EUR-Lex Access to European Union law
This document is an excerpt from the EUR-Lex website
Document 52012PC0616
Proposal for a DECISION OF THE EUROPEAN PARLIAMENT AND OF THE COUNCIL on mobilisation of the European Globalisation Adjustment Fund, in accordance with point 28 of the Interinstitutional Agreement of 17 May 2006 between the European Parliament, the Council and the Commission on budgetary discipline and sound financial management (application EGF/2011/026 IT/Emilia-Romagna Motorcycles from Italy)
Proposta għal DEĊIŻJONI TAL-PARLAMENT EWROPEW U TAL-KUNSILL dwar il-mobilizzazzjoni tal-Fond Ewropew ta’ Aġġustament għall-Globalizzazzjoni, b’konformità mal-punt 28 tal-Ftehim Interistituzzjonali tas-17 ta’ Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja soda (l-applikazzjoni EGF/2011/026 IT/Emilia-Romagna Motorcycles mill-Italja)
Proposta għal DEĊIŻJONI TAL-PARLAMENT EWROPEW U TAL-KUNSILL dwar il-mobilizzazzjoni tal-Fond Ewropew ta’ Aġġustament għall-Globalizzazzjoni, b’konformità mal-punt 28 tal-Ftehim Interistituzzjonali tas-17 ta’ Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja soda (l-applikazzjoni EGF/2011/026 IT/Emilia-Romagna Motorcycles mill-Italja)
/* COM/2012/0616 final */
Proposta għal DEĊIŻJONI TAL-PARLAMENT EWROPEW U TAL-KUNSILL dwar il-mobilizzazzjoni tal-Fond Ewropew ta’ Aġġustament għall-Globalizzazzjoni, b’konformità mal-punt 28 tal-Ftehim Interistituzzjonali tas-17 ta’ Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja soda (l-applikazzjoni EGF/2011/026 IT/Emilia-Romagna Motorcycles mill-Italja) /* COM/2012/0616 final */
MEMORANDUM TA’ SPJEGAZZJONI Il-Punt 28 tal-Ftehim Interistituzzjonali
tas-17 ta' Mejju 2006 bejn il-Parlament Ewropew, il-Kunsill u
l-Kummissjoni dwar id-dixxiplina baġitarja u l-ġestjoni finanzjarja soda[1] jippermetti l-mobilizzazzjoni
tal-Fond Ewropew ta' Aġġustament għall-Globalizzazzjoni (FEG) permezz ta'
mekkaniżmu ta' flessibbiltà, bil-limitu massimu annwali ta' EUR 500 miljun
’il fuq mil-limiti tal-intestaturi rilevanti tal-qafas finanzjarju. Il-kundizzjonijiet applikabbli
għall-kontribuzzjonijiet minn dan il-Fond huma stipulati fir-Regolament (KE)
Nru 1927/2006 tal-Parlament Ewropew u tal-Kunsill tal-20 ta' Diċembru 2006
li jistabbilixxi l-Fond Ewropew ta' Aġġustament għall-Globalizzazzjoni[2]. Fit-30 ta’ Diċembru 2011,
l-Italja ressqet l-applikazzjoni EGF/2011/026 IT/Emilia-Romagna
Motorcycles sabiex tikseb kontribuzzjoni finanzjarja tal-FEĠ wara sensji li
saru fi ħdan għaxar impriżi li joperaw fid-Diviżjoni 30 tan-NACE
Reviżjoni 2 (Manifattura ta' tagħmir ieħor tat-trasport)[3] fir-reġjun NUTS II Emilia-Romagna
(ITH5) fl-Italja. Wara analiżi bir-reqqa ta' din
l-applikazzjoni, il-Kummissjoni kkonkludiet skont l-Artikolu 10
tar-Regolament (KE) Nru 1927/2006, li l-kundizzjonijiet għal
kontribuzzjoni finanzjarja previsti f’dan ir-Regolament ġew issodisfati. SOMMARJU U ANALIŻI TAL-APPLIKAZZJONI Dejta ewlenija: || Nru ta' Referenza tal-FEG || EGF/2011/026 Stat Membru || L-Italja Artikolu 2 || b) Impriżi kkonċernati || 10 Reġjun NUTS II || Emilia-Romagna (ITH5) Diviżjoni tan-NACE Reviżjoni 2 || 30 (Manifattura ta’ tagħmir ieħor tat-trasport) Perjodu ta’ referenza || 28.02.2011 – 28.11.2011 Data ta' bidu għas-servizzi personalizzati || 1.03.2012 Data tal-applikazzjoni || 30.12.2011 Sensji matul il-perjodu ta’ referenza || 512 Ħaddiema li ngħataw is-sensja li mistennija jipparteċipaw fil-miżuri || 502 Nefqa għas-servizzi personalizzati (EUR) || 3 932 992 Spejjeż għall-intervent tal-FEG[4] (EUR) || 157 000 Spejjeż għall-intervent tal-FEG (%) || 3,84 Baġit totali (EUR) || 4 089 992 Kontribuzzjoni tal-FEG (65 %) (EUR) || 2 658 495 1. L-applikazzjoni ġiet
ippreżentata lill-Kummissjoni fit-30 ta' Diċembru 2011 u
ssupplimentata b’informazzjoni addizzjonali sal-10 ta' Settembru 2012. 2. L-applikazzjoni tissodisfa
l-kriterji għall-intervent tal-EGF stabbiliti fl-Artikolu 2(b)
tar-Regolament (KE) Nru 1927/2006, u tressqet fil-limitu ta' żmien ta' 10
ġimgħat imsemmi fl-Artikolu 5 ta' dak ir-Regolament. Rabta bejn is-sensji u l-bidliet
strutturali ewlenin fil-kummerċ dinji minħabba l-globalizzazzjoni jew bejn
is-sensji u l-kriżi finanzjarja u ekonomika globali 3. Sabiex tintwera r-rabta bejn
is-sensji u l-kriżi finanzjarja u ekonomika globali, l-Italja indikat li
r-reġistrazzjonijiet tal-vetturi b’żewġ roti motorizzati fl-Ewropa (li
jirrappreżentaw id-domanda interna) naqsu ħafna (it-tnaqqis l-aktar sinifikanti
kien ta’ -42 % għall-motorini u ta' -31 % għall-muturi bejn l-2007 u
l-2010)[5].
