EUR-Lex Access to European Union law
This document is an excerpt from the EUR-Lex website
Document 52013PC0348
Proposal for a COUNCIL DIRECTIVE amending Directive 2011/16/EU as regards mandatory automatic exchange of information in the field of taxation
Proposta għal DIRETTIVA TAL-KUNSILL li temenda d-Direttiva 2011/16/UE fir-rigward tal-iskambju awtomatiku obbligatorju ta' informazzjoni fil-qasam tat-tassazzjoni
Proposta għal DIRETTIVA TAL-KUNSILL li temenda d-Direttiva 2011/16/UE fir-rigward tal-iskambju awtomatiku obbligatorju ta' informazzjoni fil-qasam tat-tassazzjoni
/* COM/2013/0348 final - 2013/0188 (CNS) */
Proposta għal DIRETTIVA TAL-KUNSILL li temenda d-Direttiva 2011/16/UE fir-rigward tal-iskambju awtomatiku obbligatorju ta' informazzjoni fil-qasam tat-tassazzjoni /* COM/2013/0348 final - 2013/0188 (CNS) */
MEMORANDUM TA' SPJEGAZZJONI 1. IL-KUNTEST TAL-PROPOSTA 1. F'dawn l-aħħar
snin, l-isfida ppreżentata mill-frodi fiskali u l-evażjoni tat-taxxa
żdiedet konsiderevolment u saret punt fokali ta' tħassib fl-Unjoni
Ewropea u madwar id-dinja. Qegħdin jintilfu biljuni ta' euro. Permezz
tat-tnaqqis fil-frodi u fl-evażjoni, l-Istati Membri jistgħu
jżidu d-dħul mit-taxxa li jżidilhom ukoll il-kapaċità biex
jirristrutturaw is-sistemi tat-taxxa tagħhom b'mod li jkun jippromwovi aħjar
it-tkabbir, kif spjegat fl-Istħarriġ Annwali dwar it-Tkabbir
tal-2013. Minbarra dan, minħabba d-dimensjoni tal-isfida, l-intensifikar
tal-ġlieda kontra l-frodi u l-evażjoni tat-taxxa mhuwiex biss
kwistjoni ta' dħul, iżda wkoll ta' ġustizzja. B'mod partikolari
f'dawn iż-żminijiet ekonomikament diffiċli, il-kontribwenti
onesti ma għandhomx ibatu żidiet addizzjonali fit-taxxi maħsuba
biex jagħmlu tajjeb għat-telf mid-dħul ikkawżat minn dawk
li jwettqu l-frodi tat-taxxa jew li jevadu t-taxxa. 2. Għal bosta snin,
l-Unjoni Ewropea (UE) ilha taħdem b'mod attiv fuq dawn il-problemi, b'mod
partikolari billi adottat strumenti legali speċifiċi biex timplimenta
skambju awtomatiku ta' informazzjoni (automatic exchange of information,
“AEOI”) fl-Unjoni. Id-Direttiva tat-Tfaddil tal-UE (EU Savings Directive,
“l-EUSD”) tiżgura AEOI fuq l-introjtu mill-imgħax u proposta biex
il-kamp ta' applikazzjoni tagħha jiġi estiż qed tiġi
diskussa fil-Kunsill. Id-Direttiva dwar il-Kooperazzjoni Amministrattiva
(“DAC”) tiżgura li, mill-2015, l-Istati Membri se jagħmlu skambju
awtomatiku tal-informazzjoni malli din tkun disponibbli għal ħames
kategoriji ta' introjtu u kapital: impjiegi, miżati tad-diretturi,
prodotti tal-assigurazzjoni tal-ħajja li mhux koperti minn Direttivi
oħra tal-UE, pensjonijiet u sjieda ta' proprjetà immobbli u l-introjtu
minnha. 3. L-Istati Membri issa esprimew
xewqa ċara li jmorru lil hinn mil-livelli kurrenti ta' kooperazzjoni.
Il-Kunsill Ewropew tat-2 ta' Marzu 2012 stieden lill-Kunsill u
lill-Kummissjoni sabiex jiżviluppaw malajr modi konkreti biex titjieb
il-ġlieda kontra l-frodi fiskali.
Fis-6 ta' Diċembru 2012, il-Kummissjoni ppreżentat
Pjan ta' azzjoni biex issaħħaħ il-ġlieda kontra l-frodi
fiskali u l-evażjoni tat-taxxa[1].
Il-Pjan ta' Azzjoni jenfasizza l-ħtieġa li tiġi promossa l-AEOI
bħala l-istandard Ewropew u internazzjonali tat-trasparenza u l-iskambju
tal-informazzjoni fi kwistjonijiet tat-taxxa.
