5.12.2013   

MT

Il-Ġurnal Uffiċjali tal-Unjoni Ewropea

C 356/15

—

jenfasizza li l-proċess tat-tfassil tal-baġit annwali tal-UE huwa ta’ natura politika u strateġika għall-awtoritajiet reġjonali u lokali u jipproponi li jkun hemm konsultazzjoni formali dwar il-baġits tas-snin li ġejjin;

—

jilqa’ l-isforzi li saru mill-Kummissjoni Ewropea sabiex tipprovdi tagħrif dwar min jirċievi l-fondi tal-UE, iżda jidhirlu li l-informazzjoni disponibbli għall-pubbliku mhix adegwata u frammentata wisq biex wieħed ikollu stampa globali preciża tal-fondi Ewropej li ntefqu u kienu ġestiti mill-awtoritajiet lokali u reġjonali;

—

jenfasizza li se jissorvelja bir-reqqa jekk programmazzjoni li tibda bil-mod u assorbiment bil-mod hux se jkollhom impatt negattiv fuq ir-reviżjoni ta’ nofs it-terminu tal-QFP ippjanat għall-2016;

—

jinnota li madwar terz tar-RAL totali (EUR 70,7 biljun) se jitħallas fl-2014, iżda jaqbel mat-tħassib li ntwera mill-Kummissjoni Ewropea fir-rigward tas-snin finanzjarji 2015 u 2016;

—

iqis li huwa inaċċettabli li l-pagamenti huma ttardjati u jħeġġeġ li l-iskadenza tal-pagamenti fi żmien 60 jum għall-programmi b'ġestjoni kondiviża għandha tkun vinkolanti u li għandu jkun hemm penali legali jew finanzjarja jekk dan ma jsirx fi żmien l-iskadenza;

—

jinnota b'dispjaċir in-nuqqas ta’ referenzi għas-Semestru Ewropew fil-preżentazzjoni politika tal-prijoritajiet tal-baġit tal-UE għall-2014;

—

jissuġġerixxi li l-antiċipazzjoni sħiħa għall-YEI għall-2014-2015 għandha tkun akkumpanjata minn miżuri adatti (eż. il-bini tal-kapaċitajiet) għall-implimentazzjoni rapida;

—

jitlob antiċipazzjoni akbar tal-approprjazzjonijiet ta' impenn sa EUR 200 miljun għall-programm Orizzont 2020, EUR 150 miljun għall-Erasmus u EUR 50 miljun għall-COSME għas-snin 2014-2015;

—

jilqa’ l-fatt li t-trasferiment ta’ EUR 351,9 miljun huwa previst mill-ewwel għat-tieni pilastru tal-politika agrikola komuni (PAK) u jtenni l-oppożizzjoni qawwija tiegħu għal trasferimenti fid-direzzjoni opposta;

—

jissuġġerixxi li l-flessibbiltà żejda għall-“marġini globali għat-tkabbir u l-impjiegi” tintuża għall-intestatura 1b.

Relatur

Luc VAN DEN BRANDE (BE/PPE), President tal-Aġenzija Fjamminga-Ewropea ta’ Kollegament

Dokumenti ta' referenza

European Commission, Statement of estimates of the European Commission for the financial year 2014 (Preparation of the 2014 Draft Budget),

SEC(2013)370, Ġunju 2013 (mhux disponibbli bil-Malti)

Kunsill tal-Unjoni Ewropea, Abbozz ta' Regolament tal-Kunsill li jistabbilixxi l-qafas finanzjarju pluriennali għas-snin 2014-2020,

11655/13, 27 ta' Ġunju 2013

1.

jirrimarka li din hija l-ewwel darba li qed ifassal Opinjoni dwar il-proċedura tal-baġit annwali tal-UE sabiex jirrappreżenta l-fehmiet tal-awtoritajiet reġjonali u lokali fuq l-intestaturi baġitarji li tagħhom huma l-benefiċjarji ewlenin u fejn huma involuti direttament;

2.

jenfasizza li l-proċess tat-tfassil tal-baġit annwali tal-UE huwa ta’ natura politika u strateġika għall-awtoritajiet reġjonali u lokali u jipproponi li jkun hemm konsultazzjoni formali dwar il-baġits tas-snin li ġejjin mill-Kummissjoni, il-Kunsill jew il-Parlament, li tippermetti li l-KtR jieħu pożizzjoni wara li l-Kummissjoni Ewropea tkun ħarġet l-abbozz ta' baġit u l-aħjar qabel ma l-Kunsill jgħaddi l-abbozz ta' baġit lill-Parlament;

