This document is an excerpt from the EUR-Lex website
Document 52013PC0028
Proposal for a REGULATION OF THE EUROPEAN PARLIAMENT AND OF THE COUNCIL amending Regulation (EC) No 1370/2007 concerning the opening of the market for domestic passenger transport services by rail
Proposta għal REGOLAMENT TAL-PARLAMENT EWROPEW U TAL-KUNSILL li jemenda r-Regolament (KE) Nru 1370/2007 fir-rigward tal-ftuħ tas-suq għas-servizzi tat-trasport ferrovjarju domestiku tal-passiġġieri
Proposta għal REGOLAMENT TAL-PARLAMENT EWROPEW U TAL-KUNSILL li jemenda r-Regolament (KE) Nru 1370/2007 fir-rigward tal-ftuħ tas-suq għas-servizzi tat-trasport ferrovjarju domestiku tal-passiġġieri
/* COM/2013/028 final - 2013/0028 (COD) */
Proposta għal REGOLAMENT TAL-PARLAMENT EWROPEW U TAL-KUNSILL li jemenda r-Regolament (KE) Nru 1370/2007 fir-rigward tal-ftuħ tas-suq għas-servizzi tat-trasport ferrovjarju domestiku tal-passiġġieri /* COM/2013/028 final - 2013/0028 (COD) */
MEMORANDUM TA’ SPJEGAZZJONI 1. KUNTEST TAL-PROPOSTA Fil-White Paper tagħha tal-2011
dwar il-politika tat-trasport, adottata fit-28 ta' Marzu 2011[1], il-Kummissjoni Ewropea
pproponiet il-viżjoni tagħha ta' Żona Ferrovjarja Unika Ewropea,
b'suq ferrovjarju intern fejn l-impriżi ferrovjarji Ewropej ikunu
jistgħu jipprovdu servizzi mingħajr xkiel tekniku u amministrattiv
żejjed. Għadd ta’ inizjattivi ta’ politika
għarfu l-potenzjal tal-infrastruttura ferrovjarja bħala sinsla
tas-suq intern, u bħala xprunatur ta’ tkabbir sostenibbli.
Il-konklużjonijiet tal-Kunsill Ewropew ta’ Jannar 2012 saħqu fuq
l-importanza li jiġi sfruttat il-potenzjal ta’ tkabbir ta’ Suq Intern
integrat bis-sħiħ, inkluż b'miżuri fir-rigward tal-industriji
tan-netwerks. Il-Komunikazzjoni tal-Kummissjoni dwar Azzjoni
għall-Istabbiltà, għat-Tkabbir u għall-Impjiegi, adottata
fit-30 ta' Mejju 2012, issottolinjat l-importanza li jkomplu
jitnaqqsu l-piż u x-xkiel regolatorji għad-dħul fis-settur ferrovjarju.
Bl-istess mod, il-Komunikazzjoni tal-Kummissjoni dwar Governenza aqwa tas-suq
uniku[2],
adottata fis-6 ta’ Ġunju 2012, saħqet fuq l-importanza
tas-settur tat-trasport. Fl-aħħar deċennju, tliet
"pakketti ferrovjarji" leġiżlattivi mmiraw li jiftħu
s-swieq nazzjonali, u li jrendu l-ferroviji aktar kompetittivi u interoperabbli
fuq il-livell tal-UE. Ir-Regolament 1370/2007 dwar servizzi pubbliċi
tat-trasport tal-passiġġieri bil-ferrovija u bit-triq, ippubblikat
f'Diċembru 2007, stabblixxa qafas għall-għoti ta’ kuntratti
ta’ servizz pubbliku, kif ukoll għall-ikkumpensar tal-obbligi tas-servizz
pubbliku, iżda ma tax approċċ komuni dwar l-għoti ta’
kuntratti għat-trasport ferrovjarju tal-passiġġieri. Minkejja
l-leġiżlazzjoni ġdida tal-UE, is-sehem modali tal-ferrovija
fit-trasport intra-UE baqa' wieħed modest. 1.2 Problemi li għandhom jiġu
indirizzati Il-partijiet interessati jqisu li, fil-qafas
legali attwali, is-servizzi ferrovjarji tal-passiġġieri mhux
qegħdin jagħtu l-prestazzjoni mistennija f'termini ta’ kwalità, ta’
servizz u ta’ effiċjenza operattiva. 54 % minn dawn li wieġbu
s-sondaġġ tal-Ewrobarometru tal-2012 ma kinux sodisfatti bis-sistemi
ferrovjarji ta’ pajjiżhom jew tar-reġjun tagħhom. Skont
it-Tabella ta’ Valutazzjoni tas-Swieq tal-Konsumatur tal-2011[3], il-livell globali ta’
sodisfazzjoni tal-passiġġieri tal-ferroviji kien ta’ 6.7 fuq 10,
jiġifieri ferm inqas mil-livell għall-biċċa l-kbira
tal-oġġetti u s-servizz tal-konsumaturi. Fost il-konsumaturi,
is-servizzi ferrovjarji jġibu marki agħar mill-modi kollha
l-oħra tat-trasport (it-trasport urban u l-linji tal-ajru, b'mod
partikulari, ġabu marki aħjar), u jinsabu fis-27 post minn 30 suq
tas-servizzi. Hemm qabżiet konsiderevoli, fl-effiċjenza operattiva,
bejn l-aqwa u l-agħar sistemi ferrovjarji f'termini ta’ prestazzjoni. Dawn
il-qabżiet jirriflettu differenzi sinifikanti fl-użu tal-assi,
bħall-vetturi ferrovjarji u l-infrastruttura, kif ukoll fil-produttività
tax-xogħol. Imqabbel ma' setturi ekonomiċi oħra (apparti
l-finanzjament tal-infrastruttura), dawn il-qabżiet fl-effiċjenza
operattiva jwasslu għall-ħtieġa sostanzjali ta’ fondi
pubbliċi, billi ħafna impriżi ferrovjarji jagħmlu telf. Hemm għadd ta’ ostakoli li jfixklu
t-titjib tal-kwalità tas-servizz u tal-effiċjenza operattiva tal-kumpaniji
ferrovjarji. Dawn huma marbutin, l-ewwel nett, mal-aċċess
għas-suq għas-servizzi domestiċi tal-passiġġieri, kif
ukoll man-nuqqas ta’ pressjoni kompetittiva. F'ħafna Stati Membri, dan
is-suq huwa magħluq għall-kompetizzjoni, u dan mhux biss jillimita t-tkabbir,
iżda joħloq diverġenzi bejn dawk l-Istati Membri li fetħu
s-swieq tagħhom, fuq naħa, u l-Istati Membri li ma fetħuhomx fuq
in-naħa l-oħra. Id-differenzi fl-approċċi nazzjonali
għall-ftuħ tas-suq għas-servizzi tat-trasport domestiku
tal-passiġġieri qegħdin jipprevjenu l-emerġenza ta’ Suq
Intern reali u effettiv għas-servizzi ferrovjarji
tal-passiġġieri. Madankollu, il-maġġoranza l-kbira
tas-servizzi domestiċi tal-passiġġieri ma jingħatawx fuq
bażi kummerċjali, u għaldaqstant isiru fil-qafas ta’ kuntratti
ta’ servizz pubbliku. Billi ma tapplika l-ebda regola komuni tal-UE
għall-għoti ta’ tali kuntratti, ċerti Stati Membri
daħħlu sejħiet għall-offerti kompetittivi għal dawn
il-kuntratti, filwaqt li Stati Membri oħra jagħtuhom b'mod dirett.
Dan il-lapazzar ta’ sistemi regolatorji fl-UE jagħmilha diffiċli li
l-impriżi ferrovjarji jisfruttaw il-potenzjal sħiħ ta'
operazzjoni f'Suq Intern. Għaldaqstant, dan il-pakkett
leġiżlattiv ikopri wkoll il-kompetizzjoni għall-kuntratti ta’
servizz pubbliku; ix-xkiel għall-kompetizzjoni, bħad-disponibilità
ta' vetturi ferrovjarji xierqa għal applikanti potenzjali għal tali
kuntratti; u l-aċċess mingħajr diskriminazzjoni
għas-sistemi informatiċi u għas-sistemi integrati ta' bejgħ
tal-biljetti, fejn dawn ikunu ta' ġid għall-passiġġier. 1.3 Għanijiet ġenerali L-għan ewlieni tal-politika tat-trasport
tal-Unjoni Ewropea huwa li jiġi stabbilit suq intern għat-trasport,
li jikkontribwixxi għal livell għoli ta’ kompetittività, kif ukoll
għall-iżvilupp armonjuż, ibbilanċjat u sostenibbli ta’
attivitajiet ekonomiċi. Il-White Paper dwar it-Trasport tal-2011
tiddikjara li l-ferrovija għandha tirrappreżenta l-parti l-kbira
tat-trasport tal-passiġġieri fuq distanza medja sal-2050. Din
il-"bidla modali" tkun kontribut għat-tnaqqis ta’ 20 %
fl-emissjonijiet tal-gassijiet serra previst fl-Istrateġija
tal-Ewropa 2020 għal tkabbir intelliġenti, sostenibbli u
inklussiv[4].
