This document is an excerpt from the EUR-Lex website
Document 52013PC0857
Proposal for a COUNCIL RECOMMENDATION on a Quality Framework for Traineeships
Proposta għal RAKKOMANDAZZJONI TAL-KUNSILL dwar Qafas tal-Kwalità għall-Apprendistati
Proposta għal RAKKOMANDAZZJONI TAL-KUNSILL dwar Qafas tal-Kwalità għall-Apprendistati
/* COM/2013/0857 final - 2013/0431 (NLE) */
Proposta għal RAKKOMANDAZZJONI TAL-KUNSILL dwar Qafas tal-Kwalità għall-Apprendistati /* COM/2013/0857 final - 2013/0431 (NLE) */
MEMORANDUM TA’ SPJEGAZZJONI 1. IL-KUNTEST TAL-PROPOSTA Matul dawn l-aħħar
żewġ deċenni, l-apprendistati saru punt tad-dħul importanti
fis-suq tax-xogħol għaż-żgħażagħ. It-trawwim tal-impjegabbiltà u l-produttività
taż-żgħażagħ huwa kruċjali biex jersqu lejn
is-suq tax-xogħol. Madankollu, minkejja li huma
dejjem aktar jirrappreżentaw karatteristika fissa fis-swieq
tax-xogħol tagħna, it-tixrid tagħhom ġab miegħu
tħassib dejjem jikber dwar il-kontenut tat-tagħlim u
l-kundizzjonijiet tax-xogħol. Jekk l-esperjenzi ta’
taħriġ huma verament biex jiffaċilitaw l-aċċess
għall-impjieg, għandhom joffru kontenut ta’ tagħlim ta’ kwalità
u kundizzjonijiet tax-xogħol adegwati, u ma għandhomx isiru mod ta'
impjiegi regolari irħis. F'Diċembru 2012,
il-Kummissjoni ppreżentat il-Pakkett għall-Impjieg
taż-Żgħażagħ[1]
inkluża t-tnedija tal-konsultazzjoni tat-tieni stadju
tal-partijiet soċjali dwar Qafas tal-Kwalità għall-Apprendistati[2] (QFT), wara sejħiet imtennija
mill-Parlament Ewropew[3]
u l-Kunsill Ewropew[4].
Il-konsultazzjonijiet tal-Kummissjoni[5]
dwar il-kwistjoni flimkien ma’ studji oħrajn u stħarriġ,
identifikaw firxa ta’ problemi li bħalissa qed jolqtu l-apprendistati
fl-UE. Il-kwistjonijiet jikkonċernaw żewġ oqsma b’mod
partikolari: ·
kontenut ta' tagħlim mhux suffiċjenti (jiġifieri
l-apprendisti jintalbu jagħmlu xogħol menjali); kif ukoll ·
kondizzjonijiet tax-xogħol mhux xierqa
(sigħat twal ta’ xogħol, kopertura mhux sodisfaċenti
għas-saħħa u s-sikurezza jew riskji relatati max-xogħol,
ftit jew l-ebda ħlas/kumpens, sitwazzjoni legali mhux ċara, tul ta'
żmien estiż, eċċ.). Barra minn hekk, il-partijiet interessati
enfasizzaw il-kwistjoni li sehem kbir ta’ apprendistati bla ħlas jew bi
ħlas baxx jista' joħoloq problema ta’ nuqqas ta' aċċess
ugwali[6]
u jwassal ukoll għal tendenza li ħaddiema bis-salarju jiġu
sostitwiti bl-apprendisti[7].
Barra minn hekk, jista’ jagħti l-każ li l-apprendisti ma jkunux jafu
b’mod ċar jekk hux se jirċievu ħlas jew kumpens, jew ma
jiġux informati dwar kondizzjonijiet tax-xogħol ewlenin
bħad-dritt ta' assikurazzjoni fuq is-saħħa u kontra
l-inċidenti jew id-dritt tal-btala. Aktar trasparenza fir-rigward tal-kontenut
tat-tagħlim u l-kondizzjonijiet tax-xogħol tal-apprendistat se
twassal għal funzjonament aktar effiċjenti tas-suq tax-xogħol.
L-Ewrobarometru tal-2013 dwar l-apprendistati jissuġġerixxi li
t-trasparenza dwar il-kondizzjonijiet tax-xogħol fl-avviżi u
r-reklami tal-postijiet battala hemm fejn titjieb. L-oqfsa regolatorji
tal-Istati Membri b'mod ġenerali u l-istrettezza tar-regolamentazzjoni
b’mod partikolari jvarjaw ħafna kemm fost it-tipi differenti ta’
apprendistati kif ukoll minn Stat Membru għal ieħor. F’xi Stati
Membri l-ebda definizzjoni legali ta’ apprendistat ma teżisti. Filwaqt li l-frammentazzjoni attwali tar-regolamentazzjoni u n-nuqqas ta’
kriterji ta’ kwalità b'mod ġenerali huma notevoli, għarfien komuni
ta’ x'inhu apprendistat u l-istandards minimi tiegħu jista' jgħin
fit-tfassil tal-politika u tal-istrateġija regolatorja tal-Istati Membri. Fl-aħħar nett, hemm evidenza li
l-għadd ta’ apprendistati transnazzjonali huwa baxx ħafna[8], minkejja rati
għolja ta’ mobilità fost l-istudenti, pereżempju fil-programm
Erasmus. Din tidher li hija opportunità importanti mitlufa għal dak li
huwa tnaqqis tal-qgħad taż-żgħażagħ permezz
tal-mobilità: l-apprendistati transnazzjonali jistgħu jkunu fattur ewlieni
fl-għajnuna għaż-żgħażagħ biex jaqbdu
xogħol fi Stat Membru ieħor. QFT madwar
l-Ewropa kollha jgħin biex jiġi indirizzat l-għadd baxx ta'
apprendistati transnazzjonali. Dan jgħin jindirizza xkiel ewlieni
għall-mobilità transkonfinali, in-nuqqas ta’ informazzjoni, f’żona
ta’ frammentazzjoni regolatorja kbira. L-iżvilupp ta' QFT huwa wkoll
essenzjali għall-estensjoni tal-EURES għall-apprendistati, kif mitlub
mill-Kunsill Ewropew fil-konklużjonijiet tiegħu ta'
Ġunju 2012[9]. Bi tweġiba għal qgħad
għoli ħafna fost iż-żgħażagħ f'diversi Stati
Membri u b'segwitu għal impenji preċedenti, il-Kummissjoni pproponiet
Rakkomandazzjoni dwar it-Twaqqif ta’ Garanzija għaż-Żgħażagħ[10], li l-Kunsill adotta
fit-22 ta’ April 2013[11].