Fl-14 ta' Mejju 2013, il-Kunsill ECOFIN adotta
konklużjonijiet waqt li laqa' b'sodisfazzjon ix-xogħol mill-Kummissjoni
dwar l-iżvilupp ta' miżuri biex tkun miġġielda l-frodi
tat-taxxa, l-evażjoni tat-taxxa u l-ippjanar aggressiv tat-taxxa u
rrikonoxxa r-rwol utli li l-Pjan ta' Azzjoni tal-Kummissjoni jista' jkollu
f'dan ir-rigward[2].
4. Il-Kunsill Ewropew
fit-22 ta' Mejju 2013 mar saħansitra aktar 'il bogħod,
u talab l-estensjoni tal-AEOI fil-livell tal-Unjoni kif ukoll f'dak globali
bil-għan li jiġu miġġielda l-frodi tat-taxxa,
l-evażjoni tat-taxxa u l-ippjanar aggressiv tat-taxxa. F'dik
l-okkażjoni, il-Kummissjoni kkomettiet ruħha li tipproponi emendi
għad-DAC f'Ġunju 2013 sabiex tkabbar il-kamp ta' applikazzjoni
tal-AEOI, b'antiċipazzjoni tar-reviżjoni tad-DAC diġà prevista
fl-2017. 5. L-għan tal-proposta
preżenti huwa, għalhekk, li tespandi l-ambitu tal-AEOI fl-UE lil hinn
minn dak previst fl-arranġamenti eżistenti tal-UE għal skambju
awtomatiku ta' informazzjoni. Hija ġġib dawn l-elementi li
ġejjin fil-kamp ta' applikazzjoni tal-AEOI: dividendi, qligħ
kapitali, introjtu finanzjarju ieħor u bilanċi tal-kontijiet.
Id-dispożizzjoni għal rieżami u espansjoni tad-DAC fl-2017
tibqa' hemm. Madankollu, f'konformità mal-għan li jissaħħaħ
l-AEOI, it-tneħħija tal-kundizzjoni ta' disponibbiltà issa se
tiġi kkunsidrata f'dak iż-żmien fir-rigward tal-ħames
kategoriji eżistenti kollha flimkien sabiex id-DAC jkun ikopri l-firxa
sħiħa ta' introjtu. Minbarra dan, il-kategoriji li jiġu
kkunsidrati għall-inklużjoni f'dak iż-żmien ikunu emendati
fid-dawl ta' din il-proposta (ara hawn taħt). L-estensjoni tal-kamp ta'
applikazzjoni tal-AEOI tikkontribwixxi wkoll biex tiġi żgurata
l-ugwaljanza ta' trattament bejn tipi differenti ta' assi u li tiġi
evitata riallokazzjoni mhux mixtieqa ta' portafolli. 6. Il-Kummissjoni tipproponi li
titneħħa r-referenza fl-Artikolu 8(3) tad-Direttiva għal
limitu minimu li taħtu Stat Membru jista' ma jkunx jixtieq jirċievi
informazzjoni minn Stati Membri oħra. Id-diskussjonijiet urew li limitu
minimu bħal dan mhuwiex prattiku għall-Istati Membri li huma
meħtieġa li jirrapportaw. Madankollu, Stat Membru jista' jkompli
jagħżel li ma jirċievi ebda informazzjoni dwar kategorija
partikolari ta' introjtu. 7. Inizjattiva tal-UE hija
meħtieġa kemm mill-perspettiva tas-suq intern kif ukoll f'termini
tal-effiċjenza u l-effikaċja: –
Inizjattiva tal-UE tiżgura approċċ
koerenti, konsistenti u komprensiv madwar l-UE kollha għall-AEOI fis-suq
intern. Dan ikun ifisser approċċ wieħed għar-rappurtar fost
l-Istati Membri li jwassal għal iffrankar ta' spejjeż kemm
għall-amministrazzjonijiet tat-taxxa kif ukoll għall-operaturi
ekonomiċi (ara wkoll il-punt 11 hawn taħt). –
Strument legali tal-UE jiżgura wkoll
ċertezza għall-amministrazzjonijiet tat-taxxa u l-operaturi
ekonomiċi fl-UE. –
Strument legali tal-UE għandu jikkontribwixxi
għall-iżvilupp tal-istandard internazzjonali tal-AEOI. –
Strument legali tal-UE abbażi tad-DAC jkun
jinvolvi l-użu ta' arranġamenti tal-IT diġà fis-seħħ
jew li qed jiġu żviluppati biex jiġi ffaċilitat
ir-rappurtar ta' informazzjoni taħt l-EUSD u d-DAC. B'dawk id-Direttivi,
l-Istati Membri tal-UE jaqsmu informazzjoni f'formati speċifiċi
bl-użu ta' kanal ta' komunikazzjoni speċifiku (is-sistema CCN/CSI).