Il-White Paper ikkonkudiet li l-ebda bidla kbira fit-trasport ma tkun
possibbli mingħajr l-appoġġ ta' infrastruttura ferrovjarja
xierqa, u mingħajr approċċ aktar intelliġenti lejn
l-użu tagħha. L-għan globali ta’ din il-proposta,
bħala parti mir-Raba' Pakkett Ferrovjarju, huwa li tittejjeb il-kwalità
tas-servizzi ferrovjarji tal-passiġġieri, u li
tissaħħaħ l-effiċjenza operattiva tagħhom, b'mod li jittejbu
wkoll il-kompetittività u l-attrazzjoni tal-ferrovija meta mqabbla ma' mezzi
oħra ta' trasport, u b'hekk jitkompla l-iżvilupp taż-Żona
Ferrovjarja Unika Ewropea. 1.4 Għanijiet speċifiċi Din il-proposta tiġbor regoli komuni
għall-għoti ta’ kuntratti ta’ servizz pubbliku għat-trasport
ferrovjarju tal-passiġġieri, flimkien ma' miżuri ta’
akkumpanjament li għandhom iżidu s-suċċess
tal-proċeduri tas-sejħiet għall-offerti kompetittivi. L-għan tas-sejħa għall-offerti
obbligatorja u kompetittiva għall-kuntratti ta’ servizz pubbliku huwa li
tiġi intensifikata l-pressjoni kompetittiva fuq is-swieq ferrovjarji
domestiċi, sabiex is-servizzi tal-passiġġieri jikbru
fil-kwantità u jitjiebu fil-kwalità. Is-sejħa għall-offerti
kompetittiva għall-kuntratti ferrovjarji tista' wkoll tiżgura valur aħjar
għall-flus minfuq fuq is-servizzi tat-trasport pubbliku. Ir-regoli komuni
dwar il-proċedura tas-sejħa għall-offerti għandhom
jikkontribwixxi għal kundizzjonijiet tan-negozju aktar uniformi
għall-kumpaniji ferrovjarji. Dawn il-proposti jridu jitqiesu b'rabta
mal-emendi proposti għad-Direttiva 2012/34/UE tal-Parlament Ewropew u
tal-Kunsill tal-21 ta’ Novembru 2012 li tistabbilixxi żona
ferrovjarja unika Ewropea (riformulazzjoni)[5],
li ddaħħal drittijiet tal-aċċess miftuħ
għall-impriżi ferrovjarji, u ssaħħaħ
id-dispożizzjonijiet dwar l-aċċess mingħajr
diskriminazzjoni għall-infrastruttura ferrovjarja. 2. IR-RIŻULTATI
TAL-KONSULTAZZJONIJIET MAL-PARTIJIET INTERESSATI U TAL-VALUTAZZJONIJIET
TAL-IMPATT Biex jgħin lill-Kummissjoni
fil-proċess tal-valutazzjoni tal-impatt, konsulent estern intalab li
jħejji studju ta' appoġġ, u li jwettaq konsultazzjoni mmirata.
L-istudju beda f'Diċembru 2011 u r-rapport finali tlesta
f'Settembru 2012. Biex jinġabru l-fehmiet tal-partijiet
interessati, ġiet ippreferuta taħlita ta’ metodi ta’ konsultazzjoni
flok konsultazzjoni miftuħa. Bejn l-1 ta’ Marzu u
s-16 ta’ April 2012, intbagħtu kwestjonarji personalizzati
lil 427 parti interessata marbutin mas-settur ferrovjarju (impriżi
ferrovjarji, amministraturi tal-infrastruttura, ministeri tat-trasport
pubbliku, awtoritajiet tas-sikurezza, ministeri, korpi rappreżentattivi,
għaqdiet tal-ħaddiema, eċċ.). Il-fehmiet
tal-passiġġieri nġabru permezz ta’ sondaġġ
tal-Ewrobarometru, bi tweġibiet mingħand 25 000 persuna mifruxin
b'mod indaqs mal-25 Stat Membru fejn hemm il-ferroviji. In-netwerk tal-Kumitat
tar-Reġjuni ntuża sabiex jintlaħqu l-awtoritajiet lokali u
reġjonali. Il-konsultazzjonijiet ġew ikkomplementati
minn seduta mal-partijiet interessati, li saret
fid-29 ta’ Mejju 2012 (b'madwar 85 parteċipant),
konferenza (b'madwar 420 parteċipant)
fl-24 ta’ Settembru 2012, u intervisti ma' partijiet interessati
speċifiċi tul l-2012. Il-persunal tal-Kummissjoni ltaqa' ma'
rappreżentanti mill-Komunità tal-Ferroviji Ewropej (li tirrappreżenta
lill-kumpaniji ferrovjarji), l-Operaturi Ewropej tat-Trasport
tal-Passiġġieri (EPTO), il-Federazzjoni Ewropea tal-Ħaddiema
tat-Trasport, il-Federazzjoni Ewropea tal-Passiġġieri,
l-Amministraturi tal-Infrastruttura Ferrovjarja Ewropea, u l-UITP
(l-Assoċjazzjoni Internazzjonali tat-Trasport Pubbliku). Saru wkoll
laqgħat iddedikati mal-partijiet interessati fi Franza, il-Ġermanja,
il-Pajjiżi l-Baxxi, il-Polonja, l-Isvezja u r-Renju Unit. Il-parti l-kbira minn dawk li wieġbu
(60 %) qablu li drittijiet tal-aċċess ġodda addizzjonali,
is-sejħiet għall-offerti kompetittivi u obbligatorji, jew
taħlita tat-tnejn li huma, jistgħu jistimolaw l-integrazzjoni
tas-suq. L-aċċess miftuħ għat-trasport ferrovjarju
domestiku tal-passiġġieri, soġġett għal test
tal-bilanċ ekonomiku li jivvaluta l-impatt li jista' jkollu fuq
il-vijabilità tal-kuntratti ta' servizz pubbliku, kien l-iktar għażla
popolari (55 % minn dawk li wieġbu). L-arranġamenti attwali
tqiesu b'mod negattiv ħafna (b'sapport ta’ 20 % biss).
