This document is an excerpt from the EUR-Lex website
Document 52012PC0521
Proposal for a REGULATION OF THE EUROPEAN PARLIAMENT AND OF THE COUNCIL amending Council Regulation (EC) No 111/2005 laying down rules for the monitoring of trade between the Community and third countries in drug precursors
Proposta għal REGOLAMENT TAL-PARLAMENT EWROPEW U TAL-KUNSILL li jemenda r-Regolament tal-Kunsill (KE) Nru 111/2005 jistabblixxi regoli għall-monitoraġġ tal-kummerċ tal-prekursuri tad-droga bejn il-Komunità u pajjiżi terzi.
Proposta għal REGOLAMENT TAL-PARLAMENT EWROPEW U TAL-KUNSILL li jemenda r-Regolament tal-Kunsill (KE) Nru 111/2005 jistabblixxi regoli għall-monitoraġġ tal-kummerċ tal-prekursuri tad-droga bejn il-Komunità u pajjiżi terzi.
/* COM/2012/0521 final - 2012/0250 (COD) */
Proposta għal REGOLAMENT TAL-PARLAMENT EWROPEW U TAL-KUNSILL li jemenda r-Regolament tal-Kunsill (KE) Nru 111/2005 jistabblixxi regoli għall-monitoraġġ tal-kummerċ tal-prekursuri tad-droga bejn il-Komunità u pajjiżi terzi. /* COM/2012/0521 final - 2012/0250 (COD) */
MEMORANDUM TA’ SPJEGAZZJONI 1. KUNTEST TAL-PROPOSTA 1.1. Sfond Il-prekursuri tad-droga huma sustanzi
kimiċi li għandhom varjetà wiesgħa ta' użi leċiti,
bħal fis-sinteżi tal-plastik, tal-farmaċewtiċi,
tal-kosmetiċi, tal-fwejjaħ, tad-deterġenti, jew tal-aromi. Dawn
huma nnegozjati għal skopijiet leġittimi fuq swieq reġjonali u
globali, iżda xi wħud minnhom jistgħu wkoll jiġu ddevjati
mill-kanali leċiti ta' distribuzzjoni għall-manifattura illeċita
tad-drogi narkotiċi. Għalhekk,
il-kontroll tal-prekursuri tad-droga huwa komponent ewlieni fil-ġlieda
kontra d-drogi narkotiċi. Minħabba l-użi leġittimi
wiesgħa tal-prekursuri tad-drogi, in-negozju tagħhom ma jistax ikun
projbit. Ġie stabbilit qafas regolatorju speċifiku, kemm fil-livell
internazzjonali kif ukoll fil-livell tal-UE, biex jimmonitorja l-kummerċ
legali tagħhom u biex jidentifika transazzjonijiet suspettużi, biex
b'hekk jimblokka d-dirottament tagħhom għal użu illeċitu. L-efedrina u l-psewdoefedrina huma sustanzi
kimiċi użati għall-manifattura ta’ mediċini
għall-irjiħat jew l-allerġiji. Dawn iż-żewġ
sustanzi huma wkoll il-prekursuri ewlenin għall-manifattura
tal-metamfetamina[1].
Filwaqt li l-efedrina u l-psewdoefedrina huma kkontrollati fil-livell
internazzjonali u tal-UE, il-prodotti mediċinali li jkun fihom dawn
is-sustanzi mhumiex ikkontrollati meta jiġu esportati minn territorju
doganali tal-Unjoni jew jgħaddu minnu. Għalhekk dawn huma fil-mira
tat-traffikanti tad-droga bħala sors ta' prekursuri
għall-fabbrikazzjoni illeċita ta’ metamfetamina minħabba li
l-efedrina u l-psewdoefedrina li jinsabu f'dawn il-prodotti jistgħu
jiġu faċilment estratti (bl-użu tat-tagħmir irħis
domestiku u permezz ta’ proċess kimiku sempliċi). Il-fatt li l-prodotti mediċinali
għall-użu mill-bniedem li fihom l-efedrina u l-psewdoefedrina huma
esklużi mid-dispożizzjonijiet tar-Regolament (KE) Nru 111/2005,
li japplika għall-kummerċ tal-prekursuri tad-droga bejn l-UE u
pajjiżi terzi, wassal għal sitwazzjoni fejn dawn il-prodotti ma
setgħux jiġu mwaqqfa jew issekwestrati mill-awtoritajiet kompetenti
tal-Istati Membri meta dawn il-prodotti ġew esportati minn territorju
doganali tal-Unjoni jew għaddew minnu, minkejja li kien probabbli
ħafna li dawn kienu se jintużaw ħażin
għall-manifattura illeċita tal-metamfetamina fil-pajjiż tad-destinazzjoni
tagħhom. L-UE hija kkritikata internazzjonalment talli
ma tieħux miżuri ta' kontroll adegwati madwar l-Istati Membri sabiex
tindirizza din id-dgħufija. Għaldaqstant, huwa mistenni li l-UE
tagħlaq il-lakuna fil-leġiżlazzjoni attwali fir-rigward tal-poteri
konferiti fuq l-awtoritajiet tad-dwana u tal-pulizija li jistgħu jwaqqfu u
jissekwestraw l-efedrina u l-psewdoefedrina iżda ma jistgħux iwaqqfu
u jikkonfiskaw prodotti mediċinali li fihom l-efedrina jew
il-psewdofedrina. Fil-Konklużjonijiet tiegħu
tal-25 ta' Mejju 2010, il-Kunsill stieden lill-Kummissjoni biex
tippreżenta proposta leġiżlattiva f’dan is-sens. 1.2. L-iskala tal-problema
(il-metamfetamina u l-prekursuri tagħha) Fl-2009 ġew rappurtati fl-Ewropa
kważi 7 400 konfiska ta' metamfetamina, li jammontaw għal madwar
600 kg tad-droga. L-għadd kemm tal-konfiski kif ukoll
tal-kwantitajiet żdied matul il-perjodu 2004-2009. Fl-2009 laboratorji
tal-metamfetamina illeċita ġew issekwestrati għall-ewwel darba
f'bosta pajjiżi Ewropej. Din hija indikazzjoni li jista' jkun li s-swieq
tal-metamfetamina fl-Ewropa qed jespandu. Kważi nofs is-sekwestri ta' metamfetamina
fl-2009 fil-livell globali kienu fl-Amerika ta' Fuq. Is-sekwestri fil-Lvant u
fix-Xlokk tal-Asja żdiedu b'aktar minn terz u hemm sinjali li l-metamfetamina
qed tasal fir-reġjun mill-Afrika u mir-Repubblika Iżlamika tal-Iran.