Dawn il-formati faċilment jistgħu jiġu estiżi sabiex ikunu
jistgħu jintużaw ukoll għall-elementi addizzjonali issa proposti
għall-inklużjoni. Billi l-Istati Membri investew ħafna ħin
u flus fl-iżvilupp dawn il-formati, ikun hemm ekonomiji ta' skala jekk
l-Istati Membri jiskambjaw ukoll informazzjoni dwar l-elementi l-ġodda
bl-użu ta' dawn il-formati. –
Minbarra dan, il-Kunsill diġà impenja
ruħu, fl-Artikolu 8(5) tad-DAC, li għandu jikkunsidra meta opportun
jekk l-iskambju awtomatiku tal-informazzjoni għandux jiġi estiż,
fuq il-bażi ta' strument legali madwar l-UE, biex ikopri kategoriji
oħra ta' introjtu bħad-dividendi u l-qligħ kapitali. Din
il-proposta qiegħda, għalhekk, sempliċiment taċċellera
x-xogħol skont dan l-impenn. 8. Il-ftehimiet li bosta
gvernijiet ikkonkludew jew se jikkonkludu mal-Istati Uniti fir-rigward
tal-Foreign Account Tax Compliance Act (FATCA)[3]
tal-Istati Uniti taw impetu ulterjuri għall-AEOI bħala mezz
fil-ġlieda kontra l-frodi u l-evażjoni tat-taxxa. 9. Fid-9 ta' April 2013,
Franza, il-Ġermanja, ir-Renju Unit, l-Italja u Spanja ħabbru
pjanijiet għal azzjoni pilota dwar l-AEOI bl-użu tal-mudell FATCA
miftiehem mal-Istati Uniti bħala bażi. Dawn l-Istati Membri talbu
wkoll li l-Ewropa tieħu rwol ta' tmexxija biex tippromwovi l-AEOI
fid-dinja u esprimew ix-xewqa li jiddiskutu kif jista' jsir progress fl-UE dwar
it-titjib tal-iskambju tat-tagħrif dwar it-taxxa bejn l-Istati Membri
kollha. 10. L-Artikolu 19 tad-DAC
jiddikjara li Stat Membru li jipprovdi kooperazzjoni usa' ma' pajjiż terz
ma jistax jirrifjuta li jipprovdi tali kooperazzjoni usa' lil kwalunkwe Stat
Membru ieħor li jkun jixtieq jidħol f'tali kooperazzjoni
reċiproka usa' ma' dak l-Istat Membru. Il-fatt li Stati Membri kkonkludew
jew se jikkonkludu ftehimiet mal-Istati Uniti fir-rigward tal-FATCA jfisser li
dawn jipprovdu kooperazzjoni usa' skont it-tifsira ta' dik
id-dispożizzjoni. 11. AEOI mkabbar fuq il-bażi
ta' strument leġiżlattiv għall-UE kollha għandu
jneħħi l-ħtieġa u l-inċentiv għall-Istati Membri
sabiex jinvokaw l-Artikolu 19 tad-DAC, bil-għan li jikkonkludu
ftehimiet bilaterali jew multilaterali li jistgħu jitqiesu xierqa dwar
l-istess suġġett fl-assenza ta' leġiżlazzjoni relevanti
tal-Unjoni. Ix-xenarju ta' diversi ftehimiet konklużi taħt dik
id-dispożizzjoni jippreżenta għadd ta' żvantaġġi,
meta mqabbel ma' soluzzjoni miġjuba minn azzjoni mill-UE: –
Il-kundizzjonijiet indaqs għal kulħadd
bejn l-Istati Membri jistgħu jkunu f'riskju jekk l-Istati Membri jaqblu li
jikkooperaw fuq AEOI miżjud b'modi differenti. Dan jista' jwassal
għal distorsjonijiet u flussi artifiċjali tal-kapital fiis-suq
intern. –
Jekk il-ftehimiet bejn l-Istati Membri ma jkunux
identiċi, dan jista' wkoll joħloq diffikultajiet għal operaturi
ekonomiċi li huma attivi f'diversi Stati Membri billi dawn imbagħad
ikunu jistgħu jiffaċċaw rekwiżiti differenti ta' konformità
fi Stati Membri differenti. –
Jista' jfisser ukoll li l-Istati Membri ma jkunux
jistgħu jużaw is-sistemi ta' rappurtaġġ tal-IT li ġew
żviluppati fl-UE (ara hawn fuq). 12. L-adozzjoni u
l-implimentazzjoni mingħajr dewmien huma kruċjali sabiex jinkisbu
l-benefiċċji kemm jista' jkun malajr. Sabiex tiġi żgurata
l-konsistenza mal-iskadenza għall-applikazzjoni tal-AEOI
għall-kategoriji tal-introjtu u l-kapital diġà koperti mid-DAC,