Ir-rappreżentanti tal-ħaddiema jantiċipaw li kwalunkwe ftuħ
tas-suq għas-servizzi tat-trasport ferrovjarju domestiku
tal-passiġġieri se jirriżulta f'kundizzjonijiet tax-xogħol
agħar, u għal iktar strajkijiet. Fir-rigward tas-sejħiet
għall-offerti kompetittivi u obbligatorji, 45 % minn dawk li
wieġbu huma favur għażliet flessibbli, simili għal dawk
tal-proċedura nnegozjata għall-akkwist pubbliku, u perjodi ta'
tranżizzjoni biex il-kuntratti kollha ta' servizz pubbliku
jinħarġu progressivament għas-sejħiet għall-offerti
(80 % minn dawk li wieġbu). Il-biċċa l-kbira minn dawk li
wieġbu (60 %) qablu li l-ħolqien ta’ kumpaniji li jikru
l-vetturi ferrrovjarji kieku jgħin biex jittejjeb l-aċċess
għall-vetturi ferrovjarji, u l-maġġoranza l-kbira (75 %)
sejħu għal aċċess sħiħ għall-informazzjoni
teknika, ipprovduta mill-amministratur tal-infrastruttura. Fir-rigward
tal-bejgħ integrat tal-biljetti, kien hemm preferenza għal
dispożizzjonijiet mhux vinkolanti, jew għal klawżoli ta’
abilitazzjoni għal ftehimiet volontarji flok miżuri obbligatorji fuq
il-livell tal-UE jew tal-Istat Membru. Il-Kumitat Settorjali għad-Djalogu
Soċjali għall-ferroviji ġie kkonsultat
fis-26 ta’ Marzu u fid-19 ta’ Ġunju, b'mod partikulari
rigward l-għażliet u l-valutazzjoni tal-impatt soċjali
tagħhom. Abbażi tal-istudju estern imsemmi aktar
'il fuq, u abbażi tal-konklużjonijiet tal-proċess ta’
konsultazzjoni, il-Kummissjoni wettqet valutazzjoni kwalitattiva u
kwantitattiva tal-impatti tad-diversi għażliet
għall-immodernizzar tal-qafas regolatorju eżistenti. Il-valutazzjoni tal-impatt uriet li
kombinazzjoni tal-elementi li ġejjin tkun l-aħjar għażla
f'termini ekonomiċi, ambjentali u soċjali, b'ġenerazzjoni ta'
valur kurrenti nett ta' bejn EUR 21 u 29 biljun mill-2019 sal-2035: –
drittijiet ta’ aċċess miftuħ
iddefiniti b'mod wiesa', soġġetti għal test tal-impatt
tagħhom fuq il-bilanċ ekonomiku tal-kuntratti ta' servizz pubbliku; –
kuntratti ta’ servizz pubbliku mogħtija
b'kompetizzjoni; –
sistemi integrati nazzjonali volontarji ta’
bejgħ tal-biljetti; u –
obbligu li l-Istati Membri jiżguraw
l-aċċess mingħajr diskriminazzjoni għall-vetturi
ferrovjarji xierqa, għall-impriżi ferrovjarji li jixtiequ
jipparteċipaw fi proċedura pubblika ta’ sejħa
għall-offerti. 3. ELEMENTI LEGALI TAL-PROPOSTA 3.1 Definizzjoni ta’ awtorità kompetenti
lokali (l-Artikolu 2(c)) Din l-emenda żżid
iċ-ċertezza legali billi tispeċifika li "awtorità
kompetenti lokali" tkopri l-agglomerazzjonijiet urbani jew id-distretti
rurali, mhux partijiet kbar tat-territorju nazzjonali. 3.2 Speċifikazzjonijiet dwar kif
l-awtoritajiet kompetenti jiddefinixxu l-obbligi ta’ servizz pubbliku, u
l-firxa ġeografika tal-kuntratti ta’ servizz pubbliku
(l-Artikolu 2(e) u l-Artikolu 2a ġdid). Dan l-Artikolu jipprovdi proċedura
flessibbli, iżda formalizzata u trasparenti, għad-definizzjoni tal-obbligi
ta’ servizz pubbliku u għall-firxa ġeografika tal-kuntratti ta’
servizz pubbliku, jekk l-awtoritajiet jikkunsidraw li l-intervent pubbliku huwa
meħtieġ biex jiġi żgurat livell politikament ta’ min
jixtiequ ta’ mobilità fit-territorju taħt ir-responsabbiltà tagħhom.
Dan jirrikjedi li l-awtoritajiet kompetenti jfasslu pjanijiet ta’ trasport
pubbliku li jiddefinixxu l-għanijiet tal-politika u l-forniment
tat-trasport pubbliku tal-passiġġieri, u li jipprovdu xejriet ta’
prestazzjoni mixtieqa għat-trasport pubbliku tal-passiġġieri.
Jirrikjedi wkoll li l-awtoritajiet kompetenti jiġġustifikaw it-tip u
l-firxa tal-obblgi tas-servizz pubbliku li beħsiebhom jimponu fuq
l-operaturi tat-trasport pubbliku, kif ukoll l-ambitu tal-kuntratt tas-servizz
pubbliku, bil-għan li jintlaħqu l-għanijiet iddefiniti
fil-pjanijiet ta' trasport pubbliku. Għandhom japplikaw kriterji msejsa
fuq prinċipji ġenerali tat-Trattat, bħalma huma l-adegwatezza,
in-neċessità u l-proporzjonalità, kif ukoll kritejri ekonomiċi
bħall-kosteffettività u s-sostenibbiltà finanzjarja. Dan l-Artikolu
jirrekjedi wkoll li l-awtorità kompetenti tiżgura l-konsultazzjoni xierqa
tal-partijiet interessati, eż. organizzazzjonijiet
tal-passiġġieri u tal-impjegati, u operaturi tat-trasport. Għat-trasport
ferrovjarju, jirrikjedi li korpi regolatorji ferrovjarji indipendenti
jiżguraw ir-reviżjoni legali tal-proċedura. Barra minn hekk,
jistabbilixxi limitu massimu għall-volum tat-trasport ferrovjarju
tal-passiġġieri taħt kull kuntratt ta’ servizz pubbliku, b'mod
flessibbli, sabiex tiġi żgurata kompetizzjoni effettiva filwaqt li
jitqiesu d-dimensjonijiet u l-istrutturi amministrattivi differenti tas-swieq
ferrovjarji tal-passiġġieri fl-Istati Membri. 3.3 Forniment ta’ informazzjoni
operattiva, teknika u finanzjarja fir-rigward tat-trasport
tal-passiġġeri kopert minn kuntratt ta’ servizz pubbliku li
għandu joħroġ għal sejħa għall-offerti
(l-Artikolu 4(6) u 4(8) ġdid) Din id-dispożizzjoni
fl-Artikolu 4(8) tobbliga lill-awtoritajiet kompetenti jipprovdu
ċerta dejta operattiva, teknika u finanzjarja lil applikanti potenzjali
ta' kuntratt ta' servizz pubbliku, sabiex dawn ikunu jistgħu jressqu
applikazzjoni infurmata sew, u b'hekk tiġi żgurata kompetizzjoni
msaħħa. L-emendar tal-Artikolu 4(6) jiċċara li
l-awtoritajiet kompetenti ser ikollhom jindikaw biċ-ċar,
fid-dokumenti tal-offerti tagħhom, jekk jeħtiġux li l-operaturi
tas-servizz pubbliku jikkonformaw mal-istandards jew il-kriterji soċjali. 3.4 Limiti massimi għall-għoti
dirett ta’ kuntratti ta’ volum żgħir, u għall-għoti dirett
lil impriżi żgħar jew ta' daqs medju (l-Artikolu 5(4)) Din id-dispożizzjoni ddaħħal
limiti massimi speċifiċi fuq il-valur tal-għotjiet diretti
għal kuntratti ta’ volum żgħir għat-trasport ferrovjarju.
Il-limiti eżistenti huma mmirati lejn it-trasport bix-xarabank, u lejn
mezzi ta’ trasport fuq binarji għajr il-ferrovija. Il-limitu propost
għall-ferrovija jsegwi l-loġika li jiġi permess l-għoti
dirett jekk il-kost tal-organizzazzjoni ta’ proċedura ta’ sejħa
għall-offerti jkun ogħla mill-benefiċċji mistennija.