3.

jenfasizza li din l-Opinjoni ma tindirizzax in-nefqa amministrattiva relatata mal-intestatura V;

4.

f’din l-Opinjoni jiffoka fuq l-intestaturi tal-baġit ta’ interess ewlieni għall-Kumitat tar-Reġjuni u għall-awtoritajiet lokali u reġjonali, inklużi l-fondi strutturali, il-programmi Orizzont 2020 u COSME, il-Fond ta’ Koeżjoni u programmi oħrajn ta’ ġestjoni konġunta bħall-FEMS u l-FAEŻR, u LIFE +;

5.

jinnota li l-baġit Ewropew huwa ta’ importanza partikolari għall-awtoritajiet reġjonali u lokali peress li dawn jiġġestixxu direttament xi programmi tal-UE taħt ġestjoni konġunta u għalhekk huma affettwati b’mod dirett kemm mil-livell tal-approprjazzjonijiet ta' impenn kif ukoll ta' pagament f’dawn l-oqsma, speċjalment fid-dawl tad-dewmien fil-pagamenti li jirriżulta minn akkumulazzjoni ta’ impenji pendenti fis-snin li għaddew, u li jaffettwaw b'mod dirett il-finanzi pubbliċi ta’ bosta awtoritajiet lokali u reġjonali madwar l-UE;

6.

jinnota wkoll li ħafna awtoritajiet reġjonali u lokali li jibbenefikaw minn fondi Ewropej bħall-Fond Ewropew għall-Iżvilupp Reġjonali (FEŻR), il-Fond ta’ Koeżjoni, il-Fond Soċjali Ewropew (FSE), il-Fond Agrikolu Ewropew għall-Iżvilupp Rurali (FAEŻR) iu l-Fond Ewropew Marittimu u tas-Sajd (FEMS) huma dipendenti ħafna minn dawn il-fondi biex jiksbu l-għanijiet ta' politika tagħhom;

7.

jixtieq ukoll ifakkar li l-baġit tal-UE jirrappreżenta biss sehem żgħir (madwar 2 %) tan-nefqa pubblika ġenerali fi ħdan l-Unjoni Ewropea u waħdu mhux biżżejjed biex iwassal it-EUR 1,8 triljun f’investimenti diretti orjentati lejn il-futur mitluba mill-Istrateġija Ewropa 2020. Il-Kumitat tar-Reġjuni jqis għalhekk li involviment ikbar tal-awtoritajiet lokali u reġjonali fil-qafas ta’ governanza ekonomika Ewropea ġdid huwa kruċjali u jenfasizza l-importanza tal-parteċipazzjoni tal-awtoritajiet reġjonali u lokali fil-kuntest tal-ftehimiet ta’ sħubija;

8.

jenfasizza li l-investiment mill-baġit Ewropew għandu effetti multiplikaturi u ta’ lieva permezz tal-kofinanzjament pubbliku u privat fil-livell reġjonali, lokali u nazzjonali. L-investiment pubbliku f’ħafna Stati Membri jiddependi ħafna mill-Fondi Strutturali, li jirrappreżentaw aktar minn 30 % tal-investiment pubbliku fi 13-il pajjiż u, f’sitt Stati Membri, aktar minn 60 %;

9.

jinnota li m’hemm l-ebda stampa ċara f’dak li għandu x’jaqsam mas-sehem tar-reġjuni u l-gvernijiet lokali, għalkemm huwa preżunt li parti kbira tal-baġit tal-UE jintefaq mill-awtoritajiet nazzjonali, reġjonali u lokali; minn awtoritajiet pubbliċi; organizzazzjonijiet mhux governattivi; organizzazzjonijiet mingħajr skop ta’ qligħ; organizzazzjonijiet privati; negozji; universitajiet u istituzzjonijiet edukattivi; individwi, eċċ., u li, b’mod ġenerali, terz tal-ispiża pubblika u żewġ terzi tal-investiment pubbliku huma fil-livell reġjonali u lokali;

10.

huwa konvint li l-awtoritajiet reġjonali u lokali jaqdu rwol vitali u insostitwibbli fl-implimentazzjoni tal-għanijiet ta' politika Ewropea. L-awtoritajiet lokali u reġjonali jipparteċipaw direttament jew indirettament, pereżempju fi:

11.

jikkonkludi li r-reġjuni u l-awtoritajiet lokali huma involuti, direttament u/jew indirettament, fil-ġestjoni jew l-infiq ta' iktar minn 75 % tal-baġit tal-UE (1);

