52013SC0063

1.           Definizzjoni tal-problema

1.1.        Natura tal-problema

Il-linji tal-ajru ħafna drabi ma joffrux lill-passiġġieri d-drittijiet li huma intitolati għalihom f’każijiet ta’ imbarkazzjoni miċħuda, dewmien twil, kanċellazzjonijiet jew immaniġġjar ħażin tal-bagalji, b’mod partikolari skont ir-Regolamenti (KE) Nru 261/2004[1] (“ir-Regolament”) u (KE) Nru 2027/97[2]

1.2.        Motivi wara l-problema

1.2.1.     Infurzar mhux effettiv biżżejjed u uniformi mal-Ewropa kollha

Is-sistema ta’ nfurzar li hemm bħalissa mhix effettiva biżżejjed u ma tiġix applikata b’mod uniformi mal-UE kollha. Ġew identifikati tliet kwistjonijiet ewlenin:

(a) Iż-żoni griżi fir-Regolament (KE) Nru 261/2004 joħolqu inċertezza legali li tfixkel l-infurzar xieraq tad-drittijiet tal-passiġġieri bl-ajru u li twassal għal ħafna tilwim bejn it-trasportaturi tal-ajru u l-passiġġieri.

(b) Politiki ta’ sanzjonar inkonsistenti u mhux effettivi biżżejjed: fl-assenza ta’ koordinazzjoni formali, id-diversi korpi nazzjonali ta’ infurzar (NEBs) japplikaw politiki ta’ sanzjonar differenti u jinterpretaw diversi partijiet tar-Regolament (KE) Nru 261/2004 b'modi differenti.

L-ebda korp ta’ infurzar speċifiku mhuwa meħtieġ għall-infurzar tad-dispożizzjonijiet tar-Regolament (KE) Nru 2027/97 (u tal-Konvenzjoni ta’ Montreal[3]) fir-rigward tal-immaniġġjar ħażin tal-bagalji.

(c) Proċessi inadegwati tat-trattament tal-ilmenti u mezzi insuffiċjenti ta' rimedju individwali: ħafna passiġġieri jiltaqgħu ma’ diffikultajiet prattiċi meta jressqu lment lil trasportatur tal-ajru.

1.2.2.     Ċerti spejjeż tal-obbligi imposti mir-Regolament jikkostitwixxu diżinċentivi qawwija għall-konformità

Il-linji tal-ajru ma jifilħux jipprezzaw l-ispejjeż u r-riskji (tal-kura u l-kumpens) f'ċerti sitwazzjonijiet.

(a) l-episodju tal-isħaba ta’ rmied volkaniku f’April 2010 wera li l-assenza ta’ kwalunkwe limitu ta’ ħin għar-responsabbiltà tat-trasportaturi f’każijiet straordinarji li jieħdu fit-tul, jista’ joħloq riskju għall-istabbiltà finanzjarja tagħhom.

(b) ċerti spejjeż ta’ kura/assistenza huma sproporzjonati fir-rigward tad-dħul tat-trasportaturi għal ċerti operazzjonijiet fuq skala żgħira.

(2) Ċerti aspetti tal-kumpens finanzjarju għandhom effett qawwi ta’ diżinċentivar:

(a) Ħafna dewmien ma jistax jiġi assorbit fil-limitu tal-ħin attwali ta’ 3 sigħat għad-dritt ta’ kumpens.

(b) L-ammonti standardizzati ta’ kumpens li jikkumpensaw it-telf ta’ ħin komuni għall-passiġġieri kollha, jistgħu jmorru lil hinn mill-valur tal-ħsara li jsofru l-passiġġieri[4]

(3) Il-linji tal-ajru huma responsabbli għall-kura u l-kumpens meta t-taqlib iseħħ minħabba partijiet terzi, iżda d-dispożizzjonijiet nazzjonali u kuntrattwali jfixklu lit-trasportaturi tal-ajru milli jirkupraw l-ispejjeż minn partijiet terzi responsabbli. Dawn tal-aħħar ma jirċevux inċentivi ekonomiċi biex jieħdu miżuri sabiex inaqqsu l-frekwenza u/jew il-ħruxija ta’ tali taqlib.