Il-limitu korrispondenti f'termini ta’ kilometri ferrovjarji jirrifletti l-kost
medju tal-unità tal-forniment ta' trasport ferrovjarju. 3.5 Għoti kompetittiv obbligatorju
ta’ kuntratti ferrovjarji (l-Artikolu 5(6) u l-Artikolu 4) It-tħassir tal-Artikolu 5(6)
iċaħħad lill-awtoritajiet kompetenti l-għażla li
jiddeċiedu jagħtux jew le kuntratt ta’ servizz pubbliku
għall-ferrovija b'mod dirett jew abbażi ta’ sejħa
għall-offerti kompetittiva. Ir-regola ġenerali tas-sejħa
għall-offerti kompetittiva ser tapplika wkoll għall-ferrovija. 3.6 Restrizzjonijiet
fuq l-għoti (l-Artikolu 5(6) ġdid) Biex tissaħħaħ il-kompetizzjoni
wara l-introduzzjoni tas-sejħiet għall-offerti kompetittivi
għall-kuntratti ferrovjarji, din id-dispożizzjoni tippermetti
lill-awtoritajiet kompetenti jiddeċiedu jekk kuntratti tat-trasport
ferrovjarju tal-passiġġieri li jkopru jew partijiet mill-istess
netwerk, jew partijiet mill-istess pakkett ta’ rotot, jingħatawx lil
impriżi ferrovjarji differenti. Għal dan il-għan, l-awtoritajiet
kompetenti jistgħu jiddeċiedu li jillimitaw l-għadd ta'
kuntratti li għandhom jingħataw lill-istess impriża ferrovjarja
wara proċedura ta' sejħa għall-offerti kompetittiva. 3.7 Aċċess għall-vetturi
ferrovjarji (l-Artikoli 5a u 9a ġodda) L-introduzzjoni ta’ obbligu biex l-Istati
Membri jiżguraw l-aċċess effettiv u mingħajr
diskriminazzjoni għall-vetturi ferrovjarji xierqa, għall-operaturi li
jixtiequ jipprovdu servizzi ta' trasport pubbliku ferrovjarju
tal-passiġġieri, tindirizza xkiel ewlieni għall-kompetizzjoni
effettiva għall-kuntratti ta’ servizz pubbliku. F'dawk l-Istati Membri
fejn m'hemmx swieq tajbin tal-kiri tal-vetturi ferrovjarji, huwa f'idejn
l-awtoritajiet kompetenti li jieħdu miżuri biex jiżguraw
l-aċċess għall-vetturi ferrovjarji bil-għan li jfettħu
s-suq. Madankollu, billi s-sitwazzjoni u l-bżonnijiet jistgħu jvarjaw
minn pajjiż għall-ieħor, id-dispożizzjoni l-ġdida
tħalli lill-awtoritajiet kompetenti ambitu wiesa' biex jagħżlu
l-iktar mezzi xierqa biex jilħqu dan il-għan, filwaqt li tindika
wkoll il-miżuri l-aktar użati. Id-dettalji tal-proċedura, u
l-miżuri għall-iżgurar tal-aċċess għall-vetturi
ferrovjarji, għandhom jiġu ddefiniti f'atti ta’ implimentazzjoni
bbażati fuq il-proċedura ta’ eżami msemmija fl-Artikolu 9a
ta’ dan ir-Regolament. 3.8 Pubblikazzjoni ta’ ċerta
informazzjoni dwar il-kuntratti ta’ servizz pubbliku (l-Artikoli 7(1) u
7(2)) Din id-dispożizzjoni tobbliga
lill-awtoritajiet kompetenti jinkludu informazzjoni dwar id-data tal-bidu u
t-tul ta' żmien tal-kuntratti ta' servizz pubbliku fir-rapporti annwali
tagħhom dwar l-obbligi ta' servizz pubbliku, kif ukoll fl-avviżi ta'
informazzjoni preliminari dwar il-proċeduri ppjanati ta' sejħa
għall-offerti. Din l-informazzjoni addizzjonali, u l-obbligu li l-Istati
Membri jiffaċilitaw l-aċċess għar-rapporti annwali
ppubblikati mill-awtoritajiet kompetenti, għandhom iżidu
t-trasparenza fir-rigward tal-kuntratti ta’ servizz pubbliku mogħtija u
rigward il-kuntratti li x'aktarx jingħataw, u b'hekk l-operaturi
tat-trasport ikunu jistgħu jħejju aħjar għall-proċeduri
futuri tas-sejħa għall-offerti. 3.9 Perjodu ta’ tranżizzjoni li
japplika għas-sejħiet tal-offerti kompetittivi (l-Artikolu 8(2)) Din id-dispożizzjoni tiċċara li
l-perjodu ta’ tranżizzjoni ta’ għaxar snin,
sat-2 ta’ Diċembru 2019, japplika biss
għall-Artikolu 5(3), fuq l-obbligu li l-awtoritajiet kompetenti
jorganizzaw proċedura ta’ sejħa għall-offerti kompetittiva.
Id-dispożizzjonijiet kollha l-oħra tal-Artikolu 5 (eż. dwar
l-għażla ta’ għoti dirett lill-operatur intern, għal
kuntratt ta’ volum żgħir jew bħala miżura ta’
emerġenza, u r-reviżjoni legali tad-deċiżjoni
tal-għoti) japplikaw minnufih. 3.10 Perjodu ta’ tranżizzjoni
għall-kuntratti ferrovjarji mogħtija direttament diġà
eżistenti (l-Artikolu 8(2a)) Din id-dispożizzjoni ddaħħal
perjodu ta’ tranżizzjoni addizzjonali għall-kuntratti ta’ servizz
ferrovjarju pubbliku li jingħataw b'mod dirett bejn
l-1 ta’ Jannar 2013 u t-2 ta’ Diċembru 2019.
Dawk il-kuntratti jistgħu jibqgħu implimentati sakemm jiskadu,
iżda sa mhux aktar tard mill-31 ta’ Diċembru 2022. Dan
jagħti lill-impriżi ferrovjarji li ngħataw direttament kuntratt
ta' servizz pubbliku, biżżejjed żmien biex jadattaw u
jħejju għall-proċeduri ta' sejħa għall-offerti kompetittivi. 3.11 Adattamenti ta’
dispożizzjonijiet tar-Regolament 1370/2007 marbutin
mal-eżenzjoni tan-notifika ta’ għajnuna mill-istat u
l-kundizzjonijiet ta' kompatibilità tal-għajnuna mill-istat minħabba
rekwiżiti tat-Trattat Fl-abbozz propost tagħha ta’ emendi
għar-Regolament (KE) Nru 994/98 (ir-Regolament ta’ Abbilitazjoni)[6], il-Kummissjoni pproponiet
ukoll emenda għar-Regolament (KE) Nru 1370/2007 li ġġib
skont il-proċeduri previsti fl-Artikoli 108(4) u 109 tat-Trattat
l-għajnuna għall-koordinazzjoni tat-trasport jew ir-rimborż għall-qadi
ta’ ċerti obbligi inerenti fil-kunċett ta’ servizz pubbliku, kif
imsemmi fl-Artikolu 93 tat-Trattat fil-kamp ta’ amplikazzjoni
tar-Regolament ta’ Abbilitazzjoni. Il-Kummissjoni bħalissa tistenna
li, b'konsegwenza ta’ dan, ikun hemm Regolament ta’ eżenzjoni ta’
kategorija fil-futur, li jieħu post is-sustanza tal-eżenzjoni
attwali, għajr safejn ir-Regolament 1370/2007 huwa emendat minn din
il-proposta leġiżlattiva fir-rigward tas-settur ferrovjarju. 2013/0028 (COD) Proposta għal REGOLAMENT TAL-PARLAMENT EWROPEW U
TAL-KUNSILL li jemenda r-Regolament (KE) Nru 1370/2007
fir-rigward tal-ftuħ tas-suq għas-servizzi tat-trasport ferrovjarju
domestiku tal-passiġġieri (Test b’rilevanza għaż-ŻEE) IL-PARLAMENT EWROPEW U L-KUNSILL
TAL-UNJONI EWROPEA, Wara li kkunsidraw it-Trattat dwar
il-Funzjonament tal-Unjoni Ewropea, u b'mod partikulari l-Artikolu 91
tiegħu, Wara li kkunsidraw il-proposta tal-Kummissjoni
Ewropea, Wara t-trażmissjoni tal-abbozz tal-att
leġiżlattiv lill-Parlamenti nazzjonali, Wara li kkunsidraw l-opinjoni tal-Kumitat
Ekonomiku u Soċjali Ewropew[7],
Wara li kkunsidraw l-Opinjoni tal-Kumitat
tar-Reġjuni[8],
Filwaqt li jaġixxu skont
il-proċedura leġiżlattiva ordinarja, Billi: (1) Tul l-aħħar
deċennju, iż-żieda fit-traffiku ferrovjarju
tal-passiġġieri ma kinitx biżżejjed biex jiżdied
is-sehem modali tiegħu meta mqabbel mal-karozzi u l-avjazzjoni. Is-sehem
modali ta' 6 % tat-trasport ferrovjarju tal-passiġġieri
fl-Unjoni Ewropea baqa' pjuttost stabbli. Is-servizzi ferrovjarji
tal-passiġġieri ma laħħqux mal-evoluzzjoni
tal-bżonnijiet f'termini ta’ disponibbiltà u kwalità. (2) Is-suq tal-Unjoni
għas-servizzi tat-trasport ferrovjarju internazzjonali
tal-passiġġieri ilu miftuħ għall-kompetizzjoni mill-2010.