Reġistrazzjoni
tal-vetturi b’żewġ roti motorizzati fl-UE || Motorini || Muturi || Reġistrazzjonijiet || Meta mqabbel mas-sena ta’ qabel || l-2010 imqabbel mal-2007 || Reġistrazzjonijiet || Meta mqabbel mas-sena ta’ qabel || l-2010 imqabbel mal-2007 2007 || 901 425 || || -42 % || 1 520 030 || || -31 % 2008 || 876 102 || -3 % || 1 410 020 || -7 % 2009 || 740 970 || -15 % || 1 230 .043 || -13 % 2010 || 523 397 || -29 % || 1 044 129 || -15 % 4. L-Italja enfasizzat li
l-produzzjoni ta’ vetturi b’żewġ roti motorizzati fl-Ewropa naqset ħafna
ukoll minħabba l-kriżi finanzjarja u ekonomika globali, b'mod partikolari bejn
l-2007 u l-2009. Fuq il-bażi tal-istatistika tal-ACEM[6], il-produzzjoni tal-produtturi
Ewropej ewlenin ta’ vetturi b’żewġ roti motorizzati[7] għalhekk naqset b’37 %
bejn l-2007 u l-2009 u b’25 % bejn l-2008 u l-2009. Produzzjoni
tal-vetturi b’żewġ roti motorizzati għal kull pajjiż6 5. L-awtoritajiet Taljani semmew
ukoll il-kuntest mhux favorevoli għall-industrija tal-vetturi b’żewġ roti
motorizzati fl-Ewropa minħabba l-impatt dejjem jiżdied tal-produtturi li
jinsabu fl-Asja fir-rigward tal-esportazzjoni tar-roti u tal-muturi. Iċ-Ċina
b’mod partikolari - bħala l-akbar esportatur dinji tar-roti u tal-muturi b’25 %
tal-ishma fis-suq - flimkien mal-Indja li gradwalment qed tilħaq magħha,
jirrappreżentaw bħalissa l-produtturi ewlenin fid-dinja (bejn l-2007 u l-2010,
is-sehem tal-Indja fis-suq dinji tal-esportazzjonijiet tela’ minn 1 % sa 2,70 %).
Is-sehem dejjem jiżdied ta’ dawn il-pajjiżi jispjega t-tnaqqis globali
tal-esportazzjonijiet tar-roti u tal-muturi tal-maġġoranza tal-produtturi
Ewropej (għajr il-Ġermanja u Spanja bejn l-2009 u l-2010) li affettwa b’mod
partikolari lil Franza u lill-Italja (is-sehem fl-esportazzjonijiet fuq livell
dinji ta’ din tal-aħħar naqas b’aktar minn 30 % f’10 snin). Sehem fis-suq tal-esportazzjonijiet (roti u muturi)[8] ¾ Iċ-Ċina (CN) ¾ L-Italja (IT) ¾ Il-Ġermanja (DE) ¾ Spanja (ES) ¾ L-Indja (IN) ¾ Franza (FR) ¾ Ir-Renju Unit (UK). 6. L-Italja
ddeskriviet li l-valur tal-esportazzjonijiet tar-roti u tal-muturi naqas b’rata
mgħaġġla bejn l-2008 u l-2009 (pereżempju -21,3 % bejn l-2008 u l-2009
għall-UE u -25,9 % għall-Italja)8.
L-irkupru żgħir tal-esportazzjonijiet fl-2010 naqqas id-differenza bejn
il-pajjiżi msejħa avvanzati u emerġenti: tal-ewwel għandhom tendenza li jerġgħu
lura b’mod globali lejn il-livell ta’ esportazzjoni tagħhom ta’ qabel l-2008
(anke jekk għadhom minn taħt b’medja ta’ 20 % meta mqabbla mal-2008), u
t-tieni qed jiksbu riżultati aħjar minn dawk tal-2008 (iċ-Ċina b’hekk żiedet
il-valur tal-esportazzjoni tagħha bejn l-2009 u l-2010 b’32,4 %, l-Indja
b’35,8 % filwaqt li, matul l-istess perjodu, l-UE għamlet progress ta’ 9,5 %
biss). 7. L-Italja (il-produttur
ewlieni fl-Ewropa ta’ vetturi b’żewġ roti motorizzati) uriet li fuq
livell nazzjonali, il-produzzjoni ta’ muturi u motorini, li għalihom ir-reġjun
tal-Emilia-Romagna huwa kontributur importanti (tliet impriżi ta’ din
l-applikazzjoni jipproduċu muturi bil-marka tagħhom stess: Morini, Malaguti u
Minarelli), naqset (minn 6 % bejn l-2009 u l-2010).
It-tnaqqis l-aktar notevoli jikkonċerna l-produzzjoni totali ta’ vetturi b’żewġ
roti motorizzati, li naqset fl-Italja minn 641 000 vetturi fl-2008 sa 448 100 fl-2010 (-30 %)[9]. 8. L-Italja tfakkar li mill-2006,
l-importazzjonijiet tagħha ta’ spare parts għall-muturi u l-motorini
(bl-għarfien li seba’ kumpaniji ta’ din l-applikazzjoni huma parti min-netwerk
lokali ta’ bosta kumpaniji speċjalizzati fil-produzzjoni ta’ spare parts jew
komponenti għall-industriji ta’ vetturi b’żewġ roti motorizzati) huma ogħla
mill-esportazzjonijiet tagħha (u dan qatt ma kien seħħ matul l-10 snin ta'
qabel)[10]. 9. L-awtoritajiet
Taljani fl-aħħar semmew li t-tnaqqis kbir ta’ reġistrazzjonijiet ta' muturi u
motorini fl-Ewropa nħass ukoll fl-Italja (kien hemm tnaqqis ta’ 27 %
tar-reġistrazzjonijiet ta’ muturi u motorini bejn l-2009 u l-2010)[11]. Indikazzjoni tal-għadd ta’ sensji u
konformità mal-kriterji tal-Artikolu 2(b) 10. L-Italja ressqet din
l-applikazzjoni taħt il-kriterji ta' intervent previsti fl-Artikolu 2(b)
tar-Regolament (KE) Nru 1927/2006, li jitlob li biex tiġi allokata
kontribuzzjoni tal-FEG irid ikun hemm mill-inqas 500 sensja fuq perjodu
ta' disa' xhur fl-istess Diviżjoni tan-NACE Reviżjoni 2 f'reġjun wieħed
jew żewġ reġjuni kontigwi fil-livell NUTS II. 11. L-applikazzjoni ssemmi 512-il sensja
f’10 impriżi tad-Diviżjoni 30 tan-NACE Reviżjoni 2 (Manifattura
ta’ tagħmir ieħor tat-trasport) matul il-perjodu ta’ referenza ta’ disa’ xhur
bejn it-28 ta’ Frar 2011 u t-28 ta’ Novembru 2011.
