-JU. Fis-sena 2010, il-JU kienet għadha f’fażi tal-bidu filwaqt li l-kontrolli ex-ante relatati mal-ġestjoni tal-għotjiet ma kinux kompletament maturi biex jimmaniġġjaw il-volum kbir ta’ għotjiet.
B’ħarsa lejn ir-riżultati tal-ewwel eżerċizzju tal-awditu ex-post imwettaq, il-JU tixtieq tenfasizza l-effikaċja ta’ dan l-element mis-sistema ta’ kontroll intern tagħha, li permezz tagħha l-amministrazzjoni skopriet u kkoreġa l-iżbalji li saru matul il-validazzjoni ex-ante tal-JU tal-pretensjonijiet tal-ispejjeż. Għadhom għaddejjin azzjonijiet korrettivi finali.
Sa mill-2010, il-JU żviluppat b’mod sinifikanti l-proċessi tagħha li jirregolaw il-validazzjoni tal-pretensjonijiet tal-ispejjeż billi stabbilixxiet proċeduri apposta inkluż database għall-ġestjoni tal-għotjiet li tipprovdi mekkaniżmu ta’ approvazzjoni tal-istandards tal-pretensjonijiet tal-ispejjeż mill-uffiċjali Finanzjarji u tal-Proġett.
Wara l-ewwel eżerċizzju ta’ awditu ex-post, il-JU stabbilixxiet il-miżuri ta’ rkupru xierqa biex tikkoreġi l-pagamenti żejda li saru fil-passat, inkluż l-estrapolazzjoni tal-iżbalji sistematiċi misjuba fl-awditi fuq il-pretensjonijiet tal-ispejjeż mhux awditjati. Jeħtieġ li jiġi nnotat, li 75 % tal-fondi tal-JU huma mogħtija lill-benefiċjarji nnominati (il-membri tal-CSJU), li jieħdu sehem fil-proġetti CS sal-aħħar tal-programm. Din is-sitwazzjoni tiffaċilita l-miżuri korrettivi li għandhom jittieħdu mill-JU permezz ta’ rkupri fl-okkażjoni tal-pagamenti sussegwenti lill-benefiċjarji.
Bħala miżura preventiva, il-proċeduri applikati llum għall-validazzjoni ex-ante ta’ pretensjonijiet għall-ispejjeż iqisu r-riżultati tal-awditi ex-post tas-snin preċedenti, b’mod partikolari f’każijiet ta’ żbalji sistematiċi. Għall-perjodu 2008 sa 2010, aktar minn 80 % tal-iżbalji misjuba kienu ta’ natura sistematika. Dan jippermetti wkoll lill-JU biex tagħti linji gwida lill-benefiċjari nnominati, u għalhekk tevita li jkun hemm żbalji fi pretensjonijiet tal-ispejjeż futuri.
Parti sinifikanti mill-iżball misjub fl-awditi ex-post tal-2011 (madwar 50 %) kien minħabba l-użu tad-dejta tal-kontabbiltà tas-sena preċedenti, peress li dak iż-żmien ma kinitx disponibbli dejta attwali, meta kienu dovuti d-dikjarazzjonijiet finanzjarji. Il-JU qiegħda tissorvelja l-proċess tal-aġġustamenti sussegwenti fil-kontrolli ex-ante u sejra tassigura li fil-perjodi ta’ rappurtar li ġejjin, l-aġġustamenti tal-pretensjonijiet tal-ispejjeż preċedenti jiġu sottomessi mingħajr dewmien.
L-amministrazzjoni tal-JU tqis importanti li tiġi żgurata arkitettura ta’ kontroll multiannwali għall-ġestjoni tal-għotjiet tal-JU Clean SKU, li tqis l-opportunitajiet għall-proċeduri standard ta’ rkupru kif ukoll għall-miżuri preventivi. Din hija raġuni għala l-amministrazzjoni tal-JU stabbilixxiet mekkaniżmi u objettivi għat-tul multiannwali tal-proġetti, li jitkejlu minn indikaturi li jkopru d-dewmien sħiħ tal-programm.