il-limiti ta' żmien proposti għat-traspożizzjoni u
l-applikazzjoni tar-regoli l-ġodda huma
l-31 ta' Diċembru 2014 u
l-1 ta' Jannar 2015, rispettivament. 2. RIŻULTATI TAL-KONSULTAZZJONIJIET
MAL-PARTIJIET INTERESSATI U L-VALUTAZZJONIJIET TAL-IMPATT Minbarra d-diskussjonijiet li saru fil-Kunsill
tal-Ministri minn April 2013 (ara hawn fuq taħt il-punt 1),
il-Kummissjoni organizzat laqgħa teknika mal-Istati Membri
fil-21 ta' Mejju 2013 biex tikkonferma l-ħtieġa għal
proposta leġiżlattiva u biex tiddiskuti l-modalitajiet prattiċi
u l-kontenut tagħha. Id-diskussjonijiet urew li l-Istati Membri
ġeneralment kienu jappoġġaw il-ħtieġa għat-titjib
tal-iskambju awtomatiku ta' informazzjoni u sabiex titħaffef l-estensjoni
tal-ambitu tal-Artikolu 8 tad-DAC kif diġà previst
fl-Artikolu 8(5). Il-biċċa l-kbira tal-Istati Membri
jixtiequ jieħdu azzjoni rapida biex iżidu l-AEOI iżda azzjoni
mhux ikkoordinata mill-Istati Membri dwar din il-kwistjoni tista' twassal
għal frammentazzjoni potenzjali fit-tul fis-suq intern. Għalhekk, sar
eċċezzjonalment urġenti li jsir provvediment għal qafas
legali konsistenti u koerenti tal-UE; għal din ir-raġuni, ma
tħejjiet l-ebda valutazzjoni tal-impatt. Il-Parlament Ewropew adotta riżoluzzjoni
fil-21 ta' Mejju 2013[4],
li biha jilqa' b'sodisfazzjon il-Pjan ta' Azzjoni tal-Kummissjoni u
r-Rakkomandazzjonijiet tagħha, iħeġġeġ lill-Istati
Membri biex isegwu l-impenji tagħhom u jilqgħu l-pjan ta' azzjoni
tal-Kummissjoni, kif ukoll jenfasizza li l-UE għandha tieħu rwol ta'
tmexxija fid-diskussjonijiet dwar il-ġlieda kontra l-frodi tat-taxxa,
l-evażjoni tat-taxxa u r-rifuġji fiskali u, b'mod partikolari,
fir-rigward tal-promozzjoni tal-iskambju awtomatiku tal-informazzjoni. Il-Kumitat Ekonomiku u Soċjali Ewropew ukoll
adotta opinjoni fis-17 ta' April 2013[5]. Il-Kumitat jappoġġja
l-pjan ta' Azzjoni tal-Kummissjoni u jappoġġa l-isforzi tagħha
biex issib soluzzjonijiet prattiċi fir-rigward tat-tnaqqis l-frodi
tat-taxxa u l-evażjoni tat-taxxa. B'mod partikolari, huwa jappoġġa
fil-punti 4.6 u 4.7 l-inizjattivi tal-Kummissjoni fir-rigward tat-titjib dwar
l-AEOI. 3. ELEMENTI ĠURIDIĊI TAL-PROPOSTA Il-proposta għandha l-għan li
timmodifika l-Artikolu 8 tad-DAC kurrenti. Il-modifiki jinsabu fl-Artikolu 1
tal-proposta. L-ewwel modifika tikkonċerna l-paragrafu 3
tal-Artikolu 8. Il-proposta hija li titneħħa r-referenza
għal limitu minimu li taħtu Stat Membru jista' ma jkunx jixtieq
jirċievi informazzjoni minn Stati Membri oħra. Diskussjonijiet
mal-Istati Membri wrew li dan il-livell minimu mhuwiex maniġġabbli
b'mod prattiku. Minbarra dan, huwa propost li tiddaħħal l-espressjoni
“waħda jew bosta mill-” qabel it-terminu “kategoriji”; dan jevita nuqqas
ta' ftehim f'każ fejn Stat Membru jindika li ma jixtieqx jirċievi
informazzjoni dwar wieħed jew bosta mill-kategoriji tal-introjtu u
l-kapital imsemmija fil-paragrafu 1 ukoll jekk ikun jixtieq jirċievi
informazzjoni dwar oħrajn. Huwa propost li jiġi introdott, permezz
ta' paragrafu ġdid 3a tal-Artikolu 8, l-iskambju awtomatiku ta'
informazzjoni għal dividendi, qligħ kapitali, kwalunkwe introjtu
ieħor iġġenerat fir-rigward tal-assi miżmuma f'kont
finanzjarju, kwalunkwe ammont li fir-rigward tiegħu l-istituzzjoni
finanzjarja hija l-obbligant (jiġifieri hija legalment jew kuntrattwalment