Minn dawn il-512-il sensja, 63 ġew ikkalkulati skont it-tieni inċiż
tat-tieni paragrafu tal-Artikolu 2 tar-Regolament (KE) Nru 1927/2006
u 449 sensja skont it-tielet inċiż tal-istess paragrafu. 12. Il-Kummissjoni rċeviet
il-konferma fid-19 ta’ Lulju 2012 li l-persuni magħduda
fil-qafas tat-tielet inċiż tat-tieni paragrafu tal-Artikolu 2 ingħataw
tassew is-sensja (esuberi). Spjegazzjoni tan-natura mhux prevista
ta’ dawn is-sensji 13. Il-kriżi finanzjarja laqtet
is-settur mill-2008 u iffavorixxiet prinċipalment l-akbar produtturi, li
minħabba d-daqs tagħhom setgħu jadattaw ruħhom (pereżempju l-kumpanija Ducati).
L-Italja ssemmi li s-sitwazzjoni kienet differenti ħafna għall-impriżi ta’ daqs
żgħir u medju li jipproduċu muturi jew tagħmir[12],
direttament affettwati mit-tnaqqis fid-domanda (reġistrazzjonijiet) ta’ muturi
mill-2008 u t-tnaqqis f’daqqa tal-produzzjoni mill-2008. Huma ppruvaw jadattaw
il-produzzjoni tagħhom biex iżommu is-sehem tagħhom fis-suq (billi pereżempju
jipproduċu magni b’erba ċilindri għal Motori Minarelli,
jew billi jikkollaboraw ma’ marki oħrajn għal Motori Malaguti).
Minkejja l-isforzi tagħhom, l-10 kumpaniji kkonċernati fl-applikazzjoni
Taljana kellhom jagħtu s-sensja lil uħud mill-impjegati tagħhom, jew inkella
jagħlqu b’mod definittiv fl-2011. Identifikazzjoni tal-impriżi li taw
is-sensji u l-ħaddiema li se jingħataw l-għajnuna 14. L-applikazzjoni tikkonċerna 512-il sensja
li seħħew f’10 impriżi: Impriżi u għadd ta’ persuni li ngħataw is-sensja ENGINES ENGINEERING || 6 || MOTORI MALAGUTI S.P.A. || 150 F. FABBRI ACCESSORI || 5 || MOTORI MINARELLI || 19 GALVANOTECNICA & PM || 43 || PAIOLI COMPONENTS || 6 MASIERO ANTONIO CAMBI || 16 || PAIOLI MECCANICA || 51 MOTO MORINI S.P.A. || 38 || VERLICCHI NINO E FIGLI || 178 Total tal-intrapriżi: 10 || Total ta' sensji:512 || 15. L-Italja infurmat ukoll li
tlieta mill-10 impriżi kkonċernati ma kinux għalqu b’mod definittiv u ma
kinux taw is-sensja lill-persunal tagħhom kollu (Engines engineering, Motori
Minarelli u F. Fabbri accessori). 16. Il-512-il persuna li
ngħataw is-sensja matul il-perjodu ta’ referenza huma eliġibbli għall-miżuri
ta’ għajnuna skont l-Artikolu 3a(a) tar-Regolament (KE) Nru 1927/2006.
Mill-512-il ħaddiema li ngħataw is-sensja, il-502 li għadhom ma sabux
xogħol ġew identifikati biex jingħataw l-għajnuna. 17. It-tqassim tal-ħaddiema
identifikati huwa kif ġej: Kategorija || Għadd || Perċentwal Irġiel || 294 || 58,6 Nisa || 208 || 41,4 Ċittadini tal-UE || 481 || 95,8 Ċittadini ta’ pajjiżi terzi || 21 || 4,2 Bejn 15 u 24 sena || 2 || 0,4 Bejn 25 u 54 sena || 416 || 82,9 Bejn 55 u 64 sena || 82 || 16,3 > 64 sena || 2 || 0,4 18. Ma hemmx ħaddiem li jbati minn
problema tas-saħħa fuq żmien twil jew minn diżabbiltà fost il-ħaddiema
indentifikati. 19. F'termini ta' kategoriji
professjonali, it-tqassim huwa kif ġej: Kategorija || Għadd || Perċentwal Professjonijiet intermedjarji || 11 || 2,2 Impjegati tat-tip amministrattiv || 200 || 39,8 Operaturi tal-impjanti u tal-magni u ħaddiema li jimmuntaw || 291 || 58,0 20. Skont l-Artikolu 7
tar-Regolament (KE) Nru 1927/2006, l-Italja tikkonferma li ġiet applikata,
u se tkompli tiġi applikata, politika ta' nondiskriminazzjoni u ta’ ugwaljanza
bejn in-nisa u l-irġiel, matul l-istadji varji tal-mobilizzazzjoni tal-FEG u,
b'mod partikolari, għall-aċċess fl-FEG. Deskrizzjoni tat-territorju kkonċernat u
l-awtoritajiet u partijiet interessati oħra tiegħu 21. L-applikazzjoni tikkonċerna
r-Reġjun NUTS II tal-Emilia-Romagna, provinċja fil-grigal tal-Italja li
fil-1 ta’ Jannar 2011 kellha popolazzjoni ta’ 4 432 418 ruħ
b’densità tal-popolazzjoni ta’ 197,49 ruħ f’kull km2 (kważi
daqs il-medja fl-Italja ta’ 200 ruħ f’kull km2). 22. L-awtoritajiet Taljani
enfasizzaw il-fatt li l-popolazzjoni tal-Emilia-Romagna kienet qed tonqos
b’rata aktar mgħaġġla mill-medja fl-Italja (ir-rata ta’ żieda naturali hija
ħafna aktar baxxa minn dik tal-Italja: -1,3 % meta mqabba ma’ -0,4 %
f’livell nazzjonali fl-2010[13]). 23. L-Emilia-Romagna hija wkoll
reġjun fejn it-tixjiħ tal-popolazzjoni huwa ogħla mill-medja fl-Italja (l-għadd
ta’ persuni residenti li għandhom aktar minn 65 sena kien żewġ punti ogħla
mill-medja Taljana fl-2011, il-perċentwal tal-persuni bejn 0 u 14-il sena
jibqa’ 13,3 %, taħt il-livell nazzjonali ta’ 14 %)[14]. 24. L-awtoritajiet Taljani
ddeskrivew ir-reġjun tal-Emilia-Romagna bħala wieħed li għandu ekonomija
vijabbli (il-ġid prodott fl-2009 jikkorrispondi għal 8,7 % tal-PDG Taljan,
il-PDG għal kull abitant huwa ta’ EUR 30 493, jiġifieri ogħla
