EUR-Lex Access to European Union law
This document is an excerpt from the EUR-Lex website
Document 52013PC0761
Proposal for a DIRECTIVE OF THE EUROPEAN PARLIAMENT AND OF THE COUNCIL amending Directive 94/62/EC on packaging and packaging waste to reduce the consumption of lightweight plastic carrier bags
Proposta għal DIRETTIVA TAL-PARLAMENT EWROPEW U TAL-KUNSILL li temenda d-Direttiva 94/62/KE dwar l-imballaġġ u l-iskart mill-imballaġġ biex tnaqqas il-konsum tal-basktijiet tal-plastik ħfief
Proposta għal DIRETTIVA TAL-PARLAMENT EWROPEW U TAL-KUNSILL li temenda d-Direttiva 94/62/KE dwar l-imballaġġ u l-iskart mill-imballaġġ biex tnaqqas il-konsum tal-basktijiet tal-plastik ħfief
/* COM/2013/0761 final - 2013/0371 (COD) */
Proposta għal DIRETTIVA TAL-PARLAMENT EWROPEW U TAL-KUNSILL li temenda d-Direttiva 94/62/KE dwar l-imballaġġ u l-iskart mill-imballaġġ biex tnaqqas il-konsum tal-basktijiet tal-plastik ħfief /* COM/2013/0761 final - 2013/0371 (COD) */
MEMORANDUM TA’ SPJEGAZZJONI 1. KUNTEST TAL-PROPOSTA 1.1. Kuntest
Ġenerali L-istess proprjetajiet li għamlu l-basktijiet
tal-plastik kummerċjalment vijabbli - ħfief u reżistenti
għad-degredazzjoni - ikkontribwew ukoll għall-proliferazzjoni
tagħhom. Huwa stmat li fl-2010 kull ċittadin tal-UE uża 198
basket tal-plastik, li madwar 90% minnhom kienu stmati li huma basktijiet
ħfief; dawn ma tantx jerġgħu jintużaw bil-kuntrarju
tal-basktijiet eħxen u iktar probabbli li jispiċċaw skart.
F'xenarju fejn kollox jibqa l-istess il-konsum tal-basktijiet tal-plastik huwa
mistenni li jkompli jiżdied. L-estimi jissuġġerixxu wkoll li fl-2010,
iktar minn 8 biljun basket tal-plastik spiċċaw skart fl-UE. Dawn
jaħarbu mill-flussi tal-immaniġġjar tal-iskart u jakkumulaw
fl-ambjent tagħna, speċjalment fil-forma ta' skart tal-baħar, li
dejjem qed jiġi iżjed rikonoxxut bħala sfida globali
maġġuri. Hemm ukoll evidenza dokumentata li tindika li hemm
ħafna akkumulazzjoni ta' żibel fl-ibħra Ewropej. Il-problema
tal-iskart tal-basktijiet tal-plastik fl-ekosistemi tal-ilma ma taffettwax biss
il-pajjiżi b'kosta marittima, għaliex ammont konsiderevoli tal-iskart
mill-art jasal fil-baħar permezz tax-xmajjar. Ladarba l-basktijiet
tal-plastik jintremew, dawn jistgħu jibqgħu jeżistu għal
mijiet ta' snien, l-aktar f'forma frammentata. Il-konsum għoli ħafna
u li għadu qed jiżdied ta' dawn il-basktijiet huwa wkoll subottimu