obbligata li tħallas) jew id-debitur, inkluż kwalunkwe ħlasijiet
ta' fidi, u bilanċi tal-kontijiet. Dawn il-punti addizzjonali jirrelataw
mal-introjtu imħallas direttament jew indirettament lil użufruttwarji
li huma persuni naturali, kif definit bl-Artikolu 3(11)(a) tad-Direttiva
2011/16/UE, jew kapital miżmum direttament jew indirettament minn dawn
il-persuni. Mhux qed jiġi propost li tiġi estiża
għall-partiti l-ġodda l-kundizzjoni eżistenti stipulata
fl-Artikolu 8(1) fir-rigward tal-introjtu li bħalissa huwa inkluż
fid-Direttiva, li hija li l-informazzjoni għandha tiġi skambjata biss
jekk tkun “disponibbli”. Informazzjoni dwar dawk il-punti ġodda
ċertament se tkun disponibbli billi l-intermedjarji finanzjarji se jkunu
meħtieġa jirrapportawha lill-amministrazzjonijiet tat-taxxa skont
il-ftehimiet li l-Istati Membri kkonkludew jew se jikkonkludu mal-Istati Uniti
fir-rigward tal-FATCA. Rigward il-paragrafu 5
tal-Artikolu 8, qed jiġu proposti dawn it-tibdiliet: –
Fl-ewwel subparagrafu, issir referenza paragrafu
ġdid 3a u r-rieżami tal-kundizzjoni tad-disponibbiltà se
jikkonċerna l-ħames kategoriji kollha elenkati fil-paragrafu 1
(minflok tlieta minnhom biss); –
Fil-punt (b) tat-tieni subparagrafu,
ir-referenza għal “dividendi u qligħ kapitali” bħala
kwistjonijiet li għandhom jiġu kkunsidrati għal żieda
futura mad-Direttiva titneħħa billi dawn il-kategoriji issa huma
miżjuda fil-paragrafu l-ġdid 3a; “kategoriji u elementi oħra,
inklużi d-drittijiet tal-awtur” (id-drittijiet tal-awtur huma diġà
kkwotati fit-test eżistenti) hija sostitwita sabiex jitħalla aktar
miftuħ l-ambitu ta' proposta ġdida fl-2017. L-Artikolu 2
fih id-dispożizzjoni tas-soltu li torbot lill-Istati Membri biex
jittrasponu d-Direttiva. Il-limiti ta' żmien proposti
għat-traspożizzjoni u l-applikazzjoni tar-regoli l-ġodda huma
l-31 ta' Diċembru 2014 u l-1 ta' Jannar 2015
rispettivament , sabiex dawn jiġu
allinjati mad-dati applikabbli fir-rigward ta' kategoriji ta' introjtu u
kapital inklużi fl-Artikolu 8.1 tad-Direttiva eżistenti. 4. IMPLIKAZZJONI BAĠITARJA Il-proposta ma għandha l-ebda
implikazzjoni baġitarja. Dan japplika b'mod partikolari fir-rigward
tal-użu tal-għodod tal-IT, billi l-għodod li qed jiġu
żviluppati se jintużaw ukoll għall-implimentazzjoni ta' din
id-Direttiva. 2013/0188 (CNS) Proposta għal DIRETTIVA TAL-KUNSILL li temenda d-Direttiva 2011/16/UE fir-rigward
tal-iskambju awtomatiku obbligatorju ta' informazzjoni fil-qasam
tat-tassazzjoni IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea u b'mod partikolari l-Artikolu 115
tiegħu, Wara li kkunsidra l-proposta mill-Kummissjoni
Ewropea, Wara li l-abbozz tal-att leġiżlattiv
intbagħat lill-Parlamenti nazzjonali, Wara li kkunsidra l-opinjoni tal-Parlament
Ewropew[6],
Wara li kkunsidra l-opinjoni tal-Kumitat
Ekonomiku u Soċjali Ewropew[7],
Filwaqt li jaġixxi skont proċedura
leġiżlattiva speċjali, Billi: (1) F'dawn l-aħħar
snin, l-isfida ppreżentata mill-frodi fiskali u l-evażjoni tat-taxxa
żdiedet konsiderevolment u saret punt fokali ta' tħassib fl-Unjoni u
fuq il-livell globali. Introjtu li ma jiġix irrappurtat u ntaxxat
qiegħed inaqqas konsiderevolment id-dħul nazzjonali mit-taxxi.
Għaldaqstant, il-ħtieġa li jiżdiedu l-effiċjenza u
l-effikaċja fil-ġbir tat-taxxi hija waħda urġenti.