mil-livell nazzjonali li kienet EUR 25 237 bħala medja)[15] li fil-medja ġiet affettwata
aktar mir-reġjuni l-oħra b’mod partikolari mill-effetti tal-kriżi ekonomika u
finanzjarja. 25. L-Italja għalhekk indikat li
bejn l-2008 u l-2009, il-PDG għal kull abitant tal-Emilia-Romagna naqas aktar
mil-livell nazzjonali bħala medja (-4,89 % mqabbel ma’ -3,6 %) u li
l-PDG ukoll naqas b’mod aktar qawwi (-3,7 %) meta mqabbel mal-evoluzzjoni
nazzjonali (-3 %). 26. L-Emilia-Romagna hija t-tielet
reġjun Taljan f’termini ta’ esportazzjonijiet u r-raba’
għall-importazzjonijiet. Fl-2010 l-esportazzjonijiet tal-Emilia-Romagna lejn
il-bqija tad-dinja madankollu naqsu b’10,8 % meta mqabbla mal-2008.
Minkejja bilanċ kummerċjali pożittiv bejn l-2008 u l-2010 għall-Emilia-Romagna,
is-surplus kummerċjali naqas fl-istess perjodu b'mod sinifikanti b'16,5 %. 27. L-Emilia-Romagna batiet ukoll
mit-tnaqqis nazzjonali tal-għadd ta’ kumpaniji li qegħdin joperaw u mit-tnaqqis
tal-għadd ta’ ħolqien ta’ kumpaniji (80 483 impriżi ġodda inħalqu fl-2008
fl-Italja meta mqabbla ma’ 77 443 fl-2011). 28. L-awtoritajiet u l-partijiet
interessati ewlenin huma l-Ministeru Taljan tax-Xogħol u tal-Politiki Soċjali (Ministero
del Lavoro e delle Politiche Sociali), ir-reġjun tal-Emilia-Romagna (Regione
Emilia-Romagna), l-assoċjazzjoni nazzjonali tal-muniċipalitajiet Taljani (ANCI
- Associazione Nazionale Comuni Italiani), l-unjoni tal-provinċji Taljani (UPI:
Unione delle Province d'Italia), it-taqsimiet lokali
tal-konfederazzjonijiet nazzjonali tal-ħaddiema tas-sengħa u tal-impriżi żgħar
u medji (CNA: Confederazione Nazionale dell'Artigianato e della Piccola e
Media Impresa Regionale dell'Emilia-Romagna u Confartigianato Bologna),
organizzazzjonijiet tal-kooperattivi u tal-impriżi soċjali (Confcooperative
u Legacoop Emilia-Romagna), organizzazzjoni li tirrappreżenta l-impriżi
tal-manifattura u tas-servizzi fl-Italja (Confindustria), organizzazzjonijiet
tal-impjegaturi (Unindustria Bologna u Unionapi), u
trejdjunjins: CGIL (Confederazione Generale Italiana del Lavoro), CISL (Confederazione
Italiana Sindacati dei Lavoratori), FIM (Federazione Italiana
Metalmeccanici), FIOM (Federazione Impiegati Operai Metallurgici),
UIL (Unione Italiana del Lavoro) u UILM (Unione Italiana Lavoratori
Metalmeccanici). Effetti mistennija tas-sensji fuq
l-impjiegi lokali, reġjonali jew nazzjonali 29. Is-sensji fis-settur
tal-vetturi b’żewġ roti motorizzati seħħew f’kuntest ta’ bidla fl-ekonomija
nazzjonali u reġjonali lejn it-twettiq ta’ aktar attivitajiet fis-settur
terzjarju (l-industrija tal-manifattura issa tirrappreżenta biss 11,6 %
tal-impjiegi fir-reġjun). L-awtoritajiet Taljani jenfasizzaw li biex jibqgħu
jipproduċu vetturi b’żewġ roti motorizzati, l-impriżi se jkollhom
jispeċjalizzaw f’proċessi u komponenti li jiġbru flimkien l-innovazzjoni u
ħaddiema speċjalizzati. Huma tal-fehma li ma għadx hemm lok għall-produzzjoni
lokali tal-iskuters jew tal-muturi ta' kwalità baxxa jew medja u li l-iżvilupp
tal-impriżi speċjalizzati f'aċċessorji u spare parts ma għadx jista’ jsir biss
permezz ta’ marki storiċi lokali bħal pereżempju Ducati. 30. L-awtoritajiet Taljani
speċifikaw li s-settur tal-vetturi b’żewġ roti motorizzati jimpjega madwar 4 000 persuni,
mingħajr ma jitqiesu l-industriji tal-manifattura tal-ispare parts u ta’
tagħmir li huma relatati magħhom iżda li huma ta’ spiss ikklassifikati
f’kategoriji oħra differenti min-NACE Reviżjoni 2. L-istima li taw
tal-għadd ta’ persuni affettwati mill-kriżi f’dan il-qasam hija ta’ 1 382
u jistennew li se jkun hemm sensji oħra f’setturi relatati li jimpjegaw eluf
ta’ persuni[16]. 31. L-awtoritajiet Taljani
enfasizzaw ukoll id-deterjorament tas-sitwazzjoni tal-impjiegi
fl-Emilia-Romagna bi tnaqqis tar-rata tal-impjiegi ta’ madwar tliet punti bejn
l-2008 u l-2010 (minn 70,2 % sa 67,4 %). Ir-rata tal-qgħad - anke
jekk din hija fost l-inqas baxxi fl-Italja - żiedet b’mod permanenti fir-reġjun
(minn 3,2 % fl-2008 sa 5,8 % fl-2010) u hija partikolarment għolja
għaż-żgħażagħ bejn il-15 u l-24 sena b’żieda ta’ aktar minn 11-il punt għal din
il-kategorija bejn l-2008 u l-2010 (minn 11 % sa 22,3 %). 32. L-Italja tenfasizza fl-aħħar
nett li, f’dan il-perjodu ta’ kriżi għar-reġjun, l-interventi li jiggarantixxu
lill-ħaddiema tal-impriżi f’diffikultà dħul li jissosstitwixxi s-salarju tiegħu
(bħal pereżempju s-CIGS: Cassa Integrazione Guadagni Straordinaria)
intużaw ħafna (is-sigħat taħt is-CIGS għalhekk ġew immultiplikati b’14
fir-reġjun bejn l-2008 u l-2010). Pakkett ikkoordinat ta' servizzi
personalizzati li jridu jiġu ffinanzjati, analiżi tal-ispejjeż stmati u