minn perspettiva ta' effiċjenza tar-riżorsi. Fl-UE, il-basktijiet tal-plastik huma kkunsidrati
bħala imballaġ skont id-Direttiva dwar l-Imballaġ u l-Iskart
mill-Imballaġ (id-Direttiva 94/62/KE). Madankollu, ma hemmx
leġiżlazzjoni tal-UE jew politika li speċifikament jimmiraw
il-basktijiet tal-plastik. Xi Stati Membri diġà żviluppaw politiki biex
inaqqsu l-użu tagħhom, pereżempju permezz ta' miżuri ta'
prezzijiet, ftehimiet mas-settur bl-imnut jew kampanji ta' sensibilizzazzjoni,
b'riżultati varji. Wara xi attentati minn xi Stati Membri biex
jipprojbixxu l-basktijiet tal-plastik, il-Kunsill Ambjent tal-14 ta' Marzu 2011
iddiskuta l-kwistjoni u stieden lill-Kummissjoni tanalizza l-possibbiltà ta'
azzjoni tal-UE kontra l-konsum tal-basktijiet tal-plastik. 1.2. Raġunijiet
għall-proposta u l-għanijiet tagħha L-għan ġenerali ta' din il-proposta dwar
il-basktijiet tal-plastik huwa li tillimieta l-impatti negattivi fuq l-ambjent,
b'mod partikolari f'termini ta' skart, biex tħeġġeġ
il-prevenzjoni tal-iskart u użu iktar effiċjenti tar-riżorsi,
filwaqt li jiġu limitati l-impatti soċjoekonomiċi. B'mod iktar
speċifiku, il-proposta timmira li tnaqqas il-konsum tal-basktijiet
tal-plastik ta' ħxuna ta' inqas minn 50 microns (0.05 millimetri)
fl-Unjoni Ewropea. 2. RIŻULTATI
TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET
TAL-IMPATT 2.1. Konsultazzjoni
u għarfien espert 2.1.1. Studji Fl-2011 twettaq studju dwar ix-xejriet
tal-produzzjoni u l-konsum tal-basktijiet tal-plastik, l-impatti tagħhom u
l-impatti tal-għażliet differenti tal-politika biex jitnaqqas
l-użu tagħhom[1].
Fl-2012 twettaq studju addizzjonali biex jivvaluta l-impatti
soċjoekonomiċi tal-għażliet differenti tal-politika f'iktar
dettall.[2]
2.1.2. Konsultazzjoni
interna Fl-2011 inħoloq Grupp Interservizzi ta'
Tmexxija (ISG - Interservice Steering Group) b'rappreżentanti mid-DĠs
ENV, ENTR, SG, SJ u SANCO. Dan l-ISG segwa t-tħejjija tal-Valutazzjoni
tal-Impatt. 2.1.3. Konsultazzjoni
esterna Bejn is-17 ta' Mejju u 9 ta' Awwissu 2011 saret
konsultazzjoni pubblika, f'konformità mal-istandards minimi eżistenti
għal konsultazzjoni. Ġew sottomessi 15,538 tweġibiet, li
jirriflettu tħassib pubbliku serju dwar il-konsum mhux sostenibbli
tal-basktijiet tal-plastik u l-aspettattivi għoljin għal azzjoni
tal-UE f'dan il-qasam. 2.2. Valutazzjoni
tal-impatt Mal-proposta preżenti qed jiġu
ppubblikati rapport tal-valutazzjoni tal-impatt u sommarju eżekuttiv.