L-Afrika tal-Punent ukoll qed titfaċċa bħala sors ġdid
tal-metamfetamina għas-swieq illeċiti Ażjatiċi. L-efedrina u l-psewdoefedrina huma
l-prekursuri ewlenin għall-metamfetamina. Is-sekwestri tal-prekursuri
tal-metamfetamina li jinsabu fi prodotti mediċinali varjaw mhux
ħażin mill-2007 sal-2010. Fil-livell Ewropew, filwaqt li fl-2007 ftit
li xejn kienu l-preparati rreġistrati mill-kwantitajiet kollha sekwestrati,
fl-2008 u l-2009 l-ammont ta’ preparati mit-total tal-kwantitajiet sekwestrati
żdied sew u naqas b’mod konsiderevoli għal darba oħra fl-2010[2]. Wara ż-żieda kontinwa ta’ sekwestri
ta' prodotti mediċinali mill-2007 sal-2009, bħala riżultat ta'
kontrolli msaħħa tal-prodotti mediċinali li fihom l-efedrina u
l-psewdoefedrina f’ħafna pajjiżi, partikolarment fil-Messiku u
fil-pajjiżi tal-Amerika Ċentrali, fl-2010 l-ammont totali
tal-prodotti mediċinali sekwestrati madwar id-dinja naqas. Madankollu, iż-żieda jew tnaqqis
fil-livell ta’ sekwestri huwa biss indikatur wieħed biex juri li
l-manifattura illeċita qed isseħħ f’ċerta parti tad-dinja. In-nuqqas ta' mekkaniżmu ta' kontroll
għall-prodotti mediċinali li fihom l-efedrina u l-psewdoefedrina
jibqa’ sors ta’ tħassib kemm fil-livell Ewropew kif ukoll dak globali. Bl-impożizzjoni ta' kontroll tal-UE fuq
dawn il-prodotti mediċinali, aħna qed nimmiraw li nagħmluha
aktar diffiċli, għalja u riskjuża għall-kriminali biex
jakkwistaw il-kimiki li jeħtieġu għall-manifattura tad-drogi. Din
il-proposta għandha taħdem bħala deterrent: hija tiffoka fuq
il-prevenzjoni tad-dirottament tal-prekursuri. Il-proposta tikkonċentra
fuq it-tnaqqis tal-provvista tal-kimiċi li minnhom isiru d-drogi u mhux
fuq il-provvista tad-drogi għall-konsumaturi. 1.3. Konsistenza ma’ politiki
oħrajn tal-UE Effettivament, li jiġi ostakolat
id-dirottament tal-prekursuri tad-drogi għall-produzzjoni ta’ drogi
illeċiti għandha l-għan li tnaqqas il-provvista tad-drogi
illeċiti. Għalhekk hija konsistenti mal-politika tad-droga deskritta
fl-Istrateġija tal-UE għad-Drogi 2005-2012, billi tipprevedi azzjoni
għat-tnaqqis tal-provvista ta' prekursuri, u, b'hekk, tnaqqas
il-produzzjoni tad-drogi. Din l-inizjattiva għandha l-għan li
tirregola l-kummerċ estern tal-prodotti mediċinali li fihġm
l-efedrina u l-psewdoefedrina. Dawn il-prodotti huma rregolati
mid-Direttiva 2001/83/KE. Madanakollu, l-għan li ssegwi dik
id-Direttiva huwa ta' natura differenti, jiġifieri li tissalvagwardja
s-saħħa pubblika billi tikkontrolla l-produzzjoni, id-distribuzzjoni
u l-użu ta' prodotti mediċinali sabiex tiżgura l-kwalità,
is-sigurtà u l-effikaċja tagħhom. Dan jispjega għaliex
il-mekkaniżmi ta’ kontroll previsti fid-Direttiva 2001/83/KE u
fir-Regolament (KE) Nru 111/2005 huma differenti. Il-leġiżlazzjoni dwar il-prodotti
mediċinali dan l-aħħar ġiet emendata permezz
tad-Direttiva 2011/62/UE li tirrigwarda l-prevenzjoni tad-dħul ta'
prodotti mediċinali ffalsifikati fil-katina legali tal-provvista.
Id-Direttiva tindirizza inter alia il-katina tad-distribuzzjoni
għal mediċini fi ħdan l-UE, l-importazzjoni ta' sustanzi attivi,
u l-'introduzzjoni' tal-mediċini, jiġifieri mediċini li
jinġiebu fit-territorju doganali mingħajr il-ħsieb li
jitqegħdu fis-suq. Dawn id-dispożizzjonijiet huma ffukati fuq
il-prevenzjoni ta' prodotti li jaqgħu fid-definizzjoni ta’ prodotti
mediċinali ffalsifikati milli jidħlu fil-katina legali
tal-provvista. Minħabba li l-kwistjoni prinċipali bil-prekursuri
tad-droga hija waħda ta' prodotti maħdumin b'mod leġittimu
li jħallu l-katina legali tal-provvista, x'aktarx li dawn
id-dispożizzjonijiet il-ġodda mhux se jagħtu kontribut
sinifikanti biex tiġi ttrattata l-kwistjoni tal-kontroll ta' prodotti
mediċinali li fihom l-efedrina jew il-psewdofedrina milli jiġu
esportati jew milli jgħaddu mill-UE. 2. RIŻULTATI TA’ KONSULTAZZJONIJIET
MAL-PARTIJIET INTERESSATI U VALUTAZZJONIJIET TAL-IMPATT 2.1. Konsultazzjoni mal-partijiet
interessati Saret konsultazzjoni mal-partijiet
interessati. Din ma kinitx konsultazzjoni pubblika, minħabba s-sensitività
u l-karatteristiċi partikolari tal-kwistjoni involuta[3].
Għalhekk huma biss dawk il-partijiet interessati l-aktar konċernati
li ġew ikkonsultati, jiġifieri l-awtoritajiet nazzjonali kompetenti
(id-dwana, il-pulizija u s-saħħa) u l-industrija farmaċewtika.
Biex jiġi evitat li tingħata informazzjoni sensittiva
lit-traffikanti, it-tweġibiet tal-partijiet interessati kienu ttrattati
b’mod kunfidenzjali. Bi tweħiba għal din
il-konsultazzjoni, il-Kummissjoni rċeviet 31 kontribuzzjoni. Minn dawn, 22
kienu minn awtoritajiet nazzjonali (tlieta (3) minnhom kienu risposti parzjali)
u tmienja (8) mill-industrija (sitt (6) kumpaniji tal-manifattura u
żewġ (2)assoċjazzjonijiet farmaċewtiċi). F'termini ġenerali, l-industrija hija
sodisfatta bis-sitwazzjoni attwali, iżda ma tkunx kontra li din titjieb
sal-punt li ma timponix piż amministrattiv akbar fuq il-kumpaniji li
jesportaw. Fost l-awtoritajiet kompetenti tal-Istati Membri żewġ
terzi qed isejħu li tiġi emendata l-leġiżlazzjoni, għalkemm
bi gradi differenti, filwaqt li terz huwa favur li tinżamm il-qagħda
attwali, li ma jsirux emendi fil-leġiżlazzjoni. 2.2. Valutazzjoni tal-Impatt Ir-rapport dwar il-valutazzjoni tal-impatt
identifika u evalwa l-għażliet ta' politika li jimmiraw biex
jiġi evitat id-dirottament ta' prodotti mediċinali li fihom
l-efedrina jew l-psewdofedrina għall-manifattura illeċita
tal-metamfetamina billi jintroduċi miżuri ta' kontroll fuq dawn
il-prodotti meta jsir kummerċ bejn l-Unjoni u pajjiżi terzi filwaqt
li jinżamm il-fluss liberu tagħhom. Ir-rapport tal-valutazzjoni tal-impatt fih
ħames għażliet ta' politika. L-ewwel għażla tipprevedi
l-hekk imsejjaħ "xenarju ta' referenza", fejn il-Kummissjoni ma
tieħu l-ebda azzjoni u jinżamm l-istatus quo. L-għażla 2
tikkunsidra li tikkontribwixxi biex ittejjeb is-sitwazzjoni permezz ta’
miżuri volontarji mill-Istati Membri, filwaqt li l-għażliet 3, 4
u 5 jikkunsidraw soluzzjoni permezz ta’ miżuri ta' kontroll.