Din tagħmel sejħa fost l-Istati Membri biex jiżguraw li
ż-żgħażagħ kollha sal-età ta’ 25 sena
jirċievu offerta ta’ xogħol ta’ kwalità tajba, edukazzjoni kontinwa,
apprendistat jew taħriġ fi żmien erba' xhur minn meta jsiru
qiegħda jew minn meta jwaqqfu l-edukazzjoni formali. Rekwiżiti
ta’ kwalità għall-apprendistati huma essenzjali għal implimentazzjoni
effettiva tar-Rakkomandazzjoni. Fuq dan l-isfond, il-proposta attwali
għal Rakkomandazzjoni tal-Kunsill tfittex li tiżgura li
l-apprendistati jiffaċilitaw b'mod effiċjenti t-tranżizzjonijiet
mill-edukazzjoni għax-xogħol u b’hekk iżidu l-impjegabbiltà
taż-żgħażagħ. Il-proposta tistabbilixxi linji gwida li
jistgħu jiżguraw kontenut ta’ tagħlim ta’ kwalità għolja u
kondizzjonijiet ta’ xogħol xierqa. Hija tagħti ħarsa wkoll lejn
kif il-Kummissjoni se tappoġġja l-azzjoni tal-Istati Membri permezz
tal-qafas tal-iffinanzjar tal-UE, l-iskambju ta’ prassi tajba u
l-monitoraġġ. Hija tkopri l-hekk imsejħa apprendistati "għas-suq
miftuħ", jiġifieri apprendistati miftiehma bejn apprendist u
fornitur tal-apprendistati (kummerċjali, mhux bi skop ta’ qligħ, jew
mal-gvern) mingħajr l-involviment ta’ parti terza, ġeneralment wara
t-tlestija tal-istudji u/jew bħala parti ta’ tfittix għal impjieg.
Ir-Rakkomandazzjoni proposta ma tindirizzax apprendistati li jiffurmaw parti
minn kurrikuli akkademiċi jew vokazzjonali, lanqas dawk li jiffurmaw parti
minn taħriġ professjonali obbligatorju (eż. il-mediċina,
l-arkitettura eċċ). Il-proposta hija akkumpanjata minn
valutazzjoni tal-impatt li tippreżenta r-riżultati ta’
konsultazzjonijiet mal-partijiet interessati, tħares f’aktar dettall lejn
il-problemi li jirrigwardaw l-apprendistati, tittratta problemi legali u
kwistjonijiet ta’ sussidjarjetà, u tipprovdi analiżi ta’
għażliet possibbli biex tindirizza l-problema. 2. IR-RIŻULTATI
TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET
TAL-IMPATT Konsultazzjoni pubblika Il-Kummissjoni kkonsultat ma’ firxa
wiesgħa ta’ partijiet interessati dwar il-problemi li jirrigwardaw
l-apprendistati u dwar soluzzjonijiet possibbli. B'reazzjoni għal konsultazzjoni pubblika
bejn April u Lulju 2012, it-trejdjunjins, l-NGOs, l-organizzazzjonijiet
taż-żgħażagħ, l-istituzzjonijiet edukattivi u parti
kbira mill-parteċipanti individwali b'mod ġenerali appoġġaw
inizjattiva tal-Kummissjoni. Filwaqt li b'mod ġenerali huma favur
l-inizjattiva, l-organizzazzjonijiet ta’ min iħaddem, il-kmamar
tal-kummerċ u l-Istati Membri ta’ sikwit rreferew għall-ħtieġa
li l-qafas jinżamm flessibbli biżżejjed biex iqis id-diversità
tal-prassijiet nazzjonali. Il-biċċa l-kbira ta' dawk li
wieġbu qablu mal-analiżi tal-Kummissjoni (ftehim ta' apprendistat
bil-miktub, għanijiet u kontenut tat-tagħlim ċari[12], żmien limitat,
kopertura tas-sigurtà soċjali xierqa eċċ.). L-impriżi u xi
organizzazzjonijiet ta’ min iħaddem sostnew li r-rimunerazzjoni u
l-kwistjonijiet ta’ protezzjoni soċjali ma jaqgħux taħt
il-kompetenza tal-UE. Konsultazzjoni mal-imsieħba
soċjali Bejn Ottubru 2012 u Frar 2013 seħħet
konsultazzjoni f'żewġ stadji mal-imsieħba soċjali dwar
l-inizjattiva tal-QFT. L-imsieħba soċjali tennew għal
darb'oħra l-pożizzjonijiet tagħhom li kienu sostenew
fil-konsultazzjoni pubblika, bin-naħa trejdunjonistika favur inizjattiva
aktar b’saħħitha filwaqt li dawk li jħaddmu wrew tħassib
dwar il-flessibbiltà u l-piż fuq in-negozju. Madankollu, ma nedew ebda
negozjati dwar ftehim possibbli skont l-Artikolu 154 tat-TFUE. Fil-11 ta’ Ġunju 2013, ETUC,
BUSINESSEUROPE, UEAPME u CEEP ppreżentat Qafas ta’ Azzjonijiet dwar
l-Impjieg taż-Żgħażagħ (FoA), li rriżultaw minn
negozjati ta’ djalogu soċjali filwaqt li ttieħed kont tal-intenzjoni
tal-Kummissjoni li tipproponi Rakkomandazzjoni tal-Kunsill dwar Qafas Ewropew
tal-Kwalità fl-Apprendistati. L-imsieħba soċjali beħsiebhom
jieħdu aktar azzjonijiet konġunti lejn il-Kunsill u l-Parlament
Ewropew abbażi ta’ proposta li se tagħmel il-Kummissjoni għal
Rakkomandazzjoni tal-Kunsill dwar QFT Ewropea. Intrapriżi żgħar u ta’ daqs
medju (SMEs) Bejn Marzu u Ġunju 2013, seħħ
test tal-SMEs biex jinvestiga mill-perspettiva ta' min iħaddem il-kwalità
tal-apprendistati pprovduti mill-SMEs u jkejjel l-ispejjeż ta’ konformità
ta’ miżuri potenzjali fi ġdan QFT. B’kollox, 914-il SME wieġbu
għall-istħarriġ. It-test enfasizza l-importanza
tal-apprendistati għall-ħolqien tal-impjiegi fl-SMEs, u
l-maġġoranza ta’ dawk li wieġbu (71,9 %) jaraw
l-apprendistati bħala mezz biex jagħżlu u jħarrġu
l-impjegati futuri. Dan ikkonferma wkoll li għadd kbir ta’ SMEs (9 minn
10) ma jinħolqulhom ebda problemi bl-elementi ta’ kwalità proposti. Stħarriġ tal-Ewrobarometru dwar
l-apprendistati F’Mejju 2013, sar stħarriġ
tal-Ewrobarometru fl-UE-27 u fil-Kroazja biex jikkwantifikaw it-tħassib
dwar il-kwalità tal-apprendistati. Ir-riżultati ta’ dan
l-istħarriġ rappreżentattiv mal-UE kollha, l-ewwel wieħed
li qatt sar dwar is-suġġett, kienu jinkludu: ·
konferma dwar kemm huma mifruxa l-apprendistati: 46 %
ta' dawk li għandhom bejn 18-35 mistħarrġa kienu lestew
tal-inqas wieħed; ·