2.           Analiżi tas-sussidjarjetà

L-ewwel nett, hemm kamp ta' applikazzjoni limitat għall-Istati Membri biex jaġixxu weħidhom biex jipproteġu lill-konsumaturi, peress li r-Regolament dwar is-Servizzi tal-Ajru (KE) Nru 1008/2008[5] ma jippermettilhomx iqiegħdu rekwiżiti addizzjonali dwar it-trasportaturi tal-ajru tal-Komunità li jfittxu li joperaw servizzi ġewwa l-UE.

It-tieni nett, ħafna mill-problemi identifikati hawn fuq jirreferu għal diverġenzi ta’ applikazzjoni/infurzar tar-Regolament (KE) Nru 261/2004 mal-Istati Membri kollha li jdgħajfu d-drittijiet tal-passiġġieri u l-kundizzjonijiet ekwi bejn it-trasportaturi tal-ajru. Intervent ikkoordinat tal-UE biss, jista’ jindirizza dawn il-problemi.

3.           Objettivi tal-politika

Fid-dawl tal-problemi identifikati hawn fuq u skont l-Artikolu 100(2) tat-TFUE, l-objettiv ġenerali ta’ din l-inizjattiva huwa li tippromwovi l-interess tal-passiġġieri tal-ajru billi tiżgura li t-trasportaturi tal-ajru jikkonformaw ma’ livell għoli ta' protezzjoni għall-passiġġieri bl-ajru matul taqlib waqt l-ivvjaġġar, filwaqt li jiżguraw li t-trasportaturi tal-ajru joperaw skont kundizzjonijiet armonizzanti f'suq liberalizzat.

L-objettiv ġenerali li jissemma hawn fuq, jista' jwassal għal aktar objettivi speċifiċi:

1. Biex jiżgura l-infurzar effettiv u konsistenti tad-drittijiet tal-passiġġieri mal-UE kollha billi:

1.1. Jiċċara d-definizzjonijiet u l-prinċipji ewlenin wara d-drittijiet tal-passiġġieri u jissimplifika d-drittijiet;

1.2. Jiżgura politika ta’ sanzjonar effettiva u konsistenti;

1.3. Jiżgura proċessi effettivi għat-trattament tal-ilmenti u mezz ta' rimedju għall-passiġġieri

2. Biex inaqqas l-effetti ta’ diżinċentivar ta’ ċerti spejjeż tar-Regolament fuq linji tal-ajru:

2.1. Jiżgura li l-obbligi tal-linji tal-ajru fir-rigward tad-drittijiet tal-passiġġieri jkopru r-riskji li huma limitati fiż-żmien u/jew fid-daqs;

2.2. Jiżgura li l-kumpens finanzjarju f’ċerti sitwazzjonijiet ma jirriżultax f'diżinċentivi deċiżivi għall-konformità;

2.3. Jiżgura li l-partijiet terzi jkunu inċentivati biex jindirizzaw il-kawżi tat-taqlib tal-ivvjaġġar li huma responsabbli għalihom.

4.           Għażliet politiċi

4.1.        Forom possibbli ta’ intervent tal-UE

Żewġ interventi possibbli fil-livell tal-UE li ġew issuġġeriti mill-partijiet interessati ġew eliminati fi stadju bikri tal-valutazzjoni:

· Tħassir tar-Regolament iwassal għal tnaqqis sostanzjali fil-livell ta' protezzjoni tad-drittijiet tal-passiġġieri.

· Fond industrijali għall-ispejjeż kollha marbuta mal-kura u l-kumpens ikun anqas effiċjenti (speċjalment fir-rigward tal-bdil tar-rotot) u jżid l-ispejjeż amministrattivi.