L-aħħar tliet għażliet ġew mibnija bħala
żieda gradwali lejn in-numru u saħħa tal-miżuri ta'
kontroll previsti. Għażla politika oħra li
tissuġġerixxi projbizzjoni kummerċjali fuq dawn il-prodotti
ġiet ikkunsidrata u skartata mingħajr aktar analiżi tal-impatt
tagħha. Għażla 1 għandha tiġi
eskluża li kieku l-Kummissjoni kellha twieġeb b’mod adegwat
għat-talba tal-Kunsill biex jiġu indirizzati n-nuqqasijiet
identifikati fis-sistema ta’ kontroll tal-leġiżlazzjoni dwar
il-prekursuri tad-drogi u għat-tħassib li esprimiet il-komunità
internazzjonali. Għażla 2 tindirizza biss b’mod
parzjali l-problema identifikata. Hija tissuġġerixxi miżuri
volontarji li mhux se jkunu effettivi sakemm ma jkunux adottati mill-Istati
Membri kollha. L-applikazzjoni obbligatorja ta' dawn il-miżuri ma tistax
tiġi infurzata mill-istrument previst taħt din l-għażla. Għażliet 3, 4 u 5 kollha ser
jipprovdu bażi legali ċara għall-awtoritajiet kompetenti biex
iwaqqfu u/jew jissekwestraw prodotti mediċinali li fihom l-efedrina jew
il-psewdofedrina fl-esportazzjoni minn jew fi transitu fit-territorju doganali
tal-Unjoni. Dawn kollha għandhom inaqqsu l-kritika li esprima l-Bord
Internazzjonali tan-NU dwar il-Kontroll tan-Narkotiċi dwar l-allegat
nuqqas ta' azzjoni min-naħa tal-UE biex tikkontrolla dawn il-prodotti.
Dawn kollha se jżidu l-possibilitajiet biex jiġi evitat l-iżvijar
ta' dawn il-prodotti, biex b'hekk jonqos il-forniment tal-efedrina u
l-psewdoefedrina għall-manifattura illeċita tal-metamfetamina,
għalkemm fi gradi differenti. Meta wieħed iqabbel dawn it-tliet
għażliet li jirrekjedu emendi leġiżlattivi, il-piż
amministrattiv iġġenerat mill-għażla 3 (il-possibbiltà li
l-awtoritajiet iwaqqfu konsenji suspettużi) huwa biss ftit; l-istess huwa
mistennija għal għażla 4 (il-possibbiltà li l-awtoritajiet
iwaqqfu konsenji suspettużi u n-notifika ta' pre-esportazzjoni għal
kunsinni legali), filwaqt li l-għażla 5 (kontroll sħiħ
fil-kummerċ ta' prodotti mediċinali li fihom l-efedrina u
l-psewdoefedrina) timponi l-ogħla piż amministrattiv kemm
għall-awtoritajiet kompetenti kif ukoll għall-operaturi ekonomiċi.
Għalkemm l-għażla 5 tista' titqies bħala l-aktar effettiva
billi jiġu applikati kontrolli mill-aktar stretti, ir-rekwiżiti jkunu
sproporzjonati għall-għan li ssegwi din l-inizjattiva. Il-valur
miżjud ipprovdut mill-għażla 4 jekk meta mqabbla
mal-għażla 3 huwa li, taħt din l-għażla,
is-sinerġija ta' żewġ miżuri kkombinati żżid
l-effettività ta' kull miżura individwali, b'piż addizzjonali limitat
minħabba li sistema ta' notifika ta' pre-esportazzjoni hija stabbilita u
qed tiffunzjona u li l-għadd ta' notifiki ta' pre-esportazzjoni li
apparentement ikunu jistgħu jintbagħtu fis-sena mill-Istati Membri
lill-awtoritajiet huwa relattivament żgħir. Barra minn hekk,
minħabba li n-notifiki ta' pre-esportazzjoni għal sustanzi skedati
ta' kategorija 1 huma diġà obbligatorji, ikun jidher loġiku li jsiru
obbligatorji wkoll għall-prodotti li jkunu jinkoluduhom, bħal
prodotti mediċinali li fihom l-efedrina jew il;-psewdofedrina. Il-valutazzjoni tal-impatt ikkonkludiet li
l-għażla 4 tkun l-aktar waħda xierqa sabiex tindirizza
l-problema identifikata, minħabba li din tipprovdi għal bażi
legali, timponi biss rekwiżit wieħed ta’ kontroll iżjed u
tiġġenera kważi l-ebda piż amministrattiv addizzjonali. 3. BAŻI LEGALI U SUSSIDJARJETÀ Il-bażi legali tal-proposta hija
l-Artikolu 207 tat-Trattat dwar il-Funzjonament tal-Unjoni Ewropea (TFUE).