wieħed minn kull tliet apprendistati nstab
mhux sodisfaċenti, jew f'dawk li huma kondizzjonijiet tax-xogħol (25 %
tal-apprendistati kollha), kontenut ta' tagħlim (18 %) jew it-tnejn
flimkien; ·
fattur ewlieni fl-iskarsezza tal-apprendistati
transnazzjonali (9 % tal-apprendistati kollha) huwa n-nuqqas ta’
informazzjoni: 38 % ta’ dawk li huma interessati kkwotaw informazzjoni
insuffiċjenti dwar ir-regolamenti ta;l-apprendistat fi Stati Membri
oħra. Analiżi ekonometrika msejsa fuq
ir-riżultati tal-Ewrobarometru żvelat korrelazzjoni sinifikanti bejn
il-kwalità tal-apprendistati u ‘l-eżitu tal-impjieg”. Fi kliem ieħor,
dawk li kienu lestew apprendistat ta’ standard baxx kellhom b'mod sinifikanti
inqas probabbiltà li jsibu impjieg wara. Valutazzjoni tal-impatt It-tieni stadju ta’ konsultazzjoni
mal-imsieħba soċjali kien akkumpanjat minn dokument analitiku[13] dwar il-problemi
rigward il-kwalità tal-apprendistati, li jistabbilixxi r-reazzjonijiet
possibbli ta’ politika. Dan id-dokument ġie estiż fl-2013
biex jifforma dik li tkun tassew valutazzjoni tal-impatt (VI)[14] b'dejta li qabel ma
kinitx disponibbli dwar l-għadd u l-kwalità tal- apprentistati, u evidenza
ġdida tal-korrelazzjoni bejn il-kwalità u l-prospetti ta’ impjieg. Il-VI tidentifika u tanalizza għażliet ta’
politika biex jiżdied is-sehem tal-apprendistati ta’ kwalità, partikolarment
billi twaqqaf livelli ta' ‘l-aqwa prassi’ u tiskoraġġixxi lil min
iħaddem milli joffri apprendistati li ma jilħqux il-livell
meħtieġ. Barra minn hekk, tanalizza proposti ġodda dwar
it-trasparenza biex isir iktar faċli
għaż-żgħażagħ li jiskrinjaw l-apprendistati
għall-kwalità. Il-VI teżamina erba’
alternattivi minbarra x-xenarju ta’ referenza: ·
li twaqqaf websajt informattiva; ·
li tistabbilixxi tikketti ta’ kwalità volontarji; ·
li tipproponi Rakkomandazzjoni lill-Kunsill; u ·
li tipproponi Direttiva. Hija tikkonkludi li
l-aktar għażla effettiva, effiċjenti u proporzjonata tkun
proposta tal-Kummissjoni għal Rakkomandazzjoni tal-Kunsill dwar QFT biex
tiġi trasposta mill-Istati Membri fi prassi nazzjonali u/jew fis-sistema
legali nazzjonali. Din tkun tirrakomanda li l-Istati Membri
jiżguraw li l-konklużjoni ta’ ftehim bil-miktub
għall-apprendistati tkun obbligatorja. Il-ftehim
għandu jinkludi informazzjoni dwar l-għanijiet edukattivi
tal-apprendistat, il-kondizzjonijiet tax-xogħol, jekk hiex ipprovduta remunerazzjoni/kumpens,
id-drittijiet u l-obbligi skont il-liġi tal-UE u dik nazzjonali
applikabbli, kif ukoll it-tul ta' żmien tal-apprendistat. Barra minn hekk, rekwiżiti addizzjonali
dwar it-trasparenza jiġġeneraw inċentivi għal apprendistati
ta' kwalità u/jew diżinċentivi għal apprendistati taħt
il-livell meħtieġ. Skont l-alternattiva ppreferuta, l-avviżi
ta’ postijiet battala ta' apprendistat iridu jindikaw jekk l-apprendistat hux
bi ħlas jew le u, jekk l-apprendistat huwa bi ħlas, il-livell ta’
ħlas/kumpens. Barra minn hekk, il-fornituri ta’ apprendistati se jintalbu
jiżvelaw il-proporzjon ta' apprendisti li ngħataw kuntratt ta’
impjieg wara t-tmiem tal-apprendistat tagħhom. 3. L-ELEMENTI LEGALI
TAL-PROPOSTA Bażi legali Il-bażijiet legali għal din l-inizjattiva
huma l-Artikoli 153, 166 u 292 tat-TFUE. Skont l-Artikolu 292 tat-TFUE,
il-Kunsill jista’ jadotta rakkomandazzjonijiet fuq il-bażi ta’ proposta
tal-Kummissjoni fl-oqsma ta’ kompetenza tal-UE. Skont l-Artikolu 153 TFUE, l-Unjoni se
tappoġġa u tikkumplementa l-attivitajiet tal-Istati Membri, inter
alia, fil-qasam tal-kundizzjonijiet tax-xogħol, is-sigurtà
soċjali u l-protezzjoni soċjali tal-ħaddiema, kif ukoll
l-integrazzjoni tal-persuni esklużi mis-suq tax-xogħol u
l-ġlieda kontra l-esklużjoni soċjali. Skont
il-ġurisprudenza tal-Qorti tal-Ġustizzja, l-apprendistati li huma
remunerati jaqgħu taħt l-Artikolu 153. Sabiex ikunu koperti anki
l-apprendistati mhux remunerati, l-Artikolu 166 TFUE ġie miżjud
bħala bażi legali addizzjonali. Skont din id-dispożizzjoni
l-Unjoni għandha timplimenta politika ta’ taħriġ vokazzjonali,
li għandha tappoġġa u tissupplimenta l-azzjoni tal-Istati
Membri, filwaqt li tirrispetta għal kollox ir-responsabbiltà tal-Istati
Membri għall-kontenut u l-organizzazzjoni tat-taħriġ vokazzjonali.
Għaldaqstant, skont
jekk l-apprendistat huwiex remunerat jew le, l-Artikolu 153 jew 166 TFUE
japplika rispettivament. Id-dispożizzjonijiet
tal-Artikolu 153 TFUE ma japplikawx għall-paga, bis-saħħa
tal-Artikolu 153. 5 TFUE. Madankollu, din id-dispożizzjoni
tal-aħħar mhix ta' xkiel biex jiġu indirizzati l-problemi
marbuta mat-trasparenza tal-paga, billi tirrakkomanda li l-ftehim bil-miktub
dwar l-apprendistat jiċċara jekk ir-remunerazzjoni tkunx applikabbli
jew le. Tista' ssir analoġija ma’ strumenti
oħra tal-UE bħad-Direttiva 91/533/KEE, dwar l-obbligu ta’ min
iħaddem li jgħarraf impjegat bil-kondizzjonijiet applikabbli
għall-kuntratt jew għar-relazzjoni tal-impjieg. Dik id-Direttiva
tipprovdi fl-Artikolu 2 li: '1. Min iħaddem għandu jkun obbligat
li jgħarraf lill-ħaddiem... bl-aspetti essenzjali tal-kuntratt jew
tar-relazzjoni tal-impjieg. 2. L-informazzjoni imsemmija f'.....