· Materjal ta’ gwida u impenji volontarji eżistenti diġà wrew li permezz ta’ miżuri mhux regolatorji ma hemmx lok kbir għal aktar progress.

Għalhekk aġġornament tal-qafas regolatorju tal-UE huwa l-unika forma ta’ intervent tal-UE li tista’ tindirizza l-kawżi tal-problemi identifikati.

4.2.        Skrinjar inizjali tal-miżuri politiċi

Skrinjar preliminari elimina l-miżuri politiċi li ma ġabux biżżejjed benefiċċji meta mqabbla mal-ispejjeż u l-iżvantaġġi tagħhom. Dan l-iskrinjar qies l-opinjonijiet, il-kompatibbiltà legali u prattika, l-effettività u l-kumplimentarità tal-partijiet interessati.

Il-miżuri politiċi ġew ivvalutati wkoll fid-dawl tal-prinċipji tas-sussidjarjetà u l-proporzjonalità.

4.3.        Deskrizzjoni tal-għażliet politiċi

L-għażliet politiċi meqjusa huma differenti mill-għażla ta’ kompromess magħżula bejn l-infurzar aktar qawwi u l-inċentivi ekonomiċi aġġustati għal-linji tal-ajru: spiża aktar iebsa hija inċentiv għal-linji tal-ajru biex titnaqqas il-konformità filwaqt li politika ta' sanzjonar aktar qawwija hija inċentiv għall-konformità. Għalhekk, għall-għażliet fejn l-ispiża imposta mill-obbligi tar-Regolament tkun ogħla, il-politika ta’ nfurzar għandha tkun aktar stretta u kkoordinata b’mod aħjar, u viċi versa:

(1) Enfasi fuq inċentivi ekonomiċi: l-enfasi fuq it-tnaqqis tal-ispejjeż billi jinbidlu ċerti obbligi fir-rigward tal-kura (jiġifieri l-forniment tal-ikel, l-akkomodazzjoni) permezz ta’ assigurazzjoni alternattiva għall-passiġġieri.

(2) Ibbilanċjar ta’ politika ta’ infurzar aktar qawwija ma’ inċentivi ekonomiċi: koordinazzjoni aktar qawwija tal-NEBs. Żewġ varjanti li jnaqqsu l-ispejjeż:

(a) Billi jitnaqqas il-limitu tal-ħin għad-dritt ta’ kumpens fil-każ ta’ dewmien minn tliet sigħat għal mill-anqas ħames sigħat;

(b) Jew billi jiġi estiż il-kamp ta’ applikazzjoni ta “ċirkostanzi straordinarji” biex jiġu inklużi l-aktar inadempjenzi tekniċi.

Aktar subvarjanti tal-għażla 2 ġew ivvalutati fir-rigward tal-modifika tal-ammonti tal-kumpens u/jew immodifikati aktar għal-limiti tal-ħin għall-kumpens għad-dewmien (eż. il-limitu jsir dipendenti fuq id-distanza tat-titjira).

(3) Enfasi fuq l-infurzar: l-għażla 3 tisħaq kompletament fuq infurzar aktar qawwi mill-NEBs u tikkjarifika d-drittijiet eżistenti tal-passiġġieri biex tagħmel l-applikazzjoni tagħhom aktar effettiva.

(4) Infurzar ċentralizzat: l-għażla 4 tisħaq kompletament fuq politika ta’ infurzar tal-UE qawwija u ċentralizzata li trid tpatti għall-inċentivi negattivi mill-ispiża ta’ konformità.

|| Għażla 1 || Għażla 2a || Għażla 2b: || Għażla 3 || Għażla 4

Infurzar imtejjeb || Koordinazzjoni “ħafifa” || Koordinazzjoni “medja” || Koordinazzjoni “medja" + obbligu tal-mezzi || Koordinazzjoni “qawwija”