Il-valutazzjoni tal-impatt tevalwa l-impatti ambjentali, soċjali u
ekonomiċi ta' diversi għażliet ta' politika biex jitnaqqas
il-konsum tal-basktijiet tal-plastik. Qed jiġu vvalutati u mqabbla
max-'xenarju bażiku' diversi livelli ta' ambizzjoni sabiex jiġu
identifikati l-iktar strumenti li jixirqu li jimminimizzaw l-ispejjeż
filwaqt li jimmassimizzaw il-benefiċċji. Fil-15 ta' Marzu 2013 il-Bord ta' Valutazzjoni
tal-Impatt tal-Kummissjoni ppreżenta opinjoni pożittiva dwar
il-valutazzjoni tal-impatt, filwaqt li għamel għadd ta'
rakkomandazzjonijiet biex jirfina r-rapport. Fil-kummenti dwar
l-għażla li tiġi stabbilita mira komuni mifruxa mal-UE kollha
biex jitnaqqas il-konsum tal-basktijiet tal-plastik, il-Bord talab li jivvaluta
l-limitu sa fejn il-problema tal-iskart tal-basktijiet tal-plastik tista'
tiġi indirizzata fil-livell tal-Istat Membru. Konsiderazzjoni ulterjuri tal-għażliet
tal-politika disponibbli wasslet għall-konklużjoni li se jkun
diffiċli li tiġi ddisinjata u implimentata mira ta' tnaqqis mifruxa
mal-UE li tapplika għall-Istati Membri kollha. Minflok ma tiġi
stabbilita mira komuni tal-UE, għalhekk huwa ppreferut li fid-Direttiva 94/62/KE
jiġi introdott l-obbligu għall-Istati Membri kollha biex inaqqsu
l-konsum tal-basktijiet tal-plastik ħfief, filwaqt li tippermettiilhom
jiffissaw il-miri nazzjonali tat-tnaqqis tagħhom u li jagħżlu
l-miżuri biex jilħqu dawk il-miri. Madankollu fi stadju iktar tard
mira ta' tnaqqis mifruxa mal-UE tista' tiġi kkunsidrata. 3. ELEMENTI LEGALI TAL-PROPOSTA 3.1. Sommarju
tal-azzjoni proposta Il-proposta temenda l-Artikolu 4 (prevenzjoni)
tad-Direttiva 94/62/KE billi tirrikjedi lill-Istati Membri jieħdu
miżuri biex inaqqsu l-konsum tal-basktijiet tal-plastik ħfief. Din
tistipula li dawn il-miżuri jistgħu jinkludu l-użu ta' strumenti
ekonomiċi kif ukoll restrizzjonijiet kummerċjali b'deroga
tal-Artikolu 18 tad-Direttiva. Id-dispożizzjoni tal-aħħar
għalhekk tifrex il-firxa ta' strumenti disponibbli għall-Istati
Membri biex jindirizzaw il-konsum mhux sostenibbli tal-basktijiet tal-plastik. Għal fini ta' din id-Direttiva qed tiġi
introdotta definizzjoni tal-'basktijiet tal-plastik ħfief' fl-Artikolu 3
(definizzjonijiet). 3.2. Bażi
legali u d-dritt ta' azzjoni Il-proposta tadotta l-istess bazi legali tad-Direttiva
94/62/KE (l-Artikolu 100a li issa huwa l-Artikolu 114 TFUE). Id-dritt ta' azzjoni tal-UE jirriżulta
mill-fatt li r-rati għoljin ta' konsum tal-basktijiet tal-plastik
jirrapreżentaw sfida li hija kemm komuni kif ukoll transkonfinali, u biex
tiġi indirizzata l-problema f'mod iktar koerenti u effettiv hija
neċessarja inizjattiva mifruxa mal-UE kollha. Fil-preżent,
il-miżuri li ttieħdu minn Stati Membri individwali biex jindirizzaw
il-kwistjoni ma għandhomx koerenza fir-rigward tal-għanijiet
żvolti. Ukoll, miżuri unilaterali li jinkludu restrizzjonijiet