L-iskambju awtomatiku tal-informazzjoni jikkostitwixxi għodda importanti
f'dan ir-rigward u l-Kummissjoni fil-Komunikazzjoni tagħha
tas-6 ta' Diċembru 2012 li fiha Pjan ta' azzjoni biex
tissaħħaħ il-ġlieda kontra l-frodi fiskali u
l-evażjoni tat-taxxa[8]
enfasizzat il-ħtieġa li tippromwovi b'mod vigoruż l-iskambju
awtomatiku tal-informazzjoni bħala l-istandard futur Ewropew u
internazzjonali tat-trasparenza u l-iskambju tal-informazzjoni fi kwistjonijiet
tat-taxxa. Il-Kunsill Ewropew fit-22 ta' Mejju 2013 talab
l-estensjoni tal-iskambju awtomatiku tal-informazzjoni fil-livelli tal-Unjoni u
globali bil-għan li jiġu miġġielda l-frodi tat-taxxa,
l-evażjoni tat-taxxa u l-ippjanar aggressiv tat-taxxa. (2) Id-Direttiva tal-Kunsill
2011/16/UE tal-15 ta' Frar 2011 dwar il-kooperazzjoni
amministrattiva fil-qasam tat-tassazzjoni u li tħassar id-Direttiva
77/799/KEE[9]
diġà tipprevedi l-iskambju awtomatiku obbligatorju tal-informazzjoni bejn
l-Istati Membri dwar ċerti kategoriji ta' introjtu u kapital. Hu
jistabbilixxi wkoll approċċ pass-pass għat-tisħiħ
tal-iskambju awtomatiku tal-informazzjoni permezz tal-estensjoni progressiva
tagħha għal kategoriji ġodda ta' introjtu u ta' kapital u
t-tneħħija tal-kundizzjoni li l-informazzjoni għandha tiġi
skambjata biss jekk disponibbli. (3) Kif enfasizzat mit-talba
tal-Kunsill Ewropew, huwa xieraq li titressaq 'il quddiem l-estensjoni ta'
skambju awtomatiku tal-informazzjoni diġà prevista fl-Artikolu 8(5)
tad-Direttiva 2011/16/UE. Inizjattiva tal-Unjoni tiżgura approċċ
koerenti, konsistenti u komprensiv mifrux mal-Unjoni kollha għall-iskambju
awtomatiku tal-informazzjoni fis-suq intern li jwassal għal iffrankar
fl-ispejjeż kemm għall-amministrazzjonijiet tat-taxxa kif ukoll
għall-operaturi ekonomiċi. (4) Il-fatt li l-Istati Membri
jkunu kkonkludew jew esprimew l-intenzjoni li jikkonkludu ftehimiet mal-Istati
Uniti tal-Amerika dwar il-leġiżlazzjoni tagħha dwar
il-Konformità Fiskali tal-Kontijiet Barranin (komunement imsejħa “FATCA”)
jfisser li jkunu qed jipprovdu jew se jipprovdu għal kooperazzjoni usa' skont
it-tifsira tal-Artikolu 19 tad-Direttiva 2011/16/UE, u huma, jew se jkunu,
b'obbligu li jipprovdu tali kooperazzjoni usa' lill-Istati Membri l-oħra
wkoll. (5) Il-konklużjoni ta'
ftehimiet paralleli u mhux koordinati mill-Istati Membri skont l-Artikolu 19
tad-Direttiva 2011/16/UE twassal għal distorsjonijiet li jkunu ta'
detriment għall-funzjonament tajjeb tas-Suq intern. Skambju awtomatiku
tal-informazzjoni mkabbar fuq il-bażi ta' strument leġiżlattiv
għall-UE kollha għandu jneħħi l-ħtieġa
għall-Istati Membri sabiex jinvokaw dik id-dispożizzjoni,
bil-għan li jikkonkludu ftehimiet bilaterali jew multilaterali li
jistgħu jitqiesu xierqa dwar l-istess suġġett fl-assenza ta'
leġiżlazzjoni relevanti tal-Unjoni. (6) L-ambitu tal-Artikolu 8
tad-Direttiva 2011/16/UE, għandu jiġi estiż biex jinkludi
l-entrati li ġejjin koperti mill-FATCA u ftehimiet relatati mill-Istati
Membri: dividendi, qligħ kapitali, introjtu finanzjarju ieħor u
bilanċi tal-kontijiet, li jitħallsu, huma garantiti jew miżmuma
minn istituzzjoni finanzjarja għall-benefiċċju dirett jew
indirett ta' sid benefiċjarju li jkun persuna fiżika residenti fi
Stat Membru ieħor. (7) Il-kundizzjoni li skambju
awtomatiku jista' jkun suġġett għad-disponibbiltà
tal-informazzjoni mitluba kif previst fl-Artikolu 8(1) tad-Direttiva