Barra minn hekk, uħud mill-Istati Membri fetħu
għall-kompetizzjoni s-servizzi domestiċi tal-passiġġieri
tagħhom, jew billi introduċew drittijiet ta' aċċess
miftuħ, jew permezz ta' sejħiet għall-offerti ta' kuntratti ta’
servizzi pubbliku, jew it-tnejn f'daqqa. (3) Fil-White Paper
tagħha dwar il-politika tat-trasport tat-28 ta’ Marzu 2011[9], il-Kummissjoni ħabbret
il-ħsieb tagħha li tlesti s-suq intern tal-ferrovija, billi
tippermetti lill-impriżi ferrovjarji tal-Unjoni jipprovdu kull tip ta’
servizz tat-trasport ferrovjarju mingħajr xkiel tekniku u amministrattiv
żejjed. (4) Meta l-awtoritajiet kompetenti
jiġu biex jorganizzaw is-servizzi tat-trasport pubbliku
tal-passiġġieri tagħhom, iridu jiżguraw li l-obbligi
tas-servizz pubbliku, u l-firxa ġeografika tal-kuntratti ta’ servizz
pubbliku, ikunu xierqa, meħtieġa, u proporzjonati għall-ksib
tal-għanijiet tal-politika tat-trasport pubbliku tal-passiġġieri
fit-territorju tagħhom. Din il-politika għandha tiġi spjegata
fil-pjanijiet ta’ trasport pubbliku, filwaqt li jitħalla lok għal
soluzzjonijiet tat-trasport imsejsa fuq is-suq. Il-proċess ta’ definizzjoni
tal-pjanijiet ta’ trasport pubbliku u tal-obbligi ta’ servizz pubbliku
għandu jkun trasparenti għall-partijiet interessati rilevanti,
inklużi parteċipanti li potenzjalment jidħlu fis-suq. (5) Sabiex jiġi żgurat
iffinanzjar sod għall-ilħiq tal-għanijiet tal-pjanijiet ta’
trasport pubbliku, l-awtoritajiet kompetenti jridu jfasslu obbligi ta' servizz
pubbliku sabiex jilħqu l-għanijiet ta' trasport pubbliku b'mod
kosteffettiv, li jqis il-kumpens għall-impatt finanzjarju nett ta’ dawk
l-obbligi, u jridu jiżguraw ukoll is-sostenibbiltà finanzjarja fit-tul
tat-trasport pubbliku pprovdut fil-qafas ta' kuntratti ta' servizz pubbliku. (6) Biex is-suq tat-trasport
ferrovjarju pubbliku tal-passiġġieri jimxi ħarir, huwa ta’
importanza partikulari li l-awtoritajiet kompetenti jikkonformaw ma' dawn
il-kriterji għall-obbligi ta’ servizz pubbliku, kif ukoll mal-firxa
tal-kuntratti ta’ servizz pubbliku, għax l-operazzjonijiet ta’ trasport
b'aċċess miftuħ jeħtieġu jkunu kkoordinati sew ma'
dawk li jsiru fil-qafas ta' kuntratt tas-servizz pubbliku. Għal din
ir-raġuni, il-korp regolatorju ferrovjarju indipendenti għandu
jiżgura li dan il-proċess jiġi applikat b'mod korrett u
trasparenti. (7) Jeħtieġ li
jiġi stabbilit volum annwali massimu ta’ kuntratt ta’ servizz pubbliku
għat-trasport ferrovjarju tal-passiġġieri, sabiex tiġi
ffaċilitata l-kompetizzjoni għal tali kuntratti, filwaqt li
tingħata aktar flessibilità lill-awtoritajiet kompetenti biex jottimizzaw
il-volum skont kunsiderazzjonijiet ekonomiċi u operattivi. (8) Biex jiġi
ffaċilitat it-tfassil ta’ sejħiet għall-offerti u b'hekk
tittejjeb il-kompetizzjoni, l-awtoritajiet kompetenti jridu jiżguraw li
l-operaturi kollha ta' servizz pubbliku interessati li jressqu applikazzjoni
jirċievu ċertu tagħrif dwar is-servizzi ta' trasport u
l-infrastruttura koperti mill-kuntratt ta' servizz pubbliku. (9) Jeħtieġ li
ċerti limiti massimi għall-għoti dirett ta’ kuntratti ta’
servizz pubbliku jiġu adattati għat-trasport ferrovjarju, skont
il-kundizzjonijiet ekonomiċi speċifiċi li fihom isiru
s-sejħiet għall-offerti f'dan is-settur. (10) Il-ħolqien ta’ Suq Intern
għas-servizzi ta’ trasport ferrovjarju tal-passiġġieri
jeħtieġ regoli komuni għas-sejħiet għall-offerti
kompetittivi għal kuntratti ta’ servizz pubbliku f'dan is-settur, regoli
li għandhom jiġu applikati b'mod armonizzat fl-Istati Membri kollha. (11) Bil-għan li jinħolqu
kundizzjonijiet ta’ qafas li jippermettu lis-soċjetà tgawdi
bis-sħiħ il-benefiċċju tal-ftuħ effettiv tas-suq
għas-servizzi tat-trasport ferrovjarju domestiku
tal-passiġġieri, huwa importanti li l-Istati Membri jiżguraw
livell xieraq ta’ protezzjoni soċjali għall-persunal tal-operaturi
tas-servizz pubbliku. (12) Fejn is-suq ma jiżgurax
l-aċċess tal-operaturi tas-servizz pubbliku għall-vetturi
ferrovjarji b’kundizzjonijiet xierqa ekonomiċi u mingħajr
diskriminazzjoni, tali aċċess għandu jiġi ffaċilitat
mill-awtoritajiet kompetenti permezz ta’ miżuri xierqa u effettivi. (13) Ċerti fatturi ewlenin
tal-proċeduri li ġejjin ta’ sejħiet għall-offerti għal
kuntratti ta’ servizz pubbliku jeħtieġ li jsiru għalkollox
trasparenti, biex ikun possibbli rispons aktar organizzat għas-suq. (14) B'mod konsistenti
mal-loġika interna tar-Regolament (KE) Nru 1370/2007, għandu
jiġi ċċarat li l-perjodu ta’ tranżizzjoni
sat-2 ta’ Diċembru 2019 jirreferi biss għall-obbligu
li jiġu organizzati proċeduri ta’ sejħiet għall-offerti
kompetittivi għall-kuntratti ta’ servizz pubbliku. (15) It-tħejjija
tal-impriżi ferrovjarji għas-sejħiet tal-offerti kompetittivi
obbligatorji għall-kuntratti ta’ servizz pubbliku teħtieġ aktar
żmien biex tippermetti r-ristrutturar intern effettiv u sostenibbli
tal-impriżi li ngħatawlhom direttament tali kuntratti fil-passat.
Għaldaqstant, jeħtieġu miżuri ta’ tranżizzjoni
għall-kuntratti mogħtija direttament, bejn id-data tad-dħul
fis-seħħ ta’ dan ir-Regolament u
t-3 ta’ Diċembru 2019. (16) Ladarba jinkiseb il-ftuħ
tas-suq tas-servizzi tat-trasport ferrovjarju domestiku
tal-passiġġeri, billi l-awtoritajiet kompetenti aktarx ikunu jridu
jieħdu miżuri biex jiżguraw livell għoli ta' kompetizzjoni
billi jillimitaw l-għadd ta' kuntratti li jagħtu lil impriża
ferrovjarja individwali, għandhom jiġu pprovduti dispożizzjonijiet
xierqa għal dan il-għan. (17) Sabiex jiġu żgurati
kundizzjonijiet uniformi għall-implimentazzjoni tal-Artikolu 5a ta’
dan ir-Regolament, il-Kummissjoni għandha tingħata setgħat ta’
implimentazzjoni. Dawn is-setgħat għandhom jiġu
eżerċitati skont ir-Regolament (UE) Nru 182/2011 tal-Parlament
Ewropew u tal-Kunsill tas-16 ta' Frar 2011 li jistabbilixxi
r-regoli u l-prinċipji ġenerali dwar il-modalitajiet ta' kontroll
mill-Istati Membri tal-eżerċizzju mill-Kummissjoni tas-setgħat
ta' implimentazzjoni[10]. (18) Fil-kuntest tal-emendi
għar-Regolament (KE) Nru 994/98 (ir-Regolament ta’ Abbilitazzjoni[11]), il-Kummissjoni pproponiet
ukoll emenda għar-Regolament (KE) Nru 1370/2007
(COM(2012) 730/3). Sabiex jiġi armonizzat l-approċċ
għar-regolamenti ta’ eżenzjoni ta’ kategorija fil-qasam
tal-għajnuna mill-Istat, u skont il-proċeduri previsti
fl-Artikoli 108(4) u 109 tat-Trattat, l-għajnuna
għall-koordinazzjoni tat-trasport jew ir-rimborż għall-qadi ta’
ċerti obbligi inerenti fil-kunċett ta’ servizz pubbliku, kif imsemmi
fl-Artikolu 93 tat-Trattat, għandhom jinġiebu fil-kamp ta’
amplikazzjoni tar-Regolament ta’ Abbilitazzjoni. (19) B'hekk,
ir-Regolament (KE) Nru 1370/2007 għandu jiġi emendat skont dan, ADOTTAW DAN IR-REGOLAMENT: Artikolu 1 Ir-Regolament (KE) Nru 1370/2007
għandu jiġi emendat kif ġej: 1. a) Il-punt (c) tal-Artikolu 2
għandu jinbidel b'li ġej: "(c) "awtorità kompetenti lokali"
tfisser kwalunkwe awtorità kompetenti li l-ambitu ġeografiku
tal-kompetenza tagħha mhijiex nazzjonali, u li tkopri l-bżonnijiet
ta’ trasport ta’ agglomerazzjoni urbana jew ta’ distrett rurali;" b) Il-punt (e) tal-Artikolu 2
għandu jiżdiedlu li ġej: "L-ambitu tal-obbligi tas-servizz pubbliku