kummerċjali jqajmu mistoqsijiet f'termini tal-kompattibbiltà tagħhom
mad-Direttiva 94/62/KE fil-forma preżenti tagħha. Fl-istess ħin,
l-esperjenzi pożittivi li saru f'għadd ta' Stati Membri juru li fil-fatt
huwa possibbili li jnaqqsu l-konsum tal-basktijiet tal-plastik b'mod
konsiderevoli. Azzjoni tal-UE biex jonqos l-użu
tal-basktijiet tal-plastik hija totalment konformi mal-għanijiet
tad-Direttiva 94/62/KE dwar l-Imballaġ u l-Iskart mill-Imballaġ, b'mod
partikolari dawk ta' prevenzjoni u tnaqqis tal-impatti ambjentali
tal-imballaġ u l-iskart mill-imballaġ. Minħabba n-natura u l-isfond partikolari
tagħha, il-proposta preżenti hija sottomessa bħala inizjattiva
indipendenti, qabel ir-reviżjoni iktar ġenerali tal-politika dwar
l-iskart tal-UE li l-Kummissjoni se tippreżenta fir-rebbiegħa
tal-2014. 3.3. Prinċipju
tas-sussidjarjetà u tal-proporzjonalità Il-proposta hija konformi mal-prinċipju
tas-sussidjarjetà u tal-proporzjonalità stabbilit fl-Artikolu 5 tat-Trattat dwar
l-Unjoni Ewropea. Hija limitata għall-emenda tad-Direttiva 94/62/KE billi
tipprovdi qafas li jistabbilixxi għanijiet kondiviżi, filwaqt li
tħalli lill-Istati Membri liberi jiddeċiedu dwar il-metodi
preċiżi ta' implimentazzjoni. 4. IMPLIKAZZJONI BAĠITARJA Il-proposta mhux se jkollha impatt fuq
il-baġit tal-Unjoni Ewropea u għaldaqstant mhijiex akkumpanjata
mid-dikjarazzjoni finanzjarja stipulata fl-Artikolu 31 tar-Regolament
Finanzjarju (ir-Regolament (UE, Euratom) Nru 966/2012 tal-Parlament
Ewropew u tal-Kunsill tal-25 ta’ Ottubru 2012 dwar ir-regoli
finanzjarji applikabbli għall-baġit ġenerali tal-Unjoni u li
jħassar ir-Regolament tal-Kunsill (KE, Euratom) Nru 1605/2002). 2013/0371 (COD) Proposta għal DIRETTIVA TAL-PARLAMENT EWROPEW U
TAL-KUNSILL li temenda d-Direttiva 94/62/KE dwar
l-imballaġġ u l-iskart mill-imballaġġ biex tnaqqas
il-konsum tal-basktijiet tal-plastik ħfief (Test b'rilevanza għaż-ŻEE) IL-PARLAMENT EWROPEW U L-KUNSILL
TAL-UNJONI EWROPEA, Wara li kkunsidraw it-Trattat dwar
il-Funzjonament tal-Unjoni Ewropea, u b’mod partikolari l-Artikolu 114
tiegħu, Wara li kkunsidraw il-proposta tal-Kummissjoni
Ewropea[3], Wara t-trażmissjoni tal-abbozz tal-att
leġiżlattiv lill-Parlamenti nazzjonali, Wara li kkunsidraw l-opinjoni tal-Kumitat
Ekonomiku u Soċjali Ewropew[4], Wara li kkonsultaw lill-Kumitat
tar-Reġjuni[5], Filwaqt li jaġixxu skont
il-proċedura ordinarja leġiżlattiva, Billi: (1) Id-Direttiva 94/62/KE
tal-Parlament Ewropew u tal-Kunsill[6]
ġiet adottata sabiex tipprojbixxi jew tnaqqas l-impatt tal-imballaġ u
l-iskart mill-imballaġ fuq l-ambjent. Għalkemm il-basktijeit
tal-plastik jikkostitwixxu mballaġ fi ħdan it-tifsira ta' dik
id-Direttiva, id-dispożizzjonijiet tagħha ma fihomx miżuri
speċifiċi marbuta mal-konsum ta' dawn il-basktijiet. (2) Il-Konsum tal-basktijiet
tal-plastik jirriżulta f'livelli għoljin ta' skart u użu
ineffiċjenti tar-riżorsi u huma mistenni li jiżdied jekk ma hija