Kif? || - Fluss ta' informazzjoni aħjar bejn l-NEBs u l-Kummissjoni - infurzar ġenerali u trattament tal-ilmenti separat || - Il-Kummissjoni tista’ titlob investigazzjonijiet mill-NEBs - Kumitat formali jista’ jieħu deċiżjoni dwar proċeduri komuni (eż. it-trasferiment tal-ilmenti, l-iskambju ta' informazzjoni) - infurzar separat mit-trattament tal-ilmenti || Barra mill-għażla 2: obbligu għal-linji tal-ajru biex ikollhom rappreżentant f’kull ajruport kompetenti għad-deċiżjonijiet fir-rigward tal-kura u l-kumpens || il-korp ta’ nfurzar tal-UE - l-NEBs ikunu sussidjarji tal-korp ċentrali - infurzar ġenerali u trattament tal-ilmenti separat

(Diż)inċentivi ekonomiċi || Spiża baxxa || Spiża medja || Spiża għolja || Spiża għolja

Kura || Assigurazzjoni alternattiva għall-passiġġieri || - Limitu tal-ħin fuq l-akkomodazzjoni f’każijiet straordinarji li jieħdu fit-tul - Deroga parzjali għall-operazzjonijiet fuq skala żgħira || - Fond industrijali għal każijiet straordinarji li jieħdu fit-tul || - Fond Industrijali (bħall-għażla 3) - dritt għall-bdil tar-rotot f’każ ta’ dewmien twil

Pagamenti ta’ kumpens || Dritt ta’ kumpens għal demwien ta’ aktar minn 5 sigħat || Dritt ta’ kumpens għal demwien ta’ aktar minn 5 sigħat || Dritt ta’ kumpens għal demwien ta’ aktar minn 3 sigħat || Dritt ta’ kumpens għal demwien ta’ aktar minn 3 sigħat || Dritt ta’ kumpens għal demwien ta’ aktar minn 3 sigħat

Definizzjoni stretta ta’ ċirkostanzi straordinarji || Definizzjoni stretta ta’ ċirkostanzi straordinarji || Kamp ta’ applikazzjoni akbar għal ċirkostanzi straordinarji (inklużi inadempjenzi tekniċi) || Definizzjoni stretta ta’ ċirkostanzi straordinarji || Definizzjoni stretta ta’ ċirkostanzi straordinarji

Ammonti b’rata fissa mnaqqsa ta’ kumpens b’enfasi fuq distanzi qosra || Aktar subvarjanti: ammonti ta' kumpens imnaqqas jew le - limiti tal-ħin uniċi jew multipli għall-kumpens għal dewmien || Żewġ subvarjanti: ammonti ta’ kumpens imnaqqas jew le || Ammonti b’rata fissa ta’ kumpens li baqgħu ma nbidlux || Ammonti b’rata fissa ta’ kumpens li baqgħu ma nbidlux

Karatteristiċi komuni || - Kjarifika tad-drittijiet għal titjiriet ta' konnessjoni mitlufa, skedar minn qabel, tagħmir għall-mobbiltà, dewmien fuq ir-runway u politika “no show” - Korp ta’ infurzar għad-drittijiet eżistenti fil-każ ta’ bagalji mitlufa - Proċeduri ta’ trattament ta’ lmenti minimi għal-linji tal-ajru - Qsim tal-piżijiet ma’ partijiet terzi

5.           Analiżi tal-impatti

5.1.        Impatti ekonomiċi

Impatt fuq il-politiki ta’ infurzar

Fl-għażliet kollha, il-politika ta’ infurzar – li bħalissa hija prinċiparjament ibbażata fuq ilmenti individwali – issir aktar effiċjenti billi tieħu rwol aktar proattiv billi tiċċekkja l-manwali tal-linji tal-ajru, it-termini u l-kundizzjonijiet u l-pjanijiet ta’ kontinġenza għall-konformità mad-drittijiet tal-passiġġieri.

Il-koordinazzjoni bejn il-politiki ta’ infurzar nazzjonali jsiru aktar qawwija minn għażla 1 sa 4 iżda l-ispejjeż amministrattivi assoċjati għandhom tendenza wkoll li jiżdiedu.