għandha tkopri mill-inqas dan li ġej: (h) l-ammont bażiku tal-bidu,
l-elementi komponenti l-oħra u l-frekwenza tal-pagament tar-remunerazzjoni
li għalihom il-ħaddiem hu titolat...[15] Bl-istess mod, il-Proposta għal Direttiva
dwar il-kondizzjonijiet ta’ dħul u residenza ta’ nazzjonali ta’
pajjiż terz fil-qafas ta’ trasferiment intra-ażjendali[16] tindirizza l-kwistjoni
ta’ remunerazzjoni bħala element ta’ ittra ta’ missjoni mingħand min
iħaddmu, jew ta’ kuntratt. It-taħriġ huwa
għan ċentrali fil-politika edukattiva u tal-impjiegi tal-UE. Huwa
wkoll parti integrali tal-moviment ħieles tal-persuna skont l-Artikolu 45
tat-TFUE — libertà fundamentali protetta mit-Trattat. Minħabba
d-dimensjoni transnazzjonali tal-apprendistati, l-azzjonijiet tal-Istati Membri
individwali mhux se jilħqu l-għanijiet tal-inizjattiva proposta —
biex b'mod komprensiv titjieb il-kwalità tal-apprendistati li jseħħu
fl-UE. Fl-aħħar nett,
il-Karta tad-Drittijiet Fundamentali tal-Unjoni Ewropea tinkludi wkoll
għadd ta’ drittijiet u libertajiet li jistgħu jkunu rilevanti
għal miżuri futuri li jikkonċernaw l-apprendistati,
partikolarment l-Artikolu 21 (Non-diskriminazzjoni), l-Artikolu 29 (Dritt ta’
aċċess għal servizzi ta’ impjieg), l-Artikolu 31
(Kundizzjonijiet tax-xogħol ġusti u xierqa) u l-Artikolu 32
(Projbizzjoni ta’ impjieg ta’ tfal u protezzjoni ta’
żgħażagħ fuq ix-xogħol). Sussidjarjetà Il-prinċipju tas-sussidjarjetà japplika safejn il-proposta ma
taqax taħt il-kompetenza esklużiva tal-Unjoni. Fil-każ
tal-apprendistati, soluzzjoni għall-UE kollha tippreżenta diversi
vantaġġi: (1)
Il-linji gwida tal-kwalità adottati jew proposti
minn korpi differenti fi Stati Membri differenti ġeneralment jindikaw
elementi simili li huma mistennija li jkunu l-qofol għat-tisħiħ
tal-kwalità tal-apprendistati. Dan jissuġġerixxi li d-definizzjoni
tal-istandards tal-kwalità għall-apprendistati m’għandhomx ikunu
fundamentalment differenti skont il-prassi nazzjonali jew
iċ-ċirkostanzi lokali. (2)
Soluzzjoni għall-UE kollha twassal għal
benefiċċji f’termini ta’ mobilità tal-apprendisti.
Iż-żgħażagħ se jsibuha eħfef biex
jaċċettaw apprendistat f’pajjiż ieħor jekk l-eżistenza
ta’ prassijiet standard jew regoli tagħtihom għarfien ċar ta’
dak li jistgħu jistennew. (3)
L-esperjenza turi li, minħabba l-problemi ta’
koordinazzjoni, il-proċess tad-definizzjoni ta’ standards ta’ kwalità
aċċettati internazzjonalment jista’ jseħħ aktar malajr jekk
l-istituzzjonijiet supranazzjonali jodattaw rwol ta' koordinazzjoni u ta'
appoġġ. L-Istati Membri jistgħu b’mod
indipendenti jadottaw miżuri biex itejbu l-kwalità tal-apprendistati.
Fil-prattika, madankollu, huma talbu ripetutament lill-Kummissjoni biex tadotta
QFT (ara fost oħrajn il-Konklużjonijiet ta' tliet Kunsilli Ewropej
riċenti: Diċembru 2012, Frar 2013 u Ġunju 2013). F’sitwazzjoni ta’ oqfsa regolatorji
diverġenti, ikun ta’ għajnuna li jkun hemm fehim komuni ta’ x'inhu
apprendistat u tal-istandards minimi tiegħu. Dan se jgħin biex
jissawwru l-approċċi regolatorji tal-Istati Membri, billi
l-istandards proposti għandhom jiġu operazzjonalizzati permezz
tal-approċċ regolatorju speċifiku tal-Istati Membri. B'dan il-mod,
l-UE tista' tappoġġja b'mod konkret l-Istati Membri
fl-implimentazzjoni tal-linja gwida nru. 8 tal-programm Ewropa 2020, b'mod
partikolari "billi jippromulgaw skemi biex jgħinu
liż-żgħażagħ u b'mod partikolari dawk li ma humiex
f'impjieg, f'istituzzjoni ta' edukazzjoni jew taħriġ isibu
xogħol inizjali, esperjenza ta' impjieg jew opportunitajiet ta'
edukazzjoni jew taħriġ ulterjuri, inklużi l-apprendistati, u għandhom
jintervjenu b'mod rapidu meta ż-żgħażagħ jitilfu
l-impjieg." Dan jindirizza ostaklu
ewlieni għall-mobilità transkonfinali, in-nuqqas ta' informazzjoni,
f'qasam ta' frammentazzjoni regolatorja kbira, u r-Rakkomandazzjoni tgħin
biex tirfed l-appoġġ ipprovdut minn Erasmus+[17] u l-iżvilupp
ulterjuri ta' EURES[18]. Proporzjonalità L-istrument
tar-Rakkomandazzjoni tal-Kunsill jippermetti rispett strett tal-prinċipju
tal-proporzjonalità: L-Istati Membri li diġà introduċew
fil-leġiżlazzjoni tagħhom jew fil-prassi nazzjonali
s-salvagwardji proposti u l-elementi tal-kwalità mhux se jinħtieġ
minnhom li jaġixxu. L-Istati Membri għandhom ikunu ħielsa wkoll
li jivvalutaw jekk huwiex opportun li jmorru lil hinn mill-QFT propost
hawnhekk, notevolment biex jinkludi wkoll il-kwistjoni ta’ rimunerazzjoni
minima, li l-QFT ma jmissx. 4. IMPLIKAZZJONI BAĠITARJA Mhux rilevanti. 5. ELEMENTI FAKULTATTIVI Mhux rilevanti. 2013/0431 (NLE) Proposta għal RAKKOMANDAZZJONI TAL-KUNSILL dwar Qafas tal-Kwalità
għall-Apprendistati IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, u b’mod partikolari l-Artikoli 153,
166 u 292 tiegħu, Wara li kkunsidra l-proposta mill-Kummissjoni
Ewropea, Billi: (1) Iż-żgħażagħ
intlaqtu partikolarment ħażin matul il-kriżi. Ir-rati ta’
qgħad fost iż-żgħażagħ laħqu l-ogħla
livelli storiċi fis-snin li għaddew f’diversi Stati Membri,
mingħajr ebda sinjal ta’ tnaqqis fuq medda qasira ta’ żmien.
It-trawwim tal-impjegabbiltà u l-produttività
taż-żgħażagħ huwa kruċjali biex jersqu lejn
is-suq tax-xogħol. (2) Tranżizzjoni bla xkiel
mill-edukazzjoni għall-impjieg hija kruċjali biex ittejjeb
iċ-ċans taż-żgħażagħ fis-suq
tax-xogħol. It-titjib tal-edukazzjoni
taż-żgħażagħ u l-iffaċilitar
tat-tranżizzjoni tagħhom lejn l-impjieg huma meħtieġa biex
jilħqu l-mira ewlenija tal-Ewropa 2020 ta’ 75 % fl-impjieg ta’
persuni bejn l-20 u l-64 sena sal-2020. Il-linja gwida nru 8 dwar il-politika
tax-xogħol tal-Istati Membri tistieden lill-Istati Membri biex jippromulgaw
“skemi biex jgħinu liż-żgħażagħ u b'mod
partikolari dawk li ma humiex f'impjieg, f'istituzzjoni ta' edukazzjoni jew
taħriġ isibu xogħol inizjali, esperjenza ta' impjieg jew
opportunitajiet ta' edukazzjoni jew taħriġ ulterjuri, inklużi
l-apprendistati, u għandhom jintervjenu b'mod rapidu meta
ż-żgħażagħ jitilfu l-impjieg”[19]. (3) Matul dawn l-aħħar
żewġ deċenni, l-apprendistati saru punt tad-dħul importanti
fis-suq tax-xogħol għaż-żgħażagħ. (4) Se jkun hemm spejjeż
soċjoekonomiċi jekk l-apprendistati, partikolarment dawk ripetuti,
jissostitwixxu l-impjieg regolari, notevolment pożizzjonijiet ta' livell
ta’ dħul ġeneralment offruti liż-żgħażagħ.