se tittieħed l-ebda azzjoni. L-iskart tal-basktijiet tal-plastik jikkontribwixxi
għall-problema tal-iskart fil-baħar li qed thedded l-ekosistemi
marittimi madwar id-dinja kollha. (3) Basktijiet tal-plastik ta'
ħxuna inqas minn 50 microns, li jirrapreżentaw
il-maġġoranza vasta tal-għadd totali tal-basktijiet tal-plastik
kkunsamati fl-Unjoni, jerġgħu jintużaw inqas minn basktijiet
tal-plastik eħxen u għalhekk huma aktar probabbli li
jispiċċaw skart. (4) Il-livelli tal-konsum
tal-basktijiet tal-plastik ivarjaw b'mod konsiderevoli fl-Unjoni minħabba
differenzi fl-abitudni tal-konsum, is-sensibilizzazzjoni ambjentali, kif ukoll
l-effettività tal-miżuri tal-politika li jittieħdu mill-Istati
Membri. Xi Stati Membri rnexxielhom inaqqsu l-livelli tal-konsum tal-basktijiet
tal-plastik b'mod sinifikanti, fejn il-livell medju tal-konsum fis-seba' Stati
Membri bl-aħjar prestazzjoni jammonta għal 20% biss tal-konsum medju
tal-UE. (5) Sabiex jippromwovu tnaqqis
simili tal-livell medju tal-konsum tal-basktijiet tal-plastik ħfief,
l-Istati Membri għandhom jieħdu miżuri biex inaqsu l-konsum
tal-basktijiet tal-plastik bi ħxuna ta' inqas minn 50 microns f'konformità
mal-għanijiet ġenerali tal-politika tal-UE dwar l-iskart u
l-ġerarkija tal-UE dwar l-iskart kif tipprovdi d-Direttiva 2008/98/KE
tal-Parlament Ewropew u tal-Kunsill tad-19 ta’ Novembru 2008 dwar l-iskart u li
tħassar ċerti Direttivi[7].
Miżuri ta' tnaqqis bħal dawn għandhom iqiesu l-livelli
tal-konsum attwali tal-basktijiet tal-plastik fl-Istati Membri individwali,
fejn livelli iktar għoljin jirrikjedu sforzi iktar ambizzjużi.
L-awtoritajiet nazzjonali se jipprovdu dejta dwar l-użu tagħhom skont
l-Artikolu 17 tad-Direttiva 94/62/KE sabiex jimmonitorjaw il-progress
fit-tnaqqis tal-użu tal-basktijiet tal-plastik. (6) Il-miżuri li
għandhom jittieħdu mill-Istati Membri jistgħu jinvolvu
l-użu ta' strumenti ekonomiċi bħat-taxxi u l-imposti, li taw
prova li huma partikolarment effettivi biex inaqsu l-użu tal-basktijiet
tal-plastik, kif ukoll ir-restrizzjonijiet kummerċjali bħal
projbizzjonijiet b'deroga tal-Artikolu 18 tad-Direttiva 94/62/KE, suġġett
għar-rekwiżiti stipulati fl-Artikoli 34 sa 36 tat-Trattat dwar
il-Funzjonament tal-Unjoni Ewropea. (7) Il-miżuri biex jitnaqqas
il-konsum tal-basktijiet tal-plastik ma għandux iwassal għal
żieda ġenerali fil-ġenerazzjoni tal-imballaġ. (8) Il-miżuri previsti f'din
id-Direttiva huma konsistenti mal-Komunikazzjoni mill-Kummissjoni
lill-Parlament Ewropew, il-Kunsill, il-Kumitat Ekonomiku u Soċjali Ewropew
u l-Kumitat tar-Reġjoni dwar il-Pjan Direzzjonali għal Ewropa
Effiċjenti fir-Riżorsi[8]
u għandhom jikkontribwixxu għal azzjonijiet kontra l-iskart li
jitwettqu f'konformità mad-Direttiva 2008/56/KE tal-Parlament Ewropew u
tal-Kunsill tas-17 ta’ Ġunju 2008 li tistabbilixxi Qafas għal Azzjoni