għandu jeskludi kull servizz tat-trasport pubbliku li jmur lil hinn minn
dak li hu meħtieġ biex ikollu impatt ta’ netwerk lokali,
reġjunali jew subnazzjonali." 2. Jiddaħħal
l-Artikolu 2a li ġej: "Artikolu 2a Pjanijiet ta’ trasport pubbliku u obbligi ta’
servizz pubbliku 1. L-awtoritajiet kompetenti għandhom
jistabbilixxu u jaġġornaw b'mod regolari l-pjanijiet ta’ trasport
pubbliku tal-passiġġieri, b'mod li jkopru l-modi kollha rilevanti ta’
trasport għat-territorju li għalih huma responsabbli. Dawn
il-pjanijiet ta’ trasport pubbliku għandhom jiddefinixxu l-għanijiet
ta' politika tat-trasport pubbliku, kif ukoll il-mezzi għall-ilħiq
tagħhom, b'mod li jkopru l-modi kollha rilevanti ta’ trasport
għat-territorju li għalih huma responsabbli. Dawn il-pjanijiet ta'
trasport pubbliku għandhom jinkludu mill-inqas: (a)
l-istruttura tan-netwerk jew tar-rotot; (b)
ir-rekwiżiti bażiċi li għandhom
jiġu sodisfatti mill-offerta ta’ trasport pubbliku,
bħall-aċċessibbiltà, il-konnettività territorjali, is-sigurtà,
l-interkonnessjonijiet modali u intermodali fiċ-ċentri ewlenin ta'
konnessjoni, u karatteristiċi tal-offerti, bħall-ħinijiet tal-operazzjoni,
il-frekwenza tas-servizzi, u l-livell minimu ta' użu tal-kapaċità; (c)
standards ta’ kwalità marbutin ma' elementi
bħall-karatteristiċi tat-tagħmir tal-waqfiet jew stazzjonijiet
kif ukoll tal-vetturi ferrovjarji, il-puntwalità u l-affidabbiltà, l-indafa,
is-servizz u t-tagħrif għall-konsumaturi, il-ġestjoni
tal-ilmenti u s-soluzzjoni tagħhom, u l-monitoraġġ tal-kwalità
tas-servizz; (d)
il-prinċipji tal-politika tariffarja; (e)
rekwiżiti operattivi, bħat-trasport
tar-roti, il-ġestjoni tat-traffiku, u pjan ta’ kontinġenza
fil-każ ta’ disturbi. Fit-tfassil tal-pjanijiet ta' trasport pubbliku,
l-awtoritajiet kompetenti għandhom iqisu partikularment ir-regoli
applikabbli fir-rigward tad-drittijiet tal-passiġġieri, u
l-ħarsien soċjali, tal-impjiegi, u tal-ambjent. L-awtoritajiet kompetenti għandhom jadottaw
il-pjanijiet ta’ trasport pubbliku wara konsultazzjoni mal-partijiet
interessati rilevanti, u mbagħad għandhom jippubblikawhom.
Għall-finijiet ta’ dan ir-Regolament, il-partijiet interessati rilevanti
li għandhom jitqiesu, iridu jkunu, tal-anqas, operaturi tat-trasport,
amministratturi tal-infrastruttura fejn xieraq, u organizzazzjonijiet li
jirrappreżentaw il-passiġġieri u l-impjegati. 2. L-istabbiliment ta’ obbligi ta’ servizz
pubbliku, u l-għoti ta’ kuntratti ta’ servizz pubbliku, għandhom
ikunu konsistenti mal-pjanijiet ta’ trasport pubbliku applikabbli. 3. L-ispeċifikazzjonijiet tal-obbligi
ta’ servizz pubbliku għat-trasport pubbliku tal-passiġġieri, u
l-ambitu tal-applikazzjoni tagħhom, għandhom jiġu stabbiliti kif
ġej: (a)
għandhom jiġu ddefiniti skont
l-Artikolu 2(e); (b)
għandhom ikunu xierqa biex jiksbu
l-għanijiet tal-pjan ta’ trasport pubbliku; (c)
ma għandhomx imorru lil hinn minn dak li hu
neċessarju u proporzjonat biex jinkisbu l-għanijiet tal-pjan ta’
trasport pubbliku. Il-verifika tal-kwalità xierqa msemmija
fil-punt (b) għandha tqis jekk intervent pubbliku fil-forniment ta’
trasport tal-passiġġieri huwiex mezz xieraq biex jinkisbu
l-għanijiet tal-pjanijiet ta’ trasport pubbliku. Għat-trasport ferrovjarju pubbliku
tal-passiġġieri, il-verifika tan-neċessità u tal-proporzjonalità
msemmijin fil-punt (c) għandha tqis is-servizzi ta' trasport
ipprovduti skont l-Artikolu 10(2) tad-Direttiva 2012/34/UE
tal-Parlament Ewropew u tal-Kunsill tal-21 ta' Novembru 2012 li
tistabbilixxi żona ferrovjarja unika Ewropea (riformulazzjoni)[12], u għandha tqis
it-tagħrif kollu mgħoddi lill-amministratturi tal-infrastruttura u
lill-korpi regolatorji skont l-ewwel sentenza tal-Artikolu 38(4) ta' dik
id-Direttiva. 4. L-ispeċifikazzjonijiet tal-obbligi
ta’ servizz pubbliku, u l-kumpens relatat tal-impatt finanzjarju nett
tal-obbligi ta’ servizz pubbliku, għandhom: (a)
jiksbu l-għanijiet tal-pjan ta’ trasport
pubbliku fl-iktar mod kosteffettiv possibbli; (b)
isostnu finanzjarjament, u fit-tul, il-forniment
tat-trasport pubbliku tal-passiġġieri skont ir-rekwiżiti
stipulati fil-pjan ta’ trasport pubbliku. 5. Meta tiġi biex tħejji
l-ispeċifikazzjonijiet, l-awtorità kompetenti għandha tfassal
l-abbozz tal-ispeċifikazzjonijiet tal-obbligi ta’ servizz pubbliku u
l-ambitu tagħhom, il-passi bażiċi għall-verifika
tal-konformità tagħhom mar-rekwiżiti stipulati fil-paragrafi 2,
3 u 4, u r-riżultati tal-verifika. L-awtorità kompetenti għandha tikkonsulta,
b'mod xieraq, mal-partijiet interessati rilevanti –fosthom, bħala minimu,
l-operaturi tat-trasport, l-amministratturi tal-infrastruttura fejn xieraq, u
l-organizzazzjonijiet li jirrappreżentaw lill-passiġġieri u
lill-impjegati–, rigward dawn l-ispeċifikazzjonijiet, u għandha tqis
il-pożizzjonijiet tagħhom. 6. Għat-trasport ferrovjarju pubbliku
tal-passiġġieri: (a)
il-konformità tal-verifika u tal-proċedura
stipulati f'dan l-Artikolu għandha tiġi żgurata mill-korp
regolatorju msemmi fl-Artikolu 55 tad-Direttiva 2012/34/UE,
inkluż fuq inizjattiva tiegħu stess; (b)
il-volum annwali massimu ta' kuntratt ta' servizz
pubbliku f'termini ta' kilometri ta' ferrovija għandu jkun l-ogħla
valur minn 10 miljun kilometru ta' ferrovija jew terz tal-volum totali
tat-trasport ferrovjarju pubbliku nazzjonali tal-passiġġieri
fil-qafas ta' kuntratt ta' servizz pubbliku." 3. L-Artikolu 4 huwa
emendat kif ġej: (a)
Fl-Artikolu 1, il-punt (a) għandu
jinbidel b'li ġej: "(a) jiddefinixxu biċ-ċar l-obbligi
ta’ servizz pubbliku, stipulati fl-Artikolu 2(e) u fl-Artikolu 2a, li
l-operatur ta’ servizz pubbliku jkun se jikkonforma magħhom, u
ż-żoni ġeografiċi kkonċernati;" (b)
L-aħħar sentenza tal-paragrafu 1(b)
tinbidel b'li ġej: "Fil-każ ta’ kuntratti ta’ servizz
pubbliku li ma jingħatawx skont l-Artikolu 5(3), dawn il-parametri
għandhom jiġu ddeterminati b'mod li l-ebda ħlas ta’ kumpens ma
jista' jaqbeż l-ammont meħtieġ biex ikopri l-impatt finanzjarju
nett fuq il-kostijiet imġarrba u d-dħul iġġenerat fil-qadi
tal-obbligi ta’ servizz pubbliku, b'kunsiderazzjoni għad-dħul marbut
miegħu miżmum mill-operatur tas-servizz pubbliku, u qligħ
raġonevoli;" (c)
Il-paragrafu 6 jinbidel b'li ġej: "Fejn l-awtoritajiet kompetenti, skont
il-liġi nazzjonali, jirrikjedu li l-operaturi ta’ servizz pubbliku
jikkonformaw ma' ċerti standards ta’ kwalità jew soċjali, jew fejn
jistabbilixxu kriterji soċjali u kwalitattivi, dawn l-istandards u
kriterji għandhom jiġu inklużi fid-dokumenti tas-sejħiet
għall-offerti, kif ukoll fil-kuntratti ta’ servizz pubbliku." (d)
Jiżdied il-paragrafu 8 li ġej: "8. L-awtoritajiet kompetenti għandhom
iqiegħdu għad-dispożizzjoni tal-partijiet kollha interessati
tagħrif għat-tħejjija ta' offerta fil-qafas ta' proċedura
ta' sejħa kompetittiva għall-offerti. Dan it-tagħrif għandu
jinkludi informazzjoni dwar id-domanda ta’ passiġġieri, it-tariffi,
il-kostijiet u d-dħul marbutin mat-trasport pubbliku tal-passiġġieri
kopert mill-offerta, u dettalji dwar l-ispeċifikazzjonijiet
tal-infrastruttura rilevanti għall-operazzjoni tal-vetturi
meħtieġa jew tal-vetturi ferrovjarji, sabiex il-partijiet interessati
jkunu jistgħu jfasslu pjanijiet ta’ negozju infurmati sew.