l-kumplimentarjetà tiegħu mal-azzjonijiet iffinanzjati mill-Fondi Strutturali 33. Il-miżuri ppreżentati hawn
taħt huma proposti u jiffurmaw pakkett ikkoordinat ta’ servizzi personalizzati
maħsuba biex jippermettu r-riintegrazzjoni professjonali tal-502 ħaddiema
kkonċernati. Il-persuni identifikati se jkollhom il-possibbiltà li jagħżlu
l-miżuri li jixtiequ jieħdu sehem fihom b'rispett tas-sekwenza kronoloġika
tal-azzjonijiet. Din is-sekwenza hija komposta minn servizzi minimi bażiċi
mmirati lejn il-ħaddiema kollha identifikati (bħal ma huma l-orjentazzjoni
professjonali, l-għajnuna għar-riċerka attiva u t-taħriġ/il-kwalifikazzjoni
mill-ġdid) flimkien ma’ servizzi speċifiċi mmirati għal ċerti ħaddiema
(l-għajnuna għall-bidla esterna fl-impjieg u l-promozzjoni
tal-intraprenditorija). Ftit mill-ħaddiema identifikati jirċievu wkoll
allokazzjoni (għar-riċerka attiva) jekk jieħdu sehem fil-miżuri proposti. –
Orjentazzjoni professjonali: Din il-miżura tikkonsisti f’serje ta’
intervisti strutturati (kollettivi jew individwali) li jgħinu lill-ħaddiem
fl-għarfien personali tiegħu sabiex ikun jista' jiddetermina l-interessi,
il-kapaċitajiet personali u l-kompetenzi tiegħu li jeħtieġ li jtejjeb u sabiex
issir valutazzjoni personali. Dan is-servizz se jiġi propost lill-502 ħaddiema
identifikati. –
Għajnuna għar-riċerka attiva: Din il-miżura se jkollha l-għan li
tiffavorixxi fost il-ħaddiema l-ħolqien ta’ strateġija personali ta’
awtopromozzjoni bl-użu ta’ tekniki operattivi ta’ riċerka ta’ impjieg (riċerka
tal-postijiet ta’ xogħol, tħejjija għall-intervista, tfassil ta’ curriculum
vitae u ta’ ittri ta’ applikazzjoni) fil-kuntest tal-offerta tal-impjiegi
lokali, u jekk meħtieġ bl-akkumpanjament tal-ħaddiema sal-intervista. Dan
is-servizz se jiġi propost lill-502 ħaddiema identifikati. –
Taħriġ u kwalifikazzjoni mill-ġdid: Din il-miżura prevista għal 400 ħaddiem
se tikkonsisti f’kupun ta’ taħriġ ta’ valur medju ta’ EUR 4 000, li
għandu jintuża strettament fil-qafas tat-taħriġ iddeterminat għal kull ħaddiem
(madankollu b’ċerta flessibbiltà fid-determinazzjoni tal-ħtiġijiet tiegħu
fir-rigward tat-taħriġ, l-apprendistati professjonali, l-appoġġ
għall-orjentazzjoni professjonali...). –
Għajnuna għall-bidla esterna fl-impjieg: Dan l-inċentiv speċifiku se jikkonċerna l-260 ħaddiem
li jkunu fl-agħar sitwazzjoni u li jkunu jistgħu jirċievu servizzi ta' għajnuna
għall-bidla esterna fl-impjieg u ta' kollokament minn impriża pubblika jew
privata. Jitħallas bonus ta’ EUR 5 000 lill-kumpanija jew lis-servizz
li, bl-għajnuna tiegħu, il-ħaddiem ikun sab impjieg b’kuntratt indefinit
fit-tmiem tal-perjodu[17].
–
Promozzjoni tal-intraprenditorija: Din il-miżura se tikkonsisti f’servizz
personalizzat biex jakkumpanja lill-ħaddiema (b’rispett tal-kompetenzi tagħhom
u tal-valorizzazzjoni possibbli tal-esperjenza professjonali tagħhom) sabiex
jifhmu l-approċċ intraprenditorjali u x-xogħol bħala ħaddiem indipendenti. Din
l-attività se tkun f’forma ta’ tagħlim fi grupp b’analiżi tar-restrizzjonijiet
u l-opportunitajiet tax-xogħol indipendenti u tal-intraprenditorija (madwar
il-kunċetti tal-pjan ta’ direzzjoni tan-negozju, start-up...). L-awtoritajiet
Taljani huma tal-opinjoni li dan is-servizz jista’ jingħata lil 61 ħaddiem
fost dawk identifikati. –
Allokazzjoni għar-riċerka attiva: Din il-miżura - li se tikkonċerna 216-il
ħaddiem mill-ħaddiema identifikati - se titħallas fil-forma ta' allokazzjoni
kull xahar ta' medja ta’ EUR 500, f’perjodu massimu ta’ ħames xhur,
lill-ħaddiema li jieħdu sehem b’mod attiv fil-miżuri tal-FEG, b’mod
proporzjonali mal-għadd ta’ jiem ta’ parteċipazzjoni effettiva fil-miżuri
tal-FEG matul ix-xahar. Il-ħlas ta’ din l-allokazzjoni se jkun strettament
marbut mal-impenn tal-ħaddiem li jieħu sehem b’mod attiv fil-proċess ta’
riintegrazzjoni fis-suq tax-xogħol. 34. L-ispejjeż
għall-mobilizzazzjoni tal-FEG, li huma inklużi fl-applikazzjoni skont
l-Artikolu 3 tar-Regolament (KE) Nru 1927/2006, ikopru l-attivitajiet
ta' tħejjija tal-applikazzjoni għal kontribuzzjoni, ta’ monitoraġġ, ta’
informazzjoni, ta’ reklamar kif ukoll ta’ kontroll tal-implimentazzjoni
tal-Fondi. 35. Is-servizzi personalizzati
ppreżentati mill-awtoritajiet Taljani huma miżuri attivi tas-suq tax-xogħol
fl-azzjonijiet eliġibbli definiti fl-Artikolu 3 tar-Regolament (KE)
Nru 1927/2006. L-awtoritajiet Taljani jistmaw li n-nefqa totali ta’ dawn
is-servizzi hija ta’ EUR 4 089 992 li minnhom EUR 3 932 992
huma għas-servizzi personalizzati u EUR 157 000 (jiġifieri 3,84 %
tal-ammont totali) għall-ispejjeż għall-mobilizzazzjoni tal-FEG.