Kummenti dwar il-ġestjoni baġitarja u finanzjarja
Paragrafu 18
Il-JU tiddependi fuq l-eżitu effiċjenti u b’suċċess tan-negozjati relatati mas-sejħiet għal proposti u ħadet passi fuq livell intern biex ittejjeb u tħaffef il-proċess madwar dan l-aspett importanti tal-pagamenti lill-imsieħba l-ġodda. Il-JU qiegħda tara titjib globali fiż-żmien għall-għotja u qiegħda tissorvelja dan mill-viċin fil-livell tal-amministrazzjoni (3).
Paragrafu 19
Il-JU tirrikonoxxi d-dewmien mid-deċiżjoni tal-Bord ta’ Tmexxija li tapprova t-trasferiment tal-approprjazzjonijiet għall-ħlasijiet għall-pjan tal-baġit tas-sena 2012 (4). L-iskeda taż-żmien għall-ippjanar tal-baġit tal-JU u ċ-ċiklu ta’ rappurtar ġew riveduti biex jieħdu ħsieb tal-approvazzjoni xierqa u f’waqtha tal-Bord ta’ Tmexxija għat-trasferimenti għas-sena 2013.
Paragrafu 20
Il-JU ltaqgħet ma’ sitwazzjoni eċċezzjonali fl-ewwel nofs tal-2012 fir-rigward tal-irċevuta tal-pretensjonijiet tal-ispejjeż mill-membri tagħha għall-eżekuzzjoni tal-proġetti fl-2011. Id-dikjarazzjonijiet finanzjarji għall-GAMs 2011, li kienu dovuti fl-1 ta’ Marzu 2012, ġew sottomessi mill-benefiċjarji b’dewmien mhux tas-soltu li laħaq it-3-4 xhur. Il-JU analizzat ir-raġuni prinċipali għal dan id-dewmien mal-koordinaturi ITD (mexxejja ta’ konsorzji) u ħadet azzjoni biex tevita li jkun hemm żvilupp simili fl-2013. Ġie deċiż li jittieħdu dawn l-azzonijiet li ġejjin:
— |
Bi qbil mal-Bord ta’ Tmexxija (Ġunju 2012), sejra tiġi stabbilita skeda ċara għall-proċess tal-2013 (Jannar - Ġunju 2013) li tindika l-iskadenzi u ż-żminijiet għal tweġiba mistennija mill-industrija u l-JU. |
— |
Permezz ta’ linji gwida u taħriġ, il-JU sejra tikkontribwixxi biex ittejjeb il-kompletezza u l-kwalità tal-pretensjonijiet tal-ispejjeż u ċ-Ċertifikati tad-Dikjarazzjonijiet Finanzjarji (CFS) relatati; |
— |
Il-JU sejra ssaħħaħ il-monitoraġġ mill-qrib, billi tipprovdi assistenza proattiva lill-membri għall-mistoqsijiet individwali dwar l-eliġibbiltà tal-ispejjeż. Dan ma kienx possibbli minħabba n-nuqqas ta’ riżorsi fl-ewwel nofs tal-2012; |
— |
Għodda tal-IT ġdida għall-ġestjoni tal-għotjiet sejra tiffaċilita l-proċess ta’ sottomissjoni u validazzjoni tal-pretensjonijiet tal-ispejjeż. |
Wara l-validazzjoni tal-pretensjonijiet tal-ispejjeż li jiġu rċevuti finalment mill-amministrazzjoni u l-approvazzjoni mill-Bord ta’ Tmexxija aktar tard fl-2012, il-kontribuzzjonijiet in natura relatati sejrin jiġu ttrasferiti fl-Assi Netti tal-JU fil-Kontijiet finali tal-2012. Għaldaqstant, l-istatus tal-Assi Netti kif ippreżentati fil-Kontijiet finali tal-2011 għandu jiġi kkunsidrat bħala wieħed tranżitorju.