Barra minn hekk, apprendistati ta’ kwalità baxxa, speċjalment dawk bi ftit
kontenut ta’ tagħlim, ma jwasslux għal progressi sinifikanti
fil-produttività lanqas ma fihom xi effett ta' messaġġ pożittiv.
L-Ispejjeż soċjali jirreferu wkoll għal apprentistati bla
ħlas li jistgħu jillimitaw l-opportunitajiet tal-karriera ta’ dawk li
ġejjin minn sfond żvantaġġjat. (5) Hemm evidenza li jeżistu
rabtiet bejn il-kwalità tal-apprendistat u l-eżitu tal-impjieg. Il-valur
tal-apprendistati biex titħaffef it-tranżizzjoni lejn l-impjieg
jiddependi fuq il-kwalità tagħhom f’termini ta' kontenut tat-tagħlim
u l-kundizzjonijiet tax-xogħol. L-apprendistati ta' kwalità jġibu
benefiċċji diretti ta’ produttività, itejjbu l-addatament
tal-ħaddiema għas-suq tax-xogħol u jippromwovu l-mobilità,
notevolment bit-tnaqqis tal-ispejjeż tat-tfittix u t-tqabbil kemm
għall-intrapriżi kif ukoll
għaż-żgħażagħ. (6) Ir-Rakkomandazzjoni
tal-Kunsill dwar it-twaqqif ta' Garanzija
għaż-Żgħażagħ[20]
titlob li l-Istati Membri jiżguraw li ż-żgħażagħ
kollha sal-età ta’ 25 sena jirċievu offerta ta’ xogħol ta’
kwalità tajba, edukazzjoni kontinwa, apprendistat jew taħriġ fi
żmien erba' xhur minn meta jsiru qiegħda jew minn meta jwaqqfu
l-edukazzjoni formali. (7) Diversi studji u
stħarriġiet żvelaw li l-problemi tal-kwalità jolqtu proporzjon
sinifikanti ta’ apprendistati, b’mod partikolari dawk fejn ebda istituzzjoni
edukattiva jew ta’ taħriġ ma hija responsabbli direttament
għall-kontenut tat-tagħlim u l-kundizzjonijiet tax-xogħol
tal-apprendistat (l-hekk imsejħa apprendistati ta' ‘suq
miftuħ"). (8) L-evidenza turi li proporzjon
sinifikanti tal-apprendisti jintalbu jagħmlu xogħol menjali
mingħajr kontenut ta’ tagħlim suffiċjenti. Apprendistat ta’
kwalità għandu jipprovdi kontenut ta’ tagħlim solidu u bis-sens,
notevolment bl-identifikazzjoni tal-ħiliet speċifiċi li jridu
jinkisbu, superviżjoni u mentoraġġ tal-apprendist kif ukoll
il-monitoraġġ tal-progress tiegħu/tagħha. (9) Ġew identifikati wkoll
problemi fir-rigward tal-kondizzjonijiet tax-xogħol, eż. sigħat
twal ta’ xogħol, kopertura tas-sigurtà soċjali, is-saħħa u
s-sikurezza jew riskji relatati max-xogħol, ftit jew l-ebda remunerazzjoni
u/jew kumpens, nuqqas ta’ ċarezza dwar ir-reġimi legali applikabbli,
u ż-żieda fit-tul ta' żmien tal-apprendistat. (10) L-apprendistati bħalissa
huma regolati f’modi differenti ħafna madwar l-Unjoni. Fejn hemm
ir-regolamentazzjoni, hija tipprovdi elementi ta’ kwalità differenti jew
prassijiet differenti ta' implimentazzjoni, filwaqt li l-apprendistati
jibqgħu fil-biċċa l-kbira tagħhom mhux regolati f’xi Stati
Membri u f'xi setturi. Sehem konsiderevoli ta’ fornituri ta' apprendistati
jużaw l-apprendisti bi skop ta' xogħol irħis jew bla ħlas,
li spiss ikun ġej minn nuqqas ta’ qafas jew strument regolatorju, jew minn
nuqqas ta’ trasparenza rigward il-kondizzjonijiet tax-xogħol
għall-apprendistati u l-kontenut tat-tagħlim tagħhom. (11) Qafas ta’ Kwalità
għall-Apprendistati se tappoġġja t-titjib tal-kondizzjonijiet
tax-xogħol u l-kontenut tat-tagħlim tal-apprendistati.
Il-konklużjoni ta’ ftehim bil-miktub ta' apprendistat li jindika
l-għanijiet edukattivi, kondizzjonijiet tax-xogħol adegwati,
drittijiet u obbligi u tul ta’ żmien raġonevoli tikkostitwixxi
l-element ewlieni tal-Qafas ta’ Kwalità għall-Apprendistati. (12) In-nuqqas ta’ informazzjoni
hija waħda mill-kawżi ta’ apprendistati ta’ kwalità baxxa u hija
problema ħafna iktar mifruxa fir-rigward tal-apprendistati aktar minn
tal-impjieg regolari. Aktar rekwiżiti ta’ trasparenza għal avviżi
jew reklami ta' pożizzjonijiet ta' apprendistat jgħinu biex jitjiebu
l-kondizzjonijiet tax-xogħol u jistimolaw il-mobbiltà transkonfinali. (13) L-imsieħba soċjali
għandhom rwol ewlieni fit-tfassil, l-implimentazzjoni u
l-monitoraġġ ta’ politika u programmi ta’ taħriġ.
Kooperazzjoni bejn l-imsieħba soċjali u l-awtoritajiet rilevanti
tista’ timmira biex iż-żgħażagħ jiġu pprovduti
b’informazzjoni mmirata lejn opportunitajiet ta’ karriera disponibbli u
l-ħiliet meħtieġa fis-swieq tax-xogħol, kif ukoll dwar
id-drittijiet u r-responsabbiltajiet tal-apprendisti. Barra minn hekk,
l-imsieħba soċjali jistgħu jkollhom rwol fit-tħaffif
tal-implimentazzjoni tal-Qafas ta’ Kwalità għall-Apprendistati,
notevolment billi jelaboraw u jqiegħdu għad-dispożizzjoni
ftehimiet mudell sempliċi u konċiżi ta' apprendistat,
partikolarment għall-użu mill-mikrointrapriżi u li jkunu
magħmula għall-iskopijiet speċifiċi tagħhom. Fil-Qafas
tal-Azzjonijiet dwar l-Impjieg taż-Żgħażagħ ta'
Lulju 2013, l-imsieħba soċjali Ewropej ħadu nota tal-intenzjoni
tal-Kummissjoni li tipproponi Rakkomandazzjoni lill-Kunsill dwar il-qafas
tal-kwalità Ewropew għall-apprendistati u ħabbru li se
jappoġġjaw l-azzjonijiet tal-Istati Membri li jkollhom il-ħsieb
li jtejbu l-kwalità tal-apprendistati. (14) Waħda mill-isfidi hija li
tiżdied il-mobilità transkonfinali tal-apprendisti fl-Unjoni biex
tgħin fit-trawwim ta’ suq tax-xogħol Ewropew ġenwin.