Il-kontribuzzjoni totali mitluba mill-FEG hija ta’ EUR 2 658 495
(65 % tan-nefqa totali). Azzjonijiet || Għadd stmat ta’ ħaddiema kkonċernati || Nefqa stmata għal kull ħaddiem ikkonċernat (EUR) || Nefqa totali (l-FEG u l-kofinanzjament nazzjonali) (EUR) Servizzi personalizzati [l-ewwel paragrafu tal-Artikolu 3 tar-Regolament (KE) Nru 1927/2006] Orjentazzjoni professjonali || 502 || 186 || 93 372 Għajnuna għar-riċerka attiva || 502 || 310 || 155 620 Taħriġ u kwalifikazzjoni mill-ġdid || 400 || 4 000 || 1 600 000 Għajnuna għall-bidla esterna fl-impjieg || 260 || 5 000 || 1 300 000 Promozzjoni tal-intraprenditorija || 61 || 4 000 || 244 000 Allokazzjoni għar-riċerka attiva || 216 || 2 500 || 540 000 Subtotal tas-“Servizzi personalizzati” || || 3 932 992 Spejjeż għall-mobilizzazzjoni tal-FEG [it-tielet paragrafu tal-Artikolu 3 tar-Regolament (KE) Nru 1927/2006] Tħejjija || || 7 000 Monitoraġġ || || 80 000 Informazzjoni u reklamar || || 10 000 Attivitajiet ta’ kontroll || || 60 000 Subtotal tal-“Ispejjeż għall-mobilizzazzjoni tal-FEG” || || 157 000 Total tan-nefqa stmata || || 4 089 992 Kontribuzzjoni tal-FEG (65 % tan-nefqa totali) || || 2 658 495 36. L-Italja tikkonferma li
l-miżuri deskritti hawn fuq huma komplementarji mal-azzjonijiet iffinanzjati
mill-Fondi Strutturali u tiggarantixxi n-nuqqas ta’ finanzjament doppju.
Monitoraġġ kontinwu tal-azzjonijiet iffinanzjati mill-FSE u l-FEG għal
għanijiet jew ħaddiema kkonċernati simili jippermetti li jiġi evitat kwalunkwe
trikkib bejn l-FSE (jew kull strument ieħor tal-UE jew programm) u l-miżuri
ffinanzjati mill-FEG. Id-data meta nbdew jew meta huwa maħsub
li jinbdew is-servizzi personalizzati għall-ħaddiema kkonċernati 37. L-Italja bdiet tagħti
lill-ħaddiema kkonċernati s-servizzi personalizzati inklużi fil-pakkett
ikkoordinat propost għall-kofinanzjament mill-FEG, fl-1 ta' Marzu 2012.
Din id-data, għalhekk, tirrappreżenta l-bidu tal-perjodu ta' eliġibbiltà għal
kwalunkwe għajnuna li tista' tingħata mill-FEG. Proċeduri għall-konsultazzjoni mal-isħab
soċjali 38. L-applikazzjoni
għall-kontribuzzjoni mill-FEG ġiet diskussa mal-awtoritajiet u l-partijiet
interessati l-oħra deskritti fil-punt 28 waqt laqgħat li saru fit-12 ta' Ottubru 2011,
fl-14 ta' Diċembru 2011 u fis-16 ta' Jannar 2012.
39. L-awtoritajiet Taljani
kkonfermaw li r-rekwiżiti stipulati fil-leġiżlazzjoni nazzjonali tagħhom u
f’dik tal-UE li jikkonċernaw is-sensji kollettivi ġew issodisfati. Informazzjoni dwar l-azzjonijiet li huma
obbligatorji skont il-leġiżlazzjoni nazzjonali jew skont il-ftehimiet
kollettivi 40. Fir-rigward tal-kriterji li
jinsabu fl-Artikolu 6 tar-Regolament (KE) Nru 1927/2006,
l-awtoritajiet Taljani fl-applikazzjoni tagħhom: · ikkonfermaw li l-kontribuzzjoni finanzjarja mill-FEG ma tissostitwixxix
l-azzjonijiet li huma r-responsabbiltà tal-impriżi bis-saħħa tal-leġiżlazzjoni
nazzjonali jew ftehimiet kollettivi; · taw prova li l-miżuri għandhom l-għan li jipprovdu għajnuna
lill-ħaddiema kkonċernati u mhux li jirristrutturaw l-impriżi jew is-setturi
ta’ attività; · ikkonfermaw li l-azzjonijiet eliġibbli msemmijin hawn fuq ma jirċevux
għajnuna minn strumenti finanzjarji oħra tal-Unjoni. Sistemi ta’ ġestjoni u ta’ kontroll 41. L-Italja nnotifikat
lill-Kummissjoni li l-kontribuzzjoni finanzjarja tal-FEG se tiġi ġestita kif
ġej: il-Ministerio del Lavoro e delle Politiche Sociali – Direzione Generale
per le Politiche Attive e Passive del Lavoro (MLPS – DG PAPL) se jkun
l-awtorità ta’ ġestjoni, ta’ ċertifikazzjoni u ta’ verifika (l-MLPS – DG PAPL Ufficio
A bħala awtorità ta’ ġestjoni; l-MLPS – DG PAPL Ufficio B bħala
awtorità ta’ ċertifikazzjoni u l-MLPS – DG PAPL Ufficio C bħala
verifika). Ir-reġjuni tal-Emilia-Romagna (Direzione Generale Cultura
Formazione e Lavoro) se jkun il-korp intermedjarju tal-awtorità ta’
ġestjoni. 42. L-awtoritajiet Taljani
infurmaw li se jimplimentaw is-sistema ta' ġestjoni u ta' kontroll għall-FEG
adottata mill-Ministeru Taljan tax-Xogħol u tal-Politiki Soċjali (ara
d-dokument prot. 40/0002218 tad-29.09.2011) u l-manwal operattiv
għall-awtorità ta’ ġestjoni, ta’ ċertifikazzjoni u ta’ verifika (ara d-dokument
prot. 40/0005840 tas-26.10.2011). Finanzjament 43. Abbażi tal-applikazzjoni
mill-Italja, il-kontribuzzjoni proposta mill-FEG għall-pakkett ikkoordinat ta'
servizzi personalizzati (inklużi l-ispejjeż għall-intervent tal-FEG) hija ta'
EUR 2 658 495, li tirrappreżenta 65 % tan-nefqa totali.