12.

jilqa’ l-isforzi li saru mill-Kummissjoni Ewropea sabiex tipprovdi tagħrif dwar min jirċievi l-fondi tal-UE, kemm direttament mill-Kummissjoni Ewropea jew permezz tal-awtoritajiet nazzjonali u reġjonali bil-għan li tiżdied ir-responsabilità billi jkun hemm aktar trasparenza, iżda jidhirlu li l-informazzjoni disponibbli għall-pubbliku mhix adegwata u frammentata wisq biex wieħed ikollu stampa globali preciża tal-fondi Ewropej li ntefqu u kienu ġestiti mill-awtoritajiet lokali u reġjonali;

13.

jinnota b'dispjaċir li hemm nuqqas ta’ statistika li tippermetti lill-Kumitat tar-Reġjuni jaqdi r-rwol konsultattiv tiegħu u jitlob lill-Kummissjoni Ewropea biex mill-2014 'l quddiem tibda tipprovdi:

14.

jitlob lill-Kummissjoni Ewropea, il-Parlament Ewropew u l-Kunsill Ewropew biex jistandardizzaw u jarmonizzaw il-mod kif ikun ippreżentat it-tibdil fl-abbozz ta' baġits sabiex jiġi ffaċilitat il-proċess demokratiku ta’ skrutinju;

15.

jenfasizza f’dan ir-rigward li l-effettività tal-politika Ewropea tiddependi mill-applikazzjoni adatta tal-prinċipju ta’ governanza f’diversi livelli, li huwa kkunsidrat bħala prinċipju ġenerali li jirregola l-fondi strutturali (3), li jfisser li l-livelli kollha ta’ gvern, ilkoll skont il-kompetenzi tagħhom, jaħdmu flimkien b’mod effiċjenti biex jintlaħqu l-għanijiet ta' politika. L-awtoritajiet lokali u reġjonali ma jistgħux jitqiesu bħala benefiċjarji bl-istess mod bħall-organizzazzjonijiet mhux governattivi, l-organizzazzjonijiet privati, in-negozji, l-istituzzjonijiet edukattivi, eċċ.;

16.

jappoġġja l-inizjattiva tal-Kummissjoni Ewropea dwar il-Kodiċi ta’ Kondotta Ewropea dwar is-Sħubija (ECCP – European Code of Conduct on Partnersip) bħala suppliment għar-Regolament dwar id-Dispożizzjonijiet Komuni; l-ECCP jiżviluppa u jespandi s-sħubija fil-preparazzjoni, l-implimentazzjoni u l-evalwazzjoni tal-programmi u l-fondi tal-Qafas Strateġiku Komuni (QSK); huwa tal-fehma li tali sħubija hija l-aħjar garanzija għall-użu effettiv tar-riżorsi u għall-allinjament mal-ħtiġijiet tar-reġjun jew il-komunità lokali u b'dispjaċir jinnota li l-Kunsill ma jinkludiex l-ECCP fil-qafas ta' negozjar, għalkemm din il-kodiċi hija għodda importanti ta' ġestjoni għall-perjodu ta’ programmar 2014-2020;

17.

jistieden lill-Kummissjoni biex tirrapporta b’mod ċar fuq il-mod kif l-awtoritajiet reġjonali u lokali kienu involuti b’mod strutturat u f'waqtu fit-tfassil tal-Ftehimiet ta’ Sħubija u l-Programmi Operazzjonali għall-2014-2020;

18.

itenni l-ħtieġa li jitnaqqas il-piż amministrattiv għall-awtoritajiet reġjonali u lokali u jħeġġeġ lill-Kummissjoni, il-Kunsill u l-Parlament biex dan jittieħed f’konsiderazzjoni, billi jiġu żviluppati regoli ġodda li jaffettwaw l-awtoritajiet lokali u reġjonali;

19.

ifakkar fit-talba tiegħu biex il-proposti mill-Kummissjoni Ewropea jikkunsidraw il-kwalità tan-nefqa pubblika fil-kontabbiltà makroekonomika tal-Unjoni Ewropea u l-Istati Membri. Dawn il-proposti għandhom jindirizzaw b'mod partikolari l-kwistjoni tas-separazzjoni tan-nefqa attwali u l-investiment fil-kalkoli tal-iżbilanċ baġitarju sabiex jiġi evitat li l-investimenti b'benefiċċji netti fit-tul jiġu kalkolati bħala negattivi;

20.

jilqa' l-isforzi li għamlet il-Kummissjoni Ewropea biex iżżomm kont tan-nefqa pubblika relatata mal-azzjoni fir-rigward tal-klima;