Kummenti dwar kontrolli ewlenin tas-sistemi ta’ sorveljanza u kontroll tal-Impriża Konġunta
Paragrafu 21
Matul l-ewwel kwart tas-sena 2012 u wara r-rakkomandazzjonijiet tal-ECA tas-sena preċedenti, il-JU żviluppat proċedura apposta għall-proċessi relatati mal-validazzjoni tal-pretensjonijiet tal-ispejjeż, li tintegra l-POs fil-proċess ta’ validazzjoni tad-dikjarazzjonijiet finanzjarji (5). Minbarra l-validazzjoni tar-rapporti tekniċi, il-POs jivverifikaw l-informazzjoni disponibbli dwar l-użu tar-riżorsi u jinnotifikaw ir-riżultati tal-validazzjoni tagħhom lill-Uffiċjali Finanzjarji. Ġew żviluppati regoli ċari li jiżguraw l-evidenza tal-awtorizzazzjoni tal-verifika finanzjarja u operattiva rispettiva għall-validazzjoni tal-pretensjonijiet tal-ispejjeż. Il-format tal-lista ta’ verifika li ntużat preċedentement ittejjeb, biex tingħata evidenza tal-passi ta’ validazzjoni li effettivament twettqu u biex tintwera l-interazzjoni bejn it-taqsimiet finanzjarji u operattivi.
Paragrafu 22
Il-JU, wara l-esperjenzi tagħha u l-osservazzjonijiet preċedenti tal-Qorti dwar l-ipproċessar tad-dejta relatata mal-benefiċjarji, żviluppat għodda apposta għall-ġestjoni tad-dejta tal-benefiċjarji għall-Ftehimiet ta’ għotja għall-membri (GMT) fl-aħħar kwart tal-2011. Din l-għodda ntużat għall-ipproċessar tal-pretensjonijiet tal-ispejjeż tal-2011 fit-tieni kwart tal-2012 u - wara l-ittestjar tal-affidabbiltà tad-dejta kkodifikata u tar-rapporti li jirriżultaw mill-Uffiċjal tal-Kontabbiltà tal-JU flimkien ma’ kumpanija esterna tal-awditjar - ir-riżultati ġew applikati għall-Kontijiet Finali 2011.
Paragrafu 23
Il-JU tieħu nota tar-rimarki tal-Qorti u ħadet passi biex ittejjeb il-proċess intern ta’ approvazzjoni kemm għall-atturi finanzjarji kif ukoll dawk operattivi; anzi, issa permezz tal-għodda ta’ ġestjoni tal-għotjiet imsemmija hawn fuq, hemm approċċ aktar integrat għall-validazzjoni tal-pretensjonijiet tal-ispejjeż u r-rapporti tekniċi annwali mill-atturi finanzjarji u operattivi rispettivi u dan huwa aktar viżibbli fil-proċess.
Fir-rigward tas-segregazzjoni tad-dmirijiet, il-JU bħalissa qiegħda taħdem fuq modifika taċ-ċirkwiti finanzjarji biex tiżgura s-segregazzjoni bejn l-verifika finanzjarja u l-awtorizzazzjoni f’każijiet fejn ma jkunx hemm atturi finanzjarji li normalment ikunu previsti.
Paragrafu 24
Il-JU ħadet nota tar-rakkomandazzjonijiet tal-Uffiċjal tal-Kontabbiltà u kif intqal qabel, għamlet passi sinifikanti biex timplimenta l-GMT li sejrin jippermettu titjib fil-validazzjoni tal-pretensjonijiet tal-ispejjeż u biex tkun tista’ tirrapporta b’mod komprensiv u regolarment lill-amministrazzjoni tal-JU.
Kwistjonijiet oħra
Paragrafu 25
F’Awwissu 2011, il-Bord ta’ Tmexxija u l-amministrazzjoni tal-JU permezz tal-Uffiċjal tal-Awditjar Intern (IAO) saru jafu bl-involviment tal-IAO f’xi wħud mill-proċessi ewlenin fil-ġestjoni finanzjarja tal-JU u l-konsegwenzi potenzjali tal-indipendenza tal-IAO. Jekk ikun hemm bżonn, ir-riskju ta’ nuqqas ta’ assigurazzjoni potenzjali fir-rigward tal-proċessi kkonċernati sejjer jitnaqqas permezz tal-involviment tal-IAS.