2011/16/UE ma għandhiex tapplika għall-elementi l-ġodda billi
l-informazzjoni dwar dawk l-elementi għandha neċessarjament tiġi
pprovduta mill-intermedjarji finanzjarji lill-amministrazzjonijiet tat-taxxa
skont il-ftehimiet mal-Istati Uniti fir-rigward tal-FATCA. (8) Ir-referenza għal limitu
minimu fl-Artikolu 8(3) tad-Direttiva 2011/16/UE għandhom
jitneħħew billi limitu minimu bħal dan ma jidhirx li kien
maniġġabbli fil-prattika. (9) Ir-rieżami
tal-kundizzjoni ta' disponibbiltà li għandu jsir fl-2017 għandu
jiġi estiż għall-ħames kategoriji kollha msemmija
fl-Artikolu 8(1) tad-Direttiva 2011/16/UE, sabiex il-każ
għall-iskambju ta' informazzjoni mill-Istati Membri kollha fuq dawk
il-kategoriji kollha jiġi eżaminat. (10) Din id-Direttiva tirrispetta
d-drittijiet fundamentali u tħares il-prinċipji rikonoxxuti
mill-Karta tad-Drittijiet Fundamentali tal-Unjoni Ewropea. (11) Peress li l-għan
tal-azzjoni li għandha tittieħed, jiġifieri l-kooperazzjoni
amministrattiva effiċjenti bejn l-Istati Membri b'kundizzjonijiet
kumpatibbli mal-funzjonament xieraq tas-suq intern, ma jistgħux
jintlaħqu suffiċjentament mill-Istati Membri u jistgħu
għalhekk, minħabba l-uniformità u l-effikaċja
meħtieġa, jintlaħqu aħjar f'livell Komunitarju, il-Komunità
tista' tadotta miżuri, f'konformità mal-prinċipju tas-sussidjarjetà
kif stabbilit fl-Artikolu 5 tat-Trattat dwar l-Unjoni Ewropea.
F'konformità mal-prinċipju tal-proporzjonalità, kif imniżżel
f'dan l-Artikolu, din id-Direttiva ma tmurx lil hinn minn dak li hu meħtieġ
sabiex jintlaħaq dak l-għan. (12) Id-Direttiva 2011/16/UE
għalhekk għandha tiġi emendata skont dan, ADOTTA DIN ID-DIRETTIVA: Artikolu 1 L-Artikolu 8 tad-Direttiva 2011/16/UE
huwa emendat kif ġej: (a) Il-paragrafu 3 huwa sostitwit b'dan li
ġej: “3. L-awtorità kompetenti ta' Stat Membru
tista' tindika lill-awtorità kompetenti ta' kwalunkwe Stat Membru ieħor li
ma tixtieqx tirċievi informazzjoni dwar waħda mill-kategoriji
tal-introjtu u l-kapital imsemmija fil-paragrafu 1 jew bosta minnhom. Hija
għandha wkoll tinforma lill-Kummissjoni b'dan. Stat Membru jista' jitqies li ma jixtieqx
jirċievi informazzjoni f'konformità mal-paragrafu 1, jekk ma
jinformax lill-Kummissjoni bi kwalunkwe kategorija speċifika li
fir-rigward tagħha huwa jkollu informazzjoni disponibbli." (b) Wara l-paragrafu 3, jiddaħħal
il-paragrafu li ġej: “3a. L-awtorità kompetenti ta' kull Stat Membru
għandha, permezz ta' skambju awtomatiku, tikkomunika lill-awtorità
kompetenti ta' kwalunkwe Stat Membru ieħor, informazzjoni rigward perjodi
taxxabbli mill-1 ta' Jannar 2014 fir-rigward tal-punti li
ġejjin li huma mħallsa, garantiti jew miżmuma minn istituzzjoni
finanzjarja għall-benefiċċju dirett jew indirett ta' sid
benefiċjarju li jkun persuna fiżika residenti f'dak l-Istat Membru
l-ieħor: (a)
dividendi; (b)
qligħ kapitali; (c)
kwalunkwe introjtu ieħor iġġenerat
fir-rigward tal-assi miżmuma f'kont finanzjarju; (d)
kull ammont li fir-rigward tiegħu
l-istituzzjoni finanzjarja tkun obbligant jew debitur, inkluż kwalunkwe
ħlasijiet ta' fidi; (e)
bilanċi tal-kontijiet. L-ewwel subparagrafu ma għandux japplika
sal-punt li l-iskambju tal-informazzjoni inkwistjoni huwa żgurat permezz
tal-paragrafu 1 jew permezz ta' xi strument legali ieħor tal-Unjoni.” (c) Il-paragrafu 5 huwa sostitwit b'dan li
ġej: “5. Qabel l-1 ta' Lulju 2017,