21.

jilqa’ l-fatt li ntlaħaq ftehim politiku fis-27 ta’ Ġunju 2013 bejn il-Parlament, il-Presidenza tal-Kunsill u l-Kummissjoni dwar il-qafas finanzjarju pluriennali għall-2014 sal-2020;

22.

jinsab imħasseb li l-Kummissjoni ma għandix strateġija ta' ġestjoni tar-riskju adatta dwar sa fejn il-politika ta’ koeżjoni tista’ taħdem fuq il-bażi tal-baġits annwali fin-nuqqas ta’ qafas finanzjarju pluriennali;

23.

huwa partikolarment imħasseb li l-livell globali tal-QFP li jmiss, kif deċiż mill-Kunsill Ewropew, jista’ ma jkunx biżżejjed biex jssodisfa l-ambizzjonijiet tal-UE espressi fl-Istrateġija Ewropa 2020 u fil-Patt għat-Tkabbir u l-Impjiegi;

24.

jinnota b'dispjaċir li l-limitu massimu tal-QFP għall-approprjazzjonijiet ta' impenn (EUR 960 biljun) huwa ta’ EUR 34 biljun inqas minn dak għall-perjodu 2007-2013, u dan fi żmien meta l-Ewropa għandha bżonn il-mezzi meħtieġa biex tirkupra mill-kriżi attwali b’mod koordinat, u li dan il-massimu tal-QFP (EUR 960 biljun) huwa iżjed minn EUR 80 biljun inqas milli oriġinarjament propost mill-Kummissjoni;

25.

jappoġġja l-pożizzjoni tal-PE li r-Regolament tal-QFP ma jistax ikun legalment adottat sakemm ma jkunx hemm ftehim politiku fuq il-bażijiet legali rilevanti;

26.

jinnota b'dispjaċir li ma sar l-ebda progress sostanzjali dwar ir-riforma tas-sistema tar-riżorsi proprji bħala mezz biex jitnaqqsu l-kontribuzzjonijiet diretti tal-Istati Membri għall-baġit tal-UE; għaldaqstant iħeġġeġ lill-Kunsill, lill-Kummissjoni u lill-Parlament Ewropew biex mingħajr dewmien jieħdu deċiżjoni dwar il-mandat u l-kompożizzjoni tal-grupp ta' ħidma dwar ir-riżorsi proprji kif previst fil-ftehim tas-27 ta' Ġunju bil-ħsieb li tintlaħaq l-iskadenza tal-ewwel valutazzjoni fl-2014. Il-grupp ta' ħidma għandu jiltaqa' fiż-żmien tal-adozzjoni formali tar-Regolament dwar il-QFP;

27.

jilqa’ l-ftehim li ntlaħaq dwar il-flessibilità msaħħa bil-ħsieb li jsir użu sħiħ mil-limiti rispettivi tal-QFP, li jippermetti li jsir trasferiment awtomatiku ta’ approprjazzjonijiet mhux użati minn sena finanzjarja għal oħra, u dwar ir-reviżjoni obbligatorja u, b’konsegwenza, ir-reviżjoni tal-QFP sal-aħħar tal-2016;

28.

itenni l-oppożizzjoni qawwija u ċara tiegħu għal kwalunkwe forma ta’ kundizzjonalità makroekonomika, u jqis li l-għażla li tkun estiża għall-intestaturi baġitarji kollha kif kien mitlub minn xi Stati Membri hija kontroproduttiva, peress li hemm ir-riskju li jiġu ppenalizzati sew l-awtoritajiet reġjonali u lokali li mhumiex responsabbli għan-nuqqas ta’ konformità ma’ dawn ir-rekwiżiti min-naħa tal-Istati Membri tagħhom. Jinnota b'dispjaċir li l-kundizzjonalità makroekonomika għadha msemmija fl-Artikolu 6 tal-Abbozz ta’ Regolament tal-Kunsill li jistabbilixxi l-qafas finanzjarju pluriennali għas-snin 2014-2020;

29.

itenni r-rifjut tiegħu tar-riżerva għall-prestazzjoni peress li tista’ tinkoraġġixxi l-iżvilupp ta’ roġetti mhux ambizzjużi u tiskoraġġixxi l-innovazzjoni. Jinnota b'dispjaċir ir-referenzi għaliha fil-preżentazzjoni politika tal-abbozz ta' baġit tal-2014;

30.