Komunitarja fil-qasam tal-Politika tal-Ambjent Marin (Direttiva Kwadru dwar l-Istrateġija
Marina[9]). (9) Id-Direttiva 94/62/KE
għandha għalhekk tiġi emendata skont dan, ADOTTAW DIN ID-DIRETTIVA: Artikolu 1 Id-Direttiva 94/62/KE hija b’dan emendata kif ġej: (1)
Fl-Artikolu 3, jiddaħħal
il-punt 2a ġdid li ġej: '2a. 'basktijiet tal-plastik ħfief'
għandha tfisser basktijiet magħmula minn materjali tal-plastik kif
hemm definit fl-Artikolu 3(1) tar-Regolament tal-Kummissjoni (UE) Nru 10/2011*
bi ħxuna li hija inqas minn 50 microns u li huma fornuti lill-konsumaturi
fil-punt tal-bejgħ tal-oġġetti jew prodotti. _______________________ * ĠU L 12, 15.01.2011, p. 1.' (2)
Fl-Artikolu 4, jiddaħħal il-paragrafu 1a
li ġej: '1a L-Istati Membri għandhom jieħdu
miżuri biex jiksbu tnaqqis fil-konsum tal-basktijiet tal-plastik
ħfief fit-territorju tagħhom fi żmien sentejn tad-dħul
fis-seħħ ta' din id-Direttiva. Dawn il-miżuri jistgħu jinkludu
l-użu ta' miri ta' tnaqqis nazzjonali, strumenti ekonomiċi kif ukoll
restrizzjonijiet kummerċjali b'deroga mill-Artikolu 18 ta' din
id-Direttiva. L-Istati Membri għandhom jirrapportaw dwar
l-effetti ta' dawn il-miżuri fuq il-formazzjoni ġenerali tal-iskart
tal-imballaġ meta jirrapportaw lill-Kummissjoni f'konformità mal-Artikolu
17 ta' din id-Direttiva.' Artikolu 2 1. L-Istati Membri għandhom
idaħħlu fis-seħħ il-liġijiet, ir-regolamenti u
d-dispożizzjonijiet amministrattivi meħtieġa
għall-konformità ma’ din id-Direttiva sa mhux aktar tard minn tnax-il
xahar wara d-dħul fis-seħħ ta’ din id-Direttiva. Huma
għandhom jikkomunikaw minnufih it-test ta’ dawk id-dispożizzjonijiet
lill-Kummissjoni. Meta l-Istati Membri jadottaw dawk
id-dispożizzjonijiet, dawn għandhom jirreferu għal din
id-Direttiva jew ikunu akkumpanjati minn referenza bħal din fil-mument
tal-pubblikazzjoni uffiċjali tagħhom. L-Istati Membri għandhom
jiddetterminaw kif għandha ssir din ir-referenza. 2. L-Istati Membri għandhom
jikkomunikaw lill-Kummissjoni t-test tad-dispożizzjonijiet ewlenin
tal-liġi nazzjonali li huma jadottaw fil-qasam li tkopri din id-Direttiva. Artikolu 3 Din id-Direttiva għandha
tidħol fis-seħħ fl-għoxrin jum wara dak tal-pubblikazzjoni
tagħha f'Il-Ġurnal Uffiċjali tal-Unjoni Ewropea. Artikolu 4 Din id-Direttiva hija indirizzata
lill-Istati Membri. Magħmul fi Brussell, Għall-Parlament Ewropew Għall-Kunsill Il-President Il-President [1] BioIntelligence
Service, 2011. Assessment of impacts of options to reduce the use of single-use
plastic carrier bags, Final Report. [2] Eunomia
2012. Assistance to the Commission to complement an assessment of the
socio-economic costs and benefits of options to reduce use of single-use
plastic carrier bags in the EU, Final Report. [3] ĠU C , , p. . [4] ĠU C , , p. . [5] ĠU C [6] ĠU L 365, 31.12.1994, p. 10. [7] ĠU L 312, 22.11.2008, p. 3. [8] COM(2011)571 finali [9] ĠU L
164, 25.6.2008, p. 19–40