Kjarifika u simplifikazzjoni tad-drittijiet

Fl-għażliet tal-politika kollha, id-drittijiet eżistenti tal-passiġġieri tal-ajru huma kkjarifikati, speċjalment fir-rigward taċċirkostanzi straordinarji, li jnaqqsu l-ispazju għall-interpretazzjoni.

Taħt l-għażliet 2 u 4, id-drittijiet huma ssimplifikati aktar permezz tal-miżura li timplika li l-kura fil-forma ta' ikliet u xorb dejjem tiġi pprovduta wara dewmien ta' sagħtejn, irrispettivament mid-distanza tat-titjira u l-oriġini tad-dewmien tal-vjaġġatur.

Impatt fuq l-ispiża tal-konformità

L-impatt fuq l-ispiża tal-konformità għal-linji tal-ajru jista’ jitqassar b’mod simplifikat f'dan li ġej:

· taħt l-għażla 1, l-ispiża tal-konformità titnaqqas b'mod sinifikanti; każ straordinarju li jieħu fit-tul ikollu impatt limitat; u l-ispejjeż jibqgħu simili għat-trasportaturi reġjonali.

· Taħt l-għażla 2 (u l-varjanti tagħha), l-ispiża tkun simili għal-linja ta’ referenza iżda l-potenzjal ’l fuq tagħha jkun limitat f’każ li aktar passiġġieri jitolbu l-kumpens tagħhom jew f’każ straordinarju li jieħu fit-tul; l-ispiża għat-trasportaturi reġjonali tkun simili għal dik ta’ tipi ta’ linji tal-ajru oħra.

· Taħt għażliet 3 u 4, l-ispiża tkun simili għal-linja ta’ refernza, iżda b’potenzjal ’il fuq ogħla f'każ li aktar passiġġieri jitolbu l-kumpens tagħhom; ikun hemm limitu rigward l-iżviluppi tal-ispejjeż f'każ straordinarju li jieħu fit-tul; iżda l-ispiża għat-trasportaturi nazzjonali tibqa’ għolja ħafna meta kkumparata mad-dħul tagħhom.

Impatt tal-pakketti kompleti tal-politika meta mqabbel max-xenarju bażi || Spiża totali tar-rata attwali tal-pretensjonijiet (maħsuba li tiżdied bil-mod matul iż-żmien) || Spiża massima teoretika tar-Regolament (jekk il-passiġġieri kollha intitolati jitolbu kumpens)

|| VPN (2015-2025) F'miljuni ta' EUR || % ta' bidla imqabbla mal-linja ta’ referenza || VPN (2015-2025) F'miljuni ta' EUR || % ta' bidla imqabbla mal-linja ta’ referenza

Linja bażi || 10.4 || - || 23.6 || -

Għażla 1 || 2.1 || -80% || 8.0 || -66%

Għażla 2a (livelli ta’ kumpens li baqgħu ma nbidlux || 9.8 || -6% || 18.4 || -22%

Għażla 2b (livelli ta’ kumpens li baqgħu ma nbidlux || 9.6 || -8% || 17.5 || -26%

Għażla 3 || 11.3 || +9% || 26.0 || +10%

Għażla 4 || 11.6 || +12% || 26.2 || +11%

Sors: Steer Davies Gleave + Stimi tal-Kummissjoni

L-ajruporti u l-partijiet terzi jistgħu jaqsmu parti mill-ispejjeż tal-linji tal-ajru minħabba li l-erba’ għażliet jagħtu possibbiltajiet imsaħħa lil-linji tal-ajru biex dawn jitolbu kumpens għall-ispejjeż li jsofru minn partijiet terzi responsabbli mid-dewmien jew mill-kanċellazzjonijiet.