il-Kummissjoni għandha tippreżenta rapport li jipprovdi ħarsa
ġenerali u valutazzjoni tal-istatistika u l-informazzjoni riċevuta,
dwar kwistjonijiet bħall-ispejjeż amministrattivi u oħrajn
rilevanti u l-benefiċċji tal-iskambju awtomatiku tal-informazzjoni,
kif ukoll l-aspetti prattiċi marbuta ma' dan. Jekk ikun xieraq,
il-Kummissjoni għandha tippreżenta proposta lill-Kunsill rigward
il-kategoriji u l-kundizzjonijiet stabbiliti fil-paragrafu 1, inkluża
l-kundizzjoni li għandha tkun disponibbli l-informazzjoni li
tikkonċerna lil residenti fi Stati Membri oħra jew l-elementi
msemmija fil-paragrafu 3a, jew it-tnejn. Meta jkun qed jeżamina proposta
ppreżentata mill-Kummissjoni, il-Kunsill għandu jivvaluta
t-tisħiħ ulterjuri tal-effiċjenza u l-funzjonament tal-iskambju
awtomatiku tal-informazzjoni u t-titjib tal-istandard tiegħu,
bil-għan li jipprevedi li: (a) l-awtorità kompetenti ta' kull Stat Membru
għandha, permezz ta' skambju awtomatiku, tikkomunika lill-awtorità
kompetenti ta' kwalunkwe Stat Membru ieħor, informazzjoni rigward perjodi
taxxabbli mill-1 ta' Jannar 2017 rigward ir-residenti f'dak
l-Istat Membru l-ieħor, dwar il-kategoriji kollha ta' introjtu u ta'
kapital elenkati fil-paragrafu 1, kif għandhom jinftiehmu skont
il-leġiżlazzjoni nazzjonali tal-Istat Membru li jikkomunika
l-informazzjoni; (b) il-listi ta' kategoriji u partiti stabbiliti
fil-paragrafi 1 u 3a jiġu estiżi biex jinkludu kategoriji u
elementi oħra, inklużi d-drittijiet tal-awtur” Artikolu 2 1. L-Istati Membri għandhom
jadottaw u jippubblikaw, sa mhux aktar tard
mit-31 ta' Diċembru 2014, il-liġijiet, ir-regolamenti
u d-dispożizzjonijiet amministrattivi meħtieġa biex jikkonformaw
ma' din id-Direttiva. Huma għandhom jikkomunikaw minnufih it-test ta' dawk
id-dispożizzjonijiet lill-Kummissjoni. Huma għandhom japplikaw dawn
id-dispożizzjonijiet mill-1 ta' Jannar 2015. Meta l-Istati Membri jadottaw dawk
id-dispożizzjonijiet, dawn għandhom jirreferu għal din
id-Direttiva jew ikunu akkumpanjati mit-tali referenza waqt il-pubblikazzjoni
uffiċjali tagħhom. L-Istati Membri għandhom jiddeċiedu kif
għandha ssir it-tali referenza. 2. L-Istati Membri għandhom
jikkomunikaw lill-Kummissjoni t-test tad-dispożizzjonijiet
ewlenin fil-liġijiet nazzjonali li huma jadottaw fil-qasam kopert
b'din id-Direttva. Artikolu 3 Din id-Direttiva għandha tidħol
fis-seħħ fl-20 jum wara l-pubblikazzjoni tagħha f'Il-Ġurnal
Uffiċjali tal-Unjoni Ewropea. Artikolu 4 Din id-Direttiva hija indirizzata
lill-Istati Membri. Magħmul fi Brussell, Għall-Kunsill Il-President [1] COM(2012)722 finali. [2] Konklużjonijiet tal-Kunsill dwar il-frodi fiskali u
l-evażjoni tat-taxxa tal-14 ta' Mejju 2013 (Dok. 9549/13 -
FISC 94 - ECOFIN 353) [3] http://www.treasury.gov/resource-center/tax-policy/treaties/Pages/FATCA.aspx [4] Riżoluzzjoni tal-Parlament Ewropew
tal-21 ta' Mejju 2013 dwar il-ġlieda kontra l-frodi
tat-taxxa, l-evażjoni tat-taxxa, u r-rifuġji fiskali (Rapport Kleva)
– 2013/2025 (INI). [5] Opinjoni tal-Kumitat Ekonomiku u Soċjali Ewropew
tas-17 ta' April 2013 dwar il-Komunikazzjoni mill-Kummissjoni
lill-Parlament Ewropew u lill-Kunsill - Pjan ta' azzjoni biex
tissaħħaħ il-ġlieda kontra l-frodi fiskali u
l-evażjoni tat-taxxa COM(2012) 722 finali (Rapport Dandea) — CESE
101/2013. [6] ĠU C , , p. . [7] ĠU C , , p. . [8] COM(2012)722 finali. [9] ĠU L 64, 11.3.2011, p. 1.