jappoġġja l-pożizzjoni tal-PE li l-approvazzjoni tar-Regolament dwar il-QFP ma tistax tingħata sakemm ma jkunx hemm “garanzija assoluta” li l-impenji pendenti għall-2013 ikunu koperti bis-sħiħ u li għalhekk il-Kunsill għandu jieħu mhux biss deċiżjoni formali dwar l-abbozz ta’ baġit emendatorju (DAB) 2/2013 (EUR 7,3 biljun) iżda wkoll jirrispetta l-impenn politiku tiegħu biex jadotta mingħajr dewmien baġit emendatorju ieħor (EUR 3,9 biljun, li jilħqu l-EUR 11,2-il biljun (4) meħtieġa) u f’dan il-kuntest jilqa’ l-fatt li l-Kummissjoni għażlet li tibbaża l-abbozz ta' baġit għall-2014 fuq is-suppożizzjoni li dawn iż-żewġ abbozzi ta' baġit emendatorju għall-2013 se jiġu adottati;

31.

jenfasizza li se jissorvelja bir-reqqa jekk programmazzjoni li tibda bil-mod u assorbiment bil-mod hux se jkollhom impatt negattiv fuq ir-reviżjoni ta’ nofs it-terminu tal-QFP ippjanat għall-2016;

32.

huwa mħasseb dwar il-fatt li l-QFP għall-2014-2020 jintroduċi element ta' defiċit strutturali addizzjonali fil-baġit Ewropew ta’ EUR 52 biljun. L-awtoritajiet lokali u reġjonali, li huma dipendenti ħafna mill-fondi Ewropej għall-investimenti tagħhom, jarawha bħala tendenza perikoluża ħafna, billi l-Kummissjoni mhix se tkun kapaċi tonora fil-ħin l-impenji magħmula minħabba nuqqas ta’ approprjazzjonijiet ta' pagament u jinnota li l-ħolqien ta’ tali defiċit strutturali fil-baġit Ewropew imur kontra d-dispożizzjonijiet tat-Trattat (l-Artikoli 310 u 323 tat-TFUE);

33.

huwa sorpriż ħafna li, anke bis-suppożizzjoni li ż-żewġ abbozzi ta' baġit emendatorju għall-2013, li jżidu total ta’ EUR 11,2-il biljun ta’ pagamenti żejda għall-2013, jiġu adotatti, xorta huwa mistenni li fi tmiem l-2013 ikun hemm RAL ta’ madwar EUR 225 biljun (5) mill-programmi tal-perjodu 2007-2013 fil-perjodu finanzjarju l-ġdid, li jirrappreżenta madwar 25 % tat-total tal-limiti għall-pagamenti tal-QFP għas-snin 2014-2020 (EUR 908,4 biljun) u l-baġit annwali tal-UE mmultiplikat b'1,6;

34.

jinnota li dan l-ammont ta’ RAL jikkuntrasta mal-għan politiku espress mill-PE fin-negozjati biex il-perjodu l-ġdid ta’ programmar jibda b'rekord nadif u jwissi li fi tmiem l-2020 se jkun hemm RAL ta’ madwar EUR 277 biljun (6) u li din id-differenza, jiġifieri d-defiċit strutturali, se tiżdied għal kull QFP;

35.

jirrimarka li ż-żewġ oqsma li l-aktar jikkontribwixxu lejn il-livell ġenerali ta’ RAL huma l-politika ta’ koeżjoni (żewġ terzi tat-total) u l-iżvilupp rurali, u jirrakkomanda li għandhom jinstabu soluzzjonijiet biex tiġi evitata akkumulazzjoni ta’ RAL matul is-snin;

36.

jappoġġja l-appell tal-Parlament Ewropew lill-Kummissjoni Ewropea biex “tipprovdi rapporti ta' kull xahar (...) dwar l-evoluzzjoni tat-talbiet ta' pagament mill-Istati Membri mill-fondi strutturali, mill-fond ta' koeżjoni u mill-fondi għall-iżvilupp rurali u għas-sajd (analiżi skont l-Istat Membru u skont il-fond)”;

37.

jinnota li madwar terz tar-RAL totali (EUR 70,7 biljun) se jitħallas fl-2014, iżda jaqbel mat-tħassib li ntwera mill-Kummissjoni Ewropea fir-rigward tas-snin finanzjarji 2015 u 2016 u li, filwaqt li fl-2014, billi hija l-ewwel sena tal-QFP il-ġdid, hemm spazju għall-immanuvrar ta’ approprjazzjonijiet ta' pagament billi l-programmi l-ġodda se jieħdu ż-żmien biex jibdew (speċjalment dawk taħt ġestjoni konġunta), din il-flessibbiltà se tiċkien minn sena għal oħra;