Impatti ekonomiċi oħra

L-impatt fuq l-SMEs[6] huwa limitat ħafna minħabba li ftit biss huma kkonċernati b'dan ir-Regolament. Ħafna minnhom jibbenefikaw minn miżuri speċifiċi proposti għal operazzjonijiet fuq skala żgħira fl-għażla 2.

L-għażliet politiċi kollha joħolqu xi spejjeż amministrattivi ġodda għal-linji tal-ajru (l-aktar it-tħejjija ta' pjanijiet ta’ kontinġenza) u għall-NEBs (l-aktar l-implimentazzjoni tal-politika proattiva, li l-ispejjeż tagħha tkun ikkumpensat minn tnaqqis fl-għadd ta' ilmenti).

5.2.        Impatti soċjali

5.2.1.     Impatt fuq il-konsumaturi

L-għażliet kollha jippreżentaw karatteristiċi komuni:

· Infurzar aħjar tad-drittijiet tal-passiġġieri (inkluż għall-bagalji)

· Mezzi mtejba għall-infurzar tal-pretensjonijiet individwali.

· Kjarifika u tisħiħ tad-drittijiet f’ħafna każijiet

Għażla 1 tnaqqas b’mod sinifikanti l-obbligi tal-linji tal-ajru kontra l-obbligi tal-passiġġieri matul it-taqlib fl-ivvjaġġar. Għalkemm il-passiġġieri jistgħu jagħżlu l-assigurazzjoni fir-rigward tas-sitwazzjoni individwali tagħhom, ħafna passiġġieri, fid-dawl tar-rata ta’ dewmien u kanċellazzjonijiet baxxa tagħhom, jistgħu jistmaw ħażin ir-riskju li tkun meħtieġa tali assigurazzjoni.

Taħt għażla 2, l-obbligi tal-kura u l-assistenza huma msaħħa, iżda d-dritt għal talba ta' kumpens finanzjarju jitnaqqas b'xi mod. Barra minn hekk, il-passiġġieri huma anqas protetti tajjeb f’każijiet straordinarji li jieħdu fit-tul (ħlief passiġġieri b’mobbiltà mnaqqsa) u fuq titjiriet reġjonali[7] Madanakollu, dan huwa kkumpensat minn infurzar aħjar tad-drittijiet eżisteni (ara hawn fuq).

Għażliet 3 u 4 fihom ħafna vantaġġi għall-passiġġieri bħat-tisħiħ mill-ġdid u t-tisħiħ aħjar tad-drittijiet tagħhom. Madanakollu, jista’ jwassal ukoll għal prezzijiet tal-biljetti kemxejn ogħla u min iħallas it-taxxi se jikkontribwixxi għall-spiża ogħla ta' infurzar.

5.2.2.     Impatt fuq l-impjiegi

L-impatt fuq l-impjiegi tal-għażliet politiċi jibqa’ limitat minħabba li għandhom l-objettiv ewlieni li jirfinaw id-drittijiet tal-passiġġieri eżistenti u infurzar aħjar.

L-għażliet politiċi ma għandhomx effetti negattivi fuq id-drittijiet fundamentali taċ-ċittadini.

5.3.        Impatti ambjentali

L-impatt tal-għażliet politiċi vvalutati dwar l-emissjonijiet tad-CO2 jibqa’ limitat.

5.4.        Tqabbil tal-għażliet

Għażla 2 tiġi ppreferuta aktar mill-oħrajn minħabba li hija l-aktar waħda effettiva u effiċjenti biex jintlaħqu l-objettivi politiċi.

Għażla 2a hija kemxejn aktar ippreferuta mit-2b minħabba li ż-żamma tal-limitu ta’ dewmien ta’ 3 sigħat bħal f’2b tista’ tixpruna aktar kanċellazzjonijiet[8] u l-fatt li d-dritt (li ma nbidilx) għall-kumpens ifeġġ diġà wara 3 sigħat, jiġifieri qabel id-dritt (li ma nbidilx) għal rimborż (5 sigħat), jista’ jfixkel lill-passiġġieri.