L-amministratturi tal-infrastruttura ferrovjarja għandhom
jappoġġjaw lill-awtoritajiet kompetenti billi jipprovdu
l-ispeċifikazzjonijiet infrastrutturali kollha rilevanti. In-nuqqas ta’
konformità mad-dispożizzjonijiet stipulati hawn fuq ikun suġġett
għar-reviżjoni legali pprovduta fl-Artikolu 5(7)." 4. L-Artikolu 5 huwa
emendat kif ġej: (a)
Il-paragrafu 4 jinbidel b'li ġej: "4. Għajr fejn hu pprojbit bil-liġi
nazzjonali, l-awtoritajiet kompetenti jistgħu jiddeċiedu li
jagħtu kuntratti ta’ servizz pubbliku b'mod dirett: (a)
fejn il-valur annwali medju tagħhom huwa stmat
għal inqas minn EUR 1 000 000, jew inqas minn
EUR 5 000 000 fil-każ ta’ kuntratt ta’ servizz pubbliku li
jinkludi t-trasport pubbliku bil-ferrovija, jew (b)
fejn jikkonċernaw il-forniment annwali ta’
inqas minn 300 000 kilometru ta’ servizzi ta’ trasport ferrovjarju
pubbliku tal-passiġġieri, jew inqas minn 150 000 kilometru
fil-każ ta’ kuntratt ta’ servizz pubbliku li jinkludi t-trasport
ferrovjarju pubbliku. Fil-każ ta’ kuntratt ta’ servizz pubbliku li
jingħata direttament lil impriża żgħira jew ta’ daqs medju
li ma toperax iktar minn 23 vettura bit-triq, dawn il-limiti jistgħu
jiżdiedu, jew għal valur annwali medju stmat għal inqas minn
EUR 2 000 000, jew għal forniment annwali ta’ inqas minn
600 000 kilometru ta’ servizzi ta’ trasport pubbliku
tal-passiġġieri." (b)
Il-paragrafu 6 jinbidel b'li ġej: "L-awtoritajiet kompetenti jistgħu
jiddeċiedu li, sabiex iżidu l-kompetizzjoni bejn l-impriżi
ferrovjarji, il-kuntratti għat-trasport ferrovjarju pubbliku
tal-passiġġieri li jkopru partijiet mill-istess netwerk jew pakkett
ta’ rotot għandhom jingħataw lil impriżi ferrovjarji differenti.
Għal dan il-għan, l-awtoritajiet kompetenti jistgħu
jiddeċiedu, qabel ma jvaraw il-proċedura tas-sejħa
għall-offerti, li jillimitaw l-għadd ta' kuntratti li għandhom
jingħataw lill-istess impriża ferrovjarja." 5. Jiddaħħal
l-Artikolu 5a li ġej: "Artikolu 5a Il-vetturi ferrovjarji 1. F'konformità mar-regoli dwar
l-għajnuna mill-istat, l-Istati Membri għandhom jieħdu
l-miżuri meħtieġa biex jiżguraw l-aċċess effettiv
u mingħajr diskriminazzjoni għal vetturi ferrovjarji xierqa
għat-trasport ferrovjarju pubbliku tal-passiġġieri, f'isem
l-operaturi li jixtiequ jipprovdu servizzi ta’ trasport ferrovjarju pubbliku
tal-passiġġieri fil-qafas ta’ kuntratt ta’ servizz pubbliku. 2. Fejn ma jeżistux, f'suq tat-trasport
rilevanti, kumpaniji ta’ kiri tal-vetturi ferrovjarji għall-kiri
tal-vetturi ferrovjarji msemmija fil-paragrafu 1 b'kundizzjonijiet
kummerċjalment vijabbli u mhux diskriminatorji lill-operaturi kollha
kkonċernati tat-trasport ferrovjarju pubbliku tal-passiġġieri,
l-Istati Membri għandhom jiżguraw li r-riskju ta’ valur residwali
tal-vetturi ferrovjarji jiġġarrab mill-awtorità kompetenti skont
ir-regoli dwar l-għajnuna mill-istat, fejn l-operaturi li jixtiequ u huma
kapaċi jipparteċipaw fi proċeduri ta’ sejħiet
għall-offerti għal kuntratti ta’ servizz pubbliku jitolbu dan sabiex
ikunu jistgħu jipparteċipaw fl-istess sejħiet għall-offerti.
L-awtorità kompetenti tista' tikkonforma
mar-rekwiżit stipulat fl-ewwel subparagrafu f'wieħed mill-modi li
ġejjin: (a)
billi tikseb hi stess il-vetturi ferrovjarji
użati għall-implimentazzjoni tal-kuntratt ta’ servizz pubbliku,
bil-għan li tagħmlu disponibbli għall-operatur magħżul
tas-servizz pubbliku bi prezz tas-suq, jew bħala parti mill-kuntratt ta'
servizz pubbliku skont l-Artikolu 4(1)(b), l-Artikolu 6, u fejn
applikabbli, skont l-Anness, (b)
billi tipprovdi garanzija għall-iffinanzjar
tal-vetturi ferrovjarji użati għall-implimentazzjoni tal-kuntratt ta'
servizz pubbliku bi prezz tas-suq, jew bħala parti minn kuntratt ta'
servizz pubbliku skont l-Artikolu 4(1)(b), l-Artikolu 6, u fejn
applikabbli, skont l-Anness. Tali garanzija tista' tkopri r-riskju ta’ valur
residwali filwaqt li tirrispetta r-regoli rilevanti dwar l-għajnuna
mill-istat fejn applikabbli, (c)
billi tintrabat, fil-kuntratt ta’ servizz pubbliku,
li tieħu lura l-vetturi ferrovjarji fi tmiem il-kuntratt bi prezz tas-suq. Fil-każijiet imsemmija fil-punti (b) u
(c), l-awtorità kompetenti għandu jkollha d-dritt li tirrikjedu li
l-operatur tas-servizz pubbliku jittrasferixxi l-vetturi ferrovjarji, wara
l-iskadenza tal-kuntratt ta’ servizz pubbliku, lill-operatur ġdid li jkun
ingħata kuntratt. L-awtorità kompetenti tista' tobbliga lill-operatur ġdid
tat-trasport pubbliku jieħu l-vetturi ferrovjarji f'idejh. Dan
it-trasferiment għandu jsir b'rati tas-suq. 3. Jekk il-vetturi ferrovjarji jiġu
trasferiti lil operatur ġdid tat-trasport pubbliku, l-awtorità kompetenti
għandha tqiegħed għad-dispożizzjoni, fid-dokumenti
tas-sejħa għall-offerti, tagħrif iddettaljat dwar il-kost
tal-manutenzjoni tal-vetturi ferrovjarji, kif ukoll dwar il-kundizzjoni
fiżika tagħhom. 4. Sa [18-il xahar mid-data tad-dħul
fis-seħħ ta' dan ir-Regolament], il-Kummissjoni għandha tadotta
miżuri li jistipulaw id-dettalji tal-proċedura li għandha
tiġi segwita għall-applikazzjoni tal-paragrafi 2 u 3 ta’ dan
l-Artikolu. Dawk l-atti ta’ implimentazzjoni għandhom jiġu adottati
skont il-proċedura ta’ eżami msemmija fl-Artikolu 9a(2)." 6. Fl-Artikolu 6,
il-paragrafu 1 jinbidel b'li ġej: "1. Il-kumpens kollu marbut ma' regoli
ġenerali jew ma' kuntratt ta’ servizz pubbliku għandu jikkonforma
mal-Artikolu 4, irrispettivament minn kif il-kuntratt ikun ingħata.