38.

f’dan ir-rigward, jenfasizza l-aspett pożittiv tal-ftehim tal-QFP (7) dwar il-possibilitajiet ta' flessibbiltà fi ħdan il-QFP u l-hekk imsejjaħ “il-marġini globali għall-pagamenti” (8);

39.

jesprimi t-tħassib tiegħu li l-Kummissjoni mhiqed tipprevedi l-ebda marġini għas-sena 2014, peress li l-livell ta’ pagamenti huwa stabbilit għal EUR 136,1 biljun li jfisser li l-Kummissjoni mhu se jkollha l-ebda marġini addizzjonali għall-2015 u li hemm il-periklu li d-defiċit strutturali jakkumula għal darb’oħra bit-tħejjija tal-programmi l-ġodda għall-perjodu 2014-2020 u b'dak li baqa' mill-perjodu 2007-2013 (+/– EUR 155 biljun);

40.

jiġbed l-attenzjoni għall-konsegwenzi tar-regola l-ġdida “n+3” għad-diżimpenji fil-qasam tal-politika ta’ koeżjoni f’termini ta’ akkumulazzjoni tar-RAL fis-snin li ġejjin. F’dan ir-rigward, il-Kumitat tar-Reġjuni jirrakkomanda li l-pagament tal-impenji pendenti għall-perjodu 2007-2013 jingħataw prijorità matul il-perjodu 2014-2016 (EUR 70 biljun kull sena fuq tliet snin), minħabba li t-talbiet għall-pagamenti għall-perjodu ta’ programmazzjoni l-ġdid x’aktarx jibdew jakkumulaw fil-perjodu 2017-2018 (2014 + 3 snin, jekk nikkunsdraw id-dewmien biex jibdew il-programmi fl-2014 minħabba d-dewmien relatat mal-ftehim dwar il-QFP);

41.

iqis li huwa inaċċettabli li l-pagamenti huma ttardjati u jħeġġeġ li l-iskadenza tal-pagamenti fi żmien 60 jum għall-programmi b'ġestjoni kondiviża għandha tkun vinkolanti u li għandu jkun hemm penali legali jew finanzjarja jekk dan ma jsirx fi żmien l-iskadenza u li l-penali finanzjarja li diġà teżisti (imgħax) għall-programmi ġestiti b’mod ċentrali (eż. is-Seba' Programm Kwadru/ proġetti marbuta mal-programm “Orizzont 2020” futur) jiġu kkunsidrati għal fondi oħra meta l-pagamenti ma jaslux sad-data ta’ skadenza. Din hija kwistjoni partikolarment importanti għall-awtoritajiet lokali u reġjonali li qed jistennew rimborżi. Il-Kumitat tar-Reġjuni għalhekk jistenna li tinstab soluzzjoni għal dan fir-reviżjoni li jmiss tar-Regolament Finanzjarju tal-UE;

42.

jinnota b'dispjaċir il-proliferazzjoni ta’ baġits emendatorji matul is-sena ta’ implimentazzjoni li jirriżultaw mill-istimi baxxi, li ma jirriflettux ir-realtà, fir-rigward tal-ħtiġijiet ta’ pagamenti imposti mill-Kunsill, mill-Kummissjoni u mill-Parlament. Għall-2013 diġà kien hemm 5 abbozzi ta’ baġits emendatorji, filwaqt li fl-2010 kien hemm 10;

43.

iħeġġeġ lill-Kummissjoni, il-Parlament u l-Kunsill biex iressqu soluzzjonijiet strutturali li jsolvu d-defiċit strutturali tal-baġit tal-UE sabiex id-dħul imwiegħed tal-awtoritajiet lokali u reġjonali ma jibqax mhedded minn nuqqas fl-approprjazzjonijiet ta’ pagament Ewropej;

44.

jafferma mill-ġdid li l-investiment pubbliku sottonazzjonali għandu t-tendenza li jkun ikkonċentrat f’għadd ta’ setturi ta' prijorità ewlenija li huma kritiċi għas-suċċess tal-Istrateġija Ewropa 2020; itenni t-talba tiegħu biex tingħata prijorità politika ikbar biex jinħolqu sinerġiji bejn il-baġits tal-UE, l-Istati Membri, ir-reġjuni u l-awtoritajiet lokali, bil-għan li jiġu implimentati l-prijoritajiet tal-UE li dwarhom intlaħaq ftehim;

45.