L-Artikolu 207 jiddefinixxi politika kummerċjali komuni tal-UE. Barra
minn hekk, l-Artikolu 3(1) tat-TFUE jipprovdi kompetenza esklużiva
tal-Unjoni Ewropea fil-qasam tal-politika kummerċjali komuni. Ir-Regolament tal-Kunsill (KE)
Nru 111/2005 jistabbilixxi regoli għall-monitoraġġ
tal-kummerċ tal-prekursuri tad-drogi bejn l-Unjoni u pajjiżi terzi, u
għalhekk jaqa' taħt il-politika kummerċjali komuni. 4. IMPLIKAZZJONI BAĠITARJA Il-proposta mhux se jkollha impatt fuq
ir-riżorsi umani u fuq il-baġit tal-Unjoni Ewropea u
għaldaqstant mhijiex akkumpanjata mid-dikjarazzjoni finanzjarja prevista
taħt l-Artikolu 28 tar-Regolament Finanzjarju (Regolament
tal-Kunsill (KE, Euratom) Nru 1605/2002 tal-25 ta’ Ġunju 2002
rigward ir-Regolament Finanzjarju applikabbli għall-baġit
ġenerali tal-Komunitajiet Ewropej). 5. TAGĦRIF IEĦOR Il-proposta fiha xi emendi oħra li
jimmiraw li jiffaċilitaw l-implimentazzjoni tar-Regolament u biex
tiżdied l-effettività tiegħu. Il-proposta tinkludi: - il-possibbiltà li jkun emendat l-Anness
għar-Regolament sabiex ikun hemm reazzjoni aktar rapida għal xejriet
emerġenti fid-dirottament tal-prekursuri; - referenza għall-bażi ta’ dejta,
maħluq bir-Regolament (KE) Nru 273/2004 kif emendat, biex jiġi
ssimplifikat ir-rappurtar tal-awtoritajiet tal-Istati Membri b'konformità
mal-Artikolu 12(12) tal-Konvenzjoni tan-Nazzjonijiet Uniti; - klawżola ta’ reviżjoni biex
tevalwa jekk ir-Regolament emendat ikunx effettiv biex jipprevjeni
d-dirottament ta' prodotti mediċinali li fihom l-efedrina jew
il-psewdofedrina; - l-adattament tad-dispożizzjonijiet
tar-Regolament (KE) Nru 111/2005 b'konformità mar-regoli dwar atti
delegati u implimentattivi taħt it-Trattat dwar il-Funzjonament tal-Unjoni
Ewropea (TFUE). Il-Kummissjoni ingħatat setgħat
implimentattivi skont ir-Regolament attwali b'konformità mal-Artikoli 4 u
7 tad-Deċiżjoni 1999/468/KE. Kif dan ir-Regolament qed jiġi
emendat, dawn il-poteri għandhom jiġu allinjati b'konformità
mal-Artikoli 290 u 291 tat-TFUE. L-allinjament fil-proposta tkun sar
b'konformità mad-dispożizzjonijiet tal-Fehim Komuni dwar l-Atti Ddelegati
bejn il-Parlament Ewropew, il-Kunsill u l-Kummissjoni u r-Regolament (UE)
Nru 182/2011 li jistabbilixxi r-regoli u l-prinċipji ġenerali
dwar il-mekkaniżmi għal kontroll mill-Istati Membri
tal-eżerċizzju mill-Kummissjoni tas-setgħat ta’ implimentazzjoni.
Il-proposta hija soġġetta
għall-Ftehim WTO-ABT u għalhekk soġġetta għal notifika
lid-WTO. 2012/0250 (COD) Proposta għal REGOLAMENT TAL-PARLAMENT EWROPEW U
TAL-KUNSILL li jemenda r-Regolament tal-Kunsill (KE) Nru 111/2005
jistabblixxi regoli għall-monitoraġġ tal-kummerċ
tal-prekursuri tad-droga bejn il-Komunità u pajjiżi terzi. (Test b'rilevanza għaż-ŻEE) IL-PARLAMENT EWROPEW U L-KUNSILL
TAL-UNJONI EWROPEA, Wara li kkunsidraw t-Trattat dwar
il-Funzjonament tal-Unjoni Ewropea, u b’mod partikolari l-Artikolu 207
tiegħu, Wara li kkunsidraw il-proposta tal-Kummissjoni
Ewropea, Wara t-trażmissjoni tal-abbozz tal-att
leġiżlattiv lill-Parlamenti nazzjonali, Wara li kkonsultaw lill-Kontrollur Ewropew
għall-Protezzjoni tad-Dejta[4], Filwaqt li jaġixxu skont
il-proċedura leġiżlattiva ordinarja, Billi: (1) Skont l-Artikolu 32
tar-Regolament tal-Kunsill (KE) Nru 111/2005
tat-22 ta' Diċembru 2004 li jistabbilixxi regoli
għall-monitoraġġ tal-kummerċ bejn il-Komunità u
pajjiżi terzi fil-prekursuri tad-droga[5], fis-7 ta’ Jannar 2010
il-Kummissjoni ppreżentat rapport lill-Kunsill u lill-Parlament Ewropew
dwar l-implimentazzjoni u t-tħaddim tal-leġiżlazzjoni
Komunitarja dwar il-monitoraġġ u l-kontroll tal-kummerċ
tal-prekursuri tad-drogi[6]. (2) Ir-rapport tal-Kummissjoni
indika li, fis-sistema ta' kontroll attwali tal-Unjoni għall-prekursuri
tad-drogi, prodotti mediċinali li fihom l-efedrina u l-psewdoefedrina, li
l-kummerċ tagħhom ma kienx ikkontrollat, kienu ddevjati lejn
il-manifattura illeċita tad-droga barra mill-Unjoni, bħala sostitut
għall-efedrina u l-psewdoefedrina li huma kkontrollati internazzjonalment.
Il-Kummissjoni għaldaqstant irrakkomandat it-tisħiħ tal-kontroll
tal-kummerċ internazzjonali fi prodotti mediċinali li fihom
l-efedrina jew il-psewdofedrina esportati minn jew jgħaddu minn territorju
doganali tal-Unjoni li jkunu ddevjati għall-manifattura illegali ta’drogi. (3) Fil-konklużjonijiet
tiegħu dwar il-funzjonament u l-implimentazzjoni tal-leġiżlazzjoni
tal-Unjoni dwar il-prekursuri tad-droga tal-25 ta’ Mejju 2010,
il-Kunsill tal-Unjoni Ewropea stieden lill-Kummissjoni biex tagħmel
proposta biex jiġi emendat ir-Regolament tal-Kunsill (KE)
Nru 111/2005 f 'dan is-sens. (4) Huwa importanti li d-definizzjoni
ta' sustanzi skedati tiġi ċċarata: it-terminu 'preparazzjoni
farmaċewtika' li joħroġ mill-Konvenzjoni tan-Nazzjonijiet Uniti