Kull kumpens, tan-natura li jkun, marbut ma' kuntratt ta’ servizz pubbliku li
ma jingħatax skont l-Artikolu 5(3), jew marbut ma' regola
ġenerali, għandu jikkonforma wkoll mad-dispożizzjonijiet
stipulati fl-Anness. " 7. L-Artikolu 7 huwa
emendat kif ġej: (a)
Il-paragrafu 1 jinbidel b'li ġej: "1. Kull awtorità kompetenti għandha
tqiegħed għad-dispożizzjoni, darba fis-sena, rapport aggregat
dwar l-obbligi ta' servizz pubbliku li għalihom hija responsabbli, id-data
tal-bidu u t-tul ta' żmien tal-kuntratti ta' servizz pubbliku, l-operaturi
magħżula ta' servizz pubbliku, u l-ħlasijiet ta' kumpens u
d-drittijiet esklussivi mogħtija lill-istess operaturi ta’ servizz
pubbliku permezz ta’ rimborż. Ir-rapport għandu jiddistingwi bejn
it-trasport bix-xarabank u t-trasport ferrovjarju, għandu jippermetti l-monitoraġġ
u l-valutazzjoni tal-prestazzjoni, il-kwalità u l-iffinanzjar tan-netwerk
tat-trasport pubbliku, u fejn xieraq, għandu jipprovdi tagħrif dwar
in-natura tad-drittijiet esklussivi mogħtija u safejn jaslu. L-Istati
Membri għandhom jiffaċilitaw l-aċċess ċentrali
għal dawn ir-rapporti, ngħidu aħna permezz ta’ portal
tal-internet komuni." (b)
Fil-paragrafu 2, jiżdied il-punt li
ġej: "(d) id-data tal-bidu u t-tul ta’ żmien
previsti tal-kuntratt ta’ servizz pubbliku." 8. L-Artikolu 8 jinbidel
kif ġej: (a)
L-ewwel subparagrafu tal-paragrafu 2 jinbidel
b'li ġej: "2. Mingħajr ħsara
għall-paragrafu 3, l-għoti ta’ kuntratti ta’ servizz pubbliku
bil-ferrovija, bl-eċċezzjoni ta’ modi oħra bbażati fuq
il-binarji bħall-metro u t-tramm, għandu jikkonforma mal-Artikolu 5(3)
sa mit-3 ta’ Diċembru 2019. Kull kuntratt ta’ servizz
pubbliku b'modi oħra bbażati fuq il-binarji u bit-triq irid ikun
ingħata skont l-Artikolu 5(3) sa mhux aktar tard mit-3 ta’
Diċembru 2019. Matul il-perjodu ta’ tranżizzjoni li jibqa'
sejjer sat-3 ta’ Diċembru 2019, l-Istati Membri
għandhom jieħdu miżuri biex jikkonformaw progressivament
mal-Artikolu 5(3), sabiex jevitaw problemi strutturali serji,
partikularment b'rabta mal-kapaċità tat-trasport." (b)
Jiddaħħal il-paragrafu 2a li
ġej: "2a. Il-kuntratti ta’ servizz pubbliku
għat-trasport ferrovjarju pubbliku tal-passiġġieri li
jingħataw bejn l-1 ta’ Jannar 2013 u t-2 ta’
Diċembru 2019 jistgħu jkomplu sad-data tal-iskadenza
tagħhom. Madankollu, jiġri x'jigri, ma għandhomx ikomplu lil
hinn mill-31 ta’ Diċembru 2022." (c)
Fil-paragrafu 3, l-aħħar sentenza
tat-tieni subparagrafu tinbidel b'li ġej: "Il-kuntratti msemmija fil-punt (d)
jistgħu jkomplu sakemm jiskadu, dejjem jekk ikunu ta’ tul ta’ żmien
limitat simili għall-perjodi speċifikati fl-Artikolu 4." 9. Jiddaħħal
l-Artikolu 9a li ġej: "Artikolu 9a Komitoloġija 1. Il-Kummissjoni għandha tkun
megħjuna mill-Kumitat taż-Żona Ferrovjarja Unika Ewropea,
stabbilit bl-Artikolu 62 tad-Direttiva 2012/34/UE tal-Parlament
Ewropew u tal-Kunsill tal-21 ta' Novembru 2012 li tistabbilxxi
żona ferrovjarja unika Ewropea (riformulazzjoni)[13]. Dak il-kumitat għandu
jkun kumitat fit-tifsira tar-Regolament (UE) Nru 182/2011. 2. Fejn issir referenza għal dan
il-paragrafu, għandu japplika l-Artikolu 5 tar-Regolament (UE)
Nru 182/2011." Artikolu 2 Dan ir-Regolament għandu jidħol
fis-seħħ l-għada tal-jum tal-pubblikazzjoni tiegħu f'Il-Ġurnal
Uffiċjali tal-Unjoni Ewropea. Dan ir-Regolament għandu jorbot
fl-intier tiegħu u japplika direttament fl-Istati Membri kollha. Magħmul fi Brussell, Għall-Parlament Ewropew Għall-Kunsill Il-President Il-President [1] White paper: Pjan direzzjonali għal Żona Unika
Ewropea tat-Trasport – Lejn sistema tat-trasport kompetittiva u li tuża
r-riżorsi b’mod effiċjenti; COM(2011) 144. [2] Governanza aqwa tas-suq uniku; COM(2012) 259. [3] http://ec.europa.eu/consumers/consumer_research/cms_en.htm. [4] Komunikazzjoni tal-Kummissjoni "Ewropa 2020: Strateġija
għal tkabbir intelliġenti, sostenibbli u inklussiv'", COM(2010)
2020. [5] ĠU L 343, 14.12.2012, p. 32. [6] Proposta għal Regolament tal-Kunsill li jemenda
r-Regolament tal-Kunsill (KE)
Nru 994/98 tas-7 ta’ Mejju 1998 dwar l-applikazzjoni
tal-Artikoli 92 u 93 tat-Trattat li jistabbilixxi l-Komunità Ewropea għal
ċerti kategoriji ta' għajnuna Statali orizzontali, u r-Regolament
(KE) Nru 1370/2007 tal-Parlament Ewropew u tal-Kunsill
tat-23 ta’ Ottubru 2007 dwar servizzi pubbliċi tat-trasport
tal-passiġġieri bil-ferrovija u bit-triq, COM(2012) 730 finali,
5.12.2012. [7] ĠU C , , p. . [8] ĠU C , , p. . [9] White Paper: Pjan direzzjonali għal Żona Unika
Ewropea tat-Trasport – Lejn sistema tat-trasport kompetittiva u li tuża
r-riżorsi b’mod effiċjenti, COM(2011) 144. [10] ĠU L 55, 28.2.2011, p. 13. [11] Proposta għal Regolament tal-Kunsill li jemenda
r-Regolament tal-Kunsill (KE)
Nru 994/98 tas-7 ta’ Mejju 1998 dwar l-applikazzjoni
tal-Artikoli 92 u 93 tat-Trattat li jistabbilixxi l-Komunità Ewropea għal
ċerti kategoriji ta' għajnuna Statali orizzontali, u r-Regolament
(KE) Nru 1370/2007 tal-Parlament Ewropew u tal-Kunsill
tat-23 ta’ Ottubru 2007 dwar servizzi pubbliċi tat-trasport
tal-passiġġieri bil-ferrovija u bit-triq, COM(2012) 730 finali,
5.12.2012. [12] ĠU L 343, 14.12.2012,
p. 32. [13] ĠU L 343/32,
14.12.2012.