jilqa’ l-inizjattiva tal-Kummissjoni biex issegwi kull nefqa pubblika ddedikata għall-finanzjament tal-Istrateġija Ewropa 2020, iżda huwa sorpriż li s-seba’ inizjattivi ewlenin huma meħuda bħala bażi, pjuttost milli l-ħames miri ewlenin (dwar l-impjieg, l-innovazzjoni, l-edukazzjoni, l-inklużjoni soċjali u l-klima/l-enerġija);

46.

jinnota b'dispjaċir in-nuqqas ta’ kwalunkwe referenza għall-11-il għan tematiku tar-Regolament dwar id-Dispożizzjonijiet Komuni li fuqhom jeħtieġ li jkunu kkonċentrati l-Fondi ta’ Investiment u Strutturali Ewropej (9), li għandhom ikunu konformi mal-Qafas Strateġiku Komuni (QSK) propost mill-Kummissjoni Ewropea nhar l-14 ta’ Marzu 2012;

47.

itenni t-talba tiegħu għall-flessibbiltà sabiex ikunu rispettati l-ispeċifiċitajiet territorjali tar-reġjuni u l-bliet;

48.

jinnota b'dispjaċir in-nuqqas ta’ referenzi għas-Semestru Ewropew fil-preżentazzjoni politika tal-prijoritajiet tal-baġit tal-UE għall-2014. Jinnota b'dispjaċir ukoll li l-Kummissjoni injorat l-istedina tal-PE biex tipprovdi data fattwali u konkreta dwar kif l-abbozz tal-baġit tal-UE li qed tipproponi jista’ effettivament jiżvolġi rwol stimolanti, katalitiku, sinerġetiku u komplementari għall-investimenti fil-livelli lokali, reġjonali u nazzjonali biex jiġu implimentati l-prijoritajiet maqbula fil-qafas tas-Semestru Ewropew  (10); u għalhekk iħeġġeġ, fuq il-bażi tal-prinċipju tal-governanza f'diversi livelli, l-involviment tar-reġjuni, u b’mod partikolari r-reġjuni li għandhom setgħat leġislattivi, fis-Semestru Ewropew;

49.

jappoġġja l-Inizjattiva favur l-Impjieg taż-Żgħażagħ u jitlob li l-YEI tkun parti minn ftehimiet ta’ sħubija futuri, filwaqt li jenfasizza li r-reġjuni u l-awtoritajiet lokali għandhom ikunu involuti b’mod sħiħ fl-implimentazzjoni ta' kwalunkwe inizjattiva dwar l-impjieg minħabba li dawn jinsabu fl-aħjar pożizzjoni biex jivvalutaw is-swieq lokali tal-impjieg u l-programmi mfassla apposta għaż-żgħażagħ u wkoll minħabba li bosta reġjuni għandhom kompetenza sħiħa f’dan il-qasam ta’ politika;

50.

jinnota b'dispjaċir li l-YEI qed tinħoloq flimkien ma' fondi oħra minflok ma jintuża l-qafas tal-FSE biex tiġi indirizzata l-kwistjoni, u b’hekk jiżdied il-piż amministrattiv għall-benefiċjarji;

51.

jinnota li l-Kummissjoni pproponiet l-antiċipazzjoni sħiħa (EUR 6 biljun) (11) għall-YEI għall-2014-2015 u jissuġġerixxi li l-antiċipazzjoni sħiħa għandha tkun akkumpanjata minn miżuri adatti (eż. il-bini tal-kapaċitajiet) għall-implimentazzjoni rapida minħabba l-impossibilità li l-Kummissjoni tadotta l-abbozz ta’ Regolament dwar id-Dispożizzjonijiet Komuni u r-Regolament dwar l-FSE qabel ir-Regolament dwar il-QFP, jiġifieri lejn tmiem l-2013, li jwassal għal dewmien fl-implimentazzjoni, u minħabba l-inċertezzi usa’ fir-rigward ta’ kif din il-YEI se tiġi implimentata mill-Istati Membri/reġjuni fil-prattika u l-veloċità ta’ assorbiment tagħha; barra minn hekk jappella biex l-Artikolu 9(f) tar-Regolament dwar il-QFP jiġi emendat sabiex titneħħa l-limitazzjoni espliċita tal-linja baġitarja l-ġdida tal-YEI għal EUR 3 biljun. Dan il-pass ser ikun iktar u iktar meħtieġ biex jiġi evitat kwalunkwe finanzjament retroattiv (backloading) wara l-2016 għall-programmi li huma kruċjali għall-koeżjoni bħall-programmi ta' kooperazzjoni transkonfinali jew partijiet mill-Faċilità Nikkollegaw l-Ewropa;