kontra t-Traffikar Illeċitu fi Drogi Narkotiċi u Sustanzi
Psikotropiċi adottata fi Vjenna
fid-19 ta' Diċembru 1988, (minn hawn 'il quddiem
imsejħa l-"Konvenzjoni tan-Nazzjonijiet Uniti") għandu
jiġi sostitwit mit-terminoloġija rilevanti
tal-leġiżlazzjoni tal-Unjoni, 'prodotti mediċinali', u t-terminu
‘preparazzjonijiet oħrajn' għandu jitħassar peress li jidduplika
t-terminu 'taħlitiet' li diġà jintuża fid-definizzjoni. (5) Regoli dwar is-sospensjoni
jew it-tħassir ta’ reġistrazzjoni għandhom jiġu introdotti
sabiex jallinjaw ir-regoli eżistenti għas-sospensjoni jew ir-revoka
ta’ liċenzja. (6) Prodotti mediċinali li
fihom l-efedrina jew il-psewdofedrina għandhom għalhekk jiġu
kkontrollati mingħajr ma jfixklu l-kummerċ leġittimu
tagħhom. (7) Għal dan il-għan,
kull esportazzjoni ta' prodotti mediċinali li fihom l-efedrina jew
il-psewdofedrina għandha tkun ippreċeduta minn notifika ta'
pre-esportazzjoni mibgħuta mill-awtoritajiet kompetenti fl-Unjoni
lill-awtoritajiet kompetenti tal-pajjiż ta’ destinazzjoni. (8) L-awtoritajiet kompetenti
tal-Istati Membri għandhom jingħataw il-poteri li jwaqqfu jew
jissekwestraw dawk il-prodotti meta jkun hemm raġunijiet tajba fuq suspett
li jkunu intiżi għall-manifattura tad-drogi illeċiti, meta jkunu
esportati, impurtati jew fi tranżitu. (9) Bl-għan li l-Istati
Membri jkunu jistgħu jirreaġixxu aktar malajr fir-rigward tax-xejriet
emerġenti ġodda tad-dirottament tal-prekursuri tad-drogi,
l-possibilitajiet tagħhom biex jaġixxu f’każijiet ta’
tranżazzjonijiet suspettużi li jinvolvu sustanzi mhux skedati
għandhom jiġu ċċarati. (10) Għandha tintuża
Bażi tad-Dejta Ewropea dwar il-prekursuri tad-droga biex jiġi
ssimplifikat l-irrappurtar mill-Istati Membri rigward is-sekwestri u l-kunsinni
bil-baħar, biex jinħoloq reġistru Ewropew tal-operaturi li huma
detenturi ta' liċenzja jew reġistrazzjoni, li tiffaċilita
l-verifika tal-leġittimità ta’ tranżazzjonijiet tagħhom li jkunu
jinvolvu sustanzi skedati, u biex jippermettu lill-operaturi jipprovdu
lill-awtoritajiet kompetenti b'informazzjoni dwar it-tranżazzjonijiet
legali tagħhom li jkunu jinvolvu sustanzi skedati. (11) Ir-Regolament (KE)
Nru 111/2005 jipprevedi l-ipproċessar tad-dejta. Dan
l-ipproċessar tad-dejta jista' jkopri wkoll id-dejta personali li
għandha ssir b’konformità mal-Liġi tal-Unjoni. (12) Ir-Regolament (KE)
Nru 111/2005 jagħti poteri lill-Kummissjoni sabiex timplimenta xi
wħud mid-dispożizzjonijiet tiegħu, biex jiġu
eżerċitati skont il-proċeduri stabbiliti fid-Deċiżjoni
tal-Kunsill 1999/468/KE tat-28 ta' Ġunju 1999 li
tistabbilixxi l-proċeduri għall-eżerċizzju tas-setgħat
tal-implimentazzjoni konferiti fuq il-Kummissjoni[7], kif
emendata bid-Deċiżjoni tal-Kunsill 2006/512/KE[8]. (13) Bħala konsegwenza
tad-dħul fis-seħħ tat-Trattat ta’ Lisbona, dawk is-setgħat
għandhom jiġu allinjati mal-Artikoli 290 u 291 tat-Trattat
dwar il-Funzjonament tal-Unjoni Ewropea (it-Trattat). (14) Sabiex jintlaħqu
l-għanijiet tar-Regolament (KE) Nru 111/2005, il-poter li jiġu
adottati atti skont l-Artikolu 290 tat-Trattat dwar il-Funzjonament
tal-Unjoni Ewropea għandu jiġi ddelegat lill-Kummissjoni sabiex
tistabbilixxi dispożizzjonijiet li jiddeterminaw każijiet fejn
m'hemmx bżonn ta' liċenzja u tistabbilixxi aktar kundizzjonijiet
għall-għoti ta' liċenzji, tistabbilixxi l-kundizzjonijiet
għal eżenzjonijiet mill-kontrolli ta' ċerti kategoriji ta'
operaturi u tal-operaturi involuti fl-esportazzjoni ta' kwantitajiet żgħar
ta' sustanzi skedati elenkati fil-Kategorija 3, tistabbilixxi l-kriterji
sabiex tiddetermina kif tista' tingħata prova tal-għanijiet
leċiti tat-tranżazzjoni, tiddetermina l-informazzjoni li hija
meħtieġa mill-awtoritajiet kompetenti biex jissorveljaw
l-esportazzjoni, l-importazzjoni jew l-attivitajiet intermedjarji
tal-operaturi, tiddetermina l-pajjiżi tad-destinazzjoni li
l-esportazzjonijiet lejhom ta’ sustanzi skedati tal-Kategorija 2 u 3 tal-Anness
għandha tiġi preċeduta minn notifika ta' pre-esportazzjoni,
tiddetermina proċeduri ta' pre-esportazzjoni ssimplifikati u tistabbilixxi
l-kriterji komuni tagħhom, tiddetermina l-pajjiżi ta' destinazzjoni
li lejhom l-esportazzjonijiet ta’ sustanzi skedati elenkati fil-Kategorija 3
tal-Anness għandhom ikunu suġġetti għal awtorizzazzjoni
għall-esportazzjoni, tiddetermina proċeduri ta' awtorizzazzjoni ta'
esportazzjoni ssimplifikati u tistabbilixxi l-kriterji komuni tagħhom, u
tintroduċi sustanzi addizzjonali fl-Anness għal dan ir-Regolament,
kif ukoll emendi oħra meħtieġa biex twieġeb għal
xejriet ġodda tad-dirottament tal-prekursuri tad-droga. Huwa ta’
importanza partikolari li l-Kummissjoni twettaq konsultazzjonijiet xierqa matul
ix-xogħol preparatorju tagħha, inkluż fuq il-livell ta’ esperti.