L-għajnuna proposta mill-Kummissjoni minn dan il-Fond hija bbażata fuq
l-informazzjoni li ngħatat mill-Italja. 44. B'kunsiderazzjoni tal-ammont
massimu possibbli ta' kontribuzzjoni finanzjarja mill-FEG stabbilita
fl-Artikolu 10(1) tar-Regolament (KE) Nru 1927/2006, kif ukoll
tal-marġni disponibbli għall-allokazzjoni mill-ġdid tal-approprjazzjonijiet,
il-Kummissjoni tipproponi li timmobilizza l-FEG għall-ammont totali msemmi hawn
fuq, li għandu jiġi allokat skont l-intestatura 1a tal-qafas finanzjarju. 45. Il-kontribuzzjoni proposta se
tħalli aktar minn kwart l-ammont massimu annwali ddestinat għall-FEG
disponibbli għall-ħtiġijiet tal-aħħar erba' xhur tas-sena, b’mod konformi
mal-Artikolu 12(6) tar-Regolament (KE) Nru 1927/2006. 46. B’din il-proposta
għall-mobilizzazzjoni tal-FEG, il-Kummissjoni qiegħda tniedi l-proċedura
ssimplifikata ta' trijalogu prevista fil-Punt 28 tal-Ftehim Interistituzzjonali
tas-17 ta' Mejju 2006, sabiex tikseb il-qbil taż-żewġ fergħat
tal-awtorità baġitarja dwar il-ħtieġa li jintuża l-FEG u l-ammont meħtieġ.
Il-Kummissjoni tistieden lill-ewwel waħda miż-żewġ fergħat tal-awtorità
baġitarja li tilħaq ftehim, f'livell politiku xieraq, dwar l-abbozz
tal-proposta għall-mobilizzazzjoni biex tgħarraf lill-fergħa l-oħra u
lill-Kummissjoni bl-intenzjonijiet tagħha. F'każ ta' nuqqas ta' qbil minn xi
waħda miż-żewġ fergħat tal-awtorità baġitarja, għandha tissejjaħ laqgħa formali
tat-trijalogu. 47. B’mod separat, il-Kummissjoni
tippreżenta talba għall-awtorizzazzjoni ta' trasferiment sabiex fil-baġit
għall-2012 iddaħħal l-approprjazzjonijiet għall-impenji speċifiċi, b’mod
konformi mal-Punt 28 tal-Ftehim Interistituzzjonali tas-17 ta' Mejju 2006. Sors tal-approprjazzjonijiet għall-ħlas 48. L-ammont
tal-approprjazzjonijiet għall-ħlas imsemmi fil-linja baġitarja 04 05 01
fil-bidu se jintuża kollu wara l-adozzjoni mill-awtorità baġitarja tal-proposti
diġà ppreżentati għall-mobilizzazzjoni tal-FEG u għalhekk mhumiex biżżejjed
biex ikopru l-ammont meħtieġ għal din l-applikazzjoni. 49. Pagament ta’ EUR 1 160 745
tal-linja baġitarja tal-Faċilità Ewropea ta' Mikrofinanzjament Progress se
jintuża biex ikopri parti tal-ammont meħtieġ għal din l-applikazzjoni. 50. L-ammont addizzjonali ta’
EUR 1 497 750 meħtieġ għal din l-applikazzjoni se jkun kopert
permezz ta’ titjib mitlub mill-Baġit emendatorju Nru 6. Proposta għal DEĊIŻJONI TAL-PARLAMENT EWROPEW U
TAL-KUNSILL dwar il-mobilizzazzjoni tal-Fond Ewropew ta’
Aġġustament għall-Globalizzazzjoni, b’konformità mal-punt 28 tal-Ftehim
Interistituzzjonali tas-17 ta’ Mejju 2006 bejn il-Parlament
Ewropew, il-Kunsill u l-Kummissjoni dwar id-dixxiplina baġitarja u l-ġestjoni
finanzjarja soda (l-applikazzjoni EGF/2011/026 IT/Emilia-Romagna Motorcycles
mill-Italja) IL-PARLAMENT EWROPEW U L-KUNSILL
TAL-UNJONI EWROPEA, Wara li kkunsidraw it-Trattat dwar
il-Funzjonament tal-Unjoni Ewropea, Wara li kkunsidraw il-Ftehim
Interistituzzjonali tas-17 ta' Mejju 2006 bejn il-Parlament
Ewropew, il-Kunsill u l-Kummissjoni dwar id-dixxiplina baġitarja u l-ġestjoni
finanzjarja soda[18],
u b'mod partikolari l-punt 28 tiegħu, Wara li kkunsidraw ir-Regolament (KE)
Nru 1927/2006 tal-Parlament Ewropew u tal-Kunsill tal-20 ta' Diċembru 2006
li jistabbilixxi l-Fond Ewropew ta' Aġġustament għall-Globalizzazzjoni[19], u b'mod partikolari
l-Artikolu 12(3) tiegħu, Wara li kkunsidraw il-proposta tal-Kummissjoni
Ewropea[20], Billi: (1) Il-Fond Ewropew ta’
Aġġustament għall-Globalizzazzjoni (FEG) twaqqaf biex jipprovdi appoġġ
addizzjonali għall-ħaddiema li ngħataw is-sensja b’riżultat ta’ bidliet
strutturali maġġuri fix-xejriet kummerċjali dinjin minħabba l-globalizzazzjoni
u biex jgħinhom fir-riintegrazzjoni tagħhom fis-suq tax-xogħol. (2) Il-kamp ta' applikazzjoni
tal-FEG twessa’ għall-applikazzjonijiet imressqa mill-1 ta’ Mejju 2009