Id-diversità eżistenti fir-regolamenti tikkostitwixxi ostaklu
għall-iżvilupp tal-mobilità transkonfinali tal-apprendisti. Barra
minn hekk, f’xi każijiet, l-ostakli amministrattivi u legali
għall-mobilità transkonfinali tal-apprendisti nstabu li jaffettwaw diversi
mill-Istati Membri destinatarji. Jekk jipprovdi standards u linji gwida li
għandhom jintużaw bħala referenza, il-Qafas ta’ Kwalità
għall-Apprendistati se jiffaċilita l-aċċess
għall-apprendistat transnazzjonali. (15) L-iżvilupp ta’ Qafas ta’
Kwalità għall-Apprendistati se jżid it-trasparenza. Barra minn hekk,
se jappoġġja l-estensjoni tal-EURES għal apprendistati, b’hekk tiġi
ffaċilitata l-mobbiltà, li se tgħin biex jissaħħaħ
l-appoġġ għall-mobilità tal-apprendisti pprovduta minn Erasmus+. (16) Il-programmi tal-Istati Membri
li jippromwovu u joffru apprendistati
għaż-żgħażagħ jistgħu jiġu
appoġġati finanzjarjament mill-Fondi Ewropej. Barra minn hekk,
l-Inizjattiva għall-Impjieg taż-Żgħażagħ se
tappoġġa l-apprendistati fil-kuntest tal-Garanzija
għaż-Żgħażagħ, filwaqt li żżomm
fil-mira ż-żgħażagħ mir-reġjuni tal-Unjoni li
huma l-aktar milquta mill-qgħad fost iż-żgħażagħ
u li se jiġu kofinanzjati mill-Fond Soċjali Ewropew (FSE) 2014-20.
Il-FSE kif ukoll l-Inizjattiva għall-Impjieg
taż-Żgħażagħ tista’ tintuża biex jiżdied
l-għadd u l-kwalità tal-iskemi ta’ apprendistat tal-Istati Membri. Dan
jinvolvi possibiltà ta' kontribuzzjoni għall-ispejjeż
tal-apprendistati inkluża, taħt ċerti kundizzjonijiet, parti
mir-remunerazzjoni. Barra minn hekk, huma jistgħu wkoll
jappoġġaw l-ispejjeż ta’ taħriġ ieħor li
ż-żgħażagħ jistgħu jsegwu lil hinn
mill-apprendistat tagħhom, eż. korsijiet tal-lingwa. (17) Il-Kummissjoni nediet Programm
speċifiku tal-FSE ta’ Assistenza Teknika għall-Istati Membri biex
jistabbilixxu skemi ta’ apprendistat bl-appoġġ tal-FSE. Dan
il-Programm ta' Assistenza Teknika tal-FSE jipprovdi pariri strateġiċi,
operattivi u politiċi lill-awtoritajiet nazzjonali u reġjonali
filwaqt li jikkunsidra t-twaqqif ta’ skemi ta’ apprendistat ġodda, jew
l-immodernizzar ta’ skemi eżistenti. (18) Il-Kunsill,
fir-Riżoluzzjoni tiegħu dwar id-Djalogu Strutturat dwar l-Impjieg
għaż-Żgħażagħ ta' Mejju 2011 iddikjara li
"qafas tal-kwalità għat-taħriġ tal-apprendistati huwa
mixtieq sabiex jiggarantixxi l-valur edukattiv ta' esperjenza bħal
din". (19) Il-konklużjonijiet
tal-Kunsill ta’ Ġunju 2011 dwar “Il-promozzjoni tal-impjieg
taż-żgħażagħ għall-kisba tal-objettivi Ewropa
2020” stiednu lill-Kummissjoni biex “tipprovdi gwida dwar il-kundizzjonijiet
għal apprendistati ta’ kwalità għolja permezz ta’ qafas ta’ kwalità
għall-apprendistati”[21]. (20) F’Ġunju 2012
fir-“Riżoluzzjoni tiegħu lejn irkupru għani fl-Impjiegi”[22] il-Parlament Ewropew
stieden lill-Kummissjoni biex mill-aktar fis possibbli tippreżenta
“proposta għal Rakkomandazzjoni tal-Kunsill dwar Qafas ta’ Kwalità
għall-Apprendistati”, u biex tiddefinixxi “standards minimi li
jappoġġaw il-forniment u t-teħid ta’ esperjenzi
tal-apprendistati”. (21) Il-Kunsill Ewropew ta’
Ġunju 2012 stieden lill-Kummissjoni biex teżamina l-possibilità li
testendi l-portal tal-EURES għall-apprendistati.[23] (22) Il-konklużjonijiet
tal-Kunsill Ewropew ta’ Diċembru 2012 stiednu lill-Kummissjoni “biex
tiffinalizzaw rapidament il-qafas ta’ kwalità għall-apprendistati”. (23) Fil-Pakkett dwar l-Impjiegi
għaż-Żgħażagħ ta’ Diċembru 2012
il-Kummissjoni nediet konsultazzjoni mal-imsieħba soċjali dwar Qafas
ta’ Kwalità għall-Apprendistati. Fit-tweġibiet tagħhom,
l-imsieħba soċjali tal-UE infurmaw lill-Kummissjoni li ma kellhomx
l-intenzjoni li jniedu negozjati għal ftehim awtonomu skont l-Artikolu 154
tat-TFUE[24].