Paragrafu 27
Il-JU sejra temenda r-regoli finanzjarji wara l-aġġornament li jmiss għall-qafas tar-regolament finanzjarju li għaddej bħalissa (ara wkoll il-punt 30).
Paragrafu 28
It-talba għall-pagament tal-kontribuzzjonijiet tal-2011 lill-Kummissjoni (bħala wieħed mill-Membri tal-JU) kienet akkumpanjata b’mod xieraq minn tbassir ta’ fluss ta’ flus adegwat. Filwaqt li ma ġie inkluż l-ebda fluss ta’ flus, it-talba lil Membri oħra minbarra l-KE ġiet akkumpanjata minn spjegazzjoni tal-ammont mitlub u r-ripartizzjoni ewlenija, li turi s-sehem ta’ kull membru jew kumpanija assoċjata. Barra minn hekk, permezz tal-informazzjoni dwar il-kontijiet annwali tas-sena preċedenti u l-baġit annwali approvat tas-sena 2011, mogħtija fil-minuti tal-Bord ta’ Tmexxija, il-membri kollha ngħatawlhom id-dettalji finanzjarji rilevanti. Il-JU sejra tassigura, li fil-futur, it-tbassir tal-fluss ta’ flus sejjer jiġi inkluż mat-talbiet għall-pagamenti anki għall-membri minbarra l-Kummissjoni.
Paragrafu 29
L-implimentazzjoni adegwata tad-dispożizzjonijiet iddettaljati fl-Anness II, il-Kundizzjonijiet ġenerali, tal-ftehimiet tal-għotja tal-JU Clean Sky għall-Membri dwar il-protezzjoni, l-użu u d-disseminazzjoni tar-riżultati tar-riċerka għadha għaddejja.
Fi żmien xieraq sejra tiġi stabbilita proċedura apposta, li tiġbor fil-qosor l-elementi tar-rwol superviżorju tal-JU u l-kontrolli fis-seħħ.
Paragrafu 30
Il-JU sejra temenda r-regoli finanzjarji wara l-aġġornament li jmiss għall-qafas tar-regolament finanzjarju li għaddej bħalissa. Dan sejjer jippermetti lill-JU biex tallinja ruħha mar-regoli aċċettati b’mod komuni u tieħu vantaġġ biex tiċċara, fejn ikun possibbli, il-kwistjonijiet imqajma mill-Qorti.
Paragrafu 31
Flimkien mal-Impriżi Konġunti ġirien fil-bini komuni tagħhom, il-JU Clean Sky ħadmet aktar fuq il-finalizzazzjoni tal-Pjan ta’ Rkupru minn Diżastru. Huwa previst, li dan jitlesta sa tmiem l-2012.
(1) Il-pagamenti operattivi akkumulati mill-2008 sal-2011 jlaħħqu Eur 261 358 871, il-pagamenti finali flimkien mal-approvazzjoni tal-prefinanzjament għas-snin 2008 sa 2010 jlaħħqu Eur 129 295 956.
(2) = 4,09 % ta’ (Eur 129 295 956 /Eur 261 385 871)*100
(3) Mit-twaqqif tal-JU, iż-żmien għall-għotja tjieb minn 418 jum għal 268 jum mill-aktar sejħa riċenti (Sejħa 10). Dan juri titjib ulterjuri minn dak ivvalutat mill-Qorti.
(4) Il-Bord ta’ Tmexxija ma adottax il-pjan tal-baġit annwali 2011 f’Diċembru 2010 fejn ġiet inkluża stima tal-ammont ittrasferit.
(5) Proċedura CS Nru 2.9.1, Proċedura Interim għall-validazzjoni tad-dikjarazzjonijiet finanzjarji rċevuti mill-Membri għall-eżekuzzjoni tal-GAMs 2011 u għall-aġġustamenti rċevuti għall-GAMs tas-snin preċedenti