(15) Il-Kummissjoni, meta
tħejji u tfassal l-atti ddelegati, għandha tiżgura
trażmissjoni simultanja, f’waqtha u xierqa tad-dokumenti rilevanti
lill-Parlament Ewropew u lill-Kunsill. (16) Sabiex ikunu żgurati
kondizzjonijiet uniformi għall-implimentazzjoni tar-Regolament (KE)
Nru 111/2005, għandhom ikunu kkonferiti setgħat ta’
implimentazzjoni lill-Kummissjoni, jiġifieri li tistabbilixxi mudell
għal-liċenzji. Dawn is-setgħat għandhom jitħaddmu
b'konformità mar-Regolament (UE) Nru 182/2011 tal-Parlament Ewropew u
tal-Kunsill tas-16 ta' Frar 2011 li jistabbilixxi r-regoli u
l-prinċipji ġenerali dwar il-mekkaniżmi ta' kontroll mill-Istati
Membri tat-tħaddim mill-Kummissjoni tas-setgħat ta' implimentazzjoni[9]. (17) Billi dan ir-Regolament huwa
bbażat fuq il-politika kummerċjali komuni, il-proċedura ta'
eżaminazzjoni għandha tintuża għall-adozzjoni tal-atti ta’
implimentazzjoni. (18) Ir-Regolment (KE)
Nru 111/2005 għandu għaldaqstant jiġi emendat skont dan, ADOTTAW DAN IR-REGOLAMENT: Artikolu 1 Ir-Regolament (KE) Nru 111/2005 huwa
emendat kif ġej: (1)
L-Artikolu 2 huwa emendat kif ġej: (a) il-punt (a) huwa sostitwit b’dan li
ġej: "(a) 'sustanza skedata' tfisser
kwalunkwe sustanza li tintuża għall-manifattura illeċita ta’
drogi narkotiċi jew sustanzi psikotropiċi u elenkata fl-Anness,
inklużi taħlitiet u prodotti naturali li fihom tali sustanzi. Dan
jeskludi prodotti naturali u taħlitiet li fihom sustanzi skedati u li huma
magħmula b'tali mod li sustanzi skedati ma jkunux jistgħu
jintużaw jew jiġu estratti permezz ta' mezzi faċilment applikabbli
jew ekonomikament vijabbli u prodotti mediċinali fit-tifsira
tal-Artikolu 1(2) tad-Direttiva 2001/83/KE tal-Parlament Ewropew u
tal-Kunsill[10];" (b) il-punt (j) jitħassar. (2)
L-Artikolu 6 huwa emendat kif ġej: (a) fil-paragrafu 1, it-tielet subparagrafu
huwa sostitwit b’dan li ġej: "Il-Kummissjoni tingħata
s-setgħa li tadotta atti ddelegati b'konformità mal-Artikolu 30b li
tistabbilixxi dispożizzjonijiet għad-determinazzjoni ta'
każijiet fejn m'hemmx bżonn ta' liċenzja u li tistabbilixxi
aktar kundizzjonijiet għall-għoti tal-liċenzji." (b) għandhom jiżdiedu
l-paragrafi 3 u 4 li ġejjin: "3. Il-Kummissjoni tistabbilixxi
mudell għal liċenzji permezz ta’ atti ta’ implimentazzjoni. Dawk
l-atti ta’ implimentazzjoni għandhom jiġu adottati skont
il-proċedura ta’ eżami msemmija fl-Artikolu 30(2). 4. L-atti ddelegati msemmija
fit-tielet subparagrafu tal-paragrafu 1 u l-atti ta' implimentazzjoni msemmija
fil-paragrafu 3 jiggarantixxu kontroll u monitoraġġ sistematiku u
konsistenti tal-operaturi. " (3)
L-Artikolu 7 huwa emendat kif ġej: (a) fil-paragrafu 1 jiżdied
is-subparagrafu li ġej: "Meta jiġi kkunsidrat jekk
tingħatax reġistrazzjoni, l-awtorità kompetenti tieħu in
kunsiderazzjoni l-kompetenza u l-integrità tal-applikant." (b) il-paragrafu 2 huwa sostitwit
b’dan li ġej: "2. Il-Kummissjoni tingħata
s-setgħa li tadotta atti ddelegati b'konformità mal-Artikolu 30b biex
tistabbilixxi l-kundizzjonijiet għall-eżenzjoni mill-kontrolli ta'
ċerti kategoriji ta' operaturi u tal-operaturi involuti fl-esportazzjoni
ta' kwantitajiet żgħar ta' sustanzi skedati elenkati fil-Kategorija
3, filwaqt li jiġi żgurat li r-riskju ta' dirottament ta' sustanzi
skedati jiġi minimizzat." (c) Jiżdied il-paragrafu 3 li
ġej: "3. Il-liċenzja tista' tkun
sospiża jew rivokata mill-awtoritajiet kompetenti kull meta
l-kundizzjonijiet li taħthom tkun inħarġet
ir-reġistrazzjoni ma jiġux aktar sodisfatti jew fejn hemm
raġunijiet tajba biex ikun suspettat li hemm riskju ta' dirottament ta'
sustanzi klassifikati." (4)
Fl-Artikolu 8, il-paragrafu 2 huwa
sostitwit b'dan li ġej: "2. Il-Kummissjoni tingħata s-setgħa li tadotta atti
ddelegati b'konformità mal-Artikolu 30b li tistabbilixxi l-kriterji sabiex
tiddetermina kif tista' tingġata prova tal-għanijiet leċiti
tat-tranżazzjoni, sabiex ikun żgurat li l-movimenti kollha ta'
sustanzi skedati fit-territorju doganali tal-Unjoni jistgħu jiġu
ssorveljati mill-awtoritajiet kompetenti u r-riskju ta’ dirottament jiġi
minimizzat." (5)
Fl-Artikolu 9, (a) Li ġej jiżdied fl-aħħar
tal-paragrafu 1: "Għal
dan il-għan, l-operaturi jipprovdu kull informazzjoni disponibbli li
tippermetti lill-awtoritajiet kompetenti jivverifikaw il-leġittimità ta’
ordni jew tranżazzjoni rilevanti, bħal: - l-isem
tas-sustanza skedata; - il-kwantità u
l-piż tas-sustanza skedata; kif ukoll - l-ismijiet u l-indirizzi
tal-esportatur, l-importatur, id-destinatarju finali u, fejn applikabbli,
il-persuna involuta fl-attivitajiet intermedjarji. Din
l-informazzjoni se tintuża biss għall-finijiet ta' prevenzjoni
tad-dirottament ta' sustanzi skedati. " (b) Il-paragrafu 2 huwa sostitwit
b’dan li ġej: "2. L-operaturi jipprovdu informazzjoni dwar
l-esportazzjoni, l-importazzjoni jew l-attivitajiet intrermedjarji tagħhom
f'forma sommarja lill-awtoritajiet kompetenti. Il-Kummissjoni tingħata s-setgħa li
tadotta atti ddelegati b'konformità mal-Artikolu 30b biex tiddetermina
l-informazzjoni li hija meħtieġa mill-awtoritajiet kompetenti sabiex
dawn ikunu jistgħu jissorveljaw dawk l-attivitajiet, inklużi regoli
dwar kif wieħed jipprovdi din l-informazzjoni f’forma elettronika
għal bażi ta' dejta Ewropea, fejn xieraq." (6)
L-Artikolu 11 huwa emendat kif ġej: (a) fil-paragrafu 1, l-ewwel