Ma hemm l-ebda kriterju oġġettiv għaliex għandu jiġi ppreferut subvarjant ta' għażla 2a aktar minn ieħor. Hija kwistjoni ta’ ġudizzju politiku jekk tnaqqis addizzjonali tal-ispejjeż – permezz tal-bidliet fil-livelli ta’ kumpens jew tibdil addizzjonali fil-limiti taż-żmien għad-dewmien – jitqies bħala ġustifikat minkejja l-possibbiltajiet imnaqqsa għall-kumpens għall-passiġġieri.

6.           Monitoraġġ u evalwazzjoni

Il-Kummissjoni tevalwa kif xieraq l-implimentazzjoni tar-Regolament 4 snin wara l-adozzjoni tiegħu mill-Kunsill u l-Parlament. L-evalwazzjoni se titwettaq mill-Kummissjoni f’kooperazzjoni mill-qrib mal-partijiet interessati.

Ir-rapporti annwali tal-NEBs se jibqgħu l-għodda ewlenija għall-monitoraġġ tal-livell ta’ konformità u l-konsistenza tal-politiki ta’ infurzar nazzjonali. Il-Kummissjoni tista’ tfassal rapporti regolari bbażati fuq rapporti nazzjonali, ikkumplimentati fejn meħtieġa bl-esperjenza tagħha, minn studji ad hoc jew informazzjoni minn stħarriġ tal-passiġġieri.

[1]               Ir-Regolament (KE) Nru 261/2004 tal-Parlament Ewropew u tal-Kunsill tal-11 ta’ Frar 2004 li jistabbilixxi regoli komuni dwar il-kumpens u l-assistenza għal passiġġieri fil-każ li ma jitħallewx jitilgħu u ta’ kanċellazzjoni jew dewmien twil ta’ titjiriet, u li jħassar ir-Regolament (KEE) Nru 295/91, ĠU L 46/1 tas-17-2-2004.

[2]               Ir-Regolament (KE) Nru 2027/97 tal-Kunsill tad-9 ta’ Ottubru 1997 dwar ir-responsabbiltà ta’ trasportaturi bl-ajru fl-eventwalità ta’ inċidenti (ĠU L 285, 17.10.1997, p.1) kif emendat bir-Regolament (KE) Nru 889/2002 tal-Parlament Ewropew u tal-Kunsill tat-13 ta’ Mejju 2002 (ĠU L 140, 30.5.2002, p.2)

[3]               Il-Konvenzjoni għall-Unifikazzjoni ta’ Ċerti Regoli għat-Trasport Internazzjonali bl-Ajru (il-Konvenzjoni ta' Montreal), ĠU L 194 tat-18.07.2001, http://europa.eu/legislation_summaries/transport/air_transport/l24255_en.htm

[4]               L-istudji kkalkulaw li l-valur ta' ħin, wara l-aġġustament għall-inflazzjoni, huwa bejn EUR 40 kull siegħa (għall-ivvjaġġar turistiku) u EUR 98 kull siegħa (għall-ivvjaġġar fuq xogħol). Minħabba li qegħdin nirreferu għal ammonti standardizzati li jkopru l-ħsara komuni għall-passiġġieri kollha, dan huwa l-aktar valur baxx li għandu jittieħed bħala referenza.

[5]               Ir-Regolament (KE) Nru 1008/2008 tal-Parlament Ewropew u tal-Kunsill tal-24 ta’ Settembru 2008 dwar regoli komuni għall-operat ta’ servizzi tal-ajru fil-Komunità, ĠU L 293 tal-31.10.2008.

[6]               L-ebda mikrointrapriża mhi kkonċernata minn dan ir-Regolament.

[7]               Din il-miżura, ibbażata fuq dejta tal-2011, tikkonċerna anqas minn 0.05 % tal-passiġġieri kollha koperti mir-Regolament

[8]               Kif juru l-mudelli ta’ ottimizzazzjoni tal-iskedi tal-linji tal-ajru