52.

jinsab partikolarment imħasseb dwar it-tnaqqis li qed isir f’diversi intestaturi baġitarji li huma essenzjali biex jinkiseb l-investiment fit-tul meħtieġ għal irkupru ekonomiku mgħaġġel, partikolarment fil-politika ta’ koeżjoni, l-iżvilupp rurali u l-programmi COSME u Orizzont 2020;

53.

jitlob, f’konformità mal-Artikolu 9f tal-abbozz ta' Regolament tal-Kunsill dwar il-QFP tas-27 ta’ Ġunju 2013, antiċipazzjoni akbar tal-approprjazzjonijiet ta' impenn sa EUR 200 miljun għall-programm Orizzont 2020, EUR 150 miljun għall-Erasmus u EUR 50 miljun għall-COSME għas-snin 2014-2015;

54.

mhux sorpriż li l-approprjazzjonijiet ta’ impenn għall-2014 fil-qasam tal-koeżjoni huma minimi fid-dawl tad-dewmien (12) mistenni fl-implimentazzjoni ta’ ftehimiet ta’ sħubija u programmi operazzjonali, iżda jistieden lill-Istati Membri biex jiffukaw fuq il-programmi operazzjonali sabiex il-fondi jiġu attivati diġà fl-2014;

55.

jinnota b'dispjaċir it-tħassir tal-partita baġitarja relatata mal-programm Erasmus għar-rappreżentanti lokali u reġjonali eletti taħt l-intestatura 1b (partita baġitarja 13 03 77 11) u jitlob il-kontinwazzjoni tagħha fuq il-bażi tal-esperjenza tal-KtR dwar din l-inizjattiva;

56.

jilqa’ b’sodisfazzjon iż-żieda ta’ 10,3 % f’approprjazzjonijiet ta' impenn għall-Programm LIFE + mqabbla mal-2013 iżda ma jifhimx it-tnaqqis fl-approprjazzjonijiet ta' pagament (– 1,1 %);

57.

jilqa’ l-bidla ewlenija mill-ġestjoni diretta għall-ġestjoni kondiviża għall-FEMS, għalkemm dan ifisser pagamenti aktar baxxi fil-bidu tal-perjodu ta’ finanzjament;

58.

jilqa’ b’sodisfazzjon id-dispożizzjoni mdaħħla fl-Artikolu 8 tal-abbozz ta’ Regolament tal-Kunsill dwar il-QFP, li tippermetti r-reviżjoni tal-QFP sabiex jiġu trasferiti għas-snin sussegwenti, li jaqbżu l-limiti tal-infiq korrispondenti, l-allokazzjonijiet mhux użati fl-2014 fil-każ tal-adozzjoni tar-regoli l-ġodda u ta' programmi taħt ġestjoni kondiviża wara l-1 ta’ Jannar 2014;

59.

jilqa’ l-fatt li t-trasferiment ta’ EUR 351,9 miljun huwa previst mill-ewwel għat-tieni pilastru tal-politika agrikola komuni (PAK) u jtenni l-oppożizzjoni qawwija tiegħu għal trasferimenti fid-direzzjoni opposta;

60.

jenfasizza li la l-konklużjonijiet tal-Kunsill Ewropew tas-7 u t-8 ta’ Frar 2013 u lanqas l-abbozz ta' Regolament tal-Kunsill dwar il-QFP tas-27 ta’ Ġunju 2013 ma jipprevedu sottolimitu għall-politika ta’ koeżjoni, li ġie ttrasformat minflok f'sottointestatura. Fuq din il-bażi, il-Kumitat jikkontesta l-bosta referenzi għal dan is-sottolimitu fil-preżentazzjoni tal-Abbozz ta' Baġit għall-2014 (13) u b’hekk jargumenta favur trasferimenti ta' approprjazzjonijiet ta’ impenn/pagament fi ħdan l-intestatura 1, fejn rilevanti;

61.

jilqa’ l-“marġini globali għat-tkabbir u l-impjiegi”, li se jkun kostitwit minn marġini li jibqgħu disponibbli taħt il-limiti tal-QFP għall-approprjazzjonijiet ta' impenn bejn l-2014 u l-2017, japprezza li l-appropjazzjonijiet ta' impenn relatati jistgħu jintużaw “lil hinn” mil-limiti għas-snin 2016 sa 2020 (14), u jissuġġerixxi li din il-flessibbiltà ikbar tintuża għall-intestatura 1b.