subparagrafu huwa sostitwit b’dan li ġej: "1. Qabel l-esportazzjonijiet
kollha tas-sustanzi skedati mniżżla fil-Kategorija 1 tal-Anness
u l-esportazzjonijiet ta' sustanzi klassifikati fil-Kategoriji 2 u 3 tal-Anness
għal ċerti pajjiżi ta' destinazzjoni, għandha ssir notifika
ta' pre-esportazzjoni mibgħuta mill-awtoritajiet kompetenti fl-Unjoni
lill-awtoritajiet kompetenti tal-pajjiż ta' destinazzjoni, b'konformità
mal-Artikolu 12(10) tal-Konvenzjoni tan-Nazzjonijiet Uniti. Il-Kummissjoni
tingħata s-setgħa li tadotta atti ddelegati b'konformità
mal-Artikolu 30b li tiddetermina l-lista tal-pajjiżi destinatarji
sabiex jiġi minimizzat ir-riskju ta' dirottament ta' sustanzi skedati u
prodotti mediċinali li fihom l-efedrina jew il-psewdofedrina, billi
tiżgura monitoraġġ sistematiku u konsistenti
tal-esportazzjonijiet ta’ ċerti sustanzi u prodotti lejn dawk
il-pajjiżi.” (b) il-paragrafu 3 huwa sostitwit
b’dan li ġej: "3. Proċeduri ssimplifikati
tan-notifika ta' pre-esportazzjoni jistgħu jiġu applikati
mill-awtoritajiet kompetenti fejn huma sodisfatti li dan mhu ser
jirriżulta f'ebda riskju ta' dirottament ta' sustanzi skedati u ta'
prodotti mediċinali li fihom l-efedrina u l-psewdoefedrina. Il-Kummissjoni tingħata s-setgħa
li tadotta atti ddelegati b'konformità mal-Artikolu 30b biex tiddetermina
tali proċeduri u tistabbilixxi l-kriterji komuni li għandhom
jiġu applikati mill-awtoritajiet kompetenti." (7)
Fl-Artikolu 12(1), it-tielet subparagrafu huwa
sostitwit b’dan li ġej: "Madankollu, l-esportazzjonijiet ta’
sustanzi skedati elenkati fil-Kategorija 3 tal-Anness ikunu
suġġetti biss għal awtorizzazzjoni għall-esportazzjoni fejn
notifiki ta' pre-esportazzjoni huma meħtieġa, jew fejn dawk
is-sustanzi jiġu esportati lejn ċerti pajjiżi ta' destinazzjoni. Il-Kummissjoni tingħata
s-setgħa li tadotta atti ddelegati b'konformità mal-Artikolu 30b biex
tiġi stabbilita l-lista ta' dawn il-pajjiżi ta' destinazzjoni sabiex
jiġi żgurat livell xieraq ta’ kontroll." (8)
L-Artikolu 19 huwa sostitwit b’dan li
ġej: “Artikolu
19 Proċeduri ssimplifikati biex
tingħata awtorizzazzjoni ta' esportazzjoni jistgħu jiġu
applikati mill-awtoritajiet kompetenti meta huma sodisfatti li dan mhux ser
jirriżulta f’xi riskju ta' dirottament ta' sustanzi klassifikati. Il-Kummissjoni tingħata s-setgħa
li tadotta atti ddelegati b'konformità mal-Artikolu 30b biex tiddetermina
tali proċeduri u tistabbilixxi l-kriterji komuni li għandhom
jiġu applikati mill-awtoritajiet kompetenti." (9)
L-Artikolu 26 huwa emendat kif ġej: (a) il-paragrafu 1 huwa sostitwit
b’dan li ġej: "1. Mingħajr ħsara
għad-dispożizzjonijiet tal-Artikoli 11 sa 25 u
tal-paragrafi 2 u 3 ta' dan l-Artikolu, l-awtoritajiet kompetenti ta' kull
Stat Membru jipprojbixxu l-introduzzjoni ta' sustanzi skedati, kif ukoll ta'
prodotti mediċinali li fihom l-efedrina u l-pswedoefedrina, fit-territorju
doganali tal-Unjoni jew it-tluq tagħhom minnu, jekk hemm raġunijiet
tajba biex ikun suspettat li s-sustanzi u l-prodotti huma maħsuba
għall-manifattura illeċita ta' drogi narkotiċi jew ta' sustanzi
psikotropiċi." (b) jiżdied il-paragrafu 3a
li ġej: "3a. Kull Stat Membru jista' jadotta
l-miżuri meħtieġa biex l-awtoritajiet kompetenti jkunu
f'pożizzjoni li jikkontrollaw u jimmonitorjaw tranżazzjonijiet
suspettużi ta' sustanzi mhux skedati, b'mod partikolari: (a) biex jakkwistaw informazzjoni
rigward kwalunkwe ordnijiet għal sustanzi mhux skedati jew operazzjonijiet
li jinvolvuhom; (b) biex jidħlu fil-bini
tan-negozju tal-operaturi sabiex jiksbu evidenza ta' tranżazzjonijiet
suspettużi ta' sustanzi mhux skedati." (10)
L-Artikolu 28 huwa sostitwit b’dan li
ġej: “Artikolu
28 Minbarra l-miżuri msemmija
fl-Artikolu 26, il-Kummmissjoni tingħata s-setgħa li
tistabbilixxi, fejn meħtieġ, permezz ta' atti ta' implimentazzjoni,
miżuri biex tiżgura l-monitoraġġ effettiv ta' kummerċ
bejn l-Unjoni u pajjiżi terzi fi prekursuri ta' drogi bil-għan li
jipprevjenu d-dirottament ta' tali sustanzi, b'mod partikulari fir-rigward
tad-disinn u l-użu ta' formoli għall-awtorizzazzjoni
tal-esportazzjoni u l-importazzjoni. Dawk l-atti ta’ implimentazzjoni
għandhom jiġu adottati skont il-proċedura ta’ eżami
msemmija fl-Artikolu 30(2)." (11)
L-Artikolu 29 għandu jitħassar. (12)
L-Artikolu 30 huwa sostitwit b’dan li ġej: “Artikolu
30 1. Il-Kummissjoni tiġi assistita
mill-Kumitat tal-Prekursuri ta' Drogi (minn issa 'l quddiem imsejjaħ
il-Kumitat”). Dak il-kumitat għandu jkun kumitat skont it-tifsira
tar-Regolament (UE) Nru 182/2011. 2. Meta ssir referenza għal dan
il-paragrafu, japplika l-Artikolu 5 tar-Regolament (UE)
Nru 182/2011." (13)
Jiddaħħlu l-Artikoli 30a u 30b li
ġejjin: "Artikolu
30a Il-Kummissjoni
tingħata s-setgħa li tadotta atti ddelegati b'konformità
mal-Artikolu 30b sabiex tadatta l-Anness għal xejriet ġodda fid-dirottament
tal-prekursuri tad-drogi, b’mod partikolari s-sustanzi li jistgħu
faċilment jiġu ttrasformati f'sustanzi skedati, u li jiġi wara
emenda għat-tabelli fl-Anness mal-Konvenzjoni tan-Nazzjonijiet Uniti. Artikolu 30b 1. Is-setgħa ta’ adozzjoni ta’
atti delegati hija mogħtija lill-Kummissjoni suġġett
għall-kundizzjonijiet stabbiliti f’dan l-Artikolu. 2. Id-delega ta’ setgħa msemmija
fl-Artikoli 6 (3) it-tielet subparagrafu, 7(2), 8(2), 9(2), 11(1) u (3),