sat-30 ta' Diċembru 2011 biex jinkludi appoġġ għall-ħaddiema li
jingħataw is-sensja bħala riżultat dirett tal-kriżi finanzjarja u ekonomika
globali. (3) Il-Ftehim Interistituzzjonali
tas-17 ta’ Mejju 2006 jippermetti l-mobilizzazzjoni tal-FEG fi
ħdan il-limitu massimu annwali ta’ EUR 500 miljun. (4) Fit-30 ta’ Diċembru 2011,
l-Italja ppreżentat applikazzjoni għall-mobilizzazzjoni tal-FEG għal sensji f’10
impriżi li joperaw fis-settur tan-NACE Reviżjoni 2 Nru 30
(Manifattura ta' tagħmir ieħor tat-trasport) fir-reġjun NUTS II
Emilia-Romagna (ITH5) fl-Italja, li kkompletat b’informazzjoni addizzjonali
sal-10 ta’ Settembru 2012. Din l-applikazzjoni tikkonforma
mar-rekwiżiti għad-determinazzjoni tal-kontribuzzjoni finanzjarja kif stabbilit
fl-Artikolu 10 tar-Regolament (KE) Nru 1927/2006. Il-Kummissjoni,
għalhekk, tipproponi li timmobilizza ammont ta' EUR 2,658,495. (5) Il-FEG għandu, għalhekk, jiġi
mobilizzat sabiex jipprovdi kontribuzzjoni finanzjarja għall-applikazzjoni
mressqa mill-Italja, ADOTTAW DIN ID-DEĊIŻJONI: Artikolu 1 Fil-qafas tal-baġit ġenerali tal-Unjoni
Ewropea għas-sena finanzjarja 2012, il-Fond Ewropew ta' Aġġustament
għall-Globalizzazzjoni (FEG) għandu jiġi mmobilizzat biex jipprovdi s-somma ta'
EUR 2 658 495 f'approprjazzjonijiet għall-impenji u għall-ħlas. Artikolu 2 Din id-Deċiżjoni għandha tiġi ppubblikata f'Il-Ġurnal
Uffiċjali tal-Unjoni Ewropea. Magħmul fi Brussell, Għall-Parlament Ewropew Għall-Kunsill Il-President Il-President [1] ĠU C 139, 14.6.2006, p. 1. [2] ĠU L 406, 30.12.2006, p. 1. [3] Ir-Regolament (KE) Nru 1893/2006 tal-Parlament
Ewropew u tal-Kunsill tal-20 ta’ Diċembru 2006 li jistabbilixxi
l-klassifikazzjoni tal-istatistika ta’ attivitajiet ekonomiċi tan-NACE
Reviżjoni 2 u li jemenda r-Regolament tal-Kunsill (KEE) Nru 3037/90
kif ukoll ċerti Regolamenti tal-KE dwar setturi speċifiċi tal-istatistika (ĠU
L 393, 30.12.2006, p. 1). [4] B'konformità mat-tielet paragrafu tal-Artikolu 3
tar-Regolament (KE) Nru 1927/2006. [5] Sors: ACEM (Association des Constructeurs Européens
de Motocycles - http://www.acem.eu) Registrations and
deliveries - édition 2011. [6] Sors: ACEM (Association des Constructeurs Européens
de Motocycles - http://www.acem.eu) Production -
édition 2011 [7] L-Italja, Spanja, Franza, il-Ġermanja, l-Awstrija,
ir-Renju Unit, ir-Repubblika Ċeka, il-Protugall u l-Isvezja. [8] Sors: id-dejta disponibbli dwar il-kummerċ tar-roti u l-muturi
ġejja mill-Konferenza tan-Nazzjonijiet Uniti dwar il-Kummerċ u l-Iżvilupp
(UNCTAD). [9] Sors: Associazione Nazionale Ciclo Motociclo
Accessori (ANCMA) - www.ancma.it. [10] Sors: ANCMA. [11] Sors: ACEM. [12] Din l-applikazzjoni tikkonċerna 10 impriżi ta’ daqs
żgħir u medju li għandhom medja ta’ 92 persuna b'minimu ta’ sitt ħaddiema
u massimu ta’ 363 ħaddiema għal kull impriża. [13] Sors: ISTAT (Istitut Nazzjonali tal-Istatisitika
tal-Italja) - Tabella 3 fi http://demo.istat.it/altridati/indicatori/index.html#tabreg. [14] Sors: ISTAT - Tabella 6 fi http://demo.istat.it/altridati/indicatori/index.html#tabreg. [15] Sors: Banca d'Italia, Economie regionali, L'economia
dell'Emilia-Romagna – 2011: http://www.bancaditalia.it/pubblicazioni/econo/ecore/2011/analisi_s_r/1131_emilia. [16] L-Italja semmiet b’mod partikolari d-Diviżjonijiet
tan-NACE Reviżjoni 2 : 24 (Metallurġija), 25 (Manifattura ta’
prodotti tal-metal, għajr il-makkinarju u t-tagħmir), 26 (Manifattura ta'
prodotti tal-informatika, elettroniċi u ottiċi), 27 (Manifattura ta’ tagħmir
elettriku), 28 (Manifattura ta’ makkinarju u tagħmir mhux imsemmi band’oħra) u 29
(Industrija awtomobilistika). [17] Il-bonus jitħallas biss jekk ma jkunx diġà dovut skont
il-leġiżlazzjoni ta’ appoġġ tal-politiki reġjonali għall-promozzjoni
tal-impjiegi. [18] ĠU C 139, 14.6.2006, p. 1. [19] ĠU L 406, 30.12.2006, p. 1. [20] ĠU C […], […], p. […].