(24) Il-Kunsill Ewropew ta’
Ġunju 2013 kkonferma mill-ġdid li ‘Il-Qafas tal-Kwalità
għall-Apprendistati għandhom jiġu stabbiliti kmieni fl-2014”. (25) Il-Qafas tal-Kwalità huwa punt
ta’ referenza importanti għad-determinazzjoni ta’ offerta ta' kwalità
tajba tal-apprendistati skont ir-Rakkomandazzjoni tal-Kunsill għat-Twaqqif
ta' Garanzija għaż-Żgħażagħ. (26) Skont l-Istħarriġ
Annwali ta' Tkabbir 2014[25]
huwa "essenzjali li tkun iffaċilitata t-tranżizzjoni mill-iskola
għax-xogħol, notevolment biż-żieda tad-disponibbiltà ta'
skemi ta' taħriġ jew apprendistati ta' kwalità tajba " (27) Għall-finijiet ta’ din
ir-Rakkomandazzjoni, l-apprendistati jfissru perjodu limitat ta’ prattika ta’
xogħol, miftiehem bejn fornitur ta' apprendistat u apprendist
mingħajr l-involviment ta’ parti terza, li jinkludi komponent ta’
tagħlim, sabiex tinkiseb esperjenza prattika qabel il-bidu ta' impjieg
regolari (apprendistati ‘tas-suq miftuħ"). (28) Din ir-Rakkomandazzjoni
għandha tkopri l-apprendistati kollha "tas-suq miftuħ",
kemm jekk bi blas kemm jekk le. (29) Din ir-Rakkomandazzjoni ma
tkoprix kollokamenti f’postijiet għall-esperjenza tax-xogħol
bħala parti ta’ kurrikula akkademiċi, ta' edukazzjoni formali jew
kors vokazzjonali. Apprendistati li l-kontenut tagħhom huwa regolat skont
il-liġi nazzjonali u li t-tlestija hija rekwiżit biex jinkiseb grad
universitarju jew aċċess għal professjoni speċifika
(eż. mediċina, arkitettura, eċċ.) mhumiex koperti minn din
ir-Rakkomandazzjoni. B’DAN JIRRAKKOMANDA LI L-ISTATI MEMBRI: (1)
Itejbu l-kwalità tal-apprendistati tas-suq
miftuħ, b’mod partikolari fir-rigward tal-kontenut tat-tagħlim u
l-kondizzjonijiet tax-xogħol, bil-għan li ttaffa it-tranżizzjoni
taż-żgħażagħ mill-edukazzjoni għax-xogħol
billi jadottaw fi ħdan il-leġiżlazzjoni tagħhom jew il-prassi
nazzjonali dawn il-prinċipji għal Qafas ta’ Kwalità
għall-Apprendistati:
Konklużjoni ta’ ftehim bil-miktub
għall-Apprendistati (2)
Jeħtieġu li l-apprendistati jkunu
bbażati fuq ftehim bil-miktub konkluż qabel l-apprendistat bejn u
l-apprendist u l-fornitur tal-apprendistat; (3)
Jiżguraw li l-ftehimiet ta’ apprendistat
jindikaw l-objettivi edukattivi, il-kundizzjonijiet tax-xogħol, jekk
ir-remunerazzjoni jew kumpens humiex ipprovduti mill-fornitur tal-apprendistat
lill-apprendist, id-drittijiet u l-obbligi tal-partijiet skont il-liġi
tal-UE u dik nazzjonali applikabbli, kif ukoll it-tul ta’ żmien
tal-apprendistat, kif imsemmi fir-rakkomandazzjonijiet 4-12;
Għanijiet ta’ tagħlim: (4)
Iġibu 'l quddiem l-aqwa prassi fir-rigward
tal-għanijiet ta' tagħlim sabiex iż-żgħażagħ
ikunu jistgħu jiksbu esperjenza prattika u ħiliet rilevanti; il-kompiti
assenjati lill-apprendist għandhom jippermettu li dawn l-għanijiet
jinkisbu; (5)
Iħeġġu lill-fornituri
tal-apprendistati biex jinnominaw sorveljant għall-apprendisti li jiggwida
lill-apprendist fil-kompiti assenjati, u jissorvelja l-progress tiegħu/tagħha;
Kondizzjonijiet tax-xogħol (6)
Jiżguraw li jiġu rispettati d-drittijiet
tal-apprendisti skont il-liġi tal-UE u dik nazzjonali applikabbli, kif
ukoll il-kondizzjonijiet tax-xogħol tagħhom, inklużi limiti
applikabbli għall-ħin massimu ta’ xogħol fil-ġimgħa,
il-perjodi minimi ta' serħan ta’ kull jum u ta’ mistrieħ
fil-ġimgħa u l-intitolamenti minimi ta' btala; (7)
Jeħtieġu li l-fornituri tal-apprendistati
jiċċaraw il-kopertura għal dak li għandu x'jaqsam ma'
assigurazzjoni tas-saħħa u kontra l-inċidenti kif ukoll il-liv
minħabba mard; (8)
Jiżguraw li l-ftehim dwar l-apprendistat
jiċċara jekk ir-remunerazzjoni u/jew kumpens humiex applikabbli, u
jekk applikabbli, x'għandha tkun ir-rata ta’ remunerazzjoni u/jew kumpens;
Drittijiet u obbligi (9)
Jiżguraw li l-ftehim dwar l-apprendistat
jistipula d-drittijiet u l-obbligi tal-apprendist u l-fornitur
tal-apprendistat, inkluż fejn rilevanti l-politika tal-fornitur
tal-apprendistat dwar il-kunfidenzjalità u s-sjieda tad-drittijiet
tal-proprjetà intellettwali;
Tul ta' żmien raġonevoli (10)
Jiżguraw tul ta’ żmien raġonevoli
tal- apprentistati li bħala regola ma jaqbiżx is-sitt xhur,
ħlief f’każijiet fejn tul ta’ żmien itwal huwa
ġġustifikat, pereżempju programmi ta’ taħriġ intern
għar-reklutaġġ jew apprendistati li jseħħu fi Stat
Membru ieħor; (11)
Jiċċaraw iċ-ċirkostanzi u
l-kondizzjonijiet li taħthom apprendistat jista' jiġi estiż jew
imġedded wara li jkun skada l-ftehim ta' apprendistat inizjali; (12)
Jinkoraġġixxu l-prassi li fil-ftehim dwar
l-apprendistat jiġi speċifikat li kemm l-apprendist kif ukoll
il-fornitur tal-apprendistat jistgħu jtemmu l-ftehim b’avviż
bil-miktub ta’ ġimgħatejn;
Għarfien xieraq tal-apprendistati (13)
Jinkoraġġixxu lill-fornituri
tal-apprendistati biex jiċċertifikaw permezz ta’ ċertifikat jew
ittra ta’ referenza l-għarfien, il-ħiliet u l-kompetenzi miksuba waqt
l-apprendistati;
Rekwiżiti ta' trasparenza (14)
Jiżguraw li l-fornituri tal-apprendistati
jinkludu fl-avviżi u r-reklami tagħhom dwar il-postijiet vakanti
informazzjoni dwar it-termini u l-kondizzjonijiet tal-apprendistat, b’mod
partikolari dwar jekk ir-remunerazzjoni u/jew kumpens u l-protezzjoni
soċjali humiex applikabbli, u jiżguraw li s-servizzi tal-impjieg
japplikaw rekwiżiti ta' trasparenza u gwida tal-karriera xierqa;
L-imsieħba soċjali (15)
Iġibu 'l quddiem l-involviment attiv
tal-imsieħba soċjali fl-implimentazzjoni tal-Qafas ta’ Kwalità
għall-Apprendistati; Apprendistati transkonfinali (16)
Jiffaċilitaw il-mobilità transkonfinali
tal-apprendisti fl-Unjoni Ewropea inter alia, billi jiċċaraw
il-qafas legali nazzjonali għall-apprendistati tas-suq miftuħ u
jistabbilixxu regoli ċari dwar l-ilqugħ tal-apprendisti minn Stati
Membri oħra, u l-ibgħit tal-apprendisti lejn Stati Membri oħra u
billi jnaqqsu l-formalitajiet amministrattivi; (17)
Iġibu 'l quddiem l-użu estiż
tan-netwerk EURES u l-iskambju ta’ informazzjoni dwar l-apprendistati permezz
tal-portal EURES u jinkoraġġixxu lis-servizzi tal-impjieg biex
itellgħu postijiet vakanti ta' apprendistat fuq il-portal tal-EURES;
L-użu ta’ Fondi Strutturali u ta' Investiment Ewropej (18)
Jagħmlu użu tal-Fondi Strutturali u ta'
Investiment Ewropej, jiġifieri l-Fond Soċjali Ewropew u l-Fond
tal-Iżvilupp Reġjonali Ewropew, fil-perjodu ta' programmar li jmiss
tal-2014-20, u l-Inizjattiva dwar l-Impjieg taż-Żgħażagħ,
fejn applikabbli, biex jiżdiedu l-għadd u l-kwalità
tal-apprendistati, inkluż permezz ta' sħubijiet effettivi
mal-partijiet kollha interessati.