12(1), 19, 28 u 30a tingħata għal perjodu mhux determinat minn [OPOCE,
daħħal id-data tad-dħul fis-seħħ ta' dan ir-Regolament
ta' emenda] 3. Id-delega tas-setgħat
imsemmija fl-Artikoli 6(3) it-tielet subparagrafu, 7(2), 8(2), 9(2), 11(1)
u (3), 12(1), (19), 28 u 30a tista’ tiġi rrevokata fi kwalunkwe ħin
mill-Parlament Ewropew jew mill-Kunsill. Deċiżjoni ta’ revoka ttemm
id-delega ta’ setgħa speċifikata f’dik id-deċiżjoni. Din
tidħol fis-seħħ fil-jum ta’ wara l-pubblikazzjoni
tad-Deċiżjoni f’Il-Ġurnal Uffiċjali tal-Unjoni Ewropea
jew f’data iktar tard speċifikata fiha. Ma taffettwa l-validità tal-ebda
att delegat diġà fis-seħħ. 4. Malli tadotta att delegat,
il-Kummissjoni tinnotifika dan simultanjament lill-Parlament Ewropew u
lill-Kunsill. 5. Att iddelegat adottat skont
l-Artikoli 6(3) it-tielet subparagrafu, 7(2), 8(2), 9(2), 11(1) u (3),
12(1), (19), 28 u 30a jidħol fis-seħħ biss jekk ma tiġi
espressa l-ebda oġġezzjoni mill-Parlament Ewropew jew mill-Kunsill fi
żmien xahrejn min-notifika ta’ dak l-att lill-Parlament Ewropew u
lill-Kunsill jew jekk, qabel ma jiskadi dak il-perjodu, il-Parlament Ewropew u
l-Kunsill ikunu t-tnejn informaw lill-Kummissjoni li mhumiex se
joġġezzjonaw. Dak il-perjodu jiġi estiż b'xahrejn fuq
l-inizjattiva tal-Parlament Ewropew jew tal-Kunsill." (14)
Fl-Artikolu 32, it-tielet subparagrafu
jinbidel b'dan li ġej: "Il-Kummissjoni tevalwa
l-implimentazzjoni u t-tħaddim tal-Artikoli 11 u 26 sakemm dawn
jikkonċernaw prodotti mediċinali li fihom l-efedrina jew
il-psewdofedrina u l-Artikolu 30a sa [OPOCE, daħħal id-data 5
snin wara d-dħul fis-seħħ ta' dan ir-Regolament ta' emenda]". (15)
L-Artikolu 32a li ġej huwa inserit: "Artikolu 32a Bażi ta' dejta Il-Kummissjoni
tuża Bażi ta' dejta Ewropea dwar il-prekursuri tad-droga, kif
stabbilit bir-Regolament (KE) Nru 273/2004 tal-Parlament Ewropew u tal-Kunsill[11], li
għandha l-funzjonijiet li ġejjin: (a)
tiffaċilita l-komunikazzjoni tal-informazzjoni
skont l-Artikolu 32 l-ewwel subparagrafu, kif ukoll
ir-rappurtaġġ lill-Bord Internazzjonali ta' Kontroll
tan-Narkotiċi skont Artikolu 32 it-tieni subparagrafu; (b)
tiġġestjona reġistru Ewropew
tal-operaturi, li ngħataw liċenzja skont l-Artikolu 6(1) jew
reġistrazzjoni skont l-Artikolu 7(1); (c)
tgħin lill-operaturi biex jipprovdu
lill-awtoritajiet kompetenti informazzjoni dwar l-esportazzjoni,
l-importazzjonijew attivitajiet intermedjarji tagħhom skont
l-Artikolu 9(2)." (16)
L-Artikolu 33 huwa sostitwit b’dan li
ġej: "Dispożizzjonijiet ta’
protezzjoni tad-dejta 1. L-ipproċessar ta' dejta
personali mill-awtoritajiet kompetenti tal-Istati Membri għandu jsir
b'konformità mad-Direttiva 95/46/KE u taħt is-superviżjoni
tal-awtorità pubblika indipendenti tal-Istat Membru msemmi fl-Artikolu 28
ta' din id-Direttiva. 2. L-ipproċessar tad-dejta
personali mill-Kummissjoni, inkluż għall-għan tal-Bażi ta'
dejta Ewropea msemmija fl-Artikolu 32a, għandu jitwettaq skont
ir-Regolament (KE) Nru 45/2001 u taħt is-superviżjoni
tal-Kontrollur Ewropew għall-Protezzjoni tad-Dejta." Artikolu 2 Dan ir-Regolament jidħol
fis-seħħ fl-għoxrin jum wara l-pubblikazzjoni tiegħu f’Il-Ġurnal
Uffiċjali tal-Unjoni Ewropea. Dan ir-Regolament jorbot fl-intier
tiegħu u japplika direttament fl-Istati Membri kollha. Magħmul fi Brussell, 27.9.2012 Għall-Parlament Ewropew Ghall-Kunsill Il-President Il-President ANNESS [1] Il-metamfetamina
hija droga sintetika li tappartjeni għall-grupp tal-amfetamini.. Din
id-droga timmanipula ċ-ċentri tal-pjaċir tal-moħħ u
tista' tkun aktar b’saħħitha mill-kokaina u normalment ikollha effett
iktar fit-tul. Meħuda bħala pilloli, impejpa, miġbuda man-nifs
jew injettata, hija partikolarment attraenti
għaż-żgħażagħ għaliex tipproduċi sens
ta' ħafna enerġija, ir-reħi tal-inibizzjonijiet soċjali u
sensazzjonijiet ta' intelliġenza, kompetenza u qawwa. L-effetti
fiżiċi u psikoloġiċi (sensazzjonijiet ta' ansjetà,
iperstimulazzjoni u paranojja) jseħħu malajr. [2] Fl-2007,
8mt minn dawn il-prekursuri ġew sekwestrati li minnhom kważi 4% kienu
fil-forma ta' prodotti mediċinali; fl-2008 3,5mt li 51% kienu fil-forma
ta' prodotti mediċinali; fl-2009 1,4mt li 43% kienu fil-forma ta' prodotti
mediċinali; fl-2010 2,9mt li minnhom 3% kienu fil-forma ta' prodotti
mediċinali. Dawn is-sekwestri saru fuq il-bażi
tal-leġiżlazzjoni nazzjonali. [3] Fuq naħa waħda, is-suġġett innifsu, il-prekursuri
tad-droga, mhuwiex magħruf ħafna u kien x'aktarx jinvolvi
tweġibiet dwar is-sitwazzjoni globali tal-problema tad-droga, li kien ikun
irrilevanti għal dan l-eżerċizzju. Min-naħa l-oħra, l-problema involuta u l-għażliet
previsti jaffettwaw biss aspett speċifiku ħafna tal-kontroll
tal-prekursuri tad-drogi. [4] ĠU
C , , p. . [5] ĠU L
22, 26.1.2005, p. 1. [6] Rapport
mill-Kummissjoni lill-Kunsill u lill-Parlament Ewropew skont l-Artikolu 16
tar-Regolament (KE) Nru 273/2004 tal-Parlament Ewropew u tal-Kunsill
tal-11 ta' Frar 2004 u l-Artikolu 32 tar-Regolament
tal-Kunsill (KE) Nru 111/2005 dwar l-implimentazzjoni u t-tħaddim
tal-leġiżlazzjoni Komunitarja dwar il-monitoraġġ u
l-kontroll tal-kummerċ tal-prekursuri tad-drogi COM(2009)709 finali. [7] ĠU L 200, 22.7.2006, p. 11. [8] ĠU L 184, 17.7.1999, p. 23. [9] ĠU L 55, 28.2.2011, p. 13. [10] ĠU L
311, 28.11.2001, p. 67. [11] ĠU L 86, 24.3.2004, p. 21