Implimentazzjoni ta’ Qafas tal-Kwalità għall-Apprendistati (19)
Jimplimentaw il-Qafas tal-Kwalità
għall-Apprendistati mill-aktar fis possibbli, u mhux aktar tard minn tmiem
l-2014; (20)
Jidentifikaw l-awtorità pubblika inkarigata minn
din l-implimentazzjoni u jikkomunikaw lill-Kummissjoni kif jiġi
implimentat il-Qafas tal-Kwalità għall-Apprendistati; (21)
Iġibu 'l quddiem l-involviment attiv tas-servizzi
tal-impjieg, l-istituzzjonijiet edukattivi u l-fornituri tat-taħriġ
fl-implimentazzjoni tal-Qafas tal-Kwalità għall-Apprendistati;
JINNOTA LI L-KUMMISSJONI GĦANDHA L-ĦSIEB LI:
(22)
Trawwem il-kooperazzjoni mill-qrib mal-Istati
Membri, l-imsieħba soċjali u l-partijiet interessati l-oħra
bil-għan li titħaffef l-implimentazzjoni ta’ din ir-Rakkomandazzjoni; (23)
Tissorvelja l-implimentazzjoni tal-Qafas
tal-Kwalità għall-Apprendistati skont din ir-Rakkomandazzjoni u tanalizza
l-impatt tal-istrateġiji politiċi li hemm fis-seħħ; (24)
Tirrapporta dwar il-progress fl-implimentazzjoni
ta’ din ir-Rakkomandazzjoni fuq il-bażi tal-informazzjoni pprovduta
mill-Istati Membri; (25)
Taħdem mal-Istati Membri, l-imsieħba
soċjali, is-servizzi tal-impjieg, u l-organizzazzjonijiet
taż-żgħażagħ u l-apprendisti biex iġġib 'il
quddiem din ir-Rakkomandazzjoni; (26)
Tinkoraġġixxi u tappoġġja
lill-Istati Membri, inkluż permezz tal-promozzjoni tal-iskambju
tal-aħjar prassi bejniethom, biex jużaw il-Fond Soċjali Ewropew
u l-Fond Ewropew għall-Iżvilupp Reġjonali jew Fondi oħra
Ewropej għall-perjodu ta’ pprogrammar 2014-2020 biex jiżdiedu
l-għadd u l-kwalità tal-apprendistati; (27)
Tkompli bl-isforzi tagħha sabiex
iżżid l-offerta ta’ apprendistati transnazzjonali tal-programm
Erasmus+; (28)
Taħdem, flimkien mal-Istati Membri, lejn
l-inklużjoni tal-apprendistati f’EURES u twaqqaf paġna tal-web
iddedikata dwar oqfsa legali nazzjonali għall-apprendistati; Magħmul fi Brussell, Għall-Kunsill Il-President [1] COM(2012) 727 finali, 5.12.2012. [2] COM(2012) 728 finali, 5.12.2012. [3] PE 2009/2221 (INI), 6.7.2010 u r-Riżoluzzjoni
2012/2647(RSP). [4] Il-Konklużjonijiet tal-Kunsill Ewropew ta'
Diċembru 2012, Frar 2013 u Ġunju 2013. [5] SWD(2012) 407 finali, 5.12.2012. [6] Skont ir-rapport dwar il-Paga Minima Nazzjonali (2011)
tal-Kummissjoni dwar il-Pagi Baxxi fir-Renju Unit, l-apprendistati de facto
qed isiru prekondizzjoni għal aktar u aktar impjiegi. [7] Il-Kummissjoni dwar il-Pagi Baxxi fir-Renju Unit
tirreferi fir-rapport tagħha tal-2013 għal “nuqqas ta’ ħlas
mifrux tal-paga minima għal pożizzjonijiet li jidhru li huma
xogħol”. [8] L-istħarriġ tal-Ewrobarometru tal-2013
żvela li 9 % biss tal-apprendistati seħħew barra
l-pajjiż. [9] www.consilium.europa.eu/uedocs/cms_Data/docs/pressdata/en/ec/131388.pdf [10] COM(2012) 729 finali, 5.12.2012. [11] Rakkomandazzjoni tal-Kunsill dwar it-Twaqqif ta' Garanzija
għaż-Żgħażagħ, 2013/C 120/01, 22.4.2013. [12] Fost affarijiet oħra, il-kontenut tat-tagħlim
jista’ jkopri taħriġ inizjali, spjegazzjoni ċara/deskrizzjoni
tal-ħidma tal-organizzazzjoni u l-kwistjonijiet bażiċi fi
ħdan is-settur, kif ukoll l-allokazzjoni ta' mentor li jsegwi
x-xogħol tal-apprendist u jipprovdi gwida. [13] SWD(2012) 407 finali, 5.12.2012. [14] SWD(2013) 495 finali, 4.12.2013 [15] L-Artikolu 3 tal-istess Direttiva jeħtieġ li
l-informazzjoni għandha tingħatat lill-impjegat bil-miktub, mhux
aktar tard minn xahrejn wara l-bidu tal-impjieg. [16] COM(2010) 378 finali, 13.7.2010. [17] Mill-1 ta' Jannar 2014, Erasmus+ se jsir
il-programm ġdid ta' finanzjament tal-UE għall-edukazzjoni,
it-taħriġ, iż-żgħażagħ u l-isport. Erasmus+
se jkollu struttura simplifikata ġdida li tgħaqqad il-programmi ta’
finanzjament attwali fis-settur inkluż il-Programm ta’ Tagħlim tul
il-Ħajja (Comenius, Leonardo, Erasmus, Grundtvig u programmi trasversali),
Żgħażagħ fl-Azzjoni, Jean Monnet, Tempus u Erasmus Mundus. [18] EURES huwa netwerk ta’ kooperazzjoni bejn il-Kummissjoni
Ewropea u s-Servizzi Pubbliċi tal-Impjiegi tal-Istati Membri. Il-portal
tal-EURES jipprovdi lill-ħaddiema, lil min iħaddem u dalwaqt ukoll
lill-apprendisti u dawk li jipprovdu l-apprendistati b’informazzjoni dwar
l-impjiegi, l-apprendistati u l-opportunitajiet ta’ tagħlim madwar
l-Ewropa. [19] Id-Deċiżjoni tal-Kunsill dwar il-Linji gwida
għall-politika tal-Istati Membri dwar l-Impjiegi, 2010/707/UE,
21.10. 2010. [20] Rakkomandazzjoni tal-Kunsill dwar it-Twaqqif ta' Garanzija
għaż-Żgħażagħ, 2013/C 120/01, 22.04.2013. [21] Il-Konklużjonijiet tal-Kunsill 11838/11
"Il-Promozzjoni tal-Impjieg taż-Żgħażagħ
għall-kisba tal-objettivi Ewropa 2020" ta' 17.06.2011. [22] Riżoluzzjoni 2012/2647(RSP). [23] EUCO 76/12 tat-28/29 ta’ Ġunju 2012. [24] COM(2012) 727 finali, 11.12.2012. [25] COM(2013) 800 finali, 13.11.2013.